1 Худайың ислеги билен Месих Исаның ресулы болмага чагырылан Павлусдан ве Состенис догандан,
2 Худайың мукаддеслиге чагырылып, Месих Исада мукаддес эдилен Коринтосдакы йыгнагына ве хер ерде хем оларың, хем-де бизиң Реббимиз Иса Месихиң адыны тутянларың барысына салам!
3 Атамыз Худайдан, Реб Иса Месихден сизе мерхемет хем парахатлык болсун!
4 Мен Месих Исада сизе берлен Худайың мерхемети үчин, сиз барада элмыдам Худая шүкүр эдйәрин.
5 Чүнки сиз Онда хер зада, хер сөзе ве хер билиме бай болдуңыз.
6 Бизиң Месих хакдакы гүвәлигимиз сизде беркеди.
7 Шонуң үчин хем сиз Реббимиз Иса Месихиң аян болмагына гарашып, хич бир сылагда етмезчилигиңиз ёкдур.
8 Ол сизи Реббимиз Иса Месихиң гүнүнде мүйнсүз болар ялы, соңа деңеч беркидер.
9 Сизи Өз Оглы, бизиң Реббимиз Иса Месих билен шәрикчилиге чагыран Худай ынамдардыр.
10 Эй доганлар, хеммәңизиң дилиңиз бир болуп, араңызда бөлүнишик болман, бир пикирде ве бир ислегде бирлешмегиңизи Реббимиз Иса Месихиң ады билен сизден хайыш эдйәрин.
11 Чүнки, эй доганлар, сизиң араңыза дава дүшенлиги хакда Клоиниң өйүндәкилер маңа хабар берди.
12 Мениң айтҗак болян задым шу: сизиң хер бириңиз «Мен Павлусыңкы», «Мен Аполлосыңкы», «Мен Кифасыңкы», «мен Месихиңки» диййәрсиңиз.
13 Месих бөлүндими? Павлус сизиң үчин хача чүйлендими? Я сиз Павлусың адына чокундырылдыңызмы?
14 Хич ким маңа өз адына чокундырды диймез ялы,
15 Мен Криспус ве Гаюсдан башга сизиң хич бириңизи чокундырманыма Худая шүкүр эдйәрин.
16 Шейле хем мен Стефаның ичерсини-де чокундырдым, башга чокундыраным ядыма дүшмейәр.
17 Чүнки Месих мени чокундырмак үчин дәл-де, Хош Хабары ыглан этмек үчин ёллады, йөне Месихиң хачы бидерек болмаз ялы, муны сөз акылдарлыгында этмели дәлдим.
18 Чүнки хачың сөзи хеләк боланлар үчин акмаклык, биз - гутуланлар үчин болса Худайың гудратыдыр.
19 Чүнки: «Мен акылдарларың акылдарлыгыны вейран эдерин, дүшүнҗелилериң дүшүнҗесини гүйчден дүшүрерин» дийип язылгыдыр.
20 Акылдар ханы? Канунчы ханы? Бу дөврүң алымы ханы? Худай бу дүнйәниң акылдарлыгыны акмаклыга өвүрмедими?
21 Чүнки дүнйәниң Худайың акылдарлыгында өз акылдарлыгы билен Худайы танамадыгына гөрә, Худай иман эденлери вагыз акмаклыгы аркалы гутармагы унады.
22 Чүнки ехудылар гудрат гөркезмеги талап эдйәр, греклер акылдарлыгы гөзлейәр.
23 Биз болсак хача чүйленен Месихи ехудылар үчин бүдремәге себәп, греклер үчин-де акмаклык болан,
24 йөне чагырыланлара, хем ехудылара, хем греклере Худайың гудраты ве Худайың акылдарлыгы болан Месихи вагыз эдйәрис.
25 Чүнки Худайың «акмаклыгы» адам акылындан үстүн, Худайың «эҗизлиги» адам гүйҗүнден гүйчлүдир.
26 Чүнки, эй доганлар, чагырылышыңыза середиң. Адам өлчеги боюнча көпиңиз акылдар, гүйчли, асылзада дәлдиңиз.
27 Йөне Худай акылдарлары утандырмак үчин, дүнйәниң акмак сайянларыны сайлады. Худай гүйчлүлери утандырмак үчин, дүнйәниң эҗиз сайянларыны сайлады.
28 Худай әхмиетли затлары ятырмак үчин, бу дүнйәниң асылзада дәллерини, әсгерилмейәнлерини ве әхмиетсизлерини сайлады.
29 Ол муны хич бир адам Худайың хузурында магтанмасын дийип этди.
30 Йөне: «Магтанан Реб билен магтансын» дийип язылышы ялы,
31 сиз Худайың саясында Месих Исадасыңыз. Ол бизиң үчин Худайың акылдарлыгы ве догрулыгы, мукаддеслиги ве гутарышы болды.
1 Эй доганлар, мен сизе Худайың гүвәлигини вагыз этмәге геленимде, сөз ве акыл артыклыгы билен гелемок.
2 Чүнки сизиң араңыздакам, Иса Месихден, Онуң хача чүйленмегинден башга хич бир зады билмезлиги йүрегиме дүвдүм.
3 Мен сизе эҗизлик ве горкы ичинде гелдим, гаты-да сандыраярдым.
4 Сөзүм хем вагзым ынсан акылдарлыгының ынандырыҗы сөзлерине дәл-де,
5 сизиң иманыңыз ынсан акылдарлыгында дурман, Худайың гүйҗүнде дурар ялы, Рухуң ве Онуң гүйҗүниң гөркезилмегине даянярды.
6 Биз акылдарлыгы кәмиллер арасында сөзлейәрис. Бизиң сөзлейән бу акылдарлыгымыз бу дөврүңки, бу дөврүң гечиҗи хөкүмдарларыныңкы дәл-де,
7 Худайың заман башламаздан өң бизиң шөхратымыз үчин беллән гизлин, сырлы акылдарлыгыдыр.
8 Бу акылдарлыга бу дөврүң хөкүмдарларының хич бири дүшүнмеди, чүнки дүшүнен болсалар, шөхратлы Ребби хача чүйлемездилер.
9 Эмма язылышы ялы: «Худайың Өзүни сөенлер үчин тайярлан затларыны не гөз гөрендир, не гулак эшидендир, не-де адам йүреги хыял эдендир».
10 Бизе болса Худай муны Өз Рухы аркалы аян этди, себәби, Рух әхли зады, Худайың чуң пикирлерини-де барлаяндыр.
11 Чүнки адамда нәме барлыгыны адамың өзүнде болан рухундан башга ким билер? Шейле хем Худайда нәме барлыгыны Худайың Рухундан башга хич ким билйән дәлдир.
12 Биз бу дүнйәниң рухуны дәл-де, Худайың өзүмизе берен берекетлерини билер ялы, Худайдан гелен Рухы алдык.
13 Биз булары адам акылдарлыгының өвреден сөзлери билен дәл-де, рухы затлары рухы сөзлер билен сөзләп, Рухуң өвреден сөзлери билен айдярыс.
14 Тебигы адам Худайың Рухуна дегишли затлары унамаз, чүнки булар онуң үчин акмаклыкдыр, булары билип билмез, себәби булара рух боюнча дүшүнилйәндир.
15 Руха уян адам әхли зады сайгарар, йөне оны хич ким сайгармаз.
16 Чүнки, «Реббе өвүт берер ялы, онуң пикирини ким билди?» Йөне бизде Месихиң пикири бардыр.
1 Эй доганлар, мен сизе Руха уянлара дәл-де, тебигы адамлара, Месихдәки чагалара гүррүң бершим ялы гүррүң бердим.
2 Сизе гаты-гуты дәл-де, сүйт бердим, чүнки сиз гаты-гуты иймеги башармаярдыңыз, муны хәзир хем башармаярсыңыз.
3 Чүнки сиз энтек тебигы адамларсыңыз. Себәби араңызда ичигарачылык, чекишме ве даваның барлыгына гөрә, сиз тебигы адамлар дәлми? Адам адаты боюнча гезмейәрсиңизми?
4 Чүнки бири «Мен Павлусыңкы», ене бири «Мен Аполлосыңкы» диййән болса, тебигы адамлар дәлсиңизми?
5 Павлус ким? Аполлос ким? Олар хызматчы, сиз хем Реббиң хер бирине бершине гөрә, олар аркалы иман этдиңиз.
6 Мен экдим, Аполлос суварды, йөне өсдүрйән Худайдыр.
