1

¹ Maam a poll sẽn ya Kirist Zezi tẽn-tʋmd wa sẽn zems Wẽnnaam daabã ne ba-biig a Tɩmote

² n tʋmd seb kãnga Wẽnnaam nebã sẽn ya tõnd ba-biis sẽn maand sɩd Kirist tũudma pʋgẽ n be Kolosã nengẽ. Bɩ y paam bark la laafɩ sẽn yit tõnd ba a Wẽnnaam nengẽ.

³ Tõnd pʋʋsda tõnd Zu-soab a Zezi Kirist ba a Wẽnnaam barka, la d pʋʋsd yãmb yĩng n ka basdẽ ye.

⁴ Sɩd me, tõnd wʋmame tɩ b gomd yãmb tẽeb ne Kirist Zezi wã yelle, la nonglem ning yãmb sẽn tar Wẽnnaam nebã fãa yĩngã yelle,

⁵ tẽeb pidsg gũudũm ning b sẽn bĩng yãmb yĩng arzãn pʋgẽ wã yĩnga. Sɩd koɛɛgã sẽn ya koe-noogã sẽn pĩnd n kɩt tɩ yãmb bãngã.

⁶ Koe-no-kãng taa yãmb nengẽ. A sẽn womd biis la a kẽngd taoor to-to dũniyã tɛk fãa wã, a maanda a woto me yãmb nengẽ hal sẽn sɩng ne daar ning yãmb sẽn wʋm la y bãng Wẽnnaam barkã wa sẽn zems sɩda,

⁷ la sẽn zems sagls nins tõnd tʋmd-n-ta-nongr a Epafras sẽn gʋls yãmbã. Yẽ yaa Kirist tʋmtʋmd sẽn moond sɩda, n tʋmd yãmb yĩnga.

⁸ A wilga tõnd nonglem ning Sɩɩg-sõng sẽn kɩt tɩ yãmb tarã.

⁹ Yaa woto yĩng n kɩt tɩ sẽn sɩng ne daar ning tõnd me sẽn wʋm kiba-kãngã wã, tõnd pʋʋsda Wẽnnaam yãmb yĩng n ka basdẽ ye, la d kot Wẽnnaam tɩ b pids yãmb sũyã ne bãmb daabã bãngre, la b kõ yãmb yam fãa, ne bãngr ning Sɩɩg-sõng sẽn kõtã.

¹⁰ Kɩt-y tɩ y kẽnã waoogd Zu-soabã, tɩ y tõe n ta bãmb yam bũmb fãa pʋgẽ, la y wom biis ne tʋʋm sõama buud fãa, la y bɩ Wẽnnaam bãngr pʋgẽ.

¹¹ Tõnd kota Wẽnnaam, tɩ yãmb na paam pãng n paase, bãmb pãn-kãsengã maasem yĩnga, tɩ yãmb tõe n yɩ neb sẽn kẽngd taoor sɩd-sɩda, la sẽn tar sũ-mare.

¹² Pʋʋs-y tõnd ba a Wẽnnaam bark ne sũ-noogo, bãmb sẽn kɩt tɩ yãmb tõe n naag ne bãmb nebã n paam pʋɩɩr vẽenemã pʋgẽ wã yĩnga.

¹³ Bãmb fãaga tõnd n yiis likã pãngẽ, n tall-d n kẽng b bi-ribl-nongrã soolmẽ,

¹⁴ soab ning maasem yĩng tõnd sẽn paam fãagre, la yel-wẽna sugrã.

¹⁵ Kirist yaa Wẽnnaam, soab ning ned sẽn ka tõe n yã wã wẽnego, la bũmb nins fãa b sẽn naanã dẽenem soaba.

¹⁶ Bala, bãmb n naan bũmb nins fãa sẽn be yĩngr wall tẽng zugu, sẽn be yãab la sẽn ka tõe n yã, naam gɛyã, rĩm-dãmba, pãn-soaadba, la noeyã. Bãmb n naan fãa b mengã yĩnga.

¹⁷ Bãmb denga bũmba fãa n beẽ, la yaa bãmb pʋgẽ la bũmb fãa yalsd a zĩigẽ.

¹⁸ Bãmb yaa tẽedbã sẽn ya bãmb yĩngã zugu. Bãmb la bũmb fãa sɩngre, sẽn yɩ-a pipi n vʋʋg n bas kũum, tɩ bãmb tõe n yɩ dẽenem soab bũmb fãa pʋgẽ.

