1

¹ Yɨ'ɨ̂ Paulo, yɨ'ɨ̂ me'rakãharã Silvano, Timóteo me'ra mɨsâre a'ti pũríre ohâ'. Mɨsâ Tessalônicakãharãre marî pakɨ Õ'âkɨ̃hɨ, marî wiôgɨ Jesu Cristo yarãre ãyu dutíse o'ô'. Õ'âkɨ̃hɨ mɨsâre ãyuró weeáto. Mɨsâre ãyuró ehêri põ'ratikã weeáto. Paulo Tessalônicakãharã naâ ãyuró weesétisere tɨ'ógɨ Õ'âkɨ̃hɨre sẽri basá'ke niî'

² Mɨsâre ɨ̃sâ sẽrisétiri nɨkɨ marî pakɨ Õ'âkɨ̃hɨre “Ãyú'” niî nu'kukã'.

³ Kɨ̃ɨ̂re sẽrírã, a'tîro niî'. “Õ'âkɨ̃hɨ, Tessalônicakãharã mɨ'ɨ̂ makɨ Jesu Cristore ẽho peórã ãyuró weesétisama. Naâ ma'isére ĩ'yórã, ãpêrãre ãyuró wee tamúsama. Jesu Cristo kɨ̃ɨ̂ opâturi a'tiátehere e'katíse me'ra yuû kuerã weesamá. Tohô weérã kɨ̃ɨ̂re ẽho peó du'utisama”, niî sẽrí' Õ'âkɨ̃hɨre.

⁴ Õ'âkɨ̃hɨ mɨsâre ma'imí. Kɨ̃ɨ̂, yarã́ niiáto niîgɨ besékɨ niîwĩ. Ɨ̃sâ a'teré masî'.

⁵ Mɨsâre Jesu yeé kitire werêrã, ɨ̃sa yeé ɨseri me'ra di'akɨ̃ werêtiwɨ. Espírito Santo tutuasé me'ra werêwɨ. Ɨ̃sâ bu'esé diakɨ̃hɨ́ta niî' niîrã, mɨsâre bu'êwɨ. Mɨsâ masísa'. Ɨ̃sâ toopɨ́ niîrã, mɨsâre ma'írã, ãyuró weesétiwɨ.

⁶ Mɨsâ ɨ̃sâ weé'kere ĩ'yâ kũurã, ɨ̃sâ weeró nohota weesétikãrã niîwɨ. Teeré weérã, Jesu Cristo weeséti'karo nohota weékãrã niîwɨ. Mɨsâre Espírito Santo e'katíse o'okã́, ɨpɨ́tɨ pi'etímirã, Jesu Cristo yee kitire yẽ'êwɨ.

⁷ Tohô weérã mɨsâ Jesuré ẽho peósere ĩ'yórã, ãyusé weesétise me'ra niî pe'tirã ãpêrã Jesuré ẽho peórãre ĩ'yókãrã niîwɨ. Mɨsa yaá di'ta Macedôniakãharãre, tohô niikã́ ãpêrã a'tí di'ta Acaiakãharãre tohô weékãrã niîwɨ.

⁸ Mɨsâ me'rata marî wiôgɨ Jesu yeé kiti niî pe'tiropɨ se'sâa wa'a'. Macedônia, Acaia di'akɨ̃ mehereta se'sâro weé wee'. Niî pe'tirokãharãpɨ mɨsâ Õ'âkɨ̃hɨre ẽho peósere masî pe'ti tohama. Tohô weérã teeré ãpêrãre weré wee'.

⁹ Mehô naâ pe'eta mɨsâ weesétisere kiti weréma. Ɨ̃sâ mɨsâ tiropɨ niikã́, mɨsâ ɨ̃sâre ãyuró weé'kere werêma. Apêye maa, mɨsâ yeê'kãrãre ẽho peó du'u'kere werêma. Teeré du'ú, ni'kâroakãre Õ'âkɨ̃hɨ katigɨ́ diakɨ̃hɨ́ niigɨ́ pe'ere ẽho peó, kɨ̃ɨ̂ ɨaró weeápa'ro.

