1

¹ Maam a Poll sẽn ya Wẽnnaam tʋmtʋmda la a Zezi Kirist tẽn-tʋmd sẽn na paas Wẽnnaam nin-tũusdsã tẽebo la kɩt tɩ b bãng sɩd sẽn wat ne

² Wẽn-tũudum, n paam tẽeb pidsg gũudem ne vɩɩm sẽn kõn sa wã, Wẽnnaam sẽn ya sɩd soabã sẽn dag n kãab hal tɩ dũni nan ka naana.

³ La wakat sẽn ta, b puka b koɛɛgã koe-mooneg ninga bãmb sẽn kõ maana pʋgẽ, wa sẽn zems noor ninga tõnd fãagd a Wẽnnaam sẽn kõ wã.

⁴ Maam n tʋmd seb kãnga a Tit sẽn ya mam meng biig tẽeb pʋgẽ wã, tẽeb ninga sẽn ya tõnd fãa rẽndã nengẽ, bɩ f paam bark la laafɩ sẽn yit tõnd ba a Wẽnnaam la d fãagd a Zezi Kirist nengẽ.

⁵ Mam basa foom Kɛrɛt tẽng tɩ f maneg bũmb ning sẽn ket n tog n manegã, la f maan wa mam sẽn dag n wilg foom tɩ f yãk wẽnd-dot kãsem-dãmb tẽng fãa pʋgẽ wã.

⁶ Bãmb tog n yɩɩ neb sẽn ka tar yelle, la sẽn tar pag a yen bala, la sẽn tar kamb sẽn ya tẽedba n ka maand tʋʋm dẽgdo, n ya kom-sakdse.

⁷ Sɩd me, togame tɩ karen-saamb sẽn ya Wẽnnaam tʋʋma yel-gɛtã yɩ ned sẽn ka tar yell ye, karen-saamb ka tog n yɩ tɩta-neda la sũur sẽn yikd tao-tao ye, a ka tog n yɩ rã-yũuda, a ka tog n yɩ zab-zabda la ned sẽn baood paoong ne zãmb ye.

⁸ Yẽ tog n yɩɩ ned sẽn maand sãamba sãando la a yɩ maan-neer zoa, la a yɩ ned sẽn tagsd sõama, la a ya nin-tɩrga la pʋ-peelem soaba la tõog-m-meng soaba.

⁹ Yẽ tog n gãda sɩd koɛɛgã kãenkãe wa b sẽn dag zãms-a to-to wã tɩ yẽ tõe n sagl neb a taaba wa sẽn zems tõ-sõamyã la a tõog kɩɩsdbã.

¹⁰ Sɩd me, neb wʋsg n be n ya kɩɩsdba la gom-vɩɩd-rãmba la bɛlgdba, sẽn yɩɩda yaa zũnsã sʋk la b be.

¹¹ F tog n kɩtame tɩ b sĩndi. Bãmb lubda zags zãnga n zãmsd neba bũmb sẽn ka zems ye, n baood paoong ne zãmbo.

¹² Kɛrɛt-dãmbã ned a yen sẽn ya bãmb meng no-rɛɛs dag n yeelame yaa: "Wakat fãa Kɛrɛt neba yaa zĩrĩ-be-rãmba, pʋto-rãmba, yão-be-neb sẽn ya kʋɩɩmba."

¹³ Kaset kãnga yaa sɩda, rẽ wã yĩnga, bɩ f leng-b ne

¹⁴ pãnga tɩ b paam tẽeb sẽn ya sõama, tɩ b ra wa tũ zuif-rãmba soalmã la ninsaalbã tõoda sẽn basd sɩdã ye.

¹⁵ Bũmba fãa yaa yɩlemd ne neb nins sẽn ya yɩlma. La neb nins sẽn maand yel-wẽna la sẽn ka tẽedbã, baa fʋɩ ka yɩlemd ne bãmb ye. Bãmb yama ne b sũ-bãngra rẽgmame.

¹⁶ B yetame tɩ b mii Wẽnnaam la b kɩɩsda Wẽnnaam ne b mensã tʋʋmã, bãmb yaa wẽns tɩ looge, la kɩɩsdba la neb sẽn ka tol n tõe n maan tʋʋm sõng ye.

2

¹ La foom, zãms neba bũmb nins sẽn zems ne tẽebã yẽbg sõngã.

² Zãms nin-kẽembã tɩ b yɩ yõk-m-mens-rãmba, la b yɩ neb sẽn tar waoogre, la b yɩ mi-m-mens-rãmba, la b yɩ sõama tẽeba pʋga la nonglem pʋga, la b yɩ sũ-maasem-dãmba.

³ Wilg pʋg-yãansã me tɩ b tog n paama yel-manesem sẽn ya sõama, tɩ b ka tog n yɩ nin-sãbsdba, wall rã-yũudb ye. Bãmb tog n kõo

⁴ sagl sõamyã, sẽn na yɩl n zãms pʋg-bi wã tɩ b

⁵ nong b sɩdba ne b kãmba, la b yɩ mi-m-nems rãmba, la neb sẽn ka maand rẽgd ye, la b ges b zags yell neere, la b yɩ pʋg-sõamyã, sẽn sakd b sɩdba tɩ Wẽnnaam koɛɛgã ra paam tʋʋsg ye.

⁶ Sagl kom-bɩɩsã tɩ b yɩ mi-m-nems-rãmb bũmba fãa pʋgẽ.

