²

1

¹ Yɨ'ɨ̂ Paulo, yɨ'ɨ̂ me'rakãharã me'ra mɨsâ Jesu Cristore ẽho peórãre Galácia di'tapɨ niirã́re ohâ'. Mɨsâre ãyu dutíse o'ô'. Yɨ'ɨ̂ Jesu Cristo bese kũú'kɨ niî'. Yɨ'ɨ̂re masa mehéta Õ'âkɨ̃hɨ yee kitire werê dutirã besewã́. Naâ o'ôo'kã meheta teeré werê'. Jesu Cristo, kɨ̃ɨ̂ pakɨ́ Õ'âkɨ̃hɨ naâ basi yɨ'ɨ̂re besewã́. Õ'âkɨ̃hɨta Jesu Cristo wẽrî'kɨpɨre masókɨ niîwĩ.

³ Marî wiôgɨ Jesu Cristo, marî pakɨ Õ'âkɨ̃hɨ ãyuró weeáto mɨsâre. E'katíse, mɨsâre ãyuró ehêri põ'ratikã weeáto.

⁴ Jesu Cristo kɨ̃ɨ̂ basi kɨ̃ɨ̂ ɨaró me'ra marî yã'âro weé'kere wẽrî basakɨ niîwĩ. A'ti ɨmɨ́kohokãhase yã'asé doka niî nemotikã'ato niîgɨ tohô weékɨ niîwĩ. A'teré weégɨ, marî pakɨ Õ'âkɨ̃hɨ dutî'karo nohota weékɨ niîwĩ.

⁵ Tohô weérã marî Õ'âkɨ̃hɨre “Mɨ'ɨ̂ ãyú butia'gɨ, tutuâ yɨ'rɨagɨ niî'” niî nu'kukã'rã. Tohôta weerã́. Jesu Cristore ẽho peóse me'ra di'akɨ̃ yɨ'rɨrã́sa' niisé niî'

⁶ Õ'âkɨ̃hɨ mɨsâre ma'ígɨ, besékɨ niîwĩ. Jesu Cristo kɨ̃ɨ̂ wẽrisé me'ra mɨsâre yɨ'rɨókɨ niîwĩ. Kɨ̃ɨ̂ tohô weemíkã, mɨsâ pe'e maatá waro kɨ̃ɨ̂re ẽho peó du'urã weé'. Apêye bu'esé pe'ere siru tuúrã weé'. Mɨsâ tohô weekã́ tɨ'ógɨ, ɨpɨ́tɨ ɨkɨása'.

⁷ Ãpêrã mɨsâ neê waro ẽho peó'kere dohórẽ'sama. Mɨsâre Jesu Cristo yee kitire werê su'riasama. Teeré dɨka yuú sĩ'risama. Jesu Cristore ẽho peóse me'ra di'akɨ̃ marîre yɨ'rɨtá basió'. Apêye bu'esépɨa basiótisa'.

⁸ Ɨ̃sâ mɨsâre Õ'âkɨ̃hɨ masaré yɨ'rɨóse kitire keoró werêwɨ. Mɨsâre Jesu Cristo yee kitire mehêkã weregɨ́re Õ'âkɨ̃hɨ ɨpɨ́tɨ bu'îri da'reáto. No'ó yɨ'ɨ̂ nohore, ou ãpí ɨ'mɨ̂sekɨ̃hɨ Õ'âkɨ̃hɨre werê ko'tegɨre ɨ̃sâ mehêkã werekã́, bu'îri da'reáto.

⁹ Yɨ'ɨ̂ too dɨpóropɨ mɨsâ tiropɨ niîgɨ, a'teré werê tohawɨ. Ni'kâroakãre opâturi niî nemo' taha. No'ó ɨ̃sâ bu'ê'ke Jesu Cristo yee kitire mɨsâre mehêkã weregɨ́ nohore Õ'âkɨ̃hɨ bu'îri da'reáto.

¹⁰ Yɨ'ɨ̂ a'teré werêgɨ, masá yɨ'ɨ̂re “Ãyú butia'ro werê me'rimi” niiáto niîgɨ meheta werê'. Õ'âkɨ̃hɨ pe'ere “Keoró bu'êmi” niî dutigɨ werê'. Yɨ'ɨ̂ too dɨpóropɨre “Masá yɨ'ɨ̂ me'ra e'katiáto”, niî nu'kuwɨ. Tohô niî nu'kugɨ pũrikã, Jesu Cristo ɨaró weetí boosa'. Kɨ̃ɨ̂re da'rá ko'tegɨ meheta niî boosa'. Õ'âkɨ̃hɨ Paulore Jesu Cristo yee kitire werê dutigɨ kũû'ke niî'

¹¹ Yɨ'ɨ̂ keoró mɨsâre masikã́ ɨása'. Yɨ'ɨ̂ bu'esé masá naâ wãkusé meheta niî'.

¹² Yɨ'ɨ̂re teeré neê ni'kɨ́ masɨ́ bu'êtiwĩ. Jesu Cristo kɨ̃ɨ̂ basi teé bu'esére masikã́ weewĩ́.

¹³ Too dɨpóropɨ Judeu masa naâ ẽho peósetisere yɨ'ɨ̂ weékũ'kere mɨsâ tɨ'opã́. Jesu Cristore ẽho peórãre yã'â butia'ro weékũwɨ. Neê ni'kɨ́ Jesu Cristore ẽho peógɨ mariáto niîgɨ naâ ẽho peósere pe'ó sĩ'rimiwɨ.

¹⁴ Yɨ'ɨ̂ ma'mɨ̂ niîgɨ, Judeu masa naâ ẽho peósetisere ãyuró weewɨ́. Ãpêrã yɨ'ɨ̂ me'rakãharã yɨ'rɨóro ɨ̃sâ yẽkɨ sɨmɨá weeséti mɨhati'kere weé yɨ'rɨ nɨ'kawɨ.

¹⁵ Yɨ'ɨ̂ Jesu Cristore ẽho peórãre yã'âro weewɨ́. Tohô weemíkã, yɨ'ɨ̂ bahuaátoho dɨporopɨ Õ'âkɨ̃hɨ bese yuú tohakɨ niîwĩ. Ɨpɨ́tɨ ma'ígɨ, kɨ̃ɨ̂ makɨ́ niî dutigɨ besékɨ niîwĩ.

¹⁶ Kɨ̃ɨ̂ “Besegɨ́ti” niî'karo nohota keoró ni'kâ nɨmɨ kɨ̃ɨ̂ makɨré yɨ'ɨ̂re ĩ'yowĩ́. Ĩ'yó, yɨ'ɨ̂re Judeu masa niîtirãre Jesu Cristo yee kitire werê dutiwĩ. Kɨ̃ɨ̂ tohô ĩ'yokã́, ãpêrãre “Yɨ'ɨ̂ de'ró weegɨ́sari?” niî sẽrí yã'a nemotiwɨ.

¹⁷ Apêye kẽ'rare “Jesu Cristo yɨ'ɨ̂ dɨporo bese kũú mɨ'ta'kãrã tiro Jerusalẽ́pɨ maatá sẽrí yã'a bakeo'gɨ wa'âgɨti”, niîtiwɨ. Tohô weeró noho o'ôgɨ, diakɨ̃hɨ́ wa'â wa'âwɨ Arábia di'tapɨ. Be'ró toopɨ́ niî'kɨ Damascopɨ mahâmi tohatiwɨ taha.

¹⁸ Yɨ'ɨ̂ Jesu Cristore ẽho peóka be'ro i'tiá kɨ'ma yɨ'rɨwɨ́. Tiikése kɨ'mari yɨ'rɨ́ka be'ro Jerusalẽ́pɨ Pedrore ĩ'yâgɨ wa'âwɨ. Toopɨ́re kɨ̃ɨ̂ me'ra pɨá semana tohâ ke'a ni'iwɨ.

¹⁹ Jesu Cristo kɨ̃ɨ̂ bese kũú'kãrã niî pe'tirãre ĩ'yâtiwɨ. Pedro, ãpí Tiago marî wiôgɨ Jesu Cristo akabihí di'akɨ̃re ĩ'yâwɨ.

²⁰ Õ'âkɨ̃hɨ tɨ'óropɨ mɨsâre werêgɨti. A'té yɨ'ɨ̂ weresére niî soogɨ meheta weé'.

²¹ Yɨ'ɨ̂ Jerusalẽ́pɨre niîka be'ro Síria di'tapɨ, tohô niikã́ Cilícia di'tapɨ wa'âwɨ.

²² Yɨ'ɨ̂ Judéia di'tapɨre yoakã́ niîtiwɨ. Tohô weérã ãpêrã Jesu Cristore ẽho peórã yɨ'ɨ̂re ĩ'yâ masitiwã.

