Понеже часто случается вамъ стязатися съ христіяноборцы измаильтяны о благочестивјй вјрј нашей, и они христіяноборцы, неточію не хотятъ исповјдати Христа, Бога истинна и Сына Божія быти, но еще и ругаются намъ, исповјдающимъ Его Сына Божія и Бога. И аще хощете заградити уста ихъ и посрамляти ихъ, не отъ иного коего богодухновеннаго писанія, точію отъ святыхъ Евангелій, творите имъ показанія. Занеже бјсодухновенная ихъ книга, глаголема по нихъ коранъ, во многыхъ мјстехъ хвалитъ è [1] и праведно и свято нарицаетъ è, и съ небесе низпослано мнитъ. И елико убо на показаніе, яко Христосъ и Богъ есть истиненъ, и Сынъ Божій и есть и глаголется, и отъ насъ, вјрующихъ в онь, покланяемъ и вјримъ есть, глаголите сице къ нимъ, со всякою кротостію и разумомъ правымъ: понеже и вы исповјдуете, яко Евангеліе, еже по насъ, праведно и истинно есть, чесо ради преслушаете его, сице явј глаголющаго о Божествј Христовј въ Евангеліи, еже отъ Іоанна? Глаголетъ бо сице чистјйше: въ началј бј Слово, и Слово бј къ Богу, и Богъ бј Слово [2]. Виждь, како явственнј глаголетъ Бога Слово Бога и Отца, и яко присно изъ начала бј къ Богу, сирјчь неразлучно бј (отъ) Бога Слово, и яко Творецъ всјхъ есть и Содјтель; вся, глаголетъ, Тјмъ бышя, сирјчь видимая же и невидимая. И безъ него же ничтоже бысть, еже бысть. И да не непщуемъ, яко Слово Бога и Отца есть, якоже наше слово, непричастно животу, и на воздухъ разливаемо и исчезаемо, учитъ насъ святое Евангеліе и глаголетъ: въ немъ животъ бј, сирјчь въ самемъ Божіи Словј животъ есть; и той есть животъ и свјтъ человјкомъ, вјрующимъ в онь. А яко Бога и Отца Слово и пріиде въ міръ сей, и бысть человјкъ совершенъ кромј грјха, — тоже святое Евангеліе пониже глаголетъ: въ мірј бј, и міръ тјмъ бысть, и міръ Его не позна; во своя пріиде, и свои Его непріяша, сирјчь языкъ безвјрныхъ іюдеевъ. Таже глаголетъ: и Слово плоть бысть, сирјчь въ плоть человјчю одјяся и явися въ міръ сей человјкъ совершенъ по явленному [3], и Богъ совершенъ по разумному [4]. Потомъ глаголетъ: и елицы пріяшя Его, сирјчь въ Него вјровашя, и исповјдуютъ Его Бога совершенна и человјка совершенна, и уповаютъ нань, дастъ имъ власть чядомъ Божіимъ быти. Елицы же Его отмјтаются, и Сына Божія и Бога не исповјдуютъ, ниже могутъ чяда Божія быти, ниже глаголатися, по Божественому сему Евангелію. Се показа святое Евангеліе, яко Христосъ Слово есть Бога и Отца, и яко Творець и Содјтель есть всјхъ видимыхъ и невидимыхъ тварей, яко Свјтъ и Животъ есть человјкомъ, вјрующимъ въ Него, и яко пріиде уже въ міръ и въ плоть человјчю одјяся, и яде и питъ съ человјкы, и бысть человјкъ совершенъ. По истинј, а не по привидјнію, якоже нјцыи еретицы блядословишя. Нынј же да разумјимъ и сіе, яко Сына Божія, Его глаголетъ святое Евангеліе, —и аще правј мы христіяне, Сына Божія исповјдуемъ Его и имјнуемъ? Яко убо Сынъ Божій правј и преподобнј глаголется, Самъ Богъ и Отецъ, во святыхъ Евангеліихъ, Сына своего возлюбленна именуетъ и свидјтельствуетъ свыше гласомъ, услышаннымъ, егда крестися во Іорданј рјцј, отъ Іоанна Предотечи, и второе, егда преобразися предъ ученикы своими, на горј Ѳаворстей, егда слышанъ бысть съ небесе гласъ Божій, глаголющь: сей