<h4>1</h4>
<p><sup>1</sup> Tõnd gʋlsda yãmb sẽn kẽed ne vɩɩm koɛɛga wɛɛngẽ, koɛɛg ning sẽn dag n be hal sɩngr wẽndẽ wã, tɩ tõnd wʋm a kibarã, tɩ d mens nin yãnd-a wã, tɩ tõnd ges-a wã, la d sɩɩs-a ne d nusã,
<p><sup>2</sup> b puk-a lame tɩ tõnd yã. Yaa rẽ yĩngã, tɩ tõnd kõt yãmb koe-kãng kaseto, la d togsd yãmb vɩɩm sẽn kõn sa wã koɛɛg sẽn dag n be tõnd Ba nengẽ, tɩ b vẽneg-a ne tõndã.
<p><sup>3</sup> Bũmb ning tõnd sẽn yã la d wʋma, tõnd togsd-a-la yãmb me, tɩ yãmb me tõe n paam lagem-n-taar ne tõndo. La tõnd lagem-n-taarã bee ne d ba wã, la ne b Bi-ribl a Zezi Kirist.
<p><sup>4</sup> Tõnd gʋlsda bõn-kãngã tɩ tõnd sũ-noogã na pid zãnga.
<p><sup>5</sup> Ad koɛɛg ningã tõnd sẽn wʋm a Zezi Kirist nengẽ n togsd yãmbã: Wẽnnaam yaa vẽenem la lik baa bilf ka be bãmb pʋgẽ ye.
<p><sup>6</sup> Tõnd sã n yetẽ tɩ d tara lagem-n-taar ne bãmba n yaool n kẽnd lik pʋgẽ, tõnd yagda zĩrĩ la d ka maand sɩd ye.
<p><sup>7</sup> La tõnd sã n kẽnd vẽenemẽ wa bãmb mengã sẽn be vẽenemẽ wã, tõnd tara lagem-n-taar ne taaba, la bãmb Bi-ribl a Zezi zɩɩmã pekda tõnd yel-wẽna fãa n yiisi.
<p><sup>8</sup> Tõnd sã n yetẽ tɩ d ka tar yel-wẽnde, tõnd belgda d mense la sɩd ka be tõnd pʋgẽ ye.
<p><sup>9</sup> Tõnd sã n vẽneg n togs Wẽnnaam d yel-wẽna, bãmb yaa sɩd soaba la tɩrga tɩ maan tõnd sugr d yel-wẽna yĩnga, la b pek tõnd n yiis d tʋʋm-wẽnsã fãa.
<p><sup>10</sup> Tõnd sã n yeel tɩ d ka maan yel-wẽnde, tõnd geta Wẽnnaam wa zĩrĩ yagda, la bãmb goamã ka be tõnd pʋgẽ ye.
<h4>2</h4>
<p><sup>1</sup> Mam kom-bõonego, m gʋlsda yãmb bõn-kãngã sẽn na yɩl tɩ y ra maan yel-wẽn ye. La ned sã n maan yel-wẽna, tõnd tara sɛ-yõakd sẽn be d ba wã nengẽ: Yaa tɩrlem soab a Zezi Kirist.
<p><sup>2</sup> B talla a Zezi meng n maan maoong tõnd yel-wẽna sugr kũun yĩnga, la ka tõnd bal yel-wẽnã yĩng ye, la dũni neba fãa me yel-wẽna yĩnga.
<p><sup>3</sup> Tõnd sã n sak Wẽnnaam tõodã, dẽ tõnd miime tɩ d bãnga bãmba.
<p><sup>4</sup> Ned ning sẽn yet t'a mii Wẽnnaam la a yaool n ka sakd b tõodã, yẽ soab yaa zĩrĩ yagda la sɩd ka be yẽ pʋgẽ ye.
<p><sup>5</sup> La ned ning sẽn sakd Wẽnnaam goamã, a wilgdame t'a nonga Wẽnnaam sɩd-sɩda. Ad tõnd sẽn tõe n bãng to-to tɩ d bee bãmb pʋgẽ:
<p><sup>6</sup> Sẽn yet-a tɩ yẽ paada Wẽnnaam pʋgẽ tog n kẽnda wa a Zu-soabã sẽn dag n kẽndã.
<p><sup>7</sup> M kom-nongdse, ka tõ-paalg la mam gʋlsd yãmb ye, yaa tõ-kʋdg yãmb sẽn dag n paam hal sɩngrẽ wã. Tõ-kʋdg kãnga yaa koɛɛg ning yãmb sẽn dag n wʋma.
<p><sup>8</sup> Mam sẽn gʋlsd yãmbã yaa tõ-paalg me. Yel-kãng yaa sɩd Zu-soabã pugẽ, la yãmb pʋse. Bala, lik bida wã loogdame, la vẽenem sɩd-sɩdã zoe n yãgdame.
