1

¹ Yɨ'ɨ̂ Paulo, Timóteo me'ra mɨsâre ãyu dutí'. Õ'âkɨ̃hɨ ɨaró nohota Jesu Cristo yɨ'ɨ̂re kɨ̃ɨ yeé kitire werê dutigɨ kũûkɨ niîwĩ. Yɨ'ɨ̂ a'ti pũríre mɨsâre Õ'âkɨ̃hɨ yarã Corintopɨ niirã́re ohâ'. Tohô niikã́ niî pe'tirã Õ'âkɨ̃hɨ yarã Acaia di'tapɨ niirã́re ohâ'.

² Mɨsâre Õ'âkɨ̃hɨ marî pakɨ, tohô niikã́ Jesu Cristo marî wiôgɨ ãyuró weeáto. Tohô niikã́ mɨsâre ãyuró ehêri põ'ratikã weeáto. Paulo kɨ̃ɨ̂ pi'etíse kiti niî'

³ Õ'âkɨ̃hɨ marî wiôgɨ Jesu Cristo pakɨre “Ãyú'” niîrã. Kɨ̃ɨ́ta marîre pahá yã'ami. Marîre wãkû tutuakã weé nu'kumi.

⁴ Pi'etísetiri nɨkɨ Õ'âkɨ̃hɨ marîre wãkû tutuakã weemí. Tohô weérã marí kẽ'ra pi'etírãre wãkû tutuakã wee masí'. Marîre Õ'âkɨ̃hɨ wãkû tutuakã weé'karo nohota naâre wee masí'.

⁵ Jesu Cristo yeere werêrã, pi'etí no'o'. Cristo pũûro pi'etí'kere pi'etí tamu'. Kɨ̃ɨ̂ me'rata, kɨ̃ɨ̂ wee tamúse me'ra nemoró wãkû tutua'.

⁶ Ɨ̃sâ pi'etírã, mɨsâre wãkû tutuakã ɨárã, mɨsâ yɨ'rɨ wetíkã ɨárã, tohô pi'etí'. Õ'âkɨ̃hɨ ɨ̃sâre wãkû tutuasere o'ômi. Tohô weérã ɨ̃sá kẽ'ra mɨsâre wãkû tutuakã weé'. Ɨ̃sâ pi'etíro noho pi'etírãsa'. Tohô wa'akã́, Õ'âkɨ̃hɨ mɨsâre wãkû tutuakã weegɨ́sami.

⁷ Ɨ̃sâ weeró noho pi'etíkã, Õ'âkɨ̃hɨ mɨsâre wãkû tutuakã weegɨ́sami. Tohô weérã ɨ̃sâ mɨsâ ãyuró weeátehere masî yuu toha'.

⁸ Akawerérã, ɨ̃sâre Ásiapɨ wa'â'kere masikã́ ɨása'. Ɨ̃sâ toopɨ́re ɨpɨ́tɨ waro pi'etíwɨ. A'tîro wãkûmiwɨ: “Neê põo tẽósome. Wẽrîrãsa'”, niîmiwɨ.

⁹ “Ɨ̃sâre wẽhé kõ'arãsama”, niî wãkûmiwɨ. Ɨ̃sâ neê tutuâtiwɨ. Tohô wa'â'ke ãyú niîwɨ. Teé me'ra a'tîro wãkûwɨ. “Ɨ̃sâ basi neê wee tamú masitisa'. Õ'âkɨ̃hɨ ni'kɨtá ɨ̃sâre wee tamú masimi”, niî wãkûwɨ. Kɨ̃ɨ́ta wẽrî'kãrãpɨre masogɨ́ niîmi.

¹⁰ “Õ'âkɨ̃hɨ ɨ̃sâre naâ wẽhe boó'kãrãre yɨ'rɨówĩ. Ni'kâroakãre yɨ'rɨó nu'kukã'mi. Be'ropɨ́ kẽ'rare ɨ̃sâre yɨ'rɨó nu'kukɨ̃'sami”, niî ẽho peó'.

¹¹ Õ'âkɨ̃hɨre mɨsâ ɨ̃sâre sẽri basá nu'kukã, tohô weegɨ́sami. Pãharã́ ɨ̃sâre sẽri basákã, Õ'âkɨ̃hɨ ãyuró ɨ̃sâre wee tamúgɨsami. Kɨ̃ɨ̂ tohô weekã́ ĩ'yârã, pãharã́ Õ'âkɨ̃hɨre “Ãyú'” niîrãsama. Paulo Corintopɨ wa'â sĩ'rimi'ke niî'

¹² Apêyere ɨ̃sâ pũûro e'katí'. Ɨ̃sâ a'ti nukúkãpɨre wee soóro mariró ãyuró weesétiwɨ. Mɨsâ wa'teropɨ kẽ'rare tohôta weewɨ́. Tohô weérã ɨ̃sâ bu'îri marirã́ ãyuró tɨ'ó yã'a'. Ɨ̃sâ basi ɨ̃sâ masisé me'ra weetíwɨ. Õ'âkɨ̃hɨ wee tamúse me'ra weewɨ́.

¹³ Mɨsâre ohârã, tɨ'otá basióse di'akɨ̃re ohâ'. Mɨsâre teeré ãyuró masikã́ ɨá'.

¹⁴ Kã'ró masî toha', masîrã pe'e. Mɨsâ ãyuró masî pe'orã, marî wiôgɨ Jesu opâturi a'tikã́, “Ɨ̃sâre diakɨ̃hɨ́ta niîpã”, niîrãsa'. Ɨ̃sâ mɨsâre “Ãyuró weesétima” niîro nohota mɨsá kẽ'ra ɨ̃sâre ãyuró wãkûrãsa'.

¹⁶

¹⁵ Tohô ãyuró wa'ârosa' niî wãkûgɨ, Macedôniapɨ wa'âgɨ, mɨsâ tiropɨ ĩ'yâ mɨ'tagɨ wa'â sĩ'rimiwɨ. “Be'ró ĩ'yâ mahami tohatigɨti taha”, niîmiwɨ. Pɨáti mɨsâ tiropɨ ĩ'yâgɨ wa'â sĩ'rimiwɨ. Mɨsâ e'katíkã ɨágɨ tohô weé sĩ'rimiwɨ. Yɨ'ɨ̂ tohô weekã́, Judéia di'tapɨ wa'aátehere wee tamúrãsama niî wãkûgɨ, tohô weé sĩ'rimiwɨ.

¹⁷ Yɨ'ɨ̂ toopɨ́ wa'âtikã ĩ'yârã, “Wio pesáro mariró weé ma'akã'pĩ”, niîti? “Kɨ̃ɨ̂ no'ó ɨaró weé ma'agɨ noho niîmi”, niîsari? “ ‘Wa'âgɨti’ niî'kɨ niîmigɨ, a'tîtiapĩ”, niîti? “Na'îro dɨka yuú mɨhasami”, niî wãkûti?

¹⁸ Nií wee'. Õ'âkɨ̃hɨ ɨ̃sâ weesére “Diakɨ̃hɨ́ta niî'”, niîsami. Tohô weérã ɨ̃sâ neê ni'kâti no'ó ɨaró dɨka yuú, uúkũ ma'a wee'.

¹⁹ Ɨ̃sâ Jesu Cristo Õ'âkɨ̃hɨ makɨ uúkũ'karo nohota uúkũ'. Kɨ̃ɨ̂ neê ni'kâti “Weegɨ́ti, weesomé”, niîtikɨ niîwĩ. Niî pe'tise kɨ̃ɨ̂ “Weegɨ́ti” niî'karo nohota weemí. Ɨ̃sâ i'tiárã, Silvano, Timóteo, yɨ'ɨ̂, kɨ̃ɨ yeé kitire mɨsâre bu'êwɨ. Niî pe'tise kɨ̃ɨ̂ uúkũse diakɨ̃hɨ́ niî'.

²⁰ A'tîro niî'. Õ'âkɨ̃hɨ too dɨpóropɨre masaré “Ãyuró weegɨ́ti”, niîkɨ niîwĩ. Niî pe'tise kɨ̃ɨ̂ tohô niî'ke Jesu Cristo kɨ̃ɨ̂ a'tisé me'ra, kɨ̃ɨ̂ wẽrî'ke me'ra keoró wa'âwɨ. Tohô wa'akã́ ĩ'yârã, marî Õ'âkɨ̃hɨre “Tohôta niî'”, niî e'katí peo'.

²¹ Õ'âkɨ̃hɨta marîre Cristore ẽho peó nu'kukã weemí. Kɨ̃ɨ́ta marîre kɨ̃ɨ yarã́ wa'â dutigɨ besékɨ niîwĩ.

²² Marîre kɨ̃ɨ yarã́ wa'akã́ weékɨ niîwĩ. Kɨ̃ɨ yarã́ niî' niisére ĩ'yó sĩ'rigɨ Espírito Santore o'ôo'kɨ niîwĩ. Espírito Santo marî me'ra niîgɨ, kɨ̃ɨ́ta Õ'âkɨ̃hɨ marîre yɨ'rɨoátehere masikã́ weemí.

²³ Yɨ'ɨ̂ Corintopɨre wa'â sĩ'rimigɨ, wa'âtiwɨ. Õ'âkɨ̃hɨ yɨ'ɨ̂ tohô weé'kere masîsami. Yɨ'ɨ̂ mɨsâre tu'tî boosa' niîgɨ, ma'ígɨ wa'âtiwɨ.

²⁴ Mɨsâ ẽho peósere “A'tîro pe'e ɨá'”, niîgɨ meheta weé'. Mɨsâ ãyuró ẽho peó'. Mɨsâre ãyuró e'katíse me'ra niisétiato niîgɨ tohô wee tamú sĩ'ri'.

2

¹ Yɨ'ɨ̂ too dɨpóropɨre mɨsâre bɨhâ wetikã weewɨ́. Tohô weégɨ opâturi taha mɨsâre bɨhâ wetikã weé sĩ'ritigɨ, wa'âtiwɨ.

² Yɨ'ɨ̂ mɨsâre bɨhâ wetikã weekã́, noá yɨ'ɨ̂re e'katíkã wee boósari? Mɨsâ di'akɨ̃ yɨ'ɨ̂re tohô weé'. Mɨsâ bɨhâ wetikã, basióti boosa'.

³ Tohô weégɨ yɨ'ɨ̂ mɨsâre ohâwɨ. Yɨ'ɨ̂ toopɨ́ wa'akã́, e'katíkã weeró noho o'ôrã, yɨ'ɨ̂re bɨhâ wetikã wee boópã. Yɨ'ɨ̂ a'tîro tɨ'ó yã'a'. Yɨ'ɨ̂ e'katíkã, mɨsá kẽ'ra e'katí boopã.

⁴ Yɨ'ɨ̂ ohâ mɨ'taka pũrire ohâgɨ, pũûro wãkû ke'ti, utîwɨ. Mɨsâre bɨhâ wetiato niîgɨ meheta ohâwɨ. Yɨ'ɨ̂ mɨsâre ma'í yɨ'rɨ'. Mɨsâre teeré masî dutigɨ ohâwɨ. Yã'âro weé'kɨre akobohó duti'ke niî'

⁵ Ni'kɨ́ yã'âro weegɨ́ marîre bɨhâ wetikã weékɨ niîwĩ. Yɨ'ɨ̂ di'akɨ̃re tohô weetíwĩ. Mɨsá kẽ'ra meharóta weé no'okãrã niîwɨ. Marî niî pe'tirã tohô weé no'okãrã niîwɨ. Yɨ'ɨ̂ a'teré tohô uúkũgɨ, ɨpɨ́tɨ waro niî butia'gɨ meheta weé'.

⁶ Mɨsâ pãharã́ yã'âro weegɨ́re bu'îri da'rê toha'.

⁷ Tohô weérã ni'kâroakã mɨsâ kɨ̃ɨ̂re akobohóya. Kɨ̃ɨ̂re wãkû tutuakã weeyá. Tohô weetíkã, kɨ̃ɨ̂ bɨhâ weti yɨ'rɨa boosami.

⁸ Tohô weégɨ mɨsâre kɨ̃ɨ̂re ma'i dutí' taha.

⁹ Yɨ'ɨ̂ mɨsâre too dɨpóropɨre ohâwɨ. “Teé yɨ'ɨ̂ dutî'kere keoróta weemíti naa?” niî masî sĩ'rigɨ ohâwɨ.

¹⁰ Mɨsâ no'ó yã'âro weegɨ́re akobohókã, yɨ'ɨ́ kẽ'ra kɨ̃ɨ̂re akobohó'. Yɨ'ɨ̂re yã'âro weetíwĩ. Mɨsâ pe'ere yã'âro weewĩ́. Yɨ'ɨ̂re yã'âro weetímikã, kɨ̃ɨ̂re akobohó'. Mɨsâre ma'ígɨ, tohô weé'. Jesu Cristo yɨ'ɨ̂re “Kɨ̃ɨ̂re diakɨ̃hɨ́ta akobohómi”, niî ĩ'yâsami.

¹¹ Marî kɨ̃ɨ̂re akobohótikã, wãtî kɨ̃ɨ̂re yã'âro bɨhâ weti yɨ'rɨkã wee boósami. Jesu Cristo yeere du'úkã' boosami. Marî wãtî wee wɨásere ãyuró masî'. Paulo Trôadepɨ wãkû ke'ti'ke niî'

¹² Yɨ'ɨ̂ Trôade wamêtiri makapɨ Cristo yee kitire bu'êgɨ ehâgɨ, a'tîro boka eháwɨ. Jesu Cristo marî wiôgɨ pãharã́re kɨ̃ɨ yeé kitire tɨ'ó sĩ'rikã weékɨ niîwĩ.

