1

¹ Yɨ'ɨ̂ Simão Pedro Jesu Cristore da'rá wã'ya ko'tegɨ kɨ̃ɨ̂ bese kũú'kɨ mɨsâre ãyu dutí'. Niî pe'tirã ɨ̃sâ weeró noho ẽho peórãre a'ti pũríre ohâ'. Marî Jesu Cristore ẽho peóse ãyusé waro niî'. Jesu Cristo marî wiôgɨ marîre yɨ'rɨógɨ kɨ̃ɨ̂re ẽho peókã weékɨ niîwĩ. Marîre ni'kâro noho kɨ̃ɨ yarã́ wa'akã́ weékɨ niîwĩ.

² Õ'âkɨ̃hɨ, tohô niikã́ marî wiôgɨ Jesuré masî nemoya. Mɨsâ tohô weekã́, niî pe'tise ãyusé, mɨsâ ehêri põ'raripɨ ãyuró tɨ'o yã'asere o'ô yɨ'rɨ mɨharãsama. Jesu Cristore ẽho peórãre “A'tîro weeró ɨá'” niisé niî'

³ Õ'âkɨ̃hɨ kɨ̃ɨ̂ makɨ́ Jesu Cristore marîre masikã́ weékɨ niîwĩ. Kɨ̃ɨ̂re masîrã, kɨ̃ɨ̂ tutuaró me'ra marî kɨ̃ɨ̂ ɨaró ãyuró niiséti masirãsa'. Jesu Cristo ãyú yɨ'rɨagɨ, niî pe'tise ãyuró weegɨ́ marîre kɨ̃ɨ yarã́ niî dutigɨ pihîkɨ niîwĩ.

⁴ A'tîro weégɨ, kɨ̃ɨ̂ tutuaró me'ra marîre “Pehé ãyuró weegɨ́ti”, niîkɨ niîwĩ. Kɨ̃ɨ̂ tohô niî'ke ãyusé waro niî'. Wapatí yɨ'rɨa'. Kɨ̃ɨ̂ “A'tîro weegɨ́ti” niisé me'ra marî kɨ̃ɨ̂ weeró noho niiséti masirãsa'. Tohô niikã́ mɨsâ a'ti nukúkãkãhase yã'asé ɨâri pehasere yɨ'rɨ wetírãsa'.

⁵ Mɨsâ Jesu Cristore ẽho peó toha'. Mɨsâ tutuaró põo tẽóro a'teré wee nemó peoya. Wãkû tutua, ãyuró niisétiya. Tohô niisétirã, Õ'âkɨ̃hɨ yeere tɨ'o masí nemoya.

⁶ Tɨ'o masí nemorã, mɨsâ basi yã'âro weé sĩ'rirã, nɨ'kayá. Nɨ'kárã, mehêkã wa'akã́, ẽho peó du'utikã'ya. Ẽho peó du'utirã, Õ'âkɨ̃hɨre keoró ẽho peó, kɨ̃ɨ̂ ɨaró weeyá.

⁷ Kɨ̃ɨ̂ ɨaró weérã, ni'kɨ́ põ'ra weeró noho mɨsâ basi a'mêri wee tamúya. A'mêri wee tamúrã, niî pe'tirãre ma'iyá.

⁸ Mɨsâ a'teré siâpe me'ra nemoró wee turiá wã'karã, marî wiôgɨ Jesu Cristore ãyuró masîrãsa'. Kɨ̃ɨ̂ ɨaró wee nemórãsa'. “Mehô waro kɨ̃ɨ̂re ẽho peópã”, niîsome.

⁹ Mɨsâ teeré tohô weetírã pe'e, kapêri ĩ'yâ ehatirã weeró noho niísa'. Õ'âkɨ̃hɨ yeere neê masîtisa'. Mɨsâ too dɨpóropɨ yã'âro weé'kere Jesu Cristo akobohó'kere wãkûtisa'.

¹⁰ Yɨ'ɨ̂ akawerérã, mɨsâ Õ'âkɨ̃hɨ besé'kãrã niî'. Tohô weérã kɨ̃ɨ̂ besé'kãrã weeró noho niî pe'tise mɨsâ weé põo tẽóro ãyuró niisétiya. Mɨsâ tohô weérã Jesu Cristore ẽho peó du'usome.

