1

¹ Maam a Polle, sẽn paam-a boolg tɩ yɩ Kirist Zezi tẽn-tʋmda, wa sẽn zems ne Wẽnnaam daabã, ne ba-biig a Sostɛn n gʋlsd seb kãngã,

² n na n tʋm Wẽnnaam tẽedbã sẽn be Korẽntã. Bãmb yaa neb sẽn welg toor Kirist maasem yĩnga, tɩ b tõe n yɩ pʋ-peelem dãmba. Sebrã yaa neb nins fãa sẽn pʋʋsd ne tõnd Zu-soab a Zezi Kirist yʋʋre, baa b sẽn be zĩig ninga yĩnga. A Zezi Kirist yaa bãmb Zu-soaba, la tõnd me Zu-soaba.

³ Bɩ tõnd ba a Wẽnnaam ne Zu-soab a Zezi Kirist ning yãmb zut barka, la b kõ yãmb laafɩ.

⁴ Mam sã n tagsd yãmb yelle, mam pʋʋsda Wẽnnaam bark wakat fãa, b sẽn ning yãmb zut bark Kirist Zezi pʋgẽ wã yĩnga.

⁵ Tɩ yãmb paam bũmb fãa wʋsgo, sã n yaa goama wall bãngr fãa.

⁶ Bala, Kirist kasetã kɩɩ yẽg yãmb pʋgẽ sõama.

⁷ Woto, yãmb sẽn gũud tõnd Zu-soab a Zezi pukrã, kũun baa a yen ka paoog yãmb ye.

⁸ Bãmb na n kɩtame tɩ y yals kãenkãe a woto hal tɩ wakat ta, tɩ rõadg kõn zĩnd yãmb zut tõnd Zu-soab a Zezi Kirist daarã ye.

⁹ Wẽnnaam, sẽn bool-a yãmb tɩ y paam lagem-n-taar ne bãmb Bi-ribl a Zezi Kirist sẽn ya tõnd fãagdã, bãmb yaa maan-sɩd soaba.

¹⁰ M ba-biisi, mam bõosda yãmb ne tõnd Zu-soab a Zezi Kirist yʋʋre, tɩ y kɩt tɩ y goama tũud taaba, tɩ welgr da zĩnd yãmb sʋk ye. Zems-y taab sõama ne yam a yembre, tagsg a yembr pʋgẽ.

¹¹ Bala, m ba-biisi, a Kolowe nebã wilga maam tɩ ka-wʋm-taab n be yãmb sʋka.

¹² Mam wʋmdame tɩ yãmb ned fãa yetame tɩ yẽ yaa a Poll neda, wall a Apolos neda, wall a Sefas neda, wall Kirist neda.

¹³ Kirist welgame laa? Dẽ, b kaa a Poll da-pɩk zug yãmb yĩng laa? Bɩ yaa ne a Poll yʋʋr la yãmb paam lisgu?

¹⁴ Mam pʋʋsda Wẽnnaam barka, mam sẽn ka lis yãmb ned baa a yembre, sã n ka a Kirispus la a Gayusã.

¹⁵ Woto, ned baa a yembr ka tõe n yeel tɩ b lisa yãmb ne mam yʋʋr ye.

¹⁶ Mam lisa a Stefanas zaka rãmba, la mam ka mi m sã n lisa ned a to me ye.

¹⁷ Bala, Kirist ka tʋm maam tɩ m kẽng n lis neb ye, la yaa tɩ moon koe-noogã. Ka tɩ moon-a ne gom-minim, tɩ m ra wa n kɩt tɩ Kirist ra-pɩkã lebg bõn-yaalg ye.

¹⁸ Bala, da-pɩkã koɛɛgã yaa yalemd ne neb nins sẽn sãamd-bã la ne tõnd dãmb sẽn paam fãagrã, a yaa pãng sẽn yit Wẽnnaam nengẽ.

¹⁹ Rẽnda n kɩt tɩ b gʋls n yeele: Mam na n sãama yam dãmba yam, la m kɩt tɩ neb nins sẽn tar bãngr lebg zaalem.

²⁰ Yam soabã bee yɛ? Tõog karen-saambã bee yɛɛne? Zamaan kãngã nokoɛɛm wẽedã bee yɛ? Dẽ yĩnga, Wẽnnaam ka kɩt tɩ dũni yam lebg yalemd sɩda?

²¹ Bala, dũni wã sẽn ka tũnug Wẽnnaam yamã n bãng bãmbã, a meng yama pʋgẽ wã yĩnga, a taa Wẽnnaam yam tɩ tall koe-moonegã yalemda n fãag neb nins sẽn tẽedã.

²² Zuif-rãmbã kotame tɩ b maan bõn-bãna, tɩ Gɛrk-rãmbã baood yam.

²³ La tõnd moonda Kirist ning b sẽn ka da-pɩk zugã. Koe-kãng yaool n yaa bõn-lakdg ne Zuif-rãmbã, la a ya yalemd ne buud a taabã.

²⁴ La sã n yaa ne neb nins sẽn paam-b boolgã, tɩ b yaa Zuif tɩ b yaa Gɛrke, koɛɛgã yaa pãng sẽn yit Wẽnnaam nengẽ, yam sẽn yit Wẽnnaam nengẽ.

²⁵ Bala, bũmb ning sẽn ya yalemd ne Wẽnnaamã yaa yam n yɩɩd ninsaalbã, la bũmb ning sẽn ya pãn-komsem ne Wẽnnaam tara pãng n yɩɩd ninsaalbã.

²⁶ M ba-biisi, ges-y yãmb sẽn dag n ya bũmb nins wakat ning b sẽn bool yãmba, sẽn ya-b yam dãmb wa neb sẽn yetã ka waoog yãmb sʋk ye. Pãng rãmb ka waooga, naam roog neb me ka waooga.

²⁷ La Wẽnnaam yãka dũni bũmb nins sẽn ya yalemdã n na n ning yam dãmb yãnde. Wẽnnaam yãka dũni bũmb nins sẽn ya pãn-komsmã n na n ning pãens rãmbã yãnde.

²⁸ Wẽnnaam dɩka dũni bũmb nins sẽn ka yõodã, bũmb nins nebã sẽn ka nandã, bũmb nins sẽn ka be wa, n na n kɩt tɩ sẽn be-bã lebg zaalem,

²⁹ tɩ ned baa a yen da waoog a meng Wẽnnaam taoor ye.

³⁰ Yaool n yaa Wẽnnaam n kɩt tɩ yãmb be Kirist Zezi pʋgẽ, Wẽnnaam kɩtame tɩ Kirist lebg tõnd yam, la d tɩrlem, la d welg-toore, la d fãagre,

³¹ t'a wa b sẽn gʋlsã: Bɩ ned ning sẽn waoogd a menga, waoog a meng Zu-soabã pʋgẽ.

2

¹ M ba-biisi, sã n ya ne maam, mam sẽn wa n wa yãmb nengẽ wã, ka ne gom-minim wall yam yɩɩdem la mam wa n na n moon koɛɛg n kɩs Wẽnnaam kaset ye.

² Bala, mam ka tags tɩ yaa sõama tɩ mam bãng bũmb a to yãmb sʋkã tɩ sã n ka a Zezi Kirist, soab ning b sẽn ka da-pɩk zugã ye.

³ Mam sẽn dag n be yãmb nengẽ wã, mam mengã dag n bee pãn-komsem pʋgẽ tɩ dabeem la rigb wʋsg dag n tar maam.

⁴ Mam goama ne m koe-moonegã ka yɩ ne yam goam sẽn na kɩt tɩ ned tẽ ye, la yɩɩ ne Sɩɩgã tʋʋma la a pãnga.

⁵ Tɩ yãmb tẽebã da wa n yẽbg ninsaalb yam zug ye, la yɩ Wẽnnaam pãngã zugu.

⁶ Yaool n yaa yam la tõnd moond neb nins sẽn zems zãngã sʋka. Ka dũni kãngã yam, wall dũni kãngã nanams yam ye. Wẽnnaam na n kɩtame tɩ bõn-kãens fãa ka zĩnd pãng ye.

⁷ Tõnd moonda Wẽnnaam yam sẽn ya yel-solemde la sẽn solge, tɩ Wẽnnaam pĩnd n segl hal sẽn deng zamaan sɩngre, tõnd waoogr yĩnga.

⁸ Dũni kãngã naab baa a yen ka bãng yam kãng ye, bala, b sã n dag n bãngẽ-yã-a, b dag n kõn ka tõnd Zu-soab sẽn so ziirã da-pɩk zug ye.

⁹ La yaa wa b sẽn gʋlsã: Bũmb ned nif sẽn nan ka yã ye, bũmb ned tʋbr sẽn nan ka wʋm ye. La bũmb sẽn nan ka wa ninsaal tagsgẽ ye, bũmb ning fãa Wẽnnaam sẽn segl neb nins sẽn nong bãmbã yĩnga.

¹⁰ Wẽnnaam vẽnega yam kãng ne tõndo, Sɩɩg-sõng maasem yĩnga. Bala, Sɩɩgã feesda bũmb fãa, baa ne bũmb nins sẽn solg hal Wẽnnaam pʋgẽ.

¹¹ Dẽ wã, ãnna n be ninsaalb sʋk n mi ninsaal yelle, tɩ ka ninsaal sɩɩg sẽn be a pʋgẽ wã? Woto me, ned baa a yen ka mi Wẽnnaam yelle, sã n ka Wẽnnaam Sɩɩgã ye.

¹² Tõnd yaool n ka deeg dũni sɩɩg ye, la yaa Sɩɩg sẽn yit Wẽnnaam nengẽ, tɩ tõnd tõe n bãng bũmb nins Wẽnnaam sẽn kõ tõndo, b nimbãan-zoeerã yĩnga.

¹³ Tõnd sẽn gomd bõn-kãens yellã, ka ne goam sẽn yit ninsaal yam pʋgẽ ye, la yaa ne goam Wẽnnaam Sɩɩgã sẽn kõta, n dɩkd yɛl sẽn ya sɩɩg yɛl n bilgd neb sẽn tagsd sɩɩg yɛlã yelle.

¹⁴ La ninsaal sẽn ya yĩng neongã ka tõe n deeg bũmb nins sẽn yit Wẽnnaam Sɩɩgã nengẽ wã ye, bala, b yaa yalemd ne yẽnda. La a ka tõe n bãng-b ye, bala, yaa ne Sɩɩg-sõngã la ned tagsd b yelle.

¹⁵ La ned ning sẽn tagsd sɩɩgã yɛlã, yẽnda yẽ tagsda bũmb fãa yelle, la ned baa a yen ka bʋʋd yẽnda bʋʋd ye.

¹⁶ Sɩd me, ãnna soab n bãng Zu-soabã tagsg n na n sagl-ba? La ne tõndo, tõnd tara Kirist tagsgo.

3

¹ Sã n ya ne maam, m ba-biisi, mam ka tõog n gom ne yãmb wa neb sẽn tagsd sɩɩgã yell ye, la yaa wa ne neb sẽn vɩ yĩng sakr pʋgẽ, wall kom-bõoneg Kirist pʋgẽ.

² Mam ka kõ yãmb rɩ-taok ye, yaa bĩisim, bala, yãmb pʋgã da ka tõe rɩ-taok ye. La baa ne moasã me, yãmb pʋsã ket n ka tõe-a ye, bala, yãmb ket n tũuda yĩngã ratem.

³ Sũ-kiirã ne ka-wʋmd-taabã sẽn be yãmb sʋkã, dẽ yĩnga, yãmb ka neb sẽn sakd yĩngã ratem, la y kẽnd wa ninsaal sẽn maandã sɩda?

