Воспой, душе! божественыхъ апостолъ Петра и Павла, въ прочихъ верховныя и первопрестолныя, добростоящія звјзды церкви Христовј, иже отъ мерзостныя прелести идольскыя и служенія бјсовомъ, къ благочестія и истины свјту языкы наставишя животочьными свјтосіяніи божественыхъ ученій. Воспой же по сущей ти силј! достойныхъ же пјній самјмъ уступи горнјйшимъ умомъ, пјснь же приношя имъ черьплющи отъ спасительныхъ источникъ божественнаго Израиля; оного бо божественнаго корени отрасли сіи, житія же и слова божественными свјтлостьми преизящнј востекьше къ славј онаго, на нихже, аки на конехъ, вочеловјчивыйся Богъ Слово яздя мысленнј, возмути премногія мерзскыя воды, сирјчь таинстна мерзскыхъ бјсовъ, яже преже покрыша всю землю глубокымь мракомь богомерскыхь идолъ, и землю, преже доброплодную убо, таже въ слатину преложшуся, злобою своихъ жителей, дјланіи божествеными премудрыхъ сихъ, явилъ есть пакы плоды благоуханнјйшими сладцј веселящу Владыку своего, и преже пустую и не причястну влагы, струями божественными приснотекущыхъ сихь источникъ, показа преизобилующу и обливаему струями животочныхъ водъ. Сіи суть, иже отъ Божественаю огня Параклитова облиставшія молнія и аки стрјлы испущены, иже сладчяйшимъ свјтомъ ученія и чюдесъ жигательнымъ огнемъ отгнашя всякій мракъ отъ земли басней лжеглаголаныхъ бјсы изобрјтенныхъ, трисіянную же единого Богоначалія честную проповјдь въ мыслехъ вјрныхъ облисташя и соблюдаютъ присно, ихже мотыками слова мысленными и обильными напаяніи Духа Святаго, таиньственіи источницы исполнени водъ животочныхъ явишяся, и земли основанія открышяся, сирјчь божественіи чиноначальницы вјрныхъ, иже всенощными молитвами и духовными напаяніи, основанія явишяся земли и къ божественыхъ разумјній прозябенію показаша ю благоискусну. Сіи суть глаголанная мысленно мудрымъ псалмопјвцјмь Божію повјдающе небеса славу, иже блистаніи божественыхъ учительствъ и молніями выше ума чюдесъ преизящнје украсившеся, явишяся всей твари звјзда та небесная, ихъ же богогромное вјщаніе всю возгремј подсолнечную, аки божественныя трубы, высокою проповјдію богословія, превосходящаго ума и слова всякого, и преже солнечныя мысли, по подобію скотъ къ земли пригвожденныя не похвально, воздвижуще, увјщавше нерадјти убо вседушьно всјхъ вкупј тлјющихъ красныхъ земленыхъ, всею же и мыслію желати единыхъ вјчныхъ, на небесехъ имјющимъ всегда мысли своя, и тщатися внутръ быти Божественныя славы, богоугодными житія же и слова нравы, прилјжаніе равно и обоихъ творящимъ, зане другое кромј другаго не пользуетъ, смјхъ же паче и руганіе есть предъ мыслящими добрј, якоже и ступаніе некрасно и нетвердо есть, единою ногою бываемо, такожде и лице нјсть красновидно, единымъ окомъ скуднј просвјщаемо. А еже отъ обою растворено боголюбное житіе и добрј достигшее къ концу общихъ предјлъ, еже есть смерть, совершенна показало есть Христова стаинника, неложно вожделјвша отъ всея душа не сію тлјющу, но присно пребывающую жизнь; къ благородію бо древа и плода истязуетъ благопотребна, якоже пакы отрјваетъ сія, худј растуща, ниже всякому Господа просто глаголющу Его, но совершающу, рече, теплымъ раченіемъ души, волю Отца, иже на небесехъ, внити въ Царство Небесное [1]. Такожде и влјзшя въ бракы съ худою одеждею, сирјчь непотщавшася къ свјтовидней бани пристяжати истканную благолјпнј отъ благовјрныхъ дјлъ одежду, повелј отъ среды блаженныхъ пирянъ [2] взята воврещи въ негасимый огнь, не да очистився, яко блядива ересь вјщаетъ, пакы причястится божественаго пированіа, но да въ немъ сожжется въ бесконечныя вјкы. Такожде же и украшеннымъ убо добротою дјвьственою, масла же не пріемшимъ въ сосудехъ своихъ, сирјчь милосердіемъ, еже къ нищымъ, не просвјтившимъ доброты дјвьства своего, затворися, увы! дверь женихова, и како къ нему приступишя, не предочистившеся чистительнымь огнемъ, не укаряетъ ихь Божественый отвјтъ, нижè пакы повелјваетъ имъ: идите, прежде очиститеся пламенемъ огненымъ, таже сице внидите въ чертогъ Мой, но тјмъ, еже: не вјмъ васъ, далече отсылаетъ ихъ. Увы и увы! Аще убо божественна и преестественная похвала дјвьства далече таинственнаго невјстника отсылается, за еже не украсися сообщителнымъ масломъ,—сообщително масло и елей милостыня, еже есть къ нищимъ, — а иже къ грабленіемъ и беззаконнымъ лихвамъ, чяродјяніемъ же и убійствомъ и различнымъ студодјяніемъ гнуснымъ разстлјвшеся по всему житію своему , како въ божественный чертогъ внидутъ, не попекшеся, преже исхода, сотворити плоды покаянія достойны прегрјшеній своихъ? Дјлъ бо нынјшній вјкъ, якоже глаголеть божественый проповјдникъ, вјнцомъ же будущій. Разликующее [3] скончяніе убогаго и насладившагося богатаго явј