¹³ Tohô niîmikã, yɨ'ɨ̂ Tito marî akawerégɨre bokatígɨ, pũûro wãkû ke'tiwɨ. Tohô weégɨ naâre we'êriti, wa'â wa'âwɨ Macedônia di'tapɨ. Jesu Cristo me'ra marî ãyuró wee masí' niisé niî'

¹⁴ Yɨ'ɨ̂ wãkû ke'timigɨ, Õ'âkɨ̃hɨre “Ãyú'” niî'. Kɨ̃ɨ̂ marîre ãyuró weé nu'kukã weemí. Marî Cristo yarã niikã́, tohô weemí. Marî Cristo yee kiti weresé me'ra masaré kɨ̃ɨ̂re masikã́ weemí. Kɨ̃ɨ̂re masisé ɨ'mɨ̂tihise weeró noho niî pe'tiropɨ se'sâ'.

¹⁵ Marî Jesu Cristo yee kitire werêrã, ɨ'mɨ̂tihise weeró noho niísa'. A'tîro niî'. Masá Õ'âkɨ̃hɨre “Ãyú'” niikã́, opê weeró noho bahusé me'ra buê morokã, tɨ'sâsami. A'teré weeró noho marî kɨ̃ɨ yeé kitire werekã́ ĩ'yâgɨ, tɨ'sâsami. Tee kití niî pe'tirã kɨ̃ɨ̂ yɨ'rɨó'kãrãre se'sâa wa'a'. Tohô niikã́ kɨ̃ɨ̂ yɨ'rɨó no'oya marirã́ pekâ me'epɨ wa'aáhã kẽ'ra teé uúkũsere tɨ'ó se'sa wa'âma.

¹⁶ Yɨ'rɨó no'otirã Jesu Cristo yee kitire wererã́re ĩ'yârã, kɨ̃ɨ̂re ẽho peótirã “Pekâ me'epɨ wa'ârãsa'” niîrã weeró noho tɨ'ó yã'asama. Õ'âkɨ̃hɨ yɨ'rɨó no'o'kãrã pe'e Jesu Cristo yee kitire wererã́re ĩ'yârã, kɨ̃ɨ̂re ẽho peórã “Marî Jesu Cristo me'ra niî nu'kukã'rãsa'”, niî wãkûsama. Neê ni'kɨ́ kɨ̃ɨ̂ se'saro tee kitíre werê masitimi. Õ'âkɨ̃hɨ wee tamúro me'ra pe'e werê masimi.

¹⁷ Pãharã́ a'tîro weemá. Õ'âkɨ̃hɨ yee kitire werêrã, wapá ta'ase di'akɨ̃re wãkûma. Ɨ̃sâ naâ weeró noho weé wee'. Õ'âkɨ̃hɨ o'ôo'kãrã Cristore da'rá ko'terã niî'. Tohô weérã Õ'âkɨ̃hɨ ĩ'yóropɨre kɨ̃ɨ yeé kitire keoró werê'.

3

¹ Ɨ̃sâ “Õ'âkɨ̃hɨ yee kitire keoró werê'” niîrã, ɨ̃sâ basi ãyuró uúkũrã meheta weé'. Ãpêrã tohô wee wɨásama. Naâ basi ãyuró uúkũsama. Ãpêrãre a'tîro niîsama: “Ɨ̃sâre papéra ohâ basaya”, niîsama. “Ã'rá ãyuró weerã́ niîma”, niî apo basá dutisama. “Ɨ̃sâ tohô weekã́, ‘Ãyurã́ niîma’, niî ĩ'yârãsama” niîrã, tohô wee dutísama. Mɨsâ naâ weesétiro noho ɨatí? Ɨ̃sâ mɨsâre “Ãyurã́ niî', tohô weérã ɨ̃sâre papéra apo basáya”, niîrã meheta weé'.

² Mɨsâ Jesu Cristore ẽho peó'. Tohô weesé me'ra ɨ̃sâ mɨsâre keoró bu'ê'kere ĩ'yó'. Tohô weérã ãpêrã ohâ basaka pũrire ɨá wee'. Ɨ̃sâ mɨsâre tii pũrí weeró noho niîma, niî ehêri põ'rati'. A'tîro niî'. Niî pe'tirã mɨsâre ĩ'yârã, masîsama. “Naâ naâre diakɨ̃hɨ́ta werêpã”, niîsama.

³ Mɨsâre Cristo masaré yɨ'rɨómi niisére werêwɨ. Teeré ẽho peókã, Cristo mɨsâre ãyuró weewĩ́. Kɨ̃ɨ̂ mɨsâre tohô weesére ãpêrã kẽ'rare masikã́ ɨamí. Teeré masî dutigɨ papéra pũripɨ ohakɨhɨ́ me'ra ohâtikɨ niîwĩ. Tohô niikã́ too dɨpóropɨ Õ'âkɨ̃hɨ katî nu'kugɨ ɨ̃tâ pĩhipɨ ohâ'karo nohota weetíkɨ niîwĩ. A'tîro pe'e weékɨ niîwĩ. Espírito Santo tutuaró me'ra mɨsâ wãkusére dɨka yuúkɨ niîwĩ. Teé me'ra Cristo mɨsâre ãyuró weesére ĩ'yomí.

⁴ Ɨ̃sâ Õ'âkɨ̃hɨre ẽho peórã, a'tîro niî masi'. Ɨ̃sâ weresére tɨ'ó ẽho peó'kere “Diakɨ̃hɨ́ta niî'”, niî masi'. Cristo wee tamúse me'ra ɨ̃sâ tohô niî masi'.

⁵ “Ɨ̃sâ se'saro Õ'âkɨ̃hɨ yeere werê masi'”, niîrã meheta weé'. Niî pe'tise ɨ̃sâ weesére Õ'âkɨ̃hɨ wee tamúse me'ra pe'e weé'.

⁶ Õ'âkɨ̃hɨta “Masá me'ra apogɨ́ti” niî'kere ɨ̃sâre werekã́ weewĩ́. Kɨ̃ɨ̂ niî'ke a'tîro niî': “Yɨ'ɨ̂ naâ wiôgɨ niîgɨti. Naâ pe'e yarã́ niîrãsama.” Õ'âkɨ̃hɨ tohô niî'ke Moisé dutisé ohâ'kere yɨ'tisé weeró noho nií wee'. Espírito Santo masaré Õ'âkɨ̃hɨ ɨaró weekã́ wee masími. “Moisé dutisé ohâ'kere yɨ'tirã́ti”, niî'kãrã pe'ere neê basió wee'. Naâ bu'îritirã pekâ me'epɨ wa'â boopã. Espírito Santo pe'e marîre katî nu'kukã weemí.

⁷ Õ'âkɨ̃hɨ Moisére dutî'kere ɨ̃tâ pĩhipɨ ohâ no'okaro niîwɨ. Teé dutisé marî yɨ'rɨ́ nɨ'kase bu'iri wẽhé kõ'a dutise weeró noho niîkaro niîwɨ. Õ'âkɨ̃hɨ teeré o'ôgɨ, ɨpɨ́tɨ asistése me'ra o'ôkɨ niîwĩ. Tohô weéro Moisé teeré ohakã́, kɨ̃ɨ̂ diâpoa asistékaro niîwɨ. Israel kurakãharã kɨ̃ɨ̂ asistékã ĩ'yâ põo tẽo masitikãrã niîwã. Siâpe me'ra kɨ̃ɨ̂ asistése pe'ti dihákaro niîwɨ.

⁸ Teé dutisé asistése me'ra o'ô'ke nemoró Espírito Santo kɨ̃ɨ̂ marîre bu'esé pe'e tootá nemó'.

⁹ A'tîro niî'. Moisé dutisé marîre “Bu'îri da'rê no'orãsama” niî'ke ãyú yɨ'rɨakaro niîwɨ. Tootá Õ'âkɨ̃hɨ marîre bu'îri moomá niisé kiti pe'e nemoró ãyú'.

¹⁰ Jesu Cristo yeere marî ĩ'yâ kasa nɨ'kokã maa, Moisé dutisé “Ãyú yɨ'rɨa'” naâ niî'ke pe'e mehô niisé tohákã'.

¹¹ Moisé kɨ̃ɨ̂ dutisé asistése me'ra a'tî'ke pe'tiátehe niîkaro niîwɨ. Jesu Cristo yee kiti pe'e pe'titiátehe niî'. Tohô weéro Moisé dutisé nemoró, ãyú yɨ'rɨ nɨ'ka'.

¹³

¹² Ɨ̃sâ Jesu Cristo yee kiti pe'titiátehere e'katí yuu toha'. Tohô weérã diakɨ̃hɨ́ta werê'. Moisé kɨ̃ɨ̂ diâpoare asistése niî dohatisere pe'ti dihákã ĩ'yâ dutitikɨ niîwĩ. Tohô weégɨ su'tîro kasero me'ra mo'âkɨ niîwĩ. Ɨ̃sâ kɨ̃ɨ̂ weeró noho weé wee'. Tohô weérã Jesu Cristo yee kitire uiró mariró bahû yoaropɨ werê'.

¹⁴ Moisé Õ'âkɨ̃hɨ dutî'kere werekã́, Israel kurakãharã tɨ'o masítikãrã niîwã. A'tóka tero kẽ'rare meharóta niîma. Naâ Õ'âkɨ̃hɨ yee kiti ohâka pũrire bu'êrã, tɨ'otíma. Cristore ẽho peórã di'akɨ̃ too dɨpóro ohâ'kere tɨ'omá.

¹⁵ Ni'kâroakãpɨ kẽ'rare Israel kurakãharã Moisé ohâ'kere bu'êrã, tɨ'otíma yuhûpɨ.

¹⁶ Marî wiôgɨre ẽho peóka be'ro Õ'âkɨ̃hɨ yeekãhasere tɨ'ó no'o'.

¹⁷ Jesu Cristo marî wiôgɨ Espírito Santo me'ra ni'kɨtá niîmi. Tohô weérã marî Espírito Santo me'ra niîrã, pekâ me'epɨ wa'â boo'kãrã yɨ'rɨó no'o'kãrã niî'.

¹⁸ Marî Cristore ẽho peórã niî'. Tohô weérã marî wiôgɨ ãyú yɨ'rɨagɨ niîmi niisére masî'. Marî, marî katirí ɨmɨ̂koho põo tẽóro kɨ̃ɨ̂ di'akɨ̃re wãkû nu'ku'. Kɨ̃ɨ̂re wãkûrã, siâpe me'ra kɨ̃ɨ̂ weeró noho kɨ̃ɨ̂ ãyuró weesére marí kẽ'ra wee nemó wã'ka'. Marî wiôgɨ Espírito Santo marîre tohô weemí.

4

¹ Õ'âkɨ̃hɨ ɨ̃sâre ãyuró weégɨ, Jesu Cristo yee kitire werê dutikɨ niîwĩ. Tohô weérã wãkû tutuatirã nií wee'.

² Bopôyaro weesére, tohô niikã́ masá ĩ'yâtiropɨ weesére yabí niî'. Õ'âkɨ̃hɨ werê duti'kere niî soose me'ra weré wee'. Teeré dɨka yuúro mariró, keoró di'akɨ̃ werê'. Õ'âkɨ̃hɨ ĩ'yóropɨre tohô weé'. Tohô weérã ɨ̃sâ weresére “Diakɨ̃hɨ́ta werêma”, niîsama.

³ No'ó Jesu Cristo yee kitire tɨ'otí ẽho peótirã noho bu'îri da'rê no'oahã niîma.

⁴ Naâ ẽho peótise bu'iri a'ti ɨmɨ́kohokãharã wiôgɨ wãtî naâre tɨ'o masítirã, kapêri ĩ'yâtirã weeró noho tohakã́ weesamí. Kɨ̃ɨ̂, Cristo niî pe'tirã bu'ipɨ ãyú butia'gɨ niîmi niisére ẽho peó dutitigɨ tohô weesamí. Jesu Cristo masɨ́ weeró noho ɨpɨtígɨ niîkɨ niîwĩ. Kɨ̃ɨ̂ Õ'âkɨ̃hɨ warota niîmi. Tohô weégɨ masaré Õ'âkɨ̃hɨre masikã́ weékɨ niîwĩ.

⁵ Ɨ̃sâ Jesu Cristo yee kitire werêrã, masá ɨ̃sâre ãyuró wãkû dutirã meheta werê'. “Marî wiôgɨ Jesu Cristo niîmi, kɨ̃ɨ̂reta ẽho peóro ɨá'” niî dutirã pe'e werê'. Ɨ̃sâ a'tîro niî': “Jesu Cristo ɨ̃sâre kɨ̃ɨ yeé kitire werê dutise bu'iri mɨsâre da'rá ko'terã weeró noho niî'.”

⁶ A'tîro niî'. Õ'âkɨ̃hɨ neê waropɨ a'ti nukúkã na'î tĩ'aro niî'kere bo'rê yuukã weékɨ niîwĩ. Kɨ̃ɨ̂ teeré weé'karo noho kɨ̃ɨ́ta taha mari yeé ehêri põ'raripɨ bo'rê yuukã weékɨ niîwĩ. Kɨ̃ɨ yeére tɨ'o masítimi'kãrãre tɨ'o masíkã weékɨ niîwĩ. Tohô niikã́ marîre Õ'âkɨ̃hɨ tutuâ yɨ'rɨagɨ niîmi niisére masikã́ weékɨ niîwĩ. Jesu Cristore masirã́ teeré masî no'o'. Marî ɨpɨ́ pe'ti dihátihi ɨpɨ niî' niisé niî'

⁷ Mari yaá ɨpɨ di'tâ me'ra yeê'ke paarɨ weeró noho niî'. Pe'tiátihi ɨpɨ niî'. Tohô ɨpɨtímirã, Õ'âkɨ̃hɨ yee kiti ãyú butia'se kitire kɨó'. Tohô weéro masî no'o'. Õ'âkɨ̃hɨ kɨ̃ɨ̂ tutuâ yɨ'rɨse me'ra tee kitíre masaré masikã́ weemí. Mari yeé tutuasé me'ra meheta weé'.

⁸ Apé tero pũûro pi'etí'. Tohô pi'etímirã, ɨpɨ́tɨ waro bɨhâ weti wee'. Ɨ̃sâ wãkû ke'timirã, ɨpɨ́tɨ waro “De'ró wa'â butia'rosari baa?” nií wee'.

⁹ Masá ɨ̃sâre yã'âro weé sĩ'rimikã, Õ'âkɨ̃hɨ ɨ̃sâre neê kõ'â wã'katimi. Naâ ɨ̃sâre tuu kehé kũumirã, wẽhetíma.

¹⁰ No'ó ɨ̃sâ wa'aró Jesuré wẽhé'karo nohota ɨ̃sá kẽ'rare wẽhé sĩ'rimima. Masá ɨ̃sâre pi'etíkã ĩ'yârã, Jesu katî nu'kugɨ ɨ̃sâre wee tamúsere masîma.

¹¹ Niî pe'tise nɨmɨri ɨ̃sâ katiró põo tẽóro Jesu yeé kitire weresé bu'iri wẽrîta wió niî'. Tohô weérã ɨ̃sa yaá ɨpɨ boâ dihatihi ɨpɨ me'ra Jesu Cristo kɨ̃ɨ̂ niisétisere masaré ĩ'yó'.

¹² Ɨ̃sâ pe'e wiosé pɨ'to niîmirã, mɨsâre katî nu'ku dutirã Jesu Cristo yee kitire bu'ê nu'ku'.

¹³ Õ'âkɨ̃hɨ yee kiti ohâka pũripɨ a'tîro ohâ no'okaro niîwɨ: “Yɨ'ɨ̂ ẽho peówɨ. Tohô weégɨ Õ'âkɨ̃hɨ yeekãhasere mɨsâre uúkũwɨ.” Tohôta niî' ɨ̃sá kẽ'rare. Õ'âkɨ̃hɨre ẽho peórã, kɨ̃ɨ yeére uúkũ'.

¹⁴ Marî masî', Õ'âkɨ̃hɨ, marî wiôgɨ Jesuré masó'karo nohota marí kẽ'rare masogɨ́sami. Marî kɨ̃ɨ̂re ẽho peókã, tohô weegɨ́sami. Ɨ̃sâre mɨsâ me'ra kɨ̃ɨ̂ tiropɨ miáagɨsami.

¹⁵ Ɨ̃sâ mɨsâre ãyuró wa'â dutirã niî pe'tisere pi'etí'. Mɨsâ pãharã́re siâpe me'ra Õ'âkɨ̃hɨ ãyuró weekã́ ɨárã, tohô weé'. Be'ró pãharã́ a'teré ĩ'yârã, Õ'âkɨ̃hɨre “Ãyú'” niîrãsama. Teé me'ra kɨ̃ɨ̂re “Ãyú yɨ'rɨagɨ niîmi” niîrã, tohô weerã́sama.

¹⁶ Tohô weérã ɨ̃sâ pi'etímirã, wãkû tutua nu'kukã'. Mu'yumírã, siâpe me'ra nemoró wãkû tutua nemo'.

¹⁷ A'tîro niî'. Marî a'ti nukúkãpɨ pi'etíse maatá pe'tiátehe niî'. Marî Jesu Cristore ẽho peórã pi'etí'ke wapa nemoró ãyusé pe'titiátehere bokarã́sa'.

¹⁸ Marî a'ti nukúkãkãhase pe'tiátehere wãkû nɨrɨtikã'ro ɨá'. Bahutíse ɨ'mɨ̂sekãhase pe'ere wãkû nɨrɨro ɨá'. Marî ĩ'yasé pe'tiátehe niî'. Ĩ'yâtise pe'e niî nu'kuatehe niî'.

5

¹ Marî masî', mari yaá ɨpɨ wi'í weeró noho boâ diharosa'. Tohô wa'akã́, Õ'âkɨ̃hɨ ɨ'mɨ̂sekãha ɨpɨ pe'titiátihi ɨpɨre o'ôgɨsami. Tii ɨpɨ́ masá weéka ɨpɨ niîtisa'.

² Diakɨ̃hɨ́ta niî'. Marî a'tîro ɨpɨtírã utî, kari butí'. Ma'ma ɨpɨ́ su'ti wetí sĩ'risa'.

³ Marî ma'ma ɨpɨ́re kɨórã, su'ti marírã weeró noho niîsome.

⁴ Marî a'ti ɨpɨ́ me'ra kari butí'. Pũûro pi'etí'. Mari yaá ɨpɨre wẽriáto niîgɨ meheta weé'. Marî ma'má su'tí sãyâro weeró noho dɨka yuuáto niîgɨ tohô niî'. Ma'ma ɨpɨ́ pe'titiátihi ɨpɨre kɨ'orã́sa'. Õ'âkɨ̃hɨ me'ra katî nu'kukã'rãsa'. Meha ɨpɨ́ boâ dihatihi ɨpɨ boâ bahu dutiá wa'ârosa'.

⁵ Õ'âkɨ̃hɨta marîre a'teré apo yuúkɨ niîwĩ. Kɨ̃ɨ̂ marîre weeátehere masî mɨ'ta dutigɨ Espírito Santore o'ôo' yuu mɨ'takɨ niîwĩ.

⁶ Teeré wãkûrã, wãkû tutua nu'ku'. Masî no'o', marî a'ti ɨpɨ́ me'ra niîrã, marî wiôgɨ Õ'âkɨ̃hɨ tiropɨ nií wee'.

⁷ Tohô weérã kɨ̃ɨ̂re ĩ'yâtimirã, Jesu Cristore ẽho peó'. Kɨ̃ɨ̂re siru tuú'. Be'ropɨ́ wa'aátehe kẽ'rare ãyuró masîtimirã, “Õ'âkɨ̃hɨ tiropɨ wa'ârãsa'”, niî'.

⁸ Marî, mari yeé niiátehere e'katí yuu toha'. Tohô weérã marî “Marî wiôgɨ me'ra niiáhã, wẽrisé ɨamísa'”, niî'.

⁹ Tohô niîmirã, marî katîrã ou wẽrîka be'ro marî wiôgɨ ɨaró di'akɨ̃ weé nu'ku sĩ'ri'.

¹⁰ A'tîro niî'. Cristo kɨ̃ɨ̂ beseátihi nɨmɨ niikã́, marî niî pe'tirãre besegɨ́sami. Marî ni'karérãre marî weé'ke nɨkɨ keoró marî ãyuró ou yã'âro weé'kere wapa yeégɨsami. Õ'âkɨ̃hɨ kɨ̃ɨ̂ me'ra niî dutigɨ ɨa sãáse niî'

¹¹ Marî wiôgɨ Cristo marîre beseátehere wãkû'. Teeré wãkûrã, kɨ̃ɨ̂re wio pesáse me'ra ẽho peó'. Masaré “A'tîro weeró ɨá'”, niî werê'. Õ'âkɨ̃hɨ ɨ̃sâ weesére ãyuró masîmi. Mɨsá kẽ'rare tohôta masikã́ ɨá'.

¹² Ɨ̃sâ basi ɨ̃sa yeére opâturi ãyuró uúkũ nemorã meheta wee'. A'tîro pe'e weé'. Ɨ̃sâre ãyuró wãkû dutirã, e'katiáto niîrã tohô weé'. Tohô weérã mɨsâ ãpêrã bu'îkãhase di'akɨ̃ bahusére wãkurã́re, ehêri põ'rapɨkãhase wãkûtirãre ãyuró yɨ'ti masírãsa'.

¹³ Ãpêrã ɨ̃sâre “Maatihírã weemá”, niîsama. Naâ tohô niîmikã, ɨ̃sâ Õ'âkɨ̃hɨ ɨaró weérã weé'. Apé terore “Keoró weemá”, niîsama. Teeré weérã, mɨsa yeékãhasere weérã weé'.

¹⁴ Cristo marîre ma'imí. Tohô weérã kɨ̃ɨ yeé kitire werê'. Marî masî', Cristo niî pe'tirãre wẽrî basakɨ niîwĩ. Teé me'ra masî no'o', niî pe'tirã Cristo wẽrî dɨka yuú no'o'kãrã wẽrî'kãrã weeró noho tohapã́.

¹⁵ Cristo niî pe'tirãre wẽrî basakɨ niîwĩ. Katisé kɨorã́ naâ ɨaró di'akɨ̃ weetíkã'ato niîgɨ tohô weékɨ niîwĩ. Kɨ̃ɨ̂ ɨaró pe'e wee dutígɨ wẽrî masákɨ niîwĩ.

¹⁶ Tohô weérã ɨ̃sâ neê ãpêrãre a'ti ɨmɨ́kohokãharã wee wɨáro weeró noho ĩ'yâ wee wee'. Yɨ'ɨ̂ too dɨpóropɨre Cristore tohô weemíwɨ. “A'tí di'takɨ̃hɨ niîmi”, niî wãkûmiwɨ. Ni'kâroakãre tohô wãkû no'oya marí' maha.

¹⁷ Marî Cristo yarã wa'ârã, apé su'tiro sãhárã weé'. Ãyusé di'akɨ̃ dɨka yuú'. Too dɨpóropɨ no'ó ɨaró weeséti'kere wee nemó wee' maha.

¹⁸ Õ'âkɨ̃hɨta marîre tohô weékɨ niîwĩ. Marî Cristore ĩ'yâ tu'tirã niîkãrã niîwɨ. Kɨ̃ɨ̂ pe'e kɨ̃ɨ̂ wẽrisé me'ra marîre kɨ̃ɨ̂ me'rakãharã sãhakã́ weékɨ niîwĩ. Niî pe'tirãre tohô wa'akã́ ɨágɨ, kɨ̃ɨ yeé kitire werê dutigɨ marîre o'ôo'kɨ niîwĩ.

¹⁹ A'tîro niî'. Õ'âkɨ̃hɨ niî pe'tirã a'ti nukúkãkãharãre kɨ̃ɨ̂ me'rakãharã sãhakã́ ɨamí. Tohô weégɨ Cristore wẽrî dutikɨ niîwĩ. Teé me'ra masaré kɨ̃ɨ yarã́ sãhakã́ weégɨ weemí. Jesu Cristo wẽrisé me'ra naâre bu'îri marirã́ ĩ'yâmi. Teeré ãpêrã masikã́ ɨágɨ ɨ̃sâre werê dutiwĩ.

²⁰ Tohô weérã ɨ̃sâ Cristo dɨka yuúrã niî'. Kɨ̃ɨ̂re, kɨ̃ɨ yeé kitire werê basa'. Ɨ̃sâ weresé me'ra Õ'âkɨ̃hɨ mɨsâre “Yɨ'ɨ̂ me'rakãharã niîma”, niîsami. Tohô weérã mɨsâre Cristo dutiró me'ra “Ãyuró Õ'âkɨ̃hɨ me'ra niiáto”, niî'.

²¹ Cristo neê kã'roákã yã'âro weetíkɨ niîwĩ. Õ'âkɨ̃hɨ pe'e marî yã'âro weesé bu'iri kɨ̃ɨ̂re wẽrî basa dutikɨ niîwĩ. Kɨ̃ɨ̂re yã'agɨ́re weeró noho bu'îri da'rêkɨ niîwĩ. Tohô weesé me'ra Õ'âkɨ̃hɨ marîre Cristo yarã wa'akã́ weékɨ niîwĩ. Tohô niikã́ kɨ̃ɨ̂ ɨaró kɨ̃ɨ̂ weeró noho ãyuró niî dutigɨ tohô weékɨ niîwĩ.

6

¹ Ɨ̃sâ Õ'âkɨ̃hɨ yeere da'ra tamúrã niî'. Tohô wee yuúrã, kɨ̃ɨ̂ mɨsâre ãyuró weesére wãkû duti'. Kɨ̃ɨ̂ ɨaró nohota ãyuró weeyá.

² Õ'âkɨ̃hɨ yee kiti ohâka pũripɨ kɨ̃ɨ̂ uúkũ'kere a'tîro niî ohâ no'okaro niîwɨ:

Yɨ'ɨ̂ masaré ãyuró weerí kura, mɨ'ɨ̂ sẽrisére tɨ'owɨ́. Yɨ'ɨ̂ yɨ'rɨóri kura kẽ'rare, mɨ'ɨ̂re yɨ'rɨówɨ, niîkɨ niîwĩ Õ'âkɨ̃hɨ. Tɨ'oyá. Ni'kâroakã kɨ̃ɨ̂ tohô weerí kura niî'. Ni'kâroakã kɨ̃ɨ̂ yɨ'rɨó sĩ'risami.

