1

¹ Yɨ'ɨ̂ Paulo Jesu Cristo bese kũú'kɨ niî'. Õ'âkɨ̃hɨ marîre yɨ'rɨógɨ niîmi. Kɨ̃ɨ́ta Jesu Cristo yee kitire werê dutigɨ o'ôo'wĩ. Jesu Cristo marî wiôgɨ kẽ'ra yɨ'ɨ̂re o'ôo'wĩ. Kɨ̃ɨ̂reta marî yuû kuerã weé'.

² Timóteo, mɨ'ɨ̂re ohâ'. Mɨ'ɨ̂ Jesu Cristore ẽho peógɨ niî tĩhagɨ yɨ'ɨ̂ makɨ waro weeró noho niî'. Õ'âkɨ̃hɨ marî pakɨ, tohô niikã́ Jesu Cristo marî wiôgɨ mɨ'ɨ̂re ãyuró weeáto. Pahá yã'ato. Mɨ'ɨ̂re ãyuró ehêri põ'ratikã weeáto. Niî soosere ka'mú ta'a duti'ke niî'

³ Yɨ'ɨ̂ Macedôniapɨ wa'aátoho dɨporo mɨ'ɨ̂re tii maká Éfesopɨ toha dutíwɨ. No'ó mehêkã bu'erã́re ka'mú ta'a dutigɨ tohâ ke'a dutiwɨ. Ni'kâroakãre meharóta niîgɨti taha.

⁴ Tookãhárãre werê turia ma'asere, tohô niikã́ naâ yẽkɨ sɨmɨáre wamê peo nu'kusere “Wãkû ma'atikã'ya”, niîya. Masá teeré wãkûrã, mehô waro a'mé tu'ti ma'asama. Marîre Õ'âkɨ̃hɨ wee dutí'kere ãyuró weekã́ weé wee'. Marî kɨ̃ɨ̂re ẽho peóse me'ra pe'e Õ'âkɨ̃hɨ wee dutí'kere weé'. Tohô weégɨ naâre mehêkã bu'esére ka'mú ta'aya.

⁵ Mɨsâre a'mêri ma'ikã́ ɨágɨ, tohô dutî'. Yã'asé marirã́, bu'îri marirã́ tɨ'ó yã'arã, diakɨ̃hɨ́ Õ'âkɨ̃hɨre ẽho peórã, keoró ma'irã́sa'.

⁶ Ãpêrã teeré weetíma. No'ó ɨaró uúkũ ma'ama.

⁷ Õ'âkɨ̃hɨ yeekãhase kɨ̃ɨ̂ dutî'kere bu'ê sĩ'rimima. Tohô weemírã, naâ uúkũsere tɨ'o masítima. Masî butia'rã weeró noho bu'êma.

⁸ Marî masî'. Õ'âkɨ̃hɨ Moisére dutisé kũû'kere keoró masikã́ maa, ãyú niî'. Teé a'tîro niî'. Masá Õ'âkɨ̃hɨre yɨ'rɨ́ nɨ'kasere masî dutigɨ kũûkɨ niîwĩ.

⁹ Õ'âkɨ̃hɨ teeré kũûgɨ, keoró weerã́re kũûtikɨ niîwĩ. Kɨ̃ɨ̂re yɨ'rɨ́ nɨ'karãre, kɨ̃ɨ̂ dutiró weetírãre kũûkɨ niîwĩ. Tohô niikã́ yã'â butia'ro weerã́re, yã'âro weé nu'kurãre kũûkɨ niîwĩ. Õ'âkɨ̃hɨre ẽho peótirãre, kɨ̃ɨ yeé bu'esékãhasere ɨatírãre kũûkɨ niîwĩ. Apêyere, no'ó pakɨré, pakoré wẽhé kõ'arãre, niî pe'tirã no'ó wẽhesé bɨkɨrãre kũûkɨ niîwĩ.

¹⁰ No'ó ãpêrãre a'me tãrá baha ke'atirãre, no'ó ɨmɨá se'saro numiâ me'ra wee wɨáro noho weerã́ nohore kũûkɨ niîwĩ. Numiâ kẽ'rare naâ weeró noho wee wɨárã nohoreta kũûkɨ niîwĩ. Tohô niikã́ masaré yẽ'ê, ãpêrãpɨre duâ turiarãre kũûkɨ niîwĩ. Niî soose bɨkɨrãre, tohô niikã́ “Õ'âkɨ̃hɨ me'ra diakɨ̃hɨ́ta niî'” niî soorã nohore kũûkɨ niîwĩ. Tohô niikã́ niî pe'tise ãyusé bu'esére ka'mú ta'arã nohore Õ'âkɨ̃hɨ kɨ̃ɨ̂ dutisére kũûkɨ niîwĩ.

¹¹ A'té bu'esé, ãyú butia'se Õ'âkɨ̃hɨ yɨ'rɨóse kiti niîro nohota niî'. Kɨ̃ɨ̂ ãyú yɨ'rɨgɨ yɨ'ɨ̂re a'te kitíre werê dutiwĩ. Paulo “Yɨ'ɨ̂ yã'agɨ́ niîmikã, Õ'âkɨ̃hɨ yɨ'ɨ̂re ãyuró weewĩ́” niî'ke niî'

¹² Yɨ'ɨ̂ marî wiôgɨ Jesu Cristore “Ãyú'” niî'. Kɨ̃ɨ̂ yɨ'ɨ̂re ãyuró wãkûgɨ, kɨ̃ɨ yarã́re yɨ'ɨ̂re wee tamú dutiwĩ. Tohô wee dutígɨ, yɨ'ɨ̂re tutuasére o'ôwĩ.