⁴ Ned a yen sã n yeel tɩ yẽ yaa a Poll karen-biiga, tɩ ned a to yeel tɩ yẽ yaa a Apolos karen-biiga,

⁵ ka ninsaalemd la rẽnda sɩda? A Apolos yaa bõe, t'a Poll ya bõe? Bãmb yaa tʋmtʋmdb bal Wẽnnaam sẽn tall n kɩt tɩ yãmb tẽ a Zezi, n zems ne Zu-soabã sẽn tees yãmb a soaba.

⁶ Maam n sele, t'a Apolos zãgs koom, la yaa Wẽnnaam n kɩtd tɩ koodã bɩtẽ.

⁷ Woto, ka ned ning sẽn sel-a wã la bũmb ye. Ka ned ning sẽn zãgs-a koomã me n ya bũmb ye. Yaa Wẽnnaam, soab ning sẽn kɩtd-a tɩ koodã bɩtẽ wã n ya bũmbu.

⁸ Ned ning sẽn sel-a wã, la ned ning sẽn zãgs-a koomã yaa yembr bala, la ned fãa na n deega a keoor wa zems a tʋʋmde.

⁹ Bala, tõnd yaa tʋmd-n-taas ne Wẽnnaam. Yaa yãmb la Wẽnnaam Pʋʋgo, Wẽnnaam roogo.

¹⁰ Wẽnnaam nimbãan-zoeerã b sẽn maana yĩnga, mam yẽbga roogã wa tãn-met sẽn tar yam, la ned a to waa n mee yẽbgrã zugu. La bɩ ned fãa gũus ne a sẽn met to-to yẽbgrã zugã.

¹¹ Bala, ned baa a yen ka tõe n yẽbg yẽbgr a to tɩ ka sẽn be-a wã ye, sẽn dat n togs t'a Zezi Kirist bala.

¹² La ned sã n me yẽbg-kãng zug ne sãnem, wall wanzuri, wall kug buud sẽn be yõodo, wall raoogo, wall yamdo, wall moodo, ned fãa tʋʋmd na n pukame.

¹³ Bala, daarã na n kɩtame tɩ b bãng-a. Tɩ bõe bugmẽ la ned fãa Tʋʋmd na n puki, la bugmã na n maka ned fãa tʋʋmd n ges a sẽn ya ne bũmb ninga.

¹⁴ Bugmã sã n ka rɩ tʋʋmd ned sẽn maan yẽbg-kãng zugã, sẽn tʋm-a wã na paam keoore.

¹⁵ La bugmã sã n dɩ tʋʋmd ning ned sẽn maane, na n yɩɩ bõn ne a soaba. Soab kãng na n paama fãagre, la a na yɩɩ wa ned sẽn pɩʋʋg bugum n põse.

¹⁶ Yãmb zɩ tɩ yãmb yaa Wẽnnaam roogo, la tɩ Wẽnnaam sɩɩgã bee yãmb pʋgẽ laa?

¹⁷ Ned sã n sãam Wẽnnaam doogã, Wẽnnaam na n sãam a soaba. Bala, Wẽnnaam doogã welga toore, la yaa yãmb la ro-kãnga.

¹⁸ Bɩ ned da belg a meng ye. Ned yãmb sʋkã sã n tagsd t'a tara dũni yam, bɩ a lebg yalma, t'a tõe n lebg yam soaba.

¹⁹ Bala, dũni yam yaa yalemd wẽnnaam taoore. Dẽ n kɩt tɩ b gʋls n yeel tɩ: Wẽnnaam yõkda yam dãmbã b sɩlmẽ wã.

²⁰ B leb n gʋlsame n yeel tɩ: Zu-soabã mii yam dãmba sẽn tagsd n lebd zĩig ninga, n miẽ tɩ b tagsgã yaa zaalem bala.

²¹ Dẽ, bɩ ned baa a yen da teeg ned n na n bao waoogr ye. Bala, bũmba fãa yaa yãmb dẽnda.

²² A Poll woo, a Apolos woo, a Sefas woo, dũni wã woo, vɩɩma woo, kũuma woo, bũmb nins sẽn be moasã wã woo, bũmb nins sẽn wat taoorã woo, fãa yaa yãmb dẽnda.

²³ Tɩ yãmb ya Kirist rẽnda, tɩ Kirist ya Wẽnnaam dẽnda.

4

¹ Woto yĩnga, ges-y tõnd wa Kirist tʋmtʋmdba, Wẽnnaam sẽn ning b yel-soalmã yell b nusẽ.

² B sẽn dat bũmb ning yel-gɛtb nengẽ bala, yaa tɩ b yã tɩ b maanda sɩd ne b tʋʋmde.

³ Ne maam, ka yell ne maam tɩ yãmba, wall dũni bʋ-kaoodb bʋ mam bʋʋd ye. Mam me ka kaood n meng bʋʋd ye, bala, bũmb ka zɩsg mam sũurã ye.

⁴ La ka rẽnda yĩng la mam zemsɩ ye. Sẽn kaood-a mam bʋʋd yaa Zu-soabã.

⁵ Woto yĩnga, da kao-y bũmb baa fɩ bʋʋd tɩ wakatã nan ka ta ye, tɩ Zu-soabã waoong nan ka ta ye. Bãmb sã n wa, b na n puka bũmb ning sẽn solg lik pʋgẽ wã, la b na n kɩtame tɩ bũmb nins nebã sẽn dag n saag b sũyã pʋsẽ wã pugsi. Wakat kãnga, Wẽnnaam n na n pẽg ned kam fãa.

⁶ M ba-biisi, mam dɩka mams kãens n bilg maam ne a Apolos yellã, yãmb wʋmb yĩnga. Woto, tõnd yĩnga, yãmb na zãms n bãnge, n da wa n maan tɩ yõsg bũmb ning sẽn gʋlsã ye, la yãmb ned baa a yen ka na n tong ned a yen poore, n wa waoog a menga, n paoog ned a to wã ye.

⁷ Bala, bõe n welgd foo ne f taabã? Bõe la fo tar tɩ ka ned n kõ foom? La sã n yaa tɩ yaa ned n kõ foom, bõe tɩ f waoogd f meng wa f ka reeg-a ned nengẽ?

⁸ Yãmb zoee n tɩgame, yãmb zoee n yaa arzegs rãmba, yãmb sɩngame n dɩt naam tɩ tõnd kaẽ ye. Wẽnd na kɩt tɩ y sɩd rɩ naam, tɩ tõnd me tõe n naag yãmb n dɩ naamã.

⁹ Bala, mam tẽedame tɩ Wẽnnaam kɩtame tɩ tõnd sẽn ya tʋmtʋmdba yɩ neba fãa zʋʋre, la neb bʋʋd sẽn kao tɩ b zems kũum, b sẽn kɩt tɩ tõnd lebg bõn-gets dũni rãmb yĩnga, la malegs yĩnga, la ninsaalb yĩngã yĩnga.

¹⁰ Kirist yĩnga, tõnd yaa yalemba, la yãmb yaa yam dãmb Kirist pʋgẽ, tõnd yaa pãn-komsem dãmba, la yãmb tara pãnga. Yãmb bee waoogre, la tõnd paamda paoogre.

¹¹ Hal tɩ ta moasã, kom la ko-yũudu, la naongo, la pãbre, la yeebg tara tõndo.

¹² Tõnd tʋmda ne d nus n yaadẽ. Nebã tʋʋda tõndo, la tõnd ningd-b la barka. Neb namsda tõndo, la tõnd sakda rẽnda.

¹³ Hal tɩ ta moasã neb kãnegda tõndo, la tõnd belsda neba. Tõnd lebga wa sagd dũni neb nifẽ, ned baa a yen sẽn ka rata.

¹⁴ Mam ka gʋlsd yãmb yõwã n na n ning yãmb yãnd ye. Mam keoogda yãmba, yãmb sẽn ya m kom-nongdsã yĩnga.

¹⁵ Sɩd me, ba yãmb sã n paam tɛtb tus piig Kirist pʋgẽ, yãmb ka tar ba-rãmb wʋsg ye. Bala, yaa maam n dog yãmb Kirist Zezi pʋgẽ, koe-noogã maasem yĩnga.

¹⁶ Woto yĩnga, mam sagenda yãmba: Yɩ-y mam togs-n-taase.

¹⁷ Bõn-kãng yĩnga, mam tʋma m bi-nongr a Tɩmote sẽn maand sɩd Zu-soabã pʋgẽ wã yãmb nengẽ. Yẽ na n tẽega yãmb so-tũuds nins sẽn be Kirist pʋgẽ tɩ mam zãmsd nebã, zĩig fãa, wẽnd-dota fãa pʋsã.

¹⁸ Neb kẽer wuka b mense, wa mam sã n da ka tog n wa yãmb nengẽ ye.

¹⁹ La sã n taa Zu-soabã raabo, bilf sã n paase, mam na n waa yãmb nengẽ. Mam na n gesa wuk-m-mens rãmb kãens pãnga, la ka b goama yell ye.

²⁰ Bala, Wẽnnaam soolma ka goam ye, la yaa pãnga.

²¹ Bõe la y rata? Y ratame tɩ m wa y nengẽ ne sãbsg bii, bɩ ne nonglem la ne sũ-bʋgsem yam?

5

¹ Wakat fãa, d wʋmdame tɩ b gomd dẽgd sẽn maand yãmb sʋkã yelle. Tʋʋm-dẽgd ning sẽn maand yãmb sʋkã, ned pʋs n pa yãt a buud bu-zemsã meng sʋk ye. Yaa woto hal tɩ baa yãmb ned a yembr tara a ba paga.

² Tɩ yãmb yaool n wuk y mense. Yãmb ka maan sũ-sãoong wa kũum yĩnga, tɩ b tõe n yiis ned ning sẽn maan a woto wã yãmb sʋk ye.

³ Sã yaa ne maam, baa mam yĩngã sẽn ka be be ne yãmbã, la yaa m tagsgã n be ne yãmbã, mam zoee n kaoo ned ning sẽn maan-a yell kãngã wã bʋʋdo, wa m sã n da bee be.

⁴ Bala, Zu-soab a Zezi yʋʋrã yĩnga, yãmb ne mam tagsgã naaga taaba, ne tõnd Zu-soab a Zezi pãnga.

⁵ Bɩ b bas ned a woto a Sʋtãan nugẽ, t'a yĩngã na sãame, t'a sɩɩgã na paam fãagr Zu-soab a Zezi daarã.

⁶ Bũmb ning yãmb sẽn dɩkd n waoogd y mensã ka neer ye. Yãmb ka mi tɩ rã-bɩll bilf bal kɩtedame tɩ zom-nagd tõr wuk laa?

⁷ Yiis-y rã-bɩl-kʋdgã n bas y mens n lebg yɩlma, tɩ y tõe n yɩ zom-nagd-paalga, rã-bɩll sẽn ka be yãmb pʋgẽ wã yĩnga. Bala, b kʋʋ Kirist sẽn ya tõnd zʋʋg-n-basã maoongo.

⁸ Woto yĩnga, bɩ d maan kibsã, la da yɩ ne rã-bɩl-kʋdgo, wall ne zãmb la pʋ-toog rã-bɩll ye. Bɩ yɩ ne pʋ-peelem la sɩd bur sẽn ka rã-bɩlle.

⁹ Mam gʋlsa yãmb m sebrã pʋgẽ n yeel-y tɩ y da paam lagem-n-taar ne tʋʋm-dẽgd maandbã ye.

¹⁰ M ka yet tɩ y lak y mens zãng fasɩ ne dũni kãnga tʋʋm-dẽgd maandbã, wall ne yão-be-nebã, la kãag n kõ m meng rãmba, wall wẽnd-naands pʋʋsdbã ye. Sã n yaa rẽ, na n yɩ tɩlɛ tɩ y yi n bas dũni.

