Обновленія почитати древній законъ есть и добрј уставленъ, глаголетъ преизобильный въ богословіи Григоріе. И како убо не добрј уставленъ, идјже имъ два великая сотворяются, ибо и промыслъ и еже о насъ прилежаніе всјхъ Содјтеля и Владыки явлена бываютъ выну всјмъ человјкомъ, имиже едиными и вся яже о насъ исправляются и къ нашей пользј устрояются. Такоже и дјянія и достохвальная житіа преподобныхъ и богоносныхъ отецъ посничества рекý и зјлная томленія и еже съ самјмъ тымъ діяволомъ повсядневная боренія и еже отъ добрыхъ, сирјчь, елика во славу и честь Владыки всјхъ тщаніе же и попеченіе ихъ пјваемо бываетъ и незабытно присно отъ рода къ роду всегда препосылаема и на подражаніе добрыхъ иже исправленіи воставляюща послјднеродныхъ. Симъ убо сице ся имущимъ, праведно и мнј неключимому, понуженіа ради твоего, показася не предати забвенію, но краткимъ писаніемъ явлено сотворити послјднимъ родомъ содјянное неизслјдованными судьбами Владыки всјхъ и Бога; азъ же убо, аще и недостоинъ сый таковаго начинанія, но надјюся на великіа щедроты Господа моего и воспоминаю реченная святыми Его неложными усты: Азъ есмь, рече Сый при купинј и нынј той же, той же и во вјки, не усумнюся глаголати, яко гугнивъ еси, лјпо бо ми есть дати тебј языкъ многорјчивъ, да проповјси великую мою благодать и похвалиши угождьшихъ ми и потрудившихся добрј; азъ же окаянный, надјяся тому словеси, понудихся тому прострјти грубую мою десницу, молюжеся и милъ ся дјю, да не зазоръ ми будетъ отъ васъ, о боголюбивіи: прямо бо простертъ кипарисъ на высоту востече, но очесемъ единемъ дарова наслаженіе свое, смоковница же нижними и стропотными вјтвьми оградися, но медоточными плоды наслаждаетъ гортань. Сице убо и философскихъ словесъ суетное поученіе, не божественная бо глаголютъ ниже мудръствуютъ, но о иныхъ упражняются, ихъ же намъ нелјпо есть и глаголати, наполняютъ бо воздухъ словесы, и ни едино же отъ нихъ Богу угодно, ниже святымъ похвально, ни человјкомъ на пользу и спасеніе, но вся суетна и развращенна, наши же христіянскіа похвалы Богу приносимыя и святымъ Его, аще и проста бываютъ неухищренными глаголы, но благодарна и нескрыта и явствена всјмъ на пользу слышащимъ, якоже бо и сіи творцы житіа блаженыхъ онјхъ отецъ Зосима и Савватíа, Досифей глаголю ученикъ преподобнаго Зосима написа убо потонку и неухищренно и якоже бы возможно тамо живущимъ человјкомъ глаголати же и прочитати, понеже убо тамо пребывающiи человјцы близь моря и кругъ острова того мало свјдяху россійскаго языка близь живущіи ижера, чюдь, лопь, вдалје же каяне и мурмане и иніи мнози языцы, мнозіи бо отъ тјхъ прихожаху во обитель преподобныхъ отецъ Зосимы и Савватíа и остригаху главы своя, бывающе мниси. Того ради Досифей неухищренно ниже добрословіемъ писаше, но яко воспоминаніа ради трудолюбнаго житіа преподобныхъ онјхъ отецъ, да слышащіи ревнуютъ по нихъ добродјтелемъ ихъ. По сихъ случися быти Спиридону митрополиту во обители Пречастыя Богородицы завомо Ферапонтовъ, якоже напреди слово скажетъ въ житіи блаженныхъ отецъ, умолену и ему бывшу еже подробну преписати и удобрити достохвальное пребываніе; онъ же отчасти убо исправи и добрословіемъ украси, но не все, понеже убо, якоже выше рекохъ, тамо ради живущихъ человјкъ, еще бо въ то время отъ иныхъ градовъ немнози прихождаху во еже постригати главы своя, но близь живущіи человјцы, якоже выше назнаменахъ, мало свјдуще россійскаго языка. Нынј же, по божественному апостолу, явися благодать спасительная всјмъ человјкомъ, не токмо бо округъ острова того истинніи богочетцы и Христови поклонницы, но благодатію его мнози языцы иновјрніи превратишася въ православную и благочестивую христіянскую нашю