1

¹ Maam a Poll sẽn ya a Zezi Kirist tẽn-tʋmd wa sẽn zems Wẽnnaam tʋlsmã n tʋmd seb-kãngã Wẽnnaam nebã ne neb nins sẽn be Efɛɛs n tũud a Zezi Kiristã.

² Bɩ tõnd ba a Wẽnnaam ne tõnd Zu-soab a Zezi Kirist kõ yãmb b barkã la b laafɩ wã.

³ Pẽgr Wẽnnaam sẽn ya tõnd Zu-soab a Zezi Kirist ba wã! Bãmb sẽn kõ tõnd Sɩɩg-sõng bark buud fãa sẽn yit yĩngri, Kirist maasem yĩngã.

⁴ Wẽnnaam yãka tõnd Kirist maasem yĩng sẽn deng dũni naanego, tɩ tõnd yɩ neb sẽn ya yell bãmb taoor ye. Wẽnnaam nonglemã pʋga,

⁵ bãmb da pĩnd n yãka yam tɩ tõnd na n yɩɩ bãmb kamba, a Zezi maasem yĩnga, a wa sẽn zems bãmb daabo, la sẽn noom bãmba.

⁶ Bõn-kãng yaa tɩ tõnd na zẽk bãmb barkã ziir b sẽn kõ tõnd bãmb Bi-riblã maasem yĩngã.

⁷ Yaa Kirist zɩɩmã maasem yĩng la tõnd paam fãagre, fãagr ning sẽn ya yel-wẽnã sugr kũuni, sẽn zems Wẽnnaam barkã sẽn waoog wʋsgã,

⁸ bark ning Wẽnnaam sẽn kõ tõnd hal wʋsgo, n paas yam fãa ne bãngrã.

⁹ Wẽnnaam kɩtame tɩ tõnd bãng bãmb datmã yel-solemde, a wa sẽn zems yam-yãkr ning b sẽn da pĩnd n yãk Kirist pʋgẽ wã.

¹⁰ Wakatã sã n pidi, Wẽnnaam na n pidsa b yam-yãk kãense. Bãmb na n tigsa bũmb nins fãa sẽn be yĩngri la sẽn be tẽng zugã tɩ b sak naab a yembre: Kiristã.

¹¹ Kirist maasem yĩnga, Wẽnnaam yãka tõnd n bĩng toore. Bãmb sẽn maand bũmb fãa wa b yamã sẽn yãke la wa b sẽn datã, bãmb pĩnd n tʋlsa tõndo,

¹² tɩ tõnd sẽn da pĩnd n tẽed Kiristã, tõnd na tʋm n kɩt tɩ nebã bãng bãmb ziirã.

¹³ Kirist maasem yĩnga, yãmb me sẽn wʋm sɩd koɛɛgã, yãmb fãagrã koe-noogã, yãmb tẽe bãmba, la b ning-y la bãnd sẽn ya Sɩɩg-sõng b sẽn dag n kãabã.

¹⁴ Sɩɩg-sõng yaa kaset sẽn wilgd tɩ tõnd na n paama d pʋɩɩrã, sẽn ya tɩ Wẽnnaam sẽn da neb ninsã na n dɩɩ naam tɩ yɩ Wẽnnaam ziiri.

¹⁵ Yaa woto yĩnga, mam me sẽn wʋm tɩ b gomd yãmb tẽeb ne Zu-soab a Zezi wã yelle, la nonglem ning yãmb sẽn tar Wẽnnaam neba fãa yĩngã yelle,

¹⁶ mam pʋʋsda Wẽnnaam bark yãmb yĩng n ka basdẽ ye. Mam tẽegda yãmb yell m pʋʋsg pʋgẽ.

¹⁷ Mam pʋʋsdame n kot tõnd Zu-soab a Zezi Kirist Wẽnnaamã sẽn ya Ba sẽn tar ziirã tɩ b na kõ yãmb yam la vẽnegr sɩɩga, n kɩt tɩ y bãng bãmba.

