1

¹ Maam a Poll sẽn ya a Zezi Kirist tʋmtʋmd Wẽnnaam sẽn yãkã, la tõnd ba-biig a Tɩmote n tʋmd seb kãngã Wẽnnaam nebã sẽn be Korẽntã, la Wẽnnaam neba fãa sẽn be Akayi soolmã fãa pʋgã.

² Bɩ y reeg bark la laafɩ sẽn yit tõnd ba a Wẽnnaam la Zu-soab a Zezi Kirist nengẽ.

³ Pẽgr Wẽnnaam sẽn ya tõnd Zu-soab a Zezi Kirist ba wã! Ba sẽn ya nimbãan-zoɛta la Wẽnnaam sẽn belsd nebã wakat fãa.

⁴ Bãmb belsda tõnd d toodã fãa pʋgẽ, tɩ tõnd sẽn paamd belsg Wẽnnaam nengẽ wã, tõnd na tõog n bels neb nins sẽn be tood buud fãa pʋgẽ wã ne bels-kõngo.

⁵ Bala, a wa Kirist namsgã sẽn paamd tõndã, woto me, tõnd paamda belsg wʋsg Kirist maasem yĩng me.

⁶ Tõnd sã n namsdẽ, yaa tɩ yãmb na paam belsog la fãagre. Tõnd sã n paamd belsgo, yaa sẽn na yɩl la yãmb paam belsog sẽn na kõ yãmb pãng tɩ y tõog n sak namsg nins tõnd sẽn paamdã ne sũ-mare.

⁷ La tõnd sũur keema sõama ne yãmba, bala, tõnd miime tɩ yãmb sẽn naag n sak namsgã, yãmb tara pʋɩɩr ne belsgã me.

⁸ Sɩd me, d ba-biisi, tõnd ka rat tɩ yãmb zɩ tood nins tõnd sẽn paam Azi soolmẽ wã ye. Tõnd namsa wʋsg tɩ looge, n yɩɩg tõnd pãnga, hal tɩ d dag n ka le tẽed tɩ d na n vɩɩmdame ye.

⁹ Tõnd da tagsda d sũyã pʋs tɩ b na n kʋʋ tõndo, rẽ sẽn paam tõndã yaa sẽn na n yɩl tɩ tõnd kõn teeg d mens ye, la tɩ d na teeg Wẽnnaam ning sẽn vʋʋgd kũuma.

¹⁰ Yaa Wẽnnaam kãng n fãag tõndo, la b na fãag tõnd ne kũum a woto buudu. N ye tõnd tara tẽ-kãngã tɩ b na n leb n fãaga tõnd yɛsa.

¹¹ Yãmb mens me sẽn sõng tõnd n pʋʋsd tõnd yĩngã, woto, Wẽnnaam na n leoka neb wʋsg pʋʋsg n sõng tõndo, la neb wʋsg na n pʋʋsa Wẽnnaam bark tõnd yĩnga.

¹² Bala, bũmb ning sẽn kõt tõnd sũ-noogã, yaa tõnd sũ-bãngrã sẽn kɩt kaset tɩ dũni wã neb sʋka, tõnd kẽna ne sõmblem la pʋ-peelem sẽn yit Wẽnnaam nengẽ wã yĩnga, la d kẽna yãmb sʋk a woto n yɩɩda. La ka yɩ ne ninsaal yam ye, yaa ne Wẽnnaam barkã la d maan woto.

¹³ Tõnd sẽn gʋlsd yãmbã ka bũmb a to ye, yaa yãmb sẽn karẽmd n yãtẽ la y wʋmdẽ wã bala. La mam tẽedame tɩ yãmb na n bãnga zãnga,

¹⁴ a wa yãmb sẽn zoe n sɩng n bãng tɩ Zu-soabã waoong daare, tõnd yaa yãmb zu-zẽkre, tɩ yãmb ya tõnd zu-zẽkre.

¹⁵ La tẽ-kãnga pʋgẽ, mam da rat n deng n waa yãmb nengẽ, sẽn na n yɩlẽ tɩ yãmb tõe n paam bark naoor a yiib-n-soaba.

¹⁶ M da rat n yii yãmb nengẽ n tũ Masedoan, la m yi Masedoan n lebg n wa yãmb nengẽ tɩ y sõng-m ne zude kẽndã.

¹⁷ Dẽ yĩnga, mam sẽn da tʋlg n maan bõn-kãngã, mam wilgdame tɩ m ka yas m zĩ-yend bii? Bɩ mam yam-yãkra yaa ninsaal dẽnda tɩ mam tõe n yeel tɩ n-ye, n leb n yeel tɩ ayo?

¹⁸ Sã n ya sɩd me tɩ Wẽnnaam yaa sɩd soaba, koɛɛg ning tõnd sẽn gom ne yãmba ka yɩ n-ye n leb n ya ayo ye.

¹⁹ Bala, maam ne a Sɩlvẽ la a Tɩmote sẽn da moon Wẽnnaam bi-ribl a Zezi Kirist koɛɛg yãmb sʋka ka yɩ n-ye la ayo ye, la a Zezi pʋgẽ, yaa n-ye bal n be.

²⁰ Wẽnnaam kãabdã fãa yaa n-ye ning sẽn be-a Kirist pʋgẽ wã. Dẽ, yaa a Zezi maasem yĩng la tõnd yet tɩ: ãmina! Wẽnnaam waoogr yĩnga.

²¹ Yaa Wẽnnaam n kɩted tɩ tõnd ne yãmb yalsd kãenkãe Kirist tũudmã pʋgẽ, la bãmb yãka tõnd n welg tõnd toore.

²² Bãmb n ning tõnd bãnd b yʋʋrã yĩnga, la b ning Sɩɩg-sõng sẽn ya arzegs nins bãmb sẽn bĩng tõndã reng-n-lɛmbg tõnd sũyã pʋgẽ.

²³ Mam dɩkda Wẽnnaam tɩ ya m kaset soaba, la m sã n yagda zĩrĩ, bɩ b reeg m sɩɩgã: Yaa sẽn na n sõng yãmb yĩng n kɩt tɩ mam ka leb n wa Korẽntã.

²⁴ Ka tɩ tõnd dat n modga yãmb y tẽeba pʋg ye, la yaa tɩ tõnd dat n naaga yãmb n tʋm tɩ y paam sũ-noogo. Bala, yãmb kɩɩ yẽg tẽebã pʋgẽ.

2

¹ Dẽ, mam yãka yam m sũurẽ n ka rat n leb n wa yãmb nengẽ ye. Sẽn na yɩl n da wa sãam yãmb sũyã ye.

² Bala, mam sã n sãam yãmb sũyã, ãnna n tõe n kõ maam sũ-noogo, sã n ka mam sẽn sãam neb nins sũyã bala?

³ Mam gʋlsa wa mam sẽn da gʋlsã, tɩ mam sã n wa wa, bɩ m da paam sũ-sãoong ne neb nins sẽn da tog n kõ maam sũ-noogã ye. La mam sũur keema ne yãmb fãa, bala, mam sũ-noog yaa yãmb fãa sũ-noogo.

⁴ Yaa to-kãseng pʋga, la sũ-sãoong ne nintãm pʋg la mam dag n gʋls yãmba. A ka sẽn na n sãam yãmb sũy ye, la yaa tɩ yãmb na bãng nonglem kãseng ning mam sẽn tar yãmb yĩngã.

⁵ Ned sã n yɩ sabaab tɩ sũ-sãoong wa, ka maam bal sũur la a sãame ye, yaa yãmb fãa, la bas-y tɩ m yeel tɩ yãmb neb kẽere, n da wa yag zĩrĩ ye.

⁶ Sɩbgr ning yãmb neb wʋsg sẽn sɩbg nin-kãnga soabã sek-a lame.

⁷ La sẽn ya neer n yɩɩd moasã, yaa tɩ yãmb tog n kõ-a-la sugri, la y bels-a tɩ sũ-sãoong-kãseng da wa yõk-a, n kẽes-a pãn-komsem pʋg ye.

⁸ Dẽ, mam sagenda yãmb tɩ y maan bũmb sẽn wilgd tɩ y nong-a lame.

