1

¹ Yɨ'ɨ̂, yɨ'ɨ̂ me'rakãharã Silvano, Timóteo me'ra mɨsâre a'ti pũríre ohâ'. Mɨsâ Tessalônicakãharãre marî pakɨ Õ'âkɨ̃hɨ, marî wiôgɨ Jesu Cristo yarãre ãyu dutíse o'ô'.

² Õ'âkɨ̃hɨ marî pakɨ, tohô niikã́ Jesu Cristo marî wiôgɨ mɨsâre ãyuró weeáto. Mɨsâre ãyuró ehêri põ'ratikã weeáto. Jesu Cristo opâturi a'tikã́ masaré beseátehe niî'

³ Yɨ'ɨ̂ akawerérã, ɨ̃sâ mɨsa yeékãhasere wãkûrã, Õ'âkɨ̃hɨre “Ãyú'” niî nu'kukã'rãti. Mɨsâ Jesu Cristore ẽho peó nemorã weé'. Apêye kẽ'rare mɨsâ a'mêri ma'i nemó'. Tohô weérã Õ'âkɨ̃hɨre “Ãyú'” niî nu'kukã'ro ɨá'.

⁴ Mɨsa yeékãhasere no'ó ɨ̃sâ wa'aró Jesu Cristore ẽho peórãre naâ nerê wɨaropɨ a'tîro niî werê'. “Tessalônicakãharã ãpêrã naâre yã'âro weemíkã, neê ẽho peó du'utima. Naâre mehêkã wa'akã́ kẽ'rare, nɨ'kamá”, niî e'katíse me'ra werê'.

⁵ Ni'kâroakã mɨsâ Jesu Cristore ẽho peóse bu'iri ãpêrã mɨsâre tu'tî, yã'âro weesamá. Naâ tohô weemíkã, mɨsâ Õ'âkɨ̃hɨre ẽho peó nu'kurã, kɨ̃ɨ̂ keoró weesére ĩ'yârãsa'. Be'ró mɨsâ kɨ̃ɨ̂ tiropɨ wa'ârãsa'. Mɨsâre “Ãyurã́ niîma, a'tiáto yɨ'ɨ̂ tiropɨ”, niîgɨsami.

⁶ Õ'âkɨ̃hɨ keoró weegɨ́sami. Mɨsâre pi'etíkã weé'kãrãre pi'etíkã weegɨ́sami.

⁷ Mɨsâ tu'ú'kãrã pe'ere soosé o'ôgɨsami. Ɨ̃sá kẽ'rare meharóta weegɨ́sami. Kɨ̃ɨ̂ marî wiôgɨ Jesu a'tirí nɨmɨ niikã́, tohô weegɨ́sami. Kɨ̃ɨ̂ a'tîgɨ, kɨ̃ɨ̂re werê ko'terã tutuarã́ me'ra ɨ'mɨ̂sepɨ dihátigɨsami. Pekâ me'e weeró noho asisté dihatigɨsami.

⁸ Õ'âkɨ̃hɨre ẽho peótirãre, marî wiôgɨ Jesu masaré yɨ'rɨóse kitire yɨ'rɨ́ nɨ'karãre bu'îri da'rêgɨ a'tîgɨsami.

⁹ Naâre bu'îri da'rê bahurió, kõ'â diho butia'gɨsami. Tohô weérã naâ neê kã'roákã marî wiôgɨre ĩ'yâti butia'rãsama. Tohô niikã́ kɨ̃ɨ̂ tutuasére, kɨ̃ɨ̂ asistésere ĩ'yâsome.

¹⁰ Kɨ̃ɨ̂ a'tirí nɨmɨre Jesuré ẽho peórã a'tîro weerã́sama. Kɨ̃ɨ̂ asistése, kɨ̃ɨ̂ tutuasére ĩ'yârã, “Jesu ãyú yɨ'rɨami”, niîrãsama. “Niî pe'tirã bu'i wiôgɨ niîmi” niî ĩ'yâ maria, e'katírãsama. Mɨsá kẽ'ra ɨ̃sâ werê'kere ẽho peó tĩharã, naâ me'ra niîrãsa'.

