1

¹ Maam a Poll, a Zezi Kirist tʋmtʋmd b sẽn yãk t'a yɩ tẽn-tʋmdã, n welg-a toor Wẽnnaam koe-noogã yĩnga,

² koe-noog ning Wẽnnaam sẽn dag n tũnug b no-rɛɛsdbã n kãab bãmb gʋls-sõamyã pʋgẽ,

³ la sẽn gomd bãmb Bi-ribl sẽn ya a Daviid yageng ne yĩng yelle,

⁴ la ne sɩɩgã yelle, b welga toore, la Wẽnnaam wilga ne pãng n yeel t'a Zezi yaa Bãmb Bi-ribla, bãmb sẽn vʋʋg-b n yiis kũum sʋkã yĩngã.

⁵ Yaa tõnd Zu-soab a Zezi Kirist. Yaa bãmb maasem yĩng la tõnd deeg barka, la tẽn-tʋmde, tɩ ne bãmb yʋʋre, tõnd na tall soolem toay-toayã fãa neb tɩ b wa tẽ Bãmba, la b sak Bãmba.

⁶ A Zezi Kirist sẽn bool yãmbã, yãmb me yaa soolem kãens rãmba.

⁷ Maam n tʋmd seb-kãnga neb nins fãa sẽn be Rom n ya Wẽnnaam nin-nongdse, tɩ Wẽnnaam bool-b tɩ b yɩ sõama n welg toorã nengẽ: Bɩ tõnd ba a Wẽnnaam la tõnd Zu-soab a Zezi Kirist ning yãmb zut barka la b kõ-y bãane.

⁸ Pipi, mam deng n pʋʋsda m Wẽnnaamã bark a Zezi maasem yĩnga, yãmb fãa yĩnga. Bala, yãmb tẽebã yell saaga dũni gill fãa.

⁹ Wẽnnaam mam sẽn sakd ne m sũur fãa, n moond bãmb bi-riblã koe-noogã yaa mam kaset soab tɩ mam pʋta yãmb yell daar fãa,

¹⁰ la wakat fãa m pʋʋsg pʋgẽ. Mam kota Wẽnnaam tɩ b sã n data, bɩ b kõ-m weer sẽn zems tɩ wa yãmb nengẽ.

¹¹ Bala, mam data ne m sũur fãa n yã yãmba, tɩ m tõe n taas yãmb Sɩɩgã kũuni, tɩ yãmb tẽebã na paam pãnga,

¹² wall tɩ tõnd pʋs n naag taab n paam raood paoosg ne tẽeb a yen tãa ning yãmb la maam sẽn tarã.

¹³ M ba-biisi, mam ka rat tɩ yãmb zɩ tɩ mam saaga naoor wʋsg n dat n wa n ges yãmba, tɩ m tõe n wom biis yãmb sʋk wa soolem a taabã pʋsẽ wã. La hal tɩ ta moasã, gɩdgr n gɩdg maam.

¹⁴ Mam tog n tʋma ne neb yam sẽn weke, la ne neb yam sẽn ka weke, la ne bãngdba la ne zɩtbã me.

¹⁵ Dẽnda n kɩt tɩ mam dat ne n sũur fãa n moon yãmb me sẽn be Rommã koe-noogã.

¹⁶ Bala, koe-noogã mooneg yãnd ka tar maam ye. A yaa Wẽnnaam pãng sẽn fãagd ned ning fãa sẽn tẽeda: Pipi yaa Zuif-rãmba, tɩ sẽn ka-b Zuif-rãmbã pʋgda.

¹⁷ Sɩd me, Wẽnnaam tɩrlmã pukda be ne tẽebo, la tẽeb yĩnga, wa b sẽn gʋlsã: Nin-tɩrg na vɩ ne tẽebo.

¹⁸ Tɩ bõe, Wẽnnaam sũ-puugr yita yĩngr n sigd ninsaalb zutu, b sẽn paoogd Wẽnnaamã la b tʋʋm-wẽnsã yĩnga, bãmb sẽn gɩdgd sɩdã t'a ka tõe n maan a tʋʋmde, tɩ ka zemsã yĩnga.

¹⁹ Bala, bũmb ning fãa ned sẽn tõe n bãng sẽn kẽed ne Wẽnnaam yellã ya vẽeneg ne bãmba, tɩ bõe, Wẽnnaam puk-a la bãmba.

²⁰ Sɩd me, sẽn sɩng ne dũni naanego, nebã nee Wẽnnaam yɛlã ninsaal nin sẽn ka yãtã, bãmb pãng ka zĩnd sɩngr kõn zĩnd saabã la b Wẽnnaamlemã sõama. La yaa b sẽn get bãmb yɛlã, bũmb nins bãmb sẽn maandã pʋgẽ.

²¹ Dẽ, bãmb ka tõe n yã bũmb n dõd n yi ye, tɩ bõe, bãmb sẽn bãng Wẽnnaamã, b ka waoog-b wa b yaa Wẽnnaam ye, la b ka pʋʋs-b bark ye. La b tagsd sẽn ka yõodã kẽesa bãmb moogo, la bãmb sũyã sẽn ka tar yãm-wekrã kẽe lik bida pʋgẽ.

²² B wuka mens n yeel tɩ b yaa yam dãmbã, la b lebga yalemba.

²³ La b teka Wẽnnaam sẽn ka kiidã ziir ne bõn-naands sẽn mamsd ninsaal sẽn kiidã, la liuuli, la nao a naase, la bõn-vuudsi.

²⁴ Dẽnda n kɩt tɩ Wẽnnaam bas-b tɩ b kẽ rẽgd pʋgẽ, wa b sũyã sẽn data, tɩ b paoog b yĩnsã b toore.

²⁵ Bãmb teka Wẽnnaam yellã sẽn ya sɩdã ne zĩrĩ. Bãmb pʋʋsda bõn-naandsã n sakd-ba, la b bas Naandã sẽn tog n paam waoogr wakat sẽn kõn a wã pʋʋsgo.

²⁶ Dẽ n kɩt tɩ Wẽnnaam bas-b tɩ b maan yĩng ratem sẽn paoogd neda. Bala, bãmb pagbã basa gãag ning sẽn zems Wẽnnaam sẽn seglã n maand sẽn ka segd ye.

²⁷ Raopã me basa pagbã gãag sẽn zems Wẽnnaam seglsã, tɩ ratem taab yĩngã rɩt bãmb wa bugum. B maanda yãnde, rao ne raoa, la b yĩnsã paamda sɩbgr sẽn zemsd ne b menengã sẽn wat ne bũmb ningã.

²⁸ Bãmb sẽn ka tags tɩ yaa sõama tɩ bãng Wẽnnaamã, Wẽnnaam basame tɩ b tũud b tagsdã sẽn ya wẽnsã, tɩ b maand bũmb sẽn ka zems ye.

²⁹ Ka-tɩrlem buud fãa, la pʋ-toogo, la yão-beedo, la wẽnga, la ratem-wẽnga, la nin-kʋʋbo, la zaba, la zãmbo, la sɩlem n pid bãmba.

³⁰ B yaa tẽn-kãn-neba, nin-sãbsdba, wẽn-kɩɩsdbã, sũ-tʋʋls rãmba, wilg-m-mens rãmba, wuk-m-mens rãmba, n mi soay sẽn na tũ n maan wẽnga, ba-rãmb la ma-rãmb kɩɩsdba, b yam ka wek ye.

³¹ B yaa neb sẽn ka be teegre, sẽn ka tar nonglem, n ka mi sugri, n ka tar nimbãan-zoeere ye.

³² La baa ne b sẽn mi Wẽnnaam yelsem sẽn yet tɩ neb nins sẽn maand bõn-kãensã zemsa ne kũumã, b maand-b lame. La ka rẽ bal ye, b yetame me tɩ neb nins sẽn maand bõn-kãensã maanda neere.

2

¹ Dẽ, fo sẽn ya ned ning fãa, fo sẽn kaood f taab bʋʋdã, fo kõn paam bũmb n dõd n yi ye. Bala, fo sẽn kaood neb a taab bʋʋdã, fo dogenda yell f meng zugu. Tɩ bõe, fo kaooda f taabã bʋʋdo, la f yaool n maand wa bãmb bala.

² Sɩd me, tõnd miime tɩ Wẽnnaam bʋ-kaoor neb nins sẽn maand a woto wã yĩng tũuda sɩda.

³ Fo tẽedame tɩ f sẽn kaood f taab bʋʋdo, n maand wa bãmbã fo na n põsa Wẽnnaam bʋ-kaoorã?

⁴ Bɩ fo ka nand bãmb sõmblemã, la bãmb sũ-bʋgsmã, la bãmb sũ-marã sẽn waoogã, n ka miẽ tɩ Wẽnnaam sõmblemã tusda foom tɩ f tek yam n kos sugri?

⁵ La ne fo sũurã riglingã la f sũurã sẽn ka baood tekrã, fo tigsda sũ-puugr n bĩngd f meng Wẽnnaam sũ-puugrã daar yĩnga, daar ning bãmb bʋ-kaoorã sẽn zemsã sẽn na n pukã,

⁶ bãmb sẽn na n keo ned kam fãa wa sẽn zems a tʋʋmdã:

⁷ neb nins sẽn modgd tɩ maan neere, n baood ziiri, la waoogre, la b baood vɩɩm sẽn kõn sa wã na n paam-a lame,

⁸ la neb nins nokoɛɛm sɩɩg sẽn tar tɩ b kɩɩsd sɩd la b sakd ka-tɩrlemã na n paama Wẽnnaam sũ-yikri la b sũ-puugri.

⁹ Zuif-rãmb pipi tɩ sẽn ka-b Zuif-rãmbã pʋgda. Ned ning fãa sẽn maand wẽngã na n paama to-kãsenga la pelen-yɩgse.

¹⁰ Ned ning fãa sẽn maand neere, na n paama ziiri, waoogre la bãane. Zuif-rãmbã pipi tɩ sẽn ka-b Zuif-rãmbã pʋgda.

¹¹ Bala, Wẽnnaam ka bakd neb ye.

¹² Neb nins fãa sẽn ka bãng tõogã, la sẽn maan yel-wẽnã na sãam me tɩ tõog toor kaẽ ye. La neb nins sẽn paam tõogã la sẽn maan yel-wẽnã, tõogã la b na n ges n kao bãmb bʋʋdo.

¹³ Sɩd me, ka neb nins sẽn kelgd tõogã n zems Wẽnnaam nifẽ ye. La yaa neb nins sẽn sakd tõogã n na n paam zemsgo.

¹⁴ Buud a taabã sẽn ka tar tõogã sã n kell n maand bũmb nins tõogã sẽn yetã, bãmb sẽn ka tar tõogã, bãmb mensã mii b sẽn tog n maane.

¹⁵ B wilgdame tɩ bũmb nins tõogã sẽn datã gʋlsa bãmb sũyã pʋse. Bãmb sũ-bãngrã kɩta rẽnda kaseto, la bãmb tagsgã rõta bãmba wall a zabd n sõngd bãmba.

¹⁶ Daar ning Wẽnnaam sẽn na n kɩt tɩ Kirist Zezi kao nebã tʋʋm-solgdsã bʋʋd wa koe-noog ning mam sẽn moondã sẽn yetã, bõn-kãens na n pukame.

¹⁷ Fo boonda f meng tɩ Zuif, n teegd tõogã, n waoogd f menga, f sẽn ya wẽn-tũudã yĩngã.

¹⁸ Fo yetame tɩ f mii bãmb daabã, tɩ tõogã sẽn zãms foomã yĩnga, fo mii bũmb ning sẽn ya sõama la sẽn ya wẽng n bake.

¹⁹ Fo sẽn yet f meng tɩ f yaa zoens tɛtã, la neb nins sẽn be lik bida pʋgẽ wã vẽenemã,

²⁰ n ya ka-yam dãmbã zãmsdã, la kamb karen-saambã, yaa tɩ fo tẽedame tɩ f tara bãngr la sɩd sor tõogã pʋgẽ.

²¹ Fo zãmsda neb a taabã, la f ka zãmsd f meng ye.

