1

¹ Maam a Polle, mam yaa tẽn-tʋmda, la ka tẽn-tʋmda ninsaalb wall ned sẽn yãk ye. Yaa a Zezi Kirist la ba a Wẽnnaam, soab ning sẽn vʋʋg a Zezi tɩ b yi kũum sʋkã n yãk maam.

² Maam ne ba-biis nins fãa sẽn be ne maamã n gʋlsd wẽnd-dotã sẽn be Galasi wã.

³ Bɩ tõnd ba a Wẽnnaam ne tõnd Zu-soab a Zezi Kirist bark yãmba, la b kõ-y bãane.

⁴ Kirist yaa soab ning sẽn kõ b vɩɩm tõnd yel-wẽnã yiisg yĩnga, tɩ b tõe n fãag tõnd n yiis-d dũni kõngã wẽngã pʋgẽ, wa sẽn zems tõnd ba a Wẽnnaam daabã.

⁵ Bɩ bãmb paam ziir wakat fãa, ãmina!

⁶ Yãmb sẽn wẽnemd tao-tao n bas soab ning sẽn bool-a yãmb Kirist maasem yĩng n na n tũ koe-noog a to wã linga maam.

⁷ Ka tɩ koe-noog a to n be ye, la neb n rãmbd yãmb n dat n teem Kirist koe-noogã.

⁸ La tõnd mensã, wall arzãn malɛk sã n togs yãmb koe-noog sẽn ya toor ne koe-noog ning tõnd sẽn moon yãmbã, bɩ kãab-wẽng zĩnd a zugu.

⁹ Tõnd yeela yãmb pĩnda, la mam leb n yetame: Ned sã n togs yãmb koe-noog sẽn ya toor ne koe-noog ning yãmb sẽn deegã, bɩ kãab-wẽng zĩnd a zugu.

¹⁰ Dẽ wã, mam dat n taa nebã yam bii, bɩ Wẽnnaam yam? Dẽ yĩnga, mam baoodame tɩ maan sẽn noom nebã laa? Mam sã n da ket n maandẽ sẽn noom nebã, mam da kõn ya Kirist tʋmtʋmd ye.

¹¹ M ba-biisi, mam yeta yãmb tɩ koe-noog ning mam sẽn moonã ka yit ninsaal nengẽ ye.

¹² Bala, mam mengã ka reeg-a, wall m wʋm-a ned nengẽ ye, la yaa ne a Zezi Kirist vẽnegre.

¹³ Sɩd me, yãmb wʋma mam yel-manesem sẽn yɩ to-to pĩnda, Zuif-rãmbã kaoreng pʋgẽ. Wakat kãnga, mam dag n namsda Wẽnnaam nin-tũusidsã, la m sãamd b roogã.

¹⁴ Zuif rãmbã kaoreng pʋgẽ, mam dag n yɩɩda m rog-taasã wʋsg m buudã pʋga. Bala, mam dag n wɩngda ne m ba-rãmbã minindã sakr hal tɩ looge.

¹⁵ La sẽn dag n welg-a maam toor tɩ m nan ket n be m ma pʋgẽ, la b maan nimbãan-zoeer n bool maamã

¹⁶ sẽn wa n mik tɩ zemsame tɩ b puk b Bi-riblã ne maam, tɩ mam na moon b yellã bu-zẽmsã sʋkã, mam ka yals n sok ninsaal ye,

¹⁷ la mam ka kẽng Zeruzalɛm n babs neb nins sẽn deng-b maam n ya tẽn-tʋmdbã ye. Mam kẽnga Arabi, la mam lebg n waa Damas.

¹⁸ Yʋʋm a tãab rẽ zugẽ, mam kẽnga Zeruzalɛm n na n tɩ bao n bãng a Sefas, la mam zĩnda ne-a dasem piig la a nu.

¹⁹ La mam ka yãnd tẽn-tʋmd a to baa a yen, sã n ka Zu-soabã ma-biig a Zak bala.

²⁰ Mam sẽn gʋlsd yãmb yõwã wã, mam yeta yãmb Wẽnnaam taoor tɩ m ka yagd ye.