¹⁰ Õ'âkɨ̃hɨ kɨ̃ɨ̂ makɨ́ Jesu ɨ'mɨ̂sepɨ niigɨ́re, kɨ̃ɨ̂ opâturi a'tiátehere e'katíse me'ra yuû kuerã weeápa'ro. A'teré ãpêrã ɨ̃sâre kiti weréma mɨsâ weesétisere. Õ'âkɨ̃hɨ kɨ̃ɨ̂ makɨ́ wẽrî'kɨpɨre masókɨ niîwĩ. Kɨ̃ɨ̂ Jesutá niîmi marî ɨpɨ́tɨ bu'îri boka boó'kere yɨ'rɨó'kɨ.

2

¹ Akawerérã, mɨsâ a'teré ãyuró masísa'. Ɨ̃sâ Tessalônicapɨ sihârã, mehô warota bu'ê kusiatikãrã niîwɨ. Ɨ̃sâ bu'esére tɨ'órã, mɨsâ pãharã́ Jesuré ẽho peówɨ.

² Ɨ̃sâ mɨsâ tiropɨ wa'aátoho dɨporo ɨ̃sâ Filipopɨ niîwɨ. Toopɨ́ niikã́, tookãhárã ɨ̃sâre tãrá, yã'âro buhíkã'wã. Mɨsâ teeré masísa'. Mɨsa yaá makakãharã kẽ'ra ɨ̃sâ weresére ka'mú ta'a sĩ'rimiwã. Naâ tohô weemíkã, Õ'âkɨ̃hɨ ɨ̃sâre ãyuró wãkû tutuase o'ôwĩ. Tohô weérã kɨ̃ɨ yeé kitire uiró mariró werêwɨ.

³ Mɨsâre Jesu yeé kitire werêrã, mehêkã pe'e werêtiwɨ. Yã'âro weé sĩ'rirã, numiâre a'me tãrá sĩ'rirã, weé ta'sase me'ra werêtiwɨ.

⁴ Õ'âkɨ̃hɨ pe'e ĩ'yâ bese tohagɨpɨ kɨ̃ɨ yeé kiti weresére kũûgɨtigɨ ɨ̃sâre besékɨ niîwĩ. Masá ɨ̃sâ me'ra e'katiáto niîrã meheta kɨ̃ɨ yeé kitire werêwɨ. Õ'âkɨ̃hɨ pe'ere e'katí dutirã werêwɨ. Õ'âkɨ̃hɨ niîmi niî pe'tise marî wãkusére masigɨ́.

⁵ Ɨ̃sâ toopɨ́ niîrã, neê ni'kâti mɨsa yeére ɨâri peharã, ãyuró uúkũ ta'sa werêtiwɨ. Mɨsâ a'teré masísa'. Õ'âkɨ̃hɨ kẽ'ra diakɨ̃hɨ́ta ɨ̃sâ wãkusére masîsami.

⁷

⁶ Ɨ̃sâ Jesu o'ôo'kãrã niî'. Tohô weérã “Ɨ̃sâre wiôrã weeró noho ĩ'yâya”, niî masi boopã. Tohô niîta basiómikã, neê ni'kɨré niîtiwɨ. A'tîro pe'e weewɨ́. Ni'kó numiô koô makɨré ko'tê mi'ó masosamó. Koô weeró noho ɨ̃sá kẽ'ra mɨsâ tiropɨ niîrã, mɨsâre ma'írã, tohôta weewɨ́.

⁸ Mɨsâre ma'írã, Õ'âkɨ̃hɨ yee kiti di'akɨ̃re werêtiwɨ. Niî pe'tise ɨ̃sâ põo tẽóro wee tamúta basiósere wee tamúwɨ. Mɨsâre ɨpɨ́tɨ ma'ikã́ti.

⁹ Ɨ̃sâ toopɨ́ niîrã da'rá'kere mɨsâ wãkúsa'. Mɨsâre Õ'âkɨ̃hɨ yee kitire werêrã, pehé kari boóse o'ô sĩ'ritiwɨ. Tohô weérã ɨ̃sâre a'mâ ekatikã'ato niîrã ɨ̃sâ basi da'rawɨ́. Yamîri, ɨmɨ̂kohori yoâkãta ɨ̃sâ ba'aátehere, ɨ̃sâre dɨ'sasé nohore wapá ta'arã da'rawɨ́.

