²

1

¹ Yɨ'ɨ̂ mɨsâre Jesu Cristo yeekãhasere, kɨ̃ɨ̂ niisétisere ohâgɨ weé'. A'tîro niî'. A'ti ɨmɨ́koho weeátoho dɨporo kɨ̃ɨ̂, kɨ̃ɨ̂ pakɨ́ me'ra niî tohakɨ niîwĩ. Be'ró a'ti nukúkãpɨre bahuákɨ niîwĩ. Kɨ̃ɨ̂ katî nu'kugɨ marîre katî nu'kukã weegɨ́ niîmi. Ɨ̃sâ kɨ̃ɨ̂re ĩ'yâwɨ. Kɨ̃ɨ̂ uúkũsere tɨ'owɨ́. Ɨ̃sâ basita kɨ̃ɨ̂re ĩ'yâ butia'wɨ. Kɨ̃ɨ̂re ãyuró masîwɨ. Tohô weérã kɨ̃ɨ̂re ĩ'yâ'kere mɨsâre werê'.

³ Ɨ̃sâ marî pakɨ Õ'âkɨ̃hɨ me'ra, tohô niikã́ kɨ̃ɨ̂ makɨ́ Jesu Cristo me'ra ãyuró niîkã'. Mɨsá kẽ'rare tohôta ɨa sãása'. Tohô weérã ɨ̃sâ ĩ'yâ'kere, tɨ'ó'kere mɨsâre werê'.

⁴ Mɨsâre ãyuró e'katiáto niîgɨ a'ti pũríre ohâ'. Õ'âkɨ̃hɨ ãyugɨ́ niîmi niisé kiti niî'

⁵ Jesu Cristo ɨ̃sâre bu'ê'kere mɨsâre werê turia'. Kɨ̃ɨ̂ a'tîro niîwĩ: “Õ'âkɨ̃hɨ ãyugɨ́ niîmi. Kɨ̃ɨ̂pɨre neê yã'asé marí'. Kɨ̃ɨ̂ sĩ'óo'se weeró noho niîmi. Na'î tĩ'ase weeró noho niîtimi”, niîwĩ.

⁶ Marî a'tîro niî boosa': “Õ'âkɨ̃hɨ me'ra ãyuró niîkã'”, niî boosa'. Tohô niîmirã yã'âro weérã, niî soorã weésa'. Marî weesétise, mari yeé uúkũse ɨseri me'ra tohô weésa'.

⁷ Õ'âkɨ̃hɨ ãyuró weemí. Marî Õ'âkɨ̃hɨ weeró noho ãyuró weérã pũrikã, ãpêrã me'ra ãyuró niiséti masi'. Kɨ̃ɨ̂ makɨ́ Jesu Cristo wẽrisé me'ra niî pe'tise marî yã'âro niisétisere dɨka yuú nu'kumi.

⁸ Marî yã'asé kɨomírã yã'asé moó' niîrã, marî basita niî soorã weé'. Marî wãkusé diakɨ̃hɨ́ nií wee'.

⁹ Õ'âkɨ̃hɨ keoró weé nu'kugɨ marî yã'âro weé'kere diakɨ̃hɨ́ werê yɨ'rɨkã, keoróta marîre akobohógɨsami. Niî pe'tise marî yã'âro weeséti'kere koé pe'okɨ̃'sami.

¹⁰ Õ'âkɨ̃hɨ a'tîro niîkɨ niîwĩ: “Masá niî pe'tirã yã'arã́ niîma”, niîkɨ niîwĩ. Marî yã'âro weé wee' niîrã, Õ'âkɨ̃hɨ niî soose pihagɨ niîmi, niîrã wee boósa'. Kɨ̃ɨ̂ uúkũsere ẽho peótirã weeró noho niî boosa'.

2

¹ Mɨsâ yɨ'ɨ̂ põ'ra weeró noho niî'. Yã'asé weetíkã'ato niîgɨ, mɨsâre a'teré ohâ'. Marî yã'âro weekã́ maa, Jesu Cristo kɨ̃ɨ̂ pakɨpɨ́re marîre uúkũ basasami. “Naâre akobohóya”, niîsami. Jesu Cristo yã'asé moogɨ́ niîmi. Tohô weégɨ kɨ̃ɨ̂ marîre sẽri basá masisami.

² Jesu Cristo wẽrisé me'ra marî yã'âro weé'kere akobohóse bokákãrã niîwɨ. Marî di'akɨ̃ akobohóse boka masítisa'. Niî pe'tirã a'ti nukúkãkãharã akobohóse boka masísama.

