1 Woto yaa a Zezi Kirist vẽnegr Wẽnnaam sẽn kõ bãmb tɩ b wilg b nonglem yemsã bũmb nins sẽn tog n zĩnd wakat bilf sã n paase. La a Zezi Kirist tʋma b malɛk t'a wilg b tʋmtʋmd a Zã bõn-kãense.
2 Yaa yẽnda n yɩ kaset soaba, n togs nebã Wẽnnaam goama la a Zezi Kirist kasetã, n wilg bũmb nins fãa yẽ sẽn yã wã.
3 Bark bee neb nins sẽn karemd pĩnd-n-bãngr gom-kãensã wã zutu, la neb nins sẽn kelgda la b sakd bũmb nins sẽn gʋls tɩ be a pʋgẽ wã zutu. Bala wakatã kolgame.
5
4 Maam a Zã n tʋmd seb kãnga wẽnd-dot a yopoe wã sẽn be Azi Porvẽnsã pʋgẽ wã. Bɩ soab ning sẽn be, la sẽn dag n be la sẽn watã, n paas sɩɩs a yopoe wã sẽn be bãmb geerã taoorã, la a Zezi Kirist sẽn ya kaset soab sẽn ya tɩrga, la pipi soab Wẽnnaam sẽn vʋʋg n bas kũum la dũniyã rĩm-dãmba Rĩmã ning yãmb zut barka, la b kõ-y bãane. Soab ning sẽn nonga tõndo, n pek tõnd ne b zɩɩmã
6 n yiis d yel-wẽna, n maan tõnd tɩ d lebg soolem maan-kʋʋdb bãmb ba a Wẽnnaam yĩngã, bãmb n tog ne ziiri la pãng zamaan o zamaane! Ãmina!
7 Ade bãmb wata ne sawato. Ninsaal fãa na n yãa bãmba, hal baa ne neb nins sẽn dag n kõs bãmbã. La buuda fãa sẽn be dũni zugã na n wiisa bãmb yĩnga. N-ye! Ãmina!
8 Zu-soab a Wẽnnaam yetame yaa: Maam yaa Alfa la Omega, soab ning sẽn be moasa, la sẽn dag n be la sẽn wata, soab ning sẽn tõeyã fãa wã.
9 Maam a Zã sẽn ya yãmb ba-biiga la sẽn naag yãmb n paamd namsgo, la sẽn naag yãmb n tar pʋɩɩr ne Wẽnnaam soolem, la m naag n maood a Zezi tũudmã pʋgẽ wã, mam dag n bee Patmoos sẽn ya tẽng koom sẽn gũbgi, Wẽnnaam goamã la a Zezi kasetã yĩnga.
10 Zu-soaba daare, Sɩɩg-sõng pida maam, la mam wʋma koe-kãseng sẽn wẽnd baorg koɛɛg m poorẽ.
11 A da yetame yaa: Gʋls bũmb nins fo sẽn ne wã sebr zug n tʋm wẽnd-dot yopoe wã sẽn be Efɛɛse, la Ismirn la Pɛrgam la Tɩyatɩɩr la Sard la Filadɛlfi ne Laodise.
12 Mam wẽnemdame n na n ges ned ning sẽn da gomd-a ne maamã. La mam sẽn wẽnemde, mam yãa sãnem fɩtl-dogends a yopoe,
13 la ned sẽn be fɩtl-dogends a yopoe wã sʋka, n wẽnd Ninsaal Bi-ribla. B rag n yera fuug sẽn sig n ta b nao wã, la b ra sẽbga b yãoog ne sãnem sẽbdga.
14 B zugã zoobd rag n yaa peels wa pe-kõbdo la wa lamdo. B ninã ra yaa wa bug-witim.
15 B naowã ra yaa wa zũud b sẽn zug boaag pʋgẽ t'a mooge, la b koɛɛgã ra yaa wa ko-kãsemsã bʋrgo.
16 Bãmb da zãada ãds a yopoe ne b rɩtgo. Zabr sʋʋg sẽn tar noey a yiib sẽn dɩt n da yit bãmb noorẽ wã. La bãmb nengã ra yaa wa wĩntoogo wakat ning a sẽn yãgd ne a pãng tɛkã. Fɩtl dogends a yopoe (1.12)
17 Mam sẽn yãnd-bã, mam lʋɩɩ b taoor n ya wa kũum. Bãmb tika maam ne b nug-rɩtg n yeel yaa: Da maan rabeem ye!
18 Mam yaa dẽenem la yaoolem soaba, soab ning sẽn vɩ. Mam dag n kiime, la ad-ma, mam vɩɩme, zamaan o zamaane. Mam tara kũum ne kɩɩm-kulg kʋɩlen-biisi.
19 Dẽ wã, gʋls bũmb nins fo sẽn yã, bũmb nins sẽn be moasã, la bũmb nins sẽn na n yaool n maanã.
20 Ad ãds a yopoe wã fo sẽn yã mam rɩtgã ne sãnem fɩtl-dogends a yopoe wã yel-solemdã võore: Ãds a yopoe wã yaa wẽnd-dot a yopoe sẽn be tẽms a yopoe wã gũudba, la sãnem fɩtl-dogends a yopoe wã yaa wẽnd-dot a yopoe wã sẽn be tẽms a yopoe wã.
1 Gʋls Efɛɛs wẽnd-doogã gũud n yeel-a yaa: Ad bũmb ning a soab sẽn zãad ãds a yopoe ne a rɩtgo, la a kẽnd sãnem fɩtl-dogends a yopoe wã sʋkã sẽn yeta:
2 "Mam mii tʋʋm nins y sẽn maanã, la y sẽn tʋmd to-to, la m mii y modgrã. Mam miime tɩ yãmb ka tõe n sak tɩ nin-wẽns zĩnd ne-y ye. Yãmb maka neb nins sẽn yet tɩ b yaa tẽn-tʋmdb n yaool n ka tẽn-tʋmdbã n gese, la yãmb mikame tɩ b yaa zĩrĩ yagdba.
3 Yãmb nangda pãnga, yãmb namsa mam yʋʋrã yĩnga, la yãmb ka boog y raood ye.
4 La yell ning mam sẽn tar ne yãmba, yaa tɩ yãmb basa y pipi nonglmã.
5 Dẽ wã, bɩ y tẽeg zĩig ning yãmb sẽn lʋɩ wã. Tek-y yam n kos sugri, la y leb n tʋm y pipi tʋʋma. Sã n ka rẽ, mam na n waa yãmb nengẽ, la m na n yiisa yãmb fɩtl-doagendgã a zĩigẽ, sã n ka tɩ yãmb teka yam n kos sugri.
6 Baoosgo yãmb tara bõn-sõng a yembre: yaa tɩ yãmb kisa Nikolayit-dãmba tʋʋma, tʋʋm nins mam me sẽn kisã."
7 Bɩ ned ning sẽn tar-a tʋb kelg bũmb ning Sɩɩg-sõng sẽn yet wẽnd-dotã: Mam na n kõo tõaagd fãa noor t'a rɩ vɩɩm tɩɩgã sẽn be Wẽnnaam Paradi pʋgẽ wã biisi.
8 Gʋls Ismirn wẽnd-doogã gũud n yeel-a yaa: Sẽn ya-a dẽenem la yaoolem soaba, sẽn dag n ki-a n leb n vʋʋgã yetame yaa:
9 "Mam bãnga yãmb namsgã ne y naongã, la yãmb yaool n yaa arzegs rãmba, la mam bãnga kãnegr ning neb nins sẽn yet tɩ b yaa Zuif-rãmb n yaool n ka Zuif-rãmba, la b ya Sʋtãanã karen-doogã rãmb sẽn kãnegd yãmbã.
10 Da maan-y rabeem ne namsg ning y sẽn na n namsã ye. Gese, Sʋtãanã na n kẽesa yãmb neb kẽer bi-bees roogo, sẽn na n yɩl n mak yãmba, la yãmb na n paama namsg rasem piiga. Kel n maan-y neer hal tɩ ta kũum, la mam na kõ yãmb vɩɩm maanfo." Maanfo (2.10)
11 Bɩ ned ning sẽn tar tʋb kelg bũmb nins Sɩɩg-sõng sẽn yet wẽnd-dotã. Kũum a yiib soabã ka na n sɩɩs ned ning sẽn na n paam-a tõogrã ye.
12 Gʋls Pɛrgam wẽnd-doogã gũud n yeel-a yaa: Soab ning sẽn zãad-a zabr sʋʋg sẽn tar noey a yiib sẽn dɩtã yetame yaa:
13 "Mam mii yãmb sẽn be zĩig ningã: zĩ-kãng yaa a Sʋtãan geere. Yãmb talla mam yʋʋrã, la yãmb ka bas y tẽeb ne maam baa wakat ning b sẽn kʋ mam kaset tɩrg soab a Ãntipaas yãmb sʋka, zĩig ning a Sʋtãan sẽn be wã.
14 La mam tara yell bilf ne yãmba. Yaa tɩ neb n be yãmb sʋkã n tũud a Balaam zãmsgã. Yẽ ra zãmsa a Balak t'a maan bẽdg n kɩt t'a Israyɛl yagensã rɩ wẽnd-naands maand nemdo, la b maan yoobo, tɩ rẽ lub-ba.
15 Yãmb me tara neb kẽer me sẽn sakd Nikolayit-dãmba zãmsgo.
16 Dẽ wã, bɩ y tek yam n kos sugri, sã n ka rẽ, bilf sã n paase, mam na n waa yãmb nengẽ, la m na n zaba ne bãmb ne m noorẽ zabr sʋʋgã."
17 Bɩ sẽn tar-a tʋb kelg bũmb nins Sɩɩg-sõng sẽn yet wẽnd-dotã. Mam na n kõo ned ning sẽn na n tõogã man sẽn solge, la kug-pɛɛlga. Kugrã zugu, yʋ-paalg n gʋls be ned baa a yen sẽn ka mi, sã n ka ned ning sẽn deegd-a kugrã.
18 Gʋls Tɩyatɩɩr wẽnd-doogã gũud n yeel-a yaa: Ad Wẽnnaam Bi-riblã, sẽn tar-a nin sẽn wẽnd bug-witim t'a nao wẽnd wa zũudã sẽn yeta:
19 "Mam bãnga yãmb tʋʋma la y nonglemã, la y tẽebã, la y tʋʋm sõamy wã, la y sũ-marã ne y yaoolem tʋʋmã sẽn ya wʋsg n yɩɩd y pipi tʋʋmã.
20 La mam tara yell ne yãmba: yaa tɩ yãmb basa pag a Zezabɛll t'a zãmsd nebã. A yetame t'a yaa no-rɛɛsa, n zãmsd nebã la a belgd mam tʋmtʋmdbã tɩ b maand yoobo, la b wãbd wẽnd-naands maand nemdo.
21 Mam kõo yẽ weer t'a tek yam n kos sugr a yoobã yĩnga, la yẽ ka rat n kos sugr a yĩng ye.
22 Gese, mam na n gãneg-a-la tẽnga la to-kãseng pʋga, yẽ ne neb nins sẽn maand yoob ne yẽ wã, sã n ka tɩ b teka yam n bas b tʋʋmã.
23 Mam na n kɩtame tɩ kũum kʋ a kambã, la wẽnd-dotã fãa na n bãngame tɩ mam yaa soab ning sẽn feesd tagsd la sũyã, la mam na n yaoo yãmb ned kam fãa wa sẽn zems a tʋʋmã.
24 La yãmb Tɩyatɩɩr neb a taaba fãa sẽn ka sakd zãms-kãngã, la sẽn ka bãng a Sʋtãan yel-solgdsã wa b sẽn mi n yetã, mam yeta yãmb tɩ m ka na n zɩlg yãmb zɩɩb a to ye.
25 Bũmb ning sẽn be bala, yaa tɩ y tall bũmb nins yãmb sẽn tarã kãenkãe hal tɩ mam wa.
26 Ned ning sẽn na n tõoge, la ned ning sẽn na n tall-a mam tʋʋmã hal tɩ wakat ta, mam na n kõo yẽ noor t'a soog soolem dãmba.
27 Yẽ na n zãa naam dasaar sẽn ya kut n soog-ba, wa b sẽn wãad tãnd lagdo, wa mam meng sẽn deeg m ba nengẽ wã.
28 La mam na n kõo yẽ yibeoog ãdga.
29 Bɩ sẽn tar-a tʋb kelg bũmb nins Sɩɩg-sõng sẽn togsd mam wẽnd-dotã.
1 Gʋls Sard wẽnd-doogã gũud n yeel-a yaa: Ad soab ning sẽn tar Wẽnnaam sɩɩs a yopoe la ãds a yopoe wã sẽn yeta: "Mam bãnga yãmb tʋʋmã. Yãmb yʋʋr yiime tɩ y vɩɩme la y yaool n yaa kũum.