<p><sup>9</sup> Ned ning sẽn yet t'a bee vẽenemẽ n yaool n kis a ba-biiga, a ket n bee lik bida pʋgẽ.
<p><sup>10</sup> Ned ning sẽn nong a ba-biig bee vẽenemẽ bũmb ka be n na n lub-a ye.
<p><sup>11</sup> La ned ning sẽn kis a ba-biig bee lik bida pʋgẽ. Yẽ kẽnda likã pʋgẽ, n ka mi a sẽn dabdẽ ye, bala likã kɩtame t'a ninã ka ne ye.
<p><sup>12</sup> Kom-bõonego, mam gʋlsda yãmb tɩ bala, Kirist yʋʋrã yĩnga yãmb paama y yel-wẽna sugri.
<p><sup>13</sup> Ba-rãmba, mam gʋlsda yãmb tɩ bala, yãmb sẽn bãng soab ning sẽn be-a hal sɩngr wẽndẽ wã yĩnga. Kom-bɩɩse, mam gʋlsda yãmba, tɩ bala, yãmb tõoga wẽng soabã. Kom-bõonego, mam gʋlsa yãmba, tɩ bala, yãmb bãnga d ba wã.
<p><sup>14</sup> Ba-rãmba, mam gʋlsa yãmba, tɩ bala, yãmb bãnga soab ning sẽn be hal sɩngr wẽndẽ wã. Kom-bɩɩse, mam gʋlsa yãmba, tɩ bala, yãmb tara pãnga, tɩ Wẽnnaam goamã be yãmb pʋgẽ, la tɩ y tõoga wẽng soabã.
<p><sup>15</sup> Da nong-y dũni wã, wall bũmb ning sẽn be a pʋgẽ wã ye. Ned sã n nong dũni wã, d ba wã nonglem ka be a soab pʋgẽ ye.
<p><sup>16</sup> Bala, bũmb nins fãa sẽn be dũniyã pʋgã, sã n ya yĩng ratem wẽngã, la ninã sẽn get bũmb nins n datã, la wilg-m-meng arzegs sẽn wat-ne wã ka yit Wẽnnaam nengẽ ye, a yita dũni nengẽ.
<p><sup>17</sup> Dũni loogdame la a ratem wẽngã me loogdame. La ned ning sẽn maand Wẽnnaam daab paada wakat sẽn kõn sa.
<p><sup>18</sup> Mam kom-bõonego, moasa yaa yaoolem wakate. Wa yãmb sẽn dag n wʋm tɩ Kirist kɩɩsd n watã, ad Kirist kɩɩsdb wʋsg n be moasã. Rẽ kɩtame tɩ tõnd miẽ tɩ yaa yaoolem wakate.
<p><sup>19</sup> Bãmb yii tõnd sʋka la b rag n ka tõnd neb ye. Tɩ bõe, bãmb sã n dag n yaẽ tõnd neba, b dag n na n paa ne tõndo. La b sẽn maan to-to wã wilgda vẽeneg tɩ ka neba fãa n yaa tõnd neb ye.
<p><sup>20</sup> Yãmb mensã paamame tɩ soab ning sẽn welg-a toorã kõ yãmb b Sɩɩgã, la yãmb fãa tara bãngre.
<p><sup>21</sup> Mam sẽn gʋls yãmbã, ka tɩ yãmb ka mi sɩdã ye, la yaa yãmb sẽn mi-a wã yĩnga, la zĩrĩ sẽn ka yit sɩd pʋgẽ wã yĩnga.
<p><sup>22</sup> Ãnna la zĩrĩ yagdã, sã n ka ned ning sẽn kɩɩsda t'a Zezi ka Kiristã? Ned ning sẽn yet t'a ka mi d ba ne b bi-riblã yaa Kirist kɩɩsda.
<p><sup>23</sup> Ned ning fãa sẽn yet t'a ka mi bi-riblã ka tar ba wã me ye, la ned ning sẽn yet t'a mii biigã, a tara ba wã me.
<p><sup>24</sup> Sã n ya ne yãmba, koɛɛg ning yãmb sẽn dag n wʋm hal sɩngrẽ wã tog n paa yãmb pʋse. Bũmb ning yãmb sẽn wʋm hal sɩngrẽ wã sã n pa yãmb pʋse, yãmb me na n paa bi-riblã ne ba wã pʋga.
<p><sup>25</sup> Ad bũmb ning Kirist sẽn kãab tõndã: Yaa vɩɩm sẽn kõn sa.
<p><sup>26</sup> Mam gʋlsa yãmb bõn-kãense, neb nins sẽn belgd yãmba wɛɛngẽ.