¹⁰ Ɨ̃sâ weeséti'kere mɨsâ ĩ'yâwɨ. Õ'âkɨ̃hɨ kẽ'ra masîsami. Ɨ̃sâ mɨsâ Jesu Cristore ẽho peórã me'ra niîrã, ɨ̃sâ wee soóro mariró niisétiwɨ. Mehêkã weetíwɨ. Õ'âkɨ̃hɨ ɨaró noho niisétiwɨ. Tohô weérã ãpêrã ɨ̃sâre “Naâ bu'îri kɨomá” niiró mariró niîkã'wɨ.

¹²

¹¹ Ni'kɨ́ kɨ̃ɨ̂ põ'raré werêro weeró nohota ɨ̃sá kẽ'ra mɨsâ nɨkɨre werêwɨ. E'katíse, wãkû tutuasere mɨsâre o'ôwɨ. Õ'âkɨ̃hɨ põ'ra weeró nohota niiséti dutiwɨ. Mɨsâre Õ'âkɨ̃hɨ kɨ̃ɨ̂ põ'rá niiáto niîgɨ besesamí. Tohô niikã́ mɨsâre kɨ̃ɨ̂ me'ra kɨ̃ɨ̂ asistése niirópɨ niî nu'ku dutisami.

¹³ Apêye mɨsa yeékãhasere werêgɨti. Õ'âkɨ̃hɨ yee kitire werekã́, mɨsâ Õ'âkɨ̃hɨ yee uúkũse niî' niîrã, maatá ẽho peówɨ. “Masá naâ uúkũsere ẽho peó boosaɨ”, niîtiwɨ. Mɨsâ tohô weesére wãkûrã, Õ'âkɨ̃hɨre “Ãyú'” niî nu'kukã'. Ɨ̃sâ mɨsâre werê'ke Õ'âkɨ̃hɨ uúkũse warota niîwɨ. Tee kití me'rata Õ'âkɨ̃hɨ kɨ̃ɨ̂ ɨaró weeáto niîgɨ mɨsâre siâpe me'ra dɨka yuú nu'kugɨ weemí.

¹⁴ Mɨsâ Jesu Cristore ẽho peókã, mɨsa yaá di'takãharã mɨsâre pi'etíse o'ôkãrã niîwã. Judéia di'tapɨ kẽ'rare naâ akawerérã Judeu masa mɨsâre wa'â'karo nohota Jesuré ẽho peórãre weékãrã niîwã.

¹⁵ Judeu masata dɨporókãharãpɨ kẽ'rare Õ'âkɨ̃hɨ yee kiti werê mɨ'tarãre wẽhékãrã niîwã. Marî wiôgɨ Jesuré tohôta weékãrã niîwã. Ɨ̃sá kẽ'rare mɨsa yaá makapɨ niikã́, ɨ̃sâre ɨatírã, kõ'âkã'wã. Tohô weégɨ Õ'âkɨ̃hɨ naâ me'ra tɨ'sâtisami. Judeu masa niî pe'tirã Jesuré ẽho peórã me'ra kumûkã di'akɨ̃ ɨákã'ma.

¹⁶ Judeu masa niîtirãre Õ'âkɨ̃hɨ yɨ'rɨókã ɨatíma. Tohô weérã naâre Jesu yeé kitire werekã́ ɨa sãátirã, a'tîro weewã́. Ɨ̃sâ naâre weresére ka'mú ta'a sĩ'rimiwã. Naâ yã'âro weesé siâpe me'ra bɨkiâro weé'. Tohô weérã naâ pahî butia'ro bu'îri kɨomá. Naâ yɨ'rɨ́ nɨ'ka poose bu'iri ni'kâroakãpɨta naâ Õ'âkɨ̃hɨ bu'îri da'resére bokarã́sama. Paulo kẽ'ra Tessalônicakãharãre ĩ'yârã wa'â sĩ'rimi'ke niî'

¹⁷ Ɨ̃sâ mɨsâ tiropɨ niî'kãrã wihá wã'katika be'roakã maatá mɨsâre ĩ'yâ sĩ'rimikãti. Ɨ̃sâ ɨpɨ́ toopɨ́ niîtimikã, mɨsâ tiropɨ di'akɨ̃ ehêri põ'ratiwɨ. Toopɨ́re ɨpɨ́tɨ wa'â sĩ'rimiwɨ taha.

¹⁸ Pehetíri yɨ'ɨ̂ Paulo basi pe'eta “Wa'âgɨti”, niîmiwɨ. Ɨ̃sâ toopɨ́ wa'â sĩ'risetiri nɨkɨ wãtî ɨ̃sâre ka'mú ta'a mɨhawĩ.