7 Шоңа гөрә, экен-де, суваран-да хичдир, диңе өсдүрйән Худай әхмиетлидир.
8 Экен билен суваран бирдир, йөне хер бири өз зәхметине гөрә сылагыны алар.
9 Биз Худайың ишдешлеридирис, сиз болсаңыз, Худайың экин мейданы, Худайың ымаратысыңыз.
10 Худайың өзүме берлен мерхеметине гөрә, мен акылдар усса кимин бинаның дүйбүни тутдум. Башга бири болса, онуң үстүни гуряндыр, йөне хер киши нәхили салшына дыкгат этсин.
11 Себәби хич ким тутулан дүйпден, ягны Иса Месихден башга дүйби тутуп билмез.
12 Бу дүйбүң үстүнде гызылдан, күмүшден, гымматбаха дашлардан, агачдан, отдан, самандан,
13 ымарат салан хер кишиниң иши белли болар, чүнки Реббиң гүни оны аян эдер, себәби отда белли болар, хер бириниң ишиниң нәхилидигини от сынар.
14 Кимиң бина эдени ода чыдаса, шол сылаг алар.
15 Кимиң иши янса, ол зыян чекер, йөне өзи от ичинден гечен ялы болуп гутулар.
16 Сиз Худайың ыбадатханасыдыгыңызы, Худайың Рухуның сизде яшаяныны билмейәрсиңизми?
17 Бири Худайың ыбадатханасыны йыкса, Худай хем оны йыкар, чүнки Худайың ыбадатханасы мукаддесдир. Ине, шол ыбадатхана сизсиңиз.
18 Хич ким өзүни алдамасын. Сизиң араңыздан бири шу дүнйәде өзүни акылдар сайян болса, онда ол акылдар болмак үчин акмак болсун.
19 Чүнки бу дүнйәниң акылдарлыгы Худайың янында акмаклыкдыр, себәби: «Ол акылдарлары өз хилелеринде тутяндыр» дийип язылгыдыр.
20 Ене-де: «Реб акылдарларың пикирлериниң бошдугыны билйәндир» дийип язылгыдыр.
21 Шоңа гөрә, хич ким адам билен магтанмасын, чүнки хемме зат сизиңкидир:
22 Павлус, Аполлос я Кифас болсун, дүнйә, яшайыш, өлүм болсун, хәзирки я гелҗекки затлар болсун - хеммеси сизиңкидир.
23 Сиз Месихиңкисиңиз, Месих-де Худайыңкыдыр.
1 Шейлеликде, адамлар бизи Месихиң хызматчылары, Худайың сырларының векиллери хасап этмелидир.
2 Векиллериң хер биринден болса садыклык талап эдилйәр.
3 Сизиң я-да адамларың диванының үстүмден хөкүм чыкармагы мениң үчин мөхүм зат дәл, йөне өзүм хем өз үстүмден хөкүм чыкармаярын.
4 Чүнки мен өзүмде бир айып гөрмейәрин, йөне мунуң билен өзүми акламаярын. Мениң үстүмден хөкүм чыкарян Ребдир.
5 Шонуң үчин Реб гелйәнчә, вагтындан өң хич бир задың үстүнден хөкүм чыкармаң. Ол гараңкылыгың гизлин затларыны ягтылдар, йүреклериң ниетлерини аян эдер, шол вагт хер кес Худайдан өзүне лайык тарыпыны алар.
6 Эй доганлар, сиз языланлардан артык пикир этмезлиги бизден өвренип, хич бириңиз бейлекиниң өңүнде габармаз ялы, мен бу затлары сиз себәпли өзүме хем Аполлоса тымсал эдип айтдым.
7 Чүнки ким сени бейлекилерден пархлы эдйәр? Алмадык нәмәң бар? Алан болсаң, алмадык ялы, өвүнмәң нәме?
8 Сиз эййәм доюп, эййәм баядыңыз, бизсиз хөкүм сүрдүңиз. Догрудан хем, биз-де сиз билен хөкүм сүрер ялы, кәшгә хөкүм сүрседиңиз!
9 Чүнки Худай биз ресуллары өлүме беллененлер ялы соңкулар хөкмүнде орта чыкарандыр өйдйәрин, себәби биз дүнйә, перишделере ве адамлара томаша болдук.
10 Биз Месихиң хатырасына акмакдырыс, йөне сиз Месихде акыллысыңыз. Биз эҗиз, сиз гүйчли, сиз шөхратлы, биз әсгерилмедикдирис.
11 Биз шу чака ченли ачлыга, сувсузлыга, ялаңачлыга, енҗилмәге, сергезданлыга дөз гелип йөрендирис.
12 Өз эллеримиз билен ишләп, зәхмет чекйәрис, сөгүленимизде, хайыр-дога эдйәрис, азар берленде чыдаярыс.
13 Мыҗабат япыланда, мылайым җогап берйәрис. Шу чака ченли дүнйәниң сыр-сүплүги, хеммәниң зир-зибили болдук.
14 Мен бу затлары сизи утандырмак үчин язамок, сизе сөйгүли балаларым хөкмүнде несихат берйәрин.
15 Месихде он мүңлерче тербиечиңиз болса-да, көп атаңыз ёкдур, себәби Месих Исада Хош Хабар аркалы мен сизиң атаңыз болдум.
16 Шоңа гөрә-де, маңа өйкүниң дийип, сизден хайыш эдйәрин.
17 Реббе садык болан сөйгүли оглум Тимотеосы шу максат билен сизе иберйәрин. Ол мениң Месих Исадакы ёлларымы хер ерде, хер йыгнакда өвредишим ялы, сизиң ядыңыза салар.
18 Хамала, мен сизе гелмеҗек ялы, кәбирлери габарян экен.
19 Реб ислесе, басым сизе гелип, габарянларың сөзүни дәл-де, гүйҗүни гөрерин.
20 Себәби Худайың Патышалыгы сөзде дәл-де гүйчдедир.
21 Сиз нәме ислейәрсиңиз? Яныңыза таяк билен барайынмы я-да сөйгүдир юмшаклык рухы билен?
1 Сизиң араңызда бутпаразлар арасында-да гөрүлмедик ахлаксызлыгың барлыгы эшидилйәр: бири өз атасының аялыны аланмыш.
2 Сиз болса бу иши эден араңыздан айрылар ялы, яс тутман, гайтам, габарярсыңыз.
3 Мен тен билен сизиң яныңызда болмасам-да, рухда сиз билендирин. Сизиң яныңызда ялы, бу иши эден адамы мен эййәм хөкүм этдим.
4 Рухум араңызда болуп, Реббимиз Иса Месихиң гудраты билен бир ере үйшен махалыңыз,
5 тени хеләк болуп, рухы Реб Исаның гүнүнде гутулар ялы, бу адамы шейтана табшырың.
6 Магтанмагыңыз догры дәлдир. Азаҗык хамырмаяның бүтин хамыры туршадяныны сиз билмейәрсиңизми?
7 Хамырмая тәзе хамыр болар ялы, көне хамырмаяны айырың. Чүнки бизиң Песахлык гузымыз Месих-де гурбан эдилендир.
8 Шонуң үчин көне хамырмая билен, яманлык ве эрбетлик хамырмаясы билен дәл-де, ак йүреклилигиң, хакыкатың петири билен байрам эделиң.
9 Мен сизе хатымда ахлаксызлар билен гатнашык этмәң дийип яздым.
10 Бу дүнйәниң, умуман, ахлаксызлары, ачгөзлери, талаңчылары я бутпаразлары билен диемок, ёгсам, сиз бу дүнйәден чыкмалы болардыңыз.
11 Йөне мен сизе доган дийилйәниң бири ахлаксыз, ачгөз, бутпараз, агзы пайыш, араккеш я талаңчы болса, онуң билен гатнашмазлыгы, бейле адам билен нахар хем иймезлиги язярын.
12 Чүнки мениң дашардакыларың үстүнден хөкүм чыкармага нәме хакым бар? Сиз ичердәкилериң үстүнден хөкүм чыкармалы дәлми?
13 Дашардакыларың үстүнден Худай хөкүм чыкарар. Сиз яманы өз араңыздан чыкарың.
1 Башга бири билен давасы болан сизиң бириңиз мукаддеслер хузурында дәл-де, имансызларың өңүнде үстүнден хөкүм чыкарылмагына йүрек эдерми?
