1

¹ Yɨ'ɨ̂ marî akawerégɨ Timóteo me'ra mɨsâre ãyu dutí'. Õ'âkɨ̃hɨ ɨá'karo nohota yɨ'ɨ̂re Jesu Cristo kɨ̃ɨ yeé kitire werê dutigɨ kũûwĩ.

² Mɨsâ Colossokãharã Jesu Cristo yarã kɨ̃ɨ̂re ẽho peó nu'kurãre ohâ'. Mɨsâre Õ'âkɨ̃hɨ marî pakɨ ãyuró weeáto. Mɨsâre ãyuró ehêri põ'ratikã weeáto. Paulo Colossokãharãre Õ'âkɨ̃hɨre sẽri basá'ke niî'

³ Õ'âkɨ̃hɨ marî wiôgɨ Jesu Cristo pakɨre mɨsâre sẽri basásetiri nɨkɨ “Ãyú'” niî'.

⁵

⁴ Mɨsa yeé kitire tɨ'owɨ́. A'tîro niî'. Mɨsâ Jesu Cristo masaré yɨ'rɨómi niisé diakɨ̃hɨ́kãhasere tɨ'ókãrã niîwɨ. Teeré tɨ'órã, mɨsâre Õ'âkɨ̃hɨ ɨ'mɨ̂sepɨ weeátehere e'katí yuu tohakãrã niîwɨ. Tohô weérã Jesu Cristore ãyuró ẽho peókãrã niîwɨ. Mɨsâ basi Õ'âkɨ̃hɨ yarã niî pe'tirãre ãyuró ma'isétikãrã niîwɨ. Ɨ̃sâ teeré tɨ'ó'kãrã niî tĩharã, Õ'âkɨ̃hɨre “Ãyú'” niî'.

⁶ Ãpêrã kẽ'ra tohôta tee kitíre tɨ'órã, mɨsâ weeró nohota weérã weemá. Niî pe'tiropɨ werê turia wã'karã weemá. Mɨsâ Õ'âkɨ̃hɨ masaré ma'isére tɨ'órã, “Diakɨ̃hɨ́ta niî'”, niîkãrã niîwɨ.

⁷ Ɨ̃sâ ɨpɨ́tɨ ma'igɨ́ Epafra mɨsâre tee kitíre werêkɨ niîwĩ. Kɨ̃ɨ̂ ɨ̃sâre da'ra tamúgɨ niîmi. Õ'âkɨ̃hɨ besé'kɨ Cristo yeekãhasere mɨsâre weregɨ́ niîmi.

⁸ Kɨ̃ɨ́ta mɨsa yeé kitire mii eháwĩ. Mɨsâ Jesu Cristore ẽho peó tĩharã ãyuró ma'isétisere werêwĩ.

⁹ Tohô weérã Epafra mɨsa yeé kitire werêka nɨmɨta maatá ɨ̃sâ Õ'âkɨ̃hɨre sẽri basá nɨ'kawɨ. A'tîro niikã́ kẽ'rare mɨsâre tohô sẽri basá nu'kukã'. A'tîro sẽri basá': “Õ'âkɨ̃hɨ, Espírito Santo tɨ'o masíse o'oáto naâre. Kɨ̃ɨ̂ tohô o'okã́, naâ mɨ'ɨ̂ dutî'kere ãyuró tɨ'o masírãsama.

¹⁰ Mɨ'ɨ yarã́ weeró nohota weesétirãsama”, niî sẽri basá'. Õ'âkɨ̃hɨ mɨsâ tohô weekã́ ĩ'yâgɨ, e'katígɨsami. Mɨsâ kɨ̃ɨ̂ ɨá'karo nohota ãyuró weerã́sa'. Kɨ̃ɨ̂re masî nemorãsa'.

¹¹ Kɨ̃ɨ̂ tutuâ yɨ'rɨagɨ kɨ̃ɨ̂ tutuasére mɨsâre o'ôgɨsami. Tohô weekã́, mɨsâ e'katíse me'ra niî pe'tise mehêkã wa'asére wãkû tutuarãsa'.

¹² Mɨsâ Õ'âkɨ̃hɨre “Ãyú'” niîrãsa'. Kɨ̃ɨ̂ mɨsâ yã'âro weé'kere dɨporópɨ akobohó, dɨka yuú tohakɨ niîwĩ. Tohô weérã mɨsâ kɨ̃ɨ̂ tiropɨ ãpêrã kɨ̃ɨ yarã́, kɨ̃ɨ̂re ẽho peórã me'ra niîrãsa'.