²¹ Dẽ poore, mam kẽnga Siiri ne Silisi soolmẽ.

²² La Wẽnd-dot nins sẽn be a Kirist pʋgẽ Zude wã dag n ka mi maam ye.

²³ B dag n wʋmame bal tɩ b yetẽ tɩ "ned ning sẽn dag n namsd tõndã moonda tẽeb ning a sẽn dag n dat n sãamã koɛɛg mosã."

²⁴ La Wẽnd-do-kãens nebã dag n kõta Wẽnnaam waoogr mam wɛɛngẽ.

2

¹ Rẽ poore, yʋʋm piig la a naas zugẽ, mam leb n kẽnga Zeruzalɛm la mam peega a Tit me.

² Yaa vẽnegr mam sẽn paam yĩng la mam kẽng be. Mam wilg-b la koe-noogã mam sẽn moond bu-zẽmsã. Yaa taoor dãmbã la m gom-ne, ka yɩ nebã fãa taoor ye. Bala, mam dag n zoeta tʋʋmdã m sẽn maan la m ket n maandẽ wã na n wa yɩ zaalem.

³ La pʋs n ka yɩ tɩlɛ t'a Tit sẽn ya Gɛrk n be ne maamã kẽ bãong ye.

⁴ Baoosgo, baa ne neb nins sẽn belg tɩ b yaa tõnd ba-biisã sẽn kẽ tõnd sʋk n na n gũus tõnd n ges lohorem ning tõnd sẽn tar d lagem-n-taar a Zezi Kiristã pʋgẽ wã, n dat n kẽes tõnd yembdẽ wã...

⁵ La tõnd ka tũ b raabã baa bilf ye, sẽn na yɩlẽ tɩ koe-noogã sɩdã na kell n yals yãmb sʋka.

⁶ La sã n yaa ne neb nins nebã sẽn dag n get wa taoor dãmbã, la b sẽn dag n ya bũmb ning pĩndã ka pak maam ye, Wẽnnaam ka welgd neb ye. Taoor dãmb kãens ka modg maam tɩ m maan baa fɩ ye.

⁷ Ayo, b sẽn yã tɩ Wẽnnaam kõo maam koe-noogã neb nins sẽn ka-b Zuif rãmbã yĩnga, wa b sẽn kõ a Pɩyɛɛr Zuif rãmbã yĩngã,

⁸ (bala, ned ning sẽn tʋm a Pɩyɛɛr pʋgẽ n kɩt t'a lebg Zuif rãmbã tẽn-tʋmdã, soab kõng me n tʋm mam pʋgẽ bu-zẽmsã yĩnga).

⁹ La b sẽn bãng bark ning Wẽnnaam sẽn kõ maamã, a Zak ne a Sefas la a Zã, nebã sẽn get wa ra-lugsã yõga maam ne a Barnabas nus-rɩtgo, n wilg tɩ lagem-n-taar bee tõnd ne bãmb sʋka. Woto, tõnd na n teesa bu-zẽmsã sẽne, tɩ bãmb tees Zuif rãmbã sẽne.

¹⁰ Tõnd togame bal n tẽeg naong rãmbã yelle, la mam maana rẽndã ne m sũur fãa.

¹¹ La a Sefas sẽn wa Ãntiyosã mam leng-a-la nebã taoore, bala, a dag n maana sẽn ka zemse.

¹² Sɩd me, sẽn deng neb kẽer sẽn yi a Zak nengẽ wã waoongo, a Sefas dag n dɩta ne bu-zẽmsã. La nin-kãens waoongã zugẽ, a welgame n ka le rɩt ne bu-zẽmsã ye, a sẽn zoet zũinsã yĩnga.

¹³ Zuif-rãmb a taabã me dag n kuusd n maanda wa yẽ sẽn maanã, hal t'a Barnabas mengã tũ n kẽ b zãmbã pʋgẽ.