²² Fo moondame n yetẽ tɩ b ra zu ye, la f yaool n zuuda! Fo yetame tɩ b ra yo ye, la f yaool n yooda! Fo geta wẽnd-naands wa bõn-põosgo, la f yaool n kẽed b rotẽ wã n zuud-ba!

²³ Fo sẽn dɩk tõogã n waoogd f mengã, fo kɩɩsda tõogã n paoogd Wẽnnaam.

²⁴ Bala, buud a taabã neb paoogda Wẽnnaam yʋʋr yãmb yĩnga, wa sẽn be gʋls-sõamyã pʋgẽ wã.

²⁵ Sɩda, bãong yaa bũmb sẽn be yõodo, fo sã n sakda tõogã. La fo sã n kɩɩs tõogã, fo bãongã lebga moonem bala.

²⁶ La sẽn ka kẽ-a bãong sã n sakd bũmb nins sẽn gʋls tõogã pʋgẽ wã, b ka na n ges a moonemã wa bãong kõom sɩda?

²⁷ Sẽn ka tol n kẽ-a bãongã sã n pidsd tõogã sẽn yetã, a kõn kao fo bʋʋdo, fo soab sẽn tar tõogã sebr la bãongã sɩda?

²⁸ Ka ned ning sẽn tar-a Zuif yalẽ wã bal n ya Zuif ye. La bãongã ka bũmb ning b sẽn ne yĩn-nemdã pʋgẽ wã ye.

²⁹ La Zuif yaa ned ning sẽn ya-a Zuif a sũur pʋgẽ, la bãong meng yaa sũurẽ dẽnda, sẽn zems Sɩɩgã rẽnda, la ka tõogã rẽnd ye. Zuif kãng pẽgr ka yit ninsaalb nengẽ ye, la yaa Wẽnnaam nengẽ.

3

¹ Zu-noog ning Zuif sẽn tarã yaa bõe, wall bãongã kõom yõod yaa bõe?

² A bee nafr bũmb fãa pʋgẽ. Pipi, Wẽnnaam deng n dɩka b goamã n gũnug ne Zuif-rãmbã.

³ La d na n yeelame tɩ bõe? Bãmb neb kẽer sã n ka maan sɩd ne Wẽnnaam, dẽ yĩnga, bãmb sẽn ka maan sɩdã na n kɩtame tɩ Wẽnnaam sɩdã ka maan a tʋʋmde?

⁴ Yaa vẽeneg tɩ ayo. Nebã tog n bãngame tɩ baa ninsaalbã fãa sã n yagda zĩrĩ, Wẽnnaam yaa sɩd-soaba, wa b sẽn gʋlsã: Tɩ ne yãmb goama, b na mik tɩ yãmb yaa tɩrga, la tɩ yãmb bʋʋda kaoob wakate, bɩ y paam tõogre.

⁵ La tõnd ka-tɩrlemã sã n kɩtdẽ tɩ Wẽnnaam tɩrlemã pukdẽ, tõnd na n yeelame tɩ bõe? Wẽnnaam sã n sak tɩ b sũur yiki, b yaa ka-tɩrlem soab sɩda? Mam sẽn gomda yaa ninsaalemdo.

⁶ Yaa vẽeneg tɩ ayo. Sã n ka rẽ, Wẽnnaam na n yɩɩ a wãn n kao dũni bʋʋdo?

⁷ La sã n yaa tɩ ne mam zĩrĩ wã Wẽnnaam sɩdã pukdame n paasde tɩ ya bãmb waoogre, bõe tɩ b na n leb n kao mam bʋʋd wa yel-wẽn maanda?

⁸ La wa tẽn-kãn-neb kẽer sẽn kãnegd tõnd n yetẽ tɩ d gomda a woto wã, bõe tɩ tõnd ka na n maand wẽng tɩ sẽn ya sõmb tõe n tũ be n wa? Nin-kãens sɩbgrã yaa bũmb sẽn zemse.

⁹ La rẽ wã, tõnd yɩɩda neb a taabã la? Baa bilfu! Bala, tõnd zoe n wilgame tɩ nebã fãa, Zuif-rãmba la sẽn ka-b Zuif-rãmbã bee yel-wẽnã yembd pʋgẽ

¹⁰ wa sẽn gʋlsã: Ned sẽn zems ka be ye! Baa a yen ka ye.

¹¹ Ned baa a yen yam ka weke, baa a yen ka baood Wẽnnaam ye. Neba fãa menemame, n naag taab n lebg ka-barka.

¹² Ned baa a yen ka be sẽn maand neer ye, baa a ye!

¹³ Bãmb kokorã yaa wa yaoog b sẽn fõke. B zɛlmã wã belgda neba. Ruruug zẽnem n be bãmb no-bɩmsẽ wã.

¹⁴ Bãmb noor pida ne kãab-wẽng la toolem.

¹⁵ B naowã tʋʋla ne a kẽng n tɩ raag zɩɩm.

¹⁶ B sẽn pɩʋʋgẽ fãa, yaa sãoong ne toog bala.

¹⁷ B ka mi bũmb ning sẽn wat ne laafɩ ye.

¹⁸ B toor ka be ne Wẽnnaam zoees ye.

¹⁹ Tõnd yaool n miime tɩ bũmb ning fãa tõogã sẽn yetã, a yeta neb nins fãa sẽn loe ne tõogã, tɩ noyã fãa na mume, tɩ nebã na bãng tɩ Wẽnnaam nifẽ, nebã fãa yaa bɛɛgdba.

²⁰ Bala, ned baa a yen ka na n paam zemsg Wẽnnaam taoor tõogã sakr yĩng ye, bala, tõogã kɩtdame bal tɩ ned bãng yel-wẽnd sẽn ya a soaba.

²¹ La moasã Wẽnnaam tɩrlem pukame tɩ tõog toog kaẽ ye, la tõogã ne Wẽnnaam no-rɛɛsdbã sɛb kɩta tɩrlemã kaseto,

²² sẽn yaa tɩ tẽeb ne a Zezi Kirist wata ne Wẽnnaam tɩrlem neb nins fãa sẽn tẽedã yĩnga. Bala, welgr ka ye:

²³ Nebã fãa maana yel-wẽna, n kong Wẽnnaam ziirã.

²⁴ La b paamda zemsgã zaalem bala, Wẽnnaam nimbãan-zoeerã yĩnga, fãagr ning sẽn be a Zezi Kirist pʋgẽ wã maasem yĩnga.

²⁵ Yaa bãmb la Wẽnnaam pĩnd n yãk n kõ, neb nins sẽn na n tẽ bãmbã yel-wẽna yiisg yĩnga, ne b zɩɩmã. Woto na n wilga Wẽnnaam tɩrlem. Bãmb sẽn bas nebã n ka sɩbg-b b yel-wẽn nins b sẽn dag n maan Wẽnnaam sũ-marã wakatã yĩnga,

²⁶ bãmb da rat n wilga b tɩrlemã moasã wakatã, tɩ nebã na bãng tɩ bãmb yaa tɩrga, bãmb sẽn kɩtd tɩ ned ning sẽn tẽed a Zezi wã zemsã.

²⁷ Woto yĩngã, bõe pʋgẽ la ned tõe n waoog a menga? Bũmb ka be ye. Ne tõ-bʋgo? Ne tʋʋm tõogo? Ayo! La yaa ne tẽeb tõogo.

²⁸ Bala, tõnd geendame tɩ ninsaal paamda zemsg tẽeb yĩnga, tɩ tõog tʋʋmã toog kaẽ ye.

²⁹ Walla, Wẽnnaam yaa Zuif-rãmbã bal Wẽnnaam la? Bãmb ka buud a taabã me Wẽnnaam la? N-ye, bãmb yaa buud a taabã me Wẽnnaam,

³⁰ bala, Wẽnnaam a yen tãa n be n na n kɩt tɩ sẽn kẽ-b bãongã zems tẽeb yĩnga, la b kɩt tɩ sẽn ka kẽ-bã me zems tẽeb yĩnga.

³¹ Woto wã, dẽ yĩnga tõnd dɩkda tẽebã n kiisd tõogã la? Yaa vẽeneg tɩ ayo. Ka woto ye: tõnd wilgdame tɩ tõogã yaa sõama.

4

¹ Dẽ yĩnga, tõnd na n goma d yĩng yaab a Abraham yell n yeel tɩ bõe? Bõe la b paam-yã?

² Sã n yaa sɩd tɩ yaa tʋʋmã yĩng la a Abraham paam tɩrlem, b tõe n waooga b menga. La Wẽnnaam taoore, a ka a woto ye.

³ Sɩd me, Wẽnnaam gʋls-sõamyã yetame tɩ bõe? A Abraham tẽe Wẽnnaam, la Wẽnnaam gesa a Abraham wa nin-tɩrga, a tẽebã yĩnga.

⁴ La ned sã n tʋm tʋʋmde, a yaoodã ka nimbãan-zoeer kũun ye, yaa a rẽnda.

⁵ Sã n yaa ne ned ning sẽn ka tʋm-a, la a yaool n tẽ soab ning sẽn kɩtd tɩ wẽng maand lebg tɩrgã, b geta a soabã wa nin-tɩrga a tẽebã yĩnga.

⁶ Woto me, a Daviid yetame tɩ ned ning Wẽnnaam sẽn kõt tɩrlem t'a ka tʋm bũmbã tara sũ-noogo. A yeelame:

⁷ Bark bee neb nins b yel-wẽnã sẽn paam sugrã, tɩ b yel-wẽnã paam ludbã zutu.

⁸ Bark bee ned ning Zu-soabã sẽn ka geelgd a yel-wẽnã zugu.

⁹ Sũ-no-kãng yaa zũinsã yĩng bal bii, bɩ yaa ne moosã me? Bala, tõnd yetame yaa: Ne a Abraham, b geelga b tẽebã wa tɩrlem.

¹⁰ Wakat ning b sẽn geelg b tẽebã wa tɩrlema, dẽ tɩ b dag n yaa wãn-wãna? Dẽ tɩ b dag n kẽe bãong bɩ b ka kẽ? B dag n nan ka kẽ bãong ye, b da ket n yaa moaaga.

¹¹ La b reega bãongã kõom sẽn ya bãnd sẽn wilg t'a paama tɩrlem tẽeb yĩnga, la rẽ tɩ b ket n yaa moaaga. Woto, b yaa nebã fãa sẽn tẽedã ba, tɩ baa ne b sẽn ka kẽ bãongã, bɩ Wẽnnaam geelg-b tɩrlemã.

¹² Woto bãmb yaa zũinsã me ba. Ka yĩngã bãong bal la b kẽ ye, b kẽnda tẽeb ning tõnd yaab a Abraham sẽn dag n tar b moonem wakatã pʋgẽ.

¹³ Sɩd me, ka ne tõogã la Wẽnnaam kãab a Abraham wall a yagensã tɩ b na n sooga dũni wã ye, la yaa ne tẽeb tɩrlem.

¹⁴ Sã n yaa tõog yĩng la ned paamd dogem-pʋɩɩre, dẽnd tẽeb yaa zaalem, la b kiisa kãabgã sẽn kãabã.

¹⁵ Bala, tõogã wata ne sũ-yikri, la zĩig ning tõog sẽn ka be, beegr me ka ye.

¹⁶ Dẽ, yaa ne tẽebo, tɩ b tõe n yeel tɩ yaa nimbãan-zoeere, tɩ kãabg ning Wẽnnaam sẽn kãabã na pids a Abraham yagensã fãa yĩnga. Ka b rãmb sẽn tar-b tõogã yĩng bal ye, la yaa ne neb nins sẽn tar-b tõnd ba a Abraham tẽebã wa b sẽn gʋlsã:

¹⁷ Mam kɩtame tɩ fo lebg buud wʋsg ba. Bãmb yaa tõnd fãa ba, Wẽnnaam ning b sẽn tẽ wã taoore. Yaa Wẽnnaam ning sẽn kõt kũum vɩɩm, la b kɩtd tɩ bũmb nins sẽn ka be wã zĩndi.

¹⁸ A Abraham maana tẽeb ne bũmb ned sẽn ka tõe n tẽ, b tẽeme n lebg soolem wʋsg ba wa Wẽnnaam sẽn dag n yeelã: Fo yagensã na n yɩɩ a woto.

