1

¹ Yɨ'ɨ̂ Paulo Jesu Cristo bese kũú'kɨ niî'. Kɨ̃ɨ̂ yɨ'ɨ̂re Õ'âkɨ̃hɨ ɨá'karo nohota kɨ̃ɨ yeé kitire werê dutigɨ kũûwĩ. Mɨsâ Õ'âkɨ̃hɨ yarãre, Éfesopɨ niirã́re ãyu dutí'. Mɨsâ Jesu Cristore ẽho peó nu'ku'.

² Mɨsâre Õ'âkɨ̃hɨ marî pakɨ, Jesu Cristo marî wiôgɨ ãyuró weeáto. Mɨsâre ãyuró ehêri põ'ratikã weeáto. Cristo me'ra Õ'âkɨ̃hɨ marîre ãyuró weé'ke niî'

³ Õ'âkɨ̃hɨ, marî wiôgɨ Jesu Cristo pakɨre “Ãyú'” niîrã. Cristo yarã niî yuukã, Õ'âkɨ̃hɨ marîre ãyuró weékɨ niîwĩ. Marîre ma'ígɨ, niî pe'tise ɨ'mɨ̂sepɨ ehêri põ'rakãhase ãyusére o'ôkɨ niîwĩ.

⁴ A'ti nukúkã weeátoho dɨporo kɨ̃ɨ̂ marîre bese yuú tohakɨ niîwĩ. Cristore ẽho peórã kɨ̃ɨ yarã́ sãharã́sama niî wãkûgɨ, tohô besékɨ niîwĩ. Marîre kɨ̃ɨ̂ ĩ'yóropɨre ãyurã́, bu'îri moorã́ niiáto niîgɨ tohô weékɨ niîwĩ.

⁵ Dɨporópɨ kɨ̃ɨ̂ marîre ma'ígɨ, kɨ̃ɨ̂ põ'rá wa'ârãsama, niî tohakɨ niîwĩ. Jesu Cristore ẽho peoáto niîgɨ marîre tohô weékɨ niîwĩ. Teeré weégɨ, kɨ̃ɨ̂ weé sĩ'ri'karo nohota weékɨ niîwĩ.

⁶ Kɨ̃ɨ̂ makɨ́ kɨ̃ɨ̂ ɨpɨ́tɨ ma'igɨ́ me'ra marîre ãyuró weékɨ niîwĩ. Tohô weérã kɨ̃ɨ̂ marîre ãyuró weé'kere wãkûrã, kɨ̃ɨ̂re e'katí peo nu'ku'.

⁸

⁷ Õ'âkɨ̃hɨ marîre ɨpɨ́tɨ ma'ígɨ, kɨ̃ɨ̂ makɨré o'ôkɨ niîwĩ. Kɨ̃ɨ̂ kurúsapɨ wẽrisé me'ra, kɨ̃ɨ yeé diî a'mâ bɨrose me'ra marî yã'âro weé'ke wapare wapa yeékɨ niîwĩ. Teé me'ra Õ'âkɨ̃hɨ marî yã'âro weé'kere akobohókɨ niîwĩ. Marîre ãyuró weégɨ, tohô weékɨ niîwĩ. Kɨ̃ɨ̂ marîre ãyuró weesére masiáto niîgɨ masisére, tɨ'o masísere marîre o'ô yɨ'rɨ mahakɨ niîwĩ.

⁹ Marîre kɨ̃ɨ̂ weé sĩ'ri'ke, too dɨpóro masî no'oya marí'kere masikã́ weékɨ niîwĩ. Kɨ̃ɨ̂ Jesu Cristo wẽrisé me'ra kɨ̃ɨ yarã́re “Ãyuró weé tu'a eha nɨ'kogɨti” niî'kere masikã́ weékɨ niîwĩ.

¹⁰ A'ti ɨmɨ́koho pe'tikã́, niî pe'tise Õ'âkɨ̃hɨ “A'tîro wa'ârosa'” niî'karo nohota wa'ârosa'. Tohô wa'akã́, kɨ̃ɨ̂ ɨá'karo nohota weegɨ́sami. A'tîro weegɨ́sami. Kɨ̃ɨ̂ niî pe'tirã ɨ'mɨ̂sepɨ niirã́, a'ti nukúkãpɨ niirã́re Cristore naâ dɨpoá sõróogɨsami.

¹¹ Õ'âkɨ̃hɨ marîre Jesu Cristo me'ra ni'kâro me'ra niî dutigɨ dɨporópɨ bese yuúkɨ niîwĩ. Marîre kɨ̃ɨ̂ “O'ôgɨti” niî'kere yẽ'ê dutigɨ tohô weékɨ niîwĩ. A'té niî pe'tise kɨ̃ɨ̂ “Weegɨ́ti” niisé kɨ̃ɨ̂ wãkû yuu'kepɨ niî'. Kɨ̃ɨ̂ niî pe'tise ãyú tɨ'sa' niisére weesamí.

¹² Kɨ̃ɨ̂ a'tîro weégɨ, ɨ̃sâ Cristore ẽho peó mɨ'tarãre ãyuró weekã́ ɨágɨ besékɨ niîwĩ. Ɨ̃sâ ãyuró weesé me'ra masá kɨ̃ɨ̂ Õ'âkɨ̃hɨre “Ãyú butia'gɨ niîmi” niî wãkuáto niîgɨ tohô besékɨ niîwĩ.

¹³ Cristo kurúsapɨ wẽrî'ke me'ra mɨsá kẽ'ra Õ'âkɨ̃hɨ yarã wa'âwɨ. Mɨsâ diakɨ̃hɨ́kãhase Cristo yee kitire tɨ'órã, kɨ̃ɨ̂re ẽho peówɨ. Kɨ̃ɨ yeé kiti a'tîro niî'. Marî pekâ me'epɨ wa'â boo'kãrãre yɨ'rɨ wetíkã weékɨ niîwĩ. Kɨ̃ɨ̂re ẽho peókã, Õ'âkɨ̃hɨ mɨsâre kɨ̃ɨ yarã́ tohakã́ weékɨ niîwĩ. Yarã́ niîma niisére ĩ'yó sĩ'rigɨ, mɨsâre Espírito Santore o'ôo'kɨ niîwĩ. Espírito Santo Õ'âkɨ̃hɨ “Mɨsâre o'ôgɨti” niî'kɨta niîmi.

¹⁴ Õ'âkɨ̃hɨ Espírito Santore marîre o'ô tohakɨ niîwĩ. Tohô weérã marî masî'. Diakɨ̃hɨ́ta niî pe'tise kɨ̃ɨ̂ “O'ôgɨti” niî'kere o'ôgɨsami. Kɨ̃ɨ̂ o'oátehere yuû kuerã weé'. Kɨ̃ɨ yarã́ niî pe'tirã yã'âro weeséti niîmi'kãrãre yɨ'rɨ wetí pe'tikã weegɨ́sami. Tohô weéka be'ro kɨ̃ɨ̂ “O'ôgɨti” niî'kere o'ôgɨsami. Kɨ̃ɨ̂ tohô weekã́ ĩ'yârã, masá Õ'âkɨ̃hɨre “Ãyú butia'gɨ niîmi”, niîrãsama. Paulo Éfesokãharãre sẽri basáse niî'

¹⁶

¹⁵ Yɨ'ɨ̂ mɨsâ ãyuró weesére masî'. Mɨsâ marî wiôgɨ Jesuré ẽho peó'. Tohô niikã́ niî pe'tirã Õ'âkɨ̃hɨ yarãre ma'í'. Mɨsâ tohô weekã́ wãkûgɨ, yɨ'ɨ̂ Õ'âkɨ̃hɨre sẽri basásetiri nɨkɨ kɨ̃ɨ̂re “Ãyú'” niî nu'ku'.

¹⁷ Õ'âkɨ̃hɨ, marî wiôgɨ Jesu Cristo pakɨ ãyú butia'gɨ niîmi. Kɨ̃ɨ̂re mɨsa yeé niiátehere a'tîro sẽri basá': “Õ'âkɨ̃hɨ, Espírito Santo tɨ'o masíse o'oáto naâre. Mɨ'ɨ yeékãhasere ãyuró ĩ'yoáto. Nemoró mɨ'ɨ̂re masî dutigɨ tohô weeáto.