⁹ Bala, mam sẽn da gʋls yãmba me, da yaa sẽn na n mak yãmb n bãng y sã n yaa sakdb bũmb fãa pʋgẽ.

¹⁰ La yãmb sẽn kõt ned ninga sugr a beegr yĩngã, mam me kõt-a-la sugri. La ne maam, mam sẽn maan sugrã, sã n yaa tɩ bũmb n be m sẽn tog n kõ sugri, yaa yãmb yĩng la m maan bõn-kãng Kirist nifẽ,

¹¹ sẽn na yɩl tɩ sʋtãana ra wa tõog tõnd ye. Bala, tõnd mii a Sʋtãan sɩlmã.

¹² La mam sẽn ta Torwas n na n moon Kirist koe-noogã, baa ne Zu-soabã sẽn pak sor be n kõ maama,

¹³ mam sɩɩgã da ka gãe ye, mam sẽn ka yãnd m ba-biig a Titã yĩnga. Dẽ, mam basa bãmb n kẽng Masedoan.

¹⁴ Bark Wẽnnaam sẽn kɩtd tɩ tõnd paamd tõogr daar fãa Kiristã tũudum pʋgẽ wã, la b kɩtdẽ tɩ ne tõndo, nebã bãngd Kirist zĩiga fãa, wa yũ-noog sẽn saagd to-to wã.

¹⁵ Sɩd me, tõnd yaa wa wisd sẽn tar yũ-noog Kirist sẽn dɩk n kõ Wẽnnaam, tɩ tõnd be neb nins sẽn paam fãagrã, la neb nins sẽn na n sãamã sʋka.

¹⁶ Ne neb kẽere, tõnd yaa kũum yũug sẽn wat ne kũum, la ne neb a taaba, tõnd yaa vɩɩm yũug sẽn wat ne vɩɩm. Ãnna n tar pãng n tõe n maan bõn-kãensã?

¹⁷ Bala, tõnd ka wẽnd wa neb wʋsg sẽn dɩkd Wẽnnaam koɛɛgã n leebd n baood yõodã ye. Ayo, tõnd sẽn gomdã yaa ne pʋ-peelem, la goamã yita Wẽnnaam nengẽ, la tõnd gomda Wẽnnaam taoore, la Kirist tũudmã pʋgẽ.

3

¹ Dẽ wã, dat n yeelame tɩ tõnd leb n sɩngame n na n pẽg d mens bii? Wall tõnd da rata kaset sɛb n wilg yãmb wa neb a taabã sẽn maandã, wall d rata yãmb kaset sɛb n wilg neb a taabã?

² Yãmb yaa tõnd sebr sẽn gʋls tõnd sũyã pʋse, neba fãa sẽn mi la b karemdẽ.

³ Yaa vẽeneg tɩ yãmb yaa Kirist sebre, tõnd sẽn gʋls n tʋme. Ka sẽn gʋls ne gʋls-koom ye, la yaa sẽn gʋls ne Wẽnnaam sẽn vɩ wã sɩɩga. Ka sẽn gʋls kug-wals zut ye, la yaa sẽn gʋls yãmb sũyã pʋse.

⁴ Yaa tẽeb pidsg-gũudum kãng la tõnd tar Wẽnnaam nengẽ, Kirist maasem yĩnga.

⁵ Ka rat n yeel tɩ tõnd mens tara pãng n tõe n maan bũmb kãng ne d mens pãng ye, la yaa tɩ tõnd pãngã yita Wẽnnaam nengẽ.

⁶ Wẽnnaam kɩtame tɩ d tõe n yɩ bãmb tʋmtʋmdba kãab-paalgã maasem yĩnga. Ka ne tõog sẽn gʋlsã ye, la yaa ne Sɩɩg-sõngo. Bala, tõog sẽn gʋlsã kʋʋdame, la Sɩɩg-sõng kõta vɩɩm.

⁷ La sã n yaa tɩ tõog ning sẽn wat-a ne kũuma, b sẽn gʋls-a kug-wals zutã, a sã n da tar ziir hal tɩ Israyɛl kambã rag n ka tõe n ges a Moyiis nengã, yẽ nengã sẽn yãgd ne ziirã yĩnga, tɩ yaool n yaa ziir sẽn na n wa n loogã,

⁸ rẽ wã, Sɩɩgã sẽn maand tʋʋmd ningã kõn tall ziir n yɩɩd sɩda.

⁹ Tʋʋmd ning sẽn wat ne sɩbgrã sã n da tar ziiri, yaa tʋʋmd ninga sẽn wat ne tɩrlma n tar ziir n yɩɩda.

¹⁰ La b sã n na n mak-b ne taaba, bũmb ninga sẽn ya wa a talla ziirã ka yɩ ziir ye, ziir ning sẽn ya kãseng n yɩɩdã yĩnga.

¹¹ Rẽnda wã yĩnga, sã n yaa tɩ bũmb ning sẽn loogda paama a ziiri, dẽnd bũmb ning sẽn ka loogdã n tar ziir yɩɩda.

¹² Dẽ, tõnd sẽn tar tẽeb-pidsg gũudum kãngã wã, tõnd tara raood wʋsgo.

¹³ La tõnd ka maand wa a Moyiis sẽn da lut a nengã ne peende, tɩ Israyɛl kambã da yã ziir kãng sẽn ya bõn-loaagdgã sɛɛbã ye.

¹⁴ La bãmb yama pagame, bala, hal tɩ ta moasã, bãmb sã n karemd kãab kʋdgã, peen-kãng ket n beeme. Peen-kãng ka tõe n pilg tɩ sã n ka ne a Kirist ye.

¹⁵ Hal tɩ ta moasã, b sã n karẽmd a Moyiis sebrã peenda ket n luda b yama.

¹⁶ La b sã n wẽnemd n tek yam n tẽ "Zu-soabã", peendã pilgdame.

¹⁷ La b sẽn yet tɩ "Zu-soabã", rat n yeelame tɩ Sɩɩga, la Zu-soabã Sɩɩg sẽn be zĩig ninga, lohorem bee be.

¹⁸ Tõnd fãa nems pilgame tɩ nebã ne Zu-soabã ziir kãng beene wa neng-gɛtgẽ, la Zu-soabã, sẽn ya-a Sɩɩgã, tedga tõnd tɩ d wẽneg bãmba, n paamd ziir n paasdẽ.

4

¹ Wẽnnaam sẽn zoe tõnd nimbãaneg n kõ tõnd tʋʋm kãnga wã yĩng n kɩt tɩ tõnd ka boogd d raood ye.

² Tõnd kɩɩsda bũmb nins solg n ya yãn-tʋʋma, tõnd ka tʋmd ne sɩlem ye. La tõnd ka tekd Wẽnnaam goama ye. Tõnd wilgda sɩdã vẽenega, n paamd kaset sõng neba fãa sũyã pʋs Wẽnnaam taoore.

³ La tõnd sẽn moond koe-noog ningã wã sã n ket n solgame, a solga ne neb nins sẽn na n sãama.

⁴ Yaa neb nins sẽn ka tẽed-bã. Dũni kãngã na-wẽngã sẽn yaa a sʋtãan sẽn lud b yamã tɩ b ka tõe n yã Kirist sẽn ya Wẽnnaam mengã wẽnegã koe-noogã ziirã yĩnga.

⁵ Ka tõnd mens koɛɛg la d moond ye, yaa a Zezi Kirist koɛɛg la tõnd moonda. La a Zezi maasem yĩnga, tõnd boonda d mens tɩ yãmb tʋmtʋmdba.

⁶ Bala, Wẽnnaam sẽn yeel tɩ vẽenem na n yãga lik pʋgẽ wã, yaa Wẽnnaam n kɩt tɩ vẽenemã yãg tõnd sũyã pʋse, tɩ tõnd yã Wẽnnaam ziirã sẽn pɩnd Kirist nengã zugu.

⁷ Tõnd zãada paoon-kãngã d yĩnsã sẽn ya wa yagd laasã pʋse. Tɩ pãn-kãseng kãngã na yɩ Wẽnnaam dẽnda, la kõn yɩ tõnd dẽnd ye.