¹¹ Teeré wãkûrã, marî ẽho peógɨ Õ'âkɨ̃hɨre mɨsâre sẽri basá nu'ku'. A'tîro sẽrí'. “Õ'âkɨ̃hɨ, mɨ'ɨ̂ põ'ra sãha dutígɨ naâre pihîkɨ niîwɨ. Tohô weégɨ naâre mɨ'ɨ̂ ɨaró nohota niisétikã weeyá. Naâ ãyuró weé sĩ'rima. Niî pe'tise naâ weé sĩ'risere mɨ'ɨ̂ wee tamúro me'ra weeáto. Tohôta mɨ'ɨ̂re ẽho peó yapatíkã'ato”, niî sẽri basá'.

¹² Mɨsâ a'tîro weekã́, ãpêrã marî wiôgɨ Jesuré ãyuró wãkûrãsama. Mɨsá kẽ'rare “Naâ ãyurã́ niîma”, niî ĩ'yârãsama. Õ'âkɨ̃hɨ, tohô niikã́ marî wiôgɨ Jesu Cristo mɨsâre ma'írã, tohô weekã́ weerã́sama.

2

¹ Yɨ'ɨ̂ akawerérã, ni'kâroakã maa marî wiôgɨ Jesu Cristo a'tiátehere, kɨ̃ɨ̂ tiropɨ marîre neêo nɨ'ko miáatehere werêgɨti.

² Ãpêrã “Marî wiôgɨ a'tirí nɨmɨ niî toha'” mɨsâre niikã́, wãkû ke'titikã'ya. A'tîro niî boosama. Ãpêrã “Espírito Santo yɨ'ɨ̂re tohô niiámi”, niî boosama. Ãpêrã “Ãpí werêgɨ, tohô niiámi”, niî boosama. Ãpêrã “Paulo kẽ'ra tohô ohâkãrã niiáma”, niî boosama. A'teré tɨ'órã, maatá wãkû ke'ti, werê suria no'otikã'ya.

³ Naâ ɨaró noho niî soo no'otikã'ya. Kɨ̃ɨ̂ a'tiátihi nɨmɨ dɨporo a'tîro wa'ârosa'. Masá ɨpɨ́tɨ waro Õ'âkɨ̃hɨre yɨ'rɨ́ nɨ'karãsama. Tohô weerí kura ni'kɨ́ yã'âro weé yɨ'rɨ nɨ'kagɨ waro bahuágɨsami. Kɨ̃ɨ̂ pekâ me'epɨ bu'îri da'rê bahurió no'oakɨhɨ niîgɨsami.

⁴ Kɨ̃ɨ̂ Õ'âkɨ̃hɨre ĩ'yâ tu'tigɨ, tohô niikã́ niî pe'tise masá ẽho peóse nohore yã'âro uúkũakɨhɨ niîgɨsami. Kɨ̃ɨ̂ di'akɨ̃re ẽho peókã ɨagɨ́sami. Õ'âkɨ̃hɨ weeró noho Õ'âkɨ̃hɨ wi'ipɨ sãháa nuha duhîgɨsami. “Yɨ'ɨ̂ Õ'âkɨ̃hɨ niî'”, niî soogɨsami.

⁵ Yɨ'ɨ̂ mɨsâ tiropɨ niîgɨ, teeré werêwɨ. Mɨsâ teeré wãkú weeti?

⁶ Mɨsâ kɨ̃ɨ̂ yã'agɨ́ a'tiátehere ka'mú ta'agɨre masî'. Õ'âkɨ̃hɨ kɨ̃ɨ̂ keóka nɨmɨ dɨporo yã'agɨ́ a'tîsome.

⁷ Diikése yã'asé kɨ̃ɨ̂ weeátehere masî no'oya marí' yuhûpɨ. Tohô masî no'oya marimíkã, yã'asé kɨ̃ɨ̂ weesé noho nɨ'ká toha'. Kɨ̃ɨ̂re ka'mú ta'agɨre miáaka be'ro kɨ̃ɨ̂ yã'âro weesé masî no'orosa'.

⁸ Kɨ̃ɨ̂ wa'akã́, yã'âro weesé bɨkɨ pe'e a'tîgɨsami. Be'ró marî wiôgɨ Jesu a'tí di'tapɨ opâturi a'tîgɨ, kɨ̃ɨ̂ tutuaró me'ra yã'agɨ́re wẽhegɨ́sami. Kɨ̃ɨ̂ asistése me'ra a'tîgɨ, kɨ̃ɨ̂re kõ'â bahuriógɨsami.