²³ Yee kití di'akɨ̃re tɨ'ókãrã niîwã. “Sõ'ó niîka tero marîre yã'âro weé sĩ'rigɨ siru tuú'kɨ ni'kâroakãre ‘Jesu Cristore ẽho peóya’, niî kusiagɨta weeápɨ'. Too dɨpóropɨre Jesu Cristore ẽho peósere pe'ókã' sĩ'rimi'kɨta niiápɨ'”, niî uukahákãrã niîwã.

²⁴ Yɨ'ɨ̂ Jesu Cristore ẽho peósere tɨ'órã, Õ'âkɨ̃hɨre “Mɨ'ɨ̂ ãyú butia'gɨ, tutuâ yɨrɨagɨ niî'” niîkãrã niîwã.

2

¹ Catorze kɨ'mari Jerusalẽ́pɨ yɨ'ɨ̂ ehâka be'ro Barnabé me'ra opâturi tii makápɨ wa'âwɨ taha. Ɨ̃sâ me'rakɨ̃hɨ Tito wamêtigɨ kẽ'rare miáawɨ.

² Õ'âkɨ̃hɨ yɨ'ɨ̂re toopɨ́ wa'â dutiwĩ. Tohô weégɨ wa'âwɨ. Jerusalẽ́pɨre ehâ, Jesu Cristore ẽho peórã wiôrã me'ra di'akɨ̃ nerê, uúkũwɨ. Judeu masa niîtirãre Jesu Cristo masaré yɨ'rɨómi niisé kiti, yɨ'ɨ̂ bu'ê'kere naâre werêwɨ. Yɨ'ɨ̂ neê waropɨ bu'ê nɨ'ka'kere, yɨ'ɨ̂ ni'kâroakã bu'esére de'ró niîrãsari? niîgɨ, werêwɨ. Mɨ'ɨ̂ bu'esé wapa marí' niîri niîgɨ, werê yã'amiwɨ.

³ Naâ neê mehêkã niîtiwã. Yɨ'ɨ̂ me'rakɨ̃hɨ Tito Judeu masɨ meheta niîwĩ. Kɨ̃ɨ̂ tohô niîmikã, ɨ̃sâ Judeu masa wee wɨáse nohore wee dutítiwã. “Kɨ̃ɨ̂re õ'rekɨhɨ́ yapa kaserore yehê kõ'aro ɨá'”, niîtiwã.

⁴ Wiôrã pe'e “Titore õ'rekɨhɨ́ yapa kaserore yehê kõ'aro ɨá'” niîtimikã, ãpêrã tohô niî ko'terã pe'e “Kɨ̃ɨ̂re yehê kõ'aro ɨá'”, niîwã. Naâ Jesu Cristore ẽho peó ta'sarã, Jesu Cristore ẽho peórã me'ra a'mé sɨ'awã. Tohô niî ta'sa, ĩ'yâ du'tirã niîwã. Naâ ɨ̃sâ Jesu Cristore ẽho peórã weesétisere ĩ'yâwã. Ɨ̃sâ kɨ̃ɨ̂re ẽho peórã Moisé dutisé doka niîtikã ĩ'yâwã. Teeré ĩ'yârã, ɨ̃sâre ɨ̃sâ yẽkɨ sɨmɨáre dutî mɨhati'kere wee dutí sĩ'rimiwã taha. Moisé kɨ̃ɨ̂ dutî'ke doka kũû sĩ'rimiwã taha.

⁵ Naâ tohô dutîmikã, ɨ̃sâ neê kã'roákã naâ dutisére “Weeró ɨása'”, niîtiwɨ. Mɨsâre Jesu Cristore ẽho peóse me'ra di'akɨ̃ yɨ'rɨrã́sa' niisé kitire masikã́ ɨá'. Tohô weérã diakɨ̃hɨ́kãhase, Jesu Cristo yeere werêrãti niîrã, naâ wee dutí'kere weetíwɨ.

⁶ Wiôrã yɨ'ɨ̂re mehêkã werê dutitiwã. “Marî yẽkɨ sɨmɨáre wee dutí'kere wee dutíya Judeu masa niîtirãre”, niîtiwã. Õ'âkɨ̃hɨ marî niî pe'tirãre ni'kâro noho ĩ'yâsami. Teeré masîgɨ, “Naâ wiôrã niîma” niî, ɨpɨ́tɨ waro wãkûtiwɨ. Õ'âkɨ̃hɨ naâre besé'karo nohota yɨ'ɨ́ kẽ'rare besewĩ́.

⁷ Wiôrã yɨ'ɨ̂re a'tîro niîwã: “Mɨ'ɨ́ kẽ'ra Õ'âkɨ̃hɨ besé'kɨ niî'. Kɨ̃ɨ̂ mɨ'ɨ̂re Judeu masa niîtirãre Jesu Cristo yee kitire werê dutiapĩ. Pedrore Judeu masare werê duti'karo nohota mɨ'ɨ̂re naâ pe'ere werê dutiapĩ”, niîwã wiôrã.

⁸ Õ'âkɨ̃hɨ Pedrore Judeu masare Jesu Cristo yee kitire werê dutikɨ niîwĩ. Kɨ̃ɨ̂ Õ'âkɨ̃hɨta taha yɨ'ɨ́ kẽ'rare Jesu Cristo yee kitire Judeu masa niîtirã tiro pe'ere werê dutiwĩ.

⁹ Jerusalẽ́pɨre Tiago, Pedro, tohô niikã́ João naâ i'tiárã Jesu Cristore ẽho peórã wiôrã niîwã. Naâ yɨ'ɨ̂re “Judeu masa niîtirãre Õ'âkɨ̃hɨ mɨ'ɨ̂re ma'ígɨ werê dutiapĩ”, niîwã. Tohô weérã ɨ̃sâ pɨárãre, yɨ'ɨ̂, tohô niikã́ Barnabére “Marî ni'kâro noho da'rarã́sa'”, niîwã. Naâ ɨ̃sâre “Jesu Cristo yee kitire Judeu masa niîtirãre werêrã wa'âya”, niîwã. “Ɨ̃sâ pe'e Judeu masare werêrãti”, niîwã.

¹⁰ Ɨ̃sâre a'té di'akɨ̃re wee dutíwã: “Pahasé kɨorãre wee tamúya”, niîwã. A'tetá niîwɨ yɨ'ɨ̂ ãyuró weegɨ́ti niî wãkû yɨ'rɨ nɨ'ka'ke. Paulo Antioquiapɨ Pedrore tu'tî'ke niî'

¹²

¹¹ Be'ró Pedro Antioquiapɨre etâwĩ. Kɨ̃ɨ̂ neê waro tii makápɨre etâka be'roakã ãyuró weemíwĩ. Kɨ̃ɨ̂ toopɨ́re niîgɨ kɨ̃ɨ̂ keoró weetí'ke wapa kɨ̃ɨ̂pɨreta tu'tîwɨ. Neê waro Judeu masa niîtirã Jesu Cristore ẽho peórã me'ra ba'â, naâ me'ra ba'pâti niîkã'miwĩ. Kɨ̃ɨ̂ tohô weé niisétiri kura Judeu masa Jerusalẽ́kãharã Tiago kɨ̃ɨ̂ o'ôo'kãrã etâwã. Pedro naâ etakã́ ĩ'yâgɨ, Judeu masa niîtirã me'ra weeséti'kere weé du'ukã'wĩ. Naâ yɨ'ɨ̂re tu'tî boosama niîgɨ, tohô weewĩ́. Toopɨ́ etarã́ Judeu masa wee dutísere keoró weerã́ niîwã. Tohô weérã Judeu masa niîtirãre “Judeu masare dutisére weeró ɨá'”, niî kusiawã. Tohô weégɨ naâre uîgɨ, Pedro Judeu masa niîtirã me'ra ba'pâti du'ukã'wĩ. Naâ me'ra ba'â nemotiwĩ maha.

¹³ Ãpêrã Judeu masa kɨ̃ɨ̂ weesére ĩ'yârã, kɨ̃ɨ̂ weeró noho weé ta'sawã. Judeu masa niîtirã me'ra ba'âmi'kãrã ba'âtiwã. Naâ me'ra niisétitiwã. Barnabépɨta tohô wee nemó peokã'wĩ.