¹⁴ La mam sẽn yã tɩ b ka kẽnd tɩrg wa sẽn zems koe-noogã sɩdã yĩnga, mam yeela a Sefas nebã fãa taoore yaa: Fo sẽn ya Zuifã, fo sã n maand wa bu-zẽmsã fo na n maana a wãn n modg bu-zẽmsã tɩ b sak Zuif rãmbã kaorengo?

¹⁵ Tõnd yẽ dogame n ya Zuif-rãmba, la d ka yel-wẽn-maandb soolem dãmbã sʋk ye.

¹⁶ Tõnd sẽn mi tɩ ka ne tõogã tʋʋm la ned yɩt tɩrga, la yaa ne tẽeb ne a Zezi Kiristã, tõnd me tẽe a Zezi Kiristã, tɩ tẽeb ne Kiristã na kɩt tɩ tõnd lebg tɩrse, la ka tõogã tʋʋm ye, bala, tõog tʋʋm kõn kɩt tɩ ned baa a yembr yɩ tɩrg ye.

¹⁷ La tõnd sẽn baood tɩ Kirist kɩt tɩ tõnd yɩ tɩrsã, b sã n mik tɩ tõnd me yaa yel-wẽn maandb wa bu-zẽmsã, dẽ, Kirist yaa yel-wẽna tʋmtʋmd laa? Yaa vẽeneg tɩ ka a woto ye.

¹⁸ Bala, bũmb nins mam sẽn yeel tɩ b ka sõngdã, mam sã n wẽnemd n yeel tɩ b sõngdame, rẽnd mam lebga m meng kɩɩsda.

¹⁹ Sɩd me, sã n yaa ne tõogã wɛɛngẽ, mam yaa kũum tõogã maasem yĩnga, tɩ m tõe n vɩɩmd Wẽnnaam yĩnga.

²⁰ B kaa maam ne Kiristã, la ka maam n vɩ yɛs ye, yaa Kiristã n vɩ mam pʋgẽ. Mam sẽn vɩ m yĩngã pʋgẽ moasã wã, yaa tẽeb ne Wẽnnaam Bi-riblã, soab ning sẽn kõ a vɩɩm a toor mam yĩngã pʋgẽ la mam vɩ.

²¹ Mam ka tõdgd Wẽnnaam barkã ye. Bala, sã n dag n yaa ne tõog la ned paamd tɩrlem, dẽnd Kiristã kii zaalem.

3

¹ Yãmb Galasi neb sẽn ka yam! Ãnna n belg yãmba, b bilga yãmb a Zezi Kirist b sẽn ka da-pɩk zugã yellã vẽenegã ãnna n belg yãmba?

² Ad bũmb ning bal mam sẽn dat tɩ yãmb leok maam: Yaa yãmb sẽn maan tõogã sẽn yeelã yĩng la yãmb deeg Sɩɩg-sõngã bii, bɩ yaa yãmb sẽn kelg koe-noogã ne tẽebã?

³ Yãmb ka yamã taa a woto? Yãmb sẽn sɩng ne Sɩɩgã pãngã, yãmb na n baasa ne yĩng rẽnd mosã laa?

⁴ Bũmb nins fãa yãmb sẽn yã wã yɩɩ zaalem laa? Sã n yaẽ la zaalem!

⁵ Soab ning sẽn kõt yãmb Sɩɩgã la b maand bõn-bãn yãmb sʋkã, yaa yãmb sẽn sakd tõogã yĩng la b maand bii, bɩ yaa yãmb sẽn kelgd koe-noogã ne tẽebã yĩnga?

⁶ La ne a Abraham, a tẽe Wẽnnaam, la Wẽnnaam ges-a-la wa nin-tɩrga, a tẽebã yĩnga.

⁷ Dẽ wã, bɩ y reeg tɩ yaa neb nins sẽn tẽedã n ya a Abraham kamba.

⁸ Woto, Wẽnnaam gʋls-sõamyã sẽn pĩnd n neẽ tɩ Wẽnnaam na n kɩtame tɩ bu-zẽmsã yɩ tɩrs tẽeb yĩngã, b pĩnd n togsa a Abraham koe-no-kãngã n yeele: Buud fãa na n paama bark fo yĩnga.