2 Maan gũusgu la f kɩt tɩ sẽn be fo pʋgẽ n nan ka ki wã leb n yẽege. Bala, mam mikame tɩ yãmb tʋʋmã ka zems mam Wẽnnaamã taoor ye.
3 Dẽ wã, bɩ y tẽeg yãmb sẽn deeg koɛɛgã la y wʋm-a to-to wã, tall-y-yã-a la y kos sugri. Yãmb sã n ka gũusi, mam na n waa yãmb nengẽ wa wagdre, la yãmb ka na n bãng sẽn ya wakat ning la mam na n wa n ling yãmbã ye.
4 Baoosgo, yãmb tara neb kẽer Sard sẽn ka rẽgem b fut ye. Bãmb na n kẽna ne maam ne fu-peelse, bãmb sẽn zems tɩ kẽn ne maamã yĩnga.
5 Ned ning sẽn na n tõogã na n yeelga fu-peels a woto. Mam ka na n yẽes yẽ yʋʋrã vɩɩm sebrã pʋgẽ ye, la mam na n boola yẽ yʋʋrã m ba la malegsã taoore."
6 Bɩ ned ning sẽn tar-a tʋb kelg bũmb ning Sɩɩg-sõng sẽn togsd wẽnd-dotã.
7 Gʋls Filadɛlfi wẽnd-doogã gũud n yeel-a yaa: Ad bũmb sõmblem soabã, sɩd soabã, sẽn tar-a a Daviid kʋɩlen-bilã, soab ning sẽn pakd tɩ ned ka tõe n pagã, soab ning sẽn pagd tɩ ned ka tõe n pakã sẽn yeta:
8 "Mam bãnga yãmb tʋʋmã. Gese, mam ninga kʋɩleng sẽn pak yãmb taoore tɩ ned ka tõe n pag-a ye, tɩ bala yãmb pãngã paoodame, la yãmb talla mam koɛɛgã, la y ka kɩɩs mam yʋʋrã ye.
9 Ade, mam na n ninga neb nins sẽn ya a Sʋtãan tũudbã yãmb nugẽ. Bãmb boonda b mens tɩ Zuif-rãmba tɩ yaool n ka sɩd ye, bala b yagda zĩrĩ. Gese, mam na n kɩtame tɩ b wa n wõgemd yãmb taoore, la b bãng tɩ mam nonga yãmba.
10 Yãmb sẽn tall mam koɛɛg ning sẽn kɩt tɩ yãmb nangd pãng mam pʋgẽ wã yĩnga, mam me na n kogla yãmb wakat ning makrã sẽn na wa dũniyã tɛk fãa n mak nebã sẽn be a zugã.
11 Mam wata tao-tao. Gãd-y bũmb nins yãmb sẽn tarã kãenkãe, tɩ ned da reeg yãmb maanfã ye.
12 Mam na n kɩtame tɩ ned ning sẽn tõog-a wã lebg ra-luk mam Wẽnnaamã roog pʋga, la yẽ kõn le yi be ye. Mam na n gʋlsa mam Wẽnnaamã yʋʋre, la m Wẽnnaamã tẽng sẽn ya Zeruzalɛm paalg sẽn yit mam Wẽnnaamã nengẽ arzãn n sigdã yʋʋr yẽ zugu, la m gʋls mam yʋ-paalegã yẽ zugu."
13 Bɩ ned ning sẽn tar kelg bũmb nins Sɩɩg-sõng sẽn yet wẽnd-dotã.
14 Gʋls Laodise wẽnd-doogã gũud n yeel-a yaa: Ad bũmb ning sẽn ya-a Ãmina, la kaset soab sẽn ya tɩrga, la sɩd soaba, sẽn naan-a Wẽnnaam bõn-naandsã sẽn yeta:
15 "Mam bãnga yãmb tʋʋmã. Yãmb ka maasga la y ka tʋʋlg me ye. Mam nongẽ la yãmb sẽn dag n na n yaẽ tʋʋlga wall maasga.
16 Woto, yãmb sẽn ya zalzal n ka maasg la y ka tʋʋlgã yĩnga, mam na n wʋka yãmb m noorẽ.
17 Yãmb sẽn yet tɩ yãmb yaa arzegs rãmba, tɩ y paama arzegse la yãmb ka le rat baa fʋɩ wã yĩnga, la yãmb sẽn ka mi tɩ y yaa nimbãan-neba, n be namsg pʋgẽ la y ya naong rãmba la y zoẽnse la bɛɛlã yĩnga,
18 mam sagenda yãmb tɩ y ra sãnem mam nengẽ, sẽn zug ne bugum, tɩ y tõe n lebg arzegs rãmba, la y ra fu-peels mam nengẽ, tɩ y tõe n paam n yeelge, n lud y yãnd n da yɩ a zaal ye, la y ra nin kaam mam nengẽ n sõog y ninã tɩ y tõe n yã.
19 Mam lengda neb nins fãa mam sẽn nonge, la m sɩbgd-ba. Dẽ wã, bɩ y nang pãnga la y tek yam n kos sugri.
20 Ade, mam yasa rig-noorẽ n kabsdẽ. Ned sã n wʋm mam koɛɛgã n pak kʋɩlengã, mam na n kẽe yẽ roogẽ n dɩ ne yẽnda la yẽ na n dɩɩ ne maam.
21 Mam na n kɩtame tɩ ned ning sẽn tõogã zĩnd ne maam mam geerã zug wa mam sẽn tõoge, n zao ne m ba b geerã zugã."
22 Bɩ ned ning sẽn tar tʋb kelg bũmb ning Sɩɩg-sõng sẽn yet wẽnd-dotã.
1 Dẽ poore, mam gesame, la haya! Mam yãa kʋɩleng sẽn pak arzãn pʋga. La pipi koɛɛg ning sẽn wẽnd baorg mam sẽn da wʋm t'a gomd ne maamã yeela maam yaa: Rʋ yĩngr ka, la mam na n kɩtame tɩ fo yã bũmb nins sẽn ya tɩlɛ tɩ wa zĩndã.
2 Tao-tao bala, Sɩɩg-sõng pida maam. La ade, geer n da be arzãn pʋga, la ned n dag n zao geerã zugu.
3 Ned ning sẽn zao-a geerã zugã dag n wẽnda wa kug sẽn be yõod n boond tɩ zaspe la sardoan. La saag-gomtɩʋʋg sẽn wẽnd wa kugr sẽn boond tɩ emerood n dag n gũbg geerã.
4 La gɛy pisi la a naas n dag n gilg ge-kãsengã, la kãsem-dãmb pisi la a naas n zao b zutu, n yer fu-peelse, la b n fõg sãnem maanf-rãmba.
5 Sa-yãgbo, la kelemse, la sa-kelems n yit geerẽ wã. Fɩtl-dãmb a yopoe n be geerã taoor n wit ne pãnga. Bãmb yaa Wẽnnaam sɩɩs a yopoe wã.
6 Geerã taoor daag n gãnega bũmb sẽn pɩnd wa vɛɛre, n tud n ya wa kiristalle. La geerã sʋk ne sẽn gũbg geerã fãa, bõn-vɩɩs a naas n be be n pid ne nin taoor la poorẽ.
7 Pipi bõn-vɩɩgã wẽnda wa gɩgemde, la yiib soabã wẽnda wa nag-bila la tãab soaba neng wẽnda wa ninsaal nenga, la naas soaba wẽnda wa panantugr sẽn yɩgda.
8 Bõn-vɩɩs a naasã ned kam fãa tara pɩgs a yoobe, la b pida ne nin zĩiga fãa, la b pʋgẽ me. Wĩndg la yʋngo b yetame tɩ: Sõngo, sõngo, Zu-soab a Wẽnnaam sẽn Tõeya fãa wã yaa sõngo. Bãmb da beeme la b bee moasa la b watame, n ka basdẽ ye.
9 La wakat ning bõn-vɩɩs a naasã sẽn na n waoog sẽn zao-a geerã zugu, n vɩ zamaan o zamaana, la b zẽk b yʋʋre, la b pʋʋs-b barkã,
10 kãsem-dãmbã pisi la a naasã na n wõgemda sẽn zao-a geerã zugu la b sẽn vɩ zamaan o zamaana taoore, n waoogd-ba, la b na n lobda b maanf-rãmba geerã taoor la b yetẽ:
11 Tõnd Zu-soaba la d Wẽnnaam, yãmb n zems tɩ reeg ziiri, la waoogre, la pãnga. Bala, yãmb n naan bũmb fãa, la yaa yãmb daab yĩng la y naan-b tɩ b beẽ.
1 La mam yãa sebr sẽn be sẽn zao-a geerã zugã nug rɩtgẽ. Sebrã pʋg ne a poorã fãa gʋlsame, la b sog-a-la ne sogds a yopoe.
2 La mam yãa malɛk sẽn tar pãng sẽn zẽkd a koɛɛg n sokdẽ yaa: Ãnna n zems tɩ sok sogdsã la a lak sebrã?
3 La ned baa a yen da ka be arzãn wall tẽng zugu, wall tẽnga tẽngr sẽn dag n tõe n lak sebrã wall a ges-a ye.
4 La b sẽn ka yã ned baa a ye sẽn zems tɩ lak sebrã wall tɩ ges-a wã yĩnga, mam da yãbda wʋsgo.
5 La kãsem-dãmba ned a yen yeela maam yaa: Da yãb ye. Ad Zuda buudã gɩgemd sẽn ya a Daviid yagengã paama tõogre, n na n sok sogds a yopoe wã la a lak sebrã.
6 La mam yãa pe-bil sẽn yas yĩngr geerã sʋka la bõn-vɩɩs a naasã ne kãsem-dãmba sʋka, la a yaa wa pesg b sẽn kʋ. Pe-bilã da tara yɩɩl a yopoe la nin a yopoe sẽn ya Wẽnnaam sɩɩs a yopoe wã b sẽn tʋm dũniyã tɛk fãa wã.
7 Pe-bilã waa n deega sebrã sẽn be sẽn zao-a geerã zugã nug rɩtgẽ wã.
8 Pe-bilã sẽn deeg sebrã, bõn-vɩɩs a naasã ne kãsem-dãmbã pisi la a naasã wõgemda bãmb taoore, la bãmb ned kam fãa zãada pɛndg la sãnem laag sẽn pid ne tɩdar sẽn tar yũ-noogo, sẽn ya nin-sõamyã pʋʋsgo.
9 La bãmb da yɩɩnda yɩɩn-paalg n yetẽ: Yãmb n zems tɩ reeg sebrã la y sogs a sogdsã, bala b ra kʋʋ yãmba, la yãmb fãaga neb buud fãa pʋgẽ, goam buud fãa pʋgẽ, tẽms fãa pʋgẽ, soolem fãa pʋgẽ ne yãmb zɩɩm tɩ b lebg Wẽnnaam neba.
10 Yãmb kɩtame tɩ bãmb lebg soolem la maan-kʋʋdb tõnd Wẽnnaamã yĩnga, la bãmb na n dɩɩ naam dũni zugu.
11 Mam gesame la m wʋma malegs wʋsg sẽn gũbg geerã, ne bõn-vɩɩsã la kãsem-dãmbã koeese, la bãmb sõorã yaa tus piig naoor tus piiga, la tus naoor tusa.
12 Bãmb da zẽkda b koees n yetẽ: Pe-bil ning b sẽn dag n kʋ wã zemsame tɩ reeg pãn-tõogo, la arzegse la yam la pãnga, la waoogre, la ziiri la pẽgre.
13 La mam wʋma bõn-nandsã fãa sẽn be arzãna la sẽn be tẽng zug la tẽngã tẽngre la ko-kãsenga zugu la bũmb nins fãa sẽn be be wã sẽn yet yaa: Sẽn zao-a geerã zugã la pe-bilã n tog ne pẽgre, la waoogre, la ziiri la pãnga, zamaan o zamaane.
14 La bõn-vɩɩs a naasã yeelame yaa: Ãmina! La kãsem-dãmbã yĩgimdame n waoog-ba.
1 Pe-bilã sẽn sok soagdg a yembr sogds a yopoe wã sʋkã, mam gesame, la mam wʋma bõn-vɩɩs a naasã ned a yembr sẽn gom ne koɛɛg sẽn wẽnd wa sa-kɛleng n yeel yaa: Wa!
2 Mam gesame, la mam yãa wed-moaag sẽn ya pɛɛlga. Sẽn zao-a weefã ra zãada tãpo, la b kõo yẽ maanfo. La a kẽnga wa tõaagda, n na n tõoge.
3 Pe-bilã sẽn sok soagdg a yiib soabã, mam wʋma bõn-vɩɩg a yiib soabã sẽn yeel yaa: Wa!
4 La wed-moaag a to kõbg sẽn ya miuug wa bugum yiime. La b kõo sẽn da zao-a yẽ wã pãn-tõog t'a yiis dũni laafɩ, tɩ nebã kood taaba. La b kõo yẽ zabr sʋ-kãsenga.
