1

¹ Dɨporópɨ Õ'âkɨ̃hɨ marî yẽkɨ sɨmɨá Judeu masare pehetíri uúkũkɨ niîwĩ. Kɨ̃ɨ̂, kɨ̃ɨ yeé kiti werê mɨ'tarãre werêgɨ, a'tîro weékɨ niîwĩ. Ãpêrãre bahû yoaropɨ werêkɨ niîwĩ. Ãpêrãre kẽ'esé weeró noho ĩ'yókɨ niîwĩ. Ãpêrãre kẽ'erópɨ werêkɨ niîwĩ.

² A'tóka terore a'ti ɨmɨ́koho pe'tiátoho dɨporo kɨ̃ɨ̂ makɨ́ me'ra kɨ̃ɨ yeékãhasere marîre uúkũmi. Neê waropɨta Õ'âkɨ̃hɨ kɨ̃ɨ̂ makɨ́ me'ra niî pe'tise a'ti ɨmɨ́kohokãhasere weékɨ niîwĩ. Teeré weégɨ, niî pe'tise kɨ̃ɨ̂ makɨ yeé toha dutígɨ tohô weékɨ niîwĩ.

³ Kɨ̃ɨ́ta Õ'âkɨ̃hɨ asistésere kɨogɨ́ niîmi. Õ'âkɨ̃hɨ tutuâ yɨ'rɨgɨ, ãyú yɨ'rɨgɨ niîmi. Kɨ̃ɨ̂ makɨ́ kẽ'ra kɨ̃ɨ̂ weeró nohota niîmi. Kɨ̃ɨ̂ uúkũ tutuase me'ra niî pe'tise a'ti ɨmɨ́kohokãhasere kɨ̃ɨ̂ neê waropɨ weé nɨ'ka'karo weeró nohota niî nu'kukã weemí. Kɨ̃ɨ̂ wẽrisé me'ra marî yã'âro weé'kere yɨ'rɨókɨ niîwĩ. Tohô weéka be'ro ɨ'mɨ̂sepɨre Õ'âkɨ̃hɨ tutuâ yɨ'rɨgɨ duhirí kumuropɨ ehâ nuhakɨ niîwĩ. Õ'âkɨ̃hɨ makɨ Õ'âkɨ̃hɨre werê ko'terã ɨ'mɨ̂sekãharã nemoró niîmi niisé niî'

⁴ Õ'âkɨ̃hɨ kɨ̃ɨ̂ makɨré kɨ̃ɨ̂ wiôgɨ niisére o'ô turiakɨ niîwĩ. Tohô weégɨ kɨ̃ɨ̂ makɨ́ kɨ̃ɨ̂re werê ko'terã ɨ'mɨ̂sekãharã bu'ipɨ tohákɨ niîwĩ.

⁵ Õ'âkɨ̃hɨ kɨ̃ɨ̂ makɨré a'tîro niîkɨ niîwĩ:

Mɨ'ɨ̂ yɨ'ɨ̂ makɨ niî'. Ni'kakã́ me'ra yɨ'ɨ̂ mɨ'ɨ̂ pakɨ niî' niisére ĩ'yó', niîkɨ niîwĩ. Kɨ̃ɨ̂, kɨ̃ɨ̂re werê ko'terãre tohô niîtikɨ niîwĩ. Tohô niikã́ kɨ̃ɨ̂ makɨ yeékãhasere uúkũgɨ, a'tîro niîkɨ niîwĩ:

Yɨ'ɨ̂ kɨ̃ɨ̂ pakɨ́ niîgɨti. Kɨ̃ɨ̂ yɨ'ɨ̂ makɨ niîgɨsami, niîkɨ niîwĩ. Kɨ̃ɨ̂re werê ko'terã pe'ere neê tohô niîtikɨ niîwĩ.

⁶ A'tîro weékɨ niîwĩ. Kɨ̃ɨ̂ makɨ́ masá ma'mi ni'kɨ́ niigɨ́re a'ti nukúkãpɨ bahuákã weékɨ niîwĩ. Tohô wa'akã́ weégɨ, Õ'âkɨ̃hɨ a'tîro niîkɨ niîwĩ:

Niî pe'tirã yɨ'ɨ̂re werê ko'terã yɨ'ɨ̂ makɨre ehâ ke'a, ẽho peoáto, niîkɨ niîwĩ.

⁷ Õ'âkɨ̃hɨ kɨ̃ɨ̂re werê ko'terã pe'e maa a'tîro niîkɨ niîwĩ:

Yɨ'ɨ̂, yɨ'ɨ̂re werê ko'terãre wĩ'ró weeró noho ɨpɨtíkã weé'. Naâreta taha pekâ me'e weeró noho ɨpɨtíkã weé'.

⁸ Kɨ̃ɨ̂ makɨ́ pe'ere “A'tîro weegɨ́ti”, niîkɨ niîwĩ:

Mɨ'ɨ̂ Õ'âkɨ̃hɨ niisé, wiôgɨ niisé neê pe'tisomé. Mɨ'ɨ̂ masaré keoró dutîgɨsa'.

⁹ Mɨ'ɨ̂ keoró weesére ma'í'. Ãpêrã yã'âro weesé pe'ere yabî'. Tohô weégɨ yɨ'ɨ̂ Õ'âkɨ̃hɨ mɨ'ɨ̂re beségɨ, wiôgɨ sõróogɨ, ɨ'sê me'ra wa'rêwɨ. Mɨ'ɨ̂ me'rakãharã bu'i tohakã́ weewɨ́. Masá mɨ'ɨ̂re “Ãyú yɨ'rɨagɨ niîmi”, niîma.

¹⁰ Apêro Õ'âkɨ̃hɨ kɨ̃ɨ̂ makɨré uúkũ'kere a'tîro ohâ no'okaro niîwɨ:

Wiôgɨ, neê waropɨre mɨ'ɨ̂ basita a'ti nukúkãre, ɨ'mɨ̂sere bahúrẽ'wɨ.

¹¹ A'té mɨ'ɨ̂ weé'ke pe'tirósa'. Mɨ'ɨ̂ pũrikã pe'tisomé. Niî nu'kugɨsa'. Niî pe'tise mɨ'ɨ̂ weé'ke su'tí weeró noho boâ diharosa'.

¹² Mɨ'ɨ̂ teeré su'tí weeró noho tuú pe'egɨsa'. Niî pe'tise teé dɨka yuú no'orosa'. Mɨ'ɨ̂ pũrikã neê dɨka yuú wee'. Meharóta niî nu'ku'. Mɨ'ɨ̂ katirí ɨmɨ̂koho neê pe'tisomé, niîkɨ niîwĩ Õ'âkɨ̃hɨ kɨ̃ɨ̂ makɨré.

¹³ Õ'âkɨ̃hɨ a'té kẽ'rare kɨ̃ɨ̂ makɨré a'tîro niîkɨ niîwĩ:

Yɨ'ɨ̂ tiro wiôgɨ duhirí kumuro diakɨ̃hɨ́ pe'e duhîgɨsa'. Mɨ'ɨ̂re ĩ'yâ tu'ti'kãrãre mɨ'ɨ̂ doka tohá pe'tikã weegɨ́ti. Yɨ'ɨ̂ tohô weerí kura mɨ'ɨ̂ duhîgɨsa', niîkɨ niîwĩ. Kɨ̃ɨ̂re werê ko'terã pe'ere neê ni'kɨré tohô niîtikɨ niîwĩ.

¹⁴ Niî pe'tirã Õ'âkɨ̃hɨre werê ko'terã bahutírã niîma. Naâ kɨ̃ɨ̂ dutisére weé ko'terã niîma. Naâ kɨ̃ɨ̂ yɨ'rɨó'kãrãre wee tamú dutigɨ o'ôo'kãrã niîma.

2

¹ Õ'âkɨ̃hɨ kɨ̃ɨ̂ makɨré niî pe'tirã wiôgɨ wa'akã́ weékɨ niîwĩ. Tohô weérã Jesu Cristo yee kitire marî tɨ'ó'kere nemoró wãkû nɨrɨro ɨá'. Teeré wãkûtirã, mehêkã ẽho peó boosa' niîrã, wãkû nɨrɨro ɨá'.

² Dɨporópɨre Õ'âkɨ̃hɨ kɨ̃ɨ̂re werê ko'terã ɨ'mɨ̂sekãharãre kɨ̃ɨ yeé kitire werê dutikɨ niîwĩ. “Naâ werê'ke diakɨ̃hɨ́ niî'”, niî no'okaro niîwɨ. Tohô niîmikã, masá pe'e naâ werê'kere ẽho peóti, yɨ'rɨ́ nɨ'kakãrã niîwã. Õ'âkɨ̃hɨ niî pe'tirã naâ dutisére weetírãre keoró bu'îri da'rêkɨ niîwĩ.

³ Marî pũrikã Õ'âkɨ̃hɨ masaré yɨ'rɨóse kiti ãyú butia'sere kɨó'. Tohô kɨomírã, teeré ɨatírã, kɨ̃ɨ̂ bu'îri da'resére neê yɨ'rɨ wetísome. Neê warore Jesu Cristo marî wiôgɨ masaré yɨ'rɨógɨti niisére werê nɨ'kakɨ niîwĩ. Be'ró taha kɨ̃ɨ̂ werê'kere tɨ'órã, a'tîro weékãrã niîwã. Diakɨ̃hɨ́ta niî' niîrã, marîre werê turiakãrã niîwã.

⁴ Apêye kẽ'rare Õ'âkɨ̃hɨ a'tîro weékɨ niîwĩ. Kɨ̃ɨ̂ a'te kitíre diakɨ̃hɨ́ta niî' niîgɨ, pehé weé ĩ'yosere ĩ'yâ mariase me'ra ĩ'yókɨ niîwĩ. Tohô niikã́ Espírito Santo me'ra marîre a'tîro weékɨ niîwĩ. Kɨ̃ɨ̂ ɨaró noho pehé mehêkãri di'akɨ̃ wee masísere o'ôkɨ niîwĩ. Jesu Cristo marî weeró noho ɨpɨtígɨ niîmi niisé niî'

⁵ A'ti ɨmɨ́koho pe'tíka be'ro ape ɨmɨ́koho niîrosa'. Tii ɨmɨ́kohopɨre Õ'âkɨ̃hɨre werê ko'terã ɨ'mɨ̂sekãharã dutisé doka niîsome.

⁶ A'tîro pe'e niî'. Õ'âkɨ̃hɨ yee kiti ohâka pũripɨre ni'kɨ́ a'tîro ohâkɨ niîwĩ:

Õ'âkɨ̃hɨ, de'ró weégɨ masaré wãkûmiti mɨ'ɨ? Naâ boâ diharãre de'ró weeákɨhɨ toô kã'ro wãkû ke'timiti mɨ'ɨ?

⁷ Õ'âkɨ̃hɨ, yoâtikã masaré mɨ'ɨ̂re werê ko'terã doka niikã́ weékɨ niîwɨ. Tohô weemígɨ, naâre be'ropɨ́re wiôrã sõróokɨ niîwɨ. Naâre wiôrã sõróo, niî pe'tirã naâre “Ãyurã́ niîma”, niî wãkukã́ weékɨ niîwɨ.

⁸ Niî pe'tise mɨ'ɨ̂ bahúrẽ'kere masá dutiáto niîgɨ kũûkɨ niîwɨ, niî ohâkɨ niîwĩ. Õ'âkɨ̃hɨ niî pe'tisere masá dutisé doka niikã́ weékɨ niîwĩ. Tohô weéro neê apêye noho naâ bu'ipɨ nií wee'. Tohô niîmikã, masá niî pe'tisere dutîtima yuhûpɨ.

⁹ Jesu pũríkãre tohô ohâ'karo nohota wa'âkaro niîwɨ. Õ'âkɨ̃hɨ kɨ̃ɨ̂re a'ti nukúkãpɨre o'ôo'gɨ, kɨ̃ɨ̂re werê ko'terã dokapɨ kũû ni'ikɨ niîwĩ. Õ'âkɨ̃hɨ marîre pahá yã'agɨ, niî pe'tirãre wẽrî basa dutigɨ tohô kũûkɨ niîwĩ. Ni'kâroakãre kɨ̃ɨ̂ wẽrî pi'etí'ke wapa Õ'âkɨ̃hɨ kɨ̃ɨ̂re wiôgɨ sõróokɨ niîwĩ. Niî pe'tirã kɨ̃ɨ̂re “Ãyú yɨ'rɨgɨ niîmi” niî dutigɨ tohô weékɨ niîwĩ.

¹⁰ Niî pe'tise Õ'âkɨ̃hɨ yee niî'. Kɨ̃ɨ̂ tutuaró me'ra niî nu'ku'. Niî pe'tirã kɨ̃ɨ̂ põ'raré ɨ'mɨ̂sepɨ kɨ̃ɨ̂ wiôgɨ niirópɨ kɨ̃ɨ̂ me'ra niikã́ ɨamí. Tohô weégɨ kɨ̃ɨ̂ keoró weé sĩ'rigɨ, Jesu Cristo marîre yɨ'rɨógɨre pi'etíkã weékɨ niîwĩ.

¹¹ Jesu Cristo marî yã'âro weé'kere kõ'âkɨ niîwĩ. Marîre Õ'âkɨ̃hɨ yarã tohakã́ weékɨ niîwĩ. Marî Jesu Cristo me'ra ni'kɨ́ põ'ra niî'. Tohô weégɨ Õ'âkɨ̃hɨ makɨ marîre “Yɨ'ɨ̂ akawerérã niîma”, niî masimi. Marîre neê bopôya sãatimi.

¹² Õ'âkɨ̃hɨ yee kiti ohâka pũripɨ Jesu Cristo kɨ̃ɨ̂ pakɨré uúkũsere a'tîro ohâ no'okaro niîwɨ:

Mɨ'ɨ yeékãhasere, yɨ'ɨ̂ akawerérã mɨ'ɨ̂re ẽho peórãre werêgɨti. Masá nerê wɨaropɨ “Õ'âkɨ̃hɨ ãyú yɨ'rɨami”, niî mɨ'ɨ̂re basâ peogɨti.

¹³ Apêropɨ kẽ'rare a'tîro ohâ no'okaro niîwɨ:

Yɨ'ɨ̂ Õ'âkɨ̃hɨre ẽho peógɨti. Apêropɨre niî nemowɨ taha:

Õ'âkɨ̃hɨ põ'ra kɨ̃ɨ̂ yɨ'ɨ̂re o'ô'kãrã me'ra a'tó niî', niî ohâ no'okaro niîwɨ.

¹⁴ Marî wẽrî dihaatihi ɨpɨre kɨó'. Tohô weeró noho Jesu kẽ'ra marî weeró noho ɨpɨtíkɨ niîwĩ. Kɨ̃ɨ̂ marî weeró noho ɨpɨtígɨ, wẽrîkɨ niîwĩ. Kɨ̃ɨ̂ wẽrisé me'ra wãtî wẽrisé o'ogɨ́re dokâ ke'akã weékɨ niîwĩ.

¹⁵ Kɨ̃ɨ̂ wẽrisé me'ra wẽrisére uirã́re, tee doká niî nu'kurãre yɨ'rɨ wetíkã weékɨ niîwĩ.

¹⁶ A'tîro niî'. Jesu Cristo Õ'âkɨ̃hɨre werê ko'terã ɨ'mɨ̂sekãharãre wee tamúgɨ meheta a'tîkɨ niîwĩ. Marî Abraão paramérã niî turiarã Õ'âkɨ̃hɨ yarã pe'ere wee tamúgɨ a'tîkɨ niîwĩ.

¹⁷ Jesu Cristo marî kɨ̃ɨ̂ akawerérã weeró noho ɨpɨtíkɨ niîwĩ. Marîre yɨ'rɨó sĩ'rigɨ tohô weékɨ niîwĩ. Kɨ̃ɨ̂ wẽrisé me'ra marî yã'âro weé'kere kɨ̃ɨ̂ pakɨré akobohó dutikɨ niîwĩ. Kɨ̃ɨ̂ tohô weégɨ sacerdotea wiôgɨ masá yã'âro weé'kere Õ'âkɨ̃hɨre sẽri baságɨ weeró noho weékɨ niîwĩ. Marîre ãyuró wee tamú nu'ku sĩ'rigɨ tohô weékɨ niîwĩ. Niî pe'tise marî weeró noho weesétigɨ, marîre pahá yã'agɨti niîgɨ, tohô ɨpɨtíkɨ niîwĩ.

¹⁸ Pehé mehêkã wa'akã́, pi'etíkɨ niîwĩ. Tohô niikã́ wãtî kɨ̃ɨ̂re niî kehe sãakɨ niîwĩ. Tohô wa'asére wãkû tutuakɨ niîwĩ. Tohô weégɨ marîre mehêkã wa'akã́, wãtî marîre yã'âro wee dutíkã, wee tamú masimi.

3

¹ Yɨ'ɨ̂ akawerérã, Jesu Cristore ẽho peórã Õ'âkɨ̃hɨ besé no'o'kãrã Jesu Cristore ãyuró wãkû nɨrɨya. Kɨ̃ɨ̂ Õ'âkɨ̃hɨ yeere werê dutigɨ o'ôo' no'o'kɨ niîmi. Tohô niikã́ kɨ̃ɨ̂ sacerdotea wiôgɨ weeró noho Õ'âkɨ̃hɨre mari yeé niiátehere sẽri baságɨ weesamí.

² Dɨporópɨ Moisé Õ'âkɨ̃hɨ wee dutígɨ kũû'kere keoró weékɨ niîwĩ. Meharóta Jesu kẽ'ra Õ'âkɨ̃hɨ kɨ̃ɨ̂re kũû'kere keoró weékɨ niîwĩ.

³ Jesuré Moisé yɨ'rɨóro ãyuró wãkû yɨ'rɨ nɨ'karo ɨá'. A'té weeró noho niî'. Ni'kɨ́ wi'iré weesamí. Tií wi'i nemoró wi'i weé'kɨ pe'e ãyuró uúkũ no'osami. Jesutá wi'í weé'kɨ weeró noho niîmi.

⁴ Niî pe'tise wi'serire masá weemá. Õ'âkɨ̃hɨ pe'e niî pe'tisepɨreta weé'kɨ niîmi.

⁵ Moisé Õ'âkɨ̃hɨ yarãre ko'têgɨ, keoró weékɨ niîwĩ. Kɨ̃ɨ̂ da'rasé a'tîro niîkaro niîwɨ. Õ'âkɨ̃hɨ werê'kere werê mɨ'tagɨ niîkɨ niîwĩ.