³ Marî masî', Õ'âkɨ̃hɨ dutisére weérã, kɨ̃ɨ̂re ĩ'yâ wã'a no'osa'.

⁴ Marî a'tîro niî boosa': “Õ'âkɨ̃hɨre masî'.” Tohô niîmirã kɨ̃ɨ̂ dutisére weetírã, niî soose piharã niî boosa'.

⁵ Kɨ̃ɨ̂ dutiró weérã, Õ'âkɨ̃hɨre keoróta ẽho peósa'. Tohô weérã marî Õ'âkɨ̃hɨ me'ra niî' niisére masî'.

⁶ Marî Õ'âkɨ̃hɨ me'ra niî' niîrã, Jesu Cristo weeséti'karo nohota wee sirú tuuro ɨá'. A'mêri ma'iyá niisé kiti niî'

⁷ Akawerérã, yɨ'ɨ̂ mɨsâre ohasé apêye ma'má dutisé meheta niî'. Too dɨpóropɨ mɨsâ dutisé kɨó'kereta ohâ'. A'té mɨsâ tɨ'ó'kepɨ niî'.

⁸ Tohô niîmiro, yɨ'ɨ̂ mɨsâre ohasé ma'má dutisé weeró noho wa'â'. A'mêri ma'isére wamê peogɨ weé'. Too dɨpóropɨ marî a'mêri ma'itírã, yã'arã́ niîwɨ. Na'î tĩ'aropɨ niirã́ weeró noho niîwɨ. Ni'kâroakãre a'té du'ú no'oro weé'. A'tóka terore marî a'mêri ma'írã, bo'rê yuuropɨ niirã́ weeró noho niî'. Teé a'mêri ma'isére Jesu Cristo me'ra masî no'o'. Tohô niikã́ mɨsâ me'ra masî no'o'.

⁹ Marî a'tîro niî boosa': “Yɨ'ɨ̂ pũrikã ãyuró Õ'âkɨ̃hɨ dutiró weé nu'kukã'.” Tohô niîmigɨ ãpêrãre ma'itígɨ, too dɨpóropɨ na'î tĩ'aropɨ niî'karo weeró nohota niîkã'sa' taha.

¹⁰ Ãpêrãre ma'ígɨ, bo'rê yuuropɨ niigɨ́ weeró noho niîmi. Neê kɨ̃ɨ̂re kã'roákã yã'âro weesé marí'.

¹¹ Marî ãpêrãre ma'itírã, na'î tĩ'aropɨ niirã́ weeró noho niisétisa'. Marî yã'âro weesé bu'iri kapêri ĩ'yâtirã weeró noho niísa'. Tohô weérã “A'tîro pe'e ɨá'”, niî masitisa'.

¹⁴

¹² Yɨ'ɨ̂ mɨsâ niî pe'tirãre ohâgɨti. Jesu Cristo kɨ̃ɨ̂ wẽrisé wapa Õ'âkɨ̃hɨ mɨsâ yã'âro weé'kere akobohókɨ niîwĩ. Mɨsâ Õ'âkɨ̃hɨre masî'. Bɨkɨrã́, mɨsâre ohâ'. Jesu Cristore neê waropɨ dɨ'pôkãti'kɨre ẽho peó yuukã, ohâ'. Ma'mâ piha, mɨsâ wãkû tutuarã niî'. Õ'âkɨ̃hɨ yee uúkũsere tɨ'ó ẽho peó'. Wãtîre dokâ ke'akã weékãrã niîwɨ. Tohô weégɨ mɨsâre ohâ'.

¹⁶

¹⁵ A'ti ɨmɨ́kohokãhase Õ'âkɨ̃hɨ yee meheta niî'. A'teré wãkû nɨrɨtikã'ya. Yã'âro wãkusé, a'me tãrá sĩ'rise, ɨâri pehase, ãpêrã yɨ'rɨóro niî sĩ'rise yã'â niî'. A'té niî pe'tise a'ti ɨmɨ́kohokãhase niî'. “Teeré weerã́ti”, niîtikã'ya. No'ó a'teré weé sĩ'rigɨ noho marî pakɨ Õ'âkɨ̃hɨre ma'itísami.

¹⁷ A'ti ɨmɨ́koho pe'tí wã'karo weé'. Niî pe'tise yã'âro weé sĩ'ri ɨâri pehase kẽ'ra pe'tiá wa'ârosa'. Õ'âkɨ̃hɨ dutiró weerã́ pũrikã neê pe'titírãsama. Kɨ̃ɨ̂ tiropɨ niî nu'kukã'rãsama. Niî soorã yee kiti niî'

¹⁸ Niî soorã yee kitire werêgɨti. A'ti ɨmɨ́koho pe'tíro weé'. Jesu Cristo kɨ̃ɨ̂ opâturi a'tiátoho dɨporo ni'kɨ́ kɨ̃ɨ̂re ĩ'yâ tu'tigɨ a'tîgɨsami. Mɨsâ a'teré tɨ'ó tohakãrã niîwɨ. Pãharã́ kɨ̃ɨ̂ weeró noho niirã́ niî tohama. Tohô weérã marî a'ti ɨmɨ́koho maatá pe'tiátehere masî'.

