1

¹ A Poll, a Zezi Kirist tẽn-tʋmda, a wa sẽn zems ne Wẽnnaam sẽn ya tõnd fãagdã raabo, la sẽn zems ne a Zezi Kiristã, tõnd tẽeb sẽn be ne a soabã noore,

² n gʋlsd a Tɩmote, m bi-roagdg tẽeb pʋgẽ. Bɩ barka, la nimbãan-zoeere, la laafɩ sẽn yit Ba a Wẽnnaam la tõnd Zu-soab a Zezi Kirist nengẽ wã zĩnd ne foom.

³ A wa mam sẽn dag n sagl foom wakat ning mam sẽn loogd n dabd Masedoannã, kell n pa Efɛɛs n sagl neb kẽer tɩ b ra zãms nebã koɛɛg a to ye,

⁴ la b ra sak soalma, ne roog yɛl sẽn ka saabo, la sẽn ka wat ne Wẽnnaam tʋʋmd tẽeb pʋgẽ la yaa nokoɛɛm balã ye.

⁵ Sagl-kãng võor yaa nonglem sẽn yit sũ-yolgemd pʋgẽ, la sũ-bãngr sẽn ya sõama pʋgẽ, la tẽeb sɩd-sɩd pʋgẽ.

⁶ Neb kẽer sẽn bʋdg n bas bõn-kãensã yĩnga, b bʋdgame n menem gom-vɩɩd pʋgẽ.

⁷ Bãmb dat n yɩɩ a Moyiis tõog karen-saam-dãmba, n yaool n ka wʋmd b sẽn gomdã, la b sẽn yetã võor ye.

⁸ Tõnd mii sɩd t'a Moyiis tõogã yaa sõama, b sã n tũ-a tɩ zemse,

⁹ la d miẽ t'a Moyiis tõogã ka maan nin-tɩrg yĩng ye, la yaa nin-wẽnsã, neb nins sẽn ka sakd noorã, sẽn ka tẽed-b Wẽnnaamã, yel-wẽn maandbã, neb nins sẽn paoogd Wẽnnaamã, la toog sẽn ka be ne wẽn-tũudum, ba-rãmb la ma-rãmb kʋʋdba,

¹⁰ la yĩng ratem yemse, la raop bɩ pagb sẽn gãe taaba, la yem-koaasdba, la zĩrĩ yagdba, la zĩrĩ kaset rãmba, la bũmb nins a taab sẽn kɩɩsd koe-sõngã maandbã yĩnga.

¹¹ Yaa koe-noog ning sẽn tar ziirã, Wẽnnaam sẽn ya bark soabã koe-noogã, koe-noog ning b sẽn ning mam noorẽ wã n yet a woto.

¹² Mam pʋʋsda soab ning sẽn kõ-a maam pãngã barka, tõnd Zu-soab a Zezi, bãmb sẽn ges tɩ mam yaa ned sẽn maand sɩda, n zĩndig maam tʋʋmdã pʋgẽ,

¹³ tɩ mam yaool n dag n ya ned sẽn paoogd Wẽnnaam, la sẽn namsd tẽedbã, la ned sẽn maand a taab pãnga. La b zoee mam nimbãanega, bala, dag n yaa zɩɩlem la ka-tẽeb pʋgẽ la mam dag n maand rẽnda.

¹⁴ La mam paama tõnd Zu-soabã barkã, n paas tẽeb la nonglem sẽn be a Zezi Kirist pʋgẽ.

¹⁵ Gomd ning sẽn yet t'a Zezi Kirist waa dũni n na n fãag yel-wẽn maandbã yaa sɩda, la gomdã zemsa reegr zãnga, la mam yaa yel-wẽn-maandbã taoor soabã.

¹⁶ La Wẽnnaam maana nimbãan-zoeer ne maam, t'a Zezi Kirist reng n wilg b sũ-marã fãa ne maam, mam sẽn ya wẽng n yɩɩd yel-wẽn maandba fãa wã, tɩ yɩ kaset neb nins fãa sẽn na tẽ bãmba n dat vɩɩm sẽn ka sɛtã yĩnga.

¹⁷ Bɩ rĩm ning sẽn be-a wakat sẽn kõn sa, n ka tõe n ki, la ned nin sẽn ka tõe n yã, n ya b yen tãa n ya Wẽnnaamã soog waoogre, la ziiri, wakat sẽn ka sɛt ye. Ãmina!

