1

¹ Yɨ'ɨ̂ Paulo, tohô niikã́ Timóteo Jesu Cristore da'rá ko'terã niî'. Ɨ̃sâ mɨsâ niî pe'tirãre Jesu Cristore ẽho peórã Filipopɨ niirã́re ohâ'. Tohô niikã́ Jesu Cristore ẽho peóri kurakãharã sɨ'orí wehê peorã kẽ'rare ohâ'. Naâre wee tamú ko'terã kẽ'rare ohâ'.

² Õ'âkɨ̃hɨ marî pakɨ, Jesu Cristo marî wiôgɨ mɨsâre ãyuró weeáto. Mɨsâre ãyuró ehêri põ'ratikã weeáto. Jesu Cristore ẽho peórãre Paulo sẽri basáse niî'

³ Yɨ'ɨ̂ mɨsâre wãkusétiri nɨkɨ yɨ'ɨ̂ wiôgɨ Õ'âkɨ̃hɨre “Ãyú'” niî'. Mɨsâ ãyuró wee yuúkã tohô weé'.

⁵

⁴ Neê waropɨ mɨsâ Jesu Cristo yee kitire tɨ'órã, yɨ'ɨ̂re wee tamú nɨ'kawɨ. A'tóka tero kẽ'rare tohôta weé nu'ku'. Tohô weégɨ mɨsâ niî pe'tirã yee niiátehere Õ'âkɨ̃hɨre e'katíse me'ra sẽri basá nu'ku'.

⁶ Õ'âkɨ̃hɨ mɨsâre ãyuró weesére yɨ'ɨ̂ masî yɨ'rɨkahá pu'tikã'. Õ'âkɨ̃hɨ mɨsâre ãyuró dɨka yuú nɨ'kakɨ niîwĩ. A'tóka tero kẽ'rare dɨka yuúgɨ weemí. Teê Jesu Cristo a'tirí kurapɨ tohô dɨka yuú yapatígɨsami.

⁷ Yɨ'ɨ̂ a'tîro wãkû': “Õ'âkɨ̃hɨ naâre tohô dɨka yuú nu'kugɨsami”, niî'. Yɨ'ɨ̂ tohô wãkusé ãyú niî'. Mɨsâre ma'ígɨ, tohô bɨsɨ̂'. A'tîro niî'. Ni'kâroakãre yɨ'ɨ̂ bu'îri da'rerí wi'ipɨ niikã́, mɨsâ yɨ'ɨ̂re bu'î peha tamu'. Wiôrãre “Jesu Cristo masaré yɨ'rɨómi niisé kiti diakɨ̃hɨ́ niî'” niî werekã́ kẽ'rare, bu'î peha tamu'. Tohô weérã Õ'âkɨ̃hɨ yɨ'ɨ̂re wee tamúsere mɨsá kẽ'ra bu'î peha tamu'.

⁸ Õ'âkɨ̃hɨ yɨ'ɨ̂ mɨsâre ɨpɨ́tɨ ma'isére masîmi. Yɨ'ɨ̂ mɨsâre ma'ígɨ, Jesu Cristo kɨ̃ɨ̂ pahá yã'ase me'ra ma'í'.

⁹ Mɨsâre “Nemoró a'mêri ma'i nemoáto”, niî sẽri basá'. “Niî pe'tisere ãyuró masisé me'ra tɨ'o kasá nɨ'ko pe'oato”, niî'.

¹⁰ Tohô weérã mɨsâ “A'tîro weeró ɨá'”, niî masirãsa'. Yã'âro weesére moorã́sa'. Jesu Cristo a'tikã́, bu'îri marirã́ boka ehá no'orãsa'. Ãyusé di'akɨ̃ weérã boka ehá no'orãsa'.

¹¹ Jesu Cristota mɨsâre niî pe'tisere ãyuró weekã́ weegɨ́sami. Mɨsâ tohô weekã́ ĩ'yârã, masá Õ'âkɨ̃hɨre a'tîro wãkûrãsama. “Ãyú yɨ'rɨami, ãyusé weemí”, niîrãsama. Jesu Cristo niî pe'tise yɨ'rɨóro niî yɨ'rɨ nɨ'kami niisé niî'

¹² Yɨ'ɨ̂ bu'îri da'rerí wi'ipɨ niîmikã, Jesu Cristo masaré yɨ'rɨómi niisé kiti nemoró se'sâa wa'ása'. Akawerérã, mɨsâre teeré masikã́ ɨá'.

¹³ Yɨ'ɨ̂ bu'îri da'rerí wi'ipɨ niîgɨ, surárare Jesu Cristo masaré yɨ'rɨómi niisére werê'. Tohô weérã niî pe'tirã surára, wiôgɨ yaa wi'ipɨ ko'terã́ a'tîro niîma: “Kɨ̃ɨ̂ Jesu Cristore siru tuúse wapa, bu'îri da'rerí wi'ipɨ niîmi”, niîma. Ãpêrã kẽ'ra masî pe'tikã'ma.

