1

¹ A'ti pũrí be'ropɨ́ wa'aátehere Jesu Cristo wererí pũri niî'. Õ'âkɨ̃hɨ Jesu Cristore “Kã'roákã be'ro a'tîro wa'ârosa'”, niî ĩ'yókɨ niîwĩ. Kɨ̃ɨ̂ Jesu Cristore ẽho peórãre teeré masî dutigɨ tohô werêkɨ niîwĩ. Be'ró Jesu Cristo yɨ'ɨ̂ João wamêtigɨre teeré werê turiawĩ. Kɨ̃ɨ̂ Õ'âkɨ̃hɨre werê ko'tegɨ ɨ'mɨ̂sekɨ̃hɨ me'ra tohô weewĩ́. Yɨ'ɨ́ta Jesu Cristore da'rá wã'ya ko'tegɨ niî'.

² Yɨ'ɨ̂ ĩ'yâ'ke niî pe'tisere werêgɨti. Yɨ'ɨ̂ tɨ'ó'ke kẽ'rare werêgɨti. Õ'âkɨ̃hɨ uúkũ'kere Jesu Cristo yɨ'ɨ̂re ãyuró werêwĩ.

³ A'ti pũrí ohâ'karo noho wa'aátoho kã'ró dɨ'sá'. No'ó a'ti pũríre Jesu Cristore ẽho peórãre bu'êgɨ noho e'katíse bokagɨ́sami. Tohô niikã́ a'ti pũrí Õ'âkɨ̃hɨ o'ô'kere bu'ekã́ tɨ'orã́ pe'e kẽ'ra e'katíse bokarã́sama. No'ó naâ a'ti pũrípɨ ohâ'kere diakɨ̃hɨ́ weerã́ noho e'katíse bokarã́sama. João Jesu Cristore ẽho peóse kurarikãharãre ohâ'ke niî'

⁴ Yɨ'ɨ̂ mɨsâ Ásiapɨ niirã́ sete Jesu Cristore ẽho peóse kurarikãharãre ohâ'. Õ'âkɨ̃hɨ mɨsâre ãyuró weeáto. Mɨsâre ãyuró tɨ'ó yã'akã weeáto. Õ'âkɨ̃hɨ neê waropɨta niî'kɨ niîmi. A'tóka tero kẽ'rare niî nu'kukã'mi. Be'ropɨ́ kẽ'rare opâturi a'tîgɨsami. Õ'âkɨ̃hɨ wiôgɨ duhirí kumuro tiro sete Õ'âkɨ̃hɨre werê ko'terã bahutírã nu'kumá. Naâ toopɨ́ nu'kurã́ Espírito Santore niî pe'tise tutuasé kɨogɨ́ niîmi, niî sĩ'rirã weemá. Naá kẽ'ra mɨsâre ãyuró weeáto.

⁵ Tohô niikã́ Jesu Cristo mɨsâre ãyuró weeáto. Kɨ̃ɨ̂ Õ'âkɨ̃hɨ yeekãhasere keoró weregɨ́ niîmi. Kɨ̃ɨ́ta niî pe'tirã wẽrî'kãrã dɨporo masá mɨ'ta'kɨ niîmi. Kɨ̃ɨ̂ niî pe'tirã a'tí di'takãharã wiôrãre dutîmi. Marîre ma'imí. Kɨ̃ɨ̂ wẽrîgɨ, kɨ̃ɨ yeé diî me'ra marî yã'âro weé'kere yɨ'rɨówĩ.

⁶ Kɨ̃ɨ̂ wẽrisé me'ra marî wiôrã wa'âpã. Tohô niikã́ Õ'âkɨ̃hɨ yeere da'rarã́ sãhapã́. Kɨ̃ɨ̂ pakɨ́ dutisére da'raáto niîgɨ marîre tohô weékɨ niîwĩ. Kɨ̃ɨ̂re ãyuró e'katí peorã. Tohô tutuagɨ́ niî nu'kugɨsami. Tohôta niiáto.

⁷ Mɨsâ tɨ'oyá. Õ'âkɨ̃hɨ besé'kɨ Cristo o'me kuráripɨ dihátigɨsami. Kɨ̃ɨ̂ a'tikã́, niî pe'tirã ĩ'yârãsama. Tohô niikã́ kɨ̃ɨ̂re wẽhé'kãrãpɨta ĩ'yârãsama. Niî pe'tirã a'tí di'takãharã kɨ̃ɨ̂ a'tikã́ ĩ'yârã, utîrãsama. Tohôta wa'ârosa'.

⁸ Marî wiôgɨ Õ'âkɨ̃hɨ tutuâ yɨ'rɨ nɨ'kagɨ a'tîro niîmi: “Yɨ'ɨ́ta niî mɨ'tagɨ, niî tɨogɨpɨ niî'.” Õ'âkɨ̃hɨ neê waropɨta niî'kɨ niîmi. A'tóka tero kẽ'rare niî nu'kumi. Be'ropɨ́ kẽ'rare opâturi a'tîgɨsami. João Jesu Cristore kẽ'esé weeró noho ĩ'yâ'ke niî'

⁹ Yɨ'ɨ̂ João mɨsâ akawerégɨ weeró noho niî'. Mɨsâ weeró nohota yɨ'ɨ́ kẽ'ra pi'etí'. Marî ni'kâro noho Õ'âkɨ̃hɨ põ'ra niî'. Tohô niikã́ yã'âro wa'akã́, Jesu Cristo marîre wãkû tutuasere o'ômi. Yɨ'ɨ̂ Patmo wamêtiri nɨkɨropɨ bu'îri da'rerí wi'ipɨ niîwɨ. Õ'âkɨ̃hɨ yee kiti, Jesu Cristo uúkũ'kere weresé bu'iri toopɨ́ niîwɨ.

¹⁰ A'tîro wa'âwɨ yɨ'ɨ̂re. Ni'kâ soorí nɨmɨ niikã́ Espírito Santo tutuaró me'ra kẽ'esé weeró noho ĩ'yowĩ́. Wãkûtiro yɨ'ɨ̂ sẽ'êma pe'e tutuaró uúkũkã tɨ'owɨ́. Kɨ̃ɨ̂ uúkũse coroneta putíro weeró noho bɨsɨ̂wɨ.

¹¹ Kɨ̃ɨ̂ yɨ'ɨ̂re a'tîro niîwĩ: —Yɨ'ɨ́ta niî mɨ'tagɨ, niî tɨogɨpɨ niî'. Niî pe'tise mɨ'ɨ̂ ĩ'yasére ni'kâ pũripɨ ohâya. Mɨ'ɨ̂ ohâ'kere Ásiapɨ niirã́ sete kurari Jesu Cristore ẽho peóse kurarikãharãre o'ôo'ya. Naâ a'tikérã niîma: Éfesokãharã, Esmirnakãharã, Pérgamokãharã, Tiatirakãharã, Sardekãharã, Filadélfiakãharã, tohô niikã́ Laodicéiakãharãre o'ôo'ya, niîwĩ.

¹² Kɨ̃ɨ̂ tohô uúkũkã tɨ'ógɨ, yɨ'ɨ̂ noá niîti? niîgɨ, mahâmi ĩ'yawɨ. Setepagɨ sĩ'óo'se ouro me'ra weé'kepagɨre ĩ'yâwɨ.

¹³ Teepagɨ́ wa'teropɨ ni'kɨ́ masɨré ĩ'yâwɨ. Kɨ̃ɨ̂ su'tîro yoaróhore sãyâwĩ. Kɨ̃ɨ̂ kutîropɨ ouro me'ra weéka daare dɨ'tewĩ́.

¹⁴ Kɨ̃ɨ̂ poâri ãyuró butisé poari niîwɨ. Kɨ̃ɨ̂ kapêri pe'e pekâ me'e ɨ̃hɨrí põ'ra weeró noho asiwɨ́.

¹⁵ Kɨ̃ɨ̂ dɨ'pôkãri komé así pa'akɨhɨ pekâ me'epɨ ɨ̃hɨ̂ro weeró noho niîwɨ. Kɨ̃ɨ̂ uúkũse pehe maári po'ê yaha a'mâ bɨrose weeró noho bɨsɨ̂wɨ.

¹⁶ Kɨ̃ɨ̂ diakɨ̃hɨ́kãha amukãpɨ sete yõkoáre kɨowĩ́. Kɨ̃ɨ̂ ɨsêropɨ ni'kâ pĩhi wiorí pĩhire kɨowĩ́. Tii pĩhí pɨ̂a pe'eseri ɨse yoháka pĩhi niîwɨ. Kɨ̃ɨ̂ diâpoa ɨmɨ̂kohokɨ̃hɨ muhîpũ ɨpɨ́tɨ asistéro weeró noho niîwɨ.

¹⁷ Kɨ̃ɨ̂re ĩ'yâ ɨkɨágɨ, wẽrîgɨ weeró noho kɨ̃ɨ̂ dɨ'pôkãri tiro bɨrɨ̂ ke'akãti. Yɨ'ɨ̂ tohô wa'akã́ ĩ'yâgɨ, kɨ̃ɨ̂ diakɨ̃hɨ́kãha amukã me'ra yãa peó, yɨ'ɨ̂re niîwĩ: —Uîtikã'ya. Yɨ'ɨ́ta niî mɨ'tagɨ, niî tɨogɨpɨ niî'.

¹⁸ Katî nu'kugɨ niî'. Too dɨpóropɨre wẽrîwɨ. Ni'kâroakãre katî nu'kukã'. Yɨ'ɨ̂ masaré wẽrî duti masi'. Pekâ me'epɨ wa'â duti masi'. Ãpêrã kẽ'rare “Pekâ me'epɨ wa'âsome”, niî masi'.

¹⁹ Mɨ'ɨ̂ ĩ'yâ'kere, ni'kâroakã niisére ohâya. Be'ropɨ́ mɨ'ɨ̂ ĩ'yaátehe kẽ'rare ohâya.

²⁰ Apêyere masá too dɨpóropɨ masî no'oya marí'kere werêgɨti. Ã'rá sete yõkoá a'tîro niî sĩ'rirã weemá. Naâ yɨ'ɨ̂re ẽho peóse kurarikãharã wiôrã sɨ'orí niirã́ niîma. Sete sĩ'óo'se ouro me'ra weé'kepagɨ kẽ'ra a'tîro niî sĩ'riro weé'. Teé tiikésepagɨ yɨ'ɨ̂re ẽho peóse kurarikãharã niîma, niî sĩ'riro weé', niîwĩ.

2

¹ Jesu Cristo a'tîro niîwĩ: —Éfesokãharã, yɨ'ɨ̂re ẽho peóri kurakãharã wiôgɨ sɨ'orí niigɨ́re a'tîro niî ohâya: “Yɨ'ɨ̂ sete yõkoáre diakɨ̃hɨ́kãha amukãpɨ kɨó'. Tohô niikã́ sete sĩ'óo'se ouro me'ra weé'kepagɨ wa'teropɨ sihâ'.

² Niî pe'tise mɨsâ weesére yɨ'ɨ̂ masî'. Mɨsâ da'rasé, mɨsâ wãkû tutuasere masî'. Tohô niikã́ yã'âro weerã́re mɨsâ ɨatísere masî'. Mɨsâ basi ãpêrã naâ niisétisere ĩ'yâ masi'. Naâ ‘Jesu Cristo bese kũú'kãrã niî'’, niîma. Tohô niîmirã, niîtima. Tohô weérã naâre ĩ'yârã, ‘Niî soorã niîma’, niî'. Mɨsâ naâ tohô weesére masî'.

³ Yeekãhásere da'rárã, mɨsâ ɨpɨ́tɨ pi'etíwɨ. Mɨsâ teé pi'etísere nɨ'kawɨ́.

⁴ Mɨsâ ãyuró weemíkã, apêye noho mɨsâre werê nemo sĩ'ri'. A'tîro niî'. Mɨsâ neê waro ma'í nɨ'ka'karo weeró noho weé wee'.

⁵ Tohô weérã mɨsâ neê waropɨ ãyuró weé'kere wãkûya. Mɨsâ yã'âro weé'kere bɨhâ wetiya. Neê waropɨ niiséti'kereta weeyá taha. Mɨsâ dɨka yuútikã, mɨsa yaá kurakãhagɨ sĩ'óo'kɨhɨre kõ'âgɨti.

⁶ Apêye mɨsâ weesé pe'e ãyú niî'. Nicolaíta wamêtiri kurakãharã weesétisere mɨsâ neê kã'roákã ɨá wee'. Yɨ'ɨ́ kẽ'ra teeré neê ɨá wee'.

⁷ Espírito Santo Jesu Cristore ẽho peórãre uúkũmi. O'mê peeri kɨorã́ kɨ̃ɨ̂ uúkũsere tɨ'oyá. A'tîro niî'. Yɨ'ɨ̂ pakɨ tiro ãyuró Paraíso wamêtiropɨ ni'kâgɨ yukɨ̂gɨ niî'. Ãyuró weé yɨ'rɨ wetírã ẽho peó du'utirã tigɨ dɨkáre ba'â, katî nu'kurãsama”, niî ohâya, niîwĩ. Esmirnakãharãre ohâ'ke niî'

⁸ Opâturi Jesu Cristo niî nemowĩ taha: —Esmirnakãharã, yɨ'ɨ̂re ẽho peóri kurakãharã wiôgɨ sɨ'orí niigɨ́ kẽ'rare a'tîro ohâya: “Yɨ'ɨ́ta niî mɨ'tagɨ, niî tɨogɨpɨ niî'. Yɨ'ɨ̂ wẽrî masá'kɨ niî'.

⁹ Niî pe'tise mɨsâ weesére masî'. Mɨsâ pi'etíse, pahasé kɨosere masî'. Tohô pahasé kɨomirã, pehé kɨorã́ weeró noho niî'. Apêyere masî'. Ãpêrã ‘Judeu masa niî'’, niîma. Tohô niîmirã, mɨsâre yã'âro uúkũma. Naâ Judeu masa waro niîtima. Naâ wãti yaá kurakãharã niîma.

¹⁰ Mɨsâ pi'etiátehere uîtikã'ya. Wãtî ni'karérã mɨsâ ẽho peósere du'u dutígɨ bu'îri da'rerí wi'ipɨ sãhakã́ weegɨ́sami. Mɨsâ yoâtikã pɨámukãse nɨmɨrita pi'etírãsa'. Tohô weemíkã, teê wẽrîrãpɨ tohôta ẽho peó yapatíkã'ya. Yɨ'ɨ̂ tiropɨ mɨsâre katî nu'kukã weegɨ́ti.

¹¹ Espírito Santo Jesu Cristore ẽho peórãre uúkũmi. O'mê peeri kɨorã́ kɨ̃ɨ̂ uúkũsere tɨ'oyá. A'tîro niî'. Keoró weé yɨ'rɨ wetírã ẽho peó du'utirã pekâ me'epɨ wa'âsome”, niî ohâya, niîwĩ. Pérgamokãharãre ohâ'ke niî'

¹² Jesu Cristo niî nemowĩ taha: —Pérgamokãharã, yɨ'ɨ̂re ẽho peóri kurakãharã wiôgɨ sɨ'orí niigɨ́ kẽ'rare a'tîro ohâya: “Yɨ'ɨ̂ pɨ̂a pe'eseri ɨse yoháka pĩhi wiorí pĩhire kɨogɨ́ niî'.

¹³ Yɨ'ɨ̂ mɨsâ niî pe'tise weesére masî pe'okã'. Mɨsa yaá maka Pérgamo kẽ'rare masî'. Tii makápɨ wãtiâ wiôgɨ dutiró kɨosamí. Toopɨ́ niîmirã, mɨsâ yɨ'ɨ̂re siru tuú nu'ku'. Yɨ'ɨ̂re ẽho peó du'u wee'. Sõ'ó niîka tero mɨsa yaá maka wãtî niirópɨre a'tîro wa'âkaro niîwɨ. Antipa wamêtigɨ Õ'âkɨ̃hɨ yeekãhasere keoró werêkɨ niîwĩ. Ãpêrã kɨ̃ɨ̂re mɨsâ wa'teropɨ niigɨ́re wẽhé kõ'akãrã niîwã. Tiîta kẽ'rare mɨsâ yɨ'ɨ̂re neê ẽho peó du'utiwɨ.

¹⁴ Apêye mɨsâre a'tîro weresé kɨó'. Dɨporópɨ ni'kɨ́ Balaão wamêtigɨ niîkɨ niîwĩ. Kɨ̃ɨ̂ Balaque wamêtigɨre a'tîro bu'êkɨ niîwĩ: ‘Mɨ'ɨ̂ Israel kurakãharãre yã'âro wee dutíya’, niîkɨ niîwĩ. ‘Naâre mɨsâ ẽho peógɨre o'ô'ke di'ire ba'â dutiya’, niîkɨ niîwĩ. Kɨ̃ɨ̂ tohô niikã́ tɨ'ógɨ, Balaque naâ wẽhé ɨ̃hâ moro peo'ke di'ire Israel kurakãharãre ba'â dutikɨ niîwĩ. Tohô niikã́ naâ yã'âro a'me tãrá baha ke'atikã weékɨ niîwĩ. A'tóka tero mɨsâ wa'tero ni'karérã Balaão wee dutí'ke nohore siru tuúma.

¹⁵ Apêye kẽ'rare ni'karérã yɨ'ɨ̂ yabisére a'tîro weemá. Nicolaíta wamêtiri kurakãharã bu'esére siru tuúma. Neê du'ú sĩ'ritima.

¹⁶ Tohô weérã niî pe'tise mɨsâ yã'âro weesére bɨhâ wetiya. Mɨsâ dɨka yuútikã, mɨsâ tiropɨ wa'âgɨti. Yaa pĩhí wiorí pĩhi ɨsêropɨ kɨorí pĩhi me'ra mɨsâre bu'îri da'rêgɨti.

¹⁷ Espírito Santo yɨ'ɨ̂re ẽho peórãre uúkũmi. O'mê peeri kɨorã́ kɨ̃ɨ̂ uúkũsere tɨ'oyá. Keoró weé yɨ'rɨ wetígɨ ẽho peó du'utigɨre maná wamêtise ɨ'mɨ̂sekãhasere ekagɨ́sa'. Tohô niikã́ kɨ̃ɨ̂re ɨ̃tâ pee butirí peere o'ôgɨti. Tii peépɨ masî no'oya marirí wamere ohâ no'orosa'. Neê ni'kɨ́ teé wameré masîsome. Tii peére kɨogɨ́ di'akɨ̃ masîgɨsami”, niî ohâya, niîwĩ. Tiatirakãharãre ohâ'ke niî'

¹⁸ Jesu Cristo niî nemowĩ taha: —Tiatirakãharã, yɨ'ɨ̂re ẽho peóri kurakãharã wiôgɨ sɨ'orí niigɨ́re a'tîro ohâya: “Yɨ'ɨ̂ Õ'âkɨ̃hɨ makɨ kapêrire pekâ me'e ɨ̃hɨrí põ'ra weeró noho kɨogɨ́ niî'. Tohô niikã́ yɨ'ɨ̂ dɨ'pôkãri komé así pa'akɨhɨ weeró noho niî'.

¹⁹ Niî pe'tise mɨsâ weesére masî pe'okã'. Mɨsâ ma'isé, ẽho peóse, a'mêri wee tamúse, wãkû tutuasere masî'. Ni'kâroakãre mɨsâ neê waro weé'karo nemoró ãyuró weérã weé'.

²⁰ Tohô niîmikã, apêye mɨsâre werê sĩ'ri'. A'tîro niî'. Mɨsâ sõ'ó niîko Jezabelre kõ'á wee'. Koô ‘Õ'âkɨ̃hɨ werê duti'kere werê turiago weé'’, niîmimo. Tohô niîmigo, yɨ'ɨ̂re da'rá ko'terãre niî soosere bu'êmo. Naâre yã'âro weé, no'ó ɨaró a'me tãrá baha ke'atikã weemó. Tohô niikã́ wa'îkɨ̃ di'ire, naâ yeê'kɨre ẽho peóse o'ô'ke di'ire ba'akã́ weemó.

²¹ Tii nɨmɨ́pɨ koô yã'âro weé'kere bɨhâ weti dɨka yuú dutimiwɨ. Neê dɨka yuú sĩ'ritimo. Koô yã'âro a'me tãrásere du'ú sĩ'ritimo.

²² Tohô weégɨ koô yã'âro weesére du'utíkã ĩ'yâgɨ, koôre do'âtikã weegɨ́ti. Koô me'ra yã'âro weé a'me tãrárãre ɨpɨ́tɨ pi'etíkã weegɨ́ti.

²³ Koô põ'raré wẽrikã́ weegɨ́ti. Tohô weekã́, niî pe'tirã Jesu Cristore ẽho peóse kurarikãharã a'tîro niîrãsama: ‘Kɨ̃ɨ̂ masá tɨ'ó yã'asere masîmi’, niîrãsama. ‘Naâ po'peapɨ wãkusére, ɨ̃sá kẽ'rare masî pe'okã'mi’, niîrãsama. ‘Marî niisétisere keoró wapa yeégɨsami’, niîrãsama.

²⁴ Ãpêrã mɨsâ Tiatirapɨ niirã́ Jezabel bu'esére siru tuútirã, wãtiâ wiôgɨ yeekãhase ya'yiósere masîtirã noho pe'ere a'tîro niîgɨti: ‘Mɨsâre apêye dutî nemosome.

²⁵ A'té di'akɨ̃re weeyá. Mɨsâ keoró weesétisere neê du'utíkã'ya. Teê yɨ'ɨ̂ a'tirí kurapɨ weé nu'kukã'ya.’

²⁶ Keoró yɨ'ɨ̂ ɨaró noho weé yɨ'rɨ wetí ẽho peó du'utirã, tohôta weé yapatíkã'ya. Tohô weerã́re wiôrã wa'akã́ weegɨ́ti.

²⁷ Yɨ'ɨ̂ pakɨ yɨ'ɨ̂re niî pe'tise makarikãharã wiôgɨ sõróowĩ. Yɨ'ɨ́ kẽ'ra naâre meharóta sõróogɨti. Yarã́ a'tîro weerã́sama. Yã'arã́re tutuaró me'ra dutîrãsama. Komegɨ́ me'ra bapâri di'î me'ra yeê'keparɨre paâ mɨtoro weeró noho naâre weerã́sama.

²⁸ Apêye kẽ'rare yɨ'ɨ̂ ɨaró weé nu'kugɨre a'tîro weegɨ́ti. Naâre sɨ'orí niigɨ́ weeró noho niîgɨsami. Yõkoáwɨ̃ bo'rê ke'ari kura mɨhátigɨ weeró noho niîgɨsami.

²⁹ Espírito Santo Jesu Cristore ẽho peórãre uúkũmi. O'mê peeri kɨorã́ kɨ̃ɨ̂ uúkũsere tɨ'oyá”, niî ohâya, niîwĩ.

3

¹ Jesu Cristo niî nemowĩ taha: —Sardekãharã, yɨ'ɨ̂re ẽho peóri kurakãharã wiôgɨ sɨ'orí niigɨ́re a'tîro ohâya: “Yɨ'ɨ̂ sete Õ'âkɨ̃hɨre werê ko'terã bahutírãre kɨó'. Naâ Espírito Santore niî pe'tise tutuasé kɨogɨ́ niîmi, niî sĩ'rirã weemá. Tohô niikã́ tiikérãta taha yõkoáre kɨó'. Niî pe'tise mɨsâ weesére masî pe'okã'. Mɨsâ ‘Õ'âkɨ̃hɨ yeere ãyuró weemá’ niî no'orã niî'. Tohô niîmirã, wẽrî'kãrã weeró noho niî'. Kɨ̃ɨ yeére neê weé wee'.