²⁰

¹⁹ Mɨsáta niî' ɨ̃sâre e'katíse o'orã́. Tohô weérã mɨsâre pũûro ĩ'yâ sĩ'risa'. Marî wiôgɨ Jesu kɨ̃ɨ̂ opâturi a'ti nukúkãpɨ a'tikã́, kɨ̃ɨ̂re werêrãti mɨsa yeé kitire. A'tîro niîrãti: “Ã'ratá niîma ɨ̃sâre e'katíse o'ô'kãrã. Naâre mehô waro mɨ'ɨ yeé kitire werêtwɨ. Naâ teeré tɨ'órã, mɨ'ɨ̂re ãyuró ẽho peówã. Tohô weérã pũûro e'katí' naâ me'ra”, niîrãti kɨ̃ɨ̂re.

3

²

¹ Mɨsa yeé kitire tɨ'ó sĩ'rirã, põo tẽótikãti. Tohô weérã mɨsâ tiropɨ Timóteore ĩ'yâ dutirã o'ôo'wɨ. “Ɨ̃sâ pe'e Atenapɨ toharã́ti”, niîwɨ. Timóteo ɨ̃sâ me'rakɨ̃hɨ Jesu yeé kitire werê kusia tamugɨ niîmi. Kɨ̃ɨ̂ mɨsâre Jesuré nemoró ẽho peókã weegɨ́sami niîrã, o'ôo'wɨ. Tohô niikã́ wãkû tutua nemosere wereáto niîrã kɨ̃ɨ̂re o'ôo'wɨ.

⁴

³ Ãpêrã masá mɨsâ Jesuré ẽho peókã ĩ'yârã, ĩ'yâ tu'ti, buhíkã'sama. Naâ tohô weekã́, Jesuré ẽho peó du'utikã'ato niîrã Timóteore werê dutirã o'ôo'wɨ. Ɨ̃sâ toopɨ́ niîrã, mɨsâre a'teré werê yuu tohawɨ. “Marî Jesuré ẽho peórã, pi'etí no'orosa'”, niîwɨ. Ɨ̃sâ niî'karo nohota marî niî pe'tirãre keoró wa'âro weé'. Mɨsâ teeré masísa'.

⁵ Mɨsâ Jesuré ẽho peósere masî sĩ'rigɨ põo tẽóti, de'ró wa'âmiti naâre? niîgɨ, mɨsa yeé kitire miíti dutigɨ Timóteore o'ôo'wɨ. “Apé tero weégɨ mɨsâre wãtî Jesuré ẽho peó du'ukã weékã'pĩ”, niîkãti. Tohô weégɨ ɨ̃sâ bu'ê'ke neê wapa marípari? niî masî sĩ'rigɨ kɨ̃ɨ̂re o'ôo'wɨ. Tessalônicakãharã yee kitire Timóteo kitití eha'ke niî'

⁶ Ni'kâroakãre Timóteo mɨsâ tiropɨ niî'kɨ dahâ tohami a'topɨ́re. Kɨ̃ɨ̂ mɨsa yeére ãyusé kitití dahami. A'tîro niiámi: “Naâ Jesuré ẽho peó nu'kukã'ma. Naâ basi ãyuró a'mêri ma'isétiama. Marîre ma'isé me'ra wãkû nu'kukã'ma. Marîre pũûro ĩ'yâ sĩ'riama marî naâre ĩ'yâ sĩ'riro nohota”, niî kitití dahami.

⁷ Mɨsâ Jesuré ẽho peóse kitire tɨ'órã ɨ̃sâ pi'etímirã, e'katí'.

⁸ Marî wiôgɨ Jesuré ẽho peó nu'kukã tɨ'órã, yuhûpɨta ɨ̃sâ ãyuró ehêri põ'rati'.

⁹ Tohô weérã mɨsâre wãkûrã, e'katí yɨ'rɨasa'. Õ'âkɨ̃hɨre mɨsa yeékãhasere ɨ̃sâ de'ró weé “Ãyú'” niî põo tẽó boosari? Basió wee'.

¹⁰ Yamîri, ɨmɨ̂kohorita yoâkã Õ'âkɨ̃hɨre sẽrí nu'kukã' mɨsâ tiropɨ wa'â sĩ'rirã. Mɨsâre Jesu yeére werê yapá da'reo sĩ'risa'.