¹⁹ Naâ kɨ̃ɨ̂re ĩ'yâ tu'tirã marî me'rakãharãta niîkã'miwã. Be'ró, naâ Jesu Cristo yee kitire ẽho peótirã, marîre dɨka watía wa'âwã. Naâ marî me'rakãharã waro meheta niî'kãrã niîwã. Marî me'rakãharã niîrã pũrikã, marî me'rata niî boosama. Naâ tohô dɨka watíkã ĩ'yârã, marî naâre ĩ'yâ masi'. Marî me'rakãharã meheta niî'kãrã niîwã.

²⁰ Jesu Cristo mɨsâre Espírito Santore o'ôo'kɨ niîwĩ. Tohô weérã mɨsâ diakɨ̃hɨ́kãhase, Jesu Cristo yee kitire masî pe'tikã'sa'.

²¹ Kɨ̃ɨ yeé kitire masîtirãre ohâgɨ meheta weé'. Mɨsâ Jesu Cristo yeere keoró masísa'. Tohô weégɨ mɨsâre ohâ'. Mɨsâ masî', kɨ̃ɨ yeé kiti niî soose meheta niî'.

²² Niî soose pihagɨ a'tîro niîsami: “Jesu Õ'âkɨ̃hɨ besé'kɨ meheta niîmi”, niîsami. Tohô bɨsɨgɨ́ kɨ̃ɨ̂re ĩ'yâ tu'tigɨ niîmi. Marî pakɨ Õ'âkɨ̃hɨre, kɨ̃ɨ̂ makɨ́ Jesu Cristore teesamí.

²³ No'ó kɨ̃ɨ̂ makɨ́ Jesu Cristore ɨatírã, kɨ̃ɨ̂ pakɨ́ kẽ'rare moosamá. Marî Jesu Cristore Õ'âkɨ̃hɨ besé'kɨ niîmi niîrã, Õ'âkɨ̃hɨ põ'ra niî'.

²⁴ Tohô weérã mɨsâ neê waro tɨ'ó'ke Jesu Cristo yee kitire wãkû nɨrɨya. Mɨsâ kɨ̃ɨ yeé kitire ẽho peó nu'kurã, Õ'âkɨ̃hɨ me'ra, kɨ̃ɨ̂ makɨ́ Jesu Cristo me'ra ãyuró niîkã'rãsa'.

²⁵ Jesu Cristo marîre a'tîro niîkɨ niîwĩ: “Katî nu'kuatehere o'ôgɨti”, niîkɨ niîwĩ.

²⁶ Mɨsâre niî soorã yee kitire ohâ tohapɨ.

²⁷ Mɨsâ Espírito Santo Jesu Cristo o'ôo'kɨre kɨó toha'. Kɨ̃ɨ̂ basi niî pe'tisere niî sooro mariró mɨsâre bu'êmi. “Ɨ̃sâre ãpêrã bu'eáto”, niîtisa'. Kɨ̃ɨ̂ bu'êro nohota Jesu Cristo me'ra ãyuró niîkã'ya.

²⁸ Ni'kâroakã kẽ'rare kɨ̃ɨ̂ me'ra niî nu'kukã'ya. Marî tohô weérã, kɨ̃ɨ̂ a'ti nukúkãpɨ a'tikã́, kɨ̃ɨ̂re põo tẽrírã ĩ'yâ ɨkɨásome. Bopôyasome.

²⁹ Mɨsâ Jesu Cristo ãyuró weesére masî toha'. Tohô weérã niî pe'tirã ãyuró weerã́ Õ'âkɨ̃hɨ põ'ra niîma niisére masî no'o'.

3

¹ Ĩ'yâre mɨsâ Õ'âkɨ̃hɨ marî pakɨ marîre ma'isére. Marîre ma'ígɨ, “Yɨ'ɨ̂ põ'ra” niî ẽho peósami. Tohô niîro nohota marî kɨ̃ɨ̂ põ'rá niî'. Ãpêrã a'ti nukúkãkãharã Õ'âkɨ̃hɨre masîti tĩharã, marî kɨ̃ɨ̂re ẽho peórã weesétisere masîtisama.

