[1]

Меда глаголютъ врачевстіи сынове, съ естественною сладостію своею, и силу имјти нјкую среднј бридостну [2], такожде и очищательну. Сего ради и язвы нечистыя к неудобь исцјльныя симъ растворенымъ очищаютъ, наипаче же иже въ сихъ искусни суть, такоже и во очищательныхъ питіихъ, зјло потребнј отъ нихъ примјшается, зане различіемъ цвјтовъ, отъ нихъже сбирается, чюднјйше имать качество. Томуже убо подобно обрјтеся она краткая епистолія твоя, яже ко мнј написана бысть, о пречестнјйшій и зјло мнј превозлюбленнјйшій господине Ѳеодоре! духовною бо сладостію всюду услаждена и утучнена, не токмо вкусъ разумный души видится наслаждающи, но пострјцаетъ тайнј, и аки бридостнј нјкоимъ чиномъ воставляетъ къ просвјтлјнію, сирјчь, ко отвјщанію ума нашего во мнозјмъ нерадјніи. Или не видится тебј довольнј быти кусательно, да не глаголю зазирательно, еже рещи явленј къ мужу православными напитательну догматы отъ младыхъ ногтей чистыя и непорочныя православныя вјры, неподобно быти таковыми епистоліями, сирјчь Николаевыми, взыскати и украшатися, въ нихже азъ воистину толико отстою наслаждатися, елико и въ смертоносныхъ врачеваніихъ насыщатися и наслаждатися. Но человјка онаго мудрость отъ многихъ слышавъ удивляему, и яко Ѳеодору вопрошанія нјкая искушательнј пославшу къ нему, и разрјшенія о тјхъ отъ него просившу, художнјйше той и зјло муддрјйше благосоставное слово противу отсла, хотјхъ и азъ пчеламъ поревновати, лјтающимъ убо по всякимъ цвјтомъ, но не отъ всјхъ събирающимъ медъ. И наипаче зане и Ѳеодора въ православіи знаменита, и многимъ во истину разумомъ украшена, слышахъ, уже въ сію стезю шествовавша, и того слышатель и зритель хотјлъ быти, а не и ученикъ, или молчащъ хвалитель, якоже и прочіи. Еже бо о семъ молчати въ толико время, явленое обличеніе есть, еже мнјти содержимая въ немъ веліимъ хваламъ достойна, по глаголу, Христово Рожество сущее убо и первое, молчаніемъ да чествуется, но сія убо сице, и къ толику, краткословіе бо вездј потребно есть. Ты же, о прелюбезнјйшая ми главо! къ прекословію воставляя мя содержимыхъ главъ въ немъ, веліе что бремя возложивъ на мя, да вјси. Сіе же глаголю не зане изъявленія Николаева имјютъ глубину, мала бо сія суть и немощна, яко и паучиннымъ тканіемъ уподоблятися, но зане ниже дыхати убо имјю празности, объятъ въ трудј преведенія Псалтыри, егоже ради отреклъ бы убо твое прошеніе, не аще отъинудј ревность, яже о истинј, внутренняя моя обращающа, почивати не попущаше, яко убо да не зрится лжа противу истины, и тьма противу свјта хвалится, и да познаеши и ты прочіи словомъ и дјломъ, яже ничтоже Максимъ храмлетъ во извјстнјйшей феологіи богоносныхъ отецъ, но и пачеже ненавидитъ и отвращается всјхъ еретическихъ велерјчій и латинскія послјднія новины и суесловія, бодренј вкупј и зјло любезнј на сей подвигъ совлекуся, надежди моя положивъ на подвигоположителя Бога и Спаса Христа и свјтоподателя, и духовными просвјтјніи и отеческими учительствы, расточити тщуся сопротивную египетскую тьму пресвјтлымъ свјтомъ апостольскіа истины, тьма бо воистину осязаемая и мгла глубока, яже богодохновеному евангелію, и иныхъ богоносныхъ отецъ духомъ глаголемыми учительствы, не согласующія, рукояти паче плевныя, неже учительства, и суть и нарицатися достойна суть. Аще бо свјтъ Господь нашъ Iсусъ Христосъ, и животъ и истина, въ Немъ бо, рече, животъ бј, и животъ бј свјтъ человјкомъ, и свјтъ во тьмј свјтитъ [3], смерть убо и лжа явственая и тьма осязаемая суть извјстно сопротиву вкупј вся еретическая лганія, яже не отъ приснотекущихъ источникъ разумнаго Израиля востекающія, отъ нихже пјсни составляти Господу Саваофу отъ пророка повелјвашася, глаголющаго: въ церквахъ благословите Бога, Господа отъ источникъ Израилевъ, но отъ рововъ мутныхъ воскипающая къ пагубј и удавленію воспріемлющихъ утробахъ.