¹⁸ Õ'âkɨ̃hɨ, naâ tɨ'ó yã'asepɨ mɨ'ɨ yeékãhasere masikã́ weeyá. Mɨ'ɨ̂ naâre ãyuró weé sĩ'rigɨ besékɨ niîwɨ. Niî pe'tirã mɨ'ɨ yarã́re ãyú butia'sere o'ôgɨsa'. A'teré naâre ãyuró masikã́ weeyá.

²⁰

¹⁹ Mɨ'ɨ̂ tutuâ yɨ'rɨgɨ niî'. Mɨ'ɨ̂ tutuasé neê pe'tisomé. Teé me'ra ɨ̃sâ Jesu Cristore ẽho peórãre dɨka yuúgɨ weé'. Mɨ'ɨ̂ tohô weesére naâre masikã́ weeyá”, niî sẽri basá'. Õ'âkɨ̃hɨ tutuasé a'tîro niî'. Kɨ̃ɨ̂, kɨ̃ɨ̂ tutuasé me'ra Cristo wẽrî'kɨpɨre masakã́ weékɨ niîwĩ. Kɨ̃ɨ̂ masa mɨháaka be'ro kɨ̃ɨ̂re kɨ̃ɨ̂ tiro ɨ'mɨ̂sepɨ wiôgɨ duhirí kumuro diakɨ̃hɨ́ pe'e dɨpókɨ niîwĩ. Kɨ̃ɨ̂ tutuasé me'rata kɨ̃ɨ̂ ɨaró noho marîre dɨka yuúgɨ weemí.

²¹ Õ'âkɨ̃hɨ Cristore a'tîro weékɨ niîwĩ. Niî pe'tirã a'ti nukúkãpɨ niirã́, ɨ'mɨ̂sepɨ niirã́, naâ wiôrãre, no'ó ãpêrãre dutirã́ nohore naâ bu'ipɨ tohakã́ weékɨ niîwĩ. A'ti ɨmɨ́kohopɨ, ape ɨmɨ́kohopɨre tohôta weé nu'kukɨ̃'sami.

²² Õ'âkɨ̃hɨ niî pe'tisere, niî pe'tirãre Cristo doka tohakã́ weékɨ niîwĩ. Tohô niikã́ niî pe'tirã Cristore ẽho peóse kurarikãharã dɨpoá sõróokɨ niîwĩ.

²³ Niî pe'tirã kɨ̃ɨ̂re ẽho peóse kurarikãharã ni'kâ kura niîma. Tii kurákãharã kɨ̃ɨ̂ ɨpɨ́ weeró noho niîma. Tohô niikã́ Jesu Cristota niî pe'tiropɨ niî bi'akã'sami. Kɨ̃ɨ̂re ẽho peóse kurarikãharã kɨ̃ɨ̂ ɨaró wee masíma. Tohô weéro naâre ãyuró wee masíse dɨ'sá wee'.

2

¹ Too dɨpóropɨ Cristore ẽho peoátoho dɨporo mɨsâ yã'âro weékãrã niîwɨ. Mɨsâ yã'âro weé'ke bu'iri Õ'âkɨ̃hɨ ĩ'yóropɨre wẽrî'kãrã weeró noho niîkãrã niîwɨ.

² Ãpêrã a'ti nukúkãkãharã weeró noho yã'âro weé nu'kukãrã niîwɨ. Wãtiâ wiôgɨ ɨaró noho weékãrã niîwɨ. Kɨ̃ɨ̂ a'ti nukúkãkãharã Õ'âkɨ̃hɨre yɨ'rɨ́ nɨ'karãre dutigɨ́ niîmi.

³ Too dɨpóro marî niî pe'tirã tohôta yã'âro weé nu'kuwɨ. Yã'âro weé sĩ'risere ɨâri pehawɨ. Marî no'ó ɨaró weé sĩ'rise nohore, yã'âro wãkusé nohore weewɨ́. Tohô weérã marí kẽ'ra Õ'âkɨ̃hɨre bu'îri da'rê no'o boopã. Ãpêrãre pekâ me'epɨ kõ'â, bu'îri da'reró weeró noho da'rê no'o boopã.

⁴ Kɨ̃ɨ̂ pe'e marîre ɨpɨ́tɨ ma'ígɨ, pahá yã'ase kɨó yɨ'rɨawĩ.

⁵ Marî yã'âro weé'ke bu'iri Õ'âkɨ̃hɨ marîre “Wẽrî'kãrã weeró noho niîma”, niî ĩ'yâwĩ. Cristore ẽho peóka be'ro marîre “Cristo me'ra ni'kâro me'ra niîma”, niî ĩ'yâsami. Kɨ̃ɨ̂ Cristore masó'karo nohota marí kẽ'rare katisé pe'titísere o'ôkɨ niîwĩ. Tohô weégɨ Õ'âkɨ̃hɨ marîre pahá yã'agɨ, yã'arã́ niîmi'kãrãre yɨ'rɨókɨ niîwĩ.

⁶ Õ'âkɨ̃hɨ Jesu Cristore masókɨ niîwĩ. Kɨ̃ɨ̂re masó'karo nohota marî Jesu Cristo yarãre masa mɨháa'kãrã weeró noho weékɨ niîwĩ. Jesu Cristo ɨ'mɨ̂sepɨ wiôgɨ duhirí kumuro duhîro nohota marîre kɨ̃ɨ̂ me'rata taha ɨ'mɨ̂sepɨ duhî yuu toharã weeró noho niikã́ weékɨ niîwĩ. Yã'âro niisétise me'ra niîsome maha.

⁷ Jesu Cristo kɨ̃ɨ̂ wẽrî basa'ke me'ra marîre ma'isére, kɨ̃ɨ̂ ãyú butia'ro weesére ĩ'yókɨ niîwĩ. Be'ropɨ́ niî pe'tirãre teeré masikã́ ɨágɨ tohô weékɨ niîwĩ.

⁸ A'tîro niî'. Marî Jesu Cristore ẽho peórã Õ'âkɨ̃hɨ ãyuró weesé me'ra yɨ'rɨwɨ́. Teé marî basi weé'ke meheta niî'. Õ'âkɨ̃hɨ pe'e marîre yɨ'rɨówĩ.

⁹ Marî ãyuró weesére ĩ'yâgɨ meheta yɨ'rɨówĩ. Tohô weégɨ neê ni'kɨ́ “Yɨ'ɨ̂ ãyuró weé'ke wapa Õ'âkɨ̃hɨ yɨ'ɨ̂re yɨ'rɨówĩ”, niîta basió wee'.

¹⁰ A'tîro niî'. Marî kɨ̃ɨ̂ weé'kãrã niî'. Jesu Cristo yaa kurakãharã niî dutigɨ tohô weékɨ niîwĩ. Dɨporópɨ marî ãyuró weeátehere wãkû yuu tohakɨ niîwĩ. Teeré ãyuró wee dutígɨ marîre Jesu Cristo yarã wa'akã́ weékɨ niîwĩ. Marî Jesu Cristo me'ra ãyuró niîkã' niisé niî'

¹¹ Mɨsâ too dɨpóropɨ niiséti'kere wãkûya. Mɨsâ Judeu masa nií wee'. Tohô weérã Judeu masa õ'rekɨhɨ́ yapa kaserore yehê kõ'arã, a'tîro niîsama mɨsâre: “Naâ yehê kõ'a no'oya marirã́ niîma.” Naâ basi pe'e “Ɨ̃sâ yehê kõ'a no'o'kãrã Õ'âkɨ̃hɨ yarã niî'”, niîmisama. Mɨsâ pe'ere “Õ'âkɨ̃hɨ yarã niîtima”, niîsama. Tohô weesé ɨpɨpɨ́ weesé di'akɨ̃ niî'. Tohô weesé masaré Õ'âkɨ̃hɨ yarã wa'akã́ weé wee'.