5 La bãmb sẽn sok soagdg a tãabẽ soabã, mam wʋma bõn-vɩɩg a tãabẽ soabã sẽn yeel yaa: Wa! Mam gesame, la mam yãa wed-moaag sẽn ya sablga. Sẽn zao-a yẽnda wã dag n zãada balãns a nugẽ.
6 La mam wʋma bũmb sẽn wẽnd wa koɛɛg bõn-vɩɩs a naasa sʋka. A da yetame yaa: bɩle bɛɛl ne wũmbl na n koosa hal deniye. Orz ne wũmbl a tãab na n koosa deniye. La sã n ya kaamã la divẽ wã, ra sɩɩs-b ye.
7 Pe-bilã sẽn sok soagdg a naas soabã, mam wʋma bõn-vɩɩg a naas-n-soaba koɛɛg sẽn yeel yaa: Wa!
8 Mam gesame la mam yãa wed-moaag t'a kõbgã ya kẽeg-kẽega. Sẽn da zao-a yẽnda wã yʋʋr boondame t'a kũum, la kɩɩm-kulg ra pʋgda yẽnda. La b kõo bãmb pãn-tõog tɩ b tõog dũniyã ned a yembr neb a naas fãa sʋk n kʋ-b ne zabr sʋʋga, la kom, la bãase, la ne dũniyã we-rũmsi.
9 Pe-bilã sẽn sok soagdg a nu soabã, mam yãa b sẽn dag n kʋ neb nins Wẽnnaam koɛɛgã poorẽ la b sẽn kɩs kasetã yĩngã sɩɩs sẽn be tẽn-kugrã tẽngre.
10 Bãmb zẽka b koees ne pãng n yeel yaa: Zu-soben-sõng la sɩd soaba, yãmb na n gũume hal tɩ ta dabʋr tɩ y yaool n kao duniyã nebã bʋʋdo, la y rok y sũur tõnd zɩɩma raagr yĩnga?
11 B kõo bãmb ned kam fãa fu-pɛɛlga, la b yeel-b tɩ b kel n vʋʋs wakat bilf yɛsa, hal tɩ bãmb tʋmd-n-taasã ne b ba-biisã b sẽn na n kʋ wa b sẽn kʋ bãmbã sõor pidi.
12 Pe-bilã sẽn sok soagdg a yoob soabã, mam gesame. Tẽn-digimdg kãseng n zĩndi. Wĩndga lebga sableg diga wa bot sẽn wʋg ne rũm-sableg kõbdo, la kiuugã zãng lebga wa zɩɩm,
13 la yĩngr ãdsã sʋʋga tẽngã zug wa kankang sob-kãseng sẽn wẽ t'a kankam yorge.
14 Sa-gãongã looga wa sebr b sẽn pili. La tãmsã fãa ne tẽns nins koomã sẽn gũbgã sersa b zĩisẽ.
15 Dũni rĩm-dãmbã la a nin-kãsemse la a sodaas nanamse la a arzegs rãmba la a pãens rãmba la a yemse, ne burkĩmbã, b fãa soonda tãms bogdẽ la tãms pĩis sʋka.
16 La b yeta tãmsã ne pĩisã tɩ b lʋɩ n põd-ba, n solg-b tɩ b zãag ne sẽn zao-a geerã zugã gesgo la ne pe-bilã sũ-puugri.
17 Bala, Wẽnnaam ne pe-bilã sũ-puugrã ra-kãsengã taame, la ãnna n na n tõog n põse?
1 Dẽ poore, mam yãa malegs a naas sẽn yas dũniyã kɩrems a naasã. Bãmb da yõka dũniyã sobd a naasã, sẽn na yɩl tɩ b ra wẽ tẽngã wall ko-kãsengã wall tɩɩg baa a yembr ye.
2 La mam yãa malɛk a to sẽn yi yaang n zẽkdẽ, la yẽ ra zãada Wẽnnaam sẽn vɩ wã bãn-ningdga. Malɛkã zẽka a koɛɛg n kelem n yeel malegs a naasã b sẽn da kõ noor tɩ b maan tẽngã ne ko-kãsengã wẽngã yaa:
3 Da maan-y tẽngã wall ko-kãsengã wall tɩɩsã bũmbu, hal tɩ tõnd paam n ning d Wẽnnaamã tʋmtʋmdbã rĩyã bãnde.
4 La mam wʋma neb nins b sẽn ning bãndã sõore. Yaa neb tus koabg la tus pis-naas la a naase, a Israyɛl buudã fãa kambã sʋka.
5 A Zuda buudã neb b sẽn ning bãndã sõor tus piig la a yiibu. A Rubɛn buudã me yaa neb tus piig la a yiibu. A Gaad buudã me yaa neb tus piig la a yiibu,
6 a Azɛɛr buudã me yaa neb tus piig la a yiibu, a Neftali buudã me yaa neb tus piig la a yiibu, a Manase buudã me yaa neb tus piig la a yiibu,
7 a Sɩmyõ buudã me yaa neb tus piig la a yiibu, a Levi buudã me yaa neb tus piig la a yiibu, a Isakaar buudã me yaa neb tus piig la a yiibu,
8 a Zabilõ me yaa neb tus piig la a yiibu, a Zozɛf buudã me yaa neb tus piig la a yiibu, a Bɛnzame buudã me yaa neb tus piig la a yiibu.
9 Dẽ poore, mam gesame, la mam yãa neb kʋʋng wʋsg ned sẽn ka tõe n sõd n sɛ ye, sẽn yi soolem dãmba fãa pʋse, buud fãa pʋse, tẽns toay-toay fãa pʋse, la sẽn gomd goam buud toor-toore. Bãmb dag yera fu-peelse la b zãad koms vãad b nusẽ n yas geerã taoore la pe-bila taoore.
10 Bãmb dag n zẽkda b koees ne pãng n yetẽ: Fãagrã bee ne tõnd Wẽnnaam sẽn zao geerã zugã, la ne pe-bilã.
11 La malegsã fãa ra yas n gũbga geerã ne kãsem-dãmbã la bõn-vɩɩs a naasã. Bãmb wõgemdame n fõgen b nens tẽng geerã taoor n waoog Wẽnnaam
12 n yetẽ yaa: Ãmina! Pẽgre, la ziiri, la yam la bark pʋʋsgo, la waoogre, la pãn-tõogo, la pãng yaa tõnd Wẽnnaamã n so zamaan o zamaana! Ãmina!
13 Dẽ, kãsem-dãmbã ned a yembr gomame n sok maam yaa: Neb nins sẽn yeelg fu-peelsã yaa ãnna rãmba, la b yita yɛ?
14 Mam leoka yẽ yaa: M zu-soaba, yãmb n mi. La a yeela maam yaa: Yaa neb nins sẽn yi to-kãsengã pʋgẽ wã. Bãmb pegsa b fut pe-bilã zɩɩmẽ tɩ b lebg peelse.
15 Yaa woto yĩng n kɩt tɩ b be Wẽnnaam geerã taoore, n tʋmd Wẽnnaam tʋʋmd wĩndg la yʋng bãmb roogã pʋgẽ. Ned ning sẽn zao-a geerã zugã na n zĩnda ne bãmba n gũ-ba.
16 Kom kõn le yõk-ba, ko-yũud kõn leb n yõk-ba, la wĩntoogo, wall tʋʋlg kõn leb n wẽ-b ye.
17 Bala, Pe-bilã sẽn be geerã sʋkã na n dɩlga bãmba, la b tall-b n kẽng vɩɩm ko-bunds zĩisẽ, la Wẽnnaam na n yẽesa nintãm b ninẽ.
1 Pe-bilã sẽn sok soagdg a yopoe soabã, arzãn pʋg yɩɩ sɩddd tɩ kolg lɛɛr pʋɩ-sʋka.
2 Mam yãa malegs a yopoe sẽn yas Wẽnnaam taoorã, la b kõ-b-la bard a yopoe.
3 La malɛk a to n waa n yalsa tẽn-kugrã zugẽ. Yẽ ra zãada wisd laag sẽn ya sãnem. B kõo yẽ tɩdar wʋsg t'a naag ne nin-sõamyã fãa pʋʋsg n yõog sãnem tẽn-kugrã sẽn be geerã taoorã zugu, tɩ yɩ maoongo.
4 Tɩdarã bug-zõos naaga ne nin-sõamyã pʋʋsg n yi malɛkã nugẽ n zẽk yĩngri, Wẽnnaam taoore.
5 Malɛkã rɩka wisd laagã n pids-a ne tẽn-kugrã zug bugmã n lob-a tẽngã zugu. Sa-kelemse la kelemse la sa-yãgbo la tẽn-digimdg zĩndame.
6 La malegs a yopoe wã sẽn da zãad bard a yopoe wã seglame n na n peeb bardã.
7 Pipi malɛkã peeba baorgo. La sapɩlem ne bugum sẽn kalem ne zɩɩm zĩndame, la b lob-b-la tẽng zugu. Tẽngã pʋɩɩr a yembr tãab sʋk rɩɩ bugum, tɩɩg a yembr tãab sʋk dɩɩ bugum, la mo-maasã fãa rɩɩ bugum. Bardo (8.6)
8 Malɛk a yiib-n-soabã peeba baorgo. La b loba bũmb sẽn wẽnd wa tãn-kãseng sẽn dɩt bugum ko-kãsengã pʋga. La ko-kãsengã pʋɩɩr a yembr tãab sʋk lebga zɩɩm.
9 La bõn-naands nins sẽn dag n be ko-kãsengã pʋgẽ n vɩ wã pʋɩɩr a yembr tãab sʋk kiime. La koom kogondã pʋɩɩr a yembr tãab sʋk sãamame.
10 Malɛk a tãab-n-soabã peeba baorgo. La ãd-kẽeng sẽn dɩt bugum wa bug-vɩleng n yii yĩngr n lʋɩ. Yẽ lʋɩɩ ko-zoetmã pʋɩɩr a yembr tãab sʋk zugu, la ko-bundsã pʋɩɩr a yembr tãab sʋk zugu.
11 Ad-kãng yʋʋr boondame t'a Zẽnem. La koomã pʋɩɩr a yembr tãab sʋk lebga zẽnem, la koomã sẽn lebg zẽnemã kʋʋ ninsaalb wʋsgo.
12 Malɛk a naas-n-soabã peeba baorgo. La wĩntoogã pʋɩɩr a yembr tãab sʋka, la kiuugã pʋɩɩr a yembr tãab sʋka, la ãdsã pʋɩɩr a yembr tãab sʋk pãng saame, sẽn na yɩlg la pʋɩɩr a yembre tãab sʋk lebg lika, tɩ wĩndg vẽenem pãng boog sẽn tat pʋɩɩr a yembr tãab sʋka, tɩ yʋng vẽenem pãng boog a woto.
13 Mam gesame, la m wʋma sɩl-kẽeng sẽn yɩgd sa-gãnã sʋka, n zẽk a koɛɛg ne pãng n yetẽ yaa: Toogo! Toogo! Ninsaalbã sẽn be tẽng zugã na n paama toogo, bardã a taabã malegs sẽn na n peebã koees yĩnga.
1 Malɛk a nu soaba peeba baorgo. Mam yãa ãdg a yen sẽn yi saasẽ n lʋɩ tẽngã zugu. La b kõo yẽ bulg sẽn zulum n ka tar tɛk kʋɩlen-bila.
2 Yẽ paka bul-zulungã, la bug-zõos sẽn wẽnd wa wʋn-kãseng bug-zõos yii bulgẽ wã. La bug-zõosã sẽn yi bulgẽ wã soba wĩntoogã ne pemsma.
3 Sʋy yii bug-zõosẽ wã n sãeeg n kẽ tẽngã, la b kõo bãmb pãn-tõog sẽn ya wa tẽng zug namsã sẽn tarã.
4 La b yeel-b lame tɩ b ra sɩɩs moodã sẽn be tẽng zugã wall bũmb baa a yen sẽn ningd vãado wall tɩɩg baa a yembr ye, b zab ne neb nins sẽn ka tar Wẽnnaam bãnd b rĩyẽ wã bala.
5 B ka kõ sʋyã noor tɩ b kʋ nebã ye, la yaa tɩ nams-b kiis a nu. La namsg ning b sẽn namsd nebã wẽnda wa nang sẽn dũmd ned t'a namsd to-to wã.
6 Da-kãense, ninsaalbã na n baoo kũum la b kõn yãnd-a ye. Bãmb na n datame n ki, la kũum na n zoee n zãaga ne bãmba.
7 Sʋy kãens wẽnda wa wiid sẽn seglg zabr yĩnga. Bũmb n da be b zutẽ wã n ya wa maanf-rãmba, n wẽnd wa sãnem, la b nensã ra yaa wa ninsaalb nense.
8 Sʋyã rag n tara zoobd wa pagb zoobdo, la b yẽnã dag n wẽnda wa gɩgemd yẽna.
9 Bãmb da tara yãad sẽn ya wa kut gãntigsi, la b pɩgsã bʋrg ra yaa wa terok-rãmb wiid wʋsg sẽn tat n zoet n dabd zabr zĩigẽ bʋrgo.