¹⁸ M biig a Tɩmote, koɛɛg ning mam sẽn yet foom, a wa sẽn zems bãngr gomdã sẽn gom a yellã, yaa tɩ f zab zab-sõngã wa b sẽn yeelã,

¹⁹ la f kell n tall tẽeb ne sũur kaset-sõngo. Neb kẽer basa sũur kaset kãnga, la ne tẽebã yelle, b yaa wa neb koom sẽn dɩ.

²⁰ A Himene ne a Alegsãndr bee bãmb dãmba sʋka, la mam basa bãmb ne a Sʋtãanã, tɩ b na zãms n bãng tɩ da paoog Wẽnnaam ye.

2

¹ Dẽ, mam saglg yaa tɩ y reng n kos Wẽnnaam, n pʋʋse, n yõk sɛɛga, la y pʋʋs Wẽnnaam bark neba fãa yĩnga:

² rĩm-dãmb yĩnga, neb nins fãa sẽn so naamã yĩnga, tɩ tõnd tõe n vɩ ne laafɩ la bãane, ne Wẽnnaam sakre, la ne waoogre.

³ Yaa woto n be neer Wẽnnaam nifẽ, la a noom bãmb sẽn ya tõnd fãagdã.

⁴ Bãmb daab yaa tɩ neba fãa paam fãagre, la b tõog n bãng sɩdã.

⁵ Bala, Wẽnnaam a yen tãa bal n be, sɛ-yõakd a yen tãa bal n be Wẽnnaam ne nebã sʋka: yaa dao sẽn boond t'a Zezi Kirist,

⁶ soab ning sẽn kõ a meng tɩ ra neba fãa wã. Yõwã yaa kaset sẽn kɩs a wakate.

⁷ Wẽnnaam yãka maam tɩ m moon kaset kãnga, la m yɩ tẽn-tʋmda -- mam yeta sɩda, mam ka yagd ye --, la m zãms bu-zẽmsã ne tẽebo la ne sɩda.

⁸ Dẽ, mam datame tɩ nebã zẽk nus sẽn ya yɩlma, n pʋʋs Wẽnnaam zĩig fãa, tɩ sũ-kiiri la nokoɛɛm kaẽ ye.

⁹ Sã n yaa ne pagbã, b tog n yera fut sẽn ya sõama n zems gesgo, la ne sik-m-menga. Bɩ b nagmã ra yɩ zutã pãnengo, wall sãnem, wall kĩndi, wall fut ligd sẽn ya toog yeelgrẽ ye.

¹⁰ Ayo! B tog n nagsa b mens ne tʋʋm sõamy maanego, wa sẽn zems pagb sẽn sakd Wẽnnaam sẽn tog n maane.

¹¹ Pagbã tog n deega zãmsg sĩndim la sakr meng-meng pʋgẽ.

¹² Mam ka kõt pag noor t'a zãms neba, wall a soog rao ye. A tog paa sĩndim pʋgẽ.

¹³ Bala, Wẽnnaam deng n naana a Adam pipi, n yaool n naan a Ɛɛve.

¹⁴ La sẽn paase, ka a Adam la waafã belg n tõog ye. Yaa pagã n sak belgrã, n kɩɩs Wẽnnaam noor n beeg bãmba.

¹⁵ Baoosgo, a na n paama fãagre, a sẽn lebg ma wã yĩnga, a sã n modg ne tẽebo, la nonglem, la welg toor Wẽnnaam yĩnga, la gũus-m-menga.

3

¹ Gom-kãnga yaa sɩda: Ned sã n dat n yɩ karen-saamba, yaa tʋʋm-sõng la a rata.

² Dẽ yĩnga, yaa tɩlɛ tɩ karen-saamb yɩ ned sẽn ka tar rõadga, pʋg-yend sɩda, ned sẽn gũusd ne a yel-manesem, sẽn tar yam n tõe n tagse, ned sẽn zems waoogre, sẽn maand sãamba sãando, ned sẽn tõe n zãms neb a taaba.

³ A ka tog n yɩ rã-yũuda, wall zabr soab ye. A tog n yɩɩ ned sẽn baood laafɩ. A ka tog n yɩ ned sẽn nong ligd ye.