¹⁹ B ka bas tɩ b tẽebã boog ye, b kell n maana tẽeb ne b yĩngã sẽn kolg kũumã, bal b yʋʋmã dag n kolga koabga, la a Sara rogem me ra loogame.

²⁰ La Wẽnnaam sẽn kãab-bã, b ka sãmbe, b sẽn ka tẽeb yĩng ye. La b tẽebã sẽn paas-b pãngã yĩnga, b kõo Wẽnnaam waoogre.

²¹ Bala, b sũur kɛɛma ne yel-kãngã: Bũmb ning Wẽnnaam sẽn kãabã, b tara pãng n na n pids-a.

²² Dẽnda n kɩt tɩ b geelg a Abraham tẽebã wa tɩrlemã.

²³ Ka bãmb b yembr yĩng la b gʋls n yeel tɩ b geelga b tẽebã wa tɩrlemã ye,

²⁴ la yaa tõnd me yĩnga. B na n geelga tõnd tẽebã wa tɩrlem, tõnd sẽn tẽed a soab sẽn vʋʋg tõnd Zu-soab a Zezi tɩ b yi kũum sʋkã,

²⁵ soab ning b sẽn kʋ tõnd beegr yĩnga, la sẽn vʋʋg tɩ tõnd tõe n paam tɩrlemã yĩnga.

5

¹ Dẽ, tõnd sẽn paam zemsg tẽeb yĩngã, tõnd tara zems-n-taar ne Wẽnnaam tõnd Zu-soab a Zezi Kirist maasem yĩnga.

² Yaa bãmb maasem yĩng la tõnd paam n kẽ barkã pʋgẽ ne tẽebo, la tõnd yasa kãenkãe bark kãng pʋgẽ, la tõnd maanda sũ-noogo, d sẽn gũud Wẽnnaam ziirã ne tẽebã yĩngã.

³ La sẽn yɩɩd rẽnda, tõnd maanda sũ-noog baa namsg pʋgẽ, tõnd sẽn mi tɩ namsgã wata ne sũ-mare,

⁴ tɩ sũ-mar wat ne maan-sɩd sẽn wat ne tõogre, tɩ maan-sɩd sẽn wat ne tõogrã wat ne tẽeb pidsg gũudum.

⁵ Tẽeb pidsg gũudum yaool n ka tudgd ned ye, bala, Wẽnnaam Sɩɩg-sõng b sẽn kõ tõndã pidsda tõnd sũyã ne Wẽnnaam nonglem tõnd sũyã pʋse.

⁶ Bala, wakat ning tõnd sẽn da ka pãngã, Wẽnnaam wakatã sẽn wa n ta, Kirist kii nin-wẽnsã yĩnga.

⁷ Yaa toog tɩ ned sak n ki nin-tɩrg yĩnga. Daar ninga, nina na paam raood n ki nin-sõng yĩnga.

⁸ Wakat ning tõnd sẽn dag n ket n ya yel-wẽn maandba, Kirist kii tõnd yĩnga, la ne rẽnda, Wẽnnaam wilga b nonglem tõnd yĩnga.

⁹ Moasã, tõnd sẽn paam zemsg Kirist zɩɩmã raagr yĩngã, tõnd kõn põs Wẽnnaam sũ-yikr bãmb maasem yĩng n yɩɩd sɩda?

¹⁰ Bala, sã n yaa tɩ tõnd sẽn dag n ket n ya bɛɛbã, tõnd yellã ne Wẽnnaamã paama yiisg Bãmb Bi-riblã kũum yĩnga, moasã yellã sẽn sa wã, tõnd kõn paam fãagr bãmb vɩɩmã yĩng n yɩɩd sɩda?

¹¹ Sẽn yɩɩd rẽ yɛsa, tõnd maanda sũ-noog Wẽnnaam pʋgẽ, tõnd Zu-soab a Zezi Kirist maasem yĩnga, soab ning sẽn wa ne zemsg tõnd ne Wẽnnaam sʋk moasã wã.

¹² Yaa woto yĩnga, a wa yel-wẽna sẽn wa dũni ned a yembr maasem yĩngã, tɩ yel-wẽnã wa ne kũum, tɩ nebã fãa kiidẽ, b fãa sẽn maan yel-wẽnã yĩngã...

¹³ Bala, hal tɩ ta wakat ning b sẽn moon tõogã, yel-wẽn dag n bee dũni, la b rag n ka geend yel-wẽnã tõogã sẽn dag n ka wã ye.

¹⁴ Baoosgo, kũum zĩnda a Adam wakat hal tɩ ta a Moyiis wakate. Baa neb nins sẽn ka beeg a Adam beegrã buud kiime. A Adam yaa sẽn da tog n wa-a wã wẽnego.

¹⁵ Kũun ning sẽn kõt zaalmã yell ka wẽnd kongrã yell ye. Bala, neb wʋsg sã n kii ned a yembr beegr yĩnga, sẽn yɩɩda, Wẽnnaam kiiga b barkã, la kũun sẽn yit ned a yen bark pʋgẽ, a Zezi Kirist, neb wʋsg zut wʋsgo.

¹⁶ Kũun-kãng yellã ka wẽnd nin-yend yel-wẽnã yell ye. Bala, bʋʋd sẽn pʋgd kongr a yen tãa wã wata ne sɩbgre, tɩ kũun ning sẽn kõt zaalem kongr zugẽ wã wat ne tɩrlem kũuni.

¹⁷ Kũum sã n bee ned a yen tãa kongrã yĩnga, neb nins sẽn dag deeg Wẽnnaam bark-kãsengã la tɩrlem kũunã kõn vɩɩmd n dɩ naam a Zezi Kirist b yen tãa maasem yĩng n yɩɩd sɩda?

¹⁸ Woto yĩnga, a wa ned a yen tãa beegr sẽn kɩt tɩ sɩbgr paam nebã fãa wã, woto me, tɩrlem tʋʋmd a yen tãa maasem yĩnga, tɩrlem sẽn kõt vɩɩmã tata neba fãa.

¹⁹ Sɩd me, a wa ned a yen tãa kɩɩsg yĩng sẽn kɩt tɩ neb wʋsg lebg yel-wẽn maandba, woto me, ned a yen tãa sakr yĩnga, b na n kɩtame tɩ neb wʋsg lebg tɩrse.

²⁰ La tõog yaool n waame tɩ kongr lebg kãsenga. La zĩig ning yel-wẽn sẽn paam pãnga, barkã paama paoosg n yɩɩda.

²¹ Woto, a wa yel-wẽnã ne kũum sẽn soog zĩigã, barkã sooga zĩig me tɩrlemã yĩnga, tɩ d tõe n paam vɩɩm sẽn kõn sa, tõnd Zu-soab a Zezi Kirist maasem yĩnga.

6

¹ Dẽ, tõnd na n yeelame tɩ bõe? Tõnd na n kell n paa yel-wẽnã pʋgẽ tɩ barkã paam paoosgo?

² Yaa vẽeneg tɩ ayo. Tõnd sẽn ya wa kũum ne yel-wẽna yellã, tõnd na n leb n yɩɩ a wãn n vɩ yel-wẽn pʋgẽ?

³ Yãmb zɩ tɩ tõnd fãa sẽn paam lisg Kirist Zezi pʋgẽ wã, yaa bãmb kũumẽ wã la tõnd lis-yã?

⁴ Woto, ne lisgã, tõnd muma ne bãmba b kũumã pʋgẽ, t'a wa ba wã ziir sẽn vʋʋg a Zezi tɩ b yi kũum sʋkã, tõnd me kẽnda vɩ-paalg pʋgẽ a woto.

⁵ Sɩd me, tõnd sã n lebga tɩɩg a yembr ne bãmba, tõnd sẽn paam pʋɩɩr ne bãmb kũumã yĩnga, tõnd na kell n yɩ bũmb a yembr ne bãmba, n paam pʋɩɩr ne bãmb vʋʋgrã.

⁶ Tõnd miime tɩ d yalẽ kʋdgã naaga ne bãmb n ka da-pɩkã zugu, tɩ yel-wẽnã ratem kãng pãng na sa, tɩ tõnd kõn leb n yɩ yel-wẽnã yems yɛs ye.

⁷ Bala, ned sã n ki, yel-wẽnã ka leb n tar pãng ne yẽnda ye.

⁸ La tõnd sã n yaool n kii ne Kiristã, tõnd tẽedame tɩ d na n vɩɩmda ne bãmba,

⁹ tõnd sẽn mi tɩ Kirist sẽn vʋʋg n yi kũum sʋkã kõn leb n ki wã yĩnga. Kũum ka leb n so bãmb ye.

¹⁰ Bala bãmb kiime, la yaa yel-wẽnã yiisg yĩng la bãmb ki vugr bala. La b sẽn vɩ moasã wã, b vɩɩ Wẽnnaam yĩnga.

¹¹ Woto yĩnga, ges-y y meng wa kũum ne yel-wẽna yelle, la a wa neb sẽn vɩ Wẽnnaam yĩnga, Kirist Zezi lagem-n-taarã pʋgẽ.

¹² Dẽ yĩnga, bɩ yel-wẽnã da leb n soog yãmb yĩn-kiidsã ye, la y da leb n sak a ratem wẽnsã ye.

¹³ Da dɩk-y y yĩngã will n kɩs yel-wẽnã tɩ yɩ ka-tɩrlem tʋʋm teed ye. Kõ-y y mens Wẽnnaam, wa neb sẽn vʋʋg n yi kũum sʋk n vɩ, la y kõ Wẽnnaam y yĩngã wil tɩ yɩ tɩrlem tʋʋm teedo.

¹⁴ Yel-wẽnã ka na n soog yãmb ye, bala, ka tõogã n leb n so yãmb ye, la yaa barkã.

¹⁵ La yaa bõe? Dẽ yĩnga, tõnd na n maanda yel-wẽnã, tõog sẽn ka so tõndo, la yaa barkã yĩnga? Yaa vẽeneg tɩ ayo.

¹⁶ Yãmb ka mi tɩ yãmb sã n kõ-y meng neda, n na n yɩ a yamb n sak-a, yãmb sɩd yaa ned ning yãmb sẽn sakdã yamba? Yãmb tõe n yɩɩ yel-wẽnã sẽn wat ne kũumã yemse, wall sakr sẽn taasd ned tɩrlem pʋgẽ wã yemse.

¹⁷ La Wẽnnaam sõngr yĩnga, yãmb sẽn dag n ya yel-wẽnã yemsã, yãmb saka tẽeb yẽbgr noyã b sẽn togs yãmbã ne y yamleoogo.

¹⁸ B sẽn yols yãmb n yiis yel-wẽnã yembdẽ wã, yãmb lebga tɩrlem yemse.

¹⁹ Mam gomda ne ninsaalemdo, yãmb yĩngã pãn-komsmã yĩnga. Woto me, a wa yãmb sẽn dag n kõ y yĩngã wil tɩ yɩ rẽgd la tʋʋm wẽns yemse, tɩ b maan tʋʋm wẽnsã, bɩ y kõ yĩngã wil tɩ yɩ tɩrlem yemse, tɩ b tall-y n taas yɩlgr zĩigẽ.

²⁰ Balã, wakat ning yãmb sẽn dag n ya yel-wẽnã yemse, tɩrlem dag n ka so yãmb ye.

²¹ Bi-bõe la yãmb dag n womd wakat kãnga? Yaa biis nins sẽn ningd yãmb yãnd moasã wã, bala, b baoosg yaa kũum.

²² Moasã, yãmb sẽn paam yolsg n yi yel-wẽnã yembdẽ n lebg Wẽnnaam yemsã, yãmb bi-womdɩ yaa maneg n yɩ yɩlemde, la a baoosg yaa vɩɩm sẽn kõn sa.

²³ Bala, yel-wẽnã yaood yaa kũun, la kũun ning Wẽnnaam sẽn kõt zaalmã yaa vɩɩm sẽn kõn sa, tõnd Zu-soab a Zezi Kirist pʋgẽ.

7

¹ M ba-biisi, mam gomda ne neb sẽn mi tõogo: Yãmb zɩ tɩ tõog loeta ned a yõor tɛka?

