1

¹ Yɨ'ɨ̂re Jesu Cristo kɨ̃ɨ yeé kitire bu'ê dutigɨ bese kũúwĩ. A'ti pũrí me'ra mɨsâre ãyu dutíse o'ôo'. Mɨsâ Ponto, Galácia, Capadócia, Ásia, Bitínia wamêtise di'tapɨ Jesu Cristore ẽho peóse bu'iri ãpêrã yã'âro weekã́ wa'âste wã'ka'kãrãre ohâ'.

² Marî pakɨ Õ'âkɨ̃hɨ dɨporópɨ kɨ̃ɨ̂ ɨá'karo nohota marîre kɨ̃ɨ̂ põ'rá niiáto niîgɨ besé tohakɨ niîwĩ. Espírito Santo me'ra marî yã'arã́ niî'kãrãre dɨka yuúkɨ niîwĩ. Marîre kɨ̃ɨ̂ makɨ́ Jesu Cristo ɨaró wee dutígɨ besékɨ niîwĩ. Tohô niikã́ kɨ̃ɨ̂ makɨ́ kurúsapɨ wẽrîgɨ diî a'mâ bɨrose me'ra marî yã'âro weé'kere akobohógɨti niîgɨ, besékɨ niîwĩ. Õ'âkɨ̃hɨ mɨsâ ehêri põ'raripɨ ãyuró tɨ'ó yã'ase, niî pe'tise ãyusére o'ô nemoato.

⁴

³ Õ'âkɨ̃hɨ, marî wiôgɨ Jesu Cristo pakɨre “Ãyú'” niîrã. Kɨ̃ɨ̂ marîre pahá yã'agɨ, kɨ̃ɨ̂ põ'rá sãhakã́ weékɨ niîwĩ. Kɨ̃ɨ̂ makɨ́ Jesu Cristo wẽrî'kɨpɨre masó'ke me'ra marî too dɨpóro yã'âro niiséti'kere akobohókɨ niîwĩ. Teeré weégɨ, marîre opâturi bahuá apo'kãrãre weeró noho weékɨ niîwĩ. Õ'âkɨ̃hɨ kɨ̃ɨ̂ põ'raré “Ãyú butia'sere o'ôgɨti”, niîkɨ niîwĩ. Kɨ̃ɨ̂ o'oátehere marî e'katíse me'ra yuû kuerã weé'. Teeré ɨ'mɨ̂sepɨ kɨo yuú tohasami. Kɨ̃ɨ̂ o'oátehe a'ti nukúkãkãhase weeró noho pe'tí, boâsome. Niî nu'kukã'rosa'.

⁵ Marî Õ'âkɨ̃hɨre ẽho peó yuukã, kɨ̃ɨ̂ tutuaró me'ra marîre ko'têsami. Jesu Cristo opâturi a'ti nukúkãpɨre a'tîgɨ, niî pe'tirã ĩ'yóropɨ “Ã'rá yɨ'ɨ̂ yɨ'rɨó'kãrã niîma. Yɨ'ɨ̂ me'ra niî nu'kurãsama”, niî ĩ'yogɨ́sami.

⁶ A'ti nukúkãpɨre niîrã, marî pi'etí ni'irã weé' yuhûpɨ. Tohô pi'etímirã, ɨ'mɨ̂sepɨ Jesu Cristo marîre o'oátehere wãkûrã, e'katí yuurã.

⁷ Marî Jesu Cristore ẽho peóse ouro besesé weeró noho niî'. Masá ourota niîti? niîrã, pekâ me'e bu'ipɨ asipó peosama. Sipî pehaka be'ro yã'asé marari ɨ̃hɨ̂ pe'ti diha wa'ása'. Ãyusé ouro di'akɨ̃ tohása'. A'té weeró noho marîre Jesu Cristore diakɨ̃hɨ́ta ẽho peómiti naa? niîro, yã'âro wa'ása'. Marî yã'âro yɨ'rɨ́rã, tee marári ɨ̃hɨ̂ pe'ti'karo weeró noho yã'asére weé du'usa'. Tohô niikã́ Jesu Cristore ẽho peó nemosa'. Kɨ̃ɨ̂re ẽho peó du'utikã ĩ'yârã, masá diakɨ̃hɨ́ta marîre kɨ̃ɨ̂re ẽho peóma, niî ĩ'yârãsama. Ouro wapa bɨhɨ́ niî'. Wapa bɨhɨ́miro, pe'tiá wa'ása'. Marî Jesu Cristore ẽho peóse ouro nemoró wapatí'. Tee pũríkã neê pe'titísa'. Tohô weégɨ Jesu Cristo marîre opâturi a'ti nukúkãpɨre a'tîgɨ, “Yɨ'ɨ̂re ãyuró ẽho peówɨ”, niîgɨsami.

⁹

⁸ Mɨsâ Jesu Cristore a'ti nukúkãpɨ niikã́ ĩ'yâti'kãrã niîmirã, kɨ̃ɨ̂re ma'í'. A'tóka terore kɨ̃ɨ̂re ĩ'yâtimirã, ẽho peó'. Mɨsâ kɨ̃ɨ̂re ẽho peókã, mɨsâre pekâ me'epɨ wa'â boo'kãrãre yɨ'rɨkã́ weegɨ́sami. Tohô weérã mɨsâ Õ'âkɨ̃hɨ tiropɨ wa'aátehere wãkûrã, pũûro e'katí'. De'ró niî werê nemo boosari? Werêta basió wee'.

¹⁰ Dɨporópɨ Õ'âkɨ̃hɨ yee kiti werê mɨ'tarã a'tîro niîkãrã niîwã: “Õ'âkɨ̃hɨ masá yã'âro weé'kere akobohó, naâre yɨ'rɨógɨsami”, niîkãrã niîwã. A'teré werêmirã, naâ basi weresére tɨ'o masítikãrã niîwã. Tohô weérã teeré masî sĩ'rirã, ɨpɨ́tɨ bu'ê wãkû nɨrɨkãrã niîwã.

¹¹ Espírito Santo wee tamúse me'ra a'tîro werê yuukãrã niîwã: “Masaré yɨ'rɨoákɨhɨ pũûro pi'etí wẽrîgɨsami. Wẽrî'kɨpɨ niîmigɨ, masagɨ́sami. Kɨ̃ɨ̂ masáka be'ro ɨ'mɨ̂sepɨ mɨhâa, kɨ̃ɨ̂ pakɨ tiró wiôgɨ duhirí kumuro diakɨ̃hɨ́ pe'e duhîgɨsami.” Espírito Santo tohô niisére tɨ'órã, Õ'âkɨ̃hɨ yee kiti werê mɨ'tarã “De'ró niikã́, noaré tohô wa'ârosari?” niîrã, pũûro masî sĩ'rikãrã niîmiwã.