сіе показа, ихже душя умершыхъ каяждо абіе постигла есть мјста своего, ова убо геенну, ова же нјдра Авраама; а еже посреди има утвержена велія пропасть, возбраняющая имъ, еже другъ къ другу, стремленіе, тойжф патріархъ, смышленно поношая насладившуся, а не маловремянными надежами чистительнаго огня прохлажая онаго, явленнјйши сказуетъ, яко въ семъ житіи, аки въ нјкоей стадіи, уставлено есть подвизающимся оцыщати душевныя грјхы, всяческыми благоугодными Богу дјяніи, и конечнымъ терпјніемъ скорбныхъ душевныхъ, вольныхъ же и невольныхъ. Судія сія извјщалъ таинствеными словесы. Послушаимъ Его: отступимъ же блядивыхъ еретическыхъ, божественымъ гласомъ, въ той же день вселяющымъ въ раи злодјя, кромј очищенія огня чистительнаго, научяеми, далече себе самјхъ отверземъ чюжія бляди [4]; воздыханіи же трудовъ и каплями слезными, преже даже не разыдется торжество житійское, грјхы омыимъ, якоже учитъ измываяй ложе и постелю свою на всяку нощь; на томъ бо страшномъ часј исхода, рече, нјсть иже Божіе поминаніе имать, ниже есть, иже исповјстся ему въ адј. Еда, рече мертвымъ сотвориши чюдеса; еда повјсть кто въ гробј милость твою и истину твою въ погибели, еда познана будутъ во тмј чюдеса твоя и правда твоя въ земли забвеннјй [5]. Явственнј же сими всјми являетъ псалмопјніе: щедротамъ и правдј, и чюдесемъ, и истинј Божіей онјмъ являтися, елицы, о нихже согрјшишя, достохвально показашя покаяніе, прежде отселе исхода своего. Царство бо небесное нужно есть и нужьницы восхыщають è [6], якоже слышимъ, а не насытившеися всякыя сладчайшія пища и гнусныхъ и студныхъ плотьскыхъ похотей, таже своея злобы прикрывающе чистительнымь пламенемь, преже суда, себе по еже отселе исхода очищающеи. Сице бо вотьще явится, скончяваяся весь вкупј подвигъ спасительнаго слова, сирјчь евангельскыхъ догматъ и учительствъ, Судію являющь огнемъ нестерпимымъ дышуща на нежившихъ по заповјдемъ Его, и въ огни негасимјмъ осуждающа непомиловавьшыхъ убогая, а не сподобляюща ихъ славы Божественныя, огнемъ привременнымъ очищенныхъ прежде суда, и еже паче всјхъ удивленія и страха достойно, самјхъ чюдеса сотворшихъ, и духы лукавыя отъ человјкъ отгнавшихъ, и Его Божественнымъ призываніемъ пророчествовавшыхъ, съ прјщеніемь отрјвающа Божественнаго судища своего, ниже познавша когда ихъ, свидјтельствующа, зане въ неподобныя похоти душъ своихъ истощишя благодать духовную, ниже потщашяся никогдаже прославити Господа на земли своими удесы, якоже подобаше, еще же и вотще явится. Но милосердъ буди ми, всјхъ Царю и Боже и Владыко, оболькся въ человјчьское существо, и поставивъ законы грознјйшими прещеніи, и смерть пострадавъ неблагообразну на крестј! Аще убо праведно и довольно опослј хотяше вмјнити земнороднымъ, грјховъ, огнемъ привременнымъ, преже суда, очищатися, что бо и подобаше единому безгрјшному толикы досады претерпјти, спасенію человјческому сице удобну сущу? Аще же преподобному и негрјшному едину, многыми и лютыми страстьми, якоже самъ о себј явј глаголетъ, потребно бысть въ свою славу внити, да устрашимся иже не точію богоданныхъ заповјдей сопротивнымъ шествуемъ путемъ, емуже не огненно чищеніе, но, яко слышимъ, погыбель вјчна кончина есть, но еще отъ многаго безумія, и чюжемудренно и супротивушественно, чяемъ достизати въ нетлјнную славу пострадавшаго Христа. Играющихъ дјтей игранія сія, а не крјпка мудрованія твердаго камени, на немъже Христосъ своея церкви водрузи, измывъ ея своею Божественою кровію. Еще же бляди убо и смјхъ великъ будетъ запрјщенная беззаконно живущымъ, аще убо нјкто по всему житію своему, надјяся о еже по смерти огненномъ очищеніи, живетъ беззаконно, всяческымъ студодјяніемъ вдавъ себе, ниже истрезвився коли, и о нихже беззаконновалъ, не поболјвъ волею, ниже ястъ попелъ [7], аки хлјбъ, ниже съ плачемъ разствори питіе свое, ниже въ вретище оболькся, ниже весь день сјтуя ходивъ, о немъже его лядвія наполнишася поруганія, ниже на пречистый верхъ изліявъ многоцјнное мѵро божественныхъ раченій, ниже пречистыя ногы теплыми слезами измочивъ, древнюю блудницу подражая, такожде и иже грабленіи и беззаконными рјзоиманіи, и иными всяческыми богомерскыми прибыткы скопивъ себј бесчислено злато и сребро, не подражавъ же мытаря, отдавшаго четверицею, ниже раздавъ полъимјній нищымь, якоже и онъ, паче же имиже писанными [8] остави беззаконнымъ истязаніе сродникомъ и чюжимъ, безъ милости, по своемъ исходј, моря бјдныя и убогы, ихже подобаше ему ущедрити и разрјшити лютыхъ истязаній, да и самъ услышитъ ублажающь гласъ: дому сему днесь спасеніе, о единомъ же издыхающе глаголј семъ: кульпа мея, кульпа мея [9], сирјчь грјхъ мой, и триперстнемъ и двоеперьстнемъ удареніи своихъ устенъ и персей, внутрь абіе будутъ Божественныя славы, неволею очистившеся огнемъ, по исходј своемъ. Добро убо и нужно и спасительно есть, еже, отъ нихже кто съгрјшилъ, зазирати себе, но аще лишится изочтенныхъ выше псаломникомъ лјкованій [10], аще и вся та геенна страшная въ безконечныя вјкы очищаетъ, ниже сице избјжитъ вјчныхъ мукъ. Отступи бо, рече, зла, сотвори благое [11], и здравіе, рече, получивъ, ктому не согрјшай, да не горје что будетъ ти [12], а не чистительнымъ, рече, огнемъ чистъ будеши; и древо, не творящее плоды доброхвальны, отсјчено въ огнь вметаемо бываетъ [13], а не очистится; и сотворшеи добрая, въ въскресеніе нестарјющія жизни, рече, изыдутъ изъ гроба, а не сотворьшеи злая; они бо не въ въскресеніе жизни, но въ въскресеніе суда из гроба изыдутъ, а не отъ, иже по васъ, чистительнаго огня. Слово таинственно отъ сего разумјимъ, о друзи! и разумјвше да отверземъ всяко прјніе суетно. Иже добрая сотворшеи, сирјчь дјла, животъ получятъ нетлјнный, а не иже злая, таже по своемъ исходј, огнемъ маловременнымъ исчищьшеся преже суда. Что убо ино можетъ быти явленіе гласа сего Божественаго, посреди [14] животомъ вјчнымъ и преисподними муками? ничтоже ино явј свјдјтелствующаго, но праведныхъ убо абіе в наслјдіе призываетъ вјчныя державы, дјлателей же безаконнымъ дјломъ въ огни негасимомъ осужаетъ, а не славј Божественнјй сподобляетъ огнемь временнымъ преже суда исчищенныхъ. Еже бо добрая творити въ нынјшнемъ житіи лјть есть, дондеже душя совокуплени суть телесемъ своимъ и добрая или злая вкупј съ ними дјютъ своимъ изволеніемъ; тјмже убо, не огненнымъ очищеніемъ, еже по смерти, но твореніемъ добрыхъ дјлъ въ здјшнемъ житіи, нестарјющія жизни почести воспріимутъ произшедшеи из гробъ тогда благовјрніи. Къ симъ же Спасъ рече своимъ ученикомъ: узкыми и прискорьбными потщитеся враты внити, изволеную сице сказуя нужу и подвигы, ихже терпјти намъ подобаетъ, за обычныя душь нашихъ злыя похоти и злобы, ихже здј отмыватися явј повелј, шествіемъ узкаго и прискорбнаго пути, а не чистительнымъ, преже суда, огнемъ. Понеже мнози, рече, взыскавше не возмогутъ внутрь быти божественнаго чертога, ударяюще же изъвнјюду въ божественую дверь: еже, невјмъ васъ, откуду есте [15], услышятъ, а не огнемъ очищьшеся внутрь пріяти будутъ. Увы, увы! аще взыскующеи прискорбный и узкый путь не вси внити возмогутъ и всяко, зане незаконно подвизашяся, якоже божественый проповјдникъ Христовъ учитъ, а иже непрестанными устремленіи и вседушьно по пространному пути текущеи гдј явятся? Явј бо проповјдникъ вопіетъ [16]: нельститеся, ни студодје, ни хищницы ниже досадители, ниже, иже по ряду тјхъ исчитаеши, не будутъ внутрь славы нетлјнныя. А иже огнемъ сихъ, да еще преже суда, супротивнј Божественјй заповјди, очищающеи и внутрь славы Божія введуще ихъ, како не заблудишяся отъ истины? Рекъ бо: нельститеся; явј обличилъ есть лживое мудрованіе коринфянъ еже имјяху о тјхъ, иже въ послјднемъ издыханіи ждутъ словомъ студенымъ сотворити покаяніе о бесчисленныхъ своихъ согрјшеніихъ, ихже творенія никакоже потщавшеся, преже исхода, всею душею гнушатися. Къ симъ же, ошую Спаса которіи станутъ, аще чистительнымь огнемь очищьшеся, вси злая сотворшеи, жизни безсмертныя сподобляются. Но негли о невјрныхъ единехъ сему речену бывшю мните? но о премудріи! божественый и всепремудрый проповјдникъ Христовъ явьственнј учитъ, безстудно тјмъ погыбнути, аки кромј закона лютј согрјшьшымъ. А иже въ законј согрјшишя, закономь, глаголетъ, и истязани будутъ [17], а не огнемъ очистятся. Явлено же есть отъ сего, яко весь подвигъ Судіинъ къ согрјшившымъ въ законј есть; емуже бо, рече, много приложиша, много истяжутъ тогда отъ него [18]. Аще же овы убо, якоже проповјдникъ глаголетъ, безстудно погыбаютъ, овы же пакы, по васъ, предочистившеся огнемъ, безсмертныя жизни сподобляются: то убо никтоже ошую Спаса стоя тогда явится, ниже аки суровъ и немилостивъ отслется въ огнь негасимый, и ложно сице, по васъ, будетъ слово судное. Къ симъ же, и оно Божественное реченіе къ сему всяко приводитъ, глаголюще: ходѝте, дондеже свјтъ имате, да не тма васъ постигнетъ [19]. Се явј сказуетъ, тмою покрыватися недостойно свјта благочестія ходящымъ, а не огнемъ очищатися, по исходј своемъ. Аще убо свјтъ нарицаетъ еже в онь благовјріе божественое, хоженіе же, еже съ всякымъ прилјжаніемъ спасительныя его заповјди дјлати, тму же, покрывающую насъ, послјднее разлученіе души и тјлу сему, егда нелзј уже душеполјзная и освящающая насъ дјла совершати, — якоже бо тјло се недвижимо пребываетъ, оставившу è движущу духу, сице и та, разлучившися того, не причястна пребываетъ спасительныхъ дјяній, лишится бо споспјшьствующихъ ей орудій къ умоленію Судіи. Къ симъ же Спасъ устнама своима вјщаетъ: въ день послјдняго суда дати человјкомъ отвјтъ о праздвелъ глаголј [20], а множество неисцјльныхъ прегрјшеній како преже суда онаго очищается, аще же и наименшее прегрјшеніе въ послјднемъ судј соблюдается? Яко же Судія повелјваетъ, то не угодно есть предъ нимъ мудръствовати преже оного суда чистительный огнь неисцјльныхъ прегрјшеній. Хощетъ бо, рече, Сынъ человјческый пріити въ славј Отца своего, и тогда воздастъ комуждо по дјломъ его [21]. Ты же преже оного страшнаго пришествія всескверныхъ въ животъ вводя огненымъ чищеніемъ, не явленј ли блядеши, уставъ Божественый сице безума возвращая [22], къ симъ же, нарицаяй юрода искреняго своего, повиненъ есть гееннј, якоже слышимъ, а не причястенъ Божественјй славј, огнемъ мало временнымъ, преже суда страшнаго, очистився. Судія малымь согрјшьша безконечно мучитъ не покаявшяся, а не оправдаетъ того, огнемъ очистивъ; а ты, аки бы сый милостивјйши Содјтеля, огнемъ преже суда чистя всесквернаго въ животъ вводиши. Блюдися, о добрый! да не обрящешися пострадавъ глаголемая притчею: аще слјпець слјпца водитъ, оба въ яму падоста [23], явј, яко огня негасимаго.

Но ты, душе! отступивши душегубительныя мысли сея, истинј покаряйся и предложенныхъ держися, плетущи благосочетанно верховнымъ похвалу. Сіи суть владјющаго силою самому вјку, якоже пјснопјвець вјщаетъ, очи на языкы взирающе, ихже зрјніе лъжи мглу отгна, а свјтлость истины возсія. Сіи суть устна краснаго добротою паче всјхъ сыновъ человјческыхъ, на няже Божественная благодать изліявшися, и та, аки сладкую цевницю движущи, новую и благолјпну пјснъ въ концы земли въскорј слышану сотвори. Сіи суть точащая нелестное млеко сосца непорочныя невјсты Христовы, яже въ мужа совершена, якоже есть писано, духовными наказаніи воспитаютъ, и въ мјру возраста исполненія Христова сподобляютъ вјрныхъ достигнути добрј. Сіи суть воистину руцј и персты, на ополченіе и брани научаеми отъ Единого крјпкаго и непобјдимаго, ихже храбростьми всяка вражебная и душегубительная буря удобь отражается, сладкая же весна тишины возсіяла душямъ. Сіи суть утвердившаяся мышца, аки лукъ мјдянъ, и ногы, аки елени, скоры совершившася, преблаженными и божественными дуновеніи Параклитовыми [24], скорјйши отъ всея земля отгнашя всяку бјсовъ губителъную прелесть. Сіи суть неложна божественнаго дождя исполнени облакы, иже винограда возлюбленнаго всегда покропленіи своими боготочными, краснаплодна являютъ Владыцј своему. Сіи суть сильнаго стрјлы изъощрены, отъ лука Божія испущены на идолослужебныя и злочестивыя скыпетры сирјчь царствія, имъже водрузившимся животворнј въ сердця преже вражебныхъ языкъ всјхъ Царю, и любве божественныя наполнившымся, пречистымъ Его ногамъ людіе подпадошя, и иго живодательныхъ Его заповјдей съ радостію пріяшя на своихъ выяхъ. Предрече ти ся, душе! пјнія же по достоинству самјмъ уступи невещественнымъ силамъ, да не, тщащися славити вышьши славныя, обрящешися досадивши за грубость, еже бо тщатися хвалити ихъ достойно, равно есть звјздному изочтенію. Но, о двоице Спасова доброхвальная, столпи же, утвержающе всегда непоколеблему подсолнечную божествеными молитвами! О Петре, Христовы Церкви основаніе, иже превыспреннихъ скровищь ключарю, иже огнеумныхъ богословцовъ крайнјйши верхъ, иже по первомъ первый въ судіяхъ! И ты, Павле! всея вселенныя богодохновенна и велегласна труба, яже богоглаголаннымь вјщаніемъ проповјди, и истины свјтомъ и силою внјшнихъ мудрець хытрословія, аки худовидны отроды Пификовы устрашивши распудила еси индј и индј, въ пропастехъ забвенія повергши я, лучя же трисолнечнаго свјта, аки Богомъ озаряемо и всесвјтло и веліе солнце по всей распустилъ еси вселеннјй. Иже или въ плоти, ли, якоже глаголеши, кромј ея, предивнј восхищенъ бывъ до третіяго небеси, и тамо изучився разумь неизреченныхъ, чаша явился еси всезлатая, исполнъ нектара божественнаго, сирјчь Святаго Духа, исполняя всю вселенную божественнаго піянства. Радуйтеся исполняеми Христовы красоты, пресвјтла отъ Него и преобильна воспріемлюще трудомъ вашымъ вјчнующая воздаянія. Хвалу же сію радостію пріемше, и насъ, молимъ, вы, посјщайте милостивно, любовію божественною почитающихъ вашу всехвальную и всечестную память. Отъ нихъ, овъ убо отпущеніе грјховъ, и твердость вјры да дастъ всегда намъ, преставльшимжеся отъ сея окаянныя жизни, внутрь пречистыхъ превыспреннихъ быти молитвами своими да сподобитъ насъ; овъ же въ мыслехъ нашыхъ да вліяетъ обильно богатство божественныхъ писаній и просвјщеній, и мудрованіе право и благоговјйно да дасть, да трисіянную и единосущную державу почитаемъ прямо, якоже вы въ книгахъ вчинисте, Божественымъ Параклитомъ озарившеся, и якоже иже по васъ седмижды стекшеся отвсюду, Божіимъ мановевіемъ, соборы всечествыхъ и всемудрыхь пастырей, самјмъ Параклитомъ дышущихъ, и въ Него оболкшихся Всесвятаго Духа, испытающаго глубины Божія, уставы крјпчайшими утвердишя божественное исповјданіе православныя вјры, еже есть: Вјрую въ единого Бога,... къ изложеннымъ богодохновенно отъ васъ же и онјхъ ничтоже смјющи или приложити или уложити дерзостнымъ умомъ, равно бо злочестьство есть и обое дерзнути. И подъ клятвами страшьнјйшими подлагаетъ, древле изложенными и утвержеными отцы, Божіею горящими ревностію, и далече мещетъ божественыхъ дворовъ, сихъ преступати смјющихъ безумно. Аще убо неложенъ есть, разбойника и татя именовавъ не божественвою дверію входяща во дворъ овчій, излазяща отъинуду, и глаголяй: гласа Моего услышятъ овця Моя, чюжаго же гласа убјжатъ [25], и не сущаго съ Нимъ, сирјчь не пребывающа въ Его божественныхъ учительствјхъ, явј показа врага Себј непримирительна. Такоже и писано есть въ Евангеліи: иже нјсть съ Мною, на Мя есть, и не собираяй съ мною, разсточаетъ [26], не собирающа съ нимь учительства, всяко согласна, имъже явј самъ изложи, показа божественымъ судомъ разсточающа, и наименьшу заповјдь разорившаго, и родъ человјчь, не якоже Онъ, научивша, глагола мукамъ послјднимъ предану быти, увы страшнаго же и вышше слова учительства сущаго, еже о Дусј Святј, Егоже самъ своима устнама изъглагола, преступающу, что люто не случится отъ Бога Слова? И твой, Павле, нестерпимый [27] уставъ глаголяй: аще и съ небесе будетъ ангелъ возвјщаяй вамъ наипаче ихъже научистеся, да отлучится Христова сообщенія, и да соосудится сатанј въ негасимый огнь геонскый, сице бо толкуется еже: анафема да будетъ. Слышите мысленно и ужасайтеся отъ всея душа и, разумјвше, кайтеся, елицы дерзостію ума вашего чрезъ уставъ богоносныхъ носитеся вельми блазненно: отлучаяй бо ангелы внј сообщенія Христова преступающыхъ его Божественыя уставы, Рима ли, или Афинъ, или Византіи пощадитъ честныя уставы преступающыхъ? не подобаетъ таковымъ прельщатися суетными надежами. Ни, честнјшіи мужіе! ни, молю вы. Ни лиць бо ни градовъ саномъ прощено есть своею мыслію претворити неизреченная отнюдь, разумна же точію тому Единому всеблаженному и трисолнечному естеству, сирјчь Святјй Троицы, но паче крјпко заповјдано не двизати ихъ отъ своихъ уставъ, но непреложна блюсти ихъ; соблюди бо Мнј, рече, сію, еже нынј тебј завјщеваю, рјчь невредну, ничтоже къ ней прилагаяй, ниже пакы отъемля, глаголеть таиннику древле, сирјчь Моисею. Аще убо всего ветхаго закона, глаголетъ, сјни и образовъ толь сильно соблюденіе истязуетъ отъ толь изящна мужа, никакоже повелитъ тебј предвизати хоть и наименше въ совершеныхь мужъ изложеную православную всю вјру, сирјчь священый символъ, святыми соборы, и уставы крјпкыми и грознјйшими клятвами утверженныхъ уже и заключенныхь отъ божественныхъ мужей съшедшихся седмижды въ различныхъ градехъ и временахъ. Дерзость убо и нестерпимо души безуміе, еже не множае большему стыдјнію судити достойна совершенная паче сјни и образовъ, аще убо по словеси истины, множае здј и больше Соломона и Іоны китомъ поглощенаго. Но ниже неомовеннами ризами да приступитъ кто божественнјй горј; аще ли же ни, да каменіемъ побіенъ бываетъ. Страхомъ же многымъ, воздержаніемъ же зјльнымъ предистнившу плотное сіе обложеніе, и всему внј бывшу пяточисленыхъ дверей [28], сице внити въ таинственый мракъ. Вшедшу же в онь не испытовати дерзостнј, ниже, елико мысль лакомуетъ [29], невоздержно взысковати всякого ума превосходящая, но покровенна бывша рукою Божественною, сирјчь Божіимъ свјтомъ озарена, скважнею отъ камени сматряти Божія задняя, сирјчь, твердостію заповјдей предъочищенну, словеса тварей видимыхъ и невидимыхъ сущихъ щаднј разсматряти, — сія бо таинственнј разумјтися могутъ Божія задняя, аки послј бывшая, — на лице же Божіе не возрјти безстудно, сирјчь, какоже есть Богъ, не испытовати, радоватижеся, удовляему открытыми отъ божественныхъ мужей, а вышьше ихъ не испытовати, но соглашати ихъ священнословіемъ, ниже гордјтися уповающу на свою мудрость; жестоко бо, жестоко, нјгдј рече божественое писаніе, противу острій остенъ прати [30] безумными ногами; никтоже бо, рече, видјвъ лице Мое, Моисею таиннику древле отвјщая, и живъ будетъ [31], сими отвращая мыслей смјющыхъ дерзостію изслјдовати неизслјдованная отнюдъ, сирјчь тайны божественыя сего ради, и яже безъ посредства черплющія божественыхъ просвјщеній, покрываютъ видјнія своя двјма крылома, ово убо не терпяще Божественную свјтлость, нестерпиму сущую, ово же и боговидјнію уставы подписующе нижнјйшіимъ чиномъ.