¹³ Too dɨpóropɨ yɨ'ɨ̂ kɨ̃ɨ̂re yã'âro uúkũwɨ. Kɨ̃ɨ yarã́re yã'â butia'ro weewɨ́. Tiîtapɨre yɨ'ɨ̂ Jesu Cristore ẽho peóti tĩhagɨ, yɨ'ɨ̂ weesére masîtiwɨ. Tohô weégɨ Õ'âkɨ̃hɨ yɨ'ɨ̂re pahá yã'awĩ.

¹⁴ Marî wiôgɨ yɨ'ɨ̂re ma'ígɨ, ãyú butia'ro weewĩ́. Kɨ̃ɨ̂ yɨ'ɨ̂re Jesu Cristore ãyuró ẽho peókã weewĩ́. Ãpêrãre ma'ikã́ weewĩ́.

¹⁵ A'té yɨ'ɨ̂ uúkũatehe keoró waro niî'. Niî pe'tirã ẽho peóro ɨá'. A'tîro niî'. Jesu Cristo yã'âro weerã́re yɨ'rɨó sĩ'rigɨ a'ti nukúkãpɨre a'tîkɨ niîwĩ. Yɨ'ɨ́ta niî pe'tirã yɨ'rɨóro yã'âro weé yɨ'rɨ nɨ'ka'kɨ niî'.

¹⁶ Tohô niîmikã, Õ'âkɨ̃hɨ yɨ'ɨ̂re pahá yã'awĩ. Kɨ̃ɨ̂ tohô weesé me'ra Jesu Cristo yã'âro weerã́re pahá yã'asere yɨ'ɨ̂re ĩ'yó mɨ'tawĩ. Kɨ̃ɨ̂ masaré pahá yã'ase neê pe'tisomé. Yɨ'ɨ̂re, yã'âro weé yɨ'rɨ nɨ'ka'kɨre pahá yã'akaro nohota niî pe'tirã kɨ̃ɨ̂re ẽho peórãre pahá yã'agɨsami. Naâre kɨ̃ɨ̂ me'ra katî nu'kukã weegɨ́sami.

¹⁷ Tohô weérã Õ'âkɨ̃hɨre “Ãyú yɨ'rɨami”, niî nu'kurã. Kɨ̃ɨ̂ wiôgɨ niî nu'kugɨ niîmi. Neê wẽrîsome. Õ'âkɨ̃hɨ ni'kɨtá niîmi. Kɨ̃ɨ̂ bahutígɨ, masî yɨ'rɨgɨ niîmi. Tohôta niîmi.

¹⁹

¹⁸ Timóteo, mɨ'ɨ̂ yɨ'ɨ̂ makɨ weeró noho niî'. Yɨ'ɨ̂ mɨ'ɨ̂re wee dutí'kere weeyá. Too dɨpóro marî akawerérã mɨ'ɨ̂re Õ'âkɨ̃hɨ werê duti'kere werêpã. Naâ werê'karo nohota weeyá. Teeré weégɨ, tutuaró me'ra du'u kũúro mariró ãyuró weesére weé nu'kukã'ya. Tohô niikã́ keoró ẽho peó, bu'îri marigɨ́ tɨ'ó yã'aya. Ãpêrã Jesu Cristore ẽho peórã keoró wee masímirã, weetíkãrã niîwã. Teeré weetírã, Jesu Cristore ẽho peó du'ukãrã niîwã.

²⁰ A'té tohô wa'âwɨ Himeneure, tohô niikã́ Alexandrere. Tohô weégɨ ã'rá pɨárãre Õ'âkɨ̃hɨre yã'âro uúkũ nemotikã'ato niîgɨ Jesu Cristore ẽho peórã me'ra niî nemo dutitiwɨ. Naâre wãtiâ wiôgɨ de'ró weé sĩ'riro weeáto niîgɨ tohô weewɨ́.

2

¹ Neê waro Jesu Cristore ẽho peórã a'tîro weekã́ ɨá'. Niî pe'tirãre sẽri basaáto. Õ'âkɨ̃hɨ naâre wee tamuáto niîrã sẽri basaáto. Õ'âkɨ̃hɨre sẽrírã, “Ãyú'”, niiáto.

² Wiôrãre, niî pe'tirã dutirí masare sẽri basaáto. Marî tohô weérã a'me kẽése mariró niîrãsa'. Niî pe'tise Õ'âkɨ̃hɨ dutisére keoró wee masírãsa'. Masá me'ra keoró niisétirãsa'.

³ Marî ãpêrãre sẽri basárã, ãyuró weérã weé'. Õ'âkɨ̃hɨ marîre yɨ'rɨógɨ tohô weekã́ tɨ'sâsami.

⁴ Õ'âkɨ̃hɨ niî pe'tirãre kɨ̃ɨ̂ tiropɨ wa'akã́ ɨasamí. Niî pe'tirãre kɨ̃ɨ yeé, diakɨ̃hɨ́kãhasere masikã́ ɨasamí.

⁵ Õ'âkɨ̃hɨ ni'kɨtá niîmi. Tohô niikã́ Jesu Cristo ni'kɨtá taha masaré Õ'âkɨ̃hɨ me'ra apo baságɨ niîmi. Kɨ̃ɨ̂ masɨ́ weeró noho ɨpɨtígɨ niîkɨ niîwĩ.

⁶ Jesu Cristo niî pe'tirã masaré yɨ'rɨógɨ wẽrî basakɨ niîwĩ. Marî yã'âro weé'ke wapare wapa yeégɨ tohô weékɨ niîwĩ. A'te kitíre “Tohô wa'ârosa'” niîka tero ehakã́, werê bahurẽ' no'okaro niîwɨ.