10 Bãmb dag n tara zʋy sẽn wẽnd nams zʋyã, la b tara zʋ-gõose, la pãn-tõog ning bãmb sẽn na n tall n nams ninsaalbã kiis a nu wã ra bee bãmb zʋyẽ wã.
11 Bãmb tara b naaba, bul-zulung malɛkã t'a so bãmba. A yʋʋr ne Hebre yaa "Abadõ" la ne Gɛrk yaa "Apolyõ," sẽn dat n togs tɩ sãamda.
12 Pipi toogã loogame. Ad tood a yiib n ket n wat yõwã poore.
13 Malɛk a yoobẽ soabã peeba baorgo. La mam wʋma koɛɛg sẽn yi sãnem tẽn-kugrã sẽn be Wẽnnaam taoorã yɩɩl a naasẽ wã.
14 Koɛɛgã yeela malɛk a yoobẽ soabã sẽn da zãad baorga yaa: Baag malegs a naasã b sẽn balg kʋɩl-kãseng ning sẽn boond tɩ Efartã zugã.
15 La b baaga malegs a naasã sẽn da segl n sɛ wakate, la daare, la kiuugu ne yʋʋmdã yĩngã, tɩ b kʋ ninsaalbã ned a yembr tãab fãa sʋka.
16 La zab-zabdbã sẽn ya wed-rʋʋdbã sõor dag n yaa tus kẽema kobs-yi. Mam wʋma b sõorã.
17 Woto, vẽnegrã pʋgẽ mam yãa wiidã ne neb nins sẽn zao-bã. Bãmb da tara gãntigsi, tɩ b kõbgã ya wa bugum, la wa kugr b sẽn boond tɩ safɩɩre la wa kidbri. Wiidã zut dag n wẽnda gɩgem zutu. Bugum ne bug-zõos la kidbr n dag n yit b noeyẽ wã.
18 To-kãensã a tãabã sẽn ya bugmã, la bug-zõosã ne kidbrã sẽn da yit wiidã noeyẽ wã kʋʋ ninsaalbã ned a yembr tãab sʋka.
19 Bala, wiidã pãn-tõogã bee b noeyẽ wã ne b zʋyẽ wã. Bãmb zʋyã wẽnda wa wiisi. Zʋyã tara zutu, la yaa rẽ la b tar n namsd ninsaalbã.
20 La neb a taabã sẽn kell tɩ to-kãensã ka kʋ wã ka tek yam n kos sugr tʋʋm nins b nusã sẽn tʋmã yĩng ye. Bãmb ka bas zĩn-dãmba ne wẽn-naands sẽn maan ne sãnem la wanzuri, la zũudu, la kuga, la raadã waoogr ye. Wẽn-naandsã ka tõe n yã wall b wʋme, wall b kẽn ye.
21 Bãmb ka kos sugr b nin-kʋʋrã la b bag-bʋgrã ne b yoobã la b wagdmã yĩng ye.
1 Mam yãa malɛk a to sẽn tar pãnga, sẽn yer sawadgo n yi arzãn n sigda, la saag-gomtɩʋʋg n da be yẽ zugẽ wã. A nengã da yaa wa wĩntoogo, la a naowã da yaa wa bugum.
2 Yẽ ra zãada seb-bil sẽn lake. A tilga a rɩtg naoorã ko-kãsengã zugu, la a tilg a goabg naoorã tẽngã zugu.
3 A zẽka a koɛɛg n tãs ne pãng wa gɩgemd sẽn kelemde. Malɛkã sẽn kelmã, sa-kelems a yopoe wã gomame tɩ nebã wʋme.
4 Sa-kelems a yopoe wã sẽn gomã, mam dag n na n gʋlsame, la mam wʋma koɛɛg sẽn yi arzãn n yeel yaa: ning bũmb nins sa-kelems a yopoe wã sẽn togsã soagdga, la f ra gʋls-b ye.
5 La malɛk ning mam sẽn da yã t'a yas ko-kãsenga ne tẽngã zugã zẽka a nug rɩtg n tees yĩngri,
6 la a wẽena ne soab ning sẽn vɩ-a zamaan o zamaanã, sẽn naan-a yĩngr ne bũmb nins sẽn be be wã, la dũniyã ne bũmb nins sẽn be be wã la ko-kãsenga ne bũmb nins sẽn be a pʋgẽ wã, n wẽen n yeel tɩ b ka na n leb n kõ weer yɛs ye,
7 la tɩ daar ning malɛk a yopoe soabã sẽn wat n segl n na n peeb baorgã, wakat kãng la Wẽnnaam yel-solemdã na n paam pidsg wa b sẽn dag n togs b tʋmtʋmdbã sẽn ya bãmb no-rɛɛsdbã koe-noogã.
8 La koɛɛg ning sẽn yi arzãn tɩ mam wʋmã leb n goma ne maam n yeel yaa: Kẽng n tɩ reeg seb-bilã sẽn lakã, malɛk ning sẽn yas-a ko-kãsengã ne tẽngã zugã nugẽ.
9 Mam kẽnga malɛkã nengẽ n yeel-a t'a kõ maam seb-bilã. La a yeela maam yaa: Reeg-a n vele. A na n pidsa fo pʋgã ne toolem liga, la fo noorẽ wã, a na n yɩɩ noog wa sɩɩdo.
10 Mam deega seb-bilã malɛkã nugẽ n vele. A yɩɩ noog wa sɩɩd mam noorẽ wã, la mam sẽn vel-a wã, mam pʋgã pida ne toolem.
11 Dẽ poore, b yeela maam yaa: Yaa tɩlɛ tɩ fo leb n togs bãngr goam yɛs n gom neb wʋsg yelle, la buud wʋsg yelle la goam buud wʋsg yelle la rĩm-dãmb wʋsg yelle.
1 B kõo maam tãnwĩig sẽn wẽnd wa dasaar n yeel maam yaa: Yik n mak Wẽnnaam doogã ne tẽn-kugrã, la neb nins sẽn be beene n pʋʋsdẽ wã.
2 La bas Wẽnnaam doogã samandã kɛɛng n da mak-a ye, tɩ bala, b kõ-a la bu-zẽmsã, la bãmb na n taba tẽn-sõngã kiis pis-naas la a yiibu.
3 Mam na n kõo m kaset dãmb a yiibã pĩnd-n-bãngr goam kũuni, tɩ b yeelg bot n togs bãngr goamã rasem tusr la kobs-yi la pis-yopoe.
4 Yaa bãmb la Oliiv tɩɩs a yiibu la fɩtl-dogends a yiibã sẽn yas tẽngã Zu-soabã taoorã.
5 Ned sã n dat n nams-ba, bugum n yit bãmb noorẽ wã n dɩt b bɛɛbã. N-ye, ned sã n dat n nams-ba, yaa tɩlɛ tɩ kũum a woto kʋ-a.
6 Bãmb tara pãn-tõog n tõe n pag yĩngr tɩ saag ka ni dasem nins bãmb sẽn pĩnd n togsã tɛk ye, la b tara pãn-tõog n tõe n tek ko-rãmbã tɩ lebg zɩɩm, la b kɩt tɩ tood buud fãa paam nebã tẽng zugu, wakat ninga fãa b sẽn date.
7 Bãmb sã n wa kɩs b kasetã n sɛ, rũng ning sẽn yit bog-zulungẽ wã na n yika zabr ne bãmba, n tõog-ba, n kʋ-ba.
8 La b kũumã na n paa tẽn-kãseng ning b sẽn boond sɩɩg wɛɛngẽ tɩ Sodom la Eziptã pʋgẽ, vɩʋʋgẽ, zĩig ning meng b sẽn dag n ka bãmb Zu-soabã da-pɩk zugã.
9 Tẽns toay-toay neba, la buud toay-toay neba, la neb sẽn gomd goam buud toor-toore, la soolem toay-toay neb na n yãa bãmb kũumã rasem a tãab la pʋɩ-sʋka, la b kõn sak tɩ b rɩk-b n tɩ mum ye.
10 Dũni nebã na n maana sũ-noog ne bũmb ning sẽn paam kaset dãmb a yiibã, la b na n kɩdmame. Bãmb na n tʋma kũun n kõ taaba, bala Wẽnnaam no-rɛɛsdb a yiib kãens da namsa nebã sẽn be tẽngã zugã.
11 La rasem a tãab la pʋɩ-sʋkã zugẽ, vɩɩm sɩɩg sẽn yi Wẽnnaam nengẽ kẽe bãmb pʋsẽ la b yikame n yals b nao zutu. Rabeem kãseng yõka neb nins sẽn yãt bãmbã.
12 No-rɛɛsdb a yiibã wʋma koɛɛg sẽn yi arzãn n yeel-b yaa: Wa-y yĩngr ka! Bãmb kẽe sawadgẽ n zẽk n kẽng arzãna, la b bɛɛbã yãnda bãmba.
13 Wakat kãnga bala, tẽn-digimdg sẽn ya kãseng zĩndame, la tẽngã pʋɩɩr a yembr piig sʋk sirgame. Tẽn-digimdg kãng kʋʋ neb tus a yopoe, la rabeem yõka neb a taabã, la b kõo arzãn Wẽnnaamã waoogre.
14 Toog a yiib soabã loogame. Ad keta bilf tɩ toog a tãab soabã wa.
15 Malɛk a yopoe soabã peeba baorgo. La koe-kãsems zĩnda arzãn n yeel yaa: Dũniyã soolem lebga tõnd Zu-soabã ne bãmb Kiristã n so. Bãmb na n dɩɩ naam zamaan o zamaana!
16 Kãsem-dãmb pisi la a naasã sẽn dag n zao b gɛyã zut Wẽnnaam taoorã wõgemdame n fõgen b nens tẽng n waoog Wẽnnaam n yeele:
17 Zu-soab a Wẽnnaam sẽn Tõeya fãa, sẽn be, la sẽn dag n be wã, tõnd pʋʋsd-y la barka, yãmb sẽn deeg y pãn-kãsengã la y sẽn zĩndig y naamã yĩnga.
18 Soolem toay-toayã rãmb ra yika b sũyã, la yãmb sũ-puugrã waame, la wakat taame tɩ y na n kao neb nins sẽn ki wã bʋʋdo, la y keo y no-rɛɛsdbã sẽn ya yãmb tʋmtʋmdbã ne y nin-tũusidsã la neb nins sẽn zoet yãmb yʋʋrã, nin-talse la nin-kãsemse, la y sãam neb nins sẽn sãamd tẽngã.
19 B paka Wẽnnaam roogã sẽn be arzãnã, la b yãa Wẽnnaam kãabg koglgã b roogã pʋga. Sa-yãgbo, la koeese, la sa-kelemse la tẽn-digimdg ne sapɩlem wʋsg zĩndame.
1 Bõn-bãnd sẽn ya kãseng puka arzãna. Yaa pag sẽn pil wĩntoog wa fuugu, n tab kiuugã ne a nao, la a fõgen maanf sẽn maan ne ãds piig la a yiibu.
2 Pagã ra tʋtame, la a kʋmda rogem kʋnkʋma, rogmã toog sẽn namsd-a yĩnga.
3 Bõn-bãnd a to puka arzãna: Ad yaa bõnin-kãseng sẽn ya miuugu, n tar zut a yopoe ne yɩɩl piiga, la maanf-rãmb n da fõg a zut a yopoe wã.
4 Yẽ zʋʋrã rag n kãagda ãdsã sẽn be yĩngrã, yembr taab fãa sʋk n lobd tẽng zugu. Bõninã yik n yalsa pag ning sẽn dat n dogã taoore, tɩ pagã sẽn dog yee, bɩ yẽ vel a biigã.
5 Pagã roga bi-ribla, rao sẽn na n zã kut dasaar n soog soolem fãa. La b zẽka pagã biig t'a kẽng Wẽnnaam nengẽ, la b geerẽ wã.
6 La pagã zoee n kẽnga weoogẽ, zĩig ninga Wẽnnaam sẽn dag n segl a yĩngã, tɩ b tõe n dɩlg-a be rasem tusr la kobs yi la pis yoobe.
7 Zab-kãseng zĩnda arzãna. Malegs naab a Misɛl ne a malegsã zaba ne bõninnã. Bõninnã me ne a malegsã zabame,
8 la b ka tõog ye. La zĩig ka leb n zĩnd arzãn yẽ yĩng ye.
9 B riga bõnin-kãsengã, wag-kʋdrã b sẽn boond tɩ rõatã la a Sʋtãana, soab ning sẽn belgd tẽngã zĩig ning fãa neb sẽn be wã nebã. B tusa yẽnda ne a malegsã n lob tẽng zugu.
10 Dẽ, mam wʋma koe-kãseng arzãn pʋgẽ sẽn yeel yaa: Moasã, fãagre, la pãnga, la tõnd Wẽnnaamã naam la bãmb Kiristã noor waame. Bala, b luba tõnd ba-biisã rõatã, soab ning sẽn dag n dõt bãmb Wẽnnaam taoor wĩndg la yʋngã.