¹¹ Mam sẽn gʋls yãmb bũmb ning moasã n yetẽ wã, yaa tɩ y ra paam lagem-n-taar ne ned ning sẽn yet t'a yaa yãmb ba-biiga, n yaool n maand tʋʋm-dẽgdo, wall a ya yão-be-neda, wall wẽnd-naands pʋʋsda, wall nin-tʋʋda, wall ned neng sẽn yilimd ne rãam, wall kãag n kõ m meng soab ye. Bɩ y pʋs n da naag ned a woto n dɩ ye.

¹² Bõe tɩ m na n kao kɛɛng neb bʋʋdo? Ka neb nins sẽn be ne yãmbã bʋʋd la yãmb kaood sɩda?

¹³ Wẽnnaam n na n kao kɛɛng nebã bʋʋdo. Gʋls-sõmyã yetame tɩ: Dig-y nin-wẽngã n yiis y sʋka.

6

¹ Yãmb ned sã n tar yell ne ned a to, a saagd n kẽnda neb nins sẽn ka sakd Wẽnnaama nengẽ n bʋ-ne-a bii, bɩ yaa tẽedbã nengẽ?

² Yãmb ka mi tɩ nin-sõamy wã na n kaoo dũni bʋʋd laa? La sã n yaa tɩ yaa yãmb n na n kao dũni wã bʋʋdo, dẽ yĩnga, yaa paoogr ne yãmb tɩ kao yɛl sẽn ka a woto bʋʋd sɩda?

³ Yãmb ka mi tɩ tõnd na n kaoo malegsã bʋʋd laa? Bõe tɩ tõnd ka na n kao vɩ-kãngã yɛlã bʋʋdo?

⁴ Yãmb sã n yaool n tar yɛl ne taab vɩ-kãngã yɛl poorẽ, yaa neb nins wẽnd-doogã sẽn ka gomd b yellã la yãmb kɩted tɩ b kao bʋʋdã.

⁵ Mam yeta woto n na n ning yãmb yãnde. Dẽ, ned ba yen ka be yãmb sʋkã n tar yam n tõe n bʋ yɛl nins sẽn be a ba-biisã sʋkã bʋʋd wɛ?

⁶ Ba-biig bʋʋda ne ba-biig a to neb sẽn ka tẽedb taoore.

⁷ Yãmb sẽn bʋʋd ne taabã zoe n yaa kongr yãmb yĩnga. Bõe tɩ yell sã n ka zemse, yãmb ka yõkd y mens n tʋk-a? Bõe tɩ yãmb ka basd bal tɩ b dɩk bũmb yãmb sẽn so?

⁸ Yaa yãmb n maand sẽn ka zemse, la y fãad neb a taaba, la yaa yãmb ba-biisi.

⁹ Yãmb zɩ tɩ neb nins sẽn maand sẽn ka zemsã ka na n paam Wẽnnaam soolem wa b rogem-pʋɩɩr laa? Da belg-y y mens ye. Tʋʋm-dẽgd maandbã, wẽn-naands pʋʋsdbã, nin-yoaadbã,

¹⁰ wẽng maandbã, raopã wall pagb sẽ gãe taabã, wagda wã, yão-beed dãmba, sẽn yũud-b rãam n tũubdẽ wã, nin-tʋʋdbã, fãadbã, baa a yen kõn paam Wẽnnaam soolma wa a dogem-pʋɩɩr ye.

¹¹ Yãmb neb kẽer yaool n dag n yaa a woto. La yãmb paama pekre, b kɩtame tɩ yãmb lebg sõama, b kɩtame tɩ yãmb zemse, tõnd Zu-soab a Zezi Kirist yʋʋrã maasem yĩnga, la ne tõnd Wẽnnaamã Sɩɩg pãnga.

¹² Mam tara noor tɩ maan bũmb fãa, la ka bũmba fãa n be yõod ye. Mam tara noor tɩ maan bũmb fãa, la mam ka na n sak n kẽ bũmb baa a yembr yemdẽ ye.

¹³ Rɩɩb yaa pʋg yĩnga, la pʋg yaa rɩɩb yĩnga. La Wẽnnaam na n sãama b yiiba fãa. Yĩngã ka tʋʋm-dẽgd yĩng ye, a yaa Zu-soabã yĩnga, la Zu-soabã yaa yĩngã yĩnga.

¹⁴ Wẽnnaam, sẽn vʋʋg-a Zu-soabã na n vʋʋga tõnd me ne b meng pãngã.

¹⁵ Yãmb zɩ tɩ yãmb yĩnga yaa Kirist will laa? Dẽ wã, mam na n dɩka Kirist wilã n kɩt tɩ lebg pʋg-yoodr willi?

¹⁶ Nokoeemd ka be tɩ yaa ayo ye. Yãmb zɩ tɩ ned sẽn lagem ne pʋg-yoodr lebga yĩng a yembr ne-a laa? Bala, b yeelame tɩ: Bãmb b yiibã na n lebga yĩng a yembre.

¹⁷ La ned ning sẽn loe ne Zu-soabã lebgda sɩɩg a yembr ne bãmba.

¹⁸ Zoe-y yoobo. Yel-wẽnd a to ninsaal sẽn maand ka be a yĩngã pʋgẽ ye. La ned ning sẽn maand yoob beegda a meng yĩnga.

¹⁹ Yãmb zɩ tɩ yãmb yĩnga yaa Sɩɩg-sõng roogo, Sɩɩg-sõng yãmb sẽn deeg Wẽnnaam nengẽ, la tɩ yãmb ka leb n so y meng laa?

²⁰ Bala, b lebs n daa yãmb toogo. Woto yĩnga, waoog-y Wẽnnaam ne y yĩngã la ne Sɩɩgã sẽn ya Wẽnnaam dẽndã.

7

¹ Ne bũmb ning yãmb sẽn gʋls maam n gom a yellã, yaa sõama rao yĩng t'a ra sɩɩs pag ye.

² La sẽn na yɩl tɩ ned ra maan yoobo, bɩ ned fãa paam a paga, tɩ pag fãa paam a sɩda.

³ Bɩ sɩdã kɩs pagã bũmb ning a sẽn tog n kis-a wã, la tɩ pagã me maan a woto ne a sɩdã.

⁴ Pag ka tar noor ne a mengã yĩng ye, yaa a sɩdã n tar noor ne. Rao wã me ka tar noor ne a mengã yĩng ye, yaa a pagã.

⁵ Bɩ ned fãa ra mong a to, sã n ka tɩ y zemsa taab noore, wakat bilf yĩnga, tɩ y tõe n paam weer n pʋʋs Wẽnnaam. Rẽ sã n loog bɩ y leb n bao taaba, t'a Sʋtãan da wa n mak yãmba, y sẽn ka tõe y meng yĩng ye.

⁶ Mam sẽn yet woto wã, ka tõog ye, yaa sore.

⁷ Mam datẽ lame tɩ raopã fãa yɩẽ wa maam. La ned fãa deegda a kũun Wẽnnaam nengẽ, t'a zagl rẽnd ya woto, t'a zagl me rẽnd ya bũmb a to.

⁸ Sã n ya neb nins sẽn ka yi kãadmã, la pʋgkõapã, mam yet-b lame tɩ b sã n kell n pa wa mam sẽn yaa a soabã, yaa sõama.

⁹ La b sã n ka tõe b mense, bɩ b kẽ kãadem. Bala, b sã n kẽ kãadmã n são b sẽn na n kẽnd tɩ wusdẽ.

¹⁰ La neb nins sẽn kẽ kãadmã, mam yet-b lame (la ka maam n yet-b ye, yaa Zu-soabã) tɩ pag da yi n bas a sɩd ye.

¹¹ La a sã n yi n bas-a, bɩ a kell n zĩnd a yembre, wall a maneg a yell ne-a.

¹² La neb a taabã, m yet-b lame, ka Zu-soabã ye: D ba-biig sã n tar pag t'a ka tẽeda, n yaool n sak n na n zĩnd ne yẽnda, bɩ a ra rig-a ye.

¹³ La pag sã n tar sɩd t'a ka tẽeda, n yaool n sak n na n zĩnd ne yẽnda, bɩ a da rig-a ye.

¹⁴ Bala, pagã kɩtame t'a sɩdã sẽn ka tẽedã lebg nin-sõngo, la d ba-bi-raoogã me kɩtedame t'a pagã sẽn ka tẽedã lebg nin-sõngo. Sã n ka rẽ, yãmb kambã na n yɩɩ bõn-dẽgdo, tɩ b yaool n ya nin-sõamyã.

¹⁵ Sẽn ka tẽed-a wã sã n welge, bɩ a welge. Sã n yɩ a woto, bũmb ka loet ba-bi-raoogã bɩ ba-bi-poakã ne a to wã ye. Wẽnnaam boola tõnd tɩ d vɩɩmd laafɩ pʋgẽ.

¹⁶ Sɩd me, paga, fo na n yɩɩ wãn n bãng f sã n na n fãaga f sɩda? Walla, sɩda, fo na n yɩɩ wãn n bãng f sã n na n fãaga f pagã?.

¹⁷ Sẽn be bala, bɩ ned fãa kẽn wa pʋɩɩr ning Wẽnnaam sẽn pʋɩ n kõ-a wã, la wa boolg ning a sẽn paam Wẽnnaam nengẽ wã. Yaa woto la mam yet wẽnd-dotã fãa pʋgẽ tɩ b maane.

¹⁸ Wẽnnaam sẽn wa n bool yãmbã, sã n mikame tɩ y rag n ya zũnga, bɩ y kell n yɩ zũnga. La sã n yaa tɩ y rag n yaa moaaga, bɩ y ra kɩt tɩ b kẽes-y bãong ye.

¹⁹ Bãong kõom ka fɩ, la moonem me ka fɩ. Yaa Wẽnnaam noyã sakr la b geenda.

²⁰ Bɩ ned fãa kell n pa wa a sẽn da ya to-to wakat ning a sẽn paam boolgã.

²¹ Wẽnnaam sẽn wa n bool foomã, rẽ tɩ f yaa yamba? Da maan yɩɩr ye. La f sã n tõe n paam lohorem, da bas tɩ loog ye.

²² Bala, yamb ning sẽn paam boolg Zu-soaba pʋgẽ, a lebga Zu-soaba burkĩna. Woto me, burkĩn ning b sẽn boolã yaa Kirist yamba.

²³ B lebs n daa yãmb toogo. Bɩ y da le lebg ninsaalb yems ye.

²⁴ M ba-biisi, bɩ ned kam fãa kell n pa n sẽn dag n ya to-to wakat ning b sẽn bool-a wã.

²⁵ Sã n yaa ne pa-kuil-n-dãmba yelle, mam ka tar sẽn yit Zu-soabã nengẽ ye. Maam, ned Wẽnnaam sẽn kɩt t'a maand sɩd bãmb nimbãan-zoeerã yĩngã n wilgd m tagsgo.

²⁶ Yɛl nins sẽn be moasã wã yĩnga, ad bũmb ning mam sẽn tẽed tɩ yaa sõama: Yaa sõama tɩ rao kell n yɩ a woto.

²⁷ Fo tara paga? Da bao tɩ welg ne-a ye. Fo ka tar paga? Da bao pag ye.

²⁸ Fo sã n yi kãadem, kõn yɩ yel-wẽnd ye. Pa-kuil sã n yi kãadem, kõn yɩ yel-wẽnd ye. La nin-bãmb na n paama sũ-sãamse, mam yaool n baooda yãmb sõngre.

²⁹ M ba-biisi, (ad bũmb ning m sẽn yeta), mam yetame yaa: Weerã yaa koɛɛga. Sẽn sɩng ne moasã, bɩ neb nins sẽn tar pagbã yɩ wa neb sẽn ka tar pagba,

³⁰ tɩ neb nins sẽn yãbd yɩ wa neb sẽn ka yãbdã, tɩ neb nins sẽn maand sũ-noogã yɩ wa neb sẽn ka maand sũ-noog ye, tɩ neb nins sẽn daad yɩ wa neb sẽn ka tar ye.