⁸ Tõnd paamda namsg buud toor-toore, la b ka kʋʋd tõnd ye. Tõnd dag n ka mi d sẽn na n maaneg ye, la tõnd ka boogd raood ye.

⁹ Neb namsda tõndo, la Wẽnnaam sõngda tõndo. B pãbda tõnd n lubdẽ, la d ka kiid ye.

¹⁰ Tõnd tara a Zezi kũuma mamsg d yĩnsã pʋs daar fãa, tɩ neba na yã a Zezi vɩɩmã tõnd yĩnsã pʋse.

¹¹ Bala, tõnd sẽn vɩ wã, b kẽnda ne tõnd kũum zĩigẽ wakat fãa a Zezi yĩnga, sẽn na n yɩl t'a Zezi vɩɩmã me na puk tõnd yĩn-kiidsã pʋse.

¹² Woto, kũum n maand a tʋʋmd tõnd pʋse, tɩ vɩɩm maand a tʋʋmd yãmb pʋse.

¹³ La a wa Wẽnnaam gʋls-sõamyã sẽn yeel tɩ: Mam tẽeme. Yaa woto yĩng la m n gom-yã. Tõnd me tẽedame, la yaa woto yĩng me n kɩt tɩ tõnd sẽn gomdã.

¹⁴ La d miime tɩ sẽn vʋʋg-a Zu-soab a Zezi wã na n naaga tõnd me ne a Zezi n vʋʋge, la na n kɩtame tɩ tõnd ne yãmb naag taab n yals bãmb taoore.

¹⁵ Bala, bõn-kãens sẽn maandã yaa yãmb yĩnga, tɩ barkã sẽn tat neb wʋsgã kɩt tɩ b pʋʋs Wẽnnaam barka, Wẽnnaam waoogr yĩnga.

¹⁶ Yaa woto yĩng n kɩt tɩ tõnd ka boogd d daood ye. La baa tõnd yĩngã sã n sãame, tõnd sɩɩgã lebgda paalg daar fãa.

¹⁷ Bala, tõnd sẽn na n paam namsg bilf wakat bilf pʋgẽ wã Kɩtdame tɩ tõnd na n paam ziir kãseng sẽn kõn sa n yɩɩda.

¹⁸ Sẽn paase, tõnd sẽn getã, ka bũmb nins nin sẽn ne wã ye, tõnd geta bũmb nins nin sẽn ka tõe n yã wã. Bala, bũmb nins nin sẽn ne wã loogdame, la bũmb nins nin sẽn ka ne wã paada wakat sẽn kõn sa.

5

¹ Sɩd me, tõnd miime tɩ tõnd tẽng zug ka roogã sẽn ya fu-roogã sã n wa n sãame, tõnd tara roog arzãn pʋga, sẽn ya Wẽnnaam n me. Yaa roog sẽn paad wakat sẽn kõn sa, sẽn ka ninsaalb nus n me ye.

² La tõnd sidgda ro-kãng pʋg me n dat arzãn doogã n yeelg n yɩɩd a yembrã,

³ tɩ tõnd sã n paam yeelgre, tõnd kõn yɩ bɛɛl ye.

⁴ Bala, tõnd sẽn ket n be fu-ro-kãngã pʋgã, tõnd sidgdame n tar namsgo, la ka tɩ tõnd dat n yeega tẽng zug roogã ye, la yaa tɩ tõnd data arzãn doogã n yeelge, tɩ vɩɩmã vel yĩn-kiidgã.

⁵ Yaa Wẽnnaam n maan tõnd tɩ d yɩ a woto, bãmb n kõ tõnd Sɩɩg-sõng tɩ ya arzegs nins b sẽn bĩng tõndã reng-n-lɛmbga.

⁶ Dẽ wã, daar fãa tõnd tara raood wʋsgo, la d miime tɩ tõnd sẽn be yĩn-kãnga pʋgẽ wã, tõnd zãra ne Zu-soabã.

⁷ Bala, tõnd kẽnda ne tẽebo, la d ka yã n yaool n tẽed ye.

⁸ Tõnd tara raood wʋsgo, la tõnd nongẽ lame n yi n bas yĩng kãnga n kẽng Zu-soabã nengẽ n yɩɩda.

⁹ Yaa woto yĩng me tɩ tõnd maoodẽ, n dat n ta bãmb yam, tõnd sã n be yĩn-kãnga pʋga, wall d sã n wa n yi n bas-a.

¹⁰ Bala, yaa tɩlɛ tɩ tõnd fãa yals Kirist bʋʋdã geer taoore, tɩ b keo ned kam fãa wa sẽn zems tʋʋm nins yẽ sẽn tʋm a yĩngã pʋgã. Sã n ya tʋʋm-sõama wall tʋʋm-wẽnse.

¹¹ Tõnd sẽn mi Zu-soabã rabeem zoeesã, tõnd baoodame n sagl nebã n tõog tɩ b tẽ. Wẽnnaam mii tõnd sõama. La mam tẽedame tɩ yãmb sũyã pʋse, yãmb me mii maam.

¹² Tõnd ka le wilgd yãmb yɛs tɩ tõnd zemsame ye, la tõnd kõta yãmb weer tɩ y maan sũ-noog tõnd yĩnga, tɩ yãmb na tõog n leok neb nins sẽn waoogd b mens ne nin sẽn ne bũmb ninsã, la ka sẽn be sũurẽ wã.

¹³ Sɩd me, sã n ya tɩ tõnd yaa ka-yam dãmba, yaa Wẽnnaam yĩnga, la tõnd sã n tara yam, yaa yãmb sõngr yĩnga.

¹⁴ Bala, Kirist nonglemã n so tõndo. Tõnd sẽn bãng vẽeneg n welg tɩ nin-yend n ki neb a fãa yĩnga, tɩ rẽ rat n yeel tɩ yaa neba fãa n ki wã.

¹⁵ A Zezi kii neba fãa yĩnga, tɩ sẽn vɩ-bã kõn leb n vɩ b mens yĩng ye, la b na n vɩɩ sẽn ki-a bãmb yĩng n vʋʋg n bas kũumã yĩnga.

¹⁶ Woto, sẽn sɩng ne moasã, tõnd ka leb n get ned wa sẽn zems ninsaal tagsg ye, la baa tõnd sã n dag n gesa Kirist wa sẽn zems ninsaal tagsgo, moasã, tõnd ka le get bãmb wa sẽn zems ninsaal tagsg yɛs ye.

¹⁷ Ned sã n tũud Kirist, yẽ soab yaa nin-paalga. Bõn-kʋdã loogame, tɩ bũmba fãa lebg paalse.

¹⁸ La yõwã fãa yita Wẽnnaam nengẽ. Kirist maasem yĩnga, Wẽnnaam yiisa yell ning sẽn da be tõnd ne bãmb sʋkã, n kõ tõnd zabr paasg tʋʋmde.

¹⁹ Bala, yaa ne Kirist la Wẽnnaam yiis yell ning sẽn da be bãmb ne dũniyã sʋka, n ka le geelgd ninsaalbã beegrã ye. La b ninga zabr paasg koɛɛg togsg tõnd zutu.

²⁰ Dẽ, tõnd yaa Kirist tʋmtʋmdba, tɩ tõnd sẽn gomd ne yãmbã, yaa Wẽnnaam n tall tõnd n gomd ne yãmba: Tõnd kota yãmb ne Kirist yʋʋr tɩ y leb n paam lagem-n-taar ne Wẽnnaam!

²¹ Wẽnnaam kɩtame tɩ Kirist sẽn ka maan yel-wẽna lebg yel-wẽn tõnd yĩnga, tɩ tõnd tõe n lebg nin-tɩrs Kirist pʋg Wẽnnaam taoore.

6

¹ Tõnd sẽn ya Wẽnnaam tʋmd-n-taasã yĩnga, tõnd kota yãmb tɩ y ra bas bark ninga yãmb sẽn deeg Wẽnnaam nengẽ wã tɩ yɩ zaalem ye.

² Bala, bãmb yetame: Mam leoka foom sẽn zems a wakate, la fo sẽn dat fãagr wakate, mam waa n sõnga foom. Ade, moasã yaa wakat sẽn zemse. Ade, moasã yaa fãagr daare.