¹⁴ Yɨ'ɨ̂ bu'îri da'rerí wi'ipɨ niî yuukã, pãharã́ marî akawerérã wãkû tutuama. Teé bu'iri naâ marî wiôgɨre ẽho peó nemorã, uiró mariró Õ'âkɨ̃hɨ yee kitire werêma.

¹⁷

¹⁵ Ãpêrã pe'e yɨ'ɨ̂re ɨórã, Jesu Cristo yeere werêma. Naâ bu'esé pe'ere siru tuú dutirã tohô weemá. Naâ, naa yeékãhasere wãkûrã weemá. Keoró wãkûtimirã, Jesu Cristo yeere werêma. Yɨ'ɨ̂ bu'îri da'rerí wi'ipɨ niikã́, kɨ̃ɨ̂re bɨhâ wetise dokê pehaato niîrã tohô weemá. Ãpêrã pe'e Jesu Cristo yee kitire ãyuró weé sĩ'rise me'ra werêma. Yɨ'ɨ̂re ma'írã, tohô weemá. Naâ a'tîro masîma. “Kɨ̃ɨ̂ Jesu Cristo yee kitire keoró uúkũse bu'iri kɨ̃ɨ̂ bu'îri da'rerí wi'ipɨ niîmi”, niîma.

¹⁸ Ãpêrã yɨ'ɨ̂re yã'âro weé sĩ'rikã, ãyurósa'. No'ó yɨ'ɨ̂re ma'írã, ma'itírã, Jesu Cristo yeere werêrã weemá. Naâ tohô weesére tɨ'ógɨ, e'katí'. Tohô e'katí nu'kugɨsa'.

¹⁹ A'tîro niî'. Mɨsâ sẽrisé me'ra, tohô niikã́ Espírito Santo Jesu Cristo o'ô'kɨ yɨ'ɨ̂re wee tamúse me'ra niî pe'tise yɨ'ɨ̂re wa'asé ãyuró yapatírosa'. A'teré masî'.

²⁰ Yɨ'ɨ̂ Jesu Cristo yeere werêtigɨ, bopôya boosa'. A'tîro pe'e ɨása'. Uiró mariró wãkû tutuase me'ra kɨ̃ɨ yeére werê nu'ku sĩ'risa'. Ni'kâroakã kẽ'rare yɨ'ɨ̂ weé nu'kuro nohota weé sĩ'risa'. Tohô weégɨ yɨ'ɨ̂ bu'îri da'rerí wi'ipɨ niî'kɨ wihakã́, ou yɨ'ɨ̂re wẽhekã́, a'tîro wa'akã́ ɨása'. Niî pe'tise yɨ'ɨ̂ weesé me'ra Jesu Cristore masá nemoró masikã́ ɨása'. Kɨ̃ɨ̂ ãyú butia'sere siâpe me'ra masî nemokã ɨása'.

²¹ Niî pe'tiro yɨ'ɨ̂ katiró põo tẽóro Jesu Cristo ɨaró weé sĩ'risa'. Yɨ'ɨ̂ pe'e maa kɨ̃ɨ̂ ãpêrã, apêye noho yɨ'rɨóro niî yɨ'rɨ nɨ'kami. Yɨ'ɨ̂ wẽrîgɨ, kɨ̃ɨ̂ me'ra niîgɨsa'. Kɨ̃ɨ̂ me'ra niikã́, ãyú yɨ'rɨa'.

²² Yɨ'ɨ̂ katîgɨ, marî wiôgɨ yeekãhasere da'ra masí'. Tohô weégɨ yɨ'ɨ̂ wẽrikã́, ou katikã́, ãyú niî boosari niî masitisa'.

²³ A'té pɨáro besekã́, diâsa niî'. Wẽrîgɨ, Jesu Cristo me'ra niî boosa'. Tohô weégɨ “Wẽrikã́, ãyu boósa'”, niî tɨ'ó yã'a'.

²⁴ “Yɨ'ɨ̂ katîgɨ pe'e, mɨsâre nemoró wee tamú boosa'”, niî tɨ'ó yã'asa'.

²⁵ Tohô weégɨ yɨ'ɨ̂ masî', mɨsâ me'ra niî ni'igɨti yuhûpɨ. Mɨsâre nemoró wee tamúgɨti niîgɨ, tohô weegɨ́ti. Tohô niikã́ mɨsâ ẽho peóse me'ra nemoró e'katiáto niîgɨ tohô weegɨ́ti.

²⁶ Tohô weérã opâturi yɨ'ɨ̂ mɨsâ tiropɨ niikã́, Jesu Cristo yɨ'ɨ̂re ko'tesé wapa, nemoró kɨ̃ɨ̂re “Ãyú yɨ'rɨami” niîrãsa'.