⁶ Õ'âkɨ̃hɨ yarã ni'kâ wi'i weeró noho niîma. Õ'âkɨ̃hɨ besé'kɨ Cristo tií wi'ikɨ̃hɨ wiôgɨ makɨ niîmi. Kɨ̃ɨ̂ keoró weé nu'kumi. Tií wi'ikãharã maríta niî'. Marî Õ'âkɨ̃hɨre ẽho peó du'utirã, kɨ̃ɨ yarã́ niîrãsa'. Tohô niikã́ “Be'ropɨ́ kɨ̃ɨ̂ o'oátehere marîre o'ôgɨsami” niî ẽho peórã, kɨ̃ɨ yarã́ niîrãsa'. Õ'âkɨ̃hɨ me'ra niirã́ soó, e'katíse niî'

⁷ Espírito Santo Õ'âkɨ̃hɨ yee kiti ohâka pũripɨ niî'karo nohota marî ẽho peó du'utikã'ro ɨá'. A'tîro ohâ no'okaro niîwɨ:

A'tóka tero mɨsâ Õ'âkɨ̃hɨ uúkũsere tɨ'órã,

⁸ neê ehêri põ'ra bɨtîtikã'ya. Dɨporópɨ Õ'âkɨ̃hɨre yɨ'rɨ́ nɨ'ka'kãrã weeró noho niîtikã'ya. Naâ yukɨ́ mariró, masá marirópɨ niîka terore Õ'âkɨ̃hɨ dutisére ɨatíkãrã niîwã. Ɨatírã, Õ'âkɨ̃hɨre uakã́ weé nu'kukãrã niîwã.

⁹ Õ'âkɨ̃hɨ a'tîro niîkɨ niîwĩ: “Mɨsâ yẽkɨ sɨmɨá masá marirópɨ niîrã, yɨ'ɨ̂re uakã́ weewã́. Quarenta kɨ'mari yɨ'ɨ̂ ãyuró weesére ĩ'yâmirã, tohô weewã́.

¹⁰ Tohô weégɨ yɨ'ɨ̂ naâ me'ra uâkãti. A'tîro niîwɨ: ‘Mɨsâ no'ó ɨaró mehêkã di'akɨ̃ weé'. Yɨ'ɨ̂ dutisére neê ɨá wee'.’

¹¹ Tohô weégɨ naâ me'ra uâgɨ, ‘Diakɨ̃hɨ́ta a'tîro weegɨ́ti’ niîwɨ. ‘Yɨ'ɨ̂ mɨsâre o'oátihi di'tare neê ehâsome. Yɨ'ɨ̂ me'ra soó, e'katí tamusome’, niîwɨ naâre”, niîkɨ niîwĩ Õ'âkɨ̃hɨ.

¹² Yɨ'ɨ̂ akawerérã, tɨ'o masíya. Neê ni'kɨ́ yã'âro wãkû, ẽho peótigɨ niîtikã'ya. Yã'âro wãkûrã, kɨ̃ɨ̂re ẽho peótirã, mɨsâ Õ'âkɨ̃hɨ katî nu'kugɨre kõ'ârã wee boósa'.

¹³ A'tîro pe'e weeyá. Ɨmɨ̂kohori nɨkɨ a'mêri wãkû tutuakã weeyá. Niî pe'tise mɨsâ katirí ɨmɨ̂kohore, yã'âro weerí niîrã, a'mêri wee tamú nu'kukã'ya. Mɨsâ yã'âro weérã, nemoró yã'âro wee sãhá boosa'. Õ'âkɨ̃hɨre yɨ'rɨ́ nɨ'ka boosa'. Tohô weérã a'mêri wãkû tutuakã weeyá.

¹⁴ Marî neê waro Jesu Cristore ẽho peó'karo noho ẽho peó nu'kurã. Tohô weérã, marî Õ'âkɨ̃hɨ besé'kɨ Cristo wiôgɨ niirópɨ kɨ̃ɨ̂ me'ra niî nu'kurãsa'.

¹⁵ Yɨ'ɨ̂ niî'karo nohota a'tîro ohâ no'okaro niîwɨ:

Ni'kakã́ mɨsâ Õ'âkɨ̃hɨ uúkũsere tɨ'órã, mɨsâ ehêri põ'ra bɨtîtikã'ya. Dɨporókãharã Õ'âkɨ̃hɨre yɨ'rɨ́ nɨ'ka'kãrã weeró noho niîtikã'ya, niî no'okaro niîwɨ.

¹⁶ Dɨporókãharã Õ'âkɨ̃hɨ uúkũsere tɨ'omírã, kɨ̃ɨ̂re yɨ'rɨ́ nɨ'kakãrã niîwã. Naâ niî pe'tirã Egitopɨ niî'kãrã Moisé miáa no'o'kãrã niîkãrã niîwã. Tohô miáa no'o'kãrã niîmirã, Õ'âkɨ̃hɨre yɨ'rɨ́ nɨ'kakãrã niîwã.

¹⁷ Quarenta kɨ'mari Õ'âkɨ̃hɨ yã'âro weerã́ me'ra uâkɨ niîwĩ. Naâ yukɨ́ mariró, masá marirópɨ wẽrî baha ke'atikãrã niîwã.

¹⁸ Õ'âkɨ̃hɨ kɨ̃ɨ̂re yɨ'rɨ́ nɨ'ka'kãrãre “A'tîro weegɨ́ti” niîkɨ niîwĩ: “Yɨ'ɨ̂ naâre o'oátihi di'tare neê ehâsome. Naâ yɨ'ɨ̂ me'ra soó, e'katí tamusome”, niîkɨ niîwĩ.

¹⁹ Tohô weérã marî masî'. Naâ Õ'âkɨ̃hɨre ẽho peótise bu'iri kɨ̃ɨ̂ o'oátihi di'tare ehâ masitikãrã niîwã.

4

¹ Õ'âkɨ̃hɨ dɨporókãharãre “Soó, e'katí tamurã a'tiá”, niîkɨ niîwĩ. A'tîro niikã́ marí kẽ'rare meharóta niîgɨ weemí. Apé tero weérã ni'karérã mɨsâ tiropɨ niirã́ kɨ̃ɨ̂ me'ra soó, e'katí tamuti boosama. Tohô weérã ãyuró me'ra kɨ̃ɨ̂re yɨ'tiró ɨá'.

² Marí kẽ'ra dɨporókãharã weeró nohota masaré yɨ'rɨóse kitire werê no'o'kãrã niî'. Naâ marikã mehô waro tee kitíre tɨ'ókãrã niîwã. Teeré tɨ'omírã, ẽho peótikãrã niîwã.

³ Marî teeré ẽho peórã pũrikã, kɨ̃ɨ̂ me'ra soó, e'katí tamurãsa'. Õ'âkɨ̃hɨ ɨ'mɨ̂se, a'ti nukúkã weé tu'a eha nɨ'ko toha soókɨ niîwĩ. Dɨporópɨre “Soorã́sama” niî'kɨ niîmigɨ, masá marirópɨ sihâ'kãrãre uúkũgɨ, a'tîro niîkɨ niîwĩ:

Yɨ'ɨ̂re ẽho peótise bu'iri naâ me'ra uâgɨ, “Diakɨ̃hɨ́ta yɨ'ɨ̂ me'ra soó, e'katí tamusome”, niîwɨ, niîkɨ niîwĩ.

⁴ Apêropɨ Õ'âkɨ̃hɨ yee kiti ohâka pũripɨ kɨ̃ɨ̂ a'ti ɨmɨ́kohore wee tɨóka nɨmɨ be'rokãhá nɨmɨre a'tîro ohâ no'okaro niîwɨ:

Tii nɨmɨ́ niikã́, niî pe'tise kɨ̃ɨ̂ weéka be'ro saurúre soókɨ niîwĩ Õ'âkɨ̃hɨ.

⁵ Opâturi meharóta a'tîro ohâ no'owɨ taha:

Yɨ'ɨ̂ me'ra soó, e'katí tamurã wa'âsome, niîkɨ niîwĩ.

⁶ Dɨporókãharãpɨ Õ'âkɨ̃hɨ yɨ'rɨóse kitire tɨ'ó mɨ'ta'kãrã, naâ yɨ'rɨ́ nɨ'ka'ke bu'iri kɨ̃ɨ̂ me'ra soó, e'katí tamurã wa'âtikãrã niîwã. Ãpêrã pe'ere kɨ̃ɨ̂ me'ra soó, e'katí tamurã wa'aátoho dɨ'sá' yuhûpɨ.

⁷ Dɨporókãharãpɨ naâ soó, e'katí tamurã wa'âtikã ĩ'yâgɨ, Õ'âkɨ̃hɨ marî pe'ere ape nɨmɨ́ bese kũúkɨ niîwĩ. Kɨ̃ɨ̂ beséka nɨmɨ a'tóka tero niî'. Õ'âkɨ̃hɨ be'ropɨ́ Davi ohâ'ke me'ra marîre a'teré masikã́ weemí. Teeré Õ'âkɨ̃hɨ yee kiti ohâka pũripɨ a'tîro ohâkɨ niîwĩ:

A'tóka terore mɨsâ Õ'âkɨ̃hɨ uúkũsere tɨ'órã, mɨsâ ehêri põ'ra bɨtîtikã'ya, niîkɨ niîwĩ.

⁸ Too dɨpóropɨ Josué Israel kurakãharãre Canaã wamêtiropɨ sɨ'orí miáakɨ niîwĩ. Kɨ̃ɨ̂ naâre toopɨ́ miáa, naâre soosé o'ôtikɨ niîwĩ. Kɨ̃ɨ̂ o'ôka be'ro niikã́ maa, Õ'âkɨ̃hɨ be'ropɨ́re teeré uúkũ nemoti boopĩ.

⁹ Tohô weéro masî no'o'. Ãyú butia'se soosé Õ'âkɨ̃hɨ a'tí di'ta weéka be'ro soó'karo nohota marî kɨ̃ɨ yarã́re soosé dɨ'sá' yuhûpɨ, niî no'o'.

¹⁰ Õ'âkɨ̃hɨre ãyuró ẽho peógɨ, kɨ̃ɨ̂ me'ra soó, e'katí tamugɨsami. Kɨ̃ɨ̂ da'rasétisere kɨ̃ɨ̂ me'ra ãyuró tɨ'ó yã'agɨsami. Õ'âkɨ̃hɨ marikã kɨ̃ɨ̂ da'ráka be'ro soókɨ niîwĩ. Tohô weégɨ Õ'âkɨ̃hɨ me'ra niigɨ́ kɨ̃ɨ̂ me'ra soogɨ́sami.

¹¹ Õ'âkɨ̃hɨ me'ra soorã́ti niîrã, marí kẽ'ra wãkû tutuaro ɨá'. Dɨporókãharãpɨ Õ'âkɨ̃hɨre yɨ'rɨ́ nɨ'ka'karo weeró noho wee sirú tuutikã'ro ɨá'. Naâ ẽho peótise bu'iri kɨ̃ɨ̂ me'ra sootíkãrã niîwã.

¹² Õ'âkɨ̃hɨ yee uúkũse niî nu'kukã'. Tutuâ yɨ'rɨa'. Yõserí pĩhiho pɨ̂a pe'eseri ɨse yoháka pĩhi me'ra yõsêro weeró noho niî'. Tii pĩhí nemoró Õ'âkɨ̃hɨ uúkũse pũrikã marî po'peapɨ, marî ehêri põ'rapɨ, marî wãkusépɨ, niî pe'tiropɨ sãháasa'. Õ'âkɨ̃hɨ uúkũsere tɨ'órã, marî po'peapɨ wãkusére “Ãyú niî', ou yã'â niî'”, niî bese masí no'o'.

¹³ Marî Õ'âkɨ̃hɨ weé'kãrã niî'. Kɨ̃ɨ̂re neê du'ti masí wee'. Niî pe'tise marî niisére, marî weesére kɨ̃ɨ̂ ĩ'yâ masimi. Kɨ̃ɨ́ta marî weé'kere “De'ró weérã tohô weerí?” niî besegɨ́sami. Jesu sacerdotea wiôgɨ weeró noho niîmi niisé niî'

¹⁴ Jesu Õ'âkɨ̃hɨ makɨ sacerdotea wiôgɨ weeró noho marîre Õ'âkɨ̃hɨre sẽri baságɨ niîmi. Kɨ̃ɨ̂ Õ'âkɨ̃hɨ tiropɨ niîmi. Tohô weérã marî kɨ̃ɨ̂re ẽho peó nu'kukã'ro ɨá'.

¹⁵ Õ'âkɨ̃hɨre marîre sẽri baságɨ sacerdotea wiôgɨ weeró noho niîmi. Kɨ̃ɨ́ kẽ'ra marî weeró noho pi'etíkɨ niîwĩ. Tohô weégɨ marî tutuâtikã, marîre pahá yã'asami. Kɨ̃ɨ̂ niî pe'tise yã'âro wa'asére tɨ'ó yã'akɨ niîwĩ. Tohô niikã́ wãtî marîre yã'asére wee dutíro nohota Jesu kẽ'rare yã'asére wee dutíkɨ niîwĩ. Wãtî tohô wee dutímikã, Jesu pe'e neê ni'kâti yã'âro weetíkɨ niîwĩ.

¹⁶ Marîre kɨ̃ɨ̂ pahá yã'a yuukã, uiró mariró Õ'âkɨ̃hɨ kɨ̃ɨ̂ wee tamúsere sẽri masí'. Marîre ãyuró weegɨ́sami. Marîre mehêkã wa'akã́, kɨ̃ɨ̂re wee tamúse sẽrikã́, pahá yã'agɨsami.

5

¹ Sacerdotea wiôgɨre besérã, naâ wa'tero niigɨ́re besemá. Kɨ̃ɨ̂, masa yeékãhase niiátehere Õ'âkɨ̃hɨre sẽri baságɨ niîmi. Masá yã'âro weé'kere akobohóse sẽrígɨ, wa'îkɨ̃rãre wẽhé ɨ̃hâ moromi.

² Sacerdotea wiôgɨ marî weeró noho niîmi. Masɨ́ niîgɨ, kɨ̃ɨ́ kẽ'ra tutuâtimi. Tohô weégɨ tutuâtirãre, tɨ'o masítirãre, no'ó ɨaró wee bahá ke'atirãre pahá yã'asami.

³ Kɨ̃ɨ́ kẽ'ra kɨ̃ɨ̂ basi yã'âro weé'ke wapa ãpêrãre wee basáro nohota wa'îkɨ̃rãre wẽhé ɨ̃hâ morosami.

⁴ Neê ni'kɨ́ sacerdotea wiôgɨ kɨ̃ɨ̂ basi besé sãha masítisami. A'tîro pe'e weé no'osami. Õ'âkɨ̃hɨ basi besé sõróosami. Kɨ̃ɨ̂ Arãore weé'karo nohota weesamí.

⁵ Õ'âkɨ̃hɨ besé'kɨ Cristo kẽ'rare tohôta wa'âkaro niîwɨ. Cristo Õ'âkɨ̃hɨ tiropɨ sacerdotea wiôgɨ weeró noho wa'âgɨ, kɨ̃ɨ̂ basi besetíkɨ niîwĩ. Õ'âkɨ̃hɨ pe'e kɨ̃ɨ̂re besé sõróokɨ niîwĩ. Yɨ'ɨ̂ mɨsâre a'te dɨpóro ohâ'karo nohota a'tîro niîkɨ niîwĩ:

Mɨ'ɨ̂ yɨ'ɨ̂ makɨ niî'. Ni'kakã́ me'ra yɨ'ɨ̂ mɨ'ɨ̂ pakɨ niî' niisére ĩ'yó'.

⁶ Apêropɨ kẽ'rare Õ'âkɨ̃hɨ yee kiti ohâka pũripɨ kɨ̃ɨ̂ makɨré a'tîro niîkɨ niîwĩ:

Mɨ'ɨ̂ sacerdote niî nu'kugɨsa'. Melquisedeque niî'karo nohota niîgɨsa', niîkɨ niîwĩ.

⁷ Õ'âkɨ̃hɨ besé'kɨ Cristo a'ti nukúkãpɨ niîgɨ, kɨ̃ɨ̂re sẽríkɨ niîwĩ. Kɨ̃ɨ̂re sẽrígɨ, ɨpɨ́tɨ tutuaró me'ra, utisé me'ra Õ'âkɨ̃hɨre sẽríkɨ niîwĩ. Kɨ̃ɨ̂re wẽrîtikã wee masí boo'kɨre tohô sẽríkɨ niîwĩ. Kɨ̃ɨ̂ Õ'âkɨ̃hɨ ɨaró weékɨ niîwĩ. Kɨ̃ɨ̂ tohô weekã́ ĩ'yâgɨ, kɨ̃ɨ̂ sẽrisére tɨ'ókɨ niîwĩ.

⁸ Cristo Õ'âkɨ̃hɨ besé'kɨ kɨ̃ɨ̂ makɨ́ niîmigɨ, pi'etíkɨ niîwĩ. Tohô pi'etígɨ, Õ'âkɨ̃hɨ dutisére yɨ'tíkɨ niîwĩ. Teé me'ra Õ'âkɨ̃hɨre yɨ'tisére ãyuró masîkɨ niîwĩ.

⁹ Kɨ̃ɨ̂ wẽrîgɨ, niî pe'tise kɨ̃ɨ̂ pakɨ́ kũû'kere weékɨ niîwĩ. Tohô weégɨ kɨ̃ɨ̂ masaré yɨ'rɨógɨ sãháakɨ niîwĩ. Marî niî pe'tirã kɨ̃ɨ̂re ẽho peó yɨ'tirã́re yɨ'rɨó, katî nu'kukã weemí.

¹⁰ Õ'âkɨ̃hɨ Melquisedeque sacerdotea wiôgɨ warore weeró noho kɨ̃ɨ̂re sõróokɨ niîwĩ. Ẽho peó du'uri niîrã, wãkû tutuaya niisé niî'

¹¹ Õ'âkɨ̃hɨ besé'kɨ Cristo sacerdotea wiôgɨ waro Melquisedeque weeró noho niisére pehé werê sĩ'risa'. Tohô werê sĩ'rimikã, mɨsâ tɨ'o masíti, tɨ'ó sĩ'ritise bu'iri basió wee'.

¹² Mɨsâ yoakã́ Jesu Cristore ẽho peówɨ. Ni'kâroakãre ãpêrãre bu'erã́pɨ niî toha boosa'. Tohô niîmirã, Õ'âkɨ̃hɨ yeere mehô niiseákãre opâturi werê apokã ɨá'. Mɨsâ tutuâti butia'rã weeró noho wa'â' taha. Tohô weérã diâsatiseakãre ãyuró tɨ'óro noho o'ôrã, tɨ'otí yɨ'rɨokã'. Ba'asére ba'âro noho o'ôrã, ni'kâroakãre wekɨ̂ õpekṍre sĩ'rirã́ weeró noho niî' yuhûpɨ.

¹³ Wekɨ̂ õpekṍ di'akɨ̃re sĩ'rirã́, wi'marã́ waro niîma. Mɨsâ naâ wi'marã́ weeró noho diakɨ̃hɨ́ weesére Õ'âkɨ̃hɨ yeekãhasere masí wee'.

¹⁴ Ba'asé bɨtisé pe'e bɨkɨrã́ ba'asé niî'. Naâ diâsasere masîma. Ãyusére, yã'asére bese poó'kãrãpɨ niîma.

6

¹ Marî ãyuró ẽho peórã niî sĩ'rirã, Cristo yee kiti diâsasere bu'êrã. Marîre bu'ê mɨ'ta'kere opâturi bu'êtikã'rã maha. Bu'ê tohawɨ teé maa. Marî bu'ê mɨ'ta'ke a'tîro niîwɨ. Marî yã'âro weé'kere akobohóse sẽri dutíwɨ. Tohô yã'âro weé'ke bu'iri pekâ me'epɨ wa'â boopã, niîwɨ. Marî wãkusé dɨka yuúro ɨá' niisére bu'êwɨ. Tohô niikã́ Õ'âkɨ̃hɨre ẽho peóro ɨá' niisére bu'ê mɨ'tawɨ. A'té neê waro bu'ê nɨ'ka'kere weetíkã'rã maha.

² Apêye kẽ'rare wamê yeesere, Yãa peó Espírito Santore kɨokã́ weesére bu'ê mɨ'tawɨ. Tohô niikã́ wẽrî'kãrã masarã́sama, yã'âro weé'kãrã pekâ me'epɨ bu'îri da'rê no'orãsama niisére bu'êwɨ.

³ Ni'kâroakã Õ'âkɨ̃hɨ kɨ̃ɨ̂ ɨakã́, apêyere, diâsasere bu'ê nemo boosa'.

⁶

⁴ Mɨsâ apé tero weérã Jesu Cristo yee kitire ẽho peómirã, ẽho peó du'u boosa'. Õ'âkɨ̃hɨ masaré katî nu'kusere o'ôkɨ niîwĩ. Kɨ̃ɨ̂ o'ômikã, naâ ẽho peó du'u boosama. Tohô ẽho peó du'urã nohore a'tîro niî'. Naâ wãkusére opâturi neê dɨka yuú masitisama. Tohô niikã́ Espírito Santore kɨorã́ noho, no'ó Õ'âkɨ̃hɨ yee kiti ãyusé kitire masirã́ noho teeré ẽho peó du'urã, neê opâturi naâ wãkusére dɨka yuú masitisama. Õ'âkɨ̃hɨ tutuasé o'osére masîmirã Jesu Cristore ẽho peó du'urã, neê opâturi akobohóse sẽri masítisama. Kɨ̃ɨ̂re ẽho peó du'urã, naâ basi Õ'âkɨ̃hɨ makɨre opâturi kurúsapɨ paâ bi'perã weeró noho weérã weemá. Niî pe'tirã ĩ'yóropɨ kɨ̃ɨ̂re yabî buhíkã'rã weemá.

⁷ Õ'âkɨ̃hɨ masaré ãyuró weesé a'tîro niî'. Masá di'tâ weeró noho niîma. Õ'âkɨ̃hɨ naâre ãyuró weesé akôro pehâro weeró noho niî'. Niî pe'tisetiri akôro pehasétiri nɨkɨ di'tâpɨ si'bî sãha'. Akó di'tâpɨre ãyuró si'bî sãhaka be'ro naâ otesé ãyuró pĩ'rí dɨkâtisa'. Tohô dɨkâtikã, tií di'ta wiôgɨre ãyú niî'. Õ'âkɨ̃hɨ “Ãyusé di'ta niî'”, niîsami. Tohô weeró noho ãyuró weerã́re e'katíse me'ra naâre ĩ'yâsami.

⁸ Ãpêrã pe'e yã'asé di'ta weeró noho niîma. Yã'asé di'tapɨre akôro pehâmikã, potâ, yã'asé di'akɨ̃ bahuása'. Tií di'ta wapa marí'. Tií di'ta wiôgɨ teeré ĩ'yâgɨ, “Yã'asé niî', ɨ̃hâ kõ'arã”, niîsami. Kɨ̃ɨ̂ niî'karo noho Õ'âkɨ̃hɨ kẽ'ra kɨ̃ɨ̂re ẽho peó du'urãre meharóta niîsami. Marî ɨ'mɨ̂sepɨ niiátehere e'katí yuurã ẽho peó du'usome niisé niî'

⁹ Yɨ'ɨ̂ ma'irã́, ɨ̃hâ kõ'asere uúkũmigɨ, yɨ'ɨ̂ “Õ'âkɨ̃hɨ mɨsâre ɨ̃hâ kõ'agɨsami”, niîgɨ meheta weé'. Mɨsâ yɨ'rɨó no'o'kãrãpɨ niî'. Tohô weérã ãyuró weé'.

¹⁰ Õ'âkɨ̃hɨ keoró weegɨ́ niîmi. Kɨ̃ɨ̂ mɨsâ akawerérã Jesu Cristore ẽho peórãre mɨsâ ãyuró weé'kere akobohósome. Naâre mɨsâ wee tamúsere akobohósome. Mɨsâ naâre ãyuró weérã, Õ'âkɨ̃hɨre ma'isére ĩ'yó'.

¹¹ Mɨsâ a'tîro weekã́ ɨpɨ́tɨ ɨá'. Ãpêrãre wee tamúrã, mɨsâ nɨkɨ e'katíse me'ra ãyuró weé sĩ'risere tohôta weé yapatíkã'ya. Tohô weéro Õ'âkɨ̃hɨ “O'ôgɨti” niî'ke keoró mɨsâ wãkû'karo nohota wa'ârosa'.

¹² Mɨsâ nihî siharã dohokã́ ɨatísa'. Ãpêrã Jesu Cristore ẽho peórã weeró noho weeyá. Naâ, naâre yã'âro wa'akã́, wãkû tutuama. Neê Jesu Cristore ẽho peó du'utima. Naâ tohô weekã́ ĩ'yâgɨ, Õ'âkɨ̃hɨ naâre kɨ̃ɨ̂ “O'ôgɨti” niî'kere o'ôgɨsami. Mɨsá kẽ'ra naâre ĩ'yâ kũu, wee sirú tuuya.

¹⁶

¹³ Masá diakɨ̃hɨ́ta niî' niîrã, naâ yɨ'rɨóro niigɨ́ me'ra wamê peorã weesamá. Naâ tohô niî wamê peokã, naâre “Tohô nií wee'”, niîta basiótisa'. Õ'âkɨ̃hɨ pũrikã Abraãore mɨ'ɨ̂re ãyuró weegɨ́ti niîgɨ, ãpí wamé me'ra wamê peotikɨ niîwĩ. Neê ni'kɨ́ Õ'âkɨ̃hɨ nemoró niî yɨ'rɨ nɨ'kagɨ marimí. Tohô weégɨ a'tîro weegɨ́ti niîgɨ, kɨ̃ɨ̂ basi wamê peokɨ niîwĩ. A'tîro niîkɨ niîwĩ: “Diakɨ̃hɨ́ta niî'. Mɨ'ɨ̂re ãyú butia'ro weegɨ́ti. Mɨ'ɨ̂ paramérã pãharã́ niî turiarãsama”, niîkɨ niîwĩ. Abraão kɨ̃ɨ̂ tohô niî'kere sohâtikɨ niîwĩ. Tohô weégɨ Õ'âkɨ̃hɨ kɨ̃ɨ̂re “Tohô weegɨ́ti” niî'kere yẽ'êkɨ niîwĩ.

¹⁷ Õ'âkɨ̃hɨ “Masaré ãyuró weegɨ́ti” niî'kere dɨka yuúsome niîgɨ, kɨ̃ɨ̂ basi wamê peokɨ niîwĩ. Marîre kɨ̃ɨ̂ “O'ôgɨti” niî'kere yẽ'êrãsa' niî masî dutigɨ tohô weékɨ niîwĩ.

¹⁸ Tohô weéro teé pɨáro kɨ̃ɨ̂ wamê peose, kɨ̃ɨ̂ “Masaré ãyuró weegɨ́ti” niî'ke neê dɨka yuúta basió wee'. Õ'âkɨ̃hɨ neê niî soo masitimi. Kɨ̃ɨ̂ diakɨ̃hɨ́ uúkũse me'ra marî kɨ̃ɨ̂ yɨ'rɨó no'o'kãrãre wãkû tutuakã weemí. Kɨ̃ɨ̂ marîre “Ãyuró weegɨ́ti” niî'karo nohota weegɨ́sami, niî no'o'.

¹⁹ Teeré wãkûrã, marî ɨ'mɨ̂sepɨ niiátehere e'katíse me'ra ko'tê yuurã, ẽho peó du'usome. Marî ko'tê yuuse niî nu'kukã'rosa'. Dɨka yuúsome. Jesu ɨ'mɨ̂se Õ'âkɨ̃hɨ niirópɨ sãháakɨ niîwĩ. Tohô weérã marî tohô tɨ'ó yã'a'.

²⁰ A'tîro niî'. Judeu masa sacerdotea wiôgɨ Õ'âkɨ̃hɨ wi'i po'peapɨ kɨ̃ɨ̂ Niî butia'ri Tũkupɨ sãháagɨ, a'tîro weesamí. Ɨ̃se bɨtíri kaserore yɨ'rɨ sãháasami. Jesu kɨ̃ɨ̂ wẽrîka be'ro ɨ'mɨ̂sepɨ sãháagɨ, tii kasérore yɨ'rɨágɨ weeró noho weékɨ niîwĩ. Marî ɨ'mɨ̂sepɨ wa'aátihi ma'are pãâ basagɨ weékɨ niîwĩ. Kɨ̃ɨ̂ tohô weesé me'ra sacerdotea wiôgɨ waro weeró noho tohákɨ niîwĩ. Kɨ̃ɨ̂ Melquisedeque niî'karo nohota sacerdote niî nu'kugɨsami.

7

¹ Dɨporókɨ̃hɨ Melquisedeque wamêtigɨ Salẽ́ wamêtiri maka wiôgɨ niîkɨ niîwĩ. Kɨ̃ɨ̂ sacerdote niî yuugɨ, Õ'âkɨ̃hɨ niî pe'tirã bu'ipɨ niigɨ́re masaré sẽri basákɨ niîwĩ. Kɨ̃ɨ̂ niîka terore Abraão ãpêrã wiôrã me'ra a'mê wẽhegɨ wa'âkɨ niîwĩ. Kɨ̃ɨ yarã́ me'ra naâre dokâ ke'akã weékɨ niîwĩ. Kɨ̃ɨ̂ tohô wee dahákã, Melquisedeque kɨ̃ɨ̂re põo tẽrígɨ ehâkɨ niîwĩ. Kɨ̃ɨ̂re põo tẽrígɨ, “Õ'âkɨ̃hɨ mɨ'ɨ̂re ãyuró weeáto”, niîkɨ niîwĩ.

² Kɨ̃ɨ̂ tohô niîka be'ro Abraão naâ wiôrã yee niîmi'kere kɨ̃ɨ̂ miîkã'ti'kere pɨámukãse mesari dɨka waá kũukɨ niîwĩ. Ni'kâ mesare Melquisedequere o'ôkɨ niîwĩ. Melquisedeque wamé “Wiôgɨ keoró weegɨ́” niî sĩ'riro weé'. Kɨ̃ɨ̂ Salẽ́ wamêtiri maka wiôgɨ niî tĩhagɨ, “Ehêri põ'rapɨ ãyuró tɨ'ó yã'akã weegɨ́” niîkɨ niîwĩ. Salẽ́ niîro “Ehêri põ'rapɨ ãyuró tɨ'ó yã'ase” niî sĩ'riro weé'.

³ Melquisedeque pakɨ sɨmɨáre, kɨ̃ɨ̂ yẽkɨ sɨmɨáre neê masî no'oya marí'. Kɨ̃ɨ̂ bahuá'kere, kɨ̃ɨ̂ wẽrî'ke kẽ'rare neê masî no'oya marí'. Tohô weégɨ Melquisedeque Õ'âkɨ̃hɨ makɨ Jesu Cristo sacerdote niî nu'kuakɨhɨ weeró noho niîkɨ niîwĩ.

⁴ Mɨsâ Melquisedequere wãkûya. Mehô niigɨ́ meheta niîkɨ niîwĩ. Marî yẽkɨ Abraão waro marikã naâ wiôrã yee niîmi'kere kɨ̃ɨ̂ miîkã'ti'kere pɨámukãse mesari kɨ̃ɨ̂ see neéo kũû'kere kɨ̃ɨ̂re ni'kâ mesare o'ô wapa yeékɨ niîwĩ.

⁵ Moisé dutî'ke sacerdoteare o'ô dutisere a'tîro ohâ no'okaro niîwɨ: “Levi paramérã niî turiarã sacerdotea niirã́ di'akɨ̃re kã'ró wapa seeáto”, niîwɨ. Abraão kɨ̃ɨ̂ o'ô'karo nohota masá naâ kɨosére o'ô dutiwɨ. Naâ, naâ akawerérã niîmikã, tohô niikã́ Abraão paramérã niîmirã, naâ o'osére yẽ'êkãrã niîwã.

⁶ Melquisedeque pũrikã Levi paramí niî turiatimigɨ, a'tîro weékɨ niîwĩ. Abraão Õ'âkɨ̃hɨ “Ãyuró weegɨ́ti” niî no'o'kɨre kɨ̃ɨ̂ kɨosére o'okã́, yẽ'êkɨ niîwĩ. Teeré yẽ'êgɨ, Abraãore “Õ'âkɨ̃hɨ mɨ'ɨ̂re ãyuró weeáto”, niî sẽri basákɨ niîwĩ.

⁷ A'té diakɨ̃hɨ́ta niî'. “Õ'âkɨ̃hɨ mɨ'ɨ̂re ãyuró weeáto” niigɨ́ pe'e ãpí “Tohôta weeáto” niî yɨ'tigɨ́ nemoró wiôgɨ niî yɨ'rɨ nɨ'kami.

⁸ A'tóka tero sacerdotea marî wa'tero niirã́ ãpêrã o'osére yẽ'erã́ marî weeró noho masá niîma. Naá kẽ'ra wẽrîsama. Abraão o'ô'kere yẽ'ê'kɨ Melquisedeque pe'e maa Õ'âkɨ̃hɨ yee kiti ohâka pũripɨ katî nu'kugɨ weeró noho niigɨ́re ohâ no'okaro niîwɨ. Kɨ̃ɨ̂ katî nu'kugɨ weeró noho uúkũ no'omi.

¹⁰

⁹ Levi Abraão paramí niîkɨ niîwĩ. Kɨ̃ɨ̂ paramérã niî turiarã kẽ'ra Abraão paramérã niîkãrã niîwã. Levi, tohô niikã́ niî pe'tirã kɨ̃ɨ̂ paramérã niî turiarã sacerdotea niîkãrã niîwã. Naâ, masá o'osére yẽ'êkãrã niîwã. Abraão Melquisedequere a'mêri boka ehákã, naá kẽ'ra marí'kãrã niîmirã, Abraão me'ra niîrã weeró noho niîkãrã niîwã. Tohô weéro a'tîro niîta basió'. Levi paramérã niî turiarãpɨ Abraão Melquisedequere o'okã́, naá kẽ'ra kɨ̃ɨ̂re o'ô tamu'kãrã weeró noho niîkãrã niîwã.

¹¹ Israel kurakãharã, sacerdotea Levi yaá kurakãharã me'ra Õ'âkɨ̃hɨ dutisére yẽ'êkãrã niîwã. Naâ Levi yaá kurakãharã Arão paramérã niî turiarã niîkãrã niîwã. Naâ sacerdotea ãpêrã Õ'âkɨ̃hɨ dutisére siru tuúrãre ãyurã́ wa'akã́ wee masítikãrã niîwã. Wee masíkã pũrikãre, Õ'âkɨ̃hɨ ãpí sacerdote sõróoti boopĩ. Ãpiré sõróogɨ, Arão yaa kurakɨ̃hɨre sõróotikɨ niîwĩ. Melquisedeque weeró noho niigɨ́ pe'ere sõróokɨ niîwĩ.

¹² Ãpí sacerdote sãhakã́, too dɨpórokãhase dutisé kẽ'ra dɨka yuúsa'.

¹³ Marî wiôgɨ Jesu Cristore Õ'âkɨ̃hɨ yee kiti ohâka pũripɨ a'tîro niîkɨ niîwĩ: “Mɨ'ɨ̂ sacerdote Melquisedeque niî'karo noho niî nu'kugɨsa'”, niîkɨ niîwĩ. Jesu Cristo sacerdote niiákɨhɨ niîmigɨ, Levi yaá kurakɨ̃hɨ niîtikɨ niîwĩ. Kɨ̃ɨ yaá kurakɨ̃hɨ neê ni'kɨ́ sacerdote sãhatíkɨ niîwĩ.

¹⁴ A'tîro masî no'o', marî wiôgɨ Jesu Cristo Judá yaá kurakɨ̃hɨ niîkɨ niîwĩ. Moisé sacerdoteare uúkũgɨ, neê ni'kâti “Judá yaá kurakãharã sacerdotea niîrãsama”, niîtikɨ niîwĩ.

¹⁶

¹⁵ Ãpí sacerdote Melquisedeque weeró noho niigɨ́ bahuáse me'ra a'tîro masî no'o'. Jesu Cristo sacerdote sãhakã́, Levi yaá kurakãharã sacerdoteare sõróo duti'karo noho wa'âtikaro niîwɨ. Kɨ̃ɨ̂ katî nu'kugɨ niisé me'ra pe'e sacerdote sãháakɨ niîwĩ.

