Нелјностно пребываемъ, душе, ниже безпечально, ниже аки младенцы, неискусны смысла, поругаеми бываемъ, довольну въ соблюденіе, сирјчь во спасеніе, себј мняще быти мјсту сему нешествуемому ногами женомірянолюбцовъ. Ниже бо Египта и Фараона древле избјгшимъ, споспјшествомъ Вышняго и наставленіемъ Моисеовымъ, удовлјно [1] къ благовјрію, еже не во вселенномъ мјстј, сирјчь въ пустыни, обитати 40 лјтъ, зане къ Богу, избавльшему ихъ отъ безчисленныхъ скорбей, вјру благоразумну не сохраниша. Не мјстными премјненіи угаждаемъ бываетъ, о душе, всјхъ Владыка, ниже преоблаченіемъ худыхъ рубищъ, ихже ово сирјчь пустынное пребываніе, убо многаго ради безмолвія взыскуется, ово же смиренія ради избирается. Аще же кто въ сихъ сый, паки плетется въ плищехъ [2] и мірскихъ печалехъ, ничтоже разликуетъ пса, обращающася на свою блевотину, по словеси верховнаго. Плача бо, душе, и мертваго житія указъ есть внјшнее сіе черное рубище, увјщавающе насъ всегда вјдјти себе мертвыхъ волею въ семъ житіи сіе избравшихъ, сирјчь выну всјмъ умомъ ненавидјти всякое плотское сладкострастіе и житейскія молвы, жити же безстяжанно и преподобно своими труды веліе богатство мнящимъ нищету. Аще же паки стяжаніи славј, піянству, смјхи, имиже съпряжется всяческа беззаконная похоть, себе самихъ безъ ума сплетаемъ, нјсть лјпо рещи, яко сугубыхъ получимъ мученій, аки волею и въ разумј своя објты солгавше Христу, сего же что можетъ быти горше? Лучше бо, рече мудрость Божія, не објщавшу и отдати Богу, неже објщавшу соглати, и: вся глаголющая лжу погубиши, такоже вопіетъ божественный пјснопјвецъ. Не мјстехъ [3] убо премјненіемъ, ни ризъ, якоже предрекохъ, душе, угажаемъ бываетъ Христось, всјхъ Господь, но житія честнаго и всякія добродјтели пристяжаніемъ, на вјрј чистј твердј водруженныхъ. Понеже убо, благодатію Божіею поспјшествована, избјгла еси сјтей чювственнаго Египта, сирјчь міра сего, потщися всею силою ни владјющаго имъ діавола и тебј выну зјло бјшено навјтующаго, избјжати благоразумною, яже къ Господу, вјрою и божественнымъ страхомъ добрј огражаема. Ниже престай бјжащи его, крјпкою десницею Вышняго потопляема во пламеннјй пропасти, вкупј съ еговыми всјми колесницами и крјпкими оружники, себе же увјси покрываему облакомъ Параклитовымъ, устужающимъ варъ, иже на тя зјло воставляемъ отъ безплотныхъ врагъ помышленіи пламенными сквернјйшихъ похотій, и столпомъ не огня, но присносущнј озаряющаго свјта наставляемъ къ земли објтованія, не юже израильтяномъ раздјлили Іисусъ Наввинъ, но юже всеа твари перворожденный, иже красный добротою, паче всјхъ сыновъ человјчь, рожейся отъ откроковицы и святыя Дјвы, неложный Богъ објща намъ Христосъ Іисусъ, въ нюже самъ первый вниде, убивъ смерть. Трезвися убо всегда, душе; гоняй бо тя безпрестани разумный Фараонъ не престаетъ, злая тебј умышляя. Ни чай, о душе любезна, престатіе умышляемыхъ имъ на тя всяческихъ лаяній; естествомъ бо завистливъ есть и безстужъ, ниже престаетъ отъ гнјва, дондеже ввержетъ тя въ пламенныхъ мученіи. Ниже отступающу вјруй; тогда бо больши уловляетъ тя зјло злокозненнј; сицевымъ бо ловленіемъ тщится скверный повинути тя, ослабити многое твое и зјльное трезвјніе. И тако, обрјтъ тебе лјнящуся, уязвитъ тя внезапу единымъ отъ многихъ душегубныхъ стрјлъ, или узою губительною киченія запнетъ отъ преспјянія, еже къ большимъ добродјтелемъ; умъ бо сый зјло искусенъ, въ еже зло умышляти, вјсть, егда прилјжно трезвимся, елику ползу отъ нихже наноситъ намъ напастей приобрјтаемъ, укрјпляеми свыше Божіею благодатію. Аще бо трезвимся, нанесеніе напастей виновно свјтлјйшихъ вјнецъ бываетъ намъ, якоже и доброму борцу, еже братися противу благоискусныхъ противоборцовъ. Аще убо споспјшествомъ твоего душеспасителя избјгнеши рукъ всегубительнаго Фараона и чермную глубину пламенныхъ стреканій прешедши сухою, а не мокрою, якоже боговјщанное слово тайноучитъ насъ, и худою пищею, пјшь же, а не сјдящи на жребяти, сирјчь присно худу и не единаго чего сущу достойну себе мниши въ мысли, а не во устјхъ, вселишися при холмј горы Синайскія въ пустыни, сирјчь пристанеши во священномъ пристанищи многопјтаго и благоуханнаго бестрастія, емуже наиначе желаетъ всесвятый Духъ. Блюдися, да не, равнј неблагодарнымъ людемъ онјмъ, и ты окаянная, избјсившися вдаси себе объяденію и піянству и плясаніемъ, да не и ты многоцјнная твоя и честная вся во чревј твоемъ погребеши и точно Богу послужиши тому, якоже и они, тельцу древне, да не и ты погрјшиши будущихъ благъ Божіихъ, якоже и они, објтованныхъ земли, и ввержена будеши въ мученіихъ, томящихъ тя безконечно и горје всјхъ бывшихъ преже закона безвјрныхъ. Но аще истиною любиши Христа царя твоего вкусившаго, тебе ради, смерть на крестј, потщися всею силою божественныя его любве, скрыти прилјжно въ мысли своей. Сего же получити немощно инако, аще не вся похоти своя возненавидиши до конца; сія же паки немощно возненавидјти, аще не утвердиши божественный страхъ во сердцы своемъ; сего же паки не пристяжеши, аще не всякаго отъ себе изринеши сумнјнія и еже чаяти мудритися, аки же простъ младенецъ вослјдъ идеши за Господемъ твоимъ, повинующися повелјніемъ его. Якоже убо любы совершеніе есть всего закона, такожде и вјра основаніе есть всјмъ вкупј добродјтелемъ; вјра страха ражаетъ, сей же паки дјланія заповјдей, имже умъ совокупляется божественнјй любви. Ейже сподобившися, смиренная мудрствуй, прахъ себе вмјняй, да выну насладишися божественными желаніи.
Примјчанія:
[1] Довольно было.
[2] Плищъ — шумъ, крикъ, молва.
[3] мјстъ.
Источникъ: Сочиненія преподобнаго Максима Грека, изданныя при Казанской Духовной Академіи. Часть вторая: Нравоучительныя сочиненія. —– Казань: Въ типографіи Губернскаго правленія, [1860]. — С. 148-152.