1

¹ Maam a Poll ne a Tɩmote sẽn ya Zezi-Kirist nonglem yemsã n tʋmd seb-kãnga Wẽnnaam neba fãa sẽn tẽed a Zezi Kiristã la karen-saam-dãmba ne yel-gɛtbã sẽn be Filip tẽngã.

² Bɩ y reeg bark la laafɩ sẽn yit tõnd ba a Wẽnnaam ne Zu-soab a Zezi Kirist nengẽ.

³ Wakat fãa mam sẽn tẽegd yãmb yelle, mam pʋʋsda Wẽnnaam bark y yĩnga.

⁴ Mam pʋʋsda yãmb fãa yĩng wakat fãa ne sũ-noog n ka basdẽ ye,

⁵ yãmb sẽn sõngd ne koe-noogã tʋʋmd hal sẽn sɩng daar ning yãmb sẽn wʋm-a, tɩ ta moasã wã yĩnga.

⁶ Mam mii hakɩɩk tɩ Wẽnnaam sẽn sɩng tʋʋm sõng-kãng yãmb sũya pʋsã na n kell n maan-a lame n baase, hal tɩ ta a Zezi Kirist daarã.

⁷ A Zemsame tɩ mam paam tagsg a woto yãmb fãa yĩnga, bala, mam yam bee ne yãmb sõama, tɩ bõe, sã n yaa mam sẽn be bi-bees roog pʋg moasã wã, wall sã n yaa mam sẽn da gomd n wilgdẽ tɩ koe-noogã yaa sɩdã, yãmb fãa lagemda ne maam n paamd bark a yembre.

⁸ Tɩ bõe, Wẽnnaam yaa mam kaset soab tɩ mam nonga yãmb fãa ne a Zezi Kirist nonglem,

⁹ la mam sẽn pʋʋsd n kot bũmb ninga, yaa tɩ yãmb nonglem na paasd daar fãa n yɩɩda, ne bãngre la yam-vẽnegre.

¹⁰ Tɩ woto, yãmb na n bãnga bũmb ning sẽn ya sõama n yɩɩda sẽn na yɩlẽ tɩ Kirist waoongã daare, bɩ y yɩ neb sẽn ya sɩd dãmb tɩ rõadg kãe ye,

¹¹ n pid ne tɩrlem biis sẽn yit a Zezi Kirist nengẽ, Wẽnnaam waoogre la b pẽgr yĩnga.

¹² M ba-biisi, mam datame tɩ yãmb bãng tɩ bũmb nins sẽn paam maamã kɩtame tɩ koe-noogã saag n yɩɩda.

¹³ Sɩd me, na-yira nebã fãa la zĩiga fãa nebã bãngame tɩ yaa mam sẽn maand Kirist tʋʋmdã yĩng la b balg maam.

¹⁴ Ba-biisã kẽer sẽn tũud Zu-soabã fãa paama raood mam balgrã yĩnga, n moon Wẽnnaam koɛɛgã ne raood n ka zoe rabeem ye.

¹⁵ Yaa sɩd tɩ neb kẽer moonda a Kirist koɛɛgã sũ-kiir la geesem-geesem yĩnga. La neb kẽer moond-a-la ne yam sẽn ya sõama.

¹⁶ Bãmb dãmba moonda ne nonglem, b sẽn mi tɩ Wẽnnaam yãka maam tɩ m gom koe-noogã yĩngã.

¹⁷ La neb a tãabã yaool n moonda Kirist koɛɛgã ne geesem-geesem, la ka ne pʋ-peelem ye. La b tẽedame tɩ bõn-kãng na n paasa maam namsg m balgrã pʋgẽ.

¹⁸ Dẽ, ka yell ye, baa sẽn ya bũmb ning fãa, sã n yaa ne yam-wẽng wall yaa ne pʋ-peelem, b baas n moonda Kirist koɛɛgã, la mam maanda sũ-noog bõn-kãng yĩnga. La m na n le maana sũ-noog yɛsa.