¹⁴

¹³ Marî pakɨ Õ'âkɨ̃hɨ marîre, wãtî dutî no'o'kãrãre yɨ'rɨókɨ niîwĩ. Õ'âkɨ̃hɨ makɨ wẽrisé me'ra na'î tĩ'aropɨ weeró noho niî'kãrãre yɨ'rɨókɨ niîwĩ. Marî yã'asé weé'kere akobohókɨ niîwĩ. Tohô weégɨ marîre kɨ̃ɨ̂ makɨ́ ɨpɨ́tɨ ma'igɨ́re o'ôo'kɨ niîwĩ. Marî wiôgɨ niiáto niîgɨ tohô weékɨ niîwĩ. Õ'âkɨ̃hɨ Jesu Cristo wẽrisé me'ra masaré yɨ'rɨó'ke niî'

¹⁵ Õ'âkɨ̃hɨre ĩ'yâ no'oya marí'. Kɨ̃ɨ̂ makɨ́ a'ti nukúkãpɨ a'tîgɨ, kɨ̃ɨ̂ niisétisere masaré bahû yoaropɨ ĩ'yókɨ niîwĩ. Jesu Cristo niî pe'tise dɨporo niî tohakɨ niîwĩ.

¹⁶ Õ'âkɨ̃hɨ kɨ̃ɨ̂ makɨ́ me'ra niî pe'tisere ɨ'mɨ̂se, a'tí di'ta bahurã́, bahutírãre weékɨ niîwĩ. Apêye kẽ'rare bahusé, bahutísere weékɨ niîwĩ. Tohô niikã́ wiôrãre ɨ'mɨ̂sepɨ niirã́, a'ti nukúkãpɨ niirã́, niî pe'tirãre weékɨ niîwĩ. Teeré weégɨ, “Yɨ'ɨ̂ makɨ yee niîrosa'”, niîkɨ niîwĩ.

¹⁷ Kɨ̃ɨ̂ makɨ́ neê waropɨta niî pe'tise kɨ̃ɨ̂ bahúrẽ'atoho dɨporo niî tohakɨ niîwĩ. Kɨ̃ɨ̂ me'rata kɨ̃ɨ̂ bahúrẽ'ke niî nu'kukã'. Keoró dɨka yuúro mariró niî nu'ku'.

¹⁸ Jesu Cristo marî dɨpoá kɨ̃ɨ̂re ẽho peórã wiôgɨ niîmi. Kɨ̃ɨ́ta marî kɨ̃ɨ̂re ẽho peórãre katisé o'ogɨ́ niîmi. Marî niî pe'tirã Jesu Cristore ẽho peórã ni'kâ kura, ni'kâ ɨpɨ niî'. Kɨ̃ɨ̂ marî masá ma'mi niîmi. Kɨ̃ɨ̂ wẽrîka be'ro marî niî pe'tirã dɨporo masákɨ niîwĩ. Tohô weégɨ niî pe'tirã bu'ipɨ niîmi.

¹⁹ Õ'âkɨ̃hɨ a'tîro niîkɨ niîwĩ: “Yɨ'ɨ̂ makɨ yɨ'ɨ̂ weeró nohota niiáto”, niîkɨ niîwĩ. Tohô weéro niî pe'tise Õ'âkɨ̃hɨ niisétise Jesu Cristopɨreta niî'.

²⁰ Õ'âkɨ̃hɨ kɨ̃ɨ̂ makɨré wẽrikã́ ɨákɨ niîwĩ. Niî pe'tise, niî pe'tirã, ɨ'mɨ̂se, a'ti nukúkã yɨ'ɨ̂ me'ra apoáto niîgɨ tohô weékɨ niîwĩ. Kɨ̃ɨ̂ makɨ́ kurúsapɨ wẽrisé me'ra apókɨ niîwĩ.

²¹ Mɨsá kẽ'ra neê waro Õ'âkɨ̃hɨre masîtikãrã niîwɨ. Mɨsâ yã'âro weeséti'ke bu'iri Õ'âkɨ̃hɨre ĩ'yâ tu'ti, yã'âro wãkûkãrã niîwɨ.

²² Mɨsâ tohô niisétimikã, Õ'âkɨ̃hɨ ni'kâroakãre mɨsâ me'ra apókɨ niîwĩ. Jesu Cristo marî weeró noho ɨpɨtígɨ tii ɨpɨ́ me'rata kɨ̃ɨ̂ pi'etí, wẽrîkɨ niîwĩ. Kɨ̃ɨ̂ wẽrisé me'ra Õ'âkɨ̃hɨ yarã bu'îri marirã́ tohakã́ weékɨ niîwĩ. Kɨ̃ɨ̂ pakɨpɨ́re mɨsâre wiagɨ́ti niîgɨ, tohô weékɨ niîwĩ.

²³ Mɨsâ kɨ̃ɨ yeé kitire ẽho peó nu'kukã, kɨ̃ɨ̂ ɨaró weé nu'kukã, tohô weegɨ́sami. Ãpêrã mɨsâre mehêkã werekã́, kɨ̃ɨ yeé kitire neê kõ'âtikã'ya. A'teré niî pe'tirokãharãpɨ tɨ'órã weemá. Yɨ'ɨ́ kẽ'ra a'te kitíre werê tamu sihagɨta niî'. Õ'âkɨ̃hɨ Paulore Jesu Cristore ẽho peórãre wee tamú duti'ke niî'

²⁴ Õ'âkɨ̃hɨ yɨ'ɨ̂re werê duti'kere werêgɨ, apé tero pũûro pi'etí'. Tohô pi'etímigɨ, e'katí'. Jesu Cristo kɨ̃ɨ̂re ẽho peórã yee niiátehere pi'etí tohakɨ niîwĩ. Tohô weégɨ yɨ'ɨ́ kẽ'ra kɨ̃ɨ̂re ẽho peórãre wee tamú sĩ'rigɨ pi'etí'.