¹⁷ Õ'âkɨ̃hɨ Jesu Cristore a'tîro niîkɨ niîwĩ:

Mɨ'ɨ̂ sacerdote niî nu'kuakɨhɨ niî'. Melquisedeque niî'karo nohota niîgɨsa', niîkɨ niîwĩ.

¹⁸ Õ'âkɨ̃hɨ too dɨpóro kɨ̃ɨ̂ dutisé kũû mɨ'ta'kere mehô niisé tohakã́ weékɨ niîwĩ. Teé masaré ãyuró niisétikã weetíkaro niîwɨ.

¹⁹ A'tîro niî'. Moisé dutî'kere yɨ'tírã, masá ãyurã́ wa'âtikãrã niîwã. Ni'kâroakã maa marî Jesu Cristore ẽho peórã, ãyurã́ tohá'. Õ'âkɨ̃hɨre masîta basió'. Tohô weérã ãyuró e'katí yuu'.

²⁰ Õ'âkɨ̃hɨ kɨ̃ɨ̂ makɨré sacerdote sõróogɨ, kɨ̃ɨ̂ basita “Diakɨ̃hɨ́ weegɨ́ti”, niîkɨ niîwĩ.

²¹ Ãpêrã sacerdotea pe'ere sõróogɨ, tohô niîtikɨ niîwĩ. Õ'âkɨ̃hɨ kɨ̃ɨ̂ makɨré sõróogɨ, kɨ̃ɨ̂ basi wamê peo, sõróokɨ niîwĩ. Õ'âkɨ̃hɨ kɨ̃ɨ yeé kiti ohâka pũripɨre a'tîro ohâ no'okaro niîwɨ:

“Yɨ'ɨ̂ basita diakɨ̃hɨ́ tohô weegɨ́ti” niî'ke dɨka yuú no'oya marirósa'. Mɨ'ɨ̂ sacerdote niî nu'kuakɨhɨ niî'. Melquisedeque weeró nohota niîgɨsa', niîkɨ niîwĩ.

²² Kɨ̃ɨ̂ tohô niî'kere a'té me'ra masî no'o'. Jesu me'ra Õ'âkɨ̃hɨ “Masaré ãyuró weegɨ́ti” niî'kere diakɨ̃hɨ́ta niîgɨ weepĩ́, niî no'o'. Kɨ̃ɨ̂ Moisé me'ra “Masaré ãyuró weegɨ́ti” niî mɨ'ta'ke nemoró a'té be'rokãháse pe'e ãyú yɨ'rɨ nɨ'ka'.

²³ Sacerdotea pãharã́ waro sãha mɨhákãrã niîwã. Naâ wẽrisé bu'iri niî nu'ku masitikãrã niîwã. Naâ wẽrîka be'ro ãpêrã dɨka yuú mɨhakãrã niîwã.

²⁴ Jesu pũríkã katî nu'kukɨ̃'sami. Kɨ̃ɨ̂ sacerdote niisére ãpêrãre dɨka yuú turiasome.

²⁵ Tohô weégɨ Õ'âkɨ̃hɨre masî sĩ'rirãre yɨ'rɨ wetí dohakã weemí. Kɨ̃ɨ̂re ẽho peórãre tohô weemí. Kɨ̃ɨ̂ katî nu'kugɨ mari yeé niiátehere Õ'âkɨ̃hɨre sẽri basá nu'kumi.

²⁶ Tohô weégɨ Jesu sacerdotea wiôgɨ waro niîmi. Kɨ̃ɨ̂ nohoreta marî ɨá'. Kɨ̃ɨ̂ yã'asé moogɨ́, ãyú butia'gɨ, yã'âro weetígɨ niîmi. Marî yã'âro weerã́ weeró noho niîtimi. Õ'âkɨ̃hɨ kɨ̃ɨ̂re niî pe'tirã bu'ipɨ kũûkɨ niîwĩ.

²⁷ Kɨ̃ɨ̂ ãpêrã sacerdotea wiôrã weeró noho niîtimi. Sacerdotea wiôrã ɨmɨ̂kohori nɨkɨ naâ yã'âro weé'kere akobohósere sẽrírã, wa'îkɨ̃rãre wẽhé ɨ̃hâ morosama. Be'ró ãpêrã yeere meharóta wee basásama. Jesu Cristo pe'e a'tîro weékɨ niîwĩ. Kɨ̃ɨ̂ ni'kâtita naâ wa'îkɨ̃rãre wẽhé ɨ̃hâ moro peo'karo weeró noho weégɨ, kɨ̃ɨ̂ basi kɨ̃ɨ̂ wẽrisé me'ra masá yã'âro weé'kere wẽrî wapa yeé pe'okã'kɨ niîwĩ. Kɨ̃ɨ̂ niî pe'tirã yee niiátehere tohô wee basákɨ niîwĩ.

²⁸ Moisé dutî'ke me'ra sacerdotea wiôgɨre sõróorã, a'tîro weé no'o'karo niîwɨ. Kɨ̃ɨ̂re sõróorã, kɨ̃ɨ̂ ãyuró weé nu'kutimikã, bese sõróo no'okaro niîwɨ. Tohô weéka be'ro Õ'âkɨ̃hɨ pe'e diakɨ̃hɨ́ta kɨ̃ɨ̂ basi kɨ̃ɨ̂ makɨré sacerdotea wiôgɨ waro sõróokɨ niîwĩ. Kɨ̃ɨ̂ makɨ́ ãyugɨ́ niî nu'kugɨre tohô weékɨ niîwĩ.

8

¹ Niî pe'tise ni'kâroakã yɨ'ɨ̂ ohâ'ke a'tîro niî'. Jesu Cristo mari yagɨ́ sacerdotea wiôgɨ waro niîmi. Kɨ̃ɨ̂ ɨ'mɨ̂sepɨ wiôgɨ duhirí kumuro Õ'âkɨ̃hɨ tutuâ yɨ'rɨgɨ tiro diakɨ̃hɨ́ pe'e ehâ nuhakɨ niîwĩ.

² Kɨ̃ɨ̂ ɨ'mɨ̂sepɨ Õ'âkɨ̃hɨ Niî butia'ri Tũkupɨre sacerdotea wiôgɨ weeró noho niîsami. Tií wi'i Õ'âkɨ̃hɨ weéka wi'i niísa'. Masa mehéta weepã́.

³ A'tí di'tapɨ maa sacerdotea wiôrãre wa'îkɨ̃rãre wẽhé ɨ̃hâ moro peo dutiro sõróo no'okaro niîwɨ. Tohô niikã́ apêyere o'ô dutirã sõróo no'okãrã niîwã. Tohô weégɨ Jesu Cristo kẽ'ra Õ'âkɨ̃hɨre apêye noho o'okã́, ãyú tɨ'sa' niîgɨ wẽrîgɨ, kɨ̃ɨ̂re apêye noho o'ôgɨ weeró noho weékɨ niîwĩ.

⁴ Jesu Cristo a'ti nukúkãpɨre toha dohágɨ, neê kã'ró sacerdote niîti boopĩ. Ãpêrã sacerdotea Moisé dutî'karo nohota Õ'âkɨ̃hɨre apêyere o'orã́ niî tohakãrã niîwã. Tohô weéro basióti boopã.

⁵ A'ti nukúkãpɨ sacerdotea Õ'âkɨ̃hɨ yeekãhasere da'rarã́ a'tîro weemá. Naâ Õ'âkɨ̃hɨ wi'i ɨ'mɨ̂sepɨ niirí wi'ikãhasere weeró noho weérã weemá. Marî masî'. Ɨ'mɨ̂sekãha wi'i pe'e tií wi'i waro niî'. A'ti nukúkãkãha wi'i pe'e ɨ'mɨ̂sekãha wi'i weeró noho ĩ'yóro weé'. Tohô weégɨ Õ'âkɨ̃hɨ kɨ̃ɨ yaá wi'i a'ti nukúkãkãha wi'ire wee dutígɨ, Moisére a'tîro niîkɨ niîwĩ: “Ãyuró wãkûya. Niî pe'tise yaá wi'ikãhasere mɨ'ɨ̂re ɨ̃rɨgɨ́pɨ ĩ'yó'karo nohota weeyá”, niîkɨ niîwĩ.

⁶ A'tóka tero maa maha Jesu sacerdotea wiôgɨ waro Õ'âkɨ̃hɨ tiropɨ marîre sẽri basá nu'kugɨ niîmi. Kɨ̃ɨ̂ weesé ãpêrã sacerdotea yeé nemoró ãyú yɨ'rɨ nɨ'ka'. A'tîro niî'. Õ'âkɨ̃hɨ neê waro masá me'ra apógɨ, “Yɨ'ɨ̂ dutî'kere weérã, yarã́ niîrãsama”, niîkɨ niîwĩ. Be'roré taha masá me'ra apógɨ, “Mɨsâ wiôgɨ niîgɨti. Mɨsâre yarã́ wa'akã́ weegɨ́ti. Mɨsâre akobohógɨti. Yɨ'ɨ̂ me'ra katî nu'kurãsa'”, niîkɨ niîwĩ. Kɨ̃ɨ̂ tohô niî'kere masî no'o'. Kɨ̃ɨ̂ niî mɨ'ta'ke nemoró be'rokãháse pe'e ãyú yɨ'rɨ nɨ'ka'. Teé be'rokãhasere Jesutá keoró wa'akã́ weékɨ niîwĩ. Tohô weéro ãpêrã sacerdotea weesé nemoró ãyú yɨ'rɨ nɨ'ka'.

⁷ A'tîro niî'. Õ'âkɨ̃hɨ neê waro masá me'ra apó'ke keoró wa'âtikaro niîwɨ. Keoró wa'akã́ maa, masá me'ra opâturi apo nemóti boopĩ.

⁸ Õ'âkɨ̃hɨ neê warokãharãre “Yɨ'ɨ̂ dutî'kere keoró weetíma”, niîkɨ niîwĩ. Naâre kɨ̃ɨ yeé kiti ohâka pũripɨ a'tîro ohâ no'okaro niîwɨ:

Marî wiôgɨ a'tîro niîmi: “Be'ropɨ́ yɨ'ɨ̂ Israel kurakãharãre, tohô niikã́ Judá yaá kurakãharãre opâturi ãyuró naâ me'ra wee apógɨti taha.

⁹ Too dɨpóropɨ naâ yẽkɨ sɨmɨá me'ra weegɨ́ti niî apó'karo noho niîsome. Naâre Egitopɨ niî'kãrãre yɨ'ɨ̂ basi mii wiháawɨ. Naâre ‘Ãyuró weegɨ́ti’, niîmiwɨ. Naâ pe'e yɨ'ɨ̂ dutî'kere weetíwã. Tohô weégɨ naâre kõ'â wã'kawɨ”, niîkɨ niîwĩ marî wiôgɨ.

¹⁰ “Be'ropɨ́ Israel kurakãharã me'ra opâturi ‘Ãyuró weegɨ́ti’ niî'ke a'tîro niî'. Yɨ'ɨ̂ dutî'kere naâre wãkukã́ weegɨ́ti. Tohô niikã́ naâre yɨ'ɨ̂ dutî'kere ẽho peókã weegɨ́ti. Tohô weégɨ yɨ'ɨ̂ naâ wiôgɨ niîgɨti. Naá kẽ'ra yarã́ niîrãsama.

¹¹ Naâ neê ni'kɨré yɨ'ɨ̂ Õ'âkɨ̃hɨ niisére bu'êsome. Neê kɨ̃ɨ̂ me'rakɨ̃hɨre, kɨ̃ɨ̂ akawerégɨre, ‘Õ'âkɨ̃hɨre masîya’, niîsome. Niî pe'tirã yɨ'ɨ̂re masîrãsama. Wi'marã́, tohô niikã́ bɨkɨrã́ masîrãsama.

¹² Naâ yã'âro weé'kere akobohógɨti.

Neê opâturi teeré wãkû nemosome”, niîkɨ niîwĩ marî wiôgɨ.

¹³ Õ'âkɨ̃hɨ neê waropɨ “Masaré ãyuró weegɨ́ti”, niîkɨ niîmiwĩ. Be'ró, “Opâturi masá me'ra ãyuró weegɨ́ti”, niî apókɨ niîwĩ taha. Tohô weéro kɨ̃ɨ̂ niî mɨ'ta'ke pe'e pe'tiá wa'âkaro niîwɨ. Niî pe'tise mehá ɨá no'oya marí'. Teé maatá pe'ti diháse niî'.

9

¹ Ni'kâroakã maa a'tîro niîgɨti. Õ'âkɨ̃hɨ neê waro “Masá me'ra ãyuró weegɨ́ti” niîka terore kɨ̃ɨ̂re sẽrí, ẽho peórã wee wɨá dutise nohore kũûkɨ niîwĩ. Naâ sẽrí, ẽho peóri wi'i a'ti nukúkãkãha wi'i niîkaro niîwɨ.

² Tií wi'i wa'îkɨ̃rã kaseri me'ra weéka wi'i niîkaro niîwɨ. Neê sãháari tũku Ãyurí Tũku wamêtikaro niîwɨ. Toopɨ́re sĩ'óo'kɨhɨ nu'kúkaro niîwɨ. Tohô niikã́ naâ Õ'âkɨ̃hɨre o'ôrã pãuré peoró nu'kúkaro niîwɨ.

³ Ɨ̃se bɨtíri kaseroho yɨ'rɨropɨ ape tũkú Õ'âkɨ̃hɨ Niî butia'ri Tũku niîkaro niîwɨ.

⁴ Tii tũkúpɨ ɨ'mɨ̂tihise ɨ̃hâ moro peo wɨaro ouro me'ra weé'karo niîkaro niîwɨ. Tohô niikã́ Õ'âkɨ̃hɨ “Masá me'ra ãyuró weegɨ́ti” niî'kere kɨorí akaro, ouro kasero me'ra omá bi'aka akaro kũyákaro niîwɨ. Tii akáro po'peapɨ ni'kârɨ ouro me'ra weékarɨ niîkaro niîwɨ. Tirɨpɨ́ ba'asé maná wamêtise sãyâkaro niîwɨ. Apêye kẽ'ra Arão yagɨ tuakɨhɨ́ niîkagɨ yãsâ wihikɨ niîkaro niîwɨ. Tohô niikã́ Õ'âkɨ̃hɨ dutî'kere ohâ'ke pĩhiri ɨ̃tâ pĩhiri sãyâkaro niîwɨ.

⁵ Tii akáro bu'ipɨre Õ'âkɨ̃hɨre werê ko'terã ɨ'mɨ̂sekãharã yeê'kãrã nu'kúkãrã niîwã. Naâ toopɨ́ niî yuukã, Õ'âkɨ̃hɨ toopɨ́ niisére ĩ'yó no'okaro niîwɨ. Õ'âkɨ̃hɨre werê ko'terã wɨɨsé dokapɨ sacerdotea wiôgɨ Õ'âkɨ̃hɨre masaré yã'âro weé'kere akobohó dutigɨ diî wehêste peokɨ niîwĩ. Ni'kâroakãre niî pe'tise tií wi'ikãhasere werê nemo masitisa'.

⁶ Õ'âkɨ̃hɨ wi'ire apóka be'ro sacerdotea naâ da'ra wɨásere weérã, niî mɨ'tari tũkupɨre sãhá nu'kukã'kãrã niîwã.

⁷ Ape tũkú pe'ere sacerdotea wiôgɨ waro di'akɨ̃ ni'kâtita, ni'kâ kɨ'mare sãháakɨ niîwĩ. Toopɨ́ sãháagɨ, wa'îkɨ̃rã wẽhé'kãrã yee diîre mii sãháakɨ niîwĩ. Kɨ̃ɨ̂ basi yã'âro weé'ke wapa, tohô niikã́ masá naâ yã'âro weé'ke wapare akobohóse sẽrígɨ tohô weékɨ niîwĩ.

⁸ Tohô weé'ke me'ra a'tóka terore Espírito Santo a'tîro marîre ĩ'yomí. Too dɨpóropɨ sacerdotea Õ'âkɨ̃hɨ wi'ipɨ wee wɨáse noho ni'kâroakãre weé nu'kukã maa, marî ɨ'mɨ̂sepɨre neê sãháa masiti boosa'.

⁹ A'té niî pe'tise too dɨpórokãhasere a'tóka terore a'tîro masî no'o'. Tiîtapɨre Õ'âkɨ̃hɨre o'osé, naâ wa'îkɨ̃rãre ɨ̃hâ moro peose masaré bu'îri marirã́ tɨ'ó yã'akã wee masítikaro niîwɨ.

¹⁰ Teé naâ weeséti'ke a'tîro niîkaro niîwɨ. Sĩ'risé, ba'asé, tohô niikã́ naâ Õ'âkɨ̃hɨre sẽriátoho dɨporo naâ yã'âro weé'kere koesétise niîkaro niîwɨ. Teé dutisé bu'îkãhase di'akɨ̃ niîkaro niîwɨ. Tohô weesé teê Õ'âkɨ̃hɨ teeré dɨka yuúka be'ropɨ ãyúkaro niîwɨ.

¹¹ Õ'âkɨ̃hɨ besé'kɨ Cristo a'tî tohakɨ niîwĩ. Ni'kâroakãre kɨ̃ɨ̂ pe'e sacerdotea wiôgɨ waro niîmi. Kɨ̃ɨ̂ marîre ãyusére miítikɨ niîwĩ. Ni'kâroakãre kɨ̃ɨ̂ sacerdotea wiôgɨ wee wɨáse nohore Õ'âkɨ̃hɨ wi'i ɨ'mɨ̂sepɨ niirí wi'ipɨ weégɨ weesamí. Ɨ'mɨ̂sepɨ niirí wi'i, a'ti nukúkãkãha wi'i nemoró, ãyú butia'ri wi'i niísa'. Masá weéka wi'i meheta niísa'.

¹² Õ'âkɨ̃hɨ besé'kɨ Cristo ɨ'mɨ̂sekãha wi'i Õ'âkɨ̃hɨ Niî butia'ri Tũku waropɨre sãháakɨ niîwĩ. Kɨ̃ɨ̂ wa'îkɨ̃rã, cabrakã, wekɨ̂ wi'marã́ yee diire mii sãhátikɨ niîwĩ. Tohô weeró noho o'ôgɨ, kɨ̃ɨ yeé diî me'ra, kɨ̃ɨ̂ wẽrisé me'ra sãháakɨ niîwĩ. Teé me'ra marî niî pe'tirãre ni'kâti me'rata wẽrî basakɨ niîwĩ. Marîre katî nu'ku dutigɨ tohô weékɨ niîwĩ.