вјру и крестишася во имя Отца и Сына и Святаго Духа съ отрицаніемъ первыя ихъ вјры и проклятіемъ своея имъ ереси, первје бо быша яко звјри дивіи живуще въ пустыняхъ непроходныхъ и въ пещерахъ и въ разсјлинахъ земныхъ, не имуще ни храма ни инаго потребнаго къ жительству человјку, токмо животными пищу пріимаху звјрми и птицами и морскими рыбами, и елико кто нахожаше, тјмъ куплю творяху, языцы же иновјрніи, глаголю, якоже и выше, каяне, и мурмане, нынј же быша православніи христіяне и толико благодатію Христовою вдалј распространишася болј трею тысящу отъ Соловецкаго острова даже и до варяжскаго нјкоего града зовомаго Варгавъ, идјже живяше капитонъ, сирјчь князь, идјже нынј благоволеніемъ Отца, изволеніемъ Сына и съ дјйствомъ Святаго Духа устроися монастырь честенъ и совокупися многа чета иноческаго пребываніа отъ града оного варяжскаго тако шестьдесятъ поприщъ отстоящъ, на рјцј, глаголемой Печенга, близь моря. Все же устроися, Богу поспјшествующу, молитвами святыхъ онјхъ и богоносныхъ отецъ Зосимы и Савватíа, къ нему восходящими, донелиже они нынј вселишася въ пустый онъ отокъ, дотолј тамо потонку слышашеся имя Христово; егда же благоволи Богъ прославитися святому Своему имени угодники Своими, тогда въ пустыни яко градъ сотворися. Аще бо они не въ едино время, но единодушни быша, колико отъ бјсовъ пострадаша пакости два мужа неискусна, мужеубійства, брани, худости, и нищетј, и помощи подлежавша, въ божественую же силу, свыше сшедшую, вооружившеся зјльною ревностію, съ самјмъ діяволомъ сплетшеся и того удавивше, подъ ногама попраша, вмјсто всякаго инаго оружіа вземше непобјдимое оружіе православнаго креста, имъ же защищаеми, изгнаста отъ вселеніа своего всяку злокозненую прелесть бјсовскихъ ловленій и человјкъ злыхъ нахоженіа, прожде бо прихожаху къ великому оному первовсельнику и прещеніемъ претяху изыти изъ мјста того, да не зло что постражетъ, иже убо жена нјкоего отъ живущихъ ту отъ ангела богоранную язву пріимши и своимъ повјдавши вскорј оттуду изыдоша; оттолј даже и донынј никоеяже пакости сотворити смјяху. Оле чудо! преже бывый отокъ пустъ и никимъ же вјдомъ, нынј же превооруженъ оружствомъ Святаго Духа, крјпкими возбранными воины небеснаго Царя, иже не къ крови и плоти ополчахуся, но къ началомъ и властемъ и къ міродержителемъ тмы вјка сего, къ духовомъ злобј небеснымъ, по божественному и велегласному Павлу. И сей хвалится великій онъ островъ веледушевными всельники, паче же рекý, гражаны, иже безчислеными побјдами и одолјніи свјтлјйшими на высоту аерскую зјло превознесены и бјсовскіа прегордыя лаяніа подъ нозј повергоша и ни во чтоже сотвориша, Христа же вышняго Царя великаго Бога на земли прославиша и отъ Него велію славу на небесјхъ пріяша и нынј предстоятъ Святјй Троицј со всјми святыми о насъ молящеся. Азъ же окаянный и грубый, понуженіа ради твоего, честный отче, надежду возложихъ на всемилостиваго Бога, дающаго и безсловеснымъ ясно провјщавати, якоже при Валаамј древле, призывая же святыхъ онјхъ отецъ на помощь, яко да поспјшествуютъ ми еже къ похвалј добродјтелемъ ихъ и чюдному исправленію, начахъ еже ко древнему и новая прикладавати къ иже древле водруженному твердо каменному столпу и оныя новыя принфотворныя, яко да и новая о твердјмъ ономъ крјпко утвердятся. Небеси убо высота неиспытаема, земли же широта и догота не осяжаема, морю же глубина неизмјрима, святыхъ же чюдеса неисчетна и недоумјваема. Сихъ же святыхъ пречюдному житію начало сице, якоже и древле речеся.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть третiя: Разныя сочиненiя Максима Грека. – Изданiе второе. Казань: Типо-литографiя Императорскаго Университета, 1897. – с. 213-218.