¹⁸ Mam pʋʋsdame tɩ Wẽnnaam na puk yãmb pʋ-tẽer ninã tɩ y bãng bõn-neer ning b sẽn bool yãmb tɩ paamã, la y bãng bãmb pʋɩɩr ning sẽn ya arzegs sẽn be ziirã, Wẽnnaam nin-tũusdsã sẽn tarã.

¹⁹ Mam pʋʋsdame tɩ yãmb na bãng bãmb pãng kãsengã sẽn zem to-to, la a sẽn tʋmd tõnd sẽn ya tẽedbã pʋsẽ, wa sẽn zems bãmb naamã pãng sẽn tʋmdã.

²⁰ Wẽnnaam wilga b pãn-kãsengã Kirist pʋgẽ, n vʋʋg-b tɩ b yi kũum sʋka, n kɩt tɩ b zĩ bãmb dɩtg Arzãn pʋga.

²¹ Wẽnnaam kɩtame tɩ Kirist yɩɩd rĩm-dãmba fãa la noyã fãa la pãensã fãa la naam fãa, la b yʋʋrã yɩɩda yʋyã fãa sẽn pʋtã, la ka dũnna zamaanã pʋg bal ye, la yaa ne zamaan ning sẽn watã me pʋgẽ.

²² Wẽnnaam kɩtame tɩ Kiristã so bũmb fãa, la b kɩt tɩ bãmb yɩ b tẽedbã fãa Zu-soab ne bũmb fãa.

²³ Kirist tẽedbã yaa Kiristã yĩnga. Kirist yalẽ wã fãa bee b nebã pʋgẽ, la b pida bũmb fãa ned fãa pʋgẽ.

2

¹ Yãmba, yãmb dag n yaa kũum y beegrã ne y yel-wẽnã yĩnga.

² Pĩnda, yãmb dag n kẽnda yel-wẽn kãens pʋgẽ wa sẽn zems dũni-kãngã sẽn kẽnd to-to wã, n sakd yĩngr pãng naabã, sɩɩg ning sẽn tʋmd wẽn-kɩɩsdbã pʋgẽ mosã wã.

³ Tõnd fãa me rag n bee bãmb sʋka, la tõnd dag n vɩɩ wa sẽn zems tõnd yĩngã datem wẽnsã. Tõnd dag n tʋmda wa tõnd yĩngã sẽn date, la sẽn zems tõnd tagsdo, la tõnd dag n yaa neb sẽn na n paam Wẽnnaam sɩbgr wa neb a taabã.

⁴ La Wẽnnaam sẽn tar nimbãan-zoeer wʋsgã, la bãmb sẽn nong tõnd ne nonglem kãsengã yĩnga,

⁵ baa tõnd sẽn dag n ya kũum d beegrã yĩngã, Wẽnnaam kõo tõnd vɩɩm Kirist pʋgẽ. Yaa Wẽnnaam barkã yĩng la yãmb paam fãagre.

⁶ Wẽnnaam naaga tõnd ne Kiristã n vʋʋge, n kɩt tɩ tõnd naag ne bãmb n zĩnd arzãn pʋga, Kirist maasem yĩnga,

⁷ tɩ wakat sẽn wate, bɩ bãmb tõe n wilg tõnd bãmb bark kãsengã, b sẽn kõ tõnd sõmblem Kirist maasem yĩngã.

⁸ Sɩd me, yaa Wẽnnaam barkã yĩng la yãmb paam fãagr tẽeb yĩnga. Yãmb sẽn paam fãagrã, ka ne y mens pãng ye, yaa Wẽnnaam kũuni.

⁹ Ka ne tʋʋm ye, tɩ ned baa a yen da wa pẽg a meng ye.

¹⁰ Bala, tõnd yaa Wẽnnaam bõn-naandse. B naana tõnd Kiristã maasem yĩnga, tɩ tõnd na maan tʋʋm sõama nins bãmb sẽn dag n pĩnd n segl tɩ tõnd wa maanã.

¹¹ Dẽ wã, tẽeg-y tɩ wakat sẽn looge, yãmb dag n yaa bu-zẽms yĩng wɛɛngẽ, tɩ neb nins sẽn yet tɩ b yaa zũnsi, tɩ yaool n ya bãong ninsaal nus sẽn kẽesã rãmb n dag n boond yãmb a bu-zẽmsã tɩ moose.