есть Сынъ мой возлюбленный, о немъ же благоизволихъ, того послушайте. Елма убо [5] святая Евангелія являютъ Бога и Отца, именующа Христа Сына своего возлюбленнаго; чесо ради вы, агаряне, отрицаетеся сыновства и Божества Его, и насъ укаряете, глаголющихъ его Сына и Бога? Аще убо праведно и истинно исповјдуете святое Евангеліе, вјрите прочее и вы, и съ нами исповјдуйте, яко ей воистину Сынъ Божій есть же и глаголется Христосъ. Елма сицевое свидјтельство самого Бога и Отца есть, съ небесе сшедше, — добрј убо и правј мы христіяне, вјрующе свидјтельствующу Богу и Отцу, Сына Божія исповјдуемъ и именуемъ Христа, а не раба, ни человјка проста, якоже вы глаголете, и обрјтаетеся досажаюте въ Него. Еще же услышимъ и ино евангельское свидјтельство и показаніе о Христј, яко Сынъ Божій и Богъ и есть и глаголется Христосъ. Князь нјкій отъ іюдеевъ, Никодимъ званіемъ, пришедши ко Христу нощію, слышати отъ него желая высокое нјкое и предивное ученіе, — и Христосъ къ нему сице отвјща, рекъ: сице возлюби Богъ міра, яко Сына Своего далъ есть Единороднаго, да всякъ, вјруяй в Онь, не погыбнетъ, но да имать животъ вјчный [6]. И паки глаголетъ [7]: не посла бо Богъ Сына своего въ міръ, да судитъ міру, но да спасется Имъ міръ; вјруяй в Онь не судится, а не вјруяй уже осудися, зане не вјрова во имя единороднаго Сына Божіа. Сей же есть судъ, яко Свјтъ пріиде въ міръ. И возлюбишя человјцы тму паче, нежели Свјтъ; бјша бо дјла ихъ лукава. Виждь, яко явьственјйше третицею, самъ себе именуетъ Сына Единороднаго, Бога Вышняго, и яко Свјтъ въ міръ пріиде, и яко не вјруяй в Онь осужденъ есть, а вјруяй не боится осужденія, но спасенъ будетъ отъ грядущаго праведнаго и страшнаго гнјва Божія на сыны непокоривые. Выже откуду чяете спасеніе улучити, на страшномъ дни втораго Его пришествія, елма отметаетеся Божества Его и сыновства? Аще убо по истинј, а не по лицемјрію, хвáлите святое Евангеліе и глаголите, яко инзиль хакъ [8], престаните прочее досажати и хулити на Христа, и исповјдите Его съ нами Сына Божія и Бога, якоже свидјтельствуетъ святое Евангеліе; аще убо желаете избјжати грядущаго праведнаго и страшнаго гнјва Божія на сыны непокоривыя, отметающіяся единороднаго Сына и Слова Божія, якоже и блаженый Іоаннъ Креститель и Предотеча Христовъ свидјтельствуетъ во Еваніеліи, еже отъ Іоанна сице явј и твердј глаголя о Христј [9]: и свидјтелствова Іоаннъ глаголя, яко видјхъ Духъ сходящь, акы голубь, съ небесе, и пребысть на Немъ; и азъ не вјдахъ Его, но пославый мя крещати, сирјчь Богъ и Отецъ, рече мнј: на Немъ же аще узриши Духъ сходящъ и пребываяй на Немъ, той есть крещаяй Духомъ Святымъ. И азъ видјхъ и свидјтелствовахъ, яко той есть Сынъ Божій. Той же Іоаннъ божественный глаголетъ и сія о Спасј Христј: грядый свыше, выше всјхъ есть. Сіе глаголетъ о Христј; а о себј глаголетъ, уничижаа себе: сый отъ земли, отъ земли есть и отъ земли глаголетъ. И пакы глаголетъ о Христј [10]: грядый съ небесе выше всјхъ есть, — и еже видј и слыша, то и свидјтельствуетъ, и свидјтелства его никтоже пріемлетъ. Отецъ любитъ Сына и вся далъ есть въ руцј Его; вјруяй въ Сына имать животъ вјчный, а не вјруяй Сыну не узритъ животъ, но гнјвъ Божій пребудетъ на немъ.