⁷ Kɨ̃ɨ yeé kitire werê dutigɨ Cristo yɨ'ɨ̂re sõróowĩ. Kɨ̃ɨ̂ bese kũú'kɨ niiáto niîgɨ Judeu masa niîtirãre kɨ̃ɨ yeé, diakɨ̃hɨ́kãhasere bu'ê dutigɨ sõróowĩ. Diakɨ̃hɨ́ta niî'. Niî soogɨ meheta weé'.

⁸ Tohô weégɨ niî pe'tirokãharã ɨmɨaré a'tîro weekã́ ɨá'. Naâ nerê wɨaropɨ Õ'âkɨ̃hɨre sẽrikã́ ɨá'. Yũû moro sẽrírã, yã'âro weesé moorã́ sẽriró ɨá'. Uasé, a'mé tu'tise moorã́ sẽriró ɨá'.

⁹ Numiâ kẽ'ra a'tîro weekã́ ɨá'. Naâ su'tiré ãyuró ĩ'yâ tɨ'saropɨta sãyaáto. Ehâ tu'aro weé me'rikã'ato. Naâ ɨpɨré ãpêrã “Ãyurã́ niîma” niî dutirã pehé ma'mâ su'a yɨ'rɨotikã'ato.

¹⁰ A'tîro pe'e weeáto. Ãyuró bahú sĩ'rirã, Õ'âkɨ̃hɨre ẽho peórã numia wee wɨáse nohore weeáto. Bahû yoaropɨre ãyuró weesé me'ra “Ãyurã́ niîma”, niî no'oato. Ãpêrãre wee tamú, ãyuró weeáto.

¹¹ Jesu Cristore ẽho peórã nerê, naâ bu'erí kurare numiâ di'ta maríro tɨ'oáto. Ũru sãá ma'a, ye'sûtikã'ato.

¹² Neê numiâre masa dekópɨ werê nu'kukã ɨá wee'. Tohô niikã́ ɨmɨaré neê dutîtikã'ato. Tohô weeró noho o'ôrã, naâ numiâ di'ta mariáto.

¹³ A'tîro niî'. Õ'âkɨ̃hɨ Adãore weé mɨ'takɨ niîwĩ. Kɨ̃ɨ̂ be'ro Evare weékɨ niîwĩ.

¹⁴ Apêye kẽ'rare, Adão wãtî niî soo no'o mɨ'ta'kɨ meheta niîmi. Numiô pe'e niî soo no'o mɨ'ta'ko niîwõ. Tohô weé no'o'ko niî yuugo, Õ'âkɨ̃hɨ dutî'kere yɨ'rɨ́ nɨ'kako niîwõ.

¹⁵ Tohô niîmikã, Õ'âkɨ̃hɨ numiâre yɨ'rɨógɨsami. Naâ põ'ratíkã, naâre ãyuró yɨ'rɨ wetíkã weegɨ́sami. Naâ kɨ̃ɨ̂re ẽho peókã, masaré ma'ikã́, tohô weegɨ́sami. Naâ keoró wãkû yuu, weesétikã, Õ'âkɨ̃hɨ kɨ̃ɨ̂ ɨaró weé nu'kukã, yɨ'rɨ wetíkã weegɨ́sami.

3

¹ Masá a'tîro uúkũ wɨase diakɨ̃hɨ́ta niî': “No'ó Jesu Cristore ẽho peóri kurakãharãre sɨ'orí niigɨ́, sɨ'orí wehê peogɨ sãhá sĩ'rigɨ noho ãyusé da'rasére weé sĩ'rigɨ weemí.”

² Tohô weé sĩ'rigɨ noho a'tîro niisétigɨ noho niiáto. Kɨ̃ɨ́ta “Yã'âro weemí” niî no'oya marigɨ́ niiáto. Ni'kotá nɨmôtigɨ niiáto. Kɨ̃ɨ̂ wio pesáse me'ra weesétigɨ noho niiáto. Ãyuró wãkû yuu weesétigɨ noho niiáto. Ãpêrã wio pesáse me'ra ĩ'yâ no'ogɨ noho niiáto. Siharí masa kɨ̃ɨ yaá wi'ipɨ wa'akã́, ãyuró põo tẽrígɨ noho niiáto. Ãpêrãre ãyuró bu'ê me'rigɨ noho niiáto.

³ Tohô niikã́ ke'agɨ́, kumûkã bɨkɨ niîtikã'ato. Tohô weeró noho o'ôgɨ, tu'tiró mariró masaré keoró weegɨ́ noho niiáto. A'me kẽésere ɨatígɨ, niyérure ɨâri pehatigɨ noho niiáto.

⁴ Kɨ̃ɨ̂, kɨ̃ɨ yaá wi'ikãharãre ãyuró dutî masigɨ noho niiáto. Kɨ̃ɨ̂ põ'raré ãyuró wio pesáse me'ra yɨ'tí me'rikã weegɨ́ niiáto.

⁵ Kɨ̃ɨ̂, kɨ̃ɨ yaá wi'ikãharãre dutî masitigɨ, Õ'âkɨ̃hɨre ẽho peóri kurakãharã pe'ere tootá nemoró ko'têti boosami.

⁶ Jesu Cristore neê waropɨ ẽho peó mɨhati'kɨre sɨ'orí wehê peogɨ sõróoya. Apé tero weégɨ ni'kɨ́ ẽho peóka be'roakã sõróo no'o'kɨ pe'e “Yɨ'ɨ̂ ãpêrã yɨ'rɨóro ãyú yɨ'rɨ nɨ'ka'”, niî boosami. Kɨ̃ɨ̂ tohô niîgɨ, wãtî weeró noho wãkû boosami. Tohô weégɨ Õ'âkɨ̃hɨ wãtîre bu'îri da'rê'karo weeró noho kɨ̃ɨ̂re wee boósami.

