1

¹ A Poll ne a Sɩlvẽ la a Tɩmote n gʋlsd Tesalonik-rãmb wẽnd-doogã sẽn be ba a Wẽnnaam pʋgẽ, la Zu-soab a Zezi Kirist pʋgẽ wã. Bɩ Wẽnnaam ning yãmb barka la b kõ yãmb bãane.

² Tõnd pʋʋsda Wẽnnaam bark yãmb yĩng n ka basdẽ ye, la tõnd pʋta yãmb yell d pʋʋsg pʋgẽ.

³ Tõnd tẽegda yãmb tẽebã tʋʋmde, la yãmb nonglmã tʋʋmde, la y tẽeb ne tõnd Zu-soab a Zezi Kiristã pidsg gũudũm sẽn ka vigsdã yelle, tõnd ba a Wẽnnaam taoor n ka basdẽ ye.

⁴ D ba-biis Wẽnnaam sẽn nonge, tõnd miime tɩ Wẽnnaam tʋlsa yãmba.

⁵ Bala, koe-noogã tõnd sẽn moonã ka wa yãmb nengẽ ne no-goam bal ye. La yaa ne pãng me, ne Sɩɩg-sõngo, tɩ sãmbg baa bilf ka a pʋgẽ ye. Sɩd me, yãmb mii tõnd sẽn maan to-to yãmb sʋka, yãmb sõngr yĩnga.

⁶ Yãmb sẽn deeg Wẽnnaam goamã namsg wʋsg pʋgẽ, ne sũ-noog ning Sɩɩg-sõng sẽn kõtã, yãmb lebga tõnd togs-n-taase, la Zu-soabã togs-n-taas me.

⁷ Woto, yãmb lebga mamsg tẽedba fãa sẽn be Masedoan la Akayi wã yĩnga.

⁸ Bala, Zu-soabã koɛɛgã yii yãmb nengẽ n sãage. Ka Masedoan la Akayi bal ye. Neb sẽn be zĩig fãa bãnga yãmb tẽeb ne Wẽnnaamã yelle, tɩ ka leb n ya tɩlɛ tɩ tõnd leb n gom a yell ye.

⁹ B gomda tõnd yell n wilgd tõnd sẽn paam n kẽ yãmb sʋk to-to, la yãmb sẽn kos sugr n tek yam to-to, n wẽnemd n bas wẽn-naandsã n sakd Wẽnnaam sẽn vɩ n ya sɩd soabã,

¹⁰ la y gũud tɩ bãmb bi-ribl a Zezi yi yĩngr n wa, soab ning Wẽnnaam sẽn kɩt tɩ b vʋʋg n yi kũum sʋka, la b yolsd tõnd ne Wẽnnaam sũ-puugr sẽn watã.

2

¹ M ba-biisi, yãmb mens miime tɩ tõnd waoongã yãmb nengẽ ka yɩ zaalem ye.

² La yãmb miime tɩ b namsa tõnd Filip, la tõnd yãa toog be. Rẽ kɩtame tɩ tõnd paam pɛl-kɛgeng ne d Wẽnnaamã, n na n moon yãmb Wẽnnaam koe-noogã maoor wʋsg pʋgẽ.

³ Sagls nins tõnd sẽn sagl yãmbã ka yɩ tudgri, bɩ tags-rẽgd pʋgẽ, wall ne sɩlem ye.

⁴ La a wa Wẽnnaam sẽn poes tõnd n na n kõ tõnd koe-noogã mooneg tʋʋmdã, tõnd ka gomd n na n noog ninsaalb sũy ye, la yaa tɩ noog Wẽnnaam sẽn feesd sũyã sũuri.

⁵ Yãmb miime tɩ tõnd zɩ n gom n na n belg neb ye, tɩ tõnd zɩ n gom n dat n paam paoong ye. Wẽnnaam yaa d kaset soaba.