¹¹ Ɨ̃sâ marî pakɨ Õ'âkɨ̃hɨre, marî wiôgɨ Jesuré a'tîro sẽrí'. “Tessalônicakãharã tiropɨ ɨ̃sâre o'ôo'ya.

¹² Nemoró naâ basi a'mêri ma'isétikã weeyá. Niî pe'tirã ãpêrã kẽ'rare ma'ikã́ weeyá. Naâre ɨ̃sâ ma'iró nohota naá kẽ'ra ãpêrãre ma'iáto.

¹³ Õ'âkɨ̃hɨ, mɨ'ɨ̂re ẽho peó du'utikã'ato. Mɨ'ɨ̂ ɨaró weeáto. Naâre wãkû tutuakã weeyá. Mɨ'ɨ̂ naâre tohô weekã́, mɨ'ɨ̂ ĩ'yóropɨ bu'îri marirã́ niîrãsama. Tohô weérã Jesu opâturi a'ti nukúkãpɨre kɨ̃ɨ yarã́ me'ra a'tikã́, bu'îri marirã́ niîrãsama.” A'tîro niî sẽri basá' mɨsa yeékãhasere marî pakɨ Õ'âkɨ̃hɨre.

4

¹ Apêye mɨsa yeékãhasere werê nemo sĩ'risa'. Yɨ'ɨ̂ basi dutisé meheta niî'. Marî wiôgɨ Jesu dutisére werê'. Ɨ̃sâ mɨsâre dutî'karo nohota Õ'âkɨ̃hɨ tɨ'sasé nohore weeyá. Mɨsâ ni'kâroakãre Õ'âkɨ̃hɨ dutî'kere weérã weé'. Siâpe me'ra nemoró wee nemóya.

² Ɨ̃sâ werê'kere mɨsâ masísa'. A'teré werêrã, Jesu marî wiôgɨ kɨ̃ɨ̂ dutiró me'ra mɨsâre werêwɨ.

³ Õ'âkɨ̃hɨ kɨ̃ɨ̂ ɨaró weekã́ tɨ'sâsami. Kɨ̃ɨ yarã́ weeró noho weesétiya. Mɨsâ nɨmosã́ numia, mɨsâ marapɨ́ sɨmɨa niîtirãre a'me tãrátikã'ya.

⁴ Mɨsâ nɨkɨ wio pesáse me'ra yã'âro weé ĩ'yoro mariró amûkã dɨ'té, nɨmôti bɨroya. Mɨsâ tohô weekã́ ĩ'yârã, ãpêrã “Ãyuró weemá”, niîrãsama.

⁵ Õ'âkɨ̃hɨre masîtirã numiare yã'âro weé sĩ'rirã, ɨâri pehasama. Mɨsâ naâ weeró noho niîtikã'ya. Mehô wãkû tutuaya.

⁶ Neê ãpi nɨmóre a'me tãrátikã'ya. Mɨsâ ãpi nɨmóre a'me tãrárã, koô marapɨ́re yã'âro weérã weésa'. Õ'âkɨ̃hɨ a'té yã'asé weerã́re bu'îri da'rêgɨsami. Too dɨpóropɨ mɨsâre werê tohawɨ a'té tohô wee dutítise kitire.

⁷ Õ'âkɨ̃hɨ marîre yã'asére wee dutítikɨ niîwĩ. Ãyusé pe'ere kɨ̃ɨ̂re ẽho peórã weesétiro noho wee dutíkɨ niîwĩ.

⁸ No'ó a'té bu'esére teerã́ noho ɨ̃sâre teérã meheta weesamá. Õ'âkɨ̃hɨ pe'ere teérã weesamá. Õ'âkɨ̃hɨ marîre kɨ̃ɨ̂ ɨaró wee dutígɨ Espírito Santore o'ôo'kɨ niîwĩ. Tohô weérã kɨ̃ɨ̂ ɨaró weetírã, “Õ'âkɨ̃hɨ, mɨ'ɨ̂re ɨá wee'”, niîrã weésa'.

⁹ Mɨsâ a'mêri ma'isétise pũrikãre weré wee'. Õ'âkɨ̃hɨ kɨ̃ɨ̂ basi pe'e Espírito Santo me'ra mɨsâre a'mêri ma'i dutí tohakɨ niîwĩ.