² Woto, pag sã n kuil sɩda, tõogã loee yẽndã ne a sɩdã a sɩdã yõor tɛka. La sɩdã sã n ki, tõog ning sẽn dag n loe-a ne a sɩdã yii n bas-a lame.

³ Dẽ, a sɩdã sã n ket n vɩ, t'a lebg dao a to paga, b na n bool-a lame tɩ pʋg-yoodre. La a sɩdã sã n ki, a paama yolsg ne tõogã. Dẽ, a sã n lebg ned a to paga, a ka pʋg-yoodr ye.

⁴ Woto me m ba-biisi, yãmb yaa kũum, sã n yaa ne tõogã yelle, Kirist yĩngã maasem yĩnga, n na n lebg ned a to rẽnda, soab ning sẽn vʋʋg n yi kũum sʋka, tɩ tõnd na wom biis Wẽnnaam yĩngã.

⁵ Bala, wakat ning yĩngã sẽn dag n so tõndã, tõogã sẽn kɩt tɩ yel-wẽnã ratem yikã dag n tʋmda tõnd yĩngã wil pʋsẽ, n kɩtdẽ tɩ tõnd womd biis sẽn wat ne kũum.

⁶ La moasã, b yiisa tõnd tõog yembd pʋgẽ, bala, tõnd yaa kũum ne bũmb nins sẽn dag gãd tõnd yembd pʋgẽ wã, tɩ tõnd Wẽnnaamã sakrã yaa sɩɩgã tõog pʋgẽ, sẽn ya tõ-paalgã, la ka leb n ya tõ-kʋdgã sẽn gʋlsã pʋgẽ ye.

⁷ Dẽ, tõnd na n yeelame tɩ bõe? Tõogã yaa yel-wẽnd la? Yaa vẽeneg tɩ ayo. La mam ka bãng yel-wẽn sẽn ya bũmb ninga, sã n ka tõogã maasem yĩng ye. Tõogã sã n dag n ka yeelẽ tɩ: Da maan sũ-kiir ye, mam dag n kõn bãng sũ-kiir sẽn yaa a soab ye.

⁸ La yel-wẽnã paama tõogã sẽn yeelã n na n kɩt tɩ sũ-kiir buud fãa kẽ maam, bala, tõog sã n kaẽ, yel-wẽn yaa bõn-kɩɩnga.

⁹ Ne maam, pĩnda, tõogã sẽn dag n ka be wã, mam dag n vɩɩme. La tõogã sẽn wa wã, yel-wẽn paama vɩɩm, tɩ mam ki.

¹⁰ Woto, tõogã sẽn taasd ned vɩɩm pʋgẽ wã taee maam n taas kũumẽ.

¹¹ Bala, yel-wẽnã sẽn paam weerã, a talla tõogã n belg maam n tõoge, la a talla tõogã n kɩt tɩ mam ki.

¹² Woto, tõogã yaa bõn-sõngo, noyã me yaa bõn-sõamyã, n ya tɩrse la sõama.

¹³ Dẽ yĩngã, bũmb ning sẽn ya sõama wã lebga kũum mam yĩnga? Yaa vẽeneg tɩ ayo. La sẽn na yɩlg tɩ yel-wẽn puk a meng n wilg t'a yaa yel-wẽnã, a talla bõn-sõng n wa ne mam kũum, tɩ tõogã maasem yĩnga nebã na yã tɩ yaa yel-wẽn kãseng tɩ looge.

¹⁴ Sɩd me, tõnd miime tɩ tõogã yaa sɩɩg bũmbu. La mam yaa yĩnga, yel-wẽn sẽn so n maand a sẽn dat-ne.

¹⁵ Bala, bũmb nins mam sẽn maandã, mam ka wʋmd b võor ye. Mam sẽn dat n maan bũmb ninsã, mam ka maand ye, la mam yaool n maanda bũmb nins mam sẽn kisã.

¹⁶ Mam sã n maanda m sẽn ka rata, mam sẽn yetã zemsda ne tõogã sẽn yetã, tɩ tõogã yaa bõn-sõngo.

¹⁷ Moasã, ka leb n ya maam n maand bõn-kãens ye, la yaa yel-wẽnã sẽn be mam pʋgẽ wã.

¹⁸ Bala, mam miime tɩ bõn-sõng ka be mam pʋgẽ, mam yĩngã pʋgẽ ye. Bala mam tõee n paama datem tɩ maan neere, la m ka tar pãn-tõog tɩ maan-a ye.

¹⁹ Mam ka maand neer ning mam sẽn datã ye, la m maanda wẽng ning m sẽn ka ratã.

²⁰ Mam sã n maand m sẽn ka ratã, ka leb n ya maam n maand ye, la yaa yel-wẽnã sẽn be mam pʋgẽ wã.

²¹ Mam sẽn dat n maan neerã, mam mikame tɩ tõ-kãngã n be ne maam: Wẽng n yegd maam.

²² Mam sũurã zĩ-zulungẽ wã, mam sũ-noog bee ne Wẽnnaam tõodã.

²³ La mam yãta tõog a to mam yĩnga wilẽ, t'a maood ne mam yam-wekrã tõogã, n kɩtd tɩ mam ya yel-wẽnã sẽn be mam yĩngã wilẽ wã tõog yamba.

²⁴ Mam yaa nĩmbãan-neda. Ãnna n na n yiis maam yĩn-kãngã sẽn ya kũumã nugẽ?

²⁵ Bɩ d pʋʋs Wẽnnaam bark tõnd Zu-soab a Zezi Kirist maasem yĩnga... Woto, ne mam yam-wekre, mam yaa Wẽnnaam tõogã yamba, la sã n yaa ne mam yĩngã, mam yaa yel-wẽnã tõog yamba.

8

¹ Woto yĩnga, sɩbgr ka be neb nins sẽn be Zezi Kirist pʋgẽ n kẽnd wa sẽn zems Wẽnnaam Sɩɩgã raabã la ka yĩng ratmã zut ye.

² Sɩd me, Sɩɩg sẽn kõt vɩɩm a Zezi Kirist pʋgẽ wã tõog yolsa maam ne yel-wẽnã tõogo, la ne kũum tõog yembdo.

³ Bala, Wẽnnaam sẽn tʋm b meng Bi-riblã ne yĩng sẽn wẽnd yel-wẽnã rẽndã, yaa yel-wẽnã yiisg yĩnga. Bi-riblã zĩnda b yĩngã pʋgẽ n wilg tɩ yel-wẽnã ka sõama ye. La tõogã ka tõe rẽnda ye, bala, yĩngã kɩtame t'a ka pãng ye.

⁴ Kirist maana a woto tɩ tɩrlem ning tõogã sẽn yeel tɩ d tog n paamame wã na pid tõnd pʋsẽ, tõnd sẽn kẽnd wa sẽn zems Sɩɩgã raabo la ka yĩng rẽndã yĩnga.

⁵ Sɩd me, neb nins sẽn vɩ wa yĩngã sẽn datã, yĩngã sẽn dat bũmb ninsã n tusd bãmba, la yaa Sɩɩgã sẽn dat bũmb ninsã n tɛt neb nins sẽn kẽnd wa Sɩɩgã sẽn datã.

⁶ Yĩngã ratem sakr wata ne kũum, la Sɩɩgã ratem sakr wata ne vɩɩm la bãane.

⁷ Bala, yĩngã ratem sakr yaa beem ne Wẽnnaam, tɩ bõe, yĩngã ka sakd Wẽnnaam tõogã ye, la a pʋs n ka tõe n sak-a me ye.

⁸ La neb nins yĩngã ratem sẽn so wã yaool n ka tõe n ta Wẽnnaam yam ye.

⁹ Ne yãmba, yĩngã ratem ka leb n so yãmb yɛs ye, yaa Sɩɩgã n so yãmba, sã n yaa tɩ Wẽnnaam Sɩɩgã bee yãmb pʋse. Ned sã n ka tar Kirist Sɩɩgã, a ka bãmb dẽnd ye.

¹⁰ La Kirist sã n be yãmb pʋgẽ, yaa sɩd tɩ yĩngã yaa kũum yel-wẽnã yĩnga, la Sɩɩgã kõta vɩɩm, tɩrlemã yĩnga.

¹¹ La soab ning sẽn vʋʋg a Zezi tɩ b yi kũum sʋkã Sɩɩg sã n be yãmb pʋgẽ, soab kãnga, sẽn vʋʋg-a Kirist Zezi tɩ b yi kũum sʋkã na n kõo yãmb yĩn-kiidsã me vɩɩm, bãmb Sɩɩgã sẽn be yãmb pʋgẽ wã maasem yĩnga.

¹² Woto yĩngã, m ba-biisi, tõnd tara samde, la ka yĩngã samde, n na n vɩɩmd wa yĩngã sẽn dat ye.

¹³ Yãmb sã n vɩɩmd wa yĩngã sẽn data, yãmb na ki. La yãmb sã n kɩt tɩ yĩngã tʋʋm ki ne Sɩɩgã pãnga, yãmb na vɩɩmde.

¹⁴ Bala, neb nins fãa Wẽnnaam Sɩɩgã sẽn tɛt yaa Wẽnnaam kamba.

¹⁵ Yãmb ka reeg yembd sɩɩg n na n ket n vɩ rabeem pʋgẽ ye. La yãmb reega Sɩɩg sẽn kɩtd tɩ yãmb lebg Wẽnnaam kamba, tɩ Sɩ-kãng maasem yĩnga, tõnd yetame tɩ Abba, sẽn dat n yeel tɩ "m ba."

¹⁶ Wẽnnaam Sɩɩgã meng kɩta kaset ne tõnd sɩɩgã n yetẽ tɩ tõnd yaa Wẽnnaam kamba.

¹⁷ La tõnd sã n yaa bãmb kamba, tõnd yaa b rãmb nins sẽn na n soog bãmb paoong me. Tõnd na n sooga Wẽnnaam paoongã, la d yaa pʋɩt-n-taas ne Kirist, a sã n yaa tɩ tõnd lagma ne bãmb n namse, tɩ d tõe n naag bãmb n paam waoogr me.

¹⁸ Mam getame tɩ namsg nins sẽn tar tõnd moasã wã ka tõe n dɩk n mak ne ziir ning sẽn na n puk tõnd yĩng nindaarã ye.

¹⁹ Dẽnda n kɩt tɩ dũni bõn-naandsã fãa gũud Wẽnnaam kambã pukr ne datem kãsenga.

²⁰ Bala, bõn-naandsã kẽe faoolem pʋgẽ. Ka ne b meng yamleoog ye, la yaa ned ning sẽn kẽes-a bãmb be wã yĩnga.

²¹ B be faoolmã pʋgẽ ne tẽeb pidsg gũudum kãngã: Bõn-naands kãens na n paama yolsg ne yembdo, la sãoongã, n paam pʋɩɩr ne Wẽnnaam kambã lohorem sẽn be ziirã.

²² Tõnd yaool n miime tɩ hal tɩ ta moasã, bõn-naandsã fãa wẽeda siri, tɩ rogem toog tar-ba.

²³ Sẽn yɩɩda, tõnd mensã sẽn zoe n paam Sɩɩgã reng-n-lɛmbgã, tõnd me wẽeda sir d pʋsẽ, n gũud wakat ning Wẽnnaam sẽn na n deeg tõnd n maan b kambã, la d gũud tɩ b yols tõnd yĩngã n baase.

²⁴ Bala, tõnd paama fãagre, la yaa ne tẽebo. La bũmb ning fo sẽn gũud ne tẽebã sã n ya bũmb f sẽn ne, ka leb n ya tẽeb yell ye. Fo sã n ne bũmbu, f tõe n leb n tẽe a paoong yɛsa?

²⁵ La tõnd sã n tẽed tɩ d na n paama bũmb nins tõnd sẽn ka ne, tõnd maood n gũud-a lame.

²⁶ Woto me, Sɩɩgã wat n sõngda tõnd d pãn-komsmã pʋgẽ, bala, tõnd ka mi d sẽn segd n kos bũmb nins d pʋʋsg pʋgẽ ye. La Sɩɩgã meng yõkda sɛɛg ne sir ned sẽn ka tõe n togs ye.