¹⁴ Naâ Jesu Cristore ẽho peóse me'ra di'akɨ̃ yɨ'rɨrã́sa' niisére masîmirã, keoró weetíwã. Tohô weégɨ naâ weesé keoró niîtikã ĩ'yâgɨ, Pedrore niî pe'tirã Jesu Cristore ẽho peórã ĩ'yóropɨ tu'tîwɨ. Kɨ̃ɨ̂re a'tîro niîwɨ: “Mɨ'ɨ̂ Judeu masɨ niîmigɨ, Judeu masa niîtirã me'ra ba'âgɨ, naâ weeró noho weesétigɨ weé'. Mɨ'ɨ̂ tohô weesé ãyú niî', ãyuró pe'ea'. Mehô ni'kâroakãre naâ me'ra ba'âti, naâ me'ra niisétitigɨ, ‘Judeu masa weeró noho weeyá’, niîgɨ weé' taha naâre. Mɨ'ɨ̂ tohô weekã́, ‘Ɨ̃sâre Moisé dutî'kere weeró ɨása'’, niî wãkûsama. Mɨ'ɨ̂ basi weetíse Judeu masa niîtirãre ‘Weeyá’ niîro noho wa'â'. Mɨ'ɨ̂ tohô weesé yã'â niî'”, niîwɨ. Judeu masa, Judeu masa niîtirã ẽho peóse me'ra di'akɨ̃ yɨ'rɨrã́sama niisé niî'

¹⁵ Marî neê bahuárãpɨta Judeu masa niî tohakãrã niîwɨ. Ãpêrã weeró noho Moisé kɨ̃ɨ̂ dutî'kere weetíkã weé wee'.

¹⁶ Tohô niîmirã, marî Moisé dutî'kere weérã, yɨ'rɨ masítisa'. Jesu Cristore ẽho peóse me'ra di'akɨ̃ yɨ'rɨ wetí masi'. Marî Õ'âkɨ̃hɨ me'ra ãyuró niî sĩ'rirã, Jesu Cristore ẽho peó'. Moisé kɨ̃ɨ̂ dutî'kere weérã pũrikã, neê ni'kɨ́ Õ'âkɨ̃hɨ me'ra ãyuró niî masitisami.

¹⁷ Marî “Jesu Cristo me'ra di'akɨ̃ yɨ'rɨrã́sa'” niikã́, marî akawerérã Judeu masa a'tîro niîma marîre: “Mɨsâ yã'â niî'”, niîma. “Marî yẽkɨ sɨmɨáre dutî'kere weetírã, Judeu masa niîtirã weeró noho mɨsâ yã'â niî'”, niîma marîre. Too pũríkãre tohô niîrã, Jesu Cristo marîre “Sɨ'orí yã'âro weégɨ weemí naâre”, niîsama. Naâ tohô niisé diakɨ̃hɨ́ nií wee'. Jesu Cristore tohô weesé marí'.

¹⁸ Mɨsâre “Marî yẽkɨ sɨmɨá dutî'ke me'ra yɨ'rɨsomé”, niî werê tohawɨ. Ni'kâroakãre teé me'ra yɨ'rɨrã́sa', teeré weeyá niîgɨ, yɨ'ɨ́ta bu'îriti boosa'.

¹⁹ Yɨ'ɨ̂ too dɨpóropɨre a'tîro wãkûmiwɨ. “Moisé kɨ̃ɨ̂ dutî'ke me'ra di'akɨ̃ Õ'âkɨ̃hɨ me'ra ãyuró niîta basiósa'”, niîmiwɨ. Tohô niîmigɨ, neê weé põo tẽótikãti. Be'ró yɨ'ɨ̂re Õ'âkɨ̃hɨ kɨ̃ɨ̂ makɨ́ Jesu Cristore ĩ'yowĩ́. Tohô weégɨ ni'kâroakãre Jesu Cristore ẽho peógɨ, Õ'âkɨ̃hɨ me'ra wãkû pi'etíro mariró niîkã'. Marî yẽkɨ sɨmɨáre wee dutí'kere wãkû nɨrɨ wee' maha.

²⁰ Jesu Cristo kurúsapɨ wẽrîkɨ niîwĩ. Yɨ'ɨ̂ kɨ̃ɨ̂re ẽho peógɨ, kɨ̃ɨ̂ me'ra wẽrîgɨ weeró noho wa'âkɨ niîwɨ. Tohô weégɨ yɨ'ɨ̂ se'saro nií wee'. Ni'kâroakãre Jesu Cristo yɨ'ɨ̂re sɨ'orí niîmi. Yɨ'ɨ̂ kɨ̃ɨ̂ ɨaró, kɨ̃ɨ̂ dutiró weé'. Õ'âkɨ̃hɨ makɨre ẽho peógɨ, wãkû tutua'. Kɨ̃ɨ̂ yɨ'ɨ̂re ma'ígɨ, yã'âro weé'kere wẽrî wapa yeé basakɨ niîwĩ.

²¹ Yɨ'ɨ̂ Jesu Cristo wẽrî'kere “Tohô niî ma'akã'ro weé'”, nií wee'. Kɨ̃ɨ̂ yɨ'ɨ̂re ma'isére neê du'ú sĩ'ritisa'. Moisé dutî'ke me'ra marî yɨ'rɨtá basiókã maa, Jesu Cristo mehô waro wẽrî boopĩ.

3

¹ Mɨsâ Galáciakãharã Jesu Cristore ẽho peó du'urã, tɨ'o masíti butia'rã weeró noho weérã weé'. Noá mɨsâre niî soo sihamirito mehêkã ẽho peó dutirã? Ɨ̃sâ toopɨ́re niîrã, mɨsâre Jesu Cristo kɨ̃ɨ̂ kurúsapɨ wẽrisére keoró werêwɨ. Mɨsâ ãyuró ɨ̃sâ weresére tɨ'owɨ́.

² A'té di'akɨ̃re mɨsâre sẽrí yã'agɨti. Mɨsâ Moisé dutî'kere weérã, Espírito Santore yẽ'êri? Yẽ'êtipã. Jesu Cristo yee kitire tɨ'órã kɨ̃ɨ̂re ẽho peórã pe'e, yẽ'êpã.

³ Espírito Santo tutuaró me'ra mɨsâ Õ'âkɨ̃hɨ põ'ra sãhá nɨ'kawɨ. Ni'kâroakãre mɨsâ tutuaró me'ra ẽho peó yapatírãti, niîmiti? Põo tẽótisa'. Mɨsâre tɨ'o masíse pe'tiá wa'aáti?

⁴ Jesu Cristore neê waro ẽho peókã, ãpêrã mɨsâre yã'âro weékãrã niîwã. Ni'kâroakãre kɨ̃ɨ̂re ẽho peó du'urã, “Mehô waro pi'etípã”, niîrã weetí? Yɨ'ɨ̂ tɨ'ó yã'akã, mehô waro pi'etítipã.

⁵ Õ'âkɨ̃hɨ mɨsâre Espírito Santore o'ôo'kɨ niîwĩ. Kɨ̃ɨ̂ tutuasé me'ra mɨsâ wa'teropɨre pehé weé ĩ'yomi. De'ró weégɨ tohô weesarí, mɨsâ tɨ'ó yã'akã? Jesu Cristo yee kitire mɨsâ tɨ'ó ẽho peókã, tohô weesamí. Moisé kɨ̃ɨ̂ dutî'kere weekã́ maa, neê tohô weetí boosami.

⁶ Marî yẽkɨ Abraão yeekãhasere wãkûrã. Kɨ̃ɨ̂ pũrikã Õ'âkɨ̃hɨre ẽho peókɨ niîwĩ. Tohô weégɨ Õ'âkɨ̃hɨ kɨ̃ɨ̂re “Ãyugɨ́ niîmi”, niî ĩ'yâkɨ niîwĩ.

⁷ Mɨsâ a'teré masîya. Abraão weeró noho Õ'âkɨ̃hɨre ẽho peórã naáta niîma Abraão paramérã waro.

⁸ Õ'âkɨ̃hɨ yee kiti ohâka pũripɨ Judeu masa niîtirã naâ Õ'âkɨ̃hɨre ẽho peoátehere ohâ yuu no'okaro niîwɨ. Naâre yɨ'rɨoátehere werê yuugɨ, Õ'âkɨ̃hɨ Abraãore a'tîro niîkɨ niîwĩ: “Niî pe'tirã a'tí di'takãharã mɨ'ɨ̂ weeró noho ẽho peó siru tuurãre ‘Ãyurã́ niîma, bu'îri moomá’, niî ĩ'yâgɨti. Naâre ãyuró weegɨ́ti”, niîkɨ niîwĩ.

⁹ Abraão Õ'âkɨ̃hɨre ẽho peókɨ niîwĩ. Tohô weégɨ Õ'âkɨ̃hɨ kɨ̃ɨ̂re ãyuró weékɨ niîwĩ. A'tóka tero kẽ'rare niî pe'tirã Jesu Cristore ẽho peórãre Õ'âkɨ̃hɨ ãyuró weemí.