¹² Wakat kãng tɩ yãmb dag n zãra ne Kiristã, la yãmb da ka tar noor tɩ lagem ne Israyɛl nebã ye. Sẽn paase, yãmb dag n zãra ne lagem-n-taar ning Wẽnnaam sẽn dag n kãabã, la y dag n ka tar tẽeb pidsg gũudum ye. Y dag n vɩɩ dũni pʋgẽ n ka tar Wẽnnaam ye.

¹³ La moasã, Kirist pʋgẽ, yãmb sẽn dag n zãr wakat sẽn loogã, Kirist zɩɩmã maasem yĩnga, yãmb pẽnegame.

¹⁴ Bala, yaa Kirist n ya tõnd laafɩ. Bãmb n kɩt tɩ sẽn ya-a Zuif la sẽn ka-a Zuif lebg buud a yembre, n wã welgr lalgã sẽn ya beemã sẽn dag n be sʋkã.

¹⁵ Kirist yiisa a Moyiis tõodã ne a noyã la a minindã, n na n kɩt tɩ buud a yiibã naag taab bãmb pʋgẽ n yɩ bu-paalg a yembre, n kɩt tɩ laafɩ zĩndi,

¹⁶ la b yiis yell ning sẽn dag n be buud a yiibã ne Wẽnnaam sʋkã, n kɩt tɩ b lebg yĩng a yembre, la b kɩt tɩ beemã sa, da-pɩkã maasem yĩnga.

¹⁷ Kirist waa n moona yãmb dãmb sẽn da zãrã laafɩ koe-noogã, la b moona neb nins sẽn da pẽ wã me.

¹⁸ Bala, Kirist maasem yĩnga, tõnd ned kam fãa tara noor tɩ wa d ba wã nengẽ, Sɩɩg-sõng a yembr pʋgẽ.

¹⁹ Dẽ wã yĩnga, yãmb ka leb n ya sãamba, wall nin-loogds ye. Yãmb yaa buud a ye ne Wẽnnaam nebã, n ya Wẽnnaam zakã neba.

²⁰ B mee yãmb yẽbgr ning tẽn-tʋmdbã ne Wẽnnaam no-rɛɛsdbã sẽn yẽbgã zugu, la yaa Kirist mengã n ya roogã pãng kugri.

²¹ Kirist maasem yĩnga, roogã gill fãa naagda taab n yikdẽ, n lebgd ro-sõng Zu-soabã pʋgẽ.

²² Yãmb sẽn be Kirist pʋgẽ wã, yãmb me naaga meebã pʋgẽ n lebg Wẽnnaam Sɩɩgã roogo.

3

¹ Yaa woto yĩng n kɩt tɩ maam a Poll yaa Kirist bi-bɛɛg yãmb sẽn ya bu-zẽmsa yĩnga,....

² M tẽed tɩ yãmb wʋmame tɩ b gomd Wẽnnaam bark koɛɛgã b sẽn kõ maam tɩ m togs yãmbã yelle.

³ Yɩɩ ne vẽnegr la Wẽnnaam wilg maam yel-solemd ning mam sẽn gʋls a goamã bilf n wilg yãmbã.

⁴ Yãmb sã n karem-ba, y na n bãnga yam vẽnegr ning mam sẽn paam Kirist yel-solemdã pʋgẽ wã võore.

⁵ Wakat sẽn looge, Wẽnnaam rag n ka kɩt tɩ ninsaalbã kamb bãng yel-solem-kãng wa b sẽn vẽneg-a mosã ne b tẽn-tʋmdb sõamyã la ne b no-rɛɛsdbã, ne Sɩɩg-sõng pãngã ye.

⁶ Yel-solem-kãng yaa tɩ bu-zẽmsã naagda Zuif-rãmbã n paamd pʋɩɩr a yembre, la b lebg yĩng a ye ne bãmba, la pʋɩt-n-taas ne kãab-noog ning sẽn be a Zezi Kirist pʋgẽ, koe-noogã maasem yĩngã.

⁷ Mam lebga koe-no-kãng tẽn-tʋmda, wa sẽn zems Wẽnnaam barkã kũunã b sẽn kõ maam, tɩ bãmb pãngã maand tʋʋmdã yĩnga.