³¹ La tɩ neb nins sẽn zaeegd ne dũni wã yɩ wa b sẽn sɩd ka zaeegd ne-a. Bala, dũni kãnga sẽn ya to-to wã loogdame.

³² Mam yaool n datame tɩ yãmb yɩ neb sẽn ka maand yɩɩr ye. Ned ning sẽn ka yi-a kãadem, Zu-soabã yell n pak-a, a sẽn na n maan to-to n ta Zu-soabã yam.

³³ Sẽn yi-a kãadem, dũni yɛl yell n pak-a, a sẽn na n maan to-to n ta a pagã yam.

³⁴ La a pʋɩɩ zĩis a yiibu. Woto me pag sẽn ka tar sɩda, la pa-kuili, yaa Zu-soabã yell n pak-ba, tɩ b tõe n yi nin-sõamy b yĩngã pʋgẽ la b sɩɩgã pʋgẽ me. Sẽn kuil-a sɩda, dũni yɛl n pak-a, a sẽn na n maan to-to n ta a sɩda yam.

³⁵ Mam sẽn gomd woto wã, yaa yãmb sõngr yĩnga. Ka tɩ bẽd yãmb ye, yaa sẽn na yɩl la yãmb maan sẽn zemse, n na n sõng-y tɩ y loe y meng ne Zu-soabã tɩ tak-tɩ-m-tak kaẽ ye.

³⁶ Ned sã n tags t'a pa-kuil sã n yõsg sɩd wakat yaa yãnde, n dat n kuils-a, bɩ a maan a sẽn data. Rẽ ka yel-wẽnd ye. Bɩ d yi kãadem.

³⁷ La sẽn yɛs-a kãenkãe, n mi a sẽn dat tɩ modgr kaẽ, yẽ sã n yãk yam a sũurẽ t'a na n basa a biig a yiri, soab kãng maana neere.

³⁸ Woto, sẽn kõ-a a biig sɩd maana neere, sẽn ka kõ-a a biig sɩd maan-neer n yɩɩda.

³⁹ Pag loee ne a sɩda, a sɩdã vɩɩm tɛka. La a sɩdã sã n ki, a tara noor tɩ leb n kuil ned ning a sẽn data, la sẽn be, tog n yɩɩ Zu-soabã pʋgẽ.

⁴⁰ La ne maam, mam yetame t'a sã n kell n pa a woto, a sũur na yɩ noog n yɩɩda. Maam me yaool n tẽedame tɩ m tara Wẽnnaam Sɩɩgã.

8

¹ Sã n yaa ne maand nins sẽn kʋ tẽn-kugã nemdã yelle, tõnd fãa miime tɩ d tara bãngre. (Bãngr wata ne wuk-m-menga, la nonglem sõngdame.

² Ned sã n tagsd t'a mii bũmbu, a ket n ka mi tɩ sek ye.

³ La ned sã n nong Wẽnnaam, Wẽnnaam mi-a lame).

⁴ Sã n yaa ne maandã b sẽn kʋ wẽn-naandsã nemd wãbr yelle, tõnd miime tɩ wẽn-naandg ka be dũni ye, la tɩ Wẽnnaam a yen bal n be.

⁵ Bala, baa ne bũmb nins sẽn be yĩngr wall tẽng zug tɩ b boond tɩ wẽnnaam-dãmbã (la wẽnnaam-dãmba ne zu-soben-dãmba sõor waooga).

⁶ Ne tõndo, Wẽnnaam a yen bal n be, n ya ba. Bũmb fãa yita bãmb nengẽ, tõnd yaa bãmb dẽnda. La zu-soab a yen tãa n be, a Zezi Kirist, soab ning maasem yĩng bũmb fãa sẽn be, la tõnd sẽn be.

⁷ La ka neba fãa n mi bõn-kãng ye. Sɩd me, neb kẽer yam sẽn ket n togl ne Wẽn-naandsã yellã wãbda nem-kãens sẽn yɩ maoongã. La bũmb kãng rẽgemda bãmb sũ-bãngrã sẽn ka pãngã.

⁸ Ka rɩɩb n na n pẽneg tõnd ne Wẽnnaam ye: Tõnd sã n ka rɩt-a, bũmb ka paoog tõnd ye. La tõnd sã n n dɩt-a, a ka paasd tõnd fʋɩ.

⁹ Baoosgo, bɩ y gũus tɩ yãmb lohormã da wa n lebg kug-lakdg neb nins sẽn ka pãnga yĩng ye.

¹⁰ Bala, ned sã n yã foom a tar bãngrã tɩ f zĩ wẽn-naandg karen-doogẽ n dɩtẽ, rẽ yĩnga, a sũ-bãngrã sẽn ka pãngã ka na n kɩt t'a me wãb maand sẽn kʋ wẽn-naandsã nemdo?

¹¹ Woto, fo bãngrã kɩtame tɩ ka pãng soabã, ba-biig ning Kirist sẽn ki a yĩngã sãame.

¹² Fo sã n maan yel-wẽnd a woto n beeg f ba-biisã, tɩ b sũ-bãngrã sẽn ka pãngã lak foom, fo beega Kirist.

¹³ Yaa woto n kɩt tɩ rɩɩb sã n ya kug-lakdg m ba-biig yĩnga, mam kõn leb n wãb nemd lae-lae, tɩ m da wa n kɩt tɩ m ba-biig lʋɩ ye.

9

¹ Mam ka tar lohorem laa? Mam ka tẽn-tʋmd laa? Mam ka yã d Zu-soab a Zezi laa? Yãmb ka mam tʋʋmd Zu-soabã pʋgẽ biis laa?

² Mam sã n ka tẽn-tʋmd neb kẽer yĩnga, mam yaa tẽn-tʋmd yãmb yĩnga. Yãmb yaa mam sẽn ya Zu-soabã tẽn-tʋmdã tʋʋmd kaset bãnde.

³ Gomd ning mam sẽn tar n leokd neb nins sẽn bʋʋd ne maama yaa woto.

⁴ Tõnd ka tar noor tɩ dɩ la d yũ laa?

⁵ Tõnd ka tar noor tɩ peeg d tão n maan d paga, wa tẽn-tʋmdb a taaba, la Zu-soabã ba-bi-raopa la a Sefas sẽn maanã laa?

⁶ Bɩ yaa maam bal ne a Barnabas n ka tar noor tɩ tʋme?

⁷ Ned a ãe n be sodaarẽ la a get a meng yelle? Ãnna n send nasaar sãbga, n ka rɩt a biisi? Ãnna n kɩɩmd rũms n ka yũud b bĩisim?

⁸ Dẽ yĩnga, yaa mam sẽn ya ninsaalã yĩng la m gomd a woto? Tõogã meng ka gomd a woto sɩda?

⁹ Bala, b gʋlsa a Moyiis tõogã pʋgẽ n yeele: Naaf ning sẽn pãbd-a koodã zɛɛgẽ wã, da ning a noor yʋk ye. Naafã yell n pak Wẽnnaam bii?

¹⁰ Bɩ yaa tõnd yĩng bal la b gom-yã? N-ye! Yaa tõnd yĩng la b gʋls rẽnda. Sẽn kood-a tog n koo ne saagre, la sẽn pãbd-a koodã me tog n pãbda ne saagr t'a na n paama a pʋɩɩre.

¹¹ Sã n yaa tɩ tõnd bʋda sɩɩgã arzegs yãmb yĩnga, rẽ yĩnga, tõnd sã n tigsd yãmb arzegsã, yõsgame sɩda?

¹² Neb a taab sã n dɩt yãmb yõodo, ka tõnd n pʋs n tog n dɩ n yɩɩda? La tõnd ka maan wa noor ning d sẽn tarã ye. Ayo, tõnd sakda fãa, tɩ d da wa ning gɩdgr Kirist koe-noogã taoor ye.

¹³ Yãmb ka mi tɩ neb nins sẽn maand-b Wẽnnaam tʋʋmdã, wẽnd-doogã n dɩlgdba, la tɩ neb nins sẽn tʋmd tẽn-kugrẽ wã paamda pʋɩɩr bũmb nins b sẽn yõogd tẽn-kugrã zugã pʋgẽ laa?

¹⁴ Woto me, Zu-soabã kõo noor tɩ koe-noogã dɩlg neb nins sẽn moond koe-noogã.

¹⁵ Ne maam, mam ka tʋm ne no-kãens baa a yembr ye, la mam ka gʋlsd a woto tɩ y na kõ-m ye. Bala, mam sẽn kiid n são... Ned baa a yen kõn yiis waoogr ning mam sẽn tar yel-kãng pʋgẽ wã ye.

¹⁶ Ne maam, tɩ moon koe-noogã ka waoogr baoob ye. Wẽnnaam n yet-m tɩ m moone. Mam sã n ka moon koe-noogã, toog n na n paam maam.

¹⁷ Mam sã n moon ne yamleoogo, mam paamda a keoore. La mam sã n moon-a modgr yĩnga, yaa tʋʋmd b sẽn dogl m zugu.

¹⁸ Mam keoor la bʋgo? Yaa tɩ m sã n moond koe-noogã, bɩ m moon-a zaalem, n ka deeg bũmb nins koe-noogã sẽn kõt maam ne-wã ye.

¹⁹ Bala, baa ned a yen sẽn ka so maamã, mam maana m meng tɩ yɩ neba fãa tʋmtʋmda, tɩ m tõe n paam neb fãa sõor m sẽn tõe n paam n yɩɩda.

²⁰ Ne Zuif-rãmbã, mam yɩɩ wa Zuif, tɩ m tõe n paam-ba. Ne neb nins a Moyiis tõogã sẽn loe wã, mam yɩɩ wa ned a Moyiis tõogã sẽn loe, la a Moyiis tõogã yaool n ka loe maam, tɩ m tõe n paam neb nins tõogã sẽn loe wã.

²¹ Ne neb nins sẽn ka be tõogã pʋgẽ wã, mam yɩɩ wa ned sẽn ka be tõogã pʋgẽ ye, la mam mengã yaool n ka ned sẽn be Wẽnnaam tõogã poorẽ ye, mam bee Kirist tõogã pʋgẽ, tɩ m tõe n paam neb nins sẽn ka be tõogã pʋgẽ wã.

²² Ne neb nins sẽn be pãn-komsem pʋgẽ wã, mam yɩɩ pãn-komsem soaba, tɩ m tõe n paam pãn-komsem dãmbã. Mam maana m meng tɩ yɩ bũmba fãa naaba fãa yĩnga, tɩ sẽn wa n ya neng ning fãa, bɩ m fãag neb kẽere.

²³ Mam maanda bũmba fãa koe-noogã yĩnga, tɩ m tõe n paam pʋɩɩr a pʋgẽ.

²⁴ Yãmb zɩ tɩ neb nins sẽn zoet zoeesã zĩigẽ wã, nebã fãa n zoeta, la tɩ yaa nin yen tãa n deegd keoorã laa? Bɩ y zoe y sẽn na zoe to-to n paam keoorã.

²⁵ Ned ning sẽn yõgd maoor modgda a meng n basd bũmb kẽere. Bãmb maanda a woto n dat maanf sẽn sãamda, la tõnd maandame n dat maanf sẽn ka sãamd ye.

²⁶ Mam yẽ, mam zoetame, la ka wa ned sẽn ka mi a sẽn dabdẽ ye. Mam lobda nug-gila, la ka tɩ pãb pemsem ye.