¹⁹ Bala, a taa Wẽnnaam yam tɩ kɩt tɩ bãmb sẽn ya bũmb ning fãa, bɩ a Zezi me yɩ a woto,

²⁰ la b kɩt t'a Zezi wa ne zems-n-taar bãmb a Wẽnnaam ne bũmb fãa sʋka, sã n yaa sẽn be tẽng zugu wall sẽn be yĩngri, n kɩt tɩ bãmb maasem yĩnga, bɩ laafɩ zĩndi, bãmb zɩɩma sẽn daag da-pɩkã zugã yĩnga.

²¹ La yãmb sẽn dag n ya sãamb la y ya bɛɛb y tagsdã ne y tʋʋm-wẽnsã yĩng pĩndã,

²² moasã, Wẽnnaam yiisa yell ning sẽn da be yãmb ne bãmb sʋkã, a Zezi yĩn-kiidgã kũum maasem yĩnga, tɩ b tõe n tall yãmb n wa b taoor ne pʋ-peelem, tɩ y ka tar yelle, la tɩ rõdb kaẽ ye.

²³ Yãmb sã n sɩd pa tẽebã pʋgẽ, la y kɩ yẽg n yals kãenkãe tɩ bũmb da wa n zãag yãmb ne koe-noogã tẽeb pidsg gũudũm ning yãmb sẽn wʋma, sẽn ya koe-noog ning b sẽn moon ninsaalbã fãa sẽn be dũniyã zugã, koe-noog ning maam a Poll sẽn lebg a tʋmtʋmdã.

²⁴ Moasã, mam maanda sũ-noogo, m sẽn be namsg pʋg yãmb yĩngã yĩnga, la mam yĩngã pʋgẽ, m pidsda Kirist namsg nins sẽn paooge, b sẽn da tog n nams b tẽedbã sẽn ya bãmb yĩngã yĩngã.

²⁵ Yaa Kirist tẽedbã yĩng la mam lebg karen-saamba. Wẽnnaam n ning mam zug tɩ m moon yãmb bãmb koɛɛgã zãnga.

²⁶ Koe-no-kãng yaa yel-solemd sẽn solg wakat fãa, la sẽn solg ne zamaan dãmba fãa, n yaool n puk-a moasã ne bãmb nebã.

²⁷ Wẽnnaam n tʋlg n kɩt tɩ b nebã bãng yel-solem-kãnga arzɛkã sẽn tar ziir bu-zẽmsa sʋkã, dat n togs tɩ Kirist sẽn be yãmb pʋsẽ wã, b na n pidsa tẽeb gũudũm ning sẽn ya ziirã.

²⁸ Yaa Kirist koɛɛg la tõnd moonda, n keoogd ned buud fãa la d zãmsd ned kam fãa ne yam buud fãa, tɩ tõnd tõe n kɩt tɩ ned kam fãa zems zãng Kirist tũudmã pʋgẽ.

²⁹ Yaa bõn-kãng yĩng la mam tʋmda, n tar bãmb pãngã sẽn maand a tʋʋmd mam pʋgẽ ne pãng kãsengã n maoodẽ.

2

¹ Sɩd me, mam datame tɩ yãmb bãng zab-kãseng ning mam sẽn zabd yãmb yĩngã, la neb nins sẽn be Laodise, la neb nins fãa sẽn nan ka yã mam nengã yĩnga.

² Mam maoodame tɩ b sũya tõe n paam belsgo, tɩ b tõe n lagem taab nonglem pʋgẽ n paam yam n bãng sɩd-sɩda, n bãng Wẽnnaam yel-sõmdã sẽn ya Kiristã.

³ Yam vẽnegr ne bãngrã arzegsã fãa solga Kirist pʋgẽ.

⁴ Mam togsda bõn-kãng tɩ ned da wa n belg yãmb ne sɩlem n tõog ye.

⁵ Bala, baa mam yĩngã sã n zãr ne yãmba, mam yam bee ne yãmba, mam sũur yaa noog mam sẽn ne yel-manesem sõngã sẽn be yãmb sʋkã, la yãmb tẽebã sẽn ya kãenkãe Kirist pʋgẽ wã yĩnga.

⁶ Woto yĩnga, yãmb sẽn deeg Zu-soab a Zezi Kiristã, kẽn-y ne bãmba.

⁷ Kɩ-y yẽga, n yals kãenkãe Kirist pʋga, n tall tẽeb kãenkãe wa sẽn zems zãmsg nins b sẽn dag n zãms yãmbã, la y pʋʋs bark wʋsgo.