³ Tõnd ka rat tɩ d yel-manesem baa yen lub ned ye, tɩ ned da wa n gom tõnd tʋʋmdã wẽng ye.

⁴ La bũmb fãa pʋga tõnd wilgdame tɩ tõnd yaa Wẽnnaam tʋmtʋmdba, n maand sũ-mar wʋsg namsgã pʋgẽ, la naongã pʋgẽ, la sũ-sãamsã pʋgẽ,

⁵ la pãbre, la bi-bees rot kõom, la tẽn-dãmbg pʋgẽ, la tʋʋm-wɛgl pʋgẽ, la gõeem sẽn ka be, la kom pʋgẽ.

⁶ Tõnd wilgdame tɩ d yaa Wẽnnaam tʋmtʋmdba, ne pʋ-peelem, ne bãngre, ne sũ-maasem ne sõmblem, ne Sɩɩg-sõngo, la ne nonglem sẽn ka naag ne zãmbo,

⁷ ne koɛɛg sẽn ya sɩda, la ne Wẽnnaam pãnga, ne tɩrlem zab teed sẽn tar n zabdẽ, la sẽn tar n kogend d menga, waoogre, la paoogr pʋgẽ,

⁸ yʋ-beedo la yʋ-noog pʋgẽ, neb geta tõnd wa zĩrĩ be-neba baa ne tõnd sẽn togsd sɩdã.

⁹ B geta tõnd wa sãamba, baa ne b fãa sẽn mi tõndã. B geta tõnd wa kiidba, la tõnd yaool n vɩɩme. B geta tõnd wa neb b sẽn sɩbgde, la b ka kʋʋd tõnd ye.

¹⁰ B geta tõnd wa sũ-saoong rãmba la tõnd tara sũ-noog daar fãa. B geta tõnd wa naong rãmba, la tõnd kɩtdame tɩ neb wʋsg lebgd arzegs rãmba. B geta tõnd wa neb sẽn ka tar baa fʋɩ, la tõnd yaool n tara bũmb fãa.

¹¹ Korẽnt neba, tõnd goma vẽeneg ne yãmba. D pelga d pʋs ne yãmba.

¹² Tõnd ka solg yãmb d nonglem ye. La yãmb ka wilg tõnd y nonglem ye.

¹³ Mam gomda ne yãmb wa m kamba, bɩ y tags tõnd yell wa tõnd sẽn tagsd yãmb yellã. Yãmb me pelg y pʋs ne tõndo.

¹⁴ Bɩ y da paam lagem-n-taar ne neb nins sẽn ka tẽedbã ye. Bala, bõe lagem-n-taar n be tɩrlem ne wẽng sʋka? Wall bõe lagem-n-taar n be vẽenem ne lik sʋka?

¹⁵ La bõe zems-n-taar n be Kirist ne a Sʋtãan sʋka? Wall ned ning sẽn tẽedã tara bõe pʋɩɩr ne ned ning sẽn ka tẽedã?

¹⁶ Bõe lagem-n-taar n be Wẽnnaam doogã ne wẽn-naands sʋka? Bala, tõnd yaa Wẽnnaam sẽn vɩ roogo, wa Wẽnnaam sẽn yeel tɩ: Mam na n zĩnda ne bãmba, la m kẽn bãmb sʋka. Mam na n yɩɩ bãmb Wẽnnaam, la bãmb na n yɩɩ mam neba.

¹⁷ Yaa woto yĩng tɩ Zu-soaba yetẽ yaa: Yi-y bãmb sʋka, welg-y toor ne-ba. La y ra sɩɩs bũmb sẽn ya rẽgd ye, la mam na reeg yãmba.

¹⁸ Mam na n yɩɩ yãmb Ba, la yãmb na n yɩɩ mam kom-dibli la m kom-pugli. Yaa Zu-soabã, sẽn-tõe-a fãa wã n yeele.

7

¹ Woto yĩnga, m zo-nongdse, tõnd sẽn tar kãab kãensã wã, bɩ d yɩlg d mens ne rẽgd ninga sẽn dẽgemd yĩngã ne sɩɩgã, n bɩ sõmblem sẽn zems zãng pʋgẽ n paase, Wẽnnaam dabeem zoees pʋgẽ.

² Bas-y tɩ d paam weer y sũyã pʋsẽ. Tõnd ka maan ned baa yen wẽnga, tõnd ka sãam ned baa a yen yelle, tõnd ka zãmb ned n deeg a bũmbu.

³ Mam sẽn gomd a woto wã, ka sẽn na n mong yãmb bʋʋm ye. Bala, mam dag n zoe n yeelame tɩ tõnd tagsda yãmb yelle, d sã n vɩ wall d sã n ki.

⁴ Mam sũur keema wʋsg ne yãmba, mam sũur nooma ne yãmba. Mam paamda belsgo. Baa tõnd namsgã fãa pʋgẽ, mam tara sũ-no-kãsenga.

⁵ Bala, tõnd sẽn ta Masedoan soolmẽ wã tɛka, tõnd yĩnsã ka tol n paam vʋʋsg baa bilf ye. Tõnd paama namsg buud fãa. Yɩng yaa maoore, la pʋgẽ yaa rabeem.

⁶ La Wẽnnaam sẽn belsd sũ-sãoong rãmbã, b belsa tõnd ne a Tit waoongã.

⁷ La ka ne a Tit waoongã bal ye, leb n yaa ne belsg ning yẽ sẽn paam yãmb nengẽ wã me. Yẽ togsa tõnd yãmb sẽn dat maam wʋsg to-to wã, yãmb nintãm la y sẽn dat n sõng maam to-to wã. Rẽ kɩtame tɩ mam paam sũ-noog wʋsg n paase.

⁸ Baa mam sebrã sã n sãama yãmb sũyã, mam ka maand m bãngẽ ye. La baa mam sã n maana m bãngẽ, yɩɩ wakat bilf pʋgẽ, mam sẽn yã tɩ seb-kãngã sãama yãmb sũyã yĩnga.

⁹ Mam maanda sũ-noog moasã, la ka m sẽn sãam yãmb sũyã yĩng ye. Yaa yãmb sũ-sãoongã sẽn kɩt tɩ yãmb tek yam n kos sugrã yĩnga. Bala, yãmb sũ-sãoongã yii Wẽnnaam nengẽ. Rẽ wã, tõnd ka maan yãmb bũmb sẽn na n sãam-y ye.

¹⁰ Sɩd me, sũ-sãoong ninga sẽn yit Wẽnnaam nengẽ wã kɩtdame tɩ ned tek yam n kos sugr n paam fãagre, la ned ka maand a bãngẽ rẽ yĩng ye. La dũni wã sũ-sãoong wata ne kũum.

¹¹ La ad sũ-sãoong ninga sẽn yit Wẽnnaam nengẽ wã sẽn modg yãmb tɩ y maan bũmb ninsi: A kɩtame tɩ y yiis yell y mens zutu, a waa ne sũ-pa-noaanga, a waa ne rabeem, a waa ne ratem kãsenga, a waa ne yamleoogo, a waa ne sɩbgre. Bũmba fãa pʋgẽ, yãmb wilgame tɩ y ka tar yell yel-kãnga pʋg ye.

¹² Rẽ wã, mam sẽn gʋls yãmbã, ka sẽn maan-a yellã yĩnga, a ka ned ning yẽ sẽn beegã me yĩng ye. La yaa sẽn na n yɩl tɩ yãmb sẽn nong tõnd to-to wã yɩ vẽeneg yãmb sʋk Wẽnnaam taoore.

¹³ Yaa rẽ n kɩt tɩ tõnd paam belsgã. La sẽn paasd tõnd sẽn paam belsgã, a Tit sẽn paam raood ning yãmb fãa nengẽ t'a sũurã noomẽ wã leb n kõo tõnd sũ-noog wʋsg n yɩɩd yɛsa.