2 Я-да сиз мукаддеслериң дүнйәниң үстүнден хөкүм чыкарҗагыны билмейәрсиңизми? Дүнйәниң үстүнден хөкүм чыкарҗак болсаңыз, онда кичи даваларың үстүнден хөкүм чыкармага сиз мынасып дәлми?
3 Бу яшайшың ишлери бейледе дурсун, сиз бизиң перишделериң-де үстүнден хөкүм чыкарҗакдыгымызы билмейәрсиңизми?
4 Бу яшайшың ишлерини хөкүм этмели болсаңыз, онда йыгнакда сыланмаян адамлары бу ише гойярсыңыз.
5 Муны сизи утандырмак үчин айдярын: өз доганларының арасында хөкүм этмеги башарян екеҗе-де акылдар адам араңызда ёкмы?
6 Гайтам, доган-доган билен дивана гидишйәр, өзем имансызларың өңүнде.
7 Догрудан-да, араңызда дивана гидишмелериң барлыгының өзи сизиң үчин бүтинлей бир шовсузлыкдыр. Адалатсызлык чекмек сизиң үчин хас говы дәлми? Талаңа дөз гелмек сизиң үчин хас говы дәлми?
8 Эмма сизиң өзүңиз адалатсызлык эдйәрсиңиз, талаярсыңыз, өзем доганларыңызы.
9 Я-да адалатсызларың Худайың Патышалыгыны мирас алмаҗакдыгыны билмейәрсиңизми? Алданмаң, Худайың Патышалыгыны не ахлаксызлар, не бутпаразлар, не зынахорлар, не гомосексуаллар, не бечебазлар,
10 не огрулар, не ачгөзлер, не араккешлер, не агзы пайышлар, не-де талаңчылар мирас алар.
11 Сизиң хем кәбирлериңиз шейледиңиз, йөне ювулдыңыз, мукаддес эдилдиңиз, Реббимиз Иса Месихиң ады билен, Худайымызың Рухы аркалы акландыңыз.
12 Маңа хемме зада ругсат берлендир, йөне хемме зат пейдалы дәлдир. Маңа хемме зада ругсат берлендир, йөне хич зат маңа агалык этмели дәлдир.
13 Иймит гарын үчин, гарын-да иймит үчиндир, йөне Худай икисини-де ёк эдер. Тен болса ахлаксызлык үчин дәл-де, Реб үчиндир, Реб-де тен үчиндир.
14 Худай Өз гудраты билен Ребби дирелтди, бизи-де дирелдер.
15 Сиз тениңизиң Месихиң агзасыдыгыны билмейәрсиңизми? Мен Месихиң агзасыны алып, бир кемчиниң агзасы эдейинми? Этмен!
16 Я-да бир кемчин билен бирлешениң онуң билен бир тен боляныны билмейәрсиңизми? Себәби: «Икиси бир тен болар» дийлендир.
17 Эмма Реб билен бирлешен Онуң билен бир рухдур.
18 Ахлаксызлыкдан гачың! Адамың эдйән хер бир гүнәси тениң дашындадыр, йөне ахлаксызлык эдйән өз тенине гаршы гүнә эдйәндир.
19 Я-да тениңизиң сизде яшаян ве сизиң Худайдан алан Мукаддес Рухуңызың ыбадатханасыдыгыны, сизиң өзүңизиңки дәлдигиңизи билмейәрсиңизми?
20 Чүнки сиз бир баха алындыңыз. Мунуң үчин, Худайыңкы болан тениңиз ве рухуңыз билен Худайы шөхратландырың.
1 Инди сизиң язан затларыңыз хакда: бир адама аяла эл дегирмезлик ягшыдыр.
2 Йөне ахлаксызлыкдан сакланмак үчин, хер кишиниң өз аялы ве хер аялың өз әри болсун.
3 Әр аялына, шейле хем аял әрине мәхрибанлык борҗуны берҗай этсин.
4 Аялың өз тенине ыгтыяры ёкдур, бу ыгтыяр әриңкидир ве шонуң ялы, әриң-де өз тенине ыгтыяры ёкдур, бу ыгтыяр аялыңкыдыр.
5 Диңе ораза ве дога билен мешгул болар ялы, ылалашыга гөрә, вагтлайынча болмаса, бири-бириңизи әр-аяллык хакындан махрум этмәң. Вагтлайын айрылсаңыз-да, шейтан небсиңизе буюрмак бабатда сизи сынага салмаз ялы, ене-де бирлешиң.
6 Эмма муны буйрук дәл-де, ругсат хөкмүнде айдярын.
7 Мен әхли адамларың өзүм ялы болмагыны арзув эдйәрин, йөне хер кишиниң Худайдан өз сылагы бардыр; бириниңки бир хили, башга бириниңки башга хилидир.
8 Эмма өйленмедиклере, дул хатынлара, мениң ялы галсалар, олар үчин ягшыдыр диййәрин.
9 Небислерине буйруп билмейән болсалар, онда өйленсинлер, себәби өйленмек ышк одуна янмакдан говудыр.
10 Өйлененлере болса мен дәл-де, Реб: «Аял әринден айрылмасын» дийип, буйрук берипдир.
11 Эгер-де айрылан болса, әрсиз галсын я-да әри билен ярашсын. Әр-де аялының талагыны бермесин.
12 Бейлекилере болса Реб дәл-де, мен диййәрин: бир доганың иман этмедик аялы бар болса, ол аял хем онуң билен яшамага разы болса, ол онуң талагыны бермесин.
13 Бир аялың иман этмедик әри бар болса, әри хем онуң билен яшамага разы болса, онда ол әринден айрылмасын.
14 Чүнки иман этмедик әр иманлы аялы аркалы мукаддес эдилендир, иман этмедик аял хем иманлы әр аркалы мукаддес эдилендир, ёгса, чагаларыңыз хапа боларды, йөне хәзир мукаддесдир.
15 Йөне иман этмедик айрылса, гой айрылсын. Доган я-да аял доган бейле ягдайларда баглы дәлдир. Худай бизи парахат яшамага чагырандыр.
16 Чүнки, эй аял, сен әриңи халас эдип-этмеҗегиңи ниреден билйәрсиң? Эй әр, сен аялыңы халас эдип-этмеҗегиңи ниреден билйәрсиң?
17 Йөне Реб хер кеси нәхили беллән болса, Худай кими нәхили чагыран болса, ол шейле гезсин. Мен бу буйругы әхли йыгнаклара берйәрин.
18 Ким сүннетликә чагырылан болса, сүннетсиз болмасын. Ким сүннетсизкә чагырылан болса, сүннетленмесин.
19 Сүннетлилик-де хичдир, сүннетсизлик-де хичдир, иң мөхүми Худайың буйрукларыны берҗай этмекдир.
20 Ким нәхили ягдайда чагырылан болса, шонда галсын.
21 Гулкаң чагырылан болсаң, гайгы этме, йөне азат болмагы башарсаң, пурсатдан пейдалан.
22 Чүнки гулка Реб тарапындан чагырылан адам Реббиң эркин адамыдыр, шонуң ялы, эркинликде чагырылан-да Месихиң гулудыр.
23 Сиз бир баха сатын алындыңыз, адамың гулы болмаң.
24 Доганлар, ким нәхили ягдайда чагырылан болса, шол ягдайда Худайың хузурында галсын.
25 Гызлар хакда Ребден буйругым ёк; йөне Реббиң мерхемети саясында садык киши хөкмүнде маслахат берйәрин.
26 Мениң пикиримче, хәзирки аладалы ягдай зерарлы, адама өз болшы ялы галмак ягшыдыр.
27 Бир аяла баглымысың? Онда, айрылҗак болма. Аялдан айрылдыңмы? Онда, аял гөзлеме.
28 Йөне өйленсең хем гүнә эден дәлсиң, гыз-да әре чыкса, гүнә эден дәлдир. Эмма өйлененлериң яшайышда мушакгаты болар, мен сизе дөземок.
29 Йөне, эй доганлар, сизе айдярын: вагт гысгадыр. Мундан бейләк аялы барлар аялы ёклар ялы,
30 аглаянлар хем агламаянлар ялы, шатланянлар хем шатланмаянлар ялы, мал аланлар хем малы ёклар ялы,
31 дүнйәден пейдаланянлар хем пейдаланмаянлар ялы болсун, себәби дүнйәниң хәзирки ягдайы гечегчидир.
32 Мен сизиң гайгысыз болмагыңызы ислейәрин. Өйленмедик киши Ребби хошнут этҗек болуп, Онуң ишлериниң аладасыны эдйәндир.