⁹ Kɨ̃ɨ̂ yã'agɨ́ etâka be'ro wãtiâ wiôgɨ wee tamúro me'ra pehé weé ĩ'yo ta'sagɨsami.

¹⁰ Pekâ me'epɨ bu'îri da'rê no'oahãre no'ó niisé yã'asé põo tẽóro naâre weé ta'sagɨsami. Õ'âkɨ̃hɨ naâre yɨ'rɨó sĩ'rimikã, naâ diakɨ̃hɨ́kãhasere ẽho peó sĩ'ritirãsama. Tohô weérã pekâ me'epɨ wa'â doharãsama.

¹¹ Naâ ẽho peótise bu'iri Õ'âkɨ̃hɨ nemoró naâre niî soo nemokã weegɨ́sami. Tohô weérã niî soo no'o, ẽho peórãsama.

¹² Õ'âkɨ̃hɨ yee diakɨ̃hɨ́kãhasere ẽho peó sĩ'ritirã, yã'âro weesére tɨ'sâ yɨ'rɨarãsama. Tohô weégɨ Õ'âkɨ̃hɨ naâre bu'îri da'rê bahuriógɨsami. Õ'âkɨ̃hɨ kɨ̃ɨ̂ besé'kãrãre yɨ'rɨókɨ niîwĩ niisé niî'

¹³ Yɨ'ɨ̂ akawerérã, Jesu marî wiôgɨ mɨsâre ma'imí. Õ'âkɨ̃hɨ neê waropɨ mɨsâre yɨ'rɨ wetíkã weégɨ besékɨ niîwĩ. Espírito Santo tutuaró me'ra Õ'âkɨ̃hɨ yarã sãhakã́ weékɨ niîwĩ. Tohô niikã́ mɨsâre diakɨ̃hɨ́kãhasere ẽho peó dutigɨ tohô weékɨ niîwĩ. Tohô weérã ɨ̃sâ mɨsâ weesétisere wãkûrã, Õ'âkɨ̃hɨre “Ãyú'” niî nu'kukã'rãti.

¹⁴ Ɨ̃sâ mɨsâre Jesu Cristo masaré yɨ'rɨóse kitire werêwɨ. Teé me'ra Õ'âkɨ̃hɨ mɨsâre kɨ̃ɨ̂ põ'rá wa'akã́ weékɨ niîwĩ. Marî wiôgɨ Jesu Cristo niirópɨ marîre kɨ̃ɨ̂ ãyú butia'sere bu'î peha tamukã ɨágɨ, tohô weékɨ niîwĩ.

¹⁵ Tohô weérã wãkû tutua nu'kukã'ya. Ɨ̃sâ mɨsâ tiropɨ bu'ê'kere, tohô niikã́ ɨ̃sâ too dɨpóropɨ ohâ o'o'kere wãkû nɨrɨya.

¹⁶ Jesu Cristo marî wiôgɨ basita, tohô niikã́ marî pakɨ Õ'âkɨ̃hɨ marîre pahá yã'arã, ma'íkãrã niîwã. Naâ marîre wãkû tutuakã weé nu'kusama. Marîre o'oátehere e'katí yuu tohakã weesamá.

¹⁷ Mɨsâre wãkû tutuakã, ẽho peó nu'kukã weeáto. Niî pe'tise mɨsâ uúkũsere, mɨsâ weesére ãyuró niisétikã weeáto.

3

¹ Akawerérã, mɨsâre a'tîro niî tɨorãti. Ɨ̃sa yeé niiátehere sẽri basáya. A'tîro sẽriyá. “Naâ marî wiôgɨ yee kitire werekã́, pãharã́ masá naâ weresére ẽho peoáto”, niî sẽri basáya. Tohô niikã́ mɨsâ weé'karo noho “Naâre tɨ'oáto”, niî sẽri basáya.

² Niî pe'tirãpɨta Jesu Cristo yeere ẽho peótima. Tohô weérã apêye kẽ'rare sẽri basáya. Masá yã'arã́ ɨ̃sâre yã'âro weetíkã'ato niîrã, sẽriyá.

³ Marî wiôgɨ kɨ̃ɨ̂ “Weegɨ́ti” niî'kere weetíkã weesomé. Kɨ̃ɨ̂ mɨsâre wãkû tutuakã weegɨ́sami. Wãtîre ka'mú ta'agɨsami.