⁸ Mam sẽn ya Wẽnnaam neba fãa yao-zʋʋgã, Wẽnnaam kõo maam bakr kãnga, tɩ m moon koe-noog ning sẽn wilgd Kirist arzegs sẽn ka sɛtã bu-zẽmsã sʋka,

⁹ la m vẽneg yel-solemd ning sẽn dag n solg Wẽnnaam sẽn ya bũmb fãa naandã nengẽ, wakat sẽn kaoosã n wilg nebã.

¹⁰ Dẽ, sẽn sɩng ne moasã, a Zezi tẽedbã maasem yĩng na n kɩtame tɩ nanamsã ne yĩngr pãens rãmbã bãng Wẽnnaam yamã, bũmb wʋsg pʋgẽ.

¹¹ Bõn-kãng zemsa ne Wẽnnaam yam-yãkr sẽn kõn sa, b sẽn pids-a tõnd Zu-soab a Zezi Kirist maasem yĩngã.

¹² Tõnd sẽn be Kirist pʋgẽ la d tẽed bãmbã yĩnga, tõnd tara lohorem tɩ kolg Wẽnnaam ne pɛl-kɛgenga.

¹³ Sẽn paase, mam kota yãmb tɩ y ra bas tɩ mam sẽn nams yãmb yĩngã boog yãmb raood ye. Mam namsgã yaa yãmb waoore.

¹⁴ Yaa woto yĩng tɩ mam yĩgimdid d ba wã taoore,

¹⁵ soab ning buud fãa sẽn be yĩngr la sẽn be tẽng zug sẽn paamd b yʋy b nengẽ wã taoore,

¹⁶ tɩ b na kõ yãmb wa sẽn zems b naamã arzɛka, n kɩt tɩ ne bãmb Sɩɩg-sõng pãnga, bɩ yãmb paam pãng y sũyã pʋse,

¹⁷ tɩ ne tẽebo, Kirist na zĩnd yãmb sũyã pʋse, la m kotẽ tɩ yãmb na kɩ yẽg n yals kãenkãe nonglem pʋgẽ,

¹⁸ tɩ yãmb tõe n naag ne Wẽnnaam nebã fãa n tõog n bãng nonglemã yalem la a woglem la a zulum ne a zãntlem sẽn ya to-to,

¹⁹ la tɩ y bãng Kirist nonglemã sẽn yɩɩd ninsaalb bãngre, sẽn na n yɩlẽ tɩ yãmb na pid ne bũmb fãa, hal n pid ne Wẽnnaam yalẽ wã.

²⁰ Bɩ soab ning sẽn tõe n tall-a pãng ning sẽn be tõnd pʋgẽ n tʋmdẽ wã n maan hal wʋsg yɩɩg tõnd sẽn kot fãa, wall d sẽn tagsd fãa wã

²¹ paam ziir a Zezi tẽedbã sʋka, a Zezi Kirist pʋgẽ, zamaan o zamaana, wakat sẽn kõn sa, ãmina.

4

¹ Woto yĩnga, mam sẽn be bi-bees roogẽ Zu-soabã tũudum yĩngã, mam sagenda yãmb tɩ y kẽn wa sẽn zems boolg ning Wẽnnaam sẽn bool yãmbã.

² Kẽn-y ne sik-m-meng la sũ-bʋgsʋm la sũ-mare, la y sak n deeg taab ne nonglem,

³ n mao tɩ Sɩɩg-sõng lagem-n-taar zĩndi, laafɩ ning sẽn loe-a yãmb ne taabã yĩnga.

⁴ Yĩng a yembr bal n be, la Sɩɩg-sõng a yembr bal n be, wa b sẽn bool yãmb tɩ y paam tẽeb pidsg gũudum a yembr y boolgã yĩngã.

⁵ Zu-soab a yembr bala n be, la tẽeb a yembr bala, la lisg a yembr bala.

⁶ Wẽnnaam a yembr bal n be n ya neba fãa ba, n so bũmb fãa, la b be b fãa sʋka, la b fãa pʋse.

