Слава Тебј, преблагій Боже Отче Вседержителю, слава Тебј и покланяніе и велелјпіе отъ всея видимыя и мысленныя твари нынј и въ безконечныя вјки! Како достойнј азъ, перстный и страстный, неблагодарное созданіе пречистыхъ рукъ Твоихъ, воспою и славословлю безчислосіянную державу божественнаго Ти величества и неизслјдованную бездну благости и человјколюбія Твоего, еже къ намъ неблагодарнымъ, зане отступившихъ насъ отъ Твоея благости и лютј нечествовавшихъ на ню и всякою злобою, преслушаніемъ же и непокорствомъ огорчевавшихъ Твоя человјколюбныя утробы, не престалъ еси милуя насъ и промышляя о насъ и питая и обращая отъ пути прелести нашея на путь истины Твоея, чюдесы предивными, пророки же и закономъ и заповјдми спасителными, знаменіи отъ небесъ, знаменіи отъ земли и моря, намъ же окаяннымъ безчувственнј пребывающимъ къ толицјй, яже къ намъ, благости Твоея и всякимъ образомъ огорчевающимъ Тя и всякими нечестіи и неизреченными беззаконіи, ниже сице отвратился еси насъ или оставилъ, неизслјдованна бо и безконечна есть бездна благости Твоея, еюже побјжденъ бывъ, Иже единъ сый непобјдимъ и всесиленъ, благоволилъ еси послати собезначальнаго и соприсносущнаго Ти Сына Господа нашего Ісуса Христа на помощь и на возвращеніе окаяннаго рода нашего неблагодарныхъ, се показаніе веліе Твоея, яже о насъ, совершенныя благости, иже не пощадјлъ еси единороднаго и возлюбленнаго Сына своего, но выдалъ еси Его на страсти поносныя и смерть горчайшу, за спасеніе намъ неблагодарнымъ. Что веліе се и страшно таинство, что толико Твое, еже о насъ нечестивыхъ и неблагодарныхъ, человјколюбіе и благость? Еда бо не можаше ли, Иже единъ Всесильный, инымъ которымъ образомъ спасти рода нашего единъ Всесилный? Ей, можаше, Владыко, и единымъ божественнымъ Си мановеніемъ исцјлити насъ; что бо Тебј невозможно? Тебј всяческая работаютъ и повинуются, аки Владыцј и Содјтелю. Но сице бысть благоволеніе предъ Тобою, яко да разумно будетъ, еже о насъ окаянныхъ, неисчетное Твое человјколюбіе и пучина щедротъ Твоихъ и яко не точію мановеніе всемогущія божественныя силы Своея можеши творити превелія и предивна, но и худыми немощнјйши, яже у насъ; что бо немощнјйши человјческія плоти страстей же и креста и смерти, въ нихъже и имиже посрамилъ еси начальства и власти темныя, но и самого имјющаго державу смертную гордаго и величаваго сатану и діавола, иже многообразными нечестіи и студодјяніи на лјта довольна умертвилъ насъ безумныхъ, егоже нынј покорилъ еси попрану бывати ногами благочестивј служащихъ божественнјй славј Твоей, попираемъ бо и поругаемъ бываетъ, якоже худая птица о отгонится непобјдимымъ знаменіемъ креста образуемомъ нань. Такова, яже отъ Твоея благости, положена въ немъ божественна сила, бјсы въ бјгъство обращаетъ, недуги отгоняетъ, мертвыя, аки отъ сна, воставляетъ. Мы же немощніи и убозіи, что къ симъ противу принесемъ Твоей, яже о насъ, благости? Ни единого отъ сущихъ у насъ требуеши, вся бо Твоя и яже на небесјхъ и яже на земли и яже въ моряхъ и безднахъ, ты бо всјхъ сихъ и Творецъ и Господь; единаго точію у насъ отъ сущихъ ко превелицјй благости Твоей требуеши и желаеши спасенія нашего и неложнаго обращенія и покаянія, еяже ради вины и на смерть выдалъ еси возлюбленнаго единороднаго Сына своего Ісуса Христа Господа нашего, Егоже животворною смертію мы мертвы прежде суще оживотворихомся и мрачныхъ адскихъ пропастей избыхомъ и восходъ, иже на небеса, обрјтохомъ и затворенный древле, по преслушанію праотца нашего, райскій входъ, воспріяхомъ паки послушаніемъ втораго Адама Господа нашего Ісуса Христа, егоже божественное и живоносное воскресеніе по вся лјта празднующе веселія божественнаго и неизглаголанныя духовныя радости по душамъ исполняемся, егоже ради и воспјвающе возопіемъ, отъ глубины сердечныя: благословенъ еси, Господи Боже отецъ нашихъ и препјтый и превозносимый во вјки вјкомъ аминь, и благословенно имя славы Твоея препјтое и превозносимое во вјки вјкомъ аминь, яко благоволилъ еси посјтити насъ Востокомъ свыше, еже есть явленіемъ мысленнаго Солнца правды Ісуса Христа Господа нашего, яко мертвыхъ сущихъ нечестіемъ оживотворилъ еси твоего благовјрія свјтлостію, яко враги суща прежде и сыны діяволя и чада естествомъ гнјву, други и сыны и чада возлюбленна Твоя явилъ еси насъ, по благодати Ісуса Христа Господа нашего и дарованію Святаго Духа Твоего, измывъ насъ божественною банею пакибытія, яко омраченныхъ сущихъ насъ всяческими прелестми и лжеименнаго разума внјшнихъ софистъ освјтилъ еси насъ лучами богоразумія и сокровищи неблазненнаго богословія и премудрости, въ нихже и имиже преизобильно озаряеми, благословимъ неблазненно Отца и Сына и Святаго Духа, единого Бога въ тріехъ ипостасјхъ, безначальна, несозданна, соприсносущна, безконечна, содјтеля всјхъ видимыхъ и невидимыхъ, преблага, человјколюбца, всякаго блага подателя и виновна, предъ нимъ же раболјпно припадающе и воспјвающе возопіемъ: спаси насъ Твоею благодатію, Пресвятая Троице, содјтелю всјхъ и содержателю, сохрани насъ въ настоящемъ убо жітіи благовјрно служащихъ Ти и любовная Тебј и угодная всегда совершающихъ, со всякимъ благодареніемъ и чистымъ житіемъ, а въ будущемъ сподоби соучинитися намъ божественному лику избранныхъ Твоихъ, идјже шумъ чистъ празднующихъ и гласъ неизреченнаго радованія; Ты бо еси намъ Богъ возлюбленъ, вјренъ же и праведенъ, и мы людіе Твои, по благодати Твоей, и развј Тебе иного не вјмы, имя Твое имянуемъ и славословимъ Отца и Сына и Святаго Духа единого божества и царства, Емуже подобаетъ всяка слава, честь, поклоненіе, въ безконечныя вјки. Аминь.

Печатается по изданію: Сочиненiя преподобнаго Максима Грека, изданныя при Казанской Духовной Академiи. Часть вторая: Нравоучительныя сочиненiя. – Казань: Въ типографiи Губернскаго правленiя, [1860]. – с. 440-445.