Толь велика и сильна свидјтельства отъ святыхъ Евангелій имуще мы христіяне, вјруемъ и исповјдуемъ всею душею и сердцемъ Сына Божія и Бога быти Христа, и крещаемся, сирјчь очищаемся отъ грјхъ нашихъ призываніемъ Отца и Сына и Святаго Духа, по заповјди и завјщанію самого Спаса Христа, глаголющаго святымъ Своимъ ученикомъ и апостоломъ [11]: шедше въ міръ, научите вся языкы, крестяще ихъ во имя Отца и Сына и Святаго Духа; вјровавый и крестився спасенъ будетъ, а не вјровавый осуженъ будетъ. Вы же, агаряне, аще по истиннј вјрите яко Евангеліе есть истинно и праведно и съ небесе сшедше, чесо ради толикыхъ сильныхъ свидјтельствъ и показаній евангельскыхъ о Божествј Христовј отмјтаетеся и преступаете, нижè Бога Его исповјдуете, нижè Сына Бога Вышняго, нижè крещаетеся во имя Отца и Сына и Святаго Духа? И во что прочее уповаете спастися? али, во еже обрјзывати срамныя уды вашя, іудейскы уповаете спастися? прельщаетеся злј: ничимъ же прочее пользуетъ васъ таковое обрјзаніе. Преже пришествія Христова въ міръ сей совершаемо обрјзаніе, по закону Моѵсеову, имјяше силу, зане по повелјнію Божію бываше, и обрјзаеміи имјяху упованіе спасенія, ей аще и прочихъ заповјдей Божіихъ храняху. А отъ негоже времени пріиде Христосъ и училъ есть новый и совершенный евангельскый законъ; оттолј Моисейское обрјзаніе преста и упразнися въ конецъ, и ни едину прочее силу имать. Понеже пріиде истина Христосъ, преста сјнь, сирјчь Моисейская завјщанія, яже о жертвахъ, и іудейскыя обычяи. Но ни еже умывати водою по вся дни срамныя уды ваша ни сице очищаетъ душы ваши отъ плотскыхъ вашихъ нечистотъ, якоже ни псовъ очищаетъ николиже отъ сквернаго и гнуснаго смрада ихъ, еже лизати имъ языкомъ своимъ проходы ихъ и срамныхъ удъ, — пребываютъ бо и тако гнусни и злосмрадни и нечисти всегда; — нижè отпущеніе грјховъ своихъ пріемлете отъ умовенія афедроновъ вашихъ и срамныхъ удовъ. Внјшнее сткляници и блюду очищаете, а внутренее полно есть всякыя нечистоты; исполоскайте внутреннее чаши, сирјчь очистите душа ваша святымъ крещеніемъ, совершаемымъ во имя Отца и Сына и Святаго Духа, и тогда чиста будутъ душя и серця ваша отъ всякого нечестія, беззаконія же и всякыя нечистоты, занеже святое Евангеліе, егоже почитаете и глаголете, яко иньзиль хакъ, есть сирјчь, праведно и истинно, сице повелјваетъ, и глаголетъ къ Никодиму, князю іудейскому [12]: аминь аминь глаголю тебј: аще кто не породится свыше, не можетъ видјти царствія Божія. И пакы къ немуже глаголетъ самъ Христосъ [13]: аминь аминь глаголю тебј: аще кто не породится отъ воды и Духа не можетъ внити въ царствіе Божіе. И сіе чесоли ради? занеже вода едина, кромј призыванія Святыя Троицы, внјшную руду [14] тјлесную точію очищаетъ, а не и душевную проказу. Очистите убо душевныя ваша проказы святымъ крещеніемъ, совершаемымъ во имя Отца и Сына и Святаго Духа, и тако будете чисти.