⁷ La fo mengã yɩ mamsg ne tʋʋm-sõama maanego, la f zãms nebã ne koɛɛg sẽn ya sɩda la sẽn zems reegre.

⁸ La f gom gom-tɩrs b sẽn kõn tõog n dõd-f ye, tɩ yãnd na yõk nin-kɩɩsdbã, la tɩ b kõn paam bõn-wẽng tõnd zug n gom ye.

⁹ Sagl yemsã tɩ b sak b zu-soben-dãmba bũmb fãa pʋgẽ, n maan sẽn noom-ba, la b ra yɩ kɩɩsdb ye,

¹⁰ la b ra zuk bũmb ye, la b maan pʋ-peelem sõama wakat fãa, t'a tõe n kɩt tɩ Wẽnnaam sẽn ya tõnd fãagdã koɛɛgã paam waoogr bũmb fãa pʋgẽ.

¹¹ Wẽnnaam puka b barkã, bark ning sẽn wat ne fãagr ninsaalbã fãa yĩngã.

¹² A zãmsda tõnd tɩ d bas wẽn-kɩɩsgo la duniyã ratem wẽnsã la d vɩɩmd zamaan kãnga pʋgẽ ne gũus-m-menga la tɩrlem la d sak Wẽnnaam,

¹³ n gũud tõnd Wẽnnaam sẽn ya kãseng la fãagdã, a Zezi Kirist pukrã sẽn wat ne sũ-noogã ziirã.

¹⁴ A Zezi Kirist kõo b meng tõnd yĩnga, tɩ fãag tõnd ne yel-wẽn fãa n kɩt tɩ tõnd lebg bãmb neb b sẽn yɩlge, la sẽn wɩngd ne tʋʋm-sõama maanego.

¹⁵ Fo sẽn tog n maan la a woto, sagl neba la f leng-b ne noore. Da sak tɩ ned paoog-f ye.

3

¹ Tẽeg-b tɩ b sak soolem taoor dãmba ne pãn-soaadbã, tɩ b yɩ sakdba, la b sak n maan tʋʋm sõama fãa.

² Tɩ b ra gom ned wẽng ye, tɩ b ra yɩ zab zabdb ye, la b yɩ neb sẽn baood laafɩ, sẽn nong neba, n maand sũ-bʋgsem ne neba fãa.

³ Bala, pĩnda tõnd me rag n yaa yalemba, la nin-kɩɩsdba, la neb sẽn bʋdge, la ratem wẽns buud toay-toay la sũ-no-yood n dag n so tõndo. Tõnd dag n vɩɩ pʋ-toog la sũ-kĩir pʋga, tõnd dag n kisa neb a taaba tɩ bãmb me kis tõndo.

⁴ La tõnd fãagd a Wẽnnaam sõmblema la b nonglem neba fãa yĩngã sẽn puki,

⁵ bãmb fãaga tõndo, la ka tõnd sẽn tʋm tʋʋm-tɩrs yĩng ye, la yaa bãmb mengã nimbãan-zoeer yĩng la b fãag tõndo, bãmb soo tõnd ne soob sẽn palemda, tɩ Sɩɩg-sõng tũnug rẽnda n kõ tõnd rogem paalga la vɩ-paalga.

⁶ Yaa Sɩɩg-sõng ninga Wẽnnaam sẽn tũnug tõnd fãagd a Zezi Kirist n sik-a tõnd zug wʋsgã,

⁷ tɩ ne bãmb barkã b sã n kɩt tɩ tõnd lebg tɩrse, bɩ tõnd lebg pʋɩt-n-taas ne vɩɩm sẽn kõn sa wã tõnd sẽn gũudã.

⁸ Gom-kãnga yaa sɩda, la mam datame tɩ fo togs-a nebã tɩ neb nins sẽn tẽ Wẽnnaamã na wɩng ne tʋʋm sõama maanego. Yõwã n be neere la a tar yõod ne ninsaalba.

⁹ Lak ne yalem goama, la rot rɩkre, la ka-wʋmd-taaba, la no-koɛɛma tõog poorẽ. Bala, b ka tar yõodo la b yaa gom vɩɩdo.

¹⁰ Ned ning sẽn wat ne welgr sã n paam keoogr vugri, la naoor a yiibu, n ka sak bɩ f lak f meng ne-a.

¹¹ Tɩ fo miime tɩ ned a woto basa so-sõngã n dɩk so-wẽngã, n maand yel-wẽna, la a mongda a meng bʋʋm.

¹² Mam sã n wa n tʋm a Artemas bɩ a Tisik fo nengẽ, bɩ f nang pãng n wa paam maan Nikopoli tẽnga, bala mam yãka yam n na n zĩnd be waooda wẽnde.

¹³ Ges tõ-mit a Zenaas ne a Apolos so-toakã yelle, tɩ bũmb da wa n paoog-b ye.

¹⁴ Tõnd neba me tog n zãmsame tɩ maan tʋʋm-sõama n tõog n sõng ne yɛl sẽn dat manegr tao-tao, tɩ bãmb da yɩ neb sẽn ka wat ne baa fɩ ye.

¹⁵ Neb nins fãa sẽn be ne maama pʋʋsda foo. Pʋʋs neb nins sẽn be tẽeba pʋgẽ n nong tõndã. Bɩ Wẽnnaam barkã zĩnd ne yãmb fãa.