1

¹ Maam a Poll sẽn ya a Zezi Kirist tẽn-tʋmda, Wẽnnaam daab yĩnga, sẽn zemsd ne vɩɩm kãabg ning sẽn be a Zezi Kirist pʋgẽ wã

² n gʋlsd m bi-nongr a Tɩmote. Bɩ barka, la nimbãan-zoeere, la laafɩ sẽn yit ba a Wẽnnaam la tõnd Zu-soab a Zezi Kirist nengẽ wã zĩnd ne foom.

³ Mam pʋʋsda Wẽnnaam ning mam yaab-rãmbã sẽn dag n sakdã, la mam me sẽn sakd ne sũur kaset sẽn ya yolemdã barka. La mam ka basd tɩ pʋd fo yell m pʋʋsg pʋgẽ, wĩntoog ne yʋng ye.

⁴ Bala, mam ket n tẽra fo nintãmã, la mam data ne m sũur fãa n leb n yã-fo, tɩ m sũurã tõe n pid ne sũ-noogo.

⁵ Mam ket n tẽra tẽeb ning fo sẽn tara, sẽn ka kalem ne zãmbã yelle. Tẽ-kãng dag n zĩnda ne f yaab a Loyiis, la ne f ma a Eniisi, la mam mii m sũurẽ t'a bee ne foom me.

⁶ Rẽ n kɩt tɩ mam sagend foom tɩ f yãdg Wẽnnaam kũunã fo sẽn deeg ne mam nus-tikrã bugum.

⁷ Bala, ka rabeem Sɩɩg la Wẽnnaam kõ tõnd ye, la yaa pãnga, la nonglem, la yam Sɩɩga.

⁸ Da zoe yãnd ne Zu-soabã kaset fo sẽn tog n kɩsã ye, la f ra zoe yãnd mam yĩnga, mam sẽn be bi-bees roogẽ bãmb yĩngã yĩng ye. Ayo! Naag maam n nams koe-noogã yĩnga, Wẽnnaam pãngã sõngr yĩnga.

⁹ Yaa bãmb n fãag tõndo, la b bool tõnd bool-sõngo. La ka tõnd tʋʋm yĩng ye, yaa bãmb mengã tʋlsem la bark ning b sẽn maan tõnd a Zezi Kirist pʋgẽ hal sẽn deng wakat sẽn ka sɩngrã wakatã yĩnga.

¹⁰ Bark kãng lebga vẽeneg moasã ne tõnd fãagd a Zezi Kirist pukrã. Bãmb kɩtame tɩ kũum pãng sa, la b kɩt tɩ vɩɩm la yĩng sẽn ka kiidã yell yɩ vẽenega, koe-noogã maasem yĩnga.

¹¹ Wẽnnaam yãka maam tɩ m yɩ koe-no-kãng moaanda, a tẽn-tʋmda, a karen-saamba.

¹² Mam sakda namsg koe-noogã yĩnga, la yãnd ka tar maam ye, bala, mam mii m sẽn tẽ a soabã, la mam mii m sũur pʋgẽ tɩ b tara pãng tɩ gũ bũmb ning bãmb sẽn ning mam nugẽ wã hal tɩ da-kãng ta.

¹³ Gom-sõamy nins fo sẽn deeg mam nengẽ wã, tall rẽ tɩ yɩ mamsg fo yĩnga, tẽeb pʋgẽ, la nonglem sẽn be a Zezi Kirist pʋgẽ wã me pʋgẽ.

¹⁴ Bũmb ning sẽn be fo pʋgẽ wã, tall-a, Sɩɩg-sõng sẽn vɩ tõnd pʋgẽ wã maasem yĩnga.

¹⁵ Fo miime tɩ neb nins fãa sẽn be Azi wã basa maam. A Fizɛl ne a Hɛrmozɛn bee bãmb sʋka.

¹⁶ Bɩ Zu-soabã sudg a Onezifoor zaka rãmb barka, bala, a belsa maam naoor wʋsgo, la mam bãensã yãnd ka tall-a ye.

¹⁷ A pʋs n baoo maam ne a sũur fãa, a sẽn wa Rommã, hal n yãnd maam.

¹⁸ Bɩ Zu-soabã kɩt t'a paam bãmb nimbãan-zoeer da-kõng. Fo mii sõngr ning fãa a sẽn sõng maam Efɛɛsã n yɩɩd neb a taabã sẽn mi.