Но нјчто глаголете, яко мы христіяне три Бога глаголемъ, исповјдующе Отца и Сына и Святаго Духа: не дай Господи, да не будетъ сіе! Аще кто три Бога именуетъ, да будетъ проклятъ въ вјкы вјкомъ аминь! Мы единого Бога вјмы, Творца и содјтеля всјхъ, имуща Слово и Духа, равночестна и равнобожна [15] и собезначална себј и сприсносущна. Николиже бо бј Богъ безъ Слова и Духа; не буди намъ таково что хулити. Тјмъже и глаголемъ: присно Богъ и Отецъ, присно Сынъ и Слово Его, и съ Нимъ присно и Духъ Святый, иже отъ Отца исходитъ. Единъ Богъ трое, а не три Бози, да не будетъ. Якоже глаголемъ умъ, слово и духъ — едина душа трое, а не три души, якоже глаголемъ дискосъ [16], свјтъ, луча — едино солнце три сія, а не три солнца, сице и таинство Святыя Троицы: аще бо и глаголемъ Богъ Отецъ, Богъ Сынъ и Слово Его, Богъ Всесвятый Духъ, но не три Бози. Три сия, но единъ Богъ — три сія — безначаленъ и бесконеченъ. Слышите и инъ образъ. Домъ высокъ, трикровенъ, раздјляемъ на трое, и подклјть домъ и есть и глаголетъся, и еже свыше подклјта такоже домъ и есть и глаголется, такожде и яже превыше тјхъ часть, юже и горницу глаголемъ, домъ есть и глаголется; обаче не тріи домы трія сія, но единъ домъ. Такоже и о всякомъ древј: корень, стебль, вјтви, тріа сія едино древо есть же и глаголется, а не три. Такожде и о дни: разстояніе, еже отъ утра даже до објда, день есть и глаголется, и еже отъ објда даже до полудни, день же, и еже отъ полудни до вечера день же есть и глаголется; обаче не три дни трія сія, но единъ день. Такоже и о Божествј: Богъ Отецъ, Богъ и Сынъ, Богъ и Святый Духъ; обаче не три Бози, но единъ Богъ трое сіи: едино царство, едина власть, едина сила. Аще же еще не вјруете и, еже паче ума и слова, таинство сіе не пріемлете, ни разумјти можете, азъ имамъ показати, яко и вы, не разумјюще и не хотяще, исповјдуете единого Бога трисоставна [17] суща. Рцыте ми: егда исповјдуете зловјріе ваше, чесо ради не подимаете пальца вашего, но подимаете лихана [18]? Явленно есть, яко палецъ точію два состава имать, і сего ради нјсть приличенъ къ показанію тріехъ Богоначалныхъ ипостасей. Лиханъ же три состава имать, и якоже едина каяждо чясть отъ состава, въ составј перстъ глаголется, обаче не три персты, но одинъ перстъ три сія чясти есть. Се прочее и вы, не разумјюще и не хотяще, исповјдуете, подиманіемъ лихана перста, трисоставна единаго Бога, сирјчь Святую Троицу. Въ ту изволите и вы креститися, да сподобитеся быти чада вјрна и свойственна Сарры, свободныя жены патріеарха Авраама. Зане, дондеже не крещени есте, рабыни Агари чяда есте беззаконна и чюжда и изгнана отъ наслјдія праведнаго Авраама, и не имате ни едино участіе со Исаакомъ, сыномъ свободныя. Имјхомъ и ина многа и сильна свидјтельства и показанія предложити вамъ отъ Моисейскыхъ книгъ и пророческихъ, на увјреніе ваше, яко да извјстится, что едина есть истинна и неблазненна и богоугодна вјра, яже православнымъ христіяномъ, евангельская и апостольская. Но понеже Божественое Евангеліе хвалите и чюдитеся паче всякыя иныя книги; сего ради и мы отъ Евангелія единого показанія сотворихомъ вамъ, да не имате глаголати, яко вы христіяне лжива свидјтелства и показанія творите къ намъ.