⁸ Gũus-y tɩ ned da belg yãmb ne zãmsg buudu, la ninsaalb minind n zãag ye, bõn-kãens yaa dũniyã yɛla, la a ka Kirist rẽnd ye.

⁹ Bala, Wẽnnaam sẽn ya bũmb ningã fãa, Kirist me yaa a woto b yĩngã pʋgẽ.

¹⁰ La yãmb tara bũmb fãa bãmb pʋg tɩ seke, bãmb sẽn ya nanams fãa Naaba la noeyã fãa Zu-soabã.

¹¹ Bãmb pʋgẽ me, b kẽesa yãmb bãongo, la ka bãong sẽn kẽes ne ninsaalb nus ye, rat n togs tɩ yaa Kirist bãong sẽn kɩt tɩ yãmb bas y yĩngã ratma.

¹² Yãmb muma ne Kirist, b sẽn lis yãmbã pʋgẽ, la b naaga yãmb bãmb pʋgẽ n vʋʋg n bas kũum, yãmb sẽn tẽ Wẽnnaam pãngã sẽn vʋʋg Kirist n bas kũumã yĩnga.

¹³ Pĩnda, yãmb sẽn dag n ya bɛɛgdb y kongrã ne y sẽn ka kẽ bãong y yĩngã pʋgẽ wã yĩngã, Wẽnnaam kõo yãmb vɩɩm ne Kirist n kõ tõnd beegrã fãa sugri.

¹⁴ Bãmb yẽesa tõod nins b sẽn da gʋls n kaood tõnd bʋʋdã la sẽn da mongd tõnd bʋʋma Wẽnnaam menesa tõ-kãng wakat ning b sẽn ka a Zezi da-pɩkã zugã.

¹⁵ Kirist sãama pãens rãmba ne noeyã pãnga, n wilg neba fãa tɩ b tõog-b-la ne da-pɩkã.

¹⁶ Dẽ wã yĩnga, da sak-y tɩ ned kao yãmb bʋʋd ne yãmb sẽn dɩt bũmb ning wɛɛngẽ wall y sẽn yũud bũmb ninga, wall kibsa wall kiu-paalga wall vʋʋsg daar wɛɛngẽ ye.

¹⁷ Bõn-kãens fãa yaa bũmb nins sẽn na n wa wã mamsg bala, la bũmba meng-meng yaa Kirist.

¹⁸ Da sak-y tɩ ned sẽn maand wa a yaa sik-m-meng soaba la sẽn pʋʋsd malegs belg yãmb wa a sẽn date, n kɩt tɩ y kong y zoeesa keoor ye. Ned a woto buud teegda yãab buud toay-toaya, t'a ninsaalem tagsdã kɩt t'a pid ne wuk-m-meng zaalem

¹⁹ la a ka tongd a meng ne zug ning sẽn sõngd yĩngã tõrã ne a kõb-sũgdsã la a gĩina t'a bɩt bɩʋʋng sẽn yit Wẽnnaam nengẽ wã ye.

²⁰ Sã n yaa tɩ yãmb kii ne Kirista, tɩ Kirist yols yãmb ne tẽeb buud toay-toayã yembdo, bõe tɩ yãmb bas tɩ b leb n modgd yãmb tɩ y sak tõod a woto sẽn ya:

²¹ "Da rɩk-y ye! Da lemb-y ye! Da sɩɩs-y ye!"

²² Bõn-kãens b sẽn tar n tʋmdẽ wã sãamdame. Bõn-kãens yaa yeelsem la zãmsg ninsaalb sẽn tar n zãmsd taaba.

²³ Yaa sɩd tɩ ned sã n get yeelsmã ne zãmsgã, b wẽnda wa b yaa yam tʋʋma, b sẽn wilgd wẽn-tũudum sẽn maand ne yamleoogo, la sik-m-menga, la tõog-m-menga. La b yaool n ka tar yõod n tõe n sõng ned t'a tõog a yĩngã ratem wẽng ye.

3

¹ Dẽ, sã n yaa tɩ yãmb naaga ne Kiristã, n vʋʋge, bɩ y bao bũmb nins sẽn be arzãna, zĩig ning Kirist sẽn zao Wẽnnaam dɩtgã.

² Tags-y bũmb nins sẽn be arzãnã yelle, la y ra tags bũmb nins sẽn be dũni zugã yell ye.

³ Bala, yãmb kiime, la yãmb vɩɩmã solga ne Kiristã Wẽnnaam nengẽ.

⁴ Kiristã sẽn ya yãmb vɩɩmã sã n wa n puki, dẽ, yãmb me na n naaga bãmb b ziirã pʋgẽ n puki.