¹¹ Mɨsâ ãyuró weé nu'kurã, marî wiôgɨ Jesu Cristo tiropɨ ehârãsa'. Toopɨ́ marîre yɨ'rɨógɨ me'ra ãyuró niî nu'kukã'rãsa'.

¹² Yɨ'ɨ̂ werê'kere masî tohasa'. Teeré masîrã, du'u kũúro mariró mɨsâ tɨ'ó'kere ãyuró weé nu'kurã weé'. Mɨsâ teeré masîmikã, akobohóri niîgɨ, werê nu'kukɨ̃'ti.

¹⁴

¹³ Kã'roákã dɨ'sása' yɨ'ɨ̂ wẽriátoho. Marî wiôgɨ Jesu Cristo yɨ'ɨ̂re werê tohami. Tohô weégɨ yɨ'ɨ̂ katiró ehâ tu'aro yɨ'ɨ̂ uúkũ'kere wãkuáto niîgɨ werê'. Yɨ'ɨ̂ tohô werekã́, ãyú niîrosa' niî wãkûgɨ, tohô werê'.

¹⁵ Yɨ'ɨ̂ wẽrîka be'ro yɨ'ɨ̂ werê'kere ãyuró wãkû nu'kukã'ato niîgɨ yɨ'ɨ̂ põo tẽóro ãyuró weegɨ́ti. Pedro Jesu Cristo ɨ̃rɨgɨ́pɨ dɨka yuúkã ĩ'yâ'ke niî'

¹⁶ Marî wiôgɨ Jesu Cristo opâturi a'ti nukúkãpɨ tutuaró me'ra kɨ̃ɨ̂ a'tiátehere werê no'o tohawɨ. Teeré werêrã, masá naâ wee wɨáro noho wãkû bahurẽ'ke mehereta werêwɨ. Ɨ̃sâ basi ɨ̃rɨgɨ́pɨ Jesu kɨ̃ɨ̂ tutuasére ĩ'yâwɨ.

¹⁷ Kɨ̃ɨ̂ pakɨ́ Õ'âkɨ̃hɨ kɨ̃ɨ̂ tutuasére, kɨ̃ɨ̂ asistésere ĩ'yokã́ ĩ'yâwɨ. Kɨ̃ɨ̂ tohô weerí kura ɨ'mɨ̂sepɨ uúkũgɨ, a'tîro niîwĩ: “Ã'rí yɨ'ɨ̂ makɨ yɨ'ɨ̂ ma'igɨ́ niîmi. Kɨ̃ɨ̂ me'ra e'katí'”, niîwĩ.

¹⁸ Kɨ̃ɨ̂ tohô uúkũ dihosere ɨ̃sâ tɨ'owɨ́. Tiîtare marî wiôgɨ me'ra ɨ̃rɨgɨ́pɨ niîwɨ. Kɨ̃ɨ̂ tigɨpɨ́ niîgɨta asistéwĩ.

¹⁹ Tohô wa'asé me'ra ɨ̃sâ masîwɨ. “Dɨporókãharãpɨ Õ'âkɨ̃hɨ yee kiti werê mɨ'tarã diakɨ̃hɨ́ta ohâpã Jesu yeékãhasere”, niîwɨ. Naâ ohâ'ke na'î tĩ'aropɨ sĩ'óo'kã bo'rê yuuse weeró noho niî'. Teeré bu'ê, wãkû nɨrɨya. Tohô weérã marî Õ'âkɨ̃hɨ ɨaró niiséti masirãsa'. Teê Jesu Cristo opâturi a'tikã́pɨ teeré bu'ê, wãkû nu'kukã'ya. Bo'rêa mɨhatikã yõkoáwɨ̃ mɨhátiro weeró noho Jesu Cristo a'ti nukúkãpɨ a'tîgɨ, marî masîtisere masikã́ weegɨ́sami.