33 Йөне өйленен аялыны хошнут этҗек болуп, дүнйә ишлериниң аладасыны эдйәндир.
34 Әрли аял билен гызың арасында-да парх бардыр. Әрсиз аял хем тенде, хем-де рухда мукаддес болар ялы, Реббиң ишлериниң аладасыны эдйәндир, йөне әрли аял әрини хошнут этҗек болуп, дүнйә ишлериниң аладасыны эдйәндир.
35 Мен муны сизиң бойнуңыза сыртмак салмак үчин дәл-де, эйсем, эдепли болуп, пикириңизи дагатман, Реббе берлер ялы, өз пейдаңыз үчин айдярын.
36 Эмма бири өз гелинлиги билен гелшиксиз иш эдйәндир өйтсе, гызың хем яшы гечен болуп, өйленмек зерур болса, ол халаныны этсин, гүнә эдйән дәлдир. Олар өйленсин.
37 Эмма ким ниетинде берк дуруп, мәтәчлик чекмән, небсине буйруп, гелинлиги билен өйленмезлиги йүрегине дүвен болса, онда ол говы эдйәр.
38 Шейле, адаглысы билен өйленен говы эдйәр, йөне өйленмедик ондан-да говы эдйәр.
39 Аял, әри өлйәнчә, оңа баглыдыр. Эгер-де әри өлсе, өз исләнине бармага азатдыр, йөне Ребде болмалыдыр.
40 Эгер-де ол әрсиз галса, мениң пикиримче, хас хем багтыярдыр. Менде-де Худайың Рухы бардыр дийип пикир эдйәрин.
1 Бутлара берилйән гурбанлар хакда хеммәмизиң билимимизиң барлыгыны билйәрис. Билим текепбир эдйәндир, йөне сөйги абатлаяндыр.
2 Ким бир зады билйәндирин өйдйән болса, онда ол энтек билмелиси ялы билйән дәлдир.
3 Йөне ким Худайы сөййән болса, Худай хем оны танаяндыр.
4 Бутлара берлен гурбанларың этинден ийилмеги барада болса, бутуң дүнйәде хичдигини, бир Худайдан башга худайың ёкдугыны билйәрис.
5 Чүнки Ерде болсун, Гөкде болсун, «таңры» дийилйәнлер нәче болса-да, энчеме «таңрыларың» ве энчеме «реблериң» болшы ялы,
6 бизиң бир Ата Худайымыз бардыр. Хемме зат Ондандыр, биз Онуң үчин яшаяндырыс ве бир Реббимиз Иса Месих бардыр, хемме зат Ол аркалы боландыр, биз Ол аркалы яшаяндырыс.
7 Эмма хеммелерде бу билим ёк, кәбирлери бутуң пикиринде болуп, эти энтек-де бута берлен гурбан ялы иййәр. Онсоң эҗизликлери зерарлы, оларың ынсабы тегмилтли боляр.
8 Дамак бизи Худая якын эдйән дәлдир. Иймесек-де кемлигимиз болмаз, ийсек-де артыкмачлыгымыз болмаз.
9 Эмма велин бу азатлыгыңызың эҗизлериң бүдремегине себәп болаймагындан хабардар болуң.
10 Чүнки бири билимли болан сениң бутханада сачак башында отураныңы гөрсе, эҗизлиги зерарлы, онуң ынсабы бутлара берлен гурбанлардан иймәге мейилленмезми?
11 Онсоң сениң билимиң зерарлы, бу эҗиз доган хеләк болар, Месих болса онуң угрунда өлди.
12 Шейлеликде, сиз доганларыңыза гаршы гүнә эдип, оларың эҗиз ынсапларыны яраламак билен, Месихе гаршы гүнә эдйәрсиңиз.
13 Шонуң үчин, дамак доганымың бүдремегине себәп болян болса, онда мен доганымы бүдретмез ялы, асла эт иймерин.
1 Мен эркин дәлми? Мен ресул дәлми? Мен Реббимиз Месихи гөрмедимми? Сиз Ребде мениң зәхметимиң нетиҗеси дәлмисиңиз?
2 Мен башгалара ресул болмасам-да, сизе ресулдырын; сиз Реб ёлунда мениң ресуллыгымың мөхрүсиңиз.
3 Өзүми сорага чекйәнлериң гаршысында мен шейле горанярын.
4 Бизиң иймәге, ичмәге хакымыз ёкмы?
5 Бейлеки ресуллар, Реббиң доганлары ве Кифас ялы, иманлы бир аялы янымызда гездирмәге хакымыз ёкмы?
6 Я-да ишлемезлиге диңе мен билен Барнабасың хакы ёкмы?
7 Ким өз харҗы билен эсгерлик эдйәр? Ким үзүм агаҗыны экип-де, онуң мивесинден иймейәр? Я-да ким сүрини бакып-да, онуң сүйдүнден ичмейәр?
8 Мен муны адамларың пикир эдишине гөрә айдярынмы? Канун-да шуны айтмаярмы?
9 Чүнки Мусаның канунында: «Харман дөвен өкүзиң агзыны баглама» дийип язылгыдыр. Худай өкүзлериң аладасыны эдйәрми?
10 Булары бүтинлей бизиң үчин айтмаярмы? Хава, бу бизиң үчин языландыр. Шейле, ер сүрен умыт билен сүрмелидир, харман дөвен хем хармана шәрик болмак умыды билен дөвмелидир.
11 Биз сизде рухы затлары экип, сизден мадды затлары орсак, бу бир улы затмыдыр?
12 Башгаларың сизден муны ислемәге хакы бар болса, бизиң муңа олардан көп хакымыз ёкмудыр? Йөне биз бу хакдан пейдаланман, Месихиң Хош Хабарының өңүни бөкдемезлик үчин, хер зада дөз гелйәрис.
13 Сиз мукаддес затлар билен мешгулланянларың ыбадатханадан иййәнини, гурбанлык эдилйән ери саклаянларың гурбанлык эдилйән ерден пайларыны аляныны билмейәрсиңизми?
14 Шейле, Реб хем Хош Хабары вагыз эдйәнлериң Хош Хабардан яшамагыны буюрды.
15 Мен бу затларың хич биринден пейдаланамок, шу затлар маңа шейле эдилсин дийип хем язамок, себәби бу буйсанҗымы бириниң бидерек эденинден өленим говудыр.
16 Чүнки Хош Хабары вагыз эдйән болсам, өвүнмәге хакым ёкдур, себәби бу маңа ваҗыпдыр. Эгер Хош Хабары вагыз этмесем, вай мениң халыма!
17 Чүнки муны мейлетин этсем, сылагым болар. Мейлетин этмесем-де, диңе өзүме табшырылан везипәни берҗай этдигимдир.
18 Ери, сылагым нәме? Хош Хабардакы хакымдан долы пейдаланмаз ялы, Хош Хабары вагыз эдип, Хош Хабары мугт бермегим.
19 Чүнки мен хер кесден азат болсам-да, көп адамлары газанҗак болуп, өзүми хеммелере гул этдим.
20 Мен ехудылары газанҗак болуп, ехудылара ехуды болдум. Канун астындакылары газанҗак болуп, канун астында болмасам-да, канун астындакылара канун астындакы ялы болдум.
21 Худайың гаршысында канунсыз болман, Месихиң Кануны астында болсам-да, кануны ёклары газанҗак болуп, кануны ёклара кануны ёк кимин болдум.
22 Эҗизлери газанҗак болуп, эҗизлере бир эжиз ялы болдум. Хер ничик-де болса, кәбирлерини халас этҗек болуп, хер кесе хер зат болдум.
23 Мен булары Хош Хабарда пайым болсун дийип, Хош Хабар үчин эдйәрин.
24 Сиз ылгав мейданында ылгаянларың хеммесиниң ылгап, йөне байрагы бириниң аляныны билмейәрсиңизми? Байрак алар ялы ылгаң.
25 Гөрешйән адам әхли затда өз небсине буюряндыр. Олар муны паны тәҗи алмак үчин, биз хем бакы тәҗи алмак үчин эдйәрис.
26 Шонуң үчин, мен максатсыз ылгаян ялы ылгамаярын, хованы юмруклаян ялы юмрукламаярын.
27 Йөне бейлекилере вагыз эденимден соң, өзүм махрум галмаз ялы, теними хорлап, оны гул эдйәрин.
1 Эй доганлар, аталарымызың барының булут астында боланындан, барының деңизден геченинден хабарлы болмагыңызы ислейәрин.
2 Бары булутда хем деңизде Муса чокундырылды.