²⁷ Niî pe'tise mɨsâ weesétisere Jesu Cristo yee kiti niîro nohota weeyá. Mɨsâ tohô weekã́, mɨsâ tiro niîgɨ, ou yoarópɨ niîgɨ, mɨsâ ãyuró weesére tɨ'ogɨ́ti. Mɨsâre ni'kâro noho ãyuró ẽho peó nu'kukã ɨása'. Tohô niikã́ wãkû tutuase me'ra ni'kâro noho Jesu Cristo yee kitire werê turiakã ɨása'.

²⁸ Jesu Cristo yee kitire ɨatírã mɨsâre yã'âro weekã́, uîtikã'ya. Tohô weérã naâ pekâ me'epɨ wa'aátehere masîrãsama. Mɨsâ pe'e kẽ'ra uîtirã, mɨsâre yɨ'rɨó no'oatehere ĩ'yorã́sa'. Õ'âkɨ̃hɨta mɨsâre yɨ'rɨó, uiró mariró niisétikã weemí.

²⁹ Õ'âkɨ̃hɨ mɨsâre ma'ígɨ, Cristore ẽho peó dutiwĩ. Jesu Cristore ẽho peó'ke bu'iri mɨsâre yã'âro weerã́sama. Teé kẽ'rare Õ'âkɨ̃hɨ kũûwĩ.

³⁰ Jesu Cristore ẽho peóse bu'iri marî ni'kâro noho pi'etí'. Too dɨpóropɨ mɨsa yaá makapɨ yɨ'ɨ̂re tãrá, bu'îri da'rerí wi'ipɨ kũukã́ ĩ'yâwɨ. Ni'kâroakã kẽ'rare meharóta yɨ'ɨ̂re yã'âro weesére tɨ'ósa'.

2

²

¹ Jesu Cristo mɨsâre wãkû tutua e'katíkã weemí. Kɨ̃ɨ̂ mɨsâre ma'ígɨ, wee tamúmi. Espírito Santo mɨsâ me'ra niîmi. Tohô weérã mɨsâ ma'isé, pahá yã'asere kɨórã, a'tîro weeyá. Ãyuró ni'kâro me'ra niisétiya. Ni'kâro noho a'mêri ma'iyá. Espírito Santo me'ra ni'kârota wãkusétirã niîya. Tohô weesé me'ra yɨ'ɨ̂re e'katí nemokã weerã́sa'.

³ Mɨsa yeé di'akɨ̃re ɨa sãátikã'ya. “Ãpêrã yɨ'rɨóro niî'”, niîtikã'ya. Ãpêrã pe'ere “Ãyú yɨ'rɨ nɨ'kama”, niî tɨ'ó yã'aya.

⁴ Mɨsa yeékãhase di'akɨ̃re “Ãyuró wa'aáto”, niî wãkûtikã'ya. Ãpêrã yee kẽ'rare “Ãyuró wa'aáto”, niî wãkûya.

⁵ Mɨsâ Jesu Cristo wãkuséti'karo nohota wãkusétiya. Kɨ̃ɨ̂ “Ãpêrã yɨ'rɨóro ãyugɨ́ niî'”, niîtikɨ niîwĩ.

⁶ Kɨ̃ɨ̂ Õ'âkɨ̃hɨ niisétisere kɨomígɨ, “Yɨ'ɨ̂ a'ti nukúkãpɨ a'tîgɨ, Õ'âkɨ̃hɨ weeró noho niisére neê du'usomé”, niîtikɨ niîwĩ.

⁷ A'tîro pe'e weékɨ niîwĩ. Kɨ̃ɨ̂ ɨaró me'ra kɨ̃ɨ̂ wiôgɨ niisére du'úkɨ niîwĩ. Du'ú, a'ti nukúkãpɨ a'tîgɨ, ãpiré da'rá ko'tegɨ weeró noho wa'âkɨ niîwĩ. A'ti ɨpɨ́ me'ra bahuákɨ niîwĩ.

⁸ Tohô weégɨ masɨ́ weeró noho bahúgɨ, mehô niigɨ́ wa'âkɨ niîwĩ. Masá “Kɨ̃ɨ̂re kurúsapɨ paâ bi'peya” niikã́, kɨ̃ɨ̂ pakɨré yɨ'tígɨ, yɨ'rɨ́ nɨ'katikɨ niîwĩ. Kɨ̃ɨ̂ kurúsapɨ yã'âro wẽrîmigɨ, kɨ̃ɨ̂ pakɨré yɨ'rɨ́ nɨ'katikɨ niîwĩ.

⁹ Tohô weégɨ Õ'âkɨ̃hɨ kɨ̃ɨ̂re niî pe'tirã bu'ipɨ sõróokɨ niîwĩ. Kɨ̃ɨ̂ wameré ãpêrã wame yɨ'rɨóro ãyuró wãkû dutigɨ tohô weékɨ niîwĩ.

¹⁰ Tohô weérã niî pe'tirã ɨ'mɨ̂sepɨ niirã́, a'ti nukúkãpɨ niirã́, wẽrî'kãrã Jesu wameré tɨ'órã, ehâ ke'a pe'tirãsama.