⁶ Tõnd ka bao waoogr sẽn yit ninsaalb nengẽ, yãmb nengẽ, wall neb a taab nengẽ ye. Tõnd yaool n dag n tõe n modga yãmba, tõnd sẽn ya Kirist tẽn-tʋmdbã yĩnga.

⁷ La tõnd sẽn zĩnd yãmb sʋkã, tõnd pida ne sũ-bʋgsem. A wa pag sẽn get a kamb yellã,

⁸ tõnd da nongẽ lame n kõ yãmb Wẽnnaam koe-noogã ne nonglem. La ka rẽ bal ye. Tõnd da nongẽ n kõo d vɩɩmã me yãmb yĩnga, bala, yãmb lebga tõnd nin-nongdse.

⁹ D ba-biisi, yãmb tẽra tõnd tʋʋmã ne d naongã: Tõnd moona yãmb Wẽnnaam koe-noogã, la tõnd tʋma yʋng ne wĩntoogo, tɩ d da wa n yɩ zɩɩb yãmb yĩng ye.

¹⁰ Yãmb yaa kaset rãmba, la Wẽnnaam me yaa kaset soaba, tɩ tõnd yel-manesem ne yãmb sẽn ya tẽedbã yɩɩ sõama la tɩrga, tɩ rõdb kaẽ ye.

¹¹ Yãmb miime me tɩ tõnd yɩɩ wa ba-rãmb ne b kamba, yãmb yembr yembr yĩnga.

¹² Tõnd sagla yãmba, n bels yãmba, la d bõos yãmb tɩ y kẽn wa sẽn zemsd Wẽnnaam daabo, bãmb sẽn bool yãmb tɩ y paam pʋɩɩr ne bãmb soolem la b ziirã yĩnga.

¹³ Tõnd pʋʋsda Wẽnnaam bark me n ka basdẽ ye, bala, yãmb sẽn deeg Wẽnnaam goamã tõnd sẽn togs yãmbã, yãmb ka reeg-a wa a yaa ninsaalb goam ye. Yãmb deeg-a-la wa a sẽn ya bũmb ning sɩd-sɩdã, Wẽnnaam goam sẽn tʋmd yãmb sẽn ya tẽedbã pʋgẽ.

¹⁴ D ba-biisi, yãmb sɩd lebga Wẽnnaam dot nins sẽn be Zude soolmẽ wã togs-n-taase, la wẽnd-do-kãens bee Kirist Zezi pʋgẽ. Bala, yãmb tẽngã rãmb sẽn nams yãmb to-to wã, Zuif-rãmbã me namsa wẽnd-do-kãens rãmb a woto me.

¹⁵ Zuif-rãmbã n kɩt tɩ b kʋ Zu-soab a Zezi la Wẽnnaam no-rɛɛsdbã, la b nams tõndo. B ka maand sẽn noom Wẽnnaam ye, la b kisa neba fãa.

¹⁶ Bãmb gɩdgda tõnd tɩ d da moon bu-zẽmsã Wẽnnaam koɛɛgã, tɩ b paam fãagr ye. B sẽn maan a woto wã, b maana b yel-wẽnã n taase. La Wẽnnaam sũ-puugr baas n ta-b lame.

¹⁷ D ba-biisi, tõnd sẽn zãag ne taab wakat bilf yĩnga, d nina ka ne taab ye, la d sũyã loee ne taaba. Tõnd data ne d sũyã fãa n leb n yã yãmb neng ne nenga.

¹⁸ Dẽ kɩtame tɩ tõnd dag n dat n wa yãmb nengẽ. Naoor a yiib la maam a Poll yẽ dag n dat n wa yãmb nengẽ, la a Sʋtãan gɩdga tõndo.

¹⁹ Tõnd saagr bee ne ãnna rãmba, la ãnna rãmb n ya tõnd sũ-noog la d waoogr maanf tõnd Zu-soab a Zezi taoore, la b waoongã wakate? Ka yãmb laa?

²⁰ N-ye! Yãmb yaa tõnd ziir la d sũ-noogo.