⁷ La b kõo tõnd ned kam fãa barkã, wa sẽn zems Kirist kũun makdgã.

⁸ Yaa woto yĩng tɩ gʋls-sõamyã yetẽ yaa: Bãmb sẽn dʋ yĩngrã, b zãa yemse, la bãmb kõo ninsaalb kũuni.

⁹ La gomd ning sẽn yet tɩ bãmb dʋʋme wã võor yaa bõe, sã n ka tɩ bãmb reng n siga tẽngã tẽngr me?

¹⁰ Soab ning sẽn dag n sig-a wã, yaa soab kãng bal n zẽk yĩngr hal n loog saasẽ, tɩ bãmb tõe n pid bũmb fãa.

¹¹ Yaa bãmb n kɩt tɩ neb kẽer yɩ tẽn-tʋmdba, tɩ kẽer yɩ bãmb no-rɛɛsdba, tɩ kẽer yɩ koe-noogã moaandba, tɩ kẽer yɩ pe-kɩɩmba la karen-saam-dãmba,

¹² b nebã bɩɩsg yĩnga. Wẽnnaam maana a woto bãmb tʋʋmdã na tõog n maan yĩnga, la Kirist yĩngã bɩɩsg yĩnga,

¹³ hal tɩ tõnd fãa na lagem taab n paam tẽeb a yembre, la d bãng Wẽnnaam Bi-riblã, n yɩ neb sẽn bɩ, n lebg wa a Zezi sẽn ya bũmb ningã, n zems zãngã.

¹⁴ Woto, tõnd kõn leb n yɩ wa kamb sẽn lengde, tɩ zãmsg buud fãa rɩkd-b n loogdẽ, tɩ ninsaalbã zãmbã ne b belgr tʋʋmã tar tõnd n leebdẽ ye.

¹⁵ La yaa tɩ tõnd sẽn togsd sɩd ne nonglemã yĩnga, tõnd na n bɩɩ bɩʋʋngã ne bũmb fãa, Kirist sẽn ya tõnd naabã pʋgẽ.

¹⁶ Yaa bãmb yĩng la yĩngã wil gill fãa sẽn sog taab sõama, sũgdsã sẽn zãad yĩngã sõama wã yĩngã, yĩngã will fãa bɩtame n zems a sẽn tog n bɩ to-to, la a bɩɩsd a meng ne nonglem.

¹⁷ Woto yĩnga, ad bũmb ning mam sẽn yet yãmba, la m sẽn kɩt a kaset Zu-soabã pʋgẽ: Yaa tɩ yãmb ka tog n leb n kẽn wa neb nins sẽn ka pʋʋsd Wẽnnaamã ye. Bãmb kẽnda wa sẽn zems b tagsg sẽn ka yõodã.

¹⁸ Zɩɩlmã sẽn be nin-kãens pʋgẽ la b sũyã sẽn riglmã yĩnga, b yamã ka liki, la b ka vɩ wa Wẽnnaam sẽn datã ye.

¹⁹ Yel-wẽnã maaneg yãnd ka le tar-b baa bilfu. B basame tɩ raglem soog-ba, tɩ b maand tʋʋm dẽgd buud fãa la rat-wʋsgo.

²⁰ La yãmba, ka yɛl a woto maaneg pʋgẽ la yãmb zãms tɩ bãng Kiristã ye, 21-22 sã n yaa tɩ yãmb wʋma bãmb yelle, la y paam zãmsg bãmb pʋgẽ, n zems ne sɩd ning sẽn be a Zezi pʋgẽ wã. Sɩdã võor yaa tɩ yãmb bas y tʋʋm kʋdã sẽn ya nin-kʋdgã rẽndã, nin-kʋdg ning sẽn dẽgemd a meng nana, ratem wẽngã sẽn tudgid nedã yĩnga,

²³ la tɩ Sɩɩgã tek yãmb yamã,

²⁴ la y yeelg nin-paalgã wa fuugu, nin-paalg ning Wẽnnaam sẽn naan wa b sẽn data, tɩrlem la sõmblem sɩd sẽn wat-ne wã pʋgẽ.