¹² Tiîtapɨre mɨsâ ẽho peoátoho dɨporo Cristore moókãrã niîwɨ. Mɨsâ Õ'âkɨ̃hɨ yarã Israel kurakãharã me'ra niîtikãrã niîwɨ. Õ'âkɨ̃hɨ Israel kurakãharãre a'tîro niîkɨ niîwĩ: “Naâre ãyuró weegɨ́ti. Naâ wiôgɨ niîgɨti. Yarã́ niîrãsama”, niîkɨ niîwĩ. Mɨsâ pe'ere tohô niîtikɨ niîwĩ. Mɨsâ Õ'âkɨ̃hɨ ɨ̃sâre yɨ'rɨógɨsami niisére masîtikãrã niîwɨ. Õ'âkɨ̃hɨre moókãrã niîwɨ.

¹³ Ni'kâroakã pũrikãre mɨsâ Jesu Cristore ẽho peórã niî'. Tohô weérã too dɨpóropɨ kɨ̃ɨ̂re masîtimi'kãrã kɨ̃ɨ yarã́ wa'âkãrã niîwɨ. Cristo kɨ̃ɨ̂ wẽrisé, kɨ̃ɨ̂ diî a'mâ bɨrose me'ra mɨsâre kɨ̃ɨ yarã́ wa'akã́ weékɨ niîwĩ.

¹⁴ Cristo niîmi marîre ãpêrã me'ra ãyuró niikã́ weegɨ́. Kɨ̃ɨ́ta marîre Judeu masare, Judeu masa niîtirãre ni'kâ kurakãharã wa'akã́ weékɨ niîwĩ. Marî a'mêri ĩ'yâ sĩ'ritimi'kere du'ukã́ weékɨ niîwĩ.

¹⁵ Kɨ̃ɨ̂ wẽrisé me'ra Moisé dutî'kere weérã, neê ni'kɨ́ yɨ'rɨ wetí masitimi niisére masikã́ weékɨ niîwĩ. Tohô weégɨ Cristo pɨá kura niîmi'kãrãre kɨ̃ɨ̂re ẽho peókã ĩ'yâgɨ, ni'kâ kurata weékɨ niîwĩ. Tohô weesé me'ra marîre ãyuró ni'kâro me'ra niisétikã weékɨ niîwĩ.

¹⁶ Kɨ̃ɨ̂ kurúsapɨ wẽrisé me'ra marîre Judeu masare, Judeu masa niîtirã me'ra a'mêri marî pe'sûtisere du'ukã́ weékɨ niîwĩ. Kɨ̃ɨ̂ wẽrisé me'rata taha marî pɨá kura niîmi'kãrãre ni'kâ kura weékɨ niîwĩ. Tohô niikã́ teé me'rata marîre Õ'âkɨ̃hɨ me'ra ãyuró niikã́ weékɨ niîwĩ.

¹⁷ Cristo a'ti nukúkãpɨ a'tîgɨ, “Õ'âkɨ̃hɨ masá me'ra ãyuró niisétisere apógɨ a'tîwɨ”, niî werêkɨ niîwĩ. Ɨ̃sâ Judeu masa Õ'âkɨ̃hɨ yeere masî'kãrãre werêkɨ niîwĩ. Tohô niikã́ mɨsá kẽ'ra Judeu masa niîtirã, Õ'âkɨ̃hɨ yeere masîti'kãrãre tee kitíre werêkɨ niîwĩ.

¹⁸ A'tîro niî'. Jesu Cristo wẽrisé me'ra marî Judeu masa, Judeu masa niîtirã niî pe'tirã marî pakɨ Õ'âkɨ̃hɨre sẽri masí'. Kɨ̃ɨ̂re ẽho peó, masîta basió'. Kɨ̃ɨ̂ tiropɨ wa'â masi'. Espírito Santo ni'kɨ́ niigɨ́ kɨ̃ɨ̂ wee tamúse me'ra tohô weetá basió'.

¹⁹ Tohô weérã mɨsâ Judeu masa niîtirã Õ'âkɨ̃hɨ ĩ'yóropɨre apé sia'kãharã siharí masa weeró noho nií wee' maha. Õ'âkɨ̃hɨre masîtirã weeró noho nií wee' maha. A'tîro pe'e niî'. Judeu masa Cristore ẽho peórã weeró nohota Õ'âkɨ̃hɨ yaa kurakãharã niî'. Niî pe'tirã Cristore ẽho peórã me'ra ni'kɨ́ põ'ra, Õ'âkɨ̃hɨ põ'ra niî'.

²⁰ Marî niî pe'tirã Jesu Cristore ẽho peórã ni'kâ wi'i yeêka wi'iho weeró noho niî'. Tií wi'i yeê nɨ'ka'ke a'tîro niî'. Jesu Cristo bese kũú'kãrã, tohô niikã́ Õ'âkɨ̃hɨ werê duti'kere werê turiarã mɨsâre neê waro bu'ê dɨ'pôkãtikãrã niîwã. Teeré tɨ'órã, ẽho peókãrã niîwɨ. Naâ neê waro yeê nɨ'kakaga ɨ̃tâga weeró noho Jesu Cristo niîmi.

²¹ Yeê nɨ'kakaga ɨ̃tâga me'ra niî pe'tise tií wi'ikãhase keoró niî nu'kukã'. Niî pe'tise apêye ɨ̃tapagá tigá yeê nɨ'kakaga ɨ̃tâga me'ra yeê a'mé sɨ'o no'o'. Keoró tigá me'ra ãyuró yeê turia mɨha no'o'. Tohô weeró noho Cristo marî kɨ̃ɨ̂re ẽho peókã, ãpêrã too dɨpóro ẽho peórã me'ra ãyuró a'mé sɨ'akã weemí. Ãpêrã kɨ̃ɨ̂re ẽho peó wã'kakã, kɨ̃ɨ́ta taha marî niî pe'tirãre ni'kâ kura, pahirí kura wa'akã́ weemí. Ãpêrã marî niî pe'tirãre ĩ'yârã, wio pesáse me'ra “Õ'âkɨ̃hɨ yaa kura niî'”, niîrãsama.

²² Mɨsá kẽ'ra Judeu masa niîtirã ãpêrã Jesu Cristore ẽho peórã me'ra a'mé sɨ'a, Õ'âkɨ̃hɨ yaa kurakãharã tohá'. Õ'âkɨ̃hɨ Espírito Santo me'ra mɨsâpɨre niîmi.

3

¹ Õ'âkɨ̃hɨ mɨsâre ma'ígɨ, ãyuró weékɨ niîwĩ. Kɨ̃ɨ̂ tohô weesére wãkûgɨ, kɨ̃ɨ̂re e'katí peo'. Yɨ'ɨ̂ Paulo mɨsâ Judeu masa niîtirãre Jesu Cristo yee kitire weresé wapa, bu'îri da'rerí wi'ipɨ niî'.

² Mɨsâ masísa', Õ'âkɨ̃hɨ mɨsâre pahá yã'agɨ, ãyuró weé sĩ'rigɨ, yɨ'ɨ̂re a'tîro werê dutiwĩ. Judeu masa niîtirã kẽ'rare yɨ'rɨómi niisére werê dutiwĩ.

³ Õ'âkɨ̃hɨ too dɨpóropɨ masî no'oya marí'ke kitire yɨ'ɨ̂re bahû yoaropɨ ĩ'yowĩ́. Teeré “Judeu masa niîtirãre ãyuró weegɨ́ti” niî'kere yɨ'ɨ̂re masikã́ weewĩ́. Yɨ'ɨ̂ mɨsâre a'te dɨpóro pehêtepawa ohâ tohapɨ.

⁴ Mɨsâ teeré bu'êrã, yɨ'ɨ̂re “Cristo yee kiti, too dɨpóro masî no'oya marí'ke kitire kɨ̃ɨ̂ masîmi”, niîrãsa'.

⁵ Dɨporókãharã Õ'âkɨ̃hɨ Judeu masa niîtirãre yẽ'êgɨsami niisére masîtikãrã niîwã. Ni'kâroakã pũrikãre Espírito Santo me'ra kɨ̃ɨ yarã́, kɨ̃ɨ̂ bese kũú'kãrãre werêmi. Tohô niikã́ teeré kɨ̃ɨ̂ werê duti'kere werê turiarãre werêmi.