Проявлена дерзость и уму вредъ, еже Божественныя отвјты и древними уставы уставленны безъ ума преступати, ихже извјстное испытаніе нјсть емлемо человјческыми помыслы, еже пакы рјшити ихъ многымъ безстудіемъ, въ огнь обаче обыче метати раззорителя ихъ. Прокляти бо, рече Псаломникъ, уклоняющеися отъ заповјдей Твоихъ. Кыи же паче прокляти быти могутъ? но точію въ геену отсылаеми; добро есть еже побјжати, но въ нихже нјсть убытокъ, а еже побјжаему бывати, въ нихже живетъ спасеніе, далече лучше, а еже пребывати твердымъ въ Божественныхъ уставјхъ и тјхъ любити твердыхъ вјщаній, богомудренныя души воистину есть показаніе и сродныя по всему хвалящейся и глаголющей: скотенъ азъ у тебј и азъ выну съ тобою, за еже по подобію скота послушати Владыку, выну не отлучену пребывати у него. Единого убо Отца по винј начало сущихъ, отъ него Сына и Духа да поемъ, согласно древнимъ отцамъ, да якоже особнј единъ есть Сыну родитель, такожде и единъ явится испущая Духъ, да коемуждо ипостасу соблюдется извјстно свойство свое и недвижимо пребудетъ. Мысль бо глаголющая и Сына съ Отцомъ по винј испущати присносущна Духа раззорила есть грубно свойственный уставъ. Свойство бо, якоже рекошя богословцы, аще предвижется, нјсть къ тому свойство. Отцу же единому обоя присносущна и еже ражати и еже испущати единосущная себј, мысль богословная свидјтельствуетъ; единого бо источника Божественнаго естества явј ареопагитьскый богословець и весь соборъ преславныхъ Богоглаголивыхъ Отца глаголютъ; къ симъ же и Сына особнј и истинною нарицатися, отрицаетъ тјмъ, еже мудрствовати Его испущателя; двоя наречени, а межи себе противящася отнюдь, единому лицу присвидјтельствующе; къ симъ же два начала въ трисвјтломъ существј полагаетъ хульно и зјло грубно. Аще бо, по числу, два испущателя, како и не два источника Духа? Якоже бо существомъ единъ Богъ есть трое, такожде пакы тричисленъ ипостасьми есть. Или бо по лицямъ или по существу, нужно есть мудръствовати, соединитися испущателемъ, внегда испущаютъ присносущна Духа. И аще убо лицы соединитися имъ мудръствуетъ, внегда испущаета присносущно Духа, явлено показася смјшеніе Савеліево, въ едино лице сліявшимся имъ обоимъ. Аще пакы соединеніемъ существеннымь речетъ испущати имъ присносущьна Духа, ей оставляю, еже отсюду безсмјстное разсмотряти. Едино бо существо и соединеніе тріемъ есть; равни бо къ другу другъ ипостаси суть по всему, кромј еже быти имъ образа. И сице убо будетъ и Духъ вкупј съ Отцемъ ражая Сына. Сего же что можетъ быти нечестивјйшее? Аще бо, да яко по всему явится равенъ Сынъ ражающему Его, сего ради глаголеши Его испущателя, то бо слышалъ есмь отъ твоея премудрости, время ти уже тоже и Духу дарити, равенъ бо и той Отцу и Сыну, и да ражаетъ вкупј съ Отцемъ Сына, да и Духъ равенъ Отцу и Сыну явится. Твое бо мудрованіе таково что повелјваетъ. Аще же, понеже вдунувъ рече своимъ ученикомъ: пріимите Духъ Святый [32], сего же ради и по винј мудрьствуеши сего испущати, время ти уже и еже въ лице первосозданнаго вдуновенное древле дыханіе исходно отъ Отца и Сына глаголати. Аще же хульно сіе тамо помышляти, то и здј хульно же есть; дуновеніе бо и тамо и здј писаніе равно положи. Къ симъ же, аще тогда дуновеніемъ всею равна существенна сирјчь Святаго Духа вдуну имъ, чесо ради не отлучятися Іеросалима повелјваше имъ, но въ немъ пребывати, дондеже свыше облекутся въ силу. Проявлено убо, яко отъ исполненія своего дасть имъ дарованіе грјхомъ рјшительно, а не ту всю ипостась соестественна ему Пресвятаго Духа. Како бо неописуемь описуется описуемыми усты, акы трубою нјкоею тогда вдуновену бывшу ученикомъ? Но ниже, елма Духъ его нарицается, похвально есть мудръствовати, яко испущаетъ ѝ, понеже ниже ражатися отъ сего речемъ когда, донелјже здравый имамы умъ и чювства, рождьшаго его, понеже Отецъ его нарицается. Къ симъ же, рождьшійся рождьшаго болша себе глаголя, и всяко по винј, а не по слову Божественаго существа; равно бо той въ тріехъ познавается. И еже паче, и менше, отнюдь не пріимаетъ. Аще ли же, по васъ, равно Отцу речемъ Его испущати Духа присносущна, вотще явится глаголя рождьшаго болша себе. Но, милостивъ ми буди всјхъ Царю и Владыко! равеньство бо вины отмещетъ отъ среды ихъ большее. Кто же, благовјріемъ украшенъ, стерпитъ, слыша самую истину, сице