¹⁰ Ãpêrã pũrikãre Õ'âkɨ̃hɨ bu'îri da'rêsami. Naâ a'tîro wãkûsama. “Moisé dutî'kere weérã, yɨ'rɨrã́sa'”, niîsama. Tohô wãkûmirã, niî pe'tise teeré weé pe'otisama. Õ'âkɨ̃hɨ yee kiti ohâka pũripɨre a'tîro niîwɨ: “Niî pe'tise Moisé dutî'kere weé pe'otigɨ noho bu'îri da'rê no'ogɨsami”, niîwɨ. Tohô weérã “Moisé dutî'ke me'ra yɨ'rɨrã́sa'”, niîmisama. Nií wee'. Õ'âkɨ̃hɨ naâre bu'îri da'rêgɨsami.

¹¹ Õ'âkɨ̃hɨ yee kiti ohâka pũripɨre a'tîro ohâ no'okaro niîwɨ: “Õ'âkɨ̃hɨ kɨ̃ɨ̂re ẽho peórãre ‘Ãyurã́ niîma’, niî ĩ'yâsami. Kɨ̃ɨ̂ me'ra niî nu'kurãsama”, niîwɨ. Tohô weérã marî masî'. Moisé dutisé me'ra neê ni'kɨ́ Õ'âkɨ̃hɨ me'ra ãyuró niîta basió wee'.

¹² Moisé kɨ̃ɨ̂ dutisé pe'e tohô meheta niî'. A'tîro pe'e niîwɨ. “Niî pe'tise Moisé dutî'kere weé pe'ogɨ, Õ'âkɨ̃hɨ me'ra katî nu'kukɨ̃'sami. Teeré weé pe'otigɨre Õ'âkɨ̃hɨ ‘Bu'îri kɨomí’, niî ĩ'yâgɨsami”, niîwɨ.

¹³ Marî niî pe'tise Moisé dutî'kere weé põo tẽó wee'. Tohô weégɨ Õ'âkɨ̃hɨ naâ weé pe'otima niîgɨ, “Bu'îri kɨomá”, niîkɨ niîwĩ. Apêro, Õ'âkɨ̃hɨ yee kiti ohâka pũripɨre a'tîro ohâ no'okaro niîwɨ: “No'ó naâ wẽrîka be'ro yukɨ̂gɨpɨ dɨ'te yoó no'o'kãrã Õ'âkɨ̃hɨ bu'îri da'rê duti'kãrã niîma”, niî ohâ no'okaro niîwɨ. Dɨporópɨre masá yã'arã́re tohô weékũkãrã niîwã. Jesu Cristo kẽ'ra yã'agɨ́, bu'îritigɨ weeró noho marî bu'îri da'rê no'o boo'kere kurúsapɨ wẽrî wapa yeékɨ niîwĩ. Tohô weégɨ kɨ̃ɨ̂ marîre yɨ'rɨkã́ weékɨ niîwĩ. Marî ni'kâroakãre kɨ̃ɨ̂re ẽho peórã, bu'îri marí'.

¹⁴ Jesu Cristo marîre bu'îri da'rê boo'kere kurúsapɨ wẽrî wapa yeékɨ niîwĩ. Tohô weekã́, Õ'âkɨ̃hɨ Abraãore Judeu masa niîtirã kẽ'rare “Tohô weegɨ́ti” niî'ke keoróta wa'âkaro niîwɨ. Jesu Cristore ẽho peókã, naâre Abraãore weeró noho “Ãyurã́, bu'îri marirã́ niîma”, niî ĩ'yâsami. Tohô weégɨ kɨ̃ɨ̂ niî'karo nohota weesamí. Niî pe'tirã Jesu Cristore ẽho peórãre Espírito Santore o'ôo'sami. Õ'âkɨ̃hɨ Abraãore, Moisére kɨ̃ɨ̂ uúkũ'ke niî'

¹⁵ Ni'kâroakãre masá naâ wee wɨáse nohore mɨsâre werêgɨti. Masá “A'tîro weerã́” niî, wiôrã tiro papéra apo yuúsama. Be'ró naâ teeré apóka be'ro neê ni'kɨ́ “Tii pũríre kõ'âkã'ya, a'tîro ohâ nemoya”, niî masitisami.

¹⁶ Õ'âkɨ̃hɨ kɨ̃ɨ̂ Abraãore niî'ke a'té weeró nohota niîwɨ. A'tîro niîkɨ niîwĩ: “A'ti nukúkãkãharãre mɨ'ɨ̂ parami niî turiagɨpɨ me'ra ãyuró weegɨ́ti”, niîkɨ niîwĩ. “Mɨ'ɨ̂ paramérã niî turiarã pãharã́ me'ra ãyuró weegɨ́ti”, niîtikɨ niîwĩ. Tohô niîtimigɨ “Mɨ'ɨ̂ parami niî turiagɨ ni'kɨ́ me'ra di'akɨ̃ tohô weegɨ́ti”, niîkɨ niîwĩ. Tohô niîgɨ, Jesu Cristore uúkũgɨ weékɨ niîwĩ.

¹⁷ Yɨ'ɨ̂ mɨsâre niisé a'tîro niîro weé'. Õ'âkɨ̃hɨ Abraãore niîkɨ niîwĩ: “Masá yɨ'ɨ̂re ẽho peórã yɨ'rɨrã́sama. Naâ yɨ'ɨ̂ me'ra ãyuró niîrãsama”, niîkɨ niîwĩ. Be'ropɨ́ quatrocentos trinta kɨ'mari be'ro Õ'âkɨ̃hɨ kɨ̃ɨ̂ dutisére Moisére kũûkɨ niîwĩ. Teeré kũûgɨ, “Too dɨpóropɨ Abraãore ‘Yɨ'ɨ̂ tohô weegɨ́ti’ niî'ke wapa marírosa'”, niîtikɨ niîwĩ.

¹⁸ Marî Moisé kɨ̃ɨ̂ ohâ'kere weekã́, Õ'âkɨ̃hɨ me'ra ãyuró niîta basiókã maa, Õ'âkɨ̃hɨ Abraãore too dɨpóropɨ niî'ke wapa marí boopã. Tohô nií wee'. Õ'âkɨ̃hɨ Abraãore ma'ígɨ, “Kɨ̃ɨ̂ tohô weegɨ́ti” niî'kere keoró weékɨ niîwĩ. “Niî pe'tirã mɨ'ɨ̂ weeró noho ẽho peórãre yɨ'rɨógɨti”, niîkɨ niîwĩ.

¹⁹ Too pũríkãre de'ró weégɨ Õ'âkɨ̃hɨ Moisére sõ'ó niî'ke dutisére kũûpari? A'tîro niî'. Marîre “Yã'arã́ niî', bu'îri kɨó'” niî masî dutigɨ kũûkɨ niîwĩ. Õ'âkɨ̃hɨ teeré Abraão paramí niî turiagɨ Jesu Cristo a'tirí kurapɨ kũû tɨokɨ niîwĩ. Jesu Cristo me'ra Õ'âkɨ̃hɨ “A'ti nukúkãkãharãre ãyuró weegɨ́ti” niî'ke keoró wa'âwɨ. Teé dutisére Õ'âkɨ̃hɨ kɨ̃ɨ̂re werê ko'terã ɨ'mɨ̂sekãharã me'ra Moisére werê duti o'okɨ niîwĩ. Moisé pe'e kẽ'ra teeré tɨ'ógɨ, werê turiakɨ niîwĩ masapɨ́re taha.

²⁰ Abraão pe'ere Õ'âkɨ̃hɨ ãyuró weeátehere ãpêrãre werê duti o'otimigɨ, kɨ̃ɨ̂ basita werêkɨ niîwĩ. Tohô weéro Õ'âkɨ̃hɨ Abraãore niî'ke pe'e Moisére niî'ke yɨ'rɨóro wapatí yɨ'rɨ nɨ'kakaro niîwɨ.

²¹ Too pũríkãre Abraãore kɨ̃ɨ̂ niî'ke wapatí yɨ'rɨ nɨ'kakã, Moisére kɨ̃ɨ̂ dutî'ke pe'e wapa marípari? Niîtikaro niîwɨ. Masá niî pe'tise Moisé kɨ̃ɨ̂ dutisére weetá basiókã maa, marîre Õ'âkɨ̃hɨ me'ra ãyuró niîta basió niî boopã. Basiótikaro niîwɨ.

²² Õ'âkɨ̃hɨ yee kiti ohâka pũripɨ a'tîro ohâ no'okaro niîwɨ: “Niî pe'tirã masá yã'arã́ niîma. Bu'îritirã niîma”, niîwɨ. Tohô weéro Õ'âkɨ̃hɨ Abraãore kɨ̃ɨ̂ dɨporópɨ niî'ke wa'â'. A'tîro niîkɨ niîwĩ: “Mɨ'ɨ̂ weeró noho ẽho peó siru tuurãre ‘Ãyurã́ niîma’, niî ĩ'yâgɨti”, niîkɨ niîwĩ. Tohô weégɨ Õ'âkɨ̃hɨ Jesu Cristore ẽho peórãre bu'îri da'rê no'o boo'kere yɨ'rɨósami.