Но время уже есть воздвигнутися къ разоренію высотъ возвышаемыхъ, якоже божественный апостолъ глаголетъ, на познаніе Спаса Христа, не колесницами и коньми уповающе, сирјчь, ложными изъявленіи, и какова суть въ нихъже кичатъ аристотельстіи философи, но во имя Господа Бога нашего призывающе, якоже блаженый псалмопјвецъ поетъ, зане надјющимся въ колесницахъ и конехъ сокрушеніе и паденіе случается, тіи бо, рече, спяти быша и падоша, а во имя Господа Бога призывающимъ, востаніе и исправленіе благовјствуется; мы бо, рече, востахомъ и исправихомся. Речетъжеся мнј не на вся Николаева изъявленія, — не возможно бо есть мнј сіе совершити нынј, и яко преди рјхъ, — но на та, еликаже не страшится, отъ Божественнаго Параклита присносущномъ присхожденіи, дерзостнј зјло и помышляти и глаголати, слово срјсти хощетъ, Божественнаго Параклита свјтоизлитіемъ просвјщаемо: высота бо латинскихъ недугованій, яже между насъ и ихъ преграждаетъ, сія есть. Пагубныя бо и прочая ихъ ученія и мудрованія, и богоносныхъ отецъ седмь кратъ собравшихся преданіемъ и ученіемъ далече отстоятъ, въ толицј, яко Богу единому исправити могущу сія, но уразумјетъ же глаголемыхъ силу, иже не въ другомъ градј, токмо въ самомъ Римј велеславномъ бывъ, иже тамо беззаконно совершаемая узритъ, отъ возвышающихъ на высоту бровь, и апостольская мјста удержавати хвалящихся, вся убо, якоже рјхъ, яже въ нихъ лютая, и велику отвращенію достойна. Но источникъ злыхъ и основаніе всјхъ новина есть, яже о Дусј Святјмъ, яже и прочая злая вкупј введе. И не дивно есть, о премудрый Ѳеодоре! не бо къ тому возможно есть богословити правј, и правило составляти тјмъ, Параклитова вдохновенія лишеннымъ. Како бо Духъ вдохнетъ у нихъже Богъ Отецъ изметается отъ свойства дыханія, яко посемъ покажется; Духъ бо, глаголетъ, идјже хощетъ дышетъ [4], хощетъ же не индј, токмо идјже Отецъ и Сынъ, правомудреннј съ тјмъ богословится, и по преданіемъ чествуемымъ богоносныхъ отецъ славословится; едина бо воля Отца и Сына и Святаго Духа, якоже бо едино существо и сила, и нјсть различіе волямъ во Святјй Троицј. На ту убо высоту слово обращаемо есть, и всякимъ чиномъ во истинј и любви недугующихъ разумъ исцјляти подобаетъ, общаго врача и Спаса Iсуса Христа вожда предлагающе ко испытанію истины, и правымъ словомъ слово да исправляется, и яже главная изъявленія Николаева пучину испытая вкупј, и сопротивъ предлагая догматы чистыя и простыя истины, не въ помышленіи ложныхъ и образованіи гіометрійскихъ, въ нихъже ходившіи не пользовашася, истину показующая, но боговдохновенными гласы, и отеческими указаньми чистјйшими, и каковыми подобаетъ быти отъ свјта исходящимъ, истину облистающа. Сіе предглаголюще тебј вјдати, яко не учити тебј хотяще обличити, аки неправј мудрствующа, многащи обращаемъ лице слова, и глаголемъ; ты же не стыдишися, и паки, ты же глаголеши, и ты не страшишися таковая мудрствуя; не къ тебј бо сія суть, о премудрый Ѳеодоре, но противу Николая и его единомыслениковъ, ихъже ради и преже, неже начну испытаніе главъ, потребно непщевахъ явлены сотворити вопреки глаголющимъ заповјди богоносныхъ отецъ, возбраняюща насъ, яже выше насъ, и всего ангельскаго разума вышша суща, испытовати и изысковати, да познаютъ, яко почестію содержими еже къ предавшимъ намъ таинство Троицы непостижимое, а не оскудјніемъ слова, и обличеніе показательныхъ, въ заповедехъ и преданіихъ отеческихъ почиваемъ. Извјстно бо вјмы, яко не быша тј глаголющіи, но Духъ иже отъ Отца, якоже глаголетъ блаженый Кѵрилъ въ епистоліи ко Іоанну патріарху Антіохійскому, яко да покажетъ въ послјдующихъ. Или не врачевстіи сынове сице творити обычествуютъ, егда противу недужныхъ нападеній уготовляются? Мјры бо и тіи живота умјренаго уставленаго отъ учителей прежнихъ, предсвидјтельствующе недугующимъ, ихъже соблюдающимъ убо надежда нјчто цјльбу получити, преступающимъ же недалече отъ смерти быти. Тогда къ надыманію недуговъ и огнемъ и желјзомъ и многообразными цјльбами въстаютъ. Тјмъже и мнј послјдующу никтоже да поношаетъ, наипаче же всјмъ прилежаніемъ и бодростію крјпкою словеса да услышитъ, не аки моя, но яко отъ тјхъ блаженныхъ мужей реченная, ихъ бо словеса азъ возвјщаю. Такожде да не къ распри ушеса приклонитъ, во все непщеваніе и злоизволеніе отъ ума изгнавъ, прилјжнј и истиннолюбнј словеса да услышитъ.