3 Бары шол бир рухы иймити ийди.
4 Бары шол бир рухы ичгини ичди, себәби олар өзлерине хемралык эден рухы гаядан ичйәрди. Ол гая болса Месихди.
5 Эмма Худай оларың көпүсинден разы дәлди. Чөлде оларың җесетлери серлип галды.
6 Йөне оларың хөвеслениши кимин, биз-де ямана хөвесленмез ялы, бу вакалар бизе мысал хөкмүнде йүзе чыкды.
7 «Халк ийип-ичмек үчин ашак отурды ве ойнамак үчин ёкары галды» дийип язылышы ялы, оларың кәбирлери кимин сиз хем бутпараз болмаң.
8 Зына этмәлиң, чүнки оларың кәбирлери зына эдип, бир гүнде йигрими үч мүң адам өлди.
9 Ребби сынамалың, чүнки оларың кәбирлери Оны сынап, йыланлардан хеләк болдулар.
10 Кәйинмәң, чүнки оларың кәбирлери кәйинип, өлүм перишдесиниң элинден хеләк болдулар.
11 Йөне бу затларың бары оларың башына гөрелде хөкмүнде инип, дөвүрлериң соңуна етен бизе үндев үчин язылды.
12 Шонуң үчин мен догрудырын дийип пикир эдйән адам өз йыкылмагындан әгә болсун.
13 Сиз хер кишиниң башына гелйәнден башга хич бир сынага салынмадыңыз. Худай догручылдыр, Ол сизе гүйҗүңизден өте сыналмагыңыза ёл бермән, дөз гелип билмегиңиз үчин, сынаг билен билеликде чыкалга-да ачар.
14 Шонуң үчин, эй, эзиз доганларым, бутпаразлыкдан гачың.
15 Мен дүшүнҗели адамлара гүррүң берйәрин. Айдянларыма өзүңиз баха бериң.
16 Бизиң шүкүр эдйән шүкүр кәсәмиз Месихиң ганына шәрикчилик дәлми? Бизиң бөлйән чөрегимиз Месихиң тенине шәрикчилик дәлми?
17 Чөрегиң бир болшы ялы, көп болан биз хем бир тендирис, себәби бизиң хеммәмизиң шол бир чөрекде пайымыз бардыр.
18 Ысрайыл халкына середиң, гурбанлыклары иййәнлер гурбанлык эдилйән ер билен шәрикчилик эдйәнлер дәлми?
19 Мен нәме диййәрин? Бута берлен гурбан бир затмыдыр? Я-да бут бир затмыдыр?
20 Ёк, йөне бутпаразлар берйән гурбаныны Худая дәл-де, җынлара берйәр диййәрин. Мен сизиң җынлар билен шәрикчилик этмегиңизи исләмок.
21 Сиз хем Реббиң кәсесинден, хем җынларың кәсесинден ичип билмерсиңиз. Сиз хем Реббиң сачагына, хем җынларың сачагына шәрик болуп билмерсиңиз.
22 Я-да биз Реббиң габанҗаңлыгыны оярярысмы? Биз Ондан гүйчлүми?
23 Маңа әхли зада ругсат эдилендир, йөне хемме зат пейдалы дәлдир. Маңа әхли зада ругсат эдилендир, йөне хемме зат абатлаян дәлдир.
24 Хич ким өз пейдасыны гөзлемесин, башганың пейдасыны гөзлесин.
25 Эт базарында нәме сатылян болса, ынсап хатырасы үчин, хич бир зады селҗермән ийиң.
26 Чүнки Ер ве онуң йүзүндәки әхли зат Реббиңкидир.
27 Иман этмедиклериң бири сизи нахара чагырып-да, сиз хем гитмек ислесеңиз, өңүңизде нәме гоюлса, ынсап хатырасы үчин, хер бир зады селҗермән ийиң.
28 Эмма бири сизе: «Бу бутлара берлен гурбаның этидир» дийсе, яңкы хабар берениң хатырасы үчин ве ынсап хатырасы үчин иймәң, чүнки Ер ве онуң ичиндәкилериң бары Реббиңкидир.
29 Мен ынсап дийип, сениң өзүңкә дәл-де, бейлекиниңкә диййәрин, себәби нәме үчин мениң азатлыгымың үстүнден бейлекиниң ынсабы хөкүм чыкаряр?
30 Мен шүкүр эдип, нахара гошулян болсам, онда нәме үчин шүкүр эдйән задым үчин маңа кәелйәр?
31 Ийсеңиз-де, ичсеңиз-де, хер нәме этсеңиз-де, барыны Худайың шөхраты үчин эдиң.
32 Ехудылара, греклере ве Худайың йыгнагына бүдремәге себәп болмаң.
33 Чүнки мен хем хер затда хер кеси разы этмәге чалышярын. Мен муны өз бәхбидим үчин эдемок, гутулсынлар дийип, көп адамларың бәхбиди үчин эдйәрин.
1 Мениң Месихден гөрелде алшым ялы, сиз хем менден гөрелде алың.
2 Эй доганлар, хер затда мени яда салянлыгыңыз, таглыматы сизе табшырышым ялы саклаянлыгыңыз үчин, мен сизи тарыплаярын.
3 Сизиң муны-да билмегиңизи ислейәрин: хер эркегиң баяры Месих, аялың баяры эркек, Месихиң баяры хем Худайдыр.
4 Башына зат гейип, дога я пыгамберлик эдйән эркек киши өз башыны биабрай эдйәндир.
5 Башы ачык дога я пыгамберлик эдйән аял киши хем өз башыны биабрай эдйәндир, чүнки бу сачы сырылмак билен бирдир.
6 Чүнки аял башыны өртмейән болса, онда сачыны-да кесдирсин. Аял сачының кесилмегинден я-да сырылмагындан утанян болса, онда башыны өртсүн.
7 Чүнки эркек Худайың сураты хем шөхратыдыгы үчин башыны өртмели дәлдир, йөне аял эркегиң шөхратыдыр.
8 Чүнки эркек аялдан дәл-де, аял эркекдендир.
9 Себәби эркек аял үчин дәл-де, аял эркек үчин ярадылды.
10 Шонуң үчин, перишделериң хатырасына аялың башында онуң ыгтыяр астындадыгыны гөркезйән белги болмалыдыр.
11 Йөне велин Ребде не аял эркексиз, не-де эркек аялсыздыр.
12 Чүнки аялың эркекден болшы ялы, эркек хем аял аркалы дүнйә инендир, йөне хемме зады Худай ярадандыр.
13 Сизиң өзүңиз баха бериң: аялың башы ачык Худая дога этмеги ярашыклымыдыр?
14 Эркегиң сачы узын болса, бу онуң үчин биабрайчылыкдыгыны,
15 йөне аялың сачы узын болса, бу онуң үчин абрайдыгыны тебигатың өзи өвретмейәрми? Чүнки сач аяла бүренҗек ерине берлендир.
16 Йөне бириниң җедел эдеси гелйән болса, бизиң хем, Худайың йыгнакларының хем бейле эндиги ёк.
17 Эмма бу таглыматда сизи тарыпламаярын, чүнки сизиң үйшмелериңиз пейдалы дәл, зыянлыдыр.
18 Чүнки, биринҗиден, хачан йыгнакда үйшүшениңизде, араңызда бөлүнишигиң боляныны эшидйәрин, муңа аз-кем ынанярынам.
19 Чүнки араңыздакы Худайың тассыклан адамлары белли болар ялы, араңызда бөлүнишигиң болмагы зерурдыр.
20 Сиз бир ере үйшүшениңизде, Реббиң нахарыны иймек үчин үйшмейәрсиңиз.
21 Чүнки нахар иениңизде, хер ким өз нахарыны бейлекилерден өңүрти аляр, бири ач галяр, ене бири серхош боляр.
22 Сизиң иймәге, ичмәге өйүңиз ёкмы? Я-да Худайың йыгнагыны әсгермән, ёксуллары утандырярсыңызмы? Мен сизе нәме диейин? Сизи тарыплайынмы? Бу затда сизи тарыпламарын.
23 Чүнки мен Ребден аланымы сизе табшырдым. Реб Иса Өзүниң тутулып берлен гиҗеси чөрек алып,
24 шүкүр эденинден соң, оны бөлүп: «Алың, ийиң, бу мениң сизиң үчин дөвлен беденимдир, муны мени яда салмак үчин берҗай эдиң» дийди.