¹⁰ Mɨsa yaá di'ta Macedôniakãharãre niî pe'tirã Jesuré ẽho peórãre ma'isétirã, kɨ̃ɨ̂ dutî'karo noho weérã weé'. A'té pe'e maa mɨsâre werêgɨti. Jesuré ẽho peórãre nemoró ma'i nemóya.

¹¹ Ãyuró kumûkã mariró niisétiya. Mɨsa yeé niîtisere, ãpêrã yeekãhasere uukahá wãkû nɨrɨtikã'ya. Mɨsa yeé pe'ere wãkûya. Mɨsâ da'rasé kɨosére ãyuró da'rasétiya. Nihî sihatikã'ya. Too dɨpóropɨre mɨsâ tiropɨ niîrã, a'teré werê tohawɨ.

¹² Mɨsâ tohô ãyuró da'rárã, ãpêrã a'mâ eka no'oya marirã́sa'. Mɨsâ basi da'rasé me'ra katîrãsa'. Mɨsâ tohô weekã́ ĩ'yârã, Jesuré ẽho peótirã mɨsâre ãyuró wio pesáse me'ra wãkûrãsama. Jesu opâturi a'ti nukúkãpɨ a'tiátehe kiti niî'

¹³ Apêye taha werêgɨti. Wẽrî'kãrãpɨ de'ró wa'ârãsari niisére mɨsâre werê kasa nɨ'ko sĩ'risa'. A'teré masîrã, Jesuré ẽho peórã naâ wẽrikã́, pũûro bɨhâ wetisome. A'tîro niî'. Jesuré ẽho peórã wẽrîrã, kɨ̃ɨ̂ tiropɨ kɨ̃ɨ̂ me'ra niî nu'kukã'rãsama. Kɨ̃ɨ̂re ẽho peótirã pũrikã kɨ̃ɨ̂ tiropɨ neê wa'âsome. Tohô weérã Jesuré ẽho peóti tĩharã, naâ me'rakãharã, naâ akawerérã wẽrikã́, pũûro bɨhâ wetisama. Mɨsâ pũrikã Jesuré ẽho peó'. Tohô weérã naâ weeró noho bɨhâ wetitikã'ya.

¹⁴ Marî a'teré ẽho peó'. Jesu wẽrî'kɨpɨ masákɨ niîwĩ. Kɨ̃ɨ̂ opâturi a'ti nukúkãpɨ a'tikã́, kɨ̃ɨ̂re ẽho peórã wẽrî'kãrãre Õ'âkɨ̃hɨ kɨ̃ɨ̂ makɨré masó'karo nohota masogɨ́sami. Masó toha, kɨ̃ɨ̂ tiropɨ miáagɨsami.

¹⁵ Ni'kâroakãre marî wiôgɨ Jesu werê'kere mɨsâre werê turiarã weé'. Jesu a'ti nukúkãpɨ opâturi a'tikã́, Jesuré ẽho peórã kɨ̃ɨ̂re põo tẽrírã wa'ârãsama. Kɨ̃ɨ̂re põo tẽrírã, marî katirã́ ãpêrã wẽrî'kãrã dɨporo ɨ'mɨtã́ wã'kasome.

¹⁶ A'tîro pe'e wa'ârosa'. Jesu kɨ̃ɨ̂ uúkũse dutisé me'ra ɨ'mɨ̂sepɨ a'tîgɨsami. Õ'âkɨ̃hɨre werê ko'terã wiôgɨ ɨpɨ́tɨ uúkũ keho, Õ'âkɨ̃hɨ yaro putiró coronetare putigɨ́sami. Tohô wa'akã́, Jesuré ẽho peórã wẽrî'kãrã ape ɨpɨ́ me'ra masá mɨ'tarãsama.

¹⁷ Naâ be'roakã marî Jesuré ẽho peórã kẽ'ra a'ti nukúkãpɨ katirã́ o'me kuráripɨ naâ me'ra mɨhâarãsa'. Toopɨ́ Jesuré põo tẽrírãsa'. Tohô weé kɨ̃ɨ̂ me'ra niî nu'kukã'rãsa'.

¹⁸ Mɨsâ a'teré ãpêrãre werê turiaya. Tohô weérã mɨsâ a'mêri wãkû tutuakã weerã́sa'.

5

¹ Diî nɨmɨ, no'óka tero niikã́ Jesu opâturi a'tîgɨsari niisé maa masî no'oya marí'. Tohô weérã mɨsâre weré wee'.