⁷ Apêye kẽ'rare a'tîro niî no'ogɨre beseyá. Jesu Cristore ẽho peótirã “Kɨ̃ɨ́ta ãyuró weemí” niî no'ogɨ niiáto. Tohô weetíkã maa, ãpêrã kɨ̃ɨ̂re yã'âro wãkû boosama. Kɨ̃ɨ̂ ɨaró weégɨ, bopôyagɨ wãtî ɨaró wee boósami. Wee tamú ko'terã a'tîro niisétiro ɨá' niisé niî'

⁸ Jesu Cristore ẽho peóri kurakãharã, Õ'âkɨ̃hɨ yee kiti wererã́re wee tamú ko'terã kẽ'ra naâ wiôrã weeró noho weesétirã niiáto. Ãpêrã ẽho peó no'orã noho niiáto. Naâ uúkũsere keoró weerã́ noho niiáto. Ke'arã́, yã'âro weesé me'ra niyéru wapá ta'a sĩ'rirã noho niîtikã'ato.

⁹ Marî ẽho peóse Jesu Cristo yee kiti Õ'âkɨ̃hɨ ĩ'yó'kere ẽho peó nu'kurã niiró ɨá'. Naâ bu'îri moorã́ tɨ'ó yã'arã niiró ɨá'.

¹⁰ Naâre sõroátoho dɨporo naâ weesétisere ãyuró masiró ɨá'. Naâ ãyuró weesétikã, bu'îri marikã́ ĩ'yârã, sõróoya.

¹¹ Numiâ kẽ'ra meharóta ãpêrãre ẽho peó no'orã noho niiáto. Uukaháse piharã niîtikã'ato. Nɨkɨ̂ ĩ'yase me'ra weesétirã niiáto. Tohô niikã́ keoró weé nu'kurã niiáto.

¹² Ɨmɨ́ wee tamú ko'tegɨ ni'kotá nɨmôtigɨ niiáto. Kɨ̃ɨ̂ põ'raré, kɨ̃ɨ yaá wi'ikãharãre ãyuró dutî masigɨ niiáto.

¹³ Naâ wee tamú ko'tesere ãyuró weekã́, naâre masá “Ãyuró weemá”, niîrãsama. Tohô niikã́ Jesu Cristore naâ ẽho peósere uiró mariró ãyuró werê nemorãsama. Marî ẽho peósekãhase niî'

¹⁵

¹⁴ “Maatá mɨ'ɨ̂ tiropɨ wa'âgɨti”, niî wãkû'. Tohô wãkûmigɨ, apé tero weégɨ maatá wa'âti boosa'. Tohô weégɨ mɨ'ɨ̂re Õ'âkɨ̃hɨ põ'ra a'tîro niisétiro ɨá' niisére ohâgɨti. Õ'âkɨ̃hɨ katî nu'kugɨ niîmi. Kɨ̃ɨ̂ põ'rá Jesu Cristore ẽho peóri kurakãharã niîma. Naáta Õ'âkɨ̃hɨ yee kiti diakɨ̃hɨ́kãhasere masaré masikã́ weemá.

¹⁶ Diakɨ̃hɨ́ta niî'. Marî ẽho peóse too dɨpóro masá masîti'ke niî'. Mehô niisé nií wee'. Ãyusé waro niî'. A'tîro niî':

Õ'âkɨ̃hɨ makɨ masɨ́ weeró noho ɨpɨtígɨ a'ti nukúkãpɨre bahuákɨ niîwĩ. Espírito Santo kɨ̃ɨ̂re “Ãyugɨ́ waro niîmi”, niî werê bahurẽ'kɨ niîwĩ. Õ'âkɨ̃hɨre werê ko'terã ɨ'mɨ̂sepɨ niirã́ kɨ̃ɨ̂re ĩ'yâkãrã niîwã. Kɨ̃ɨ yeé kiti a'ti nukúkãpɨre werê se'sa no'o'. A'ti nukúkãpɨre masá kɨ̃ɨ̂re ẽho peóma. Be'ró Õ'âkɨ̃hɨ ɨ'mɨ̂sepɨ kɨ̃ɨ̂re miáakɨ niîwĩ.

4

¹ Espírito Santo bahû yoaropɨ a'tîro niîkɨ niîwĩ: “A'ti ɨmɨ́koho pe'tiátoho dɨporo ãpêrã Jesu Cristore ẽho peómi'kãrã ẽho peó du'urãsama. Wãtiâ niî soose me'ra bu'esére wererã́re siru tuúrãsama. Tohô niikã́ wãtiâ bu'esére siru tuúrãsama.”

² Weé ta'sari masa niî soose me'ra bu'ekã́, tɨ'orã́sama. Weé ta'sari masa teé niî soosere masîmirã, neê bu'îritirã tɨ'ó yã'atima.

³ Naâ a'tîro weesamá. Masaré nɨmôti sĩ'rikã, ka'mú ta'asama. Tohô niikã́ ni'karé ba'asére ba'â dutitisama. Õ'âkɨ̃hɨ pe'e a'té ba'asére weékɨ niîwĩ. Jesu Cristore ẽho peórãre diakɨ̃hɨ́kãhase masirã́re ba'â dutigɨ tohô weékɨ niîwĩ. Teeré ba'ârã, kɨ̃ɨ̂re “Ãyú'” niî dutigɨ tohô weékɨ niîwĩ.