²⁷ La soab ning sẽn feesd sũyã mii bũmb ning Sɩɩgã sẽn data. Bãmb yõkda Wẽnnaam sɛɛg nin-sõamyã yĩng wa sẽn zemsd Wẽnnaam daabo.

²⁸ La tõnd miime tɩ bũmb fãa tʋmda ne taab neb nins sẽn nong Wẽnnaamã, b rãmb sẽn paam boolg wa sẽn zems Wẽnnaam yam-yãkrã sõngr yĩnga.

²⁹ Bala, neb nins Wẽnnaam sẽn pĩnd b bãngã, b pĩnd n yãka yam tɩ b na n wẽnega bãmb Bi-riblã, tɩ bãmb Bi-riblã na yɩ bi-rẽeng ba-biis wʋsg sʋka.

³⁰ La neb nins bãmb sẽn pĩnd n tʋlsã, b bool-b lame: La bãmb sẽn bool-b rãmbã, b kɩtame me tɩ b zemse. La neb nins bãmb sẽn kɩt tɩ b zemsã, b waoog-b lame me.

³¹ Dẽ, tõnd na n yeelame tɩ bõe ne yel-kãnga? Wẽnnaam sã n bee ne tõndo, ãnna n tõe n zab ne tõndo?

³² Bãmb sẽn ka bas b meng Bi-riblã tɩ b põse, n dɩk-b n kõ tɩ b kʋ tõnd fãa yĩngã, na n yɩɩ wãn tɩ b ka lagem bũmbã fãa ne bãmb n kõ tõndo, nimbãan-zoeer yĩngã?

³³ Ãnna n na n dõd Wẽnnaam nin-tũusdsã? Yaa Wẽnnaam la sẽn kɩtd tɩ ned lebg tɩrgã.

³⁴ Ãnna n na n kao b bʋʋd n sɩbg-ba? Kirist Zezi la sẽn ki-a wã. La sẽn yɩɩda, bãmb vʋʋgame, b bee Wẽnnaam nug-rɩtgo, b yõkda sɛɛg tõnd yĩnga.

³⁵ Ãnna n na n welg tõnd ne Kirist nonglmã? Toogo, bɩ sũ-sãoong kãsenga, bɩ namsgo, bɩ kom, bɩ naongo, bɩ sãoongo, bɩ zabr sʋʋga?

³⁶ Wa b sẽn gʋlsã: B kʋʋda tõnd daarã tõr fo yĩnga. B geta tõnd wa piis b sẽn koota.

³⁷ La bõn-kãens fãa pʋgẽ, tõnd yaa tõaagdb hakɩɩka, sẽn nong-a tõndã maasem yĩnga.

³⁸ Bala, mam sũur keemame tɩ kũum, wall vɩɩm, wall malegse, wall pãn-soaadba, wall bũmb sẽn be moasã, wall bũmb sẽn wata,

³⁹ wall pãense, wall yĩngr neba, wall tẽngr neba, wall bõn-naandg a to baa a yen kõn n welg tõnd ne Wẽnnaam nonglem sẽn be tõnd Zu-soab a Kirist Zezi pʋgẽ wã ye.

9

¹ Mam yeta sɩd Kirist pʋgẽ, mam ka yagd zĩri ye. Mam sũ-bãngrã kɩta maam bõn-kãng kaseto, Sɩɩg-sõng maasem yĩnga.

² Sũ-sãoon-kãsenga, la sũ-bõdem n be mam sũurẽ wã daar fãa.

³ Bala, mam dag n nongẽ lame tɩ kãab wẽng zĩnd mam zugu, la m welg ne Kirist m ba-biisã, la m ba-rãmba ne yĩng yelle, sõngr yĩnga.

⁴ Bãmb yaa Israyɛl rãmba, b rãmb Wẽnnaam sẽn deeg n maan b kamba tɩ b so ziiri, la kaoolã, la tõogã, la kaorengo, la kãabdo, la yaab-rãmba.

⁵ Sã n yaa ne yĩng yelle, yaa bãmb n dog Kiristã, soab ning sẽn yɩɩd bũmba fãa, n ya Wẽnnaam sẽn ya bark soab wakat sẽn ka sɩngr n ka saabã. Ãmina!

⁶ A ka tɩ Wẽnnaam goama lebga zaalem ye. Bala, ka b rãmb fãa sẽn ya a Israyɛl yagensã n ya Israyɛl ye.

⁷ Ka b sẽn ya a Abraham roogã neb yĩng la b yaa a yagens ye. La b yeelame yaa: Na n tũnuga a Izak tɩ fo paam yagens sẽn tar fo yʋʋre,

⁸ Sẽn dat n togs tɩ ka kamb nins sẽn ya b yĩng neongã n ya Wẽnnaam kamb ye, la yaa neb nins b kãab-bã la b geend wa b yagense.

⁹ Sɩd me, ad kãabgã gomde: Woto wẽnde, mam na n lebg n waame, la rẽ t'a Sara paama bi-ribla.

¹⁰ Sẽn yɩɩda, yɩɩ woto me ne a Rebeka, sẽn tall tõnd ba a Izak bal pʋgã.

¹¹ Bala, kamba da nan ka rog ye, la b da nan ka maan neer bɩ wẽng ye. Baoosgo, Wẽnnaam daabã kell n yalsame wa sẽn zems bãmb sẽn yãke, la yãkrã ka tũud ne tʋʋmã ye, a tũuda ne sẽn bool-a wã.

¹² B yeela a Rebek yaa:

¹³ Yao wã na n sooga kẽemã, wa sẽn gʋlsa: Mam nonga a Zakoob, la mam kisga a Ezayu.

¹⁴ Dẽ, tõnd na n yeelame tɩ bõe? Dẽ yĩnga, ka-tɩrlem bee Wẽnnaam pʋgẽ laa? Yaa vẽeneg tɩ ka ye.

¹⁵ Bala, b yeela a Moyiis yaa: Mam na n zoee ned ning m sẽn na n zoe a nimbãanegã nimbãanega, la m na kʋma ned ning m sẽn na n kʋmã.

¹⁶ Woto yĩnga, yel-kãng ka tũud ne soab ning sẽn data, wall ne soab ning sẽn zoet ye, bee ne Wẽnnaam, soab ning sẽn zoet nimbãanegã.

¹⁷ Bala, Wẽnnaam gʋls-sõamyã yeela Faarõ yaa: Mam zẽka foom ne m raabo, n na n tall foom n wilg m pãngã, tɩ b na moon mam yʋʋrã tẽng zug tɛk fãa.

¹⁸ Woto, bãmb zoeta ned ning b sẽn dat n zoe a nimbãanegã nimbãanega, la bãmb sẽn dat t'a soab sũur yɩ kɛgenga, b kengda a soabã sũurã.

¹⁹ Dẽ, fo na n yeela maam yaa: Bõe la bãmb na n leb n yeel tɩ ka zemse? Bala, ãnna n tõe n kɩɩs bãmb sẽn datã?

²⁰ La fo yẽ, foo la ãnda n tõe n wẽ nokoeemd ne Wẽnnaam? Bũmb ning yagbã sẽn yagdã na n yeela yagbã tɩ yaa bõe yĩng t'a yagd yẽnda a woto?

²¹ Ka yagbã n so yagdã, n yãkd yagd a yembr pʋgẽ n yagd teoogo a tʋʋm sẽn be waoogre, la a yagd teoogo a tʋʋm sẽn be paoogr la?

²² La Wẽnnaam sã n maan sũ-mar wʋsg ne lagd sẽn wat ne sũ-yikri la sẽn maan sãoong yĩngã, n na n wilg b sũ-yikri la b kɩt tɩ nebã bãng bãmb pãngã?

²³ La bãmb sã n dag n datame n kɩt tɩ lagd sẽn zems ne nimbãan-zoeere, la bãmb sẽn pĩnd n yãk tɩ b paam ziirã bãng bãmb ziirã sẽn zems to-to?

²⁴ Dat n togs tɩ tõndo, neb b sẽn boole, ka Zuif-rãmbã sʋk bal ye, la bu-zẽmsã sʋk me,

²⁵ wa bãmb sẽn yeel a Ooze sebrã pʋgẽ wã: Ned ning sẽn dag ka mam nedã, mam na n boola a soab tɩ m neda, la ned ning sẽn dag n ka m noangã, mam na n bool-a lame tɩ m noanga.

²⁶ La zĩig ning meng b sẽn dag n yet bãmb tɩ b ka mam nebã, be bala, b na n boola bãmb tɩ Wẽnnaam sẽn vɩ kom-dibli.

²⁷ A Ezayi me goma Israyɛl yell n yeele: Baa Israyɛl nebã sõor sã n ta ko-kãsengã biisrã sõore, neb bilf bal n na põse.

²⁸ Bala, bũmb ning Zu-soabã sẽn yeelã, b na n maan-a-la zãng tẽng zugu, la b na n maan-a-la tao-tao.

²⁹ La a wa a Ezayi sẽn da pĩnd n yeelã, Saasẽ sodaas naabã sã n dag ka kellẽ tõnd buudã, tõnd dag n na n lebgẽ la wa Sodom, la tõnd dag n na n wẽnegẽ la Gomoor.

³⁰ Dẽ, tõnd na n yeelame tɩ bõe? Bu-zẽmsã, sẽn dag n ka baood-b tɩrlemã paama tɩrlem, tɩrlem ning tẽeb sẽn kõtã.

³¹ Tɩ Israyɛl nebã sẽn dag n baood tõog sẽn wat ne tɩrlemã ka paam tõ-kãng ye.

³² Bõe yĩnga? Yaa tɩ Israyɛl ka bao tɩrlemã ne tẽeb ye, la yaa ne tʋʋmã. Bãmb laka kug-lakdgã,

³³ wa sẽn gʋlsã: Ade, mam ningda kug-lakdgã la kugr sẽn lubd neb Siyõ pʋgẽ. La ned ning sẽn tẽed-a bãmb kõn paam yãnd ye.

10

¹ M ba-biisi, mam sũurã raabo, la mam bõosg ne Wẽnnaam b yĩng yaa tɩ b paam fãagre.

² Bala, mam kɩta bãmb kaset n yetẽ tɩ b tara ratem wʋsg Wẽnnaam yĩnga, la b ka tar bãngr ye.

³ Bãmb sẽn zɩ Wẽnnaam tɩrlemã yellã, la b rat n zĩndig b meng tɩrlemã, b ka sak n tũ Wẽnnaam tɩrlemã ye.

⁴ Bala, Kirist yaa tõogã baoosg zĩiga, tɩ ned ning fãa sẽn tẽed na paam tɩrlem.

⁵ Sɩd me, a Moyiis gʋlsa tɩrlem ning tõogã sẽn wat-ne wã yell n yeele: Ned sã n maan wa tõogã sẽn yeelã, tõogã na kɩt t'a vɩɩmde.

⁶ La tɩrlem ning tẽeb sẽn wat-ne wã yeta a woto: Da tags f sũurẽ tɩ: Ãnna n na n dʋ arzãna? A rʋʋb yaa tɩ sigs Kiristã be.

⁷ Wall ãnna n na n sig bog-zulungã pʋgẽ? A sigb yaa tɩ tak Kirist n yiis kɩɩm-kulgu.

⁸ Sã n yaa a woto, tẽebã yetame tɩ bõe? Gomdã pẽe foom, a bee fo noorẽ la f sũurẽ. Yaool n yaa tẽeb gomdã la tõnd moonda.

⁹ Fo sã n kɩs Zu-soab a Zezi kaset ne f noore, la fo sã n tẽ f sũurẽ tɩ Wẽnnaam vʋʋga bãmb n yiis kũum sʋka, fo na paam fãagre.

¹⁰ Bala, yaa ned sẽn na n tar tẽeb a sũurẽ la a paamd tɩrlem, la yaa ned sẽn na n kɩs kaset ne a no-goam la a paamd fãagre, wa Wẽnnaam gʋls-sõamyã sẽn yetã:

¹¹ Ned ning fãa sẽn tẽed bãmb kõn paam yãnd ye.

¹² Sɩd me, welgr ka be Zuif ne Gɛrk sʋk ye: B fãa tara Zu-soab a yen sẽn maand neb nins fãa sẽn boond bãmbã neer wʋsgo.