2

¹ Dẽ, m biiga, keng f meng bark ning sẽn be a Zezi Kirist pʋgẽ wã pʋgẽ.

² Bũmb nins fo sẽn wʋm mam noorẽ kaset dãmb wʋsg taoorã, togs-b neb nins sẽn maand sɩda la sẽn tõe n zãms neb a taabã.

³ Naag maam n nams wa a Zezi Kirist soda-sõngo.

⁴ Sodaag ka kẽesd a toog nin-zaals vɩɩm yɛl pʋgẽ, a sã n dat tɩ ned ning sẽn dɩk-a yẽ sodaarã sũur yɩ noog ne-a ye.

⁵ La reem-dɛɛmd ka paamd tõogr maanfo, a sã n ka tũ reemã soay fãa n deem ye.

⁶ Ka-koaad ning sẽn namsd a yĩng n tʋmdẽ wã n tog n yɩ pipi n yãgs a koodã biisi.

⁷ Wʋm m sẽn yetã võore. Bala, Zu-soabã na n weka fo yamã ne bũmb fãa.

⁸ Tẽeg a Zezi Kirist yelle: bãmb vʋʋgame n bas kũum. Bãmb yaa a Daviid yagenga, wa koe-noogã sẽn yeelã.

⁹ Yaa koe-no-kãng yĩng la mam namsda, hal tɩ b sẽb maam wa tʋʋm-wẽns maanda. La b ka sẽb Wẽnnaam goamã ye.

¹⁰ Rẽ n kɩt tɩ mam sakd bũmba fãa nin-tũusidsã yĩnga, tɩ bãmb me tõe n paam fãagr ning sẽn be a Zezi Kirist pʋgẽ, la m paam ziir sẽn kõn sa.

¹¹ Gom-kãngã yaa sɩda: Tõnd sã n ki ne bãmba, tõnd na n vɩɩmda ne bãmb me.

¹² Tõnd sã n nang pãnga, tõnd na n dɩɩ naam ne bãmba. Tõnd sã n yeel tɩ d ka mi bãmba, bãmb me na yeel tɩ b ka mi tõnd ye.

¹³ Tõnd sã n ka maand sɩda, bãmb yẽ paada sɩdã pʋgẽ. Bala, bãmb ka tõe n yeele, n leb n kɩɩs tɩ b ka yeel ye.

¹⁴ Ad bũmb nins fo sẽn tog n tẽeg nebã, n togs-b Wẽnnaam taoor tɩ b gũus n lak ne no-koɛɛm gom-biis poorẽ t'a ka yõod baa bilf ye. B sẽn wat ne bũmb ninsi, yaa neb nins sẽn kelgdã sãoongo.

¹⁵ Nang pãng n yals Wẽnnaam taoor wa ned sẽn bɩ, tʋmtʋmd sẽn kõn sulg a zug ne yãnd ye. Yɩ ned sẽn togsd sɩd koɛɛgã ne tɩrlem.

¹⁶ Lak ne gom-vɩɩd sẽn ka kẽed ne wẽn-tũudmã yɛlã, bala, neb nins sẽn gomd gom-kãensã na n kell n kẽeda wẽngã pʋgẽ n paasdẽ.

¹⁷ Bãmb goamã na n dɩɩ wa solenkẽega. A Himene ne a Filɛt bee bãmb dãmb sʋka.

¹⁸ Bãmb bʋdg n basa sɩdã, n yetẽ tɩ kũum vʋʋgrã zoe n loogame, la b leebda neb kẽer tẽebo.

¹⁹ Baoosgo, yẽbg-kãenkãe ning Wẽnnaam sẽn yẽbgã yasame, la gomd ning sẽn pʋgdã ning-a-la bãnde: Zu-soabã mii neb nins sẽn ya bãmb dẽndã, la ned ning fãa sẽn pʋt Zu-soabã yʋʋr tog n basa ka-tɩrlem.

²⁰ Yi-kãseng pʋgẽ, ka sãnem bɩ wanzuri lagd bal n be ye. Kẽer me bee be n ya ne raado wall ne tãndo. Teed kẽer tʋʋm bee waoogre, la kẽer me tʋʋmd yaa rẽgdo.