²⁰ A'te pũríkãre ãyuró tɨ'o masíya. Õ'âkɨ̃hɨ yee kiti werê mɨ'tarã naâ “Tohô wa'ârosa'” niî ohâ'kere marî basi wãkusé me'ra “Tohô niî sĩ'riro weé'”, niî masitisa'. Espírito Santo kɨ̃ɨ̂ wee tamúro me'ra pe'e marî teeré tɨ'o masírãsa'.

²¹ Õ'âkɨ̃hɨ yee kiti werê mɨ'tarã marikã naâ ohâ'kere naâ wãkusé me'ra di'akɨ̃ dɨ'pôkãtitikãrã niîwã. A'tîro pe'e weékãrã niîwã. Naâ Espírito Santo ĩ'yosé, ohâ dutiro me'ra Õ'âkɨ̃hɨ yeere ohâkãrã niîwã.

2

¹ Dɨporópɨre Israel kurakãharã ni'karérã “Ɨ̃sâ Õ'âkɨ̃hɨ yee kiti werê mɨ'tarã niî'”, niî sookãrã niîwã. Naâ tohô weé'karo weeró noho mɨsâ tiropɨ niirã́ kẽ'ra meharóta wee sirú tuurãsama. Niî soose me'ra diakɨ̃hɨ́ weeró noho bu'êrãsama. Tohô weérã mɨsâ ẽho peósere dohórẽ'rãsama. Jesu naâ yã'âro weé'ke bu'iri wẽrî wapa yeé'kɨ pe'ere ɨasomé. Naâ tohô weekã́, Õ'âkɨ̃hɨ wãkûtiro naâre bu'îri da'rêgɨsami.

² Naâ numiâre a'me tãrásetisere pãharã́ Jesuré ẽho peórã ĩ'yâ kũurãsama. Naâ tohô weekã́ ĩ'yârã, Jesuré ẽho peótirã pe'e Jesu yeé, diakɨ̃hɨ́kãhasere yã'âro uúkũrãsama.

³ Niyérure ɨâri peharã, niî soose me'ra mɨsâre bu'êrãsama. Naâ tohô weesé wapa naâre bu'îri da'reátehe niî yuu tohasa'. Neê yɨ'rɨ wetísome. Dɨporópɨ “Õ'âkɨ̃hɨ naâre bu'îri da'rê no'orãsama”, niî tohakɨ niîwĩ.

⁴ Õ'âkɨ̃hɨ dɨporópɨre ɨ'mɨ̂sekãharã kɨ̃ɨ̂re werê ko'terã niîmi'kãrãre naâ yã'âro weekã́, bu'îri da'rêkɨ niîwĩ. Tohô weégɨ naâre bu'îri da'reró na'î tĩ'ase tutiripɨ dɨ'te kũú kõ'âkɨ niîwĩ. Be'ró niî pe'tirã masaré beseátihi nɨmɨ niikã́, naâre bu'îri da'rê bahuriógɨsami.

⁵ Noé kɨ̃ɨ̂ niîka tero kẽ'rare Õ'âkɨ̃hɨ kɨ̃ɨ̂re ẽho peóti'kãrãre akobohótikɨ niîwĩ. Akobohótigɨ, niî pe'tirã masá yã'arã́re miô kõ'akɨ niîwĩ. Noé, kɨ̃ɨ̂ nɨmó, põ'rá ɨmɨá i'tiárã, naâ nɨmosã́ numia di'akɨ̃re yɨ'rɨókɨ niîwĩ. Noé masá wãkusére dɨka yuú duti, “Ãyuró weeyá”, niî werêkɨ niîmiwĩ.

⁶ Tohô niikã́ Õ'âkɨ̃hɨ Sodoma, Gomorra wamêtise makarikãharã kẽ'rare bu'îri da'rêkɨ niîwĩ. Bu'îri da'rêgɨ, ɨ̃hɨ̂'ke mara di'akɨ̃ kũyakã́ naâre ɨ̃hâ kõ'a bahuriókɨ niîwĩ. Be'ropɨ́re yã'âro weerã́re “Tohô wa'ârosa'” niî masiáto niîgɨ tohô weékɨ niîwĩ.