¹³ Bala, ned ning fãa sẽn na n bool Zu-soabã yʋʋr na n paama fãagre.

¹⁴ La bãmb na n yɩɩ a wãn n bool ned ning b sẽn ka tẽedã yʋʋre? La b na n yɩɩ a wãn n tẽ ned tɩ b ka wʋm tɩ b gomd a yelle? La b na n yɩɩ a wãn n wʋm tɩ b gomd a yelle, koe-moaandb sã n ka beẽ?

¹⁵ La koe-moaandb na n yɩɩ wãn n zĩndi, ned sã n ka tʋm-ba? Wa b sẽn gʋlsã: Neb nins sẽn moond koe-noogã nao tara rasãnde.

¹⁶ La ka nebã fãa n sak koe-noogã ye. Dẽ n kɩt t'a Ezayi yeel yaa: Zu-soaba, ãnna n tẽ tõnd sẽn togsã?

¹⁷ Woto, yaa bũmb ning ned sẽn wʋmdã n wat ne tẽebo, la bũmb ning a sẽn wʋmdã yita Kirist goamã pʋgẽ.

¹⁸ La mam sokdame tɩ b ka wʋm laa? B wʋm-yã! Bãmb koɛɛg saaga tẽn-tõrã, la bãmb goamã taa dũni tɛk fãa.

¹⁹ La mam sokdame tɩ Israyɛl nebã ka bãng laa? A Moyiis n yɩ pipi n yeel yaa: Mam na n kɩtame tɩ neb sẽn ka soolem sũ-kiir yõk yãmba, la mam na n dɩka buud sẽn ka tar yam vẽnegre, n kɩt tɩ yãmb sũyã yiki.

²⁰ La a Ezayi pʋs n paama raood n yeele: Neb nins sẽn dag n ka baood maamã yãa maam. La mam puka m meng ne neb nins sẽn dag n ka sokd mam yellã.

²¹ La a goma Israyɛl yell n yeele: Daarã tõre, mam tẽega m nusi, n tees neb sẽn ya kɩɩsdba, la nokoeem-wẽedba.

11

¹ Dẽ, mam sokdame yaa: Wẽnnaam zãgsa b nebã laa? Yaa vẽeneg tɩ b ka zãgs-b ye. Bala, mam me yaa Israyɛl neda, a Abraham yagenga, a Bɛnzame buudu.

² Wẽnnaam ka zãgs b nebã bãmb sẽn pĩnd n bãngã ye. Yãmb ka mi bũmb ning Wẽnnaam gʋls-sõamyã sẽn yeta, zĩig ning a Eli sẽn yẽgem ne Wẽnnaam Israyɛl nebã poorẽ wã?

³ Zu-soaba, b kʋʋ yãmb no-rɛɛsdbã, b leeba yãmb tẽn-kugã n lubi. Maam m yembr n kelle, tɩ b baood maam n na n kʋ.

⁴ La Wẽnnaam leokame tɩ bõe? Mam welga raop tus a yopoe m mengã yĩnga, la b ka yĩgimd baal taoor ye.

⁵ Woto me, moasã, neb n kelle, wa sẽn zems Wẽnnaam sẽn tũus b rãmb b barkã pʋgẽ wã.

⁶ La sã n yaa ne Wẽnnaam bark la ned paamd fãagre, ka leb n ya ne tʋʋm ye. Sã n ka rẽ, barkã ka leb n ya nimbãan-zoeer ye la sã n yaa ne tʋʋmã la ned paamd fãagre, ka leb n ya nimbãan-zoeer yell ye. Sã n ka rẽ, tʋʋmd ka leb n ya tʋʋmd ye.

⁷ Dẽ, yaa bõe? Israyɛl nebã ka paam bũmb ning b sẽn dag n baoodã ye, la nin-tũusdsã paam-a lame. Neb a taabã sũy riglimame,

⁸ wa b sẽn gʋlsã: Hal tɩ ta dũnna daare, Wẽnnaam kõo bãmb gõeem sɩɩga, nin sẽn ka ne, tʋb sẽn ka wʋmda. La a Daviid yeelame yaa:

⁹ Bɩ b rɩɩbã yɩ bẽdg b yĩnga, gãmbre, kug-lakdga, la b yaoodo.

¹⁰ Bɩ b ninã lebg lik n ka tõe n yã ye, la y kɩt tɩ b kuudẽ n ka tõe n doog ye.

¹¹ Dẽ, mam sokdame yaa: B lakame n na n lʋɩ? Yaa vẽeneg tɩ ka a woto ye. La bãmb lʋɩɩsã wa ne bu-zẽmsã fãagre, tɩ sũ-kiir na yõk Israyɛl nebã.

¹² Bãmb lʋɩɩsã sã n zĩnda yõod ne dũni, tɩ bãmb kongrã zĩnd yõod bu-zẽmsã yĩnga, bãmb yikr zãng kõn zĩnd yõod n yɩɩda?

¹³ Bu-zẽmsã, mam yeta yãmba: Mam sẽn ya tẽn-tʋmd bu-zẽmsã sʋka, mam waoogda m tʋʋmdã,

¹⁴ tɩ sã n tõe, bɩ m kɩt tɩ sũ-kiir yõk mam buudã, tɩ m tõe n fãag neb kẽere.

¹⁵ Bala, b sẽn bas bãmb kɛɛngã sã n kɩtame tɩ dũni paam yel-manegr ne Wẽnnaam, b sẽn na n leb n deeg bãmbã na n yɩɩ a wãnã? A kõn yɩ vʋʋg n bas kũum sɩda?

¹⁶ La dẽenem biisã sã n welga toor Wẽnnaam yĩnga, zom nagdgã me welga toore. La yẽgrã sã n welga toor Wẽnnaam yĩnga, wilã me yaa a woto.

¹⁷ La sã n yaa tɩ b kʋʋsa wil kẽere, n dɩk fo sẽn ya weoogẽ oliiv tɩɩgã n lebs n tong b zĩigẽ wã, tɩ fo paam lagem-n-taar ne oliiv tɩɩgã yẽg la a sũma,

¹⁸ da paoog wilã n waoog f meng ye. Fo sã n waoogd f menga, bãng tɩ ka foom n zãad yẽgã ye, la yaa bãmb n zãad foom.

¹⁹ Daar ninga fo na n yeelame: b kʋʋsa wilã, tɩ b tõe n lebs maam n tong beene.

²⁰ Yaa sõama yẽ. Yaa b ka-tẽebã yĩng la b sẽn kʋʋs-bã. La yaa tẽeb yĩng la fo ket n vɩ. Da paam wuk-m-meng tagsg ye, ayo, maan dabeem.

²¹ Bala, Wẽnnaam sã n ka bas tɩɩgã meng wila, b ka na n bas foom me ye

²² Ges Wẽnnaamã sõmblemã ne b toolmã yelle: Bãmb yaa toaag ne neb nins sẽn lʋɩ wã, la Wẽnnaam sõmblem fo yĩnga, fo sã n pa sõmblem-kãng pʋgẽ. Sã n ka rẽ, b na n kʋʋga foom me.

²³ Bãmb me sã ka pa ka-tẽebã pʋgẽ, b na n lebs-b lame n tom ne tɩɩgã. Bala, Wẽnnaam pãnga sekame tɩ lebs-b n tom yɛsa.

²⁴ B kʋʋga foom oliiv tɩɩg sẽn ya weoog bũmb zugu, n tong foom ne yir oliiv tɩɩga, baa ne rẽ sẽn ka zemsd ne foomã. Sẽn ya bãmb meng tɩɩg la rẽ wã, Wẽnnaam kõn lebs-b n tom be n yɩɩda, a sẽn zemsd ne bãmbã yĩnga?

²⁵ Bala, m ba-biisi, mam ka rat tɩ yãmb zɩ yel-solem-kãngã ye, tɩ yãmb da wa n get y mens wa yam dãmb ye: Israyɛl nebã kenga b sũy wakat bilf yĩnga, hal tɩ bu-zẽmsã fãa na kẽ fãagrã pʋgẽ.

²⁶ Rẽ zugẽ, Israyɛl nebã fãa na n paama fãagr wa sẽn gʋlsã: Yoalsdã na n yii Siyõ. B na n kɩtame t'a Zakoob bas Wẽn-kɩɩsgo.

²⁷ Mam kaool ne bãmb na n yɩɩ a woto wakat ning mam sẽn na n yẽes b yel-wẽnã.

²⁸ Sã n yaa ne koe-noogã yelle, b yaa bɛɛba, yãmb yĩnga. La sã n yaa ne yãkrã, Wẽnnaam nong-b lame, b ba-rãmbã yĩnga.

²⁹ Bala, bũmb nins Wẽnnaam sẽn kõ zaalmã, ne boolg ning Wẽnnaam sẽn boolã ka tõe n viig ye.

³⁰ A wa yãmb sẽn dag n kɩɩs Wẽnnaam, n paam nimbãan-zoeer moasã Israyɛl nebã kɩɩsg yĩngã,

³¹ woto me, bãmb me kɩɩsa moasã, tɩ b tõe n paam nimbãan-zoeer mosã, nimbãan-zoeer ning yãmb sẽn paamã maasem yĩnga.

³² Bala, Wẽnnaam kẽesa nebã fãa kɩɩsg pʋgẽ, n na n naag b fãa n zoe b nimbãanega.

³³ Wẽnnaam arzẽgsã, la b yamã ne b bãngrã zulma wʋsgo. Ned ka tõe n vees bãmb bʋʋdã soɛy n bãng ye, la ned ka tõe n wʋm bãmb so-tũudsã võor ye. Sɩd me,

³⁴ ãnna n bãng Zu-soabã tagsgo? Wall ãnna n yɩ bãmb sagenda?

³⁵ Ãnna n deng n kõ bãmba, tɩ bãmb tog lebs a soaba?

³⁶ Bũmb fãa yii bãmb nengẽ, bãmb n maan bũmb fãa, la bũmb fãa yaa bãmb yĩnga. Bãmb n so ziir wakat fãa. Ãmina.

12

¹ Woto yĩnga, m ba-biisi, mam sagenda yãmb ne Wẽnnaam nimbãan-zoeerã tɩ y kõ y yĩnsã tɩ yɩ maan-vɩɩs sẽn welg toore, la sẽn tat Wẽnnaam yam. Yãmb sã n maan a woto, na n yɩɩ kaoreng sẽn zemse.

² Da yɩ-y wa dũni kãngã nebã ye. Paam-y yam-wek-paalle, tɩ rẽ tek yãmba, tɩ y tõe n bãng Wẽnnaam daabo: Rẽ yaa sõama, n noomẽ la a zemsa zãnga.

³ Ne bark ning Wẽnnaam sẽn maan maamã, mam yeta yãmb ned kam fãa t'a ra tags tɩ yẽ yaa tɩrg tɩ looge, n kẽes a tagsd moog ye. La bɩ ned fãa paam tagsd sẽn zemse, t'a tõe n paam sik-m-menga, tɩ zems ne tẽeb ning Wẽnnaam sẽn kõ-a wã.

⁴ Sɩd me, a wa tõnd yĩngã sẽn ya a yembr n tar wil wʋsgã, la tɩ wilã fãa tʋʋm ka yembrã,

⁵ woto me, baa ne tõnd sẽn ya wʋsgã, tõnd lagem n yaa yĩng a yembr Kiristã pʋgẽ, n ya wil ne taaba.

⁶ La tõnd paama kũun toay-toayã, n zems ne bark ning Wẽnnaam sẽn maan tõndã: Sã n yaa pĩnd-n-bãngr goama, bɩ a zemsd ne tẽebã.

⁷ Sã n yaa yel-gesg tʋʋmde, bɩ a yɩ ne tʋʋmd tagsgo. Bɩ ned ning sẽn zãmsd neb wɩng ne zãmsgã.

⁸ Ned ning sẽn sagend nebã, bɩ a wɩng ne saglgo. Ned sã n ya kõata, bɩ a kõ ne sik-m-menga. Sẽn yaa-a taoor soaba, bɩ a maan a tʋʋmd ne a sũur fãa. Sẽn yaa-a nimbãan-zoɛta, bɩ yɩ ne sũ-noogo.