Начну же сице. Да познаютъ извјство, елицы и въ самомъ Римј ино учительство предсјдящимъ обитаютъ, и во Италіи, и въ странахъ, яже за Алпійскими и Пиринійскими горами, и до Гадиря, яко мы, иже выи наши подлагаемъ подъ иго пречистјйшаго престола апостольскія Церкве констянтинополскія, толико отстоимъ лукавствовати или новину дерзати въ преданнјмъ намъ крјпцј исповјданіи соборныя апостольскія и непорочныя вјры, елико и своего живота навјты помышляти смертоносныя. Вјмы бо, вјмы извјстно, и отъ божественныхъ писаній о семъ извјстихомся, яко еже подвигнути нјчто малјйшее отъ ученій вјры, или премјнити, превеликихъ есть отрицаніе, и жизни вјчныя отпаденіе. И прежде иныхъ Свидјтель есть самъ Основатель вјры нашея, и всея истины и правды Начальникъ, Господь нашъ Iсусъ Христосъ, иже наченъ боголјпное учительство къ своимъ ученикомъ, аки основаніе крјпко и неподвижимо того предлагаетъ, еже со всякимъ прилјжаніемъ и храненіемъ многимъ даже и до малјйшія соблюдати Его заповјди неподвижны и непремјнны. Глаголетъ бо во евангеліи иже отъ Матфея: иже убо разрјшитъ едину отъ заповјдей сихъ меньшихъ, и научитъ тако человјки, мній наречется въ Царствіи Небеснјмъ, и прочая [5]; а еже мній, божественный Златоустъ протолкуя, сирјчь осужденъ будетъ, истолкова. Аще же нјкто дерзнетъ, яко о законныхъ заповјдехъ сіе глаголаше Iсусъ, занеже выше рече, іота едина или едина черта отъ закона не прейдетъ, и прочая, не истиннј речетъ; ибо самъ Спасъ первый заповјдь, яже о суботј, разрјшаше, тјмже и отъ фарисей оклеветашеся, глаголющихъ: сей человјкъ нјсть отъ Бога, зане не хранитъ суботы; но и по немъ ученицы Его, ихъже первый есть блаженный Павелъ, аки противу всјхъ заповјдей законныхъ, будущая образующихъ, всјхъ себе обративше, вся разориша, якоже Дјяній священная книга и иныя богодохновенныя книги повјдаютъ. Видится убо о заповјдехъ благодати Спаса сіе глаголавша; сего ради и совершая боголјпное то учительство, таковою заповјдію паки учениковъ приточнј утверждаетъ, глаголя: всякъ убо слышаяй сія Моя словеса, но яже Азъ нынј рјхъ вамъ, и творитъ та, уподоблю его мужу мудру, и прочая даже до конца [6]. Не токможе всјхъ Спасъ заповјда намъ неподвижно соблюдати свое боголјпное учительство, но и въ божественномъ евангеліи, еже отъ Іоанна, не единою, но многащи сіе видится творя съ великимъ прилјжаніемъ, нынј убо приточнј: не входяй, глаголетъ, дверми въ дворъ овчій, но инудј входя, той тать есть и разбойникъ [7]. Кто убо дверь есть, токмо глаголавый: Азъ есмь дверь овцамъ, нынј же, и егда своя овца изводитъ, предъ ними ходитъ, и овца послјдуютъ Ему, зане вјдятъ гласъ Его, по чюждему же не послјдуютъ, но бјжатъ отъ него, понеже не вјдятъ чюжаго гласа, нынј же пребывайте въ любви Моей, — и како пребудемъ въ ней, — научаетъ глаголя: аще заповјди Моя соблюдете, пребудете въ любви Моей [8]; и паки: аще вы пребудете въ словеси Моемъ, воистину ученицы Мои есте, и познаете истину, и истина свободитъ васъ [9]. Како убо не явственнј лжутъ глаголющіи, не подвигнути ничтоже отъ божественнаго евангелія, иже толь грозную и высокую догму отъ Христа убо ученикомъ гласомъ живымъ преданную, послјди паки по лјтјхъ нјколицјхъ Вознесенія Спасова на небеса, отъ блаженнаго Іоанна, въ Патмј островј Духомъ Святымъ и укончанну и запечатлјнну, не устрашаются преписующе, и приложеніемъ гласа чюжаго во священномъ исповјданіи вјры растлјвающе? или како похвалятся ктому, яко съ Христомъ сбираютъ, учительство Его не соблюдающе? како не вмјнятся тати и разбойницы, не евангельскою дверію въ дворъ овчій входяще, или како истиною свободятся отъ мукъ безконечныхъ, иже истинј евангельской не повинуются, отъ толикихъ и толь великихъ богоносныхъ отецъ, и лјты богопріятныхъ свидјтельствованой и утверженой? како же и отъ любве Спасовы не отлучатся, не хотящіи Его богословіи о Святјмъ Дусј послушати, но отъ растлјнныхъ тјхъ и по земли валяющихся лжемышленій упражняемыя мудрости міра сего отвлачими, Параклитова достоинства единоисходна отъ Отца, двјма началы зјло буе, да не реку нечестивј, написуютъ, не вјдуще, зане яко Единородный отъ Отца единаго и единъ раждательнј раждается, и собство Его есть единородство, такожде и Духъ Святый равенъ сый по всјхъ Отцу и Сыну, единъ Той исходнј отъ Отца единаго исходитъ, сего ради и единоисходно происхожденіе суще нарицается, и сіе собство Его есть усвоеннјйше? Но о сихъ убо потомъ речемъ.