¹⁹ Tɩ bõe, yãmb pʋʋsgã la a Zezi Sɩɩgã sõngrã yĩnga, mam miime tɩ bõn-kãng na n wẽneg n waa ne mam yolsgo.

²⁰ Wa sẽn zems mam datem la m tẽeb pidsg gũudmã, bũmb ba a yembr yãnd ka na n yõk maam ye. Moasã ne wakat fãa, mam na n goma ne pɛl-kɛgenga. Woto, Kirist na n paama waoogr mam yĩngã pʋgẽ, sã n ya mam sẽn vɩ wall m sẽn ki.

²¹ Tɩ bõe, ne maam, Kirist yaa mam vɩɩm. La tɩ ki yaa yõod ne maam.

²² La mam sẽn na n kell n vɩ m yĩngã pʋgẽ wã sã n tara yõod ne mam tʋʋmdã, mam ka mi m sẽn yãkd a soab ye. Bũmb a yiib ratem n tar maam.

²³ Mam dat n loog n kẽnga Kirist nengẽ. Rẽnda n ya neer wʋsg ne maam.

²⁴ La yãmb yĩnga, mam sẽn na n kell n vɩɩmd n ya sõama n yɩɩda.

²⁵ Mam sũur keemame. La mam miime tɩ mam na n kell n paa me, la m na n zĩnda yãmb fãa sʋk n sõng-y tɩ y kẽng taoore la y paam sũ-noog tẽeba pʋgẽ.

²⁶ Mam sã n leb n wa yãmb nengẽ, a na n kõo yãmb waoogr yɛs mam yĩnga, a Zezi Kirist tũudmã pʋgẽ.

²⁷ Bũmb sẽn be bala, kɩt-y tɩ yãmb tʋʋmã zems ne Kirist koe-noogã, sẽn na n yɩlẽ tɩ mam sã n wa n na ges yãmba, wall m sã n ka wa, bɩ m wʋm yãmb kibar sẽn yet tɩ y yasa kãenkãe ne yam a yembre, n lagemd taab ne tagsg a yembr n zabd koe-noogã tẽeb yĩnga.

²⁸ La y ka sakd n bas tɩ y bɛɛba kẽes yãmb rabeem ne bũmb baa yembr ye. Bõn-kãng yaa kaset bãmb yĩng tɩ b na n sãamame, la a yaa fãagr yãmb yĩnga. Rẽ yita Wẽnnaam nengẽ.

²⁹ Tɩ bõe, Wẽnnaam sẽn maan bark ning Kirist maasem yĩngã, ka tɩ yãmb tẽ Kiristã bal ye, yaa tɩ yãmb na nams bãmb yʋʋrã yĩng me,

³⁰ n maood maoor ning yãmb sẽn yã tɩ mam maoome wã, la y wʋmd mosã tɩ mam maoodame wã.

2

¹ Dẽ yĩnga, sã n yaa tɩ tũ Kirist wata ne belsgo, sã n yaa tɩ Kirist nonglem yãmb yĩngã paasda yãmb raoodo, sã n yaa tɩ yãmb tara lagem-n-taar ne Sɩɩg-sõngo, la sã n yaa tɩ yãb-taab ne nimbãan-zoeer beeme,

² bɩ y paam nonglem a yembre, la yam a yembre, la datem a yembre, tɩ mam sũurã yɩ noog zãnga.

³ Da maan-y bũmb baa fɩ ne geesem-geesem wall ne wuk-m-meng ye, la bɩ ned kam fãa paam sik-m-meng yam n tags tɩ neb a taaba yɩɩda yẽnda.

⁴ Bɩ yãmb ned kam fãa ra ges a meng sõngr yell bal ye, la bɩ a ges neb a taaba sõngr yell me.

⁵ Paam-y yam ning a Zezi Kirist sẽn da tarã.