<p><sup>27</sup> La ne yãmba, Sɩɩg-sõng ning yãmb sẽn deeg bãmb nengẽ wã bee yãmb pʋse, la yãmb ka baood tɩ b zãms yãmb ye. La wa bãmb Sɩɩgã sẽn zãmsd yãmb bũmb fãa wã, tɩ yaa sɩdã, la ka zĩrĩ wã, woto, bɩ y pa ne Kirist wa Sɩɩg-sõng sẽn zãms yãmb to-to wã.
<p><sup>28</sup> La moasã, mam kom-bõonego, bɩ y pa Kirist pʋga, tɩ bãmb sẽn na n wa pukã wakate, bɩ tõnd paam pɛl-kɛgenga, tɩ bãmb waoongã daare, yãnd kõn yõk tõnd bãmb taoor ye.
<p><sup>29</sup> Yãmb sã miẽ tɩ Kiristã yaa tɩrlem soaba, bɩ y bãng tɩ ned ning fãa sẽn maand sẽn ya tɩrg yaa Wẽnnaam biiga.
<h4>3</h4>
<p><sup>1</sup> Ges-y nonglem ninga d ba wã sẽn nong tõndã, bala b boonda tõnd tɩ Wẽnnaam kamba. La tõnd sɩd yaa bãmb kamba. Ad bũmb ning sẽn kɩt tɩ dũni wã ka mi tõndã: Yaa t'a ka bãng d ba wã ye.
<p><sup>2</sup> Mam zo-nongdse, tõnd yaa Wẽnnaam kamb moasã, la tõnd sẽn na n yɩ bũmb ningã nan ka puk nand ye. La tõnd miime tɩ Kirist sã n wa n puki, tõnd na n yɩɩ wa bãmba, tɩ bõe, tõnd na n yãa bãmb sẽn yaa a soabã.
<p><sup>3</sup> Ned ninga fãa sẽn tẽed Kiristã yel-kãngã pidsg yĩnga, a yɩlgda a meng n lebg yɩlemd wa a Zezi Kirist sẽn ya yɩlemdã.
<p><sup>4</sup> Ned ninga fãa sẽn maand yel-wẽnde, a kɩɩsda tõogã me. Yel-wẽna yaa tõogã kɩɩsgo.
<p><sup>5</sup> La yãmb miime t'a Zezi waame n na n yiis yel-wẽna, la yel-wẽnd ka tol n be bãmb pʋgẽ ye.
<p><sup>6</sup> Ned ning fãa sẽn be Kirist pʋgẽ ka maand yel-wẽn ye. Ned ning fãa sẽn maand yel-wẽn ka yã bãmba, la a ka bãng-b ye.
<p><sup>7</sup> Kom-bõonego, bɩ y ra sak tɩ ned ba a yen belg yãmb ye. Ned ning sẽn maand tɩrlem yaa tɩrg wala a Zezi Kirist sẽn ya tɩrgã.
<p><sup>8</sup> Ned ning sẽn maand yel-wẽn yaa rõatã neda, bala rõatã sɩng n maanda yel-wẽn hal sɩngr wẽndẽ. Wẽnnaam Bi-riblã waame n na n sãam rõatã tʋʋma.
<p><sup>9</sup> Wẽnnaam sẽn dog ned ninga fãa ka maand yel-wẽn ye, Wẽnnaam yalẽ wã sẽn be yẽ pʋgẽ wã yĩnga. La sẽn ya Wẽnnaam n dog-a wã yĩnga, a ka tõe n ket n maand yel-wẽn ye.
<p><sup>10</sup> Yaa woto la b bãngd sẽn ya-b Wẽnnaam kamba la sẽn ya-b rõatã kamb n bake. Ned ning fãa sẽn ka maand tɩrga la sẽn ka nong a ba-biig ka Wẽnnaam biig ye.
<p><sup>11</sup> Ad koɛɛg ning yãmb sẽn wʋm hal sɩngrẽ wã: Bɩ d nong taaba.
<p><sup>12</sup> Bɩ d ra maan wala a Kaẽ sẽn da ya wẽng soabã rẽndã, la sẽn kʋ a ba-biigã ye. La bõe yĩng n kɩt t'a kʋ-a? Yaa yẽ tʋʋma sẽn da ya wẽns t'a ba-biigã tʋʋma zemsã yĩnga.
<p><sup>13</sup> M ba-biisi, dũniyã neba sã n kis yãmba, bɩ y ra yɛɛs ye.
<p><sup>14</sup> Tõnd sẽn nong d ba-biisã yĩnga, tõnd miime tɩ d yii kũum zĩigẽ n kẽ vɩɩm zĩigẽ. Ned ning sẽn ka tar nonglem bee kũum pʋgẽ.
<p><sup>15</sup> Ned ninga fãa sẽn kis a ba-biig yaa nin-kʋʋda, la yãmb miime tɩ nin-kʋʋd ba a yen ka tar vɩɩm sẽn kõn sa wã tɩ bee a pʋgẽ ye.
