Но елика убо Божія благодать, свыше наставляющи, дасть глаголати противу безбожнаго сего и христоборца чювьствена бјса, глаголю же сквернаго Моамефа, толика и сицева. Нынј же къ благовјрнымъ слово обращу, не аки превосходя, нјкый азъ учителъ имъ сый, или поставленъ свыше надъ ними, но и акы наименшій и худый братъ имъ, и стаинникъ въ благочестивыхъ догматехъ непорочныя и боготворительныя вјры христіанскыя, воспоминая имъ и себј самому отъчасти, утвержающая убо насъ и соблюдающа въ яже о Христј, истиннјмъ Бозј нашемъ и Спасј, вјрј и любви и надеждј, и храняща насъ невредныхъ отъ достигшихъ насъ нынјшнихъ временъ нестроеній. И да тако реку: отъ темнаго и безсвјтнаго мрака нынј паче, нежели иногда когда, приличнје есть глаголати намъ съ блаженымъ пророкомъ и царемъ Давыдомъ: ты Господи да соблюдеши ны отъ рода сего и въ вјкы; [1] чесо ради? зане, рече, окрестъ нечестивіи ходятъ. Идјже бо, аще вселенныя [2] простреши мысленое око души, тамо всяко обрящеши множащуся и омрачающу тму нечестія христіаноборцовъ измаилтянъ. Наченшу убо отъ лјтъ Ираклія царя греческаго, и простерту даже и до сего времени, ей убо и въ послјдующее пребыти хотящу, якоже азъ отъ божественыхъ писаній учимъ бываю, даже и до явленія самого богоборца антихриста, еже не зјло далече есть, но и при дверехъ уже стоитъ, яко же божественая писанія учатъ насъ, явьственнј глаголюща: на осмомъ вјцј быти хотящу всјхъ устроенію, сирјчь и греческія области престатію, и началу мучительства богоборца антихриста, и второму страшному на земли Спаса Христа пришествію. А яко недалече стоитъ сицево чаемое благовјрныхъ всјхъ устроеніе, явьствено есть и отъ иныхъ многыхъ, яснјйшихъ писанныхъ показаній и преданій, и наипаче, отъ нихже блаженый апостолъ Павелъ пишетъ въ еже къ Солуняномъ, посланіи второмъ, учя ихъ хотящая быти знаменія преже Господня втораго пришествія: и никтоже васъ, рече, да прельщаетъ ни по единому образу, аще бо не пріидетъ отступленіе прежде, и открыется человјкъ беззаконія, сынъ погибельный, противляяйся и превозносяся надъ всякымъ глаголемымъ Богомъ и чтилищемъ, яко ему сјсти въ Церкви Божіи, аки Богу, и прочая. [3] Отступленіе же, сирјчь преложеніе языкъ отъ непорочныя и правыя христіаньскыя вјры на различныя богомерскія ереси, на христоборное безвјріе агарянъ, когда иногда, болше нынјшняго, чаемъ видјти или слышати? гдј, яже въ благовјріи и честности боголјпнјй возсіавшая, красота вкупј и слава бывшихъ вјрныхъ въ Iеросалимј, и Александріи, и Египтј, и Ливіи и Антиохіи? гдј теплота она и ревность божественная возсіавшихъ въ постј, въ скитј и въ горней Ѳиваидј, и въ различныхъ странахъ и горахъ, богоносныхъ и равноангельныхъ отецъ нашыхъ? гдј, яже въ благовјріи возрастшая, высота пресловутая и похвала всјхъ западныхъ языкъ, святая, глаголю, соборная и апостольская Церковь ветхаго Рима? Не сія ли вся видимъ нынј, ова убо обладана бывша, ова же и запустјна, отъ безбожныхъ агарянъ, ова же охудјна и непотребьна бывша до конца различными богомерскыми ересми, ихже началникъ есть той, иже преже пресвјтлый и преименитый во благовјріи и во всякомъ житіи честномъ и