² Tɨ'o masíya. Mɨsâ ãyuró weesé pe'tíro weé'. Dɨ'saseákãre ãyuró weeyá. Mɨsâ weesére a'tîro ĩ'yâ'. Õ'âkɨ̃hɨ ĩ'yóropɨre mɨsâ keoró weé wee'.

³ Mɨsâre bu'ê'kere wãkûya. Teeréta siru tuúya. Mɨsâ keoró weetísere bɨhâ wetiya. Tohô weetíkã, yɨ'ɨ̂ yahagɨ́ weeró noho weegɨ́ti. Wãkûtiro mɨsâ tiropɨ bu'îri da'rêgɨ wa'âgɨti.

⁴ Tohô niîmikã, tii maká Sarde mɨsâ wa'teropɨre pehêterãkã ãyuró weerã́ niîma. Naâ yã'âro weesére ĩ'yâ kũu siru tuútima. Su'tí ũ'îritirã weeró noho niîtima. Ãyuró weé'kãrã niî yuurã, yɨ'ɨ̂ me'ra niîrãsama. Su'tí butisé sãyarã́ weeró noho bu'îri marirã́ niîrãsama.

⁵ Ãpêrã kẽ'ra ãyuró weé yɨ'rɨ wetírã ẽho peó du'utirã noho su'tí ãyuró butisé sãâ no'orãsama. Katî nu'kuse kɨorã́ naâ wameré ohâ õ'oka pũripɨ kɨorã́ naâ wameré neê koé no'osome. Koé no'oro noho o'ôrã, yɨ'ɨ̂ pakɨ ĩ'yóropɨre yɨ'ɨ̂ ‘Naâre masî'’, niîgɨti. Meharóta kɨ̃ɨ̂re werê ko'terã ĩ'yóropɨ kẽ'rare niîgɨti.

⁶ Espírito Santo Jesu Cristore ẽho peórãre uúkũmi. O'mê peeri kɨorã́ kɨ̃ɨ̂ uúkũsere tɨ'oyá”, niî ohâya, niîwĩ. Filadélfiakãharãre ohâ'ke niî'

⁷ Jesu Cristo niî nemowĩ taha: —Filadélfiakãharã, yɨ'ɨ̂re ẽho peóri kurakãharã wiôgɨ sɨ'orí niigɨ́re a'tîro ohâya: “Yɨ'ɨ̂ yã'asé moogɨ́, diakɨ̃hɨ́ niigɨ́ niî'. Yɨ'ɨ̂ dɨporókɨ̃hɨ wiôgɨ Davi yaá sáwire kɨó'. Yɨ'ɨ̂ ni'kɨtá masá Õ'âkɨ̃hɨ tiropɨ wa'akã́ wee masí'. Ãpêrã wa'âtikã kẽ'rare wee masí'. Yɨ'ɨ̂ pãâokã, neê ãpí bi'a masítimi. Bi'akã́ kẽ'rare, neê ãpí pãâo masitimi. Mɨsâre a'tîro werêgɨti.

⁸ Niî pe'tise mɨsâ weesére masî pe'okã'. Yɨ'ɨ̂ mɨsâre pehé yeekãhásere wereátehere kũûwɨ. Teeré wee masí'. Neê ni'kɨ́ teeré ka'mú ta'a masitimi. Mɨsâ tutuâtirã niî'. Tutuâtimirã, yeé bu'esére ãyuró yɨ'tí'. Yeekãhásere ãpêrãre uúkũrã, ‘Kɨ̃ɨ̂re masî'’, niî'.

⁹ Ãpêrã a'tîro niîsama: ‘Judeu masa niî'’, niîsama. Tohô niîmirã, Judeu masa waro niîtima. Niî soorã wãtiâ wiôgɨ yaa kurakãharã niîma. A'tîro weegɨ́ti naâre. Naâre mɨsâ dɨporo ehâ ke'akã weegɨ́ti. Yɨ'ɨ̂ tohô weekã́, yɨ'ɨ̂ mɨsâre ma'isére masîrãsama.

¹⁰ Mɨsâre mehêkã wa'akã́ wãkû tutua duti'kere keoró weewɨ́. Tohô weégɨ niî pe'tirã a'ti nukúkãkãharã pi'etíri kura mɨsâre ko'têgɨti. Niî pe'tirã a'ti nukúkãkãharãre de'ró ẽho peómiti naa? niîgɨ, naâre pi'etíkã weegɨ́ti.

¹¹ Maatá a'tîgɨti taha. Mɨsâ keoró weesétisere neê du'utíkã'ya. Mɨsâ keoró weetírã, Õ'âkɨ̃hɨ mɨsâre o'ô booka be'to, kɨ̃ɨ̂ ‘O'ôgɨti’ niî'kere bahurió boosa'. Ãpêrãre o'ô boosami. Tohô weérã keoró weé nu'kukã'ya.

¹² Ãyuró weé yɨ'rɨ wetí ẽho peó du'utirãre yɨ'ɨ̂ pakɨ tiro kũûgɨti. Naâ kɨ̃ɨ yaá wi'ikãhase botâri weeró noho kɨ̃ɨ̂ tiro niî nu'kurãsama. Yɨ'ɨ̂ pakɨ wameré naâpɨre ohâgɨti. Kɨ̃ɨ yaá maka wamé kẽ'rare ohâgɨti. Kɨ̃ɨ yaá maka, apé ma'ma maká Jerusalẽ́ wamêti'. Tii maká ɨ'mɨ̂sekãha maka niî'. A'ti nukúkãpɨ dihátirosa'. Yɨ'ɨ́ kẽ'ra naâre yɨ'ɨ̂ wamé, ma'má ape wamé ohâgɨti.

¹³ Espírito Santo Jesu Cristore ẽho peórãre uúkũmi. O'mê peeri kɨorã́ kɨ̃ɨ̂ uúkũsere tɨ'oyá”, niî ohâya, niîwĩ. Laodicéiakãharãre ohâ'ke niî'

¹⁴ Jesu Cristo niî nemowĩ taha: —Laodicéiakãharã, yɨ'ɨ̂re ẽho peóri kurakãharã wiôgɨ sɨ'orí niigɨ́ kẽ'rare a'tîro ohâya: “Yɨ'ɨ̂ diakɨ̃hɨ́ uúkũgɨ niî'. Õ'âkɨ̃hɨ yee kitire keoró werê nu'kugɨ niî'. Õ'âkɨ̃hɨ yɨ'ɨ̂ me'ra niî pe'tisere weewĩ́.

¹⁵ Niî pe'tise mɨsâ weesére masî pe'okã'. Yarã́ niîmirãta, ãyuró ẽho peó wee'. Mɨsâ ẽho peórã waro niikã́, ãyu boópã. Yɨ'ɨ̂re ẽho peótikã, yã'â niî boosa'. Yɨ'ɨ̂re bu'î di'akɨ̃ ẽho peókã maa, tootá yã'â yɨ'rɨa'.

¹⁶ Mɨsâ tohô weesére yabî yɨ'rɨasa'.

¹⁷ Mɨsâ a'tîro uúkũ': ‘Pehé kɨó'. Niî pe'tise ãyuró wa'â'. Neê dɨ'sá wee'’, niî'. Mɨsâ neê tɨ'o masí wee'. Pahasé kɨorã waro weeró noho kapêri ĩ'yâtirã, su'ti marírã weeró noho niî'.

¹⁸ Tohô weégɨ mɨsâre niîgɨti. Mɨsâ ouro pekâ me'epɨ ɨ̃hâ apó'ke yɨ'ɨ̂ kɨosére yẽ'êya. Pi'etímirã yɨ'ɨ̂re ẽho peórã, ouro kɨorã́ weeró noho niî'. Teeré kɨórã, mɨsâ pehé kɨorã́ niîrãsa'. Apêye kẽ'rare su'tí butisé yɨ'ɨ̂ kɨosére sãyâya. Mɨsâ teeré sãyakã́, bopôyase pe'tiá wa'ârosa'. Yɨ'rɨó no'o'kãrã niîrãsa'. Tohô niikã́ kapêri piosé yɨ'ɨ̂ kɨosére yẽ'êya. Mɨsâ teé piôka be'ro ãyuró ĩ'yârãsa' taha. Yeekãhásere ãyuró masîrãsa'.

¹⁹ Yɨ'ɨ̂ ma'irã́ niî pe'tirãre tu'tî boo kure'. Naâ yã'âro weesére du'u dutígɨ tohô weé'. Tohô weérã yeekãhásere ɨpɨ́tɨ weé sĩ'riya. Mɨsâ yã'âro weé'kere bɨhâ weti dɨka yuúya.

²⁰ Tɨ'oyá. Yɨ'ɨ̂ sãháa sĩ'rigɨ, ni'kɨ́ sopé pɨ'to pisû nu'kugɨ weeró noho niî'. No'ó yɨ'ɨ̂re tɨ'ógɨ, kɨ̃ɨ̂ me'ra niî dutigɨ pãâo sõrogɨ nohore a'tîro weegɨ́ti. Kɨ̃ɨ̂ me'ra sɨ'orí e'katí, niî nu'kugɨti. Kɨ̃ɨ́ kẽ'ra yɨ'ɨ̂ me'ra meharóta weegɨ́sami.

²¹ Ãyuró weé yɨ'rɨ wetí ẽho peó du'utirãre yɨ'ɨ̂ me'ra wiôgɨ duhirí kumuropɨ dɨpogɨ́ti. Yɨ'ɨ̂ marikã, ãyuró weé yɨ'rɨ wetí'kɨ yɨ'ɨ̂ pakɨ me'ra wiôgɨ duhirí kumuropɨ niî'. Tohôta yɨ'ɨ́ kẽ'ra naâre meharóta weegɨ́ti.

²² Espírito Santo Jesu Cristore ẽho peórãre uúkũmi. O'mê peeri kɨorã́ kɨ̃ɨ̂ uúkũsere tɨ'oyá”, niî ohâya, niîwĩ.

4

¹ Be'ró yɨ'ɨ̂ João ɨ'mɨ̂sepɨ ĩ'yâ morowɨ. Toopɨ́ ni'kâ sope susukã́ ĩ'yâwɨ. Too dɨpóro coroneta putipɨhɨ́ putí'karo weeró noho bɨsɨ̂'kɨta taha uúkũwĩ. A'tîro niîwĩ yɨ'ɨ̂re: —A'topɨ́ mɨhátia. Be'ró wa'aátehere mɨ'ɨ̂re ĩ'yogɨ́tigɨ weé', niîwĩ.

² Kɨ̃ɨ̂ tohô niîka be'roakã maatá Espírito Santo tutuaró me'ra yɨ'ɨ̂re ɨ'mɨ̂sepɨre miáawĩ. Toopɨ́ wiôgɨ duhirí kumurore ĩ'yâwɨ. Tii kumúropɨ duhigɨ́re ĩ'yâwɨ.

³ Kɨ̃ɨ̂ ɨ̃tâ pee pũûro así pa'ari pee weeró noho bahugɨ́ niîwĩ. Jaspe ou sardônica ɨ̃tá sõ'akahá wa'terí pee weeró noho así pa'awĩ. Tii kumúro sumútohore ni'kâ daa bu'ê daa niî mahami sɨtɨawɨ. Pũûro ya'sarí daa esmeralda wamêtiri pee weeró noho así pa'awɨ.

⁴ Wiôgɨ duhirí kumuro tiropɨ vinte e quatro wiôrã duhisé kumuri niîwɨ. Teé duhisé kumuripɨre tiikérãta taha wiôrã bɨkɨrã́ duhîwã. Naâ su'tí butisére sãyâwã. Naâ nɨkɨ naâ dɨpopápɨre ouro me'ra weé'ke be'torire pesâwã.

⁵ Õ'âkɨ̃hɨ wiôgɨ duhirí kumuropɨre bɨpô ya'baró weeró noho bahuwɨ́. Tohô niikã́ bɨpô paâro weeró noho pũûro bɨsɨ̂wɨ. Tii kumúro tiro sete sĩ'óo'se tuturi nu'kuwɨ́. Tee tutúri nɨkɨta taha Õ'âkɨ̃hɨre werê ko'terã bahutírã niîma. Naáta Espírito Santore tutuasé kɨogɨ́ niîmi, niî sĩ'rirã weemá.

⁶ Apêye kẽ'ra tii kumúro tiro diâ pahirí maa weeró noho bahuró akostíro niîwɨ. Tii kumúro sumútohopɨ ãpêrã ba'pâritirã katirã́ weeró noho bahurã́ nu'kuwã́. Niî pe'tiro naâ diâpoapɨ, naâ sẽ'êmapɨre kapêri kɨó bi'awã.

⁷ Niî mɨ'tagɨ yaî pahigɨ́ sõ'agɨ́ weeró noho bahuwĩ́. Kɨ̃ɨ̂ be'rokɨ̃hɨ wekɨ̂ weeró noho bahugɨ́ niîwĩ. Kɨ̃ɨ̂ be'rokɨ̃hɨ masɨ́ weeró noho diâpoatigɨ niîwĩ. Kɨ̃ɨ̂ be'rokɨ̃hɨ aâ pakɨ wɨɨ́ wã'kagɨ weeró noho bahugɨ́ niîwĩ.

⁸ Niî pe'tirã naâ nɨkɨ seis wɨɨsé kɨowã́. Naâ wɨɨsé bu'i, naâ wɨɨsé dokapɨ kapêri weeró noho bahusé pehé kɨowã́. Naâ ɨmɨ̂kohore, yamîre a'tîro bɨsɨ̂ nu'kuwã:

Õ'âkɨ̃hɨ marî wiôgɨ ãyú butia'gɨ, yã'asé moogɨ́ niîmi. Tutuâ yɨ'rɨgɨ niîmi. Kɨ̃ɨ́ta niîmi neê waropɨta niî'kɨ. A'tóka tero kẽ'rare niî nu'kukã'mi. Be'ropɨ́ kẽ'rare opâturi a'tîgɨsami, niîwã.

⁹ Wiôgɨ duhirí kumuropɨ duhigɨ́, katî nu'kugɨre naâ ba'pâritirã kɨ̃ɨ̂ niisétisere ãyuró uúkũ, e'katí peo, “Ãyú'” niîwã.

¹⁰ Naâ tohô weesétiri nɨkɨ sõ'ó niîkãrã vinte e quatro wiôrã bɨkɨrã́ kɨ̃ɨ̂ dɨporo ehâ ke'a mɨhawã. Kɨ̃ɨ̂ katî nu'kugɨre ẽho peówã. Kɨ̃ɨ̂ dɨ'pôkãri tiropɨ naa yeé ouro me'ra weé'ke be'torire kũûwã. Tohô niikã́ naâ vinte e quatro wiôrã bɨkɨrã́ a'tîro niîwã:

¹¹ Õ'âkɨ̃hɨ ɨ̃sâ wiôgɨ, mɨ'ɨ̂ ãyú butia'gɨ niî'. Mɨ'ɨ̂re ãyuró uúkũro ɨá'. Mɨ'ɨ̂ niî pe'tirã yɨ'rɨóro ãyú yɨ'rɨgɨ, tutuâ yɨ'rɨ nɨ'kagɨ niî'. Mɨ'ɨ̂ niî pe'tisere weé'kɨ niî'. Mɨ'ɨ̂ ɨaró me'ra niî pe'tise niî'. Teé mɨ'ɨ̂ ɨaró me'rata niî pe'tise weé no'okaro niîwɨ, niîwã.

5

¹ Õ'âkɨ̃hɨ ɨ'mɨ̂se wiôgɨ duhirí kumuropɨ duhîwĩ. Kɨ̃ɨ̂ ni'kâ papéra tũrure diakɨ̃hɨ́kãha amukãpɨ kɨowĩ́. Tii tũrú pɨ̂a pe'eseri ohâka tũru niîwɨ. Setetiri pi'râ bi'aka tũru niîwɨ.

² Wiôgɨ duhirí kumuro pɨ'to ni'kɨ́ Õ'âkɨ̃hɨre werê ko'tegɨ tutuagɨ́re ĩ'yâwɨ. Kɨ̃ɨ̂ tutuaró me'ra a'tîro sẽrí yã'awĩ: —Noa nohó a'ti tũrúre pãâo masiakɨhɨ ãyugɨ́ niîti?

³ Neê ni'kɨ́ ɨ'mɨ̂sepɨ niigɨ́, a'ti nukúkãpɨ niigɨ́, tohô niikã́ a'ti nukúkã dokapɨ niigɨ́ tii tũrúre pãâ masitiwĩ. Tohô niikã́ neê kã'ró tii tũrúre pãâ bu'eákɨhɨre ĩ'yâ no'oya mariwɨ́.

⁴ Yɨ'ɨ̂ João neê ni'kɨ́ tii tũrúre pãâ masitikã, teé ohâ'kere bu'ê masitikã ĩ'yâgɨ, pũûro utîwɨ.

⁵ Yɨ'ɨ̂ utirí kura ni'kɨ́ wiôgɨ bɨkɨ́ yɨ'ɨ̂re niîwĩ: —Toô kã'rota utîya. Dɨporókɨ̃hɨ wiôgɨ Davi paramí niî turiagɨ ãyuró weé yɨ'rɨ wetí tohawĩ. Kɨ̃ɨ̂ Judá yaá kurakɨ̃hɨ yaî sõ'agɨ́ tutuagɨ́ weeró noho wiôgɨ niîmi. Kɨ̃ɨ̂ a'ti tũrúre pãâ masimi. Teé pi'râ bi'a'ke kẽ'rare pãâ masimi.

⁶ Kɨ̃ɨ̂ tohô niîka be'ro yɨ'ɨ̂ Cristo masa mɨhá'kɨre ĩ'yâwɨ. Kɨ̃ɨ̂ ovelha wi'magɨ́ wẽhé no'o'kɨ weeró noho bahuwĩ́. Kɨ̃ɨ̂ wiôgɨ duhirí kumuro pɨ'to katigɨ́ nu'kuwĩ́. Sõ'ó niîkãrã ba'pâritirã katirã́ weeró noho bahurã́, tohô niikã́ wiôrã bɨkɨrã́ wa'teropɨ nu'kuwĩ́. Kɨ̃ɨ̂ sete kapé sa'ari kɨogɨ́ niîwĩ. Tiikéseta taha kapêri kẽ'rare kɨowĩ́. Kɨ̃ɨ̂ kapé sa'ari tutuasé kɨogɨ́ niîmi, niî sĩ'riro weé'. Kɨ̃ɨ̂ kapêri pe'e a'tîro niî sĩ'riro weé'. Kɨ̃ɨ̂ Espírito Santore kɨomí. Tohô weégɨ niî pe'tisere, niî pe'tiropɨ niisére masî pe'okã'mi, niîro weé'.

⁷ Õ'âkɨ̃hɨ makɨ ovelha wi'magɨ́ weeró noho bahugɨ́ wiôgɨ duhirí kumuro pɨ'topɨ wa'âwĩ. Toopɨ́ wiôgɨ diakɨ̃hɨ́kãha amukãpɨ kɨóka tũrure miîwĩ.

⁸ Kɨ̃ɨ̂ tohô weekã́ ĩ'yârã, naâ ba'pâritirã katirã́ weeró noho bahurã́, tohô niikã́ vinte e quatro wiôrã bɨkɨrã́ kɨ̃ɨ̂ dɨ'pôkãpɨ ehâ ke'awã. Naâ nɨkɨ bɨâ pɨ̃tese pakare kɨowã́. Naâ nɨkɨ ouro me'ra weé'ke paari bapârire kɨowã́. Tee paári ɨ'mɨ̂tihise ɨ̃hâ morosere posetíse paari niîwɨ. Teé ɨ'mɨ̂tihise Õ'âkɨ̃hɨre ẽho peórã naâ sẽrisé niî', niî sĩ'riro weé'.

⁹ Naâ Õ'âkɨ̃hɨ makɨ ovelha wi'magɨ́ weeró noho bahugɨ́re apêye ma'má basasére basâ peowã. A'tîro niîwã:

Mɨ'ɨ̂ ãyugɨ́ niî'. Mɨ'ɨ̂ a'ti tũrúre miî masi'. A'té pi'râ bi'a'kere pãâ masi'. A'tîro niî'. Mɨ'ɨ̂ wẽhé no'o'kɨ niîwɨ. Mɨ'ɨ̂ wẽrisé me'ra, mɨ'ɨ̂ diî me'ra niî pe'tirã masá Õ'âkɨ̃hɨ yarã niiáto niîgɨ wapa yeékɨ niîwɨ. Niî pe'tise kurarikãharãre, mehêkã uúkũrãre, niî pe'tiropɨ niirã́re Õ'âkɨ̃hɨ yarã wa'akã́ weékɨ niîwɨ. Tohô weégɨ mɨ'ɨ̂ a'ti tũrúre miî masi'.

¹⁰ Õ'âkɨ̃hɨ yarãre wiôrã sãhakã́ weékɨ niîwɨ. Tohô niikã́ Õ'âkɨ̃hɨ yeere da'rarã́ sõróokɨ niîwɨ. Niî pe'tirokãharãre dutîrãsama, niî basâwã.

¹¹ Be'ró yɨ'ɨ̂ ɨ'mɨ̂sepɨ niirã́ Õ'âkɨ̃hɨre werê ko'terã pãharã́re ĩ'yâwɨ. Naâ uúkũsere tɨ'owɨ́. Naâ pãharã́ a'tîro weewã́. Wiôgɨ duhirí kumuro sumútoho, tohô niikã́ ba'pâritirã katirã́ weeró noho bahurã́, ãpêrã wiôrã bɨkɨrã́ sumútoho nu'ku mahámi sɨtɨawã. Pãharã́ waro niî yɨ'rɨo kehokã'wã.

¹² Tutuaró me'ra a'tîro niîwã:

Ovelha wi'magɨ́ naâ wẽhé no'o'kɨ ãyugɨ́ waro niîmi. Tohô weégɨ niî pe'tirãre dutî masimi. Niî pe'tisere kɨo masími. Niî pe'tisere masî pe'omi. Tutuagɨ́ niîmi. Niî pe'tirã “Ãyú yɨ'rɨami” niî no'ogɨ niîmi. Kɨ̃ɨ̂ Õ'âkɨ̃hɨ asistésere kɨogɨ́ niîmi. Niî pe'tirã kɨ̃ɨ̂re e'katí peoma, niî basâwã.

¹³ Be'ró ãpêrã uúkũse kẽ'rare tɨ'owɨ́. Naâ a'tikérã niîwã. Niî pe'tirã Õ'âkɨ̃hɨ weé'kãrã ɨ'mɨ̂sepɨ niirã́, a'tí di'tapɨ niirã́, di'tâ po'peapɨ niirã́ niîwã. Tohô niikã́ diâ pahirí maapɨ niirã́ niîwã. Naâ a'tîro basâ peowã:

Wiôgɨ duhirí kumuropɨ duhigɨ́re niî pe'tirã e'katí peoato. Niî pe'tirã kɨ̃ɨ̂re “Ãyú yɨ'rɨami”, niiáto. “Asistése, tutuasé kɨogɨ́ niîmi”, niiáto. Tohô niikã́ Õ'âkɨ̃hɨ makɨ ovelha wi'magɨ́ weeró noho bahugɨ́ kẽ'rare tohôta e'katí peo nu'kukã'ato, niîwã.