² Akawerérã, marî Õ'âkɨ̃hɨ põ'ra niî toha'. Kɨ̃ɨ̂ põ'rá niîmirã, be'ropɨ́ marî de'ró wa'aátehere ãyuró masî no'oya marí' yuhûpɨ. A'té di'akɨ̃re masî'. Marî Jesu Cristo a'tikã́, kɨ̃ɨ̂ bahusére ĩ'yârãsa'. Kɨ̃ɨ̂re ĩ'yârã, kɨ̃ɨ̂ weeró noho wa'ârãsa'.

³ Jesu Cristore neê yã'asé marí'. Marí kẽ'ra kɨ̃ɨ̂ weeró noho ãyurã́ wa'ârãsa' niiátehere wãkû'. Tohô weérã marî yã'âro weeséti'kere dɨka yuú wã'karã weé'.

⁴ Yã'âro weesétise Õ'âkɨ̃hɨ dutî'kere yɨ'rɨ́ nɨ'kase niî'. Niî pe'tirã yã'âro weerã́ Õ'âkɨ̃hɨre yɨ'rɨ́ nɨ'karã weemá.

⁵ Mɨsâ masî toha', marî yã'âro weé'kere kõ'âgɨ Jesu Cristo a'ti nukúkãpɨre a'tîkɨ niîwĩ. Neê kɨ̃ɨ̂re kã'roákã yã'asé marí'.

⁶ Tohô weérã niî pe'tirã kɨ̃ɨ̂ me'ra niî nu'kurã yã'âro weesétitisama. Yã'âro weerã́ pe'e Jesu Cristore masîtisama.

⁷ Mɨsâ tɨ'o masíya. Ãpêrã mɨsâre maa soókã, ẽho peótikã'ya. Jesu Cristo ãyugɨ́ niîmi. Tohô weérã kɨ̃ɨ̂ weeró noho niirã́ masá ãyurã́ niîma.

⁸ Wãtî neê waropɨta yã'agɨ́ niî mɨhati'kɨ niîmi. Tohô weérã yã'âro weesétirã kɨ̃ɨ yarã́ niîma. Jesu Cristo Õ'âkɨ̃hɨ makɨ wãtî yã'âro weesére kõ'âgɨ a'tîgɨ a'ti nukúkãpɨre a'tîkɨ niîwĩ.

⁹ Õ'âkɨ̃hɨ kɨ̃ɨ̂ põ'raré kɨ̃ɨ̂ weeró noho niisétikã weékɨ niîwĩ. Tohô weérã Õ'âkɨ̃hɨ põ'ra yã'asére weé nu'kutima.

¹⁰ Marî Õ'âkɨ̃hɨ põ'rare, wãti yarã́re a'tîro ĩ'yâ dɨka waá masi'. No'ó ãpêrãre ma'itírã, yã'âro weesétirãre “Wãti yarã́ niîma”, niî'. Ãpêrãre ma'irã́ ãyuró weesétirã pe'ere “Õ'âkɨ̃hɨ põ'ra niîma”, niî'. A'mêri ma'i dutíse niî'

¹¹ A'mêri ma'iró ɨá' niisé kiti mɨsâ neê waro maatá tɨ'ó'ke niî'.

¹² Dɨporókɨ̃hɨpɨ Caĩ́ wamêtigɨ weeró noho niîtikã'rã. Kɨ̃ɨ̂ wãti yagɨ́ niîgɨ, kɨ̃ɨ̂ akabihí Abelre wẽhékɨ niîwĩ. De'ró weégɨ kɨ̃ɨ̂re wẽheparí? Caĩ́ kɨ̃ɨ̂ weesétise yã'asé niîkaro niîwɨ. Kɨ̃ɨ̂ akabihí weesé pe'e ãyusé niîkaro niîwɨ. Teé bu'iri kɨ̃ɨ̂re ɨógɨ, wẽhékɨ niîwĩ.

¹³ Ãpêrã mɨsâ ãyuró weesétisere ĩ'yâ ɨórã, ĩ'yâ tu'ti boosama. Naâ Caĩ́ kɨ̃ɨ̂ akabihíre ɨó'karo weeró noho weérã weesamá. Naâ mɨsâre ĩ'yâ tu'tikã, ɨkɨátikã'ya.

¹⁴ Marî ãpêrãre ma'írã, Õ'âkɨ̃hɨ põ'ra niî' niisére masî'. Too dɨpóropɨre Jesu Cristore masîti tĩharã, ãpêrãre ma'itíwɨ. Ni'kâroakãre kɨ̃ɨ̂re ẽho peó yuurã, a'mêri ma'í'. Ãpêrãre ma'itírã pũrikã, marî too dɨpóropɨ niî'karo nohota niîkã' boosa'. Katî nu'kusere moo boósa'.

