Тогда будете люди Божіи и спасенніи будете имъ, егда, отступивше всякаго вашего зловјрія и упрямъства и непокорства, возглаголете съ вјрою и любовію съ ними: благословенъ грядый во имя Господне, Богъ Господь и явися намъ, и въ заповјдехъ Его станете ходити, крестившеся во имя Отца и Сына и Святаго Духа, якоже есть писано: твой есмь азъ, спаси мя, таже приводитъ, зане рече: оправданія твоя изыскахъ. Вы, и Его Божества отмјтающеся, рекше предъ Пилатомъ: [1] мы царя не имамы, токмо кесаря, и паки: кровь Его на ны и на чада наша; и оправданія Его не пріемлюще, еже глаголетъ: вјровавый и крестився спасется, а не вјровавый осудится. [2] Како глаголеши: мы убо Божіи есме во всякомъ статіи [3] нашемъ? или не слышалъ еси глаголющаго пророка: и паки отчужени быша грјшницы отъ ложеснъ, заблудиша отъ чрева глаголаша лжу?
Не Божіи къ тому есте, якоже предпоказася нами, ниже упованіе ваше твердо есть; писано бо есть: пожрите жертву правдј и уповайте на Господа; [4] вы же, убивше Его, врази уже есте Ему и убійця, а не сынове, ни друзи и не людіе паствы Его. Како убо уповаете нань? суетно убо упованіе ваше и богомерско.
И аще въ гнјвј Божіи есте, то убо и врази и богомерзцы. Како убо Его есте, писанію глаголющу: сынове чюждіи солгаша Мнј, сынове чюждіи охромоша отъ стезь своихъ? Онъ чуждихъ уже васъ и вјсть и именуетъ; и ты, Самуиле, своихъ Его глаголеши васъ?
И аще, по словеси истинны и твоему, отцы ваши оскудјша и заблудиша, не познавше пришествія Христова, то убо и вы сами оскудјли и заблудили съ ними, и сего ради погибли, по реченному: се удаляющіися отъ Тебе погибнутъ.
И въ томъ неправду глаголеши, Самуиле: и Моѵсей и прочіи пророцы ходиша во всјхъ заповјдехъ и свидјніихъ и оправданіихъ Божіихъ, правдою живше и цјломудріемъ, и вјрою несумнјною и желаніемъ горящимъ, Месію Христа и ждаху и уповаху нань и пророчествоваху, яже о Немъ; вы же не точію не ходите во всјхъ заповјдехъ Божіихъ, якоже они ходили, но еще и, противящеся пророчествіямъ ихъ, убисте Христа Бога, послана къ вамъ на избавленіе вамъ же и всему роду человјческому. Аще же и они, якоже человјцы, согрјшиша въ чемъ нибуди по невјденію и забвенію, или мыслію, худымъ нјкимъ согрјшеніемъ единою, но абіе исправляху себе и не пребываху противляющеся заповјдемъ Божіимъ, ниже валяхуся въ сквернахъ плотскихъ и беззаковныхъ сластехъ, якоже вы и мы. И солгалъ убо еси и хулилъ злј на праведныхъ онјхъ.
И то слово твое, о Самуиле, мнј ся кажетъ безлјпично, да не глаголю, безумно, аще бо истинною вјровалъ еси Христа быти Месію, о Немъ же вси пророцы писаша предивна, коея ради вины желая глаголеши: о да быхомъ загладили отъ книгы Исаины рјчь сію: егда убихомъ Его? Лјпо было бы тебј глаголати сице: о да быхомъ тогда послушали пророка и Богу ся покаяли, а пророка бы не убили, и Богъ бы насъ не отринулъ. Къ симъ же, аще бы и загладили рјчь сію, тогда, ниже сице могли были погасити Христову славу Божествевную; писано бо есть пророкомъ Аввакумомъ: [5] покры небеса добродјтель Его и хваленія Его исполнь земля, и паки: яже Богъ помыслилъ, кто разорити возможетъ, и руку его высокую кто отвратити возможетъ. [6]
Самуиле господине, не прикладывай Христово вознесеніе преложенію Енохову и взятію аки на небесјхъ Иліину на колесницы огненней и конехъ. Они человјцы точію быша святіи, и праведніи и сего ради овъ убо ангела всяко имј преложшаго ѝ, а не собою, ни аеромъ, овому же колесница и кони огневидни послашася. Ниже на небо рече писаніе преложена бывша Еноха, ты то глаголеши, ни Илія на небо, но аки на небо взятъ бысть, рече писаніе; Христосъ же Богъ сый плотоносенъ и содјтель всјхъ и Господь Еноху и Иліи и Моѵсею, не аерною легкостію, но Божественною силою взыде на небо самое, а не аки на