⁴ Niî pe'tise Õ'âkɨ̃hɨ weé'ke ãyusé niî'. Marî neê yabîtikã'ro ɨá'. A'tîro pe'e weeró ɨá'. Kɨ̃ɨ̂re “Ãyú'” niisé me'ra, ba'aró ɨá'.

⁵ A'tîro niî'. Õ'âkɨ̃hɨ teeré “Ãyú niî'”, niî tohakɨ niîwĩ. Tohô weérã marî kɨ̃ɨ̂re “Ãyú'” niikã́, kɨ̃ɨ̂ teé ba'asére ãyusé wa'akã́ weemí. Paulo Timóteore wee dutí'ke niî'

⁶ Mɨ'ɨ̂ Õ'âkɨ̃hɨ yeekãhasere marî akawerérãre bu'êya. Teeré bu'êgɨ, Jesu Cristore ãyuró da'rá ko'tegɨ niîgɨsa'. Siâpe me'ra mɨ'ɨ̂ Õ'âkɨ̃hɨ yeekãhasere bu'êgɨ, nemoró ẽho peógɨsa'. Mɨ'ɨ̂ ãyusé bu'esére siru tuúse me'ra nemoró wãkû tutuagɨ niîgɨsa'.

⁷ A'ti nukúkãkãhase werê ma'asere tɨ'otíkã'ya. Nemoró Õ'âkɨ̃hɨ ɨaró weé nu'kukã'ya.

⁸ A'tîro niî'. Marî da'rárã, nemoró tutuarã́ wa'ása'. Teé ãyú niî'. Marî Õ'âkɨ̃hɨ ɨaró weekã́, tootá nemoró ãyúsa'. A'ti ɨmɨ́kohopɨre, be'ró ɨ'mɨ̂sepɨre marîre ãyuró wa'ârosa'.

⁹ A'té diakɨ̃hɨ́ta niî'. Niî pe'tirã a'teré ẽho peóro ɨá'.

¹⁰ Tohô weérã marî Jesu Cristo yeekãhasere werêrã, pi'etí, ɨpɨ́tɨ da'rá'. Õ'âkɨ̃hɨ marîre ãyuró weeátehere wãkû, e'katí yuu toharã, tohô weé'. Kɨ̃ɨ̂ katî nu'kugɨ niî pe'tirãre yɨ'rɨógɨ niîmi. Kɨ̃ɨ̂re ẽho peórã se'sarore yɨ'rɨógɨsami.

¹¹ A'teré ãpêrãre dutîya. Naâre teeré bu'êya.

¹² Mɨ'ɨ̂ ma'mɨ̂ niisé bu'iri ãpêrã mɨ'ɨ̂ uúkũsere ẽho peóti boosama. Tohô weesére ka'mú ta'aya. A'tîro pe'e weeyá. Jesu Cristore ẽho peórãre ãyusére weé ĩ'yoya. Mɨ'ɨ̂ uúkũ wɨase, mɨ'ɨ̂ weesétise me'ra ĩ'yoyá. Tohô niikã́ ãpêrãre ma'isé, mɨ'ɨ̂ Jesu Cristore ẽho peóse me'ra ĩ'yoyá. Apêye kẽ'rare ãyugɨ́ mɨ'ɨ̂ niisé me'ra ĩ'yoyá.

¹³ Yɨ'ɨ̂ toopɨ́ etaátoho dɨporo nerêrã, Õ'âkɨ̃hɨ yee kitire bu'ê ĩ'yo nu'kukã'ya. Marî akawerérãre wãkû tutua dutigɨ tohô weeyá. Naâre ãyuró bu'êya.

¹⁴ Õ'âkɨ̃hɨ mɨ'ɨ̂re wee masíse o'ô'kere weé nu'kukã'ya. Sõ'ó niîka tero Jesu Cristore ẽho peóri kurakãharã sɨ'orí niirã́ mɨ'ɨ̂re yãa peóka terore teé wee masísere Õ'âkɨ̃hɨ o'ôwĩ.

¹⁵ Õ'âkɨ̃hɨ o'ô'kere wãkû nɨrɨ, ãyuró weé nu'kukã'ya. Tohô weekã́, niî pe'tirã mɨ'ɨ̂ ãyuró weé wã'kasere ĩ'yârãsama.

¹⁶ Apêye niîgɨti. Mɨ'ɨ̂ bu'esére, tohô niikã́ mɨ'ɨ̂ weesétisere ãyuró wãkûya. Niî pe'tisere keoró weé nu'kukã'ya. A'teré weégɨ, mɨ'ɨ̂ basi yɨ'rɨ wetígɨ weegɨ́sa'. Tohô niikã́ mɨ'ɨ̂ weresére tɨ'orã́ kẽ'ra yɨ'rɨ wetírãsama.

5

¹ Timóteo, mɨ'ɨ̂re dutîgɨti. Bɨkɨrã́ ɨmɨaré tu'tîtikã'ya. Mɨ'ɨ̂, mɨ'ɨ̂ pakɨ sɨmɨáre uúkũgɨ weeró noho naâre werêya. Ma'mâ piha kẽ'rare mɨ'ɨ̂ akabihírãre uúkũgɨ weeró noho weeyá.

² Bɨkɨrã́ numiare mɨ'ɨ̂ pakosã́ numiare uúkũgɨ weeró noho naâre werê me'rikã'ya. Nu'miáre mɨ'ɨ̂ akabihírã numiare weeró noho yã'âro wãkuró mariró werêya.

³ Wapê wi'ia numia wee tamú no'oya marirã́re wee tamúya.