¹³ Dɨporókãharãpɨ naâ wẽrî'kãrãre da'rá yã'aka be'ro Õ'âkɨ̃hɨ ĩ'yóropɨre yã'asé kɨorã́ weeró noho tohákãrã niîwã. Tohô weérã wekɨá ɨmɨa yeé diîre, cabra yee diîre, tohô niikã́ wekɨ̂ wi'magó ɨ̃hâ no'o'ko yee nitî me'ra yã'asé kɨorã́ weeró noho niirã́re wehêste peokãrã niîwã. Naâre Õ'âkɨ̃hɨ ĩ'yóropɨre yã'asé moorã́ toha dutírã tohô weékãrã niîwã. Diakɨ̃hɨ́ta niî', niîro pe'ea'. Naâ, bu'îpɨ di'akɨ̃ ãyurã́ tohákãrã niîwã.

¹⁴ Wekɨ yeé diî me'ra, cabra yee diî me'ra tohô weetá basiókã maa, Cristo yee diî me'ra maa tãhâ'. Cristo Espírito Santo niî nu'kugɨ wee tamúse me'ra wa'îkɨ̃rã ɨ̃hâ moro peoro noho o'ôgɨ, kɨ̃ɨ̂ basi Õ'âkɨ̃hɨre wiágɨ, wẽrîkɨ niîwĩ. Kɨ̃ɨ̂ kurúsapɨ wẽrîgɨ, yã'asé moogɨ́ niîkɨ niîwĩ. Kɨ̃ɨ yeé diî me'ra marî bu'îritirã, yã'âro weeséti tɨ'ó yã'a'kere pekâ me'epɨ wa'â boo'kãrãre yɨ'rɨ wetíkã weékɨ niîwĩ. Kɨ̃ɨ̂ Õ'âkɨ̃hɨ katî nu'kugɨ yeere weé nu'ku dutigɨ tohô weékɨ niîwĩ.

¹⁵ Tohô weégɨ Jesu Cristo a'tîro weegɨ́ niîmi. Be'ropɨ́re masaré opâturi Õ'âkɨ̃hɨ “Yɨ'ɨ̂ mɨsâ wiôgɨ niîgɨti. Mɨsâ, yarã́ niîrãsa'” niî'kere apo baságɨ niîmi. Too dɨpórokãharã pe'e Õ'âkɨ̃hɨ niî mɨ'tase kɨ̃ɨ̂ dutî'ke doka niîrã, yã'âro weé, kɨ̃ɨ̂ dutî'kere yɨ'rɨ́ nɨ'kakãrã niîwã. Jesu Cristo wẽrisé me'ra teeré akobohó no'okãrã niîwã. Tohô niikã́ Õ'âkɨ̃hɨ besé'kãrã kɨ̃ɨ̂ “O'ôgɨti” niî'ke katî nu'kusere yẽ'êrãsama.

¹⁶ A'tîro weeró noho niî'. Ni'kɨ́ kɨ̃ɨ̂ wẽriátoho dɨporo kɨ̃ɨ̂ akawerégɨre “Yɨ'ɨ̂ kɨosé mɨ'ɨ yeé toharósa'”, niîsami. Kɨ̃ɨ̂ wẽrikã́ ĩ'yârã, wẽrî'kɨ yee niî'kere kɨ̃ɨ̂re o'ôsama.

¹⁷ Kɨ̃ɨ̂ wẽriátoho dɨporo kɨ̃ɨ̂ “O'ôgɨti” niî'kere yẽ'ê masitisami. Kɨ̃ɨ̂ wẽrîka be'ropɨ di'akɨ̃ yẽ'ê masisami.

¹⁸ Tohô weéro Õ'âkɨ̃hɨ “Masaré a'tîro weegɨ́ti” niî mɨ'ta'ke kẽ'rare tohôta wa'âkaro niîwɨ. Wa'îkɨ̃rãre wẽhé, naa yeé diî wehêstese me'ra di'akɨ̃ Õ'âkɨ̃hɨ “Tohô weegɨ́ti” niî'ke wa'â nɨ'kakaro niîwɨ.

¹⁹ Moisé a'tîro weékɨ niîwĩ. Kɨ̃ɨ̂ niî pe'tise Õ'âkɨ̃hɨ dutî'kere niî pe'tirã tɨ'óropɨ bu'êkɨ niîwĩ. Bu'ê toha nɨ'ko, kɨ̃ɨ̂ sõ'arí kasero ovelha poari me'ra weéka kaserore miîkɨ niîwĩ. Tohô niikã́ yukɨ̂ siti hissopo wamêtiri sitire pe'êkɨ niîwĩ. Wekɨ̂ makɨ wẽhé no'o'kɨ yee diîre, cabra yee diîre akó me'ra morékɨ niîwĩ. Be'ró sõ'arí kaserore tii sití dɨpɨpɨ dɨ'té õ'o, teé diîpɨ yoso miíkɨ niîwĩ. Be'ró Õ'âkɨ̃hɨ yee dutî'ke ohâka pũrire, tohô niikã́ masá niî pe'tirãre wehêste peokɨ niîwĩ.

²⁰ Kɨ̃ɨ̂ tohô weéka be'ro naâre niîkɨ niîwĩ: “A'té diî me'ra Õ'âkɨ̃hɨ masaré ‘Tohô weegɨ́ti’ niî'kere masî no'o'”, niîkɨ niîwĩ.

²¹ Apêyere, Moisé Õ'âkɨ̃hɨ wi'ire a'tîro weékɨ niîwĩ. Niî pe'tise tií wi'i po'peapɨ Õ'âkɨ̃hɨre ẽho peórã naâ kɨosére diî me'ra wehêste peokɨ niîwĩ.

²² Tiîtare Õ'âkɨ̃hɨ dutisé a'tîro niîkaro niîwɨ. Diî me'ra Õ'âkɨ̃hɨ wi'ipɨ niisére kɨ̃ɨ̂ ĩ'yóropɨ ãyusé toha dutíro wehêste peo no'okaro niîwɨ. Wehêste peoya marikã́, Õ'âkɨ̃hɨ masá yã'âro weé'kere akobohótikɨ niîwĩ. Diî me'ra di'akɨ̃ Õ'âkɨ̃hɨ masá yã'âro weesére akobohó no'o'. Jesu kɨ̃ɨ̂ wẽrisé me'ra masá yã'âro weé'kere yɨ'rɨóse niî'

²³ Dɨporókãhase Õ'âkɨ̃hɨ wi'ipɨ wee wɨáse noho ɨ'mɨ̂sekãhase weeró noho ĩ'yóro weékaro niîwɨ. Teeré Õ'âkɨ̃hɨ ĩ'yóropɨ ãyusé toha dutírã a'tîro weékãrã niîwã. Wa'îkɨ̃rãre wẽhé, naa yeé diî me'ra wehêste peokãrã niîwã. Dɨporókãharã naâ weé'ke nemoró ɨ'mɨ̂sekãhase pe'e ãyú yɨ'rɨ nɨ'ka'. Tohô weéro wa'îkɨ̃rãre ɨ̃hâ moro peo'ke nemoró, ãyusé warore ɨá'. Teé Jesu Cristo wẽrisé niî'.

²⁴ A'ti nukúkãpɨre Jesu Cristo masá weéka wi'i Ãyurí Tũku wamêtiri tũkupɨre sãháatikɨ niîwĩ. Tií wi'i ɨ'mɨ̂sekãha wi'i weeró noho ĩ'yóro weékaro niîwɨ. Kɨ̃ɨ̂ ɨ'mɨ̂se waro pe'ere sãháakɨ niîwĩ. Ni'kâroakãre kɨ̃ɨ̂ Õ'âkɨ̃hɨ tiropɨ marîre sẽri baságɨ weesamí.

²⁵ Too dɨpóropɨ sacerdotea wiôgɨ Judeu masɨ Õ'âkɨ̃hɨ Niî butia'ri Tũkupɨre ni'karétirita kɨ'mâri nɨkɨ wa'îkɨ̃rã yee diîre mii sãháa mɨhakɨ niîwĩ. Teé diî, kɨ̃ɨ yeé diî niîtikaro niîwɨ. Cristo pũrikãre kɨ̃ɨ yeé diî waro niîkaro niîwɨ. Kɨ̃ɨ̂ wẽrisé me'ra ni'kâtita ɨ'mɨ̂se Õ'âkɨ̃hɨ tiropɨ sãháakɨ niîwĩ.

²⁶ Jesu Cristo sacerdotea wiôgɨ weeró noho weégɨ pũrikã, a'tí di'ta dɨ'pôkãtikãpɨta wẽrî nɨ'ka, a'tîro niikã́ kẽ'rare wẽrî nu'kukã' boosami. Tohô weeró noho o'ôgɨ, a'tóka tero a'ti ɨmɨ́koho pe'tí wã'kari kurare Cristo a'ti nukúkãpɨre bahuákɨ niîwĩ. Kɨ̃ɨ̂ ni'kâtita niî pe'tirã yee niiátehere wẽrî basakɨ niîwĩ. Yã'âro weé'kere kõ'âgɨ, tohô weékɨ niîwĩ.

²⁷ Marí kẽ'ra niî pe'tirã ni'kâti me'rata wẽrî diharãsa'. Wẽrîka be'ro Õ'âkɨ̃hɨ marîre besegɨ́sami.

²⁸ Cristo ni'kâtita kɨ̃ɨ̂ wẽrisé me'ra wa'îkɨ̃rãre wẽhé ɨ̃hâ moro peoro weeró noho weékɨ niîwĩ. Tohô weesé me'ra masá niî pe'tirã yã'âro weé'kere kõ'âkɨ niîwĩ. Be'ró opâturi a'tîgɨsami. Masá naâ yã'âro weé'kere kõ'âgɨ meheta a'tîgɨsami. Masá kɨ̃ɨ̂re yuû kuerã pe'ere yɨ'rɨógɨ a'tîgɨ weegɨ́sami.

10

¹ Moisé dutisé Õ'âkɨ̃hɨ masaré be'ropɨ́ ãyuró weeátehere ĩ'yóro weékaro niîwɨ. Tohô weéro Moisé dutî'ke masaré Õ'âkɨ̃hɨ me'ra ãyuró niî masikã weetíkaro niîwɨ. Teé a'tîro niîkaro niîwɨ. Naâ Õ'âkɨ̃hɨ me'ra ãyuró niî sĩ'rirã, ni'kâti kɨ'mâri nɨkɨ wa'îkɨ̃rãre wẽhé ɨ̃hâ moro peokãrã niîwã. Teé naâre Õ'âkɨ̃hɨ ĩ'yóropɨ ãyurã́ tohakã́ wee masítikaro niîwɨ.

² Teé masaré ãyurã́ tohakã́ wee masíkã maa, naâ wa'îkɨ̃rãre ɨ̃hâ moro peosere du'úkã' boopã. Naâ ni'kâti ɨ̃hâ moro peose me'rata naâ yã'âro weé'kere akobohó no'o'kãrãpɨ tohá toha boopã. Naâ bu'îri marirã́ tɨ'ó yã'a boopã.

³ A'tîro pe'e niîkaro niîwɨ. Naâ wa'îkɨ̃rãre wẽhé ɨ̃hâ moro peorã, naâ yã'âro weé'kere kɨ'mâri nɨkɨ wãkûrã, tohô weékãrã niîwã.

⁴ Wekɨá ɨmɨa yeé diî, cabra yee diî yã'âro weé'kere neê kõ'â masitisa'.

⁵ Tohô weégɨ Jesu Cristo a'ti nukúkãpɨre a'tîgɨ, Õ'âkɨ̃hɨre a'tîro niîkɨ niîwĩ:

Mɨ'ɨ̂ masá yã'âro weé'kere akobohó sĩ'rigɨ, wa'îkɨ̃rãre wẽhé ɨ̃hâ moro peosere ɨá wee'. Tohô niikã́ naâre akobohó sĩ'rigɨ, apêye noho o'okã́ ɨá wee'. A'tîro weégɨ, mɨ'ɨ̂ ni'kâ ɨpɨ yɨ'ɨ̂re o'ôkɨ niîwɨ. Masá yã'âro weé'kere wẽrî basa dutigɨ tohô weékɨ niîwɨ.

⁶ Mɨ'ɨ̂ masá naâ yã'âro weesére kõ'â sĩ'rigɨ, wa'îkɨ̃rãre ɨ̃hâ moro peosere, tohô niikã́ apêye noho o'osére tɨ'sá wee'.

⁷ Tohô tɨ'sâtise bu'iri yɨ'ɨ̂ a'tîro niîwɨ: “Õ'âkɨ̃hɨ, mɨ'ɨ̂ ɨaró weégɨ a'tîgɨ weé'. Mɨ'ɨ yeé kiti ohâka pũripɨ yɨ'ɨ̂ pi'etiátehere ohâ no'o'karo nohota weegɨ́ti”, niîkɨ niîwĩ Jesu Cristo.

⁸ Tohô weégɨ Jesu Cristo niî'karo nohota a'tîro niî'. Õ'âkɨ̃hɨ wa'îkɨ̃rã ɨ̃hâ moro peosere, kɨ̃ɨ̂re apêye noho o'osére tɨ'sâtisami. Tohô niikã́ masá yã'âro weé'kere kõ'â sĩ'rirã ɨ̃hâ moro peosere ɨatísami. Niî pe'tise teé tohô weesé Moisé dutî'karo noho niîkaro niîwɨ. Tohô niîmikã, Õ'âkɨ̃hɨ pe'e tohô weesére tɨ'sâtikɨ niîwĩ.

⁹ Jesu Cristo Õ'âkɨ̃hɨre “Mɨ'ɨ̂ ɨaró weégɨ a'tîgɨ weé'”, niîkɨ niîwĩ. Tohô niîgɨ, wa'îkɨ̃rã wẽhé ɨ̃hâ moro peosere kõ'âkɨ niîwĩ. Kɨ̃ɨ̂ wẽrisé me'ra too dɨpóropɨ naâ weeséti'kere dɨka yuúkɨ niîwĩ.

¹⁰ Jesu Cristo kɨ̃ɨ̂ wẽrisé me'ra Õ'âkɨ̃hɨ ɨaró weékɨ niîwĩ. Teeré weégɨ, kɨ̃ɨ̂ wa'îkɨ̃rã wẽhé ɨ̃hâ moro peosere weeró noho weégɨ weékɨ niîwĩ. Kɨ̃ɨ̂ wẽrisé me'ra Õ'âkɨ̃hɨ marîre kɨ̃ɨ yarã́ tohakã́ weékɨ niîwĩ. Ni'kâtita kɨ̃ɨ̂ wẽrisé me'ra marî niî pe'tirãre wẽrî basakɨ niîwĩ.

¹¹ Niî pe'tirã Judeu masa sacerdotea ɨmɨ̂kohori nɨkɨ a'tîro weékãrã niîwã. Nu'ku tĩhárã, wa'îkɨ̃rãre wẽhé ɨ̃hâ moro peo mɨhakãrã niîwã. Naâ ɨ̃hâ moro peo nu'kumikã, masá yã'âro weé'kere neê kõ'â masitikaro niîwɨ.

¹² Jesu Cristo pũrikã ni'kâti kɨ̃ɨ̂ wẽrisé me'rata masá yã'âro weé'kere kõ'â pe'okɨ niîwĩ. Kɨ̃ɨ̂ tohô weéka be'ro Õ'âkɨ̃hɨ tiro diakɨ̃hɨ́ pe'e ehâ nuhakɨ niîwĩ.

¹³ Toopɨ́ yuû kuegɨ weesamí. Õ'âkɨ̃hɨ niî pe'tirã kɨ̃ɨ̂re ĩ'yâ tu'ti'kãrãre dokâ ke'akã weéka be'ropɨ weé du'ugɨsami.

¹⁴ Ni'kâti kɨ̃ɨ̂ wẽrisé me'rata Õ'âkɨ̃hɨ yarãre ãyurã́ tohakã́ weékɨ niîwĩ. Naâ ãyurã́ niî nu'kurãsama.

¹⁵ Teé diakɨ̃hɨ́ta niî yuukã, Espírito Santo kẽ'ra marîre “Tohôta niî'”, niî werêmi. Kɨ̃ɨ̂ a'tîro werê mɨ'takɨ niîwĩ:

¹⁶ “Be'ropɨ́ yɨ'ɨ̂ naâ me'ra ‘Opâturi ãyuró weegɨ́ti’ niî'ke a'tîro niî'”, niîkɨ niîwĩ Õ'âkɨ̃hɨ.

“Yɨ'ɨ̂ dutî'kere naâre wãkukã́ weegɨ́ti. Tohô niikã́ naâre yɨ'ɨ̂ dutî'kere ẽho peókã weegɨ́ti.”

¹⁷ Be'ró a'tîro niî nemokɨ niîwĩ:

“Neê opâturi naâ yã'âro weé'kere wãkû nemosome”, niîkɨ niîwĩ, niî werêkɨ niîwĩ Espírito Santo.

¹⁸ Tohô weérã marî yã'âro weé'kere akobohó no'oka be'ro niî yuukã, opâturi marî yã'âro weé'ke bu'irire akobohó dutirã wa'îkɨ̃rãre ɨ̃hâ moro peosere ɨa nemó wee'. Jesu Cristo yee diî me'ra Õ'âkɨ̃hɨ tiro sãháa masi' niisé niî'

¹⁹ Too dɨpóro sacerdotea wiôgɨ di'akɨ̃ Õ'âkɨ̃hɨ Niî butia'ri Tũkupɨre sãháa masikɨ niîwĩ. Ni'kâroakãre marí kẽ'ra akobohó no'o'kãrãpɨ niîrã, uiró mariró kɨ̃ɨ̂ sãháa'karo noho wee masí'. Õ'âkɨ̃hɨpɨre diakɨ̃hɨ́ uiró mariró sẽri masí'. Jesu Cristo kɨ̃ɨ̂ wẽrî'ke me'ra, kɨ̃ɨ yeé diî a'mâ bɨro'ke me'ra tohô wee masí'.