небо, якоже Илія; облакъ свјтелъ предивнј приведъ отъ небытія въ бытіе ниже подъятъ Его, рече Лукино писаніе, отъ очію учениковъ Его, не аки требуя облачныя помощи на возхожденіе. Не буди мудрствовати намъ таково хульно; Онъ бо вся носитъ и держитъ въ руцј своей; но древнее исполняя пророчество, глаголюще о самомъ Содјтели: [7] пропинаяй небо, яко скинію, покрываяй водами превыспренняя своя, полагаяй облаки на возхожденіе свое, ходяй на крилу вјтреню, якоже и индј глаголетъ: и взыде на херувимъ и возлете, возлете на крилу вјтреню. А еже глаголеши, яко и Мафусала взятъ бысть на небо въ плоти и Моѵсей, того святое писаніе ниже гдј являетъ, но яко Мафусала поживе толика и толика лјта и умре, а не глаголетъ: преложенъ или взятъ бысть на небо, ни о Моѵсеи глаголетъ, яко взыде на небо, но яко умре и погребенъ бысть всяко архангеломъ Михаиломъ, иже и стязашеся съ діаволомъ о тјлеси Моѵсеовј, егда и запрети діаволу Михаилъ, рекъ: да запретитъ ти Господь, діаволе, и тако, отступившу діаволу, погребено бысть тјло Моѵсеово на горј оной, ли инде, Богъ вјсть единъ, а писаніе того не объявило. Сіе же глаголю до Месіина, иже есть Христово, воплощенія и распятія и во адъ сошествія; тамо бо, Христу сошедшу съ душею всесвятою своею, не точію Мафусалу и Моѵсея, но вся вкупј, иже отъ вјка, праведныя исхитивъ изъ руки адовы, вывелъ ихъ изъ тмы и сјни смертныя и ввелъ ихъ въ древній божественный рай, и нынј суть съ Царемъ и Спасомъ своимъ и въ раю, и на небеси и вездј, по реченному, идеже ни будетъ трупъ, ту соберутся и орлы. [8] А еже глаголеши о прехожденіи сыновомъ израилевымъ, яко вода ношаше тјлеса ихъ, не согласно глаголеши святому писанію; писаніе бо сице явј глаголетъ: водрузишася, аки стјна, воды, водрузишася и волны посредј моря; отъ сего разумјти есть, яко посредј обою сею водяною стјною путь имъ бысть сухъ, маніемъ Божіимъ водящаго ихъ, якоже пониже глаголетъ: сынове же израилевы проидоша сушею посредј моря, а не глаголетъ: водою носими, проидоша, якоже ты глаголеши. А еже глаголеши, яко съ небесе сшедъ, ношаше тјлеса волуя [9] и скотская на небеса, явлени бляди суть и рожденіе младенческія мысли, за неже кромј писанія сіе глаголеши; писаніе бо глаголетъ сице явј: яко огнь онъ сшедъ съ небесе, вся вкупј и мяса, и полена, и воду ту, и каменіе и самую землю, вся сожже, и снјде и опепелилъ, а не глаголетъ, яко ова убо сожже, а тјлеса волуя и скотская вознесе въ верхъ. Нјсть лјпо, Самуиле добрый, кромј святыхъ писаній глаголати что, или мудрствовати —не приложиши бо, рече Господь къ Моѵсею, къ рјчи сей, ниже уложиши.
Доколј не испувјдуете Христа истиннаго Бога и не отступаете невјрствія вашего, ни молитва ваша пріятна есть Богу, ни постъ, ни жертва, ни обрјзаніе, ни суботы; вся бо сія возненавидитъ душа моя, рече Исаіемъ пророкомъ. [10] И аще безчисленно и уповаете и прибјгаеге къ Нему, вся вамъ суетна и не полезна. Во гнјвј Божіи есте и ходите, якоже явј глаголетъ пророчество: [11] да обрящется рука твоя всјмъ врагомъ твоимъ, десница твоя обрящетъ вся, невавидящая Тебе, зане положиши я, якоже пещь огненню во время лица твоего. Чесо же ради? зане уклониша, рече, на Тя злая, помыслиша совјты, ихъже не возмогоша составити, яко положиши я хребетъ, еже есть, побјдиши ихъ и въ бјгство обратиши я, во избытцјхъ ихъ, сирјчь, иже останутъ въ томъ же имъ безвјріи и жестокосердіи, уготовиши лице свое, еже есть, гнјвъ твой. Всуе убо хвалишися и глаголеши частј: обаче Божіи есме и къ Нему прибјгаемъ.
Примјчанiя:
[1] Іоан. 19: 15.
[2] Матф. 16: 16.
[3] состояніи.
[4] Пс. 4: 6.
[5] Аввак. 3: 3.
[6] Исаіи 14: 27.
[7] Пс. 103: 2.
[8] Матф. 24: 28.
[9] воловья.
[10] Исаіи 1: 14.
[11] Пс. 20.
Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 45-51.