⁶ Teé too dɨpóro masî no'oya marí'ke kiti a'tîro niî'. Judeu masa niîtirã Jesu Cristore ẽho peórã, Judeu masa weeró noho Õ'âkɨ̃hɨ põ'ra sãharã́sama. Naá kẽ'ra kɨ̃ɨ̂ o'oátehere yẽ'êrãsama. Naâ pɨá kura niîmi'kãrã ni'kâ kura niîrãsama. Õ'âkɨ̃hɨ “Judeu masare Jesu Cristo me'ra ãyuró weegɨ́ti”, niîkɨ niîwĩ. Kɨ̃ɨ̂ tohô niî'kere Judeu masa niîtirã kẽ'rare weegɨ́sami.

⁷ A'te kitíre Õ'âkɨ̃hɨ yɨ'ɨ̂re werê dutigɨ kũûwĩ. Yɨ'ɨ̂ yã'agɨ́ niîmikã, yɨ'ɨ̂re ãyuró weégɨ, kɨ̃ɨ̂ tutuaró me'ra tohô kũûwĩ.

⁸ Yɨ'ɨ́ta mehô niigɨ́ waro niî pe'tirã Õ'âkɨ̃hɨre ẽho peórã dokapɨ tɨ'ó yã'a'. Tohô niîmikã, yɨ'ɨ̂re ãyuró weé sĩ'rigɨ, a'tîro weékɨ niîwĩ. Judeu masa niîtirãre kɨ̃ɨ̂ besé'kɨ Cristo yee ãyusé kitire werê dutiwĩ. Tee kití a'tîro niî'. Õ'âkɨ̃hɨ Jesu Cristo me'ra ãyú butia'sere marîre weemí. Teé ãyusére marî wãkû põo tẽó wee'.

⁹ Apêyere Õ'âkɨ̃hɨ niî pe'tirã tee kití too dɨpórokãharã masîti'kere masiáto niîgɨ yɨ'ɨ̂re o'ôo'wĩ. Kɨ̃ɨ̂ niî pe'tisere weé'kɨ tee kitíre maatá werêtikɨ niîwĩ. Tee kití kɨ̃ɨ̂ neê waro wãkû yuu'ke a'tîro niî'. “Judeu masa niîtirã Judeu masa weeró noho Õ'âkɨ̃hɨ põ'ra niîrãsama” niî'ke niî'.

¹⁰ Tohô weéro ni'kâroakãre Jesu Cristore ẽho peóri kurakãharã me'ra a'tîro wa'â'. Naâ pehe kurári niîmi'kãrã ni'kâ kura wa'akã́ ĩ'yârã, ɨ'mɨ̂sekãharã wiôrã, tohô niikã́ wãti yarã́ tutuarã́ a'tîro masîsama: “Õ'âkɨ̃hɨ masî yɨ'rɨami. Ãyú butia'ro wãkusé kɨomí” niî, masîsama.

¹¹ Neê waropɨ Õ'âkɨ̃hɨ “Tohôta pehe kurárikãharãre ni'kâ kura wa'akã́ weé yapatígɨti”, niîkɨ niîwĩ. Kɨ̃ɨ̂ niî'karo nohota Jesu Cristo marî wiôgɨ me'ra keoró wa'akã́ weékɨ niîwĩ.

¹² Cristo me'ra marî Õ'âkɨ̃hɨre masîta basió'. Jesu Cristore ẽho peó tĩharã, uiró mariró “Marîre yẽ'êgɨsami”, niî'. Kɨ̃ɨ̂re sẽri masí'.

¹³ Yɨ'ɨ̂ mɨsâre werê'ke bu'iri pi'etí'. Mɨsâre a'tîro weekã́ ɨá'. Yɨ'ɨ̂ pi'etísere wãkûrã, bɨhâ wetitikã'ya. Pi'etígɨ, Õ'âkɨ̃hɨ mɨsâre ãyuró weé'kere ãpêrãre wãkukã́ weé'. Cristo masaré ma'isére masiáto niîgɨ, Paulo sẽri basáse niî'

¹⁴ Õ'âkɨ̃hɨ, marî wiôgɨ Jesu Cristo pakɨre e'katí peogɨ ehâ ke'a'. Mɨsâ Judeu masa niîtirãre ãyuró weesére wãkûgɨ, tohô weé'.

¹⁵ Õ'âkɨ̃hɨta pakɨ́ niî mɨ'ta'kɨ niîmi. Kɨ̃ɨ̂ me'ra pakɨ́ niisé nɨ'ká'. Kɨ̃ɨ̂ niî pe'tise kurarikãharã ɨ'mɨ̂sepɨ niirã́, a'ti nukúkãpɨ niirã́ ni'kâro me'ra niisétikã weékɨ niîwĩ.

¹⁶ Marî pakɨre mɨsa yeé niiátehere sẽri basá'. Kɨ̃ɨ̂ ãyú butia'gɨ, tutuâ yɨ'rɨgɨ niîmi. Kɨ̃ɨ̂ Espírito Santo me'ra mɨsâre wãkû tutuakã weegɨ́sami.

¹⁷ Mɨsâ Cristore ẽho peó, nemoró kɨ̃ɨ̂ me'ra ãyuró niiáto niîgɨ sẽri basá'. Apêye maa, mɨsâ Cristore, tohô niikã́ ãpêrãre ãyuró ma'ikã́ ɨágɨ sẽri basá'.

¹⁸ Mɨsâ niî pe'tirã Õ'âkɨ̃hɨ yarã me'ra Jesu Cristo marîre ma'í yɨ'rɨ nɨ'kasere masî dutigɨ sẽri basá'. Kɨ̃ɨ̂ niî pe'tirã masaré ɨpɨ́tɨ waro ma'imí. Wiôrã, mehô niirã́, niî pe'tirãpɨreta ma'í nu'kukã'mi. Kɨ̃ɨ̂ ma'isé neê pe'tisomé.

¹⁹ Mɨsâre kɨ̃ɨ̂ ma'isére masî dutigɨ sẽri basá'. Kɨ̃ɨ̂ ma'isére wãkû põo tẽó masitisa'. Teé, kɨ̃ɨ̂ ma'isére masîrã, kɨ̃ɨ̂ weeró noho ãyurã́, yã'asé moorã́ niîrãsa'. Tohô weérã Õ'âkɨ̃hɨre kɨó yɨ'rɨarãsa'.

²⁰ Niî pe'tirã “Õ'âkɨ̃hɨre ãyú yɨ'rɨami”, niiáto. Kɨ̃ɨ̂ niî pe'tise marî sẽrisé yɨ'rɨóro o'ôsami. Marî wãkû'ke nemoró o'ô masisami. Kɨ̃ɨ̂ tutuaró me'ra marîre tohô wee masísami.

²¹ Tohô weérã Õ'âkɨ̃hɨ marî Jesu Cristore ẽho peóri kurakãharãre ãyuró weekã́ ĩ'yârã, niî pe'tirã Õ'âkɨ̃hɨre e'katí peo nu'kukã'ato. Tohô niikã́ Jesu Cristo masapɨ́re weesére ĩ'yârã, tohôta weeáto. A'tóka terokãharã, be'rokãhárã kẽ'ra tohôta Õ'âkɨ̃hɨre e'katí peo nu'kukã'ato. Tohôta wa'ârosa'.

4

¹ Yɨ'ɨ̂ marî wiôgɨ yee kitire weresé wapa, bu'îri da'rerí wi'ipɨ niî'. Õ'âkɨ̃hɨ kɨ̃ɨ̂ tutuaró me'ra marîre ãyuró weékɨ niîwĩ. Teeré wãkûgɨ, mɨsâre a'tîro weekã́ ɨá'. Mɨsâ Õ'âkɨ̃hɨ besé'kãrã weeró nohota ãyuró weesétiya.

² Neê ni'kɨ́ “Ãpêrã yɨ'rɨóro niî'”, niî wãkûtikã'ya. Tu'tiró mariró keoró weeyá. Mɨsâre yã'âro, mehêkã weekã́, wãkû tutuaya. Ãpêrãre ma'írã, keoró weetíkã ĩ'yârã, tohô tɨ'ó yã'akã'ya.