¹² Õ'âkɨ̃hɨ naâ masî sĩ'rikã ĩ'yâgɨ, naâre a'tîro werêkɨ niîwĩ: “A'te kití mɨsâ niirí kurare wa'âsome yuhûpɨ. Be'rokãhárãpɨ a'teré ĩ'yârãsama”, niîkɨ niîwĩ. Naâre teeré werê yuugɨ, marî a'tóka terokãharã pe'ere werêgɨ weékɨ niîwĩ. Tohô weégɨ Õ'âkɨ̃hɨ a'tóka terore a'tîro weemí maha. Espírito Santo ɨ'mɨ̂sepɨ niigɨ́re kɨ̃ɨ yeé kiti wererã́ me'ra mɨsâre werê dutigɨ o'ôo'kɨ niîwĩ. Naâ Espírito Santo tutuaró me'ra teeré a'tîro werêma. “Jesu Cristo a'tî tohakɨ niîwĩ. Marîre yɨ'rɨó'kɨ niîmi”, niîma. Õ'âkɨ̃hɨre werê ko'terã ɨ'mɨ̂sekãharã kẽ'ra masaré yɨ'rɨósere “De'ró niî butia'ti?” niî masî sĩ'risama. Õ'âkɨ̃hɨ marîre yã'asé mariró niiséti dutise niî'

¹³ Õ'âkɨ̃hɨ marîre ma'ígɨ, yã'âro marî weé'kere akobohó tohakɨ niîwĩ. Tohô weérã mɨsâ weeátehere ãyuró wãkû yuuya. Mɨsâ yã'âro weé sĩ'risere weetíkã'ya. Wãkû tutuaya. Õ'âkɨ̃hɨ ãyuró weégɨ, marîre Jesu Cristo opâturi a'ti nukúkãpɨ a'tikã́ kɨ̃ɨ̂ o'oátehere pũûro wãkû nɨrɨya. Teeré wãkûrã, e'katíse me'ra ko'têya.

¹⁴ Wi'marã́ ãyurã́ naâ pakɨ sɨmɨá dutisére ãyuró yɨ'tisamá. Naâ weeró nohota mɨsá kẽ'ra marî pakɨ Õ'âkɨ̃hɨ dutisére ãyuró yɨ'tiyá. Mɨsâ too dɨpóropɨ Õ'âkɨ̃hɨre masîtirã, yã'âro ɨâri pehasere weékãrã niîwɨ. Ni'kâroakãre mɨsâ yã'âro ɨâri pehasere du'úkã'ya maha.

¹⁵ A'tîro pe'e weesétiya. Õ'âkɨ̃hɨ marîre besé'kɨ yã'asé moogɨ́ niîmi. Tohô weérã marî yã'asé marirã́ niiró ɨá'.

¹⁶ Õ'âkɨ̃hɨ yee kiti ohâka pũripɨ a'tîro ohâ no'okaro niîwɨ: “Yɨ'ɨ̂ ãyugɨ́, yã'asé moogɨ́ niî'. Tohô weérã mɨsá kẽ'ra yã'asé marirã́ niisétiya”, niîkɨ niîwĩ Õ'âkɨ̃hɨ.

¹⁷ Mɨsâ Õ'âkɨ̃hɨre sẽrírã, kɨ̃ɨ̂re “Pakɨ́” niísa'. Kɨ̃ɨ̂ niî pe'tirãre ni'kâro noho marî weé'ke nɨkɨre bese bɨrógɨsami. Neê ni'kɨré dɨ'asomé. Tohô weérã mɨsâ a'ti ɨmɨ́kohopɨre katiró põo tẽóro Õ'âkɨ̃hɨre wio pesáse me'ra tɨ'ó yã'aya.

¹⁸ Mɨsâ yẽkɨ sɨmɨá niiséti'karo noho wee sirú tuu mɨhati'ke wapa maríkaro niîwɨ. Teé wapa marísere kõ'âgɨ, Õ'âkɨ̃hɨ yɨ'rɨókɨ niîwĩ. Mɨsâ a'tîro masî'. Kɨ̃ɨ̂ marîre bu'îri da'rê boo'kere wapa yeé wĩrogɨ, pe'tisé noho me'ra, ouro, niyéru me'ra wapa yeétikɨ niîwĩ.

¹⁹ A'tîro pe'e weékɨ niîwĩ. Kɨ̃ɨ̂ makɨ́ Jesu Cristo kɨ̃ɨ̂ ɨpɨ́tɨ ma'igɨ́ wẽrîgɨ diî a'mâ bɨrose me'ra marîre yɨ'rɨókɨ niîwĩ. Ɨ̃sâ Judeu masa yẽkɨ sɨmɨápɨa naâ yã'âro weé'ke wapa Õ'âkɨ̃hɨre akobohóse sẽrírã, a'tîro weékãrã niîwã. Ovelha dohôri wi'i niîtigɨre, kamî marigɨ́re, niî pe'tiro kɨ̃ɨ̂ ɨpɨ́ ãyugɨ́re wẽhé, Õ'âkɨ̃hɨre ɨ̃hâ morokãrã niîwã. Kɨ̃ɨ̂, ovelha ãyugɨ́ niî'karo noho Jesu Cristo ãyugɨ́ waro, yã'asé moogɨ́ niîmi. Kɨ̃ɨ̂ wẽrîgɨ diî a'mâ bɨrose me'ra marî yã'âro weé'kere yɨ'rɨókɨ niîwĩ.

²⁰ Õ'âkɨ̃hɨ a'ti ɨmɨ́koho weeátoho dɨporo “Yɨ'ɨ̂ makɨ masaré yɨ'rɨógɨsami”, niî besé tohakɨ niîwĩ. Tohô besemígɨ, maatá o'ôo'tikɨ niîwĩ. A'tóka teropɨ mari yeé niiátehere yɨ'rɨoákɨhɨre o'ôo'kɨ niîwĩ.

²¹ Jesu Cristo wẽrisé me'ra Õ'âkɨ̃hɨre ẽho peó no'o'. Kɨ̃ɨ̂ Jesu Cristore wẽrî'kɨpɨre masókɨ niîwĩ. Masó, ɨ'mɨ̂sepɨ kɨ̃ɨ̂re mii mɨhákɨ niîwĩ. Toopɨ́ kɨ̃ɨ̂re wiôgɨ sõróokɨ niîwĩ. Marîre ẽho peó dutigɨ tohô weékɨ niîwĩ. Tohô niikã́ marî ɨ'mɨ̂sepɨ wa'aátehere e'katíse me'ra yuû kue dutigɨ tohô weékɨ niîwĩ.

²² Mɨsâ diakɨ̃hɨ́ niisére yɨ'tírã, Jesu Cristore ẽho peórã weékãrã niîwɨ. Kɨ̃ɨ̂re ẽho peórã, mɨsâ yã'âro weeséti'kere du'úkãrã niîwɨ. Tohô weérã mɨsâ ni'kâroakãre bu'îri marirã́ niî'. Mɨsâ ni'kɨ́ põ'ra weeró noho a'mêri ma'í'. A'mêri ma'írã, bu'îkãhase uúkũse me'ra di'akɨ̃ ma'itíkã'ya. Niî pe'tise mɨsâ weesé me'ra pe'e ma'iyá.

²³ A'tîro niî'. Õ'âkɨ̃hɨ uúkũse niî nu'kukã'rosa'. Marî teeré ẽho peórã, kɨ̃ɨ̂ põ'rá sãháakãrã niîwɨ. Tohô weérã opâturi bahuá apo'kãrã weeró noho niî'. Marî pakɨ sɨmɨá boâ dihasama. Marî opâturi bahuá aporã, naâ boâ diharo weeró noho wa'âsome. Õ'âkɨ̃hɨ põ'ra sãhárã pe'e, kɨ̃ɨ̂ me'ra katî nu'kukã'rãsa'.

²⁴ Õ'âkɨ̃hɨ yee kiti ohâka pũripɨ a'tîro ohâ no'okaro niîwɨ:

Taâ yãî wẽrî pe'tia wa'ása'. Masá kẽ'ra tohôta niî pe'tirã wẽrîrãsama. O'ôri kẽ'ra ãyusé niîmiro, boâ dihasa'. Masá kẽ'ra pehé kɨorã́, wiôrã niîmi'kãrã wẽrîrãsama.

²⁵ Naâ kɨosé kẽ'ra pe'tirósa'. Õ'âkɨ̃hɨ uúkũse pũrikã neê pe'tisomé. Niî nu'kukã'rosa', niî ohâ no'okaro niîwɨ. Mɨsâre tee kitíre ãpêrã werêkãrã niîwã. Naâ wereséta ãyusé, neê pe'titíse kiti niî'.