3

¹ Tõnd wa n ka leb n tõe n gũ yɛs ye. Dẽ n kɩt tɩ tõnd yãk yam tɩ ya tõnd bal n na pa Atɛn.

² La tõnd tʋma d ba-biig a Tɩmote sẽn ya tõnd tʋmd-n-taag Wẽnnaam tʋʋmdã pʋgẽ, n moond Kirist koe-noogã, t'a wa n paas yãmb raoodo, la a sagl yãmb y tẽebã sõngr yĩnga,

³ tɩ namsg ning sẽn paamd yãmb moasã wã da wa n vigs ned baa a yembr ye. Bala, yãmb mens miime tɩ nams-kãens yaa tõnd pʋɩɩre.

⁴ Wakat ning tõnd sẽn dag n be ne yãmbã, tõnd pĩnd n yeela yãmb tɩ d na n paama namsgo. La yãmb miime tɩ yaa rẽ n wa wã.

⁵ Dẽ n kɩt tɩ mam sẽn ka leb n tõe n gũ n kaoosã yĩnga, mam tʋma a Tɩmote t'a wa n sok yãmb tẽebã yelle, mam sẽn zoet dabeem tɩ makdã na n mak yãmb tɩ tõnd tʋʋmdã lebg zaalmã yĩnga.

⁶ La moasã, a Tɩmote yii yãmb nengẽ n lebg n wa tõnd nengẽ, la a waa ne yãmb tẽebã la y nonglmã koe-noodo, la koe-nood tɩ yãmb ket n tẽra tõnd yell sõama, la y raab tɩ leb n yã tõndo, wa tõnd me sẽn dat n yã yãmbã.

⁷ Woto, m ba-biisi, baa ne tõnd sẽn be tood la namsg pʋgẽ wã, tõnd paama belsg ne yãmb kibarã, y tẽebã yĩnga.

⁸ Moasã, tõnd vɩɩme, yãmb sẽn paad Zu-soaba pʋgẽ kãenkãe wã yĩnga.

⁹ Tõnd ka tõe n pʋʋs Wẽnnaam bark n sa yãmb yĩnga, sũ-noog ning tõnd sẽn maand Wẽnnaam taoor yãmb yĩngã yĩng ye.

¹⁰ Yʋng ne wĩndga, tõnd bõosda Wẽnnaam ne d sũyã fãa tɩ d tõe n yã yãmb nengã, la d kɩt tɩ y paam bũmb ning sẽn paoog yãmb tẽebẽ wã.

¹¹ Bɩ Wẽnnaam meng sẽn ya tõnd ba wã, la tõnd Zu-soab a Zezi pak d sorã tɩ d ta yãmb nengẽ.

¹² Bɩ Wẽnnaam kɩt tɩ yãmb nonglem taab yĩnga, la neba fãa yĩngã lebg kãseng n puugi, wa nonglem ning tõnd sẽn tar yãmb yĩngã.

¹³ Woto, bɩ Wẽnnaam paas yãmb raoodo, tɩ y ra paam rõdb y sũyã pʋsẽ ye, la y zĩnd sõmblem tõnd ba a Wẽnnaam taoore, daar ning tõnd Zu-soab a Zezi sẽn na n wa ne nin-sõamy wã.

4

¹ Yaoolem bũmbu, m ba-biisi, yaa tɩ yãmb zãmsa tõnd nengẽ n bãng y sẽn tog n kẽn to-to n ta Wẽnnaam yam, la y pʋs n maanda a woto. Moasã, tõnd kota yãmba, n bõosd yãmb ne Zu-soab a Zezi yʋʋr tɩ y maan neer n yɩɩd a woto.

² Sɩd me, yãmb mii bũmb nins tõnd sẽn deeg Zu-soab a Zezi nengẽ n wilg yãmb tɩ y maanã.