¹⁵ No'ó ãpêrãre ĩ'yâ tu'tigɨ noho masaré wẽhé kõ'agɨ weeró noho niîmi. Mɨsâ masî', neê ni'kɨ́ masaré wẽhé kõ'agɨ katî nu'kusere moosamí. Mɨsâ kɨ̃ɨ̂ weeró noho niîtikã'ya.

¹⁶ Jesu Cristo mari yeé niiátehere wẽrîkɨ niîwĩ. Tohô weérã marî a'mêri ma'isére masî'. No'ó ãpêrãre ma'írã, mari yaá katirí ɨmɨ̂kohore wãkû nɨrɨtisa'. Naâre wee tamúrã, marí kẽ'ra wẽrî masi'.

¹⁷ Marî apêye noho kɨomírã, pahasé kɨorãre o'ôtirã, de'ró weé “Õ'âkɨ̃hɨre ma'í'”, niî boosari?

¹⁸ Bu'î, mari yeé uúkũse ɨseri me'ra di'akɨ̃ “Naâre ma'í'”, niîtikã'ro ɨá'. Naâre ãyuró wee tamúro ɨá'. Teé me'ra marî naâre ma'isére ĩ'yo masí'. Õ'âkɨ̃hɨre ẽho peórã uiró mariró niî masi' niisé niî'

²⁰

¹⁹ Apé tero marî a'tîro wãkúsa': “Yɨ'ɨ̂ yã'â yɨ'rɨagɨ niísa'.” Tohô wãkûmirã, marî ãpêrãre ma'írã, Õ'âkɨ̃hɨ me'ra uiró mariró niî masi'. Marî kɨ̃ɨ̂ põ'rá niî'. Kɨ̃ɨ̂ marî wãkusére masî pe'okã'sami. Kɨ̃ɨ̂ marî yã'âro weé'kere akobohósami.

²²

²¹ Marî neê bu'îri moósa' niî tɨ'ó yã'arã, uisé mariró Õ'âkɨ̃hɨre sẽri masí'. Kɨ̃ɨ̂ dutisére, kɨ̃ɨ̂ ɨasére weekã́, Õ'âkɨ̃hɨ niî pe'tise marî sẽrisére yɨ'tigɨ́sami.

²³ Kɨ̃ɨ̂ dutî'ke a'té niî'. Kɨ̃ɨ̂ makɨ́ Jesu Cristore ẽho peó dutimi. Tohô niikã́ kɨ̃ɨ̂ dutî'karo nohota marîre a'mêri ma'i dutími.

²⁴ Marî kɨ̃ɨ̂ dutî'kere weérã, kɨ̃ɨ̂ me'ra ãyuró niîkã'. Kɨ̃ɨ́ kẽ'ra marî me'ra ãyuró niîkã'mi. Marîre Espírito Santore o'ôkɨ niîwĩ. Tohô weérã kɨ̃ɨ̂ marî me'ra niisére masî'.

4

¹ Akawerérã, Õ'âkɨ̃hɨ yeere wererã́ mɨsâ tiropɨ bu'êrã etakã́, naâ weresére “Diakɨ̃hɨ́ta Õ'âkɨ̃hɨ yee niîmitito?” niî ĩ'yâya. Ãpêrã Õ'âkɨ̃hɨ o'ôo'kãrã niîtima. Niî pe'tirãpɨre ẽho peótikã'ya. Naâ Espírito Santore moomírã, tohô niî ma'akã' boosama. A'ti ɨmɨ́kohopɨre no'ó ɨaró niî soorã niî bi'akã'ma. “Õ'âkɨ̃hɨ yeere werêrã weé'”, niî bɨsɨ̂ sihama.

² Mɨsâ naâ diakɨ̃hɨ́ wererã́re a'tîro ĩ'yâ beseya. Naâ “Jesu Cristo a'ti ɨpɨ́ me'ra bahuákɨ niîmi”, niîsama. Tohô ẽho peórã, Espírito Santore kɨorã́ niîma. Naâre ẽho peóya.

³ Ãpêrã tohô ẽho peótirã, Espírito Santore moomá. Mehô kɨ̃ɨ̂re pe'sûtima. Mɨsâ Jesu Cristore ĩ'yâ tu'tigɨ kɨ̃ɨ̂ a'tiátehere tɨ'ó tohapã. Naâ kɨ̃ɨ̂ weeró noho niirã́ a'tí di'tapɨre niî tohama.