³ Espírito Santo mɨsâre ni'kâro me'ra niisétikã weemí. Mɨsâ ni'kâro me'ra ãyuró niisétirãti niîrã, a'mêri akobohóya. A'mêri ãyuró wehê peo, kumûkã mariró niîya.

⁴ Marî ni'kâ kurakãharã niî'. Espírito Santo ni'kɨ́ niigɨ́, marî niî pe'tirãpɨre niîmi. Õ'âkɨ̃hɨ ɨ'mɨ̂sepɨ wa'â dutigɨ marî niî pe'tirãre bese yuúkɨ niîwĩ.

⁵ Marî wiôgɨ Jesu Cristo ni'kɨtá niîmi. Marî niî pe'tirã kɨ̃ɨ̂re ni'kâro noho ẽho peó'. Jesu Cristore siru tuúsere ĩ'yórã, marî niî pe'tirã wamê yee no'o'.

⁶ Õ'âkɨ̃hɨ marî pakɨ ni'kɨtá niîmi. Kɨ̃ɨ̂ marî niî pe'tirã wiôgɨ niîmi. Kɨ̃ɨ̂, kɨ̃ɨ yarã́ me'ra kɨ̃ɨ yeékãhasere weemí. Kɨ̃ɨ yarã́ niî pe'tirãpɨre niîmi.

⁷ Tohô niîmikã, Cristo marîre, marî nɨkɨre Espírito Santo me'ra wee masísere o'ôkɨ niîwĩ.

⁸ Tohô weéro Õ'âkɨ̃hɨ yee kiti ohâka pũripɨ ohâ'karo nohota niî'. A'tîro ohâ no'okaro niîwɨ:

Kɨ̃ɨ̂ ɨ'mɨ̂sepɨ mɨhâatoho dɨporo kɨ̃ɨ̂re ĩ'yâ tu'tirãre dokâ ke'akã weékɨ niîwĩ. Kɨ̃ɨ̂ mɨhâaka be'ro masaré Espírito Santo me'ra wee masísere o'ôkɨ niîwĩ.

⁹ Kɨ̃ɨ̂ ɨ'mɨ̂sepɨ mɨhâasere uúkũrã, kɨ̃ɨ̂ toopɨ́ mɨhâatoho dɨporo a'tí di'tapɨ dihátikɨ niîwĩ yuhûpɨ, niîrã weé'. Diháti, a'topɨ́ niîkɨ niîwĩ.

¹⁰ Kɨ̃ɨ́ta taha a'tí di'tapɨ niî'kɨ ɨ'mɨ̂se ãyú butia'ropɨ Õ'âkɨ̃hɨ niirópɨ mɨhâakɨ niîwĩ. Tohô weégɨ niî pe'tiropɨ dutî masimi.

¹¹ Jesu Cristo kɨ̃ɨ yarã́re, naâ nɨkɨre Espírito Santo me'ra wee masísere o'ôkɨ niîwĩ. Ni'karérãre bese kũú, kɨ̃ɨ yeé kiti wererã́ sãhakã́ weékɨ niîwĩ. Ãpêrãre Õ'âkɨ̃hɨ kɨ̃ɨ̂ uúkũse tɨ'ó'kere werê turiarã sãhakã́ weékɨ niîwĩ. Ãpêrãre, masá pekâ me'epɨ wa'â boo'kãrãre yɨ'rɨ wetíse kitire werê kusiarã sõróokɨ niîwĩ. Ãpêrãre, Jesu Cristore ẽho peórãre sɨ'orí niirã́, tohô niikã́ kɨ̃ɨ yeére bu'ê turiarãre kũûkɨ niîwĩ.

¹² Tohô weé kɨ̃ɨ yarã́re kɨ̃ɨ yeékãhasere da'raáto niîgɨ tohô weékɨ niîwĩ. Kɨ̃ɨ yaá kurakãharãre kɨ̃ɨ̂ ɨaró wee nemoáto niîgɨ tohô wee masísere o'ôkɨ niîwĩ.

¹³ Teeré weé, marî a'mêri wee tamúrã, Õ'âkɨ̃hɨ makɨre nemoró ẽho peó nemorãsa'. Kɨ̃ɨ̂re ãyuró masîrãsa'. Tohô niikã́ Õ'âkɨ̃hɨ ɨaró nohota keoró wee masí nemorãsa'. Õ'âkɨ̃hɨ besé'kɨ Cristo ãyuró niisétigɨ niîkɨ niîwĩ. Marî kɨ̃ɨ̂re ẽho peóri kurakãharã kẽ'ra kɨ̃ɨ̂ weeró nohota niisétirãsa'.

¹⁴ Tohô weérã wi'marã́ weeró noho wee sirú tuu mɨharã niîsome. Niî pe'tisetiri ma'má bu'esére tɨ'órã, na'îro dɨka yuú mɨhasome. Niî soo me'rirã marîre mehêkã ẽho peókã weesomé.

¹⁵ A'tîro pe'e bɨkɨrã́ weeró noho weerã́sa'. Diakɨ̃hɨ́ a'mêri ma'í, uúkũrãsa'. Siâpe me'ra diakɨ̃hɨ́kãhasere ẽho peó tu'a eha nɨ'korãsa'. Tohô niikã́, ãpêrãre werê yapá da'reorãsa'. Niî pe'tise no'ó marî weesére Cristo me'ra niîrã, kɨ̃ɨ̂ ɨaró wee nemórãsa'. Kɨ̃ɨ́ta niîmi kɨ̃ɨ̂re ẽho peóri kurakãharã dɨpoá.

¹⁶ Tohô dɨpoá niîgɨ, marîre keoró a'mé sɨ'akã weemí. Marî ɨpɨ́ pehé dɨka watímiro, ni'kâ ɨpɨta niî'. A'té weeró noho marî kɨ̃ɨ̂re ẽho peórãre ni'kâ kurata kɨ̃ɨ̂ me'ra ni'kâro me'ra niikã́ weemí. Marî ẽho peórã nɨkɨ a'mêri wee tamúrã, siâpe me'ra wee tamú wã'ka, a'mêri ma'í tu'a eha nɨ'korãsa'. Jesu Cristo me'ra ma'má weesétisere boká'ke niî'

¹⁷ Marî wiôgɨ dutiró me'ra mɨsâre a'tîro wee dutí'. Mɨsâ Õ'âkɨ̃hɨre masîtirã weeró noho weetíkã'ya. Too dɨporópɨ weeséti'ke nohore weetíkã'ya. Õ'âkɨ̃hɨre masîtirã no'ó ɨaró wãkû, weé ma'akã'sama.

¹⁸ Naâ tɨ'o masítima. Na'î tĩ'aropɨ niirã́ weeró noho niîma. Õ'âkɨ̃hɨ masaré ãyuró weesére masîtima. Õ'âkɨ̃hɨ yeere wãkû sĩ'ritirã, tɨ'o masítirã weeró noho niîma. Tohô weérã Õ'âkɨ̃hɨ tiropɨ katî nu'kusome.

¹⁹ Naâ yã'âro weesétisere neê bopôyatima. Naâ no'ó ɨaró yã'âro wee bahá ke'atima. Naâ weé tɨ'sase, niî pe'tise yã'asére weemá. Naâ weesére “Ãyumítito?” niî wãkûtima.

²⁰ Mɨsâ pũrikãre Cristo Õ'âkɨ̃hɨ besé'kɨ tohô weesére wee dutítikɨ niîwĩ.

²¹ Mɨsâ keoróta kɨ̃ɨ yeé kitire tɨ'órã, masísa'. Kɨ̃ɨ̂re ẽho peórã weesétisere Jesu bu'ê'kere masísa'.

²² Mɨsâ too dɨpóropɨ weeséti'ke maa du'úkã'ya maha. Mɨsâ “Yã'âro ɨâri pehasere weérã, e'katírãsa'”, niî wãkûmipã. Nií wee'. Tohô weesé mɨsâre dohórẽ'pã.

²³ Mɨsâ mehêkã wãkusére du'úkã'ya. Õ'âkɨ̃hɨ dɨka yuú'karo nohota ma'má wãkusére kɨoyá.