безстудно и грубно хулиму. Аще бо, якоже по существу, такожде и по винј, равенъ рождьшійся рождьшему, како истиньствуетъ всеистинный, больше Отца рекъ? Тјмже убо, мысли человјческыя да лжутъ, яже вельми безстудно суетными своими словесы смјютъ пищати противу Божественныхъ велјній. Богъ же единъ всегда истиненъ да воспјвается, и его Божественная повелјнія да соблюдутся съ страхомъ и благоговјйньствомъ, и покланяема да бываютъ честно. Разумјете ли, каковыя хульныя пропасти пореваетъ чюжихъ словесъ суетно поученіе? Премудрј убо воистину моляшеся божественый пјснописецъ къ Божіимъ заповјдемъ, а не на лихоимьство, сирјчь чюжихъ словесъ суетно поученіе, сердцу своему приклонитися; сильно бо прельщати человјческыя мысли и отлучити истины не собреженіемъ прилежащаго ему. Аще уздою божественныхъ коней членовныя его востягнеши твердо, и подъ яремъ подведеши è божественыя четверицы, сирјчь Евангелія, стяжалъ еси конь крылома златыма возносяща тя неблазненно на самое небо, и крилј посребренј пріялъ еси голубици, златомъ междорамія украшаеми. Аще же невоздержанно вдаси себе неправеднымъ его неистовьствомъ, жукъ мотылороденъ совершеннј показался еси свјрискы [33] всегда выспрь движа, и съ нимиже пакы на низъ валяяся, оселъ же плевій утробу наполняя и долу понича выну, и слјпець стјну осязая, и свинія въ тинј сквернавј погружаяся.

Но аще послушаете тјхъ моихъ худыхъ словесъ, аще есть вамъ отнюдъ печаль о нужнјмъ вашемъ доброхваленіи и общемъ спасеніи, пріидјте, распрю древную отринувше, возлюбимъ пакы богодарованный миръ, о немъже радуется Христосъ, и единомышленно, якоже божественными уставы изложися, воспјваемъ Духа Святаго, отъ Отца единого исходяща, въ простотј ума послушающе учителя, да отъ него пріимемъ добрую хвалу явльшагося вјрнаго въ малыхь раба. Довольно же себј, о друзи! да вмјнимь тјмъ, яко обрјстися равнымъ учителю въ таинствјхъ, яже паче ума и слова, Его же бо и то есть неложное поученіе, яко ниже ученикъ есть вышше учителя, ниже рабъ владыки. Да пріимемъ, аки младенцы, дондеже отчасти, о любезніи! разумјемъ и пророчествуемъ, царство вышше умныхь и божественыхъ учительствъ, да внутрь Божія славы будемъ; инако бо получити невозможно, якоже отъ неложнаго гласа слышимъ. Ниже преже времяни, во еже отъ чясти разумјти взыскуимъ дерзостнј совершеньство: немудръствуйте, рече, паче, неже подобаетъ мудрствовати, но мудрствуйте во еже цјломудръствовати. Божественый Павелъ, предувидјвъ Духомъ издалече ваше отпаденіе, пишетъ се къ вамъ римляномъ: да держимъ же крјпко божественная учительства вся непреложна, да мужу мудру водрузившу храмину свою верху камени уподобимся, а не создавшему ея безъ ума на песцј, яже, не стерпјвши нужи снесшихся внезапу на ню тучь вјтровъ, паденіе пострада веліе. Такожде и прочій уставъ, показующій на земли церковь Христову второе небо, жертвъ честностію и священниковъ житіи непорочными и нравы честными попечемся исправити, якоже древними уставися правилы отъ боговдохновенныхъ мужъ, мановеніемъ Божіимъ стекшихся седмижды въ различныхъ градјхъ и лјтехъ, да, еяже слава вся внутрь есть, царева дщи, рясны златыми и ризами изъвнјюду свјтло украшенна, одесную царствующаго всјми, станетъ. Немало бо прегрјшеніе есть, еже приносити безквасна совершенному живота хлјбу, аще убо совершенно человјче естество совокупилъ есть себј, а не исполу воспріятъ è отъ Пречистыя Отроковицы, но все то себј соединилъ непреложно, сирјчь вкупј самјй души и уму, ихже образъ держатъ соль и квасъ, якоже божественый кесарійскый святитель, Василій великій учитъ, лаодикійскаго Аполлинарія зломышленную ересь отрјвая искорени, и не влагающыхъ въ просфирј соль и квасъ отгонитъ божественыхъ оградъ, яко злочестивыхъ и хульникъ и отметающихся, имиже беззаконно дерзаютъ въ просфирј всесовершенаго воплощенія Бога Слова. Отселј проявлено есть, яко не отъ богодохновенныхъ Петра и Павла и прочихъ стаинникъ имъ опрјсночное жреніе начало пріятъ, но отъ Аполлинарія безумнаго, иже безумный бездушна тјла блядяше преже всея твари созданнаго воспріимша Бога Слова и произшедша отъ Чистыя Отроковица, аки сквозј нјкую трубу, сего ради и образовающая ума и душу, соли и кваса, возбраняше отъ божественнаго хлјба, аки соли убо ума, квасу же душу образующу, еже убо ему сицевая божественнјй