2

¹ Mɨsâ Õ'âkɨ̃hɨ põ'ra niî'. Tohô weérã niî pe'tise yã'asére du'úkã'ya. Ãpêrãre niî sootikã'ya. Wee soótikã'ya. Ãpêrã yeere ɨotíkã'ya. Uukahátikã'ya.

³

² Mɨsâ Õ'âkɨ̃hɨ ãyugɨ́ niîmi niisére masî tohasa'. Tohô weérã wi'marã́ neê bahuárã naâ pakó õpekṍre ɨpɨ́tɨ mi'rí sĩ'rirã weeró noho weeyá. Õ'âkɨ̃hɨ yee ãyusé kitire ɨpɨ́tɨ tɨ'sasé me'ra tɨ'ó sĩ'riya. Wi'marã́ naâ pakosã́ numia yee õpekṍre mi'rírã, ĩ'yo duárã wa'âsama. Õ'âkɨ̃hɨ uúkũse wi'magɨ́ pako õpekṍ weeró noho niî'. Teé diakɨ̃hɨ́ werê me'rikã'. Marî teeré wãkû nu'kurã, kɨ̃ɨ̂re ẽho peó tutua nemorãsa'. Kɨ̃ɨ̂re masî nemoato niîgɨ marîre yɨ'rɨókɨ niîwĩ. Jesu Cristo ɨ̃tâga wi'í yeê nɨ'kakaha weeró noho niîmi niisé niî'

⁴ Mɨsâ Jesu Cristore ẽho peó'. Tohô weérã kɨ̃ɨ̂ me'ra ãyuró niisétiya. Kɨ̃ɨ̂ katîgɨ, marîre kɨ̃ɨ̂ me'ra katikã́ weemí. Kɨ̃ɨ̂ niî nu'kukɨ̃'sami. Ãpêrã kɨ̃ɨ̂reta teékãrã niîwã. Naâ teemíkã, kɨ̃ɨ̂ pakɨ́ Õ'âkɨ̃hɨ pe'e kɨ̃ɨ̂re “Ãyú yɨ'rɨgɨ niîmi”, niî besékɨ niîwĩ. Besé toha, kɨ̃ɨ̂re wiôgɨ sõróokɨ niîwĩ.

⁵ Mɨsâre ãyuró masî dutigɨ a'tîro werêgɨti. Õ'âkɨ̃hɨ ɨ̃tâ peeri me'ra ni'kâ wi'i ãyurí wi'i weégɨ weeró noho weesamí. Ɨ̃tâga ãyukahá me'ra yeê nɨ'kasami. Tutuarí wi'i niiáto niîgɨ tohô weesamí. Jesu Cristota kɨ̃ɨ̂ neê waro wi'í yeê nɨ'kaka ɨ̃tâga weeró noho niigɨ́ niîmi. Marîpɨa apêye naâ yeê turia mɨhase weeró noho niî'. Marî niî pe'tirã ni'kâro me'ra Õ'âkɨ̃hɨ kɨ̃ɨ̂ weéka wi'i weeró noho niî'. Tohô weérã kɨ̃ɨ yarã́ waro niîrã, Jesu Cristo wee tamúse me'ra sacerdotea weeró noho Õ'âkɨ̃hɨ yeere da'ra masí'. Ãyuró weérã, ãpêrã yee niiátehere sẽri basá masi'. Tohô niikã́ Õ'âkɨ̃hɨre “Ãyú'” niî masi'. Marî tohô weekã́ ĩ'yâgɨ, Õ'âkɨ̃hɨ e'katísami.

⁶ Dɨporókãharãpɨ kẽ'ra teekãháse Õ'âkɨ̃hɨ kɨ̃ɨ̂ uúkũ'kere a'tîro ohâkãrã niîwã:

Ni'kâ wi'i, wi'í Jerusalẽ́pɨre weegɨ́ti. Tií wi'ire weégɨ, ni'kâga ɨ̃tâga ãyukaháre besegɨ́ti. Tutuarí wi'i wa'aáto niîgɨ tigá me'ra nɨ'kagɨ́ti. Yɨ'ɨ̂ ɨ̃tâgare uúkũgɨ, yɨ'ɨ̂ makɨ pe'ere wamê peogɨ weé'. Kɨ̃ɨ́ta niîmi yɨ'ɨ̂ besé'kɨ. Yɨ'ɨ̂ ĩ'yakã́, ãyú yɨ'rɨagɨ niîmi. Kɨ̃ɨ̂re ẽho peórã pũûro e'katírãsama. “Mehô warota ẽho peókãti”, niîsome, niî ohâkãrã niîwã Õ'âkɨ̃hɨ yee kiti werê mɨ'tarã.

⁷ Mɨsâ Jesu Cristore ẽho peórã ãyuró e'katíse me'ra kɨ̃ɨ̂re tɨ'ó yã'asa'. Ãpêrã pe'e kɨ̃ɨ̂re ẽho peóti tĩharã, mɨsâ weeró noho tɨ'ó yã'atisama. Mehô niigɨ́re weeró noho tɨ'ó yã'akã'sama. Ãpêrã Õ'âkɨ̃hɨ yee kiti werê mɨ'tarã a'tîro ohâkãrã niîwã taha:

Masá ɨ̃tá me'ra wi'í weerã́tirã ni'kâgare naâ ɨatíkahare, kõ'âsama. Naâ kõ'âkaga me'ra ãpêrã pe'e tutuarí wi'i weesamá. Tigá marikã́ maa, wi'í yeêya mari boópã. A'té a'tîro niî sĩ'riro weé'. Wiôrã Judeu masa tigá ɨ̃tâgare weeró noho Jesu Cristore ɨatíwã. Naâ ɨatímikã, kɨ̃ɨ̂ pakɨ́ Õ'âkɨ̃hɨ pe'e kɨ̃ɨ̂re besékɨ niîwĩ. Besé, kɨ̃ɨ̂re wiôgɨ sõróokɨ niîwĩ. Kɨ̃ɨ̂ marikã́re, marî Õ'âkɨ̃hɨ põ'ra sãha masíti boopã.

⁸ Apêye ohâ nemokãrã niîwã taha:

Õ'âkɨ̃hɨ kɨ̃ɨ̂ besékaga ɨ̃tâgapɨ masá pɨ'â tuu, bɨrɨ̂ ke'arãsama. A'té a'tîro niî sĩ'riro weé'. Jesu Cristore Õ'âkɨ̃hɨ besékɨ niîwĩ. Tigapɨ́ pɨ'â tuu, bɨrɨ̂ ke'a'karo weeró noho Jesu Cristore ẽho peótirã bu'îri da'rê no'orãsama. Too dɨpóropɨta maatá Õ'âkɨ̃hɨ kɨ̃ɨ̂ makɨré ẽho peótirã tohô wa'ârãsama, niî tohakɨ niîwĩ.

⁹ Marî pũrikã naâ weeró noho nií wee'. Õ'âkɨ̃hɨ kɨ̃ɨ yarã́ niiáto niîgɨ marîre besékɨ niîwĩ. Tohô weérã marî wiôgɨ yarã sacerdotea weeró noho kɨ̃ɨ yeére da'rarã́ niî'. Õ'âkɨ̃hɨ marîre kɨ̃ɨ yaá kurakãharã sãhakã́ weékɨ niîwĩ. Yã'asé mariró niisétikã weékɨ niîwĩ. Dɨporópɨ Õ'âkɨ̃hɨ kɨ̃ɨ yarã́ masá Israel kurakãharãre yɨ'ɨ̂ werê'ke peheré weékɨ niîwĩ. Mɨsâ Jesu Cristore ẽho peórã niî'. Tohô weégɨ mɨsâre meharóta weemí. Õ'âkɨ̃hɨ marîre ãyuró weé'kere ãpêrãre werê dutigɨ tohô weemí. Õ'âkɨ̃hɨ ãyú yɨ'rɨagɨ marî yã'âro weé'kere akobohómi. Akobohó, na'î tĩ'aropɨ niî'kãrãre marîre yɨ'rɨómi. Tohô weérã ni'kâroakãre kɨ̃ɨ̂ põ'rá bo'rê yuuropɨ niirã́ weeró noho niî'.