Нынј же богоносныхъ мужей да прилагаемъ заповјди, яко објщахомъ. Абіе же и Павелъ божественный отъ іудейскаго мрака, вкупј же и неистовства возбнувъ, и истинныя лозы чашю животворную всю испивъ, и Спасово изволеніе познавъ извјстнјйше, къ Колоссаемъ пиша заповјдаетъ: блюдитеся, да никто васъ будетъ прельщая философіею и тщетною лестію, по преданію человјческому, по стихіямъ міра, а не по Христј [10]; такожде и Галатовъ утвердити хотя, глаголетъ: но аще мы, или ангелъ съ небесе благовјститъ вамъ паче, еже благовјстихомъ вамъ, анафема да будетъ; якоже предрјхомъ, и нынј паки глаголемъ, аще кто благовјствуетъ паче, еже пріясте, анафема да будетъ [11]. Зри, честнјйшій мужю! како блаженый Павелъ философіи достоинство прелесть нарицаетъ тщетную и крадущу простыхъ разумы, аки по преданію человјкъ, по стихіямъ міра, а не по Христј сущю. Ни ли тою латинстіи сынове ходятъ днесь и превращаютъ апостольскую истину? Или умомъ ко училищемъ италійскимъ, и тамо узриши по подобію потоковъ текущихъ, наипаче потопляющихъ Аристотеля и Платона, и иже окрестъ ихъ. И никая въ нихъ догма крјпка непщуется, ни человјческая, ни божественная, аще не аристотельскія силлогизмы тјмъ утвердятъ сію догму. И аще не согласится съ художественнымъ, или яко худјйше то отринуша, или еже видится сопротивно быти художеству, сіе отсјцающе ко угоженію аристотельскаго художества премјниша, и яко истиннјйше заступаютъ. И что убо тебј возглаголю, елико беззаконнуютъ днесь латинстіи сынове, отъ философіи тщательнаго прелщенія прельщаеми по апостолу, о безсмертіи души, и о наслажденіи праведныхъ будущемъ, и о строеніи вјрныхъ отъ настоящія жизни отходящихъ; яже вся страждутъ, занеже послјдуютъ паче внјшнему діалектическу вјдјнію, неже внутренјй церковной и богодарованной философіи. Но добро убо воистину достолюбно словесъ внјшнихъ вјдјніе, но елико къ навыченію, еже правј глаголати и къ наощренію разума и очищенію, а не во обрјтеніе божественныхъ догматъ и въ разсужденіе. Понеже выше помышленія всякаго сія суть, и выше зрјнія всякаго существеннаго и несущественаго; вјрою токмо зрима и познаваема, и всякаго художества словесна отбјгаютъ, и выспрь возлјтаютъ, еже добрј свјдый блаженный Іоаннъ Златоустый, таковая глаголетъ въ словј о серафимјхъ, идјже протолкуетъ видјнная блаженнымъ пророкомъ Исаіемъ. Имјютъ же сице словеса его златая: яко убо видј, глагола, коимже чиномъ, умолча; пріемлю глаголемая, а не тонцј испытаю умолчаная. Разумјю откровенная, не истязаю сокровенныхъ. Сего бо ради сокровена бјша: поставъ златъ есть писаній чтеніе, основа злата, и утóкъ златъ; не сотку паучины поставовъ, моихъ помышленій неможеніе вјмъ; не прелагай предјлъ вјчныхъ, глаголетъ, яже положиша отцы твои; предјлы подвизати небезбјдно есть; и како, яже Богъ намъ положилъ, преложимъ? О неисповјдимаго блаженнаго оного отца благоговјинства, господине Ѳеодоре! гóре же нашему дерзостному безсрамію, еже смјемъ на божественная таинства, яже отънюдъ непостизаемая самјмъ ангеломъ суть. Той таковъ и толь великъ въ добродјтели бывъ, не смјяше множае что неже рабъ достоинъ бј видјти или глаголати, но доволенъ бывъ въ глаголанныхъ пророкомъ, паучиннымъ поставомъ уподоби, умаляя боголјпная своя помышленія. Мы же большимъ много разстояніемъ отстояще отъ благодати и премудрости, отъ небесъ въ немъ обитаемыя, неже отъ неуподобляемаго и ангельскаго житія его и святости, иже множае прахъ страстей привлачимъ, и по подобію безсловесныхъ скотовъ гнуснымъ сладострастіемъ прилјпляющеся, малою же нјкоею искрою внјшняго любопрјнія паче, неже философіи себе разжегше, и отъинудј иніи вскочивше аки дивіи звјри, ризу Церкви истканную отъ вышняго богословія, раздираемъ лютј діалектическими нужами и софисмамы стязаемся всуе показати и человјкомъ реченная священная таинства, яже отнюдъ неизреченная и неудобь разумјваема, токмо же единой Святјй Троицј вјдома суть. И тойже убо глаголетъ: предјлы подвизати небезбјдно естъ; и како, яже намъ Богъ положилъ, преложимъ? Ты же, Николае, не устрашился толь веліе и крјпкое основаніе всею божественнаго дому непорочныя вјры нашея, уставленное убо прежде отъ Бога, потомъ отъ толикихъ и толь веліихъ божественныхъ отецъ составлено и утвержено, насиліи софисматскими гнусными разорити покушаяся. Ни ли неистовство и изступленіе ума явное сія суть? Но обличительно убо яко непотребно и созданія никоего, или малого нјкоего творящее, оставляемо есть; показателное же, аки паче созидающее слышителе, и дјйствуемо есть, еже помышленіе быти подобаетъ всјмъ проповјдателемъ истины. Но Павелъ убо божественный сице утвердилъ.

Время же уже и премудрјйшаго Діонисія, нареченнаго Ареопагита, услышати, что отъ тјхъже намъ повелјваетъ, како попущаетъ намъ искати о божественныхъ ѵпостасехъ; глаголетъ бо: да держимъ яже божественнј намъ отъ божественныхъ писаній показана суть, зане всяко даяніе благо и всякъ даръ совершенъ свыше есть сходя отъ Тебе Отца свјтовъ, и все отъ Отца двизаемаго свјтоявленія происхожденіе къ намъ благодатнј приходящее, паки яко соединяющая сила обрящется къ собрателя Отца единству и богозрителной простотј; ибо отъ Того вся и въ Него, якоже священное слово глаголетъ. И той убо таковъ и толь велій глаголетъ: да держимъ, сирјчь удерживаемъ крјпцј, яже намъ божественнј откровенна бјша отъ Святыя Троицы; ты же, о человјче, не устрашишилися, сіе подвизая и иныхъ призывая