⁴ A tog n yɩɩ ned sẽn get a zak yell neere, m kɩtd t'a kamb yɩ kom-sakds wa sẽn zems pẽgre.

⁵ Ned sã n ka tõe n ges a meng zak yelle, a na n yɩɩ a wãn n ges Wẽnnaam doogã yelle?

⁶ Yẽ ka tog n yɩ sug-kot paalg ye, sã n ka rẽ, a tõe n kẽe wuk-m-meng pʋgẽ, n paam sɩbgr ning wẽng soabã sẽn na n paamã.

⁷ A togame n paam tɩ kɛɛng-rãmbã kɩt a kaset sõngo, tɩ nebã da wa n ka nand-a, la tɩ rõatã bẽodg ra yõk-a ye.

⁸ Yel-gɛtb me tog n yɩɩ neb sẽn zems waoogre, la sɩd dãmba. B ka tog n yɩ neb sẽn yũud rãam wʋsgo, wall sẽn maand zãmb n baood ligd ye.

⁹ Bãmb tog n talla tẽeb sɩd koɛɛgã sẽn pukã kãenkãe, ne sũur kaset sõngo.

¹⁰ Nebã tog n deng n maka bãmb n gese, tɩ b sã n mik tɩ b ka rõadga, bɩ b yaool n maan yel-gesg tʋʋmdã.

¹¹ Bãmb pagbã me tog n yɩɩ neb sẽn zems waoogre. B ka tog n yɩ nin-sãbsdb ye. B tog n yɩɩ yõk-m-mens rãmba, la b maand sɩd bũmb fãa pʋgẽ.

¹² Yel-gɛt tog n yɩɩ pʋg-yend sɩda, la a tog n gesa a kambã ne a zaka rãmb yell sõama.

¹³ Yel-gɛtb nins sẽn maand b tʋʋmd neerã paamda waoogr zĩiga, la b pels yaa kãenkãe Kirist Zezi tẽebã pʋgẽ.

¹⁴ Mam gʋlsda foom bõn-kãensã, baa ne mam sẽn saagd n dat n wa fo nengẽ moas-moasã wã,

¹⁵ tɩ baa mam sã n wa n kaoosdẽ, fo na bãng f sẽn na n maan bũmb ning Wẽnnaam zakã pʋga, sẽn dat n togs tɩ Wẽnnaam sẽn vɩ wã nin-tũusdsã sʋka, sẽn ya sɩd ra-luka, la a yẽbgr sẽn tebended-a wã.

¹⁶ Ned ka tõe n kɩɩs tɩ wẽn-tũudbã yel-soalmã yaa bõn-kãseng ye. Kirist, soab ning sẽn dɩk yĩng tɩ neb yã-a wã, soab ning Sɩɩg-sõng sẽn kɩs a kaset sõngã, b puka b meng ne malegsã, neb moona b yellã buud toay-toayã sʋka, la tẽng zug ka, neb tẽ-b lame, la b paama zẽkre, la ziiri.

4

¹ Sɩɩg-sõng togsa vẽeneg tɩ yaoolem wakate, neb kẽer na n basa tẽebo, n pʋg belgr sɩɩse, la zãmsg zĩn-dãmb sẽn kõta.

² La yaa bɛlgdb sẽn ya zãmb dãmba, la b sũ-bãngrã sẽn wʋm ne kut sẽn moogã goam n na n kɩt tɩ yɩ a woto.

³ B yeta nebã tɩ b da yi kãadem ye, la b bas rɩɩb kẽer n da rɩ ye, tɩ Wẽnnaam yaool n naan rɩ-kãens tɩ neb nins sẽn maand sɩda la sẽn mi sɩdã na dɩ ne bark pʋʋsgo.

⁴ Wẽnnaam sẽn naan bũmb ninsã fãa yaa sõama, b sã n dɩt-b ne bark pʋʋsgo.

⁵ Bala, bũmb fãa lebgda sõama Wẽnnaam goamã la pʋʋsg yĩnga.

⁶ Fo sã n bilg ba-biisã bõn-kãense, fo na n yɩɩ Kirist Zezi tʋmtʋmd sõng sẽn paam dɩlgr ne tẽeb goama, la ne zãms-sõng fo sẽn tũ sõama wã.