⁹ Woto, neb nins sẽn tar tẽebã naaga ne tẽeb soab a Abraham n paam barka.

¹⁰ Sɩd me, neb nins fãa sẽn teegd tõod tʋʋmã bee kãab-wẽng pʋgẽ, bala, b gʋlsame n yeele: Kãab-wẽng n be ned ning fãa sẽn ka sakd bũmb nins fãa sẽn gʋls seb-kãngã pʋgẽ, la a ka maand wa sẽn gʋlsã zugu.

¹¹ La yaa vẽeneg tɩ ned baa a yen kõn paam tɩrlem Wẽnnaam taoor tõog yĩng ye, tɩ bõe, nin-tɩrg na n vɩɩ ne tẽebo.

¹² Tõog yaool n ka yit tẽebẽ ye. La tõogã yetame tɩ ned ning sẽn na n maan-a wa sẽn gʋlsã, bõn-kãens na kɩt t'a vɩɩmde.

¹³ Kirist yolsa tõnd ne kãab-wẽngã, bãmb sẽn lebg kãab-wẽng tõnd yĩngã yĩnga. Bala, b gʋlsame tɩ kãab-wẽng n be ned ning sẽn lulg raoog zugã zugu.

¹⁴ Woto, a Abraham barkã na n zĩnda a Zezi Kirist pʋgẽ bu-zẽmsã yĩnga, la ne tẽebo, bɩ tõnd deeg Sɩɩgã Wẽnnaam sẽn kãabã.

¹⁵ M ba-biisi, m dɩk ninsaalb mamsgo: Ned sã n gʋls sebr n wilg a sũur gomde, a sẽn dat tɩ yɩ to-to a kũum poore, baa ne sẽn ya ninsaal n gʋlsã, ned baa a yen ka kɩɩsd gomdã wall a paas-a bũmb ye.

¹⁶ Kãabdã sẽn kãabã yaa a Abraham ne a yagengã. B ka yeel tɩ yagense, wa b yaa wʋsg ye. Yaa a yen tãa. B sẽn yeel tɩ "fo yagengã" dat n togsame tɩ Kirist.

¹⁷ Ad mam gomdã võore: Yaa tɩ yam-yãkr ning Wẽnnaam sẽn yãke, n togs tɩ bu-zẽmsã, ka tõog sẽn yaool n wa yʋʋm kobs-naas la pis-tã rẽnda zugẽ wã n na n kiis-a, n kɩt tɩ kãabgã yɩ zaalem ye.

¹⁸ Bala, rogem pʋɩɩrã sã n dag n yitẽ tõogã pʋgẽ, a dag n kõn leb n yi kãabgẽ ye. Yaool n yaa kãabg pʋgẽ la Wẽnnaam ning b barkã a Abraham zugu.

¹⁹ La yaa bõe yĩng la b wa ne tõogã? Wẽnnaam yaool n waa ne tõogã n n a puk nebã beegre, hal tɩ yageng ning Wẽnnaam kãabgã sẽn be a zugã na wa. Malegs n moon kãab-kõngo, la b tũnuga sɛ-yõakda.

²⁰ Sã n yaool n ya nin-yend yelle, a ka baood sɛ-yõakd ye. La Wẽnnaam yaool n yaa b yembre.

²¹ Dẽ wã, tõogã kɩɩsda Wẽnnaam kãabgã laa? Ayo! B sã n dag n kõẽ tõog sẽn tõe n kõ vɩɩm, tõogã dag n na n sɩd waa ne tɩrlem.

²² Wẽnnaam gʋls-sõamyã yeelame tɩ dũni gill fãa bee yel-wẽn maaneg pʋgẽ. Woto, yaa neb nins sẽn tẽed a Zezi Kiristã n na n paam kũun ning Wẽnnaam sẽn kãabã, b sẽn tẽ wã yĩnga.

²³ Sẽn deng tẽebã waoongo, tõnd dag n bee tõogã yembdẽ n gũud tẽebã sẽn na n wa pukã.