премудрости, древній Римъ и яже по немъ прочая Италіа? Иди мысленымъ, душе, окомъ въ Индію и Ефиопію послјднихъ концевъ вселенныя, — и тамо обрящеши всяко безобразіе и гнушеніе всяческыхъ ересей. Есть же, гдј и агаряньское нечестіе узриши, тамошныя языкы прельщающе, и къ себј прилагающе, гдј различныя восточныя, вјрныя языки, отъ нихъ же свјтъ благовјрія наченъ сіяти, при божественныхъ апостолехъ, и къ намъ европiяномъ разліяся. Не сія ли вся безмала, [4] агарянская нечестивая тма, ова убо къ себј уже преложи, ова же не потребьствова, и озлоби и растлјла есть душевнј, и растлјваетъ всегда всякымъ образомъ? Что не глаголю болшее всјхъ бывшихь на земли пресловутыхъ слышаній и видјній? гдј высота и неприкладная слава, елика въ области и премудрости и всякой добродјтели и благозаконіи и православнји вјрј царствія православныхъ христіанъ царей, царствовавшихъ въ всеславнјмъ и благочастнјмъ градј Констянтина великаго? гдј всемірный онъ свјтъ благовјрія, иже, подобнј солнцу, осіявая вселенную всю, архіереиствовавшими въ немъ, равноангельными святители? Не сія ли вся, лјты уже довольными, работна суть и подручна измаилтяномъ? И ниоткудуже избавленія намъ нјсть, но всегда, яже убо по насъ на горшее, а яже по нихъ въ еже славнје происходятъ. Уразумјимъ мыслено, въ каково злочястіе нынј доидошя, яже у насъ, бјдныхъ грековъ, вещи; како всјхъ онјхъ благыхъ вкупј лишихомся, и умалихомся паче всјхъ языкъ, и быхомъ поношеніе сосјдомъ нашимъ, посмјаніе и поруганіе окрестнымъ нашимъ, по божественому рещи писанію. Гдј убо нынј, яже паче ума и слова тогда совершахуся въ немъ, отъ пречистыя Божія Матеро чюдеса, избавляющія его, паче надежа, отъ частыхъ нахоженій варьварскыхъ? Чесо ради сія вся нынј погасло? Чесо ради нынј не востаетъ градохранительница и Владычица того на заступленіе и избавленіе всяко? преже дерзнутыхъ ради въ немъ, нашими прародители, неисцјльныхъ беззаконій. Или не тако божествоное пјснопјніе глаголетъ о подобнј намъ нечествовавшихъ іудеяхъ: обаче за льщенія ихъ положилъ имъ еси злая, низложилъ я еси, внегда разгордјтися имъ; како бышя въ запустјніе, внезапу изчезошя, погибошя за безаконія ихъ, якоже сонія востающаго. [5] Но плакати, яже по единому нашихъ злосчастій, оставивше, на предложеное возвратимся, и уразумјемъ, инымъ божественымъ и неложнымъ гласомъ, не далече, но близъ стоящу всяческыхъ устроенію, сирјчь чяемую кончину вјка сего, и яко скверный Моамефъ той есть, глаголемый въ божественјй апокалипси, псевдопрофитъ [6] и предитечя богоборнаго антихриста. Смотримъ же сице. Господь нашъ Iсусъ Христосъ, въ святыхъ евангеліяхъ, уча ученики своя, вкупј и утвержая ихъ и ими всјхъ вјрныхъ въ своей вјрј и любви, и вопрошенъ бывъ отъ нихъ, рекшихъ: рци намъ, когда сія будутъ, и кое есть знаменіе твоего пришествія, и кончина вјка сего, — и той предреклъ имъ, елика лютая и нестроенія случятся въ человјцјхъ, преже страшнаго пришествія своего и кончины вјка сего, приводитъ [7] глаголя: и тогда соблазнятся мнози, и другъ друга предадятъ, и возненавидятъ другъ друга, и мнози псевдопрофити востанутъ и прельстятъ многихъ, [8] начальникы, прозябшихъ различныхъ ересей, въ своей Церкви, знаменуя сице Владыка, яковъ же бысть Симонъ волхвъ, и Маркіонъ, и Манентъ, и Оригенъ, Арій же и Македоній и Несторій, Сергій же и богомерстіи иконоборци, иже вси, различнј, озлобишя соборную Церковь Спаса Христа, и бесчисленныхъ отъ православныя вјры привлекошя въ своя ереси. Таже приводитъ, глаголя: и проповјсться евангеліе сіе царствія во всей вселеннјй, во свидјтельство всјмъ языкомъ, и тогда пріидетъ кончина. [9] Чесо же ради во свидјтельство проповјсться? да слышавшеи и вјровавшеи спасутся, а не вјровавшеи осудятся прочее праведнымъ осужденіемъ, аки не имуще ни единый извјтъ [10] о своемъ невјрьствіи. А яко уже проповјдася издавна евангеліе царствія Божія во всей вселеннјй, свидјтель достовјренъ божественый Павелъ апостолъ, глаголя о прочихъ апостолехъ своихъ, на осужденіе невјрныхъ іудеевъ: но глаголю: еда не услышашя, ей услышашя, во всю бо землю изыдоша вјщанія ихъ и въ концы вселенныя глаголы ихъ, [11] сирјчь апостолъ Христовыхъ. Таже по еже предпроповјдати имъ будущее омраченіе свјтиломъ, и паденіе звјздамъ, и силъ небесныхъ движеніе, притчею представляетъ имъ и образователнј [12] время кончины вјка и своего пришествія, глаголя: [13] отъ смоковници же научитеся притчи, рекше, глаголемая вамъ нынј отъ мене гадателнј, егда уже вјтвь ея, рече, мякька будетъ и листвія прозябнутъ, вјдите, яко близъ есть жатва, такожде и вы, егда увидите сія вся, вјдите, яко близъ есть, при дверехъ сирјчь, кончина вјку. Смоковницу Владыка глаголя, якоже мнј ся видитъ не садъ сей чювственный и плодоносный, — сего бо сада вјтвь, по вся лјта, мякка бываетъ и плодъ приноситъ, и листвія происпущаетъ, но ниже и кончину приводитъ, — но смоковницу глаголетъ, таинственнј простертую по всей вселеннјй, святую соборную и апостольскую Церковь свою, вјтвь же плодоносну — учителное слово, сирјчь евангельскую проповјдь, ею же и въ ней же отъ предстоящихъ Церкви Христовј архіереевъ просвјщаеми и учими, иже вездј благочестивіи, плодоносна является своему небесному Садодјлателю мысленная сія смоковница, и сего ради благословеніе духовно свыше пріемлетъ, и на лутчее всегда преспјваетъ. Аще же вјтвь ея мякька будетъ, сирјчь учителное слово не имать твердое, и не обинительно [14] и не на лици зрящи, по апостольскому божественому словеси, глаголющему: обличи, запрети, утјши, двигнися благовременне, безвременне, дјло благовјстника сотвори, — и сего ради листвія точію вјтвь ея произноситъ, сирјчь безплодіе благыхъ дјлъ, приличнје же есть рещи презрјніе и преслушаніе евангельскыхъ Божіихъ заповјдей, по небреженію многому пастырей, не пріемлетъ свыше благословеніе духовное, но, отсјцы ея, услышитъ, вьскую и упражняетъ землю, и еже да нектому истебе плодъ будетъ въ вјкы. Когда же иногда паче, нежели нынј, умякчится вјтвь таинственныя сея и божественыя смоковницы, и листвія произрастутъ ли, егда нјсть ни единъ учай прилјжнј, ни наказуя безчинныя, никтоже утјшая малодушьныя, никтоже заступаяй и прилежа о немощныхъ, никтоже обличаяй противящихся слову благочестія, никтоже запрјщаяй безстуднымъ, никтоже обращаяй заблуждьшихъ отъ истины и