⁶ Bãmb sẽn da tar Wẽnnaam yalẽ wã, b ka tags tɩ bãmb sẽn zem ne Wẽnnaamã,

⁷ yaa bũmb b sẽn tog n gãd kãenkãe ye. La a Zezi basa b naam n lebg wa yãmba, n dɩk yĩng wa ninsaalb wẽneg n wa wala ninsaala.

⁸ A Zezi sika b menga, halɩ n sak kũum, n ki da-pɩkã zugu.

⁹ Yaa woto yĩng me n kɩt tɩ Wẽnnaam zẽk bãmb ne waoogr sẽn ya kãsenga, n kõ-b yʋʋr sẽn yɩɩd yʋyã fãa,

¹⁰ tɩ ne a Zezi yʋʋre, rũma fãa sẽn be saasẽ saasẽ, la sẽn be tẽngã zugu, la sẽn be kɩɩm-kulgã na n yĩgimdame,

¹¹ la tɩ zɛlmã fãa na n kɩsa kaset t'a Zezi Kirist yaa fãagda, tɩ yɩ tõnd ba a Wẽnnaam waoogr yĩnga.

¹² Woto, m zo-nongdse, wa yãmb sẽn sak wakat fãa wã, bɩ y tʋm fãagrã tʋʋm ne rabeem la rigbu, la ka mam sẽn da be yãmb sʋkã bal ye, la bɩ y tʋm moasã mam sẽn ka be yãmb sʋkã n yɩɩda.

¹³ Tɩ bõe, yaa Wẽnnaam n maand b tʋʋmd yãmb pʋsẽ, la b kõt yãmb ratmã, la pãng tɩ maan wa sẽn zems bãmb daabã.

¹⁴ Maan-y bũmba fãa tɩ yẽgõng ne no-koɛɛm kaẽ ye.

¹⁵ Tɩ yãmb na yɩ neb sẽn ka tar yelle, la sẽn ya yɩlma. Tɩ yãmb na yɩ Wẽnnaam kamb sẽn ka tar dõdb ye, zamaan kãnga nebã sẽn sãam la sẽn ya wẽnsã sʋka, yãmb yãgda bãmb sʋk wa vẽenem dũniyã pʋga,

¹⁶ n zãad vɩɩm koɛɛgã bãmb yĩnga. Dẽ, Kirist waoongã daare, mam tõe n maana sũ-noogo, mam zoeesã ne m maoorã sẽn ka yɩ zaalmã yĩnga.

¹⁷ La baa b sã n dɩk maam n bas wa b sẽn basd koom maoong zĩigẽ, n paas maam ne maoong ning la kũun nins yãmb sẽn kõt Wẽnnaam y sẽn tẽed bãmbã yĩnga, mam maanda sũ-noog ne bõn-kãnga, la m naagda yãmb fãa n kɩdemdẽ.

¹⁸ Bɩ yãmb me maan sũ-noog a woto n naag maam n kɩdme.

¹⁹ Mam tẽedame tɩ ne Zu-soaba a Zezi sõngre, sã n yɩ bilfu, mam na n tʋma a Tɩmote yãmb nengẽ n bãng yãmb kibare tɩ bõn-kãng tõe n kõ maam daoodo.

²⁰ Bala, mam ka tar ned sẽn tar yam a yembr ne maam n na sɩd ges yãmb yellã neer ye.

²¹ Sɩd me, b fãa geta b mens yɛlã yelle, n ka baood a Zezi Kirist rẽndã ye.

²² Yãmb miime t'a Tɩmote wilga a zemsgo, n zĩnd mam sɛɛgẽ wa biig sẽn be ne a ba, n naag maam koe-noogã tʋʋmd pʋgẽ.

²³ Dẽ, mam tagsdame tɩ mam sã wa bãng m yellã sẽn na n yɩ to-to, m na n tʋm-a-la yãmb nengẽ.

²⁴ La mam tar tẽeb ne Zu-soabã tɩ sã n yɩ bilfu, mam meng na n waa n gesa yãmba.