къ таковой ямј. Но услышимъ и кая насъ учитъ мудрствовати о превышесущномъ Божествј; глаголетъ бо, яже вышесущественнаго богорожденія не пріобщаются единъ ко другому, единъ же источникъ вышесущественнаго Божества Отецъ есть, не сущу Сыну Отцу, ниже Отцу Сыну; явј, яко таже и о Дусј Святјмъ. Аще бо вјдалъ бы и Сына источника Духа, не убо реклъ бы единаго источника Отца, еже бо едино есть, не пріемлетъ другаго. И паки глаголетъ тойже, яко источникъ Божества Отецъ есть, Сынъ же и Духъ богорожденія, аще сице лјпо есть рещи, отрасли богорожденіи, аки цвјты и вышесущественіи свјтове, отъ священныхъ словесъ пріяхомъ. Что убо свјтлјйше и достовјрнјйше быти можетъ свидјтельства сего, аще бо Павелъ бј таинственнј уча священнаго Діонисія, сокровенная и неизреченная вышесущественнаго Божества? Той глаголетъ явј, не преобращатися единому къ другому, яже вышесущественнаго богорожденія, сирјчь собства усвоеннјйшая богоначальныхъ ѵпостасей, сирјчь нерожденіе Отца, и Сына рожденіе, и Духа Святаго происхожденіе. Латини же единою все чествованіе отвергше, преобращаема сія показующе, не срамляются, тако явственнј на истину борюще, еже бы исповјдати Сына совиновна Отцу быти въ происхожденіи Духа, что ино показати хотятъ, токмо прехожденіе собства еже происходити и къ Сыну бывшее, яко покажется напреди. И той же паки глаголетъ: единъ источникъ вышесущественнаго Божества Отецъ есть. И ты не срамляешилися и Сына вкупј показуя источника Божества? и аще твое мнјніе попустится, како слово святаго Діонисія пребудетъ, именовавше Сына и Духа отрасли и цвјты отъ Отеческаго корене возрастшихъ обоихъ? отрасль Сынъ, отрасль и Духъ Святый; цвјтъ такожде Сынъ, цвјтъ и Духъ Святый. И не рече: отрасль и цвјтъ единственнј, но отрасли и цвјты множественнј, да покажетъ не растущая другъ отъ друга, но отъ единаго Отца, якоже отъ корене обоя равночестно растуща. Откуду бо пріялъ еси, или отъ коего иного Павла услышалъ еси, егоже проповјдуеши днесь благочестія, о человјче? Той глаголетъ: да держимъ, и ты ли глаголеши область имјти предвизати отеческія предјлы сія и самому папј римскому, и претворити я, яко похощеши? кто тебј область сію даде? исправляти повелјно есть тебј клевретомъ твоимъ человјкомъ спасеніе, не якоже ты хощеши, но спасительнымъ гласомъ священныхъ евангелій, и по апостольскимъ и отеческимъ преданіемъ, сице убо хощеши услышати и самъ: блаженъ еси Симоне варъ Іона, яко плоть и кровь не яви тебј, но Отецъ Мой Иже на небесјхъ; зане, аще инако сотвориши, зри, да не услышиши и самъ страшнаго онаго гласа: отъиди вспять мене сатана, соблазнъ Ми еси, зане не мудрствуеши, яже Божія суть, но яже человјческая. Сего бо ради и ключа воспріялъ еси знаменовательныхъ сущихъ невидимыхъ сокровищь въ тайнј сокровеныхъ, яко отверзъ да покажеши ихъ, кацјхъ Владыка дому положилъ въ апостольскихъ ковчезјхъ хартіами и черниломъ и животворными словесы, а не яко да иная за иная износиши чюжа нјкая, и сія діалектическими насильствы и образописаніи, а не паче духовными просвјщеніи и вјрными исповјданіи, утвердити покушаешися. И якоже не смјемъ ничтоже мудрствовати или рещи кромј, яже священное писаніе предаде намъ, явленнј священный Діонисій показуетъ глаголя: весьма бо несмјемо есть глаголати, ни помышляти о вышесущественномъ Божествј, кромј яже божественнј намъ отъ священныхъ словесъ откровена суть. И назнаменай ми здј, о дивный Ѳеодоре, священнаго Діонисія благоговјинство! Несмјемо есть, рече, не токмо глаголати, но ниже помыслити нјчто кромј написанныхъ. Николай же, и иже о немъ въ таковую дерзость поползнушася, яко и образы гіометричными, сокровенное и не образуемое вышесущественнаго Божества кичишася показати кромј написаныхъ. Что же иное паче сокровено можетъ быти рожденія Единороднаго отъ Отца и происхожденія Параклита. Яже глубины Божія нарицаемы Параклита Павелъ испытовати изрече, глаголетъ бо: Духъ испытаетъ и глубины Божія [12]. Въ коей убо вышеестественјй силј разума высокаго и постижителнаго достоинства утверждаеми, во глубину ту не ý разумјваемую и неиспытанную божествоннаго сокровенія, еже съкры тма, по божественному Давыду, — и положилъ, глаголетъ, тму въ сокровеніе свое, — воврещи себе не устрашимся, иже ни своего естества разумјти можемъ, коимъ чиномъ, сирјчь, разумное чювственному смјшено есть? или кое есть совокупленіе и соузъ ихъ? ни ли велій смјхъ сія сутъ, и неистовство явное? не довлјетъ ли тебј, о человјче, соблюдати искушенная отъ толикихъ святыхъ мужей и временъ благопріятныхъ и свою немошь познати? И Павелъ убо на третіе небо восхищеный и неизреченные глаголы слышавъ, вопіетъ глаголя: яко нынј убо отчасти разумјваемъ и отчасти пророчествуемъ [13]; той убо отчасти, а ты отъ всего, еже бо стязатися хитрословіи человјческихъ умышленій показати сокровеніе Божества, како имать въ себј естествомъ и чиномъ, что ино знаменуетъ, токмо еже все уже разумјша.