²⁵ Õ'âkɨ̃hɨ yɨ'ɨ̂re naâre wee tamú dutiwĩ. Tohô weégɨ yɨ'ɨ̂ mɨsâ Jesu Cristore ẽho peórãre a'tîro weé'. Kɨ̃ɨ yeé kitire ãyuró tɨ'o masí pe'oato niîgɨ mɨsâre wee tamú'.

²⁷

²⁶ Mɨsâ Colossokãharã, Judeu masa niîtirã kẽ'rare ãyú butia'se kiti niî'. Jesu Cristo mɨsâpɨreta niîmi. Kɨ̃ɨ̂ mɨsâ me'ra niî yuukã, ãyusé mɨsâ ɨ'mɨ̂sepɨ niiátehere masî, e'katí yuu tohasa'. Õ'âkɨ̃hɨ maatá Judeu masa niîtirãre Jesu Cristo yɨ'rɨógɨsami niisére werêtikɨ niîwĩ. Tohô weérã neê warokãharãpɨa a'teré masîtikãrã niîwã. A'tóka terore Õ'âkɨ̃hɨ Jesu Cristore ẽho peórãre masikã́ weemí.

²⁸ Ɨ̃sâ Jesu Cristo yee kitire werê'. Niî pe'tirã masa nɨkɨ́re kɨ̃ɨ̂ niisétisere masî dutirã werê'. Kɨ̃ɨ̂ ɨaró wee dutírã, kɨ̃ɨ̂ me'ra niî nu'ku dutirã werê'.

²⁹ A'teré weé sĩ'rigɨ, Jesu Cristo kɨ̃ɨ̂ tutuasé o'osé me'ra yɨ'ɨ̂ masaré ɨpɨ́tɨ bu'ê, naâre Õ'âkɨ̃hɨre sẽri basá'.

2

¹ Yɨ'ɨ̂ niî'karo nohota mɨsa yeé niiátehere ɨpɨ́tɨ wãkû, Õ'âkɨ̃hɨre sẽri basá'. Tohô weégɨ mɨsâre a'teré masiáto niîgɨ ohâ o'ogɨ weé'. Niî pe'tirã Laodicéiakãharãre, tohô niikã́ yɨ'ɨ̂re ĩ'yâtirãre meharóta sẽri basá'.

² A'tîro sẽrí': “Õ'âkɨ̃hɨ, naâre wãkû tutuase o'ôya. Ãyuró sɨ'orí niisétiato. A'mêri ma'iáto. Naâ ãyuró mɨ'ɨ yeékãhasere tɨ'o masí pe'oato. Naâ tohô weérã, mɨ'ɨ̂ makɨre ãyuró masîrãsama”, niî sẽri basá'. Neê waropɨre Õ'âkɨ̃hɨ niî pe'tise kɨ̃ɨ̂ makɨ́ Jesu Cristo yeekãhasere werêtikɨ niîwĩ. A'tóka terore maha kɨ̃ɨ yeére werêmi.

³ A'tîro niî'. Jesu Cristopɨreta niî pe'tise masisé, tɨ'o masíse niî'. Tohô weégɨ kɨ̃ɨ̂ di'akɨ̃ ãyuró masigɨ́ niîmi. Kɨ̃ɨ̂re ẽho peórã niî pe'tise masisére boká no'o'.

⁴ Ãpêrã mɨsâre diakɨ̃hɨ́ weeró noho uúkũ maa soó boosama. Ãyuró tɨ'o masíya niîgɨ, teeré werê'.

⁵ Yɨ'ɨ̂ apêropɨ niîmigɨ, mɨsâ wa'teropɨ niîgɨ weeró noho tɨ'ó yã'a'. Mɨsâre pũûro wãkû'. Yɨ'ɨ̂ mɨsâ ãyuró niisétikã tɨ'ógɨ, mɨsâ Jesu Cristore ẽho peókã tɨ'ógɨ, ɨpɨ́tɨ e'katí'.

⁶ Neê waropɨre marî wiôgɨ Jesu Cristore ẽho peókãrã niîwɨ. Tiîtapɨre mɨsâ ẽho peó'karo nohota a'tóka tero kẽ'rare niî pe'tise nɨmɨri kɨ̃ɨ̂re ẽho peó nu'kukã'ya.