⁷ Naâre bu'îri da'rêgɨ, Ló ãyuró weegɨ́ di'akɨ̃re yɨ'rɨ wetíkã weékɨ niîwĩ. Ló Sodomakɨ̃hɨ ãpêrã tii makákãharã naâ yã'â butia'se weekã́ ĩ'yâgɨ, kari butíkɨ niîwĩ.

⁸ Kɨ̃ɨ̂ ãyugɨ́ niîkɨ niîwĩ. Naâ yã'arã́ wa'teropɨ niîgɨ, ɨmɨ̂kohori nɨkɨ naâ yã'â butia'se weekã́ ĩ'yâgɨ, bɨhâ wetikɨ niîwĩ. Tohô niikã́ naâ yã'âro uúkũsere tɨ'ógɨ, bɨhâ weti nemokɨ niîwĩ.

⁹ Õ'âkɨ̃hɨ naâre tohô weé'kere wãkûrã, a'tîro niî masi'. Õ'âkɨ̃hɨ ãyurã́re yã'âro wa'akã́, yɨ'rɨ wetíkã wee masísami. Yã'arã́ pe'ere kɨ̃ɨ̂ bu'îri da'reátihi nɨmɨ niikã́pɨ bu'îri da'reákɨhɨ dɨ'te kũú yuu tohasami.

¹⁰ Masá yã'asé naâ ɨpɨkãháse ɨâri peha weerã́ nohore Õ'âkɨ̃hɨ bu'îri da'rê yɨ'rɨ nɨ'kagɨsami. Tohô niikã́ Jesu Cristo kɨ̃ɨ̂ wiôgɨ niisére naâ yɨ'rɨ́ nɨ'karã nohore ɨpɨ́tɨ bu'îri da'rêgɨsami. Sõ'ó niîkãrã mɨsâre niî soo siharã naâ ɨaró se'saro, no'ó ɨaró weé ma'a kusiasama. Uiró mariró ɨ'mɨ̂sepɨ niirã́ tutuarã́re buhíkã'sama.

¹¹ Ɨ'mɨ̂sekãharã Õ'âkɨ̃hɨre werê ko'terã pe'e niî soorã yɨ'rɨóro tutuâ yɨ'rɨ nɨ'karã niîma. Tohô niîmirã, yã'arã́ Õ'âkɨ̃hɨre werê ko'terã niîmi'kãrãre Õ'âkɨ̃hɨpɨre werê sãa, buhíkã'tisama.

¹² Niî soori masa wa'îkɨ̃rã weeró noho tɨ'o masítisama. Naâ tɨ'o masítisere no'ó ɨaró uúkũ ma'asama. Naâ tɨ'ó yã'aro bahuró tɨ'ó yã'asama. Wa'îkɨ̃rã bahuáka be'ro yẽ'ê wẽhé kõ'a no'oahã weeró noho niîsama. Naâ weeró noho naá kẽ'ra wẽrî diharãsama.

¹³ Ãpêrãre naâ yã'âro weé'ke wapa naá kẽ'ra yã'âro weé no'orãsama. Ɨmɨ̂koho, bahû yoaropɨ no'ó ɨaró yã'âro wee bahá ke'ati tɨ'sasama. Mɨsâ bosê nɨmɨri weekã́, naâ bopôyaro, yã'â butia'ro weérã weesamá. Weé ta'sase me'ra e'katísama.

¹⁴ Numiâre yã'âro wãkusé me'ra di'akɨ̃ ĩ'yâsama. Naâ me'ra yã'âro weé sĩ'risama. Yã'âro weesére kari butítisama. Ẽho peó tutuatirãre naâ weeró noho ɨâri pehakã weesamá. No'ó naâ ĩ'yasé nɨkɨ ɨa poó'kãrã niî yuurã, ɨa nemókã'sama. Naâ bu'îri da'rê no'oahã niîma.

¹⁵ Õ'âkɨ̃hɨ yee, diakɨ̃hɨ́kãhasere du'úrã, diakɨ̃hɨ́ niîtise pe'ere siru tuúsama. Naâ dɨporókɨ̃hɨpɨ Balaão wamêtigɨ Beor makɨ weeró noho weesamá. Kɨ̃ɨ̂ Balaão yã'âro weesé me'ra niyéru wapá ta'a sĩ'rikɨ niîwĩ.