¹⁰ Dɨporópɨ ni'kɨ́ Õ'âkɨ̃hɨ yee kiti werê mɨ'tagɨ a'tîro niîkɨ niîwĩ: “Õ'âkɨ̃hɨ pãharã́ Judeu masa niîtirãre yɨ'rɨógɨsami.” Tohô weérã mɨsâ too dɨpóropɨre Õ'âkɨ̃hɨ põ'ra meheta niîkãrã niî ni'iwɨ yuhûpɨ. Ni'kâroakãre kɨ̃ɨ̂re ẽho peóka be'ro kɨ̃ɨ̂ põ'rá niî' maha. Õ'âkɨ̃hɨre mɨsâ ẽho peoátoho dɨporo kɨ̃ɨ̂ mɨsâre ma'isére, kɨ̃ɨ̂ pahá yã'asere masîtikãrã niîwɨ. Ni'kâropɨta a'teré masî' maha. Pedro Jesu Cristore ẽho peórãre “A'tîro weeyá” niisé niî'

¹¹ Yɨ'ɨ̂ mɨsâre pũûro ma'ísa'. Ni'kâroakã yɨ'ɨ̂ wereátehere mɨsâ weekã́ ɨása'. Marî a'ti nukúkãpɨre siharí masa niî'. Marî niiátoho waro ɨ'mɨ̂sepɨ niî'. Toopɨ́ niî nu'kukã'rãsa'. Tohô weérã marî yã'âro weé sĩ'risere weetíkã'rã. Marî yã'âro weé sĩ'rise ãyuró weé sĩ'rise me'ra a'me kẽése niî'. Teé yã'âro weé sĩ'rise ãyuró weesé pe'ere ka'mú ta'a sĩ'risa'. Õ'âkɨ̃hɨ pe'e marîre ãyuró weekã́ ɨasamí.

¹² Mɨsâ Jesu Cristore ẽho peótirã wa'teropɨ niísa'. Kɨ̃ɨ̂re ẽho peóse bu'iri mɨsâre “Yã'arã́ niîma”, niî uukahásama. Mɨsâ naâ wa'teropɨre ãyuró niisétiya. Tohô weekã́, naâ tohô uukahámirã, mɨsâ ãyuró weesétisere ĩ'yârãsama. Teeré ĩ'yârã, siâpe me'ra pãharã́ Jesu Cristore ẽho peórãsama. Tohô weérã kɨ̃ɨ̂ opâturi a'tikã́, mɨsâ weeró nohota naá kẽ'ra Õ'âkɨ̃hɨre “Mɨ'ɨ̂ ãyugɨ́, tutuagɨ́ niî'”, niî ẽho peórãsama.

¹⁴

¹³ Marî wiôgɨ Jesu Cristore ẽho peórã niî tĩharã, a'tîro weeró ɨá'. A'tí di'takɨ̃hɨ wiôgɨ waro, kɨ̃ɨ̂ dokakãharã wiôrã, tohô niikã́ niî pe'tirã a'ti nukúkãkãharã wiôrã dutisére yɨ'tiró ɨá'. Wiôgɨ waro kɨ̃ɨ̂ dokakãharãre yã'âro weerã́re bu'îri da'rê dutisami. “Ãyuró weerã́ pe'ere ‘Mɨsâ ãyuró weeápɨ’ niîya”, niîsami.

¹⁵ Õ'âkɨ̃hɨ mɨsâ ãyuró weekã́ ɨasamí. Tohô weekã́, ãpêrã mɨsâre uukahámi'kãrã mehô warota uukahá ma'akã'rãsama. Õ'âkɨ̃hɨ mɨsâ ãyuró weesé me'ra naâ uukahá ma'a'kãrãre, tɨ'o masítirãre di'ta maríkã weekã́ ɨasamí.

¹⁶ Õ'âkɨ̃hɨ marîre yɨ'rɨó tohakɨ niîwĩ. Tohô weérã yɨ'rɨó no'o'kãrã weeró noho weesétirã. A'tîro wãkûtikã'rã. “Yɨ'ɨ̂ ãpêrã dutisé doka nií wee'. Tohô weégɨ yɨ'ɨ̂ ɨaró weegɨ́ti”, niîtikã'rã. A'tîro pe'e weerã́. Õ'âkɨ̃hɨre ma'í, kɨ̃ɨ̂ ɨaró weerã́. Yã'asére weetíkã'rã. Da'rá ko'terã naâ wiôgɨ dutisére ãyuró yɨ'tirã́ weeró noho marí kẽ'ra Õ'âkɨ̃hɨ dutisére yɨ'tirã́.

¹⁷ Dɨka waáro mariró niî pe'tirãre ni'kâro noho ĩ'yârã. Jesu Cristore ẽho peórãre ma'irã́. Õ'âkɨ̃hɨre nɨkɨ̂ ĩ'yase me'ra ẽho peórã. A'tí di'takɨ̃hɨ wiôgɨre wio pesáse me'ra tɨ'ó yã'arã. Jesu Cristo pi'etígɨ nɨ'ká'karo noho marîre nɨ'ka dutíse niî'

¹⁸ Mɨsâ ni'karérã ãpêrãre da'rá ko'terã niísa'. Mɨsâ wiôrãre ẽho peóya. Niî pe'tirã naâ dutisére yɨ'tiyá. Mɨsâre ãyuró weerã́ di'akɨ̃re yɨ'titíkã'ya. No'ó yã'âro weerã́ kẽ'rare yɨ'tiyá.

¹⁹ Apé tero mɨsâ ãyuró weemíkã, mɨsâ wiôrã bu'îri da'rê boosama. Naâ tohô weekã́, mɨsâ Õ'âkɨ̃hɨre ẽho peósere ĩ'yórã, naâre ye'sûtikã'ya. Tohô weekã́, mɨsâre Õ'âkɨ̃hɨ “Ãyuró weemá”, niî ĩ'yâgɨsami.

²⁰ Mɨsâ yã'âro weéka be'ro maa mɨsâre bu'îri da'rêrã, keoró weérã weemá. Mɨsâ naâ bu'îri da'resére nɨ'kárã, “Ãyuró weérã, nɨ'ká'”, niîtikã'ya. Mɨsâ tohô nɨ'kasé wapa marí'. Mɨsâ yã'âro weé'ke wapa keoróta bu'îri da'rêrã weesamá. Mɨsâ ãyuró weéka be'ro naâ yã'âro weekã́, nɨ'kayá. Tohô weesé pe'ere Õ'âkɨ̃hɨ “Ãyuró weemá”, niî ĩ'yâgɨsami.

²¹ Õ'âkɨ̃hɨ mɨsâ ãyuró weemíkã, mɨsâre yã'âro weesére nɨ'ka dutígɨ kũûkɨ niîwĩ. Jesu Cristo marikã marîre yɨ'rɨógɨ, pi'etí, wẽrîwĩ. Ãyuró weemíkã, kɨ̃ɨ̂re yã'âro weewã́. Tohô weégɨ marí kẽ'rare kɨ̃ɨ̂ weé'karo nohota wee sirú tuukã ɨasamí.