²⁴ Õ'âkɨ̃hɨ kɨ̃ɨ̂ weeró noho niisétiato niîgɨ, mɨsâre ma'má weesétisere o'ôkɨ niîwĩ. Tohô weérã kɨ̃ɨ̂ ɨaró nohota teé ma'maré weeyá.

²⁵ Tohô weérã a'mêri niî soosere du'úkã'ya. Marî niî pe'tirã Jesu Cristore ẽho peóri kurakãharã niî'. Tohô weérã a'mêri diakɨ̃hɨ́ uúkũro ɨá'.

²⁶ Mɨsâ uârã, yã'âro weetíkã'ya. Uâ na'iatikã'ya.

²⁷ Wãtî mɨsâre uâ dohakã weé sĩ'risere ka'mú ta'aya.

²⁸ Too dɨpóropɨ yaha poó'kɨ yaha nemótikã'ato maha. Yaharó noho o'ôgɨ, da'raáto. Tohô weégɨ kɨ̃ɨ̂ basi kɨogɨ́sami. Kɨ̃ɨ̂ da'rá'ke wapa me'ra pahasé kɨorã kẽ'rare wee tamú masigɨsami.

²⁹ Yã'asére uúkũtikã'ya. A'tîro pe'e weeyá. Ãyusé, no'ó masaré wee tamúse noho pe'ere uúkũya. Tohô weérã, mɨsâ uúkũse tɨ'orã́re ãyuró weerã́sa'.

³⁰ Niî pe'tise yã'âro weesére weetíkã'ya. Espírito Santore bɨhâ wetikã weetíkã'ya. Õ'âkɨ̃hɨ Espírito Santore o'osé me'ra mɨsâ “Õ'âkɨ̃hɨ yarã niîma”, niî no'o'. Tohô weérã mɨsâ masî', Jesu Cristo a'tikã́pɨ Õ'âkɨ̃hɨ mɨsâre ãyuró yɨ'rɨó butia'gɨsami.

³¹ Niî pe'tise a'mêri yã'âro tɨ'ó yã'asere, pũrîro uúkũsere, uâ yɨ'rɨ mahasere, a'mé tu'tise, uârã karíkũsere, tohô niikã́ ãpêrãre yã'âro uúkũse kẽ'rare du'úkã'ya. Neê ni'kɨré ĩ'yâ tu'titikã'ya.

³² A'tîro pe'e weeyá. A'mêri ãyuró wee tamú, pahá yã'aya. Õ'âkɨ̃hɨ Cristo me'ra mɨsâre akobohó'karo nohota mɨsá kẽ'ra a'mêri akobohóya.

5

¹ Mɨsâ Õ'âkɨ̃hɨ põ'ra kɨ̃ɨ̂ ma'irã́ niî'. Tohô weérã kɨ̃ɨ̂ weeró noho weeyá.

² Jesu Cristo marîre ma'í'karo nohota a'mêri ma'í nu'kukã'ya. Kɨ̃ɨ̂ marîre ma'ígɨ, wẽrî basakɨ niîwĩ. Kɨ̃ɨ̂ wẽrî basa'ke Judeu masa ovelha wi'magɨ́re wẽhé, Õ'âkɨ̃hɨre ɨ̃hâ moro peo'karo weeró noho niî'. Õ'âkɨ̃hɨ naâ ɨ̃hâ morokã, tɨ'sâkɨ niîwĩ. Teé weeró noho Jesu Cristo marîre wẽrî basa'kere tɨ'sâkɨ niîwĩ.

³ Mɨsâ Õ'âkɨ̃hɨ yarã niî toha'. Tohô weérã mɨsâ nɨmosã́ numia niîtirãre, marapɨ́ sɨmɨa niîtirãre neê a'me tãrá baha ke'atitikã'ya. Niî pe'tise no'ó yã'âro weesére, yã'âro wãkusére weetíkã'ya. Tohô niikã́ ãpêrã yeere ɨâri pehatikã'ya. Neê kã'ró yã'âro weesére wãkûtikã'ya.

⁴ Yã'asére uúkũ buhíkã'tikã'ya. No'ó ɨaró uúkũ ma'atikã'ya. Tohô weesé keoró nií wee'. Tohô weeró noho o'ôrã, a'tîro pe'e weeyá. Õ'âkɨ̃hɨ ãyuró weesére a'mêri uúkũ, kɨ̃ɨ̂re “Ãyú'” niîya.

⁵ Mɨsâ masî tohasa'. No'ó ɨaró a'me tãrá baha ke'atirã noho Jesu Cristo yarã niîtima. Õ'âkɨ̃hɨ niirópɨ wa'âsome. Meharóta taha yã'asére weegɨ́, tohô niikã́ a'ti ɨmɨ́kohokãhase ɨâri peha yɨ'rɨ nɨ'kagɨ kẽ'ra kɨ̃ɨ̂ tiropɨ wa'âsome. A'ti ɨmɨ́kohokãhase ɨâri peha yɨ'rɨ nɨ'kase Õ'âkɨ̃hɨ mehereta ẽho peóse niî'.

⁶ Tɨ'o masíya. Õ'âkɨ̃hɨ teé yã'asé weerã́re kɨ̃ɨ̂re yɨ'rɨ́ nɨ'karãre pekâ me'epɨ bu'îri da'rêgɨsami. Naâ yã'âro weesére “Ãyusé niî'”, niî boosama. Naâ tohô uúkũ maa soósere neê ẽho peótikã'ya.

⁷ Õ'âkɨ̃hɨre yɨ'rɨ́ nɨ'karãre naâ yã'âro weesére neê kã'ró bu'î peha tamutikã'ya.

⁸ Mɨsâ too dɨpóropɨre yã'âro weesétirã, na'î tĩ'aropɨ weeró noho niîkãrã niîwɨ. Õ'âkɨ̃hɨre masîtikãrã niîwɨ. Ni'kâroakã pũrikãre marî wiôgɨ yarã niîrã, bo'rê yuuropɨ niîrã weeró noho niî'. Õ'âkɨ̃hɨ yeekãhasere masî'. Kɨ̃ɨ yarã́ weeró noho weesétiya.

⁹ Marî bo'rê yuuropɨ niîrã, ãpêrãre ãyuró weé'. Tohô niikã́ wee soóse mariró Õ'âkɨ̃hɨ ɨaró noho keoró weé'.

¹⁰ Niî pe'tise mɨsâ weesé nohore “Marî wiôgɨ e'katígɨsari?” niî wãkûya.

¹¹ Jesu Cristore ẽho peótirã na'î tĩ'aropɨ niîrã weeró noho niîsama. Naâ no'ó ɨaró weé ma'asama. Mɨsâ naâ weeró noho weetíkã'ya. A'tîro pe'e weeyá. Naâ weesére “Yã'asé Õ'âkɨ̃hɨ wee dutítise niî'” niî, bahû yoaropɨ ĩ'yoyá.

¹² Naâ ya'yióropɨ yã'âro weesére marî uúkũkã, bopôya niî'.

¹³ Bo'rê yuuropɨre niî pe'tise bahú'. Marî naâ yã'âro weé'kere yã'â niî' niîrã, bahû yoaropɨ ĩ'yó'. Tohô weekã́, naâ yã'âro weesére masîsama. Masîrã, naá kẽ'ra dɨka yuú boosama.

¹⁴ Tohô weéro Jesu Cristore ẽho peótirãre a'tîro uúkũ no'o':

Mɨ'ɨ̂ kãrigɨ́, tɨ'o masítigɨ weeró noho niî'. Wã'kayá. Õ'âkɨ̃hɨ ĩ'yóropɨre wẽrî'kɨ weeró noho niî'. Tohô niîmigɨ, masayá. Tɨ'o masíya. Cristo Õ'âkɨ̃hɨ besé'kɨ mɨsâre bo'rê yuuropɨ niirã́re weeró noho weegɨ́sami, niî no'o'.

¹⁵ Tohô weérã mɨsâ weesére ãyuró wãkû kasa nɨ'koya. Õ'âkɨ̃hɨ yeere masîtirã weeró noho niîtikã'ya. Kɨ̃ɨ yeére masirã́ weeró noho pe'e ãyuró niîya.