11 D ba-biisã tõoga rõatã ne pe-bilã zɩɩm pãnga, la ne kasetã bãmb sẽn kɩtã pãnga, la bãmb ka nong b vɩɩmã, hal n zoe kũum ye.
12 Yaa woto yĩnga, bɩ arzãna la yãmb dãmb sẽn be beene wã maan sũ-noogo! Toog na n paama tẽngã ne ko-kãsengã. Bala, Sʋtãana sig n waa yãmb nengẽ ne sũ-puugri, a sẽn bãng t'a wakatã sẽn ketã ka waoogã yĩnga.
13 Bõninnã sẽn yã tɩ b loba yẽnda tẽng zugã, a babsa pag ning sẽn dog-a bi-riblã.
14 La b kõo pagã panantug-kẽeng pɩgs a yiib t'a yɩk n kẽng weoogẽ wã, a zĩigẽ wã, zĩig ning b sẽn na n dɩlg-a wakat a yembre, la wakat dãmba, la wakat pʋɩ-sʋkã, tɩ waafã ra yã-a ye.
15 La waafã kɩtame tɩ koom yi a noorẽ wã, n ya wa mogr koom ne pʋgl pagã, sẽn na yɩl tɩ koomã kãag pagã.
16 La tẽngã sõnga pagã, n yaag a noor n vel koomã bõninnã sẽn yiis a noorẽ wã.
17 Bõninnã sũur puuga ne pagã, la a kẽngame n tɩ yik zabr ne pagã yagensã sẽn kellã, neb nins sẽn sakd Wẽnnaam tõodã la sẽn tall-b a Zezi kasetã.
18 La bõninnã yik n yalsa ko-kãsengã bĩisr zugu.
1 Dẽ poore, mam yãa rũng sẽn yi ko-kãsengẽ wã n tar yɩɩl piiga la zut a yopoe, la maanf-rãmb piig n dag n be a yɩɩla zutu, la Wẽnnaam tʋʋsg yʋy n dag n gʋls a zutẽ wã.
2 Rũngã mam sẽn yã wã ra wẽndã wa ãbga, t'a naowã wẽnd wa wʋrs naowã, t'a noorã wẽnd wa gɩgemd noore. Bõninnã kõo rũngã a pãngã la a geerã la a pãn-tõogã.
3 La mam yãa rũngã zug a yen sẽn pogle, n ya wa a na n kiime, la a poglgã sẽn da tog n kʋ-a wã maagame. Neba fãa sẽn be tẽng zugã yɛɛsame la b tũu rũngã.
4 B wõgemda bõninnã taoore a sẽn kõ rũngã pãn-tõogã yĩnga. B wõgemda rũngã taoore, n yeele: Ãnnã n wẽnd rũngã, la ãnna n tõe n zab ne-a?
5 B kõo rũngã noor t'a gom wilg-m-meng goama la Wẽnnaam paoogr goama. La b kõo yẽ pãn-tõog t'a tʋm kiis pis-naas la a yiibu.
6 Rũngã yaaga a noor n na n gom n paoog Wẽnnaam, n paoog bãmb yʋʋrã la b sɛk-roogã, la neb nins sẽn be arzãnã.
7 La b kõo yẽ noor t'a yik zabr ne Wẽnnaam nin-tũusdsã n tõog-ba. B kõo yẽ pãn-tõog t'a tõog buud fãa, la tẽng fãa neba, la goam buud fãa neba la soolem fãa.
8 La neba fãa sẽn be tẽng zugu, tɩ b yʋy ka gʋls vɩɩm sebr sẽn ya pe-bil ning b sẽn kʋ hal dũni naaneg wakatã sebrã pʋgẽ wã wõgemda rũngã taoore.
9 Ned sã n tar tʋb bɩ a kelge!
10 Ned sã n tog n kẽ yembdo, a na n kẽ yembdo. Ned sã n kʋ ne zabr sʋʋga, yaa tɩlɛ tɩ b kʋ-a ne zabr sʋʋga. Wẽnnaam nin-tũusdsã modgr la b tẽebã la woto.
11 Dẽ poore, mam yãa rũng a to sẽn yi tẽnga pʋgẽ. A ra tara yɩɩl a yiib sẽn wẽnd wa pe-bil yɩɩla, la a ra gomda wa bõninnã.
12 Yẽ da tʋmda ne pipi rũngã pãn-tõogã fãa a nifẽ, la a kɩtame tɩ tẽngã ne nebã sẽn be a zugã wõgemded pipi rũngã sẽn da paam sãmpog-kʋʋdg tɩ maagã taoore.
13 Rũng a yiib-n-soabã maana bãn-kãsemse, hal n kɩtdẽ tɩ bugum yit yĩngr n sigd tẽngã zug nebã nifẽ.
14 Ne bãn b sẽn kõ-a noor t'a maan pipi rũngã taoorã, a belga nebã sẽn be tẽng zugã, n yeel-b tɩ b maan rũng ning sẽn paam poglg ne zabr sʋʋg n kell n põsã bõn-naandga.
15 B kõo rũng a yiib-n-soabã pãn-tõog t'a kɩt tɩ pipi rũngã bõn-naandgã paam sɩɩga, sẽn na yɩl la bõn-naandgã gome la a kɩt tɩ b kʋ neb nins fãa sẽn kõn wõgemd rũngã bõn-naandgã taoorã.
16 La a kɩtame tɩ neba fãa, nin-tals la nin-kãsemse, arzegs rãmb la naong rãmba, yemse ne burkĩmb reeg bãnd b nug-rɩtgo wall b rĩyã zutu,
17 la tɩ ned baa a yen ra tõog n da wall a koose, t'a ka tar bãndã, rũngã yʋʋre, wall a yʋʋrã geel-bilã ye.
18 Yam la woto. Bɩ ned ning sẽn tar yam geelg rũngã yʋʋr geelg sõore. Bala, yaa ninsaal yʋʋr geelg sõore, la a yʋʋrã geelg sõor yaa 666.
1 Mam gesame, la m yãa pe-bilã sẽn yik n yas Siyõ tãngã zugu, tɩ neb tus koabg la tus pis-naas la a naas sẽn da tar pe-bilã yʋʋr ne b ba wã yʋʋr sẽn gʋls b rĩyẽ wã be ne bãmba.
2 Mam wʋma koɛɛg sẽn yi arzãna, n wẽnd wa ko-kãsems koɛɛga, wa sa-kɛleng kãseng bʋrgo, la rãamd ninga mam sẽn wʋma ra wẽnda wa pend-wẽebd sẽn wẽed b pendse.
3 B yɩɩnda yɩɩn-paalg geerã taoore, la bõn-vɩɩs a naasã ne kãsem-dãmbã taoore. Ned ba a yen ra ka tõe n zãms yɩɩllã ye, sã n ka neb 144.000 sẽn dag n paam fãagr dũni zugã.
4 Yaa neb nins sẽn ka rẽgem b mens ne pagbã, bala b ka sãam ye. Bãmb na n pʋgda pe-bilã n dabd zĩig ninga fãa b sẽn dabda. B raa bãmb n yiis neba sʋka, tɩ b yɩ wa dẽenem biis Wẽnnaam ne pe-bilã yĩnga,
5 la zĩrĩ ka tol n zĩnd b noeyẽ ye. Rõadg ka be b zut ye.
6 Mam yãa malɛk a to sẽn yɩgd n pɩʋʋgd yĩngri: A dag n tara koe-noog sẽn paad wakat sẽn kõn sa, n na n togs neb nins sẽn be tẽng zugã, soolem fãa, buud fãa, goam buud fãa neba, la tẽng fãa neba.
7 Yẽ, zẽka a koɛɛg n yetẽ yaa: Zoe-y Wẽnnaam dabeem la y waoog bãmba. Bala wakat taame tɩ bãmb na n kao bʋʋdo. Wõgemd-y soab ning sẽn naan-a yĩngr la tẽngã, ko-kãseng ne ko-bundsã taoore.
8 Malɛk a to sẽn ya yiib-n-soab pʋglame n yetẽ yaa: A lʋɩɩme! A lʋɩɩme! Babilon kãsengã sẽn kɩt tɩ soolem dãmba fãa yũ yẽ yoobã sẽn ka koakã divẽ wã lʋɩɩme.
9 Malɛk a to sẽn ya tãab-n-soab pʋgla bãmb ne koe-kãseng n yeele: Ned sã n wõgemd rũngã ne a bõn-naandgã taoore, la a sã n deeg bãndã a dĩirẽ wall a nug zugu,
10 yẽ soab me na n yũu Wẽnnaam sũ-puugrã divẽ sẽn ka pulli tɩ b kiig bãmb sũ-puugr laagẽ wã. La yẽ na n paama namsg bugmẽ la kidbr pʋga, maleg-sõamy wã ne pe-bilã taoore.
11 Bãmb namsgã bug-zõos zẽkda zamaan o zamaane. La wĩndg ne yʋngo, neb nins sẽn wõgemded rũngã ne a bõn-naandgã taoorã, la ned ning sẽn deeg-a yẽ yʋʋrã bãndã ka tol n tar vʋʋsem ye.
12 Woto yĩnga, nin-sõamy wã tog n nanga pãnga, n sakd Wẽnnaam tõodã la b tall tẽeb ne a Zezi.
13 Mam wʋma koɛɛg sẽn yi arzãn n yetẽ: Gʋlse: sẽn sɩng ne moasã, bark bee kũum nins sẽn kiid Zu-soaba tũudum pʋgẽ wã zutu. Sɩɩg-sõng yetame tɩ n-ye, tɩ b tõe n bas b tʋʋmã n vʋʋse, bala bãmb tʋʋmã pʋgd-b lame.
14 Mam gesame la m yãa sawad-pɛɛlga, la ned sẽn wẽnd wa ninsaal n dag n zao sawadgã zugu. A rag n fõgena a zug sãnem maanfo, la a zãad goeoog sẽn dɩt a nugẽ.
15 Malɛk a to yii wẽnd-doogẽ wã n zẽk a koɛɛg n gom ne sẽn zao-a sawadgã ne pãng n yeel yaa: Yulumd f goeoogã n wʋre. Wʋrb wakat taame, bala, bõn-koaadlã sẽn be tẽng zugã bɩɩme.
16 La sẽn zao-a sawadgã zugã yulumda a goeoogã tẽngã zugu, la b tigsa tẽng zug bõn-koaadlã.
17 Malɛk a to yii wẽnd-doogã sẽn be arzãnã pʋgẽ. Yẽ me rag n tara goeoog sẽn dɩte.
18 Malɛk a to sẽn dag n tar pãn-tõog ne bugum yii tẽn-kugrẽ wã, n zẽk a koɛɛg n yeel malɛk ning sẽn zãad goeoog sẽn dɩtã yaa: Yulumd f goeoogã sẽn dɩtã, n yãgs nasaar-sibã sẽn be tẽng zugã gĩna, bala, a sibã bɩɩme.
19 Malɛkã yulumda a goeoogã tẽngã zugu. A yãgsa nasaar-sibã sẽn be tẽng zugã biisi n lob-b divẽ wẽkr kogl kãsengã sẽn ya Wẽnnaam sũ-puugr zĩigẽ wã pʋga.
20 La b taba koglgã pʋgẽ tẽngã kɛɛnga, la zɩɩm yii koglgẽ wã n zoe. A zulmã tata wiid salba, la a zoeeme n ta kɩlo kobs-tã.
1 Dẽ poore, mam yãa bãnd a to arzãn sẽn ya kãseng n sek gesgo. Yaa malegs a yopoe sẽn da zãad tood a yopoe, yaoolem dãmbã. Bala yaa ne to-kãens la Wẽnnaam sũ-puugrã na n pidsi.
2 La mam yãa bũmb sẽn ya wa ko-kãseng sẽn ya neng-gɛtga, n kalem ne bugum. La mam yãa neb nins sẽn tõog rũngã ne a bõn-naandgã la a yʋʋrã geel-bilã sẽn yɛs yĩngri, nen-gɛtgã sẽn wẽnd ko-kãsengã zugu. Bãmb da zãada Wẽnnaam pendse.
3 Bãmb yɩɩnda Wẽnnaam tʋmtʋmd a Moyiis yɩɩllã, la pe-bilã yɩɩlle: Zu-soab a Wẽnnaam sẽn Tõeya fãa, yãmb tʋʋmã yaa kãsemse la b bee neere! Soolem dãmba rĩma, yãmb tʋʋmã zemsame la b yaa sɩda.
4 Zu-soaba, ãnna n ka na n zoe yãmba, la a ka na n waoog yãmb yʋʋrã? Bala, yãmb y yen tãa n welg toore. La soolem dãmba fãa na n waa n wõgemda yãmb taoore, yãmb tɩrlemã sẽn pukã yĩnga.