²⁴ Woto, tõog yɩɩ tõnd gũuda n na n tɛ tõnd n taas Kirist nengẽ, tɩ ne tẽebo, tõnd na lebg tɩrse.

²⁵ Tẽebã sẽn wa wã, ka leb n ya gũud kõng n so tõnd yɛs ye.

²⁶ Bala, yãmb sẽn tẽed a Zezi Kiristã yãmb fãa yaa Wẽnnaam kamba.

²⁷ Yãmb sẽn deeg lisg Kirist pʋgẽ wã, Kirist luda yãmb wa fuugu.

²⁸ Ka leb n be tɩ m yaa Zuif bɩ Gɛrka, yamb bɩ burkĩna, dao bɩ pag ye, bala, yãmb fãa yaa yembr a Zezi Kirist pʋgẽ.

²⁹ La yãmb sã n yaa Kirist neba, dẽnd yãmb yaa a Abraham yagense, n ya pʋɩt-n-taas ne a rogem-pʋɩɩrã wa b sẽn kãabã.

4

¹ La mam yaool n yeta yãmb tɩ ned ning sẽn na n soog a ba wã paoong sã n ket n ya biiga, welgr ka be yẽ ne yamb sʋk ye, tɩ yaool n ya yẽ n na n soog bũmba fãa.

² Ba-wubdsi la tʋʋm-gɛtb n so yẽnda hal tɩ ta wakat ning ba wã sẽn yãkã.

³ Tõnd me sẽn dag n ya kambã, tõnd dag n bee dũni wã bũmb buud toor-toor yembd pʋgẽ.

⁴ La wakat sẽn ta, Wẽnnaam tʋma b bi-riblã tɩ pag rog-ba, n dog-b tõogã pʋgẽ,

⁵ tɩ b tõe n yols neb nins sẽn dag n be tõogã yembd pʋgẽ, n tõog n deeg tõnd n maan Wẽnnaam kamba.

⁶ La yãmb sẽn ya Wẽnnaam kambã yĩnga, Wẽnnaam tʋma b bi-riblã Sɩɩg yãmb sũyã pʋse, la Sɩɩgã yetame tɩ "abba" sẽn dat n togs tɩ "m ba"!

⁷ Woto, fo ka leb n ya yamb yɛs ye, fo yaa Wẽnnaam biiga. La fo sã n ya Wẽnnaam biiga, fo yaa bãmb pʋɩ-rɛɛgd me, bãmb maasem yĩnga.

⁸ Pĩndã, yãmb dag n ka mi Wẽnnaam ye, la yãmb dag n sakda wẽnnaam dãmb sẽn ka wẽnnaam dãmb sɩd-sɩd ye.

⁹ La mosã, yãmb sẽn bãng Wẽnnaamã, la sẽn yɩɩd fãa Wẽnnaam sẽn bãng yãmbã, yɩta a wãn tɩ yãmb leb n kẽed dũni bõn-kãensã sẽn ka pãnga la sẽn ka yõodã, n na n le lebg b yemse?

¹⁰ Yãmb tũuda rayã, kitã, wakatã la yʋʋmã.

¹¹ Dabeem tara maam ne m sẽn nams yãmb yĩngã ka yɩ zaalem.

¹² M ba-biisi, mam bõosda yãmb tɩ y yɩ wa maam, bala, mam me yaa wa yãmba.

¹³ Yãmb ka beeg maam baa bilf ye. Yãmb miime tɩ mam sẽn na n moon yãmb koe-noogã pipi, yɩɩ mam ka laafɩ yĩnga.

¹⁴ Mam yĩnsã ka-laafɩ wã yɩɩ makr yãmb yĩnga. Ka tɩ yãmb ka ges maam n ka nandẽ, wall y yam yii maam ye. Ayo! Yãmb pʋs n deega maam wa Wẽnnaam malɛka, la wa a Zezi Kirist.

¹⁵ La yaa bõe n wa ne yãmb sũ-noogã? Bala, mam kɩta yãmb kaset n yetẽ tɩ yãmb sã n dag n tõeẽ, y dag n na yãgs y ninã n kõ maam.