¹¹ Niî pe'tirã “Jesu Cristo marî wiôgɨ niîmi”, niîrãsama. Naâ Õ'âkɨ̃hɨre, “Ãyú yɨ'rɨami”, niîrãsama. Jesu Cristore ẽho peórã yã'âro weerã́re ãyusé weesétise ĩ'yorã́sama niisé niî'

¹² Akawerérã, yɨ'ɨ̂ mɨsâre ma'í'. Too dɨpóropɨ yɨ'ɨ̂ mɨsâ me'ra niîka terore yɨ'ɨ̂ dutî'kere yɨ'tiwɨ́. Ni'kâroakãre yɨ'ɨ̂ yoarópɨ niî'. Tãhása' maha. Tootá nemoró yɨ'tiyá. Õ'âkɨ̃hɨ mɨsâre yɨ'rɨókɨ niîwĩ. Teeré wio pesáse me'ra wãkûya. Teeré wãkûrã, “Ãpêrã yɨ'rɨóro niî'”, niiró mariró niisétiya. Ãyuró niî yapatíya. Yã'âro weerí niîrã, tohô weeyá.

¹³ A'tîro niî'. Mɨsâre Õ'âkɨ̃hɨ ãyuró weé sĩ'rikã weesamí. Kɨ̃ɨ̂ ɨaró noho mɨsâre ãyuró tu'â eha nɨ'kokã weesamí.

¹⁴ No'ó niî pe'tisere weérã tɨ'sâtimirã, ũru sãáse me'ra weetíkã'ya.

¹⁵ Tohô weérã Õ'âkɨ̃hɨ põ'ra yã'asé marirã́, bu'îri moorã́ niîrãsa'. Mɨsâ a'ti nukúkãkãharã niî soorã yã'âro weesétirã wa'teropɨ niî'. Mɨsâ ãyuró weérã, naâre ãyuró, keoró weesére ĩ'yorã́sa'.

¹⁶ Ãyusé katisé pe'titíse kitire werêrãsa'. Mɨsâ ãyuró weesé me'ra yɨ'ɨ̂ mɨsâ tiropɨ bu'ê siha'kere a'tîro niîgɨti. Jesu Cristo opâturi a'tikã́, yɨ'ɨ̂ mehô waro naâre bu'êtipã niîgɨ, e'katígɨti.

¹⁷ Masá mɨsâre yã'âro weemíkã, mɨsâ Jesu Cristore ẽho peó nu'ku'. Mɨsâ ẽho peóse Õ'âkɨ̃hɨre ãyusé o'osé weeró noho niî'. Yɨ'ɨ̂ Jesu Cristo yeere weresé wapa yɨ'ɨ̂re wẽhekã́, Õ'âkɨ̃hɨre ãyusé o'ô nemoro weeró noho niîrosa'. Tohô wa'akã́, yɨ'ɨ̂ e'katígɨsa'. Mɨsá kẽ'rare e'katíkã weegɨ́sa'.

¹⁸ Mɨsâ yɨ'ɨ̂re e'katí tamurãsa'. Timóteo, Epafrodito yeekãhase niî'

¹⁹ Marî wiôgɨ Jesu ɨakã́, maatá Timóteore mɨsâ tiropɨ o'ôo'gɨti. Mɨsa yeé kitire tɨ'ógɨ, e'katígɨti niîgɨ, tohô weegɨ́ti.

²⁰ Timóteo di'akɨ̃ yɨ'ɨ̂ weeró noho wãkûmi. Kɨ̃ɨ̂ yɨ'ɨ̂ weeró noho mɨsâre ãyuró wa'akã́ ɨágɨ, ɨpɨ́tɨ wãkû ke'timi.

²¹ Ãpêrã naa yeé di'akɨ̃re ãyuró wa'akã́ ɨa sãásama. Jesu Cristo yee pe'ere tohô wãkûtisama.

²² Mɨsâ pũrikã Timóteo keoró weesére masî tohasa'. Kɨ̃ɨ̂ yɨ'ɨ̂ me'ra ni'kɨ́ kɨ̃ɨ̂ pakɨ́ me'ra da'ragɨ́ weeró noho Jesu Cristo yee kitire werê tamugɨ weemí.

²³ Tohô weégɨ yeekãhásere ãyuró masîka be'ro kɨ̃ɨ̂re mɨsâ tiropɨ o'ôo'gɨti.

²⁴ Kɨ̃ɨ̂re o'ôo' sĩ'rimigɨ, yɨ'ɨ́ kẽ'ra Jesu Cristo marî wiôgɨ o'ôo'kã, maatá mɨsâ tiropɨ wa'âgɨsa'.

²⁵ “Apé tero weégɨ Timóteo me'ra ãpí marî akawerégɨ Epafroditore o'ôo'ro ɨásato”, niî wãkû'. Epafrodito yɨ'ɨ̂ me'ra tutuaró Jesu Cristo yeere werê tamumi. Mɨsâ basi yɨ'ɨ̂re wee tamú dutirã kɨ̃ɨ̂re o'ôo'kãrã niîwɨ.