²⁵ Woto yĩnga, bas-y zĩrĩ yagbo, la bɩ yãmb ned kam fãa togs a to sɩda. Bala, tõnd yaa yĩng a yembr wil ne taaba.

²⁶ Yãmb sũur sã n yiki, da sak-y tɩ wĩndg tɩ kẽ tɩ y sũurã nan ka sig ye.

²⁷ Da kõ-y-yã a Sʋtãan weer ye.

²⁸ Bɩ ned ning sẽn dag n zuud da leb n zu ye. A mao n tʋm pʋ-peelem tʋʋmd ne a nusi, t'a tõe n paam bũmb sẽn na kõ ned ning sẽn tog ne sõngrã.

²⁹ Da sak-y tɩ gom yook ba a yembr yi yãmb noorẽ ye. Gomd sã n na n wa yi, bɩ yɩ gom-sõng sẽn na sõng ned t'a bɩ la a wa ne bark neb nins sẽn wʋmdã zutu.

³⁰ Da maan-y tɩ Wẽnnaam Sɩɩg-sõngo, Sɩɩg ning b sẽn tall n ning yãmb bãnd fãagr daarã yĩngã sũur sãam ye.

³¹ Yiis-y sũ-toogo la kisgri, la tẽn-kãnem, la pʋ-toog buud fãa y sʋka.

³² Maan-y taab neere, n kʋmd taaba, la y kõ taab sugri, a wa Wẽnnaam sẽn kõ yãmb sugr Kirist maasem yĩngã.

5

¹ Dẽ wã yĩnga, yɩ-y Wẽnnaam togs-n-taase, wa kom-nongdse,

² la y kẽn nonglem pʋga, wa Kirist me sẽn nong tõndo, n kõ b meng tõnd yĩng tɩ yɩ kũun la maoong sẽn ya wa kaam sẽn tar yũ-noog n tat Wẽnnaam yam.

³ Dẽ wã, a wa nin-sõamy sẽn tog n yɩ to-to wã, da saag-y tɩ b pʋd yoobo, la rẽgd buud baa a yembre, la rat-wʋsg yell yãmb sʋk ye.

⁴ Da gom-y gom dẽgdo, wall yalem goama, wall kʋʋsem goam tɩ bõn-kãens ka zems ye. Pʋʋs-y Wẽnnaam barka.

⁵ Bala, bãng-y neer tɩ nin-yoaad baa a yen, rẽgd soab baa a yen, rat-wʋsg soab baa a yen, sẽn dat n togs tɩ wẽn-naands pʋʋsd ka na n paam pʋɩɩr Kirist ne Wẽnnaam soolmẽ wã ye.

⁶ Da sak-y tɩ ned belg yãmb ne gom-vɩɩd ye. Bala, yaa bõn-kãens yĩng la Wẽnnaam sũ-puugr sigd kɩɩsdbã zutã.

⁷ Dẽ wã, da paam-y lagem-n-taar ne bãmb ye.

⁸ Sɩd me, pĩnda, yãmb dag n bee likẽ. La moasã, yãmb sẽn tũud Zu-soabã yĩnga, y bee vẽenemẽ. Rẽ wã, kẽn-y wa vẽenemẽ kamba.

⁹ Bala, vẽenem biis yaa sõmblem buud fãa, la tɩrlem la sɩda.

¹⁰ Mak-y n bãng-y bũmb nins sẽn tat Zu-soabã yam,

¹¹ la y ra tol n paam lagem-n-taar ne likã tʋʋm sẽn ka yõodã ye. Wilg-y tɩ b ka sõama ye.

¹² Sɩd me, pʋs n yaa yãnd tɩ pʋd bũmb nins nin-bãmbã sẽn maandã.

¹³ La d sã n wilg tɩ b ka sõama, lebgda vẽenega. Bala, bũmb ning fãa sẽn puk yaa vẽenega.

¹⁴ Yaa woto yĩng n kɩt tɩ b yeel yaa: Foo! Sẽn gõe-a wã, neke! Yik n yi kũumã sʋka, la Kirist na kõ foom vẽenem sẽn kõt vɩɩm.

¹⁵ Dẽ wã, gũus-y neer ne yãmb kẽnde, n da kẽn wa yalemb ye. Kẽn-y wa yam dãmba.

