Кроткое и тихое и еже ко злобамъ человјческимъ терпјливое зјло потребно есть всјмъ вкупј вјрнымъ, наипаче же священникомъ Вышняго, по глаголющему Божественному гласу: возмјте иго мое на себе и учитеся отъ Мене, яко кротокъ есмь и смиренъ сердцемъ; [1] противу же пререкущихъ и противящихся благовјрію и развратити его словомъ же и дјломъ тщащихся и питомыя его въ свою ихъ прелесть прелагающихъ праведно есть и зјло потребно намъ воспріяти, юже по благовјрію, похвальную божественную ревность всею душею, по глаголющему пророку: не ненавидящая ли Тя, Господи, возненавидјхъ и о вразјхъ твоихъ истаяхъ, совершенною ненавистію возненавидјхъ ихъ: во враги бышя мнј. [2] Кто кротчайшій боговидца Моѵсея? но егда видј людей беззаконновавшихъ и Вышняго прогнјвавшихъ своимъ ихъ безуміемъ, кротость свою отложивъ по смотрјнію, не пощадј старца и юношь, старицу и юнну, но безъ милости повелј ревнителемъ закону, левитяномъ, убивати оружіемъ вся по ряду; аще и сродники суть, аще стары, аще млады, понеже забывше многихъ и великихъ Божіихъ благотвореній и чюдесъ, ко идолослуженію уклонилися. Такожде да возлюбимъ ревность юже по Бозј, Финеесову похвальную, иже копіемъ прободь Замбрія, князя израильтянина и мидіанитянину на самомъ гнусодјяніи; якоже есть писано [3]: и ста Финеесъ и угоди, и преста сјчь, сирјчь еже по Божію гнјву истребленіе людей іудейскихъ. Егда во единъ день падоша 23 тысящи единаго ради грјха блуднаго, коль чюдна убо ревность та онаго чюднаго мужа; не точію бо Божію ярость велію и праведну преставила отъ языка израильтянина, но и еще, рече вмјнися ему въ правду въ родъ и родъ. Оставляю глаголати яже о пречудномъ Иліи и Елисеи, елика они, по ревности Божіи, содјяша о славј Божіи и спасеніи языка іудейскаго. Исправленіе же блаженнјйшаго архіерея Льва Катанскаго кто не вјсть? паче же кто, слышавъ, не ужаснется иже о скверномъ Иліодорј волхвј? на время не мало долготерпјвъ всякимъ дјломъ смущающемъ священную паству Спаса Христа и поругающемся ей, наконецъ разумјвъ его неизцјльными недугующа, къ тому не стерпј его. Иліодору бо, во время вечернихъ пјсній и волхованій сатанинскими просмутившу божественныя пјсни, божественною ревностію разжегся святитель Божій Левъ пречудный, изъ олтаря текъ со тщаніемъ и омофоромъ своимъ содерзновеніемъ шею Иліодорову объемъ, привлекъ его даже до торгу и, ту огню велику возгнјщьшуся по его велјнію, привлече его, влјзлъ съ нимъ во огнь и пребысть тамо божественный архіерей, предержа его омофоромъ, дондеже изгорј весь скверный онъ бесовомъ ученикъ и служитель; святитель же Вышняго и велемудрый поборникъ благовјрію, Левъ изыде невредимъ, ниже власу единому его огнемъ опалјвшу. Тјхъ же и вы якоже сотаинники и тјхъ же имъ таинствъ строителе, подражающе, туюжъ имъ ревность и подвигъ за благочестіе воспріимите вседушьно и смущающая è, иже аще ни будутъ, не посрамляйтесь, ниже обинуйтесь, но апостольски противитеся, единомудренно и единодушно съ приличнымъ дерзновеніемъ святителемъ Божіимъ православнымъ, и смутившаго убо паству Спасову предадите внјшней власти въ казнь, да и ины накажутся не приложити имъ смущати овця Спасовы, ни приложити въ землю нашу православную. Кое бо сообщеніе вјрну съ безвјрникомъ? Они распяли. Емуже мы покланяемся, въ Негоже и вјровахомъ и спасаемся; онижъ безпрестани кленутъ, Егоже мы день и нощь благословляемъ и славимъ со Отцемъ и Святымъ Духомъ. Соблюдите землю нашу чисту и невредну отъ таковыхъ бјшеныхъ псовъ. Будьте сопричастницы древнимъ ревнителемъ, да и вы тјхъ же имъ вјнець и хваленій получите въ грядущій вјкъ о Христј Ісусј Господј нашемъ, Емуже слава въ безконечны вјки со безначальнымъ Отцемъ и со Святымъ Духомъ. Аминь.

Примјчанiя:
[1] Матф. 11: 29.
[2] Псал. 138: 21.
[3] Числ. 25: 7.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 42-45.