¹⁶ Mam sẽn togs yãmb sɩdã yĩnga, mam lebga yãmb bɛ laa?

¹⁷ Bãmb sẽn wɩngd ne yãmbã ka sõama ye. B sẽn datã yaa tɩ welg yãmb ne tõndo, tɩ yãmb na wẽnemd n kẽ bãmba.

¹⁸ Yaa sõama tɩ y wɩng ne bũmb ning sẽn ya sõama wakat fãa, la ka mam sẽn be ne yãmb wakat bal ye.

¹⁹ Mam kamba, rogem toog leb n tara maam yãmb yĩnga, hal n na ta wakat ning yãmb sẽn nan wẽneg Kiristã.

²⁰ Mam da nong n bee yãmb sʋk moasã n tek m sẽn gomd to-to wã, bala, mam ka mi m sẽn na n maan to-to ne yãmb yellã ye.

²¹ Yãmb dãmb sẽn dat n be tõog sakr pʋgẽ wã, leok-y maam wɛ! Yãmb ka kelgd tõogã laa?

²² Bala, b gʋlsame t'a Abraham paama kom-dibli a yiibu: a yembr yaa yem-poakã biiga, t'a to wã ya burkĩn-poakã biiga.

²³ Yaa ne ninsaal datem la b rog yem-poakã biigã, la b roga burkĩn-poakã biig wa sẽn zems Wẽnnaam sẽn kãabã.

²⁴ Mamsg n be yel-kõngã pʋgẽ, bala, pagbã a yiibã mamsda kaool a yiibu. Pag a yembr mamsda kaool ning sẽn maan Sinayi tãngẽ wã, la a sẽn dogd b rãmbã yaa yemse. Pʋg-kãng yaa a Agaar.

²⁵ A Agaar yaa Sinayi tãng sẽn be Arabi wã, la kell n zemsa ne rũnna-rũnnã Zeruzalɛmã, bala, a bee yembdẽ ne a kambã.

²⁶ La Zeruzalɛm sẽn yit-a yĩngrã yaa burkĩna, la yaa yẽnda n ya tõnd ma.

²⁷ Sɩd me, b gʋlsame n yeel yaa: pʋg-kiir sẽn ka rogda, maan sũ-noogo. Fo sẽn ka yã rogem toogã, kɩdem la f kaase! Bala, pag ning b sẽn basã kamb na n yɩɩga pag ning b sẽn nongã kamba.

²⁸ La yãmba, m ba-biisi, yãmb yaa kãabg kamb wa Izake.

²⁹ La a wa biig ning b sẽn dog yĩng ratem yĩngã sẽn dag n namsd biig ning b sẽn dog wa sẽn zems Wẽnnaam Sɩɩgã raabã, ket n yaa a woto bal moasã.

³⁰ La Wẽnnaam gʋls-sõamyã yetame tɩ bõe? Dig yem-poakã ne biigã, bala, yem-poakã biig ka na n naag ne burkĩnã biig n deeg rogem pʋɩɩr ye.

³¹ Woto, m ba-biisi, tõnd ka yem-poakã kamb ye, tõnd yaa burkĩnã kamba.

5

¹ Kirist yolsa tõnd tɩ d na vɩ ne lohorem. Dẽ yĩngã, yals-y kãenkãe n da leb n kẽes y mens yembdẽ ye.

² Ade, maam a Poll yeta yãmb tɩ yãmb sã n kɩt tɩ b kẽes-y bãongo, Kirist ka na n zĩnd yõod ne yãmb ye.

³ Mam leb n yeta ned ning fãa sẽn kɩt tɩ b kẽes-a bãong t'a tog n pidsa tõogã gilli.

⁴ Yãmb dãmb sẽn baood zemsg tõog sakr pʋgẽ wã, yãmb welga ne Kirist, yãmb monga y mens barkã.

⁵ Ne tõndo, yaa tẽeb pʋgẽ la tõnd gũud tɩ Wẽnnaam kɩt tɩ tõnd lebg nin-tɩrse, Sɩɩg-sõng pãngã yĩnga.