² Mɨsâre werêgɨti. Ni'kɨ́ yahagɨ́ yamî wãkûtiro yahágɨ a'tîsami. Kɨ̃ɨ̂ weeró nohota Jesu kẽ'ra marî neê wãkûtiri kura a'tîgɨsami. Mɨsâ kɨ̃ɨ̂ wãkûtiro a'tiátehere masî tohasa'.

³ Jesuré ẽho peótirã kɨ̃ɨ̂ opâturi a'tiátoho dɨporoakã a'tîro wãkûrãsama. “Ɨ̃sâ uiró mariró ãyuró niîkã'”, niîrãsama. A'tîro naâ wãkû kũyari kura naâre pehé yã'asé wa'ârosa'. Ni'kó nihî pako wãkûtiro wi'magɨ́ wɨaátoho dɨporoakã pũrisé pi'etí nɨ'kasamo. Naá kẽ'ra Jesuré ẽho peótirã tohôta wãkûtiro ɨpɨ́tɨ pi'etírãsama. Neê ni'kɨ́ yɨ'rɨ wetísome.

⁴ Masá Jesuré ẽho peótirã na'î tĩ'aropɨ niirã́ weeró noho niîsama. Naâ kɨ̃ɨ̂re yɨ'rɨ́ nɨ'ka, kɨ̃ɨ̂ ɨaró weetísama. Mɨsâ pũrikã naâ weeró noho nií wee'. Tohô weérã Jesu kɨ̃ɨ̂ opâturi a'tí di'tapɨ a'tikã́, ĩ'yâ ɨkɨásome. Yahagɨ́re ĩ'yâ mariaro weeró noho wa'âsome.

⁵ Mɨsâ yã'asé weeséti'kere Jesu akobohó tohakɨ niîwĩ. Tohô weérã bo'rê yuuro, ɨmɨ̂kohopɨ niirã́ weeró noho niî'. Marî Jesu yarã́ yã'asé wee boórã noho nií wee'. Jesuré ẽho peótirã pe'e yã'âro weesétisama. Na'î tĩ'aro, yamîpɨ niirã́ weeró noho niîsama.

⁶ Marî kãrirã́ weeró noho niîtikã'rã. Jesu opâturi a'tiátehere wãkûtirã, kãrirã́ weeró noho niîsama. Marî pe'e kɨ̃ɨ̂ a'tiátehere ãyuró tɨ'o masíse me'ra wãkû nɨrɨrã. Yã'asé weé sĩ'rirã, wãkû tutuarã.

⁷ Yamîpɨ masá kãrimá. Ke'arã́ yamîpɨta ke'asamá.

⁸ Marî pe'e Jesu yarã́ ɨmɨ̂kohopɨ niirã́ weeró noho niî'. Tohô weérã marî weesére ãyuró tɨ'ó yã'a nɨ'ko toharãpɨ weesétirã. Apêyere werêgɨti. Ni'kɨ́ surára a'mê wẽheropɨ wa'âgɨ, kɨ̃ɨ̂ ɨpɨré ka'mú ta'agɨ komé su'tirore sãyâsami. Kɨ̃ɨ̂ weeró nohota marî wãtîre ka'mú ta'arã Õ'âkɨ̃hɨre ẽho peó nu'kukã'rã. Ãpêrãre ma'irã́. Dɨpôare ka'mú ta'arã kome sapéare pesâro weeró noho Jesu kɨ̃ɨ̂ opâturi a'tiátehere, marî kɨ̃ɨ̂ me'ra niî nu'kuatehere wãkû nɨrɨrã. Marî tohô weekã́, wãtî marîre yã'âro wee masítisami.

⁹ Õ'âkɨ̃hɨ bu'îri bokaáto niîgɨ meheta marîre besékɨ niîwĩ. Mehô marî bu'îri kɨo boó'kãrãre marî wiôgɨ Jesu Cristo me'ra yɨ'rɨókɨ niîwĩ.

¹⁰ Kɨ̃ɨ̂ me'ra niî nu'kukã'ato niîgɨ marîre wẽrî basakɨ niîwĩ. Tohô weérã kɨ̃ɨ̂ opâturi a'tikã́, kɨ̃ɨ̂re ẽho peórã wẽrî'kãrã, marî katirã́ kɨ̃ɨ̂ me'ra niî nu'kukã'rãsa'.

