Понеже убо Божественною помощію обличихомъ уже, еже на Спаса Христа, іудейское бјсованіе, пріиди прочее, о душе, обратимъ себе противу еллинскому зломудрію и дерзноглаголанію; не меньше бо іудеевъ стрјляютъ хуленіи велію нашу христіянскую вјру. Ихъже аще кто вопроситъ: чесо ради, о мужіе, толь зјло ненавидите всечестную вјру христіянскую и поругаетеся ей выну поруганіи, оплеваніи, досадою, яже по ланитј, крестомъ и безчестною смертію, поругающеся намъ, поношаютъ, аки являющимъ множайшу немощь Бога нашего. Окаянніи воистину и несмысленніи, ниже бо разумјютъ, яко имиже тщатся угасити славу Его Божественную и всјми царствующую державу, сими паче и, не хотяще, являютъ Его всјхъ Царя единаго и всесильна и премудра Бога. Аще сицевыя: страсти и безчестную смерть претерпјвъ, якоже они глаголютъ, велеславныхъ боговъ гордость и дерзость и еже по всей земли служеніе и волховныя храмы ихъ возможе скоро отвсюду до конца истребити не множество(мъ) воевъ, ниже храборники, оружники, ниже съ небесе молнеными стрјлами; по кроткими словесы и гладкими поученіи всјхъ отъ мрачныя прелести истуканныхъ преложи на непрелесный свјтъ своего благовјрія, не славу на земли, ни пища наслажденіе, ниже ино что отъ красныхъ житія сего објщавая имъ, наипаче же супротивна обрящеши Его предвозвјщающимъ скорбь и всяческихъ лютыхъ множество, почесть же оныхъ и воздарованіе Вышняго Божественное царство, егоже ради безчисленна множества всяческихъ человјковъ во всей земли ища и обрящеши всјхъ вкупј, ихъже стяжаху отрекшимся, либо въ пустыняхъ скончавшимъ житія сего теченіе предобрј, или огнемъ и мечемъ и многими мученіи мучившихся оставити свјтъ солнечный. Кто же отъ вјка Богъ вашь, или силенъ царь, ли риторъ и премудръ законоположникъ таково коли возможе содјяти хоти во своихъ единоплемянныхъ и увјщевати ихъ нерадити всјхъ вкупј красныхъ міра сего и на самую смерть дерзати и веселитися въ скорбехъ яже о благовјріи? Ни единаго, много трудився, обрящеши; отнюдь невозможна сицевая человјчестјй силј и премудрости. А распеньшемуся скоро и премудрјйшіе малыми и ненаучеными мужи совершишася сія по всей земли и, еже есть велію удивленію достойно, яко мучители и суровјйшими гонители всюду гонима лютј, такожде и безчисленными треволненіи ересей обуреваема и навјтуема, вјра наша пребываетъ неколеблема, равнј высочайшу камени и недвижимјй горј, гонившимъ враждебнјйше, богомерскимъ злјйше истребившимся отъ житія сего. Аще убо истинною рачитель еси священныя премудрости и упремудрился еси твердымъ и трезвеннымъ умомъ, аще ни единая кая иная богодохновенная рјчь увјщеваетъ тя отступити, имъже недугуеши, злочестиваго пренія поне [2] отъ побјжденія и всеконечныя погибели глаголетиыхъ тобою великихъ лжебожныхъ боговъ и отъ напраснаго [3] преложенія языкъ отъ куміръ на еже по Христј святое благовјріе, познавай силу непобјдимую распеньшагося и сложи всяко безумное прјніе, цјломудренный же умъ воспріимъ, не вмјняй Христу поносъ [4] и стыдъ безчестныя оны страсти, но всепремудро умышленіе всеблагаго Бога, превосходяще всякаго ума и глаголъ человјчь. Оно же смышляяй благоразумно, яко аще смертію и толь безчестными страстьми, ихъ же волею изволилъ, толь велія и предивна боголјпна дјла скорјйше во всей земли содјла; явленъ бысть, яко возмоглъ бы убо, яко Богъ, и единымъ мановеніемъ содјяти сія скоро по всей земли. Аще бо на крестј стража, [5] всю