⁷ Zãag f meng ne kibay sẽn ka kẽed ne tẽeb yelle, la ne soalem pʋg-yãans sẽn tãoodã.

⁸ Mao ne Wẽnnaam sakre. Bala, yĩngã modgr yõod yaa bilfu, la Wẽnnaam sakr bee yõod ne bũmb fãa. A tara vɩɩm ning sẽn be moasã wã kãabgo, la vɩɩm ning sẽn watã yĩnga.

⁹ Yaa gomd sãmbg sẽn ka be a pʋgẽ, la sẽn zems tɩ b reeg-a zãnga:

¹⁰ Tõnd tʋmdame, la d maoodẽ, tɩ bõe, tõnd saagr bee ne Wẽnnaam sẽn vɩ la sẽn ya neba fãa fãagda, la tẽedbã fãagd n yɩɩda.

¹¹ Fo sẽn tog n sagl nebã tɩ b maane, la f zãms-b bũmb ningã la woto.

¹² Da sak n maan tɩ ned paoog foom f yãadem yĩng ye. Yɩ mamsg neb nins sẽn maand sɩdã yĩnga, ne f noor goama, ne f kẽnde, ne f nonglem, ne f tẽebo, ne f sõmblem.

¹³ Wɩng ne sɛbã kaoreng nebã sʋka, la saglgo, la zãmsgo hal tɩ m wa.

¹⁴ Da bas kũun ning bãngr gomd sẽn togse, tɩ kãsem-dãmbã tik foom ne b nus n pʋʋs n kõ foomã tɩ yɩ zaalem ye.

¹⁵ Maan tʋʋm kãng neere, n dɩk f meng n kõ-a, tɩ neba fãa na yã tɩ fo kẽngda taoore.

¹⁶ Mao n gũus f menga, la f gũus ne zãmsgã. Wɩng ne bõn-kãense, bala, fo sã n maan a woto, fo na n fãaga f menga, la f fãag neb nins sẽn kelgd foomã.

5

¹ Da leng nin-kẽem ne pãng ye, sagl-a wa a yaa f ba. Maan kom-bɩɩsã wa f ba-biisi,

² la pʋg-yãansã wa f ma-rãmba, la pʋg-sadbã wa f tãopa, ne sõmblem zãnga.

³ Waoog pʋgkõap nins sẽn sɩd ya pʋgkõapa.

⁴ Pʋgkõor sã n tar kamb bɩ yagense, bɩ kom-kãens zãms tɩ reng n zoe b meng yirã rãmb nimbãanega, n lebs bãmb bũmb nins b sẽn dag n ges bãmb yell ne wã, bala, maan-kãng nooma Wẽnnaam.

⁵ La pʋgkõor ning sẽn ya-a pʋgkõor meng-menga, n vɩ a yembre, a teegrã fãa bee ne Wẽnnaam, n modgd ne bõosg la pʋʋsgo, yʋng la wĩntoog fãa.

⁶ La pʋgkõor ning sẽn vɩ yĩng sũ-noog pʋgẽ yaa kũum, baa ne a sẽn vɩ wã.

⁷ Ad bũmb nins fo sẽn tog n wilg-b tɩ b maane, tɩ rõadg da zĩnd b zut ye.

⁸ Ned sã n ka get a neb yelle, sẽn yɩɩd fãa yaa a zaka rãmba, yẽ basa a tẽebã, la a yaa wẽng n yɩɩd ned ning sẽn ka-a tẽedã.

⁹ Pʋgkõor b sẽn tõe n gʋls a yʋʋr pʋgkõapã sebr zug tog n tara yʋʋm sẽn tat pis-yoobe, la a yɩ rao a yen tãa paga,

¹⁰ tɩ neba fãa miẽ t'a wuba kamba, n maan sãambã sãando, n pegs nin-sõamy naowã, la a sõng neb nins sẽn namsda, la a bao tɩ maan tʋʋm-sõng buuda fãa.

¹¹ La f ra sak n gʋls pʋgkõap nins sẽn ya pʋg-bi wã ye, bala, b ratma sã n lak ne Kiristã, b rata sɩdba,

¹² la rẽ yaa beegr ne bãmba, b sẽn sãam b pipi kaoolã yĩnga.