⁷ Kɨ̃ɨ̂re nemoró masî nemoya. Mɨsâre bu'ê'karo nohota kɨ̃ɨ̂re ẽho peó nemoya. Ɨmɨ̂kohori nɨkɨ Õ'âkɨ̃hɨre “Ãyú'”, niîya. Jesu Cristore ẽho peótirã ẽho peó'ke niî'

⁸ Ãpêrã mɨsâre werekã́, ãyuró tɨ'o masíya. Naâ mɨsâre niî soose me'ra werê boosama. Diakɨ̃hɨ́ weeró noho uúkũsama. Nií wee'. Teé uúkũse me'ra masaré werê, maa soórã weemá. Jesu Cristo yee meheta niî'. Naâ basi naâ wãkusére, dɨporókãharãpɨ niiséti mɨhati'kere werêrã weemá. Tohô weérã naâre ẽho peótikã'ya.

⁹ A'tîro pe'e niî'. Jesu Cristopɨre niî pe'tise Õ'âkɨ̃hɨ niisétise niî'.

¹⁰ Mɨsá kẽ'ra kɨ̃ɨ̂pɨreta niî'. Tohô weérã mɨsâ Õ'âkɨ̃hɨre kɨó yɨ'rɨa toha'. Jesu Cristo niî pe'tirã wiôgɨ niîmi. Ɨ'mɨ̂sekãharã, a'ti nukúkãkãharã, bahurã́, bahutírã niî pe'tirã wiôrã kɨ̃ɨ̂ doka niîma.

¹¹ Mɨsâ masísa', Õ'âkɨ̃hɨ yarã sãhá sĩ'rirã, Judeu masa weeró noho õ'rekɨhɨ́ yapa kaserore yehê kõ'atikãrã niîwɨ. A'tîro pe'e wa'âkaro niîwɨ. Jesu Cristo basi mɨsâ yã'âro weesétisere kõ'âkɨ niîwĩ. Tohô weérã õ'rekɨhɨ́ yapa kaserore yehê kõ'a'kãrã weeró noho Õ'âkɨ̃hɨ yarã tohákãrã niîwɨ.

¹² Jesu Cristo wẽrî yaá no'okɨ niîwĩ. Mɨsá kẽ'ra wamê yee no'orã, yã'âro weeséti'kere du'úrã, wẽrî yaá no'o'kãrã weeró noho tohákãrã niîwɨ. Wẽrî'kãrã, katîrã naâ weé'kere weetímima baa. Tohô weérã mɨsá kẽ'ra too dɨpóropɨ weé'kere weetísa'. Jesu Cristo wẽrîka be'ro Õ'âkɨ̃hɨ kɨ̃ɨ̂re masókɨ niîwĩ. Kɨ̃ɨ̂re masó'karo nohota mɨsá kẽ'rare masógɨ, apé su'tiro sãhakã́ weékɨ niîwĩ. Õ'âkɨ̃hɨ kɨ̃ɨ̂ tutuaró me'ra kɨ̃ɨ̂ makɨ́ Jesu Cristore masó'kere mɨsâ ẽho peó yuukã, tohô weékɨ niîwĩ.

¹³ Mɨsâ Judeu masa niîtirã õ'rekɨhɨ́ yapa kaserore yehê kõ'atikãrã niîwɨ. Tohô niikã́ yã'âro weékũkãrã niîwɨ. Yã'âro niiséti tĩharã, too dɨpóropɨre wẽrî'kãrã weeró noho niîkãrã niîwɨ. A'tóka terore maha Õ'âkɨ̃hɨ yarã niî'. Kɨ̃ɨ̂ mɨsâre katî nu'kukã weékɨ niîwĩ. Mɨsâre yã'âro weé'kere akobohókɨ niîwĩ.

¹⁴ Õ'âkɨ̃hɨ kɨ̃ɨ̂ dutî'kere yɨ'rɨ́ nɨ'kakã, marîre bu'îri da'rê boopĩ. Teé marî pehé yã'asé kɨomí'kere kɨ̃ɨ̂ makɨ́ kurúsapɨ wẽrisé me'ra akobohókɨ niîwĩ.

¹⁵ Jesu Cristo kɨ̃ɨ̂ wẽrisé me'ra niî pe'tirã ĩ'yóropɨ wãtiâre dokâ ke'akã weékɨ niîwĩ. “A'ti nukúkãkãhasere pũûro wãkûtikã'ya” niî'ke niî'

¹⁶ Mɨsâ masísa', Judeu masa ni'karé apêye ba'asére ba'â dutitisama. Tohô weérã ãpêrã mɨsâ sĩ'risére, ba'asétisere Judeu masare dutîtise nohore naâ uukahákã, tɨ'otíkã'ya. Naâ pehé bosê nɨmɨri kɨosamá. Ni'kâ kɨ'mare, ma'ma muhípũre, tohô niikã́ semanari nɨkɨ naâ soo wɨáse nɨmɨrire kɨosamá. Naâ weeró nohota tiikése bosê nɨmɨri wee dutísama. “Mɨsâ tohô weetírã, Õ'âkɨ̃hɨ dutî'kere weé wee'”, niîsama. Naâ tohô niikã́, tɨ'otíkã'ya.