⁹ Kɩt-y tɩ zãmb da zĩnd nonglem pʋgẽ ye. Kisg-y wẽnga, la y nong sẽn ya sõama wã sõama.

¹⁰ Nong-y taab ne babiir nonglem. Nand-y taaba, n tagsd taab yelle.

¹¹ Yɩ-y neb sẽn wɩngd ne tʋʋmde, la y da yɩ kʋɩɩmb ye. Wɩng-y ne sɩɩgã yelle. Maan-y Zu-soabã tʋʋmde.

¹² Maan-y tẽeb n kɩdme. Paam-y sũ-mar toog pʋgẽ. Wɩng-y ne pʋʋsgo.

¹³ Sõng-y nin-tũusdsã sẽn dat sõngrã. Mao-y n maand-y sãambã sãando.

¹⁴ Ning-y neb nins sẽn namsd yãmbã zut barka. Ning-y bark la y ra kãab-b wẽng ye.

¹⁵ Maan-y sũ-noog ne neb nins sẽn maand sũ-noogo, la y yãb ne neb nins sẽn yãbda.

¹⁶ Paam-y tagsg a yen taab yĩnga. Da bao-y tɩ paam bõn-kãsems ye. Kɩt-y tɩ y ratem zĩnd ne bõn-talse. Da ges-y y mens wa yam dãmb ye.

¹⁷ Da lebs-y ned baa a ye wẽng wẽng yĩng ye. Bao-y bũmb nins sẽn ya sõama nebã fãa nifẽ wã.

¹⁸ Sã n tõe, t'a yellã sã n bee ne yãmba, bɩ y kɩt tɩ laafɩ zĩnd yãmb ne neba fãa sʋka.

¹⁹ M zo-nongdse, da rok-y y sũy y toor ye. Bas-y tɩ sũ-yikrã maan a tʋʋmde. Bala, b gʋlsame yaa: Zu-soabã yetame tɩ sũ-dokr yaa bãmb n so, la yaa bãmb n na n keo nebã.

²⁰ Kom sã n tar fo bɛya, kõ-a t'a rɩ. Ko-yũud sã n tar-a, kõ-a t'a yũ. Bala, fo sã n maand a woto, yaa bug-saal la fo rʋʋgd a zugu.

²¹ Da sak tɩ wẽng tõog foom ye. Maan neer n tõog wẽnga.

13

¹ Bɩ ned fãa sak pãn-soaadb sẽn yɩɩd-a. Bala, noor ka be sẽn ka yit Wẽnnaam nengẽ ye, la yaa Wẽnnaam n zĩnig pãn-soaadb nins sẽn be wã.

² Yaa woto yĩng tɩ ned ning sẽn kɩɩsd pãn-soaadb kɩɩsda Wẽnnaam noore. La neb nins sẽn kɩɩsdã na n baoo sɩbgr n kõ b mense.

³ Ned sã n maand neere, a ka yɛɛsd sẽn zãad-b tẽng ye. Yaa a sẽn maand wẽng la a yɛɛsd-ba. Fo ratame n da zoe pãn-soaad dabeem? Maan neere, la a na yeel tɩ f sẽn maanda yaa sõama.

⁴ Bala, a tʋmda Wẽnnaam tʋʋmde, fo sõngr yĩnga. La fo sã n maan wẽnga, maan dabeem. Bala, a sẽn zãad zabr sʋʋgã ka zaalem ye. A tʋmda Wẽnnaam yĩnga, n wilg ned ning sẽn maand wẽngã Wẽnnaam sũ-dokre, la b sũ-yikri.

⁵ Dẽ wã yĩnga, nebã tog n saka noore, sũ-yikr kãng yĩnga, la ka rẽ yĩng bal ye, yaa sũur kaset yĩng me.

⁶ Yaa bõn-kãng yĩng me la yãmb yaood yaoodã. Bala, neb nins sẽn zãad nebã bee Wẽnnaam tʋʋmd pʋgẽ, bõn-kãng maaneg yĩnga.

⁷ Kɩs-y ned fãa bũmb ning y sẽn tog n kɩs-a: Kɩs-y sẽn tog n deeg-a yaoodã yaoodo, la y kɩs sẽn tog n deeg-a yõor yaoodã yõor yaoodo, la y zoe ned ning y sẽn tog n zoe wã, la y waoog ned ning y sẽn tog n waooge.

⁸ Da tall-y ned samde, sã n ka tɩ nong taab ye. Bala, ned ning sẽn nong a taab pidsa Wẽnnaam tõogã zãnga.

⁹ Sɩd me, d tõee n gila tõod nins sẽn yet tɩ: Da yo ye, da kʋ ye, da zu ye, da kɩs kaset zĩri ye, da ges f to bũmb n dat ye, la tõod a taabã yeelame tɩ: Nong f to wa f menga.

¹⁰ Nonglem kɩtdame tɩ f ka maand f to wẽng ye. Dẽ, nonglem yaa tõogã pidsgu.

¹¹ Yãmb sẽn mi wakat ning tõnd sẽn be wã, moasã yaa wakat tɩ y nek n bas gõeem. Bala, fãagrã pẽe ne tõnd moasã n yɩɩd wakat ning tõnd sẽn lebg tẽedbã.

¹² Zĩigã zoee n zʋʋgame, la zĩig kolga yẽegre. Dẽ, wa-y tɩ d bas likã tʋʋma, la d bob vẽenem pʋgẽ zab-teedo.

¹³ Tɩ d kẽn ne pʋ-peelem, wa neb sẽn kẽnd wĩndga, n ka rɩt tɩ loogdẽ, la d ka rã-yũudba, n da maan raglem la yoobo, wall ka wʋm-taaba la sũ-kiir ye.

¹⁴ Yeelg-y Zu-soab a Zezi Kirist wa fuugu, la y ra bʋ yĩngã yelle n dat n pids a sẽn datã ye.

14

¹ Reeg-y ned ning sẽn ka-a pãng tẽeb pʋgẽ wã sõama, la y ra wẽ nokoeemd ne-a a tagsg wɛɛngẽ ye.

² Nina tẽedame t'a tõe n dɩɩ bũmba fãa. Ned a to sẽn ya pãn-komsem soab rɩta zẽ-vãad bala.

³ Bɩ ned ning sẽn dɩt-a wã ra paoog sẽn ka rɩt-a wã ye, la bɩ ned ning sẽn ka rɩt-a wã ra bʋ sẽn dɩt-a wã bʋʋd ye. Bala, Wẽnnaam reeg-a-la sõama.

⁴ Fo sẽn kaood f to tʋmtʋmd bʋʋdã, foo la ãnna? A yɛsa yĩngr t'a lʋɩtame, paka a zu-soabã. La a na n yalsa yĩngri, bala, Zu-soabã tara pãn-tõog tɩ tebend-a.

⁵ Nina tagsdame tɩ daar yɩɩda a to. Tɩ ned a to getẽ tɩ b zema taaba. Bɩ ned fãa bãng t'a sẽn tagsdã zemsame.

⁶ Ned ning sẽn tagsd dayã yellã, yaa Zu-soabã yĩng la a tagsd b yelle. Sẽn dɩt-a wã, yaa Zu-soabã yĩng la a rɩta, bala, a pʋʋsda Zu-soabã barka. Sẽn ka rɩt-a wã, yaa Zu-soabã yĩng la a ka rɩta. Yẽ me pʋʋsda Wẽnnaam barka.

⁷ Sɩd me, tõnd ned baa a yen ka vɩ a meng yĩng ye, la baa a yen ka kiid a meng yĩng ye.

⁸ Bala, tõnd sã n vɩya, yaa Zu-soabã yĩng la tõnd vɩ. La tõnd sã n ki, yaa Zu-soabã yĩng la tõnd kiyã. Tɩ tõnd vɩ, tɩ d ya kũum me, tõnd yaa Zu-soabã rẽnda.

⁹ Bala, Kirist kiime n lebg n vʋʋge, tɩ b tõe n yɩ sẽn ki-bã ne sẽn vɩ-bã Zu-soaba.

¹⁰ La yaa bõe tɩ fo yẽ kaood f ba-biig bʋʋdo? Wall yaa bõe yĩng tɩ fo yẽ paoogd f ba-biiga? Tõnd fãa na n yalsa Wẽnnaam bʋʋd geerã taoore.

¹¹ Bala, b gʋlsame tɩ: Zu-soabã yeelame tɩ b vɩɩme, tɩ rũmã fãa na n yĩgimda bãmb taoore, la tɩ zɛlma fãa na n kõo Wẽnnaam waoogre.

¹² Woto tõnd ned kam fãa na n togsa Wẽnnaam a meng yelle.

¹³ Woto yĩnga, bɩ d da leb n kao taab bʋʋd ye. Ayo! Tʋm-y ne y tagsgã n da wa n ning kug-lakdg wall bũmb sẽn tõe n lub neda, y ba-biig taoor ye.

¹⁴ Mam miime, la Zu-soab a Zezi pʋgẽ, mam mii hakɩɩka, tɩ bũmb ka be n ya rẽgd a toor ye. La ned sã n tags tɩ bõn-kãngã yaa rẽgdo, dẽ a yaa rẽgd ne yẽnda.

¹⁵ Fo ba-biig sũur sã n sãam fo bõn-dɩtl poorẽ, ad fo ka leb n kẽnd ne nonglem ye. Da sak tɩ f bõn-dɩtl wa ne f ba-biiga, soab ning Kirist sẽn ki a yĩngã sãoong ye.

¹⁶ Bũmb ning sẽn ya sõama ne yãmbã ka tog n wa ne tẽn-kãnem ye.

¹⁷ Bala, Wẽnnaam soolmã, ka tɩ rɩ wall tɩ yũ ye, la yaa tɩrlem la bãane, la sũ-noogo, Sɩɩg-sõng sẽn kõta.

¹⁸ Ned ning sẽn maand Kirist tʋʋmd a woto tata Wẽnnaam yam, la nebã me wilgdame t'a sẽn maandã zemsame.

¹⁹ Woto yĩnga, bɩ d bao bũmb ning fãa sẽn wat ne laafɩ la ne taab bɩɩsgo.

²⁰ Da sãam Wẽnnaam tʋʋmd rɩɩb yĩng ye. Sɩd-sɩdã, bũmb fãa yaa sõama rɩɩb yĩnga. La ned sã n dɩ-a n lebg kug-lakdg neb yĩnga, a yaa wẽnga.

²¹ Yaa sõama tɩ ra wãb nemdo, wall yũ rãam, wall tɩ bas n da sɩɩs bũmb ning sẽn na n yɩ kug-lakdg f ba-biig yĩnga n kɩt a lʋɩ wall a maan pãn-komsem.

²² Tẽeb ning fo sẽn tarã, tall-a f meng yĩng Wẽnnaam taoore. Ned sẽn geend tɩ bũmb ning yaa sõama wã sã n ka kaood a bʋʋdo, sũ-noog soab la yẽnda.

²³ La ned sã n wa sãmbd ne bũmb ning a sẽn dɩta, a bʋʋd zoe n kaoome, tɩ bõe, ka tẽeb n kɩt t'a maan a sẽn maandã ye. La bũmb ning fãa sẽn ka tẽeb n kɩt tɩ f maan yaa yel-wẽnde.

15

¹ Tõnd dãmb sẽn tar pãngã, tõnd tog n tebenda neb nins sẽn ka pãngã b pãn-komsmã pʋgẽ, la d da bao sẽn noom tõnd ye.

² Bɩ tõnd ned kam fãa maan sẽn noom a to, sẽn ya sõmb wɛɛngẽ, t'a tõe n bɩ.

³ Bala, Kirist ka bao sẽn noom b meng ye, la a wa b sẽn gʋlsã: Tʋy nins nebã sẽn tʋʋd yãmbã lʋɩɩ mam zugu.

⁴ Mik bũmb nins b sẽn pĩnd n gʋlsã gʋlsa tõnd zãmsg yĩnga, tɩ tõnd tõe n paam saag-sõngo, sũ-mare la belsg ning Wẽnnaam gʋls-sõamyã sẽn kõtã yĩnga.