¹⁴ Naâ tohô niikã́ tɨ'órã, sõ'ó niîkãrã ba'pâritirã katirã́ weeró noho bahurã́ “Tohôta wa'aáto”, niîwã. Ãpêrã vinte e quatro wiôrã bɨkɨrã́ ehâ ke'a, kɨ̃ɨ̂re katî nu'kugɨre ẽho peówã.

6

¹ Be'ró Õ'âkɨ̃hɨ makɨ ovelha wi'magɨ́ weeró noho bahugɨ́ tii tũrú pi'râ bi'a'kere pãakã́ ĩ'yâwɨ. Kɨ̃ɨ̂ pi'râ bi'a mɨ'ta'karo pãâka be'ro ni'kɨ́ sõ'ó niîkãrã ba'pâritirã katisé kɨorã́ niî mɨ'tagɨ yaî pahigɨ́ sõ'agɨ́ weeró noho bahugɨ́ uúkũsere tɨ'owɨ́. Kɨ̃ɨ̂ uúkũse bɨpô paasé weeró noho bɨsɨ̂wɨ. A'tîro niîwĩ: —A'tiá.

² Kɨ̃ɨ̂ tohô niîka be'ro ni'kɨ́ cavalo butigɨ́re ĩ'yâwɨ. Kɨ̃ɨ̂ bu'ipɨ pesagɨ́ ni'kâ bɨê tẽhere kɨowĩ́. Ãpêrã kɨ̃ɨ̂re ni'kâ be'to dɨpôapɨ pesarí be'tore peôwã. Kɨ̃ɨ̂ weé nu'ku'karo weeró noho ãpêrãre dokâ ke'akã weégɨ wa'âwĩ taha.

³ Be'ró Õ'âkɨ̃hɨ makɨ ovelha wi'magɨ́ weeró noho bahugɨ́ apêro pi'râ bi'a'karore pãâwĩ taha. Kɨ̃ɨ̂ pãakã́, ãpí katisé kɨogɨ́ wekɨ̂ weeró noho bahugɨ́ niî mɨ'tagɨ be'rokɨ̃hɨ uúkũwĩ taha: —A'tiá, niîwĩ.

⁴ Be'ró ãpí cavalo sõ'agɨ́ wiháawĩ. Kɨ̃ɨ̂ bu'i pesagɨ́re a'ti nukúkãpɨ niirã́re a'mê wẽhe dutigɨ o'ôo'wĩ. —A'me kẽése mariró niîtikã'ato, niîwĩ. Masaré a'mê wẽhekã weewĩ́. Kɨ̃ɨ̂re pahirí pĩhihore o'ôwĩ.

⁵ Be'ró taha Õ'âkɨ̃hɨ makɨ ovelha wi'magɨ́ weeró noho bahugɨ́ apêro pi'râ bi'a'karore pãâwĩ. Kɨ̃ɨ̂ tohô weekã́, ãpí katisé kɨogɨ́ masɨ́ weeró noho diâpoatigɨ uúkũwĩ: —A'tiá, niîwĩ. Be'ró ãpí cavalo yĩigɨ́re ĩ'yâwɨ. Kɨ̃ɨ̂ bu'ipɨ pesagɨ́ ni'kâro nɨkɨsé keoróre kɨowĩ́.

⁶ Katisé kɨorã́ weeró noho bahurã́ wa'teropɨre ni'kɨ́ uúkũkã tɨ'owɨ́. A'tîro niîwĩ: —Ba'asé a'tîro wapatírosa'. Ni'kâ quilo trigo peeri ni'kâ nɨmɨ da'ra wapá ta'ase weeró noho wapatírosa'. I'tiá quilo cevada peeri ni'kâ nɨmɨ da'ra wapá ta'ase weeró noho wapatírosa'. Ɨ'sê piritári ba'ase, tohô niikã́ ɨ'sê dɨka koo vinho pe'tikã́ weetíkã'ato, niîwĩ.

⁷ Be'ró Õ'âkɨ̃hɨ makɨ ovelha wi'magɨ́ weeró noho bahugɨ́ apêro pi'râ bi'a'karore pãâwĩ. Kɨ̃ɨ̂ pãakã́, ãpí katisé kɨogɨ́ aâ pakɨ wɨɨ́ wã'kagɨ weeró noho bahugɨ́ uúkũkã tɨ'owɨ́: —A'tiá, niîwĩ.

⁸ Be'ró ãpí cavalore ĩ'yâwɨ. Kɨ̃ɨ̂ butî wihigɨ niîwĩ. Kɨ̃ɨ̂ bu'i pesagɨ́ Wẽrisé wamêtiwĩ. Kɨ̃ɨ̂ be'ro ãpí wẽrî'kãrã naâ niirókɨ̃hɨpɨ siru tuú wã'katiwĩ. Ovelha wi'magɨ́ a'ti nukúkãkãharãre kã'roákã dekô me'ra dɨharó wẽhe dutígɨ o'ôo'wĩ. A'mê wẽhese me'ra, ɨhá boasé me'ra, do'âtise me'ra boâ dutigɨ o'ôo'wĩ. Tohô niikã́ wa'îkɨ̃rã, yaîwa me'ra masaré wẽhe dutígɨ o'ôo'wĩ.

⁹ Be'ró Õ'âkɨ̃hɨ makɨ ovelha wi'magɨ́ weeró noho bahugɨ́ apêro pi'râ bi'a'karore pãâwĩ taha. Kɨ̃ɨ̂ pãakã́, naâ Õ'âkɨ̃hɨre wa'îkɨ̃rãre ɨ̃hâ moro peo wɨarore ĩ'yâwɨ. Too dokápɨ Õ'âkɨ̃hɨre ẽho peórã wẽhé no'o'kãrã ehêri põ'rari niîwɨ. Naâ kɨ̃ɨ̂re ẽho peóse bu'iri, tohô niikã́ Jesu Cristo yee kitire weresé bu'iri wẽhé no'okãrã niîwã.

¹⁰ Naâ tutuaró me'ra uúkũwã. A'tîro niîwã: —Wiôgɨ, ãyú butia'gɨ, mɨ'ɨ̂ yã'asé moogɨ́ niî'. Mɨ'ɨ̂ “Weegɨ́ti” niî'kere keoró weé'. De'ró niikã́ mɨ'ɨ̂ nukûkãkãharã ɨ̃sâre wẽhé'kãrãre bu'îri da'rê a'megɨsari?

¹¹ Be'ró naâre su'tí butisére o'ôwĩ. A'tîro niîwĩ: —Soó ni'iya yuhûpɨ. Ãpêrã mɨsâ akawerérã Jesu Cristo yeere wererã́ mɨsâ weeró noho wẽhé no'orãsama. Mɨsâ soorã́sa'. Teê “Tiikérãre wẽherã́sama” niî'ke wa'akã́pɨ soorã́sa', niîwĩ.

¹² Be'ró Õ'âkɨ̃hɨ makɨ ovelha wi'magɨ́ weeró noho bahugɨ́ apêro pi'râ bi'a'karore pãâwĩ taha. Kɨ̃ɨ̂ pãakã́, di'tâ pũûro nara sãáwɨ. Muhîpũ ɨmɨ̂kohokɨ̃hɨ na'î tĩ'a wa'âwĩ. Wẽrî'kãrãre bɨhâ wetirã su'tí yĩisé sãyâro weeró noho wa'âwĩ. Muhîpũ yamîkɨ̃hɨ diî weeró noho pũûro sõ'âwĩ.

¹³ Yõkoá kẽ'ra ɨ'mɨáropɨ niî'kãrã nukûkãpɨ bɨrɨ̂ dihawã. Naâ yukɨ dɨká wi'masé weeró noho wa'âwã. Yukɨ dɨká marikã wĩ'ró pũûro wẽekã́, bɨrɨ̂ diha'. Tohô weeró noho wa'âwã.

¹⁴ Ɨ'mɨ̂se marî papérare tũrêro weeró noho bahu dutiá wa'âwɨ. Niî pe'tise ɨ̃rɨpagɨ́, opa nɨkɨ́ri apé sia'pɨ wa'âwɨ.

¹⁵ A'ti ɨmɨ́kohokãharã wiôrã ɨ̃tâ tutiripɨ du'tiwã́. Tohô niikã́ ɨ̃rɨpagɨ́kãhase ɨ̃ta paá pakase dokapɨ du'tiwã́. Ãpêrã kẽ'ra pehé kɨorã́, surára wiôrã, tutuarã́, da'rá ko'terã, da'rá ko'tetirã du'tiwã́.

¹⁶ Naâ ɨ̃rɨgɨ́re, ɨ̃ta paáre niîwã: —Ɨ̃sâ bu'i bɨrɨ̂ pehaya. Wiôgɨ duhirí kumuropɨ duhigɨ́ ɨ̃sâre bu'îri da'rêgɨ weemí. Ɨ̃sâre ka'mú ta'aya. Ovelha wi'magɨ́ kẽ'ra ɨ̃sâre ɨpɨ́tɨ bu'îri da'rêgɨ weemí. Ka'mú ta'aya.

¹⁷ Masaré bu'îri da'reátihi nɨmɨ niî toha'. Noá põo tẽó boosari teeré? niî karíkũwã.

7

¹ Õ'âkɨ̃hɨ makɨ ovelha wi'magɨ́ weeró noho bahugɨ́ teé pi'râ bi'a'kere pãakã́ ĩ'yâka be'ro apêye ĩ'yâwɨ. Ba'pâritirã Õ'âkɨ̃hɨre werê ko'terã a'ti nukúkãpɨre ba'pâritise sumútohoripɨ nu'kukã́ ĩ'yâwɨ. Naâ nɨkɨ wĩ'ró naâ tiro ehasére ka'mú ta'awã. Tohô weéro wĩ'ró di'tâpɨre, diâ pahirí maapɨre, yukɨpagɨ́ bu'ipɨre wẽéotiwɨ.

² Ãpí Õ'âkɨ̃hɨre werê ko'tegɨ kẽ'rare ĩ'yâwɨ. Kɨ̃ɨ̂ muhîpũ mɨhátiro pe'e a'tîwĩ. Kɨ̃ɨ̂ Õ'âkɨ̃hɨ katî nu'kugɨ wamé yãa kũúrore kɨowĩ́. Ã'rá ba'pâritirã di'târe, diâ pahirí maare dohórẽ' duti no'okãrã niîwã. Kɨ̃ɨ̂ naâre karíkũwĩ:

³ —Di'tâ, diâ pahirí maare, yukɨpagɨ́re dohórẽ'tikã'ya yuhûpɨ. Marî wiôgɨre da'rá ko'terãre naâ diâpoapɨ kɨ̃ɨ̂ wameré yãa kũúka be'ropɨ dohórẽ'ya, niîwĩ.

⁴ Cento quarenta e quatro mil masa Israel paramérã niî turiase kurarikãharã naâ diâpoapɨ yãa kũú no'owã.

⁵ Judá yaá kurakãharã doze mil ohâ yãa kũú no'owã. Rubén yaa kurakãharã doze mil yãa kũú no'owã. Gade yaa kurakãharã kẽ'ra doze mil yãa kũú no'owã.

⁶ Ãpêrã Aser yaa kurakãharã doze mil yãa kũú no'owã. Naftali yaa kurakãharã doze mil yãa kũú no'owã. Manassé yaa kurakãharã doze mil yãa kũú no'owã.

⁷ Tohô niikã́ Simeão yaa kurakãharã doze mil yãa kũú no'owã. Levi yaá kurakãharã doze mil yãa kũú no'owã. Issacar yaa kurakãharã doze mil yãa kũú no'owã.

⁸ Zebulṍ yaa kurakãharã kẽ'ra doze mil yãa kũú no'owã. José yaá kurakãharã doze mil yãa kũú no'owã. Benjami yaa kurakãharã kẽ'ra doze mil yãa kũú no'owã. Niî pe'tirã naa yeé diâpoaripɨre yãa kũú no'o'kãrã di'akɨ̃ niîwã. Su'tí butisé sãyarã́ pãharã́ Õ'âkɨ̃hɨ diakɨ̃hɨ nu'kusé kiti niî'

⁹ Israel yee kurarikãharãre yãa kũú no'oka be'ro a'tîro ĩ'yâwɨ. Pãharã́ masá niî pe'tise kurarikãharã, mehêkã uúkũrã, niî pe'tirokãharãpɨre ĩ'yâwɨ. Naâ wiôgɨ duhirí kumuro diakɨ̃hɨ, tohô niikã́ Õ'âkɨ̃hɨ makɨ ovelha wi'magɨ́ weeró noho bahugɨ́ diakɨ̃hɨ nu'kuwã́. Pãharã́ waro niîwã. Neê ba'pâ keota basiótiwã. Naâ su'tí butisére sãyâ, pũrî opa keérire kɨowã́.

¹⁰ Naâ karíkũwã:

Õ'âkɨ̃hɨ marî wiôgɨ marîre yɨ'rɨógɨ niîmi. Kɨ̃ɨ̂ wiôgɨ duhirí kumuropɨ duhîmi. Õ'âkɨ̃hɨ makɨ ovelha wi'magɨ́ weeró noho bahugɨ́ kẽ'ra marîre yɨ'rɨógɨ niîmi, niî karíkũwã.

¹¹ Niî pe'tirã Õ'âkɨ̃hɨre werê ko'terã wiôgɨ duhirí kumuro sumútohopɨ nu'ku mahámi sɨtɨawã. Tohô niikã́ sõ'ó niîkãrã wiôrã bɨkɨrã́re, ãpêrã katisé kɨorã́ weeró noho bahurã́re mahâmi sɨtɨawã. Naâ Õ'âkɨ̃hɨre werê ko'terã wiôgɨ duhirí kumuro tiro ehâ ke'a, Õ'âkɨ̃hɨre ẽho peórã naâ diâpoarire paâ mu'ri ke'awã.

¹² A'tîro niîwã:

A'tîro wa'aáto marî wiôgɨre. Niî pe'tirã kɨ̃ɨ̂re ẽho peoáto. “Asistégɨ, masî pe'ogɨ niîmi”, niiáto. Niî pe'tirã “Ãyú yɨ'rɨami”, niî e'katí peoato. Niî pe'tirãre dutîmi. “Tutuâ yɨ'rɨgɨ niîmi”, niiáto. A'té tohôta niî nu'kuato. Tohôta niiáto, niî ẽho peówã.

¹³ Ni'kɨ́ wiôgɨ bɨkɨ́ yɨ'ɨ̂re sẽrí yã'awĩ: —Ã'rá su'tí butisé sãyarã́ no'okãhárã niîti? No'opɨ́ a'tiápari? niîwĩ.

¹⁴ Yɨ'ɨ̂ kɨ̃ɨ̂re yɨ'tiwɨ́: —Wiôgɨ, mɨ'ɨ̂ masísa'. Kɨ̃ɨ̂ pe'e yɨ'ɨ̂re niîwĩ: —Ã'rá nukûkãkãharã pũûro pi'etíka terore naá kẽ'ra pi'etí'kãrã niîma. Naâ Õ'âkɨ̃hɨ makɨ ovelha wi'magɨ́ weeró noho bahugɨ́ wẽrisé me'ra naâ ehêri põ'raripɨ yã'asé moorã́ tohákãrã niîwã.

¹⁵ Tohô weérã naâ Õ'âkɨ̃hɨ duhirí kumuro tiro niî nu'kukã'ma. Kɨ̃ɨ yaá wi'ipɨre ɨmɨ̂kohori nɨkɨ, yamîri nɨkɨ kɨ̃ɨ̂ ɨaró weemá. Wiôgɨ duhirí kumuropɨ duhigɨ́ naâ me'ra niîmi. Naâre ko'têmi.

¹⁶ Naâ ɨhá boâ, ako wɨó nemosome. Naâre muhîpũ ɨmɨ̂kohokɨ̃hɨ ɨ̃hâ nemosome. Asisé yãisére tɨ'ó yã'a nemosome.

¹⁷ Õ'âkɨ̃hɨ makɨ ovelha wi'magɨ́ weeró noho bahugɨ́ wiôgɨ duhirí kumuro pɨ'topɨ niigɨ́ ovelhare ko'têgɨ weeró noho naâre ko'têgɨsami. Akó wiharí peepɨ miáagɨsami. Teeré sĩ'rírã, katî nu'kurãsama. Õ'âkɨ̃hɨ niî pe'tirã naâ ya'ko koó wiharã́re tuu koégɨsami.

8

¹ Be'ró Õ'âkɨ̃hɨ makɨ ovelha wi'magɨ́ weeró noho bahugɨ́ naâ pi'râ bi'a tɨo'karore pãâwĩ. Kɨ̃ɨ̂ pãakã́, niî pe'tiro ɨ'mɨ̂sepɨ di'ta mariá wa'âwɨ. Ni'kâ hora deko tohô wa'âwɨ.

² Be'ró sete Õ'âkɨ̃hɨre werê ko'terã kɨ̃ɨ̂ pɨ'to nu'kurã́re ĩ'yâwɨ. Naâre naâ nɨkɨ putisé coronetare o'ôwĩ.

³ Be'ró ãpí Õ'âkɨ̃hɨre werê ko'tegɨ a'tîwĩ. Kɨ̃ɨ̂ ɨ'mɨ̂tihise ɨ̃hâ morokaha ouro me'ra weékagare kɨowĩ́. Kɨ̃ɨ̂ Õ'âkɨ̃hɨre wa'îkɨ̃rã ɨ̃hâ moro peo wɨaro pɨ'topɨ ehâ nɨ'kawĩ. Pehé ɨ'mɨ̂tihise kɨ̃ɨ̂re ɨ̃hâ moro peoatehere o'ôwã. Niî pe'tirã Õ'âkɨ̃hɨ yarã kɨ̃ɨ̂re sẽrí'ke me'ra moré su'u ɨ̃hâ moro peoatehere o'ôwã. Kɨ̃ɨ̂ ouro me'ra weé'karo ɨ'mɨ̂tihise ɨ̃hâ moro wɨaropɨ wiôgɨ duhirí kumuro diakɨ̃hɨ teeré ɨ̃hâ morowĩ.

⁴ Kɨ̃ɨ̂ ɨ̃hâ morose ɨ'mɨ̂tihise o'mé Õ'âkɨ̃hɨ tiropɨ mɨhâwɨ. Õ'âkɨ̃hɨ yarã kɨ̃ɨ̂re sẽrí'ke me'ra moré su'u mɨhawɨ.

⁵ Be'ró Õ'âkɨ̃hɨre werê ko'tegɨ ɨ'mɨ̂tihise ɨ̃hâ moro wɨaropɨkãhase pekâ me'e ɨ̃hâ moa'kere ɨ'mɨ̂tihise ɨ̃hâ morokahapɨ õrê sãawĩ. Be'ró tigakãhásere a'ti nukúkãpɨre po'o dihówĩ. Kɨ̃ɨ̂ tohô weéka be'ro bɨpô paakã́, ɨpɨ́tɨ bɨsɨsére tɨ'owɨ́. Bɨpô ya'bakã́ ĩ'yâwɨ. Tohô niikã́ di'tâ nara sãáwɨ. Õ'âkɨ̃hɨre werê ko'terã coroneta putiátehe niî'

⁶ Be'ró sete Õ'âkɨ̃hɨre werê ko'terã naâ coroneta putisére apo yuúwã.

⁷ Niî mɨ'tagɨ putiwĩ́. Kɨ̃ɨ̂ putíka be'ro yɨsɨáse peeri a'ti nukúkãpɨre bɨrɨ̂ dihawɨ. Tohô niikã́ pekâ me'e diî me'ra moré'ke bɨrɨ̂ dihawɨ. Tohô wa'akã́, di'tâ kã'ró dekô boo kure ɨ̃hɨ̂wɨ. Yukɨpagɨ́ kẽ'ra meharóta dekô boo kurepɨta ɨ̃hɨ̂wɨ. Niî pe'tise taâ ɨ̃hɨ̂ pe'tia wa'âwɨ.

⁸ Kɨ̃ɨ̂ be'rokɨ̃hɨ putiwĩ́. Kɨ̃ɨ̂ putíka be'ro ni'kâgɨ ɨ̃rɨgɨ́ ɨ̃hɨkɨhɨ́ diâ pahirí maahopɨ doke yõó no'owɨ. Tii maá deko boo kure diî maa wa'âwɨ.

⁹ Diâ pahirí maakãharã dekô boo kure wẽrîwã. Yukɨ̂sɨpawɨ kẽ'ra tii maápɨ niisé dekô boo kure mirî ɨ̃hâ kõ'a no'owɨ.

¹⁰ Be'ró, pɨárã be'rokɨ̃hɨ putiwĩ́. Kɨ̃ɨ̂ putíka be'ro yõkoáwɨ̃ pahigɨ́ ɨ'mɨárokɨ̃hɨ bɨrɨ̂ dihawĩ. Bɨrɨ̂ dihagɨ, sĩ'óo'ri tuturoho weeró noho ɨ̃hɨ̂ dihawĩ. Kɨ̃ɨ̂ diâpɨre, õ'ô maha maariakãpɨre dekô boo kure doké bi'pe ke'awĩ.

¹¹ Yõkoáwɨ̃ “Sɨ̃egɨ́” wamêtiwĩ. Akó a'ti nukúkãkãhase kɨ̃ɨ̂ dokê ke'a'karo ehâ tu'aro akó sɨ̃esé wa'âwɨ. Teé akoré sĩ'rírã, pãharã́ masá wẽrîwã.

¹² I'tiárã be'rokɨ̃hɨ putiwĩ́ taha. Kɨ̃ɨ̂ putikã́, muhîpũ ɨmɨ̂kohokɨ̃hɨ dekô boo kure paâ no'owĩ. Tohô wa'akã́ ɨmɨ̂koho dekô boo kure na'î tĩ'a wa'âwɨ. Muhîpũ yamîkɨ̃hɨ, yõkoá kẽ'rare tohôta paâ no'owã. Tohô weérã yamîpɨre dekô boo kure bo'rê yuutiwã.

¹³ Be'ró ĩ'yâwɨ taha. Ni'kɨ́ aâ pakɨ a'ti ɨmɨ́koho dekopɨ wɨɨkã́ ĩ'yâwɨ. Tutuaró me'ra a'tîro niîwĩ: —Ãpêrã i'tiárã Õ'âkɨ̃hɨre werê ko'terã putikã́, yã'â butia'ro wa'ârosa' a'ti nukúkãkãharãre, niîwĩ.

9

¹ Ba'pâritirã be'rokɨ̃hɨ putiwĩ́. Kɨ̃ɨ̂ putikã́, ni'kɨ́ yõkoáwɨ̃ nukûkãpɨ bɨrɨ̂ diha'kɨre ĩ'yâwɨ. Kɨ̃ɨ̂re ni'kâ sáwi o'ôwã. Kopê niî bahu dutí dihari peekãha sáwi niîwɨ.

² Be'ró kɨ̃ɨ̂ tii peére pãâowĩ. Pãâoka be'ro o'mé paka wihawɨ́. Tii peékãhase o'mé muhîpũre tuú bi'akã'wɨ. Na'î tĩ'a wa'âwɨ.

³ Teé o'mé me'ra pãharã́ mɨ'mɨ̂ri wi'ia wɨɨ wiháwã. Niî pe'tiropɨ wɨɨ́ se'sa wa'âwã. Naâ mɨ'mɨ̂ri wi'ia a'ti nukúkãkãharã kutîpa weeró noho toâwã. Naâ siipápɨre kutîpa weeró noho toakahá kɨowã́.

⁴ Naâre taâre, otesére, yukɨpagɨ́re dohórẽ' dutigɨ meheta weewĩ́. Masá naâ diâpoapɨ Õ'âkɨ̃hɨ wamé yãa kũú no'oya marirã́ di'akɨ̃re toâ dutiwĩ.