²² Kɨ̃ɨ̂ neê ni'kâti yã'âro weetíwĩ. Niî sootiwĩ.

²³ Kɨ̃ɨ̂re yã'âro buhíkã'kãrãre naâre buhíkã' a'metiwĩ. Kɨ̃ɨ̂ pi'etígɨ, “Mɨsâre bu'îri da'rêgɨti”, niîtiwĩ. Kɨ̃ɨ̂ pakɨ́ pe'ere “Yɨ'ɨ̂ pakɨ kɨ̃ɨ̂ ɨaró, keoró yã'âro weerã́re bu'îri da'rêgɨsami”, niîwĩ. Tohô weégɨ kɨ̃ɨ yeé niiátehere kɨ̃ɨ̂ pakɨpɨ́re wiawĩ́.

²⁴ Kɨ̃ɨ̂ basi marî yã'âro weé'ke wapare wapa yeégɨ kurúsapɨ wẽrîwĩ. Marî yã'âro weesére du'u dutígɨ marîre wẽrî basawĩ. Tohô kɨ̃ɨ̂ weesé me'ra a'tîro weewĩ́. Marîre yã'asére siru tuúmi'kãrãre ãyusé Õ'âkɨ̃hɨ yee pe'ere siru tuúkã weewĩ́. Kɨ̃ɨ̂ marîre yɨ'rɨógɨ, kamî da're no'o', ɨpɨ́tɨ pũrisé tɨ'ó yã'awĩ. Tohô kɨ̃ɨ̂ weesé me'ra marî yã'âro yɨ'rɨ boó'kãrã yɨ'rɨó no'owɨ.

²⁵ Marî a'tîro niîkũmiwɨ. Ovelha sã'rîro po'peapɨ niî'kãrã no'ó ɨaró wihá wã'kasama. Wihá wã'ka, ĩ'yâ nɨrɨtikã, bahu dutiá wa'âsama. Marî naâ weeró noho niîkũmiwɨ. Ni'kâroakãre Jesu Cristore ẽho peó'. Tohô weérã ovelhare ko'tegɨ́ bahu dutí'kãrãre a'mâ, kɨ̃ɨ̂ naâre boká'karo weeró noho niî'. Jesu Cristo marîre yã'âro weerí niîgɨ, marîre ĩ'yâ nɨrɨ, ko'tegɨ́ niîmi.

3

²

¹ Numiâ, marâpɨ sɨmɨatirã ãyuró tɨ'oyá yɨ'ɨ̂ wereátehere. Mɨsâ marapɨ́ sɨmɨa dutisére, naâ ɨaró weeyá. Ni'karérã mɨsâ marapɨ́ sɨmɨa Jesu Cristore ẽho peótisama. Kɨ̃ɨ yeé kitire neê tɨ'ó sĩ'ritisama. Tohô weérã tee kitíre werêtimirã, a'tîro pe'e weeyá. Naâre ẽho peóya. Naâ dutisére e'katíse me'ra weeyá. Mɨsâ tohô weekã́, naá kẽ'ra mɨsâ ãyuró weesétisere ĩ'yâ kũu, Jesu Cristore ẽho peó boosama.

³ Ãpêrã, ãyurã́ niîma, niî dutirã mɨsâ ɨpɨré pehé ma'mâ su'atikã'ya. Mɨsâ ɨpɨ́ bahusé di'akɨ̃re wãkû nɨrɨtikã'ya.

⁴ Mɨsâ ãyurã́ niî sĩ'rirã, ãyuró bahú sĩ'rirã, a'tîro pe'e weesétiya. Mɨsâ marapɨ́ sɨmɨare tɨ'sâropɨta naâ dutisére ma'isé me'ra weeyá. Tu'tiró mariró ãpêrãre keoró weé me'rikã'ya. Ehêri põ'ra kari butíro mariró tɨ'ó yã'aya. A'té ãyuró weesétise pe'tisomé. Mɨsâ ɨpɨré ma'mâ su'ase pũrikã pe'tirósa'. Mɨsâ ãyuró weesétikã, Õ'âkɨ̃hɨ mɨsâ me'ra e'katígɨsami. Mɨsâ a'tîro weesé kɨ̃ɨ̂ ĩ'yóropɨre ãyú butia'se waro niî'.

⁵ Yɨ'ɨ̂ mɨsâre niîro nohota dɨporókãharã numia Õ'âkɨ̃hɨre ẽho peórã ãyuró weesétikãrã niîwã. Naâ marapɨ́ sɨmɨa dutisére ãyuró yɨ'tíkãrã niîwã.

⁶ Sara dɨporókõhopɨ koô marapɨ́ Abraão dutisére ãyuró yɨ'tíko niîwõ. Tohô weégo Abraãore koô wiôgɨre weeró noho tɨ'ó yã'ako niîwõ. Mɨsá kẽ'ra mɨsâ marapɨ́ sɨmɨare ãyuró weeyá. Mɨsâ niî pe'tisere ãyuró weérã, tohô niikã́ uiró mariró niisétirã, Sara weeró noho niîrãsa'.

⁷ Ni'kâroakãre nɨmôtirãre werêgɨti. Mɨ'ɨ̂ nɨmore ãyuró weesétiya. Koôre ẽho peóya. Koô mɨ'ɨ̂ weeró noho tutuâtimo. Õ'âkɨ̃hɨ koó kẽ'rare pahá yã'agɨ, mɨ'ɨ̂re weeró nohota yɨ'rɨókɨ niîwĩ. Tohô weégɨ koôre ãyuró ko'têya. A'tîro weekã́, mɨsâ Õ'âkɨ̃hɨre sẽrisé neê ka'mú ta'ata basiósome. A'mêri ãyuró niiséti dutise niî'

⁸ Ni'kâroakãre niî pe'tirãpɨre werê tɨogɨti. Ni'kâro me'ra niiséti bɨroya. Ãpêrãre pahá yã'aya. Ni'kɨ́ põ'ra weeró noho ma'isétiya. “Ɨ̃sâ ãpêrã yɨ'rɨóro niî'”, niî wãkûtikã'ya.

⁹ Ãpêrã mɨsâre yã'âro weekã́, naâre a'metíkã'ya. Mɨsâre yã'âro buhíkã'kã, naâre buhíkã' a'metikã'ya. A'tîro pe'e weeyá. Naâre ãyuró wa'aáto niîrã, Õ'âkɨ̃hɨre sẽri basáya. Õ'âkɨ̃hɨ marîre tohô wee dutísami. A'tîro weekã́, Õ'âkɨ̃hɨ mɨsâre ãyuró weegɨ́sami.

¹⁰ Dɨporópɨre ni'kɨ́ Salmo wamêtiri pũripɨre ãyuró niisétisere a'tîro ohâkɨ niîwĩ:

No'ó mɨsâ katirí ɨmɨ̂kohore e'katíse me'ra niî sĩ'rirã, yã'âro uúkũtikã'ya. Niî sootirãta niîya.

¹¹ No'ó mɨsâ yã'âro weé sĩ'risere weetíkã'ya. Ãyusé pe'ere weeyá. Ãpêrã me'ra a'mé tu'titirãta ma'isé me'ra niisétiya.

¹² Ãyuró weesétirãre Õ'âkɨ̃hɨ ko'têsami. Naâ kɨ̃ɨ̂re sẽrisére yɨ'tisamí. Yã'âro weerã́ me'ra pe'ere e'katítisami. Naâre bu'îri da'rêsami. Tohô weérã mɨsâ ãyuró niisétiya niî, Salmo pũripɨre ohâ no'okaro niîwɨ.

¹³ Mɨsâ ãyusé di'akɨ̃re weesétikã, noá mɨsâre yã'âro wee boósari? Weetísama.