²⁵ Mam tagsame tɩ yaa neer tɩ m lebg n tʋm a Epafordit sẽn ya mam tʋmd-n-taagã la m soda-taagã t'a wa yãmb nengẽ. Yãmb dag n toola yẽ sõngr t'a wa n kõ maam.

²⁶ Yẽ rag n data ne a sũur fãa n yã yãmb fãa, la a sũurã sãama wʋsgo yãmb sẽn wʋm a pa-keema yĩnga.

²⁷ A Epafordit sɩd lʋɩɩ bãag n da kolg kũum fãa-fãa, la Wẽnnaam zoee yẽ nimbãanega, la ka yẽ bal nimbãaneg ye, la yaa mam me nimbãanega, sẽn na n yɩlẽ tɩ mam da paam sũ-sãoong n paas ye.

²⁸ Rẽ wã, mam tʋmda yẽnda ne yãgb wʋsg yãmb nengẽ, tɩ yãmb sã n yãnd-a bɩ y leb n paam sũ-noogo, tɩ mam menga sũ-sãoongã na booge.

²⁹ Woto yĩnga, bɩ y reeg-a ne sũ-no-kãseng wa y ba-biig Zu-soaba pʋga, la y waoog neb nins sẽn ya a woto wã.

³⁰ Tɩ bõe, yaa Kirist tʋʋmdã yĩng la a sẽn da na n ki wã. Yẽ gẽnega a yõor n sõng maam ne sõngr ning yãmb sẽn da tog n sõng maam n ka tõogã.

3

¹ La koɛɛg sẽn keta m ba-biisi, maan-y sũ-noog Zu-soaba tũudum pʋgẽ. Mam ka yɛɛd tɩ leb n gʋls yãmb bõn-kãens ye. La yaa yãmb sõngr yĩnga.

² Gũus-y y mens ne neb nins sẽn wẽnd wa baasã, la y gũus ne tʋʋm-wẽns maandbã la ne sẽn kẽ-b bãong yĩng wɛɛngẽ wã balã.

³ Bala, tõnd sẽn waoogd Wẽnnaam ne Sɩɩg-sõng pãnga, n maand sũ-noog a Zezi Kirist pʋgẽ, n ka teegd yĩngã tʋʋmã, yaa tõnd la zũins sɩd-sɩda.

⁴ Sã n ya yĩng tʋʋm teegre, mam me ra tõe n teega yĩnga tʋʋma. Neb a taab sã n tẽed tɩ b tõe n teega yĩnga tʋʋma, mam n yɩɩda.

⁵ Mam lebga zũng mam sẽn wa n tar rasem a nii, mam yaa Israyɛl neda, n ya a Bɛnzame buudu la Hebre meng-menga. La sã n ya ne tõog wɛɛngẽ, mam yaa Fariisẽ.

⁶ La wɩngr ne Wẽnnaam tʋʋmdã wɛɛngẽ, mam namsa a Zezi tẽedbã, la ne tɩrlem tõog sakr wɛɛngẽ, ned ka tõe n dõd maam ye.

⁷ La bõn-kãens sẽn da ya yõod ne maamã, mam geelga bãmb wa bũmb sẽn ka tar yõodo, Kiristã yĩnga.

⁸ La mam sẽn bãng m fãagd a Zezi Kirist tɩ rẽ ya sõma wʋsgã, mam pʋs n gesa bõn-kãens fãa wa bũmb sẽn ka yõodo. Kiristã yĩnga, mam sakame n bas fãa, n geelgd bũmb fãa wa sagdo tɩ m tõe n paam Kirist,

⁹ la m zĩnd bãmb pʋgẽ. Ka ne mam meng tɩrlem, mam sẽn sak tõog n paamã ye, la yaa ne tɩrlem ning ned sẽn paamda, a sẽn tẽed Kiristã yĩnga, tɩrlem sẽn yit Wẽnnaam nengẽ, la sẽn paamd ne tẽebo.