⁵ Naâre toâ wẽhe dutitiwĩ. Ni'kâmukãse muhipũri naâre pũrikã́ wee dutíwĩ. Naâ toasé kutîpa weeró noho pũrîwɨ.

⁶ Tohô wa'arí kurare masá ɨpɨ́tɨ wẽrî sĩ'rimiwã. Naâ wẽrî sĩ'rimikã, basiótiwɨ.

⁷ Mɨ'mɨ̂ri wi'ia cavaloa a'mê wẽheatoho dɨporo apo yuú'kãrã weeró noho bahuwã́. Naâ dɨpopápɨ ouro me'ra weé'ke be'tori weeró noho bahusére pesâwã. Naâ diâpoa masɨ́ diâpoa weeró noho bahuwɨ́.

⁸ Naâ poârire numiâ weeró noho poâ nɨ'motiwã. Naâ upîkari yaî upîkari weeró noho bahuwɨ́.

⁹ Naâ ɨpɨré ka'mú ta'arã, komé su'ti weeró noho bahusére kɨowã́. Naâ wɨɨkã́, ɨpɨ́tɨ bɨsɨ̂wɨ. Masá a'mê wẽherã wa'ârãtirã, cavaloa wehesépawɨ wa'âro weeró noho bɨsɨ̂wɨ.

¹⁰ Naâ siipápɨ toasé kɨosé me'ra ni'kâmukãse muhipũri masaré toâwã.

¹¹ Mɨ'mɨ̂ri wi'ia wiôgɨ niî bahu dutí dihari peeho wiôgɨ niîmi. Kɨ̃ɨ́ta tii peére pãâwĩ. Kɨ̃ɨ̂ wamé hebreu yee me'ra Abadṍ wamêtiwĩ. Grego yee me'ra Apoliṍ wamêtiwĩ. Dohórẽ'ri masɨ niîmi, niî sĩ'riro weé'.

¹² Niî mɨ'tase yã'asé pe'tí'. Pɨáro dɨ'sá'.

¹³ Ni'kâmukãrã be'rokɨ̃hɨ putiwĩ́. Kɨ̃ɨ̂ putikã́, ni'kɨ́ uúkũkã tɨ'owɨ́. Õ'âkɨ̃hɨ niirópɨ Õ'âkɨ̃hɨre ɨ'mɨ̂tihise ɨ̃hâ moro peo wɨaro ouro me'ra weé'karo niîwɨ. Toó bu'ipɨ ba'pâritise kapé sa'ari niîwɨ. Teé wa'teropɨ Õ'âkɨ̃hɨ uúkũkã tɨ'owɨ́.

¹⁴ Kɨ̃ɨ̂ coroneta putigɨ́re a'tîro niîwĩ: —Ba'pâritirã Õ'âkɨ̃hɨre werê ko'terã dɨ'té nɨ'ko'kãrãre pãâya. Naâ pahirí maaho Eufrate wamêtiri maa pɨ'to niîma, niîwĩ.

¹⁵ Kɨ̃ɨ̂ tohô niîka be'ro ã'rá pãâ no'owã. Naâ ba'pâritirã Õ'âkɨ̃hɨre werê ko'terã niî pe'tirã a'ti nukúkãkãharãre dekô boo kurepɨ wẽhérã wa'âwã. Naâreta Õ'âkɨ̃hɨ a'tîro weékɨ niîwĩ. “Tií hora, tii nɨmɨ́, tii muhípũ, tií kɨ'ma niikã́, mɨsâ bu'îri da'rêrãsa'”, niî bese kũúkɨ niîwĩ. Keoró kɨ̃ɨ̂ niî'karo noho wa'âwɨ.

¹⁶ Naâ me'ra pãharã́ surára cavaloa me'ra niîwã. Naâre pãharã́ waro duzentos milhões niîma niisére tɨ'owɨ́.

¹⁷ Cavaloa, tohô niikã́ naâ bu'i pesarã́ a'tîro bahuwã́. Naâ bu'i pesarã́ naâ kutîrore ka'mú ta'asere sõ'aró, ya'saró, ewɨ̂ro kɨowã́. Cavaloa naâ dɨpopáre yaihó weeró noho dɨpopátiwã. Naâ ɨsêropɨ pekâ me'e ɨ̃hɨ̂ wihawɨ. O'mé wihawɨ́. Tohô niikã́ enxofre wamêtise opê weeró noho sipisé ɨ̃hɨ̂ wihawɨ.

¹⁸ Teé i'tiá pekâ me'e, o'mé, enxofre me'ra masaré dekô boo kure wẽhewã́.

¹⁹ Cavaloa naâ ɨsêri me'ra, naa yeé pĩkori me'ra masaré wẽhewã́. Naa yeé pĩkori yapari ãyâ dɨpoa weeró noho bahuwɨ́. Teé me'ra masaré dutî da'rewã.

²⁰ Ãpêrã masá pekâ me'e, o'mé, enxofre me'ra wẽrîtirã pe'e naâ yã'âro weesére neê du'utíwã. Naâ wãtiâre ẽho peósere du'utíwã. Naâ ẽho peóse yeê'ke ouro me'ra weé'ke, prata me'ra weé'ke, bronze me'ra weé'ke, ɨ̃tâ peeri me'ra weé'ke, yukɨpagɨ́ me'ra weé'kere ẽho peó du'utiwã. Teé yeê'ke naâ ẽho peóse pehé neê ĩ'yâti, neê tɨ'otí, neê sihá wee'. Tohô niîmikã, neê ẽho peó du'utiwã.

²¹ Tohô niikã́ masaré wẽhé kõ'asere, naâ ãpêrãre dohórẽ'sere du'utíwã. Apêyere, naâ no'ó ɨaró a'me tãrá baha ke'atisere, ãpêrã yeere yahasére neê du'utíwã.

10

¹ Be'ró ãpí Õ'âkɨ̃hɨre werê ko'tegɨ tutuagɨ́ ɨ'mɨ̂sepɨ niî'kɨre dihátikã ĩ'yâwɨ. Kɨ̃ɨ̂ o'me kurá dekopɨ dihátiwĩ. Kɨ̃ɨ̂ dɨpôa bu'i bu'ê daa niîwɨ. Kɨ̃ɨ yaá diâpoa muhîpũ ɨmɨ̂kohokɨ̃hɨ weeró noho asistéwɨ. Kɨ̃ɨ̂ yẽkâri ɨ̃hɨsé botari weeró noho bahuwɨ́.

² Kɨ̃ɨ̂ amûkãpɨ papéra pãâka turiakãre kɨowĩ́. Kɨ̃ɨ̂ diakɨ̃hɨ́kãha dɨ'pôkãre pahirí maahopɨ ɨ'ta kũú nu'kuwĩ. Kũûpe' pe'ere di'tâpɨ ɨ'ta kũú nu'kuwĩ.

³ Kɨ̃ɨ̂ toopɨ́ nu'kugɨ́ yaihó weeró noho pũûro karíkũwĩ. Kɨ̃ɨ̂ karíkũkã, sete bɨpoâ uúkũwã.

⁴ Naâ uúkũka be'ro naâ uúkũsere ohâ nɨ'kamiwɨ. Tohô weerí kura ni'kɨ́ ɨ'mɨ̂sepɨ niigɨ́ yɨ'ɨ̂re niîwĩ: —Naâ bɨpoâ uúkũsere ãpêrãre werêtikã'ya. Ohâtikã'ya teeré, niîwĩ.

⁵ Be'ró yɨ'ɨ̂ diâ pahirí maapɨ, di'tâpɨ nu'kukã́ ĩ'yâ'kɨ kɨ̃ɨ yaá diakɨ̃hɨ́kãha amukãre sĩô morowĩ.

⁶ Kɨ̃ɨ̂ a'tîro niîwĩ: —Õ'âkɨ̃hɨ katî nu'kugɨ niîmi. Ɨ'mɨ̂se, di'tâ, pakasé maari niî pe'tirã teepɨ́ niirã́re weé'kɨ niîmi. Õ'âkɨ̃hɨ wamé me'ra niîgɨti. Marî yuû kue'ke pe'tiá wa'â'. Yuû kue nemosome.

⁷ Õ'âkɨ̃hɨre werê ko'tegɨ niî tɨogɨ putí nɨ'kari kurare a'tîro wa'ârosa'. Õ'âkɨ̃hɨ “Tohô weegɨ́ti” niî'ke masî no'oya marí'ke wa'â bakeo'rosa'. Kɨ̃ɨ̂, kɨ̃ɨ yeé kiti werê mɨ'tarãre “A'tîro weegɨ́ti” niî'ke keoró wa'ârosa', niîwĩ.

⁸ Kɨ̃ɨ̂ tohô niîka be'ro ɨ'mɨ̂sekɨ̃hɨ yɨ'ɨ̂re “Ohâtikã'ya” niî'kɨ a'tîro niîwĩ: —Sĩ'í, maahópɨ, di'tâpɨ ɨ'ta kũú nu'kugɨ tiropɨ wa'âya. Kɨ̃ɨ yaá turi pãâka turiakãre miîya, niîwĩ.

⁹ Kɨ̃ɨ̂ tohô niikã́ tɨ'ógɨ, yɨ'ɨ̂ kɨ̃ɨ̂ tiropɨ wa'âwɨ. —Mɨ'ɨ yaá turire o'ôya, niîwɨ. Yɨ'ɨ̂ sẽrikã́ tɨ'ógɨ, a'tîro niîwĩ: —Miîya. Tii pũríre ba'âya. Mɨ'ɨ̂ ba'akã́, mumiâ mumi weeró noho i'pîtirosa'. Mɨ'ɨ̂ paâgapɨ pe'ere sɨ̃esé dohorósa', niîwĩ.

¹⁰ Kɨ̃ɨ̂ tohô niikã́ tɨ'ógɨ, yɨ'ɨ̂ tii turiákãre miîwɨ. Miî, ba'âwɨ. Yɨ'ɨ̂ ba'akã́, mumî weeró noho i'pîtiwɨ. Paâgapɨ pe'ere sɨ̃é niîkãti.

¹¹ Be'ró Õ'âkɨ̃hɨre werê ko'terã yɨ'ɨ̂re niîwã: —Õ'âkɨ̃hɨ kɨ̃ɨ̂ uúkũsere werê apogɨ wa'âya taha. Kɨ̃ɨ̂ pehe makárikãharãre, pehé di'takãharãre, mehêkãri uúkũrãre naa yeékãhasere werêmi. Teeré werêgɨ wa'âya. Tohô niikã́ wiôrã kẽ'rare “Õ'âkɨ̃hɨ tohô niiámi”, niî werêya, niîwã.

11

¹ Be'ró yɨ'ɨ̂re a'tîro weewã́. Ãrɨ̂gɨ wi'í weérã keokɨhɨ́ weeró noho bahukɨhɨ́re o'ôwã. Õ'âkɨ̃hɨ yɨ'ɨ̂re a'tîro niîwĩ: —Õ'âkɨ̃hɨ wi'ire keógɨ wa'âya. Naâ ɨ'mɨ̂tihise ɨ̃hâ moro ẽho peó wɨaro kẽ'rare keoyá. Toopɨ́ ẽho peórã kẽ'rare ba'pâ keoya.

² Õ'âkɨ̃hɨ wi'i sumútoho maa keotíkã'ya. Teé apé sia'kãharãre o'ô'ke di'tâ niî'. Naâ quarenta e dois muhipũri Õ'âkɨ̃hɨ yaa maka Jerusalẽ́ di'tare dohórẽ' nu'kurãsama, niîwĩ.

³ Be'ró Õ'âkɨ̃hɨ niî nemowĩ taha: —Pɨárã yarã́, yeekãhásere wererã́re o'ôo'gɨti. Naâ pehé ɨmɨ̂kohori, mil duzentos sessenta nɨmɨri yeekãhásere uúkũrãsama. Naâ bɨhâ wetisere ĩ'yórã naâ wee wɨáro noho su'tí wãkisére sãyâ, uúkũrãsama, niîwĩ.

⁴ Ã'rá pɨárã yukɨpagɨ́ oliveira wamêtisepagɨ weeró noho niîma. Teé pɨágɨ oliveirapagɨ Õ'âkɨ̃hɨre da'rá ko'terã niîma, niîro weé'. Naáta taha pɨága sĩ'óo'sepa weeró noho niîma. A'ti nukúkãkɨ̃hɨ wiôgɨ Õ'âkɨ̃hɨ ĩ'yóropɨ sĩ'óo' nu'kuma.

⁵ Ãpêrã naâre mehêkã weé sĩ'rikã, naâ ɨsêropɨ pekâ me'e ɨ̃hɨ̂ wihasama. Naâre ĩ'yâ tu'tirãre ɨ̃hâ kõ'a pe'okã'sama. Tohô weérã niî pe'tirã naâre mehêkã weé sĩ'rirã noho wẽrîsama.

⁶ Naâ Õ'âkɨ̃hɨ yeekãhase wererí kurare akôro pehâtikã wee masísama. Tohô niikã́ akoré diî weeró noho dohokã́ wee masísama. Apêyere, masaré no'ó niisé noho yã'âro wa'akã́ wee masísama. No'ó naâ weé sĩ'riro wee masísama.

⁷ Naâ, naâre werê duti'kere werê tu'a ehaka be'ro ĩ'yâ bahu dutí dihari peekɨ̃hɨ yã'agɨ́ naâ me'ra a'me kẽégɨsami. Naâre dokâ ke'akã weé, wẽhé kõ'agɨsami.

⁸ Naâ pɨárã yee ɨpɨre masá naâ siharópɨ pahirí makahopɨ kũûrãsama. Tii makáho Jesu Cristore naâ wẽhéka maka niî'. Tii makákãharã yã'arã́ niî tĩharã, Sodomakãharã, Egitokãharã weeró noho niîma.

⁹ I'tiá nɨmɨ ape nɨmɨ́ deko niî pe'tise makarikãharã, niî pe'tise kurarikãharã naa yeé ɨpɨre ĩ'yârãsama. Tohô niikã́ niî pe'tirã mehêkãri di'akɨ̃ uúkũrã, niî pe'tise di'takãharã naa yeé ɨpɨre ĩ'yârãsama. Teeré yaa dutísome.

¹⁰ Naâ Õ'âkɨ̃hɨ yeere wererã́ pi'e kɨóro masaré tɨ'ó yã'akã weékãrã niîwã. Tohô weérã a'ti nukúkãpɨ niirã́ naâ wẽrî'kere ĩ'yârã, e'katírãsama. Naâ ɨpɨ́tɨ e'katírã, a'mêri apêye noho o'ôrãsama.

¹¹ I'tiá nɨmɨ ape nɨmɨ́ deko be'ro Õ'âkɨ̃hɨ naâre masowĩ́ taha. Naâ wã'kâ nɨ'kakã ĩ'yârã, masá ɨpɨ́tɨ ɨkɨáwã.

¹² Ni'kɨ́ ɨ'mɨ̂sepɨ niigɨ́ naâre tutuaró me'ra a'tîro niîwĩ: —Mɨhátia. Kɨ̃ɨ̂ tohô niikã́ tɨ'órã, naâ o'me kurá me'ra mɨhâawã. Naâ mɨhâakã, naâre ĩ'yâ tu'ti'kãrã ĩ'yâwã.

¹³ Naâ mɨhâari kura di'tâ pũûro nara sãáwɨ. Tii makápɨre pehé wi'seri bɨrɨ̂ dihawɨ. Pãharã́ sete mil masá wẽrîwã. Ãpêrã dɨ'sá'kãrã ɨpɨ́tɨ uîrã, “Õ'âkɨ̃hɨ ɨ'mɨ̂sepɨ niigɨ́ tutuâ yɨ'rɨ nɨ'kami”, niîwã.

¹⁴ Pɨáti yã'âro wa'â toha'. Maatá apêro wa'â bakeo'rosa' taha. Õ'âkɨ̃hɨre werê ko'tegɨ kɨ̃ɨ̂ putí tɨo'ke niî'

¹⁵ Õ'âkɨ̃hɨre werê ko'tegɨ niî tɨogɨ putiwĩ́. Ɨ'mɨ̂sepɨ niirã́ tutuaró me'ra naâ uúkũkã tɨ'owɨ́. A'tîro niîwã:

Ni'kâroakãre Õ'âkɨ̃hɨ marî wiôgɨ niî pe'tirã a'ti nukúkãkãharã wiôgɨ sãhamí. Kɨ̃ɨ̂ besé'kɨ Cristo tohôta sãhamí. Kɨ̃ɨ̂ dutî nu'kugɨsami, niîwã.

¹⁶ Tohô wa'asére ĩ'yârã, sõ'ó niîkãrã vinte e quatro wiôrã bɨkɨrã́ a'tîro weewã́. Naâ wiôrã duhisé kumuri Õ'âkɨ̃hɨ diakɨ̃hɨ duhirã́ kɨ̃ɨ̂ tiro ehâ ke'awã. Kɨ̃ɨ̂re ẽho peórã, naâ dɨpopáre paâ mu'ri ke'awã.

¹⁷ A'tîro niîwã:

Õ'âkɨ̃hɨ, ɨ̃sâ wiôgɨ tutuâ yɨ'rɨ nɨ'kagɨ, mɨ'ɨ̂re “Ãyú'” niî'. Mɨ'ɨ̂ neê warokɨ̃hɨ, be'rokɨ̃hɨ́, a'tóka tero kẽ'rare niî nu'kugɨ niî'. Mɨ'ɨ̂ tutuasé me'ra ni'kâroakã wiôgɨ sãhá nɨ'ka'. Niî pe'tirãre dutî nɨ'ka'. Tohô weérã mɨ'ɨ̂re “Ãyú'” niî'.

¹⁸ Niî pe'tirã a'ti nukúkãkãharã mɨ'ɨ̂re ɨatírã uâmiwã. Mɨ'ɨ̂ naâre bu'îri da'rerí nɨmɨ ehâ'. Tohô niikã́ wẽrî'kãrã kẽ'rare bu'îri da'rerí kura niî'. Ni'kâroakãre niî pe'tirã mɨ'ɨ yarã́re wapa yeégɨsa'. Mɨ'ɨ yeékãhasere werê turiarãre wapa yeégɨsa'. Wio pesáse me'ra mɨ'ɨ̂re ẽho peórã wiôrãre, mehô niirã́re wapa yeégɨsa'. A'ti nukúkãkãharãre dohórẽ'rã kẽ'rare kõ'arí nɨmɨ niî', niîwã.

¹⁹ Naâ tohô niîka be'ro Õ'âkɨ̃hɨ wi'i ɨ'mɨ̂sepɨ niirí wi'i sopé pãrîwɨ. Tií wi'i po'peapɨre ni'kâ akaro niîwɨ. Tii akáro Õ'âkɨ̃hɨ “A'tîro weegɨ́ti masá me'ra” niî, kɨ̃ɨ̂ ohâka pĩhire kɨorí akaro niîwɨ. Tohô wa'âka be'ro bɨpô ya'bakã́ ĩ'yâwɨ. Bɨpô paasére, tohô niikã́ mehêkã bɨsɨsére tɨ'owɨ́. Di'tâ pũûro nara sãáwɨ. Akó yɨsɨáse bɨtisé peeri bɨrɨ̂wɨ.

12

¹ Be'ró ɨ'mɨáropɨ mehêkã bahusé paka bahuákã ĩ'yâwɨ. Ni'kó numiôre ĩ'yâwɨ. Koô muhîpũ ɨmɨ̂kohokɨ̃hɨpɨ omá bi'a'karo weeró noho asistéwõ. Muhîpũ yamîkɨ̃hɨ bu'ipɨ nu'kuwṍ. Koô dɨpôapɨre ni'kâ be'to pesawṍ. Tií be'to doze yõkoá kɨowɨ́.

² Koô nihî pako niîwõ. Koô wɨaátoho dɨporoakã pũrî no'ogo ɨpɨ́tɨ karíkũwõ.

³ Be'ró ɨ'mɨáropɨ mehêkã bahusé ĩ'yâwɨ taha. Ni'kɨ́ pĩrô weeró noho bahugɨ́ sõ'agɨ́hore ĩ'yâwɨ. Kɨ̃ɨ̂ sete dɨpopá kɨowĩ́. Pɨámukãse kapé sa'aritigɨ niîwĩ. Dɨpopá nɨkɨ pesasé be'tori pesâwĩ.

⁴ Kɨ̃ɨ̂ pĩkôro me'ra dekô boo kure ɨ'mɨ̂sepɨ niirã́ yõkoáre paâste dihowĩ. Kɨ̃ɨ̂ numiô põ'ratíkã, maatá ba'âgɨti niîgɨ, koô tiro nu'kuwĩ́.

⁵ Koô ni'kɨ́ wi'magɨ́ wɨâwõ. Kɨ̃ɨ́ta niî pe'tirokãharã wiôgɨ niiákɨhɨ niîwĩ. Tutuaró me'ra masaré naâre dutiákɨhɨ niîwĩ. Kɨ̃ɨ̂ bahuáka be'ro maatá Õ'âkɨ̃hɨ tiro kɨ̃ɨ̂ wiôgɨ duhirí kumuropɨ miáa no'owĩ.

⁶ Numiô pe'e masá marirópɨ Õ'âkɨ̃hɨ apó'karopɨ du'tiwṍ. Toopɨ́ koôre pehé mil duzentos sessenta nɨmɨri ba'asé ekawã́.

⁷ Be'ró ɨ'mɨáropɨ a'me kẽése wa'âwɨ. Õ'âkɨ̃hɨre werê ko'tegɨ Miguel wamêtigɨ ãpêrã kɨ̃ɨ yarã́ Õ'âkɨ̃hɨre werê ko'terã me'ra pĩrohó tohô niikã́ pĩrô me'rakãharã me'ra a'me kẽéwĩ.

⁸ Pĩrô põo tẽóti, dokâ ke'akã weé no'owĩ. Kɨ̃ɨ̂re tohô wa'âka be'ro kɨ̃ɨ yarã́ me'ra ɨ'mɨ̂sepɨre naâ niiró bokatíwã.

⁹ Õ'âkɨ̃hɨ pĩrôre kõ'âkã'wĩ. Kɨ̃ɨ́ta neê warokɨ̃hɨ pĩrô niî no'o'kɨ niîmi. Kɨ̃ɨ̂ wãtiâ wiôgɨ niîmi. Niî pe'tirãre a'ti nukúkãkãharãre mehêkã ẽho peókã weegɨ́ niîmi. Õ'âkɨ̃hɨ kɨ̃ɨ̂re, kɨ̃ɨ yarã́ me'ra nukûkãpɨ kõ'â dihowĩ.

¹⁰ Tohô wa'âka be'ro ni'kɨ́ ɨ'mɨ̂sepɨ niigɨ́ tutuaró me'ra uúkũ dihokã tɨ'owɨ́. A'tîro niîwĩ:

Marîre yɨ'rɨóse niî toha'. Õ'âkɨ̃hɨ tutuasére, kɨ̃ɨ̂ marî wiôgɨ niisé niî toha'. Kɨ̃ɨ̂ besé'kɨ Jesu Cristo tutuasé me'ra kɨ̃ɨ̂ wiôgɨ niisé kẽ'ra niî toha'. Õ'âkɨ̃hɨ wãtîre ɨ'mɨ̂sepɨ niî'kɨre a'ti nukúkãpɨ kõ'â dihowĩ. Wãtî ɨmɨ̂kohori nɨkɨ, yamîri nɨkɨ a'tîro weewĩ́. Õ'âkɨ̃hɨpɨre werê sãagɨ, marî akawerérã Õ'âkɨ̃hɨ yarãre “Yã'âro tohô weemá”, niî nu'kuwĩ.

¹¹ Õ'âkɨ̃hɨ yarã marî akawerérã wãtîre dokâ ke'akã weewã́. Naâ Õ'âkɨ̃hɨ makɨ ovelha wi'magɨ́ weeró noho bahugɨ́ wẽrisé me'ra, kɨ̃ɨ yeé diî a'mâ bɨrose me'ra tohô weewã́. Naâ katirí ɨmɨ̂kohore ma'itírã, Õ'âkɨ̃hɨ yee kitire weresé me'ra kɨ̃ɨ̂re tohô weewã́. Ãpêrã naâre wẽhé sĩ'rikã, naâ werê du'utiwã. Wẽrisére uîtiwã.

¹² Wãtîre kõ'asé bu'iri Õ'âkɨ̃hɨre werê ko'terã, niî pe'tirã ɨ'mɨ̂sepɨ niirã́, e'katíya. Nukûkãpɨ, diâ pahirí maakãharã maa yã'â butia'. Wãtî mɨsâ tiropɨ uâ dihami. Kã'roákã yɨ'ɨ̂re dɨ'sá' bu'îri da'reátoho niîgɨ, tohô weemí, niîwĩ.

¹³ Pĩrohó nukûkãpɨ kõ'akã́ ĩ'yâgɨ, wi'magɨ́ wɨâ'kore nɨrɨwĩ́.

¹⁴ Õ'âkɨ̃hɨ pe'e koôre aâ pakɨ wɨɨsé pakare o'ôwĩ. Teé me'ra koô pĩrohóre du'tígo, wɨɨ́ wã'kawõ. Koô masá marirópɨ du'tiwṍ. Toopɨ́ Õ'âkɨ̃hɨ i'tiá kɨ'ma apé kɨ'ma deko koôre ba'asé ekawĩ́.

¹⁵ Be'ró pĩrô diahó dohó, koôre mii bɨrɨáto niîgɨ kɨ̃ɨ̂ ɨsêropɨ akoré e'o kũúwĩ. Koô numiôre a'mâ bɨro dutigɨ tohô weewĩ́.

¹⁶ Kɨ̃ɨ̂ tohô weekã́, di'tâ koôre wee tamúwɨ. Pĩrô kɨ̃ɨ̂ e'o kũúse diahó dohosére si'bî sãhakã weewɨ́.

¹⁷ Tohô wa'akã́ ĩ'yâgɨ, pĩrô numiô me'ra uâ yɨ'rɨa wa'âwĩ. Be'ró koô paramérã niî turiarã me'ra a'me kẽégɨ wa'âwĩ. Naâ Õ'âkɨ̃hɨ dutî'kere weerã́ Jesu Cristo yee bu'esére ẽho peó nu'kurã niîma.

¹⁸ Pĩrohó pahirí maa sumútohopɨ ehâ nɨ'kawĩ.

13

¹ Diâ pahirí maa sumútohopɨre ni'kɨ́ mehêkã bahugɨ́ wã'kâ pa'awĩ taha. Kɨ̃ɨ́ kẽ'ra sete dɨpopá kɨowĩ́. Apêyere pɨámukãse kapé sa'aritiwĩ. Kɨ̃ɨ̂ kapé sa'ari nɨkɨ pesasé be'torire kɨowĩ́. Kɨ̃ɨ̂ dɨpopápɨre Õ'âkɨ̃hɨ yabisé wameré ohâ õ'o no'owɨ.

² Kɨ̃ɨ̂ yaî weeró noho do'rôwĩ. Kɨ̃ɨ̂ bɨkô weeró noho dɨ'pôkãtigɨ niîwĩ. Kɨ̃ɨ̂ pahigɨ́ yaî weeró noho ɨsêrotiwĩ. Pĩrô kɨ̃ɨ̂re kɨ̃ɨ̂ tutuasére o'ôwĩ. Kɨ̃ɨ̂re yã'arã́ wiôgɨ duhirí kumuropɨ dɨpowĩ́. “Masá mɨ'ɨ̂ dutisére yɨ'tiáto”, niîwĩ.

³ Ni'kâ dɨpoapɨre yã'arí kamiroho wã'yáro weeró noho bahuwɨ́. Yatîka kamiro weeró noho niîwɨ. Tii kamírore ĩ'yârã, a'ti nukúkãkãharã wẽrî masá'kɨre weeró noho kɨ̃ɨ̂re ĩ'yâwã. Ɨpɨ́tɨ ĩ'yâ maria, kɨ̃ɨ̂re siru tuúwã.

⁴ Masá pĩrô kẽ'rare ẽho peówã. Kɨ̃ɨ̂ mehêkã bahugɨ́re masaré dutî masisere o'osé bu'iri tohô weewã́. Mehêkã bahugɨ́re ẽho peórã, a'tîro niîwã: —Neê ã'rí weeró noho tutuâ yɨ'rɨgɨ marimí. Neê ni'kɨ́ kɨ̃ɨ̂ me'ra a'me kẽé masitisami, niî ẽho peówã.

⁵ Pĩrohó mehêkã bahugɨ́re a'tîro uúkũkã weewĩ́: “Yɨ'ɨ̂ niî pe'tirã yɨ'rɨóro niî'”, niî uúkũkã weewĩ́. Tohô niikã́ Õ'âkɨ̃hɨ yabisére uúkũwĩ. Pĩrô kɨ̃ɨ̂re “Quarenta e dois muhîpũri masaré dutîgɨ wa'âya”, niîwĩ.

⁶ Kɨ̃ɨ̂ dutî'karo nohota weewĩ́. Õ'âkɨ̃hɨre yã'âro uúkũ, kɨ̃ɨ̂ wameré, kɨ̃ɨ̂ niiró ɨ'mɨ̂sepɨre yã'âro uúkũwĩ. Tohô niikã́ ɨ'mɨ̂sepɨ niirã́ kẽ'rare yã'âro uúkũwĩ.

⁷ Apêye kẽ'rare pĩrô Õ'âkɨ̃hɨ yarã nukûkãpɨ niirã́ me'ra kɨ̃ɨ̂re a'me kẽé dutigɨ o'ôo'wĩ. Naâ me'ra a'me kẽé dokâ ke'akã weewĩ́. Kɨ̃ɨ̂re niî pe'tise kurarikãharãre, niî pe'tise di'takãharãre, niî pe'tise makarikãharãre, mehêkã uúkũrãre dutî masisere o'ôwĩ.

⁸ Niî pe'tirã a'ti nukúkãkãharã mehêkã bahugɨ́re ẽho peówã. Naâ, naâ wameré Õ'âkɨ̃hɨ makɨ ovelha wi'magɨ́ weeró noho bahugɨ́ wẽhé no'o'kɨ yaa pũripɨre ohâ õ'o no'oya maríkãrã niîwã. Tii pũrí a'tí di'ta weé nɨ'kari kura katisé kɨorã́re ohâ õ'o no'oka pũri niîkaro niîwɨ.

⁹ O'mê peeri kɨorã́ a'teré tɨ'oyá.

¹⁰ “Bu'îri da'rerí wi'ipɨ sõróo no'orãsama” niî no'o'kãrã tohôta sãháarãsama bu'îri da'rerí wi'ipɨ. “Di'pĩhihó me'ra wẽhé no'orãsama” niî no'o'kãrã tii pĩhí me'rata wẽhé no'orãsama. Tohô wa'arí kurare Õ'âkɨ̃hɨ yarã wãkû tutuaya. Õ'âkɨ̃hɨre ẽho peóya.

¹¹ Be'ró ãpí mehêkã bahugɨ́re ĩ'yâwɨ taha. Kɨ̃ɨ̂ di'tâ po'peapɨ niî'kɨ mɨhátiwĩ. Kɨ̃ɨ̂ ovelha wi'magɨ́ weeró noho pɨá sa'aro kapé sa'aritiwĩ. Kɨ̃ɨ̂ uúkũse pũrikã pĩrohó weeró noho bɨsɨ̂wɨ.

¹² Kɨ̃ɨ̂ mehêkã bahugɨ́ yaî weeró noho bahugɨ́ dutisére kɨowĩ́. Kɨ̃ɨ̂ yaî weeró noho bahugɨ́ kamîroho yatî no'o'kɨre a'tîro wee basáwĩ. Niî pe'tirã a'ti nukúkãkãharãre kɨ̃ɨ̂re ẽho peókã weewĩ́.

¹³ Be'ró kɨ̃ɨ̂ basi pe'e mehêkã bahusé paka weé ĩ'yowĩ. Masá ĩ'yóropɨ pekâ me'e ɨ'mɨáropɨ niî'kere di'tâpɨ dihátikã weewĩ́.

¹⁴ Kɨ̃ɨ̂re tutuasé o'ô'ke me'ra yaî weeró noho bahugɨ́re mehêkã bahusé paka weé ĩ'yowĩ. Masaré yaî weeró noho bahugɨ́re ẽho peó dutigɨ tohô weewĩ́. Naâre yaî weeró noho bahugɨ́re yeê dutiwĩ. Kɨ̃ɨ̂ yaî weeró noho bahugɨ́ta di'pĩhí me'ra kamî da're no'o'kɨ niîmigɨ, katîwĩ.

¹⁵ Ovelha kapé sa'ari weeró noho kɨogɨ́ a'tîro wee masísere kɨowĩ́. Yaî weeró noho bahugɨ́ yeê'kere katikã́ wee masísere kɨowĩ́. Teé me'ra kɨ̃ɨ̂ yeê'kere uúkũ dutiwĩ. Tohô niikã́ teé yeê'kere ẽho peótirãre wẽhe dutígɨ tohô weewĩ́.

¹⁶ Apêye maa niî pe'tirãre a'tîro wee dutíwĩ. Naâ diâpoapɨre ou naa yaá diakɨ̃hɨ́kãha amukãpɨre apêye noho ohâ õ'o dutiwĩ. Mehô niirã́re, wiôrãre, pehé kɨorã́re, pahasé kɨorãre, ãpêrãre da'rá ko'terãre, da'rá ko'tetirãre tohô wee dutíwĩ.

¹⁷ Tohô ohâ õ'o no'oya marirã́ neê duu dutíti, neê duâ dutiti no'owã. Tohô niikã́ kɨ̃ɨ̂ wameré ohâ õ'o no'oya marirã́ ou kɨ̃ɨ̂ wamé weeró noho bahusére moorã́ kẽ'ra meharóta neê duu dutíti, neê duâ dutiti no'owã.

¹⁸ A'teré tɨ'o masíro ɨá'. No'ó tɨ'o masígɨ nohore yaî weeró noho bahugɨ́ wamere masîta basió'. Kɨ̃ɨ̂ kɨorí wame masa wamé niî'. Kɨ̃ɨ̂ wamé seiscentos sessenta e seis niî'.

14

¹ Be'ró yɨ'ɨ̂ Õ'âkɨ̃hɨ makɨ ovelha wi'magɨ́ weeró noho bahugɨ́re ɨ̃rɨgɨ́ Sião wamêtikɨhɨpɨ nu'kukã́ ĩ'yâwɨ. Kɨ̃ɨ̂ me'ra pãharã́ cento quarenta e quatro mil masa niîwã. Naâ Õ'âkɨ̃hɨ makɨ ovelha wi'magɨ́ weeró noho bahugɨ́ wamere, kɨ̃ɨ̂ pakɨ wamére naâ diâpoapɨ ohâ õ'o no'o'kãrã niîwã.

² Be'ró ɨ'mɨ̂sepɨ ɨpɨ́tɨ bɨsɨ̂ dihatikã tɨ'owɨ́. Pehe maári po'ê yaha a'mâ bɨrose weeró noho bɨsɨ̂ dihatiwɨ. Bɨpô pũûro paâro weeró noho bɨsɨ̂wɨ. Pãharã́ bɨâ pɨ̃tesere bɨâ pɨ̃tero weeró noho bɨsɨ̂wɨ.

³ Naâ cento quarenta e quatro mil masa wiôgɨ duhirí kumuro pɨ'topɨ niîwã. Naâ sõ'ó niîkãrã ba'pâritirã katisé kɨorã́ weeró noho bahurã́ ĩ'yóropɨ, tohô niikã́ wiôrã bɨkɨrã́ ĩ'yóropɨ basâwã. Apêye ma'má basasére basâ peowã. Naâ di'akɨ̃ teeré basâ masiwã. Ãpêrã naâ basasére neê basâ masitiwã. Naâ a'ti nukúkãkãharã wa'teropɨ niirã́ Õ'âkɨ̃hɨ yɨ'rɨó no'okãrã niîwã.

⁴ Naâ neê ni'kâti numiâ me'ra yã'âro weetíkãrã niîwã. Naâ Õ'âkɨ̃hɨ makɨ ovelha wi'magɨ́ weeró noho bahugɨ́re no'ó kɨ̃ɨ̂ wa'aró siru tuúwã. Naâ a'ti nukúkãkãharã wa'teropɨre yɨ'rɨó no'o'kãrã niîwã. Naâ Õ'âkɨ̃hɨre, Õ'âkɨ̃hɨ makɨ ovelha wi'magɨ́ weeró noho bahugɨ́re ẽho peó o'ô mɨ'ta'kãrã niîkãrã niîwã.

⁵ Naâ wa'terore niî soogɨ mariwĩ́. Õ'âkɨ̃hɨ ĩ'yóropɨre bu'îri marirã́ niîwã. I'tiárã Õ'âkɨ̃hɨre werê ko'terã naâ werê'ke niî'

⁶ Be'ró ãpí Õ'âkɨ̃hɨre werê ko'tegɨ ɨ'mɨáropɨ wɨɨkã́ ĩ'yâwɨ. Kɨ̃ɨ̂ niî pe'tirã a'ti nukúkãkãharãre pe'titíse kiti, Õ'âkɨ̃hɨ masaré yɨ'rɨómi niisé kitire weregɨ́ niîwĩ. Niî pe'tise di'takãharãre, niî pe'tise kurarikãharãre weregɨ́ niîwĩ. Tohô niikã́ mehêkã uúkũrãre, niî pe'tise makarikãharãre tee kitíre weregɨ́ niîwĩ.

⁷ Kɨ̃ɨ̂ tutuaró me'ra a'tîro niîwĩ: —Õ'âkɨ̃hɨre wio pesáse me'ra ẽho peóya. “Kɨ̃ɨ̂ ãyú butia'gɨ niîmi”, niîya. Kɨ̃ɨ̂ bu'îri da'rerí kura ehâ toha'. Kɨ̃ɨ̂ ɨ'mɨ̂sere, a'tí di'tare weékɨ niîwĩ. Diâ pahirí maa, niî pe'tise no'ó akó niisé maariakãre weékɨ niîwĩ. Kɨ̃ɨ̂re ẽho peóya, niîwĩ.

⁸ Kɨ̃ɨ̂ be'ro ãpí Õ'âkɨ̃hɨre werê ko'tegɨ a'tîwĩ. A'tîro niîwĩ: —Babilônia wamêtiri maka pe'tí wã'karo weé'. Pe'tiá toha'. Naâ yã'âro ɨâri peha yɨ'rɨ nɨ'karã, ke'á maatihírã weeró noho niî pe'tise di'takãharãre dohórẽ'wã. Naâre ĩ'yâ kũu, ãpêrã kẽ'ra naâ weeró noho yã'âro weewã́, niîwĩ.

¹⁰

⁹ Pɨárã Õ'âkɨ̃hɨre werê ko'terã be'ro ãpí bahuáwĩ. Tutuaró me'ra a'tîro niîwĩ: —Yaî weeró noho bahugɨ́re, kɨ̃ɨ̂ yeê'kere ẽho peógɨ nohore Õ'âkɨ̃hɨ ɨpɨ́tɨ bu'îri da'rêgɨsami. Tohô niikã́ kɨ̃ɨ yaá diâpoapɨ ou kɨ̃ɨ yaá amûkãpɨ yaî weeró noho bahugɨ́ wameré ohâ õ'o no'o'kɨ nohore meharóta bu'îri da'rêgɨsami. Õ'âkɨ̃hɨ kɨ̃ɨ̂ me'ra pũûro uâgɨ, tohô weegɨ́sami. Tutuaró me'ra dɨoró mariró bu'îri da'rêgɨsami. Pekâ me'epɨ opê weeró noho bahusé sipisé me'ra ɨpɨ́tɨ pi'etíkã weegɨ́sami. Õ'âkɨ̃hɨre werê ko'terã ĩ'yóropɨ, tohô niikã́ Õ'âkɨ̃hɨ makɨ ovelha wi'magɨ́ weeró noho bahugɨ́ ĩ'yóropɨ tohô weegɨ́sami.

¹¹ Naâre ɨ̃hâ kõ'ase o'mé tohô o'mé pu'su nu'kurósa'. Neê pe'tisomé. Yaî weeró noho bahugɨ́re, kɨ̃ɨ̂ yeê'kere ẽho peórã noho ou kɨ̃ɨ̂ wameré ohâ õ'o no'orã noho pi'etí nu'kurãsama. Ɨmɨ̂koho, yamî neê soosomé, niîwĩ.

¹² Tohô weérã Õ'âkɨ̃hɨ yarã, kɨ̃ɨ̂ dutisére weérã, yã'âro wa'asére wãkû tutuaya. Jesu Cristore ẽho peó nu'kurã, tohôta weeyá.

¹³ Be'ró ni'kɨ́ ɨ'mɨ̂sepɨ niigɨ́ uúkũkã tɨ'owɨ́. Yɨ'ɨ̂re niîwĩ: —A'tîro ohâya: “Ni'kakã́ me'ra marî wiôgɨre ẽho peórã wẽrirã́ e'katírãsama.” Espírito Santo kẽ'ra “Tohôta niî'”, niîwĩ. “Naâ katîrã Õ'âkɨ̃hɨ yeere werêrã, pi'etíwã. Naâ wẽrîka be'ro Õ'âkɨ̃hɨ naâ ãyuró weé'kere wapa yeégɨsami. Tohô weérã naâ a'ti nukúkãpɨ pi'etísere du'ú, ãyuró soorã́sama”, niîwĩ Espírito Santo. A'tí di'takãhase otesékãhase niî'

¹⁴ Be'ró yɨ'ɨ̂ o'mé butirí kurare ĩ'yâwɨ. Tii kurá bu'i ni'kɨ́ masɨ́ weeró noho ɨpɨtígɨ duhîwĩ. Kɨ̃ɨ̂ dɨpôapɨ ni'kâ be'to ouro me'ra weéka be'tore pesâwĩ. Di'pĩhí kawero ɨse yohári pĩhihore kɨowĩ́.

¹⁵ Ãpí Õ'âkɨ̃hɨre werê ko'tegɨ Õ'âkɨ̃hɨ wi'ipɨ niî'kɨ wihátiwĩ. Kɨ̃ɨ̂ o'me kurápɨ duhigɨ́re tutuaró me'ra karíkũwĩ: —Mɨ'ɨ yaá pĩhi me'ra otesére tãra miíya. A'tí di'takãhase otesé dɨka miirí kura noho niî toha'. Teé bopoásepɨ niî', niîwĩ.

¹⁶ Kɨ̃ɨ̂ tohô niikã́ tɨ'ógɨ, o'me kurápɨ duhigɨ́ kɨ̃ɨ yaá pĩhi me'ra a'ti nukúkãkãhase otesére tãra miíwĩ. Tee dɨkáre miîwĩ.

¹⁷ Be'ró ãpí Õ'âkɨ̃hɨre werê ko'tegɨ ɨ'mɨ̂sepɨ niirí wi'i Õ'âkɨ̃hɨ wi'ipɨ niî'kɨ wihátiwĩ. Kɨ̃ɨ́ kẽ'ra di'pĩhí kawero ɨse yohári pĩhihore kɨowĩ́.

¹⁸ Be'ró ãpí Õ'âkɨ̃hɨre wa'îkɨ̃rã ɨ̃hâ moro peo wɨaro pɨ'tokɨ̃hɨ wihátiwĩ. Kɨ̃ɨ̂ pekâ me'ere dutî masisere kɨowĩ́. Tií me'e wiôgɨ niîwĩ. Kɨ̃ɨ̂ ãpí di'pĩhí ɨse yohári pĩhire kɨogɨ́re tutuaró me'ra niîwĩ: —Mɨ'ɨ yaá pĩhi ɨse yohári pĩhi me'ra a'ti nukúkãkãhase ɨ'sê tõ'orire dɨtê miiya. Teé yĩá toha'.

¹⁹ Kɨ̃ɨ̂ tohô niikã́ tɨ'ógɨ, kɨ̃ɨ yaá pĩhi me'ra a'ti nukúkãkãhase ɨ'sêre dɨtêwĩ. Teeré miî, pahirí tũkuhopɨ ɨ'sê koo naâ bipeátohopɨ kũûwĩ. Teé bipe sãáse Õ'âkɨ̃hɨ yã'arã́re ɨpɨ́tɨ bu'îri da'resé niî', niî sĩ'riro weé'.

²⁰ Teé ɨ'sêre makâ sumútohopɨ bipêwã. Naâ biperí kurare diî pahiró naâ ɨ'sê biperí wi'ipɨre wihawɨ́. Teé diî ni'kâ maa pahirí maaho wa'âwɨ. Cavaloa wamɨ̂taha dekopɨ dii pakáre mirî tɨowã. Trezentos quilômetros yoarí maa niîwɨ.

15

¹ Be'ró mehêkã bahusé ĩ'yâ mariase pakare ɨ'mɨ̂sepɨ ĩ'yâwɨ. Õ'âkɨ̃hɨre werê ko'terã setere ĩ'yâwɨ. Naâ nɨkɨta taha a'ti nukúkãkãharãre bu'îri da'rê tɨoatehere kɨowã́. Teé bu'îri da'rê tɨose me'ra Õ'âkɨ̃hɨ uasé pe'tirósa'.

² Apêye kẽ'rare diâ pahirí maare ĩ'yâwɨ. Tii maá akostíri maa pekâ me'e me'ra moréka maa weeró noho bahuwɨ́. Tii maá sumútohopɨre pãharã́ masá nu'kuwã́. Naâ yaî weeró noho bahugɨ́re, tohô niikã́ kɨ̃ɨ̂ yeê'kere ẽho peóti'kãrã niîwã. Tohô niikã́ kɨ̃ɨ̂ wameré ohâ õ'o no'oya marí'kãrã niîwã. Naâ Õ'âkɨ̃hɨ o'ô'ke bɨâ pɨ̃tesere kɨowã́.

³ Naâ Õ'âkɨ̃hɨre da'rá ko'tegɨ Moisé yee basasére basâ peowã. Õ'âkɨ̃hɨ makɨ ovelha wi'magɨ́ weeró noho bahugɨ́ yee basasé kẽ'rare basâ peowã. A'tîro niîwã:

Õ'âkɨ̃hɨ ɨ̃sâ wiôgɨ, mɨ'ɨ̂ tutuâ yɨ'rɨgɨ niî'. Niî pe'tise mɨ'ɨ̂ weé'ke ãyú butia'se paka niî'. Teeré ĩ'yârã, ɨ̃sâ ĩ'yâ maria wa'â'. Mɨ'ɨ̂ niî pe'tise makarikãharã wiôgɨ niî'. Mɨ'ɨ̂ weesétise keoró niî'. Mɨ'ɨ̂re neê niî soose marí'.