¹⁶ Kɨ̃ɨ̂ tohô weekã́ ĩ'yâgo, kɨ̃ɨ yagó burra kɨ̃ɨ̂re tu'tîko niîwõ. Burra uúkũti'ko niîmigo, Õ'âkɨ̃hɨ kɨ̃ɨ̂ wee tamúro me'ra masá uúkũro weeró noho Balaãore tu'tîko niîwõ. Koô tohô niisé me'ra kɨ̃ɨ̂ weé ma'asere du'ukã́ weéko niîwõ.

¹⁷ Niî soori masa akó wihasé peeri si'bî ke'a'karo weeró noho niîma. Tee peéri ako maríro weeró noho naâ yã'arã́re ãyusé ãpêrãre wee tamúse marísa'. O'me kurári wĩ'ró me'ra tuú wã'karo weeró noho niîma. No'ó ɨaró weé nu'kuma. Naâ ni'kâ diakɨ̃hɨta uúkũtisama. Bu'îri da'rê no'oahã niî tohama. Tohô weérã na'î tĩ'aropɨ tohôta niî bahu dutírãsama.

¹⁸ Niî soori masa uúkũse wapa marísa'. Masî butia'rã weeró noho niî soose me'ra bu'êsama. A'tîro niîsama. “Marî no'ó ɨaró marî weé tɨ'saro noho weekã́, ãyú niî'”, niîsama. Teeré niîrã, naâ yã'âro wee wɨáse me'ra, tohô niikã́ naâ yã'âro ɨâri pehase me'ra ãpêrãre dohórẽ'sama. Jesu Cristore ẽho peó wã'karãre, yã'âro weesére du'ú wã'karãre, opâturi naâ yã'âro weé'kere ɨâri pehakã weesamá taha.

¹⁹ Naâ a'tîro niîsama. “Mɨsâ ãpêrã dutisé doka nií wee'. Tohô weérã mɨsâ ɨaró weeyá”, niîmisama. Tohô niîmirã, naâ basi yã'asére weé du'u masitirã, yã'asé dutisé doka niî wã'yarã weeró noho niîsama. Niî pe'tise marî yã'âro weesére du'u masítise tee doká niî wã'ya ko'tekã weé'.

²⁰ Marî wiôgɨ Jesu Cristo marîre yɨ'rɨógɨre ẽho peórã, a'ti nukúkãkãhase yã'asére yɨ'rɨ wetíwɨ. Tohô weéka be'ro niîmikã, opâturi yã'asére wee nemó peorã noho too dɨpóro niî'karo nemoró yã'âro tohasamá.

²¹ Diakɨ̃hɨ́ta naâre Jesu Cristo yeere, diakɨ̃hɨ́kãhasere masîti yɨ'rɨokã, ãyu boópã. Naâ Jesu Cristore ẽho peóka be'ro ãyusé dutisé, naâre werê'kere du'úrã, yã'â butia'ro weérã weemá.

²² Naâ opâturi yã'âro wee nemó peorã, masá naâ uúkũ wɨase noho weérã weemá. Naâ a'tîro uúkũ wɨasama. Diâyɨ kɨ̃ɨ̂ etoáka be'ro opâturi kɨ̃ɨ̂ etoá'kere ba'âsami taha. Apêye kẽ'ra niî'. Yesê ɨóka be'ro opâturi meharóta ũ'îri bɨhɨropɨ sĩ'kô kũyasami taha. Naâ Jesu Cristore ẽho peóka be'ro yã'âro weérã taha, teé weeró noho niîma.

3

¹ Yɨ'ɨ̂ ma'irã́, mɨsâre ni'kâ pũri ohâ tohawɨ. Too dɨpóroka pũri, tohô niikã́ a'ti pũrí me'ra mɨsâre diakɨ̃hɨ́ wãkuáto niîgɨ ohâ'. Mɨsâ masî'kere wãkû nu'ku dutigɨ werê kasa'.