⁴ Niî soorã wãti yarã́ niîma. Õ'âkɨ̃hɨ wãtî nemoró tutuâmi. Mɨsâ Õ'âkɨ̃hɨ yarã niî'. Tohô weérã mɨsâ naâ uúkũsere ẽho peótikãrã niîwɨ.

⁵ Niî soorã a'ti nukúkãkãharã a'ti ɨmɨ́kohokãhase di'akɨ̃re bu'êsama. Naâ weeró noho niirã́ta naâ bu'esére tɨ'osamá.

⁶ Marî pũrikã Õ'âkɨ̃hɨ põ'ra niî'. Kɨ̃ɨ̂ põ'rá niirã́ marî bu'esére tɨ'osamá. Kɨ̃ɨ̂ põ'rá niîtirã tɨ'otísama. Tohô weérã marî diakɨ̃hɨ́kãhase ẽho peórãre, diakɨ̃hɨ́ niîtisere ẽho peórãre ĩ'yâ bese masi'. “Ã'ratá niîma diakɨ̃hɨ́kãhasere ẽho peórã”, niî masi'. “Naâ niîma diakɨ̃hɨ́kãhasere ẽho peótirã”, niî ĩ'yâ dɨka waá masi'. Marîre a'mêri ma'i dutíse niî'

⁸

⁷ Akawerérã, Õ'âkɨ̃hɨ masaré ma'imí. Tohô weérã marí kẽ'ra a'mêri ma'iró ɨá'. A'mêri ma'irã́ noho Õ'âkɨ̃hɨ põ'ra niîma. Naâ Õ'âkɨ̃hɨre masîma. No'ó ma'isé moorã́ noho Õ'âkɨ̃hɨre neê masîtima.

⁹ Kɨ̃ɨ̂ marîre ma'isére ĩ'yógɨ, kɨ̃ɨ̂ makɨ́ ni'kɨ́ niigɨ́re a'ti nukúkãpɨre o'ôo'kɨ niîwĩ. Marî katî nu'kuatehere weégɨ tohô weékɨ niîwĩ.

¹⁰ Yɨ'ɨ̂ ma'isére uúkũgɨ, marî Õ'âkɨ̃hɨre ma'isére uúkũgɨ meheta weé'. Kɨ̃ɨ̂ pe'e marîre ma'isé pe'ere uúkũgɨ weé'. Kɨ̃ɨ̂ marîre ma'ígɨ, marî yã'âro weé'kere akobohó dutigɨ kɨ̃ɨ̂ makɨré o'ôo'kɨ niîwĩ. Kɨ̃ɨ̂ me'ra marî akobohóse boká'.

¹¹ Akawerérã, Õ'âkɨ̃hɨ marîre ma'í'karo nohota marí kẽ'ra ãpêrãre ma'iró ɨá'.

¹² A'ti ɨmɨ́kohopɨre neê ni'kɨ́ Õ'âkɨ̃hɨre ĩ'yâ'kɨ marimí. Marî kɨ̃ɨ̂re ĩ'yâti'kãrã niîmirã, ãpêrãre ma'írã, kɨ̃ɨ̂ marîpɨre niisére masî'. Kɨ̃ɨ̂ marîre ma'í'ke bu'iri ãpêrãre keoró ma'itá basió'.

¹³ Õ'âkɨ̃hɨ marîre Espírito Santore o'ôkɨ niîwĩ. Tohô weérã marî Õ'âkɨ̃hɨ marîpɨre niisére masî'. Marí kẽ'ra kɨ̃ɨ̂pɨreta niî'.

¹⁴ Õ'âkɨ̃hɨ makɨré ɨ̃sâ basita ĩ'yâwɨ. Kɨ̃ɨ̂re a'ti nukúkãpɨre marî yã'âro weé niisétimi'kãrãre yɨ'rɨ wetíkã wee dutígɨ o'ôo'kɨ niîwĩ. Tohô weérã mɨsâre a'teré werê'.

¹⁵ No'ó niî pe'tirã “Jesu Õ'âkɨ̃hɨ makɨ niîmi” niirã́ noho Õ'âkɨ̃hɨ me'ra niîma. Kɨ̃ɨ́ kẽ'ra naâpɨre niîmi.

¹⁶ Õ'âkɨ̃hɨ marîre ma'isére masî'. Kɨ̃ɨ̂ niî pe'tirãre ma'imí. No'ó ãpêrãre ma'igɨ́ noho ãyuró Õ'âkɨ̃hɨ me'ra niîmi. Õ'âkɨ̃hɨ kẽ'ra kɨ̃ɨ̂ me'ra niîmi.