Но да возвратимъ слово, откуду изыде извлечено, и да услышимъ иныхъ блаженныхъ отецъ, что намъ повелјваютъ, о еже соблюдати цјло и неподвижно священное исповјданіе вјры, ни прилагающимъ что, ниже отъемлющимъ отъ того. При Ѳеодосіи бо юномъ, святымъ и вселенскимъ третіимъ Соборомъ въ Ефесј собранномъ, и злочестиваго Несторія отъ общества вјрныхъ отсјкшимъ, начальникомъ пресвятјйшимъ Кириломъ, и мјсто и достоинство держащимъ преблаженнјйшаго Келестина папы римскаго, — таковая къ священному сему Собору пишетъ преблаженнјйшій Келестинъ о божественномъ и священномъ исповјданіи вјры, еже и донынј соблюдается у насъ дјло благодатію Христовою, глаголетъ же сице: кто убо когда недостоинъ, анафематј осужденъ бысть, отъемля нјчто, или прилагая въ вјрј; яже бо полнј и явственнј преданная намъ отъ святыхъ отецъ, ниже приложеніе, ниже убавленіе пріемлютъ. Чтохомъ бо въ книгахъ нашихъ, ниже приложити подобаетъ, ниже убавити, великою бо и прилагающаго и убавляющаго мукою связуютъ, тјмже и огнь и желјзо приготоваемъ, понеже инако не суть исцјляемы язвы. Слышиши ли, Николае, яко полнј и явственј, сирјчь, совершеннјйша и свјтлјйша, и якоже мощно бј имъ уразумјти и намъ вмјстити, такожде и явственнј, сирјчь, чистјйше, и никоего къ тому просвјтлјнія требующая богословіемъ речена суть отъ блаженныхъ отецъ догмата, яже намъ предана суть въ священномъ исповјданіи вјры; но и анафематј осуждаютъ иже таковое что смјти восхощетъ, сирјчь, премјнити и приложити, или убавити, и огнемъ и желјзомъ, сирјчь, прокляти, и отлучити и отъ вјрныхъ общества отсјцаютъ. Сему убо согласуяй блаженный Кѵрилъ, таковая глаголетъ, яко отъ лица священнаго его Собора, въ единой епистоліи своей, еяже посла ко Іоанну патріарху антіохійскому, себе оправдая, о нихъ же Ѳеодоритъ епископъ Кѵра града оклевета его, глаголя, и отъ Сына догматствующа Духа Святаго присносущнј и существеннј происходити. Супротивъ тјхъ отвјщавъ, таковая рече: ни по коему чину, глаголетъ, подвигнутися подъемлемъ преданную отъ отецъ нашихъ вјру, сирјчь, вјры нашея исповјданіе, ниже попущаемъ себј, или инымъ, ниже глаголаніе примјнити отъ нихже лежатъ ту, или единъ преступити складъ, поминающе глаголющаго: да не прелагаеши предјлъ вјчныхъ, яже положиша отцы твои; не бјша бо тіи глаголющіи, но Духъ Иже отъ Бога и Отца, Иже убо исходитъ отъ Него, есть же не чюжь отъ Сына по слову существа. Слышиши ли, яко не токмо разума, но и реченіе и складъ возбраняетъ премјняти, и преступити не попущаетъ, глаголя, ни самъ себј или инымъ, яко отъ лица всего Собора, ибо вселенскій Соборъ бј, и тіи предјлъ положиша запрещенія, и страшныя онјхъ клятвы прогласиша, яже содержатся въ соборнјй книзј. Аще убо себј не попущаютъ, какоже попустятъ тебј? Къ симъ назнаменуемо есть, о премудрјйшій Ѳеодоре, яко патріархъ антіохійскій Іоаннъ, и иже съ нимъ восточніи епископи, такову епистолію пріемше, извјстившеся о православіи Кѵриловј, миръ объяша и между себе согласишася, прежде разлучени бывше, глаголютъ убо сія Ѳеодоритомъ, пишущимъ во общемъ. Почетше епископи сія епистоліи и испытавше прилјжнј разумъ ея, обрјтохомъ согласна реченнымъ, яже оттуду послана быша, евангельскимъ бо благородіемъ украшаются, и Богъ совершенъ и человјкъ, Господь нашъ Iсусъ Христосъ въ нихъ проповјдается, и Духъ же Святый не отъ Сына или Сыномъ существо имјя, но отъ Отца иходя, свой же Сыну, яко единосущенъ именуемъ. Что сего свидјтельства явственнјйши и достовјрнјйши противу латинскаго противленія? епископи оклеветаху блаженаго Кѵрила, яко догматствуетъ Духа и отъ Сына, и Сыномъ имјти присносущнј существо, сирјчь, происходити; онъ же оклеветаніе сіе отсылая, оправдаетъ себе явственнј не мудрствовати таковая, но отъ Отца исходити Его по преданію священныхъ писаній, быти же и отъ Сына (?) чюжю по словеси существа, сирјчь, яко тогожде существа и естества сый, а не и по чину бытія, сирјчь, происхожденія. Епископи гласы тіи пріемше и похваливше, глаголютъ Ѳеодоритомъ, и Духъ же Святый не отъ Сына или Сыномъ существо имјя, но отъ Отца происходя, свой же Сыну именуемь яко единосущенъ. Се како явственно мудрованіе блаженнаго Кѵрила, еже имјяше о происхожденіи Духа Святаго, отвсюду является. Латини же и святјмъ сопротивная покушаются показати, и не срамляются противу сицевыя явственныя истины борюще; но блаженный убо Кѵрилъ сице мудрствуетъ.