²³ Marî Jesu Cristore ẽho peoátoho dɨporo kɨ̃ɨ̂re ẽho peoátehere ko'têrã nohota Moisé kɨ̃ɨ̂ dutî'ke doka niî ni'ikãrã niîwɨ. Moisé dutisére weé pe'o sĩ'rimirã, niî pe'tisere weé põo tẽótikãrã niîwɨ.

²⁴ Moisé dutisé me'ra Õ'âkɨ̃hɨ marîre “Yã'arã́ niî'” niî masî dutigɨ kũûkɨ niîwĩ. Teeré masîrã, marî “De'ró weé yã'âro niisére du'urã́sari?” niiáto niîgɨ kũûkɨ niîwĩ. Be'ró Jesu Cristo a'tikã́, marî a'teré masîkãrã niîwɨ. “Kɨ̃ɨ̂re ẽho peórã, Õ'âkɨ̃hɨ me'ra ãyuró niî masisa'”, niîkãrã niîwɨ.

²⁵ Ni'kâroakãre marî Jesu Cristore ẽho peóri kura niî'. Tohô weérã Moisé dutisé doka nií wee' maha.

²⁶ Marî niî pe'tirã Jesu Cristore ẽho peóse me'ra Õ'âkɨ̃hɨ põ'ra niî'.

²⁷ Jesu Cristore ẽho peó tĩharã, wamê yee no'okãrã niîwɨ. Mɨsá kẽ'rare kɨ̃ɨ̂ weeró noho niisétikã weékɨ niîwĩ.

²⁸ Õ'âkɨ̃hɨ niî pe'tirã kɨ̃ɨ̂ makɨ́ Jesu Cristore ẽho peórãre yɨ'rɨósami. Judeu masare, Judeu masa niîtirãre yɨ'rɨósami. Tohô niikã́ ãpêrãre da'rá wã'ya ko'terãre, da'rá ko'tetirãre yɨ'rɨósami. Ɨmɨaré, numiâre ni'kâro noho yɨ'rɨósami. Marî niî pe'tirãpɨta Jesu Cristore ẽho peórã dɨka watíse moó'.

²⁹ Marî Jesu Cristo yarã niî'. Tohô weérã Abraão paramérã niî turiarã waro niî'. Õ'âkɨ̃hɨ Abraãore niî'karo nohota marîre weegɨ́sami. Abraão weé'karo noho ẽho peókã, marîre yɨ'rɨógɨsami.

4

¹ Mɨsâre a'tîro werê nemogɨti. Wi'magɨ́ kɨ̃ɨ̂ pakɨ́ kũuátehere yẽ'eákɨhɨ masá tu'a ehatimigɨ, maatá yẽ'êtisami. Niî pe'tise kɨ̃ɨ yeé niîmikã, da'rá ko'tegɨ weeró noho niîsami.

² Ãpêrã masá kɨ̃ɨ̂re ko'têsama. Kɨ̃ɨ̂ naâ dutisé doka niîsami. Kɨ̃ɨ yeé niiátehe kẽ'rare ĩ'yâ nɨrɨ basasama. Kɨ̃ɨ̂ pakɨ́ kɨ̃ɨ̂ wẽriátoho dɨporo ni'kâ nɨmɨ teeré wiaátihi nɨmɨre besesamí. “Tii nɨmɨ́ ehakã́, niî pe'tisere yɨ'ɨ̂ makɨre wiayá”, niîsami. Tohô weérã tii nɨmɨ́ niikã́, niî pe'tisere kɨ̃ɨ̂re wiá pe'okã'sama. Teeré wiáka be'ro kɨ̃ɨ̂ da'rá ko'tegɨ weeró noho niîtisami maha.

³ Marí kẽ'ra Jesu Cristore ẽho peoátoho dɨporo marî yẽkɨ sɨmɨá wee mɨháti'kere weérã, ã'rí weeró noho niî ni'ikãrã niîwɨ yuhûpɨ. Teé dutisé me'ra niîrã, ãpêrãre da'rá wã'ya ko'terã weeró noho niîkãrã niîwɨ.

⁴ Tohô niîmikã, Õ'âkɨ̃hɨ pe'e kɨ̃ɨ̂ keóka nɨmɨ niikã́, keoró a'ti nukúkãpɨre kɨ̃ɨ̂ makɨré o'ôo'kɨ niîwĩ. Kɨ̃ɨ̂ Õ'âkɨ̃hɨ makɨ niîmigɨ, ni'kó numiôpɨre bahuákɨ niîwĩ. Kɨ̃ɨ̂ Judeu masɨ niîgɨ, Moisé dutisé doka niîkɨ niîwĩ.

⁵ Moisé dutisé doka niirã́re yɨ'rɨ wetíkã ɨágɨ, Õ'âkɨ̃hɨ kɨ̃ɨ̂ makɨré o'ôo'kɨ niîwĩ. Naâre yɨ'rɨógɨ, Jesu Cristo kurúsapɨ wẽrîkɨ niîwĩ. Õ'âkɨ̃hɨ põ'ra wa'â dutigɨ marîre tohô weékɨ niîwĩ.

⁶ Õ'âkɨ̃hɨ marîre yɨ'ɨ̂ põ'ra niî tohama niîgɨ, marîre kɨ̃ɨ̂ makɨ́ me'ra Espírito Santore o'ôo'kɨ niîwĩ. Tohô weérã Õ'âkɨ̃hɨre “Pakɨ́”, pisû masi'.

⁷ Marî Jesu Cristo yɨ'rɨó no'o'kãrã niî yuurã, ãpêrãre da'rá ko'terã weeró noho nií wee' maha. Ni'kâroakãre Õ'âkɨ̃hɨ põ'ra niî toha'. Tohô weérã niî pe'tise kɨ̃ɨ̂ o'oátehere yẽ'êrãsa'. Paulo Galáciakãharãre naâ Jesu Cristore ẽho peó du'u sĩ'rikã tɨ'ógɨ kɨ̃ɨ̂ wãkû ke'ti'ke niî'

⁸ Mɨsâ too dɨpóropɨre Õ'âkɨ̃hɨre masîtikãrã niîwɨ. Masá naâ yeê'kãrãre ẽho peókãrã niîwɨ. Naâre Õ'âkɨ̃hɨre weeró noho ĩ'yâkãrã niîwɨ. Naâre ẽho peórã, naâ dutisé doka niî wã'yarã weeró noho niîkãrã niîwɨ. Mɨsâ ẽho peó'kãrã Õ'âkɨ̃hɨ meheta niîkãrã niîwã.

⁹ Ni'kâroakãre mɨsâ Õ'âkɨ̃hɨre masî'. Kɨ̃ɨ̂ pe'e mɨsâre masî mɨ'takɨ niîwĩ. Kɨ̃ɨ̂re ẽho peóka be'ro too dɨpóropɨ mɨsâ ẽho peó'kere du'úkã'kãrã niîwɨ. Mɨsâ ẽho peó mɨ'ta'ke mehô niisé niî'. Wapa marí'. Ni'kâroakãre Moisé dutisére weérã, mɨsâ ẽho peó mɨ'ta'kere ẽho peórã weeró noho weérã weésa'. Too dɨpóropɨ da'rá wã'ya ko'te'kãrã weeró noho niî sĩ'risari taha?

¹⁰ Mɨsâ a'tîro wãkûmisa'. “Judeu masa wee wɨáse nohore tiikése bosê nɨmɨri kɨórã, yɨ'rɨrã́sa'”, niîmisa'. Teeré wãkûrã, soo wɨáse nɨmɨrire, ma'ma muhípũre, no'ó bosê nɨmɨri niisé nohore weésa'.

¹¹ Yɨ'ɨ̂ mɨsâre mehô waro bu'êpari? niîgɨ, yã'âro tɨ'ó yã'asa'.

¹² Akawerérã, yɨ'ɨ̂ mɨsâ a'tîro weekã́ ɨása'. Mɨsâ Judeu masa niîtirã Moisé dutisére weetíkãrã niîwɨ. Yɨ'ɨ́ kẽ'ra mɨsâ weeró noho teé dutisére weé wee' maha. Ni'kâroakãre masî'. Jesu Cristore ẽho peóse me'ra di'akɨ̃ marî yɨ'rɨrã́sa'. Tohô weégɨ Judeu masɨ niîmigɨ, Jesu Cristore ẽho peógɨ, Moisé dutisére du'úkã'wɨ. Yɨ'ɨ̂ weeró noho mɨsâ weekã́ ɨa sãá'. Yɨ'ɨ̂ mɨsâre too dɨpóropɨ bu'ekã́, yɨ'ɨ̂re neê yã'âro weetíwɨ.