5 Rẽ poore, mam gesame, la b paka kaset fu-roogã yɩlgr zĩigã arzãn pʋga.
6 Malegs nins sẽn da zãad tood a yopoe wã yii yɩlgr doogẽ wã. Bãmb dag n yera lẽ pɛɛlg fasɩ fut sẽn yãgda. La b rag n sẽba b yãad ne sãnem sẽbdse.
7 Ned a yembr bõn-vɩɩs a naasã sʋk kõo malegs a yopoe wã sãnem laas a yopoe sẽn pid ne Wẽnnaam sẽn vɩ zamaan o zamaanã sũ-puugri.
8 La yɩlgr doogã pida ne bug-zõose, Wẽnnaam ziirã ne b pãngã yĩnga, la ned baa a yen da ka tõe n kẽ yɩlgr doogẽ wã ye, hal tɩ toodã malegs a yopoe wã sẽn tarã sɛ.
1 Mam wʋma koe-kãseng sẽn yi wẽnd-doogẽ wã n yeel malegs a yopoe wã yaa: Kẽng-y n tɩ kiig-y Wẽnnaam sũ-puugrã sẽn be laas a yopoe wã pʋsã dũniyã zugu.
2 Pipi soabã kẽngame n tɩ kiig sẽn be yẽ laagẽ wã dũniyã zugu. La nod-kɛgeng sẽn ya toaag yõka neb nins sẽn dag n tar rũngã gʋlsem bãnde la b wõgemded bõn-naandgã taoorã.
3 Malɛk a yiib-n-soaba kiiga sẽn be yẽ laagẽ wã ko-kãsengã pʋgẽ, la a lebga zɩɩm wa kũum zɩɩm. La bõn-vɩɩs nins fãa sẽn dag n be ko-kãsengã pʋgã kiime.
4 Malɛk a tãab-n-soabã kiiga sẽn be yẽ laagẽ wã kʋɩlsã ne ko-bundsã pʋse, la b lebga zɩɩm.
5 La mam wʋma ko-rãmbã malɛkã sẽn yeel yaa: yãmba, soab ning sẽn dag n be, la sẽn be moasã, n welg toorã, yãmb sẽn kao bʋʋdã a woto wã zemsame.
6 Bala, bãmb daaga neb nins sẽn welg toorã la yãmb no-rɛɛsdbã zɩɩm, la yãmb kõ-b-la zɩɩm tɩ b yũ. Rẽ segda ne bãmba.
7 La mam wʋma koɛɛg sẽn yi tẽn-kugrẽ wã n yeel yaa: Hakɩɩka, Zu-soab a Wẽnnaam sẽn Tõeya fãa, yãmb bʋʋda kaoob yaa sɩda la tɩrga.
8 Malɛk a naas-n-soabã kiiga sẽn be yẽ laagẽ wã wĩntoogã zugu. La b kõo wĩntoogã pãng t'a yõog ninsaalbã ne bugum,
9 la tʋʋl-kãseng yõoga nebã. Bãmb paooga Wẽnnaam ning sẽn tar-a noor ne to-kãensã yʋʋre, la b ka tek yam n kos sugr n na n kõ Wẽnnaam waoogr ye.
10 Malɛk a nu soabã kiiga sẽn be yẽ laagẽ wã rũngã geerã zugu. La yẽ soolemã lebga lik bida. Toogã kɩtame tɩ ninsaalbã rũmd b zɛlma.
11 La toodã ne noadã sẽn tar bãmbã yĩnga, b paooga arzãnã Wẽnnaamã, la b ka tek yam n kos sugr b tʋʋm wẽnsã yĩng ye. Sũ-puugr laaga (16.1)
12 Malɛk a yoob-n-soabã kiiga sẽn be yẽ laagẽ wã kʋɩl-kãseng ning sẽn boond tɩ Efartã zugu. La kʋɩlgã koom kʋɩɩme tɩ lebg sor rĩm-dãmb nins sẽn yit yaangã yĩnga.
13 Mam yãa sɩ-rẽgd a tãab sẽn wẽnd wa loms sẽn yit dargõ wã noorẽ la rũngã noorẽ la belgr no-rɛɛsã noorẽ.
14 Bãmb yaa sɩɩse, zĩn-dãmb sẽn maand bõn-yɛɛsdse, la sẽn kẽngd dũni gill fãa rĩm-dãmbã nengẽ n na n tɩ tigs-b Wẽnnaam sẽn tõe fãa ra-kãsenga sẽn ya zabr daarã yĩnga.
15 Ad mam wata wa wagre. Bark bee ned ning sẽn ka gõe la sẽn yer a futu, sẽn na yɩl la a da kẽn beelle, la tɩ nebã kõn ya a yãndã zugu.
16 B tigma nanamsã zĩig a yen sẽn boond ne Hebre goam tɩ Harmagedõ.
17 Malɛk a yopoe soabã kiiga sẽn be yẽ laagẽ wã pemsma pʋga. La koe-kãseng yii geerẽ wã, wẽnd-doogẽ wã n yeel yaa: Maaname n sa!
18 La sa-yãgb ne koeese, la sa-kelems ne tẽn-digimdg sẽn ya kãseng zĩndame, la hal ninsaalb sẽn be dũni zug tɛka, tẽn-digimdg sẽn ya kãseng a woto nan ka tol n zĩnd ye.
19 Tẽn-kãsengã welga zĩis a tãabo. Soolem toay-toayã tẽns lʋɩɩme, la Wẽnnaam tẽega Babilon kãsengã yelle, n na n kɩt t'a yũ bãmb sũ-puug-kãsengã divẽ wã sẽn be laagẽ wã.
20 Koomã sẽn gũbg tẽns ninsã fãa zoeeme, la ned ka leb n yã tãmsã ye.
21 La sapɩlem zɩslem sẽn kolg kɩlo pis-naas yii yĩngr n dʋʋg ninsaalbã zutu. La sapɩlmã toog yĩnga, nebã paooga Wẽnnaam. Bala to-kãng talla pãng tɩ looge.
1 Dẽ poore, malegs a yopoe wã sẽn da zãad laas a yopoe wã, b ned a yembr waa n goma ne maam n yeele: Wa tɩ m na n wilga foom pʋg-yood kãsengã sẽn zĩ ko-kãsemsã zutã bʋʋdo.
2 Yaa ne yẽnda la dũniyã rĩm-dãmbã maan yoobo, la dũni nebã ra yũu yẽ yoobã divẽ tɩ b nens yilim.
3 Malɛkã rɩka maam m tagsgã pʋgẽ n kẽng weoogẽ. La mam yãa pag sẽn zao rũng sẽn ya miuug mass, n pid ne yʋɩ sẽn paoogd Wẽnnaam, la a tara zut a yopoe ne yɩɩl piiga.
4 Pagã ra yera fuug sẽn ya miu-kẽega la miuug mass n nags a meng ne sãnem la kuga b raab sẽn ya toogo, la pɛrl dãmba. Pagã ra zãada sãnem laag a nugẽ, la laagã ra pida ne tʋʋm wẽnse la ne pagã yoobã rẽgdo.
5 Yʋʋr n da gʋls pagã rĩirẽ, yaa yel-solemde: Babilon kãsengã, dũni pʋg-yoaadbã ne tʋʋm-wẽns ma.
6 Mam yãame tɩ neb nins sẽn welg toore, la a Zezi kaset dãmbã zɩɩm yilimd pagã nenga. Mam sẽn yãnd-a wã, linga mam wʋsgo.
7 La malɛk soka mam yaa: Bõe yĩng tɩ ya lingr ne foom? Mam na n togsa foom pagã ne rũng ning sẽn zɩt yẽnda, n tar zut a yopoe ne yɩɩl piigã yel-solemdã.
8 Rũng ning fo sẽn yã wã rag n beeme, la a ka leb n beẽ ye. A na n yii bog-zulungẽ wã n kẽng sãoong zĩigẽ. La dũni neb nins yʋy sẽn ka gʋls vɩɩm sebrã pʋgẽ hal dũni naaneg wẽndẽ wã sã n yã rũngã, a na n yɩɩ lingr ne bãmba, rũngã sẽn dag n be, n wa ka leb n beẽ la a na n leb n pukã yĩnga.
9 Bãngr sẽn yɩt ne yam n tog n zĩnd ka: Zut a yopoe wã yaa tãms a yopoe nins pagã sẽn zao b zutã.
10 Leb n yaa rĩm-dãmb a yopoe. Bãmb b nu n lʋɩ t'a yembr beẽ, t'a to wã nan ka wa nand ye, la a sã n wa wa, a tog n dɩɩ naam wakat bilfu.
11 Rũng ning sẽn dag n be, n ka leb n be wã meng yaa rĩm a nii soaba. Yẽ me yaa rĩm-dãmb a yopoe wã ned a yembre. La a rabda sãoong zĩigẽ.
12 Yɩɩl piigã fo sẽn yã wã yaa rĩm-dãmb piig sẽn nan ka reeg soolem ye, la b reegda pãn-tõog wa rĩm-dãmbã lɛɛr a yen yĩng ne rũngã.
13 Bãmb yam yaa a yembre, la b kõta rũngã b pãngã ne b pãn-tõogã.
14 Bãmb na n zaba ne pe-bilã. La pe-bilã na n tõog-b lame, tɩ bõe bãmb yaa zu-soben-dãmb Zu-soaba la rĩm-dãmba Dĩma. La neb nins b sẽn boolã, neb nins b sẽn tũusã ne neb nins sẽn maand sɩda, n be ne pe-bilã na n tõog-b lame me.
15 Malɛkã yeela maam yaa: koom nins fo sẽn yã tɩ pʋg-yoodrã zĩ b zutã yaa neba la neb kʋʋndo, la soolem dãmba la goam buud toay-toay neba.
16 Yɩɩl piigã fo sẽn yã wã, n paas rũngã na n kisga pʋg-yoodrã, n dees a futã n bas-a a zaala, la b wãb a nemdã, la b ning-a bugum t'a rɩ tẽma.
17 Bala, Wẽnnaam ninga bãmb sũyã pʋs tɩ b maan Wẽnnaam daabo, la b naag taab yam a yembre, n dɩk b naamã n kõ rũngã hal tɩ Wẽnnaam goamã wa paam pidsgu.
18 La pagã fo sẽn yã wã yaa tẽn-kãseng ning sẽn so-a dũniyã rĩm-dãmbã.
1 Rẽ zugẽ, mam yãa malɛk a to sẽn tar pãn-kãseng sẽn yi arzãn n sigda, n tar noor sõama la a zĩirã kõo dũniyã vẽenem.
2 Malɛkã zẽka a koɛɛg ne pãng n yeele: A lʋɩɩme! A lʋɩɩme! Babilon kãsengã lʋɩɩme! Yẽ lebga zĩn-dãmb yiri, la zĩ-dẽgd fãa, la bõn-yɩgd rẽgd fãa neba sẽn kis zĩiga,
3 Soolem dãmba fãa sẽn yũ Wẽnnaam sũ-puugr wa divẽ yẽ yoobã yĩnga, tɩ dũni rĩm-dãmb maan yoob ne yẽnda, la tɩ dũni lɛɛbdb tũnug yẽ nag-teedã pãng n lebg arzegs rãmba.
4 La mam wʋma koɛɛg a to sẽn yi arzãn n yeele: Mam neba, yi-y tẽngã pʋga, tɩ y da wa n naag n maan yel-wẽn ning a sẽn maandã, la tɩ y da wa n naag yẽnda n paam tood nins sẽn na n paam-a wã ye.
5 Bala, yẽ yel-wẽna zamame hal n tãag arzãna, la Wẽnnaam tẽega a ka-tɩrlem tʋʋmã yelle.
6 Yao-y yẽnda wa yẽ sẽn yao wã, la y lebs-a a tʋʋmã naoor a yiibu! Wamd ning pʋgẽ a sẽn kiigã, kiig-y-yã a woto naoor a yiib n kõ-a.
7 Yẽ sẽn waoog a meng n kẽ nagma pʋgẽ n ta zĩig ningã, kɩt-y t'a toogã ne a sũ-sãoongã ta a boto. Tɩ bõe, a yeta a sũurẽ yaa: Mam zĩi wa rĩm-poaka, mam ka pʋgkõore, la mam kõn tol n paam kũum sũ-sãoong ye.
8 Rẽnda yĩngã, yẽ toodã na n waa daar a yen pʋgẽ: bãag sẽn na n kʋ-a, sũ-sãoongo, kom, la bugum na n dɩ-a lame. Bala, Zu-soab a Wẽnnaam, sẽn kaood-a yẽ bʋʋdã yaa pãn-kẽeng soaba.
9 Dũniyã rĩm-dãmb nins fãa sẽn maan yoob ne tẽn-kãngã, la b paam te-neeb ne yẽ wã sã n wa yã tẽngã sẽn dɩt bugmã bug-zõose, b na n yãbame n wiis a yĩnga.