²⁷ Ayo, mam namsda m yĩngã sõama, n kɩted t'a sakd-ma, m sẽn zoet dabeem tɩ mam sẽn moon neb a taabã, bɩ b da wa n yeel tɩ mam ka zems ye.

10

¹ M ba-biisi, mam ka rat tɩ yãmb zɩ yel-kãngã ye. Tõnd ba-rãmba fãa zĩnda sawadgã tẽngre, b fãa pɩʋʋga ko-kãsengã pʋga,

² a Moyiis pʋgẽ, b fãa paama lisg sawadgã ne ko-kãsengã pʋgẽ,

³ b fãa rɩɩ sɩɩg rɩɩb a yembre,

⁴ la b fãa yũu sɩɩg bõn-yũudl a yembre. Bala, b fãa ra yũuda koom sẽn yit pĩig sẽn da pʋgd bãmbã pʋgẽ, la pĩ-kãng ra yaa Kirist.

⁵ La bãmb neb wʋsg ka ta Wẽnnaam yam ye, bala, b kii weoogẽ wã.

⁶ Bõn-kãens yaa mamsg tõnd yĩnga, tɩ tõnd da wa paam datem-wẽns wa bãmb sẽn da paamã ye.

⁷ Da yɩ-y wẽn-naands pʋʋsdb wa bãmb neb kẽer sẽn dag n yɩ, tɩ b gʋls n wilgã. B yeelame yaa: Nebã zĩndame n na n dɩ la b yũ. Rẽ poore, b yikame n na n noog b sũuri.

⁸ Tɩ d da maan rẽgd wa bãmb neb kẽer sẽn maane, tɩ neb tus pisi la a tã ki daar a yembrã ye.

⁹ Tɩ d da mak Zu-soabã wa bãmb neb kẽer sẽn mak-ba, tɩ wiis sãam-ba ye.

¹⁰ Da yẽgem-y wa bãmb neb kẽer sẽn maane, tɩ sãamdã sãam-ba ye.

¹¹ Bõn-kãens paama bãmba, tɩ yɩ mamsgo, la b gʋlsame n na n keoog tõnd dãmb sẽn mi tɩ wakatã taa a saabã.

¹² Woto yĩnga, bɩ ned ning sẽn tagsd t'a yasa yĩngrã gũus n da wa lʋɩ ye.

¹³ Makr baa a yen sẽn nan ka mak ninsaal ka mak yãmb ye. Wẽnnaam yaa sɩd maanda, la b ka na n sak tɩ yãmb paam makr sẽn yɩɩd y pãng ye. La makr sã n wa, Wẽnnaam na n n kõo yãmb maane y sẽn na maan n yi, tɩ yãmb tõe yals makrã pʋgẽ.

¹⁴ Woto yĩnga, m Zo-nongdse, zoe-y wẽn-naands pʋʋsgo.

¹⁵ Mam sẽn gomd ne yãmbã, yaa wa ne neb yam sẽn vɩ. Yãmb mens tags bũmb ning mam sẽn yetã yelle.

¹⁶ Bark bõn-yũudlã tõnd sẽn ningd barkã, a ka kɩted tɩ tõnd paam lagem-n-taar ne Kirist zɩɩmã sɩda? Burã tõnd sẽn kaoodã, a ka kɩted tɩ tõnd paam lagem-n-taar ne Kirist yĩngã sɩda?

¹⁷ Burã sẽn ya a yembrã, tõnd sẽn ya wʋsgã, d yaa yĩng a yembre. Bala, tõnd fãa wãbda bur a yembre.

¹⁸ Ges-y neb nins sẽn ya Israyɛl neb ne yĩng yellã: Neb nins sẽn wãbd dũms nins b sẽn tall n maan maandã nemdã, b ka tar lagem-n-taar ne tẽn-kugrã sɩda?

¹⁹ Mam yetame tɩ bõe? Mam yetame tɩ maandã sẽn kʋ wẽn-naandsã nemdã yaa bũmb laa? Bɩ tɩ wẽn-naandg yaa bũmbu? Baa bilfu.

²⁰ Maoongã sẽn kʋʋdã, yaa zĩn-dãmb yĩnga, la ka Wẽnnaam yĩng ye. La mam yaool n ka rat tɩ yãmb paam lagem-n-taar ne zĩn-dambã ye.

²¹ Ka tõe n yũud Zu-soabã bõn-yũudlã, la y yũud zĩn-dãmbã me rẽnd ye. Yãmb ka tõe n naag n dɩt Zu-soabã dɩɩbo, la y le naag n dɩt zĩn-dãmb dɩɩb ye.

²² Dẽ yĩnga, tõnd datame tɩ Zu-soabã sũ-kiir yik laa? Dẽ yĩnga, tõnd pãng yɩɩda bãmb laa?

²³ Noor beeme tɩ maan fãa, la ka bũmb fãa n be yõod ye. Noor beeme tɩ maan bũmb fãa, la ka fãa n sõngd ye.

²⁴ Bɩ ned baa a yen da bao a meng sõngr ye, a bao a to rẽnda.

²⁵ Sũur kaset yĩnga, bɩ y rɩ bũmb ning fãa sẽn koosd raagẽ, n da sok a kibar ye.

²⁶ Bala, tẽngã yaa Zu-soabã n so, la bũmb nins fãa sẽn be a pʋgẽ wã me, yaa bãmb n so.

²⁷ Ned sẽn ka tẽed sã n bool yãmb tɩ y wa rɩ, tɩ yãmb sak n kẽnge, sũur kaset yĩnga, bɩ y rɩ bũmb ning fãa a sẽn kõt yãmbã, n da sok a kibar ye.

²⁸ La ned sã n yeel yãmb tɩ: Yõwã yɩɩ maoongo, bɩ y ra rɩ, soab ning sẽn pĩnd n wilg yãmbã yĩnga, la sũur yĩng me.

²⁹ Mam sẽn gomd sũur kasetã yellã, ka yãmb sũur kasetã ye, yaa ned a to wã rẽnda. Sɩd me, bõe yĩng tɩ sũur kaset sẽn ka mam dẽnd na n wa kao mam lohorem bʋʋdo?

³⁰ Mam sã n pʋʋs Wẽnnaam bark la m dɩ, bõe yĩng tɩ b na n kãn maam ne bũmb ning mam sẽn pʋʋs bark a yĩnga?

³¹ Yãmb sã n dɩtẽ, wall y yũuda, wall bũmb ning fãa y sẽn maanda, maan-y fãa Wẽnnaam waoogr yĩnga.

³² Da yɩ-y kug-lakdg sẽn ka-b Zuif-rãmbã yĩnga, wall Zuif-rãmbã yĩnga, wall Wẽnnaam nin-tũusdsã yĩng ye.

³³ Wa mam me sẽn maand sẽn noom nebã, n ka baood m meng nafre, la yaa neb wʋsgã rẽndã, tɩ b tõe n paam fãagrã.

11

¹ Yɩ-y mam togs-n-taase, wa mam meng sẽn ya Kirist togs-n-taagã.

² Mam pẽgda yãmba, yãmb sẽn tẽr mam yell bũmb fãa pʋgẽ wã yĩnga, la tɩ yãmb sakd bũmb nins mam sẽn yeel yãmb tɩ y maanã.

³ Mam yaool n datame tɩ yãmb bãng tɩ Kirist yaa dao fãa Zu-soaba, la dao yaa pag zu-soaba, la tɩ Wẽnnaam yaa Kirist Zu-soaba.

⁴ Rao ning fãa sẽn lud a zug n pʋʋs wall a togs bãngr goam paoogda a Zu-soabã.

⁵ La pag fãa sẽn ka lud a zug n pʋʋs wall a togs bãngr goam paoogda a Zu-soabã. Yaa wa a sẽn põng a zugu.

⁶ Pag sã n ka teeg a zug peende, bɩ a wõrs a zoobdã me. La sã n yaa tɩ pag zoobd wõrsg wall a zug põngr yaa yãnde, bɩ a teeg peende.

⁷ Dao ka tog n teeg peend ye, a sẽn ya Wẽnnaam ziir la b wẽnegã yĩnga. La pag yaa dao ziiri.

⁸ Sɩd me, ka pag la b yãk n naan dao ye, la yaa dao la b yãk n naan paga.

⁹ La b ka naan dao pag yĩng ye, yaa pag la b naan dao yĩnga.

¹⁰ Dẽ n kɩt tɩ pag tog n ning ned sẽn so-a yẽ wã bãnd a zugẽ, malegsã yĩnga.

¹¹ Baoosgo, Zu-soabã pʋgẽ, pag ka be tɩ rao kaẽ ye, la rao ka be tɩ pag kaẽ ye.

¹² Bala, a wa b sẽn yãk rao pʋgẽ n naan pagã, yaa pag me n dog daoa, la fãa yita Wẽnnaam nengẽ.

¹³ Yãmb mens tags n gese, rẽ yĩnga, segdame tɩ pag pʋʋs Wẽnnaam n ka teeg a zug peende?

¹⁴ Vɩɩmã meng sẽn ya to-to wã ka zãmsd tõnd tɩ yaa yãnd ne rao tɩ paam zoob-wogdo,

¹⁵ la tɩ pag sã n tar zoob-wogdo bee neer ne-a sɩda? Sɩd me, b kõ-a la zoobdã tɩ lud a zugã wa peende.

¹⁶ Ned sã n minim kɩɩsgo, tõnd yẽ ka minim a woto, la Wẽnnaam doogã me ka minim ye.

¹⁷ Mam sẽn kõt yãmb koe-kãensã wã, bũmb ning mam sẽn ka pẽgda, yaa tɩ yãmb sẽn tigindã, ka tɩ y na yɩ sõama n yɩɩd ye, yaa tɩ yɩ wẽng n yɩɩda.

¹⁸ Pipi, mam wʋmdame tɩ yãmb sã n wa n tigim taaba, welgr n be yãmb sʋka (la mam tẽeda koe-kãng bilfu).

¹⁹ Yaa tɩlɛ tɩ welgr sɩd zĩndi, tɩ b na bãng neb nins sẽn zems pẽgr yãmb sʋkã.

²⁰ Dẽ, yãmb sẽn tigimd taabã, ka tɩ rɩ Zu-soabã rɩɩb ye.

²¹ Bala, kẽer sẽn dengd b taab n dɩtẽ rɩta b mens rɩɩbo, tɩ nina zĩ ne kom, tɩ nina nin tuubd ne rãam.

²² Yãmb ka tar yiy n na n dɩt be la y yũud be laa? Bɩ yãmb ka nand Wẽnnaam doogã, la y dat n paoog neb nins sẽn ka tar bũmbã? Mam na n yeela yãmb tɩ bõe? Mam na n pẽga yãmba? Yel kãngã pʋgẽ yẽ, mam kõn pẽg yãmb ye.

²³ Bala, bũmb ning mam sẽn taas yãmbã, mam deeg-a la Zu-soabã nengẽ. Yʋng ning b sẽn yõk a Zezi n kõ wã, Zu-soab a Zezi dɩka buri,

²⁴ n pʋʋs Wẽnnaam barka, n yaool n kao-a n yeele: Yõwã yaa mam yĩng mam sẽn kõt yãmba. Maand-y woto n tẽegd mam yelle.

²⁵ B sẽn dɩ n sa me, a Zezi dɩka bõn-yũudlã n yeele: Bõn-yũudl kãngã yaa kãab-paalg sẽn kãab mam zɩɩmã pʋgẽ: Maand-y a woto n tẽegd mam yell wakat fãa yãmb sẽn na yũ-a.

²⁶ Bala, wakat ning fãa yãmb sẽn wãbd bur kãngã, la y yũud bõn-yũudl kãngã, yãmb wilgda Zu-soabã kũum hal tɩ b lebg n wa.