Что же и Соборъ четвертый, въ Халкидонј собраный на Евтихія и Діоскора, при Маркіанј царј, повелј о священномъ исповјданіи вјры, да слышимъ; котораго Собора Левъ преблаженнјйшій папа римскій украшаше и утверждаше Паскасіемъ и Ликиньсіемъ и Вонифатіемъ, освященными намјстники своими. Глаголетъ убо, по прочтеніи священнаго исповјданія вјры, еже составиша первый и вторый Соборъ, а третій утвердилъ: повелј святый и вселенскій Соборъ сей, иную вјру никомуже попущену быти износити. или списовати, или составляти или учити, или показовати. А иже смјютъ иную вјру списовати или составляти, или износити, тіи, аще епископи будутъ или клирицы, да лишени будутъ, епископи убо отъ епископства, клирицы же отъ клироса, аще же простіи будутъ, да прокленутся тіи. Таже и тјмиже глаголы и прочіи Соборы повелјваютъ, и пятый и шестый и седмый, иже вопіетъ свјтлымъ гласомъ, глаголя: мы законы церковныя соблюдаемъ, мы предјлы отеческія хранимъ, мы прилагающихъ нјчто, или отъемлющихъ отъ Церкве, проклинаемъ. И паки: аще кто все преданіе церковное, написанное или не писанное отметаетъ, да будетъ анафема. Что убо къ симъ рекутъ истины супостати? Како же и отъ анафематы толикихъ и толь веліихъ блаженныхъ отецъ себе изъяти возмогутъ, и аще бесчисленнј славятся о Римј и величествј его? не бо отъ градъ и престоловъ апостольское величество и область состоится, но отъ догматъ правыхъ вјры и сожитія божественнаго, апостольскими и отеческими учительствы управляемо есть и познавается. Зане ниже врача убо наречемъ, дондеже правј мудрствуемъ, иже убо ризами врачевскима одјянъ есть внјуду, вјдјнія же врачевскаго не имать въ себј согласна одјяніемъ, но вјдущаго свидјніемъ извјстнымъ яже художества суть дјйствовати, по преданію премудрјйшихъ врачевъ, прежде его бывшихъ, того наречемъ врача, и ко исцјленію недуговъ призываемъ, аще убо о своемъ здравіи попеченіе имјемъ. Но да слышимъ, что блаженный Іоаннъ, иже отъ Дамаска, заповјдаетъ намъ о тјхъ, глаголетъ бо сице: вся преданная намъ и закономъ и пророки и евангелисты, и познаваемъ и чествуемъ, ничтоже дале ищуще. Богъ бо сый благъ и всякаго блага податель; еже бо угодно бј намъ разумјти, откры, а еже не могохомъ повести, премолча. Сія мы да возлюбимъ, и въ тјхъ да пребываемъ, не прелагающе предјлъ вјчныхъ, ниже преступающе божественное преданіе. Иже бо мало что или велико отъ божественныхъ отметаетъ, весь отметаетъ законъ, и считается вкупј съ преступающими его. Се и блаженный сей преславный просвјтитель вселеннјй, церковный славій, сладкопјсненный органъ Пресвятаго Духа, вся, глаголетъ, пріемлемъ и познаваемъ и чествуемъ, и паче сихъ ничтоже взыскуемъ, ни испытуемъ. Что же ли ради? зане, глаголетъ, Богъ благъ сый, яже вјсть намъ полезна быти откры, сего ради и довлимся сими, сирјчь, да почіемъ въ сихъ, яко отъ Бога уставленныхъ. И аще не излишнюю честь симъ подати восхощемъ, поне повелјваемымъ земскими цари равночестна да непщуемъ сія, а не испытовательнј сія яко и она благопокорнј да удержимъ. Но и римляне къ симъ глуси суть, по подобію аспида глуха, затыкающаго уши свои, и не хотятъ воспріяти цјльбы, но единою надмени киченіемъ и тщетнымъ мнјніемъ, что не падаетъ подъ діалектическими нуждами злохитреными, аки гнило отметаютъ съ великимъ презорствомъ.

Но сія убо по семъ; нынј же, яже пристоятъ къ приложенію нашему, разсмотряемъ. При Василіи убо царј констянтинопольскомъ, нарицаемомъ Македонянинј, и Фотіи пресвятјйшемъ патріарсј, егда Іоаннъ пресвятјйшій папа римскій патріаршескія кормила правяше, всякимъ православіемъ въ немъ и честностію евангельскаго житія украшенъ, Соборъ вселенскій собранъ бысть въ Констянтинополи, повелјніемъ царевымъ и святыхъ патріархъ, ко утвержденію святаго седмаго собора, и къ разоренію нововозвышенныя латинскія ереси, по подобію зјльныя бури, святую Божію Церковь смущающія, въ немже посланіи бјша отъ пресвятјйшаго папы Іоанна намјстницы его, Павелъ и Евгеній, божественніи епископи, и третій съ ними Петръ презвитеръ и кардиналъ. Сей же убо священный соборъ, по утвержденіи седмаго собора, и латинскую ересь довольнј обличивъ, и укрјпляющихъ ту анафематј предавъ, таковое повелјніе изънесе на тјхъ, иже смјша приложити нјчто во исповјданіи вјры. Аще бо кто, глаголетъ, кромј сего священнаго исповјданія вјры смјетъ ино писати, или приложити, или отъяти, и заповјдь соборну дерзнетъ именовати, да будетъ осужденъ, и отъ всякаго христіянскаго сожитія изверженъ. Сія убо божественный овященный Соборъ отсјченіе изъявилъ противу беззаконія того. О нихъже Іоаннъ преблаженнјйшій папа возвеселився и удовлився таковая пишетъ ко святјйшему патріарху Фотію, пространнје и чистје, приложеніе еже въ священномъ исповјданіи вјры отнюдъ отвергъ; рече бо: ибо твое братство добрј вјсть, яко егда пріиде къ намъ, иже мало прежде посланъ бысть отъ того, и о святјмъ исповјданіи вјры насъ испыталъ, обрјлъ насъ соблюдающихъ цјло, якоже отъ начала намъ предано бысть, ниже прилагающихъ что, ниже отъемлющихъ, извјстно вјдущихъ, яко таковая дерзающихъ тягчайшее осужденіе ждущее соблюдается; и сего ради паки изъявляемъ святыни твоей, да имјемъ извјстно о мудрованіи, о немже случишася соблазны посредј церквей Божіихъ, яко не токмо не глаголемъ сего, но и тјхъ, иже первје смјша своимъ теченіемъ сіе творити, яко преступники Божіихъ глаголъ, и претворители феологіи Господа Iсуса Христа, и прочихъ отецъ, иже соборнј собрани, предаша святое исповјданіе вјры, и съ Іудою съчиняемъ, зане тоже, что и той, дерзнуша, не предавше въ смерть Господское тјло, но вјрныхъ, иже суть уды тјлесе того, отсјкше и раздјливше другъ отъ друга, и тако въ вјчную смерть пославше, и наипаче себе, якоже неправј сотвори реченый ученикъ. Се коль извјстно преблаженнјйшій той отецъ, краткими словесы сими, ненавидиму и отбјгаему показа ересь, яко съ Іудою соучиняти начавшихъ и послј тјхъ укрјпляющихъ ю. Что убо къ симъ паки возмогутъ вопреки глаголати супостати. Или еще и къ симъ затыкаютъ уши по подобію аспида глуха и не пріемлютъ обличеніа? ибо ни вчера ни третіаго дне прежде, или во углј и въ темнјмъ мјстј речена и содјлана быша, дерзнути глаголати, аще весма мудрствуютъ и о истинј пекутся. Ни ли множае, неже шесть сотъ лјтъ, прейдоша, отнелјже сіа писаніа съдјлана суть? не въ Римј ли ветхомъ и въ самомъ царствующемъ тогда градовомъ, предъ самодержцы и архіереи и учители, егда не токмо во всей богодухновенной философіи, и глаголемой внјшней совершеннјйше цвјтяху и украшахуся оба пресвятјйшіи грады, но святостію многою, и житіемъ цјломудренымъ, и кротостію духовною, и священническій и гражданскій чинъ преизобильнјйше облистоваху, сіи дјйствовахуся, но убо и иже послј сего Іоанна преосвященный Адріанъ папа, глаголетъ пресвятјйшій Фотій, соборную епистолію, якоже бј обычай древній, къ тому Фотію пославъ, тоже благочестіе тою епистоліею проповјдаше, и Духа отъ Отца богословяше происходити.