10 Bãmb sẽn zoet rabeem tɩ yẽ toogã na n wa paam bãmbã yĩnga, b na n yalsa yɩɩg n yeel yaa: Kato! Kato! Tẽn-kãsengã, Babilon tẽng sẽn tar pãnga! Fo sɩbgr waa wakat a yen pʋgẽ bala.
11 La dũni fãa toandb yãbdame n wiisd yẽ yĩnga, ned baa a yen sẽn ka le raad bãmb koosmã yĩnga:
12 Yaa sãnem, la wanzuri, la kug sẽn be yõod wʋsgo, la pɛrl dãmba, la lẽ peen-sõamyã, la peen-miu-kẽese, la peen fʋlfʋle, la pɛɛl sẽn ya miuug-mas, la raoog buud fãa sẽn tar yũ-noogo, la teoog buud fãa sẽn maan ne wob-yẽna, la teed buud fãa sẽn maan ne raad sẽn be yõod wʋsgo, la sẽn maan ne zũudu, la kutu, la kug sẽn boond tɩ marbre,
13 kanell la ra-pegd buud sẽn tar yũ-noogo, la zẽ-biis sẽn kõt yũ-noogo, la tɩdare, la vãad buud sẽn boond tɩ miir, la wisdu, la divẽ, la kaam, la zom-bãanega, la koodo, la niis ne piisi, la wed-moose, la terok-rãmba, hal baa ninsaalba.
14 Fo sẽn da rat bũmb ning ne f sũur fãa wã loog n basa foom. Bõn-sõamy wã fãa, wall bõn-neebã menemame n bas foom, la ned kõn leb n yã-b abada.
15 Toandb nins sẽn tũnug Babilon n lebg arzegs rãmbã sẽn zoet rabeem ne toog ning sẽn na n paam tẽn-kãngã yĩngã, b na n yalsa yɩɩga, n yãbe, n maan sũ-sãoongo.
16 Bãmb na n yeelame yaa: Kato! Kato! Tẽn-kãsengã sẽn dag n yer fu-neeba la fu-miu-kẽese la fut sẽn ya miid mas n nags a meng ne sãnem ne kug sẽn be yõodo la pɛrl dãmba! Wakat a yen pʋgẽ bala, b sãama arzegs wʋsg a woto.
17 Koom kogond zu-soben-dãmba fãa ne neb nins fãa sẽn be koom kogondã pʋsã, la koom kogondã pʋg tʋmtʋmdbã ne neb nins fãa sẽn tolemd ne koom kogondã dag n yasa yɩɩga,
18 la b sẽn yã bugmã sẽn dɩt tẽngã bug-zõosã, b kelmame n yeele: Tẽn-bʋg n dag n wẽnd tẽn-kãsengã?
19 Bãmb da yugda b zut tom, n yãbda n maand sũ-sãoong wa kũum n ki, la b kelemdẽ n yetẽ: Kato! Kato! Tẽn-kãseng ning sẽn dag n tar paoong wʋsg tɩ neb nins fãa sẽn tar koom kogond ko-kãsengã zugã tũnug be n lebg arzegs rãmbã, wakat a yen pʋgẽ bala, a lebga rasempʋɩɩga.
20 Arzãna, maan sũ-noog ne bũmb ning sẽn paam-a wã. Yãmb me sẽn welg toor Wẽnnaam yĩnga, la tẽn-tʋmdba la Wẽnnaam no-rɛɛsdbã, maan-y sũ-noogo. Bala Wẽnnaam sẽn kao tẽngã bʋʋdã, b roka yãmb sũuri.
21 Dẽ, malɛk sẽn tar pãng tebga kugr sẽn wẽnd neer sẽn ya bedr n lob-a ko-kãsengã pʋgẽ n yeele: B na n tusa Babilon sẽn ya tẽn-kãsengã a woto ne pãng n lubi, la ned kõn leb n yãnd-a yɛs ye.
22 La ned kõn leb n wʋm pend-wẽedba, la yʋʋmba, la wɩɩs ne bar-pɛɛbdbã rãamd fo pʋgẽ ye. Ned kõn leb n yã nug-tʋʋmd buud baa a yen soab beene ye, la ned kõn leb n wʋm neer rãamd beene ye.
23 Fɩtl vẽenem kõn leb n yãg be ye, la ned kõn le wʋm pʋg-paal sɩd ne a pʋg-paalã koees beene yɛs ye. Bala, fo toandbã dag n yaa dũni nin-kãsemse, fo belga soolem dãmba fãa ne f bagrã.
24 La b yãa Wẽnnaam no-rɛɛsdbã ne nin-sõamyã, la neb nins fãa b sẽn kood dũniyã zugã zɩɩm fo pʋgẽ.
1 Rẽ poore, mam wʋma koe-kãseng arzãn pʋgẽ sẽn wẽnd neb kʋʋng wʋsg koees sẽn yet yaa: Halleluya! Fãagr la ziir ne pãng yaa tõnd Wẽnnaamã n so,
2 bãmb bʋ-kaoorã sẽn ya sɩd la tɩrgã yĩnga. Wẽnnaam kaoo pʋg-yood kãsengã sẽn dag n sãamd dũni ne a yoobã bʋʋdo. La Wẽnnaam doka n tʋmtʋmdbã sũuri, yẽ sẽn daag bãmb zɩɩmã yĩnga.
3 La b leb n yeela naoor a yiib soab yaa: Halleluya! La yẽ bug-zõos zẽkda zamaan o zamaane.
4 Kãsem-dãmbã pisi la a naasã ne bõn-vɩɩs a naasã wõgemdame n waoog Wẽnnaam sẽn zao geerã zugã n yeel tɩ ãmina! Halleluya!
5 Koɛɛg yii geerẽ wã n yeel yaa: Yãmb fãa sẽn ya Wẽnnaam tʋmtʋmdbã, yãmb dãmb sẽn zoet bãmbã, nin-tals la nin-kãsemse, pẽg-y tõnd Wẽnnaamã.
6 La mam wʋma koɛɛg sẽn wẽnd wa neb kʋʋng wʋsg koeese, n wẽnd wa ko-kãsems koeese, n wẽnd wa sa-kelems kãsems koees sẽn yet yaa: Halleluya! Bala tõnd Zu-soab a Wẽnnaam sẽn Tõeya fãa wã zĩndiga b naam.
7 D maan sũ-noog n kɩdme, la d waoog bãmba, bala pe-bilã pʋg-peegrã daar taame, la bãmb pʋg-paalã segla a meng n sɛ.
8 B kõo pʋg-paalã lẽ sõng fuug sẽn pɩnd n ka tar rẽgd t'a yeelge. Lẽ sõng fuugã yaa nin-sõamy wã tʋʋm sõamyã.
9 Malɛkã yeela maam yaa: Gʋlse: Bark bee neb nins b sẽn bool tɩ b wa pe-bilã pʋg-peegr kibsã zutu! La a yeela maam yaa: Koe-kãngã yaa Wẽnnaam meng goama.
10 La mam wõgemda yẽ taoor n na n waoog-a, la a yeela maam yaa: Da saag n maan a woto ye! Mam yaa fo tʋmd-n-taaga la fo ba-biis nins sẽn tar a Zezi kasetã tʋmd-n-taaga. Waoog Wẽnnaam! Wẽnnaam no-rɛɛsdbã goam yita a Zezi kasetã pʋga.
11 Dẽ poore, mam yãnda arzãn sẽn pake, la mam yãa wed-moaag sẽn ya pɛɛlga. Ned ning sẽn zao-a weefã yʋʋr la a Sɩd-maanda la a Sɩd-sɩda. Bãmb bʋʋda bʋʋdã ne tɩrlem la b zabd ne tɩrlem.
12 Bãmb ninã yaa wa bug-witim. Maanf-rãmb wʋsg n fõg bãmb zugã. Bãmb tara yʋʋr sẽn gʋls tɩ ned baa a yen ka mi, sã n ka bãmb mengã bala,
13 la b yera fu-taok sẽn los zɩɩmẽ. Bãmb yʋʋr la a Wẽnd-gomde.
14 Sodaasã sẽn be arzãnã dag n zaoo wed-peels n pʋgd bãmba, n yer lẽ sõng fut sẽn ya peels la yoalgma.
15 Zabr sʋʋg sẽn dɩt n dag yit b noorẽ wã n na n sɩbg soolem dãmbã. Bãmb na n zãa kut dasaar n dɩlg-ba. Bãmb na n taba bũmb nins sẽn be Wẽnnaam sẽn Tõeya fãa wã sũ-puugr sẽn ya kãsenga divẽ wẽkr koglgã pʋgẽ wã.
16 Bãmb tara yʋʋr sẽn gʋls b fuugã zug la b geerã zugu: rĩm-dãmb Rĩma, la zu-soben-dãmb Zu-soaba.
17 Mam yãa malɛk sẽn yas wĩntoogã pʋgẽ. Yẽ zẽka a koɛɛg ne pãng n yeel bõn-yɩgdɩ wã fãa sẽn yɩgd yĩngrã yaa: wa-y n tigm-y taab Wẽnnaam kibs kãsengã yĩnga,
18 tɩ y tõe n dɩ rĩm-dãmb nemdo, sodaas nanams nemdo, pãens rãmbã nemdo, wed-moos ne b rʋʋdbã nemdo, neb fãa nemdo, burkĩmb la yemse, nin-tals ne nin-kãsemse.
19 Mam yãa rũngã ne dũni rĩm-dãmbã ne b sodaasã sẽn tigim taab n na n zab ne soab ning sẽn zao-a wed-pɛɛlgã, la ne a sodaasã.
20 La b yõga rũngã ne zãmb no-rɛɛs ning sẽn dag n maan bõn-yɛɛsds rũngã taoor n belg neb nins sẽn deeg rũngã bãndã la b wõgemded yẽ bõn-naandgã taoorã. B loba bãmb b yiiba fãa vɩɩs bugum mogr sẽn dɩt kidbr pʋgẽ.
21 La sʋʋg ning sẽn dag n yit soab ning sẽn zao wed-moaagã zugã noorẽ wã kʋʋ neb a taabã. La bõn-yɩgdɩ wã fãa rɩɩ bãmb nemdã n tɩge.
1 Dẽ poore, mam yãa malɛk sẽn yi arzãn n sigda, n zãad bog zulungã kʋɩlen-biiga la bãng-kãseng a nugẽ.
2 Malɛkã yõka dargõ wã sẽn ya wag-kʋdrã, la rõatã, la a Sʋtãan n balg-a yʋʋm tusr yĩnga.
3 A lob-a-la bog-zulungã pʋgẽ n page, la a sog bokã noor Sʋtãanã zugẽ, sẽn na yɩl t'a da leb n belg soolem dãmba yɛsa, hal tɩ yʋʋm tusrã pidsi. Rẽ poore, yaa tɩlɛ tɩ b lok-a n bas wakat bilf yĩnga.
4 Mam yãa naam-gɛyã. La b kõo neb nins sẽn zĩnd gɛyã zutã noor tɩ b bʋ bʋʋdo. La mam yãa neb nins b sẽn fiuus b zut a Zezi kasetã ne Wẽnnaam goamã yĩngã sɩɩse, la neb nins sẽn dag n ka wõgemd rũngã wall a bõn-naandgã taoore, la b ka reeg bãndã b rĩyẽ wall b nusã zutã sɩɩse. Bãmb vʋʋgame n dɩ naam ne Kirist yʋʋm tusri.
5 La kũ-rãmb a taabã ka vʋʋg ye, hal tɩ yʋʋm tusrã pidsi. Vʋʋg-kãng yaa dẽenem vʋʋgre.
6 Neb nins sẽn naag n paam dẽenem vʋʋgrã tara bark la sõmblem. Kũum a yiib soabã ka tar b tʋʋmd ye. Bãmb na n yɩɩ Wẽnnaam ne Kiristã maan-kʋʋdba, la b na n dɩɩ naam ne Kiristã yʋʋm tusri.
7 Yʋʋm tusrã sã n wa pidi, b na n yiisa a Sʋtãan a bi-bees roogẽ wã n bas-a,
8 la a na n yiime n belg soolem nins sẽn be dũniyã kɩrems a naasã neba, Gaoog ne Magaoog, sẽn na n yɩl n tigim bãmb zabr yĩnga. Bãmb sõorã yaa wa ko-kãsengã bĩisri.
9 Bãmb yiime n yɛdg tẽng zugu, la b kẽe nin-sõamy wã tãb-sikẽ wã, la tẽn-nongrẽ wã. La bugum yii arzãn n sig n dɩ-ba.
10 B loba bɛlgdã, soab ning sẽn dag n belgd nebã bugum mogr sẽn dɩt kidbr pʋga, zĩig ning rũngã ne belgr no-rɛɛsã sẽn be wã. Bãmb na n namsa wĩndg ne yʋngo, zamaan o zamaane.
11 Dẽ poore, mam yãa ge-kãseng sẽn ya pɛɛlga, ne ned ninga sẽn zao-a geerã zugã. La dũniyã ne saasẽ zoee bãmb taoor n looge, la zĩig ka leb n be bãmb yĩng ye.