²⁷ Yaa woto yĩng tɩ ned sã n wãb burã la a yũ Zu-soabã bõn-yũudlã ne paoogre, a beegda Zu-soabã yĩng ne b zɩɩmã.

²⁸ Woto yĩnga, bɩ ned fãa fees a menga, la a yaool n wãb burã la a yũ bõn-yũudlã.

²⁹ Bala, ned ning sẽn wãbd burã la a yũud bõn-yũudlã, la a ka nand Zu-soabã yĩnga, yaa bʋʋd a meng yĩng la a wãbd la a yũuda.

³⁰ Yaa rẽnda n kɩt tɩ bãad-rãmb la koms-rãmb ya wʋsg yãmb sʋka, la tɩ neb wʋsg kiime.

³¹ Tõnd sã n da kaoẽ d meng bʋʋdo, Wẽnnaam dag n kõn kaoẽ tõnd bʋʋd ye.

³² La bʋʋd ning Wẽnnaam sẽn bʋʋdã pʋgẽ, b sɩbgda tõndo, tɩ b da wa n naag tõnd ne dũni wã n sɩbg ye.

³³ Woto yĩnga, m ba-biisi, yãmb sã n tigim taab n na n dɩ zu-soabã kũum tẽegr dɩɩbã, bɩ y yals n gũ taaba.

³⁴ Kom sã n tar neda, bɩ a dɩ a yiri, tɩ y da wa n tigim taab n bao sɩbgr n kõ y mens ye. Mam sã n wa wa, m na ges yɛl a taabã yelle.

12

¹ M ba-biisi, mam ka rat tɩ yãmb zĩnd zɩɩlem pʋgẽ Sɩɩg-sõng kũunã yell wɛɛngẽ ye.

² Yãmb mii yãmb sẽn dag n ket n ya nin-zaalse, tɩ yãmb sũyã loe ne wẽn-naands sẽn ya mugsi, tɩ y ka tõe n lak ne-bã.

³ Yaa rẽ yĩng tɩ mam yet yãmb tɩ ned ka be, Wẽnnaam Sɩɩgã sẽn na n tus-a t'a yeel tɩ kãab wẽng n be a Zezi zug ye. La ned baa a yembr me ka tõe n yeel t'a Zezi yaa Zu-soaba, sã n ka Sɩɩg-sõng n kɩt t'a yeel ye.

⁴ Kũunã yaa toay-toaya, la yaa Sɩɩg a yembr n kõte.

⁵ Tʋʋmã sẽn tʋmd to-to wã yaa toay-toaya, la yaa Zu-soab a yembr yĩng la b tʋmda.

⁶ Tʋʋmã yaa toay-toaya, la yaa Wẽnnaam a yembr n tʋmd fãa neba fãa pʋse.

⁷ Sɩɩgã belem pukda ned kam fãa vɩɩmẽ, nebã fãa sõngr yĩnga.

⁸ Sɩd me, Wẽnnaam Sɩɩgã kõta ned a yembr yam gomde, n kõ ned a to bãngr gomde, la yaa Sɩɩg a yembr n maand rẽ.

⁹ Sɩ-kãng kõta ned a to tẽebo, n kõ ned a to maagr kũuni, la yaa Sɩɩg a yembre.

¹⁰ Wẽnnaam Sɩɩgã kõta ned a to bõn-bãn maaneg kũuni, n kõ ned a to pĩnd-n-bãngr gomde, n kõ ned a to pãn-tõog tɩ bãng sɩɩsã n welg taaba, n kõ ned a to gom-zẽn buud toay-toaya, la ned a to gom-zẽn deesgo.

¹¹ Yaa Sɩɩg a yen tãa n maand bõn-kãensã fãa, n pʋɩt kũunã n kõt ned kam fãa wa b sẽn data.

¹² Sɩd me, a wa yĩng sẽn ya yembr n yaool n tar wil wʋsgã, la tɩ yĩngã wilã, baa ne b sẽn ya wʋsgã b yaa yĩng a yembr balã, Kirist me yaa a woto bala.

¹³ Bala, yaa Sɩɩg a yembr pʋgẽ la b lis tõnd fãa, Zuif-rãmba, sẽn ka-b Zuif-rãmba, yemse, burkĩmba, tɩ d tõe n lebg yĩng a yembre. La tõnd fãa yũu Sɩɩg a yembr n yiis d ko-yũudu.

¹⁴ Woto, yĩng ka will a yembr bal ye, yaa wil wʋsgo.

¹⁵ Naoor sã n yeel tɩ yẽ sẽn ka nugã yĩnga, yẽ ka yĩngã willi, rẽ ka kɩted t'a ka yĩngã will ye.

¹⁶ La tʋbr sã n yeel tɩ yẽ sẽn ka nifã yĩnga, yẽ ka yĩngã willi, rẽ ka kɩted t'a ka yĩngã will ye.

¹⁷ Yĩngã tõr sã n dag n yaẽ nifu, tʋbr da na n bee yɛ? La fãa sã n dag n yaẽ tʋbre, yõor da na n bee yɛ?

¹⁸ Ad Wẽnnaam ninga wilã yĩngã pʋgẽ wa b sẽn data.

¹⁹ Yĩngã tõr sã n dag n yaẽ will a yembre, yĩngã meng da na n beẽ la yɛɛne?

²⁰ Woto wã, yĩngã wil yaa wʋsgo, la yaa yĩng a yembre.

²¹ Nif ka tõe n yeel nug t'a ka rat a sõngr ye, la zug ka tõe n yeel nao t'a ka rat b sõngr ye.

²² Ayo, ka woto ye, yĩngã wil nins sẽn wẽnda b pãngã ka ta b taabã, n tar yõod yĩngã pʋgẽ.

²³ La wil nins tõnd sẽn get tɩ b ka be waoogr n ta b taabã, tõnd waoogd-b lame n yɩɩda. Woto, yĩngã wil nins sẽn ka togd ne gesgã, tõnd geta b yell sõama,

²⁴ la wil nins sẽn sakd gesgã ka baood tɩ d ges b yell woto ye. Wẽnnaam sẽn ning yĩngã wilã to-to wã, b kɩtame tɩ wil nins sẽn ka tar waoogrã na paam waoogre,

²⁵ tɩ welgr da wa n zĩnd yĩngã pʋgẽ ye, la tɩ wilã me na ges taab yelle.

²⁶ Yĩngã will a yembr sã n namsdẽ, wil a taabã fãa naaga yẽnda n namsdẽ. La a yembr sã n paam waoogre, b fãa naagda yẽnda n kɩdemdẽ.

²⁷ Yãmb yaa Kiristã yĩnga, la yãmb ned kam fãa yaa bãmb yĩngã wila.

²⁸ Wẽnnaam ninga neb b roogẽ wã: pipi rãmb yaa tẽn-tʋmdbã, tɩ Wẽnnaam no-rɛɛsdbã ya yiib rãmba, tɩ karen-saam-dãmbã ya tãab rãmba. Rẽ poore, bõn-bãn maaneg kũun n be, tɩ maagr kũuni, sõngr kũuni, lʋɩ neb taoor kũuni, gom-zẽn buud toay-toay kũun n pʋgda.

²⁹ Dẽ yĩnga, neba fãa yaa tẽn-tʋmdb laa? B fãa yaa Wẽnnaam no-rɛɛsdb laa? B fãa yaa karen-saam-dãmb laa? B fãa maanda bõn-ban laa?

³⁰ B fãa tara maagr kũun laa? B fãa gomda gom-zẽn laa? B fãa reesda gom-zẽn laa?

³¹ Bao-y kũun nins sẽn ya sõama n yɩɩdã. La mam na n wilga yãmb sor sẽn yɩɩd a taaba fãa.

13

¹ Mam sã n tõog n gomd ninsaalb la malegsã goam buud fãa, mam sã n ka tar nonglem, mam yaa wa waag sẽn maand bʋʋre, wall keoonf sẽn wẽeda.

² La mam sã n paam pĩnd-n-bãngr goam kũuni, la yel-soalma fãa bilgri, la bãngr fãa, la hal baa mam sã n tar tẽeb sẽn tõe n sers tãmse, mam sã n ka tar nonglem, mam ka fɩ.

³ La mam sã n dɩk n paoongã fãa n pʋɩ tɩ naong rãmbã tõe n paam rɩɩbo, mam sã n kõ m yĩngã tɩ b yõog bugum, mam sã n ka tar nonglem, rẽ fãa ka yõod ye.

⁴ Nonglem tara sũ-mare, nonglem sõngda neb a taaba, a ka maand sũ-kiir ye. Nonglem ka fʋʋmd a menga, a ka maand wilg-m-menga,

⁵ a ka maand zãmb baa bilfu, a ka baood a meng nafr bal ye, a ka yikd a sũuri, a ka bĩngd wẽng ning b sẽn maan-a wã a sũurẽ ye,

⁶ a ka maand sũ-noog ne ka-tɩrlem ye. Ayo! A maanda sũ-noog ne sɩda,

⁷ a maanda sugr bũmb fãa yĩnga, a tẽeda bũmb fãa, a tara saag-sõng ne bũmb fãa, la a sakda bũmb fãa.

⁸ Nonglem ka sat abada. Pĩnd-n-bãngr goam na sa, gom-zẽn na sa, bãngr na sa.

⁹ Bala, tõnd sẽn bãngdã, yaa wɛdg-wɛdga, la pĩnd-n-bãngr goamã d sẽn togsdã yaa wedse.

¹⁰ La sẽn zems-a zãngã sã n wa, b na n sɛɛsa sẽn ya-a wedsã.

¹¹ Mam sẽn dag n ya biigã, mam goam dag n yaa yãag goama, mam tagsg dag n yaa yãag tagsgo. Mam sẽn lebg raowã, mam sɛɛsa bũmb nins sẽn dag n ya yãadrã.

¹² Tõnd sẽn ne rũnna wã, yaa wa nin-gɛtg pʋgẽ, pulum-pulum. La wakat sã n ta, tõnd na yã-b neng ne nenga. Mam sẽn mi rũnna wã yaa wedse, la wakat sã n ta, mam na bãng bãmb wa bãmb sẽn bãng maamã.

¹³ Moasã, ad bũmb a tãab nins sẽn paadã: yaa tẽebo, la saag-sõngo, la nonglem. La sẽn ya kãseng bãmb sʋk n yɩɩdã, yaa nonglem.

14

¹ Bao-y nonglem. Dat-y Sɩɩg-sõng kũunã me, la sẽn yɩɩd fãa, bɩ y dat pĩnd-n-bãngr goamã.

² Sɩd me, sẽn gomd-a ne gom-zẽn ka gomd ne ninsaalb ye, a gomda ne Wẽnnaam. Bala, ned baa a yen ka wʋmd a võor ye, la Sɩɩgã kɩtame t'a togsd yel-soalma.

³ La sẽn togsd-a pĩnd-n-bãngr goam gomda ne ninsaalbã, n bɩɩsd-ba, n sagend-ba, n belsd-ba.

⁴ Sẽn gomd-a gom-zẽn bɩɩsda a menga. Sẽn togsd-a pĩnd-n-bãngr goamã bɩɩsda wẽnd-doogã.

⁵ Mam datame tɩ yãmb ned kam fãa gom gom-zẽna, la mam sẽn dat n yɩɩda, yaa tɩ yãmb togs pĩnd-n-bãngr goama. Sẽn togsd-a pĩnd-n-bãngr goam yɩɩda sẽn gomd-a gom-zẽnã, sã n ka t'a soab rees-a lame tɩ wẽnd-doogã tõe n paam bɩɩsg a pʋgẽ.

⁶ M ba-biisi, mam sã n wa yãmb nengẽ, n tõdg a wa ne vẽnegr gomde, wall bãngr gomde, wall pĩnd-n-bãngr gomde, wall zãmsgo, n gomd ne gom-zẽna, a yõod yaa bõe ne yãmba?