⁴ Wapê wi'io põ'ratíkã maa ou paramérãtikã maa, koôre naâ wee tamuáto. Neê waro naa yaá wi'ikãharã me'ra ãyuró weé wã'koro ɨá'. Tohô weérã põ'rá, paramérã, naâ pakɨ sɨmɨá, naâ yẽkɨ sɨmɨá ma'í'ke wapa ma'í a'merã weesamá. Tohô weesé ãyusé niî'. Õ'âkɨ̃hɨ teeré tɨ'sâsami.

⁵ Apêgo wapê wi'io waro ni'kó niigó pũrikã Õ'âkɨ̃hɨ wee tamuátehere yuû kuesamo. Ɨmɨ̂kohori nɨkɨ, yamîri nɨkɨ tohô sẽrí nu'kusamo.

⁶ Apêgo wapê wi'io pe'e koô ɨasére weé ma'akã'samo. Koô pekâ me'epɨ wa'aákoho weeró noho niî tohasamo.

⁷ A'té kẽ'rare wee dutíya. Tohô wee dutíkã, “Naâ bu'îri marirã́ niîma”, niî no'orãsama.

⁸ A'tîro niî'. Ni'kɨ́ kɨ̃ɨ̂ akawerérãre ãyuró weetígɨ, marî ẽho peósere yabigɨ́ weeró noho niîsami. Kɨ̃ɨ yaá wi'ikãharã warore ãyuró weetígɨ pe'e, tootá nemoró yã'âro weesamí. Jesu Cristore ẽho peótigɨ nemoró yã'agɨ́ niîsami.

⁹ Wapê wi'ia numiare wee tamúrãtirã naâ wameré ni'kâ pũripɨ ohâ õ'oya. A'tîro niirã́ numia nohore ohâya: Bɨkɨó waro sessenta kɨ'mari kɨogóre, ni'kɨréta marâpɨti'kore ohâya.

¹⁰ “Koô ãyuró weemó” niî no'ogo nohore ohâya. Koô põ'raré ãyuró masó'ko nohore masá koo yaá wi'ipɨ ehakã́ ãyuró yẽ'egó nohore ohâya. Tohô niikã́ mehô niisére da'ragó ãpêrã Jesu Cristore ẽho peórãre wee tamúgo nohore ohâ õ'oya. Pi'etírãre wee tamúgo nohore ohâya. No'ó ãyusé apêye noho weegóre ohâya.

¹¹ Ãpêrã wapê wi'ia numia nu'miá kure niîsama. Naâ nohore naâ wameré ohâtikã'ya. Apé tero naâ ɨmɨá me'ra niî sĩ'rirã, opâturi marâpɨti boosama taha. Jesu Cristo pe'ere wãkû du'u, marâpɨtise pe'ere wãkû yɨ'rɨ nɨ'ka boosama.

¹² Naâ “Jesu Cristo yee di'akɨ̃re weerã́ti” niî'kere weetírã, bu'îritirã niî boosama.

¹³ Apêye kẽ'rare wi'sêripɨ di'akɨ̃ siharã́, nihî siharã toha boósama. Teé di'akɨ̃re weetí boosama. Uukaháse bɨkɨrã toha boósama. Niî pe'tise de'ró wa'asére uukahárã, naa yeé niîtisere uúkũ wɨa no'oya marisére uukahá boosama.

¹⁴ Tohô weégɨ wapê wi'ia numia nu'miá kure niirã́re marâpɨtikã ɨá'. Naâ põ'ratiáto. Wi'sêrire ko'teáto. Naâ tohô weekã́, marîre ĩ'yâ tu'tigɨ “Naâ yã'âro weemá”, niî masitisami.

¹⁵ A'tîro niî'. Ãpêrã wapê wi'ia numia Jesu Cristore ẽho peómirã, kɨ̃ɨ̂re ẽho peó du'uma. Wãtiâ wiôgɨre siru tuúrã, tohô weemá.

¹⁶ Jesu Cristore ẽho peógɨ ou ẽho peógo naâ akawerégo wapê wi'iore kɨo boósama. Koôre kɨorã́ naâ wee tamuáto. Jesu Cristore ẽho peóri kurakãharãre ko'tê dutitikã'ato. Tohô weekã́, ãpêrã wapê wi'ia numia ko'tê no'oya marirã́ pe'ere ko'tê masirãsama.

¹⁷ Jesu Cristore ẽho peóri kurakãharãre sɨ'orí wehê peorãre, ãyuró weerã́re a'tîro niiró ɨá'. “Naâ ãyú butia'ro dutîma”, niiró ɨá'. Tootá masaré werê bu'erã́ pe'ere nemoró niiró ɨá'.

¹⁸ Õ'âkɨ̃hɨ yee kiti ohâka pũripɨ niîro nohota a'tîro niî': “Wekɨ̂ trigore ãrɨágɨ, tuu mahámi sɨtɨasami. Kɨ̃ɨ̂ ba'â sĩ'rigɨ, ba'aáto. A'tîro weetíkã'ato. Trigore ba'âri niîrã, kɨ̃ɨ̂ ɨsêropɨ tuu sãári be'tore tuu sãátikã'ato.” Apêropɨre a'tîro ohâ no'okaro niîwɨ: “Da'ragɨ́ kɨ̃ɨ̂ da'rasé wapa wapá ta'a ba'â masimi,” niî ohâ no'okaro niîwɨ. Tohô weérã sɨ'orí niirã́re wee tamúro ɨá'.

¹⁹ Apé tero ni'kɨ́ mɨ'ɨ̂pɨre a'tîro niî boosami: “Ɨ̃sâre sɨ'orí wehê peogɨ yã'âro weeámi”, niî werê sãa boosami. Kɨ̃ɨ̂ tohô niikã́, tɨ'otíkã'ya. Pɨárã ou i'tiárã ĩ'yâ'kãrã werê sãakã pũrikãre, tɨ'oyá.

²⁰ Yã'âro weé nu'kurãre niî pe'tirã ĩ'yóropɨ tu'tîya. Tohô weekã́, ãpêrã uîrã, yã'âro weesomé.

²¹ Õ'âkɨ̃hɨ ĩ'yóropɨre, Jesu Cristo marî wiôgɨ ĩ'yóropɨre mɨ'ɨ̂re a'tîro niîgɨti. Tohô niikã́ Õ'âkɨ̃hɨre werê ko'terã kɨ̃ɨ̂ besé'kãrã ĩ'yóropɨ kẽ'rare mɨ'ɨ̂re niîgɨti: Sɨ'orí wehê peorãre ni'kâro noho weeyá. Mɨ'ɨ̂ tɨ'sarã́ noho di'akɨ̃re ãyuró weetíkã'ya. Niî pe'tirãre keoró weeyá.

²² Ĩ'yâ boo kure keho, sɨ'orí wehê peogɨre sõróotikã'ya. Mɨ'ɨ̂ yã'âro weerã́re beségɨ, naâ yã'âro weesére bu'î peha tamu boosa'. Niî pe'tise yã'âro weesére ka'mú ta'aya.

²³ Mɨ'ɨ̂ paâpɨ do'âtise bu'iri akó di'akɨ̃ sĩ'ritíkã'ya. Kã'roákã vinho kẽ'rare sĩ'riyá.

²⁴ Ni'karérãre naâ yã'âro weesére beseátoho dɨporo maatá naâ yã'âro weesére masî no'o toha'. Ãpêrã pe'ere naâ yã'âro weesé be'ropɨ́ bahuárosa'.

²⁵ Meharóta taha ãyuró weesé kẽ'ra maatá masî no'o'. Apêye pe'e ãyuró weesé maatá bahutíse be'ropɨ́ bahuárosa'.

6

¹ Jesu Cristore ẽho peórã da'rá ko'terã naâ wiôrãre wio pesáse me'ra ĩ'yaró ɨá'. Naâ tohô weekã́ Õ'âkɨ̃hɨre, tohô niikã́ marî bu'esére ãpêrã yã'âro uúkũsome.

² Naâ wiôrã Jesu Cristore ẽho peórã niikã́, a'tîro weetíkã'ato. Naâ ẽho peórã niisé bu'iri naâre wio pesáse mariró ĩ'yâtikã'ato. A'tîro pe'e weeáto. Nemoró ãyuró weeáto. Naâ wiôrã Jesu Cristore ẽho peórã niîma. Tohô weérã naâ akawerérã naâ ma'irã́re weeró noho ãyuró weeáto. A'teré werê, bu'êya naâre. Marî ẽho peósere keoró wee dutíse niî'

³ No'ó mehêkã bu'egɨ́ noho a'tîro niîsami. Marî wiôgɨ Jesu Cristo yee bu'esére “Tohô nií wee'”, niîsami. Tohô niikã́ marî ẽho peóse kẽ'rare “Tohô nií wee'”, niîsami.

⁴ Tohô niigɨ́ masîtimigɨ, “Ãpêrã yɨ'rɨóro masî yɨ'rɨ nɨ'ka'”, niîsami. Kɨ̃ɨ̂ tohô niigɨ́ tɨ'o masítigɨ niîmi. Kɨ̃ɨ̂ naâ uúkũse nɨkɨre “Tohô nií wee'”, niî mɨhasami. Teé me'ra a'mêri ɨosé, a'mé tu'tise, yabisé, a'mêri ẽho peótise wã'ká'.

⁵ Tohô niikã́ ãpêrã mehô warota a'mé tu'tise wã'ká'. Yã'âro wãkûrã, tohô weesamá. Diakɨ̃hɨ́kãhasere neê masîtisama. Tohô weerã́ me'ra a'mé sɨ'atikã'ya. Naâ “Õ'âkɨ̃hɨre ẽho peóse me'ra wapá ta'arãsa'”, niî wãkûsama.

⁶ Tohôta niî', niîro pe'ea'. Diakɨ̃hɨ́ta marî Õ'âkɨ̃hɨre ẽho peóse me'ra pehé apêye noho kɨorã́ weeró noho niî'. Marî kɨoró ehâ tu'aro e'katíkã maa, tohôta niî'.

⁷ A'tîro niî'. Marî a'ti nukúkãpɨre bahuárã, neê apêye noho me'ra bahuátikãrã niîwɨ. Wẽrîrãpɨ kẽ'ra neê apêye noho miáasome.

⁸ Marî su'tí, ba'asé kɨosé me'ra e'katíro ɨá'.

⁹ Ãpêrã pe'e pehé kɨó sĩ'rirã ɨâri peharã no'ó ɨaró weé ma'asama. Siâpe me'ra nemoró ɨâri peha dohasama. Teé me'ra naâ dohó, bu'îri da'rê no'orãsama. Pekâ me'epɨ wa'ârãsama.