¹⁶ A'tóka tero pehé yã'asé niî'. Tohô niîmikã, a'tîro weeyá. Niî pe'tise mɨsâ weesétisetiri nɨkɨ Õ'âkɨ̃hɨ ɨaró weeyá.

¹⁷ No'ó ɨaró weé ma'atikã'ya. “Yẽ'e nohó pe'e Õ'âkɨ̃hɨ ɨasé niîti?” niî wãkûya.

¹⁸ Ke'atíkã'ya. Tohô weesé pe'ti diháse niî'. E'katí sĩ'rirã, Espírito Santore kɨó yɨ'rɨ mahaya.

¹⁹ Õ'âkɨ̃hɨ yee basasére, Salmo wamêtiri pũripɨ ohâ'ke nohore a'mêri werêya. Marî wiôgɨre ɨpɨ́tɨ e'katí peose me'ra basâ peoya.

²⁰ Marî wiôgɨ Jesu Cristore ẽho peórã, niî pe'tisere Õ'âkɨ̃hɨ marî pakɨre “Ãyú'” niî nu'kukã'ya. Ni'kâ wi'ikãharã Jesu Cristore ẽho peórãre dutisé niî'

²¹ Cristore mɨsâ ẽho peóse bu'iri wio pesáse me'ra a'mêri ĩ'yâya.

²² Marâpɨtirã numia, marî wiôgɨre yɨ'tí ẽho peóro nohota mɨsâ marapɨ́ sɨmɨare yɨ'tí ẽho peóya.

²³ A'tîro niî'. Cristo kɨ̃ɨ̂re ẽho peóri kurakãharã dɨpoá niîmi. Tohô weeró noho marâpɨtigore koô marapɨ́ koô wiôgɨ weeró noho niîmi. Apêye kẽ'rare Cristota kɨ̃ɨ yaá kurakãharãre yɨ'rɨógɨ niîmi. Marî kɨ̃ɨ yaá ɨpɨkãharã niî'.

²⁴ Marî kɨ̃ɨ yaá kurakãharã kɨ̃ɨ̂ dutisé doka niî'. A'té weeró noho marâpɨtirã numia kẽ'ra niî pe'tise naâ marapɨ́ sɨmɨa dutisé doka niiró ɨá'.

²⁵ Cristo kɨ̃ɨ yaá kurakãharãre ma'ígɨ, mari yeé niiátehere wẽrî basakɨ niîwĩ. Kɨ̃ɨ̂ ma'í'karo nohota, nɨmôtirã, mɨsâ nɨmosã́ numiare ma'iyá.

²⁶ Jesu Cristo kɨ̃ɨ yaá kurakãharãre kɨ̃ɨ yarã́ niî dutigɨ tohô wẽrî basakɨ niîwĩ. Kɨ̃ɨ yeé kitire ẽho peókã, marî yã'âro weé'kere kõ'â dɨka yuúkã weemí. Akó me'ra ũ'îritisere koeró weeró noho weemí.

²⁷ Kɨ̃ɨ̂, kɨ̃ɨ yaá kurakãharãre ãyú butia'rã kɨogɨ́ti niîgɨ, tohô weemí. De'ró niisé yã'asé moorã́, bu'îri marirã́ wa'akã́ weemí.

²⁸ Jesu Cristo kɨ̃ɨ yaá kurakãharãre ma'í'karo nohota, mɨsâ nɨmôtirã, mɨsâ nɨmosã́ numiare ma'iró ɨá'. Mɨsâ basi ma'iró nohota ma'iyá. No'ó kɨ̃ɨ̂ nɨmoré ma'igɨ́ noho kɨ̃ɨ̂ basi ma'ígɨ weemí.

²⁹ A'tîro niî'. Neê ni'kɨ́ kɨ̃ɨ̂ ɨpɨré ma'itíkã weetími. A'tîro pe'e weemí. Ãyuró ba'â, kɨ̃ɨ̂ ɨpɨré ko'têmi. Cristo kɨ̃ɨ yaá kurakãharãre tohôta weemí. Marîre ma'ígɨ, ãyuró ko'têmi.

³⁰ Marî kɨ̃ɨ̂re ẽho peóri kurakãharã kɨ̃ɨ yaá ɨpɨ niî'.

³¹ Õ'âkɨ̃hɨ yee kiti ohâka pũripɨ a'tîro ohâ no'okaro niîwɨ:

Tohô weégɨ nɨmôtigɨ kɨ̃ɨ̂ pakɨ sɨmɨá me'ra niî'kɨ naâre wiháagɨsami. Wiháa, kɨ̃ɨ̂ nɨmó me'ra niîgɨsami. Õ'âkɨ̃hɨ ĩ'yóropɨre naâ pɨárã ni'kâ ɨpɨ niîrãsama, niî ohâ no'okaro niîwɨ.

³² Teé tɨ'otá basiótise paka niî'. Tohô niîmikã, yɨ'ɨ̂ pe'e Cristo, tohô niikã́ kɨ̃ɨ̂re ẽho peóri kurakãharãre naâ ni'kâ ɨpɨ niîma niisére uúkũ'.

³³ Tohô niîmigɨ, a'té kẽ'rare niîgɨti. Nɨmôtirã nɨkɨ mɨsâ basi ma'iró nohota mɨsâ nɨmosã́ numiare ma'iyá. Numiâ kẽ'ra, mɨsâ marapɨ́ sɨmɨare ãyuró yɨ'tí ẽho peóya.

6

¹ Wi'marã́, ma'mâ piha, Jesu Cristore ẽho peórã mɨsâ pakɨ sɨmɨá dutisére ãyuró yɨ'tiyá. Tohô weesé ãyú niî'.

³

² Dɨporópɨ Õ'âkɨ̃hɨ Moisére kɨ̃ɨ̂ dutisére kũûkɨ niîwĩ. Ni'kâro dutisére a'tîro niîkɨ niîwĩ: “Mɨsâ a'teré yɨ'tikã́, ãyuró weegɨ́ti”, niîkɨ niîwĩ. A'tîro niîkaro niîwɨ: “Mɨsâ pakɨ, mɨsâ pakore ẽho peóya. Mɨsâ tohô weérã, e'katírãsa'. A'ti nukúkãpɨre yoakã́ katîrãsa'”, niîkɨ niîwĩ.

⁴ Pakɨ sɨmɨá, mɨsâ põ'rare na'îro tu'tîtikã'ya. Naâ uakã́ weetíkã'ya. A'tîro pe'e weeyá. Keoró weesére bu'ê masoya. Naâ yã'âro weekã́, “Tohô weetíkã'ya”, niîya. Naâre marî wiôgɨre ẽho peókã, kɨ̃ɨ̂ ɨaró nohota weekã́ weeyá.

⁵ Da'rá ko'terã, mɨsâ wiôrã naâ dutisére yɨ'tiyá. Jesu Cristore da'rá ko'terã weeró noho ãyuró wee soóro mariró wio pesáse me'ra naâre ẽho peóya.

⁶ Naâ ĩ'yóropɨre ãyuró da'rayá. Naâ ĩ'yâtiropɨ kẽ'rare meharóta weeyá. Mɨsâ wiôrã ĩ'yóropɨ di'akɨ̃ ãyuró da'rárã, niî soorã wee boósa'. Mɨsâ wiôrã “Ãyuró da'ramí”, niî wãkû dutirã wee boósa'. Tohô weetíkã'ya. Jesu Cristore da'rá ko'terã weeró noho Õ'âkɨ̃hɨ ɨaró noho ãyuró tɨ'sasé me'ra da'rayá.

⁷ E'katíse me'ra Jesu Cristore da'ra basárã weeró noho tɨ'ó yã'aya. Masá di'akɨ̃re da'ra basárã weeró noho tɨ'ó yã'atikã'ya.

⁸ Mɨsâ masî toha', marî wiôgɨ marî nɨkɨre wapa yeégɨsami. Da'rá ko'terã, da'rá ko'tetirãre meharóta marî ãyusé weé'karo ehâ tu'aro wapa yeégɨsami. Tohô weérã ãyuró da'rayá.