⁷ Wa b sẽn na n peeb wall b wẽ teed sẽn ka tar vɩɩm, wa wɩɩg wall pɛndga, tɩ ka tũud sõama, ned na n yɩɩ a wãn n bãng yɩɩl ning wɩɩgã sẽn peebdã, wall pɛndgã sẽn wẽedã?

⁸ Baorg sã n peebd tɩ ka vẽenega, ãnna n na n segl a meng zabr yĩnga?

⁹ Woto me, yãmb sã n gomd goam neb sẽn ka wʋmd a võore, nebã na n yɩɩ a wãn n bãng yãmb sẽn dat n togs bũmb ningã?

¹⁰ Baa dũni pʋgẽ goam buudã sẽn ya wʋsgã, baa a yen ka be n ya sɩɩ tɩ ned ka wʋmdẽ ye.

¹¹ Woto, gomd sã n gomd tɩ mam ka wʋmd a võore, mam yaa nin-zẽng sẽn gomd-a wã yĩnga, la sẽn gomd-a wã me na n yɩɩ nin-zẽng mam yĩnga.

¹² Woto yĩnga, yãmb sẽn dat Sɩɩg-sõng kũunã, bɩ y kɩt tɩ ya wẽnd-doogã bɩɩsg yĩng la yãmb baood-b wʋsgo.

¹³ Yaa woto yĩng tɩ ned ning sẽn gomd gom-zẽn tog n pʋʋs n tõog n deesdẽ.

¹⁴ Bala, mam sã n gomd ne gom-zẽna, mam sɩɩgã yẽ pʋʋsdame, la mam yamã ka maand baa fɩ.

¹⁵ Woto wã, m na n maana bõe? Mam sɩɩgã na n pʋʋsdame, la mam yamã me na n pʋʋsdame. Mam sɩɩgã na n yɩɩndame, la mam yamã me na n yɩɩndame.

¹⁶ Fo sã n pʋʋsd Wẽnnaam bark ne f sɩɩgã, ned ning sẽn zĩ ne nebã n kelgdẽ wã na n maana a wãn n leok tɩ ãmin fo bark pʋʋsgã yĩnga, a sẽn ka wʋmd bũmb ning fo sẽn yetã?

¹⁷ Yaa sɩd tɩ yãmb pʋʋsda Wẽnnaam bark sõama, la ned a to wã ka paamd bɩɩsg a pʋgẽ ye.

¹⁸ Mam pʋʋsda Wẽnnaam barka, mam sẽn gomd gom-zẽn n yɩɩd yãmb fãa wã yĩnga.

¹⁹ La wẽnd-doogẽ wã, mam nong n goma goam a nu ne m yamã, tɩ b tõe n kõ neb a taabã zãmsgo, n yɩɩd tɩ gom goam tus-piig ne gom-zẽna.

²⁰ Sã n ya ne tagsg wɛɛngẽ, bɩ y da yɩ wa kamb ye. Yɩ-y wa kamb wẽng maaneg wɛɛngẽ, la wa daop sẽn bɩ, tagsgã wɛɛngẽ.

²¹ B gʋlsa tõodã sebr pʋgẽ n yeele: Zu-soabã yeelame tɩ yaa ne buud a to neba, la ne sãamb noy la mam na n gom ne nin-kãensã. La baa ne rẽnda, b ka na n kelg maam ye.

²² Woto yĩnga, gom-zẽnã yaa bãnd neb nins sẽn ka tẽedã yĩnga, la ka tẽedbã yĩng ye. La pĩnd-n-bãngr goamã yaa bãnd tẽedbã yĩnga, la ka sẽn ka tẽedbã yĩng ye.

²³ Woto, wẽnd-doogã neb fãa sã n tigim taaba, tɩ neba fãa gomd gom-zẽna, tɩ neb wa bal n na n kelge, wall sẽn ka tẽedb sã n wa, b kõn yeel tɩ yãmb yaa gãeems sɩda?

²⁴ La neba fãa sã n togsd pĩnd-n-bãngr goama, tɩ ned sẽn ka tẽeda, wall kɛlgd bal wa, neba fãa goamã kẽed-a lame, b fãa bʋʋda yẽ bʋʋdo,

²⁵ b pukda bũmb nins sẽn solg a sũurẽ. Wakat kãnga, a na n wõgemda Wẽnnaam taoor n waoog bãmba, la a na n mooname n yeel tɩ Wẽnnaam sɩd bee yãmb sʋka.

²⁶ Woto wã, m ba-biisi, d na n maana a wãna? Yãmb sã n tigim taaba, ned sã n tar yɩɩlle, wall saglgo, wall vẽnegre, wall gom-zẽnga, wall gom-zẽn deesgo, bɩ ned fãa maan a tʋʋmd nebã bɩɩsg yĩnga.

²⁷ Sã n yaa gom-zẽn goama, bɩ neb a yiib wall a tãab bal gome, yembr yembre, tɩ ned reesdẽ.

²⁸ La ned sã n ka be n deesdẽ, bɩ ned fãa sĩnd wẽnd-doogẽ, n gom a pʋgẽ la a gom ne Wẽnnaam.

²⁹ Ne neb nins sẽn togsd pĩnd-n-bãngr goamã, bɩ neb a yiib wall a tãab gome, tɩ neb a taabã bʋ b goama n gese.

³⁰ Ned sẽn be be sã n paam vẽnegre, bɩ sẽn da gomd-a wã sĩndi.

³¹ Bala, yãmb fãa tõe n togsda pĩnd-n-bãngr goam n deesd taaba, tɩ nebã fãa na paam zãmsgo, la tɩ neba fãa na paam saglgo.

³² Wẽnnaam no-rɛɛsdbã sɩɩs sakd-b lame.

³³ Bala, Wẽnnaam ka bʋrg Wẽnnaam ye, b yaa laafɩ Wẽnnaam. Wa sẽn maand Wẽnnaam nin-sõamy wã wẽnd-dotẽ wã,

³⁴ bɩ pagbã sĩnd b noy tigindã pʋse, bala, b ka tar noor tɩ gom be ye. Bɩ b yɩ sakdba, wa Wẽnnaam tõogã me sẽn yetã.

³⁵ B sã n dat n sok bũmb kẽer võor n bãnge, bɩ b tɩ sogs b mens sɩdbã yiri. Bala, a yaa bũmb sẽn ka zems tɩ pag gom wẽnd-doogẽ ye.

³⁶ Wẽnnaam goama yii yãmb nengẽ bii, bɩ yaa yãmb nengẽ bal la a ta-yã?

³⁷ Ned sã n tẽed t'a yaa Wẽnnaam no-rɛɛsa, wall tɩ Wẽnnaam ninga gomd a noorẽ, bɩ a bãng tɩ bũmb ning mam sẽn gʋls n togs yãmbã yaa Zu-soabã tõogo.

³⁸ La ned sã n zɩ yel-kãnga, bɩ nebã me ra bãng a soab ye.

³⁹ Woto yĩnga, m ba-biisi, bɩ ned fãa dat pĩnd-n-bãngr goam kũuni, la y da gɩdg neb tɩ b da gom gom-zẽn ye.

⁴⁰ La bɩ y maan bũmb fãa tɩ zemse, la tũud taab sõama.

15

¹ M ba-biisi, mam tẽegda yãmb koe-noog ning mam sẽn moon yãmb tɩ yãmb deege, n yas a pʋgẽ kãenkãe wã.

² Koe-no-kãng maasem yĩnga yãmb paama fãagre, yãmb sã n tall-a wa mam sẽn togs-a yãmbã. Sã n ka yɩ a woto, yãmb tẽe zaalem bala.

³ Koɛɛg ning mam sẽn taas yãmbã, yaa mam me sẽn deege: Yaa tɩ wa Wẽnnaam gʋls-sõamyã sẽn yetã, Kirist kii tõnd yel-wẽnã yĩnga.

⁴ B mum-b lame, la wa Wẽnnaam gʋls-sõamyã sẽn yetã, b vʋʋga dasem a tãab daare,

⁵ la a Sefas yãa bãmba, tɩ karen-biisã piig la a yiibã me yã bãmba.

⁶ Rẽ poore, tõnd ba-biis sẽn yɩɩd bãmb kobs-nu yãa bãmb wakat a yembre. Bãmb neb wʋsg ket n vɩɩme, la kẽer me kiime.

⁷ Rẽ poore, a Zak yãa bãmba, la tẽn-tʋmdbã fãa yãa bãmba.

⁸ Bãmb fãa poore, b puka b meng ne maam tɩ m yã-ba, baa mam sẽn ya wa biig sẽn dog n pa ta wã.

⁹ Bala, tẽn-tʋmdbã sʋka, maam n ka ta m taaba, la mam ka zems tɩ b bool maam tɩ tẽn-tʋmd ye. Tɩ bõe, mam namsa Wẽnnaam nin-tũusdsã.

¹⁰ Wẽnnaam barkã yĩnga, mam yaa m sẽn ya a soaba, la bãmb nimbãan-zoeer mam yĩngã ka yɩ zaalem ye. Ayo! Mam tʋmame n yɩɩd tẽn-tʋmdbã fãa. La ka mam mengã n tʋm ye, yaa Wẽnnaam barkã sẽn be mam pʋgẽ wã.

¹¹ Woto yĩnga, tɩ yaa maam, tɩ yaa bãmba, bũmb ning tõnd sẽn moondã la woto, la yaa bõn-kãng la yãmb sẽn tẽ wã.

¹² La sã n yaa tɩ b moondame tɩ Kirist vʋʋgame n yi kũum sʋka, yɩta a wãn tɩ neb kẽer yãmb sʋk yetẽ tɩ kũum vʋʋgr ka be?

¹³ Sã n yaa tɩ kũum vʋʋgr ka be, rẽnd Kirist me ka vʋʋg ye.

¹⁴ La sã n yaa tɩ Kirist ka vʋʋge, rẽnd tõnd koe-moonegã yaa tʋʋm zaalle, la yãmb tẽebã me ka võor ye.

¹⁵ Sã n yaa tɩ kũum ka vʋʋgda, kɩtame meng tɩ tõnd yagd zĩrĩ ne Wẽnnaam yelle. Bala, tõnd yagda zĩrĩ n yetẽ tɩ Wẽnnaam vʋʋga Kirist tɩ b yaool n ka vʋʋg-b ye.

¹⁶ Bala, kũum sã n ka vʋʋgdẽ, rẽnd Kirist me ka vʋʋg ye.

¹⁷ La sã n yaa tɩ Kirist ka vʋʋge, rẽnd yãmb tẽebã ka yõod ye, la yãmb ket n bee y yel-wẽnã pʋgẽ.

¹⁸ La neb nins sẽn ki Kirist tũudum pʋgẽ wã yell sãamame.

¹⁹ Sã n yaa vɩ-kãngã pʋgẽ yĩng bal la tõnd be ne Kiristã, ned ka be t'a nimbãaneg le ta tõnd ye.

²⁰ La moas-moasã wã yẽ, Kirist vʋʋgame n yi kũum sʋka. Bãmb n yɩ pipi soab Wẽnnaam sẽn vʋʋge, sẽn ki-bã sʋka.

²¹ Bala, a wa kũumã sẽn tũnug dao a yen tãa n wa wã, kũum vʋʋgrã me tũnuga dao a yen tãa n wa.

²² La a wa neba fãa sẽn kiid a Adam maasem yĩngã, woto me, neba fãa na n vʋʋgame, Kirist maasem yĩngã.

²³ La ned fãa na n talla a zĩiga: Kirist n na n yɩ dẽenem soaba, a Zezi waoongã raare. Neb nins bãmb sẽn so wã na yaool n pʋgle.