¹³ Mɨsâ masísa'. Yɨ'ɨ̂ do'âti tĩhagɨ, mɨsâ tiropɨre Jesu Cristo masaré yɨ'rɨóse kitire bu'êwɨ.

¹⁴ Yɨ'ɨ̂ do'âtikã, mɨsâre diâsa niîwɨ. Mɨsâ yɨ'ɨ̂ dutí wi'i niîmikã, yabîtiwɨ. A'tîro pe'e weewɨ́. Ni'kɨ́ Õ'âkɨ̃hɨre werê ko'tegɨ ɨ'mɨ̂sepɨ niigɨ́re weeró noho põo tẽrí me'rikã'wɨ. Jesu Cristore mɨsâ yẽ'ê boo'karo weeró noho yɨ'ɨ̂re ãyuró weewɨ́.

¹⁵ Mɨsâ too dɨpóropɨ yɨ'ɨ̂ me'ra e'katími'ke de'ró wa'âri? Mɨsâ tiîtare yɨ'ɨ̂re ma'írã, mɨsâ wee tamúta basiókã wee boópã. No'ó mɨsa yeé kapêripɨta yɨ'ɨ̂re orê wee o'ô sãha boopã.

¹⁶ Yɨ'ɨ̂ diakɨ̃hɨ́ weresé bu'iri yɨ'ɨ̂re ĩ'yâ tu'tirã weetí? Diakɨ̃hɨ́ niisére tɨ'ó sĩ'ritisari?

¹⁷ Mɨsâre mehêkã bu'ê siharã yɨ'ɨ̂ weeró noho ãyusére ɨa sãárã meheta weesamá. Mɨsâre naâ ãyuró uúkũ ta'sasama. Yɨ'ɨ̂ me'ra pe'e e'katí dutitirã tohô weesamá. Tohô niikã́ naâ bu'esé pe'ere siru tuuáto niîrã tohô weesamá.

¹⁸ Ãpêrã mɨsâre wee tamúkã, ãyú niísa'. Ãyuró weé sĩ'rise me'ra wee tamúkã maa, ãyú niísa'. Wee tamúrã weé' niîrã, tohô wee tamú nu'kukã'ato. Yɨ'ɨ̂ toopɨ́ niikã́ di'akɨ̃ wee tamú ta'satikã'ato.

¹⁹ Yɨ'ɨ̂re mɨsâ tɨ'sâtimikã, yɨ'ɨ̂ põ'rare weeró noho ma'í'. Mɨsâre wãkûgɨ, pũûro bɨhâ weti'. Ni'kó nihî pako koô makɨré wɨaátoho dɨporoakã pũrisé pi'etísamo. Koô weeró nohota yɨ'ɨ́ kẽ'ra mɨsâ Jesu Cristore ẽho peókã ɨa sãágɨ, pũûro pi'etí'. Mɨsâ Jesu Cristo weeró noho niisétika be'ropɨ ãyuró tɨ'ó yã'agɨti.

²⁰ Yɨ'ɨ̂ mɨsâre werê nemoakɨhɨ mɨsâ tiropɨ niîkã' sĩ'rimisa'. Yɨ'ɨ̂ yoarópɨ niîgɨ, de'ró wee boósari? Pɨárã numia Agar, Sara yee kiti niî'

²¹ Mɨsâ a'tîro wãkûmisa'. “Moisé dutisére weérã, Õ'âkɨ̃hɨ me'ra ãyuró niîkã'rãsa'”, niîmisa'. Tohô wãkûmirã, Moisé dutisére keoró masîtisa'. Keoró masîrã pũrikã, mɨsâ wãkuró noho wãkûti boopã.

²² Moisé kɨ̃ɨ̂ basita Abraão yeere a'tîro ohâkɨ niîwĩ. Abraão pɨárã ɨmɨá põ'ratíkɨ niîwĩ. Ni'kɨré Agar wamêtigo kɨ̃ɨ̂re da'rá ko'tego me'ra põ'ratíkɨ niîwĩ. Ãpiré kɨ̃ɨ̂ nɨmo diákɨ̃hɨ Sara me'ra põ'ratíkɨ niîwĩ.

²³ Agar ãpêrã numia weeró nohota wi'magɨ́ boká, põ'ratíko niîwõ. Sara pe'e maa bɨkɨó waro niî yuukã, wi'magɨ́ bokatá basiótikaro niîwɨ. Õ'âkɨ̃hɨ wee tamúse me'ra koôre wi'magɨ́ bokatá basiókã weékɨ niîwĩ. Kɨ̃ɨ̂ Abraãore niîkɨ niîwĩ: “Mɨ'ɨ̂ nɨmo ni'kɨ́ põ'ratígosamo”, niîkɨ niîwĩ. Kɨ̃ɨ̂ niî'karo nohota wi'magɨ́ põ'ratíko niîwõ.

²⁵

²⁴ A'tîro weé'ke me'ra marî masî'. Naâ pɨárã numia Õ'âkɨ̃hɨ kɨ̃ɨ̂ pɨáro dutisé marîre kũû'ke weeró noho niî'. Agar ɨ̃rɨgɨ́ Sinai wamêtikɨhɨ weeró noho niîmo. Tigɨpɨ́ Õ'âkɨ̃hɨ Moisére dutisé o'ôkɨ niîwĩ. Tigɨ́ Arábia di'tapɨ niísa'. Agar makɨ kɨ̃ɨ̂ pakó da'rá ko'tego niî yuukã, kɨ̃ɨ́ kẽ'ra da'rá ko'tegɨ niîkɨ niîwĩ. Tii kurákãharã bahuá siru tuurã niî pe'tirã da'rá ko'terã niîma. Ãpêrã dutisére weé wã'ya ko'tema. Apêye maa taha a'tóka tero Jerusalẽ́pɨre ãyuró Moisé dutisére weerã́ niîsama. Agar tii maká weeró noho niîmo. Niî pe'tirã Moisé dutisére weerã́ Agar yaa kurakãharã weeró noho da'rá ko'terã niîma. Tohô weérã naâ Moisé dutisé doka niîma.

²⁶ Sara pe'e a'tîro niîmo. Jesu Cristore ẽho peórã weeró noho niîmo. Koô Abraão nɨmo diákɨ̃hɨ niîko niîwõ. Kɨ̃ɨ̂re da'rá ko'tego meheta niîko niîwõ. Marî Jesu Cristore ẽho peórã koô weeró noho niî'. Moisé kɨ̃ɨ̂ dutisé doka nií wee'. Tohô niikã́ koô Jerusalẽ́ ɨ'mɨ̂sepɨ niirí maka weeró noho niîmo. Tii maká marî Jesu Cristore ẽho peórã niiátihi maka niî'.

²⁷ Õ'âkɨ̃hɨ yee kiti ohâka pũripɨ Isaía kɨ̃ɨ̂ ohâ'ke a'tîro niî':

Numiô, mɨ'ɨ̂ põ'ra marímigo, e'katíya. Wi'marã́ naâ wɨârã pũrisé tɨ'ó yã'asere tɨ'ó yã'atimigo, e'katíya. Mɨ'ɨ̂ põ'ra marímikã, be'ropɨ́re mɨ'ɨ̂ paramérã pãharã́ niîrãsama. Apêgo, marapɨ́ me'ra niigó nemoró paramérãtigosa', niî ohâkɨ niîwĩ. A'té ohâ'ke a'tîro niî sĩ'riro weé'. Jesu Cristore ẽho peórã Moisé dutisére weerã́ nemoró pãharã́ niîrãsama.

²⁸ Akawerérã, marî Sara makɨ Isaque weeró noho niî'. Õ'âkɨ̃hɨ Abraãore niî'karo nohota Sara Isaquere wɨâko niîwõ. Marîre Õ'âkɨ̃hɨ kɨ̃ɨ̂re niî'karo nohota kɨ̃ɨ̂ põ'rá wa'akã́ weemí.

²⁹ Dɨporópɨre Sara makɨ Espírito Santo tutuaró me'ra bahuákɨ niîwĩ. Da'rá ko'tego makɨ Ismael kɨ̃ɨ̂re ĩ'yâ tu'tikɨ niîwĩ. A'tóka tero kẽ'rare tohôta niî'. Moisé dutisére weerã́ marî Jesu Cristore ẽho peórãre ĩ'yâ tu'tisama.

³⁰ Õ'âkɨ̃hɨ yee kiti ohâka pũripɨ Ismael, Isaque yeekãhasere a'tîro ohâ no'okaro niîwɨ: “Da'rá ko'tego makɨ kɨ̃ɨ̂ pakɨ́ kɨosére yẽ'êtisami. Kɨ̃ɨ̂ nɨmo diákɨ̃hɨ me'ra põ'ratí'kɨ pe'e yẽ'êgɨsami. Tohô weégɨ da'rá ko'tegore koô makɨ́ me'rata kõ'â õ'okã'ya”, niî ohâ no'okaro niîwɨ.