²⁰ Too dɨpóropɨ ɨ̃se bɨtíri kaseroho Õ'âkɨ̃hɨ Niî butia'ri Tũkupɨre ka'mú ta'a yosakaro niîwɨ. Tii kaséro ka'mú ta'a'karo weeró noho Jesu Cristo wẽriátoho dɨporo masá Õ'âkɨ̃hɨ Niî butia'ri Tũkupɨre sãháa masitikãrã niîwã. Ni'kâroakãre kɨ̃ɨ̂ wẽrisé me'ra marî tii tũkúpɨre sãháa'kãrã weeró noho kɨ̃ɨ̂ me'ra katî nu'ku masi'.

²¹ Jesu Cristo sacerdotea wiôgɨ waro ɨ'mɨ̂sepɨ Õ'âkɨ̃hɨ wi'ipɨ marîre sẽri baságɨ niîmi.

²² Tohô weérã Õ'âkɨ̃hɨre keoró wãkusé, ãyuró ẽho peóse me'ra sẽrirã́. “Tohô ẽho peó ma'akãrã weésa'” niiró mariró sẽrirã́. A'tîro niî'. Kɨ̃ɨ̂ marî yã'âro bu'îritirã tɨ'ó yã'a'kere bu'îri marirã́ tohakã́ weékɨ niîwĩ. Mari yaá ɨpɨ akó ãyusé me'ra ɨ'ó no'o'karo weeró noho niî'. Marî yã'âro weé'kere kõ'â pe'o no'o'kãrãpɨ niî'.

²³ Õ'âkɨ̃hɨ “Tohô weegɨ́ti” niî'kere weegɨ́sami. Tohô weérã marî ẽho peósetisere ẽho peóro nohota neê dɨka yuúro mariró ẽho peó nu'kurã. Kɨ̃ɨ̂ o'oátehere e'katíse me'ra yuû kuerã, tohô weerã́.

²⁴ Marî basi a'tîro wãkuró ɨá'. “Ã'raré, ãpêrãre wee tamú turia dutigɨ, de'ró weegɨ́sari?” niî wãkuró ɨá'. “Naâre a'mêri ma'i dutígɨ, ãyuró wee dutí sĩ'rigɨ tohô ɨa sãá'”, niiró ɨá'.

²⁵ Õ'âkɨ̃hɨre ẽho peórã nerê wɨaropɨ ãpêrã nerêtisama. Naâ weesére siru tuútikã'ro ɨá'. Naâre siru tuúro noho o'ôrã, marî nerêrã, a'mêri wãkû tutuakã weeró ɨá'. Kã'ró dɨ'sá' marî wiôgɨ a'tiátoho. Tohô weérã tohô weeró ɨá'.

²⁶ A'tîro niî'. Diakɨ̃hɨ́kãhasere masîmirã, marî yã'âro weé sĩ'riro bahuró yã'âro weé nu'kurã, akobohóse bokasomé. Jesu Cristo wẽrisé me'ra di'akɨ̃ akobohó no'o'. Marî yã'âro weé nu'kurã, kɨ̃ɨ̂re ɨatírã weeró noho niî'. Tohô weérã neê akobohó no'osome.

²⁷ Marî yã'âro weé nu'kukã, marîre a'tîro wa'ârosa'. Õ'âkɨ̃hɨ marîre besegɨ́sami. Kɨ̃ɨ̂ beséka be'ro pekâ me'epɨ ãpêrã kɨ̃ɨ̂re ĩ'yâ tu'ti'kãrã me'ra kõ'âgɨsami. Marîre “Bu'îri da'rêgɨti” kɨ̃ɨ̂ niî'ke tuu nɨrɨ́se di'akɨ̃ tohá'.

²⁸ Too dɨpóropɨre no'ó Moisé dutî'kere yɨ'rɨ́ nɨ'kagɨre pɨárã ou i'tiárã werê sãaka be'ro kɨ̃ɨ̂re neê pahá yã'atikãrã niîwã. Kɨ̃ɨ̂re wẽhé kõ'akãrã niîwã.

²⁹ Ãyuró wãkûya. Õ'âkɨ̃hɨ dutî'ke kɨ̃ɨ̂ Moisére kũû'kere yɨ'rɨ́ nɨ'kagɨ, bu'îri da'rê no'okɨ niîwĩ. Ni'kâroakã maa Õ'âkɨ̃hɨ makɨ kɨ̃ɨ̂re wẽrî basa'kere ẽho peó du'ugɨre tãhâsami. Ẽho peótigɨ noho Õ'âkɨ̃hɨ makɨ kɨ̃ɨ̂re wẽrî basa'kere “Wapa marí'”, niî wãkûsami. Espírito Santo kɨ̃ɨ̂re ma'isére yabîsami. A'tîro niî'. Jesu Cristo wẽrisé me'ra Õ'âkɨ̃hɨ masaré kɨ̃ɨ̂ “Weegɨ́ti” niî'kere keoró wa'akã́ weékɨ niîwĩ. Kɨ̃ɨ̂ wẽrisé me'ra, kɨ̃ɨ yeé diî me'ra marî yã'âro weé'kere kõ'âkɨ niîwĩ. Tohô weégɨ Õ'âkɨ̃hɨ kɨ̃ɨ̂ makɨré ɨatígɨre ɨpɨ́tɨ bu'îri da'rêgɨsami.

³⁰ Õ'âkɨ̃hɨ marî wiôgɨ uúkũ'kere masî'. A'tîro niîkɨ niîwĩ: “Yɨ'ɨ̂ bu'îri da'reákɨhɨ niî'. Naâ weé'ke wapare yɨ'ɨ̂ wapa yeégɨsa'.” Apêye kẽ'rare niîkɨ niîwĩ: “Marî wiôgɨ kɨ̃ɨ yarã́re naâ yã'âro weesé wapare bu'îri da'rêgɨsami.”

³¹ Õ'âkɨ̃hɨ katî nu'kugɨ niîmi. Kɨ̃ɨ̂ bu'îri da'resé pũûro wiosé niî'.

³² Mɨsâ neê waro ẽho peóka be'ro weé'kere wãkûya. Tiîtare mɨsâ Jesu Cristore ẽho peóse bu'iri pũûro pi'etíkãrã niîwɨ. Mɨsâre tohô wa'â'kere wãkû tutuakãrã niîwɨ.

³³ Ni'karérã masá ĩ'yóropɨ yabî buhíkã' no'okãrã niîwɨ. Kamî da're no'okãrã niîwɨ. Apé terore ãpêrã naâ pi'etísere tɨ'ó yã'a tamukãrã niîwɨ.

³⁴ Mɨsâ bu'îri da'rerí wi'ipɨ niirã́re pahá yã'akãrã niîwɨ. Ãpêrã mɨsa yeére e'makã́, e'katíse me'ra nɨ'kákãrã niîwɨ. Mɨsâ ɨ'mɨ̂sepɨ kɨoátehe pe'ere “A'ti nukúkãkãhase nemoró, ãyú yɨ'rɨ nɨ'kase niî'”, niîkãrã niîwɨ. Teé pe'titiátehe niî' niîrã, wãkû tutuakãrã niîwɨ.

³⁵ Tohô weérã neê ẽho peó du'utikã'ya. Ẽho peó nu'kurã, ãyusé warore yẽ'êrãsa'.

³⁶ Mɨsâre wãkû tutuarã niiró ɨá'. Tohô weérã, Õ'âkɨ̃hɨ ɨaró weéka be'ro kɨ̃ɨ̂ “O'ôgɨti” niî'kere mɨsâ yẽ'êrãsa'.

³⁷ Õ'âkɨ̃hɨ yee kiti ohâka pũripɨ a'tîro niî ohâ no'okaro niîwɨ:

“Maatá a'tîgɨti” niî'kɨ a'tîgɨsami. Neê yogosomé.

³⁸ Yɨ'ɨ̂ “Ãyuró weerã́ niîma” niî no'orã pũrikã ẽho peó nu'kurã, yɨ'ɨ̂ me'ra niî nu'kurãsama. Ãpêrã uîrã, ẽho peó du'urã pũrikãre neê tɨ'sâsome, niî ohâ no'okaro niîwɨ.

³⁹ Marî pe'e uî ẽho peó du'urã noho nií wee'. Tohô weérã marî pekâ me'epɨ wa'âsome. Marî kɨ̃ɨ̂re ẽho peórã, yɨ'rɨó no'orãsa'.

11

¹ Marî ẽho peórã, a'tîro niî masi': “Õ'âkɨ̃hɨ marîre niî'kere diakɨ̃hɨ́ta weegɨ́sami”, niî'. Teeré ĩ'yâtimirã, ĩ'yârã weeró noho “Diakɨ̃hɨ́ta niî'”, niî'.

² Dɨporópɨ marî yẽkɨ sɨmɨá Õ'âkɨ̃hɨre ẽho peókãrã niîwã. Naâ a'tîro niî wãkûkãrã niîwã: “Õ'âkɨ̃hɨ niî'karo nohota marîre wee tamúgɨsami”, niîkãrã niîwã. Tohô weégɨ Õ'âkɨ̃hɨ naâre “Ãyurã́ niîma”, niîkɨ niîwĩ.

³ Marî Õ'âkɨ̃hɨre ẽho peórã, a'tîro masî'. Kɨ̃ɨ̂ a'ti ɨmɨ́koho niî pe'tisere bahúrẽ'gɨ, kɨ̃ɨ̂ dutiró me'ra bahúrẽ'kɨ niîwĩ. Tohô weéro a'ti ɨmɨ́kohokãhase marî ni'kâroakã ĩ'yasé neê waropɨ marí'kere weé'ke niî', niî no'o'.

⁴ Dɨporókɨ̃hɨpɨ Abel Õ'âkɨ̃hɨre ẽho peógɨ, Õ'âkɨ̃hɨre ovelha wi'magɨ́re wẽhé ɨ̃hâ moro peokɨ niîwĩ. Kɨ̃ɨ̂, kɨ̃ɨ̂ ma'mi Caĩ́ o'ô'ke nemoró ãyuró o'ôkɨ niîwĩ. Õ'âkɨ̃hɨ Abel ẽho peósere ĩ'yâgɨ, kɨ̃ɨ̂ o'osére yẽ'êkɨ niîwĩ. Kɨ̃ɨ̂re “Ãyugɨ́ niîmi”, niîkɨ niîwĩ. Tohô weéro Abel dɨporópɨ wẽrîka be'ro niîmikã, a'tîro niî'. Kɨ̃ɨ̂ Õ'âkɨ̃hɨre ẽho peó'ke a'tóka terore marîre bu'esé niî'. Marí kẽ'ra kɨ̃ɨ̂ ẽho peó'karo nohota Õ'âkɨ̃hɨre ẽho peóro ɨá'.

⁵ Enoque wamêtigɨ kẽ'ra Õ'âkɨ̃hɨre ẽho peógɨ niîkɨ niîwĩ. Kɨ̃ɨ̂ wẽrîtimikã, Õ'âkɨ̃hɨ kɨ̃ɨ̂re kɨ̃ɨ̂ tiropɨ miáakɨ niîwĩ. Ãpêrã kɨ̃ɨ̂re a'mâkãrã niîmiwã. Neê bokatíkãrã niîwã. Õ'âkɨ̃hɨ yee kiti ohâka pũripɨ a'tîro ohâ no'okaro niîwɨ: “Õ'âkɨ̃hɨ Enoquere e'katíse me'ra ĩ'yâkɨ niîwĩ. Tohô weégɨ kɨ̃ɨ̂re miáakɨ niîwĩ”, niîwɨ.

⁶ Marî Õ'âkɨ̃hɨre ẽho peótirã, kɨ̃ɨ̂re e'katíkã wee masítisa'. A'tîro niî'. Õ'âkɨ̃hɨre ẽho peó sĩ'rigɨ, “Diakɨ̃hɨ́ta kɨ̃ɨ̂ niîsami”, niiró ɨá'. Tohô niikã́ “Kɨ̃ɨ̂re yɨ'ɨ̂ ẽho peókã, ãyuró weegɨ́sami”, niiró ɨá'.

⁷ Noé wamêtigɨ kẽ'ra Õ'âkɨ̃hɨre ẽho peógɨ, a'tîro weékɨ niîwĩ. A'ti nukúkãre bu'îri da'reátehere Õ'âkɨ̃hɨ kɨ̃ɨ̂re werêkɨ niîwĩ. Noé “Tohô wa'ârosa'” niî masitimigɨ, Õ'âkɨ̃hɨre ẽho peókɨ niîwĩ. Tohô weégɨ Õ'âkɨ̃hɨre yɨ'tígɨ, kɨ̃ɨ̂ akawerérã me'ra diâ mirikã́ yɨ'rɨ́ sĩ'rigɨ, yukɨ̂sɨ pahipɨhɨ́re da'rêkɨ niîwĩ. Tohô ẽho peógɨ, a'ti nukúkãkãharã Õ'âkɨ̃hɨ uúkũsere ẽho peótirãre a'tîro ĩ'yókɨ niîwĩ. Naâ pekâ me'epɨ wa'aátehere ĩ'yókɨ niîwĩ. Kɨ̃ɨ̂re Õ'âkɨ̃hɨ “Ãyugɨ́ niîmi”, niîkɨ niîwĩ. Kɨ̃ɨ̂ ẽho peó yuukã, tohô niîkɨ niîwĩ.

⁸ Abraão kẽ'ra Õ'âkɨ̃hɨre ẽho peógɨ, a'tîro weékɨ niîwĩ. Õ'âkɨ̃hɨ kɨ̃ɨ̂re apé di'tapɨ wa'â dutikã, yɨ'tíkɨ niîwĩ. Õ'âkɨ̃hɨ kɨ̃ɨ̂re o'oátohopɨ wa'âkɨ niîwĩ. Kɨ̃ɨ yaá makare wihá wã'kagɨ, “Tií di'tapɨ wa'âgɨsa'” niiró mariró wa'âkɨ niîwĩ.

⁹ Õ'âkɨ̃hɨ kɨ̃ɨ̂re “Tií di'tare mɨ'ɨ̂re o'ôgɨti” niî'kere ẽho peókɨ niîwĩ. Tií di'tapɨre etâkɨ niîwĩ. Etâ, kɨ̃ɨ̂ apé di'tapɨre niîgɨ, mehêkã peharo tɨ'ó yã'akɨ niîwĩ. Wa'îkɨ̃rã kaseri me'ra weéka wi'ipɨ kãhíkɨ niîwĩ. Kɨ̃ɨ̂ makɨ́ Isaque, tohô niikã́ kɨ̃ɨ̂ paramí Jacó meharóta niî siru tuukãrã niîwã. Õ'âkɨ̃hɨ naá kẽ'rare “Mɨsâre a'tí di'tare o'ôgɨti”, niîkɨ niîwĩ.

¹⁰ Abraão Õ'âkɨ̃hɨ yaa maka pe'titiátihi maka ɨ'mɨ̂se pe'ere niî sĩ'rigɨ, tohô wee kusiákɨ niîwĩ. Tii maká Õ'âkɨ̃hɨ weéka maka niî'.

¹¹ Apêgo kẽ'ra Õ'âkɨ̃hɨre ẽho peógo, Abraão nɨmo Sara a'tîro weé no'oko niîwõ. Koô bɨkɨó waro põ'rá bokatá basiótimikã, Õ'âkɨ̃hɨ koôre põ'ratíkã weékɨ niîwĩ. Koô ni'kɨ́ põ'ratíko niîwõ. Koô a'tîro wãkûko niîwõ: “Õ'âkɨ̃hɨ yɨ'ɨ̂re ‘Wi'magɨ́ wɨâgosa'’ niî'kere keoró weegɨ́sami”, niîko niîwõ. Tohô weégɨ Õ'âkɨ̃hɨ keoró weékɨ niîwĩ.

¹² Abraão bɨkɨ waró niîmigɨ, makɨ̂tikɨ niîwĩ. Makɨ̂ti, be'ró pãharã́ waro paramérã niî turiarã kɨókɨ niîwĩ. Naâ yõkoá, nukûpori weeró noho pãharã́ waro ba'pâ keota basiótirã niîkãrã niîwã.

¹³ Ã'rá yɨ'ɨ̂ uúkũrã Õ'âkɨ̃hɨre ẽho peó nu'kukãrã niîwã. Kɨ̃ɨ̂ “O'ôgɨti” niîka di'tare yẽ'êtimirã, ẽho peókãrã niîwã. Yẽ'êtimirã, wẽrîa wa'âkãrã niîwã. Naâ ẽho peóse kɨórã, kɨ̃ɨ̂ o'oátehere yẽ'ê'kãrã weeró noho niîkãrã niîwã. “Kɨ̃ɨ̂ niî'karo nohota weegɨ́sami” niî wãkûrã, e'katíkãrã niîwã. Naâ tohô weé'ke me'ra “Ɨ'mɨ̂sepɨ wa'ârãsa', a'ti nukúkãpɨre siharí masa weeró noho niî'”, niîkãrã niîwã.

¹⁴ Tohô niîrã, apé di'ta naâ niiátihi di'ta warore a'mârã weékãrã niîwã.

¹⁵ Naâ neê waro wihá wã'ka'karopɨre wãkûrã pũrikã, dahâ boopã.

¹⁶ A'tîro pe'e weékãrã niîwã. Tií di'ta nemoró ãyurí di'ta waro ɨ'mɨ̂se pe'ere niî sĩ'rikãrã niîwã. Tohô weégɨ Õ'âkɨ̃hɨ naâ “Ɨ̃sâ wiôgɨ niîmi” niikã́, bopôya sãatikɨ niîwĩ. Tohô bopôya sãatigɨ, naa yaá maka naâ niiátoho ɨ'mɨ̂sere apo yuú tohakɨ niîwĩ.

¹⁷ Abraão Õ'âkɨ̃hɨre ẽho peógɨ, a'tîro weékɨ niîwĩ. Õ'âkɨ̃hɨ diakɨ̃hɨ́ta yɨ'ɨ̂re ẽho peómiti? niîgɨ, kɨ̃ɨ̂ makɨ́ Isaquere wa'îkɨ̃re wẽhé ɨ̃hâ moro peo wɨaro noho wee dutíkɨ niîwĩ. Abraão kɨ̃ɨ̂ makɨ́ ni'kɨ́ niigɨ́re “Wẽhé ɨ̃hâ moro peo wee'”, niîtikɨ niîwĩ.

¹⁸ Too dɨpóropɨre Õ'âkɨ̃hɨ Abraãore a'tîro niîkɨ niîwĩ: “Isaque mɨ'ɨ̂ makɨ me'ra pãharã́ paramérã niî turiarã kɨogɨ́sa'”, niîkɨ niîwĩ.