просфирј новообычнј дерзнути въ тјхъ лјтехъ и великому касарійскому пастырю, апостольскою ревностію горящу, злочестивую догму его обличити писмены, явьственјйши показуютъ, яко въ лјтехъ онјхъ квасненный хлјбъ вездј приношаху по древнему ученію и просвјщенію всечестныхъ проповјдникъ Бога Слова. Аще убо еретическія мысли отродъ, а не апостольскаго просвјщенія суще ученіе древнее и обычей многолјтенъ, таковую догму верзите отъ среды вјрныхъ, да будите непорочни и непреткновени всјмъ. Часть бо немала израильтьскаго праздника есть безквасное жреніе. Елико же люто и зазорно есть, еже сопричащатися чюжемудреннымъ, явлено есть всјмъ правјмудръствующымъ, имъже чясть есть велика и изрядна чинъ Божіихъ священникъ, егда красится апостольскими дарованіи, а не егда смердитъ нечистыми вонями, якоже нынј зрится отъ небреженія предстоящыхъ Христовы церкве. Вјдомо бо есть вамъ, аще неточію волею слјпотуете, въ каковыя нелјпоты и безчинія взыдошя священническая, за неже не исправляти ихъ прегрјшенія по древнихъ законъ и правилјхъ, ихже честное и богочинное житіе тщанія и бреженія велія достойно быти подобаетъ, у нихже Христовъ законъ благоговјйнј соблюдается. Божественное бо повелјніе явј завјщаваетъ, глаголюще: сыны израилевы, сотворите благоговјйвы. И пакы: соль аще обуяетъ, земля чимъ осолится [34], Божій гласъ вопіетъ. И паки: бисеры вашы предъ свиньями не мещете [35], тойже Божій гласъ завјщаваетъ, имъже себј уподобляютъ, елицы недостойно служатъ Божіимъ тайнамъ. Но око самое, егда слјпотуетъ, къ солнечнымъ лучямъ никакоже взирати могуще, како возложетъ посјтити прочихъ удовъ сокрушенія цјльбы требующа: здрави будјте, и поздј нјкогда будете цјломудренны мысли, прјніе всякое, происходящее отъ духа лукаваго, оставльше, и въ простотј ума въ слјдъ ходите божественому неводу, акы рыбы словесны, въ разумномъ мори воспитаны, да съ нарочитыми сберетеся, а не съ гнилыми отвержени будете таиньственыхъ сосудъ. И воспоминаніе то пріимјте тихо мирно, всякыя неподобныя ярости оставльше, яко да явитеся по Христј ревнующе равнохвальнј древнимъ божественнымъ мужемъ, яко да и получите отъ него равныхъ имъ почестей. Аминь, буди сія, якоже угодно есть Христу, молитвами святыми Петра же и Павла, премудрыхь учителей и общихъ заступниковъ. Римъ превооруженъ, иже державу свою по всей земли распространилъ есть, хытростьми бранными и силою мужественною своихъ веледушныхъ гражданъ, иже бесчисленными побјдами и одолјніи свјтлјйшими на высоту аерьскую зјло превознесеный, и своими цари прегордыми и пренеправедными огнь губителенъ воздунувый всјми губительными челюстьми на небеснаго и присноживущаго Царя Iсуса, два мужа неискусна, худости и нищетј и немощи соживша, въ божественную же силу свыше сошедшую вооружишася зјльною ревностію, о ужасайтеся, концы вселенныя, подъ стопами пречистыми Христа Царя своего таковыи убо добрјйше подстиласта, вмјсто всякаго иного оружія вземше непобјдимо оружіе преславнаго креста, имъже остјняеми изгнаста отъ него всяку злокозненную прелесть бјсовскыхъ ловленій, Христа же Вышняго Царя Велика Бога и присносущна быти возвјщающа ему и Судію всјмь нелицемјрна, акы овны благородни отъ нечестиваго царя убіени бывше, жертва чиста принесена быста Христу, иже благовјріе о преславныхъ и священныхъ подвигъ ихъ воздаря, вјнчалъ есть ихъ вјнцы неувядаемыя славы, тјлесы убо Римъ, духи же самое небо, почесть своихъ трудовъ взяшя прехвальніи отъ Христа великаго Царя, Егоже Божество водрузишя на всей земли кровію Своею.

Примјчанiя:
[1] Матф. 7, 21.
[2] прасутствующихъ на пирј.
[3] различное.
[4] заблужденія.
[5] Псал. 87, 11-13.
[6] Матф. 11, 12.
[7] пепелъ.
[8] записями?
[9] латинскія слова: cupla mea.
[10] врачеваній.
[11] Псал. 33, 15.
[12] Іоан. 5, 14.
[13] Матф. 3, 10.
[14] между.
[15] Матф. 25, 12.
[16] 1 Кор. 6, 9-10.
[17] Рим. 2, 12.
[18] Лук. 12, 48.
[19] Іоан. 12, 35.
[20] Матф. 12, 36.
[21] Матф. 16, 27.
[22] извращая.
[23] Матф. 15, 14.
[24] Параклитъ — Утјшитель, Святый Духъ.
[25] Іоан. 10, 27.
[26] Матф. 12, 30.
[27] непреложный, или невыразимо страшный.
[28] т. е. пяти чувствъ.
[29] желаетъ.
[30] Дјян. 26, 14.
[31] Исх. 33, 20.
[32] Іоан. 20, 22.
[33] Такъ во всјхъ спискахъ.
[34] Матф. 5, 13.
[35] Матф. 7, 6.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 145-170.