² Dɨporókãharãpɨ Õ'âkɨ̃hɨ yee kiti werê mɨ'tarã ãyurã́ naâ ohâ'kere wãkûya. Tohô niikã́ marî wiôgɨ, marîre yɨ'rɨógɨ dutisére wãkûya. Teeré ɨ̃sâ Jesu Cristo bese kũú'kãrã mɨsâre werê turiawɨ.

³ A'teré masî mɨ'taya. A'ti ɨmɨ́koho pe'tiátoho dɨporo masá Õ'âkɨ̃hɨ yeere buhíkã'rãsama. No'ó naâ yã'âro weé sĩ'risere weerã́sama.

⁴ A'tîro niîrãsama: “Jesu Cristo kɨ̃ɨ̂ “A'tîgɨti” niî'ke de'ró wa'âmitito?” niîrãsama. A'tîro niî buhíkã'rãsama. “Marî yẽkɨ sɨmɨá wẽrî diha pe'tia tohama. A'ti nukúkã neê weé nɨ'ka'karo weeró noho meharóta niî nu'kukã'. Neê a'tîsome”, niî wãkûsama.

⁵ A'tîro wa'â'ke pe'ere wãkû sĩ'ritisama. Dɨporópɨ Õ'âkɨ̃hɨ kɨ̃ɨ̂ uúkũse me'ra ɨ'mɨ̂se, a'ti nukúkã bahúrẽ'kɨ niîwĩ. Kɨ̃ɨ̂ dutiró me'ra di'tâ akó po'peapɨ niî'ke bahuákaro niîwɨ. Tohô niikã́ akó me'ra a'ti nukúkãkãhase pĩ'rí, bɨkɨâkaro niîwɨ.

⁶ Akó me'rata taha Noé niîka terore Õ'âkɨ̃hɨ a'ti nukúkãre miô kõ'akɨ niîwĩ. Kɨ̃ɨ̂ tohô weé'ke me'ra “Õ'âkɨ̃hɨ a'ti nukúkãre dɨka yuú tohakɨ niîwĩ”, niî masî no'o'.

⁷ A'tóka tero niisépɨa maha ɨ'mɨ̂se niisé, a'tí di'takãhase pekâ me'e ɨ̃hâ kõ'a no'oatehe niî'. Be'ró Õ'âkɨ̃hɨ kɨ̃ɨ̂ uúkũse me'rata ɨ̃hâ pe'okã'gɨsami. Kɨ̃ɨ̂ masaré beseátihi nɨmɨ niikã́, yã'arã́re bu'îri da'rêgɨ ɨ̃hâ kõ'agɨsami.

⁸ Yɨ'ɨ̂ ma'irã́, a'teré wãkûya. Marî tɨ'ó yã'akã pe'e maa, mil kɨ'mari yoâ butia'. Õ'âkɨ̃hɨ pe'ere mil kɨ'mari ni'kâ nɨmɨ weeró noho niísa'. Ni'kâ nɨmɨ kẽ'ra kɨ̃ɨ̂re meharóta mil kɨ'mari weeró noho niísa'. Ni'kâro noho ĩ'yâsami.

⁹ Marî wiôgɨ kɨ̃ɨ̂ “Opâturi a'tîgɨti” niî'kere masá a'tîro wãkûsama: “Yogó yɨ'rɨami”, niîsama. Naâ wãkusé diakɨ̃hɨ́ nií wee'. Masaré pahá yã'agɨ, maatá a'tîtisami yuhûpɨ. Neê ni'kɨré pekâ me'epɨ wa'akã́ ɨatísami. Niî pe'tirã naâ yã'asére bɨhâ weti dɨka yuúkã ɨasamí. Tohô weégɨ a'tîtisami yuhûpɨ.

¹⁰ Marî wiôgɨ opâturi a'ti nukúkãpɨ a'tirí nɨmɨ marî neê wãkûtiri nɨmɨ niîrosa'. Ni'kɨ́ yahagɨ́ yamî wãkûtiro yahágɨ a'tîgɨ weeró noho a'tîgɨsami. Kɨ̃ɨ̂ dihátiri nɨmɨ a'tîro wa'ârosa'. Pũûro bɨsɨsé me'ra niî pe'tise ɨ'mɨáropɨ niisé pe'tiá wa'ârosa'. Niî pe'tise ɨ̃hɨ̂ pe'ti diha wa'ârosa'. A'tí di'takãhase pe'e kẽ'ra, ɨ̃hɨ̂ bahu dutírosa'.