⁹ Dutirã́, mɨsá kẽ'ra meharóta mɨsâre da'rá ko'terãre ãyuró weeyá. Naâre yã'âro tuu nɨrɨ́tikã'ya. Wãkûya, mɨsá kẽ'ra naâ weeró noho ɨ'mɨ̂sepɨre ni'kɨ́ wiôgɨ kɨó'. Kɨ̃ɨ̂ pũrikã niî pe'tirã masaré neê dɨka waáro mariró ni'kâro noho ĩ'yâsami. Õ'âkɨ̃hɨre ẽho peórã a'tîro weeró ɨá' niisé niî'

¹⁰ Ni'kâroakã maa a'tîro ohâgɨti. Akawerérã, mɨsâ marî wiôgɨ me'ra niî'. Tohô weérã kɨ̃ɨ̂ tutuâ yɨ'rɨse me'ra wãkû tutuaya.

¹¹ Wãtî mɨsâre niî soo me'rikã, Õ'âkɨ̃hɨ wee tamúse me'ra ka'mú ta'aya. A'tîro weeró noho niî'. Ni'kɨ́ surára a'mê wẽheropɨ wa'âgɨ, kɨ̃ɨ̂ ɨpɨré ka'mú ta'agɨ kome sapéare, komé su'tirore sãyâsami. Tohô weeró noho Õ'âkɨ̃hɨ marîre tutuarã́ niî dutigɨ o'osére kɨoyá. Teeré kɨórã, wãtî yã'âro weesére ka'mú ta'a masirãsa'.

¹² Marî Õ'âkɨ̃hɨ ɨaró weé sĩ'rirã, a'mê wẽherã weeró noho niî'. Masá me'ra a'mê wẽhero weeró noho nií wee'. Wãtiâ wiôrã tutuarã́ me'ra a'mê wẽhe'. Wãtiâ a'ti ɨmɨ́kohokãhase yã'âro weesére dutirã́ niîma. Naâ pãharã́ bahutírã masaré wãkusépɨ yã'âro wee dutírã niî kehe sãasama.

¹³ Tohô weérã niî pe'tise Õ'âkɨ̃hɨ mɨsâre tutuarã́ niî dutigɨ o'osére kɨoyá. Teeré kɨórã, niî pe'tisetiri nɨkɨ wãtî mɨsâre yã'âro wee dutíkã, tutuârãsa'. Mɨsâ a'tîro weéka be'ro wãkû tutuarã niîrãsa'. Tohô weérã surára a'mê wẽheropɨ wa'âgɨ, niî pe'tise komé su'tire wehê sãya'karo weeró noho weerã́sa'.

¹⁴ Surára kɨ̃ɨ yaró su'tîro bu'i ehêri tuusami. Be'ró kɨ̃ɨ̂ kutîrore ka'mú ta'agɨ komé su'tirore sãyâsami. A'té weeró noho mɨsâ Õ'âkɨ̃hɨ o'osé me'ra tutuarã́ niîya. Surára ãyuró ehêri tuu'karo weeró noho diakɨ̃hɨ́kãhase Õ'âkɨ̃hɨ yeere ãyuró uúkũ, wãkû nɨrɨ, niisétiya. Surára kɨ̃ɨ̂ kutîrore ka'mú ta'asami. Kɨ̃ɨ̂ ka'mú ta'aro weeró noho mɨsá kẽ'ra a'tîro weeyá. Wãtî yã'âro weesére ka'mú ta'ahã, Õ'âkɨ̃hɨ wee tamúse me'ra ãyuró weeyá.

¹⁵ Surára a'mê wẽhegɨ wa'aátoho dɨporo kɨ̃ɨ̂ dɨ'pôkãrire ka'mú ta'aato niîgɨ sapáture sãyâsami. Kɨ̃ɨ̂ weeró noho mɨsá kẽ'ra Jesu Cristo yee kitire werêrãti niîrã, wãkû yuuya. A'te kití a'tîro niî'. Jesu Cristo wẽrisé me'ra Õ'âkɨ̃hɨ masaré yɨ'rɨókɨ niîwĩ.

¹⁶ Apêye kẽ'rare ɨpɨré ka'mú ta'arore kɨosamí. Kɨ̃ɨ̂ me'ra a'mê wẽherã, naâ bɨesépagɨ pekâ me'e me'ra kɨosére toó me'ra ka'mú ta'akɨhɨ tohô weesamí. A'té weeró noho wãtî mɨsâre yã'âro weé sĩ'risere ka'mú ta'arã Õ'âkɨ̃hɨre ẽho peóya. A'tîro niîya: “Yɨ'ɨ̂re ãyuró yɨ'rɨ wetíkã weegɨ́sami”, niî ẽho peóya.

¹⁷ Surára kɨ̃ɨ̂ dɨpôare ka'mú ta'a sĩ'rigɨ kome sapéare pesâsami. Kɨ̃ɨ̂ weeró noho wãtî mɨsâ wãkusére dohórẽ' sĩ'rikã, “Õ'âkɨ̃hɨ yɨ'rɨó no'o'kãrã niî'”, niîya. Apêye kẽ'rare surára a'mê wẽhegɨ pahirí pĩhi di'pĩhihóre miáasami. Kɨ̃ɨ̂ weeró noho mɨsá kẽ'ra Espírito Santo o'ôka pĩhire kɨoyá. Tii pĩhí Õ'âkɨ̃hɨ uúkũse niî sĩ'riro weé'. Kɨ̃ɨ̂ uúkũse me'ra wãtîre ka'mú ta'a masi'. Tohô niikã́ niî pe'tise yã'asére kõ'â masi'.

¹⁸ Niî pe'tise yã'asére, wãtiâre ka'mú ta'arã Õ'âkɨ̃hɨre sẽrí nu'kukã'ya. Espírito Santo wee tamúse me'ra sẽriyá. Tɨ'o masíse me'ra sẽrí du'utirãta, niî pe'tirã kɨ̃ɨ yarã́re sẽri basá nu'kukã'ya.

¹⁹ Yɨ'ɨ́ kẽ'rare sẽri basáya. Yɨ'ɨ̂ Õ'âkɨ̃hɨ yeere weresétiri nɨkɨ kɨ̃ɨ̂ uúkũsere yɨ'ɨ̂re o'oáto. “Uiró mariró Jesu Cristo yee kitire masá masî no'oya marí'kere werêta basiókã weeáto”, niî sẽri basáya.

²⁰ Õ'âkɨ̃hɨ yɨ'ɨ̂re a'te kitíre werê dutigɨ o'ôo'wĩ. Yɨ'ɨ̂ kɨ̃ɨ̂re dɨka yuúgɨ weeró noho niî'. A'te kitíre weresé bu'iri ni'kâroakãre yɨ'ɨ̂ bu'îri da'rerí wi'ipɨ niî'. Toopɨ́ niîmigɨ, yɨ'ɨ̂re a'te kitíre uiró mariró wereáto niîrã, sẽri basáya. Paulo ãyu dutí tɨo'ke niî'

²¹ Tíquico marî akawerégɨ weeró noho niîmi. Kɨ̃ɨ̂ yɨ'ɨ̂ ma'igɨ́ niî pe'tise yee kitíre mɨsâre werêgɨ wa'âgɨsami. Kɨ̃ɨ̂ marî wiôgɨ yeekãhasere wee tamúgɨ niîmi.

²² Tohô weégɨ ɨ̃sa yeé kitire werê dutigɨ kɨ̃ɨ̂re mɨsâ tiropɨ o'ôo'. Tohô o'ôo'kã, wãkû tutuarãsama niîgɨ, tohô weé'.

²³ Õ'âkɨ̃hɨ marî pakɨ, tohô niikã́ marî wiôgɨ Jesu Cristo a'tîro weeáto. Niî pe'tirã mɨsâ Jesu Cristore ẽho peórãre ãyuró ehêri põ'ratikã weeáto. Ẽho peó, a'mêri ma'i nemókã weeáto.

²⁴ Õ'âkɨ̃hɨ niî pe'tirã Jesu Cristore ma'í nu'kurãre ãyuró weeáto. Toô kã'rota ohâ'. Paulo