⁵ Bɩ Wẽnnaam sẽn pid ne sũ-mar la belsgã sõng yãmb tɩ y paam tagsg a yembr taab yĩnga, wa a Zezi Kirist sẽn datã,

⁶ tɩ yãmb na kõ Wẽnnaam sẽn ya tõnd Zu-soab a Zezi Kirist ba wã waoogre, ne yam a yembre la koɛɛg a yembre.

⁷ Reeg-y taab neer wa Kirist sẽn deeg yãmbã, Wẽnnaam waoogr yĩnga.

⁸ Sɩda, mam yetame tɩ Kirist lebga zũinsã tʋmtʋmda, sẽn na yɩlg n wilg tɩ Wẽnnaam yaa sɩda, la b wilg tɩ bũmb nins Wẽnnaam sẽn dag n kãab b ba-rãmbã yaa sɩda.

⁹ La buud a taabã neb waoogda Wẽnnaam, b nimbãan-zoeerã yĩnga, wa b sẽn da gʋls n yeelã: Rẽnda n kɩt tɩ mam na n gom soolem dãmb sʋk n wilg tɩ m mii yãmba, la m na n yɩɩlame n waoog y yʋʋrã.

¹⁰ B leb n yeelame yaa: Soolem dãmbã, lagem-y Wẽnnaam nebã n maan sũ-noogo.

¹¹ N le paase, soolem dãmbã fãa neba, pẽg-y Zu-soabã, la tɩ tẽms toay-toay nebã pẽg bãmba.

¹² A Ezayi me yeelame yaa: A Izayi yagengã na n pukame. B na n yikame n soog soolem dãmbã. Soolem dãmbã neb tẽeb na n bee ne bãmba.

¹³ Bɩ Wẽnnaam, saag-sõng sẽn yit a soab nengẽ wã pid yãmb ne sũ-noog fãa la bãan fãa tẽeb pʋgẽ, tɩ saag-sõng na pid yãmba, Sɩɩg-sõng pãng yĩnga.

¹⁴ Sã n yaa ne yãmb yelle, m ba-biisi, mam sũur kɛɛm tɩ yãmb pida ne sõmblem, la y pid ne bãngr fãa, la y yaa neb sẽn tõe n keoog taaba.

¹⁵ Baoosgo, bũmb kẽer pʋgẽ, mam gʋlsa yãmb ne gãndalsem, wa m dat n kɩtame tɩ yãmb tẽeg bũmb nins y sẽn mi, la yaa Wẽnnaam sẽn maan maam neere,

¹⁶ n kɩt tɩ mam ya Kirist tʋmtʋmd buud a taabã sʋkã yĩnga. Mam maanda Wẽnnaam koe-noogã tʋʋmd sẽn ya tẽeb bũmbã, tɩ buud a taabã nebã na yɩ wa kũun sẽn noom Wẽnnaam, neb Wẽnnaam Sɩɩg-sõng sẽn welg toor Wẽnnaam yĩnga.

¹⁷ Dẽ, mam tara bʋʋm tɩ waoog m meng Kirist pʋgẽ, Wẽnnaam taoore. 18-19 Bala, mam ka na n saag n pʋd bũmb yelle, tɩ ka Kirist sẽn tũnug maam n maane, sã n yaa m goamẽ, wall m tʋʋmẽ, tɩ ne Sɩɩg-sõng pãnga, la m maan bãn sẽn tar pãnga, la ne bõn-yɛɛsdse, tɩ m tõe n sõng buud a taabã neb tɩ b sak Wẽnnaam. Yaa woto yĩnga, sẽn sɩng ne Zeruzalɛm, n gilg hal tɩ ta Iliri, mam moona Kirist koe-noogã wʋsgo.

²⁰ La mam yãka yam tɩ moon koe-noog zĩis nins b sẽn zɩ n pʋd Kirist yʋʋrã ye, tɩ m da wa n me ned a to yẽbgr zug ye. La a wa b sẽn gʋls n yeelã:

²¹ Neb nins sẽn ka gom bãmb yell b sʋkã na n yãame, la neb nins sẽn dag n ka wʋm b kibarã, na n wʋma a võore.

²² Rẽnda n gɩdg maam naoor wʋsg tɩ mam ka wa yãmb nengẽ ye.

²³ Moasã, mam ka leb n tar tʋʋm zĩig soolem kãens ye. La hal yʋʋm wʋsgo, mam da ratame tɩ m sã n wa n dabd Ɛspaẽ, bɩ m tũ yãmb nengẽ.

²⁴ Mam maanda tẽeb tɩ m sã n wa n loogdẽ, m na yãnd-yã, la m yamleoog tɩ zĩnd ne yãmbã sã n doke, y na yãag-m n kẽng Ɛspaẽ.

²⁵ Mõs-moasã wã mam dabda Zeruzalɛm, nin-sõamyã sõngr yĩnga.

²⁶ Bala, Masedoan ne Akayi nebã yãka yam n lob taab ligdi n na n sõng naong rãmbã sẽn be ba-biisã sʋk Zeruzalɛmã.

²⁷ Yɩɩ bãmb yam-yãkre, la yaa bũmb b sẽn da segd n maane. Bala, buud a taabã neb sã n paama pʋɩɩr ne bõn-sõamy nins sẽn be Zuif-rãmba nengẽ tẽeba wɛɛngẽ wã, bãmb me tog n sõnga Zuif-rãmbã ne b yĩngã yelle.

²⁸ B sẽn maan a woto wã, mam sã n tɩ kɩs ligdã n sa, mam na n yii be n tũ yãmb nengẽ n kẽng Ɛspaẽ.

²⁹ Mam miime tɩ m sã n wa wat yãmb nengẽ, yaa ne Kirist barkã la m na n wa.

³⁰ M ba-biisi, mam sagenda yãmb ne tõnd Zu-soab a Zezi yʋʋre, la ne nonglem Sɩɩg-sõng sẽn kõtã, tɩ y naag ne maam n zabe, y sẽn na n pʋʋs mam yĩnga,

³¹ tɩ mam tõe n paam yolsg ne ka-tẽeb rãmb sẽn be Zude wã, la tɩ nin-sõamy wã na reeg kũunã mam sẽn tar n kẽnd Zeruzalɛmã sõama.

³² Woto, sã n ta Wẽnnaam yam, mam na n taa yãmb nengẽ ne sũ-noogo, la mam na n paama vʋʋsem bilf yãmb sʋka.

³³ Bɩ Wẽnnaam sẽn so laafɩ wã zĩnd ne yãmb fãa. Ãmina!

16

¹ Mam tʋmda d ba-bi-poak a Feebe yãmb nengẽ. A yaa Sãnkre wẽnd-doogã yel-gɛt poaka.

² Reeg-y-yã-a Zu-soaba pʋgẽ, wa sẽn zems nin-sõamy maanego. Bũmb sã n wa n beẽ fãa t'a rat yãmb sõngre, bɩ a paam yãmba, bala, a sõnga neb wʋsgo, la a sõnga maam me.

³ Pʋʋs-y-yã a Piriska ne a Akilas sẽn ya mam tʋmd-n-taas a Zezi Kirist tũudmã pʋgẽ wã.

⁴ B gẽnega b yõor n na n fãag maam. Ka maam n yen n bal n pʋʋsd-b bark ye, buud a taabã wẽnd-dotã fãa me pʋʋsd-b lame.

⁵ Pʋʋs-y nin-tũusds nins sẽn be bãmb zakẽ wã me. Pʋʋs-y m zo-nongr a Epayinet sẽn ya Azi soolmã dẽenem biis Kirist yĩnga.

⁶ Pʋʋs-y-yã a Maari sẽn nams a meng wʋsg yãmb yĩngã.

⁷ Pʋʋs-y-yã a Andronikus ne a Zunyas sẽn ya mam ba-rãmba la m zĩnd-n-taas bi-bees roogẽ. B yaa neb tẽn-tʋmdbã sẽn nong wʋsgo, la b pʋs n denga maam n lebg Kirist neba.

⁸ Pʋʋs-y-yã a Ampiliyatus sẽn ya mam zo-nongr Zu-soabã pʋgẽ wã.

⁹ Pʋʋs-y-yã a Yʋrbẽ sẽn ya tõnd tʋmd-n-taag Kirist pʋgẽ, la y pʋʋs m zo-nongr a Ɛstakis.

¹⁰ Pʋʋs-y-yã a Apelɛs, sẽn modg Kirist tũudmã pʋgẽ wã. Pʋʋs-y-yã a Aristobul zaka rãmba.

¹¹ Pʋʋs-y m saam-biig a Herodyõ. Pʋʋs-y neb nins sẽn be a Narsis yirã n be Zu-soabã pʋgẽ wã.

¹² Pʋʋs-yã a Tirfɛn ne a Tɩrfoz, tɩ b yaa pagb sẽn modgd b mens Zu-soabã yĩnga. Pʋʋs-y d zo-nongr a Pɛrsid sẽn modgd a meng wʋsg Zu-soabã yĩnga.

¹³ Pʋʋs-y-yã a Rufus sẽn ya nin-yãkdg Zu-soabã pʋgẽ, la y pʋʋs a ma sẽn ya mam me ma wã.

¹⁴ Pʋʋs-y-yã a Asẽnkirt, ne a Felgõ, ne a Hɛrmes, ne a Patrobas, ne a Hɛrmas ne ba-biis nins sẽn be ne bãmbã.

¹⁵ Pʋʋs-y-yã Filolog ne a Zuli, a Neere ne a ma-bi-poakã, la a Olẽmpas ne nin-sõamy nins fãa sẽn be ne bãmbã.

¹⁶ Pʋʋs-y taab ne mok-sõngo. Kirist Wẽnd-dotã fãa toonda yãmb pʋʋsem.

¹⁷ M ba-biisi, mam sagenda yãmb tɩ y gũus ne neb nins sẽn wat ne welgre la bõn-lakdse, tɩ kɩɩsd zãmsg ning yãmb sẽn paamã. Zãag-y y meng ne-ba.

¹⁸ Bala, neb a woto ka tʋmd tõnd Zu-soabã, Kirist yĩng ye, yaa b mens pʋs yĩnga. B belsda neb nins sẽn ka yamã ne gom noodo la ne pẽgre.

¹⁹ Sã n yaa ne yãmba, neba fãa mii yãmb sakrã yelle. Mam sũur nooma ne yãmb yellã, la mam nongame tɩ yãmb bãng yam ne bũmb nins sẽn ya sõama, la y yɩ yɩlma n da maand wẽng ye.

²⁰ Bilf sã n paase, Wẽnnaam na n luba a Sʋtãan tɩ yãmb tab-a ne y nao wã. Bɩ tõnd Zu-soab a Zezi barkã zĩnd ne yãmba.

²¹ Mam tʋmd-n-taag a Tɩmote ne a Lusiyus la a Zazõ la Sozipatɛɛr sẽn ya m saam-biisã pʋʋsda yãmba.

²² Maam a Tɛrtiyus, sẽn gʋls seb-kãngã Zu-soaba pʋgẽ wã pʋʋsda yãmba.

²³ Mam gãag-soab a Gayus sẽn ya Wẽnd-do-tõrã gãag-soabã pʋʋsda yãmba. A Erast sẽn ya tẽngã ligd gũudã pʋʋsda yãmba. D ba-biig a Kartus me pʋʋsda yãmba.

²⁴ Bɩ tõnd Zu-soab a Zezi Kirist barkã zĩnd ne yãmb fãa. Ãmina.

²⁵ Bɩ soab ning sẽn tar-a pãn-tõog tɩ kɩt tɩ yãmb yals kãenkãe wa koe-noogã mam sẽn moondã sẽn yetã, wa sẽn zemsd ne yel-solemdã pukri, yel-solemd ning sẽn dag n solg hal sɩngr wẽndẽ wã.

²⁶ La moasã, Wẽnnaam no-rɛɛsdbã pĩnd-n-bãngr goamã sɛb puk-a-la wa Wẽnnaam sẽn ka sɩngr kõn zĩnd saabã sẽn yeelã, n wilg soolem dãmba fãa nebã, tɩ b tõe n sak tẽebã.

²⁷ Bɩ Wẽnnaam, sẽn ya b yen tãa n ya yam soabã soog ziiri, wakat fãa, a Zezi Kirist maasem yĩnga. Ãmina!