¹⁰ A'tîro niî'. Niyéru ɨâri pehase me'ra niî pe'tise yã'asé dɨ'pôkãti'. Ãpêrã Jesu Cristore ẽho peómi'kãrã a'té ɨâri pehase me'ra naâ ẽho peómi'kere du'úkã'sama. Tohô weérã ni'kâroakãre naâ katirí ɨmɨ̂kohore pehé bɨhâ wetise bokamá. Paulo Timóteore “Keoró weeyá” niî'ke niî'

¹¹ Timóteo, mɨ'ɨ̂ pũrikã Õ'âkɨ̃hɨ yagɨ ɨâri pehasere neê weé ma'atikã'ya. A'tîro pe'e weeyá. Ãyuró weé nu'kukã'ya. Õ'âkɨ̃hɨre siru tuúya. Kɨ̃ɨ̂re ẽho peóya. Niî pe'tirãre ma'iyá. Mehêkã wa'akã́, wãkû tutuaya. Tu'tiró mariró ãpêrãre ãyuró weeyá.

¹² Mɨ'ɨ̂ tutuaró põo tẽóro wãkû tutua, ẽho peó nu'kukã'ya. Katisé ɨ'mɨ̂sepɨ mɨ'ɨ̂ Õ'âkɨ̃hɨ me'ra niî nu'kuatehere wãkû nu'kukã'ya. Õ'âkɨ̃hɨ katisé pe'titísere o'ô sĩ'rigɨ mɨ'ɨ̂re besékɨ niîwĩ. Tohô weégɨ teeré wãkû yɨ'rɨ nɨ'kakã, mɨ'ɨ̂re o'ôgɨsami. Mɨ'ɨ̂ pãharã́ tɨ'óropɨ Jesu Cristore ẽho peósere keoró werêwɨ.

¹⁴

¹³ Õ'âkɨ̃hɨ niî pe'tirãre katisé o'ogɨ́ niîmi. Kɨ̃ɨ̂ ĩ'yóropɨ, tohô niikã́ Jesu Cristo ĩ'yóropɨ kẽ'rare mɨ'ɨ̂re wee dutí'. Jesu Cristo marikã kɨ̃ɨ̂ katirí ɨmɨ̂kohore ma'itígɨ, a'tîro weékɨ niîwĩ. Pôncio Pilatore kɨ̃ɨ̂ niisétisere ãyuró werêkɨ niîwĩ. Mɨ'ɨ́ kẽ'ra yɨ'ɨ̂ dutisé niî pe'tisere dɨka yuúro mariró keoró werêya. “Kɨ̃ɨ̂ keoró weetími”, niî no'otikã'ya. Marî wiôgɨ Jesu Cristo a'tirí kurapɨ tohô weé du'uya.

¹⁵ Õ'âkɨ̃hɨ “Tohô weegɨ́ti” niîka tero ehakã́, niî pe'tise kɨ̃ɨ̂ niî'kere keoró tu'â eha nɨ'kogɨsami. Õ'âkɨ̃hɨ ni'kɨtá ãyú yɨ'rɨgɨ, tutuâ yɨ'rɨgɨ niîmi. Niî pe'tirã wiôrã wiôgɨ niîmi.

¹⁶ Kɨ̃ɨ̂ ni'kɨtá katî nu'kumi. Kɨ̃ɨ̂ pũûro asistéropɨ niîmi. Neê ni'kɨ́ masɨ́ kɨ̃ɨ̂ basi Õ'âkɨ̃hɨ niirópɨ wa'â masitimi. Neê ni'kɨ́ kɨ̃ɨ̂re ĩ'yâtikɨ niîwĩ. ĩ'yâta basió wee'. Õ'âkɨ̃hɨ ni'kɨréta ãyuró uúkũ yɨ'rɨ nɨ'karo ɨá'. “Kɨ̃ɨ̂ wiôgɨ niî nu'kuato”, niiró ɨá'. Tohôta niiáto.

¹⁷ No'ó pehé kɨorã́ nohore a'tîro wee dutíya. Naâ “Ãpêrã yɨ'rɨóro niî yɨ'rɨ nɨ'ka'”, niîtikã'ato. Naâ kɨosé me'ra “Ãyuró wa'ârosa'”, niî e'katí yuutikã'ato. Teé keoró nií wee'. Pe'ti dihá wa'ârosa'. Tohô weeró noho o'ôrã, Õ'âkɨ̃hɨ pe'ere e'katíse me'ra yuû kueato. Kɨ̃ɨ̂ katî nu'kugɨ marîre e'katíkã ɨágɨ niî pe'tise marî kɨosére o'ômi.

¹⁸ Pehé kɨorã́re ãyusére wee dutíya. Ãpêrãre ãyuró weeáto. Naâ kɨosére o'oáto.

¹⁹ Naâ tohô weérã, ape ɨmɨ́kohopɨre pehé kɨorã́ weeró noho niî yuu toharãsama. Naâ katî nu'kuatehere bokarã́sama. Paulo Timóteore “Tohô weeyá”, niî tɨo'ke niî'

²⁰ Timóteo, Õ'âkɨ̃hɨ mɨ'ɨ̂re werê dutigɨ kũû'kere ãyuró weeyá. A'ti nukúkãkãhase uúkũse mehô niisére tɨ'otíkã'ya. Tohô niikã́ mehêkã no'ó ɨaró uúkũ ma'ase kẽ'rare tɨ'otíkã'ya. Ãpêrã “Masirã́ waro niî'” niirã́ pehé mehêkã wãkusé kɨomá. Ɨpɨ́tɨ naâ ɨaró uúkũ ma'asama. Naâ masisé niî soo uúkũ ma'ase niî'. Tohô weégɨ naâre tɨ'otíkã'ya.

²¹ Ni'karérã a'teré weé siru tuúrã, Jesu Cristore ẽho peómi'kere du'úkã'kãrã niîwã. Õ'âkɨ̃hɨ mɨ'ɨ̂re ãyuró weeáto. Toô kã'rota ohâ'. Paulo