²⁶ Kɨ̃ɨ̂ mɨsâre pũûro ĩ'yâ sĩ'rimi. Kɨ̃ɨ̂ do'âtise kitire mɨsâ masikã́ tɨ'ógɨ, pũûro bɨhâ wetiwĩ. Tohô weégɨ kɨ̃ɨ̂re o'ôo'gɨti.

²⁷ Diakɨ̃hɨ́ta niî', pũûro waro wa'âwĩ. Wẽrisé pɨ'to niîwĩ. Kɨ̃ɨ̂ pũûro do'âtimikã, Õ'âkɨ̃hɨ kɨ̃ɨ̂re pahá yã'awĩ. Kɨ̃ɨ̂ se'sarore tohô weetíwĩ. Yɨ'ɨ́ kẽ'rare pahá yã'awĩ. Epafrodito wẽrikã́ maa, yɨ'ɨ̂ bɨhâ weti yɨ'rɨa boopã. Tohô wa'akã́ ɨatígɨ, Õ'âkɨ̃hɨ kɨ̃ɨ̂re yɨ'rɨówĩ.

²⁸ Mɨsâ kɨ̃ɨ̂re ĩ'yârã, e'katiáto taha niîgɨ o'ôo'. Mɨsâ e'katíse kitire tɨ'ógɨ, yɨ'ɨ́ kẽ'ra e'katígɨsa'.

²⁹ E'katíse me'ra kɨ̃ɨ̂re yẽ'êya. Jesu Cristore ẽho peógɨ marî akawerégɨ niîmi. Niî pe'tirã kɨ̃ɨ̂ weeró noho niirã́re ãyuró weeyá.

³⁰ Epafrodito Jesu Cristo yeere da'rá ko'te tĩhagɨ, wẽrîa wa'âmiwĩ. Mɨsâ yɨ'ɨ̂re wee tamúta basiótisere wee tamú sĩ'rigɨ, tohô wa'âwĩ. Tohô weérã kɨ̃ɨ̂re ãyuró yẽ'êya.

3

¹ Akawerérã, ni'kâroakãre mɨsâ Jesu Cristo yarã niî tĩharã, e'katíya. Yɨ'ɨ̂ too dɨpóro niî'kere opâturi niî nemokã, yɨ'ɨ̂re mehêkã nií wee'. Yɨ'ɨ̂ niî nemokã, ãyú niî' mɨsâre.

² Yã'âro weerã́re tɨ'o masíya. Naâ Õ'âkɨ̃hɨ yarã niiáto niîrã niî pe'tirãre õ'rekɨhɨ́ yapa kaserore yehê kõ'a dutima.

³ Marî pũrikã tohô weetímirã, Jesu Cristore ẽho peó tĩharã, diakɨ̃hɨ́ Õ'âkɨ̃hɨ dutisére ãyuró weerã́ niî'. A'tîro niî'. Espírito Santo wee tamúse me'ra Õ'âkɨ̃hɨre ẽho peó'. Tohô niikã́ Jesu Cristo marîpɨre niî yuukã, pũûro e'katí'. “Masá weesétise bu'îkãhase me'ra yɨ'rɨrã́sa'”, nií wee'.

⁴ Yɨ'ɨ̂ pũrikã “Yɨ'ɨ̂ weeséti'ke me'ra yɨ'rɨgɨ́sa'”, niî masi'. Yɨ'ɨ̂ a'teré niî pe'tirã nemoró niî masi', niîgɨ pe'ea'.

⁵ A'tîro niî' yɨ'ɨ̂re. Oito nɨmɨri yɨ'ɨ̂ bahuáka be'ro yɨ'ɨ̂ õ'rekɨhɨ́ yapa kaserore yehê kõ'akãrã niîwã. Yɨ'ɨ̂ Israel kurakɨ̃hɨ Benjami yaa kurakɨ̃hɨ niî'. Yɨ'ɨ̂ hebreu masɨ niî'. Yɨ'ɨ̂ pakɨ sɨmɨá kẽ'ra naáta niîwã. Yɨ'ɨ̂ Moisé dutî'kere ẽho peógɨ niî yuugɨ, fariseu masɨ niîwɨ.

⁶ Yɨ'ɨ̂ teeré ɨpɨ́tɨ waro ẽho peó yuugɨ, Jesu Cristore ẽho peóri kurakãharãre yã'âro weewɨ́. Moisé dutî'ke maa keoró weewɨ́. Neê ni'kɨ́ yɨ'ɨ̂re “Keoró weetíwĩ”, niî masitisami.

⁷ Too dɨpóropɨre “Yɨ'ɨ̂ niiséti'kere yɨ'ɨ̂re ãyú yɨ'rɨa'”, niîmiwɨ. Ni'kâroakãre “Yɨ'ɨ̂ Jesu Cristore ẽho peógɨ, niî pe'tise too dɨpórokãhase wapa marí'”, niî tɨ'ó yã'a'.