¹¹ “Niî pe'tise ɨ̃hɨ̂ pe'ti diha wa'ârosa'” niisére tɨ'ó, yã'âro weesétisere du'ú, Õ'âkɨ̃hɨ ɨaró pe'e ãyuró weé nu'kurã.

¹² Marî wiôgɨ a'tiátehere e'katíse me'ra kɨ̃ɨ̂re ko'têrã. Kɨ̃ɨ̂re maatá a'tî dutirã marî ãyuró weé põo tẽóta basióro ãyuró weerã́. Kɨ̃ɨ̂ a'tirí nɨmɨ niikã́, niî pe'tise ɨ'mɨárokãhase ɨ̃hɨ̂ pe'ti diharosa'. Niî pe'tise a'tí di'takãhase, ɨ'mɨáropɨkãhase sipî pe'tirosa'.

¹³ Marî pe'e Õ'âkɨ̃hɨ kɨ̃ɨ̂ “Apé ma'má ɨ'mɨ̂se, ma'má di'ta weegɨ́ti” niî'kere ko'tê'. Toopɨ́re niî pe'tirã ãyusé di'akɨ̃re weerã́sama.

¹⁴ Tohô weérã yɨ'ɨ̂ ma'irã́, kɨ̃ɨ̂ a'tisére ko'têrã, niî pe'tise mɨsâ weé põo tẽóro ãyuró weeyá. A'tîro weekã́, Jesu a'tîgɨ, mɨsâre ãyurã́, bu'îri moorã́, ãyuró ehêri põ'ratirãre boka ehágɨsami.

¹⁵ Mɨsâ a'tîro masîya. Marî wiôgɨ marîre pahá yã'agɨ, marî yɨ'rɨkã́ ɨa sãágɨ ko'têsami. Tohô weégɨ maatá a'tîtisami. Marî akawerégɨ Paulo marî ma'igɨ́ kẽ'ra tohôta mɨsâre ohâkɨ niîwĩ. Õ'âkɨ̃hɨ kɨ̃ɨ̂re masisé o'osé me'ra tohô ohâkɨ niîwĩ.

¹⁶ Niî pe'tise kɨ̃ɨ̂ ohâ'ke pũri nɨkɨ Jesu Cristo opâturi a'tiátehere, tohô niikã́ marîre yã'âro weetíkã'ato niîgɨ ohâsami. Apêye ni'karé kɨ̃ɨ̂ ohâ'ke diâsa yɨ'rɨa'. Masîtirã, tohô niikã́ ẽho peó tutuatirã teeré ãpêrãre werê su'riakã'sama. Naâ apêye Õ'âkɨ̃hɨ yaa pũripɨ ohâ'kere werê su'riaro weeró noho weesamá. Tohô weérã bu'îri da'rê no'orãsama.

¹⁷ Yɨ'ɨ̂ ma'irã́, yɨ'ɨ̂ mɨsâre naâ niî soorã weeátehere werê yuu tohapɨ. Mɨsâ tohô weérã masî toha'. Naâ yã'arã́ mɨsâre niî soori niîrã, tɨ'o masíya. Tohô niikã́ mɨsâre ẽho peó tutuarã niî'kãrãre ẽho peó du'ukã weetíkã'ato.

¹⁸ Marî wiôgɨ Jesu Cristo marîre yɨ'rɨógɨ pe'ere masî nemoya. Kɨ̃ɨ̂ marîre ma'imí niisére masîrã, kɨ̃ɨ̂re nemoró ẽho peó wã'kaya. Niî pe'tirã ni'kâroakãre, be'ropɨ́ kẽ'rare Jesu Cristore “Ãyú yɨ'rɨami”, niî nu'kukã'rã. Tohôta niiró ɨá'. Toô kã'rota ohâ'. Pedro