³ Ãpêrãre ɨ̃sâ weresére mehêkã wãkû dutitirã ɨ̃sâ neê kã'ró yã'âro weé wee'.

⁴ A'tîro pe'e weé'. Niî pe'tise ɨ̃sâ weesé me'ra Õ'âkɨ̃hɨre da'rá ko'tesere ĩ'yó'. Pi'etírã, tohô ĩ'yó'. Ɨ̃sâre apêye noho dɨ'sakã́, tohô tɨ'ó yã'akã'. Mehêkã wa'akã́, nɨ'ká'.

⁵ Ɨ̃sâ a'teré pi'etíwɨ. Masá ɨ̃sâre tãrawã́. Bu'îri da'rerí wi'ipɨ sõróowã. Kumûkã wa'akã́, tɨ'ó yã'awɨ. Ɨpɨ́tɨ da'rá, apé terore kãritíwɨ. Ɨhá boâwɨ.

⁶ Ɨ̃sâ Õ'âkɨ̃hɨre da'rá ko'tesere ĩ'yórã, a'té kẽ'rare weé'. “Numiâre yã'âro weé sĩ'risa'”, nií wee'. Naâre tohô ĩ'yâkã'. Õ'âkɨ̃hɨ yeekãhase diakɨ̃hɨ́ niisére masî'. Ãpêrã keoró weetísere nɨ'ká'. Ãpêrãre pahá yã'a'. Ãpêrãre wee soóro mariró ma'í me'rikã'. Espírito Santo ɨ̃sâ me'ra niî yuukã ɨ̃sâ Õ'âkɨ̃hɨre da'rá ko'tesere ĩ'yó no'o'.

⁷ Diakɨ̃hɨ́ta werê'. Õ'âkɨ̃hɨ kɨ̃ɨ̂ tutuasére kɨó'. Kɨ̃ɨ̂ ɨ̃sâre ãyurã́ wa'akã́ weemí. Tohô weérã ãyuró wee masí'. Yã'asé kẽ'rare ka'mú ta'a masi'.

⁸ Masá ɨ̃sâre a'tîro weemá. Ãpêrã ɨ̃sâre ãyuró uúkũma. Ãpêrã yã'âro uúkũma. Ãpêrã ɨ̃sâre niî soorãre weeró noho ĩ'yâma. Ãpêrã pe'e “Diakɨ̃hɨ́ta werêma”, niî ĩ'yâma.

⁹ Ãpêrã ɨ̃sâre ãyuró ĩ'yâ masima. Tohô niîmirã, ĩ'yâ masitirã weeró noho ĩ'yâma. Apé terore ɨ̃sâre wẽhé sĩ'rikã, tɨ'ó yã'a'. Tohô niîmikã, katî nu'ku'. Ɨ̃sâre bu'îri da'rê yɨ'rɨoma. Wẽhetíma, wẽherã́pɨa.

¹⁰ Ɨ̃sâ bɨhâ wetimirã, e'katí nu'kukã'. Ɨ̃sâ pahasé kɨorã niîmirã, ɨ̃sâ bu'esé me'ra ãpêrãre pehé kɨorã́ weeró noho niikã́ weé'. Neê apêye noho moomírã, kɨó pe'orã weeró noho niî'. A'té niî pe'tise me'ra niî pe'tirãre ɨ̃sâ Õ'âkɨ̃hɨre da'rá ko'tesere ĩ'yó'.

¹¹ Akawerérã, Corintokãharã, dɨ'aró mariró mɨsâre ɨ̃sâ wãkusére werê pe'okã'. Mɨsâre pũûro ma'í'.

¹² Mɨsâre neê mehêkã wãkú wee'. Mɨsâ pe'e ɨ̃sâre mehêkã tɨ'ó yã'asa'.

¹³ Yɨ'ɨ̂ ni'kɨ́ kɨ̃ɨ̂ põ'raré dutîro weeró noho mɨsâre dutîgɨti. Yɨ'ɨ̂ mɨsâre diakɨ̃hɨ́ ma'iró nohota yɨ'ɨ̂ kẽ'rare ma'iyá. Õ'âkɨ̃hɨ põ'ra niî' niisé niî'

¹⁴ Jesu Cristore ẽho peótirã me'ra a'mé sɨ'atikã'ya. Ãyusé, yã'asé me'ra moretá basiótiro nohota ãyuró weerã́, yã'âro weerã́ me'ra a'mé sɨ'ata basió wee'. Bo'rê yuuse na'î tĩ'aropɨ niîtiro nohota Jesu Cristore ɨarã́ me'ra, ɨatírã me'ra moré su'uta basió wee'.

¹⁵ Cristo kẽ'ra, wãtiâ wiôgɨ me'ra ni'kâro noho wãkusé kɨo masítima. Ẽho peógɨ, ẽho peótigɨ me'ra neê ni'kâro noho “Tohô weeró ɨá'”, niî masitisama.

¹⁶ Õ'âkɨ̃hɨ wi'i, tohô niikã́ ẽho peóse yeê'ke me'ra neê ni'kâro noho nií wee'. Mɨsâ pe'e Õ'âkɨ̃hɨ wi'i kɨ̃ɨ̂ niirópɨ weeró noho niî'. Kɨ̃ɨ̂ katî nu'kugɨ niîmi. Kɨ̃ɨ̂ a'tîro niîkɨ niîwĩ:

Yɨ'ɨ̂ naâ tiropɨ niî, naâ me'ra niî nu'kugɨsa'. Naâ wiôgɨ niîgɨsa'. Naá kẽ'ra yarã́ niîrãsama, niîkɨ niîwĩ.

¹⁷ Tohô weégɨ apêropɨ kẽ'rare marî wiôgɨ tutuâ yɨ'rɨgɨ a'tîro niî nemokɨ niîwĩ:

“Yã'arã́ tiropɨ niîmi'kãrã wihá wã'ka wa'âya. Niî pe'tise yã'âro weesére neê weetíkã'ya. Tohô weekã́, yɨ'ɨ̂ mɨsâre yẽ'êgɨti.

¹⁸ Yɨ'ɨ̂ mɨsâ pakɨ niîgɨti. Mɨsâ pe'e yɨ'ɨ̂ põ'ra niîrãsa'”, niîkɨ niîwĩ, niî ohâ no'okaro niîwɨ.

7

¹ Akawerérã yɨ'ɨ̂ ma'irã́, mɨsâre niîgɨti. Õ'âkɨ̃hɨ marîre “Mɨsâ pakɨ niîgɨsa'”, niîkɨ niîwĩ. Tohô weérã marî niî pe'tise yã'âro weesére, ɨpɨré dohórẽ'sere, ehêri põ'rare dohórẽ'sere kõ'ârã. Õ'âkɨ̃hɨre wio pesáse me'ra kɨ̃ɨ̂re ẽho peórã, kɨ̃ɨ̂ ɨaró niî pe'tisere keoró weerã́. Corintokãharã too dɨpóro yã'âro weé'kãrã naâ dɨka yuú'ke niî'

² Ɨ̃sâre ma'iyá. Neê ni'kɨré mɨsâre yã'âro weetíwɨ. Tohô niikã́ neê ãpêrãre dohórẽ'tiwɨ. Mɨsâre ẽho peó dutirã wee soótiwɨ.

³ Yɨ'ɨ̂ “Bu'îri kɨorã́ niîma”, niîgɨ meheta weé'. Yɨ'ɨ̂ too dɨpóro niî'karo nohota mɨsâre ma'í'. Marî katîrã, ni'kâro me'ra niî'. Wẽrîrã kẽ'ra ni'kâro me'ra niî nu'kurãsa'.

⁴ Yɨ'ɨ̂ mɨsâre diakɨ̃hɨ́ta weemá, ãyú yɨ'rɨama, niî ehêri põ'rati'. Mɨsâre wãkûgɨ, wãkû tutua'. Pũûro pi'etímigɨ, e'katí yɨ'rɨa'.

⁵ Macedôniapɨre ehâka be'ro ɨ̃sâ neê kã'ró sootíwɨ. No'ó ɨ̃sâ wa'aró pũûro pi'etí wã'kawɨ. Ãpêrã ɨ̃sâre yã'âro wee kehé nɨ'kowã. Ɨ̃sâ bu'ê'kãrãre wãkûgɨ, ɨpɨ́tɨ wãkû ke'tikãti.

⁶ Tohô weemíkã, Õ'âkɨ̃hɨ wãkû tutuasere o'ogɨ́ ɨ̃sâre wãkû tutuakã weewĩ́. Õ'âkɨ̃hɨ Titore ɨ̃sâ tiropɨ etakã́ weégɨ, ɨ̃sâre tohô weewĩ́.

⁷ Kɨ̃ɨ̂ etasé me'ra di'akɨ̃ wãkû tutuatiwɨ. Mɨsâ kɨ̃ɨ̂re wãkû tutuakã weé'kere tɨ'órã, nemoró wãkû tutua nemowɨ. Mɨsâ yɨ'ɨ̂re ĩ'yâ sĩ'risere kɨ̃ɨ̂ werêwĩ. Apêye kẽ'rare mɨsâ bɨhâ wetisere werêwĩ. Tohô niikã́ mɨsâ yɨ'ɨ̂re wãkû nu'kusere werêwĩ. Teeré tɨ'ógɨ, tootá nemoró e'katí nemowɨ.

⁸ Yɨ'ɨ̂ ohâka pũri me'ra mɨsâre bɨhâ wetikã weewɨ́. Tohô bɨhâ wetikã weemígɨ, yɨ'ɨ̂ ohakã́, ãyú niîwɨ. Neê waro yɨ'ɨ̂ ohâka be'ro mɨsâre kã'ró yoâtikã bɨhâ wetikã ĩ'yâgɨ, “Yɨ'ɨ̂ ohâtikã, ãyú niî boopã”, niî wãkûmiwɨ.

⁹ Ni'kâroakã maa yɨ'ɨ̂ e'katí'. Mɨsâ bɨhâ wetise bu'iri meheta niî'. Mɨsâ bɨhâ weti tĩharã, yã'âro weesére du'ú, dɨka yuúa wa'âpa'ro. Tohô weégɨ e'katí'. Mɨsâ yã'âro weé'ke bu'iri Õ'âkɨ̃hɨ ɨaró nohota bɨhâ wetiapa'ro. Tohô weérã “Ɨ̃sâ mɨsâre dohórẽ'rã meheta weepã́”, niî'.

¹⁰ Marî Õ'âkɨ̃hɨ ɨaró nohota bɨhâ wetirã, yã'âro weesére du'ú'. Du'ú, pekâ me'epɨ wa'â boo'kãrã yɨ'rɨó no'orãsa'. Tohô weérã ãyuró yɨ'rɨ wetí'. Ãpêrã pe'e naâ yã'âro weé'kere du'utírã, mehô waro bɨhâ weti ma'asama. Tohô bɨhâ wetirã bu'îri kɨorã́, pekâ me'epɨ wa'âsama.

¹¹ Mɨsâ Õ'âkɨ̃hɨ ɨaró noho bɨhâ wetirã, a'tîro weeápa'ro. Mɨsâ weesétisere wio pesáse me'ra ĩ'yâpa'ro. Tohô wio pesáse me'ra ĩ'yârã, “Too dɨpóropɨre keoró weetípã; ni'kâroakãre keoró weé' maha”, niiápa'ro. Mɨsâ weé'kere wãkûrã, bɨhâ wetiapa'ro. Tohô niikã́ teeré wãkûrã, uîa wa'âpa'ro. Be'ró yɨ'ɨ̂re pũûro ĩ'yâ sĩ'riapa'ro. Yã'âro weegɨ́re keoró bu'îri da'reápa'ro. Niî pe'tise tohô weesé me'ra mɨsâ bu'îri moosére ĩ'yoápa'ro.

¹² Tohô weégɨ mɨsâre ohâgɨ, yã'âro weegɨ́re wee tamú sĩ'rigɨ ohâtiwɨ. Yã'âro weé no'ogɨ kẽ'rare wee tamúgɨ ohâtiwɨ. Mɨsâ pe'ere wee tamú sĩ'rigɨ ohâwɨ. Mɨsâ ɨ̃sâ ɨaró noho ãyuró weé sĩ'ri'. Tohô weégɨ teeré masî dutigɨ ohâwɨ. Õ'âkɨ̃hɨ tohô masikã́ ɨamí.

¹³ Niî pe'tise mɨsâ ãyuró weé'ke me'ra ɨ̃sâ e'katí, wãkû tutuawɨ. Tohô wãkû tutuarã, Tito pũûro e'katíkã ĩ'yârã, tootá nemoró e'katí nemowɨ. Mɨsâ niî pe'tirãpɨta kɨ̃ɨ̂ bɨhâ weti'kere wãkû tutuakã weékãrã niîwɨ. Tohô weégɨ e'katíwĩ.

¹⁴ Mɨsa yeékãhasere yɨ'ɨ̂ Titore naâ ãyú yɨ'rɨama niîgɨ, niî soogɨ weeró noho niîtiwɨ. Niî pe'tise yɨ'ɨ̂ mɨsâre werê'kere diakɨ̃hɨ́ta werêwɨ. A'té weeró noho ɨ̃sâ Titore mɨsa yeékãhasere werê'ke kẽ'ra diakɨ̃hɨ́ta niîwɨ.