25 Шонуң ялы-да, нахардан соң кәсәни алып: «Бу кәсе мениң ганым билен беркидилен тәзе әхтдир, хер гезек ичениңизде, мени яда салмак үчин муны берҗай эдиң» дийди.
26 Чүнки сиз бу чөреги хер гезек иениңизде, кәседен хер гезек ичениңизде, тә Өзи гелйәнчә, Реббиң өлүмини ыглан эдйәнсиңиз.
27 Шонуң үчин хер ким мынасып болмадык тәрде Реббиң бу чөрегини ийсе я бу кәседен ичсе, Онуң тени ве ганы бабатда языклы болар.
28 Адам өзүни сынап гөренсоң, бу чөрекден иймели, бу кәседен хем ичмелидир.
29 Чүнки ким Реббиң тенини сайгарман, гелшиксиз тәрде ийсе, ичсе, өзүне гаршы хөкүм иййәндир ве ичйәндир.
30 Шонуң үчин сизиң араңызда көплери эҗиз, хасса, өленлериң хем саны аз дәл.
31 Өз-өзүмизи сынан болсак, хөкүме дучар болмаздык.
32 Үстүмизден хөкүм чыкарыланда, бизе дүнйә билен билеликде иш кесилмез ялы, Реб бизи тербиелейәр.
33 Эй доганлар, нахар иймек үчин үйшүшениңизде, бири-бириңизе гарашың.
34 Сиз хөкүм үчин үйшүшмез ялы, ким ач болса, өз өйүнде ийсин. Галан затлары болса өзүм барамда дүзедерин.
1 Эй доганлар, мен рухы сылаглар барада-да, сизиң бихабар галмагыңызы ислемейәрин.
2 Бутпаразкаңыз, бири сизи чекйән ялы, дилсиз бутларың ызына эерйәрдиңиз.
3 Шонуң үчин сизе айдярын: Худайың Рухы билен геплейән киши: «Иса лагнат!» диймез, хич ким хем Мукаддес Рух билен болмаса: «Иса Ребдир!» дийип билмез.
4 Сылаглар дүрли-дүрли, йөне Рух шол бир Рухдур.
5 Гуллуклар-да дүрли-дүрли, йөне Реб шол бир Ребдир.
6 Амаллар дүрли-дүрли, йөне хеммеде хер зады эмеле гетирйән Худай шол бир Худайдыр.
7 Йөне хер кишә Рухуң аян болмагы хеммәниң пейдаланмагы үчин берилйәр.
8 Чүнки Рух аркалы бирине акылдарлык сөзи, ене бирине шол Рух аркалы билим сөзи,
9 башга бирине шол Рух аркалы иман, бейлекә шол Рух аркалы шыпа сылаглары,
10 бирине гудрат гөркезме, ене бирине пыгамберлик, башга бирине рухлары сайгарма, бейлеки бирине дүрли диллер, ене бирине болса диллери дүшүндирме берилйәр.
11 Буларың хеммесини болса шол бир Рух эмеле гетирйәр. Ол хер бирине Өз халайшына гөрә, айры-айры бөлүп берйәр.
12 Йөне тениң бир ве агзасының көп болшы ялы, тениң агзасы көп болса-да, бир тендир, Месих-де шейледир.
13 Чүнки ехуды болсун я грек болсун, гул болсун я азат болсун - бизиң хеммәмиз бир Рух аркалы бир тене чокундырылдык, хеммәмизе бир Рухдан ичирилди.
14 Тен хем бир агзадан дәл-де, көп агзадан ыбаратдыр.
15 Аяк: «Мен эл дәлдигим үчин, тене дегишли дәлдирин» диени билен, тене дегишли болман билмез.
16 Гулак: «Мен гөз дәлдигим үчин, тене дегишли дәлдирин» диени билен, тене дегишли болман билмез.
17 Тутуш тен гөз болан болса, онда эшидиш ниреде боларды? Бары эшидиш болан болса, онда ысгайыш ниреде боларды?
18 Эмма Худай агзаның хер бирини тенде Өз ислейшине гөрә гойды.
19 Хеммеси бир агза болан болса, онда тен ниреде боларды?
20 Шейлеликде, агза көп, йөне тен бир.
21 Гөз эле: «Сен маңа герек дәл» дийип билмез. Келле аяклара: «Сиз маңа герек дәл» дийип билмез.
22 Терсине, тениң эҗиз гөрүнйән агзалары хас көп гереклидир.
23 Биз тениң хорматсызрак гөрүнйән агзасына хас көп хормат гойярыс, овадан дәл агзаларымызың хас көп гөрки бардыр.
24 Йөне гөркли агзаларымыз муңа мәтәч дәлдир. Эмма Худай тенде хичбир бөлүнишик болман, агзалар деңлик билен бири-бириниң аладасыны этсин дийип,
25 тени гуранда, әхмиетсиз агзалары хас көп хорматлады.
26 Бир агза хорлук чексе, әхли агзалар билеликде хорлук чекер. Бир агза шөхратланса, әхли агзалар билеликде шатланар.
27 Сиз Месихиң тени, айры-айры агзаларысыңыз.
28 Худай йыгнакда биринҗилери ресул, икинҗилери пыгамбер, үчүнҗилери өвредиҗи эдип отуртды. Ондан соң гудрат гөркезмелери, соңра шыпа сылагларыны, ярдамлары, эдаралары, дүрли диллери берди.
29 Хеммелер ресулмыдыр? Хеммелер пыгамбермидир? Хеммелер өвредиҗимидир? Хеммелер гудрат гөркезйәнмидир?
30 Хеммелериң шыпа сылагы бармы? Хеммелер дүрли диллерде геплейәрми? Хеммелер диллери маныландырярмы?
31 Сиз улурак сылаглара ыхлас эдиң, мен ене сизе мундан хем говы ёлы гөркезейин.
1 Эгер мен ынсан хем перишделериң диллеринде геплейән болсам, йөне сөйгим ёк болса, онда җыңңырдаян мисдирин я-да сесленйән цимбалыдырын.
2 Пыгамберлик сылагым болуп, әхли сырлары хем ылымлары билйән болсам, даглары еринден гозгаҗак иманым болса, йөне сөйгим болмаса, онда мен хичдирин.
3 Әхли задымы пайлап, ёксуллары доюрсам, теними якмага берсем, йөне сөйгим болмаса, онда мунуң маңа хич бир пейдасы ёкдур.
4 Сөйги сабырлыдыр, шепагатлыдыр, сөйги гөрипчилик эдйән дәлдир, сөйги өвүнип, текепбирлик эдйән дәлдир.
5 Биабрайчылыклы иш эдйән дәлдир, өз непини гөзлейән дәлдир, гахарланян дәлдир, ичинде хылт саклаян дәлдир.
6 Адалатсызлыга шатланман, хакыката шатланяндыр.
7 Хер зада дөз гелйәндир, хер зада ынаняндыр, хер зада умыт баглаяндыр, хер зада чыдаяндыр.
8 Сөйги асла түкенмез. Пыгамберликлер болса айрылар, диллер дымар, билим ёга чыкар.
9 Чүнки биз бөлеклейин билип, бөлеклейин пыгамберлик эдйәрис.
10 Йөне кәмил болан геленде, бөлеклейин болан арадан айрылар.
11 Мен чагакам, чага ялы гепләп, чага ялы ойланып, чага ялы пайхас эдердим, улаланымда, чага гылыкларымы гойдум.
12 Шинди хер зады айнадакы ялы үмүзли гөрйәрис, йөне шол вагт йүзбе-йүз гөрерис. Хәзир мен бөлеклейин билйәрин, йөне шол вагт өз билинишим ялы билерин.
13 Хәзир шу үчүси галяр: иман, умыт, сөйги. Буларың иң улусы болса сөйгүдир.
1 Сөйгиниң ызында болуң хем-де рухы сылаглара, хас-да пыгамберлик этмәге ыхлас эдиң.
2 Чүнки билинмейән дилде геплейән, адам билен дәл-де, Худай билен геплешйәндир, чүнки оңа хич ким дүшүнйән дәлдир, ол сырлары рух билен айдяндыр.
3 Пыгамберлик эдйән киши адамлары абатламак, несихат ве гөвүнлик бермек үчин геплейәндир.
4 Башга дилде геплейән өзүни абатлаяндыр, йөне пыгамберлик эдйән йыгнагы абатлаяндыр.
5 Мен сизиң хеммәңизиң башга диллерде геплемегиңизи, хас-да пыгамберлик этмегиңизи арзув эдйәрин. Бу диллерде геплейән йыгнагың абатланмагы үчин дүшүндирмейән болса, онда пыгамберлик эдйән ондан говудыр.