¹⁴ Sã n ya mam sẽn pẽg m meng bilf a Tit taoor yãmb wɛɛngẽ wã, bõn-kãng yãnd ka tar maam ye. Wa tõnd sẽn dag n togs yãmb sɩd daar fãa wã, woto me, tõnd sẽn pẽg d mens yãmb wɛɛngẽ a Tit taoorã me yɩɩ sɩda.

¹⁵ La a Tit sã n tẽeg yãmb fãa sakrã yelle, a paamda nonglem wʋsg yãmb yĩng n paasdẽ, bala yãmb deega yẽnda ne rabeem la rigbu.

¹⁶ Mam maanda sũ-noogo, mam sẽn n tõe n kɩs sɩd ne yãmb bũmb fãa pʋgẽ wã yĩnga.

8

¹ M ba-biisi, tõnd datame tɩ yãmb bãng Wẽnnaam barkã sẽn puk wẽnd-dot nins sẽn be Masedoannã sʋk to-to.

² Baa ne bãmb sẽn paam makr ne tood wʋsgã, bãmb sũ-noogã yɩɩ kãsenga, tɩ baa ne b naongã sẽn ya wʋsgã, b kõo wʋsg ne sũyã fãa.

³ Mam kɩta kaset tɩ bãmb kõo ne b pãng tɛka. B kõo ne yamleoog n yɩɩd b pãng sẽn tõe menga.

⁴ Bãmb kosa tõnd ne b sũyã fãa tɩ d bas-b tɩ b naag n sõng Wẽnnaam nin-tũusidsã sẽn be Zeruzalɛmã.

⁵ Bãmb deng n dɩka b mens n kõ Zu-soabã, la b sak tõnd ne Wẽnnaam daabo. Woto yɩɩda tõnd sẽn da tẽedã.

⁶ Tõnd kosa a Tit me t'a maan nonglem tʋʋm-kãng yẽ sẽn sɩng yãmb sʋkã n baase.

⁷ A wa yãmb sẽn modgd ne bũmb fãa wã: Sã n ya tẽebo, goama, bãngre, la yãmb sẽn wɩngd ne bũmb fãa, la y tar nonglem tõnd yĩngã, bɩ y modg ne nonglem tʋʋm kãng maaneg me.

⁸ Mam sẽn yet a woto wã, ka pãng la m dat n maan-y ye, la yaa sẽn na n dɩk neb a taabã sẽn maandã n mak n ges yãmb nonglema sã n yaa sɩda.

⁹ Bala, yãmb mii tõnd Zu-soab a Zezi Kirist barkã. Tɩ baa bãmb sẽn ya arzɛk soabã, b maana b meng naong soab yãmb yĩnga, tɩ ne bãmb naongã, yãmb na paam arzegse.

¹⁰ Yaa mam tagsog la m kõt yel-kãngã zugu. Bala, bõn-kãng toga ne yãmba, yãmb sẽn yɩ pipi rãmb sẽn sɩng ne rɩɩgẽ n maan ligd-lobrã, la ka y sẽn yɩ pipi rãmb n maan-a wã bal ye, yãmb n yɩ pipi rãmb n tʋlg n na n maan-a.

¹¹ Rẽ wã, moasã, bɩ y maan-a n baase, tɩ yãmb sẽn yãk yam n wilg tɩ y rat n maan-a lame wã, bɩ y kell n tall datem n maan-a n baase, la maan-y-yã-a wa sẽn zems yãmb pãnga.

¹² Bala, ned sã n tar datem tɩ kõ wa sẽn zems yẽ sẽn tar bũmb ningã, a tata Wẽnnaam yam n yɩɩd yẽ sẽn na n dat n kõ bũmb ning yẽ sẽn ka tarã.

¹³ Bala, mam ka rat tɩ yãmb sẽn sõngd neb a taabã kẽes yãmb naong pʋg ye. La yaa sẽn na yɩl tɩ yãmb zeng taaba, tɩ yãmb sẽn tar bũmb ning tɩ sek moasa wã tõe n sõng bãmb b naongã pʋgẽ,

¹⁴ la tɩ bãmb me sã n wa tar bũmb ning tɩ sekd-ba, bɩ b tõe n sõng yãmb me y naongã pʋgẽ. Sã n yɩ a woto, yãmb na n yɩɩ zem-taaba,

¹⁵ tɩ yɩ wa gʋls sõamyã sẽn yeel tɩ: Ned ning sẽn paam wʋsgã ka tar baa fʋɩ tɩ loog ye, la bũmb ka paoog ned ning sẽn paam bilfã ye.

¹⁶ Bark Wẽnnaam, bãmb sẽn ning yam-yãk-kãnga me a Tit sũurẽ yãmb yĩngã.

¹⁷ Bala, a Tit saka tõnd kosgã, la yẽ sẽn tar ratma, a yãka yam ne a sũur fãa n na n wa yãmb nengẽ.

¹⁸ Tõnd tʋmda ba-biig ning sẽn tar pẽgr zĩiga fãa ne koe-noogã tʋʋmd a Zezi tẽedba sʋkã t'a tũ a Tit.

¹⁹ Sẽn yɩɩd fãa, a Zezi tẽedbã yãka yẽnda t'a yãag tõnd sõngr-tʋʋm-kãnga pʋgẽ, tõnd sẽn tʋmd Zu-soaba meng waoogr yĩnga, la tɩ yɩ kaset tɩ tõnd tara ratem tɩ maan ne d sũyã fãa.

²⁰ Tõnd maanda a woto tɩ ned da wa n tõog n dõd tõnd ne ligd kãng sẽn ya wʋsg tɩ tõnd get a yellã wɛɛngẽ ye.

²¹ Bala, tõnd baood n maana sẽn ya neere, ka Zu-soaba nifẽ bal ye, la ninsaalba nifẽ me.

²² Tõnd tʋmda d ba-biiga ne bãmba. Tõnd paama weer naoor wʋsg n mak a tʋʋmdã ratem n gese, la moasã a wilgame t'a tara ratem ne tʋʋma n yɩɩd pĩnda, a sẽn kɩs sɩd ne yãmbã yĩnga.

²³ Woto, sẽn kẽed ne a Tit wɛɛngẽ, yẽ yaa mam tũud-n-taaga la m tʋmd-n-taag yãmb yĩnga. La sã n ya ne d ba-biisã, bãmb yaa neb tẽedbã sẽn tʋme, Kirist waoogr yĩnga.

²⁴ Dẽ wã, bɩ y maan bũmb n wilg bãmb ne a Zezi tẽedbã tɩ yãmb tara nonglem, tɩ rẽ na n wilgame tɩ tõnd dag n tara bʋʋm la d sẽn pẽgd yãmb bãmb nifẽ wã.

9

¹ Ka tɩlɛ tɩ mam gʋls yãmb sõngr ning sẽn tog n kõ tẽedbã wɛɛngẽ ye.

² Sɩd me, mam mii yãmb ratem sõngã, la mam pẽga m meng yãmb wɛɛngẽ Masedoan neba taoor n yeel tɩ Akayi neba rag n seglame n sɛ hal rɩɩgẽ, la yãmb sẽn modgdã kɩtame tɩ neb wʋsg me rat n maane.

³ Mam tʋmda ba-biisã yãmb nengẽ, tɩ tõnd sẽn pẽg yãmbã kõn yɩ zaalem bõn-kãng wɛɛngẽ ye, la tɩ yãmb na segl n sɛ wa mam sẽn yeelã.

⁴ Mam ka rat tɩ Masedoan nebã yãag maam n wa n mik tɩ yãmb ka segl n sɛ ye, tɩ tõnd sẽn kɩs sɩd ne yãmbã da wa n lebg yãnd ne tõnd ye. La yaa m sẽn ka rat n yeel tɩ yãmb yãnda yĩnga.

⁵ Dẽ, mam tagsdame tɩ yaa neer tɩ m kos ba-biisã tɩ b reng maam taoor n wa yãmb nengẽ, n ges nonglem kũunã yãmb sẽn zoe n kãabã yelle, tɩ y tõe n segl n sɛ, tɩ yɩ yamleoog kũuni, la ra yɩ wa zoe-bõn kũun ye.

⁶ Bãng-y tɩ ned ning sẽn bʋt bilf na n tigsa bilfu, la ned ning sẽn bʋt wʋsg na n tigsa wʋsgo.