³¹ Tohô weérã yɨ'ɨ̂ akawerérã, marî Jesu Cristore ẽho peórã Sara paramérã niî turiarã niî'. Da'rá ko'tego paramérã meheta niî'. Sara makɨ kɨ̃ɨ̂ pakɨ yeére yẽ'ê'karo weeró nohota marî Õ'âkɨ̃hɨ kɨ̃ɨ̂ põ'raré o'oátehere yẽ'êrãsa'.

5

¹ Jesu Cristo marîre marî yẽkɨ sɨmɨá wee mɨháti'ke doka niî'kãrãre yɨ'rɨókɨ niîwĩ. Õ'âkɨ̃hɨ põ'ra wa'â dutigɨ marîre yã'âro weé'kere wẽrî wapa yeé basakɨ niîwĩ. Marîre too dɨpóropɨre pehé dutisé niîkaro niîwɨ. Ni'kâroakãre Jesu Cristore ẽho peórã maha tiîtapɨ niî'karo noho nií wee'. Niî soorã mɨsâre a'tîro niî boosama. “Õ'âkɨ̃hɨ me'ra ãyuró niî sĩ'rirã, Moisé dutisére weeyá”, niî boosama. Tohô niikã́, tɨ'otíkã'ya. Teeré weetíkã'ya. Mɨsâ teeré weérã, da'rá ko'terã weeró noho wa'ârãsa' taha.

² Tɨ'ó yã'are mɨsa. Yɨ'ɨ̂ mɨsâre werêgɨti. Mɨsâ “Õ'rekɨhɨ́ yapa kaserore yehê kõ'ase me'ra Õ'âkɨ̃hɨ ɨ̃sâre yɨ'rɨógɨsami”, niîtikã'ya. Mɨsâ tohô niikã́, mɨsâre Jesu Cristo wẽrî basa'ke neê wapa marírosa'.

³ Mɨsâre niî nemogɨti. Tohô wãkusétirã pũrikã niî pe'tise Moisé kɨ̃ɨ̂ dutisére weé pe'okã'ya. Ni'karé wee maá kusiatikã'ya.

⁴ Mɨsâ Moisé dutisé me'ra yɨ'rɨrã́sa' niîrã, Jesu Cristore du'úrã weé'. Kɨ̃ɨ̂ ma'isé me'ra mɨsâre ãyuró wee boó'kere bahuriórã weé'.

⁵ Ɨ̃sâ mɨsâ weeró noho wãkú wee'. Espírito Santo wee tamúro me'ra a'tîro wãkû'. Õ'âkɨ̃hɨ marîre “Jesu Cristore ẽho peóse me'ra ãyurã́ niîma”, niîgɨsami. Tohô niiátehere ẽho peóse me'ra yuû kue'.

⁶ Marî Jesu Cristo yarã niî'. Õ'âkɨ̃hɨ ĩ'yóropɨre õ'rekɨhɨ́ yapa kaserore yehê kõ'a no'ose, yehê kõ'a no'otise wapa marí'. Marî Jesu Cristore ẽho peó tĩharã, ãpêrãre ma'í'. Tee pũríkã wapatí'.

⁷ Mɨsâ Jesu Cristore ẽho peóka be'ro kɨ̃ɨ̂re ãyuró siru tuúrã weemíwɨ. Noá mɨsâre diakɨ̃hɨ́ ẽho peómi'kere werê maa soómitito?

⁸ A'té maa Õ'âkɨ̃hɨre diôtikã'ya. Kɨ̃ɨ̂ dohórẽ'tipĩ. Kɨ̃ɨ́ta mɨsâre Jesu Cristore ẽho peókã weékɨ niîwĩ.

⁹ Masá naâ uúkũ wɨase a'tîro niî': “Pãú bɨkɨakã́ weesé kã'roákã moremíkã, niî pe'tiro pãupɨ́ se'sâa wa'ása'.” Mehêkã werê maa soó siharã a'té weeró noho niîsama. Naâ bu'esé naâ pehêterãkã niîmikã, pãú bɨkɨakã́ weesé weeró noho bɨkɨâ wã'karo weé'. Niî pe'tirã Jesu Cristore ẽho peórãre dohórẽ' wã'karã weemá.

¹⁰ Naâ tohô weesére yɨ'ɨ̂ wãkû ke'ti wee'. Mɨsá kẽ'ra yɨ'ɨ̂ weeró noho Jesu Cristore ẽho peórã niî'. Tohô weérã mɨsâ, yɨ'ɨ̂ tɨ'ó yã'akã, yɨ'ɨ̂ weeró noho weerã́sa'. Mɨsâre dohórẽ' sĩ'rise wa'âsome. Õ'âkɨ̃hɨ mɨsâre dohórẽ' sĩ'rigɨ nohore bu'îri da'rêgɨsami.

¹¹ Akawerérã, ãpêrã yɨ'ɨ̂re a'tîro niîsama: “Paulo masaré ‘Õ'âkɨ̃hɨ me'ra ãyuró niî sĩ'rirã, a'tîro weeyá’ niîmi. Õ'rekɨhɨ́ yapa kaserore yehê kõ'aya niisére bu'ê kusiagɨ weemí”, niîsama. Naâ tohô niî ma'akãrã weemá. Yɨ'ɨ̂ tohô niikã́ maa, Judeu masa yɨ'ɨ̂re yã'âro weetí boosama. Yɨ'ɨ̂ Jesu Cristo kurúsapɨ wẽrisé me'ra yɨ'rɨrã́sa' niisé di'akɨ̃re werê'. Teé bu'iri yɨ'ɨ̂re yã'âro weemá.

¹² Mɨsâ Jesu Cristore ẽho peórãre dohórẽ' kusiasama. Mɨsâre dohórẽ'rãre a'tîro weekã́ ɨása'. Naâ mɨsâ tirore neê niî nemotikã'ato.

¹³ Akawerérã, Õ'âkɨ̃hɨ mɨsâre Moisé dutisé doka niiáto niîgɨ meheta kũûkɨ niîwĩ. Mɨsâ “Moisé dutisé doka nií wee'” niîmirã, “No'ó ɨ̃sâ yã'âro ɨâri pehasere weerã́ti”, niîtikã'ya. A'tîro pe'e weeyá. Ãpêrãre ma'írã, wee tamúya.

¹⁴ Marî Moisé dutisé niî pe'tisere ni'kâropɨta neêo nɨ'ko masi'. A'tîro niî': “Marî basi ma'íro nohota ãpêrã kẽ'rare ma'iró ɨá'”, niî'.

¹⁵ Mɨsâ a'mêri ma'ití, a'mê tu'ti, uukahárã pũrikã, wa'îkɨ̃rã a'me kẽérã weeró noho weérã weé'. Mɨsâ basita dɨka watí, masâ pe'tirã weerã́sa'. Tohô wa'âri niîrã, tɨ'o masí, niisétiya. Espírito Santo wee dutísere weeró ɨá' niisé niî'

¹⁶ Mɨsâre a'tîro werêgɨti. Espírito Santo mɨsâre wee dutíro nohota weé nu'kukã'ya. Mɨsâ tohô weérã, yã'asé mɨsâ ɨâri pehasere weesomé.

¹⁷ Marî yã'âro weé sĩ'rise, marî ɨaró weesé niî'. Espírito Santo kɨ̃ɨ̂ ɨasé meheta niî'. Teé ni'kâro noho nií wee'. Espírito Santo kɨ̃ɨ̂ wee dutíse ãyusé niî'. Yã'âro weé sĩ'ri, ɨâri pehase nií wee'. A'té pɨ̂a pe'eseri a'me kẽé'. Tohô weérã marî ãyuró weé sĩ'rimirã, weetísa'. Espírito Santo kɨ̃ɨ̂ ɨasére weérã, yã'âro ɨâri pehase pe'ere weé wee'.

¹⁸ Marîre Espírito Santo sɨ'orí ãyuró weesétikã, “Moisé dutisé me'ra marî yɨ'rɨrã́sa'”, niî wãkûtisa' maha.

¹⁹ No'ó yã'âro weé ɨâri pehasere maatá masî no'o'. Teeré weérã, a'tîro weesamá. Naâ nɨmosã́ numia, naâ marapɨ́ sɨmɨa niîtirãre a'me tãrásama. Yã'asé buhíkã'sama. Naâ niî pe'tise yã'asé ɨâri pehasere neê bopôyase mariró weesamá.

²⁰ Õ'âkɨ̃hɨ mehereta, masá naâ yeê'kãrãre ẽho peósama. Tɨ'ó yã'ari masa yaî weesé nohore weesamá. Ĩ'yâ tu'tisama. A'mêri wapasamá. Ãpêrãre doésama. Sahâtiro weemíkã, uâ yeesama. Naâ tɨ'sasé di'akɨ̃re weékã'sama. Naa yeé se'sarore wãkûsama. Naâ ni'kâro me'ra a'mêri niîmi'kãrã dɨka watísama.