¹⁴ Mɨsâ ãyuró weemíkã, ãpêrã mɨsâre yã'âro weekã́ maa, e'katíya. Õ'âkɨ̃hɨ mɨsâre ãyuró weegɨ́sami. Tohô weérã naâ mɨsâre yã'âro weé sĩ'rikã, wãkû ke'titikã'ya. Naâre uîtikã'ya.

¹⁵ A'tîro pe'e wãkûya. “Jesu Cristo niî pe'tirã bu'ipɨ ɨ̃sâ wiôgɨ niîmi”, niî ẽho peóya. No'ó mɨsâre ãpêrã “De'ró weérã Jesu Cristore ẽho peóti?” niî boosama. Naâ tohô niikã́, mɨsâ yɨ'tiátehere wãkû yuu tohaya. Naâre ãyuró yɨ'tí me'rikã'ya. Pũrîro yɨ'titíkã'ya.

¹⁶ Mɨsâ Jesu Cristore ẽho peóse bu'iri ãpêrã mɨsâre yã'âro uukahásama. Naâ uukahá'ke diakɨ̃hɨ́ niîtikã ĩ'yârã, bopôyarãsama. Tohô weérã mɨsâ ãyuró niisétirã, Õ'âkɨ̃hɨ ĩ'yóropɨre bu'îri marirã́ tɨ'ó yã'arãsa'.

¹⁷ Õ'âkɨ̃hɨ kɨ̃ɨ̂ ɨakã́ maa, marî ãyuró weemíkã, ãpêrã marîre yã'âro wee boósama. Tohô weesé ãyú niî'. Marî yã'âro weekã́ pe'e maa, ãpêrã marîre yã'âro weekã́, mari yeé bu'irita niî'.

¹⁸ Jesu Cristo marikã ãyugɨ́ niîmigɨ, pi'etíwĩ. Kɨ̃ɨ̂ bu'îri moomígɨ, marî yã'âro weé'ke wapare wẽrî wapa yeé basawĩ. Marî bu'îri kɨorã́re wẽrî basagɨ tohô weewĩ́. Marîre yɨ'rɨógɨ, ni'kâtita wẽrîwĩ. Kɨ̃ɨ̂ tohô weesé me'ra kɨ̃ɨ̂ pakɨ tirópɨ marîre wa'âta basiókã weewĩ́. Kɨ̃ɨ̂ bu'îkaha ɨpɨ waro maa wẽrîa wa'âwĩ. Wẽrî toha, be'ró masákɨ niîwĩ. Kɨ̃ɨ̂ ehêri põ'ra pũrikã wẽrîtikaro niîwɨ.

²⁰

¹⁹ Kɨ̃ɨ̂ ehêri põ'ra me'ra kɨ̃ɨ̂ ɨpɨ́ masâ peepɨ kũyarí kura a'tîro weékɨ niîwĩ. Dɨporópɨ Õ'âkɨ̃hɨ a'ti nukúkã miokã́ wẽrî'kãrã naâ bi'a dɨpó no'o'karopɨ niirã́re ĩ'yâgɨ wa'âkɨ niîwĩ. Toopɨ́ naâre kɨ̃ɨ̂ wẽrî masasére werêgɨ ehâkɨ niîwĩ. Diâ mioátoho dɨporo Noé yoakã́ yukɨ̂sɨhore a'mé do'ogɨ da'rákɨ niîwĩ. Kɨ̃ɨ̂ tiwɨ́ weerí kurare kɨ̃ɨ̂ niîka terokãharãre Õ'âkɨ̃hɨ naâre ẽho peókã ɨákɨ niîmiwĩ. Naâ pe'e neê ẽho peótikãrã niîwã. Noé, kɨ̃ɨ̂ nɨmó, kɨ̃ɨ̂ põ'rá, naâ nɨmosã́ numia di'akɨ̃ ẽho peókãrã niîwã. Tohô weérã naâ oitota tiwɨ́ me'ra yɨ'rɨ́kãrã niîwã.

²¹ Õ'âkɨ̃hɨ naâre yɨ'rɨó'karo weeró nohota marí kẽ'rare Jesu Cristo wẽrî masasé me'ra Õ'âkɨ̃hɨ yɨ'rɨókɨ niîwĩ. Õ'âkɨ̃hɨ a'ti nukúkãre miôgɨ naâre yɨ'rɨó'ke marîre wamê yeese weeró noho niî'. Marîre wamê yeese marî ɨpɨré ũ'îri koesé meheta niî'. A'tîro niî'. Õ'âkɨ̃hɨ ĩ'yóropɨre bu'îri marirã́ niî sĩ'rirã, kɨ̃ɨ̂re akobohóse sẽrisé niî'.

²² Jesu Cristo masáka be'ro kɨ̃ɨ̂ pakɨ tirópɨ mɨhâakɨ niîwĩ. Ni'kâroakãre kɨ̃ɨ̂ wiôgɨ duhirí kumuropɨ niîsami. Kɨ̃ɨ̂ niî pe'tirã bu'ipɨ, wiôgɨ niîmi. Õ'âkɨ̃hɨre werê ko'terã, niî pe'tirã wiôrã ɨ'mɨáropɨ niirã́ yɨ'rɨóro niîmi.

4

¹ Jesu Cristo marikã a'tí di'tapɨ niîgɨ, pũûro pi'etíwĩ. Marí kẽ'ra kɨ̃ɨ̂ pi'etí'karo weeró nohota weerã́. Pi'etísere uîtikã'rã. Marî pi'etírã, Jesu Cristo wee tamúse me'ra nemoró wãkû tutuarãsa'. Yã'asére weé sĩ'ritirãsa'.

² Tohô weérã a'tóka terore marî katisé nɨmɨri ehâ tu'aro marî yã'âro weé sĩ'risere weesomé maha. Õ'âkɨ̃hɨ kɨ̃ɨ̂ ɨaró pe'e weerã́sa'.

³ Mɨsâ Jesu Cristore ẽho peótirã naâ weesétise nohore weé tohakãrã niîwɨ. Yã'âro mɨsâ weé sĩ'risere weékãrã niîwɨ. Numiâ me'ra yã'âro weékãrã niîwɨ. Numiâ kẽ'ra ɨmɨá me'ra meharóta yã'âro weékãrã niîwɨ. Ke'ákãrã niîwɨ. Bosê nɨmɨ niikã́ ke'á, karíkũkãrã niîwɨ. Yã'âro weesére yɨ'rɨó keheokã'kãrã niîwɨ. Apêyere Õ'âkɨ̃hɨ dutisére yɨ'rɨ́ nɨ'karã, masá yeê'kere ẽho peókãrã niîwɨ.

⁴ Ni'kâroakãre tee pehére mɨsâ weetísa' maha. Too dɨpóropɨ mɨsâ me'ra yã'âro weeséti'kãrãre ba'pâti nemotisa'. Mɨsâre naâ pihikã́, wa'âtisa'. Mɨsâ tohô weekã́, “De'ró weérã tohô weetí?” niîsama. Teeré ĩ'yârã, mɨsâre ĩ'yâ tu'ti, uukahásama.

⁵ Naâ tohô weemíkã, a'teré masîya. Õ'âkɨ̃hɨ mɨsâre uukahá tu'tirã́re “De'ró weérã yɨ'ɨ̂ põ'rare tohô weerí?” niî sẽrí yã'agɨsami. Mɨsâre tohô weé'kãrã naâ weé'kere besé no'orãsama. Õ'âkɨ̃hɨ niî pe'tirã wẽrî'kãrãre, katirã́re marî weesé nɨkɨre besegɨ́sami. Neê ni'kɨré dɨ'asomé.