⁷ Bɩ ned kam fãa kõ wa sẽn zems a sẽn yãk yam a sũur pʋgẽ, la ra yɩ ne neng-gãneng wall modgr ye. Bala, Wẽnnaam nonga ned ning sẽn kõt ne sũ-noogo.

⁸ La Wẽnnaam tara pãn-tõog tɩ kõ yãmb bark buud fãa tɩ seke. Tɩ yãmb tõe n paam bũmb fãa, daar fãa, sẽn na sõng yãmb y ratmã fãa pʋgẽ n sek n kell tɩ y maan tʋʋm soamã fãa,

⁹ tɩ yɩ wa gʋls sõamyã sẽn yeelã: A kɩtame t'a tʋʋm sõama wã saag zĩig fãa. A kõo naong rãmba. Yẽ tɩrlem paada wakat sẽn kõn sa.

¹⁰ Soab ning sẽn kõt-a ka-koaad bõn-buudu, la b kõt-a bur t'a rɩtẽ wã na n kõo yãmb bõn-buudu, la b kɩt t'a wom wʋsgo, la b kɩt tɩ yãmb tɩrlma biis yɩ wʋsgo.

¹¹ Woto, yãmb na paam arzegs bũmb fãa pʋgẽ, n yãk tɩ yɩ nonglem kũuni tɩ neb wʋsg na pʋʋs Wẽnnaam barka, kũuna tõnd sẽn kõ-bã yĩnga.

¹² Bala, ka Wẽnnaam nebã bal la nonglem kũun kãngã na n sõng ye. A na n kɩtame tɩ neb wʋsg pʋʋs Wẽnnaam barka.

¹³ Bãmb sã n paam sõng-kãnga, b na n pẽga Wẽnnaam, yãmb sẽn sak n kɩs Kirist koe-noogã kaseto, la yãmb sẽn kõ kũun wʋsg bãmb yĩnga, la neba fãa yĩngã.

¹⁴ B pʋʋsda yãmb yĩng ne nonglem, Wẽnnaam sẽn sik bark kãseng yãmb zutã yĩnga.

¹⁵ Bark Wẽnnaam, bãmb kũuna noor sẽn ka tõe n togsa yĩnga.

10

¹ Maam a Poll kota yãmb ne sũ-bʋgsem, Kirist sõmblemã pʋgẽ, mam sẽn ya nin-bʋgsga, m sẽn wat n be ne yãmba la m ya nin-toaag m sẽn wat n zãr ne yãmbã.

² Mam kota yãmba, tɩ mam sã n wa n be yãmb nengẽ, bɩ y ra maan tɩ yɩ tɩlɛ tɩ mam yɩ nin-toaag wa mam sẽn tagsd n na n yɩ nin-toaag ne neb nins sẽn tagsd tɩ tõnd kẽnda wa sẽn zems yĩngã datmã ye.

³ Tõnd sɩd bee yĩng pʋga, la tõnd ka zabd wa yĩngã sẽn zabdã ye.

⁴ Bala, tõnd sẽn tar zab-teed nins n zabdẽ wã ka yĩng zab-teed ye. La zab-te-kãens tara pãng Wẽnnaam nifẽ n tõe n leeb pãens rãmbã n lubi.

⁵ Tagsd nins ne bũmb nins fãa sẽn zẽkd b mens n zabdẽ tɩ nebã kõn bãng Wẽnnaamã, tõnd leebd-b lame n lubdẽ, la tõnd tõogda tagsd buud fãa n kɩt tɩ b sak Kiristã.

⁶ Yãmb sã n wa n sak zãng fasɩ, tõnd seglame n na n sɩbg kɩɩsg buud fãa.

⁷ Yãmb geta bũmb nins yãmb ninã sẽn ne wã! Ned sã n tẽed t'a yaa Kirist rẽnda, bɩ a meng bãng bõn-kãngã me: Yẽ sã n ya Kirist rẽnda, tõnd me yaa Kirist rẽnda.

⁸ La baa mam sã n maand sũ-noog wʋsg bilf ne noor ning Zu-soabã sẽn kõ tõnd tɩ d paas yãmb pãnga, la ka sẽn na n sãam yãmbã, yãnd kõn yõk maam ye.

⁹ Mam ka rat t'a yɩ wa mam dat n kẽesa yãmb dabeem ne mam sɛbã ye.

¹⁰ Bala, b yetame tɩ: A Poll sɛba yaa toogo, la b tara pãnga, la b meng sã n be tõnd sʋka, b ka pãng ye, la b goamã ka tar yõod ye.

¹¹ Bɩ ned ning sẽn gomd a woto wã bãng neer tɩ tõnd sẽn ka be yãmb sʋk n gomd to-to d sɛbã pʋsã, tõnd sã n wa n be yãmb sʋk me, tõnd tʋʋmã yaa a woto bala.

¹² Tõnd ka saagd n zeng d mens wall d mak d mens ne neb nins sẽn wilgd tɩ b mens zemsame wã ye. La bãmb sẽn mamsd b mens la b makd b mens ne taabã, b ka yam ye.

¹³ Sã n yaa ne tõndo, tõnd ka rat n pẽg d mens tɩ loog ye, la tõnd na n dɩka mamsg ne tʋʋmd ning Wẽnnaam sẽn pʋɩ n kõ tõndo, la b leb n kɩt tɩ d tõog n ta hal yãmb nengẽ wã.

¹⁴ Tõnd ka loogd d toadg wa tõnd dag n ka ta hal yãmb nengẽ ye. Bala, tõnd talla Kirist koe-noogã n ta hal yãmb nengẽ.

¹⁵ Tõnd ka pẽgd d mens tɩ loog ne tʋʋm sẽn ya ned a to rẽnd ye. La tõnd tẽedame tɩ yãmb tẽebã sã n paasdẽ, tõnd tʋʋmdã na n lebga kãseng yãmb sʋka, zĩig ning sẽn ya tõnd dẽndã,

¹⁶ tɩ d moon koe-noogã soolem nins sẽn be yãmb taoorã, la ka tɩ d pẽg d mens ne tʋʋm nins sẽn zoe n tʋm neb a taab soolmẽ ye.

¹⁷ Wa Wẽnnaam gʋls sõamyã sẽn yeelã: Ned ning sẽn na n pẽg a menga, bɩ a pẽg a menga, a sẽn tũud Zu-soabã yĩnga.

¹⁸ Bala, ka ned ning sẽn wilgd t'a zemsame wã n tat Wẽnnaam yam ye, yaa Zu-soabã sẽn wilgd tɩ ned ninga zemsame wã.

11

¹ Mam nongẽ la yãmb sã n da tõe n sakẽ mam yalemdã bilfu! La yãmb sakdame.

² Bala, mam maanda sũ-kiir yãmb yĩnga, la yaa sũ-kiir sẽn yit Wẽnnaam nengẽ, tɩ bõe mam sẽn dɩk yãmb n kõ sɩd a yen tãa wã yĩnga. Tɩ mam tõe tall yãmb n kẽng Kirist nengẽ wa pʋg-sad sẽn ka sãam ye.

³ La baoosgo, a wa waafã sẽn maan sɩlem n zãmb a Awa wã, mam yɛɛsdame tɩ yãmb yam na n wa wẽnemd n lebg wẽng n kɩt tɩ y bas y sõmblema ne y pʋ-peelma y sẽn tar Kirist yĩngã.

⁴ Bala, ned a to sã n yɩ pipi n wa moon yãmb Zezi a to, tɩ ka Zezi ninga tõnd sẽn da moon yãmbã, wall yãmb sã n deeg sɩɩg a to sẽn ka Sɩɩg ninga yãmb sẽn dag n deegã, wall koe-noog a to tɩ ka yãmb sẽn da reeg pĩndã, yãmb sakda yẽ soab sõama.

⁵ La mam yaool n tẽedame tɩ m ka yɩ poorẽ soab bũmb baa a fʋɩ pʋgẽ, ne tẽn-tʋmdb nins sẽn yet b mens tɩ b yaa tẽn-tʋmd-kãsemsã ye.

⁶ Baa mam sã n ka gom minim-soaba, mam ka ned sẽn ka tar bãngr ye. La tõnd wilga bõn-kãng vẽeneg yãmb sʋk wakat fãa, bũmb fãa pʋga.

⁷ Bɩ Mam sẽn moon yãmb Wẽnnaam koe-noogã zaalma, n sik m meng n zẽk yãmbã, m maana yel-wẽnde?

⁸ Mam fãa a Zezi tẽedbã sẽn be zĩis a taabã, mam sẽn sak tɩ bãmb yao maam tɩ m sõng yãmba yĩnga. La mam sẽn da wa n be yãmb nengẽ n dat sõngrã, mam ka yɩ zɩɩb ned baa a ye yĩng ye.

⁹ Bala, ba-biis nins sẽn yi Masedoan n wa wã kõo maam bũmb ning sẽn da paoog maamã. Bũmba fãa pʋgẽ, mam gũusa m menga, n da wa n yɩ zɩɩb yãmb yĩng ye, la mam na n kell n gũusa m menga ne bõn-kãnga.

¹⁰ Ne Kirist sɩdã sẽn be mam sũurẽ wã, mam yetame tɩ ned ka tõe n gɩdg maam tɩ m ka pẽg m meng bõn-kãng wɛɛngẽ Akayi soolmã pʋgẽ ye.

¹¹ Bõe yĩng tɩ m yet a woto? Yaa mam sẽn ka nong yãmb yĩng bii? Wẽnnaam menga miime tɩ mam nonga yãmba.

¹² Mam sẽn maand bũmb ninga, mam na n kell n maan-a lame yɛsa, tɩ gɩdg neb nins sẽn baood weer n dat n pẽg b mens n yeel tɩ bãmb sẽn tʋmdã ne tõnd sẽn tʋmdã yaa a yembrã.

¹³ Nin-bãmba rãmb yaa zãmb tẽn-tʋmdba, la belgr tẽn-tʋmdba, n toeemd b mens n ya wa Kirist tẽn-tʋmdba.

¹⁴ La yõwã ka bõn-lingdg ye, bala, sʋtãanã meng toeemda a meng n lebg wa malɛk sẽn tar vẽenem.

¹⁵ Dẽ wã, yẽ tʋmtʋmdbã me sã n toeemd b mens n lebgd wa tɩrlem tʋmtʋmdba, ka bõn-yɛɛsdg ye. Bãmb baoosg na n yɩɩ wa b tʋʋmã sẽn ya to-to wã.

¹⁶ Mam leb n yetame: Bɩ ned da ges maam wa yalem ye, wall y sã n get maam wa yalma, bɩ y sak n deeg maam wa yalma, tɩ mam me tõe n pẽg m meng bilfu.

¹⁷ Mam sẽn gomd bũmb ningã, ka Zu-soabã n yet tɩ m gom ye. La mam gomda ne pɛl-kɛgenga, wa m yaa yalma, n pẽg m meng bõn-kãng pʋgẽ.

¹⁸ Neb wʋsg sẽn pẽgd b mens ne dũni yɛlã, mam me na n pẽga m menga.

¹⁹ Yãmb sẽn ya yam dãmb n yaool n sakd n deegd yalemb ne yamleoogo!

²⁰ Sɩd me, yãmb sakdame tɩ b kẽesd yãmb yembdo, tɩ b rɩt yãmba, tɩ b fãad yãmba, tɩ b ka nand yãmba, la b pãbd yãmb pegse.

²¹ Mam yetame tɩ yaa yãnde. Tõnd maana pãn-komsem n ka tõog n maan a woto ye. Baoosgo, ne bũmb ning fãa ned sẽn tar raood tɩ pẽg a menga, mam me tara raoodo, mam gomda wa yalma.

²² Bãmb yaa Hebre rãmba? Mam me yaa Hebre. Bãmb yaa Israyɛl buudu? Mam me yaa Israyɛl neda. B yaa a Abraham yagense? Mam me yaa a Abraham yagenga

²³ Bãmb yaa Kirist tʋmtʋmdba? Maam n leb n yɩɩda. Mam gomda wa m zugã ka be ye. Sã n ya ne tʋʋma, maam n yɩɩd-ba, ne bi-bees roog kõom, maam n yɩɩd-ba, ne pãbr deegre, maam n leb n yɩɩd-ba, la mam kolga kũum naoor wʋsgo.

²⁴ Zuif-rãmbã pãba maam ne kalwaas a yen ka pis-naase, naoor a nu.

²⁵ B pãba maam ne rasab naoor a tã, b loba maam kug vugri, koom-kogond sãama naoor a tã tɩ mam be b pʋse. Mam paa koom zug daar tõre la yʋng tõre.

²⁶ Kʋɩls rag n na n dɩɩ maam wakat kẽere, m kẽna pʋse. Fãadb rag n na n fãa maam. Mam tẽngẽ neb baoo n na n sãama maam. Neb nins sẽn ka Zuif buudã baoo n na n sãama maam, mam paama tood tẽns pʋsẽ, mam dag n na n kii wetẽ. Mam dag n na n kii ko-kãsengã zugu, zãmb ba-biis rag n na n kʋʋ maam.

²⁷ Mam tʋma tʋʋm-kegemse, mam namsame. Wakat kẽere, mam ka gũs ye. Kom la ko-yũud yõka maam. Mam gãanda kom wakat kẽere. Wakat kẽere, waood yõka maam la fut paooga maam,

²⁸ tɩ m ka gomd bũmb nins sẽn ketã ye. Mam tara zɩɩb daar fãa, a Zezi tẽedbã fãa yɛl sẽn pak maamã yĩnga.

²⁹ Ãnna pãng n boog tɩ mam dẽnd ka booge? Annã n lʋɩ yel-wẽnd pʋgẽ tɩ mam sũur ka sãame?

³⁰ Pẽg-m-meng sã n noome, mam na pẽg m pãng-komsem.

³¹ Wẽnnaam sẽn ya tõnd Zu-soab a Zezi Ba wã, sẽn tar-a bark wakat sẽn kõn sa wã miime tɩ mam ka yagd zĩrĩ ye!...

³² Mam sẽn wa n be Damasã, rĩm a Areta Gʋvɛrneerã ra kɩtdame tɩ b gũud Damas tẽnga noy n dat n yõk maam.

³³ La b kẽesa maam peoogẽ n tũnug roog fẽnetr n sik maam lalgã poor tɩ mam põse, t'a ka paam maam ye.

12

¹ Yaa tɩlɛ tɩ m pẽg m menga? Bõn-kãng ka tar yõod ye. Baoosgo, mam na n togsa mam sẽn yã yãab ninsi, la vẽnegr nins Zu-soabã sẽn kõ maamã.

² Yʋʋm piig la a naas sẽn looge, mam bãnga Kirist tẽed a yembr sẽn paam zẽkr n ta saas a tãab soabã. Mam ka mi yẽ soab sã n da bee a yĩngã pʋga, wall a sã n da ka be a yĩng pʋgẽ ye, la Wẽnnaam miime.

³ Rao-kãngã sã n da bee a yĩngã pʋga, wall a ka be, mam ka mi ye, la Wẽnnaam miime, la mam sẽn mi yaa tɩ

⁴ rao-kãngã zẽkame n kẽng Paradi, la a wʋma goama, ned sẽn ka tõe n togs ye, la b sẽn ka kõ ninsaal noor t'a gom-a ye.

⁵ Mam na n pẽga m meng rao-kãnga wɛɛngẽ, la mam mengã wɛɛngẽ, mam ka na n pẽg n meng ye. Sã n ka m pẽg m meng pãn-komsem bala.

⁶ La mam sã n dat n pẽg m menga, mam ka na n maan yalemd ye, bala mam na n togsa sɩda. La mam gũusda m meng tɩ ned da wa n yã mam sẽn maandã, la a wʋm mam sẽn gõmdã n tags tɩ maam n yɩɩd ye.

⁷ La sẽn na n yɩl tɩ mam da wuk m meng vẽneg-kãsem kãensã yĩnga, b ninga gõaag mam yĩnga pʋgẽ, sẽn ya sʋtãan tʋmtʋmd t'a paoogd maam, tɩ mam da wa n pid ne wuk m meng ye.