⁵ Dẽ wã yĩnga, kɩt-y tɩ y dũni ka yalẽ wã ki. Yaa yoobo, tʋʋm-rẽgdo, wẽng maaneg ratem, datem wẽnse, la rat-wʋsgo, sẽn ya wa wẽn-naands pʋʋsgo.

⁶ Yaa rẽnda yĩng la Wẽnnaam sũ-puugr wat kɩɩsdbã zutu.

⁷ Yãmb sẽn dag n vɩ yel-wẽn kãens pʋgã, yãmb dag n maanda bõn-kãense.

⁸ La mosã, bɩ yãmb me kɩɩs bõn-kãensã fãa: Yaa sũ-kãbre, pʋ-toogo, tẽn-kãnem la gom-dẽgd sẽn tõe n yi yãmb noorẽ wã.

⁹ Da yag-y taab zĩrĩ ye. Bala, yãmb yeega y yalẽ-kʋdgã ne a tʋʋma,

¹⁰ la y yelg yalẽ paalga. Wẽnnaam palemda yalẽ-paalgã bãmb sẽn naanã, n kɩtdẽ t'a wẽnegd bãmb a Wẽnnaam n paasdẽ, tɩ tõnd tõe n bãng bãmb zãnga.

¹¹ Yel-kãngã pʋgẽ, ka be tɩ yaa Gɛrk, wall Zuif wall zũnga, wall moaaga, wall weoog neda, wall nin-zẽmba, wall yamba, wall burkĩn ye. La Kirist yaa fãa neba fãa pʋse.

¹² Dẽ wã yĩnga, yãmb sẽn ya Wẽnnaam nin-tũusdsi, la neb sẽn welg toorã, la neb Wẽnnaam sẽn nong wʋsgã, bɩ y yelg nimbãan-zoeer meng-menga, la sõmblem, la sik-m-menga, la sũ-bʋgsem, la sũ-mar wa futu.

¹³ Tʋk-y taab zɩɩbo, la y maan taab sugri. Ned sã n tar yell ne a to, bɩ a maan a soab sugr wa Kirist sẽn maan yãmb sugrã.

¹⁴ La sẽn yɩɩd fãa, bɩ y nong taab bala, tɩ nonglem yaa loɛtg sɩd-sɩda.

¹⁵ Bɩ Kirist laafɩ, b sẽn bool yãmb a pʋgẽ tɩ y yɩ yĩng a yembrã soog yãmb sũyã. Yɩ-y neb sẽn mi y zaame.

¹⁶ Bɩ Kirist goama zĩnd yãmb pʋsẽ ne yõod ning sẽn be a pʋgẽ wã. Zãms-y taab la y keoog taab ne yam meng-menga, ne yɩɩn-sõamyã, la Wẽnnaam yɩɩla, la yɩɩl Sɩɩg-sõng sẽn kõta. Yɩɩl-y bark pʋʋsg yɩɩl ne y sũyã fãa n pẽg Wẽnnaam.

¹⁷ Bũmb ning fãa yãmb sẽn maanda, sã n yaa goam pʋga wall tʋʋm pʋga, maan-y fãa ne Zu-soab a Zezi yʋʋre, n pʋʋs ba a Wẽnnaam bark a Zezi maasem yĩnga.

¹⁸ Pagba, bɩ yãmb ned kam fãa sak a sɩda, wa sẽn zems sẽn tog n yɩ to-to Zu-soaba tũudum pʋgẽ wã.

¹⁹ Pʋg-sɩdbã, bɩ yãmb ned kam fãa nong a paga la y ra maan gãgs ne-a ye.

²⁰ Kamba, sak-y y ba-rãmb ne y ma-rãmb bũmb fãa pʋgẽ, bala, bõn-kãng nooma Zu-soaba sũuri.

²¹ Ba-rãmba, da maan-y tɩ y kambã sũy yiki, tɩ b raood wa n boog ye.

²² Tʋmtʋmdba, sak-y y dũni zu-soben-dãmbã bũmb fãa pʋgẽ. Da sak-y bãmb b nifẽ bala, tɩ wẽnd wa yãmb baood n maana sẽn noom ninsaalb ye. Sak-y bãmb ne y sũyã fãa, Zu-soabã zoees pʋgẽ.

²³ Yãmb sẽn maand bũmb ning fãa, bɩ y maan-a ne y sũur fãa wa y sẽn maand Zu-soabã yĩnga, la ka ninsaalb yĩng ye,

²⁴ yãmb sẽn mi tɩ y na n deega pʋɩɩr Zu-soabã nengẽ tɩ yɩ y keoorã yĩnga. Sɩd me, yaa Kirist sẽn ya Zu-soabã yĩng la yãmb tʋmda.