²¹ Woto, ned sã n yɩlgd a meng n yiisd rẽg-kãensã, a na n yɩɩ laoko a tʋʋm sẽn be waoogre, laok sẽn welg toore, n be yõod a soaalã yĩnga, la sẽn tõe n tall n maan tʋʋm-sõng buud fãa.

²² Zãag ne yãadem datem wẽnsã, la f bao tɩrlem, la tẽebo, la nonglem, la laafɩ ne neb nins sẽn pʋʋsd Zu-soabã ne sũy sẽn ya yɩlma.

²³ Zãgs no-koɛɛm sẽn ya yalemdo la sẽn ka yõodã, fo sẽn mi tɩ b wata ne zabã yĩnga.

²⁴ Wẽnnaam tʋmtʋmd yaool n ka tog ne zab ye, a tog n tara nonglem neba fãa yĩnga, la a tar zãmsg ne zɩɩb tʋkr kũuni.

²⁵ A tog n demsa no-koɛɛm wẽedbã ne sũ-bʋgsem, n maand tẽeb tɩ Wẽnnaam na n kɩtame tɩ b paam sũ-lebgre, n tõog n bãng sɩdã,

²⁶ tɩ b leb n paam yam-sõngo, la b tõog n yi rõatã kũusa sẽn yõg bãmba tɩ b sak-a wã pʋgẽ.

3

¹ Bãng tɩ yaoolem wakate, tood na n zĩndame.

² Bala, nebã na n yɩɩ beed-rãmba, ligd noangdba, yʋ-baoodba, wilg-m-mens rãmba, wẽn-paoogdba, ba-rãmb kɩɩsdba, zɩ-beoog-rãmba, neb toog sẽn ka be ne sõmblem,

³ sẽn ka mi nimbãan-zoeere, nen-kegems rãmba, tẽn-kãn-neba, sẽn ka tar yõk-m-menga, nin-wẽnse, nin-sõamy bɛɛba,

⁴ zãmb-rãmba, sũ-tʋʋls-rãmba, tɩ wuk-m-meng leo b ninã, tɩ b nong b sũ-noogã n yɩɩd b sẽn nong Wẽnnaamã.

⁵ B na n maanda wa b sakda Wẽnnaam, la b yaool n na n kɩɩsa sakrã pãnga. Zãag f meng ne nin-bãmba.

⁶ Kẽer bãmb sʋk kẽeda rotẽ n belgd pagb sẽn pid ne yel-wẽna, la ratem toay-toay sẽn tar n lengdẽ,

⁷ tɩ b zãmsd wakat fãa la b zɩ n tõog n bãng sɩdã ye.

⁸ Wa a Zanɛs ne a Zambrɛs sẽn kɩɩs a Moyiisã, nin-kãensã kɩɩsda sɩdã me a woto. Bãmb yaa neba, b tagsg sẽn sãame, la b tẽebã ka yalsd makr wakat ye.

⁹ La b ka na n le kẽng taoor ye, bala, neba fãa na n yãnda b yalemdã, wa b sẽn yã daop a yiibã rẽndã.

¹⁰ Ne foom, fo yãa bũmb nins mam sẽn zãms nebã, mam yel-manesem, mam yam-yãkre, mam tẽebo, mam sũ-mare, mam nonglem, mam modgre,

¹¹ neb sẽn nams maam, mam namsgo. Nams bõe buud la b ka nams maam Ãntiyos, la Likoniyom, la Listri? Bõe wẽng la b ka maan maam? La Zu-soabã yolsa maam ne b fãa.

¹² Neb nins fãa sẽn dat n vɩɩmd tẽeb vɩ-sõng Kirist pʋgẽ wã, neb na nams-ba.

¹³ La nin-wẽnsã ne bɛlgdbã na n kell n kẽeda wẽngã pʋgẽ n paasdẽ. Bãmb mensã yaa neb sẽn meneme, la b menesda neb a taab me.

¹⁴ Foom, kell n gãd bũmb ning fo sẽn zãmse, fo sẽn tẽed a soabã. Fo mii f sẽn zãms bõn-kãng ned ning nengẽ.

¹⁵ Hal f yãadem wakate, fo bãnga Wẽnnaam sebrã. B tõee n kõo foom yam tɩ f tõog n paam fãagre, fo sẽn tẽed a Zezi Kiristã.