⁴ Niî pe'tirã mɨ'ɨ̂re wio pesáse me'ra ĩ'yârãsama. Niî pe'tirã mɨ'ɨ̂re “Ãyú yɨ'rɨgɨ, tutuâ yɨ'rɨgɨ niî'” niîrãsama. Mɨ'ɨ̂ ni'kɨtá yã'asé moogɨ́ niî'. Niî pe'tise makarikãharã mɨ'ɨ̂re ẽho peórãsama. Mɨ'ɨ̂ keoró weé'kere ĩ'yârã, naâ tohô weerã́sama, niî basâwã.

⁵ Be'ró Õ'âkɨ̃hɨ wi'i, ɨ'mɨ̂sepɨ niirí wi'ire sopé pãrikã́ ĩ'yâwɨ. Tií wi'i po'peapɨ Õ'âkɨ̃hɨ Niî butia'ri Tũkure ĩ'yâwɨ. Tii tũkú po'peapɨ Õ'âkɨ̃hɨ dutisé ohâka pĩhire nɨrô no'owɨ.

⁶ Tii tũkúpɨ niî'kãrã sete Õ'âkɨ̃hɨre werê ko'terã, bu'îri da'rê tɨoatehere kɨorã́ miî, wihátiwã. Naâ butisé ũ'îri marisé su'tí ɨpɨ́tɨ asistésere sãyâwã. Naâ kutîropɨre naâ nɨkɨ ouro me'ra weé'ke daarire kɨowã́.

⁷ Be'ró ni'kɨ́ katisé kɨorã́ me'rakɨ̃hɨ a'tîro weewĩ́. Kɨ̃ɨ̂ Õ'âkɨ̃hɨre werê ko'terã setere naâ nɨkɨ bapâri o'ôwĩ. Teé ouro me'ra weé'ke paari niîwɨ. Tee paári Õ'âkɨ̃hɨ kɨ̃ɨ̂ bu'îri da'reátehere posetíwɨ. Õ'âkɨ̃hɨ katî nu'kugɨ a'ti nukúkãkãharãre ɨpɨ́tɨ bu'îri da'rêgɨsami.

⁸ Tee paári naâre o'ôka be'ro Õ'âkɨ̃hɨ Niî butia'ri Tũkupɨre a'tîro wa'âwɨ. Tii tũkúpɨre Õ'âkɨ̃hɨ ãyú yɨ'rɨase, kɨ̃ɨ̂ tutuâ yɨ'rɨase o'mé pu'su se'sa wa'âwɨ. Pũûro asistéwɨ. Neê ni'kɨ́ tii tũkúpɨre sãháata basiótiwɨ. Be'ró sete Õ'âkɨ̃hɨre werê ko'terã naâ bu'îri da'rêka be'ropɨ sãháata basiówɨ.

16

¹ Be'ró Õ'âkɨ̃hɨ wi'i ɨ'mɨ̂se niirí wi'ipɨ niigɨ́re tutuaró me'ra uúkũkã tɨ'owɨ́. Kɨ̃ɨ̂ sete Õ'âkɨ̃hɨre werê ko'terãre a'tîro niîwĩ: —Mɨsa yeé paarikãhase Õ'âkɨ̃hɨ bu'îri da'reátehere nukûkãpɨ piô dihorã wa'âya, niîwĩ.

² Niî mɨ'tagɨ wa'â, kɨ̃ɨ yaá paare di'tâpɨ piô dihowĩ. Tohô weéka be'ro masá yaî weeró noho bahugɨ́ wamere ohâ õ'o no'o'kãrãre, kɨ̃ɨ̂ weeró noho bahusé yeê'kere ẽho peórãre a'tîro wa'âwɨ. Niî pe'tirã yã'asé kamî musurítise kɨorã́ tohawã́. Pũûro pũrî no'owã.

³ Kɨ̃ɨ̂ be'ro ãpí wa'â, kɨ̃ɨ yaá paare diâ pahirí maahopɨre piô yõowĩ. Tii maá diî maaho dohowɨ́. Wẽrî'kɨ yee dii bɨ'â'ke weeró noho niîwɨ. Niî pe'tirã tii maáhopɨ niirã́ wẽrî pe'tia wa'âwã.

⁴ Pɨárã be'rokɨ̃hɨ kɨ̃ɨ yaá paakãhasere niî pe'tise no'ó akó niisé maariakãpɨre piô yõowĩ. Tohô weekã́, teé kẽ'ra diî maari wa'âwɨ.

⁵ Be'ró Õ'âkɨ̃hɨre werê ko'tegɨ niî pe'tise akó wiôgɨ a'tîro niîwĩ: —Wiôgɨ, mɨ'ɨ̂ yã'asé moogɨ́ niî'. Mɨ'ɨ̂ neê warokɨ̃hɨ, a'tóka tero kẽ'rare niî nu'ku'. Mɨ'ɨ̂ naâre a'tîro bu'îri da'rêgɨ, keoró weégɨ weé'.

⁶ Naâ a'tîro weékãrã niîwã. Mɨ'ɨ yarã́ mɨ'ɨ yeékãhase wererã́re wẽhé kõ'akãrã niîwã. Naa yeé dii a'mâ bɨrokã weékãrã niîwã. Tohô weégɨ mɨ'ɨ̂ naâre akó diî dohó'kere sĩ'ri dutígɨ, keoró weégɨ weé'. Naâre tohôta ɨá', niîwĩ.

⁷ Be'ró ni'kɨ́ Õ'âkɨ̃hɨre wa'îkɨ̃rã ɨ̃hâ moro peo wɨaro tiropɨ uúkũkã tɨ'owɨ́. A'tîro niîwĩ: —Tohôta niî'. Õ'âkɨ̃hɨ ɨ̃sâ wiôgɨ, mɨ'ɨ̂ tutuâ yɨ'rɨa'. Mɨ'ɨ̂ niî sooro mariró keoró bu'îri da'rêgɨ weé', niîwĩ.

⁸ Be'ró, i'tiárã be'rokɨ̃hɨ kɨ̃ɨ yaá paakãhasere muhîpũ ɨmɨ̂kohokɨ̃hɨ bu'ipɨ piô peowĩ. Tohô weéka be'ro muhîpũ ɨpɨ́tɨ asiwĩ́. Teé kɨ̃ɨ̂ asisé me'ra masaré ɨ̃hâ masiwĩ.

⁹ Masá ɨpɨ́tɨ waro ɨ̃hâ no'owã. Tohô ɨ̃hâ no'omirã, neê naâ yã'âro weé'kere bɨhâ weti, naâ wãkusére dɨka yuútiwã. Õ'âkɨ̃hɨre “Ãyugɨ́ niîmi”, neê niîtiwã. Kɨ̃ɨ̂re ãyuró uúkũro noho o'ôrã, kɨ̃ɨ̂re yã'âro uúkũwã. Õ'âkɨ̃hɨ bu'îri da'rêmikã, tohô weewã́.

¹⁰ Be'ró, ba'pâritirã be'rokɨ̃hɨ a'tîro weewĩ́. Kɨ̃ɨ yaá paakãhasere yaî weeró noho bahugɨ́ duhirí kumuropɨre piô dihowĩ. Niî pe'tiro kɨ̃ɨ̂ dutisé niirópɨ na'î tĩ'a wa'âwɨ. Masá pũûro pũrisé tɨ'ó yã'arã, ɨpɨ́tɨ biritú, kũ'rî diowã.

¹¹ Tohô pi'etímirã, naâ yã'âro weesére neê du'utíwã. Du'uró noho o'ôrã, naâ kamî ɨpɨ́tɨ pũrî no'orã, Õ'âkɨ̃hɨ ɨ'mɨ̂sepɨ niigɨ́re yã'â butia'ro uúkũwã.

¹² Be'ró taha ni'kâmukãrã be'rokɨ̃hɨ kɨ̃ɨ yaá paakãhasere pahirí maa Eufrate wamêtiri maahopɨre piô yõowĩ. Tii maá si'bî pe'tia wa'âwɨ. Apêye di'takãharã muhîpũ mɨhátiro pe'e niirã́re naâ wiôrã a'tiátihi ma'are apo yuúro weewɨ́.

¹³ Be'ró, yɨ'ɨ̂ sõ'ó niîkãrãre ĩ'yâwɨ. Pĩrohó weeró noho bahugɨ́re, ãpí yaî weeró noho bahugɨ́re, tohô niikã́ ovelha wi'magɨ́ weeró noho kapé sa'aritigɨ niî soose kiti werê mɨ'tagɨre ĩ'yâwɨ. Naâ i'tiárã yee ɨseripɨ wãtiâ wihawã́. Wãtiâ ta'ârokɨa weeró noho bahurã́ niîwã.

¹⁴ Ã'rá i'tiárã yee ɨseripɨ wihá'kãrã wãtiâ pehé weé ĩ'yosere weewã́. Naâ a'ti nukúkãkãharã wiôrã niî pe'tirãre a'mê wẽhe dutirã neêowã. Naâ a'mê wẽheatihi nɨmɨ Õ'âkɨ̃hɨ tutuâ yɨ'rɨagɨ yaa nɨmɨ waro niîrosa'.

¹⁵ Jesu Cristo a'tîro niîkɨ niîwĩ: —Tɨ'o masíya. Wãkûtiro yahagɨ́ a'tîgɨ weeró noho yɨ'ɨ̂ a'tîgɨti. Su'tí sãyagɨ́ weeró noho yɨ'ɨ̂ a'tiátehere ãyuró wãkû yuugɨ noho e'katígɨsami. Tohô weégɨ su'ti marígɨ kɨ̃ɨ̂re ĩ'yâ weekã, bopôyasome.

¹⁶ Naâ wãtiâ a'ti nukúkãkãharã wiôrãre hebreu yee me'ra Armagedṍ wamêtiropɨ neêowã.

¹⁷ Be'ró, seis be'rokɨ̃hɨ, kɨ̃ɨ yaá paakãhasere ɨ'mɨáropɨ piô dihowĩ. Teé be'ro Õ'âkɨ̃hɨ wi'i ɨ'mɨ̂se niirí wi'i po'peapɨ wiôgɨ duhirí kumuropɨ duhigɨ́ tutuaró me'ra uúkũwĩ. A'tîro niîwĩ: —Niî pe'tise tu'â eha nɨ'ko pe'o no'o'.

¹⁸ Kɨ̃ɨ̂ tohô niikã́, bɨpô ya'bá, ɨpɨ́tɨ paâwĩ. Kɨ̃ɨ̂ paakã́, mehêkã bɨsɨ̂ mɨhawɨ. Di'tâ ɨpɨ́tɨ nara sãáwɨ. Masá a'ti nukúkãpɨ niî nɨ'kaka tero, a'tóka terore di'tâ toô kã'ro neê nara sãá wee'. Ɨpɨ́tɨ waro tiîtare nara sãáwɨ.

¹⁹ Pahirí maka i'tiáro ye'tî, dɨka watí nɨ'kawɨ. A'ti nukúkãkãhase niî pe'tirokãhase makaripɨ se'tê dihawɨ. Õ'âkɨ̃hɨ bu'îri da'rêgɨti niîgɨ, pahirí maka Babilônia wamêtiri makakãharãre wãkûkɨ niîwĩ. Naâ me'ra ɨpɨ́tɨ uâgɨ, naâre bu'îri da'rêwĩ.

²⁰ Tohô wa'akã́, niî pe'tise ɨ̃rɨpagɨ́, opa nɨkɨ́ri bahu dutí dihawɨ.

²¹ Tohô niikã́ masaré yɨsɨáse peeri paka bɨrɨ̂ pehawɨ. Ni'karé peeri quarenta quilos nɨkɨ̂wɨ. Õ'âkɨ̃hɨ tee peéri me'ra naâre ɨpɨ́tɨ bu'îri da'rekã́ ĩ'yârã, yã'â butia'ro kɨ̃ɨ̂re uúkũwã.

17

¹ Be'ró a'tîro ĩ'yâwɨ. Ni'kɨ́ sõ'ó niîkãrã sete Õ'âkɨ̃hɨre werê ko'terã me'rakɨ̃hɨre ĩ'yâwɨ. Kɨ̃ɨ̂ sõ'ó niî'ke paari kɨorã́ me'rakɨ̃hɨ niîwĩ. Yɨ'ɨ̂ tiro a'tîwĩ. A'tîro niîwĩ: —Te'á, yɨ'ɨ̂ mɨ'ɨ̂re ɨmɨá me'ra a'me tãrá wapá ta'agore bu'îri da'resére ĩ'yogɨ́ti. Koô pakasé maari bu'ipɨ duhîmo.

² A'ti nukúkãkãharã wiôrã koô me'ra a'me tãrá baha ke'atikãrã niîwã. Koô a'ti nukúkãkãharãre ɨâri pehase me'ra ke'á maatihírã weeró noho wa'akã́ weéko niîwõ, niîwĩ.

³ Be'ró Espírito Santo yɨ'ɨ̂re kẽ'esé weeró noho ĩ'yowĩ́. Sõ'ó niîkɨ Õ'âkɨ̃hɨre werê ko'tegɨ masá marirópɨ yɨ'ɨ̂re miáawĩ. Toopɨ́ ni'koré ĩ'yâwɨ. Koô mehêkã bahugɨ́ sõ'agɨ́ bu'ipɨ pesâwõ. Mehêkã bahugɨ́re kɨ̃ɨ yaá ɨpɨ niî pe'tiropɨre pehé yã'asé Õ'âkɨ̃hɨ kɨ̃ɨ̂ yabisé wame wã'yawɨ́. Mehêkã bahugɨ́ sete dɨpopá kɨowĩ́. Apêye kẽ'rare, pɨámukãse kapé sa'aritiwĩ.

⁴ Koô numiô sõ'â yĩi boó kurerore, tohô niikã́ sõ'aró warore sãyâwõ. Koo yaá su'tîro ouro, ɨ̃tâ peeri wapa bɨhɨ́se peeriakã me'ra, apêye butisé pérola wamêtise me'ra ma'mâ su'a no'owɨ. Koô ni'kâ paa ouro me'ra weéka paa sa'wɨre kɨowṍ. Niisé nɨkɨ yã'asé tii paápɨre mu'mûwɨ. Koô ɨmɨá me'ra yã'âro a'me tãrá baha ke'ati'ke niîwɨ.

⁵ Tohô niikã́ koô diâpoapɨre mehêkã bahurí wame ohâ õ'o no'okaro niîwɨ. A'tîro niîwɨ: “Babilônia pahirí makaho, niî pe'tirã yã'arã́ numiâ ɨmɨaré a'me tãrá wapá ta'arã numia pako niî'. Tohô niikã́ niî pe'tirã yã'â yɨ'rɨ nɨ'kase weerã́ pako niî'”, niî wã'yawɨ.

⁶ Be'ró a'tîro ĩ'yâwɨ. Koô ke'ágo weewṍ. Õ'âkɨ̃hɨ yarã Jesu Cristo yee kitire wererã́ wẽhé no'o'kãrã yee dii me'ra tohô wa'âwõ. Koôre ĩ'yâgɨ, “De'ró weéro tohô wa'âmitito?” niîwɨ.

⁷ Tohô wa'akã́, Õ'âkɨ̃hɨre werê ko'tegɨ yɨ'ɨ̂re niîwĩ: —De'ró weégɨ mɨ'ɨ̂ toô kã'ro ɨkɨáti? Sikoré ya'yiósere mɨ'ɨ̂re masikã́ weegɨ́ti. Tohô niikã́ mehêkã bahugɨ́ bu'ipɨ pesâ wã'kasere werêgɨti. Kɨ̃ɨ̂ sete dɨpopátigɨ pɨámukãse kapé sa'aritimi.

⁸ A'tîro niî'. Mehêkã bahugɨ́ mɨ'ɨ̂ ĩ'yâ'kɨ dɨporópɨre niîmiwĩ. A'tóka tero marimí. Tohô niîmigɨ, be'ropɨ́ ĩ'yâ bahu dutí dihari peepɨ niî'kɨ mɨhátigɨsami. Kɨ̃ɨ̂ pekâ me'epɨ wa'â dohaatoho dɨporo tohô weegɨ́sami. A'ti nukúkãkãharã yã'arã́ mehêkã bahugɨ́re ĩ'yârã, ɨkɨárãsama. Naâ neê waropɨta a'tí di'ta weé nɨ'kari kura naâ wameré katirí pũripɨ ohâ õ'o no'oya marí'kãrã niî tĩharã, tohô wa'ârãsama. Kɨ̃ɨ̂ dɨporópɨ niî'kɨ a'tîro niikã́re marimí. Be'ropɨ́ a'tîgɨsami.

⁹ No'ó tɨ'o masírã noho a'teré masîta basió'. Kɨ̃ɨ̂ sete dɨpopá a'tîro niî sĩ'riro weé'. Teepá nɨkɨta taha ɨ̃rɨpagɨ́ koô duhisépagɨ niî'.

¹⁰ Tohô niikã́ teepáta taha a'tîro niî sĩ'riro weé'. Sete wiôrã niîma, niîro weé'. Ni'kâmukãrã wiôrã pe'ti dihá tohakãrã niîwã. Ni'kâroakãre ni'kɨ́ masaré dutîgɨ weemí. Ãpí a'tîtimi yuhûpɨ. Kɨ̃ɨ̂ a'tîgɨ, yoâtikã niîgɨsami.

¹¹ Neê waropɨre sõ'agɨ́ mehêkã bahugɨ́ niî'kɨ a'tîro niikã́re marimí. Kɨ̃ɨ́ta ã'rá sete wiôrã be'rokɨ̃hɨ wiôgɨ niiákɨhɨ niîgɨsami. Kɨ̃ɨ̂ naâ me'rakɨ̃hɨ niîmi. Be'ró pekâ me'epɨ wa'â dohagɨsami.

¹² Mehêkã bahugɨ́ kapé sa'ari mɨ'ɨ̂ ĩ'yâ'ke a'tîro niî sĩ'riro weé'. Pɨámukãrã wiôrã niîma, niîro weé'. Naâ dutî nɨ'katima yuhûpɨ. Yoâtikã, ni'kâ horata dutîrãsama. Mehêkã bahugɨ́ sõ'agɨ́ kẽ'ra naâ me'ra dutî tamugɨsami.

¹³ Ã'rá pɨámukãrã wiôrã ni'kâro noho wãkusétirãsama. Naâ mehêkã bahugɨ́re naâ dutisé kɨosére o'ôrãsama.

¹⁴ Naâ Õ'âkɨ̃hɨ makɨ ovelha wi'magɨ́ weeró noho bahugɨ́ me'ra a'mê wẽherãsama. Kɨ̃ɨ̂ naâre dokâ ke'akã weegɨ́sami. Kɨ̃ɨ̂ niî pe'tirã wiôrã bu'ipɨ niîmi. Tohô weégɨ naâre tohô weegɨ́sami. Õ'âkɨ̃hɨ makɨ me'rakãharã Õ'âkɨ̃hɨ besé'kãrã niîma. Õ'âkɨ̃hɨ ɨaró weé nu'kurã niîma, niîwĩ.

¹⁵ Be'ró Õ'âkɨ̃hɨre werê ko'tegɨ opâturi a'té kẽ'rare niîwĩ: —Mɨ'ɨ̂ ĩ'yâ'ko numiô sõ'ó niîko yã'agó pakasé maaripɨ duhiámo. Koô duhî'ke maari a'tîro niî sĩ'riro weé'. Tee maári paka masá pãharã́ niîma, niî sĩ'riro weé'. Pehe makárikãharã, pehe kurárikãharã, mehêkã uúkũrã, pehé di'takãharã niîma, niîro weé'.

¹⁶ Mehêkã bahugɨ́ sõ'agɨ́ pɨámukãrã wiôrã me'ra yã'agóre ĩ'yâ tu'tirãsama. Koôre kõ'ârãsama. Koôre su'ti marígo tohakã́ weerã́sama. Koôre ba'ârãsama. Be'ró ɨ̃hâ kõ'arãsama.

¹⁷ Õ'âkɨ̃hɨ naâre kɨ̃ɨ̂ ɨaró noho weekã́ weegɨ́sami. Tohô weégɨ naâre ni'kâro noho wãkukã́ weegɨ́sami. Naâ mehêkã bahugɨ́re wiôgɨ sõróorãsama. Teê Õ'âkɨ̃hɨ “A'tîro wa'ârosa'” niî'karo nohota wa'âka be'ropɨ wiôgɨ niî tɨogɨsami.

¹⁸ Numiô mɨ'ɨ̂ ĩ'yâ'ko sõ'ó niîka maka pahirí maka niî'. Tii makáta niî pe'tirã a'ti nukúkãkãharã wiôrãre dutirí maka niî', niîwĩ.

18

¹ Be'ró, ãpí Õ'âkɨ̃hɨre werê ko'tegɨ ɨ'mɨ̂sepɨ niî'kɨ dihátikã ĩ'yâwɨ. Kɨ̃ɨ̂ pehé dutî masiwĩ. Kɨ̃ɨ̂ asistése me'ra a'ti ɨmɨ́kohopɨre ãyuró asisté kehe kũuwĩ.

² Tutuaró me'ra karíkũwĩ: —Babilônia pahirí maka pe'tí wã'karo weé'. Pe'tiá toha'. Ni'kâroakãre wãtiâ, ãpêrã bahutírã yã'arã́ naâ niirí maka dohó'. Tohô niikã́ niî pe'tirã mirikɨ̃hɨá yã'arã́ yabiórã niiró dohó'.

³ Tii makákãharã masá yã'âro ɨâri peha yɨ'rɨ nɨ'ka'kãrã niîwã. Teeré niî pe'tise di'takãharã ke'á maatihírã weeró noho wee sirú tuuwã. A'ti nukúkãkãharã wiôrã naâ me'ra a'mé sɨ'awã. Tii makákãharã ɨâri peha yɨ'rɨ maharã, pehe waró apeká no'ó niisére duú ma'awã. Tohô weérã a'ti nukúkãkãharã naâre duâ wapá ta'arã niyéru bɨkɨrã tohawã́.

⁴ Be'ró ãpí ɨ'mɨ̂sepɨ niigɨ́ uúkũkã tɨ'owɨ́. A'tîro niîwĩ: —Mɨsâ, yarã́ niî'. A'ti makáre wiháaya. Wiháatirã, tii makákãharã naâ yã'âro weesére bu'î peha tamu boosa'. Bu'îri da'rê no'o boosa'.

⁵ A'tîro niî'. Naâ yã'âro weé'ke pehe waró niî'. Ɨ'mɨ̂sepɨ tu'â eta ke'aro weeró noho niî'. Õ'âkɨ̃hɨ naâ yã'âro weé'kere masîmi.

⁶ Tii makákãharã ãpêrãre yã'âro weékãrã niîwã. Naâ ãpêrãre yã'âro weé'karo nohota naá kẽ'ra meharóta yã'âro weé no'oato. Ãpêrãre pi'etíkã weé'karo nohota pɨáti nemoró pi'etíkã weeáto. Naâre bu'îri da'reáto.

⁷ Tii makákãharã a'tîro niîkãrã niîwã: “Ãpêrã yɨ'rɨóro ãyú yɨ'rɨ nɨ'ka'”, niîkãrã niîwã. Tohô niikã́ naâ no'ó ɨaró apêye nohore duú ma'arã pahiró niyéru kõ'âkã'kãrã niîwã. Naâ tohô weé'kãrãre ɨpɨ́tɨ pũrisé pi'etíkã weeáto. Tii makákãharã a'tîro wãkûsama. “Ɨ̃sâ wiôgo weeró noho niî'. Wapê wi'io weeró noho nií wee'. Neê bɨhâ wetisome”, niî wãkûsama.