6 Эй доганлар, мен сизиң яныңыза барып, башга диллерде геплесем, йөне ылхам, билим, пыгамберлик я таглыматдан гүррүң бермесем, сизе нәме хайрым дегер?
7 Сес чыкарян җансыз затлар, меселем, түйдүк я гусли бири-биринден пархлы сес чыкармаса, түйдүк я гусли билен нәме чалыняндыгы нәхили билнер?
8 Чүнки сурнай хем нәбелли сес чыкарса, урша ким тайярланар?
9 Шейлеликде, сиз хем дил аркалы дүшнүкли гүррүң бермесеңиз, нәме айдяныңыз нәхили билнер? Чүнки бу хова гүррүң бердигимиз болар.
10 Дүнйәде дүрли-дүрли диллериң бардыгы, оларың хич бириниң-де манысыз дәлдиги гүррүңсиздир.
11 Йөне айдылана дүшүнмесем, онда мен геплейәне бигәне, ол хем маңа бигәне болар.
12 Шейлеликде, сиз хем рухы сылаглара ыхлас эдишиңизе гөрә, йыгнагы абатламак үчин, сылаглара бай болмага чалшың.
13 Шонуң үчин билинмейән дилде геплейән адам оны маныландырар ялы дога этсин.
14 Чүнки мен башга бир дилде дога эдйән болсам, рухум дога эдйәндир, йөне акылым мивесиздир.
15 Нәме этмели? Мен рух билен дога этҗек, йөне акыл билен хем дога этҗек. Рух билен нагма айтҗак, йөне акыл билен хем нагма айтҗак.
16 Себәби сен рух билен алкыш айтсаң, билимсиз адамлар сениң шүкүриңе нәхили «омын» дийсин? Себәби ол сениң нәме айдяныңа дүшүнйән дәлдир.
17 Догры, сен говы шүкүр эдйәрсиң, йөне бейлеки абатланмаяр.
18 Мен диллерде хеммәңизден көп геплейәниме Худая шүкүр эдйәрин.
19 Йөне йыгнакда бейлекилере-де өвредер ялы, акылым билен бәш сөз айтмагы башга дилде он мүң сөз айтмакдан говы гөрйәрин.
20 Доганлар, акылда чага ялы болман, яманлыкда чага ялы болуп, акылда кәмил болуң.
21 Реб шейле диййәр: «Мен бу халка башга диллер билен, ятларың агзы билен гүррүң берерин, шонда-да Мени диңлемезлер» дийип Канунда язылгыдыр.
22 Шейлеликде, диллер иман эденлере дәл-де, иман этмедиклере, пыгамберлик хем иман этмедиклере дәл-де, иман эденлере аламатдыр.
23 Бүтин йыгнак бир ере үйшүп, әхлиси башга диллерде геплесе ве билимсизлер я-да иман этмедиклер ичери гирсе, олар: «Сиз акылыңыздан азашыпсыңыз» диймезми?
24 Эмма хеммелер пыгамберлик этсе ве бир иман этмедик я бир билимсиз ичери гирсе, хеммелер тарапындан язгарылып, хеммелер тарапындан хөкүм эдилер.
25 Йүрегиниң гизлин сырлары аян болуп, йүзин йыкылар, «Худай, догрудан-да, сизиң араңызда» дийип, Худая сежде эдер.
26 Доганлар, инди нәме? Бир ере үйшүшениңизде, сизиң хер бириңизде мезмур, тәлим, дил, ылхам я диллери дүшүндирме бардыр - әхлиси абатлама үчин болсун.
27 Кимдир бири билинмейән дилде геплейән болса, онда ики я-да иң ёкарсы үч адам нобатма-нобат гепләп, бири-де маныландырсын.
28 Дүшүндирйән ёк болса, онда ол адам йыгнакда дымып, өзүне ве Худая гүррүң берсин.
29 Пыгамберлериң хем икиси я үчүси гүррүң берип, бейлекилер сайгарсынлар.
30 Отуранлардан бирине ылхам гелсе, онда илкинҗи дымсын.
31 Чүнки хеммелер өвренип, хеммелер өвүт алар ялы, хеммәңиз бири-бириңизиң ызындан пыгамберлик эдип билерсиңиз.
32 Пыгамберлериң рухлары пыгамберлере табындыр.
33 Чүнки Худай тертипсизлик Худайы дәл-де, мукаддеслер йыгнакларының хеммесинде болшы ялы, парахатлык Худайыдыр.
34 Йыгнакларда аялларыңыз геплемесин, чүнки олара геплемәге ругсат эдилен дәлдир. Олар, кануның хем айдышы ялы, табын болмалыдырлар.
35 Олар бир зады өвренҗек болсалар, өйде өз әрлеринден сорасынлар, чүнки аяла йыгнакда геплемек айыпдыр.
36 Худайың сөзи, эйсем, сизден чыкдымы? Я диңе сизе етдими?
37 Өзүни пыгамбер я рухда кәмил сайян адам сизе язянларымың Реббиң буйругыдыгыны аңласын.
38 Бири наданлык этсе, гой, наданлык этсин.
39 Шонуң үчин, эй доганлар, пыгамберлик этмәге ыхлас эдиң, башга диллерде геплемеги-де гадаган этмәң.
40 Йөне херки зат сыпайычылык хем тертип билен болсун.
1 Эй доганлар, сизе Хош Хабары ятладярын. Мен оны сизе вагыз этдим, сиз хем оны унап, оңа баглы галдыңыз.
2 Сизе вагыз эден сөзүми тутсаңыз, эден иманыңыз бидерек болмаз, ол аркалы гутуларсыңыз.
3 Чүнки мен аланымы өңүрти сизе табшырдым. Месих Язгылара гөрә, бизиң гүнәлеримиз үчин өлди.
4 Җайланды ве Язгылара гөрә, өленден үч гүнден соң дирелди.
5 Онсоң Кифаса, соң-да Онкилере гөрүнди.
6 Ондан соң бәш йүзден көп догана бирден гөрүнди. Бу доганларың көпүси хәзир хем дири, кәбирлери болса өлди.
7 Ондан соң Якуба, соң хем бүтин ресуллара гөрүнди.
8 Иң соңунда хем бивагт доглан чага ялы болан маңа гөрүнди.
9 Чүнки мен ресулларың иң кичиси, ресул адыны алмага хем мынасып дәлдирин, себәби мен Худайың йыгнагына азар бердим.
10 Йөне нәме болсам, Худайың мерхемети аркалы болдум, Онуң маңа гөркезен мерхемети бидерек болман, оларың хеммесинден көп зәхмет чекдим. Муны мен дәл-де, мениң билен болан Худайың мерхемети этди.
11 Инди мен болайын, олар болсун, биз шейле вагыз эдйәрис, сиз хем шейле иман гетирдиңиз.
12 Месих дирелди дийип вагыз эдилйән болса, онда сизиң араңыздан кәбирлери нәме үчин өлүлер дирелмез диййәр?
13 Өлүлер дирелмейән болса, онда Месих хем дирелен дәлдир.
14 Месих дирелмедик болса, онда бизиң вагыз этмегимиз бидерек, сизиң хем иманыңыз бидерекдир.
15 Шейлеликде, биз Худай хакда яланчы шаятлар боларыс, чүнки биз Худай Месихи дирелтди дийип гүвә гечдик. Эгер өлүлер дирелмейән болса, Оны-да дирелден дәлдир.
16 Чүнки өлүлер дирелмейән болса, Месих хем дирелен дәлдир.
17 Месих дирелмедик болса, онда сизиң иманыңыз хем пуч болуп, сиз энтек өз гүнәлериңизиң ичиндесиңиз.
18 Шейле хем Месихде иманлы болуп өленлер-де хеләк боландыр.
19 Биз диңе бу яшайышда Месихе умыт баглан болсак, онда бүтин ынсанларың иң багтыгарасыдырыс.
20 Эмма Месих өлүлериң илкинҗи мивеси болуп өлүмден дирелди.
21 Чүнки өлүмиң ынсан аркалы гелши ялы, өлүлериң дирелиши-де ынсан аркалы гелди.
22 Чүнки Адам ата баглы болуп, хеммәниң өлши ялы, Месихе баглы болуп хем хеммелер яшайша етер.
23 Йөне хер кес өз нобатына гөрә: илкинҗи миве болан Месих, Ол геленсоң хем Месихиңкилер.