³ Bũmb ning Wẽnnaam sẽn dat yaa tɩ yãmb na welg toor n yɩ bãmb dẽnda, la y yõk y mens n da maan rẽgd ye:

⁴ Yaa tɩ yãmb ned kam fãa bãng tɩ tall a meng ne sõmblem la pʋ-peelem,

⁵ la a ra bas tɩ ratem wẽng soog a sũurã wa nin-zaalsã sẽn ka mi Wẽnnaamã sẽn maandã ye.

⁶ Tɩ ned da maan a to zãmb wall a wẽg-a yel-kãng pʋgẽ ye. Tõnd zoe n yeela yãmb tɩ Zu-soabã kaooda bõn-kãens bʋʋdo.

⁷ Bala, Wẽnnaam ka bool tõnd tɩ d maan rẽgd ye, la yaa tɩ d na welg toor n yɩ bãmb dẽnda.

⁸ Woto, ned ning sẽn kɩɩsd-a tõ-kãensã, ka ninsaal la a kɩɩsd ye, la yaa Wẽnnaam, soab ning sẽn kõ-a yãmb bãmb Sɩɩg-sõngã me la a kɩɩsda.

⁹ Sã n yaa ne ba-biir nonglmã yelle, yãmb ka baood tɩ m gʋls yãmb n gom a yell ye, bala, yãmb mensã paama zãmsg Wẽnnaam nengẽ tɩ nong taaba.

¹⁰ Yãmb nonga ba-biisã fãa sẽn be Masedoan tõrã a woto. La tõnd sagenda yãmb sẽn ya d ba-biisã tɩ y kẽng taoor n paase,

¹¹ la y vɩ ne taab ne laafɩ, la y ges y mens tʋʋmã yelle, la y tʋm ne y nus wa tõnd sẽn dag n yeel yãmbã, tɩ rẽnda na n yɩɩ yãmb waoogre.

¹² Maan-y-yã a woto tɩ y yel-manesem ne yɩng rãmbã zemse, la tɩ yãmb da zĩẽ n gũud ned sõngr ye.

¹³ M ba-biisi, tõnd ka rat tɩ yãmb zɩ neb nins sẽn gõe wã yelle, tɩ yãmb sũyã da wa n sãam wa neb a taabã sẽn ka tar tẽeb ne beoog neerã ye.

¹⁴ Sɩd me, tõnd sã n tẽed t'a Zezi kiime la tɩ b leb n vʋʋgame, tõnd tẽedame me tɩ neb nins sẽn ki Kirist tũudum pʋgẽ wã, Wẽnnaam na n kɩtame tɩ Kirist vʋʋg-ba, n lagem bãmb ne a Zezi n zẽke.

¹⁵ Ad bũmb ning tõnd sẽn togsd yãmba, wa sẽn zems ne Zu-soabã gomde: Tõnd sẽn ket n vɩ Zu-soabã waoong daarã, tõnd ka na n deng neb nins sẽn gõe wã ye.

¹⁶ Bala, koɛɛg n na n zẽke tɩ yɩ bãnde, tɩ b wʋm malegs naab a yen koɛɛga, tɩ Wẽnnaam baorg peebe, tɩ Zu-soabã meng yi arzãn n sigi. La neb nins sẽn ki Kirist tũudma pʋgẽ wã n na n deng n vʋʋge.

¹⁷ Sẽn pʋgda, b na n lagma tõnd sẽn ket vɩ wã ne bãmb n zẽk sawat pʋse, tɩ d seg Zu-soabã yĩngri. La woto, tõnd na n bee ne Zu-soabã daar fãa.

¹⁸ Woto yĩnga, bɩ y bels taab sũy ne gom-kãense.

5

¹ M ba-biisi, yãmb ka baood tɩ mam gʋls yãmb n wilg wakat la sasa ning bõn-kãens sẽn na n zĩndã ye.

² Bala, yãmb mens mii sõama tɩ Zu-soabã waoong na n yɩɩ wa wagdr sẽn wat yʋngo.

³ Wakat ning ninsaalbã sẽn na n yeel tɩ yaa laafɩ la bãanã, wakat kãng la sãoong na n ling bãmba. La na n yɩɩ wa rogem toog sẽn paamd pag sẽn tʋte, la b kõn põs ye.