честнаго житія христіанскаго, никтоже за совершенное смиреномудріе отбјгаетъ священническихъ санъ, ниже по божественней ревности взыщетъ ихъ, да люди безаконнующая и безьчинствующая исправитъ. Но супротивное паче обрящеши нынј дерзаемо: вси готови дары великими сихъ купити, да въ отрадј и славј и всякомъ покои всегда живутъ. Нынј время видитмися рещи глаголющую божественую рјчь: [15] вси уклонишися, сирјчь отъ спасителнаго пути евангельскыхъ заповјдей и апостольскыхъ и отеческыхъ преданій, вкупј непотребни бышя, рекше и житіемъ и словомъ и дјломъ, а еже по сихъ въслјдуетъ, молчаніемъ миную, щадя негодующихь слову же и дерзновенію и ревности, яже по истинј. О како кто достойнј восплачетъ достигшую нынј родъ нашь тму! Окрестъ нечестивіи ходятъ, якоже скимни рыкающе и всякыми образы прельщающе, и хыщаютъ [16] отъ Бога благочестивыхъ и своему отцу діаволу приносятъ, даръ ему любезнјйшій; наши же пастыріе, безчювьственјйши каменій, устроишася, довольно себе въ отвјтъ тогда непщующе, аще себе спасти возмогутъ, волею презирающе и не разумјвающе божественый гласъ, глаголющь: азъ есмь пастырь добрый; пастыръ добрый душю свою полагаетъ за овца, а наемникъ, иже нјсть пастырь, зритъ волка грядуща издалече, и оставляетъ овця и бјжитъ, зане наемникъ есть, и нерадитъ о овцяхъ; волкъ же хыщаетъ овця, и расточаетъ я, ихъже кровь, рече, изыщу отъ руки пастырей. Страшно сицевое на васъ прещеніе и всякія грозы исполнено, о честнјйшіи пастыріе! Услышите и блаженаго Павла апостола, яснј глаголющаго о васъ и о отвјтј, егоже должи есте сотворити предъ неумытнымъ Судіею: братіе, рече, повинуйтеся наставникомъ вашимъ, — и послушайте чесо ради, — тіи бо бдятъ, рече, о душяхъ вашихъ, яко слово отдати хотяще о васъ. [17]

Возвратимжеся пакы къ предложеному. Предреченное убо божественымъ апостоломъ отступленіе языкомъ отъ евангельскія проповјди къ различнымъ богомерскымъ ересемъ и къ богоборному нечестію агаринъ отродъ, [18] ово убо уже бывше, ово же по вся дни дјйствуемо зряще; такожде и таинственныя смоковницы вјтвь, мякку бывшу паче елея, по пророчеству, и листвія, а не плоды, якоже древле, происпущающу, разумјвающе, что ино ждемъ, а не точію будущую кончину всяческыхъ, по божественымъ писаніемъ, и наипаче агарянскому мучителству, отъ лјтъ Ираклия царя наченшу, и множайшая и лучшія страны вселенныя подъ собою покоршу, и покорити всегда попущаему, судбами Божіими непостижными, и православныхъ царей царствію на многа начальства раздјльшуся, и довольна уже лјта отъ агарянъ разорену бывшу, и исправленіе ниоткудуже получающу. Супротивно же паче, останкомъ западныя римскыя державы, на многа королевьства и государьства раздјленнымъ, и безпрестани межи себе враждебне живущимъ, и другу на друга воюющимъ, западнымъ королемъ, по подобію прежнимъ нашимъ европіяномъ, царямъ же и государемъ и княземъ, грекомъ же и булгаромъ и сербомъ, ихъ же всјхъ вкупј истребилъ есть, напущенный свыше на насъ, злобезбожный измаилтянинъ. И исполнися апостольскій гласъ глаголющій: аще же другъ друга снјдаете и грызаете, блюдитеся да не другъ отъ друга истреблени будете. [19] Таяжде и Владычьный