²⁴ Kirist sã n saas naam fãa, la pãn-soaadb fãa, la pãng fãa, b na n dɩka soolmã n lebs ba a Wẽnnaam. Dẽ, bũmb fãa saab taame.

²⁵ Bala, yaa tɩlɛ tɩ Kirist rɩ naam, hal tɩ ta daar ning b sẽn na n kɩt tɩ b tab b bɛɛbã fãa n zĩẽ.

²⁶ Yaoolem bɛ Kirist sẽn na n sãam yaa kũumã.

²⁷ Sɩd me, Wẽnnaam kɩtame tɩ Kirist soog bũmba fãa. La b sã n yet tɩ Wẽnnaam kɩtame tɩ Kirist soog bũmba fãa, dat n yeelame tɩ ned ning sẽn kɩt tɩ bãmb soogã ka naag tɩ bãmb soẽ ye.

²⁸ La Wẽnnaam sã n kɩt t'a Zezi soog bũmba fãa n sa, a Zezi mengã na n saka ned ning sẽn kɩt tɩ bãmb soog bũmb fãa wã, sẽn na yɩl la Wẽnnaam yɩ taoor soab bũmb fãa pʋgẽ.

²⁹ Sã n ka yɩ a woto, neb nins sẽn deegd kiidbã zĩig tɩ b lisd-bã na n maana a wãna? Kũum sã n ka vʋʋgd lae-lae, bõe yĩng tɩ nebã kɩted tɩ b lis-b kiidbã yĩngã?

³⁰ La yaa bõe yĩng tɩ tõnd gẽnegd d yõor wakat fãa?

³¹ M ba-biisi, mam yeta yãmb ne waoogr ning yãmb ya mam yĩng tõnd Zu-soab a Zezi pʋgẽ wã, tɩ daar fãa, kũum n be mam taoore?

³² Sã n yaa ninsaalb gesg yĩng la mam mao ne we-rũms Efɛɛsã, a yõod yaa bõe ne maam? Sã n yaa tɩ kũum ka vʋʋgda, bɩ d dɩ la d yũ. Bala, beoogo, d na n kiime.

³³ Da belg-y y mens ye: Tũud-n-ta-wẽng sãamda minim-sõamyã.

³⁴ Teem-y nao-kẽndre, n kẽn wa nin-tɩrse, la y ra maan yel-wẽn ye. Yaa yãmb yãnde, la mam yetame tɩ yãmb neb kẽer ka mi Wẽnnaam ye.

³⁵ La nina na n sokame tɩ sẽn ki-bã na n vʋʋga wãn-wãna, la b na n talla yĩn-bʋg buudu?

³⁶ Ka-yam soaba! Tẽeg tɩ bũmb ning fo sẽn bʋd ka yita, a sã ka ki ye.

³⁷ La fo sẽn dɩk bũmb ning n bʋdã, a ka yit n ket n ya a woto ye. Yãmb bʋta bõn-buugu, wa bɩle wall bũmb a to.

³⁸ La Wẽnnaam kõt-a la yĩng ning bãmb sẽn data, la kood buud fãa tara a tɩɩg buudu.

³⁹ Bõn-vɩɩlɩ wã fãa nemd ka wẽnd taab ye. Ninsaal nemd yaa toore, rũms nemd yaa toore, bõn-pɩgs nemd yaa toore, zĩm nemd yaa toore.

⁴⁰ Arzãn yĩns me beeme tɩ tẽng zug yĩns me beẽ. Arzãn yĩnga neerem yaa toor ne tẽng zug ka yĩngã.

⁴¹ Wĩntoog vẽenem toore, kiuug vẽenem toore, ãds vẽenem toore. Bala, ãdsã mens vẽenem ka zems taab ye.

⁴² Yaa woto me ne kũumã vʋʋgre. B sã n na n mum ninsaala, rẽ t'a yaa bõn-põaagdga. La a sã n wa na n vʋʋge, a ka lebd n yɩ bõn-põaagdg ye.

⁴³ B sẽn wat n na n mum-a wã, ka be sẽn get ye. La a sã n wa na n vʋʋge, na n yɩɩ ne ziiri. B sẽn wat n na n mum-a wã, rẽ t'a ka pãng ye. La a sã n wa na n vʋʋge, a pida ne pãnga.

⁴⁴ B sẽn wa n mumd-a wakatã, rẽ t'a yaa ninsaal yĩnga, la a sã n wa na n vʋʋge, a na n yaa sɩɩga. Ninsaal yĩng sã n beẽ, sɩɩg yĩng me beeme.

⁴⁵ Rẽnda n kɩt tɩ b gʋls n yeel tɩ: Pipi dao a Adam lebga nin-vɩɩga. La yaoolem Adamã lebga sɩɩg sẽn kõt vɩɩm.

⁴⁶ Ka sɩɩg yĩngã n deng ye, yaa ninsaal yĩngã, tɩ sɩɩg rẽndã yaool n pʋgda.

⁴⁷ Pipi raowã b sẽn yãk tẽng tom n naanã yaa tẽng bũmbu. La yiib soabã yita arzãna.

⁴⁸ Tẽng nedã sẽn ya bũmb ningã, tẽng nebã fãa me yaa a woto. La arzãn nedã sẽn ya bũmb ningã, arzãn nebã me yaa a woto.

⁴⁹ A wa tõnd sẽn tall tẽng nedã wẽnegã, tõnd na n talla arzãn nedã me wẽnego.

⁵⁰ M Ba-biisi, mam sẽn dat n yeelã, yaa tɩ ninsaal yĩng la zɩɩm ka tõe n paam Wẽnnaam soolmã ye, la bõn-põaagdg ka paamd n lebg sẽn ka põogd ye.

⁵¹ Ad mam togsda yãmb yel-solemde: Tõnd fãa ka na n ki ye. Tõnd fãa na n paama tedgr

⁵² wakat a yembre, nif kamsg pʋgẽ, yaoolem baorg peebgã wakate. Bala, a na n peebame, la neb nins sẽn ki wã na n vʋʋgame n tar yĩns sẽn ka põogd ye, la tõnd me na n paama tedgre.

⁵³ Sɩd me, yaa tɩlɛ tɩ yĩn-põaagdgã tek n lebg yĩng sẽn ka põogda, tɩ yĩn-kiidgã tek n lebg yĩng sẽn ka kiid ye.

⁵⁴ Yĩn-põaagdgã sã n wa lebg yĩng sẽn ka põogda, tɩ yĩn-kiidgã lebg yĩng sẽn ka kiida, wakat kãng la bũmb ning b sẽn gʋlsã na n pidsi. B yeelame yaa: Tõogr n vel kũum.

⁵⁵ Kũum, fo tõogrã bee yɛ? Kũum, fo toogã bee yɛ?

⁵⁶ Yaa yel-wẽnã la kũumã toolem, la yaa tõogã n kõt yel-wẽnã pãnga.

⁵⁷ La bark Wẽnnaam! Bãmb kɩtedame tɩ tõnd paam tõogre, tõnd Zu-soab a Zezi maasem yĩnga.

⁵⁸ Woto yĩnga, m ba-bi-nongdse, yals-y kãenkãe, tɩ bũmb da tõog n vigs yãmb ye. Kẽng-y taoor Zu-soabã tʋʋmd pʋgẽ wakat fãa, yãmb sẽn mi tɩ tʋʋmd ning yãmb sẽn tʋmd Zu-soabã yĩngã ka na n yɩ zaalmã yĩnga.

16

¹ Sã n yaa ne nonglem kũunã y sẽn na n kõ Kirist tẽedbã sẽn be Zeruzalɛmã yĩngã, bɩ yãmb me maan wa mam sẽn yeel Galasi soolem wẽnd-dotã tɩ b maanã.

² Dasem a yopoe wã pipi daarã, bɩ yãmb ned kam fãa bĩng bũmb ning a sẽn tõe n kõ wã kɛɛnga, a yiri, tɩ y da wa yals n gũ mam waoong n na n yaool n tigs kũunã ye.

³ La mam sã n wa, mam na n kõo neb nins yãmb sẽn yãk tɩ b tall y kũunã n kẽng Zeruzalɛmã kaset sɛb tɩ b zã n kẽnge.

⁴ La sã n ya tɩlɛ tɩ mam mengã kẽng Zeruzalɛm, b na tũ maam n kẽnge.

⁵ Mam sã n pɩʋʋg Masedoane, mam na n waa yãmb nengẽ, bala, mam na n pɩʋʋga Masedoan.

⁶ Daar ninga, mam na n zĩnda ne yãmb bilfu, wall m na n zĩnda yãmb nengẽ hal tɩ waoodã wẽnd looge, tɩ yãmb na kɩt tɩ b tall maam n kẽng zĩig ning mam sẽn na n kẽngã.

⁷ So-kãngã wã, mam ka rat n pɩʋʋg bal n ges yãmb la m loog ye. Mam saagdame tɩ Zu-soabã sã n sake, mam na n zĩnda ne yãmb bilfu.

⁸ Baoosgo, mam na n paa Efɛɛs hal tɩ ta Pãntekotã.

⁹ Bala, dignoor n pak hal yalenga, mam tʋʋmdã yĩnga, la sẽn kis-b maamã sõor waoogame.

¹⁰ A Tɩmote sã n ta, bɩ y maan y sẽn na maan t'a sẽn be yãmb sʋkã, bɩ a pɛlg yɩ kãenkãe, bala, a tʋmda Zu-soabã tʋʋmd wa mam me sẽn maandã.

¹¹ Woto yĩnga, bɩ ned baa a yen da get-a n pa nandẽ ye. Kɩt-y tɩ b yãag-a t'a lebg n wa mam nengẽ ne laafɩ, bala, mam gũuda yẽ ne ba-biisã

¹² Ne ba-biig a Apolos yelle, mam keng-a-la sõama n yeel-a t'a tũ ba-biisã n wa yãmb nengẽ, la a dag n ka yãk yam tɩ wa be moasã ye. A sã n wa paam weere, a na wa.

¹³ Neend-y-yã! Yals-y kãenkãe tẽebã pʋgẽ! Yɩ-y raopa, keng-y y mense.

¹⁴ Bɩ bũmb nins fãa sẽn maand yãmb sʋkã yɩ ne nonglem.

¹⁵ M ba-biisi, bũmb a yembr la mam leb n dat n yeel yãmb tɩ y maane. Yãmb miime t'a Stefanas zaka rãmb n yɩ pipi tẽedb Akayi soolmã, la tɩ b tʋmdame n sõngd Kirist tẽedbã.

¹⁶ Sak-y neb a woto, la y sak neb nins fãa sẽn naag tʋʋmdã pʋgẽ n tʋmdẽ wã.

¹⁷ Mam sũur yaa noog ne a Stefanas la a Fortunatus la a Akayikus sẽn wa mam nengẽ wã. B yiisa yãmb velem sẽn dag n tar maamã,

¹⁸ bala, b kɩtame tɩ maam ne yãmb sɩɩsã gãande. Bãng-y neb a woto yõod sẽn zem to-to.

¹⁹ Wẽnd-dot nins sẽn be Azi soolmã neb pʋʋsda yãmba. A Akilas ne a Pirsil la Wẽnnaam nebã sẽn tigimd bãmb zakẽ wã toonda yãmb pʋʋsem Zu-soabã pʋgẽ.

²⁰ D ba-biisã fãa toonda yãmb pʋʋsem. Pʋʋs-y taab ne mok-sõngo.

²¹ Yaa maam a Poll mengã nug n gʋls pʋʋsmã.

²² Ned sã n ka nong Zu-soabã, bɩ kãab-wẽng zĩnd a zugu. Maranata!

²³ Bɩ Zu-soab a Zezi Kirist barkã zĩnd ne yãmba!

²⁴ Mam nonga yãmb fãa Kirist Zezi pʋgẽ.