¹⁷ Õ'âkɨ̃hɨ kɨ̃ɨ̂ be'ropɨ́ ãyuró weeátehere ĩ'yó mɨ'tagɨ teeré kũûkɨ niîwĩ. Yɨ'ɨ̂ makɨ yeekãhasere masiáto niîgɨ tohô weékɨ niîwĩ. Ni'kâroakãre Jesu Cristo a'tî tohakɨ niîwĩ. Tohô weégɨ masaré a'teré too dɨpóropɨ dutî'kere Õ'âkɨ̃hɨ wee dutítimi maha.

¹⁸ Ãpêrã mɨsâre a'tîro niî soo boosama: “Ɨ̃sâ ãyurã́ niî'. Õ'âkɨ̃hɨ ɨ̃sâre ãyuró wãkuáto niîrã be'tí, kɨ̃ɨ̂re sẽrí'. Õ'âkɨ̃hɨre werê ko'terãre ẽho peó'. Ɨ̃sâ kãritímirã kẽ'esé weeró noho Õ'âkɨ̃hɨ yeere ĩ'yâ'. Tohô weérã, ɨ̃sâ ãpêrã yɨ'rɨóro Õ'âkɨ̃hɨ yeekãhasere ãyuró masî'. Mɨsá kẽ'ra tohôta weeyá. Mɨsâ a'teré weetírã, bu'îri kɨorã́sa'”, niî boosama. Mɨsâre tohô niikã́, neê ẽho peótikã'ya. “Masirã́ waro niî' ɨ̃sa”, niî wãkûsama. Tohô niî ma'akãrã weemá. A'té masá wãkusé di'akɨ̃ niî'.

¹⁹ Naâ Jesu Cristore siru tuútima. Marî pũrikã Jesu Cristo yaa kurakãharã niî'. Kɨ̃ɨ́ta niîmi marî dɨpoá. Marîre kɨ̃ɨ̂ masisére, tutuasére o'ôsami. Teé me'ra marî ɨmɨ̂kohori nɨkɨ Õ'âkɨ̃hɨ ɨaró noho nemoró a'mêri ma'í, wee tamú masi'.

²⁰ Mɨsâre too dɨpóropɨre mɨsâ yẽkɨ sɨmɨá niiséti mɨhati'kere pehé dutisé niîkaro niîwɨ. A'tóka terore too dɨpóropɨ weeséti'kere Jesu Cristo kɨ̃ɨ̂ wẽrisé me'ra yɨ'rɨ wetíkã weékɨ niîwĩ. Yɨ'rɨ wetíka be'ro niîmikã, de'ró weérã mɨsâ too dɨpóropɨ weeséti'karo nohota niîti taha?

²¹ Mɨsâre ãpêrã “A'te nohóre yẽ'êtikã'ya, tee nohóre ba'âtikã'ya”, niî boosama.

²² Naâ tohô niîrã, a'ti nukúkãkãhase maatá pe'tisére uúkũrã weemá. Masá naâ wãkuró me'ra wee dutíse niî'.

²³ Naâ dutisé ãyú butia'se weeró noho bɨsɨ̂'. Bu'îkãhase di'akɨ̃ a'tîro niî ta'sasama: “Mɨsá kẽ'ra ɨ̃sâ weeró nohota ãyuró ẽho peóro ɨá'. Õ'âkɨ̃hɨ marîre ãyuró wãkuáto niîrã be'tiró ɨá'. Marî ɨpɨ́ kẽ'ra yã'â niísa'. Tohô weérã marî basi marî ɨpɨré pi'etíse o'oró ɨá'. Marî pi'etíse o'ôka be'ro marî yã'âro ɨâri pehasere kõ'âta basió'”, niîmisama. Nií wee'. Naâ dutisére weérã, marî meharóta tohákã'sa' taha.

3

³

¹ Yɨ'ɨ̂ mɨsâre too dɨpóropɨ niî'karo nohota Jesu Cristo wẽrîkɨ niîwĩ. Mɨsâ kɨ̃ɨ̂ wẽrisé me'ra too dɨpóropɨ weeséti'kere du'úkãrã niîwɨ. Kɨ̃ɨ̂re kɨ̃ɨ̂ tutuasé me'ra kɨ̃ɨ̂ pakɨ́ masókɨ niîwĩ. Mɨsá kẽ'rare kɨ̃ɨ̂ makɨré ẽho peó yuukã, kɨ̃ɨ̂ tutuasé me'ra mɨsâre katî nu'kukã weékɨ niîwĩ. Tohô weérã a'ti nukúkãkãhasere wãkûtikã'ya. Ɨ'mɨ̂sekãhase pe'ere wãkûya. Mɨsâ Õ'âkɨ̃hɨpɨre Jesu Cristo me'ra niî'. Jesu Cristo ɨ'mɨ̂sepɨ Õ'âkɨ̃hɨ me'ra wiôgɨ duhirí kumuropɨ niîmi. Tohô weérã mɨsâ Jesu Cristo niiró ɨ'mɨ̂sepɨkãhasere ãyuró wãkû nɨrɨya.

