1

¹ A Poll ne a Sɩlvẽ la a Tɩmote n gʋlsd Tesalonik wẽnd-doogã rãmb sẽn be tõnd ba a Wẽnnaam pʋgẽ la Zu-soab a Zezi Kirist pʋgẽ wã.

² Bɩ ba a Wẽnnaam la Zu-soab a Zezi ning yãmb barka la b kõ yãmb laafɩ.

³ D ba-biisi, tõnd tog n pʋʋsda Wẽnnaam bark yãmb yĩng n ka basdẽ ye, la yaa bũmb sẽn zemse, bala, yãmb tẽebã paasdame, tɩ nonglem ning yãmb sẽn tar taab yĩngã paasdẽ.

⁴ Woto, tõnd me pẽgda d mens yãmb yĩng Wẽnnaam nin-tũusidsã sul pʋsẽ, yãmb modgrã ne y tẽebã yĩnga, nebã sẽn namsd yãmbã pʋgẽ la toodã sẽn sigd yãmbã pʋgẽ.

⁵ Yõwã wilgdame tɩ Wẽnnaam bʋʋdã yaa tɩrga, tɩ b na kɩt tɩ yãmb zems ne Wẽnnaam soolem kõom, soolem ning yãmb sẽn sakd namsgã yĩnga.

⁶ Bala, ne Wẽnnaam, a zemsame tɩ b kɩt tɩ neb nins sẽn namsd yãmbã namse,

⁷ la b kɩt tɩ yãmb sẽn namsdã, bɩ y lagem ne tõnd n paam vʋʋsg wakat ning Zu-soab a Zezi sẽn na n puk arzãn ne malegs sẽn tar pãnga.

⁸ Bãmb na n waa bug-vɩleng pʋgẽ, n sɩbg neb nins sẽn ka mi Wẽnnaam la neb nins sẽn ka sakd tõnd Zu-soab a Zezi koe-noogã.

⁹ Sɩbgr sẽn segd ne-b la b na n paame: sãoong sẽn paad wakat sẽn kõn sa, n zãag ne Zu-soabã yãabo la ne bãmb pãngã ziiri,

¹⁰ wakat ning Zu-soabã sẽn na wa tɩ neb nins bãmb sẽn so wã waoog bãmb da-kãnga, tɩ neb nins sẽn tẽed bãmbã na ges bãmbã. La yãmb yaool n tẽe kaset ning tõnd sẽn kɩsã.

¹¹ Yaa woto yĩng la tõnd pʋʋsd yãmb yĩng n ka basdẽ ye, tɩ tõnd Wẽnnaamã na kɩt tɩ yãmb yɩ neb sẽn zemsd ne boolg ning b sẽn bool yãmbã, la tɩ b na pids saag-sõamy nins yãmb sẽn tar ne tʋʋm-sõamy wã maanegã, la b kɩt tɩ yãmb tẽebã tʋʋmd zems zãnga.

¹² Woto, yãmb na waoog tõnd Zu-soab a Zezi yʋʋre, la bãmb me na waoog yãmba, wa sẽn zemsd tõnd Wẽnnaam la ne Zu-soab a Zezi Kirist nimbãan-zoeerã.

2

¹ M ba-biisi, sã n yaa ne tõnd Zu-soab a Zezi Kirist waoongã yelle, la tõnd sẽn na n tigs taab bãmb nengẽ wã yelle, tõnd kota yãmb

² tɩ y ra sak tɩ y yam yuus tao-tao, wall tɩ rabeem yõk yãmba, neb sẽn yet tɩ Zu-soabã waoong zoe n loogame wã yĩng ye. Bala, neb tõe n gomame n yeel tɩ yaa bãngr goama, wall b gome, wall b yeel tɩ tõnd n gʋls n yeel a woto.

³ Bɩ ned da tõog n belg yãmb ne manesem buud baa a yembr ye, bala, yaa tɩlɛ tɩ leb-poorẽ deng n zĩndi, tɩ wẽn-kɩɩsdã yiki. Yẽ yaa soab ning b sẽn na n sãame,

⁴ bɛ sẽn zẽkd a meng n yɩɩgd bũmb ning fãa b sẽn boond tɩ Wẽnnaam, la bũmb nins fãa neb sẽn pʋʋsda, hal n pʋs n kẽng n tɩ zĩnd Wẽnnaam doogẽ wã, n kɩt tɩ b bool-a tɩ wẽnnaam.

⁵ Yãmb ka tẽr tɩ mam goma ne yãmb a yell wakat ning m sẽn dag n ket n be ne yãmbã sɩda?

⁶ Mosã, yãmb mii bũmb ning sẽn gɩdg-a t'a ka tõe n yik hal tɩ ta a wakatã.

⁷ Bala, yel-wẽnã yel-soalem zoe n tʋmdame, la yaa tɩlɛ tɩ ned ning sẽn gɩdg-a wã deng n looge.

⁸ Yaa wakat kãng la wẽn-kɩɩsdã na n yiki, la Zu-soabã a Zezi na n sãam-a-la ne b noor pemsem, la bãmb waoongã ziir na n beds-a lame.

⁹ Wẽn-kɩɩsdã waoong na n yɩɩ ne a Sʋtãan pãnga, ne zĩrĩ bõn-bãn la bãna, la bõn-yɛɛsds buud toay-toaya,

¹⁰ la ne ka-tɩrlem belgrã fãa, neb nins sẽn na n sãamã yĩnga, bala, b ka reeg sɩdã nonglem n na paam fãagr ye.