12 La mam yãa neb nins sẽn ki wã, nin-kãsemse, nin-talse tɩ b yas geerã taoore. La b lagsa sɛba, la b laka sebr a to sẽn ya vɩɩm sebre. B bʋʋ sẽn ki-bã bʋʋdo, n zems ne bũmb nins sẽn gʋls sɛbã pʋsã, n zems ned fãa tʋʋmd sẽ yɩ a soaba.
13 Ko-kãsengã lebsa kũum nins sẽn da be be wã, tɩ kũumã ne kɩɩm-kulg lebs kũum nins sẽn da be be wã, la b bʋʋ bãmb ned kam fãa bʋʋd wa sẽn zems a tʋʋma.
14 B loba kũumã ne kɩɩm-kulg bugum mogrã pʋga. Bugum mogrã yaa kũum a yiib soaba.
15 B loba ned ning fãa b sẽn ka yã a yʋʋr tɩ gʋls vɩɩm sebrã pʋgẽ wã bugum mogrã pʋga.
1 Mam yãa yĩngr paalga la dũni paalga, bala, dẽenem yĩngrã ne dẽenem tẽngã loogame, la ko-kãsengã ka leb n be yɛs ye.
2 La mam yãa tẽn-sõngã, Zeruzalɛm paalgã sẽn yi Wẽnnaam nengẽ n sigda, la a wẽnda wa pag sẽn nags a meng a sɩd yĩnga.
3 Mam wʋma koe-kãseng sẽn yi geerẽ wã n yeele: Ad Wẽnnaam yirã bee ninsaalb sʋka. Wẽnnaam na n zĩnda ne nebã. Bãmb na n yɩɩ Wẽnnaam neba, la Wẽnnaam mengã na n paa ne bãmba.
4 Wẽnnaam na n yẽesa nintãm fãa sẽn be b ninẽ wã. Kũum kõn le zĩnd ye, la sũ-sãoong wall yãbre, wall toog kõn leb n zĩnd ye, bala, dẽenem bũmba fãa loogame.
5 Ned ning sẽn zao geerã yeelame yaa: Ade, mam maanda bũmba fãa paalse. La b yeel yaa: Gʋlse, bala, gom-kãensã yaa vẽenega la b yaa sɩda.
6 Bãmb yeela maam yaa: Maaname! Maam la Alfa la Omega, Sɩngre la Sɛɛbo. Mam na n kõo ned ning ko-yũud sẽn tarã vɩɩm ko-bundmã zaalem.
7 Ned ning sẽn na n tõogã pʋɩɩr na n yɩɩ a woto: Mam na n yɩɩ Wẽnnaam, la yẽ na n yɩɩ mam biiga.
8 La sã n ya ne rabeembã, la ka-tẽeb rãmbã, la tʋʋm-dẽgd maandbã, la nin-kʋʋdba, la nin-yoaadbã, la tɩ-maandbã, la wẽn-naands pʋʋsdbã, la zĩri yagdbã fãa, bãmb pʋɩɩr na n yɩɩ tɩ kẽ bugum mogrẽ wã, zĩig ning kidbr sẽn dɩtã. Rẽ yaa kũum a yiib soabã.
9 Dẽ poore, malegs a yopoe wã sẽn da zãad laas a yopoe sẽn pid ne yaoolem tood a yopoe wã ned a yembr waa n goma ne maam n yeel yaa: Wa tɩ m na n wilg-f la pʋg-paalã, pe-bilã pagã.
10 Malɛkã rɩka maam m yamẽ n kẽng tãn-kãseng sẽn ya luglg zugu. La a wilga maam tẽn-sõngã sẽn ya Zeruzalɛmã sẽn yi yĩngri, Wẽnnaam nengẽ n sigdã.
11 Tẽngã da tara Wẽnnaam zĩirã. Yẽ rasãndã dag n wẽnda wa kugr sẽn be yõod wʋsg neerlem, wa kugr sẽn boond tɩ zaspe n tõnd wa vɛɛre.
12 A rag n tara lal-kãseng sẽn ya zãondgo. A rag n tara zag-noey piig la a yiibu, tɩ malegs piig la yiib be zag-noeyẽ wã. Yʋy n da gʋls b zutu: Yaa Israyɛl buud piig la a yiibã yʋya.
13 Zag-noey a tãab n be yaanga, t'a tãab be rɩtgo, t'a tãab be goabga, t'a tãab be nin-taoore.
14 Tẽngã lalg mee yẽbgr piig la a yiib zugu, la b gʋlsa pe-bilã tẽn-tʋmdb piig la yiibã yʋy yẽbg-kãens zutu.
15 Malɛk ning sẽn dag n gom-a ne maama dag n tara makdg sẽn ya sãnem dasaare, n na n mag tẽngã ne a zag-noeyã la a lalgã.
16 Tẽngã ra yaa maoko, t'a woglmã ne a yalmã zem taaba. Malɛkã maga tẽngã ne sãnem dasaarã: Yaa kɩlo tus a yi. A woglmã ne a yalmã la a zãntlemã rag n zema taaba.
17 Yẽ maka lalgã: A yaa kãntɩɩs koabg la pis-naas la a naase, ninsaal kãntɩɩga, sẽn ya a yembr ne malɛkã kãntɩɩga.
18 Lalga mee ne kugr sẽn boond tɩ zaspe, la tẽngã yaa sãnem halaal sẽn wẽnd wa vɛɛr halaale.
19 Tẽngã lalgã yẽbgrã rag n nagsa ne kug buud fãa sẽn be yõodo. Pipi yẽbgrã yɩɩ ne zaspe, la yiib-n-soabã yɩɩ ne kugr sẽn boond tɩ safɩɩre, la tãab-n-soabã yɩɩ ne kugr sẽn boond tɩ kalsedoan, la naas-n-soabã yɩɩ ne kugr sẽn boond tɩ emeroode,
20 la a nu soabã yɩɩ ne kugr sẽn boond tɩ sadonigsi, la a yoob soabã yɩɩ ne kugr sẽn boond tɩ sardoan, la a yopoe soabã yɩɩ ne kugr sẽn boond tɩ kirzolit, la a nii soabã yɩɩ ne kugr sẽn boond tɩ beril, la a wɛ soabã yɩɩ ne kugr sẽn boond tɩ topaaze, la piig soabã yɩɩ ne kugr sẽn boond tɩ kirzopraaze, la piig la a yen soabã yɩɩ ne kugr sẽn boond tɩ hiyasẽnte, la piig la a yiib soabã yɩɩ ne kugr sẽn boond tɩ ametist.
21 Zag-noeyã piig la yiibã yɩɩ ne kugr sẽn boond tɩ pɛrle. Zag-noor fãa yaa kug-yende. Tẽngã soay yaa sãnem halaale, n tõnd wa vɛɛre.
22 Mam ka yã wẽnd-doog tẽngã pʋg ye, bala, Zu-soab a Wẽnnaam sẽn Tõeya fãa wã la pe-bilã me yaa tẽngã wẽnd-doogo.
23 Tẽngã ka baood tɩ wĩntoog bɩ kiuug yãg beene ye, bala, Wẽnnaam ziirã kõt-a-la vẽenem, la pe-bilã yaa a fɩtla.
24 Soolem dãmbã na n kẽna bãmb vẽenemẽ wã, la dũni rĩm-dãmbã na n waa ne b zĩirã beene.
25 Tẽngã zag-noey kõn pag wĩndg ye, yʋng ka na n zĩnd beene ye.
26 B na n talla soolem dãmba ziirã la b waoogrã n wa beene.
27 Bũmb sẽn ya rẽgdo, wall ned ning sẽn maan wẽnga wall a yagd zĩrẽ kõn kẽ be ye. Yaa neb nins yʋy sẽn gʋls pe-bilã vɩɩm sebrẽ wã bal n na n kẽ.
1 Malɛkã wilga maam vɩɩm koomã kʋɩlga, kʋɩlg sẽn pɩnd wa vɛɛre, la a yita Wẽnnaam ne pe-bilã geerẽ wã.
2 Vɩɩm tɩɩgã be tẽngã sʋka la kʋɩlgã kɩrems a yiibẽ wã. A womda naoor piig la a yiibu, a womda a biisã kiuug fãa. Tɩɩgã vãad tar n maagda soolem toay-toayã neb bãase.
3 Wẽnnaam sẽn kãab bũmb wẽng kõn leb n zĩnd be ye. Wẽnnaam ne pe-bilã geer na n zĩnda tẽngã pʋga. Bãmb tʋmtʋmdbã na n waooga bãmba,
4 b na n yãa Wẽnnaam nenga, la Wẽnnaam yʋʋrã na n zĩnda bãmb dĩyẽ.
5 Yʋng kõn le zĩnd ye, la nebã kõn dat fɩtl vẽenem wall wĩntoog vẽenem ye, bala, Zu-soab a Wẽnnaam n na n yɩɩ bãmb vẽenem. La bãmb na n dɩɩ naam zamaan o zamaana.
6 Malɛkã yeela maam yaa: Sãmbg ka be gom-kãens pʋgẽ ye, la b yaa sɩda. Zu-soabã sẽn ya no-rɛɛsdbã sɩɩs Wẽnnaamã tʋma b malɛk t'a wilg bãmb tʋmtʋmdbã bũmb nins sẽn tog n zĩnd bilf sã n paase.
7 La a Zezi yeelame: Gese, bilf sã n paas bala mam na n waame. Bark bee ned ning sẽn sakd seb-kãngã bãngr goamã zugu.
8 Yaa maam a Zã n wʋm bõn-kãense la m yã-ba. La mam sẽn wʋm bõn-kãens la m yã-bã, mam wõgemda malɛk ning sẽn da wilgd-b maamã taoor n na n waoog-a.
9 La a yeela maam yaa: Ra saag n maan a woto ye! Mam yaa fo tʋmd-n-taaga, la Wẽnnaam no-rɛɛsdbã sẽn ya fo ba-biisã tʋmd-n-taaga, la neb nins sẽn sakd seb-kãngã goamã tʋmd-n-taaga. Waoog Wẽnnaam!
10 Dẽ poore malɛkã yeela maam yaa: Da solg seb-kãngã pĩnd-n-bãngr goamã ye! Bala, b pidsgã wakat kolgame.
11 Bɩ ned ning sẽn ya ka-tɩrlem soab kell n paas a ka-tɩrlemã, tɩ ned ning sẽn ya tʋʋm dẽgd soab kell n dẽgem a meng n paase, tɩ ned ning sẽn ya tɩrg kell n maan tɩrlem n paase, tɩ ned ning sẽn ya yolgemd kell n yɩ yolgemd n paase!
12 A Zezi yeelame: Gese, bilf bal sã n paase, mam na n waame, la mam zãada keoor n watẽ n na n keo ned kam fãa wa sẽn zems a tʋʋmde.
13 Maam la Alfa la Omega, dẽenem la yaoolem, Sɩngre la Sɛɛbo.
14 Bark bee neb nins sẽn pegsd b futu, sẽn na n yɩl la b paam noor tɩ rɩ vɩɩm tɩɩgã biisi la b tũ tẽngã noey n kẽ tẽngã pʋgẽ wã zutu.
15 Tʋʋm dẽgd maandbã, ninsaan-baasã, tɩ-rɩtbã, nin-yoaadbã, nin-kʋʋdbã, wẽnd-naands pʋʋsdbã, la ned ning fãa sẽn nong zĩrĩ la sẽn yagd zĩri paada yɩng n ka kẽ tẽngã pʋgẽ ye.
16 Maam a Zezi n tʋm m malɛk t'a wa n kis yãmb bõn-kãens kaset wẽnd-dotã pʋse. Mam yaa a Daviid tɩ-tobeng la a yagenga, la yibeoog ãd-yãgdga.
17 Sɩɩg-sõng ne pʋg-paalã yetame yaa: Wa-y yã! Bɩ ned ning sẽn wʋmd-a yeel tɩ: Wa-y-yã! Bɩ ko-yũud sẽn tar a soab wa, la sẽn dat-a bɩ a reeg vɩɩm koom zaalem!
18 Mam yeta ned ning fãa sẽn wʋmd seb-kãnga bãngr goamã tɩ ned sã n paas bũmb be, Wẽnnaam na n paasa tood nins b sẽn bils seb-kãngã pʋgẽ wã yẽ sɩbgrã zugu.
19 La ned sã n boog bãngr gom-kãensã sebrã goama, Wẽnnaam na n deega pʋɩɩr ning yẽ sẽn da na n paam ne vɩɩm tɩɩgã la tẽn-sõngã b sẽn bils seb-kãngã pʋgẽ wã n bas-a.
20 Ned ning sẽn kɩt-a bõn-kãensã kasetã yetame yaa: N-ye, bilf bal sã n paase mam na n waame. Ãmina! Zu-soab a Zezi, wa-y-yã!
21 Bɩ Zu-soab a Zezi barkã zĩnd ne yãmb fãa.