⁴ Kɨ̃ɨ́ta marîre sɨ'orí niîmi. Sɨ'orí katîmi. Marî kɨ̃ɨ̂ me'ra niî'. Tohô weérã kɨ̃ɨ̂ a'ti nukúkãpɨre opâturi a'tikã́, marí kẽ'ra kɨ̃ɨ̂ tutuasé, kɨ̃ɨ̂ asistésere bu'î peha tamurãsa'. Dɨporópɨ weeséti'kere Paulo du'u dutí'ke niî'

⁵ Mɨsâ a'ti nukúkãkãhase yã'asé weé sĩ'risere du'úkã'ya. Mɨsâ, mɨsâ nɨmosã́ numia niîtirãre a'me tãrátikã'ya. Mɨsâ numiâ kẽ'ra, mɨsâ marapɨ́ sɨmɨa niîtirãre a'me tãrátikã'ya. Neê ãpêrã me'ra “Yã'âro weé sĩ'risa'”, niîtikã'ya. Neê ãpêrãre mɨsâ wãkusépɨ “Naâre wɨâ kãhi, naâ me'ra niî sĩ'risa'”, niî wãkûtikã'ya. Ãpêrã naâ kɨosére ɨotíkã'ya. Mɨsâ apêye nohore ɨórã, Õ'âkɨ̃hɨ mehereta ẽho peórã wee boósa'.

⁶ Kɨ̃ɨ̂re yɨ'rɨ́ nɨ'kakã, a'te nohó weerã́re Õ'âkɨ̃hɨ ɨpɨ́tɨ bu'îri da'rêgɨsami.

⁷ Mɨsâ too dɨpóropɨre teeré weesétirã, yã'arã́ niîkãrã niîwɨ.

⁸ A'tóka terore maha niî pe'tisere mɨsâ yã'âro weesére, uasé, ĩ'yâ tu'tise, ãpêrãre tu'tî yabisére du'uyá. Yã'asére neê wãkû buhíkã'tikã'ya.

⁹ Ãpêrãre niî sootikã'ya. Mɨsâ too dɨpóropɨ weeséti'kere du'ú tohakãrã niîwɨ. Tohô weérã teeré weetíkã'ya maha.

¹⁰ A'tóka terore mɨsâ apêye wãkusé kɨó'. Õ'âkɨ̃hɨ mɨsâre weé'kɨ kɨ̃ɨ̂ weeró noho niisétiato niîgɨ mɨsâre dɨka yuú nu'kugɨ weemí. Nemoró kɨ̃ɨ̂re masiáto niîgɨ tohô weemí.

¹¹ Marî niî pe'tirãre Jesu Cristo ĩ'yóropɨre neê dɨka watíse marí'. Judeu masa, Judeu masa niîtirã, ãpêrã õ'rekɨhɨ́ yapa kasero yehê kõ'a no'o'kãrã, yehê kõ'a no'oya marirã́re dɨka watíse marí'. Tohô niikã́ apé sia'kãharãpɨ, sumútohorikãharã, da'rá ko'terã, da'rá ko'tetirã, ã'rá niî pe'tirã me'ra dɨka watíse marí'. Kɨ̃ɨ̂ niî pe'tirã kɨ̃ɨ̂re ẽho peórã wiôgɨ niîmi. Niî pe'tirãpɨre niîmi.

¹² Õ'âkɨ̃hɨ mɨsâre ma'imí. Kɨ̃ɨ̂ mɨsâre kɨ̃ɨ yarã́ niiáto niîgɨ besékɨ niîwĩ. Tohô weérã ãpêrãre pahá yã'aya. Naâre ãyuró e'katíse me'ra wee tamúya. Mɨsâ “Ãpêrã yɨ'rɨóro niî'”, niî wãkûtikã'ya. Mɨsâre mehêkã niikã́, tohô tɨ'ó yã'akã'ya. Wãkû tutuaya.

¹³ Mɨsâ basi ãpêrã me'ra a'mé tu'ti'kãrã, ãpêrã mehêkã weekã́ tɨ'sâti'kere naâre akobohóya. Jesu Cristo mɨsâre akobohókɨ niîwĩ. Tohô weérã mɨsá kẽ'ra ãpêrãre meharóta akobohóya.

¹⁴ A'mêri ma'iyá. Mɨsâ tohô ma'írã, niî pe'tise yɨ'ɨ̂ dutî'kere weé pe'okã'rãsa'. Ãyuró mɨsâ basi sɨ'orí niisétirãsa'.

¹⁵ Õ'âkɨ̃hɨ kɨ̃ɨ̂ ɨaró weekã́, mɨsa yeé ehêri põ'raripɨre e'katíkã weesamí. Kɨ̃ɨ̂ ɨaró weetírã, bɨhâ wetisa'. Tohô weérã kɨ̃ɨ̂ ɨaró weeyá. Ãyuró sɨ'orí niisétiya. A'teré ɨa sãágɨ, kɨ̃ɨ̂ mɨsâre ni'kâ kura, ni'kɨ́ põ'ra weékɨ niîwĩ. Mɨsâ kɨ̃ɨ̂re “Ãyú'” niî nu'kukã'ya.