²¹ Ɨosé piha niîsama. Masaré wẽhé kõ'asama. Ke'asamá. Ke'árã, yã'âro weesére yɨ'rɨó kehokã'sama. Tohô niikã́ apêye pehé a'té weeró noho wee nemósama. Mɨsâre too dɨpóropɨ niî'karo nohota werê nemogɨti taha. No'ó tee nohóre weesétigɨ noho Õ'âkɨ̃hɨ wiôgɨ niirópɨ ɨ'mɨ̂sepɨ wa'âsome.

²² Espírito Santo pe'e marîre sɨ'orí a'tîro weesétikã weesamí. Ãpêrãre ma'ísa'. E'katíse kɨósa'. Mari yaá ehêri põ'rapɨ ãyuró tɨ'ó yã'asa'. Marîre yã'âro weekã́, uâtisa'. Ãpêrãre pahá yã'asa'. Naâre ãyuró weésa'. Keoró, diakɨ̃hɨ́ weé me'rikã'sa'.

²³ “Ãpêrã yɨ'rɨóro niî'”, niî tɨ'ó yã'atisa'. Yã'âro weesére weé sĩ'rimirã, weetísa'. A'té Espírito Santo me'ra weesé ãyusé di'akɨ̃ niî'. Tohô weéro a'teré neê ni'kâro dutiró “Weetíkã'ya” niî ka'mú ta'aro marí'.

²⁴ Marî Jesu Cristo yarã niî tĩharã, yã'âro ɨâri peha niiséti'kere du'úkã' maha.

²⁵ Espírito Santo marîre Õ'âkɨ̃hɨ me'ra niî nu'kukã weemí. Tohô weérã Espírito Santo wee dutíro nohota weesétiro ɨá'.

²⁶ Marî “Ãpêrã yɨ'rɨóro niî'” niisé me'ra naâre uakã́ weetíkã'rã. “Naâ yɨ'rɨóro niî'”, niîtikã'rã. A'mêri ɨotíkã'rã.

6

¹ Akawerérã, ni'kɨ́ Jesu Cristore ẽho peógɨ apé tero yã'âro wee boósami. Kɨ̃ɨ̂ tohô weekã́, Jesu Cristore ãyuró ẽho peórã noho kɨ̃ɨ̂re wee tamúya. Kɨ̃ɨ̂re “Yã'âro weesére du'uyá”, niîya. Õ'âkɨ̃hɨre akobohóse sẽri dutíya. Teeré wee tamúrã, pahá yã'ase me'ra weeyá. Mɨsá kẽ'ra yã'âro weerí niîrã, mɨsa yeére wãkû nɨrɨya.

² Mɨsâ ãpêrãre no'ó mehêkã wa'akã́, a'mêri wee tamúya. Tohô weérã Jesu Cristo dutisére keoró weerã́sa'.

³ Apé tero ni'kɨ́ “Yɨ'ɨ̂ ãpêrã yɨ'rɨóro niî'”, niî wãkûsami. Kɨ̃ɨ̂ ãpêrã yɨ'rɨóro niîtimigɨ, mehô waro wãkû ma'akã'sami. Tohô niîgɨ, kɨ̃ɨ̂ basi niî soogɨ weemí.

⁴ Marî nɨkɨ ãyuró weemíti yɨ'ɨ? niîgɨ, marî weesére beseró ɨá'. Ãyuró weéka be'ro “Ãpêrã yɨ'rɨóro ãyuró weeápã” niiró mariró mari yeé pe'ere e'katíro ɨá'.

⁵ Marî ni'karérã marî weé'kere Õ'âkɨ̃hɨre yɨ'tirã́sa'. Tohô weérã marî nɨkɨ kɨ̃ɨ̂ kũû'kere weeró ɨá'.

⁶ Mɨsâ Jesu Cristo yee kiti bu'erã́re wee tamúya. Mɨsâ kɨosére naâre dɨka waáya.

⁷ Mɨsâ a'teré masîya. Õ'âkɨ̃hɨre yã'âro buhíkã', kɨ̃ɨ̂re yã'âro weé du'tita basió wee'. “Õ'âkɨ̃hɨ yɨ'ɨ̂ yã'âro weekã́, bu'îri da'rêsome”, niî wãkûtikã'ya. Mɨsâre a'tîro werêgɨti. Marî otesé dɨka otekã́, marî otê'ke nohota pĩ'rí dɨkâtisa'. Marî weesétise kẽ'ra teé weeró noho niî'. Marî weesétiro nohota meharóta taha bokarã́sa'.

⁸ Ni'kɨ́ yã'âro ɨâri pehasere weegɨ́ noho yã'asére bokagɨ́sami. Õ'âkɨ̃hɨ kɨ̃ɨ̂re bu'îri da'rê bahuriógɨsami. Ãpí Espírito Santo ɨaró noho weegɨ́ pe'e ãyusére bokagɨ́sami. Kɨ̃ɨ̂ Õ'âkɨ̃hɨ tiropɨ katî nu'kukɨ̃'sami.

⁹ Tohô weérã ãyusére weérã, marî kari butítikã'rã. Marî kari butítikã, Õ'âkɨ̃hɨ ãyusére keoró marîre o'ôgɨsami.

¹⁰ Tohô weérã niî pe'tirãre marî põo tẽóro ãyuró weerã́. Jesu Cristore ẽho peórã pe'ere ãyuró weé yɨ'rɨ nɨ'karã. Paulo werê tɨo'ke niî'

¹¹ Mɨsâre ãyuró ĩ'yâ dutigɨ pakasé ohâgɨti. A'té niî tɨose daaripɨre yɨ'ɨ̂ basita ohâ'.

¹² Mɨsâre õ'rekɨhɨ́ yapa kaserore yehê kõ'a dutirã naâre ãpêrã ãyuró wãkukã́ ɨárã, tohô wee dutísama. Marî Jesu Cristo kurúsapɨ yɨ'rɨóse kitire bu'ekã́, Judeu masa marîre tu'tî, yã'âro weemá. Naâ teé pe'ere ɨatírã, mɨsâre tohô yehê kõ'a dutisama.

¹³ Naâ yehê kõ'a dutirã marikã niî pe'tise Moisé dutisére weé pe'otima. Tohô weé pe'otimirã, mɨsâre yehê kõ'a dutima. Naâ a'tîro niî sĩ'rirã, tohô weesamá. “Ɨ̃sáta Galácia di'takãharãre Moisé dutisére weekã́ weeápɨ” niî sĩ'rirã, tohô dutîsama.

¹⁴ Yɨ'ɨ̂ pũrikã naâ weeró noho nií wee'. Jesu Cristo marîre yɨ'rɨógɨ kurúsapɨ wẽrî'ke pe'ere werê'. Yɨ'ɨ̂re “Ãpêrã yɨ'rɨóro niîmi” niiáto niîgɨ meheta werê'. Yɨ'ɨ̂ Jesu Cristo wẽrisé me'ra a'ti nukúkãkãharã naâ ɨâri pehasere du'úkã'wɨ. Yɨ'ɨ̂ teeré wãkû nɨrɨ wee' maha.

¹⁵ Õ'âkɨ̃hɨ ĩ'yóropɨre õ'rekɨhɨ́ yapa kaserore yehê kõ'a no'ose, yehê kõ'a no'otise wapa marí'. Marî Jesu Cristore ẽho peóse, tohô niikã́ marî yã'âro weeséti'kere dɨka yuúse pũrikã wapatí'.

¹⁶ Niî pe'tise yɨ'ɨ̂ bu'ê'kere wee sirú tuurãre Õ'âkɨ̃hɨ naâre ãyuró ehêri põ'ratikã weeáto. Naâre pahá yã'ato. Niî pe'tirã kɨ̃ɨ yarã́re tohô weeáto.

¹⁷ Yɨ'ɨ̂ Jesu Cristo yee kitire bu'ekã́, naâ yɨ'ɨ̂re tãrá, kamî da're'ke wã'yá'. Naâ tohô weé'ke me'ra Jesu Cristore yɨ'ɨ̂ da'rá ko'tesere ĩ'yó'. Tohô weérã ni'kakã́ me'ra neê ni'kɨ́ yɨ'ɨ̂re kari boó nemotikã'ato. Yɨ'ɨ̂ bu'esére uúkũ maa soó nemotikã'ato.

¹⁸ Marî wiôgɨ Jesu Cristo mɨsâ niî pe'tirãre ãyuró weeáto. Mɨsâre yɨ'ɨ̂ akawerérãre weeró noho ma'í'. Toô kã'rota ohâ'. Paulo