¹⁶ Da bas-y tɩ weerã sãamd zaalem ye. Bala, mosã yaa wẽng wakate.

¹⁷ Woto wã yĩnga, da yɩ-y ka-yam dãmb ye, bãng-y bũmb nins Zu-soabã sẽn data.

¹⁸ Da tɩg-y ne rãam ye, yõwã sãamda neda. Pid-y ne Wẽnnaam Sɩɩgã.

¹⁹ Sõs-y ne taab ne yɩɩn-sõamyã, la ne Wẽnnaam yɩɩla, la ne Sɩɩg-sõng yɩɩla. Yɩɩl-y n pẽg-y Zu-soabã ne y sũyã fãa.

²⁰ Pʋʋs-y tõnd ba a Wẽnnaam bark bũmb fãa yĩnga, ne tõnd Zu-soab a Zezi Kirist yʋʋre.

²¹ Sak-y taaba, yãmb sẽn zoet Kiristã yĩnga.

²² Pagba, bɩ yãmb ned kam fãa sak a sɩda, a wa yãmb sẽn sakd Zu-soabã.

²³ Bala, rao yaa a pag zu-soaba, a wa Kirist sẽn ya bãmb tẽedbã Zu-soabã. Tẽedbã yaa Kirist yĩnga, tɩ Kirist ya tẽedbã fãagda.

²⁴ Bɩ pag fãa me sak a sɩd ne bũmb fãa, a wa tẽedbã sẽn sakd Kirist to-to wã.

²⁵ Raopã, bɩ yãmb ned kam fãa nong a paga, a wa Kirist sẽn nong b tẽedbã, n kõ b meng b yĩnga,

²⁶ n na n tõog n pek-b ne koom la ne bãmb goamã, n yɩlg-ba,

²⁷ n kɩt tɩ bãmb tẽedbã sẽn tar ziirã yals bãmb taoor tɩ rẽgdo, wall yõbdo, wall bũmb sẽn wẽnd a woto ra zĩnd ye, la tɩ b na yɩ pʋ-peelem dãmb sẽn ka tar yell ye.

²⁸ Woto me, raopã tog n nonga b pagbã wa b sẽn nong b mens yĩngã. Ned ning sẽn nong a pag nonga a menga.

²⁹ Sɩd me, ned baa a yen zɩ n kisg a meng ye. A rɩlgd-a a menga, n get a meng yell wa Kirist sẽn get b tẽedbã yelle,

³⁰ tõnd sẽn ya bãmb yĩngã wilã yĩngã.

³¹ Yaa rẽ yĩng la rao tog n yi n bas a ba ne a ma n zĩnd ne a paga, la b yiibã na n lebga yĩng a yembre.

³² Yel-solemd kõngã yaa kãsenga. Mam sẽn yet a woto wã, yaa sẽn kẽed ne Kirist la b tẽedbã wɛɛngẽ.

³³ Sẽn keta, bɩ yãmb ned kam fãa nong a pag wa a menga, la bɩ pag fãa waoog a sɩda.

6

¹ Kamba, sak-y y ba-rãmb la y ma-rãmb wa Zu-soabã sẽn datã. Bala, bõn-kãng yaa tɩrga.

² Ad pipi tõog sẽn naag ne kãabgo. A yetame yaa: Waoog f ba la f ma,

³ tɩ f tõe n paam sũ-noogo, la f vɩɩmd n kaoos dũni zugu.

⁴ La yãmb sẽn ya ba-rãmbã, ra maan-y bũmb sẽn yikd y kambã sũy ye. Wub-y-ba, n sagl-ba, la y keoog-b wa sẽn zems Zu-soabã raabo.

⁵ Tʋmtʋmdba, sak-y sẽn so-b yãmb dũni ka wã ne y sũur fãa, ne rabeem la rigbu, wa yãmb sẽn sakd Kiristã,

⁶ la y ra maan bõn-kãng b nifẽ bala, tɩ ra wa ya wa yãmb maanda sẽn noom ninsaalbã ye. Sak-y bãmba yãmb sẽn ya Kirist tʋmtʋmdb sẽn maand Wẽnnaam daabo ne y sũyã fãa wã yĩnga.