⁸ Tohô niisé bu'iri wãkûtiro ni'kâ nɨmɨta yã'asé tii makáre wa'ârosa'. Wẽrisé, pũûro pi'etíse, ɨhá boasé wa'ârosa'. Pekâ me'e me'ra ɨ̃hâ kõ'a no'orosa'. Õ'âkɨ̃hɨ tutuâ yɨ'rɨ nɨ'kagɨ tii makákãharãre bu'îri da'rêgɨsami, niîwĩ ɨ'mɨ̂sepɨ niigɨ́.

⁹ A'ti nukúkãkãharã wiôrã tii makákãharã me'ra yã'âro a'mé sɨ'a, no'ó ɨaró yã'âro weé ma'akãrã niîwã. A'ti nukúkãkãharã wiôrã tii maká ɨ̃hɨ̂, o'mé pu'su nu'kukã ĩ'yârã, pũûro utîrãsama.

¹⁰ Tohô ɨ̃hɨrí kurare wiôrã, marí kẽ'rare bu'îri da'rêri niîrã, yoarópɨ ĩ'yâ nu'kurãsama. A'tîro niîrãsama: —Babilôniare yã'â butia'ro wa'âro weé'. Pahirí maka, tutuarí maka niîmiwɨ. Wãkûtiro bu'îri da'rê bahurió diho no'okã'.

¹¹ A'ti nukúkãkãharã duâ wapá ta'arã kẽ'ra tii makáre utîrãsama. “Noá mari yeére duurã́sari baa?” niî wãkûrãsama. Teeré wãkûrã, pũûro dɨhasé wã'arãsama.

¹² Naâ miíti duasé a'tikése niîkaro niîwɨ. Ouro me'ra weé'ke, prata me'ra weé'ke, ɨ̃tâ peeri wapa bɨhɨ́se peeri, butisé peeri pérola wamêtise peeri niîkaro niîwɨ. Tohô niikã́ su'tí ãyusé butisé, su'tí así pa'ase, sõ'â yĩi boó kurese, sõ'asé niîkaro niîwɨ. Apêye kẽ'ra niî pe'tise yukɨ́ ɨ'mɨ̂tihise me'ra weé'ke, akostíse butisé marfĩ́ wamêtise me'ra weé'kere miítikãrã niîwã. Tohô niikã́ wapa bɨhɨ́se yukɨ́ me'ra weé'ke, komé me'ra weé'ke, bronze wamêtise me'ra weé'ke, mármore wamêtise me'ra weé'kere miíti mɨhakãrã niîwã.

¹³ Apêye naâ miíti duasé canela wamêtise, ɨ'mɨ̂tihise, naâ ɨ̃hâ moro peose noho, mirra wamêtise, ɨ'sê dɨka koo vinho, ɨ'sê piritári ba'asé, farinha pãú weesé, tohô niikã́ trigo miíti mɨhakãrã niîwã. Ãpêrãre wa'îkɨ̃rã apeká o'marã́re, ovelhare, cavaloare, tũrusépawɨ cavaloa wehesére, masaré da'rá wã'ya ko'terãpɨreta miíti dohakãrã niîwã.

¹⁴ Duarã́ tii maká ɨ̃hɨ̂ka be'ro a'tîro niîrãsama: —Yukɨ dɨká mɨsâ ɨpɨ́tɨ ba'â tɨ'sase noho pe'tiá wa'â'. Niî pe'tise mɨsâ ãyusé kɨosé noho pe'ti dihá wa'â'. Neê boka nemósome.

¹⁵ Tii makákãharãre duarã́ ãyuró wapá ta'akãrã niîmiwã. Tii makákãharã pi'etíkã ĩ'yârã, yoarópɨ tohákã'rãsama. Ɨpɨ́tɨ uî, utîrãsama.

¹⁶ A'tîro niî karíkũrãsama: —Ãyurí maka pahirí maka niîmika maka yã'â butia'ro wa'âkã'. Tii maká ni'kó numiô weeró noho niîmiwɨ. Ãyusé sõ'â yĩi boó kurerore, tohô niikã́ sõ'aróre sãyagó weeró noho niîmiwɨ. Koô su'tîropɨ ouro, ɨ̃tâ peeri wapa bɨhɨ́se peeri, apêye peeri pérola wamêtise peeri me'ra ma'mâ su'a'karo weeró noho niîmiwɨ.

¹⁷ A'té niî pe'tise pehé wãkûtiro pe'ti dihá wa'â', niîrãsama. Niî pe'tirã yukɨ̂sɨho au tuúrã, tiwɨpɨ́ wa'arã́, tiwɨpɨ́ da'rarã́ yoarópɨ uîrã toharã́sama. Tohô niikã́ niî pe'tirã diâ pahirí maapɨ da'rarã́ meharóta toharã́sama.

¹⁸ Tii maká ɨ̃hɨkã́ ĩ'yârã, karíkũrãsama: —A'ti maká weeró noho ãyurí maka ape maká marí', niîrãsama.

¹⁹ Pũûro bɨhâ wetirã naâ dɨpopápɨ di'târe õrê peorãsama. Utî, dɨhasé wã'arã, karíkũrãsama: —Ãyurí maka pahirí maka yã'â butia'ro wa'âkã'. Tii makákãhase niyéru me'ra niî pe'tirã yukɨ̂sɨpawɨ paka kɨorã́ ãyuró wapá ta'amiwã. Wãkûtiro pe'ti diháka maka tohá', niîrãsama.

²⁰ Ɨ'mɨ̂sepɨ niirã́ pe'e tii makáre kõ'akã́, e'katíya. Mɨsâ Jesu Cristo bese kũú'kãrã, Õ'âkɨ̃hɨ yee kitire werê turiarã, niî pe'tirã kɨ̃ɨ yarã́ e'katíya. Tii makákãharã mɨsâre pi'etíkã weewã́. Teé bu'iri Õ'âkɨ̃hɨ naâre bu'îri da'rêmi.

²¹ Be'ró ni'kɨ́ Õ'âkɨ̃hɨre werê ko'tegɨ tutuagɨ́ ɨ̃tâgahore mii morówĩ. Otesé peerire tõ'ô di'o ãrɨákahaho weeró noho bahuwɨ́. Tigaré diâ pahirí maapɨ doke yõógɨ, a'tîro niîwĩ: —Tigaré doke yõóro weeró noho Babilônia pahirí makaho niîmiro, doke yõó no'orosa'. Neê opâturi tii makáre ĩ'yâ nemosome.

²² Tii maká niî pe'tiropɨ basasé neê tɨ'ó no'osome. Bɨâ pɨ̃tese bɨsɨsé, wẽopawɨ́ putisé, coroneta putisé bɨsɨ̂some. No'ó niisére da'rarã́ neê marirã́sama. Otesé peeri ãrɨákã bɨsɨsé kẽ'ra neê tɨ'ó no'osome.

²³ Apêye kẽ'ra sĩ'óo'se noho marirósa'. Naâ amûkã dɨ'tekã́ bosê nɨmɨ wee peórã karíkũse tɨ'ó no'oya marirósa'. Too dɨpórore tii makákãharã duú wapá ta'arã apêye di'takãharã nemoró duú me'rirã niîmiwã. Tii makákãharã tɨ'ó yã'a masirã weeró noho weé me'rirã niî pe'tirokãharãre ẽho peókã weewã́.

²⁴ Tii makápɨ Õ'âkɨ̃hɨ yee kitire werê turiarã, kɨ̃ɨ̂re ẽho peórã wẽhé no'o'kãrã yee dii niîwɨ. Tohô niikã́ niî pe'tirã a'ti nukúkãkãharã wẽhé no'o'kãrã yee dii niîwɨ. Masaré wẽhé'ke wapa tii makáre bu'îri da'rê no'orosa', niîwĩ Õ'âkɨ̃hɨre werê ko'tegɨ.

19

¹ Babilôniare bu'îri da'rekã́ ĩ'yâka be'ro a'tîro wa'âwɨ. Yɨ'ɨ̂ João pãharã́ masá ɨ'mɨ̂sepɨ niirã́ tutuaró me'ra uúkũsere tɨ'owɨ́. A'tîro e'katí peowã:

Õ'âkɨ̃hɨre e'katí peorã. Aleluia. Õ'âkɨ̃hɨ marî wiôgɨ, marîre yɨ'rɨógɨ niîmi. Niî pe'tirã bu'ipɨ niîmi. Tutuâ yɨ'rɨgɨ niîmi.

² A'tîro niî'. Kɨ̃ɨ̂ niî sooro mariró keoró bu'îri da'rêmi. Tii makáre bu'îri da'rêmi. Tii maká ni'kó numiô ɨmɨaré a'me tãrá wapá ta'ago weeró noho niîwɨ. Tii makákãharã yã'âro weerã́ niî pe'tirãre a'ti nukúkãkãharãre dohórẽ'wã. Õ'âkɨ̃hɨ kɨ̃ɨ̂re da'rá ko'terãre wẽhé'ke wapa tii makákãharãre bu'îri da'rê a'mewĩ, niî basâ peowã.

³ Opâturi niîwã taha: —Õ'âkɨ̃hɨre e'katí peorã. Aleluia. Tii makáre ɨ̃hâ kõ'ase o'mé tohô o'mé pu'su nu'kurosa', niîwã.

⁴ Vinte e quatro wiôrã bɨkɨrã, tohô niikã́ ba'pâritirã katisé kɨorã́ weeró noho bahurã́ Õ'âkɨ̃hɨ wiôgɨ duhirí kumuropɨ duhigɨ́re ẽho peórã ehâ ke'awã. A'tîro niîwã: —Tohôta wa'aáto. Õ'âkɨ̃hɨre e'katí peorã. Aleluia, niîwã.

⁵ Be'ró wiôgɨ duhirí kumuro pɨ'to niigɨ́ a'tîro niîwĩ:

Niî pe'tirã Õ'âkɨ̃hɨ yeere da'rarã́ kɨ̃ɨ̂ marî wiôgɨre ãyuró e'katí peoya. Niî pe'tirã wio pesáse me'ra kɨ̃ɨ̂re ẽho peórã, wiôrã, mehô niirã́ tohô weeyá, niîwĩ. Õ'âkɨ̃hɨ masaré dutigɨ́ waro sãhá nɨ'kase niî'

⁶ Be'ró yɨ'ɨ̂ pãharã́ masá uúkũkã tɨ'owɨ́. Pehe maári po'ê yaha a'mâ bɨrose maari weeró noho bɨsɨ̂wã. Bɨpô ɨpɨ́tɨ paâro weeró noho bɨsɨ̂wã. A'tîro niîwã:

Marî Õ'âkɨ̃hɨre e'katí peorã. Aleluia. Marî wiôgɨ tutuâ yɨ'rɨ nɨ'kagɨ ni'kâroakãre niî pe'tirãre dutigɨ́ sãhá nɨ'kami.

⁷ E'katírã. Ehêri põ'raripɨ e'katí butia'rã tɨ'ó yã'arã. “Õ'âkɨ̃hɨ ãyú yɨ'rɨami”, niîrã. A'tîro niî'. Õ'âkɨ̃hɨ makɨ ovelha wi'magɨ́ weeró noho bahugɨ́ kɨ̃ɨ̂re ẽho peórã me'ra niî nɨ'kari nɨmɨ ehâ toha'. Kɨ̃ɨ̂re ẽho peórã kɨ̃ɨ̂ nɨmó niiákoho weeró noho niîma. Ni'kó amûkã dɨ'teátoho dɨporo ãyuró ma'mâ su'a no'osamo. Koô weeró noho naâ apo yuú'kãrãpɨ niîma.

⁸ Naâ su'tí butisé ũ'îri marisé, pũûro asistésere sãâ no'o'kãrã niîma, niîwã. Butisé su'tí naâ katîrã ãyuró weé'ke niî', niî sĩ'riro weé'.

⁹ Be'ró Õ'âkɨ̃hɨre werê ko'tegɨ yɨ'ɨ̂re niîwĩ: —A'tîro ohâya: “No'ó Õ'âkɨ̃hɨ makɨ ovelha wi'magɨ́ weeró noho bahugɨ́ amûkã dɨ'terí bosê nɨmɨre ĩ'yâ duti no'orã noho e'katíya”, niî ohâ dutiwĩ. Kɨ̃ɨ̂ yɨ'ɨ̂re niîwĩ taha: —A'té uúkũse Õ'âkɨ̃hɨ uúkũse waro niî'.

¹⁰ Õ'âkɨ̃hɨre werê ko'tegɨ tohô niikã́ tɨ'ógɨ, yɨ'ɨ̂ kɨ̃ɨ̂ tiro ẽho peógɨ ehâ ke'awɨ. Yɨ'ɨ̂ tohô weekã́ ĩ'yâgɨ, yɨ'ɨ̂re niîwĩ: —Tohô weetíkã'ya. Yɨ'ɨ́ kẽ'ra kɨ̃ɨ̂re da'rá ko'tegɨta niî'. Yɨ'ɨ̂ mɨ'ɨ̂ weeró noho niigɨ́ niî'. Tohô niikã́ mɨ'ɨ̂ akawerérã Jesu yeére werê nu'kurã weeró noho niî'. Yɨ'ɨ̂re neê ẽho peótikã'ya. Õ'âkɨ̃hɨ pe'ere tohô weeyá. A'tîro niî'. Espírito Santo Õ'âkɨ̃hɨ yee werê mɨ'tarãre masikã́ weékɨ niîwĩ. Teé masisé me'ra werêkãrã niîwã. Meharóta Jesu yeére wererã́ kẽ'ra Espírito Santo masisé o'osé me'ra werêma, niîwĩ. Masɨ́ cavalo butigɨ́ bu'ipɨ pesasé kiti niî'

¹¹ Be'ró, ɨ'mɨ̂se pãrikã́ ĩ'yâwɨ. Toopɨ́ cavalo butigɨ́ bahuáwĩ. Kɨ̃ɨ̂ bu'i pesagɨ́ a'tîro wamêtiwĩ. Keoró Weé nu'kugɨ, Diakɨ̃hɨ́kɨ̃hɨ niîwĩ. Kɨ̃ɨ̂ masaré keoró besegɨ́ niîwĩ. Tohô niikã́ a'me kẽégɨ keoró weegɨ́ niîwĩ. Tohô weégɨ tohô wamêtiwĩ.

¹² Kɨ̃ɨ̂ kapêri pekâ me'e ɨ̃hɨrí põ'ra weeró noho asiwɨ́. Kɨ̃ɨ̂ dɨpôapɨre pehé wiôrã pesasé be'torire pesâwĩ. Kɨ̃ɨ̂re ohâ õ'o no'oka wamere kɨ̃ɨ̂ se'saro masîwĩ.

¹³ Kɨ̃ɨ yaá su'tiro diî me'ra yosó'karore sãyâwĩ. Kɨ̃ɨ̂ wamêtiwĩ Õ'âkɨ̃hɨ uúkũse.

¹⁴ Kɨ̃ɨ yarã́ surára ɨ'mɨ̂sekãharã kɨ̃ɨ̂re siru tuúwã. Naâ su'tí butisé ũ'îri marisére sãyâwã. Naâ cavaloa butirã́ bu'ipɨ pesâwã.

¹⁵ Kɨ̃ɨ̂ ɨsêropɨre di'pĩhí ɨse yohári pĩhire kɨowĩ́. Tii pĩhí me'ra kɨ̃ɨ̂ a'ti nukúkãkãharãre kamî da'regɨsami. Tutuaró me'ra dutîgɨsami. Naâ ɨ'sêre tee koó miîrã tutuaró me'ra nɨté sa'bese weeró noho kɨ̃ɨ̂ a'ti nukúkãkãharã yã'âro weerã́re bu'îri da'rêgɨsami. Õ'âkɨ̃hɨ tutuâ yɨ'rɨgɨ naâ me'ra uâ yɨ'rɨami. Tohô weégɨ cavalo bu'i pesagɨ́ naâre ɨpɨ́tɨ waro bu'îri da'rêgɨsami.

¹⁶ Kɨ̃ɨ̂ su'tîropɨ, tohô niikã́ kɨ̃ɨ̂ ɨsôpɨ a'tîro ohâ õ'o no'okaro niîwɨ: “Niî pe'tirã wiôrã bu'ipɨ wiôgɨ waro niîmi”, niî wã'yawɨ.

¹⁷ Be'ró, ni'kɨ́ Õ'âkɨ̃hɨre werê ko'tegɨ muhîpũ ɨmɨ̂kohokɨ̃hɨ bu'ipɨ nu'kugɨ́re ĩ'yâwɨ. Kɨ̃ɨ̂ niî pe'tirã mirikɨ̃hɨá ɨ'mɨáropɨ wɨɨrã́re tutuaró me'ra karíkũwĩ: —Nerêya. Õ'âkɨ̃hɨ pehé ba'asére apomí.

¹⁸ Wiôrã yee di'ire ba'ârãsa'. Surára wiôrãre, surára tutuarã́re, cavaloa di'ire, naâ bu'i pesarã́ di'ire ba'ârãsa'. Niî pe'tirã yee di'ire ba'ârãsa'. Da'rá ko'terãre, da'rá ko'tetirãre, wiôrãre, mehô niirã́re niî pe'tirãre ba'ârãsa', niîwĩ.

¹⁹ Be'ró, sõ'agɨ́ mehêkã bahugɨ́re ĩ'yâwɨ. Tohô niikã́ niî pe'tirã a'ti nukúkãkãharã wiôrãre naa yarã́ surára me'ra nerekã́ ĩ'yâwɨ. Naâ nerêka be'ro cavalo butigɨ́ bu'i pesagɨ́ me'ra, tohô niikã́ kɨ̃ɨ yarã́ surára me'ra a'mê wẽherãtirã tohô weewã́.

²⁰ Cavalo butigɨ́ bu'i pesagɨ́ mehêkã bahugɨ́re yẽ'êwĩ. Ãpí yaî weeró noho bahugɨ́, ovelha wi'magɨ́ kapé sa'aritigɨ weeró noho bahugɨ́re yẽ'êwĩ. Kɨ̃ɨ́ta niî soose kiti werê mɨ'tagɨ niîwĩ. Kɨ̃ɨ́ta taha masá yaî weeró noho bahugɨ́re ẽho peoáto niîgɨ mehêkã bahusé pakare weé ĩ'yo basawĩ. Kɨ̃ɨ̂ weé ĩ'yose me'ra niî pe'tirã yaî weeró noho bahugɨ́ wame ohâ õ'o no'o'kãrãre a'tîro weewĩ́. Naâre niî soo, ẽho peókã weewĩ́. Yaî weeró noho bahugɨ́ yeê'kere ẽho peórã kẽ'rare meharóta niî soo, ẽho peókã weewĩ́. Be'ró, cavalo bu'i pesagɨ́ pɨárã mehêkã bahurã́re yẽ'êwĩ. Naâ pɨárã katirã́ta pekâ me'e ditarahopɨ doke yõó no'owã. Tii ditára enxofre wamêtise opê weeró noho sipisé me'ra ɨ̃hɨ̂wɨ.

²¹ Ãpêrã naâ me'rakãharã pe'ere cavalo bu'ipɨ pesagɨ́ a'tîro weewĩ́. Kɨ̃ɨ yaá pĩhi kɨ̃ɨ̂ ɨsêropɨ kɨóka pĩhi me'ra naâre wẽhé pe'okã'wĩ. Niî pe'tirã mirikɨ̃hɨá naa yeé di'ire pahî butia'ro ba'â yapîkã'wã.

20

¹ Apêye kẽ'rare ĩ'yâwɨ. Ni'kɨ́ Õ'âkɨ̃hɨre werê ko'tegɨ ɨ'mɨ̂sepɨ niî'kɨ dihátiwĩ. Kɨ̃ɨ̂ niî bahu dutí dihari peekãha sáwire kɨowĩ́. Tohô niikã́ kome daáhore kɨowĩ́.

² Kɨ̃ɨ̂ pĩrohó weeró noho bahugɨ́re dɨ'tewĩ́. Pĩrô neê waro a'ti ɨmɨ́koho da'rêka be'rokɨ̃hɨ pĩrô niî no'o'kɨ niîmi. Kɨ̃ɨ̂ wãtiâ wiôgɨ niîmi. Kɨ̃ɨ̂re kome daá me'ra pehé kɨ'mari, mil kɨ'mari dɨ'te kũúwĩ.

³ Kɨ̃ɨ̂re niî bahu dutí dihari peepɨ tuu kehé dihowĩ. Be'ró tii peé sopere bi'ákã'wĩ. Tu'â eha nɨ'ko, pi'râ bi'akã'wĩ. Mil kɨ'mari masaré niî soo ẽho peókã weetíkã'ato niîgɨ tohô weewĩ́. Be'ró mil kɨ'mari yɨ'rɨ́ka be'ro yoâtikã pãâo wĩro no'ogɨsami.

⁴ Be'ró, pehé wiôrã duhisé kumurire ĩ'yâwɨ. Tee kumúripɨ duhirã́ a'ti nukúkãkãharãre bese masísere o'ô no'o'kãrã niîwã. Ãpêrã kẽ'rare ĩ'yâwɨ. Naâ Õ'âkɨ̃hɨ yee kiti, tohô niikã́ Jesu yeére weresé bu'iri naâ dɨpopáre dɨtê sure no'o'kãrã niîwã. Naâ yaî weeró noho bahugɨ́ yeê'kere neê ẽho peótikãrã niîwã. Tohô niikã́ naâ diâpoapɨ, naâ amûkãripɨ kɨ̃ɨ̂ wameré neê ohâ õ'o no'otikãrã niîwã. Naâ wẽrî'kãrãpɨ niîmirã, masawã́. Naâ masáka be'ro Cristo me'ra mil kɨ'mari masaré dutî tamuwã.

⁶

⁵ Naâ masasé neê waro wẽrî'kãrã masá mɨ'ta'ke niî'. Wẽrî'kãrã masá mɨ'ta'kãrã Õ'âkɨ̃hɨ yarã yã'asé moorã́ niîma. E'katíma. Naâ opâturi wẽrîsome. Pekâ me'epɨ neê wa'âsome. Naâ Õ'âkɨ̃hɨ yeekãhasere, Jesu Cristo yeekãhasere da'rarã́ niîrãsama. Naâ mil kɨ'mari Cristo me'ra ãpêrãre dutîrãsama. Ãpêrã pe'e yã'arã́ wẽrî'kãrã mil kɨ'mari yɨ'rɨ́ka be'ropɨ masarã́sama.

⁷ Mil kɨ'mari yɨ'rɨ́ka be'ro wãtiâ wiôgɨ niî bahu dutí dihari peepɨ dɨ'te kũú'kɨre pãâo wĩrorãsama.

⁸ Kɨ̃ɨ̂ niî pe'tiro a'ti nukúkãkãharãre niî soosere ẽho peókã weegɨ́sami. Gogue, Magogue wamêtirã kẽ'rare meharóta weegɨ́sami. Naa yarã́ surárare a'mê wẽhe dutigɨ neêo kũugɨsami. Naâ surára nukûpori pahirí maa diâ sumútohokãhase weeró noho pãharã́ waro niîrãsama.

⁹ Naâ niî pe'tiro a'ti nukúkãpɨre se'sâ nɨ'karãsama. Naâ Õ'âkɨ̃hɨ yarã niirópɨ, tohô niikã́ kɨ̃ɨ yaá maka kɨ̃ɨ̂ ma'irí makare sɨtɨâ nɨ'ka bi'arãsama. Õ'âkɨ̃hɨ pe'e naâ tohô weekã́ ĩ'yâgɨ, naâre ɨ̃hâ kõ'a dutigɨ pekâ me'e o'ô dihogɨsami. Niî pe'tirã ɨ̃hɨ̂ pe'tia wa'ârãsama.