землю поколеба и солнечный свјтъ въ среди дни во тьму глубоку преложи и каменіе расщеплялъ и древле погребенныя мертвеца воздвигнулъ; множае паче возмоглъ бы, яко Богъ, всесильнымъ божественнымъ мановеніемъ своимъ, преложити во свјтъ богосвјтлаго благовјрія мрачную мглу безбожія бјсовскихъ куміръ, и душа человјческая, горькимъ ядомъ злоначальнаго и душетлительнаго змія умерщвены, Духомъ Святымъ своимъ оживотворити, аки отъ гроба воставивъ я отъ зловјрія идольскаго, отъ нихъже убо по всей земли скоро зјло и боголјпнј малыми и ненаучеными мужи содјла, познавши Его всесильнаго Бога, не молніи жигательными, ни силою вооруженною, ниже льстительными мечтаніи и устрашенiи ужасительными, человјки ужасающа или нудяща, но священными кротостію и тихостію призывающе всјхъ къ свјту благовјрія своего. Благопокорно и беззлобиво пріимите спасительныя страсти Его, имъже образомъ и боляй цјльбы врачебныя иже аще и худа покажутся, не испытуетъ я многопытно, ниже паки отрјетъ я, хотяй здравія получити. Покажите убо и сами къ Богу толико послушаніе, еликоже и онъ къ земному врачу, и тогда уразумјете, елика есть крестовная [6] польза, яко зјло веселитъ и освјщаетъ вкупј души вјрующихъ и Вышняго показуетъ другы небошественны и насыщающася присно пребывающихъ благъ. Сила божественна и благодать вложися свыше въ немъ: овою убо да веселитъ и святитъ вкупј благовјрныхъ душя, овоюже да смјлыя творитъ къ непрестаннјй брани невидимыхъ врагъ; имъ же вооружившеся соборы пустынелюбцовъ преподобныхъ и пребезчисленныя полки мученическіе овы убо плоти взыграній вкупј и злокозненныхъ ловленій губительныхъ бјсовъ удобь отбјгоша и нынј на небесныхъ дворехъ водворяются вкупј со святыми духи, ихъже и житіе изволишя на земли, овы же, по благовјрію гонимому поборающе, и огнемъ и мечемъ и всяческими мученіи изнуряеми плотьми своими, не убояшася, но оплюнули всякія ярости невјрныхъ, кровію своею извјщающе всјмъ распеньшагося и изволивша тридневную смерть, присносущна тогоже и вышняго Бога быти и человјка совершенна. Тјмъже убо не безсилія знаменіе; но явленіе всемогущія Божія силы крестъ есть, якоже, и еже лјчити лютыя болезни худыми быліями, показаніе есть выше естественныя премудрости врачя. Аще же не препираешися сими, пребываеши же еще, отъ безумія безмјрнаго, ругаяся честнымъ нашимъ тайнамъ, ничтоже странно: не пріемлетъ бо, премудрое ученіе слыша, ненаученый, глаголетъ еже по васъ еллинское наказаніе, ниже научится коли ракъ прямо ходити, ниже муринъ убјлится, коли умываемь: сице убо ни мысль идодопоклонника, и беззаконными дјлы и гнусными похотьми веселящагося, неудобь николиже сложится благовјрнымъ и преправеднымъ закономъ и ученіемъ священнаго благочестія. Христіанскую вјру тјмъже познайте, о мужіе, и яже о вышнемъ всесвятая учительства цјломудренною честною мыслію тщитесь востязовати, всякаго ругательства отъ сердца своего изринувше; ничтоже бо отнюдь въ нихъ хульно, ниже нечисто, ниже поруганію и ненависти достойно обрящете. Не Зевсъ бјсяся похотію блудною и прелаганіемъ на лебедь и на высокопарный орелъ и на многоцјнное злато, яко да утаивъ ся, растлитъ чужія жены; или да восхититъ любимаго юношу виночерпца; ниже раждая отъ главы своея Палладу, отроковицу доброочитую, обоюду острою секирою ударенъ бысть по главј; ниже съ молніями сходя и Семелію [7] сожегъ и въ стегнј своемъ скры я младенца; ниже Фивъ [8] волосатъ, съ отрокомъ играя и любовника своего убивъ неволею дискомъ; ниже богини сварящася яблока дјля златаго; ниже Афродиты блудящи съ Ареемъ; [9] ниже боги между собою бои составляюща и копія другъ на друга мечуще; ниже ино что сицево богомерзко обрящеши отнюдь во всјхъ святыхъ учительствехъ христіянскихъ; но единъ убо Богъ во трехъ ѵпостасехъ поется въ нихъ, ни начала ни конца николиже имый, Вседержитель Господь содержай вся, и промысленникъ всјмъ своимъ созданіемъ, видимымъ же и невидимымъ; всепремудръ, преблагъ, прещедръ, всепречистъ, свјтъ, желаніе, животъ, и ненасыщаемое раченіе, ненавидя зјло нечестивыхъ, неправедныхъ лихоимцовъ, скверно живущихъ, гнусодјевъ и всјхъ гордыхъ, ихъже и преисподнимъ огнемъ безъ конца мучащимъ, и червьми присно изнуряющими осужаетъ. Хвалитъ же благовјрныхъ и всякія добродјтели рачителей, и наипаче прикланяющихся слезамъ убогихъ, ихъже за добродјтели ихъ воздаруя, по смерти являетъ ихъ своя небесныя гражданы, свјтомъ божественнымъ присно освјщаемыхъ велелјпно и веизреченныхъ Его благъ ихъ насыщаемыхъ, яже ни око видј коли, ниже ухо слыша, ни на сердце человјче не взыдоша, идјже божественная радость и веселіе и животъ нестарјющъ и познаніе ненасыщаемыя премудрости. Такова же не мы токмо, о мужіе, глаголемъ и мудрствуемъ, но и сами тіи первіи начальницы вашея премудрости, и о Самомъ всјхъ Господј и о праведнемъ и страшнемъ судј Его и адскихъ мученій и мудрствуютъ зјло и въ книги сочиниша, аще и не совершенно о тјхъ угадали; ни Богъ бо будетъ лишаемъ равносильныхъ Слова и Духа же и Себе единосущныхъ, якоже ни солнце теплоты и лучи кромј, и словесна душа ума и слова лишена. Якоже бо Единаго подобаетъ вјрити Его по существу, такожде и трегуба паки по ѵпостасехъ исповјдати Его нужно есть, ѵпостасьми убо раздјляема нераздјльнј, существомъ же паки соединяема не смјснј, раздјленію и соединенію обоимъ же превосходящимъ всякаго ума и слова человјча. Такоже и уповаемое по смерти блаженьство: ненагими душами пріяти я лјпо есть мудрствовати, ниже подъ землею на лузј цвјтущемъ, якоже баснословна Калліопія [10] глашаетъ, но якоже Самъ всјхъ Владыка повелј въ самехъ небесныхъ дворехъ и въ желаемемъ едемј, душамъ паки преславнј совокупляемымъ своими тјлесы, возставляемыми свјтлыми, нетленными, повелјніемъ Божіимъ, егда съ небесе сошедъ судити (имать) всјмъ вкупј человјкомъ. Къ симъ же крјпко вјрити сердцемъ подобаетъ, а устнама проповјдати дерзностно, яко всјхъ Владыка всемилостивый Господь, Иже всяческая единою Своею благостію отъ небытія въ бытіе приведј, ущедривъ бјдный родъ человјчь, погыбающь злј кумірскимъ прельщеніемъ и всякимъ злочестіемъ и бесчисленными беззаконіи гиблющь по подобію стаду безсловесныхъ скотъ, Единороднаго Сына Своего Бога Слова, равна Себј божественнымъ существомъ и неизсчетною силою посла на помощь бјднаго рода человјча, да яко оставитъ [11] ихъ всякаго богомерскаго злочестія, безбожныхъ идолъ, наставитъ на истинный разумъ и свјтъ благовјрія. Зјло бо подобаше неизсчетнјй Божіей благостыни не презрјти образа своего, но помогати ему, бјднј погибающу всякими льщеніи губительныхъ бјсовъ. Все бо, еже ни буди въ сущихъ, драгое и многоцјнно и пригодно въ снјдь въ сладости, въ украшеніи и въ лјкованіи болјзней на земли, въ мори, въ езерахъ, въ рјкахъ, и солнце и луну и звјзды, доброе раствореніе аеровъ и дождя въ земное умастеніе вся