⁴ Ɨ̃sâ wee dutí'kere mɨsâ keoró weérã weé'. Teeré Õ'âkɨ̃hɨ wee tamúse me'ra ãyuró weé nu'kurãsama, niî ẽho peó'.

⁵ Jesu Cristo mɨsâre Õ'âkɨ̃hɨ ma'imí niisére masikã́ weeáto. Tohô niikã́ kɨ̃ɨ̂ wãkû tutua'karo noho mɨsâre wãkû tutuakã weeáto. Paulo “Da'rá wapá ta'aya” niisé niî'

⁶ Yɨ'ɨ̂ akawerérã, Jesu Cristo marî wiôgɨ ɨaró noho mɨsâre dutîrãti. Ãpêrã Jesu Cristore ẽho peórã mɨsâ me'ra niirã́ nihî sihasama. Ɨ̃sâ toopɨ́ dutî'kere wee sirú tuutisama. Naâ me'ra ba'pâti, neê niî nemotikã'ya.

⁷ Mɨsâ masísa'. Ɨ̃sâ toopɨ́ niîrã weé'kere ĩ'yâ kũuro ɨá'. Toopɨ́ niîrã, tohô niî ma'akã'tiwɨ.

⁸ Neê ni'kɨré wapa yeétimirã, tohô waro ba'âtiwɨ. A'tîro pe'e weewɨ́. Mɨsâre kari boó sĩ'ritirã, yamîri, ɨmɨ̂kohori da'rawɨ́.

⁹ “Ɨ̃sâ bu'esé wapa ɨ̃sâre ba'asé o'ôya” niîta basiómikã, neê weetíwɨ. Mɨsâre ãyusére weé ĩ'yo sĩ'rirã, ɨ̃sâ basi da'rawɨ́.

¹⁰ Mɨsâ me'ra niîrã, a'tîro dutîwɨ. “No'ó da'rá sĩ'ritigɨ nohore neê ba'asé ekatíkã'ya”, niîwɨ.

¹¹ Ɨ̃sâ mɨsa yeé kitire a'tîro tɨ'owɨ́. Ni'karérã mɨsâ wa'tero niirã́ nihî siha niiápa'rã. Da'ratímirã, ãpêrãre uukahá sihapa'rã.

¹² Marî wiôgɨ Jesu Cristo dutiró me'ra tohô weesétirãre werêrãti. Ãpêrãre uukaháro mariró naâ ba'aátehere, naâre dɨ'sasé nohore da'rá wapá ta'a me'rikã'ato.

¹³ Yɨ'ɨ̂ akawerérã, mɨsâ pe'e kari butíro mariró ãyuró weé nu'kukã'ya.

¹⁴ No'ó ɨ̃sâ a'ti pũrípɨ dutî o'osere weetígɨ nohore “Kɨ̃ɨ̂ niîmi”, niî masîya. Kɨ̃ɨ̂re bopôyaro yɨ'rɨáto niîrã ba'pâtitikã'ya.

¹⁵ Mɨsâ tohô ba'pâtitimirã, kɨ̃ɨ̂re ĩ'yâ tu'tirã weeró noho tɨ'ó yã'atikã'ya. Mɨsâ akawerégɨre weeró noho pe'e ãyuró weeáto niîrã werê me'rikã'ya. Paulo ãyu dutí tɨo'ke niî'

¹⁶ Marî wiôgɨ kɨ̃ɨ̂ basi marîre ãyuró ehêri põ'ratikã weegɨ́ a'tîro weeáto. No'ó de'ró mehêkã wa'akã́, mɨsâre ãyuró ehêri põ'ratikã weé nu'kukã'ato. Marî wiôgɨ mɨsâ niî pe'tirã me'ra niiáto.

¹⁷ Yɨ'ɨ̂ Paulo basi a'té ãyu dutíse maa ohâ'. Yɨ'ɨ̂ niî pe'tise pũrire ohâ wɨaro nohota ohâ'. Yɨ'ɨ̂ a'tîro di'akɨ̃ papéra o'ôo'gɨ ohâ'. Tohô weérã mɨsâ “Kɨ̃ɨ́ta ohâpĩ”, niî masîrãsa'.

¹⁸ Marî wiôgɨ Jesu Cristo mɨsâ niî pe'tirãre ãyuró weé nu'kukã'ato. Toô kã'rota ohâ'. Paulo