⁸ Apêye maa, yɨ'ɨ̂ wiôgɨ Jesu Cristore masisé wapatí yɨ'rɨa'. Apêye noho yɨ'ɨ̂ kɨo boó'ke nemoró wapatí'. Jesu Cristore ẽho peóse bu'iri niî pe'tise yɨ'ɨ̂ weeséti'kere, niiséti'kere marî ɨatísere kõ'ârã weeró noho kõ'âwɨ. Jesu Cristo yɨ'ɨ̂ wiôgɨre kɨó sĩ'rigɨ, tohô weewɨ́.

⁹ A'tîro ɨá'. Jesu Cristore yɨ'ɨ̂ me'ra niikã́ ɨá'. Moisé dutî'kere weesé me'ra Õ'âkɨ̃hɨ yɨ'ɨ̂re “Ãyugɨ́ niîmi”, niîsome. Yɨ'ɨ̂ Jesu Cristore ẽho peóse me'ra pe'e Õ'âkɨ̃hɨ yɨ'ɨ̂re ãyuró ĩ'yâsami. Yɨ'ɨ̂ ẽho peóse bu'iri yɨ'ɨ̂re keoró weekã́ weemí.

¹⁰ Yɨ'ɨ̂ a'tîro di'akɨ̃ weé sĩ'ri'. Cristore ãyuró masî sĩ'ri'. Õ'âkɨ̃hɨ kɨ̃ɨ̂ tutuaró me'ra yɨ'ɨ̂re dɨka yuú nu'kukã ɨá'. Kɨ̃ɨ̂ tutuasé me'ra Cristore masókɨ niîwĩ. Cristo kɨ̃ɨ̂ pakɨ yeére weégɨ, pi'etí, kurúsapɨ wẽrîkɨ niîwĩ. Yɨ'ɨ́ kẽ'ra Õ'âkɨ̃hɨ yeere ɨpɨ́tɨ weé sĩ'ri'. Jesu Cristo yeere wẽrîgɨpɨ, wee tɨó sĩ'ri'.

¹¹ Wẽrî'kãrã masa mɨháarãsama. Yɨ'ɨ́ kẽ'ra naâ weeró noho meharóta masa mɨháa sĩ'risa'. Marî ãyuró yɨ'rɨ́ sĩ'rirã, wãkû tutuaro ɨá' niisé niî'

¹² Yɨ'ɨ̂ a'té niî pe'tisere “Jesu Cristo weeró noho weé tu'a eha nɨ'ko pe'o toha'”, niîgɨ meheta weé'. Niî pe'tisere keoró weé wee' yuhûpɨ. Tohô weetímikã, Jesu Cristo yɨ'ɨ̂re kɨ̃ɨ yagɨ́ sãhakã́ weé tohakɨ niîwĩ. Tohô weégɨ kɨ̃ɨ̂ weeró noho niî sĩ'rigɨ, tutuaró me'ra kɨ̃ɨ yeére weé'.

¹³ Akawerérã, “Yɨ'ɨ̂ niî pe'tisere keoró weé toha'”, nií wee'. A'tîro pe'e weé'. Too dɨpóro yɨ'ɨ̂ weé'kere wãkú wee'. Be'ropɨ́ niiátehe pe'ere ãyuró weé tu'a eha sĩ'rigɨ, wãkû tutua'.

¹⁴ Ãyuró tu'â eha nɨ'ko sĩ'ri'. Õ'âkɨ̃hɨ ɨ'mɨ̂sepɨ o'oátehere yẽ'ê sĩ'rigɨ, niî pe'tise kɨ̃ɨ yeére tutuaró me'ra weé'. Marî Jesu Cristore ẽho peórã niî yuukã, marîre katisé pe'titísere o'ôgɨsami.

¹⁵ Niî pe'tirã Jesu Cristore ãyuró ẽho peórã yɨ'ɨ̂ niî'karo nohota wãkuró ɨá'. Mɨsâ mehêkã wãkukã́, Õ'âkɨ̃hɨ mɨsâre diakɨ̃hɨ́ wãkukã́ weegɨ́sami.

¹⁶ Marî Jesu Cristore ẽho peó dɨ'pôkãti'karo nohota keoró wãkû, keoró tu'â eha nɨ'koro ɨá'.

¹⁷ Akawerérã, yɨ'ɨ̂ weesére ĩ'yâ kũu siru tuúya. Ãpêrãre ɨ̃sâ weeró noho weerã́re naâ weesé kẽ'rare ĩ'yâ kũuya.

¹⁸ Too dɨpóropɨ pehetíri mɨsâre werê tohawɨ. Utisé me'ra niî nemogɨti taha. A'tîro niî'. Pãharã́ naâ yã'âro weesétise me'ra Jesu Cristore ĩ'yâ tu'tirã weeró noho niîma. Naâ kɨ̃ɨ̂ kurúsapɨ wẽrî'kere yabîrã weeró noho weemá.