¹³ Sẽn paase, b minimda kʋɩʋʋngo, n zãmsd yiy saabo. Ka b sẽn ka tʋmdã bal ye, b yɩta yel-kãnesdba, n kẽed goam sẽn ka pak-ba, la b gomd goam b sẽn ka tog n gom ye.

¹⁴ Dẽ, mam datame tɩ pʋgkõap nins sẽn yaa-b pʋg-pẽbã kuil sɩdb n dog kamba, la b zã zagse, tɩ b ra wa n kõ bɛyã weer baa a yen t'a gom wẽng ye.

¹⁵ Bala, kẽer zoe n wẽnemdame n pʋg a Sʋtãana.

¹⁶ Tẽed sã n tar pʋgkõor a zakẽ, bɩ a ges a yelle, tɩ da yɩ tɩlɛ tɩ wẽnd-doogã tʋk a zɩɩb ye. Woto, b na tõog n ges b rãmb sẽn ya pʋgkõap sɩd-sɩdã yelle.

¹⁷ Taoor dãmb nins sẽn get wẽnd-doogã tʋʋm yell neerã tog n paama waoogr n yɩɩda, la sẽn yɩɩd fãa, yaa neb nins sẽn wɩngd ne koe-moonego la ne zãmsgã.

¹⁸ Bala, Wẽnnaam sebrã yetame tɩ: Da ning naaf ning sẽn pãbd-a ki wã noor yʋk ye, la tʋmtʋmd togda ne a yaoodo.

¹⁹ Ned sã n wa n dõd kãsma, sã n ka neb a yiib bɩ a tãab kaseto, da reeg ye.

²⁰ Neb nins sẽn maand yel-wẽnã, leng-b neba fãa sʋka, tɩ neb a taabã me na zoe rabeem.

²¹ Mam kota foom Wẽnnaam taoore, la Kirist Zezi taoore, la maleg-tũusdsã taoore, tɩ f tũ noy-kãens n da tũus neba, wall f bak neb kẽer n na n sõng ye.

²² Da yãg n tigs nebã ne f nus n kẽes-b Wẽnnaam tʋʋmdẽ wã ye, la f ra naag ned a yel-wẽnd maanegẽ ye. Fo mengã, tall f meng ne sõmblem.

²³ Da yũudẽ koom yen-yen bal ye. Yũ divẽ bilfu, f pʋ-zabrã ne f yĩn-pa-nooma sẽn wat wakat wʋsgã yĩnga.

²⁴ Neb kẽer yel-wẽn yaa vẽenese, baa sẽn deng b sẽn na bʋ b bʋʋdo. La ne neb kẽere, b yel-wẽnã ka pukda, sã n ka b bʋʋdã zugẽ ye.

²⁵ Woto me, tʋʋm sõamyã pukdame, la tʋʋm nins sẽn ka-b sõama wã me ka tõe n pa n ka puk ye. Niig sẽn pãbd koodo (5.18)

6

¹ Bɩ neb nins sẽn be yembd pʋgẽ wã ges b mens zu-soben-dãmbã wa neb sẽn zems ne waoogr fãa, tɩ b ra wa n paoog Wẽnnaam yʋʋrã la tẽeb zãmsgã ye.

² La neb nins zusoben-dãmb sẽn ya tẽedbã, b ka tog n paoog-b n yetẽ tɩ bãmb yaa ba-biis ne taab ye. B tog n tʋma b yĩng sõama n yɩɩda, bala, b yaa tẽedba, la nin-nongds bãmb sẽn maood tɩ maan-b neere.

³ Ned sã n zãmsd nebã bũmb a to, la a ka kẽnd wa sẽn zems tõnd Zu-soab a Zezi Kirist gom-sõngã, la a wa tẽeb zãmsg sẽn zemsd ne Wẽnnaam sakrã,

⁴ soab kãng pida ne wuk-m-menga, la a ka mi baa fɩ ye. A sã n ka wẽed nokoɛɛma, la a ka maand zab gom-biis poorẽ, yaa bãag ne-a. Yaa bõn-kãens n wat ne sũ-kiiri, la ka-wʋm-taaba, la kãnegre, la tags-wẽng neb a taab zutu,

⁵ tɩ neb nins sɩɩs sẽn kẽ belgr pʋgẽ wã wẽed nokoɛɛm n ka basdẽ ye. Bãmb dãmb ka tar sɩd ye, la b rɩka Wẽnnaam sakrã tɩ yɩ arzegs baoob sore.