⁴ Mam ba-biisi, yãmb yẽ ka be lik pʋgẽ tɩ da-kãng na n wa ling yãmb wa wagdr ye.

⁵ Yãmb fãa yaa vẽenem neba, la wĩndg neba. Tõnd ka yʋng neb wall lik neb ye.

⁶ Dẽ yĩngã, bɩ d da gũs wa neb a taabã ye. Ayo, d neende, la d yɩ yõk-m-mens rãmba.

⁷ Yaa yʋng la sẽn gõe-bã gõe, la yaa yʋng la nebã yũud rãam n tuubdẽ.

⁸ La tõnd sẽn ya wĩndg nebã, bɩ d yɩ yõk-m-mens rãmba: Tɩ d bob tẽeb la nonglem wa gãntika, la d fõgen fãagrã tẽeb pidsg gũudmã wa kut-pugla.

⁹ Bala, Wẽnnaam ka yãk tõnd tɩ d na paam bãmb sũ-puugrã ye, la yaa tɩ tõnd na soog fãagrã tõnd Zu-soab a Zezi Kirist maasem yĩnga,

¹⁰ Soab ning sẽn ki tõnd yĩnga, tɩ tõnd sã n vɩ wall d sã n ki me, bɩ tõnd vɩ ne bãmba.

¹¹ Woto yĩnga, paas-y taab raoodo, la y bɩɩs taab tẽeb wa y sẽn zoe n maandẽ wã.

¹² D ba-biisi, tõnd kota yãmb tɩ y waoog neb nins sẽn tʋmd yãmb sʋka, n tɛt yãmb Zu-soabã pʋgẽ la b keoogd yãmbã.

¹³ Wilg-y-b tɩ yãmb nand-b lame, nong-y-b wʋsgo, b tʋʋmdã yĩnga. Zĩnd-y ne taab ne laafɩ.

¹⁴ D Ba-biisi, tõnd bõosda yãmb tɩ y keoog neb nins sẽn vɩ yaarã, la y paas neb nins raood sẽn boogã raoodo, la y tebel pãn-komsem dãmba, la y maan sũ-mar ne nebã fãa.

¹⁵ Gũus-y y mense, tɩ ned da lebs a to wẽng wẽng yĩng ye. Mao-y tɩ maan neere, sã n yaa yãmb ne taaba, wall ne nebã fãa.

¹⁶ Maan-y sũ-noog daar fãa.

¹⁷ Pʋʋs-y n da bas ye.

¹⁸ Pʋʋs-y Wẽnnaam bark bũmb fãa pʋgẽ, bala, Wẽnnaam raab la a woto Kirist Zezi pʋgẽ.

¹⁹ Da kiis-y Sɩɩg-sõngã ye.

²⁰ Da paoog-y bãngr goamã ye.

²¹ Bʋ-y bũmb fãa yelle, tɩ sẽn ya sõama bɩ y reege,

²² la y yõk y mens ne wẽng buuda fãa.

²³ Bɩ Wẽnnaam sẽn so laafɩ wã maneg yãmb yĩn-tõrã b toor tɩ yɩ sõama zãnga, tɩ tõnd Zu-soab a Zezi Kirist waoongã daare, bɩ b mik tɩ rõdb ka be yãmb belma pʋgẽ ye, sã n yaa y Sɩɩgã, wall y yĩngã pʋgẽ.

²⁴ Sẽn bool-a yãmbã yaa sɩd soaba, la yaa bãmb n na n maan a woto.

²⁵ D ba-biisi, pʋʋs-y Wẽnnaam tõnd yĩnga.

²⁶ Pʋʋs-y ba-biisã fãa ne mok-sõngo.

²⁷ Mam bõosda yãmb ne Zu-soabã yʋʋr tɩ y karem seb-kãngã tɩ ba-biisã fãa wʋme.

²⁸ Bɩ tõnd Zu-soab a Zezi Kirist barkã zĩnd ne yãmba.