²⁵ Bala, ned ning sẽn tʋmd sẽn ka zems na n wʋka a ka-tɩrlemã yaoodo, bala, Wẽnnaam ka bakd neb ye.

4

¹ Zu-soben-dãmba, yao-y y tʋmtʋmdbã ne tɩrlem la wa sẽn zemse, yãmb sẽn mi tɩ yãmb me tara Zu-soab arzãn pʋgẽ wã yĩnga.

² Wɩng-y ne pʋʋsgo, modg-y ne-a, n paas bark pʋʋsgo.

³ Pʋʋs-y tõnd yĩng me, tɩ Wẽnnaam pak sor tõnd koɛɛgã mooneg yĩnga, tɩ mam tõog n moon Kirist yel-solemdã koɛɛga, yel-solemd ning yĩng b sẽn balg maama,

⁴ tɩ mam na gom a yell vẽeneg wa sẽn zems m sẽn tog n gom a yell to-to wã.

⁵ Kɩt-y tɩ y yel-manesem ne neb nins sẽn ka be tẽeb pʋgẽ wã yɩ ne yam. Da bas-y weerã t'a loogdẽ ye.

⁶ Kɩt-y tɩ yãmb goam tall bark wakat fãa n tar yamsem noom, tɩ yãmb na bãng y sẽn tog n leok ned kam fãa to-to tɩ zemse.

⁷ Sã n ya ne mam mengã yelle, m ba-bi-nongr a Tisik sẽn ya Zu-soaba tʋmtʋmd sẽn maand sɩda, la sẽn ya mam tʋmd-n-taag Zu-soaba tʋʋmd pʋgẽ wã na n wilga yãmb bũmb fãa.

⁸ Pʋs n yaa rẽ yĩng la mam tʋmd-a yãmb nengẽ, tɩ yãmb tõe n bãng tõnd yell sẽn ya to-to, la t'a bels yãmb sũyã.

⁹ Mam tʋmda yẽnda ne d ba-bi-nongr a Onezɩm sẽn ya ned sẽn maand sɩd la a ya yãmb nedã y nengẽ. Bãmb na n wilga yãmb bũmb nins fãa sẽn maand ka wã.

¹⁰ Mam bi-be-taag a Aristark ne a Mark sẽn yaa a Barnabas saam-biigã pʋʋsda yãmba. Mam wilga yãmb bũmb nins y sẽn tog n maan a Mark yĩnga. A sã n ta yãmb nengẽ, bɩ y reeg-a sõama.

¹¹ A Zezi b sẽn boond a soab t'a Zustusã me pʋʋsda yãmba. Zuif-rãmbã sʋka, yaa bãmb bal n naag maam n tʋmd Wẽnnaam soolmã yĩnga. Bãmb yɩɩ neb sẽn paas maam daoodo.

¹² A Epafras sẽn ya yãmb nedã pʋʋsd-y lame. Yẽ yaa Kirist Zezi tʋmtʋmda, n maood yãmb yĩng a pʋʋsg pʋgẽ n ka basdẽ ye, tɩ yãmb na bɩ n ta, la y bãng Wẽnnaam daabã sõama y sũurẽ, n yals kãenkãe.

¹³ Mam kɩta yẽ kaset n yetẽ t'a maooda yãmb yĩng wʋsgo, yãmb ne neb nins sẽn be Laodise la Hiyerapolisã yĩnga.

¹⁴ Ba-bi-nongr a Luk sẽn ya logtorã ne a Demas pʋʋsda yãmba.

¹⁵ Pʋʋs-y ba-biisã sẽn be Laodise wã, ne a Nimfa la a Zezi tẽedbã sẽn tigimd yẽ zakẽ wã.

¹⁶ Yãmb sã n wa n karem seb-kãngã n sɛ, bɩ y maan y sẽn tõe tɩ b karm-a a Zezi tẽedbã sẽn be Laodise wã me sʋka, la yãmb me karem sebr ning Laodise tẽedbã sẽn na n tʋm yãmbã.

¹⁷ Yeel-y-yã a Arsɩp yaa: Gũus ne tʋʋmd ning fo sẽn deeg Zu-soabã nengẽ wã, n tõog tʋm-a sõama.

¹⁸ Maam a Poll n gʋlsd ne m meng nug n pʋʋsd yãmba. Da yĩm-y tɩ b balga maam ye. Bɩ barkã zĩnd ne yãmba.