¹⁹ Be'ropɨ́re pekâ me'epɨ yapatírãsama. Õ'âkɨ̃hɨre ẽho peótima. Naâ ɨâri pehase di'akɨ̃re ẽho peóma. Bopôyaro noho o'ôrã, naâ weesé pe'ere “Ãyú yɨ'rɨa'”, niî yɨ'rɨ nɨ'kama. A'ti nukúkãkãhase di'akɨ̃re wãkûma.

²⁰ Marî pũrikã ɨ'mɨ̂sepɨ wa'arí masa niî'. Toopɨ́ mari yaá maka niî'. Marî wiôgɨ Jesu Cristo marîre yɨ'rɨógɨ ɨ'mɨ̂sepɨ niîmi. Kɨ̃ɨ̂ a'ti nukúkãpɨ opâturi a'tiátehere yuû kuerã weé'.

²¹ Kɨ̃ɨ̂ mari yaá ɨpɨ meha ɨpɨ́re dɨka yuúgɨsami. Kɨ̃ɨ yaá ɨpɨ weeró noho ãyú butia'ri ɨpɨ weegɨ́sami. Kɨ̃ɨ̂ niî pe'tisere kɨ̃ɨ̂ doka tohakã́ weegɨ́sami. Kɨ̃ɨ̂ tohô wee masíro nohota meharóta kɨ̃ɨ̂ tutuaró me'ra marí kẽ'rare dɨka yuúgɨsami.

4

¹ Jesu Cristo marîre kɨ̃ɨ yaá ɨpɨ ãyú butia'ri ɨpɨre weeró noho weegɨ́sami. Tohô weérã akawerérã yɨ'ɨ̂ ma'irã́, Jesu Cristore neê ẽho peó du'utikã'ya. Mɨsâre pũûro ma'í'. Pũûro ĩ'yâ sĩ'ri'. Mɨsâ yɨ'ɨ̂re e'katíkã weé'. Mɨsâ keoró weesé me'ra yɨ'ɨ̂ bu'ê'kere ĩ'yó'.

² Apêye maa, mɨsâ numia Evódia, Síntique, marî wiôgɨre ẽho peó yuurã, a'mêri mɨsâ basi pe'sûtitikã'ya. Ni'kâro noho wãkûya.

³ Sícigo, mɨ'ɨ̂ yɨ'ɨ̂ me'ra werê tamugɨ niî'. Naâ numiare ni'kâro noho wãkukã́ weeyá. Õ'âkɨ̃hɨ masaré yɨ'rɨómi niisé kitire werekã́, naâ numia yɨ'ɨ̂re werê tamuwã. Naâ me'ra Clemente kẽ'ra niîwĩ. Tohô niikã́ ãpêrã naâ me'ra yɨ'ɨ̂re werê tamuwã. Naâ Õ'âkɨ̃hɨ yaa pũri katî nu'kuse niirí pũripɨ ohâ õ'o no'o'kãrã niî tohasama.

⁴ Mɨsâ Jesu Cristo yarã niî tĩharã, kɨ̃ɨ̂ me'ra e'katí nu'kukã'ya. Opâturi niî nemogɨti. E'katí du'utikã'ya.

⁵ Mɨsâ ãpêrãre pahá yã'asere niî pe'tirã masiáto. Marî wiôgɨ a'tiátoho kã'roákã dɨ'sá'.

⁶ No'ó de'ró wa'asére wãkû ke'titikã'ya. A'tîro pe'e weeyá. Niî pe'tise mɨsâre no'ó wa'asére Õ'âkɨ̃hɨre sẽriyá. Kɨ̃ɨ̂re sẽrírã, “Ãyú'” niîya.

⁷ Mɨsâ tohô weekã́, Õ'âkɨ̃hɨ mɨsâre ãyuró ehêri põ'ratikã weegɨ́sami. Kɨ̃ɨ̂ tohô weesé ãyú butia'se niî'. Masá naâ tɨ'ó põo tẽótise niî'. Mɨsâ Jesu Cristo yarã niî yuukã, mɨsâre ãyuró ehêri põ'ratikã weegɨ́sami. Tohô niikã́ mɨsâ wãkusépɨre ãyuró tɨ'ó yã'a nu'kukã weegɨ́sami. Ãyusé di'akɨ̃re wãkû nɨrɨ dutise niî'

⁸ Akawerérã, yɨ'ɨ̂ a'tîro ohâ tɨogɨti. Niî pe'tise diakɨ̃hɨ́ niisére wãkûya. Niî pe'tise a'tetá wio pesá' niisére wãkûya. Keoróta niî tɨ'sa' niisére wãkûya. Ãyusé warore wãkûya. Ãyusé tɨ'sasére wãkûya. Masá ãyuró uúkũ no'osere wãkûya. Niî pe'tise ãyusére, e'katí peose nohore wãkûya.