⁶ Bala, bũmb ning sẽn be yõod Kirist pʋgẽ wã ka bãongã wall moonemã ye, yaa tẽeb sẽn tʋmd ne nonglem.

⁷ Yãmb dag n zoeta sõama, la ãnna n gɩdg yãmb tɩ y da sak sɩdã, n kɩt tɩ y yalse?

⁸ Tags-kãng ka yi sẽn boond-a yãmbã nengẽ ye.

⁹ Rã-bɩll bilf bal wukda bur zom-nagdgã gilli, wa b sẽn mi n yetẽ wã.

¹⁰ Ne maam, mam sũurã keema ne yãmb Zu-soabã pʋgẽ, tɩ y tagsg ka na n yɩ toor ye. La ned ning sẽn dãmbda yãmbã, baa a sẽn ya ned ning fãa, a na n deega a sɩbgre.

¹¹ M ba-biisi, ne maam, sã n yaa tɩ mam moondame tɩ b kẽes nebã bãongo, bõe yĩng tɩ b namsd maam? Dẽ, a Zezi da-pɩkã koɛɛg sẽn ya wa kug-lakdg tɩ mam moondẽ wã ka le beegd ned ye.

¹² Mam datẽ lame tɩ neb nins sẽn dãmbd yãmbã tolg n wã b mens n baase.

¹³ M ba-biisi, b boola yãmb tɩ y vɩɩmd lohorem pʋgẽ. La bɩ y da rɩk lohorem kõng n na n vɩɩmd wa yĩngã sẽn datã ye. Vɩɩmd-y ne nonglem, la y tʋm n kõ taaba.

¹⁴ Bala, gomd a yen tãa n pidsid tõodã gilli. A yetame tɩ: Nong f to wa f menga.

¹⁵ La yãmb sã n wãbd taab wa baase, la y namsd taaba, bɩ y gũus n da wa gõdg n sãam taab ye.

¹⁶ Dẽ, mam yeta yãmb tɩ y kẽn wa sẽn zems Wẽnnaam Sɩɩgã sẽn tɛt yãmbã, la yãmb kõn maan y yĩngã sẽn dat ye.

¹⁷ Bala, yĩngã tara ratem sẽn ya lebend ne Wẽnnaam Sɩɩgã rẽnda, la Wẽnnaam Sɩɩgã tara ratem sẽn ya lebend ne yĩngã rẽnda. B kɩɩsda taaba, tɩ yãmb kõn maan y sẽn datã ye.

¹⁸ La sã n yaa Wẽnnaam Sɩɩgã n tɛt yãmba, yãmb ka be tõog sakr pʋgẽ ye.

¹⁹ La yĩngã tʋʋm yaool n yaa vẽenese. Yaa yoobo, rẽgdo, tʋʋm wẽns maanego,

²⁰ wẽn-naands pʋʋsgo, tɩɩm, beem, ka-wʋmd-taaba, sũ-kiiri, sũ-yikri, nokoɛɛma, welgre, yi-taaba,

²¹ zoe-bõne, rã-tɩgre, yão-beedo, la bũmb sẽn wẽnd a woto. Mam pĩnd n keoogda yãmb wa mam sẽn da zoe n maanã. Neb nins sẽn maand bõn-kãensã kõn paam Wẽnnaam soolem tɩ yɩ b pʋɩɩr ye.

²² La Sɩɩg-sõng bilã yaa nonglem, la sũ-noogo, la bãane, la sũ-mare, la sõmblem, la maan-neere, la maan-sɩda, la bʋgsem, la yõk-m-menga.

²³ Tõogã ka kɩɩsd bõn-kãensã ye.

²⁴ Neb nins sẽn be Kirist Zezi pʋgẽ wã kaa b yĩngã ne a sẽn nonge, la a daabã fãa da-pɩk zugu.

²⁵ Tõnd sã n vɩ ne Wẽnnaam Sɩɩgã pãnga, bɩ d kẽn wa sẽn zems bãmb Sɩɩgã sẽn tɛt tõndã me.