24 Соңра Ол хер хили баштутанлыгы, хер хили хәкимиети хем гудраты ёк эдип, Патышалыгы Ата Худая табшыранда, ахырзаман болар.
25 Чүнки Ол бүтин душманларыны аяк астына салянча хөкүм сүрмелидир.
26 Ёгалдылҗак соңкы душман болса өлүмдир.
27 Чүнки хемме зады Онуң аякларының астына табын эдендир. Йөне әхли зат Оңа табын эдилди дийленде, хер зады Оңа табын этдирен Худайың айратынлык газанянлыгы әшгәрдир.
28 Эмма әхли зат Оңа табын боланда, Оглуң өзи хем, Худай хем әхли затда хөкүм сүрер ялы, Оңа әхли зады табын этдирене табын болар.
29 Ёгса, өлүлер үчин чокундырыланлар нәме эдер? Өлүлер асла дирелмейән болса, онда нәмә олар үчин чокундырылярлар?
30 Нәмә биз хәли-шинди ховп астына гирйәрис?
31 Эй доганлар, сиз барада Реббимиз Месих Исада болан магтанҗыма касам, мен хер гүн өлүм билен йүзбе-йүз болярын.
32 Эгер бир адам ялы ойланып, Эфесосда ябаны хайванлар билен уруш эден болсам, маңа нәме пейдасы бар? Өлүлер дирелмейән болса, онда иелиң, ичелиң, чүнки эртир өлерис.
33 Алданмаң! Яман яранлар ягшы ахлагы бозяндыр.
34 Догрулык билен хүшгәр болуң, гүнә этмәң, чүнки сизиң кәбирлериңиз Худайы танамаяр. Мен муны сизиң утанмагыңыз үчин айдярын.
35 Эмма бириниң: «Өлүлер нәхили дирелер? Хайсы тен билен гелер?» диймеги мүмкиндир.
36 Эй акмак! Сениң экйән задың өлмесе, яшайша говушмаз.
37 Сен экеңде гөгермели бүтин өсүмлиги дәл-де, диңе тохумыны, бугдай я башга бир өсүмлигиң тохумыны экйәрсиң.
38 Йөне Худай оңа Өз ислейши ялы, бир тен, хер тохумың өз тенини берйәр.
39 Хемме эт бир эт дәлдир, ынсан эти башга, хайван эти башга, гушларың эти башга, балыкларың эти бир башгадыр.
40 Асмана дегишли тенлер хем дүнъеви тенлер бардыр, йөне асмана дегишлилериң шөхраты башга, дүнъевилериңки башгадыр.
41 Гүнүң шөхраты башга, Айың шөхраты башга ве йылдызларың шөхраты башгадыр, чүнки шөхратда йылдыз хем йылдыздан пархлыдыр.
42 Өлүлериң дирелмеги-де шейледир. Тен чүйремеде экилип, чүйремезликде галяндыр;
43 харлыкда экилип, шөхратда галяндыр, эҗизликде экилип, кувватда галяндыр;
44 тебигы тен экилип, рухы тен галяндыр. Тебигы тен бар болса, рухы тен хем бардыр.
45 Шейле-де язылгыдыр: «Илкинҗи ынсан Адам яшаян җан болды», йөне соңкы Адам яшайыш берйән рух болды.
46 Эмма рухы болан дәл-де, тебигы болан илкинҗидир, рухы болан соң гелендир.
47 Илкинҗи адам ерден, топракдандыр, икинҗи адам болса Гөкден инен Ребдир.
48 Топракдан болан адам нәхили болса, топрага дегишлилер хем шейледир. Гөкден инен нәхили болса, Гөге дегишлилер хем шейледир.
49 Биз топракдан боланың кешбини нәхили гөтерен болсак, Гөкден инениң кешбини хем шейле гөтерерис.
50 Йөне, эй доганлар, мен эт билен ганың Худайың Патышалыгындан пай алып билмейәнини, шейле хем чүйрейәниң-де чүйремезликден пай алып билмейәнини айдярын.
51 Ине, сизе бир сыры паш эдейин. Бизиң хеммәмиз өлҗек дәл, соңкы сурнай чалнанда, бирден гөз ачып-юмасы салымда үйтгедилҗекдирис.
52 Чүнки сурнай чалынҗак, өлүлер чүйремез болуп, дирелҗек, биз үйтгедилҗекдирис.
53 Себәби бу чүйрейән чүйремезлик донуны геймелидир, бу өлүмли өлмезлик донуны геймелидир.
54 Бу чүйрейән чүйремезлик, бу өлүмли өлмезлик донуны геенде, «өлүм еңишде ювдулды» диен сөз ерине етер.
55 «Эй өлүм, ханы сениң тикениң? Эй, өлүлер дияры, ханы сениң еңшиң?»
56 Өлүмиң тикени гүнәдир, гүнәниң гүйҗи болса канундыр.
57 Эмма Реббимиз Иса Месих аркалы бизе еңши ыхсан эден Худая шүкүр!
58 Шонуң үчин, эй сөйгүли доганлар, элмыдам берк, дурнуклы болуп, Реббиң ишине ыхласлы япышың, чүнки зәхметиңизиң Ребде бош дәлдигини билйәнсиңиз.
1 Мукаддеслер үчин көмек йыгнама хакда, сиз хем Галатя йыгнакларына табшырышым ялы эдиң.
2 Мен баранымда, йыгнама зерурлыгы болмаз ялы, сизиң хер бириңиз хепдәниң биринҗи гүни өз ягдайына гөрә, бир мукдар пул сүйшүрип, янында сакласын.
3 Баранымда болса мынасып гөрен адамларыңызы сизиң гатанҗыңызы Иерусалиме говшурар ялы, хатлар билен ёлларын.
4 Мениң гитмегим хем ярашыклы болса, онда олар мениң билен гидер.
5 Македониядан геченимден соң, сизиң яныңыза-да барарын, себәби мен Македониядан гечмекчи.
6 Мени гитҗек ериме угратмагыңыз үчин, белки, сизиң яныңызда бир мүтдет галарын я гышы-да гечирерин.
7 Чүнки сизи хәзир ёл угрунда гөресим геленок. Реб ругсат этсе, бирнәче вагтлап яныңызда болайсам диен умыдым бар.
8 Мен Хасыл байрамына ченли Эфесосда боларын.
9 Чүнки маңа улы, иш битириҗи бир гапы ачылды, гаршы чыкянлар хем көп.
10 Тимотеос баранда, яныңызда горкусыз болар ялы, гөз-гулак болуң, себәби ол хем мениң ялы Реббиң ишини эдйәр.
11 Оны хич ким әсгермезлик этмесин. Мениң яныма гелер ялы, оны саг-саламат ёла салың. Чүнки мен оңа доганлар билен билеликде гарашярын.
12 Доган Аполлос хакда айданымда болса, мен доганлар билен билеликде сизиң яныңыза гитмегини ондан көп хайыш этдим, эмма онуң шу вагт гелмәге мейли ёк; аматлы пурсат тапанда гелер.
13 Хүшгәр болуң, иманда берк дуруң, мерт болуң, гуҗурлы болуң!
14 Эдйән әхли задыңыз сөйги билен болсун.
15 Доганлар, сизден шуны хайыш эдйәрин, сиз Стефаның ичерсини танаянсыңыз, оларың Ахаяда илкинҗи месихилердигини ве мукаддеслериң гуллугына берлендиклерини билйәнсиңиз.
16 Сиз хем шейле адамлара, олар билен ишләп, зәхмет чекйәнлериң хеммесине баш эгиң.
17 Мен Стефаның, Фортунатусың ве Ахаякусың геленине бегенйәрин, себәби олар маңа сизиң ёклугыңызы билдирмейәрлер.
18 Чүнки олар мениң рухума-да сизиңкә беришлери ялы ынҗалык берди. Шейле адамларың гадырыны билиң.
19 Азияның йыгнаклары сизе салам айдяр. Акила ве Прискилла өйлериндәки йыгнак билен бирликде сизе Ребде көп салам айдяр.
20 Доганларың бары сизе салам айдярлар. Бири-бириңизе мукаддес огшук билен салам айдың.
21 Мен Павлус өз саламымы өз элим билен язярын.
22 Реб Иса Месихи сөймейәне лагнат болсун. Эй Реббимиз, гел!
23 Реб Иса Месихиң мерхемети сизиң билен болсун!
24 Мениң сөйгим Месих Исада сизиң әхлиңиз билен болсун! Омын.