¹⁵ Mɨsâ kɨ̃ɨ̂re wio pesáse me'ra yẽ'êkãrã niîwɨ. Kɨ̃ɨ̂ dutisére yɨ'tíkãrã niîwɨ. Mɨsâ tohô weé'kere wãkûgɨ, mɨsâre nemoró ma'imí.

¹⁶ Yɨ'ɨ̂ mɨsâre ãyuró weerã́sama niîgɨ, pũûro e'katí'.

8

¹ Akawerérã, ɨ̃sâ a'tîro mɨsâre werê sĩ'risa'. Õ'âkɨ̃hɨ Jesu Cristore ẽho peórã Macedôniapɨ niirã́re ãyuró weewĩ́. Kɨ̃ɨ̂ ãpêrãre wee tamúkã weewĩ́. Teeré mɨsâre masikã́ ɨá'.

² A'tîro niî'. Naâ ɨpɨ́tɨ pi'etírã, keoró weékãrã niîwã. Tohô pi'etímirã, pũûro e'katíwã. Naâ pahasé kɨorã waro niîmirã, pehé kɨorã́ weeró noho ãpêrãre ãyuró wee tamúwã.

³ Naâ kɨoró põo tẽóro naâ kɨosére o'ôwã. Naâ kɨosé o'ô yɨ'rɨo mɨhawã. Yɨ'ɨ̂ naâ tohô weekã́ ĩ'yâwɨ. Naâ ɨaró o'ôwã.

⁴ Ɨ̃sâre pehetíri a'tîro niîwã: “Õ'âkɨ̃hɨ yarã pahasé kɨorãre niyéru o'ô sĩ'risa'”, niîwã.

⁵ Ɨ̃sâ wãkû'karo nemoró weewã́. Neê warore naâ Õ'âkɨ̃hɨre ẽho peórã “Mɨ'ɨ yarã́ niî'”, niîwã. Be'ró ɨ̃sâre “Mɨsâ dutisére weerã́ti Õ'âkɨ̃hɨ ɨaró nohota”, niîwã.

⁶ Naâ Macedôniakãharã tohô weekã́ ĩ'yârã, ɨ̃sâ Titore mɨsâ tiropɨ wa'â duti'. Kɨ̃ɨ̂ too dɨpóropɨ mɨsâ tiro Corintopɨ niîgɨ, niyérure sẽri neéokɨ niîwĩ. Teeré sẽrí tu'a eha nɨ'ko dutirã kɨ̃ɨ̂re o'ôo'rã weé'. Tohô weérã mɨsâ ãyuró nɨ'ká'kere keoró tu'â eha nɨ'korãsa'.

⁷ Mɨsâ niî pe'tisere ãyuró weé'. Ãyuró ẽho peóseti'. Õ'âkɨ̃hɨ yeekãhasere ãyuró masî'. Ãyuró bu'eséti'. E'katíse me'ra ãyuró weé sĩ'ri'. Ɨ̃sâre ãyuró ma'í'. Mɨsâ teé niî pe'tisere ãyuró weeró nohota niyéru o'osé kẽ'rare meharóta weeyá.

⁸ Mɨsâre dutî butia'gɨ meheta weé'. Tohô weetímigɨ mɨsâ ãpêrã weesére ĩ'yása'. Naâ ãyuró ma'imá. Mɨsá kẽ'ra naâ tohô weesére ĩ'yârã, “Ɨ̃sá kẽ'ra, diakɨ̃hɨ́ta ma'imíti ɨ̃sa?” niî dutigɨ tohô niî'.

⁹ A'tîro niî'. Mɨsâ masísa', marî wiôgɨ Jesu Cristo marîre ãyuró weékɨ niîwĩ. Kɨ̃ɨ̂ pehé kɨogɨ́ niîmigɨ, mari yeé niiátehere pahá yã'agɨ a'tí di'tapɨ a'tîgɨ, pahasé kɨogɨ weeró noho wa'âkɨ niîwĩ. Marîre ãyuró weé sĩ'rigɨ, tohô weékɨ niîwĩ.

¹⁰ Mɨsâ a'tîro weekã́, ãyú niî boosa' niîgɨ, yɨ'ɨ̂ wãkusére mɨsâre niîgɨti. A'tîro niî'. Siî kɨ'ma me'ra mɨsâ ape makákãharã dɨporo niyéru o'ô nɨ'kakãrã niîwɨ. Teeré o'ôrã, e'katíse me'ra o'ôkãrã niîwɨ.

¹¹ Tohô weérã mɨsâ neê waro weé wã'ko'karo nohota weé tu'ahaya. Mɨsâ kɨoró ehâ tu'aro o'ôya.

¹² A'tîro niî'. Marî diakɨ̃hɨ́ta marî kɨoró ehâ tu'aro o'ô sĩ'rikã, Õ'âkɨ̃hɨ e'katísami. Marî mookã́, o'ô dutitisami.

¹³ Mɨsâ ãpêrãre pehé kɨo dutírã o'ô yɨ'rɨo boosa'. Tohô weérã moorã́ toha boósa'. Tohô wa'akã́ ɨá wee'.

¹⁴ Ni'kâroakã mɨsâ kɨosé me'ra naâre wee tamú masi'. Ni'kâro noho kɨo dutígɨ tohô niî'. Be'ropɨ́ naá kẽ'ra naâ kɨosé me'ra mɨsâre wee tamúrãsama. A'tîro weérã, mɨsâ ni'kâro noho kɨorã́sa'.

¹⁵ Õ'âkɨ̃hɨ yee kiti ohâka pũripɨ ohâ'karo nohota niî'. A'tîro ohâ no'o': “Pehé kɨomí'kɨ kɨó yɨ'rɨosome. Ãpí pehête kɨogɨ́ kẽ'ra yẽ'e nohó dɨ'sá no'osome”, niî ohâ no'okaro niîwɨ. Tito kɨ̃ɨ̂ me'rakãharã me'ra Corintopɨ wa'aátehe niî'

¹⁶ Yɨ'ɨ̂ mɨsa yeékãhasere wãkû ke'ti'. Yɨ'ɨ̂ wãkû ke'tiro weeró noho Tito kẽ'rare Õ'âkɨ̃hɨ wãkû ke'tikã weékɨ niîwĩ. Tohô weégɨ Õ'âkɨ̃hɨre “Ãyú'” niî'.

¹⁷ Tito yɨ'ɨ̂ o'ôo'kã, maatá yɨ'tiwĩ́. Ni'kâroakãre kɨ̃ɨ̂ mɨsâre ĩ'yâ sĩ'ri'kɨ niî tĩhagɨ, kɨ̃ɨ̂ ãyuró tɨ'saró me'ra mɨsâ tiropɨ wa'âgɨsami.

¹⁸ Tito me'ra ãpí o'ôo' nemorãsa'. Kɨ̃ɨ̂ marî akawerégɨ Jesu Cristore ẽho peógɨ niîmi. Niî pe'tirã Jesu Cristore ẽho peóri kurakãharã kɨ̃ɨ̂re a'tîro uúkũma: “Kɨ̃ɨ̂ Jesu Cristo yee kitire werê me'ri yɨ'rɨami”, niîma.

¹⁹ Apêye kẽ'rare, Jesu Cristore ẽho peóse kurarikãharã ɨ̃sâre ba'pâti dutirã kɨ̃ɨ̂re besékãrã niîwã. Niyéru sẽri neéo'kere miáakã, kɨ̃ɨ̂ ɨ̃sâ me'ra ba'pâti wã'kagɨsami. Ɨ̃sâ niyérure miáarã, masá marî wiôgɨre ãyuró uúkũ dutirã tohô weé'. Tohô niikã́ ɨ̃sâ e'katíse me'ra wee tamú sĩ'risere ĩ'yórã tohô weé'.

²⁰ Ɨ̃sâ a'teré tohô weérã, masá ɨ̃sâre “Niyéru bahuriópã” niî dutitirã tohô weé'.

²¹ A'teré weérã, ɨ̃sâ marî wiôgɨ ĩ'yóropɨre keoró weé sĩ'ri'. Tohô niikã́ masá ĩ'yóropɨ kẽ'rare keoró weé sĩ'ri'.

²² Ãpí marî akawerégɨ kẽ'rare naâ me'ra o'ôo' nemo'. Kɨ̃ɨ̂ ɨpɨ́tɨ wee tamú sĩ'risere pehetíri ĩ'yowĩ́. Tootá nemoró ni'kâroakãre mɨsâre naâ keoró weeápa'rã niîgɨ, wee tamú sĩ'rimi.

²³ Titore ãpêrã sẽrí yã'akã, a'tîro niîya: “Paulo me'rakɨ̃hɨ kɨ̃ɨ̂ me'ra da'ragɨ́ ɨ̃sâre wee tamúgɨ niîmi”, niîya. Ãpêrã pɨárãre sẽrí yã'akã pe'e maa, a'tîro niîya: “Jesu Cristore ẽho peóri kurakãharã naâ o'ôo'kãrã niîma. Naâ, naâ weesé me'ra Cristore ãyuró uúkũkã weemá”, niîya.

²⁴ Ma'isé me'ra naâre yẽ'êya. Tohô weekã́, ãpêrã mɨsâ Tito kẽ'rare ma'isére masîrãsama. Ɨ̃sâ ãpêrãre a'tîro niî tohawɨ: “Corintokãharã masaré ãyuró yẽ'êma”, niîwɨ. Mɨsâ tohô weekã́ ĩ'yârã, naâ ɨ̃sâ niî'kere “Diakɨ̃hɨ́ta niîpã”, niîrãsama.

9

¹ Mɨsâ Jesu Cristore ẽho peórãre niyéru o'osére ohâ nemo wee'.

² Mɨsâ o'ô sĩ'risere masî toha'. Mɨsâ tohô weé sĩ'risere yɨ'ɨ̂ e'katíse me'ra Macedôniakãharãre werêwɨ. “Siî kɨ'ma me'ra Corintokãharã Acaia di'tapɨ niirã́ niyéru sẽri neéo nɨ'ka sĩ'riwã”, niîwɨ naâre. Teeré tɨ'órã, pãharã́ Macedôniakãharã kẽ'ra e'katíse me'ra niyéru neêo nɨ'kawã.

³ Mɨsâre “Niyéru o'ôrãsama” niîmigɨ, Titore kɨ̃ɨ̂ me'rakãharã me'ra mɨsâ tiropɨ o'ôo'gɨti. Yɨ'ɨ̂ Macedôniakãharãre niî'ke keoró wa'akã́ ɨá'. Yɨ'ɨ̂ “Corintokãharã niyéru neêo nɨ'ka tohawã” niî'karo nohota mɨsâ o'oátehere kɨo yuú tohaya.

⁴ Apé tero yɨ'ɨ̂ mɨsâ tiropɨ wa'akã́, Macedôniakãharã yɨ'ɨ̂ me'ra wa'â boosama. Ɨ̃sâ toopɨ́ ehakã́, mɨsâ neêo yuutikã, yɨ'ɨ̂ ɨpɨ́tɨ bopôya sãa boosa'. Yɨ'ɨ̂ “Naâ neêo nɨ'ka tohawã” niî'ke bu'iri tohô wee boósa'. Mɨsá kẽ'ra meharóta bopôya boosa'.

⁵ Tohô weégɨ yɨ'ɨ̂ a'tîro wãkû'. Yɨ'ɨ̂ mɨsâ tiropɨ wa'aátoho dɨporo Tito kẽ'rare wa'â duti'. Naâ mɨsâ “O'ôrãti” niî sẽri neéo'kere apo yuúrãsama. Naâ tohô weekã́, ɨ̃sâ ehaátoho dɨporo kɨo yuú toharãsa'. Tohô weérã mɨsâ ãyuró ehêri põ'ratise me'ra o'ôrãsa'. Tohô weetírã, ɨ̃sâ ehârãpɨ “O'oró ɨá'” niikã́ maa, mɨsâ niyéru o'ôrã ãpêrã dutiró weérã wee boósa'.

⁶ Mɨsâ a'teré wãkûya. Marî kã'roákã otekã́, marî otê'ke kã'roákã pĩ'rí dɨkâti'. Pehé otegɨ́ noho pehé pĩ'rí dɨkâti no'osami. Teé weeró noho marî pahasé kɨorãre pahiró o'okã́, Õ'âkɨ̃hɨ kẽ'ra marîre o'ô'karo ehâ tu'aro o'ôsami.

⁷ Marî nɨkɨ toô kã'ro o'ôgɨti niî tɨ'ó yã'aro o'oró ɨá'. Marî o'ô sĩ'ritirã, ou ãpêrã o'ô dutikã' weeró noho tɨ'ó yã'arã, o'ôtikã'ro ɨá'. Marî e'katíse me'ra o'okã́, Õ'âkɨ̃hɨ marîre ma'isamí.

⁸ Õ'âkɨ̃hɨ niî pe'tise ãyusé mɨsâre o'ô yɨ'rɨo o'ô masimi. Kɨ̃ɨ̂ tohô weekã́, mɨsâre dɨ'sasé nohore kɨó pe'orãsa'. Tohô niikã́ no'ó niisé ãpêrãre wee tamú nu'kurãsa'.