¹⁰ Mam sẽn dat fãa yaa tɩ bãng Kiristã ne bãmb kũum vʋʋgrã pãnga la m naag bãmb n paam namsgo, n lebg yembr ne bãmb b kũumã pʋgẽ,

¹¹ tɩ m sã n tõog bɩ m paam vʋʋgr n yi kũum sʋka.

¹² Ka tɩ mam zoe n paama m rolbã nanda, wall m tõog n zemsa zãng nand ye. La mam ket n kẽngda taoore, n maoodẽ tɩ gãd-a, bala a Zezi Kirist zoe n gãda maam.

¹³ M ba-biisi, mam ka tagsd tɩ mam zoe n paama rolbã nand ye, la mam maanda bũmb a yembre: mam yĩmda bũmb nins sẽn be poorẽ wã n nangd pãng n na n paam bũmb nins sẽn be taoorã.

¹⁴ Mam zoet n dabda taoore, n dat n paam Wẽnnaam arzãn boolg rolbã a Zezi Kirist maasem yĩnga.

¹⁵ Dẽ, tõnd fãa sẽn ya tẽedb sẽn bɩ wã, bɩ d paam tags-kãngã bala. La yãmb sã n tara tagsg a to ne bũmb a taaba, Wẽnnaam na n vẽnega yãmb ne bõn-kãng sẽn ya a soab me.

¹⁶ La bũmb sẽn be bala, tõnd sẽn kẽn n ta zĩig ninga wã, d kell n naag taab n kẽne.

¹⁷ M ba-biisi, bɩ yãmb fãa yɩ mam togs-n-taase. Ges-y neb nins sẽn kẽnd wa sẽn zems mamsg ning tõnd sẽn wilg yãmbã.

¹⁸ Mam dag n togsa yãmb naoor wʋsgo, la m leb n yet-a-la yãmb ne nintãm tɩ neb wʋsg n be tɩ b kẽna wilgdẽ tɩ b yaa Kirist da-pɩkã bɛɛba.

¹⁹ Bãmb baoosg na n yɩɩ sãoongo, bãmb pʋsã n ya b wẽnnaam, bãmb maanda sũ-noog ne bũmb ning sẽn ya yãnd b yĩngã. B ka tagsd bũmb tɩ sã n ka dũniyã yɛl bal ye.

²⁰ La tõndo, tõnd yir bee arzãna, la tõnd gũuda tõnd fãagd sẽn ya Zu-soab a Zezi Kiristã tɩ b yi be n wa.

²¹ Bãmb na n teka tõnd yĩn-põaagdgã t'a lebg wa bãmb waoogr yĩngã, ne pãng ning bãmb sẽn tar tɩ sek tɩ tõog bũmb fãa tɩ b sak bãmbã.

4

¹ Woto yĩnga, m ba-bi-nongdse, mam sẽn tʋlg ne m sũur fãa tɩ leb n yã yãmb sẽn ya mam sũ-noog la m maanfã, bɩ y yals a woto kãenkãe Zu-soabã tũudum pʋga m zo-nongdse.

² Mam sagenda a Evodi ne a Sẽntiis tɩ b paam yam a yembr Zu-soabã tũudum pʋgẽ.

³ La foo me, m tʋmd-n-ta-sõngo, mam kota foom tɩ f sõng pʋg-kãense. B ra tʋma ne maam koe-noogã yĩnga, ne a Kelma la ne mam tũud-n-taas a taabã yʋy sẽn be vɩɩm sebrã pʋgẽ wã.

⁴ Maan-y sũ-noog daar fãa Zu-soabã tũudum pʋgẽ. Mam leb n yetame, maan-y sũ-noogo.

⁵ Kɩt-y tɩ neba fãa bãng yãmb sũ-bʋgsem. Zu-soabã waoong kolgame.

⁶ Da maan-y yɩɩr ne bũmb baa fʋɩ ye. La bũmba fãa pʋga, pʋʋs-y Wẽnnaam n kose la y pʋʋs barka la y wilg Wẽnnaam bũmb nins yãmb sẽn datã.