¹⁹ Abraão a'tîro wãkûkɨ niîwĩ: “Õ'âkɨ̃hɨ niî pe'tirã wẽrî'kãrãpɨreta maso masími.” Kɨ̃ɨ̂ makɨré “Wẽhegɨ́ti” weerí kura Õ'âkɨ̃hɨ kɨ̃ɨ̂re “Wẽhetíkã'ya”, niîkɨ niîwĩ. Tohô weérã a'tîro niî masi': “Abraão kɨ̃ɨ̂ makɨré wẽrî'kɨpɨ masá'kɨre weeró noho kɨókɨ niîwĩ”, niî masi'.

²⁰ Isaque Õ'âkɨ̃hɨre ẽho peógɨ, kɨ̃ɨ̂ põ'rá Jacoré, Esaúre be'ropɨ́ ãyuró wa'aátehere werê yuukɨ niîwĩ.

²¹ Jacó Õ'âkɨ̃hɨre ẽho peógɨ, kɨ̃ɨ̂ wẽriátoho dɨporoakã kɨ̃ɨ̂ paramérã José põ'ra nɨkɨre “Ãyuró wa'ârosa'”, niîkɨ niîwĩ. Tohô uúkũgɨ, kɨ̃ɨ̂ tuakɨhɨ́ me'ra yãa tuú nu'kugɨta, Õ'âkɨ̃hɨre sẽríkɨ niîwĩ.

²² José Õ'âkɨ̃hɨre ẽho peógɨ niîkɨ niîwĩ. Kɨ̃ɨ̂ wẽrîgɨ, a'tîro werê yuukɨ niîwĩ: “Israel kurakãharã Egito niî'kãrã be'ropɨ́ wiháarãsama. Naâ wa'ârã, yeé õ'arire miáato”, niîkɨ niîwĩ.

²³ Moisé pakɨ sɨmɨá Õ'âkɨ̃hɨre ẽho peókãrã niîwã. Naâ makɨ́ bahuáka be'ro “Ãyugɨ́ niîmi”, niîkãrã niîwã. Naâ i'tiá muhipũ kɨ̃ɨ̂re nɨókãrã niîwã. Kɨ̃ɨ̂ bahuaátoho dɨporo Egitokãharã wiôgɨ wi'marã́ ɨmɨaré Israel kurakãharãre wẽhe dutíkɨ niîwĩ. Moisé pakɨ sɨmɨá pe'e wiôgɨ dutisére uîti tĩharã, naâ makɨré nɨókãrã niîwã.

²⁴ Be'ró Egitokãharã wiôgɨ mako kɨ̃ɨ̂re masóko niîwõ. Moisé bɨkɨ́ ẽhágɨ, Õ'âkɨ̃hɨre ẽho peókɨ niîwĩ. Tohô weégɨ kɨ̃ɨ̂ “Egitokãharã wiôgɨ paramí niîmi” niisére tɨ'ó sĩ'ritikɨ niîwĩ.

²⁵ A'tîro pe'e weé sĩ'rikɨ niîwĩ. Õ'âkɨ̃hɨ yarã Israel kurakãharã me'ra pe'e pi'etí tamu sĩ'rikɨ niîwĩ. Õ'âkɨ̃hɨre ẽho peótigɨ weeró noho Egitokãharã wiôgɨ yaa wi'ipɨ tohá sĩ'ritikɨ niîwĩ. Naâ yã'âro weesére bu'î peha tamu sĩ'ritikɨ niîwĩ.

²⁶ Naâ kɨ̃ɨ̂re yabikã́, kɨ̃ɨ̂ Cristo Õ'âkɨ̃hɨ besé'kɨ pi'etiátehe weeró noho pi'etíkɨ niîwĩ. Tohô pi'etígɨ, “Niî pe'tise Egitopɨ niisére kɨoró nemoró ãyú niî'”, niîkɨ niîwĩ. Õ'âkɨ̃hɨ kɨ̃ɨ̂re be'ropɨ́ o'oátehere wãkûgɨ, tohô niîkɨ niîwĩ.

²⁷ Ẽho peóse kɨógɨ, Moisé Egitopɨ niî'kɨ wiháakɨ niîwĩ. Kɨ̃ɨ̂ Egitokɨ̃hɨ wiôgɨ uasére uiró mariró wiháakɨ niîwĩ. Moisé Õ'âkɨ̃hɨ bahutígɨre ĩ'yâgɨ weeró noho kɨ̃ɨ̂ “Weegɨ́ti” niisére dɨka yuúro mariró weé nu'kukɨ niîwĩ.

²⁸ Ẽho peóse kɨógɨ, Moisé Egitopɨ wihá wã'kagɨ, Páscoa wamêtiri bosê nɨmɨre weé wã'kokɨ niîwĩ. A'tîro niî'. Õ'âkɨ̃hɨ kɨ̃ɨ̂re werê ko'tegɨ ɨ'mɨ̂sekɨ̃hɨre niî pe'tirã Egitokãharã ɨmɨá masá ma'mi sɨmɨare wẽhe dutíkɨ niîwĩ. Tohô weégɨ Moisé a'tîro weékɨ niîwĩ. Õ'âkɨ̃hɨ dutî'karo nohota Israel kurakãharãre wee dutíkɨ niîwĩ. Naâ põ'rá masá ma'mi sɨmɨare wẽhetíkã'ato niîgɨ ovelha wi'marã́re wẽhe dutí, naa yeé diî me'ra sopé sumútoho wã'yasé pĩhiripɨ wa'rê dutikɨ niîwĩ. Tohô weégɨ Õ'âkɨ̃hɨre werê ko'tegɨ diîre ĩ'yâgɨ, wẽhetíkɨ niîwĩ.

²⁹ Õ'âkɨ̃hɨre ẽho peó tĩharã, Israel kurakãharã diâ pahirí maa, sõ'arí maahore pẽ'âkãrã niîwã. Tii maáre pẽ'ârã, di'tâ akó mariró pẽ'âkãrã niîwã. Egitokãharã naâ siro pẽ'â sĩ'rimirã, mirî wẽrî pe'tia wa'âkãrã niîwã.

³⁰ Apêye kẽ'rare Israel kurakãharã Jericó wamêtiri maka sumútohore sete nɨmɨri sɨtɨâ sihakãrã niîwã. Naâ Õ'âkɨ̃hɨre ẽho peó yuukã tii maká sumútohokãha sã'riro ɨ̃tá me'ra weéka sã'riroho bɨrɨ̂ dihakaro niîwɨ.

³¹ Tohô niikã́ tii makákõho Raabe wamêtigo ɨmɨá me'ra a'me tãrá wapá ta'ago ẽho peóse kɨogó niîko niîwõ. Koô Israel kurakãharã ĩ'yâ du'tirãre ãyuró nɨóko niîwõ. Tohô weégo ãpêrã tii makákãharã Õ'âkɨ̃hɨre yɨ'rɨ́ nɨ'ka'kãrã me'ra wẽrîtiko niîwõ.

³² Yẽ'eré niî nemogɨsari yɨ'ɨ? Niî pe'tirã yee kitire werêta basió wee'. Gideão weé'kere, Baraque weé'kere, Sansão weé'kere, Jefté weé'kere, Davi weé'kere, Samuel weé'kere, tohô niikã́ ãpêrã Õ'âkɨ̃hɨ yee kiti werê mɨ'tarã weé'kere werê pe'otisa'.

³³ Naâ Õ'âkɨ̃hɨre ẽho peórã ãpêrã yee di'takãharã me'ra a'mê wẽherã, naâre dokâ ke'akã weékãrã niîwã. Wiôrã niirã́ noho masaré keoró dutîkãrã niîwã. Tohô weégɨ Õ'âkɨ̃hɨ kɨ̃ɨ̂ “Ãyuró weegɨ́ti” niî'kere naâre ãyuró weékɨ niîwĩ. Yaîwa niirópɨ bi'a dɨpómikã, naâre ba'âtikãrã niîwã.

³⁴ Masaré bu'îri da'rêrã, asipó ɨ̃hâ wɨaropɨ sõróokã kẽ'rare, neê ɨ̃hɨ̂tikãrã niîwã. Ãpêrã naâre di'pĩhí me'ra wẽhé sĩ'rikã, yɨ'rɨ wetíkã'kãrã niîwã. Tutuâtimi'kãrã, tutuarã́ wa'âkãrã niîwã. Apé di'takãharã me'ra a'mê wẽherã naâre dokâ ke'akã weérã, nemoró tutuâ yɨ'rɨarã wa'âkãrã niîwã. Naâre ĩ'yâ tu'tirãre dokâ ke'akã weékãrã niîwã.

³⁵ Ni'karérã numia naâ akawerérãre wẽrîka be'ro masó no'o'kãrãpɨre wiá no'okãrã niîwã taha. Ãpêrã pe'e Õ'âkɨ̃hɨre ẽho peóse kɨomírã, ɨpɨ́tɨ pi'etíkãrã niîwã. Naâ pi'etíse me'ra wẽhé no'okãrã niîwã. Naâ ẽho peó du'ukã, bu'îri da'rerí wi'ipɨ niirã́re du'u wĩró boopã. Naâ pe'e ɨ'mɨ̂sepɨ katî nu'kusere kɨó sĩ'rirã, ẽho peó du'utikãrã niîwã.

³⁶ Ãpêrã kẽ'ra Õ'âkɨ̃hɨre ẽho peórã yabî buhíkã' no'okãrã niîwã. Naâ wekɨ̂ kasero me'ra weé'ke daari me'ra tãrá no'okãrã niîwã. Ãpêrã kome daári me'ra dɨ'té no'okãrã niîwã. Ãpêrã bu'îri da'rerí wi'ipɨ dɨpó no'okãrã niîwã.

³⁷ Ãpêrã ɨ̃tâ peeri me'ra doke wẽhé no'okãrã niîwã. Ãpêrã naâ ɨpɨ́ dekô me'ra yehê sure no'okãrã niîwã. Ãpêrã di'pĩhí me'ra dɨtê wẽhe no'okãrã niîwã. Ãpêrã su'tí moorã́ ovelha kaseri, cabra kaseri me'ra di'akɨ̃ ka'mú ta'a'kãrã, uî kusiakãrã niîwã. Naâ pahasé kɨorã, yã'âro weé no'o'kãrã, kamî da're no'o'kãrã niîkãrã niîwã.

³⁸ Naâ masá marirópɨ, ɨ̃rɨpagɨ́pɨ, ɨ̃tâ tutiripɨ, di'tâ se'tê'ke tɨ'rɨripɨ niisé koperipɨ sihâ baha ke'atikãrã niîwã. Teeré tohô weé no'orã ãyurã́ niîkãrã niîwã. Ãpêrã pe'e yã'â yɨ'rɨakãrã niîwã. Neê kã'ró Õ'âkɨ̃hɨre ẽho peórã me'ra niîta basiótikaro niîwɨ naâre.

³⁹ Õ'âkɨ̃hɨ niî pe'tirã kɨ̃ɨ̂re ẽho peórãre “Ãyurã́ niîma”, niî ĩ'yâkɨ niîwĩ. Ẽho peórã niîmirã, niî pe'tise kɨ̃ɨ̂ naâre “Ãyuró weegɨ́ti” niî'ke pe'ere ĩ'yâtikãrã niîwã.

⁴⁰ Tiîtare Õ'âkɨ̃hɨ naâre “Ãyuró weegɨ́ti” niî'kere weetíkɨ niîwĩ. A'tîro pe'e wãkûkɨ niîwĩ: “Be'rokãhárã yɨ'ɨ̂re ẽho peórã me'ra ã'rá yarã́re ãyurã́ wa'akã́ weegɨ́ti”, niîkɨ niîwĩ. Kɨ̃ɨ̂ wãkû'karo nohota weemí. Tohô weéro kɨ̃ɨ̂ too dɨpóro weé'ke nemoró kɨ̃ɨ̂ ni'kâroakã Jesu Cristo masaré yɨ'rɨóse pe'e ãyú yɨ'rɨ nɨ'ka'.

12

¹ Sõ'ó niîkãrã yɨ'ɨ̂ uúkũ'kãrã pãharã́ Õ'âkɨ̃hɨre ẽho peórã pi'etísere nɨ'kákãrã niîwã. Tohô nɨ'kárã, naâ kɨ̃ɨ̂re ẽho peósere ĩ'yókãrã niîwã. Naâ weé'ke marîre ĩ'yosé weeró noho niî'. Tohô weérã naâre wãkûrã, Õ'âkɨ̃hɨ marîre kũû'kere wãkû tutuase me'ra weeró ɨá'. Ni'kɨ́ omagɨ́ nɨkɨsé kɨ̃ɨ̂re kari boóse nohore miáatisami. Marí kẽ'ra kɨ̃ɨ̂ weeró noho weeró ɨá'. Marî niî pe'tise ãyuró weé sĩ'rikã, dohórẽ'sere, marî yã'âro wee wɨásere du'úkã'ro ɨá'.

² Jesuré wãkû nɨrɨro ɨá'. Kɨ̃ɨ́ta marîre neê waro ẽho peókã weewĩ́. Kɨ̃ɨ̂ marîre nemoró ẽho peó wã'kakã weemí. Kɨ̃ɨ̂ kurúsa bopôyaropɨ pi'etíkɨ niîwĩ. Kɨ̃ɨ̂ tohô bopôyaro wẽrisére bopôyaro mariró wẽrîkɨ niîwĩ. Kɨ̃ɨ̂ pi'etíka be'ro ɨpɨ́tɨ e'katiátehere wãkûgɨ, tohô weékɨ niîwĩ. Masa mɨháaka be'ro kɨ̃ɨ̂ Õ'âkɨ̃hɨ duhirí kumuro diakɨ̃hɨ́ pe'e ehâ nuhakɨ niîwĩ.

³ Mɨsâ Jesu weé'kere wãkûya. Yã'arã́ kɨ̃ɨ̂re pũûro pi'etíkã weékãrã niîwã. Tohô weérã mɨsá kẽ'ra pi'etírã, kari butítirãta kɨ̃ɨ̂re ẽho peó nu'kukã'ya.

⁴ Mɨsâ yã'âro weesére ka'mú ta'arã, neê ni'kɨ́ wẽrî yã'atimi yuhûpɨ.

⁵ Õ'âkɨ̃hɨ mɨsâre kɨ̃ɨ̂ põ'raré weeró noho werê kasa'kere wãkú weeti? Kɨ̃ɨ yeé kiti ohâka pũripɨ a'tîro niî':

“Yɨ'ɨ̂ põ'ra, mɨsâre ãyuró wee dutígɨ bu'îri da'rê'. Yɨ'ɨ̂ tohô weesére mehô niisére weeró noho ĩ'yâtikã'ya. Yɨ'ɨ̂ mɨsâre tu'tikã́, wãkû tutuaya.

⁶ Yɨ'ɨ̂ mɨsâ wiôgɨ yɨ'ɨ̂ ma'irã́re mɨsâ yã'âro weekã́, tu'tî'. Niî pe'tirã yɨ'ɨ̂ põ'rare ãyuró wee dutígɨ bu'îri da'rê'”, niîkɨ niîwĩ Õ'âkɨ̃hɨ, niî ohâ no'okaro niîwɨ.

⁷ Pi'etírã, Õ'âkɨ̃hɨ yeere du'utíkã'ya. Õ'âkɨ̃hɨ mɨsâre kɨ̃ɨ̂ põ'raré bu'îri da'rêgɨ weemí. Neê ni'kɨ́ pakɨ́ kɨ̃ɨ̂ makɨ́ yã'âro weesére bu'îri da'rêtikã weetísami.

⁸ Õ'âkɨ̃hɨ niî pe'tirã kɨ̃ɨ̂ põ'rá yã'âro weesére bu'îri da'rêmi. Tohô weetíkã, mɨsâ kɨ̃ɨ̂ põ'ra waró niîti boosa'. Pakɨ̂ marirã́, tohô boká'kãrã weeró noho niî boosa'.

⁹ Apêye kẽ'rare marî wi'marã́ niikã́, marî pakɨ sɨmɨá marî yã'âro weesére bu'îri da'rêkũwã. Naâ tohô weesére marî yɨ'tí ẽho peówɨ. Tohô weérã marî pakɨ ɨ'mɨ̂sepɨ niigɨ́ pe'e maa tãhârãta yɨ'tiró ɨá'. Tohô yɨ'tí ẽho peórã, katî nu'kurãsa'.

¹⁰ Marî pakɨ sɨmɨá a'ti nukúkãpɨ niirã́ marî yã'âro weesére bu'îri da'rêwã. Naâ bu'îri da'rê'ke marîre yoâtikã niîwɨ. Naâ bu'îri da'rê sĩ'riro noho marîre bu'îri da'rêwã. Õ'âkɨ̃hɨ pe'e marîre ãyuró wa'â dutigɨ bu'îri da'rêmi. Marîre kɨ̃ɨ̂ weeró noho yã'asé moorã́ wa'â dutigɨ tohô weemí.

¹¹ Diakɨ̃hɨ́ta niî'. Õ'âkɨ̃hɨ marîre bu'îri da'rekã́, neê tɨ'sá wee'. Marîre pũrî'. Tohô niîmikã, marî kɨ̃ɨ̂ bu'îri da'resé me'ra ãyuró weé'. Be'ropɨ́re marî ehêri põ'raripɨ ãyuró tɨ'ó yã'asere bokarã́sa'. Ãyuró kɨ̃ɨ̂ ɨaró noho keoró weé me'rikã'rãsa'. Õ'âkɨ̃hɨ uúkũsere yɨ'rɨ́ nɨ'katikã'ya niisé niî'

¹² Mɨsâ pi'etírã, wãkû tutuaya.

¹³ Õ'âkɨ̃hɨ ɨaró, diakɨ̃hɨ́ niisére weeyá. Tohô weekã́, ãpêrã tutuâtirã mɨsâre ĩ'yâ kũurã keoró weerã́sama. Tutuâ nemorãsama. A'tîro wa'asé weeró noho niî'. Tutuâtiri dɨ'pôkã tutuarí dɨ'pôkã wa'ârosa'. Ka'bî diha nemosome.

¹⁴ Niî pe'tirã me'ra kumûkã mariró niisétiya. Neê yã'âro weesé mariró niîya. Yã'âro weérã, marî wiôgɨre neê ĩ'yâsome.