Но понеже и сіе глаголете къ намъ и поношаете намъ: аще Богь бј Христосъ вашъ, никакоже, человјцы суще, іудее возмогли бышя озлобити Его, и смертію безчестною уморити. Противу сего безумнаго и богоборнаго прекословія вашего тјмъ же пакы святымъ Евангеліемъ отвјщаемъ вамъ. Но, яко убо Христосъ Богъ есть Вседержитель и всјхъ Творецъ, уже показахомъ вамъ сіе Евангельскыми свидјтельствы, ихъже предложихомъ вамъ. А яко волею предалъ есть себе на смерть, а не по безсилію вочеловјченіа своего іудее яша Его и умертвишя, и яко силенъ бј не точію Іеросалимъ и живущая въ немъ іудеи, но и обрјтаемыя по всей вселеннјй непокоривыя іудеи, въ мгвовеніи ока, вся вкупј потребити, то и покажемъ вамъ тјми же святыми Евангеліи. Яко убо самъ себе волею предалъ есть на смерть за спасеніе человјковъ, самъ Той вамъ свидјтель есть, глаголя сице въ Евангеліи, еже отъ Іоанна [19]: Азъ есмь пастырь добрый. Пастырь добрый душю свою полагаетъ за овця. И пакы: Азъ есмь пастырь добрый, душю мою полагаю за овця. Сего ради любитъ мя Отецъ, яко Азъ душю мою полагаю да пакы пріиму ю. Никтоже емлетъ ю отъ мене, но Азъ полагаю о себј; власть имамъ положити ю, и власть имамъ пакы пріяти ю. Сію заповјдь пріяхъ отъ Отца моего, сирјчь по совјту и изволенію Отца моего небеснаго пріидохъ въ міръ сей, да мною вјдомо будетъ всјмъ человјкомъ имя святое Его, и смерть вкушу плотію, за спасеніе человјковъ. Сего ради любитъ мя Отецъ мой, яко бодрено [20] изволяю убо умрети, да родъ человјческый, моею смертію, получитъ живота вјчнаго. И азъ, волю Отца моего совершая, полагаю волею душю мою за спасеніе многыхъ, сирјчь смерти вкушаю по человјческому. Якоже и индј глаголетъ [21]: не пріиде Сынъ человјческый, да погубитъ душя человјческыи, но да спасетъ, и дати душю Свою избавленіе за многыхъ, якоже и индј глаголетъ [22]: се восходимъ во Iеросалимъ, и скончаются вся писанная пророкы о Сынј человјчестјмъ, преданъ бо будетъ языкомъ, и поругаемъ будетъ, и бивше убіютъ Его, и въ третъй день воскреснетъ. И понеже, по Божественјй воли, сице божественніи пророцы о Немъ сія предвозвјстишя, и Онъ самъ изволилъ бодрено сія вся терпјти, чесо ради, вы агаряне, отметаетеся таковаго человјколюбія Божія строенія, и намъ поношаете, вјрующимъ и исповјдующимъ сія вся, акы по Божію неизреченному совјту, строена? Еда бо мы сія предвозгласихомъ о Немъ и писахомъ? ни, но пророцы Божіи святіи, Духомъ Святымъ просвјщаеми, сія о Спасј Христј предвозвјстишя. Который убо поносъ [23] и безславіе Христу же и намъ, аще онъ убо такова пострада по Божіей воли? Мы же и вјруемъ та и спасаемся въ покланяемыхъ страстехъ Сына Божіа. Не слышите ли, како самъ Христосъ поношаетъ невјрію ученикъ Своихъ и ими всјмъ отметающимся яже о Немъ предвозвјщана святыми пророкы? Глаголетъ бо сице во Евангеліи, еже отъ Лукы: о, несмысленная и косная сердцемъ, еже вјровати всјмъ, ихже глаголашя пророцы; не тако ли подобаше пострадати Христу и внитти въ славу Свою. Вы убо несмыслени и косни сердцемъ и невјрніи, невјрующе глаголаннымъ отъ пророкъ о спасителныхъ страстехъ Христовыхъ, въ нихже и имиже прославися и вниде въ славу Свою и царствіе небесное; мы же вјрніи мудри у Бога есмы и вмјняемся и спасаемся вјрою, яже въ Него. Вопрошаемъ васъ: рцыте намъ, которыхъ святыхъ писаній вы послушающе, отметаетеся Христова Божества и сыновьства и спасительныя страсти Его, безъчестіе и безславіе Его непщуете, и насъ укаряете и поношаете? но не можете сія показати. Самъ бо Христосъ пакы, святымъ Евангеліемъ своимъ, загражаетъ уста вашя, глаголя: нынј прославися Сынъ Человјческый, и Богъ прославися въ Немъ; и Богъ прославитъ Его въ Себј и абіе прославитъ Его. Сіе же глагола, егда Іюда предатель, въставъ отъ вечери, потече ко архіереомъ іюдейскымъ, да предаеть Христа, имъ жаждущимъ смерть Оного. Сего ради, и Господь нашъ Iусъ Христосъ, жаждя еще страдати о спасеніи нашемъ, вјдый лукавое помышленіе [24] Іюдино, со многымъ веселіемъ возгласи къ прочимъ своимъ ученикомъ: нынј прославися сынъ человјческый, и прочяя. Видите, како славу свою и самого Бога и Отца глаголетъ же и мнитъ креста и