⁹ Õ'âkɨ̃hɨ yee kiti ohâka pũripɨ ohâ'karo nohota niî'. A'tîro ohâ no'okaro niîwɨ:

Ãyugɨ́ pahasé kɨorãre ãyuró o'ô mu'si o'ôsami. Tohô weéro kɨ̃ɨ̂ ãyuró weesé niî nu'kukã'rosa'.

¹⁰ Õ'âkɨ̃hɨ otesé kapere o'ômi. Tohô niikã́ ba'asé kẽ'rare o'ômi. Kɨ̃ɨ́ta niî pe'tise mɨsâ kɨoátehere o'ôgɨsami. Niî pe'tisere nemoró kɨokã́ weegɨ́sami. Tohô weérã mɨsâ ãpêrãre nemoró o'ô masirãsa'.

¹¹ Tohô weérã pehé kɨórã, ãpêrãre o'ô mu'si o'ôrãsa'. Ɨ̃sá kẽ'rare mɨsâ o'osére pahasé kɨorãre o'ôrãti. Mɨsâ tohô o'okã́ ĩ'yârã, marî akawerérã Õ'âkɨ̃hɨre “Ãyú'” niîrãsama.

¹² Mɨsâ Õ'âkɨ̃hɨ yarã pahasé kɨorãre o'ôrã, naâre wee tamúrã weé'. Naâre Õ'âkɨ̃hɨ kẽ'rare “Ãyú'” niikã́ weé'.

¹³ Mɨsâ sẽri neéosere o'ôrã, Cristore keoró ẽho peósere naâre ĩ'yó'. Mɨsâ kɨ̃ɨ̂ dutisére yɨ'tikã́ ĩ'yârã, Õ'âkɨ̃hɨre e'katí peorãsama. Mɨsâ pahiró o'osére ĩ'yârã, Õ'âkɨ̃hɨre ãyuró wãkûrãsama. Tohô niikã́ niî pe'tirãre o'osére ĩ'yârã, tohô weerã́sama.

¹⁴ Naâ pe'e kẽ'ra mɨsâre ma'írã, Õ'âkɨ̃hɨre sẽri basárãsama. Õ'âkɨ̃hɨ mɨsâre ãyuró weekã́ ĩ'yârã, tohô weerã́sama.

¹⁵ Õ'âkɨ̃hɨ marîre Jesu Cristore o'ôgɨ, ãyú butia'ro weégɨ weékɨ niîwĩ. Tohô weérã kɨ̃ɨ̂re “Ãyú'” niîrã.

10

¹ Yɨ'ɨ̂ Paulo mɨsâre apêye noho werêgɨti. Cristo tu'tiró mariró kɨ̃ɨ̂ ãyuró pahá yã'ase me'ra uúkũro nohota mɨsâre ohâ sĩ'risa'. Ãpêrã yɨ'ɨ̂re a'tîro niîsama: “Kɨ̃ɨ̂ marî tiropɨ tutuâtigɨ, pahasé kɨogɨ weeró noho uúkũ me'rikã'mi”, niîsama. “Yoarópɨ papéra o'ôo'gɨ pe'e, tutuaró me'ra ohâ o'omi”, niîsama.

² Yɨ'ɨ̂re mɨsâ tiropɨ wa'akã́, tutuaró me'ra uúkũkã weetíkã'ya. Ãpêrã “Kɨ̃ɨ̂ a'ti nukúkãkɨ̃hɨ weeró noho ãpêrã yɨ'rɨóro niî sĩ'rimi. Õ'âkɨ̃hɨ dutiró me'ra meheta uúkũmi”, niîsama. Yɨ'ɨ̂ tohô wãkurã́ nohore tutuaró me'ra uúkũ põo tẽó masi'.

³ Ɨ̃sâ a'ti nukúkãpɨ niî', niîrã pe'e. Tohô niîmirã, ɨ̃sâ a'ti nukúkãkãharã weeró noho weé wee'.

⁴ Surára a'mê wẽherã, naâre ĩ'yâ tu'tirãre dokâ ke'akã weesamá. Naâ weeró noho ɨ̃sá kẽ'ra yã'asére dokâ ke'akã weé sĩ'ri'. Tohô weé sĩ'rirã, a'ti nukúkãkãharã wamotíro weeró noho weé wee'. Ɨ̃sâ basi ɨ̃sâ tutuaró uúkũse me'ra, ɨ̃sâ me'risé me'ra yã'asére kõ'á wee'. Tohô weeró noho o'ôrã, ɨ̃sâ Õ'âkɨ̃hɨ tutuasé me'ra pe'e kɨ̃ɨ̂re ẽho peótirã naâ wãkusére kõ'â'. Naâ ãpêrã ẽho peó boo'kãrãre ka'mú ta'asere kõ'â'. Kɨ̃ɨ̂ tutuasé me'ra masá naâ masî yɨ'rɨa' niî tɨ'ó yã'asere wapa maríse tohakã́ weé'.

⁵ Kɨ̃ɨ̂ tutuasé me'ra ɨ̃sâ naâ “Nií wee'” niisére kõ'â'. Niî pe'tise Õ'âkɨ̃hɨre ẽho peótikã weesére kõ'â'. Niî pe'tirã Cristo ɨaró noho wãkû, kɨ̃ɨ̂re keoró ẽho peókã weé'. Naâre kɨ̃ɨ̂ dutiró weeáto niîrã tohô weé'.

⁶ Mɨsâ Jesu Cristo ɨaró ãyuró weé yɨ'rɨka be'ro ɨ̃sâ a'tîro wee masí'. Mɨsâ keoró weetíkã, yɨ'rɨ́ nɨ'karãre bu'îri da'rê masi'.

⁷ Mɨsâ bu'îkãhase di'akɨ̃re ĩ'yâ'. No'ó “Jesu Cristo yagɨ niî'” niigɨ́ noho a'tîro masiró ɨá'. Kɨ̃ɨ̂ uúkũro nohota ɨ̃sá kẽ'rare “Cristo yarã niîma”, niiró ɨá'.

⁸ Marî wiôgɨ ɨ̃sâre a'tîro wee dutíwĩ. Mɨsâre “Ãyuró ẽho peókã weeyá”, niîwĩ. Mɨsâ ẽho peósere dohórẽ' dutitiwĩ. Teeré ɨpɨ́tɨ uúkũ nu'ku sĩ'rimigɨ, yɨ'ɨ̂ uúkũsere bopôya wee'.

⁹ Yɨ'ɨ̂ ohâ wɨase pũri me'ra mɨsâre tɨ'ó ɨkɨá dutigɨ meheta ohâ'.

¹⁰ Ãpêrã yɨ'ɨ̂re a'tîro niîsama: “Kɨ̃ɨ̂ ohasé tutuâ butia'. Kɨ̃ɨ̂ bahû yoaropɨ maa tutuâ tɨ'satigɨ bahumími. Kɨ̃ɨ̂ uúkũse kẽ'rare tɨ'sâya marí'”, niîsama.

¹¹ Yɨ'ɨ̂re tohô niirã́ noho a'tîro masiró ɨá': “Kɨ̃ɨ̂ yoarópɨ niîgɨ ohâ'karo nohota marî tiropɨ niîgɨ kẽ'ra, meharóta tutuaró uúkũgɨsami”, niiró ɨá'.

¹² Yɨ'ɨ̂ ãpêrã naâ basi ãyuró uúkũrã weeró noho niî sĩ'ritisa'. A'teré neê kã'ró uúkũ ma'a sĩ'ritisa'. Naâ tɨ'o masítima. Naâ ɨaró a'tîro niîsama: “Marî weeró noho weerã́ ãyurã́ niîma”, niîsama. Niî pe'tirãre ĩ'yâ besesama.

¹³ Yɨ'ɨ̂ ãpêrã yee da'rasére “Weeápɨ”, nií wee'. Õ'âkɨ̃hɨ yɨ'ɨ̂re werê dutigɨ kũû'karo ehâ tu'aro werê me'rikã'. Kɨ̃ɨ́ta yɨ'ɨ̂re mɨsâ tiropɨ bu'êgɨ wa'â dutiwĩ.

¹⁴ Tohô niîgɨ, niî soogɨ meheta weé'. Mɨsâ tiropɨ ehâgɨ, Õ'âkɨ̃hɨ yɨ'ɨ̂re kũû'kere weewɨ́. Yɨ'ɨ́ta mɨsâre ãyusé Cristo masaré yɨ'rɨómi niisé kitire werê mɨ'tawɨ. Tohô weégɨ yɨ'ɨ̂ weé'kere keoró uúkũ'.

¹⁵ Yɨ'ɨ̂ Õ'âkɨ̃hɨ kũû'ke nemoró da'rá wee'. Tohô weégɨ ãpêrã naâ da'rasére “Yɨ'ɨ̂ da'rasé niî'”, nií wee'. Tohô niîro noho o'ôgɨ, yɨ'ɨ̂ da'rá'kepɨre da'rá sĩ'rigɨ, mɨsâ tiro pe'e nemoró da'rá sĩ'ri'. Mɨsâ ẽho peókã ĩ'yâgɨ, mɨsâre nemoró bu'ê masi'.

¹⁶ Mɨsâ nemoró ẽho peóka be'ro mɨsâ yɨ'rɨró niisé makaripɨ Jesu Cristo yee kitire werê se'sagɨti. Kɨ̃ɨ yeé kitire werêya marisé makaripɨ wa'â sĩ'risa'. Ãpêrã naâ da'rá'kepɨre “Yɨ'ɨ̂ da'rasé niî'” niî sĩ'ritigɨ, tohô weé sĩ'risa'.

¹⁷ Õ'âkɨ̃hɨ yee kiti ohâka pũripɨ a'tîro ohâ no'okaro niîwɨ: “Ni'kɨ́ ‘Ãpêrã yɨ'rɨóro niî yɨ'rɨ nɨ'ka'’ niî sĩ'rigɨ, niîtikã'ato. Tohô wãkuró noho o'ôgɨ, marî wiôgɨ pe'ere ‘Tutuâ yɨ'rɨgɨ niîmi, marîre ãyú butia'ro weékɨ niîwĩ’, niiáto.”

¹⁸ Ni'kɨ́ kɨ̃ɨ̂ basi uúkũgɨ, “Yɨ'ɨ̂ ãyuró weé'” niigɨ́ nohore “Kɨ̃ɨ̂ ãyugɨ́ niîmi”, niîta basió wee'. Jesu Cristo marî wiôgɨ “Ãyugɨ́ niîmi” niî no'ogɨ pe'e ãyugɨ́ niîmi.

11

¹ Ni'kâroakã yɨ'ɨ̂ no'ó uúkũ ma'agɨ weeró noho ohâgɨti. No'ó mɨsâ põo tẽóta basiókã põo tẽóya. Mɨsâ tohô weekã́ ɨá'.

² Õ'âkɨ̃hɨ kɨ̃ɨ yarã́re ãpêrã nohore ẽho peókã, doésami. Kɨ̃ɨ̂ doéro weeró noho yɨ'ɨ̂ mɨsâre doé'. Yɨ'ɨ̂ Cristo yeere werekã́, mɨsâ tɨ'órã, ẽho peówɨ. Mɨsâ ni'kó numiô marâpɨtiakoho weeró noho niî'. Cristo mɨsâ marapɨ́ niiákɨhɨ weeró noho niîmi. Tohô weégɨ mɨsâ kɨ̃ɨ̂ ĩ'yóropɨre yã'asé marirã́ niikã́ ɨá'.

³ Tohô ɨamígɨ, mɨsâre a'tîro wa'akã́ uísa'. Pĩrô kɨ̃ɨ̂ niî kehe sãase me'ra Evare niî soo ẽho peókã weékɨ niîwĩ. Mɨsá kẽ'ra koô weeró noho ãpêrã niî soosere ẽho peó boosa'. Mɨsâ Cristore keoró ẽho peómi'kere du'u boósa'. Tohô weégɨ uísa'.

⁴ Mɨsâ a'tîro weé'. Ãpêrã mɨsâre mehêkã werekã́, ãyuró tɨ'ó tɨ'sa'. Ɨ̃sâ Jesu yeére werêwɨ. Naâ pe'e tee mehéreta werêma. Mɨsâ neê waropɨre Espírito Santore yẽ'êwɨ. Ni'kâroakãre Espírito Santo mehereta yẽ'êrã weé'. Naâ Õ'âkɨ̃hɨ masaré yɨ'rɨóse mehereta werekã́, ãyuró tɨ'ó ẽho peó'.

⁵ Naâ mɨsâre bu'êrã Jesu Cristo bese kũú'kãrã nemoró tɨ'ó yã'asama. Yɨ'ɨ̂ pe'e naâ doka tɨ'ó yã'a wee'.

⁶ Yɨ'ɨ̂ uúkũse ɨ'sɨá wee', ɨ'sɨâro pe'e. Tohô niîmikã, Õ'âkɨ̃hɨ yeekãhasere ãyuró masî'. Yɨ'ɨ̂ tohô masisére niî pe'tise yɨ'ɨ̂ weesétise me'ra ĩ'yó'.

⁷ Neê waro yɨ'ɨ̂ Õ'âkɨ̃hɨ masaré yɨ'rɨóse kitire mɨsâre werêgɨ, wapa seétiwɨ. Mɨsâ de'ró wãkûti? Apé tero weégɨ mɨsâre wapa seétigɨ, yã'âro weégɨ weeparí? Yɨ'ɨ̂ da'rá wapá ta'a ba'awɨ. Mɨsâre ãyuró weé sĩ'rigɨ, tohô weewɨ́.