¹⁵ Mɨsâ tɨ'o masíya. Apé tero mɨsâ yã'âro weesé bu'iri Õ'âkɨ̃hɨ wee tamúsere ɨatírã weeró noho wa'â boosa'. Neê ni'kɨ́ Õ'âkɨ̃hɨ ãyuró weesére ɨatígɨ noho mariáto. Tohô niikã́ mɨsâ wãkusépɨ ãpêrãre ɨosé, uasé, niî pe'tise ãpêrãre yã'âro weesé wã'kakã́ weetíkã'ya. Siâpe me'ra tohô weesére ka'mú ta'atirã, pãharã́re dohórẽ' boosa'.

¹⁶ Neê ni'kɨ́ kɨ̃ɨ̂ nɨmó niîtigo me'ra yã'âro weetíkã'ato. Tohô niikã́ Õ'âkɨ̃hɨ yeere mehô niisére weeró noho wãkûtikã'ato. Esaú dɨporókɨ̃hɨpɨ marikã mehô niisére weeró noho wãkûkɨ niîwĩ. Kɨ̃ɨ̂ masá ma'mi niisére ɨhá boâgɨ, kɨ̃ɨ̂ ãyusé yẽ'ê boo'kere ba'asé me'ra kɨ̃ɨ̂ akabihíre dɨka yuúkɨ niîwĩ. Tohô weégɨ kɨ̃ɨ̂ yẽ'ê boo'kere bahuriókɨ niîwĩ.

¹⁷ Mɨsâ masísa'. Esaú kɨ̃ɨ̂ pakɨ́ “Mɨ'ɨ̂re ãyuró wa'aáto” niikã́ tɨ'ó sĩ'rikɨ niîmiwĩ. Kɨ̃ɨ̂ pakɨ́ pe'e “Basió wee', mɨ'ɨ̂ akabihíre o'ô tohapɨ”, niîkɨ niîwĩ. Kɨ̃ɨ̂ tohô niikã́ tɨ'ógɨ, pũûro utîkɨ niîwĩ. Tohô utîmikã, kɨ̃ɨ̂ pakɨ́ kɨ̃ɨ̂ akabihíre o'ô'ke neê dɨka yuúta basiótikaro niîwɨ.

¹⁸ Mɨsâ Õ'âkɨ̃hɨre ẽho peórã dɨporókãharã Israel kurakãharã weeró noho weé wee'. Naâ sõ'ó niîkɨ ɨ̃rɨgɨ́ ĩ'yâta basiókɨhɨ, yẽ'ê yã'ata basiókɨhɨ pɨ'to wa'âkãrã niîwã. Tigɨ́ ɨpɨ́tɨ ɨ̃hɨ̂karo niîwɨ. Toopɨ́re pũûro na'î tĩ'akaro niîwɨ. Bɨpô paâ, wĩ'ró ɨpɨ́tɨ wẽékaro niîwɨ.

¹⁹ Mɨsâ tiîtakãharã weeró noho coroneta putikã́ bɨsɨsére tɨ'ó wee'. Õ'âkɨ̃hɨ uúkũse bahû yoaropɨ kẽ'rare tɨ'ó wee'. Naâ pũrikã kɨ̃ɨ̂ uúkũkã tɨ'órã, uisé me'ra “Toô kã'rota uúkũato maha”, niîkãrã niîwã.

²⁰ Naâ Õ'âkɨ̃hɨ dutî'kere uî yɨ'rɨrã, tohô niîkãrã niîwã. Kɨ̃ɨ̂ dutî'ke a'tîro niîkaro niîwɨ: “No'ó a'tîgɨ ɨ̃rɨgɨ́pɨre ɨ'ta kũúgɨ nohore ɨ̃tâ peeri me'ra doke wẽhéya. Tohô weetírã, yõserí pĩhi me'ra wẽheyá. No'ó wa'îkɨ̃rã kẽ'rare meharóta weeyá”, niîkɨ niîwĩ Õ'âkɨ̃hɨ.

²¹ Tohô wa'â'ke wió yɨ'rɨakaro niîwɨ. Moisé basita a'tîro niîkɨ niîwĩ: “Yɨ'ɨ̂ uî yɨ'rɨgɨ nara sãása'”, niîkɨ niîwĩ.

²² Mɨsâ pũrikã dɨporókãharã weeró noho nií wee'. Mɨsâ Jesu Cristore ẽho peó yuukã, Õ'âkɨ̃hɨ mɨsâre kɨ̃ɨ̂ tiropɨ wa'âta basiókã weékɨ niîwĩ. Kɨ̃ɨ̂re sẽri masíkã weékɨ niîwĩ. Toopɨ́ Õ'âkɨ̃hɨ katî nu'kugɨ yaa maka, ɨ'mɨ̂sepɨ niirí maka niísa'. Tii maká Jerusalẽ́ wamêtiri maka niísa'. Opâ bu'a Sião wamêtiri bu'apɨ niísa'. Tii makápɨ Õ'âkɨ̃hɨre werê ko'terã pãharã́ waro niîsama.

²³ Naâ nerê, kɨ̃ɨ̂re e'katí peosama. Õ'âkɨ̃hɨ põ'ra kɨ̃ɨ̂re ẽho peó mɨ'ta'kãrã kẽ'ra naâ wameré ɨ'mɨ̂sepɨ ohâ õ'o no'o'kãrã niîsama. Toopɨ́ta Õ'âkɨ̃hɨ niî pe'tirãre besegɨ́ niîsami. Tohô niikã́ too dɨpóropɨ ehêri põ'ra ãyurã́ weé no'o'kãrã toopɨ́ niîsama. Marí kẽ'ra Õ'âkɨ̃hɨre ẽho peóse me'ra naâ tiropɨ wa'ârãsa'.

²⁴ Marî Jesuré ẽho peó'. Kɨ̃ɨ̂ Õ'âkɨ̃hɨ masaré “Naâ wiôgɨ niîgɨti, naá kẽ'ra yarã́ niîrãsama” niî'kere apogɨ́ niîmi. Toopɨ́ kɨ̃ɨ yeé diî a'mâ bɨrose me'ra marî akobohó no'o'kãrã wa'â'. A'tîro niî'. Abel kɨ̃ɨ̂ diî a'mâ bɨrokã, kɨ̃ɨ̂re wẽhé'kɨre bu'îri da'rê no'okaro niîwɨ. Tohô weéro Jesu Cristo yee dii, dɨporókɨ̃hɨ Abel yee dii nemoró wapatí'.

²⁵ Tohô weérã ãyuró tɨ'o masíya. Õ'âkɨ̃hɨre mɨsâre weregɨ́re teetíkã'ya. Too dɨpórokãharãre Õ'âkɨ̃hɨ bahû yoaropɨ werêkɨ niîwĩ. Naâ kɨ̃ɨ̂re teékãrã niîwã. Naâ tohô weekã́, naâre bu'îri da'rêkɨ niîwĩ. Marî pũrikãre teekã́, tãhâgɨsami. Õ'âkɨ̃hɨ ɨ'mɨ̂sepɨ niigɨ́ marîre werêmi. Kɨ̃ɨ̂re teérã, neê yɨ'rɨ wetísome.

²⁶ Tiîtapɨre Õ'âkɨ̃hɨ kɨ̃ɨ̂ ɨpɨ́tɨ uúkũkã, di'tâ nara sãákaro niîwɨ. A'tóka terore a'tîro niîmi: “Ni'kâti di'tâ nara sãákã wee nemógɨti. Di'tâ di'akɨ̃re nara sãákã weesomé. Ɨ'mɨáropɨ niisé kẽ'rare nara sãákã weegɨ́ti”, niîmi Õ'âkɨ̃hɨ.

²⁷ Kɨ̃ɨ̂ ni'kâti di'tâ nara sãákã wee nemógɨti niîgɨ, a'tîro niîgɨ weemí. Niî pe'tise kɨ̃ɨ̂ weé'ke bahusé mióota basiósere kõ'âgɨsami. Mióota basiótise ɨ'mɨ̂sekãhase di'akɨ̃ toharósa'.

²⁸ Õ'âkɨ̃hɨ kɨ̃ɨ̂ wiôgɨ niirópɨ toharósa'. Toopɨ́ marî niîrãsa'. A'té neê mióota basió wee'. Tohô weérã Õ'âkɨ̃hɨre a'teré “Ãyú'” niîrã. Kɨ̃ɨ̂re “Ãyú'” niîrã, kɨ̃ɨ̂ tɨ'saró noho ãyuró weérã weé'. Kɨ̃ɨ̂re ẽho peórã wio pesáse me'ra weérã weé'.

²⁹ Marî wiôgɨ Õ'âkɨ̃hɨ niî pe'tise yã'asére ɨ̃hâ kõ'ari me'e weeró noho niîmi.

13

¹ Mɨsâ Jesu Cristore ẽho peórã ni'kɨ́ põ'ra weeró noho niî'. A'mêri ma'í du'utikã'ya.

² Mɨsa yaá wi'ipɨ etarã́re, siharí masare ãyuró weeyá. Teeré akobohótikã'ya. Ãpêrã tohô weérã ɨ'mɨ̂sekãharã Õ'âkɨ̃hɨre werê ko'terã eharã́re yẽ'êkãrã niîwã. “Õ'âkɨ̃hɨre werê ko'terã niîma”, niî masîtikãrã niîwã.

³ Bu'îri da'rerí wi'ipɨ niirã́re wãkûya. Naâ me'ra niîrã weeró noho tɨ'ó yã'aya. Yã'âro yɨ'rɨ́, kamî da're no'o'kãrã kẽ'rare wãkûya. Mɨsá kẽ'ra naâ weeró noho ɨpɨtí'. Tohô weérã pi'etí tamu masi'.

⁴ Niî pe'tirã nɨmôtirã, marâpɨtirã a'mêri wio pesáse me'ra ĩ'yâya. Mɨsâ nɨmosã́ numia me'ra ãyuró niisétiya. Numiâ naâ marapɨ́ sɨmɨa me'ra meharóta niisétiato. Nɨmô marirã́, marâpɨ marirã́ no'ó ɨaró a'me tãrá baha ke'atirãre Õ'âkɨ̃hɨ bu'îri da'rêgɨsami. Tohô niikã́ nɨmôtirã, marâpɨtirã niîmirã, ãpêrãre a'me tãrá baha ke'atirãre bu'îri da'rêgɨsami.

⁵ Niyérure ɨâri peha yɨ'rɨ nɨ'katikã'ya. Mɨsâ kɨosé me'ra e'katíya. Õ'âkɨ̃hɨ a'tîro niîkɨ niîwĩ: “Neê mɨ'ɨ̂re ni'kɨtá du'u kũúsome. Neê kõ'â wã'kasome.”

⁶ Tohô weérã diakɨ̃hɨ́ta ẽho peóse me'ra a'tîro niî masi':

Marî wiôgɨ yɨ'ɨ̂re wee tamúmi. Neê ni'kɨ́ yɨ'ɨ̂re yã'âro weé sĩ'risere uí wee', niî masi'.

⁷ Mɨsâre ãyuró sɨ'orí wehê peo'kãrã Õ'âkɨ̃hɨ yee kiti werê'kãrãre wãkûya. Naâ ãyuró weeséti yapá da'reo'kere wãkûya. Naâ weeró noho ẽho peó niisétiya.

⁸ Jesu Cristo neê dɨka yuútimi. Too dɨpóropɨre niiséti'karo nohota ni'kâroakãre, be'ropɨ́re meharóta niî nu'kugɨsami.

⁹ Tohô weérã ãpêrã mɨsâre mehêkã werekã́, ẽho peótikã'ya. Õ'âkɨ̃hɨ kɨ̃ɨ̂ pahá yã'ase me'ra marîre ehêri põ'raripɨ wãkû tutuakã weesamí. Ãpêrã a'tîro dutisére kɨomá: “A'teré ba'aró ɨá'. A'té pe'ere ba'âtikã'ro ɨá'”, niîma. Naâ dutisére yɨ'tiró nemoró Õ'âkɨ̃hɨ marîre wãkû tutuakã weesé pe'e ãyú yɨ'rɨ nɨ'ka'. Teé dutisére yɨ'tikã́, tohô niirã́ nohore wãkû tutuakã weé wee'.

¹⁰ Dɨporókãharã sacerdotea Õ'âkɨ̃hɨ wi'ipɨ da'rarã́ apêye wa'îkɨ̃rã ɨ̃hâ moro peo'kere ba'âtikãrã niîwã. Naâ ba'âti'karo nohota naáta taha a'tóka terore marî Jesu Cristore ẽho peórã me'ra bu'î peha masitisama.

¹¹ A'tîro niî'. Judeu masɨ sacerdotea wiôgɨ wa'îkɨ̃rãre wẽhékɨ niîwĩ. Kɨ̃ɨ̂ Õ'âkɨ̃hɨ Niî butia'ri Tũkupɨ naa yeé diîre mii sãhákɨ niîwĩ. Masá yã'âro weé'kere akobohó dutigɨ tohô weékɨ niîwĩ. Tohô weemígɨ, naâ wa'îkɨ̃rã ɨpɨ́ pe'ere makâ sumútohopɨ ɨ̃hâ kõ'akɨ niîwĩ.

¹² Tohô weé'karo noho Jesu makâ sumútohopɨ pi'etí, wẽrîkɨ niîwĩ. Kɨ̃ɨ yeé diî me'ra marîre bu'îri marirã́ tohakã́ weégɨ, tohô weékɨ niîwĩ.

¹³ Kɨ̃ɨ̂ makâ sumútohopɨ wẽrisé “Bopôya niî'”, niî no'okaro niîwɨ. Kɨ̃ɨ̂ wẽrikã́, Judeu masa wiôrã kɨ̃ɨ̂re tu'tî, yabîkãrã niîwã. Marí kẽ'rare kɨ̃ɨ̂re siru tuúkã, ãpêrã tu'tî, yabîma. Marî kɨ̃ɨ̂re siru tuúro ɨá'. Naâ tohô weesére tohô tɨ'ó yã'arã.

¹⁴ A'ti nukúkãpɨre marî niirí maka neê niî dohasome. Ape maká, be'ropɨ́ marî niiátihi maka ɨ'mɨ̂se pe'ere a'mâ'.

¹⁵ Tohô weérã Jesu Cristo kɨ̃ɨ̂ wee tamúse me'ra marî Õ'âkɨ̃hɨre ẽho peórã, a'tîro weérã. Wa'îkɨ̃rãre wẽhé ɨ̃hâ moro peo'karo weeró noho weérã, kɨ̃ɨ̂re “Ãyú'” niî nu'kurã. “Kɨ̃ɨ̂ marî wiôgɨ niîmi, ãyú yɨ'rɨami” niîrã, tohô weerã́.

¹⁶ Tohô niikã́ mɨsâ ãyuró weé nu'kukã'ya. Ãyuró weesére akobohótikã'ya. Ãpêrãre wee tamúrã, naâre mɨsâ kɨosére dɨka waáya. Tohô weérã mɨsâ Õ'âkɨ̃hɨpɨre o'ôrã weeró noho weerã́sa'. Kɨ̃ɨ̂ tohô weesére tɨ'sâsami.

¹⁷ Mɨsâre sɨ'orí wehê peorãre yɨ'tiyá. Naâ dutisére weeyá. Naâ mehêkã ẽho peóri niîrã, mɨsâre ĩ'yâ nɨrɨ, bu'ê nu'kuma. Naâ Õ'âkɨ̃hɨre a'tîro niîrãsama: “Ɨ̃sâ naâre bu'êrã, keoróta weewɨ́”, niîrãsama. Tohô weérã naâ dutisére tɨ'sâropɨta yɨ'tiyá. Naâre bɨhâ wetikã weetíkã'ya. Mɨsâ naâre yɨ'rɨ́ nɨ'kakã, naâ mɨsâre ãyuró wee tamú masitima.

¹⁸ Ɨ̃sâre Õ'âkɨ̃hɨre sẽri basá nu'kukã'ya. Ɨ̃sâ bu'îri marirã́ tɨ'ó yã'a'. Niî pe'tisere keoró weé sĩ'ri'.

¹⁹ A'tîro Õ'âkɨ̃hɨre sẽrikã́ ɨá': “Maatá Õ'âkɨ̃hɨ mɨsâ tiropɨ yɨ'ɨ̂re o'ôo'ato”, niî sẽriyá. Ãyu dutí tɨose, tohô niikã́ Õ'âkɨ̃hɨ ãyuró weeáto niisé niî'

²⁰ Õ'âkɨ̃hɨ ãyuró ehêri põ'ratikã weegɨ́ marî wiôgɨ Jesu Cristore wẽrî'kɨpɨre masókɨ niîwĩ. Jesu Cristo ovelha ko'tegɨ́ weeró noho marîre ãyuró ko'tegɨ́ niîmi. Kɨ̃ɨ̂ wẽrisé me'ra, kɨ̃ɨ yeé diî me'ra Õ'âkɨ̃hɨ masaré “Naâ wiôgɨ niîgɨti, naá kẽ'ra yarã́ niîrãsama” niî'kere keoró wa'akã́ weékɨ niîwĩ. Õ'âkɨ̃hɨ masaré “Tohô weegɨ́ti” niî'ke niî nu'kurosa'.

²¹ Õ'âkɨ̃hɨ mɨsâre keoró niisétikã weeáto. Niî pe'tisere ãyuró weesétikã weeáto. Tohô weekã́, kɨ̃ɨ̂ ɨaró wee masírãsa'. Jesu Cristo kɨ̃ɨ̂ tutuaró me'ra mɨsâre tohô weegɨ́sami. Cristore e'katí peo nu'kurã. Tohôta weerã́.

²² Yɨ'ɨ̂ akawerérã, yɨ'ɨ̂ mɨsâre werê kasasere nɨ'ka kuréya. Yɨ'ɨ̂ mɨsâre yoâtiri pũri ohâ'.

²³ Mɨsâ a'tîro masikã́ ɨá'. Marî akawerégɨ Timóteo bu'îri da'rerí wi'ipɨ niî'kɨ du'u wĩró no'o tohami. Kɨ̃ɨ̂ maatá yɨ'ɨ̂ tiropɨ etakã́, mɨsâ tiropɨ wa'âgɨ, kɨ̃ɨ̂re miáagɨti.

²⁴ Niî pe'tirã mɨsâre sɨ'orí wehê peorã ãyuáto. Niî pe'tirã Jesu Cristore ẽho peórã kẽ'ra ãyuáto. Itáliakãharã mɨsâre ãyu dutíma.

²⁵ Õ'âkɨ̃hɨ mɨsâ niî pe'tirãre ãyuró weeáto. Tohôta weeáto.