⁸ Mam bõsa Zu-soaba naoor a tãab tɩ b kɩt tɩ bõn-kãng loog n bas maam.

⁹ La b yeela maam yaa: "Mam barka sekda foom. Bala, yaa pãn-komsmã pʋg la mam pãngã maand a tʋʋmde." Dẽnd mam na n maana sũ-noog m pãn-komsmã pʋga, tɩ Kirist pãngã zĩnd mam zugu.

¹⁰ Yaa woto yĩng tɩ mam maand sũ-noog m pãn-komsmã pʋgẽ, paoogrã pʋgẽ, m sẽn ka tar m sẽn dat pʋgẽ, namsg pʋgẽ, la tood mam sẽn sak Kirist yĩngã pʋgẽ. Bala yaa mam pãn-komsmã wakat la mam tar pãnga.

¹¹ Yãmb modga maam tɩ m yɩ yalma. Sɩd me, yaa yãmb n da tog n gom n sõng maam. Bala, b sẽn boond-b rãmb tɩ tẽn-tʋmd-kãsemsã pʋs n ka yɩɩd maam ye, baa ne mam sẽn ka baa fɩ wã.

¹² Bãn nins sẽn ya toor n wilgdẽ tɩ mam yaa tẽn-tʋmdã maana yãmb sʋk tɩ neba yã, yɩɩ ne sũ-mare, makrã fãa pʋgẽ, la ne bãna, la bõn-yɛɛsdse, la ne bõn-bãna.

¹³ Yaa bõe la yãmb paam-y tɩ ka ta a Zezi tẽedba a taabã sẽn tarã, sã n ka mam sẽn ka sak tɩ y ges mam yellã bala? Kõ-y-m sugr ne kong kãngã.

¹⁴ Ade, mam seglame n sɛ n na n wa yãmb nengẽ naoor a tãab-n-soaba, la yãmb ka na n ges mam yell ye. Bala, mam ka baood yãmb bũmb ye, la yaa yãmb mensã la m baooda. Sɩd me, ka kamb n tog tigs paoong b ba-rãmb yĩng ye, la yaa ba-rãmbã n tog n tigs paoong b kamb yĩnga.

¹⁵ Ne maam, mam na n kɩsa bũmb fãa ne yamleoogo, la m kɩs m menga fãa yãmb mensa yĩnga. Mam sẽn nong yãmb wʋsgã kɩtame tɩ yãmb ka le nong maam wʋsg laa?

¹⁶ Baa sã n ya a woto, mam ka yɩ zɩɩb yãmb yĩng ye la nina na n tagsame tɩ mam maana sɩlem n paam yãmba.

¹⁷ Rẽ yĩnga, mam sẽn tʋm neb nins yãmb nengẽ wã, m tũnuga bãmb ned a bõe n belg yãmb n deeg bũmbu?

¹⁸ Mam sagla a Tit t'a wa yãmb nengẽ, la m tʋma ba-biig a yen t'a tũ yẽnda. Rẽ yĩnga, a Tit belga yãmb n deeg bũmbu? Yẽnda tagsgã ne mam dẽnda ka a yembr sɩda? Tõnd tʋʋm tʋmdɩ wã ka a yembr sɩda?

¹⁹ Hal daar zãra, yãmb da tagsame tɩ tõnd dat n baoo bʋʋm yãmb taoore, la ka a woto ye. Yaa Wẽnnaam taoore, Kirist tũudmã pʋgẽ la tõnd gomda. M zo-nongdse, bõn-kãensã fãa yaa yãmb tẽebã bɩɩsg yĩnga.

²⁰ Bala, mam zoeta m na n wa wa n mik tɩ yãmb ka ya wa mam sẽn datã ye, la tɩ yãmb da mik tɩ mam mengã ka ya wa yãmb sẽn datã ye. Mam yɛɛsdame tɩ welgre, la sũ-kiiri, la kis-taaba, la geesem-geesem, la wɩdga, la paoog-taaba, la wuk-m-meng la zũnglug na n wa zĩnd yãmb sʋka.

²¹ Mam zoeta m na n wa wa yãmb nengẽ, tɩ mam Wẽnnaamã leb n ning maam yãnd yãmb yĩnga, la tɩ mam da wa n yãbe, neb wʋsg sẽn dag n maan yel-wẽn n ka tek yam n kos sugr yĩnga, la b tʋʋm-dẽgdã la b yoobã yĩnga, la tʋʋm beedã b sẽn maana yĩng ye.

13

¹ Mam wata yãmb nengẽ naoor a tãab-n-soaba. Yɛla fãa na n paama manegre, ne neb a yiib bɩ a tãab kaseto.

² Mam sẽn dag n zĩnd yãmb nengẽ naoor a yiib-n-soabã, mam dag n zoee n togsa yãmb bõn-kãngã, la dũnna, mam sẽn ka be yãmb nengẽ wã, mam leb n deng n togsd-a-la neb nins sẽn maan yel-wẽna wakat sẽn loogã, la neb a taabã fãa. Mam sã n lebg n wa yãmb nengẽ, m ka na n bas ned baa yembr ye.

³ Bala, yãmb baooda bãnd sẽn wilgd tɩ Kirist tũnugda maam n gomda. Bãmb yaool n ka pãn-komsem soab yãmb yĩng ye, la b yaa pãn-kãseng soab yãmb sʋka.

⁴ Bala, b kaa a Zezi da-pɩk zug b pãn-komsem yĩnga, la bãmb vɩɩ ne Wẽnnaam pãnga. Tõnd me yaa pãn-komsem dãmb a Zezi tũudmã pʋgẽ, la tõnd vɩɩ ne bãmba n tʋmd yãmb yĩnga, ne Wẽnnaam pãnga.

⁵ Fees-y y mens y toore, n ges yãmb sã n bee tẽebã pʋgẽ. Mak-y y mens y toor n gese. Yãmb ka mi t'a Zezi Kirist bee yãmb pʋsẽ laa? Sã n ka rẽ, dall makrã kɩtdame tɩ yãmb ka paamd tõogr ye.

⁶ La mam tẽedame tɩ yãmb miime tɩ makrã ka kɩtd tɩ tõnd ka tõogdẽ ye.

⁷ Baoosgo, tõnd pʋʋsda Wẽnnaam yãmb yĩng tɩ y kõn maan bũmb baa yen sẽn ya wẽng ye. Ka tɩ wilg tɩ tõnd tõogda makr pʋgẽ ye, la yaa tɩ yãmb na maan sẽn ya neere, baa sã n wẽnda wa tõnd ka paamd tõogr makr pʋgẽ.

⁸ Bala, tõnd ka tar pãng n na n zab ne sɩd ye, tõnd sẽn tar pãng ningã yaa sẽn na n sõng sɩdã.

⁹ Tõnd sẽn wat n maan sũ-noog d pãn-komsmã wakatã tɩ yãmb tara pãnga, la tõnd sẽn kot bũmb ninga d pʋʋsg pʋgẽ, yaa tɩ yãmb na zems zãnga.

¹⁰ Yaa rẽ yĩng tɩ mam gʋlsd yãmb bõn-kãense, wakat ning mam sẽn ka be yãmb nengẽ wã, tɩ mam sã n wa n wa yãmb nengẽ, mam kõn yɩ nin-toaag ne yãmba, ne noor ning Zu-soabã sẽn kõ maam yãmb sõngr yĩnga, la ka y sãoong yĩngã ye.

¹¹ La sẽn keta, m ba-biisi, paam-y sũ-noogo, modg-y n zems-y zãnga. Sagl-y taaba, paam-y yam a yembre, zĩnd-y ne taab ne bãane. La Wẽnnaam sẽn ya nonglem la laafɩ soabã na pa ne yãmba.

¹² Pʋʋs-y taab ne mokr sẽn ya sõama. Wẽnnaam nebã fãa pʋʋsda yãmba.

¹³ Bɩ Zu-soab a Zezi barkã la Wẽnnaam nonglemã, la Sɩɩg-sõng lagem-n-taar zĩnd ne yãmb fãa.