¹⁶ Jesu Cristo yee kitire ãyuró wãkû nɨrɨya. Kɨ̃ɨ̂ masisé o'osé me'ra ãpêrãre mɨsâ basi a'mêri bu'êya. Mɨsâ ehêri põ'raripɨ Õ'âkɨ̃hɨre “Ãyú'” niîrã, basâ peoya.

¹⁷ Mɨsâ Jesu Cristo yarã niî'. Tohô weérã niî pe'tise mɨsâ weesétise, uúkũsetisere kɨ̃ɨ yarã́ weeró nohota weeyá. Jesu Cristo kɨ̃ɨ̂ tutuasé me'ra teeré weetá basió'. Kɨ̃ɨ̂ pakɨré “Ãyú'” niî nu'kukã'ya. Jesu Cristore ẽho peórãre wee dutí'ke niî'

¹⁸ Marâpɨtirã numia, Jesu Cristo marî wiôgɨre ẽho peórã, a'tîro weeyá. Mɨsâ marapɨ́ sɨmɨare naâ dutisére yɨ'tí ẽho peóya.

¹⁹ Mɨsâ nɨmôtirã pe'e, mɨsâ nɨmosã́ numiare ma'iyá. Naâ me'ra uâtikã'ya.

²⁰ Wi'marã́, ma'mâ piha, niî pe'tise mɨsâ pakɨ sɨmɨá dutisére ãyuró yɨ'tiyá. Õ'âkɨ̃hɨ tohô weekã́ ɨasamí.

²¹ Mɨsâ põ'rare na'îro tu'tî, uakã́ weetíkã'ya. Mɨsâ tohô weekã́, naâ bɨhâ weti, mɨsâ dutisére wee masítisama.

²² Da'rá ko'terã, niî pe'tise mɨsâ wiôrã a'ti nukúkãkãharã naâ dutisére yɨ'tiyá. Naâ ĩ'yóropɨ, naâ ĩ'yâtiropɨre ãyuró da'rayá. Mɨsâ wiôrã ĩ'yóropɨ di'akɨ̃ ãyuró da'rárã, mɨsâ wiôgɨ “Ãyuró da'ramá” niî wãkuáto, niîrã wee boósa'. Mɨsâ tohô weetíkã'ya. Õ'âkɨ̃hɨre ãyuró ẽho peó tĩharã, wee soóro mariró da'rayá.

²³ Mɨsâ apêye noho da'rárã, ãyuró tɨ'sasé me'ra da'rayá. Teesé me'ra weetíkã'ya. Masaré da'ra basámirã, Jesu Cristore da'ra basárã weeró noho tɨ'ó yã'aya.

²⁴ Mɨsâ kɨ̃ɨ̂re da'rá ko'terã niî'. Kɨ̃ɨ́ta mɨsâre ɨ'mɨ̂sepɨ wapa yeégɨsami. Mɨsâ teeré masî toha'. Tohô weérã ãyuró da'rayá.

²⁵ Yã'âro weé'ke wapare Õ'âkɨ̃hɨ bu'îri da'rêgɨsami. Masá niî pe'tirãre ni'kâro noho bu'îri da'rêsami. Neê ni'kɨ́ yɨ'rɨ wetítisami.

4

¹ Dutirã́, mɨsá kẽ'ra ɨ'mɨ̂sepɨre ni'kɨ́ wiôgɨ kɨó'. Mɨsâ teeré masî toha'. Tohô weérã Õ'âkɨ̃hɨ ɨaró nohota mɨsâre da'rá ko'terãre ãyuró kɨoyá.

² Õ'âkɨ̃hɨre ãyuró tɨ'o kasá nɨ'ko tĩharã, sẽrí nu'kukã'ya. Kɨ̃ɨ̂re “Ãyú'”, niîya.

³ Mɨsâ Õ'âkɨ̃hɨre sẽrírã, ɨ̃sá kẽ'rare sẽri basáya. “Pãharã́ Jesu Cristo yee kitire masîtirãre tɨ'ó sĩ'rikã weeáto”, niî sẽri basáya. Kɨ̃ɨ yeé kiti dɨporókãharãpɨ naâ masî no'oya marí'ke ãyusé kiti niî'. A'té weresé bu'irita yɨ'ɨ̂ bu'îri da'rerí wi'ipɨ duhísa'.

⁴ Yɨ'ɨ̂re Õ'âkɨ̃hɨre sẽri basáya. Yɨ'ɨ̂re “Wisiró mariró diakɨ̃hɨ́ wereáto”, niî sẽri basáya.

⁵ Ãpêrã Jesu Cristore ẽho peótirã me'ra ãyuró niisétiya. Naâ me'ra mɨsâ weesétisetiri nɨkɨ Õ'âkɨ̃hɨ ɨaró nohota naâre ãyuró weeyá.