²⁶ Bɩ d da lebg wuk-m-mens rãmba, n baood taab noore, la d maand sũ-kiir ne taab ye.

6

¹ M ba-biisi, yãmb sã n ling ned t'a beegdẽ, Wẽnnaam Sɩɩgã sẽn be ne yãmbã yĩnga, bɩ y sagl a soab ne sũ-bʋgsem, t'a tõe n le rɩk so-tɩrgã. Gũus f menga, tɩ fo me ra wa n paam makr ye.

² Tʋk-y taab zɩɩbo. Woto, Yãmb na n maana Kirist tõogã sẽn datã.

³ Ned sã n tẽed t'a yaa bũmbu, n yaool n ka fɩ, a belgda a menga.

⁴ Bɩ ned kam fãa ges a meng tʋʋmd sẽn ya to-to, la woto, a na maan sũ-noog ne a meng tʋʋma, la a ka tog n makd a rẽndã ne neb a taabã rẽnd n maand sũ-noog ye.

⁵ Bala, ned fãa na n tʋka a meng zɩɩbo.

⁶ Ned sã n paam tɩ ned a to zãmsd-a Wẽnnaam goamã, bɩ a kɩt tɩ sẽn zãmsd-a yẽ wã me paam pʋɩɩr ne bũmb nins yẽ sẽn tarã.

⁷ Da belg-y y mens ye: Wẽnnaam ka sẽn na paoog ye. Ned sẽn bʋd bũmb ningã la a na n tigs bala.

⁸ Bala, ned ning sẽn bʋt-a yĩngã yĩnga, a na n tigsa yĩngã biis sẽn ya sãoongo. La ned ning sẽn bʋt-a Wẽnnaam Sɩɩgã yĩng na n tigsa Sɩɩgã biis sẽn ya vɩɩm sẽn kõn sa.

⁹ Bɩ d da yɛ ne tʋʋm sõama maaneg ye. Bala, wakat sã n ta, tõnd na n tigsame, a sã n yaa tɩ tõnd ka bas n vʋʋs ye.

¹⁰ Woto yĩnga, tõnd sẽn paam weer ning fãa, bɩ d maan neba fãa neere, la sẽn yɩɩd fãa yaa tẽeb pʋgẽ ba-biisã.

¹¹ Ges-y gʋls-biisã bedrem sẽn zem to-to! Maam n gʋlsd yãmb m toor mosã.

¹² Neb nins sẽn dat tɩ ne yĩngã yell bɩ b pẽg-bã modgda yãmb tɩ y kɩt tɩ b kẽes-y bãongo, la yaa sẽn na yɩlg bal n da paam namsg Kirist da-pɩkã yĩng ye.

¹³ Bala, bãmb mensã sẽn ya zũinsã, b ka sakd tõogã ye. La b ratame tɩ yãmb kɩt tɩ b kẽes-y bãongo, tɩ bãmb paam waoogr yãmb yĩn-neong yĩnga.

¹⁴ La ne maam, yaa vẽeneg tɩ ka a woto ye. Mam ka na n waoog m meng ne bũmb a to tɩ ka ne tõnd Zu-soab a Zezi Kirist da-pɩkã ye. Ne maam, da-pɩkã yĩnga dũni wã yaa wa kũum, la ne dũni wã, mam me yaa wa kũum.

¹⁵ Bala, bũmb ning sẽn be yõodo, ka bãongo wall moonem ye, la yaa tɩ yɩ nin-paalga.

¹⁶ Bɩ bark la laafɩ zĩnd ne neb nins sẽn na n sak-b no-kãnga wã, la ne Wẽnnaam Israyɛllã.

¹⁷ Yaoolem koɛɛg yaa tɩ ned baa a yen da sãam mam sũur ye, bala, nod-dãand nins mam sẽn tarã yaa bãnd tɩ mam yaa a Zezi rẽnda.

¹⁸ M ba-biisi, bɩ tõnd Zu-soab a Zezi barkã zĩnd ne yãmba. Ãmina.