⁶ Sɩda, ned sã n maand sũ-noog ne bũmb nins a sẽn tara, Wẽnnaam sakrã sɩd yaa paoong so-kẽenga.

⁷ Bala, tõnd ka zã baa fɩ n wa tẽng zug ka ye, la tõnd ka tõe n zã baa fɩ me n loog ye.

⁸ Dẽ wã, tõnd sã n tar dɩɩb ne futu, rẽ na n seka tõndo.

⁹ Neb nins sẽn baood n lebg arzegs rãmbã lʋɩta makr pʋgẽ, la kũusr pʋgẽ, datem wʋsg sẽn ya yalemd la wẽns pʋsẽ, la bõn-kãens kẽesda ninsaalbã sãoong la meneng pʋgẽ.

¹⁰ Bala, ligdã nonglem yaa bõn-wẽnsã fãa yẽgre. La neb kẽer sẽn nong ligd wʋsgã menemame n zãag ne tẽebã, la b sɩbga b mens ne tood buud toay-toaya.

¹¹ La fo sẽn ya Wẽnnaam nedã, zãag f meng ne bõn-kãense, la f bao tɩrlem, la Wẽnnaam sakre, la tẽebo, la nonglem, la sũ-mare, la sũ-bʋgsem.

¹² Zab tẽeb zab-sõngã, gãd vɩɩm sẽn kõn sa wã, tɩ yaa rẽnda yĩng la Wẽnnaam bool foom, la yaa rẽnda yĩng me la fo sẽn kɩs kaset-sõngo, kaset rãmb wʋsg taoorã.

¹³ Mam yeta foom, Wẽnnaam sẽn kõt bõn-vɩɩsã fãa vɩɩmã taoore,

¹⁴ tɩ f sak tõodã tɩ rẽgd tosg ra zĩnd ye, tɩ rõadg da zĩndi, hal tɩ ta tõnd Zu-soab a Zezi Kirist pukrã.

¹⁵ Wakat sã n ta, sẽn tar-a barkã, n ya b yen tãa n so naamã, dĩm-dãmb Dĩma la zusoben-dãmb Zu-soabã na n puka bõn-kãnga.

¹⁶ Yaa bãmb bal n ka kiida, n vɩ vẽenem ned sẽn ka tõe n ta pʋgẽ. Ned nan ka yãnd bãmb ye, la ned ka tõe n yãnd bãmb me ye. Yaa bãmb n so waoogre, la pãng sẽn paad wakat sẽn kõn sa. Ãmina!

¹⁷ Yeel neb nins sẽn tar arzegs dũni kãngã pʋgẽ wã tɩ b ra maan wilg-m-menga, la b da rɩk b teegrã n teeg arzegs b sẽn ka tar a hakɩɩk ye. Bɩ b teeg Wẽnnaam, tɩ b kõta bũmb fãa tɩ seke, tɩ tõnd tõe n tall n maan sũ-noog ne.

¹⁸ Bɩ b maan neere, la bɩ b yɩ neb sẽn maand tʋʋm-sõamy wʋsgo, la b yɩ neb sẽn kõte, la sẽn nong n pʋɩ b sẽn tarã ne neb a taaba.

¹⁹ Woto, bãmb na n bĩnga paoong wakat sẽn watã yĩnga, wa yẽbgr sẽn tar pãnga, tɩ b tõe n paam vɩɩm hakɩɩkã tɩ yɩ b pʋɩɩre.

²⁰ Tɩmote, tall bũmb nins sẽn bĩng fo pʋgẽ wã, la f mao n zãag f meng ne gom-vɩɩd sẽn ka kẽed ne Wẽnnaam yell ye. Zãag ne nokoɛɛma, la ne zĩrĩ-bãngre.

²¹ Neb kẽer sẽn dɩk bõn-kãens tɩ yɩ b tʋʋmdã ka tõog n ta zĩig ning b sẽn da tog n ta tẽebã wɛɛngẽ wã ye. Bɩ barkã zĩnd ne yãmb fãa.