¹⁶ Wẽnnaam n kɩt tɩ b gʋls gʋls-sõamyã fãa, la b bee yõod zãmsg yĩnga, tɩ kɩt tɩ ned bãng a kongre, tɩ rems neda, tɩ wub ned tɩrlem pʋgẽ,

¹⁷ tɩ Wẽnnaam ned tõe n paam manegr la seglg tɩ maan tʋʋm-sõamy buud fãa.

4

¹ Mam yeta foom Wẽnnaam taoore, la Kirist Zezi sẽn na n kao nin-vɩɩs la kũum bʋʋdã taoore, la bãmb waoongã ne b rĩungã yʋʋr yĩnga,

² tɩ f moon koɛɛgã, tɩ f wɩng ne togsg wakat fãa, sã n yaa a togsg wakat wall ka a wakate. Mao tɩ nebã reeg tɩ gomdã yaa sɩda. Leng la f sagl ne sũ-mare la zãmsgo.

³ Bala, wakat n wat tɩ nebã ka na n leb n dat n wʋm sɩd koɛɛgã ye. La bãmb mensã yĩns ratem yĩnga, la kelgr yamleoog sẽn tar-bã yĩnga, b na n tigsa karen-saam-dãmb wʋsgo.

⁴ B na n yẽda b tʋbã ne sɩdã kelgre, la b yok-b ne soalmã kelgre.

⁵ La foom, gũus f meng ne bũmb fãa. Sak namsgo. Maan koe-noogã mooneg tʋʋmde. Maan f tʋʋmdã neere.

⁶ Bala, mam zoe n lebga wa koom b sẽn na n base, la mam loogr wakat kolgame.

⁷ Mam zaba zab-sõngo, mam zoee zoeesã n taase, mam talla tẽebo.

⁸ Moasã, Wẽnnaam bĩnga tɩrlem maanfã mam yĩnga. Zu-soabã sẽn ya bʋ-kaood tɩrgã na n kõ-a-la maam da-kãngã. La ka maam bal la b na n kõ ye, yaa neb nins fãa sẽn na nong bãmb pukrã.

⁹ Nang pãng n wa mam nengẽ tao-tao.

¹⁰ Bala, a Demas basa maam n looge, a sẽn nong moasã dũni wã yĩnga. A kẽnga Tesaloniki. A Kersãns kẽnga Galasi, t'a Tit kẽng Dalmasi.

¹¹ Yaa a Luk a yen tãa bal n be ne maam. Peeg a Mark n wa-ne, bala, a bee yõod ne maam m tʋʋmdã pʋgẽ.

¹² Mam tʋma a Tisik Efɛɛse.

¹³ Fo sã n wa watẽ, bɩ f zã m fu-bedrã m sẽn bas Torwasã, a Karpus yirã, ne sɛba n wa, la sẽn yɩɩd fãa, yaa gãn-nomdsã.

¹⁴ Yõak a Alegsãndr maana maam wẽng wʋsgo. Zu-soabã na n lebs-a-la a tʋʋm yaoodo.

¹⁵ Fo me gũus ne-a t'a kɩɩsa tõnd goamã ne a pãng fãa.

¹⁶ Mam sẽn yals bʋʋdã zĩigẽ pipi wã, ned baa a yen ka zĩnd ne maam ye, la b fãa loog n basa maam. Bɩ Wẽnnaam da geelg b sẽn maanã ye.

¹⁷ Yaa Zu-soabã n zĩnd ne maam, n kõ-m pãnga, tɩ mam togs koɛɛgã zãnga, tɩ bu-zẽmsã wʋme. La b fãaga maam gɩgemdã noorẽ.

¹⁸ Zu-soabã na n yolsa maam ne tʋʋm-wẽng fãa, la b na n fãaga maam n kẽes b soolmẽ. Bãmb n so ziir wakat sẽn ka sɛta. Ãmina!

¹⁹ Pʋʋs a Akilas ne a pag a Piriska, la a Onezifoor zaka rãmba.

²⁰ A Erast paa Korẽnte, la mam basa a Torfim Mile t'a ya bãada.

²¹ Mao n wa sẽn deng waoodã wẽnde. A Ebulus ne a Pudẽns, la a Linus ne a Kolodya, la ba-biisã fãa pʋʋsda foom.

²² Bɩ Zu-soabã zĩnd ne foom. Bɩ Wẽnnaam barkã zĩnd yãmb zutu.