Божественый гласъ уставляетъ, глаголя: всяко царство, раздјльшееся на ся, запустјетъ. [20] Яко же бо, иже многыхъ другъ ко другу по Бозј миръ и единомысліе, сущій миръ, глаголю же самого Христа, вселяетъ и держитъ въ нихъ возрастающа и благословяща и множаща ихъ, по божественому гласу, глаголющу: идјже бо, аще будутъ два или три собрани о имени моемъ, ту есмь посредј ихъ, сице пакы же, многыхъ другъ ко другу разногласіе и брань, отъ гордости, властолюбія же и сребролюбія, составлено, самого богоборца и человјкоубійца діавола вселяетъ въ нихъ, отъ него же прочее, невидимо воеводъствуеми, не престаютъ другъ на друга, аки звјри дивіи, сурово воююще, дондеже другъ отъ друга до конца истребятся. Симъ убо сице бывшимъ, и бываемымъ по вся дни, судьбами Божіими неислјдованными, добро есть и спасительно намъ, и самому Вышнему благоугодно, отвергшимъ намъ отъ мыслей нашихъ всякія слабости и душегубительно отчяаніе, и наипаче прельщающія насъ надежды суетныя, яко пакы чаемъ, якоже и прежде, устроится держава царьская въ Констянтинј градј, востати намъ отъ многолјтнаго сна премногаго нашего безпечалія и небреженія, повинующимся глаголющему проповјднику: братіе, во всякой премудрости ходите, ко внјшнимъ, время искупующе, понеже дніе лукави суть. [21] И пакы тойже: [22] нощь убо прейде, сирјчь многолјтная она тма прелести лукавыхъ бјсовъ, овладјвшая надъ человјческымъ родомъ, даже и до, еже по плоти, рождества Господа и Спаса нашего Ісуса Христа прейде, и до конца изнеможе явленіемъ присносущнаго живота и свјта, а день приближися, сирјчь невечерній свјтлјйшій свјтъ неблазненеаго богоразумія, восіявшему разумному солнцу правды, просыпася во всю вселенную и просвјтилъ есть ю. Сего ради, рече, отложимъ дјла тмы, яже суть блудъ, чюжеженство и всяка нечистота плотская, и студодјяніе, не правда же и лихоиманіе, и всяко преслушаніе и преступленіе божественныхъ заповјдей Спаса Христа, дјла тмы сихъ нарицая, не зане тмою дјйствуются, — и въ дни бо блудятъ и крадутъ и всяко иное беззаконуютъ человјцы, — но зане вјчной и преисподней тмј предаютъ насъ, дјлателей ихъ. И облечемся, рече, въ оружіихъ свјта, сирјчь въ душевныхъ съборныхъ [23] четырехъ добродјтелехъ, яжо суть: смыслъ прямъ, правда, мужество — не еже тјлеса ниизлагаетъ и стјны градскыя разоряетъ, но душевное сильное и терпјливо противу наводимыхъ намъ отъ бјсовъ и лукавыхъ человјкъ, различныхъ напаствованій и обстояній, — цјломудріе, соблюдающее насъ во всякой святынј и преподобьствј, и самјмъ святымъ ангеломъ соединяюще насъ; такожде и въ прочихъ отродехъ сихъ, благая дјянія: воздръжаніе, кротость, смиреномудріе, вјру, надежу, любовь, яже есть исполневіе всему закону. Сицевыми оружіи духовными вооружившеся, противъ ополчимся нечестію безбожныхъ агарянъ, емуже начальникъ и обрјтатель самъ добраненавистливый и богомерскый діаволъ есть, весь во всемъ вселився сквернемъ Моамефј. Ниже прельщаимся, ниже ужасаимся о добросчастіи же и пресвјтлыхъ побјдахъ и исправленіихъ; не въ сицевыхъ бо нјкыхъ состоится и познавается, еже въ Христа Бога, благовјріе. Свјтлјйши и чюднјйши сихъ, много зјло, въ благосчастіихъ и свјтлјйшихъ побјдахъ, быша Александръ Макидонскый и Кесарь Августъ, иже всея вкупј вселенныя властель бысть, и, иже по немъ, царіе римстіи, но не сего ради [24] благочестиви были, но лукавыхъ бјсовъ и идолъ ихъ служителе, Христу гонителе звјреве, якоже и нынјшній скверный Моамефъ, всякими образы гоня насъ и порабощая себј, попущающу Богу, грјхъ ради вашыхъ многыхъ, а не за благовјріе нјкое его. Да не будетъ мудръствовати когда сіе намъ; како бо благочестивъ наречется, иже Бога самого, пославшаго единороднаго Сына своего, Iсуса Христа, отметается, по божественому гласу, глаголющу [25]: не почитаяй Сына, не почитаетъ Отца, пославшаго ѝ, сирјчь отметаяйся Сына, отметается и Отца пославшаго ѝ, и спасителныя Его заповјди развращаяй, самого Христа не Сына Божіа ни Бога исповјдуетъ, но раба и созданіе Божіе мудръствуя его и нарицая; не за благочестіе убо кое его на толику высоту славы земскыя [26] возвысися и возвышается выну, елма ниже предреченіи еллинстіи и римстіи царіе, но неислјдованными и непостижимыми Божіими судбами сотворъшаго въ премудрости и правящаго вся видимая и невидимая. Да не ужасаимся убо о семъ, Господа ради, ниже да скорьбимъ, о немжо толика уже лјта работаемъ имъ, и еще ниоткуду намъ нјсть ни едино заступленіе, ниже помощь, ниже мнимъ оставленнымъ бывшимъ себе отъ Бога Спаса нашего. Елма ниже преже насъ бывшеи христіане 300 и 18 лјтъ обладаеми и гоними и всякимъ образомъ озлобляеми и обидими отъ христоборцовъ мучителей, еллинъ и римлянъ и іудеевъ, не скорбяху, ниже низпадаху мысльми своими, но паче радовахуся и веселяхуся за Христа и, яже въ Него, вјру гоними и всякыми муками изнуряеми плоти своя, вјрою, яже въ Него, и любовію и надеждею крјпящеся и себе утвержающе, поминающе, съ твердою и несумненною вјрою, објщаніе Господа Бога нашего и Iсуса Христа, глаголющаго: блажени изгнани правды ради, яко тјхъ есть царство небесное; блажени есте, егда поносятъ васъ и ижденутъ и рекутъ всякъ золъ глаголъ на васъ, лжуще Мене ради, радуйтеся и веселитеся яко мьзда вашя многа на небесехъ [27]; такожде, понимающе и завјщаніе блаженнаго Iякова, Аделфофея [28]. глаголющаго: всяку радость возмните братія моя, егда въ напастехъ впаднете различныхъ; сихъ Божественыхъ објщаній держащеся, треблаженніи они воистину христіане, не скорбяху, ни опечаляхуся, гоними отъ нечестивыхъ, и всякымъ образомъ мучими и озлобляеми, и своихъ имјній и стяжаній лишаеми, но паче славословяху Спаса Христа, яко сподобилъ ихъ таковая страдати за Божественую славу Его; тјмже и Христосъ воспрослави ихъ, неточію на небесехъ, равныхъ ихъ святымъ ангеломъ показавъ и вјнчавъ ихъ вјнцы славы неувядаемыя, но еще и на земли, прослави пречестныя ихъ мощи, дарованіи всяческыхъ исцјленій и всякыми чюдодјяніи предивными. Сице бо Самъ, иже святыхъ Своихъ мученикъ Богъ же и Владыка, објща пророкомъ Своимъ, глаголя: прославляющая Мя прославлю, а обесчествующіи Мя, обезчествуются. О нихже и духовное пјснопјніе издалеча глаголаше: мнј же зјло почтени бышя друзи твои, Боже, зјло утвердишяся владычествія ихъ, изочту ихъ, и паче песка умножатся [29]. И мы убо, братіе, зане