¹⁰ Wãtiâ wiôgɨ naâre niî soo'kɨ pekâ me'e ɨ̃hɨrí ditarahopɨ kõ'â diho no'ogɨsami. Tii ditára opê weeró noho bahusé me'ra sipî ɨ̃hɨ̂rosa'. Toopɨ́ yaî weeró noho bahugɨ́, ãpí niî soose kiti werê mɨ'tagɨ naâ pɨárã kõ'â diho no'owã. Toopɨ́re ɨmɨ̂kohori, yamîri pi'etí nu'kurãsama. Neê wihasomé. Butirí kumurohopɨ duhigɨ́ masá weesére besesé niî'

¹¹ Be'ró, wiôgɨ duhirí kumuro butirí kumurohore ĩ'yâwɨ. Toopɨ́ duhigɨ́re ĩ'yâwɨ. Kɨ̃ɨ̂ ĩ'yóropɨre a'tí di'ta, ɨ'mɨ̂se bahu dutí diha pe'tia wa'âwɨ. Teé no'opɨ́ niiró bokatíwɨ.

¹² Be'ró, niî pe'tirã wẽrî'kãrã Õ'âkɨ̃hɨ ĩ'yóropɨ nu'kukã́ ĩ'yâwɨ. Naâ no'ó niirã́ niîwã. Wiôrã, mehô niirã́ niîwã. Naâ toó nu'kurí kura Õ'âkɨ̃hɨ niî pe'tise masá weé'ke ohâ õ'o'ke pũrire pãâwĩ. Ape pũrí katî nu'kuse kɨorã́ naâ wameré ohâ õ'o no'oka pũrire pãâwĩ. Kɨ̃ɨ̂ wẽrî'kãrãre a'tîro weewĩ́. Naâ weé'ke nɨkɨre tee pũrípɨ ohâ õ'o no'o'karo nohota naâre keoró besé, bu'îri da'rêwĩ.

¹³ Diâ pakasé maari pakapɨ wẽrî'kãrã toopɨ́ niîwã. Di'tâpɨ wẽrî'kãrã kẽ'ra toopɨ́ niîwã. Niî pe'tirã naâ weé'karo nohota niî pe'tisere keoró besé, bu'îri da'rê no'owã.

¹⁴ Õ'âkɨ̃hɨ masá naâ wẽrisére kõ'â pe'okã'wĩ. Naâ wẽrî'kãrã niiró kẽ'rare kõ'â pe'okã'wĩ. Pekâ me'ehopɨ bu'îri da'resé opâturi wẽrisé weeró noho niî'.

¹⁵ Niî pe'tirã naâ wameré katî nu'kuse kɨorã́ ohâ õ'o no'oka pũripɨ ohâ õ'o no'oya marí'kãrã pekâ me'ehopɨ kõ'â diho no'owã.

21

¹ Be'ró, yɨ'ɨ̂ ape ɨmɨ́kohore, apé di'tare ĩ'yâwɨ. Too dɨpóro niî mɨ'ta'ke ɨ'mɨ̂se, di'tâ bahu dutí diha pe'tia wa'âwɨ. Diâ pahirí maaho mariwɨ́ maha.

² Yɨ'ɨ̂ João ãyú butia'ri maka, ɨ'mɨ̂se Õ'âkɨ̃hɨ tiropɨ niirí makare dihátikã ĩ'yâwɨ. Tii maká apé ma'ma maká Jerusalẽ́ niîwɨ. Ãyuró apóka maka niîwɨ. Ni'kó numiô amûkã dɨ'tegó marapɨ́re ãyuró tɨ'saáto niîgo ma'mâ su'a no'o'ko weeró noho niîwɨ.

³ Be'ró ni'kɨ́ ɨ'mɨ̂sepɨ niigɨ́ tutuaró me'ra uúkũkã tɨ'owɨ́. A'tîro niîwĩ: —Tɨ'oyá. Õ'âkɨ̃hɨ masá me'ra niîmi. Naâ me'ra niî nu'kugɨsami. Naâ kɨ̃ɨ yarã́ niîrãsama. Kɨ̃ɨ̂ basita naâ me'ra niî, naâ wiôgɨ niîgɨsami.

⁴ Naâ ya'ko koóre tuu koégɨsami. Wẽrisé marirósa'. Bɨhâ wetise, utisé, pũrisé kẽ'ra marirósa' maha. Niî pe'tise too dɨpórokãhase pe'tiá wa'ârosa', niîwĩ.

⁵ Õ'âkɨ̃hɨ wiôgɨ duhirí kumuropɨ duhigɨ́ a'tîro niîwĩ: —Tɨ'oyá. Yɨ'ɨ̂ niî pe'tise apêyere ma'má di'akɨ̃ dɨka yuú', niîwĩ. Apêye niî nemowĩ: —Yɨ'ɨ̂ uúkũsere ohâya. Teé diakɨ̃hɨ́ niisé niî'. Yɨ'ɨ̂ niî'karo nohota wa'ârosa', niîwĩ.

⁶ Be'ró a'tîro niîwĩ: —Niî pe'tise tu'â eha nɨ'ko pe'o no'o'. Yɨ'ɨ́ta niî mɨ'tagɨ, niî tɨogɨpɨ niî'. No'ó yɨ'ɨ̂re ɨpɨ́tɨ ɨárã ako wɨórã nohore yɨ'ɨ̂ katî nu'kusere o'ôgɨti. Naâre wapa seésome.

⁷ No'ó ãyuró weé yɨ'rɨ wetírã ẽho peó du'utirã noho niî pe'tise yɨ'ɨ̂ “O'ôgɨti” niî'kere yẽ'êrãsama. Yɨ'ɨ̂ naâ wiôgɨ niîgɨsa'. Naâ yɨ'ɨ̂ põ'ra niîrãsama.

⁸ Ãpêrã pũrikã uisé bu'iri yɨ'ɨ̂re ẽho peó du'urã pekâ me'epɨ wa'ârãsama. Tohô niikã́ ẽho peótirã, yã'â butia'sere weerã́, wẽhé kõ'arã toopɨ́ wa'ârãsama. Ãpêrã no'ó ɨaró a'me tãrá baha ke'atirã, yaî weeró noho tɨ'ó yã'a masirã pekâ me'epɨ wa'ârãsama. Tohô niikã́ Õ'âkɨ̃hɨ mehereta ẽho peórã, niî pe'tirã niî soose piharã pekâ me'epɨ wa'ârãsama. Tii ditára opê weeró noho bahusé sipî ɨ̃hɨ́sa'. Teé bu'îri da'resé opâturi wẽrisé weeró noho niî'. Ma'ma maká Jerusalẽ́kãhase kiti niî'

⁹ Be'ró ni'kɨ́ sõ'ó niîkãrã sete me'rakɨ̃hɨre ĩ'yâwɨ. Naáta, naâ nɨkɨ bu'îri da'rê tɨoatehe posetíse paarire kɨowã́. Ni'kɨ́ naâ me'rakɨ̃hɨ a'tîro niîwĩ: —Te'á. Mɨ'ɨ̂re Õ'âkɨ̃hɨ makɨ ovelha wi'magɨ́ weeró noho bahugɨ́ nɨmo niiákohore ĩ'yogɨ́ti, niîwĩ. Kɨ̃ɨ̂ nɨmó Jesu Cristore ẽho peórã niî sĩ'riro weé'.

¹⁰ Espírito Santo kẽ'esé weeró noho yɨ'ɨ̂re ĩ'yowĩ́. Ni'kɨ́ Õ'âkɨ̃hɨre werê ko'tegɨ ɨ̃rɨgɨ́ pahikɨhɨ́ ɨ'mɨákɨhɨhopɨ yɨ'ɨ̂re miáawĩ. Toopɨ́ yɨ'ɨ̂re Õ'âkɨ̃hɨ tiro niîka makaho dihátisere ĩ'yowĩ́. Tii maká Jerusalẽ́ yã'asé moorí makaho niîwɨ.

¹¹ Tii maká Õ'âkɨ̃hɨ asistése me'ra pũûro asistéwɨ. Ɨ̃tâ peeri wapa bɨhɨ́se peeri jaspe wamêtise peeri weeró noho asisté, akostíwɨ.

¹² Tii maká sumútoho pahirí sã'riro ɨ'mɨári sã'riro niîwɨ. Tií sã'riropɨ doze soperi niîwɨ. Tee sopéri nɨkɨ ni'karérã Õ'âkɨ̃hɨre werê ko'terã nu'kuwã́. Tee sopéripɨre Israel yee kurarikãharã wamere ohâ õ'o no'owɨ. Naâ doze kurari niîwã.

¹³ Tií sã'riropɨre muhîpũ mɨhátiro pe'e i'tiá sope niîwɨ. Muhîpũ sãháaro pe'ere i'tiá sope niîwɨ. Kũûpe' pe'ere i'tiá sope niîwɨ. Diakɨ̃hɨ́ pe'e kẽ'rare i'tiá sope niîwɨ.

¹⁴ Tii makákãha sã'rirore ɨ̃tapá paka me'ra tuú yẽ'e no'owɨ. Teepagá dozepaga niîwɨ. Teepagá nɨkɨ Jesu Cristo bese kũú'kãrã wamere ohâ õ'o no'owɨ.

¹⁵ Õ'âkɨ̃hɨre werê ko'tegɨ yɨ'ɨ̂re uúkũgɨ ni'kâgɨ ãrɨ̂gɨ ouro me'ra weé'kɨre kɨowĩ́. Tigɨ́ me'ra tii makáre, sopêrire, tií sã'rirore keogɨ́tigɨ weewĩ́.

¹⁶ Tii maká ba'pâritise pã'reri meharóta bahuwɨ́. Ni'kâro noho e'sá, ni'kâro noho yoâwɨ. Õ'âkɨ̃hɨre werê ko'tegɨ kɨ̃ɨ̂ keokɨhɨ́ me'ra tii makáre keowĩ́. Tii maká yoaró dois mil duzentos quilômetros niîwɨ. Ɨ'mɨáro, e'saró kẽ'ra meharóta niîwɨ.

¹⁷ Be'ró sã'rîrore keowĩ́. Sessenta e cinco metros ɨ̃se bɨtíwɨ. Masá keo wɨáro noho keowĩ́.

¹⁸ Sã'rîro ya'sasépa jaspe wamêtise me'ra weéka sã'riro niîwɨ. Tii maká ouro waro me'ra weéka maka niîwɨ. Ouro ẽo kuhíri ũ'îri marisé weeró noho akostíwɨ.

¹⁹ Ɨ̃tapagá tií sã'rirore tuú yẽ'esepaga paka a'tîro weé no'owɨ. Niî pe'tise ɨ̃tâ peeri wapa bɨhɨ́se peeri me'ra ma'mâ su'a no'owɨ. Niî mɨ'takaha ya'sasé peeri jaspe wamêtise peeri me'ra ma'mâ su'a no'owɨ. Be'rokãhá safira wamêtise ya'sasé peeri me'ra ma'mâ su'a no'owɨ. Be'rokãhá butî boo kurese ágata wamêtise peeri me'ra ma'mâ su'a no'owɨ. Be'rokãhá ya'sasé esmeralda wamêtise peeri me'ra ma'mâ su'a no'owɨ.

²⁰ Apêga sõ'asé sardônica wamêtise peeri me'ra ma'mâ su'a no'owɨ. Be'rokãhá sõ'â boo kurese sárdio wamêtise peeri me'ra ma'mâ su'a no'owɨ. Be'rokãhá ewɨ̂ boo kure crisólito wamêtise peeri me'ra ma'mâ su'a no'owɨ. Be'rokãhá ya'sasé berilo wamêtise peeri me'ra ma'mâ su'a no'owɨ. Be'rokãhá ewɨ̂ boo kure akostíse topázio wamêtise peeri me'ra ma'mâ su'a no'owɨ. Be'rokãhá ya'sâ boo kurese crisópraso wamêtise peeri me'ra ma'mâ su'a no'owɨ. Be'rokãhá ya'sasé jacinto wamêtise peeri me'ra ma'mâ su'a no'owɨ. Niî tɨokahapɨa sõ'â yĩi boó kurese ametista wamêtise peeri me'ra ma'mâ su'a no'owɨ.

²¹ Doze soperi niîwɨ. Tee sopéri nɨkɨ ni'kâga pérolaho me'ra weé no'o'ke soperi niîwɨ. Makâ dekopɨ wa'arí ma'a ouro me'ra weéka ma'a niîwɨ. Ẽo kuhíri akostíro weeró noho bahuwɨ́.

²² Tii makápɨre neê Õ'âkɨ̃hɨ wi'ire ĩ'yâtiwɨ. A'tîro niî'. Õ'âkɨ̃hɨ marî wiôgɨ tutuâ yɨ'rɨagɨ toopɨ́ niîmi. Tohô niikã́ Õ'âkɨ̃hɨ makɨ ovelha wi'magɨ́ weeró noho bahugɨ́ kẽ'ra toopɨ́ niîmi. Tohô weéro Õ'âkɨ̃hɨ wi'i mariwɨ́.

²³ Tii makápɨre muhîpũ ɨmɨ̂kohokɨ̃hɨ, yamîkɨ̃hɨ sĩ'óo'sere neê a'mâsome. Õ'âkɨ̃hɨ asistése me'ra ãyuró sĩ'óo' nu'ku'. Õ'âkɨ̃hɨ makɨ ovelha wi'magɨ́ weeró noho bahugɨ́ kɨ̃ɨ̂ tii makáre sĩ'óo'gɨ niîmi.

²⁴ A'ti nukúkãkãharã Õ'âkɨ̃hɨ yɨ'rɨó no'o'kãrã tii maká sĩ'óo'se me'ra sihârãsama. A'ti nukúkãkãharã wiôrã naâ wiôrã niî'kere tii makápɨ miáarãsama.

²⁵ Toopɨ́re yamî marirósa'. Tohô weéro tii makákãhase soperi susû nu'kukã'rosa'.

²⁶ A'ti nukúkãkãharã naâ ãyusé niiséti'kere tii makápɨ miáarãsama.

²⁷ Toopɨ́re neê ni'kâti yã'asé mii sãhá no'oya marirósa'. Yã'âro weerã́, niî soose bɨkɨrã toopɨ́re neê sãháasome. Õ'âkɨ̃hɨ makɨ ovelha wi'magɨ́ weeró noho bahugɨ́ yaa pũri katî nu'kuse kɨorã́ naâ wameré ohâ õ'o no'o'kãrã di'akɨ̃ sãháarãsama.

22

¹ Be'ró Õ'âkɨ̃hɨre werê ko'tegɨ diâre ĩ'yowĩ́. Tii maá ũ'îri marirí maa niîwɨ. Teé akó, katisé warore o'ôwɨ. Pũûro akostíri maa niîwɨ. Õ'âkɨ̃hɨ, tohô niikã́ kɨ̃ɨ̂ makɨ́ ovelha wi'magɨ́ weeró noho bahugɨ́ duhirí kumuro dokapɨ wihawɨ́.

² Tii maká deko wa'arí ma'apɨ a'mâ bɨrowɨ. Diâ pɨ̂a pe'eseri sumútoho yukɨ́ katisé o'osé pĩ'riwɨ́. Ni'kâ kɨ'mare dozetiri dɨkâtiwɨ. Muhîpũri nɨkɨ dɨkâtiwɨ. Tigɨkãháse pũri masaré akô yeese niîwɨ.

³ Toopɨ́re “Masá yã'âro weé'ke wapa naâre yã'âro wa'ârosa'”, niîya marirósa'. Tii makápɨre Õ'âkɨ̃hɨ, tohô niikã́ kɨ̃ɨ̂ makɨ́ ovelha wi'magɨ́ weeró noho bahugɨ́ duhirí kumuro niîrosa'. Kɨ̃ɨ yarã́ kɨ̃ɨ̂re ẽho peórãsama.

⁴ Bahû yoaropɨ kɨ̃ɨ̂re ĩ'yârãsama. Naâ diâpoapɨ kɨ̃ɨ̂ wameré kɨorã́sama.

⁵ Toopɨ́ yamî marirósa'. Toopɨ́ niirã́ neê sĩ'óo'sere ɨasomé. Muhîpũ bo'rê yuusere ɨasomé. Õ'âkɨ̃hɨ marî wiôgɨ sĩ'óo'gɨsami. Naâ toopɨ́ niirã́ Õ'âkɨ̃hɨ me'ra dutî tamu nu'kurãsama. Jesu Cristo maatá a'tîgɨsami niisé kiti niî'

⁶ Be'ró Õ'âkɨ̃hɨre werê ko'tegɨ yɨ'ɨ̂re niîwĩ: —A'té uúkũse diakɨ̃hɨ́ niisé niî'. Teé niî'karo nohota wa'ârosa'. Marî wiôgɨ Õ'âkɨ̃hɨ kɨ̃ɨ̂ werê duti'kere werê turiarãre wãkusé o'ôwĩ. Kɨ̃ɨ́ta kɨ̃ɨ̂re werê ko'tegɨre o'ôo'wĩ. Kɨ̃ɨ yarã́re maatá be'ropɨ́ wa'aátehere ĩ'yo dutígɨ tohô weewĩ́.

⁷ A'tîro niîwĩ: —Maatá a'tîgɨti. A'ti turípɨ ohâ'kere ẽho peó yɨ'tigɨ́ noho e'katígɨsami, niîwĩ.

⁸ Yɨ'ɨ̂ João a'té niî pe'tisere ĩ'yâwɨ. Niî pe'tisere tɨ'owɨ́. Teeré tɨ'ó, ĩ'yâka be'ro Õ'âkɨ̃hɨre werê ko'tegɨ yɨ'ɨ̂re ĩ'yó'kɨ tiro ẽho peógɨ ehâ ke'awɨ.

⁹ Kɨ̃ɨ̂ pe'e tohô weekã́ ĩ'yâgɨ, niîwĩ: —Tohô weetíkã'ya. Yɨ'ɨ́ kẽ'ra kɨ̃ɨ̂re da'rá ko'tegɨta niî'. Yɨ'ɨ̂ mɨ'ɨ̂ weeró noho niigɨ́ niî'. Mɨ'ɨ̂ akawerérã Õ'âkɨ̃hɨ werê duti'kere werê turiarã weeró noho niî'. Tohô niikã́ yɨ'ɨ̂ niî pe'tirã a'ti pũrípɨ ohâ'kere ẽho peó yɨ'tirã́ weeró noho niî'. Yɨ'ɨ̂re ẽho peótikã'ya. Õ'âkɨ̃hɨ pe'ere ẽho peóya, niîwĩ.

¹⁰ Kɨ̃ɨ̂ yɨ'ɨ̂re niî nemowĩ: —A'ti pũrípɨ “A'tîro wa'ârosa'” niî ohâ'ke keoró wa'aátehe kã'ró dɨ'sá'. Tohô weégɨ a'ti pũrípɨ ohâ'kere Õ'âkɨ̃hɨ yee kitire ya'yióropɨ kɨotíkã'ya.

¹¹ Kã'ró dɨ'sá'. Yã'agɨ́ meharóta kɨ̃ɨ̂ ɨaró weé bata'ato. Yã'â butia'sere weegɨ́ kẽ'ra meharóta weé bata'ato. Ãyugɨ́ pũrikã ãyuró weé nu'kuato. Tohô niikã́ Õ'âkɨ̃hɨ ɨaró weé nu'kugɨ kɨ̃ɨ̂re keoró wee sirú tuuato, niîwĩ.

¹² Be'ró Jesu a'tîro niîwĩ: —Tohôta niî'. Maatá a'tîgɨsa'. Yɨ'ɨ̂ masaré o'oátehere kɨó'. Naâ nɨkɨ naâ keoró weé'kere o'ôgɨti.

¹³ Yɨ'ɨ́ta niî mɨ'tagɨ, niî tɨogɨpɨ niî'.

¹⁴ No'ó su'tiré koé'kãrã weeró noho ãyurã́ niî sĩ'rirã naâ yã'âro weé'kere du'úrã, e'katírãsama. Naâ katisé o'okɨhɨ́ dɨkare ba'â masirãsama. Naâ a'ti maká ãyú butia'ri makapɨ sãháa masirãsama.

¹⁵ Ãpêrã pũrikã yã'âro weerã́ tii makápɨre sãháasome. Yã'â butia'ro weerã́, yaî weeró noho tɨ'ó yã'a masirã tii makápɨre sãháasome. Tohô niikã́ no'ó ɨaró yã'âro a'me tãrá baha ke'atirã, wẽhé kõ'arã sãháasome. Ãpêrã Õ'âkɨ̃hɨ mehereta ẽho peórã noho, tohô niikã́ niî soosere weé tɨ'sarã noho sãháasome.

¹⁶ Yɨ'ɨ̂ Jesu niî'. Õ'âkɨ̃hɨre werê ko'tegɨ, yagɨ́ me'ra a'ti pũríkãhase niî pe'tirã yɨ'ɨ̂re ẽho peóse kurarikãharãre werê duti'. Yɨ'ɨ̂ dɨporókɨ̃hɨ wiôgɨ Davi paramí niî turiagɨ niî'. Tohô niikã́ yõkoáwɨ̃ bo'rêa mɨhatiri kura asisté mɨhatigɨ weeró noho niigɨ́ niî', niîwĩ Jesu.

¹⁷ Kɨ̃ɨ̂ tohô niîka be'ro Espírito Santo, tohô niikã́ Jesu Cristore ẽho peórã a'tîro niîwã: —A'tî bakeo'ya, niîwã. No'ó a'teré tɨ'orã́ noho kẽ'ra “A'tiáto”, niiáto. No'ó ako wɨórã sĩ'rí sĩ'rirã noho a'tiáto. Akó katisé warore o'osére sĩ'rírã a'tiáto. Teé neê wapa marírosa'.

¹⁸ Niî pe'tirã Õ'âkɨ̃hɨ yee kitire a'ti pũrípɨ ohâ'kere tɨ'orã́re a'tîro niî werê yuugɨti. No'ó a'ti pũrípɨ ohâ'kere ohâ yɨ'rɨogɨ nohore Õ'âkɨ̃hɨ bu'îri da'rêgɨsami. A'ti pũrípɨ bu'îri da'resére ohâ'ke nohoreta kɨ̃ɨ̂re weegɨ́sami.

¹⁹ No'ó a'ti pũrípɨ ohâ'kere dɨ'agɨ́ nohore Õ'âkɨ̃hɨ a'tîro weegɨ́sami. Kɨ̃ɨ̂ ohâ dɨ'a'karo nohota Õ'âkɨ̃hɨ katî nu'kuse kɨorã́ ohâ õ'o no'oka pũripɨre kɨ̃ɨ̂ wameré koegɨ́sami. Kɨ̃ɨ̂ yukɨ̂gɨ katisé o'okɨhɨ́ dɨkare ba'âsome. Kɨ̃ɨ̂ tii maká ãyurí makare sãháasome. A'te kitíre a'ti pũrípɨre ohâ no'o'.

²⁰ Jesu Cristo a'teré werêgɨ, a'tîro niîmi: —Tohôta niî'. Kã'roákã dɨ'sá' yɨ'ɨ̂ dihátiatoho, niîmi. Tohôta wa'ârosa'. Wiôgɨ Jesu, keêro a'tî bakeo'ya.

²¹ Marî wiôgɨ Jesu Cristo mɨsâ niî pe'tirãre ãyuró weeáto. Tohôta weeáto.