Своего почитая образа, преблагій человјколюбнј сотвори, всјми тјми возводя его на свою любовь и разумъ. Явлено убо отселј, яко зјло честное у Него стяжаніе, сложенный отъ персти и души. [12] Сего ради и завистію губительнаго и злокозненна бјса прельщенна бывша и безчисленными лестьми его въ конечное злочестіе поползнувша, не стерпј отнюдь, зря сего, сице бјднј погибаема, утробами же своими неизреченныхъ щедротъ и милости своея прекланяемъ отечески, оле Божія любви! устремися Самъ на взысканіе созданія своего, зракъ нашъ совершенно воспріимъ, въ немъже непорочно и святолјпно поживј и на злоначальнаго и губительнаго врага, яко человјкъ, въ пустыни побјду благокозненно вземъ, трищи искушенъ бывъ отъ него, треми первыми родители губительныхъ страстей, сирјчь лакомствомъ чревнымъ, славы же и златолюбленіемъ, имиже наипаче человјцы вси удобь уловляеми бываемъ. И своимъ ученикомъ предавъ таинства нелестнаго благочестія и богословія и боголјпнј законоположивъ законы совершеннјйшаго житія, въ нихъже вооружившеся, безъ труда низложатъ ратующаго всегда ихъ злокозненнаго змія. Вкусивъ же волею смерть, яко человјкъ, и затворенныя благовјрныя въ адј вкупј съ Собою божественною силою отъ мертвыхъ возставивъ; тјхъ же убо въ желаемъ введе едемъ. Самъ же на небо съ своею плотію возшедъ, побјдитель смерти и пленитель аду, седе одесную Отца на престолј славы своея, отнюдуже чаемъ есть судія пріити. Таково убо о мужіи, якоже вкратцј рещи, яже по насъ, христіанехъ, большая извјствјйша учительства же и мудрованія, списана убо не книжными и обычными реченіи, но истиною и силою свјтлјйша и солнца; источникъ бо сый милости и благости всјхъ Господъ и хотя всјмъ вкупј и премудрымъ и грубымъ равнј и нелестнј пріяти пользу на умј, сице плохо [13] написана сія быша мановеніемъ Божіимъ. Не уничижите убо плохое ихъ, аки не списано красоглаголаніемъ афинеянимъ, твердое же ихъ нелестное честное же и божественное, неложное же и премудрое, и праведное ихъ благоразумно познавше, прославите устрояющаго Господа вся человјколюбнј на пользу всякому человјку. Не еже бо изобиловати красными и преухищренными глаголаніи и пущати отъ языка своего сладкое вјщаніе или наизусть вјщати безчисленная реченія преславныхъ древнихъ мужъ; се ли есть премудрому совершенство? ни; сія бо вкупј со житіемъ симъ исчезаютъ внјзапу, равнј прочимъ скороувядаемымъ краснымъ, но еже богатјти вкупј сими и нелестную вјру до скончанія своего и честенъ нравъ имјти и житіе доброхвально, сирјчь цјломудріемъ и благозаконеніемъ украшаемо, кротостію же священною и смиреномудріемъ, се есть блаженство и совершенство треблаженное; се вјсть совокупити насъ самому крайнјйшему желанію; [14] егоже нјсть возможно инако получити, но точію горящего выну любовію священнаго благовјрія и притяжаніемъ честнаго житія и всякія добродјтели на вјрј чистј твердј водруженныхъ. Сію подтщитеся стяжати, о мужіе, отвергше всякія гордости, прибывшія въ мыслехъ вашихъ отъ еллинскаго ученія, емуже конецъ смерть некончаема и преисподняя. Аще бо и видится доброхитренно уставляюще о всякой добродјтели и доброчиніи нравомъ, но студодјяніи паки въ своихъ боговъ увјщеваетъ всякія злобы любити и навыкати и о отроцјхъ и о чужіихъ подружіихъ, якоже предрекохъ, являетъ ихъ бјсящихся, и о бранехъ и о боехъ, мужеубійствехъ же и лестехъ и винопитіи и пьнствехъ зјло веселящихся. Али не сицевыхъ студныхъ повјстей исполненіи суть, о мужіе, яже по васъ, книги преславныя ихъ же, аще кто красное ухищренное глаголаніе выскрбъ, далече ихъ вержеть, тина гнусна покажутся предивны книги первыхъ вашихъ премудрыхъ мужей. Такія же образы всякія злобы имјя, кто како изволитъ когда житіе цјломудренно и преподобно; истязующаго бо его, о нихъже злочестивнј поживе, никакоже чаетъ; таяждо бо веліи бози его содјявши воспјваются отъ всјхъ, иже у васъ премудрыхъ мужей, гордость точію излишнюю, яже по васъ премудрость, вјсть ражати въ душахъ слышателей своихъ и еже отъ человјкъ тщія [15] славы увјщеваетъ мнјти сему быти блаженному концу, и еже наслаждатися всякимъ образомъ искати. Хрисиппъ да вопіетъ и твой Епикуръ и вси по ряду, иже у васъ велехвальніи мужіи, красноглаголаніемъ единымъ священныя добродјтели воспјвше, являются своими писаніи, въ вихъже всяческо студодјянія содержится. Ового убо сами бывше бјснующе и рачители, яко и снјденнымъ бывшимъ нјкимъ ищущимъ то отъ сыроядцевъ псовъ; ового же и тщавшеся прекрасными списаніи вјдома сотворити послјднимъ родомъ. Окаяни воистину и несмыслении; зане же силу пресловутыя мудрости своея оставиша послјднимъ родомъ всякія злобы образъ. Лучше бы убо имъ было, аще безъ ученія отошли бы житія сего, нежели, многимъ научившися, наставникомъ быти ко всякой злобј всјмъ слушателемъ своимъ; своими бо выну писаніи вкупј съ собою пореваютъ бесчисленныхъ въ преисподнюю пропасть погибели. Добро, зјло добро, о мужіе, еже умудритися всякимъ разумомъ и вјдјніемъ и священною премудростію; но подобаетъ къ симъ обогатјти и правою вјрою и украшатися честнолјпными нравы не ко угожденію человјкомъ, ниже хвалы ради и тщія славы и желанія стяжаній, якова ухищряютъ нјціи злонравніи и худомысленніи, раби суще чреву своему и суетныя славы, но за ту самую присноживу славу и ненасыщаемое веселіе неизреченныя Божественныя доброты. Сіе воистину совершенство рачителю священныя премудрости, еже съединитися самому крайнјйшему желаемыхъ, а не разумјніемъ басней блядивыхъ и гнилыхъ и акадимейскимъ хитрословнымъ высокоуміемъ, но прилежнымъ храненіемъ Богодохновенныхъ заповјдей и смиреннымъ и беззлобивымъ души мудрованіемъ, цјломудріемъ же священнымъ и долготерпјливою кротостію и нелицемјрною ко всјмъ человјкомъ любовію, имиже созданный рукою Божіею по образу Его, скоро паки взыти можетъ къ первјй славј своей, ихъже воздарованіе не якоже отъ человјкъ маловремянная, но яже отъ вышняго, безконечная хвала и конецъ самјй Божественнјй добротј выну наслаждатися и въ самјхъ священныхь преподобныхъ дворехъ. Да не сладостію убо суетнаго доброглаголанія кекропидьскаго безъ ума прелщающеся, останемся во мглј злочестія, но скрываемую въ ней безбожную прелесть всею душею возненавидјвше. Да взыщемъ евангельскую нелестную истину, еюже познавше Единаго, безначальнаго присносущнаго и всјми царствующаго, преблагаго Бога, къ земли колјна преклоньше, помолимся, Ему вопіюще: пощади Царю рабъ своихъ!

Примјчанiя:
[1] Слово это и слјдующія за нимъ три слова противъ могаметанъ написаны прежде 1525 г.
[2] по крайней мјрј.
[3] внезапнаго.
[4] въ поношеніе.
[5] страдая.
[6] крестная.
[7] Семелу.
[8] Фебъ.
[9] Марсомъ.
[10] Калліопа —муза эпическая.
[11] отставитъ? т. е. удалитъ, спасетъ.
[12] т. е. человјкъ.
[13] просто.
[14] т. е. Богу.
[15] тщетныя.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 51-63.