И что потреба много глаголати, возможну сущу намъ заграждати уста на истину борющихъ, имъже сотвори блаженный папа римскій Левъ? Той бо преблаженнјйшій Левъ папа, узрјвъ новоявленую сію ересь, тлящу святую и великую церковь, яже при немъ, ко многимъ инымъ, яже сотвори, ко истребленію сего еретическаго недуга, умысли тако нјчто, посланіи соборными, области и страны, яже подъ нимъ, протече, повелјвая святымъ повсюду Божіимъ церквамъ, нектому латынскою рјчію, но еллинскимъ гласомъ святыя вјры исповјданіе, кромј прикладу — и отъ Сына, гласити во время божественеыя литоргіи, два нјкая симъ сотворяя, едино убо, яко греческого рјчію пригоднјйшею сущею, во извјщеніе реченій, пјваему священному исповјданію вјры, ереси ямы безъ бјды да избјжитъ множество вјрныхъ, иже подъ нимъ, второе же, да союзъ любве, иже изначала бысть къ Церкви восточнјй, обновити, уже начавша разрјшитися злоизволенми еретичествовати хотјвшихъ, и да покажетъ всјмъ, каковою честію и чествованіемъ должна есть имјтися отъ всјхъ святая Божія Церкви [14] великая и апостольская Константинопольская, и прочіи восточныя святыя Божія Церкви, сирјчь, Александрійская, Антіохійская и Iеросалимская. Сице тіи блаженіи во истину ученицы прекротчайшаго Iсуса, и любити другъ друга, и честію превозвышати вјдяху, въ простотј сердца, и дусј кротости. Не токмо же сіе едино преблаженнјйшій той Левъ сотвори, яко повјдаетъ пресвятјйшій Фотій, но и въ газофилакіи святыхъ апостолъ, отъ древнихъ временъ благочестію цвјтущу, сохранены обрјте два щита, иже письмены и глаголы греческими написано имјяху священное исповјданіе непорочныя вјры, кромј прикладу — и отъ Сына, сія же изнесе показаннымъ быти повелј, и предъ всјмъ римскимъ множествомъ прочитатися, якоже другій нјкій боговидецъ Моѵсій, богописанныя скрижали отъ Бога пріемъ, и не повинующимся людемъ показуя, да поне сице понудитъ ихъ, отложившихъ жесточь сердца, любовь воспріимутъ. Но въ злохитренную душу, глаголетъ премудрјйшій Соломонъ, премудрость не входитъ; сего ради и тіи, единою поглотивше удицу киченія и мнјнія, юже ловецъ злобы спустилъ имъ на пагубу, неисцјльни пребыша и неисправлени. Но тіи убо въ путь свой да ходятъ; мы же, малыми нјкими довольное показаніе подавше послушающымъ божественныхъ писаній, въ простотј здравыя вјры и страхомъ Божіимъ и всею истиною свидјтельствоваше, неподобати отнюдъ нјчто о иже во исповјданіи вјры, или мало или велико, ни гласа, ни склада тамо положеннаго предвизати или премјняти, но цјло подобаетъ хранити то всею силою и вниманіемъ аки зјницу ока, да не подъ анафему толикихъ и толь великихъ святыхъ отецъ себе подложимъ.

Здј первую часть слова заключаемъ, юже твоя свјтлость воспріявши и прочетши, аще что добрј речено бывше обрящетъ въ ней, подателю всјхъ благихъ Богу сіе да написуетъ, Егоже благодатію укрјпляеми, скоро и прочую часть того слова пошлемъ, въ нейже обличеніе главъ Николаевыхъ, поелику Богъ помощь подастъ, сотворимъ, ихъже изложи Николай нјмчинъ на правое богословіе Всесвятаго Духа, яко објщахомъ тебј. Здравствуй!

Примјчанiе:
[1] Съ такимъ заглавіемъ помјщаются какъ это слово, такъ и слјдующее за нимъ о Святомъ Духј (которое имјетъ еще и другое заглавіе) въ рукописяхъ и въ печатной Кирилловой книгј. Оба они составлаютъ части одного слова, написаннаго преп. Максимомъ противъ папскаго посла Николая Шомберга, который, во время своего пребыванія въ Москвј, успјлъ склонить на свою сторону какого-то знаменитаго боярина Ѳеодора.
[2] горьковатую.
[3] Іоан. 1, 4.
[4] Іоан. 3, 8.
[5] Матф. 5, 15.
[6] Матф. 7, 26.
[7] Іоан. 10, 1.
[8] Іоан. 16, 10.
[9] Іоан. 8, 32.
[10] Колос. 2, 8.
[11] Гал. 1, 8.
[12] 1 Кор. 2, 10.
[13] 1 Кор. 13, 9.
[14] Церковь.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 188-213.