⁷ Tʋm-y b yĩng ne yamleoogo, wa y tʋmda Zu-soabã yĩnga, la ka wa ninsaal yĩng ye,

⁸ tɩ yãmb miime tɩ ned kam fãa na n deega a keoor Zu-soabã nengẽ, a wa sẽn zems tʋʋm-sõng ning a sẽn maanã, t'a ya yamb wall burkĩna.

⁹ La sã n yaa ne yãmb sẽn ya zusob-n-dãmbã, yãmb me tog n maana a woto ne y tʋmtʋmdbã. Da maan-y gãgs ne-b ye, tɩ yãmb miime tɩ bãmb ne yãmb me Zu-soabã bee arzãna, la tɩ Zu-soabã nifẽ, ned ka yɩɩd a to ye.

¹⁰ Sẽn keta, mam yeta yãmb tɩ y paam raood Zu-soabã tũudum pʋgẽ, bãmb pãn-kãsengã maasem yĩnga.

¹¹ Bob-y zab-teed nins fãa Wẽnnaam sẽn kõ yãmbã, tɩ y tõe n yals kãenkãe n zab ne a Sʋtãana, a sɩlemã pʋgẽ.

¹² Bala, tõnd zabr ka ne ninsaal sẽn ya nemd la zɩɩmã ye, la yaa ne lik rĩm-dãmba la a pãens sẽn so naam tẽng zug ka wã, la wẽng maaneg sɩɩsã sẽn be yĩngrã.

¹³ Yaa woto yĩng n kɩt tɩ mam yet yãmb tɩ y bob Wẽnnaam zab-teedã fãa, tɩ y tõe n yals n zab wẽngã wakate, la tɩ y sã n zab n tõog bũmb fãa, yãmb na yals kãenkãe.

¹⁴ Dẽ wã yĩnga, bɩ y yals kãenkãe. Rɩk-y sɩdã tɩ yɩ y sẽbdga, la y bob tɩrlem tɩ yɩ yãmb gãntika,

¹⁵ la y wid laafɩ koe-noogã togsg ratem tɩ yɩ yãmb neooda,

¹⁶ la y tall tẽeb tɩ yɩ y gãongo, tɩ y tar n kogsd wẽng soabã pɛɛmã fãa sẽn ya wa bugmã,

¹⁷ la y fõgen fãagrã me tɩ yɩ kut pugla, la y zã Sɩɩgã sʋʋg sẽn ya Wẽnnaam goamã.

¹⁸ Pʋʋs-y wakat fãa ne Sɩɩg-sõng pãnga, n pʋʋs ne kosgo n da bas ye. Nang-y pãng n maand a woto wakat fãa. Pʋʋs-y Wẽnnaam b neba fãa yĩnga,

¹⁹ la mam me yĩnga. Pʋʋs-y Wẽnnaam tɩ wakat ning fãa mam sẽn na n yaag m noor n na n gome, bɩ b kõ maam gomd sẽn na kɩt tɩ nebã bãng koe-noogã yel-solemdã võore, la tɩ m na gom ne raoodo.

²⁰ Mam yaa koe-noogã toagsda, tɩ b balg maam a poorẽ. Pʋʋs-y tɩ m tõog n gom a yell ne raood wa m sẽn tog n gomã.

²¹ Tõnd ba-bi-nongr a Tisik sẽn ya Zu-soabã tʋmtʋmd sẽn maand sɩdã na n wilga yãmb bũmb fãa, sẽn na n yɩl tɩ yãmb me bãng mam yelle, la bũmb nins mam sẽn maanda.

²² Mam yiis-a lame n tʋm yãmb nengẽ, tɩ y bãng tõnd kibare, la t'a na bels yãmb sũyã.

²³ Bɩ tõnd Ba a Wẽnnaam la d Zu-soab a Zezi Kirist kõ d ba-biisã zĩnd-n-taar laafɩ la nonglem, b sẽn tar tẽebã yĩnga.

²⁴ Bɩ neb nins fãa sẽn nong tõnd Zu-soab a Zezi Kirist ne nonglem sẽn ka tekdã paam barka.