⁸ Yɨ'ɨ̂ mɨsâ tiropɨ niirí kurare ãpêrã Jesu Cristore ẽho peóse kurarikãharã yɨ'ɨ̂re niyéru o'ôo'wã. Yɨ'ɨ̂ teeré yẽ'ê, mɨsâre wee tamú sĩ'rigɨ, naa yeé niyérure e'mâ dɨogɨ weeró noho tɨ'ó yã'awɨ.

⁹ Yɨ'ɨ̂ mɨsâ me'ra niîgɨ, apêye noho dɨ'sakã́ ĩ'yâgɨ, neê ni'kɨré kari boótiwɨ. Marî akawerérã Macedôniakãharã yɨ'ɨ̂re dɨ'sasé nohore o'ôwã. Tohô weégɨ kari boótiwɨ. A'tîrota weé yapatígɨti.

¹⁰ Yɨ'ɨ̂ diakɨ̃hɨ́ niisé Jesu Cristo yee kitire masî'. Diakɨ̃hɨ́ta niî'. Teé diakɨ̃hɨ́ niiró nohota yɨ'ɨ̂ bu'esé wapa neê niyéru sẽrisomé. Neê ni'kɨ́ Acaia di'takɨ̃hɨ “Kɨ̃ɨ̂ wapa seémi”, niî masitisami.

¹¹ Yɨ'ɨ̂ mɨsâre ma'isé bu'iri tohô uúkũ'. Yɨ'ɨ̂ mɨsâre ma'í yɨ'rɨsere Õ'âkɨ̃hɨ masîsami.

¹² Yɨ'ɨ̂ wee wɨáro noho weé nu'kugɨti. Ãpêrã pe'e yɨ'ɨ̂ weeró noho weérã weé', niîsama. Naâ bu'esé wapare wapa seésama. Yɨ'ɨ̂ pe'e wapa seé wee'. Tohô weérã naâ “Kɨ̃ɨ̂ weeró noho weé'”, niî masitisama.

¹³ A'tîro niî'. Naâ “Cristo kɨ̃ɨ̂ bese kũú'kãrã niî'” niîrã, tohô niî ma'akãrã weemá. Naâ weé ta'sarã niîma. Bu'î di'akɨ̃ Jesu Cristo kɨ̃ɨ̂ bese kũú'kãrã weeró noho bahumá.

¹⁴ Tohô weesé diâsatisa'. Wãtiâ wiôgɨ kẽ'ra tohôta wee masísami. Apé tero kɨ̃ɨ̂ ɨ'mɨ̂sekɨ̃hɨ Õ'âkɨ̃hɨre werê ko'tegɨ weeró noho bahugɨ́ dohosamí.

¹⁵ Tohô weérã kɨ̃ɨ̂re da'rá ko'terã kẽ'ra kɨ̃ɨ̂ weeró noho weesamá. Naâ ãyurã́ weeró noho wee soósama. Naâ pũrikã naâ weé'karo nohota bu'îri da'rê no'orã, pekâ me'epɨ yapatí diharãsama. Paulo Jesu Cristo bese kũú'kɨ kɨ̃ɨ̂ pi'etí'ke niî'

¹⁶ Yɨ'ɨ̂ a'te dɨpóro ohâ'karo nohota mɨsâre ohâ nemogɨti. “Kɨ̃ɨ̂ basi ãyuró uúkũgɨ, maatihígɨ weemí”, niîtikã'ya. Mɨsâ tohô wãkûrã pũrikã, “Kɨ̃ɨ̂ maatihígɨ weeró noho uúkũato”, niîya. Tohô weégɨ kã'roákã yɨ'ɨ̂ basi ãyuró uúkũgɨsa'.

¹⁷ Yɨ'ɨ̂ tohô uúkũgɨ, marî wiôgɨ dutî'karo meheta uúkũgɨ weé'. Yɨ'ɨ̂ basi ãyuró uúkũ me'rigɨ, maatihígɨ weeró noho bɨsɨ̂'.

¹⁸ Pãharã́ no'ó ɨaró naâ basi ãyuró uúkũma. Naâ tohô wee yuúkã, yɨ'ɨ́ kẽ'ra yɨ'ɨ̂ weesére ãyuró uúkũgɨti.

¹⁹ Mɨsâ masî yɨ'rɨarã niî tĩharã, maatihírã weeró noho naâ weesére ãyuró põo tẽó'.

²⁰ Mɨsâ a'tîro weé'. Ãpêrã mɨsâre dutîpekã, põo tẽósa'. No'ó mɨsa yeére mii wapákã, põo tẽósa'. No'ó tohô weetírã, mɨsâre mehô niirã́ weekã́, põo tẽósa'. Tɨ'o masítirãre weeró noho ĩ'yakã́, põo tẽósa'. No'ó mɨsâre diâpoapɨ paakã́ kẽ'rare, põo tẽókã'sa'. Tohô weesé niî pe'tisere põo tẽó pe'okã'sa'.

²¹ Naâ mɨsâre tohô weérã, yã'â butia'ro weérã weemá. Ɨ̃sâ pũrikã mɨsâre tee nohóre neê wee masíti boosa'. Ãpêrã naâ weesére ãyuró uúkũkã, yɨ'ɨ́ kẽ'ra naâ weeró noho uúkũ ma'a siru tuúgɨti. Maatihígɨ weeró noho weé'.

²² Naâ “Hebreu masa niî'”, niîsama. Yɨ'ɨ́ kẽ'ra kɨ̃ɨ́ta niî'. Naâ Israel kurakãharã niîma. Yɨ'ɨ́ kẽ'ra kɨ̃ɨ́ta niî'. Naâ Abraão paramérã niî turiarã niîma. Yɨ'ɨ́ kẽ'ra kɨ̃ɨ́ta niî'.

²³ Naâ “Cristore da'rá ko'terã niî'”, niîma. Yɨ'ɨ̂ pũrikã naâ nemoró kɨ̃ɨ̂re da'rá ko'tegɨ niî'. Yɨ'ɨ̂ tohô niîgɨ, uúkũ ma'agɨ weeró noho bɨsɨ̂'. A'tîro niî'. Yɨ'ɨ̂ naâ nemoró da'rá yɨ'rɨ nɨ'kawɨ. Yɨ'ɨ̂re naâ nemoró tãrawã́. Naâ nemoró bu'îri da'rerí wi'ipɨ pehetíri sõróo no'owɨ. Pehetíri Jesu Cristore ẽho peótirã yɨ'ɨ̂re wẽhé sĩ'rikã, wiosé pɨ'to niîwɨ.

²⁴ Ni'kâmukãsetiri Judeu masa yɨ'ɨ̂re wekɨ̂ kaseri daari me'ra tãrawã́. Tee nɨkɨ́ trinta e novetiri tãrawã́.

²⁵ I'tiáti yukɨpagɨ́ me'ra yɨ'ɨ̂re paâwã. Ni'kâti ɨ̃tâ peeri me'ra yɨ'ɨ̂re dokewã́. I'tiáti ɨ̃sâ siharí kura yukɨ̂sɨho mirî dihawɨ. Ni'kâti mirî dihaka terore ni'kâ yami, ni'kâ nɨmɨ tii maáhopɨre pa'sâ bo'reawɨ.

²⁶ Yɨ'ɨ̂ pehetíri sihâwɨ. Mirîta wioro sihâwɨ. Wioró, yaharã́ tiropɨ sihâwɨ. Yɨ'ɨ̂ akawerérã Judeu masa tiropɨ, Judeu masa niîtirã tiropɨ wiosé wa'tero sihâwɨ. Tohô niikã́ makâpɨre, masá marirópɨre, diâ pahirí maahopɨre wiosé wa'tero sihâwɨ. “Jesu Cristore ẽho peórã niî'” niî soorã wa'teropɨ kẽ'rare wiosé wa'tero sihâwɨ.

²⁷ Yɨ'ɨ̂ da'rágɨ, pi'etíwɨ. Pehetíri kãrití mɨhawɨ. Ɨhá boâwɨ. Ako wɨówɨ. Apé terore ba'âti yɨ'rɨo mɨhawɨ. Yɨsɨá bɨ'awɨ. Apé terore su'tí moowɨ́.

²⁸ Apêye maa, a'tîro tɨ'ó yã'a'. Ɨmɨ̂kohori nɨkɨ yɨ'ɨ̂ Jesu Cristore ẽho peóse kurarikãharã niî pe'tiropɨ niirã́re wãkû ke'ti'.

²⁹ No'ó tutuâtigɨ noho niikã́, yɨ'ɨ́ kẽ'ra kɨ̃ɨ̂ tutuâtisere tɨ'ó yã'a tamu'. Ni'kɨ́ Jesu Cristore ẽho peógɨre ãpêrã yã'âro wee dutíkã, kɨ̃ɨ̂ yã'âro weekã́, yɨ'ɨ̂ bopôya sãa'. Kɨ̃ɨ̂re yã'âro weekã́ weerã́ me'ra uâ'.

³⁰ Yɨ'ɨ̂ pe'e “Ãpêrã yɨ'rɨóro niî'” niiró noho o'ôgɨ, yɨ'ɨ̂re wa'â'ke me'ra tutuâtigɨ niî' niisére ĩ'yogɨ́ti.

³¹ Õ'âkɨ̃hɨ, marî wiôgɨ Jesu Cristo pakɨ yɨ'ɨ̂ uúkũsere “Diakɨ̃hɨ́ta niî'”, niî masisami. Kɨ̃ɨ̂reta “Ãyugɨ́ niîmi”, niî nu'kuro ɨá'.

³² Yɨ'ɨ̂ Damascopɨ niikã́, a'tîro wa'âwɨ. Tií di'ta wiôgɨ waro Areta wamêtigɨ dokakɨ̃hɨ a'tîro weékɨ niîwĩ. Yɨ'ɨ̂re yẽ'ê sĩ'rigɨ, tii maká sumútoho naâ yeêka sã'riro wiháase soperipɨre surárare kũûkɨ niîwĩ.

³³ Yɨ'ɨ̂ me'rakãharã pe'e yɨ'ɨ̂re a'tîro weewã́. Pi'î me'ra tií sã'riro ɨ'mɨáropɨ niirí sopeakãpɨ o'ô yɨ'rɨo dihowã. Tohô weégɨ yɨ'ɨ̂ naâre yẽ'otíwɨ.

12

¹ Marî basi ãyuró uúkũkã, wapa marí'. Tohô niîmigɨ, uúkũgɨti. Marî wiôgɨ kẽ'esé weeró noho yɨ'ɨ̂re ĩ'yó'kere werêgɨti.

² Jesu Cristore ẽho peóka be'ro a'tîro wa'âwɨ. Kẽ'esé weeró noho Õ'âkɨ̃hɨ yɨ'ɨ̂re kɨ̃ɨ̂ tiropɨ mii mɨháwĩ. Teeré yɨ'ɨ̂ ĩ'yâka be'ro catorze kɨ'mari yɨ'rɨ́'. Yɨ'ɨ̂ ɨpɨ́ me'ra ou yɨ'ɨ̂ ehêri põ'ra di'akɨ̃ wa'âgɨ, wa'âpã. Masîtisa'. Õ'âkɨ̃hɨ di'akɨ̃ masîsami.

⁴

³ A'teré masî'. Õ'âkɨ̃hɨ ɨ'mɨ̂se Paraíso wamêtiropɨ yɨ'ɨ̂re mii eháwĩ. Ɨpɨ́ me'ra ou ehêri põ'ra di'akɨ̃ miáagɨ, miáapĩ. Masîtisa'. Õ'âkɨ̃hɨ ni'kɨtá teeré masîsami. Yɨ'ɨ̂ toopɨ́ niîgɨ, masá masîtisere tɨ'owɨ́. Kɨ̃ɨ̂ werê'ke masaré werê dutise meheta niîwɨ.

⁵ A'tîro wa'agɨ́ noho pũrikãre “Ãpêrã yɨ'rɨóro niîmi”, niiró ɨá'. Yɨ'ɨ̂ basi “A'tîro niigɨ́ noho niî'”, niî masitisa'. Yɨ'ɨ̂ tutuâtise di'akɨ̃re ãyuró uúkũgɨti.

⁶ Tohô niîmigɨ, yɨ'ɨ̂ basi ãyuró uúkũgɨ, tohô uúkũ ma'agɨ meheta wee boósa'. Diakɨ̃hɨ́ta uúkũ boosa'. A'tîro niî'. Mɨsâ yɨ'ɨ̂re ẽho peó boosa'. Tohô weerí niîgɨ, yɨ'ɨ̂ ãpêrã yɨ'rɨóro niî' niîsome. Yɨ'ɨ̂ weetísepɨreta, yɨ'ɨ̂ werêtisepɨreta yɨ'rɨókã' boosa'.

⁷ Õ'âkɨ̃hɨ yɨ'ɨ̂re ĩ'yó'ke ãyú butia'se niîwɨ. Yɨ'ɨ̂ teeré wãkûgɨ, yɨ'ɨ̂ basi “Ãyú yɨ'rɨagɨ niî'”, niîta wió niî'. Tohô weégɨ Õ'âkɨ̃hɨ yɨ'ɨ̂re tohô wãkûri niîgɨ, a'tîro weewĩ́. Wãtî yɨ'ɨ̂ ɨpɨré dutí da'rekã, tohô ĩ'yâkã'kɨ niîwĩ. Tee dutí yɨ'ɨ̂re potâa bu'bêro weeró noho pũrî'.