тридневную смерть свою и прочяя страсти. Каколи же прославися? Зане спасительною страстію Своею и воскресеніемъ и на небеса вознесеніемъ изліяся благодать и даръ Святаго Духа на святыя Его ученикы, и ими на вся языкы, и прелесть богомерзскаго идолослуженія исчезе въ конецъ, и возсія вездј свјтъ неблазненнаго богоразумія. Сія есть слава Христова человјческое спасеніе, егоже вы, по многу вашему безчювствію, отпадаете безъ ума. Разумјйте же и инако, яко славу Христову спасителныя страсти его суть [25], а не безчестіе, якоже вы злј непщуете. По еже бо предати себе волею на распятіе беззаконымъ іудеомъ, какыми грознјйшими знаменіи прослави Его Отецъ Его небесный! На крестј висяше мертвецъ безъ дыханія видимъ, и день абіе въ тму преложися, лунј омрачившей солнечный свјтъ на три чясы, земля вся тряслася трусомъ грознјйшимъ, каменіе разспадеся, гроби отверзошяся и многа тјлеса усопшихъ святыхъ воскресошя и явишася многымъ во святомъ градј Iеросалимј, якоже писано есть во святыхъ Евангеліихъ. Разумјйте убо, какова страшна сила распятаго и погребенію преданнаго. Еда не можаше ли такова страшна знаменія и преже распятія своего сотворити, и противящихся Ему ужасити и, якоже Дафана и Авирона, погрузити въ пропастехъ адовыхъ? Ей можаше, акы Богъ всесиленъ. Аще бо мертвецъ бездыханенъ, такова страшна знаменіа возможе показати, множае паче возмоглъ бы, живъ сый, но не восхотј яростію и гнјвомъ непостояннымъ [26], но кротостію и благостынею и долготерпјніемъ обратити къ себј и спасти родъ человјческый. — Познавше убо благость Его и неисчетную Божественую силу отъ безчисленыхъ чюдесъ, ихъ же самъ собою сотвори въ языцј зловјрныхъ іудеевъ, и Своими ученикы по всей вселеннјй, и отъ страшныхъ знаменій въ день распятія Его, отступите сатанинскаго, отцы преданнаго, безвјріа вашего, и приступите, въ совершенномъ покаяніи, Спасу Христу и Богу всјхъ, и просвјтитеся просвјщеніемъ богоразумія неблазненнаго, возмите иго Его на себе, евангельскый законъ, и слово право и благо и бремя Его легко, сирјчь спасительныхъ заповјдей Его, имиже дýши вјрующихъ слагаютъ тягость многообразнаго грјха, воспріемлютъ же некрадомое богатство духовныхъ дарованій, по нихже прочее бываютъ божественно жилище, якоже самъ Господь објща, глаголя: аще кто любитъ Мя, слово Мое да соблюдаетъ, и Отецъ Мой возлюбитъ ѝ, и къ нему пріидемъ и обитель у него сотворимъ. Аще убо по истиннј хвáлите и имате [27] божественое Христово Евангеліе праведно и истинно, попецытеся блюсти писанныхъ въ немъ Христовыхъ словесъ, сирјчь заповјди, повелјнія, догматы, яже о Отцј и Сынј и Святјмъ Дусј, да будете прочее домъ святъ Святыя Троицы, изгнаннымъ бывшимъ отъ васъ, живущимъ въ сердцахъ вашихъ, лукавымъ и нечистамъ духовомъ.

Примјчанiя:
[1] Евангеліе.
[2] Іоан. 1, 1.
[3] по образу явленія Его въ мірј.
[4] по внутреннимъ, умопостигаемымъ свойствамъ.
[5] Если же.
[6] Іоан. 3, 16.
[7] Тамже — 17.
[8] Слово взятое изъ корана, значитъ: Евангеліе истинно.
[9] Іоан. 1, 32.
[10] Тамже — стих. 31.
[11] Матф. 28, 19.
[12] Іоан. 3, 3.
[13] Тамже — 5.
[14] грязь, нечистоту.
[15] равнымъ между собою по Божеству.
[16] кругъ.
[17] тріѵпостаснаго.
[18] Греч λιχανός — указательный палецъ, который у магометанъ называется пальцемъ исповјданія, потому что этотъ палецъ обыкновенно поднимаютъ вверхъ вступающіе въ магометанство, въ то время, когла произносятъ исповјданіе магометанской вјры.
[19] Iоан. 10, 11. 15. 17. 18.
[20] твердо.
[21] Матф. 20, 28.
[22] Матф. 20, 18.
[23] поношеніе.
[24] Въ друг. спискј: умышленіе.
[25] составляютъ.
[26] неудержимымъ.
[27] считаете.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 122-136.