⁹ Yɨ'ɨ̂ mɨsâre bu'êgɨ uúkũkã tɨ'ó'kere “A'tîro weeró ɨá'” niî'kere weeyá. Yɨ'ɨ̂ de'ró weekã́ ĩ'yâ'kere weeyá. Tohô weekã́, Õ'âkɨ̃hɨ ãyuró ehêri põ'ratikã weegɨ́ mɨsâ me'ra niîgɨsami. Filipokãharã Paulore niyéru wee tamú'ke niî'

¹⁰ Mɨsâ yɨ'ɨ̂re opâturi wee tamúsere ĩ'yâgɨ, yɨ'ɨ̂ marî wiôgɨ me'ra pũûro e'katí'. “Mɨsâ yɨ'ɨ̂re wãkûtiwɨ”, niîgɨ meheta weé'. Mɨsâre yɨ'ɨ̂re wee tamúta basiótiwɨ.

¹¹ “Apêye noho yɨ'ɨ̂re dɨ'sá'”, niîgɨ meheta weé'. No'ó yɨ'ɨ̂ kɨosé me'ra e'katí masi'.

¹² Yɨ'ɨ̂ pahasé kɨogɨ niîgɨ e'katíse me'ra niî masi'. Pehe kɨógɨ kẽ'ra e'katí masi'. Yɨ'ɨ̂re no'ó de'ró wa'akã́, e'katíse me'ra niî masi'. Yɨ'ɨ̂ yapîgɨ, yapîtigɨ kẽ'ra, e'katí masi'. Pehé kɨó yɨ'rɨ mahagɨ, e'katí masi'. Moógɨ kẽ'ra, e'katí masi'.

¹³ Jesu Cristo yɨ'ɨ̂re tutuasé o'ogɨ́ me'ra niî pe'tisere nɨ'ka masí'.

¹⁴ Tohô niîmikã, yɨ'ɨ̂ pi'etíri kura yɨ'ɨ̂re wee tamúrã, ãyuró weewɨ́.

¹⁵ Mɨsâ Filipokãharã a'tîro masî'. Yɨ'ɨ̂ Macedônia di'ta mɨsâ tiropɨ niîwɨ. Toopɨ́ niîgɨ, mɨsâre Jesu Cristo yeere werê nɨ'kawɨ. Be'ró apé sia'pɨ wihá wã'kawɨ. Filipopɨ niî'kɨ wiháakã, mɨsâ di'akɨ̃ yɨ'ɨ̂re wee tamúrã niyéru o'ôwɨ. Jesu Cristo yee kitire tɨ'ó'ke wapa e'katírã, tohô weewɨ́.

¹⁶ Yɨ'ɨ̂ Macedôniapɨ niî'kɨ wiháatoho dɨporo Tessalônicapɨ niikã́, mɨsâ pehetíri yɨ'ɨ̂re niyéru o'ôwɨ.

¹⁷ Yɨ'ɨ̂ mɨsâre apêye noho o'ôro di'akɨ̃ ɨágɨ meheta weé'. A'tîro ɨá'. Õ'âkɨ̃hɨ ĩ'yóropɨre ãpêrãre apêye noho o'ô'ke me'ra mɨsâ nemoró kɨokã́ ɨá'. Mɨsâ o'okã́, Õ'âkɨ̃hɨ mɨsâre ãyuró weegɨ́sami.

¹⁸ Niî pe'tise Epafrodito me'ra mɨsâ o'ô'kere yẽ'ê tohawɨ. Teeré yẽ'êgɨ, yɨ'ɨ̂ ɨasé nemoró kɨó'. Mɨsâ o'ô'ke Õ'âkɨ̃hɨre o'osé weeró noho niî'. Kɨ̃ɨ̂ tohô weesére tɨ'sâmi.

¹⁹ Õ'âkɨ̃hɨ yɨ'ɨ̂ wiôgɨ niî pe'tise mɨsâre dɨ'sasé nohore o'ôgɨsami. Kɨ̃ɨ̂ Jesu Cristo me'ra pehe waró ãyú butia'se kɨó yɨ'rɨ nɨ'kami. Kɨ̃ɨ̂ kɨosé nohore mɨsâre o'ôgɨsami.

²⁰ Marî pakɨ Õ'âkɨ̃hɨre e'katí peo nu'kurã. Tohôta weerã́. Paulo ãyu dutí tɨo'ke niî'

²¹ Niî pe'tirã Jesu Cristore ẽho peórã ãyuáto. Marî akawerérã yɨ'ɨ̂ me'ra niirã́ mɨsâre ãyu dutíma.

²² Niî pe'tirã a'tokãhárã Jesu Cristo yarã romano masa wiôgɨ yaá wi'ipɨ niirã́ kẽ'ra ãyu dutíma.

²³ Marî wiôgɨ Jesu Cristo mɨsâre ãyuró weeáto. Toô kã'rota ohâ'. Paulo.