¹⁷ Marî Õ'âkɨ̃hɨ me'ra niîrã, keoró ma'i masí'. Jesu Cristo a'ti nukúkãpɨ niikã́, kɨ̃ɨ̂ pakɨ́ kẽ'ra kɨ̃ɨ̂ me'ra niîkɨ niîwĩ. Kɨ̃ɨ̂ me'ra niî'karo nohota marî me'ra kẽ'rare Õ'âkɨ̃hɨ niîmi. Tohô weérã marî a'ti nukúkãkãharãre beseátihi nɨmɨ niikã́, kɨ̃ɨ̂re neê uîsome.

¹⁸ A'mêri ma'irã́ tirore uisé marí'. Uisé kɨorã́ tiro pe'ere neê a'mêri ma'isé marí'. Marî uisé me'ra bu'îritirã weeró noho tɨ'ó yã'a'. No'ó uigɨ́ noho a'mêri ma'i masítimi.

¹⁹ Õ'âkɨ̃hɨ marîre ma'í mɨ'takɨ niîwĩ. Tohô weérã marî kɨ̃ɨ̂re ma'í'.

²⁰ Marî Õ'âkɨ̃hɨre ma'imírã, ãpêrãre ĩ'yâ tu'tirã, niî soose bɨkɨrã niî'. Masá marî ĩ'yarã́ waro marikãre ma'itírã, nemoró Õ'âkɨ̃hɨ bahutígɨ pũrikãre ma'itá basiótisa'.

²¹ Jesu Cristo marîre a'tîro dutîwĩ: “Õ'âkɨ̃hɨre ma'írã, ãpêrã kẽ'rare ma'iró ɨá'”, niîwĩ.

5

¹ Niî pe'tirã “Jesu Õ'âkɨ̃hɨ besé'kɨ niîmi” niî ẽho peórã noho Õ'âkɨ̃hɨ põ'ra niîma. Ãpêrãre ma'írã, naâ põ'rá kẽ'rare ma'iró ɨá'.

² Marî Õ'âkɨ̃hɨre ma'í, kɨ̃ɨ̂ dutî'kere weérã, marî kɨ̃ɨ̂ põ'raré ma'í' niisére masî no'o'.

³ Õ'âkɨ̃hɨre ma'írã, kɨ̃ɨ̂ dutî'kere weérã weé'. Kɨ̃ɨ̂ dutisé diâsa wee', weetá basió niî'.

⁴ Marî Õ'âkɨ̃hɨ põ'ra a'ti nukúkãkãhase yã'asére weé wee'. Jesu Cristore ẽho peóse me'ra ãyuró weetá basió'.

⁵ Marî Jesu Cristore “Õ'âkɨ̃hɨ makɨ niîmi”, niî ẽho peó'. Teé me'ra di'akɨ̃ a'ti ɨmɨ́kohokãhase yã'asére ka'mú ta'a masisa'. Jesu Cristore “Õ'âkɨ̃hɨ makɨ niîmi” niisé niî'

⁶ Jesu Cristo Õ'âkɨ̃hɨ makɨ niîmi. Kɨ̃ɨ̂ a'ti nukúkãpɨ niikã́, João wamê yeeri masɨ kɨ̃ɨ̂re wamê yeekɨ niîwĩ. Kɨ̃ɨ̂re wamê yeegɨ, akó me'ra wamê yeekɨ niîwĩ. Be'ró kɨ̃ɨ̂ kurúsapɨ wẽrîwĩ. A'tîro weesé me'ra kɨ̃ɨ̂ Õ'âkɨ̃hɨ makɨ niisére ĩ'yowĩ́. Kɨ̃ɨ̂re wamê yee'ke me'ra di'akɨ̃ ĩ'yotíwĩ. Kɨ̃ɨ̂ wẽrisé me'ra kẽ'rare ĩ'yowĩ́. Espírito Santo Jesu Cristo Õ'âkɨ̃hɨ makɨ niisére ĩ'yomí. Kɨ̃ɨ́ta diakɨ̃hɨ́kãhasere weregɨ́ niîmi.

⁷ A'te kitíre naâ basita ĩ'yomá. Naâ i'tiárã ɨ'mɨ̂sepɨ niîsama: pakɨ́, makɨ́, tohô niikã́ Espírito Santo. Ã'rá i'tiárãpɨ dɨka watímirã, ni'kɨtá niîmi.

⁸ A'ti nukúkãpɨre Espírito Santo weresé me'ra Jesu Õ'âkɨ̃hɨ makɨ niîmi niisére masî'. Tohô niikã́ Jesu kɨ̃ɨ̂ Õ'âkɨ̃hɨ makɨ niisére kɨ̃ɨ̂ wamê yee no'o'ke me'ra, kɨ̃ɨ̂ wẽrî'ke me'ra ĩ'yókɨ niîwĩ.