овјхъ отъроды [30] блаженыхъ и наслјдникы вјры, яже въ Христа, истиннаго Бога нашего, такожде и тјхъ же имъ поношеній и скорбей сопричястницы суще, да не сјтуемъ ниже низпадаемъ мысльми, гоними отъ нечестивыхъ, и различнј оскорбляеми за вјру, яже въ Христа; но, равьноангельскыхъ онјхъ горящую вјру, яже во Христа, и любовь теплую и желаніе вјчныхъ благъ подражающе, всею душею да радуемся и веселимся и благодаримъ Спаса Христа о всјхъ, ихъже стражемъ, яко благочестивіи, за славу святаго и покланяемаго имяни Его, послушающе верховнаго (изъ) апостоловъ, глаголюща: возлюбленніи, поелику сообщаетеся Христовымъ страстемъ, радуйтеся, да и въ откровеніи славы Его возрадуетеся, веселящеся [31]; и пакы: аще поношаеми бываете за имя Христово, блажени есте, яко славы Божіи Духъ на вы почиваетъ [32]. Да глаголимъ и мы, съ иже подобнј намъ преданными въ скорбь, судьбами праведными всјхъ Владыкы: вся сія пріидоша на ны, и не забыхомъ Тебе, и не неправдовахомъ въ завјтј Твоемъ, и не отступи вспять сердце наше, яко смирилъ еси насъ на мјстј озлобленія, и покры насъ сјнь смертная, яко Тебе ради умерщвляеми есмы весь день; вмјнихомся, яко овця на заколеніе. Востани, Господи, воскресни и не отрини до конца; въскую лице Твое отвращаеши, забываеши нищету нашу и печаль нашу, яко смирися въ перьсть душя нашя, прильпј земли утроба нашя; востани, Господи, помози намъ, и избави насъ, имени ради Твоего. Прославимъ убо Его на земли всякымъ правотвореніемъ и честнымъ жительствомъ и терпјніемъ наносимыхъ намъ скорбныхъ, да и Онъ воспрославитъ насъ на небесехъ. Не далече стоимъ мученическыхъ подвигъ и вјнцовъ, но въ самомъ стадіи [33] исповјданія, еже за Христа, стояще есми, аще правј мудрствуемъ; многыми скорбъми подобаетъ намъ внити въ царство небесное; никтоже, сјдяй дремля, поставляетъ одолјніе. И святый великій Василій и святый апостолъ Павелъ: никтоже вјнчяется аще незаконно подвигнется [34]. Се время благопріатно; се нынј день спасеніа. Братіе, не младенцы умомъ бывайте, рече божественый апостолъ, но злобою младенствуйте, а умы совершени бывайте [35]; да и мы совершенству треблаженныхъ онјхъ и неувядаемей славј и вјнцомъ сподобимся, о Христј Iсусј Господј нашемъ, Емуже подобаетъ всяка слава, честь и покланяніе, съ безначальнымъ Его Отцемъ и Всесвятымъ, Преблагымъ и Животворящимъ Духомъ, нынј и присно, и въ вјкы вјкомъ. Аминь.

Примјчанiя:
[1] Пс. 11: 8.
[2] во вселенной.
[3] 2 Сол. 2: 4.
[4] почти
[5] Пс. 72: 18-19.
[6] лжепророкъ.
[7] присовокупляетъ.
[8] Матф. 24: 11-12.
[9] Матф. 24: 14.
[10] извиненія, оправданія.
[11] Рим. 10: 18.
[12] въ образахъ.
[13] Матф. 24: 32.
[14] неуклонно.
[15] Пс. 13: 3.
[16] похищаютъ.
[17] Евр. 13: 17.
[18] агарянскаго рода.
[19] Гал. 5: 15.
[20] Матф. 12: 25.
[21] Еф. 5: 15.
[22] Рим. 13: 12.
[23] общихъ, главныхъ.
[24] но по причинј этого не были благочестивы...
[25] Іоан. 5, 23.
[26] земныа.
[27] Матф. 5, 10-11.
[28] брата Господня.
[29] Псал. 138, 17.
[30] родъ.
[31] 1 Петр. 1, 7.
[32] 1 Петр. 4, 14.
[33] поприщј.
[34] подвизается.
[35] 1 Кор. 14, 20.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 106-121.