⁷ La Wẽnnaam laafɩ wã sẽn yɩɩd ninsaalbã bãngr fãa wã na n gũu yãmb sũya ne y tagsdã a Zezi Kirist pʋga.

⁸ Koɛɛg sẽn keta, m ba-biisi, bɩ y tags bũmb nins fãa sẽn ya sɩda, la bũmb nins fãa sẽn tar waoogre, la bũmb nins fãa sẽn ya tɩrse, la bũmb nins fãa sẽn be pʋ-peelem, la bũmb nins fãa sẽn zems nonglem, la bũmb nins fãa sẽn tar kaset sõngo, ne bũmb nins sẽn ya neer zãng n zems pẽgrã yelle.

⁹ Maan-y bũmb nins yãmb sẽn zãms la y reege, la y wʋm la y yã mam nengẽ wã. La Wẽnnaam sẽn ya laafɩ soabã na zĩnd ne yãmba.

¹⁰ Mam maana sũ-noog Zu-soabã tũudum pʋgẽ, m sẽn yã tɩ yãmb ya n leb n geta mam yell mosã wã yĩnga. Sɩdã, yãmb da tagsda mam yelle, la y ka paam weer n maan bũmb ye.

¹¹ Ka mam sẽn ka tar bũmbã yĩng la m sẽn gomd a woto wã ye, tɩ bõe mam zãmsame tɩ maan sũ-noog ne bũmb ning mam sẽn tarã bala.

¹² Mam miime tɩ vɩɩmd naong pʋga, la m miime tɩ vɩɩmd arzɛk pʋg me. Bũmba fãa pʋga, la zĩiga fãa mam zãmsame tɩ rɩ n tɩge la tɩ gãand kom me. Mam zãmsame tɩ paam wʋsgo la tɩ konge.

¹³ Kirist sẽn kõt maam b pãngã yĩnga, mam tõe n maana fãa.

¹⁴ La baoosgo, yãmb maana neer y sẽn sõng maam m toogã pʋgẽ wã.

¹⁵ Filip neba, yãmb mens tẽrame tɩ koe-noogã mooneg sɩngrẽ, mam sẽn wa n yit Masedoannã, sã n ka yãmb bala, a Zezi tẽedbã sẽn be zĩig ba a yen ka naag maam m paoong pʋgẽ wall m naong pʋgẽ ye.

¹⁶ Yaa yãmb bal n maan a woto. Tɩ bõe, mam sẽn da be Tesalonikã yãmb da zoe n tʋma sõngr sẽn yɩɩd vugr n kõ maam.

¹⁷ Ka tɩ mam baooda kũun ye, mam sẽn baood bũmb ninga yaa tɩ yãmb wom biis wʋsgo. Rẽnda n na n yɩ yãmb yõodo.

¹⁸ Mam deega fãa la m tara wʋsgo. Mam sẽn deeg bũmb nins yãmb sẽn tʋm a Epafordit t'a kõ maamã, mam tarame tɩ sek n gɩmbe. Kũun-kãens yaa wa kaam sẽn tar yũ-noogo, la maoong Wẽnnaam sẽn deegda la sẽn tat bãmb yam.

¹⁹ Mam Wẽnnaam na kõ yãmb bũmb fãa tɩ sek-yã wa sẽn zems bãmb arzeg-kãsemsã a Zezi Kirist maasem yĩnga.

²⁰ Bɩ tõnd ba a Wẽnnaam paam waoogr daar fãa, wakat sẽn ka sɛt ye. Ãmina.

²¹ Pʋʋs-y Wẽnnaam neba fãa sẽn tũud a Zezi Kiristã. Ba-biis nins sẽn be ne maamã pʋʋsda yãmba

²² Wẽnnaam neba fãa pʋʋsda yãmba, la neb nins sẽn be Sezaar zakẽ wã n toond yãmb b pʋʋsem n yɩɩda.

²³ Bɩ Zu-soab a Zezi Kirist barkã zĩnd ne yãmb fãa.