⁹ Masá naâ ĩ'yâ'kere werekã́ marikãre, marî ẽho peó'. Õ'âkɨ̃hɨ kɨ̃ɨ̂ makɨ yeére werekã́ pũrikãre, nemoró ẽho peóro ɨá'. Kɨ̃ɨ̂ masá uúkũse nemoró keoró werêmi.

¹²

¹⁰ Õ'âkɨ̃hɨ marîre kɨ̃ɨ̂ makɨ́ me'ra katî nu'kusere o'ôkɨ niîwĩ. Tohô weérã kɨ̃ɨ̂ makɨré ẽho peórã kɨ̃ɨ̂ me'ra katî nu'kurãsama. Kɨ̃ɨ̂ makɨré ẽho peótirã neê kɨ̃ɨ̂ me'ra katî nu'kusome. Marî Jesu Cristo yee kitire diakɨ̃hɨ́ta niî' niîrã, kɨ̃ɨ̂re ẽho peórã weé'. Ãpêrã a'teré ẽho peótirã noho “Õ'âkɨ̃hɨ niî soogɨ niîmi”, niîrã weemá. João werê kasa'ke niî'

¹³ Mɨsâ Õ'âkɨ̃hɨ makɨré ẽho peórãre teeré ohaápɨ. Mɨsâ katî nu'kurãsa' niisére masiáto niîgɨ tohô ohaápɨ.

¹⁴ Marî masî', Õ'âkɨ̃hɨ kɨ̃ɨ̂ ɨaró noho marî sẽrikã́, marî sẽrisére tɨ'osamí. “Marî sẽrisére tɨ'osamí” niî masîrã, kɨ̃ɨ̂re uisé mariró sẽri masí'.

¹⁵ “Õ'âkɨ̃hɨ marî sẽrisére tɨ'osamí” niî masîro nohota “Kɨ̃ɨ̂ marî sẽrí'ke kẽ'rare o'ô tohami”, niî no'o'.

¹⁶ Apé tero Jesu Cristore ẽho peógɨ yã'âro weesamí. Kɨ̃ɨ̂ tohô weekã́ ĩ'yârã, Õ'âkɨ̃hɨre sẽri basáya. Marî sẽri basákã, Õ'âkɨ̃hɨ yɨ'tigɨ́sami. Kɨ̃ɨ̂re dɨka yuúgɨsami taha. Apêye pũrikã yã'â butia'ro weesé niî'. Teé maa “Sẽri basáya” niîya marí'. Teeré weerã́ Õ'âkɨ̃hɨ tiropɨ wa'âsome.

¹⁷ Niî pe'tise yã'asé Õ'âkɨ̃hɨre yɨ'rɨ́ nɨ'kase niî'. Yɨ'ɨ̂ niîro nohota apêye yã'âro weesére Õ'âkɨ̃hɨ akobohógɨsami. Apêye yã'â butia'ro weesére akobohósome.

¹⁸ Marî masî', Õ'âkɨ̃hɨ põ'rare Jesu Cristo ãyuró ko'tê nu'kukã'mi. Tohô weérã naâ yã'âro weé nu'kutisama. Wãtî kẽ'ra Jesu Cristo ko'tê yuukã naâre yã'âro wee masítisami.

¹⁹ Marî Õ'âkɨ̃hɨ põ'ra niisére, tohô niikã́ wãtî niî pe'tiro a'ti nukúkãkãharã wiôgɨ niîmi niisére masî'.

²⁰ Apêye kẽ'rare, Õ'âkɨ̃hɨ makɨ kɨ̃ɨ̂ a'tî'kere masî'. Kɨ̃ɨ̂ marîre Õ'âkɨ̃hɨ diakɨ̃hɨ́ niigɨ́re masî dutigɨ tɨ'o masíse o'ôkɨ niîwĩ. Marî Jesu Cristo me'ra niîrã, kɨ̃ɨ̂ pakɨ́ Õ'âkɨ̃hɨpɨreta niî'. Jesu Cristo Õ'âkɨ̃hɨ niîmi. Kɨ̃ɨ́ta katî nu'kugɨ marî katî nu'kuatehere o'ômi.

²¹ Apêye, masá naâ yeê ẽho peó'ke nohore ẽho peótikã'ya. Õ'âkɨ̃hɨ se'sarore ẽho peóya. Niî pe'tise apêye noho yɨ'rɨóro Õ'âkɨ̃hɨre ma'iyá. Tohôta weeró ɨása'. Toô kã'rota ohâ'. João