⁶ Niî pe'tirã masá wẽrî diha pe'tirãsama. Jesu Cristore ẽho peó'kãrã pe'e naa yeé ɨpɨ boâmikã, Õ'âkɨ̃hɨ tiropɨ katî nu'kukã'rãsama. Tohô weérã naâre a'ti nukúkãpɨ katikã́, Jesu Cristo yee ãyusé kitire werê no'okaro niîwɨ.

⁷ A'ti ɨmɨ́koho pe'tiátoho kã'roákã dɨ'sása'. Tohô weérã mɨsâ weesére ãyuró tɨ'ó yã'a nɨ'ko, weesétiya. Wãkû tutuaya. Mɨsâ yã'âro weé sĩ'risere nɨ'kayá. Tohô weérã mɨsâ keoró Õ'âkɨ̃hɨre sẽrirã́sa'.

⁸ Niî pe'tise apêye noho yɨ'rɨóro a'tîro weeyá. Diakɨ̃hɨ́ a'mêri ma'iyá. Neê a'mêri ma'í du'utikã'ya. Marî ãpêrãre ma'írã, marîre yã'âro weesére maatá akobohósa'.

⁹ Ãpêrã mɨsa yeé wi'seripɨ ehakã́, e'katíse me'ra naâre yẽ'êya. Uasé mariró naâre a'mâ eka, kãrisé o'ôya.

¹⁰ Õ'âkɨ̃hɨ kɨ̃ɨ̂ tutuaró me'ra marî Jesu Cristore ẽho peórã nɨkɨre de'ró marî wee masísere o'ôsami. Teé o'osé me'ra kɨ̃ɨ yeére ãyuró wee masí'. Teeré o'ôgɨ, ni'kâro noho o'ôtisami. Kɨ̃ɨ̂ o'ô'ke põo tẽóro ãpêrãre wee tamú dutigɨ o'ôsami. Marî ãpêrãre wee tamúrã, kɨ̃ɨ̂ o'ô'kere keoró weérã weé'.

¹¹ Ni'karérãre a'te nohóre o'ôsami. Pãharã́ wa'teropɨ kɨ̃ɨ yeé kiti werê tutuasere o'ôsami. A'teré werêrã, kɨ̃ɨ̂ werê'karo weeró noho werêya. Ãpêrã, wee tamúrã noho kẽ'ra Õ'âkɨ̃hɨ mɨsâre tutuaró o'ô'karo põo tẽóro wee tamúya. Tohô weekã́, masá “Jesu Cristo kɨ̃ɨ̂ wee tamúro me'ra tohô weeáma” niî, “Ãyú'” niîrãsama Õ'âkɨ̃hɨre. Jesu Cristo tutuâ yɨ'rɨami. Kɨ̃ɨ̂ niî pe'tirã bu'ipɨ, wiôgɨ niîmi. Tohô weérã marî kɨ̃ɨ̂re “Ãyú'” niî nu'kukã'rã. Jesu Cristore ẽho peórãre “Mehêkã wa'akã́, wãkû tutuaya” niisé niî'

¹² Yɨ'ɨ̂ ma'irã́, apêye noho werê nemogɨti taha. Mɨsâ Jesu Cristore ẽho peóse bu'iri yã'âro yɨ'rɨ́rã, “De'ró weéro tohô wa'âti?” niî ĩ'yâ mariatikã'ya. Teé mɨsâ pi'etísere wãkû tutuarã, diakɨ̃hɨ́ta Jesu Cristore ẽho peósere ĩ'yó no'o'. Tohô weérã mɨsâ mehêkã wa'akã́, ĩ'yâ mariatikã'ya.

¹³ Mehô e'katíya. Ni'kâroakãre mɨsâ Jesu Cristo kɨ̃ɨ̂ pi'etí'karo nohota pi'etí siru tuurã weé'. Tohô weérã kɨ̃ɨ̂ opâturi a'tikã́, kɨ̃ɨ̂ asistésere, kɨ̃ɨ̂ tutuasére ĩ'yârã, pũûro e'katírãsa'.

¹⁴ Marî Jesu Cristore ẽho peóse bu'iri ãpêrã marîre yã'âro buhíkã'sama. Naâ tohô weekã́, marî a'tîro masî'. Espírito Santo tutuâ yɨ'rɨagɨ marîpɨre niîmi. Marî me'ra niî nu'kukɨ̃'sami. Ãpêrã marîre yã'âro weekã́, wee tamúsami. Tohô weérã naâ yã'âro buhíkã'mikã, e'katí no'osa'.

¹⁵ Mɨsâ a'tîro wãkûya. Wẽhé kõ'arãre, yaharã́re Õ'âkɨ̃hɨ bu'îri da'rêgɨsami. Ãpêrã yeere uukahá wãkû nɨrɨrã kẽ'rare tohôta weegɨ́sami. No'ó yã'âro weerã́re bu'îri da'rêgɨsami. Mɨsâ naâ weeró noho weetíkã'ya. Naâ, naa yeé bu'iri pi'etírãsama.

¹⁶ Apé terore mɨsâ Jesu Cristore ẽho peóse bu'iri pi'etírãsa'. Tohô pi'etírã, bopôyatikã'ya. A'tîro pe'e weeyá. Õ'âkɨ̃hɨre “Ãyú'”, niîya. “Mɨ'ɨ̂ ɨ̃sâre Jesu Cristo yarã sãhakã́ weeápɨ”, niî wãkû tutuaya.

¹⁷ Ni'kâroakãre Õ'âkɨ̃hɨ masaré beserí nɨmɨ nɨ'ká toha'. Kɨ̃ɨ̂re ẽho peórã me'ra besé nɨ'kami. Marî kɨ̃ɨ̂re ẽho peórã me'ra nɨ'kakã́, ãpêrã kɨ̃ɨ̂re ẽho peótirã pe'e maa de'ró wa'aró wa'ârosa'. Õ'âkɨ̃hɨ naá maa ɨpɨ́tɨ bu'îri da'rêgɨsami.

¹⁸ Dɨporópɨ Õ'âkɨ̃hɨ yee kiti werê mɨ'tagɨ teé pi'etísekãhasere a'tîro ohâkɨ niîwĩ:

Õ'âkɨ̃hɨre ẽho peórã waro marikã ɨ'mɨ̂sepɨ wa'aátoho dɨporo a'ti nukúkãpɨre pi'etí ni'irãsama yuhûpɨ. Too pũríkãre kɨ̃ɨ̂re ẽho peótirã yã'âro weerã́ pe'ere de'ró wa'ârosari? Naâre yã'â butia'ro wa'ârosa'. Õ'âkɨ̃hɨ naâre bu'îri da'rêgɨsami, niîkɨ niîwĩ Õ'âkɨ̃hɨ yee kiti werê mɨ'tagɨ.

¹⁹ Marî Õ'âkɨ̃hɨ ɨaró noho pi'etírã pũrikã, a'tîro weeró ɨá'. Ãyuró weesére weé nu'kukã'ro ɨá'. Tohô niikã́ mari yeé niiátehere Õ'âkɨ̃hɨ marîre weé'kɨre wiaró ɨá'. Niî pe'tise kɨ̃ɨ̂ “Weegɨ́ti” niisére keoró weesamí.

5

¹ Ni'kâroakãre maha Jesu Cristore ẽho peórã sɨ'orí niirã́re werêgɨti. Yɨ'ɨ́ kẽ'ra ãpêrãre sɨ'orí niigɨ́ta niî'. Yɨ'ɨ̂ Jesu Cristo pi'etíkã ĩ'yâwɨ. Kɨ̃ɨ̂ opâturi a'ti nukúkãpɨ a'tikã́, Õ'âkɨ̃hɨ niî pe'tirãpɨre Jesu Cristo asistésere, kɨ̃ɨ̂ tutuasére ĩ'yogɨ́sami. Teeré yɨ'ɨ́ kẽ'ra niî pe'tirã kɨ̃ɨ̂re ẽho peó'kãrã me'ra niî tamugɨsa'.