¹¹ Woto yĩnga, Wẽnnaam tʋma meneng sɩɩg b nengẽ, tɩ b na tẽ zĩrĩ,

¹² tɩ neb nins sẽn ka tẽ-b sɩdã, la sẽn nong ka tɩrlmã bʋʋd na kao.

¹³ D ba-biis Zu-soabã sẽn nong wʋsgo, sã n yaa ne tõndo, tõnd tog n pʋʋsda Wẽnnaam bark wakat fãa yãmb yĩnga, bala, Wẽnnaam tũusa yãmb hal sɩngr wẽndẽ tɩ y na paam fãagre, la yaa Sɩɩgã sẽn na welg yãmb toor Wẽnnaam yĩnga, la yãmb sẽn na n tẽ sɩdã yĩng la y na n paam-a.

¹⁴ Yaa tɩ yãmb na paam fãagr yĩng la b tall koe-noogã tõnd sẽn moonã n bool yãmba, tɩ y tõe n paam pʋɩɩr ne tõnd Zu-soab a Zezi Kirist ziirã.

¹⁵ Woto yĩnga, m ba-biisi, yals-y kãenkãe la y tall koees nins tõnd sẽn kõ yãmbã, sã n yaa ne noore, wall ne sebre.

¹⁶ Bɩ tõnd Zu-soab a Zezi Kirist mengã, la tõnd ba a Wẽnnaam sẽn nong tõndo, n bels tõnd ne belsg sẽn kõn sa, bãmb nimbãan-zoeerã yĩnga, la b kõ tõnd saag-sõngã

¹⁷ bels yãmb sũyã, la b kɩt tɩ y pɛlg yɩ kãenkãe ne tʋʋm-sõng fãa, la ne gom-sõng fãa.

3

¹ La koɛɛg sẽn keta, d kota yãmb tɩ y pʋʋs tõnd yĩnga, tɩ Zu-soabã goamã tõe n kell n saage, la a paam waoogr wa a sẽn tar yãmb nengẽ wã,

² la tɩ Zu-soaba na yols tõnd ne neb nins sẽn ka yam la sẽn ya wẽnsã. Bala, ka b fãa n tar tẽeb ye.

³ La Zu-soabã yaa sɩd soaba, la b na n kɩtame tɩ yãmb yals kãenkãe, la b gũ yãmb tɩ wẽng soabã da tõog-y ye.

⁴ Tõnd pʋs peela ne yãmb Zu-soabã pʋgẽ, tɩ yãmb maanda bũmb nins tõnd sẽn yet yãmbã, la tɩ y na n kell n maaname.

⁵ Bɩ Wẽnnaam tɛ yãmb sũyã n tees Zu-soabã nonglmã la Kirist sũ-marã.

⁶ D ba-biisi, tõnd yeta yãmb ne tõnd Zu-soab a Zezi Kirist yʋʋr tɩ y zãag y mens ne ba-biig ning fãa sẽn ya kʋɩɩma, la sẽn ka tũud minind nins tõnd sẽn wilg yãmbã ye.

⁷ Yãmb mens mii y sẽn tog n maan togs-n-taar ne tõnd to-to, bala, tõnd ka yɩ kʋɩɩmb yãmb sʋk ye.

⁸ Tõnd ka rɩ ned baa a yembr rɩɩb zaalem ye, la tõnd modga d mens n tʋm wĩndg ne yʋngo, tɩ d da wa n yɩ zɩɩb yãmb ned baa a yembr yĩng ye.

⁹ Ka tɩ tõnd dag n ka tar noor tɩ zĩnd tɩ yãmb ges tõnd yell ye, la yaa tɩ tõnd mensã da rat n kõo yãmb mamsg sẽn na tũ.

¹⁰ Bala, tõnd sẽn dag n be ne yãmbã, tõnd dag n yeela yãmb a woto: Ned sã n ka rat n tʋm bɩ a ra rɩ me ye.

¹¹ Tõnd yaool n wʋmame tɩ yãmb neb kẽer yaa kʋɩɩmba. B sẽn dag n tog n tʋmã, yaa neb a taab yɛl n pak-ba.

¹² Tõnd kota nin-kãense, n sagend bãmb ne Zu-soab a Zezi Kirist yʋʋr tɩ b maag b mens n tʋm n paam b toorẽ dɩɩb n dɩ.

¹³ La ne yãmba, m ba-biisi, bɩ y da yɛ ne tʋʋm-sõamyã maaneg ye.

¹⁴ Ned sã n ka sak bũmb ning tõnd sẽn yet seb-kãngã pʋgẽ wã, bãng-y-yã a soaba, la y ra paam lagem-n-taar baa bilf ne-a ye, tɩ yãnd yõk-a.

¹⁵ Da ges-y-yã-a wa y bɛ ye, keoog-y-yã-a wa y ba-biiga.

¹⁶ Bɩ Zu-soabã sẽn kõt laafɩ wã meng kõ yãmb vɩ-bãane wakat fãa, bũmb fãa pʋgẽ. Bɩ Zu-soabã zĩnd ne yãmb fãa!

¹⁷ Yaa maam a Poll nug n gʋls pʋʋsmã. Maam n tik m nug sɛba fãa pʋse. Mam gʋlsem la woto.

¹⁸ Bɩ tõnd Zu-soab a Zezi barkã zĩnd ne yãmb fãa.