¹¹ Teeré wãkûrã, mɨsâ ni'kâroakã weesétiro nohota ãpêrãre a'mêri wee tamú, wãkû tutuakã weeyá. Paulo Tessalônicakãharãre kɨ̃ɨ̂ werê kasa'ke niî'

¹² Akawerérã, mɨsâre a'tîro weekã́ ɨása'. Õ'âkɨ̃hɨ yee kiti wererã́re, kɨ̃ɨ̂ besé'kãrãre wio pesáse me'ra ĩ'yâya. Õ'âkɨ̃hɨ naâre kɨ̃ɨ yeé kitire bu'ê dutigɨ, mɨsâre werê kasa dutigɨ kũûkɨ niîwĩ.

¹³ Naâ mɨsâ de'ró weé niisétiatehere werêrã, ɨpɨ́tɨ da'ramá. Tohô weérã ma'isé me'ra naâre wãkûya. A'mêri uâtikã'ya. A'mêri ãyuró niisétiya.

¹⁴ Apêye mɨsâre werê nemorãti. Nihî siharãre da'ra dutíya. Wãkû ke'tirãre wãkû tutuakã weeyá. Õ'âkɨ̃hɨ yeere wee tutuátirãre wee tamúya. Mɨsâre mehêkã wa'akã́, uâ yeetikã'ya. Nɨ'kayá.

¹⁵ Mɨsâre ãpêrã yã'âro weekã́, naâre a'metíkã'ya. A'tîro pe'e weeyá. Mɨsâ me'rakãharãre, niî pe'tirãre ãyuró weé nu'kukã'ya.

¹⁶ E'katíse me'ra niî nu'kukã'ya. Bɨhâ wetitikã'ya.

¹⁷ Mɨsâ no'ó niiró, no'ó wa'aró Õ'âkɨ̃hɨre wãkû sẽrí nu'kukã'ya.

¹⁸ Mɨsâre yã'âro, ãyuró wa'akã́ kẽ'rare, Õ'âkɨ̃hɨre “Ãyú'” niî nu'kukã'ya. A'té niî pe'tisere Õ'âkɨ̃hɨ marî Jesu Cristore ẽho peórãre weekã́ ɨasamí.

¹⁹ Espírito Santo mɨsâ wãkusépɨre werekã́, ka'mú ta'atikã'ya. Yɨ'tiyá kɨ̃ɨ̂ dutisére.

²⁰ Õ'âkɨ̃hɨ yee kiti weresére tɨ'órã, yabî buhíkã'tikã'ya.

²¹ A'tîro pe'e weeyá. Naâ weresére wãkû, tɨ'o kasá nɨ'ko pe'okã'ya. Ãyusé niikã́, teeré weeyá.

²² No'ó yã'asé niisé nohore weetíkã'ya.

²³ Õ'âkɨ̃hɨ ãyuró ehêri põ'ratikã weegɨ́ mɨsâre a'tîro weeáto. Siâpe me'ra ãyuró, yã'asé mariró, kɨ̃ɨ̂ ɨaró di'akɨ̃ weekã́ weeáto. Mɨsâ ehêri põ'rarire, mɨsâ wãkusére, niî pe'tiro mɨsâ ɨpɨré ko'teáto. Kɨ̃ɨ̂ a'tîro weekã́, marî wiôgɨ Jesu Cristo opâturi a'tîgɨ, mɨsâre bu'îri marirã́ boka ehágɨsami.

²⁴ Õ'âkɨ̃hɨ mɨsâre besé'kɨ niî pe'tise kɨ̃ɨ̂ “Weegɨ́ti” niî'kere keoró weegɨ́sami. Tohô weégɨ ɨ̃sâ mɨsâre sẽri basásere yɨ'tigɨ́sami.

²⁵ Akawerérã, ɨ̃sá kẽ'rare Õ'âkɨ̃hɨre sẽri basáya.

²⁶ Niî pe'tirã tookãhárã Jesuré ẽho peórãre e'katíse me'ra a'mêri põo tẽríya.

²⁷ Marî wiôgɨ Jesu kɨ̃ɨ̂ dutiró me'ra a'ti pũríre niî pe'tirã Jesuré ẽho peórãre bu'ê ĩ'yo duti'.

²⁸ Jesu Cristo marî wiôgɨ mɨsâre ãyuró weeáto. Toô kã'rota ohâ'. Paulo