⁸ I'tiáti yɨ'ɨ̂ marî wiôgɨre “Tee pũríse pe'tiáto”, sẽrimíwɨ.

⁹ Kɨ̃ɨ̂ pe'e yɨ'ɨ̂re a'tîro niîwĩ: “Yɨ'ɨ̂ mɨ'ɨ̂re ma'í'. Tohô weéro mɨ'ɨ̂re apêye noho dɨ'sá wee'. Masá tutuâtirã niikã́, yɨ'ɨ̂ tutuasére nemoró ĩ'yotá basió'”, niîwĩ marî wiôgɨ. Tohô weégɨ yɨ'ɨ̂ tutuâtigɨ, e'katí'. Tohô tutuâtigɨ, Cristo tutuasé yɨ'ɨ̂pɨre niiáto niîgɨ tohô weé'.

¹⁰ Yɨ'ɨ̂re yã'âro uúkũsere, yɨ'ɨ̂re apêye noho dɨ'sasére e'katí'. Tohô niikã́ ẽho peóse bu'iri yã'âro weesére, mehêkã wa'asére e'katí'. A'tîro niî'. Tutuâtiro noho o'ôgɨ, nemoró tutuagɨ́ wa'â'. Corintokãharã ẽho peóri kurakãharãre Paulo wãkû nɨrɨ'ke niî'

¹¹ Yɨ'ɨ̂, yɨ'ɨ̂ basi ãyuró uúkũgɨ, maatihígɨ weeró noho weé'. Mɨsâ pe'eta yɨ'ɨ̂re tohô uúkũ dutirã weeró noho weé'. Mɨsâ yɨ'ɨ̂re ãyuró uúkũkã, ãyú niî boopã. Ãpêrã mɨsâre niî soose me'ra ẽho peókã weerã́ doka nií wee'. Naâ a'tîro niîsama: “Ɨ̃sâ Jesu Cristo bese kũú'kãrã nemoró niî'”, niîsama. Yɨ'ɨ̂ mehô niigɨ́ niîmigɨ, tohô bɨsɨ̂ siharã dɨharó nií wee'.

¹² Yɨ'ɨ̂ mɨsâ tiropɨ pi'etímigɨ, wãkû tutua tĩhagɨ, pehé Õ'âkɨ̃hɨ tutuaró me'ra weé ĩ'yowɨ. Teé me'ra diakɨ̃hɨ́ta yɨ'ɨ̂re Jesu Cristo bese kũú'kere ĩ'yowɨ́.

¹³ Mɨsâ Corintokãharãre ãpêrã Jesu Cristore ẽho peóse kurarikãharã doka ẽhó nɨ'kotiwɨ. A'té di'akɨ̃re weetíkãti. Mɨsâre wapa seétiwɨ. Mɨsâ tɨ'ó yã'akã, yɨ'ɨ̂ tohô weesé yã'â niîti? Yã'akã́ maa, akobohóya.

¹⁴ Yɨ'ɨ̂ mɨsâ tiropɨ wa'aátehere apo yuúgɨ weé'. Ni'kâroakã yɨ'ɨ̂ wa'asé me'ra i'tiáti wa'ârosa'. Mɨsâre “Wee tamúya”, niî kari boósome. Mɨsâ kɨosére e'mâsome. A'té di'akɨ̃re ɨá'. Mɨsâ Cristo dutî'kere ãyuró weekã́ ɨá'. A'tîro niî'. Pakɨ sɨmɨá naâ põ'raré naâ ɨasére o'ôsama. Naâ põ'ra mehéta naâ pakɨ sɨmɨáre naâ ɨasére o'ôsama. A'tîro weérã, mɨsâ yɨ'ɨ̂ põ'ra weeró noho niî'. Tohô weérã yɨ'ɨ̂re yɨ'ɨ̂ ɨasére o'ó wee'.

¹⁵ Yɨ'ɨ̂ kɨosé ehâ tu'aro mɨsâre wee tamúgɨti. Niî pe'tiro yɨ'ɨ̂ weé põo tẽóta basióro mɨsâre ãyuró wa'aáto niîgɨ tohô wee tamúgɨti. A'tîro tɨ'ó yã'a'. Yɨ'ɨ̂ mɨsâre nemoró ma'ikã́, mɨsâ pe'e yɨ'ɨ̂re dɨharó ma'i boósa'.

¹⁶ Ãpêrã yɨ'ɨ̂ kari boótisere masîmirã, a'tîro niîsama: “Kɨ̃ɨ̂ me'risé me'ra mɨsâre ẽho peókã weékɨ niîwĩ”, niîsama.

¹⁷ Yɨ'ɨ̂ o'ôo'kãrã mɨsâre niî soo, mɨsa yeére e'mâri? Neê apêye noho e'mâtikãrã niîwã.

¹⁸ Yɨ'ɨ̂ Titore mɨsâ tiropɨ wa'â dutiwɨ. Tohô niikã́ ãpí Jesu Cristore ẽho peógɨ marî akawerégɨre kɨ̃ɨ̂ me'ra o'ôo'wɨ. Toopɨ́re Tito niî soose me'ra mɨsa yeére e'mâri? Mɨsâ masísa'. Tito yɨ'ɨ̂ weeró noho weemí. Mɨsâre bu'êgɨ, ãyusé di'akɨ̃re weé sĩ'rikɨ niîwĩ. Neê wapa seétikɨ niîwĩ.

¹⁹ Apé tero weérã mɨsâ ɨ̃sâre “Ãyuró wãkû dutirã weemá”, niísa'. Tohô nií wee'. A'tîro pe'e niî'. Ɨ̃sâ Õ'âkɨ̃hɨ ĩ'yóropɨre Cristo dutiró me'ra uúkũ'. Yɨ'ɨ̂ ma'irã́ yɨ'ɨ̂ akawerérã, mɨsâre Õ'âkɨ̃hɨre nemoró ẽho peó nemo dutigɨ tohô weé'.

²⁰ Yɨ'ɨ̂ uísa'. Apé tero weérã yɨ'ɨ̂ mɨsâ tiropɨ wa'akã́, “Yɨ'ɨ̂ ɨaró noho meheta weérã wee boósama”, niísa'. Mɨsá kẽ'ra yɨ'ɨ̂re meharóta niî boosa'. Apêye kẽ'rare yɨ'ɨ̂ mɨsâre “A'tîro weérã wee boósama”, niísa'. “A'mé tu'tirã wee boósama. Ɨórã wee boósama. Uârã wee boósama. Naa yeé di'akɨ̃re wãkûrã wee boósama. Ãpêrãre uukahá, yã'âro uúkũrã wee boósama. Tohô niikã́ ‘Ɨ̃sâ ãpêrã yɨ'rɨóro ãyú yɨ'rɨ nɨ'ka'’, niîrã wee boósama. No'ó ɨaró weé ma'akãrã wee boósama”, niísa'.

²¹ Yɨ'ɨ̂ uísa'. Mɨsâ tiropɨ opâturi wa'akã́, Õ'âkɨ̃hɨ yɨ'ɨ̂ wiôgɨ mɨsâ yã'âro weé'ke bu'iri yɨ'ɨ̂re bopôyaro yɨ'rɨkã́ wee boósami. Tohô niikã́ yã'âro weé'kãrã akobohóse sẽritíkã, pũûro utî boosa'. Mɨsâ yã'âro weesére, yã'âro wãkusére, no'ó mɨsâ a'me tãrá baha ke'atisere pũûro bɨhâ weti boosa'. Niî pe'tise yã'asé ɨâri pehase, mɨsâ wee wɨáse nohore du'utíkã, meharóta bɨhâ weti boosa'.

13

¹ Ni'kâroakã yɨ'ɨ̂ mɨsâ tiropɨ wa'asé me'ra i'tiáti wa'ârosa'. Õ'âkɨ̃hɨ yee kiti ohâka pũripɨre a'tîro ohâ no'okaro niîwɨ: “Pɨárã ou i'tiárã ĩ'yâka be'ro marî ãpêrã weé'kere ĩ'yâ'kãrã werê sãa masi no'o'.”

² Too dɨpóropɨ mɨsâ tiro niîgɨ, yã'âro weerã́re “Bu'îri da'rêgɨti”, niî werê tohawɨ. Tohô niikã́ niî pe'tirãre werêwɨ. Ni'kâroakã yoarópɨ niîmigɨ, werê nemogɨti taha. Yɨ'ɨ̂ opâturi mɨsâ tiropɨ wa'âgɨ, yã'âro weerã́re pahá yã'asome maha.

³ Tohô weekã́ mɨsâ masîrãsa', Cristo yɨ'ɨ̂re wãkusé o'osé me'ra uúkũ'. Cristo mɨsâre dutigɨ́ tutuâtikã weetími. Mɨsâre kɨ̃ɨ̂ tutuâ yɨ'rɨsere ĩ'yomí.

⁴ Diakɨ̃hɨ́ta niî'. Kɨ̃ɨ̂ kurúsapɨ tutuâtigɨ weeró noho paâ bi'pe no'okɨ niîwĩ. Tohô niîmigɨ, ni'kâroakãre kɨ̃ɨ̂ pakɨ́ tutuaró me'ra katîmi. Ɨ̃sá kẽ'ra kɨ̃ɨ̂ niî'karo nohota tutuâtirã niî', niîrã pe'ea'. Tohô niîmirã, kɨ̃ɨ yarã́ niî yuurã, Õ'âkɨ̃hɨ tutuaró me'ra niî nu'ku'. Tohô weérã mɨsâre wee tamú masi'.

⁵ Mɨsâ “Jesu Cristore ẽho peórãta niîmiti ɨ̃sa?” niî, mɨsâ basi beseyá. Ɨ̃sâ ẽho peóse diakɨ̃hɨ́ta niîmitito? niîrã, tohô wãkûya. Ɨ̃sâpɨre Jesu Cristo diakɨ̃hɨ́ta niîmiti kɨ̃ɨ? niîrã, tɨ'ó yã'aya. Apé tero weérã kɨ̃ɨ̂re ẽho peótirã, ẽho peótisa' mɨsa.

⁶ Ɨ̃sâ Jesu Cristore diakɨ̃hɨ́ta ẽho peó'. Kɨ̃ɨ yarã́ niî'. Mɨsâre teeré masikã́ ɨá'.

⁷ Ɨ̃sâ mɨsâre yã'âro weetíkã'ato niîrã Õ'âkɨ̃hɨre sẽri basá'. Kɨ̃ɨ̂re sẽrírã, ɨ̃sâre ẽho peó dutirã meheta sẽri basá'. Mɨsâ pe'ere keoró wee dutírã sẽri basá'. No'ó ɨ̃sâ keoró weemíkãta, “Naâ keoró weetíma” ɨ̃sâre niikã́, ãyúkã'rosa'.

⁸ A'tîro niî'. Õ'âkɨ̃hɨ yee diakɨ̃hɨ́kãhaseta niî'. Mɨsâ teeré keoró weekã́ ĩ'yârã, “A'tîro pe'e weeyá”, niîsome. Ɨ̃sâ teeréta ɨa sãá'.

⁹ Mɨsâ ɨ̃sâre ĩ'yârã, “Naâ tutuâtirã, dutî masitirã niîma”, niî'. Mɨsâ pe'e tutuarã́ niikã́, ãyú niî'. Teeré ĩ'yârã, ɨ̃sâ e'katírãsa'. Mɨsâre Õ'âkɨ̃hɨ niî pe'tisere kɨ̃ɨ̂ ɨaró noho weekã́ ɨárã, sẽri basá'.

¹⁰ Yɨ'ɨ̂ mɨsâ tiropɨ wa'aátoho dɨporo a'ti pũríre ohâ'. Toopɨ́ wa'âgɨ, tutuaró me'ra mɨsâre tu'tî sĩ'ritisa'. Marî wiôgɨ yɨ'ɨ̂ mɨsâre dutî masisere o'ôkɨ niîwĩ. Tohô weégɨ yɨ'ɨ̂ mɨsâre tu'tî masi'. Tohô weé sĩ'ritisa'. Jesu Cristo mɨsâ ẽho peósere dohórẽ' dutigɨ meheta dutisére yɨ'ɨ̂re o'ôwĩ. Mɨsâre nemoró ẽho peókã ɨágɨ, tohô weewĩ́.

¹¹ Akawerérã, toô kã'rota ohâgɨti. Ãyuró niîya. Yɨ'ɨ̂ mɨsâre dutî'kere keoró weé me'rikã'ya. A'mêri wãkû tutuakã weeyá. Ni'kâro noho niiséti, a'me kẽéro mariró niîya. Õ'âkɨ̃hɨ ãyuró ehêri põ'ratikã weegɨ́, mɨsâre ma'igɨ́ mɨsâ me'ra niîgɨsami.

¹² E'katíse me'ra a'mêri põo tẽríya.

¹³ Niî pe'tirã Jesu Cristore ẽho peórã marî akawerérã mɨsâre ãyu dutíma.

¹⁴ Jesu Cristo marî wiôgɨ mɨsâ niî pe'tirãre ãyuró weeáto. Õ'âkɨ̃hɨ mɨsâre ma'igɨ́ mɨsâ me'ra niiáto. Tohô niikã́ Espírito Santo mɨsâ me'ra niiáto. Toô kã'rota ohâ'. Paulo