⁶ Naâ me'ra uúkũrã, ãyuró tɨ'sâropɨta tɨ'ó tɨ'sase me'ra uúkũya. Ãpêrã mɨsâre sẽrí yã'akã, ãyuró diakɨ̃hɨ́ yɨ'tiyá. Paulo me'rakãharã ãyu dutíse o'ô'ke niî'

⁷ Tíquico yɨ'ɨ̂ me'rakɨ̃hɨ yɨ'ɨ̂ ma'igɨ́ a'tîro weegɨ́sami. Yee kitíre mɨsâre werêgɨ wa'âgɨsami. Kɨ̃ɨ̂ yɨ'ɨ̂ me'ra marî wiôgɨ Jesu Cristo yeere da'rá ko'te tamugɨ niîmi. Tohô niikã́ yɨ'ɨ̂re bu'ê tamugɨ niîmi.

⁸ Yɨ'ɨ̂ kɨ̃ɨ̂re mɨsâ tiropɨ wa'â dutigɨti weé'. Ɨ̃sa yeé kitire tɨ'órã, mɨsâ wãkû tutua, e'katí nemorãsa'.

⁹ Onésimo mɨsa yaá maka niî'kɨ kẽ'ra kɨ̃ɨ̂ me'ra wa'âgɨsami. Kɨ̃ɨ̂ yɨ'ɨ̂ ma'igɨ́ yɨ'ɨ̂ me'rakɨ̃hɨ a'tóka terore ɨ̃sâre ãyuró wee tamúgɨ weemí. Naâ pɨárã mɨsâre werêrãsama niî pe'tise a'tó Romapɨ de'ró wa'â'kere.

¹⁰ Aristarco mɨsâre ãyu dutími. Kɨ̃ɨ́ kẽ'ra yɨ'ɨ̂ me'ra bu'îri da'rerí wi'ipɨ niîmi. Marco, Barnabé basúkɨ kẽ'ra mɨsâre ãyu dutími. Marco mɨsâ tiropɨ sihakã́, yɨ'ɨ̂ mɨsâre too dɨpóro niî'karo nohota ãyuró yẽ'eápa.

¹¹ Ãpí Jesu mɨsâre ãyu dutími. Kɨ̃ɨ̂reta “Justo” pisûkãrã niîwã. Ã'rá i'tiárã ãpêrã Judeu masa Jesu Cristore ẽho peórã wa'terore naâ di'akɨ̃ yɨ'ɨ̂re da'ra tamúma. Naâ Õ'âkɨ̃hɨ wiôgɨ niisére masaré bu'êrã weemá. Naâ wee tamúse me'ra yɨ'ɨ̂ wãkû tutua, e'katíse kɨó'.

¹² Epafra mɨsâ me'rakɨ̃hɨ ãyu dutími. Kɨ̃ɨ̂ Jesu Cristo yeekãhasere da'rá ko'tegɨ niîmi. Kɨ̃ɨ̂ mɨsâre ɨpɨ́tɨ sẽri baságɨ weemí. Õ'âkɨ̃hɨre ãyuró siru tuuáto, kɨ̃ɨ̂ ɨaró ãyuró weé nu'kuato niîgɨ, tohô sẽri basámi.

¹³ Yɨ'ɨ̂ diakɨ̃hɨ́ta werê'. Kɨ̃ɨ̂ mɨsâre ɨpɨ́tɨ sẽri basákã ĩ'yâ'. Ãpêrã kẽ'rare Laodicéiakãharãre, tohô niikã́ Hierápolikãharãre sẽri basámi.

¹⁴ Luca akô yeegɨ ɨ̃sâ ɨpɨ́tɨ ma'igɨ́ mɨsâre ãyu dutími. Ãpí kẽ'ra Dema wamêtigɨ ãyu dutíse o'ômi. Paulo ãyu dutí tɨo'ke niî'

¹⁵ Laodicéiakãharã Jesu Cristore ẽho peórã ãyuáto. Ninfa wamêtigo kẽ'ra ãyuáto. Tohô niikã́ niî pe'tirã koo yaá wi'ipɨ Õ'âkɨ̃hɨre ẽho peórã nerê wɨarã ãyuáto.

¹⁶ Mɨsâ a'ti pũríre bu'ê pe'oka be'ro Laodicéiakãharãpɨre o'ôo'ya. Naá kẽ'ra naâ nerê wɨaropɨ bu'ê ĩ'yoato. Mɨsá kẽ'ra ape pũrí Laodicéiakãharãre yɨ'ɨ̂ ohâka pũrire yẽ'êrã, mɨsâ nererópɨ bu'êya.

¹⁷ A'tîro niîya Arquipore: “Marî wiôgɨ da'ra dutígɨ kũû'kere ãyuró da'rá tu'a ehaya.”

¹⁸ A'té niî tɨose daarire mɨsâre ãyu dutíse o'ôgɨ, yɨ'ɨ̂ basita ohâ'. Wãkûya yɨ'ɨ̂ bu'îri da'rerí wi'ipɨ niisére. Õ'âkɨ̃hɨre sẽri basáya. Õ'âkɨ̃hɨ mɨsâre ãyuró weeáto. Toô kã'rota ohâ'. Paulo