² Jesu Cristore ẽho peórãre sɨ'orí niirã́, yɨ'ɨ̂ wereátehere tɨ'oyá. Õ'âkɨ̃hɨ kɨ̃ɨ yarã́re ko'tê dutigɨ mɨsâre kũûkɨ niîwĩ. Ovelhare ko'tegɨ́ kɨ̃ɨ yarã́ ovelhare ãyuró ko'têsami. Kɨ̃ɨ̂ weeró nohota mɨsá kẽ'ra Õ'âkɨ̃hɨ yarãre ãyuró ko'têya. Ãpêrã dutiró mariró mɨsâ ɨaró naâre ko'têya. Mɨsâ tohô weekã́, Õ'âkɨ̃hɨ ɨasamí. Apêye kẽ'rare naâre sɨ'orí wehê peorã, niyéru di'akɨ̃re wapá ta'a sĩ'ritikã'ya. Mehô pe'e e'katíse me'ra ko'têya.

³ Naâre ko'têrã, yã'âro dutîpetikã'ya. Naâre ĩ'yâ kũu dutirã pe'e, ãyuró weesétiya.

⁴ Tohô weekã́, Jesu Cristo niî pe'tirã masaré ko'terã́ wiôgɨ opâturi a'ti nukúkãpɨ a'tîgɨ, mɨsâre wapa yeégɨsami. “Ãyuró ko'têwɨ naâre yɨ'ɨ̂ ko'tê dutigɨ kũû'kãrãre”, niîgɨsami. Kɨ̃ɨ̂ ɨ̃sâre wapa yeése niî nu'kukã'rosa'. Kɨ̃ɨ̂ tiro, kɨ̃ɨ̂ asistéropɨ katî nu'kuatehere o'ôgɨsami. Teé neê pe'tisomé.

⁵ Ma'mâ piha, nu'miá, a'tîro weeyá. Bɨkɨrã́ mɨsâre sɨ'orí wehê peorãre ẽho peó yɨ'tiyá. Mɨsâ “Niî pe'tirãpɨta ãpêrã yɨ'rɨóro niî'” niî wãkûtirãta, a'mêri wee tamúya. Dɨporópɨ Õ'âkɨ̃hɨ yee kiti werê mɨ'tagɨ a'tîro ohâkɨ niîwĩ:

“Ãpêrã yɨ'rɨóro niî'” niirã́re Õ'âkɨ̃hɨ ãyuró wa'asére ka'mú ta'asami. Ãpêrã “Yɨ'ɨ̂ mehô niigɨ́ niî', yɨ'ɨ̂re wee tamúya” niirã́ pe'ere Õ'âkɨ̃hɨ wee tamúsami, niî ohâkɨ niîwĩ.

⁶ Õ'âkɨ̃hɨ tutuâ yɨ'rɨgɨ niîmi niîrã, kɨ̃ɨ̂ dutisére yɨ'tiyá. Tohô weekã́, Õ'âkɨ̃hɨ kɨ̃ɨ̂ ɨarí nɨmɨ mɨsâre ãpêrã wiôrã weeró noho ãyuró wãkukã́ weegɨ́sami.

⁷ Õ'âkɨ̃hɨ marîre ma'ígɨ, ko'têsami. Tohô weérã niî pe'tise marî wãkû ke'tisere, marîre no'ó mehêkã wa'asére Õ'âkɨ̃hɨpɨre o'ôrã. Kɨ̃ɨ̂ marî tohô weesére yẽ'êgɨsami.

⁸ Mɨsâ weesére ãyuró tɨ'ó yã'a nɨ'ko toharãpɨ weesétiya. Mɨsâ yã'âro weé sĩ'risere wãkû tutuaya. Ãyuró tɨ'o masíya. Wãtî marîre ĩ'yâ tu'tigɨ niî pe'tiropɨ a'mâ sihasami. Marîre yã'âro weekã́ ɨágɨ, tohô weesamí. Tohô weérã ko'tê ĩ'yâ nɨrɨya. Ni'kɨ́ yaî ba'asé a'mâgɨ pi'etí siharo weeró noho marî Jesu Cristore ẽho peósere pe'ó sĩ'risami.

⁹ Wãtî dutisére weetíkã'ya. Wãkû tutuaya. Jesu Cristore ẽho peó nu'kukã'ya. Wãtî mɨsâ di'akɨ̃re yã'âro weégɨ weetími. Niî pe'tirokãharãpɨ Jesu Cristore ẽho peórãre tohô weégɨ weemí. Naá kẽ'ra mɨsâ pi'etíro nohota pi'etírã weemá. Tohô weérã wãkû tutuaya.

¹⁰ Õ'âkɨ̃hɨ marîre ma'ígɨ, no'ó niiró wee tamú nu'kugɨsami. Kɨ̃ɨ̂ makɨ́ Jesu Cristo wẽrisé me'ra marîre yɨ'rɨókɨ niîwĩ. Õ'âkɨ̃hɨta marîre kɨ̃ɨ̂ asistéropɨ kɨ̃ɨ̂ me'ra niî nu'ku dutigɨ besékɨ niîwĩ. Marî yoâtikã a'ti nukúkãpɨre pi'etí ni'irãsa' yuhûpɨ. Tohô weéka be'ro Õ'âkɨ̃hɨ marî yã'âro niiséti'kere apó nɨ'ko wãkû tutuakã weegɨ́sami. Kɨ̃ɨ̂ tohô weekã́, marî neê uîsome.

¹¹ Tohô weérã kɨ̃ɨ̂re a'tîro niîrã: “Õ'âkɨ̃hɨ, mɨ'ɨ̂ niî pe'tirã bu'ipɨ, wiôgɨ niî'. Mɨ'ɨ̂ tutuasé neê pe'tisomé. Niî nu'kukã'rosa'”, niîrã kɨ̃ɨ̂re. Pedro ãyu dutí tɨo'ke niî'

¹² Silvano ohâ basase me'ra yɨ'ɨ̂ mɨsâre pehête a'ti pũrípɨre ohâ'. Kɨ̃ɨ̂ yɨ'ɨ̂re ba'pâtimi. Jesu Cristore ẽho peógɨ ãyuró weesétimi. Tohô weégɨ kɨ̃ɨ̂ keoró weekã́ ĩ'yâgɨ, kɨ̃ɨ̂re ẽho peó'. Mɨsâre wãkû tutua, e'katí dutigɨ a'ti pũríre ohâ'. Tohô niikã́ Õ'âkɨ̃hɨ ma'isé diakɨ̃hɨ́ta niî' niîgɨ, mɨsâre ohâ'. Kɨ̃ɨ̂ ma'isére masîrã, Õ'âkɨ̃hɨre ẽho peó yapatíkã'ya.

¹³ A'ti maká Babilôniakãharã Jesu Cristore ẽho peórã mɨsâre ãyu dutíse o'ôo'ma. Õ'âkɨ̃hɨ ã'rá kẽ'rare mɨsâre weeró nohota besékɨ niîwĩ. Ãpí kẽ'ra Marco yɨ'ɨ̂ makɨ weeró noho niigɨ́ mɨsâre ãyu dutími.

¹⁴ Mɨsâ e'katíse me'ra a'mêri põo tẽríya. Mɨsâ niî pe'tirãre Jesu Cristore ẽho peórãre ehêri põ'raripɨ Õ'âkɨ̃hɨ ãyuró tɨ'ó yã'akã weeáto. Toô kã'rota ohâ'. Pedro