<p><sup>16</sup> Ne bõn-kãnga, tõnd bãnga nonglem sẽn ya bũmb ninga: Yaa t'a Zezi Kirist kõo bãmb vɩɩmã tõnd yĩnga. Tõnd me tog n kõo d vɩɩmã d ba-biisã yĩnga.
<p><sup>17</sup> Ned sã n tar dũni arzegse, n neẽ t'a ba-biig rat sõngre, tɩ yẽ ka zoe a nimbãaneg n sõng-a, yẽ na n yɩɩ a wãn yeel t'a nonga Wẽnnaam?
<p><sup>18</sup> Kom-bõonego, bɩ tõnd nonglem ra yɩ noor goama wall no-noom ye. Bɩ a yɩ ne tʋʋma la ne sɩda.
<p><sup>19</sup> Rẽ na n kɩtame tɩ tõnd bãng tɩ d yaa sɩd-dãmba, la tõnd na n paama sũur laafɩ Wẽnnaam taoore,
<p><sup>20</sup> baa ne tõnd sũya sẽn mongd tõnd bʋʋm to-to. Bala, Wẽnnaam yɩɩda tõnd sũyã, la b mii bũmb fãa.
<p><sup>21</sup> Mam zo-nongdse, tõnd sũurã sã n ka mongd tõnd bʋʋm, tõnd pɛlg yaa kɛgeng Wẽnnaam taoore,
<p><sup>22</sup> tõnd sẽn kot bũmb ninga fãa, bãmb kõta tõndo, tõnd sẽn sakd bãmb tõodã la d maand sẽn tat bãmb yamã yĩnga.
<p><sup>23</sup> Ad bãmb tõogã la a woto: Yaa tɩ d tẽ bãmb bi-ribl a Zezi Kirist yʋʋre, la tɩ d nong taab wala sẽn zems tõog ning a Zezi sẽn kõ tõndã.
<p><sup>24</sup> Ned ning sẽn sakd bãmb tõodã bee Wẽnnaam pʋgẽ, tɩ Wẽnnaam be yẽ pʋgẽ. Woto, tõnd miime tɩ bãmb bee tõnd pʋgẽ, Sɩɩg-sõng bãmb sẽn kõ tõndã maasem yĩnga.
<h4>4</h4>
<p><sup>1</sup> Mam zo-nongdse, ra tẽ-y sɩɩsã fãa ye, mak-y-b n ges n bãng b sã n yita Wẽnnaam nengẽ. Bala, belgr no-rɛɛsdb wʋsg n wa dũniyã pʋga.
<p><sup>2</sup> Ad bũmb ning sẽn na n kɩt tɩ yãmb bãng tɩ yaa Wẽnnaam Sɩɩgã: Sɩɩg ning fãa sẽn yet t'a Zezi Kirist waa ne yĩnga, Sɩ-kãng yii Wẽnnaam nengẽ.
<p><sup>3</sup> La sɩɩg ninga fãa sẽn ka kɩt-a kaset kãng ka yit Wẽnnaam nengẽ ye, a yaa Kirist kɩɩsdã sɩɩga. Sɩɩg ning yãmb sẽn dag n wʋm t'a watame wã, la moasã, a zoee n bee dũniyã pʋgẽ.
<p><sup>4</sup> Ne yãmba, mam kom-bõonego, yãmb yaa Wẽnnaam kamba, la y tõoga belgr no-rɛɛsdbã, bala, soab ning sẽn be yãmb pʋgẽ wã yɩɩda sẽn be-a dũniyã pʋgẽ wã.
<p><sup>5</sup> Bãmb yaa dũniyã rẽnda, yaa rẽ yĩng la b goama sẽn yɩt dũni nengẽ wã, la dũniyã kelgd-b lame.
<p><sup>6</sup> La ne tõndo, tõnd yaa Wẽnnaam dẽnda. Ned ning sẽn mi Wẽnnaam kelgda tõndo, la ned ning sẽn ka mi Wẽnnaam ka kelgd tõnd ye. Yaa woto la tõnd na n bãng sɩd Sɩɩgã ne tudgr sɩɩgã n bake.
<p><sup>7</sup> M zo-nongdse, d nong taaba, bala, nonglem yita Wẽnnaam nengẽ, la ned ning fãa sẽn nong a taab yaa Wẽnnaam biiga, la a mii Wẽnnaam.
<p><sup>8</sup> Ned ning sẽn ka nong a taab ka bãng Wẽnnaam ye, bala Wẽnnaam yaa nonglem.
<p><sup>9</sup> Ad Wẽnnaam sẽn puk b nonglemã to-to tõnd yĩnga: Bãmb tʋma b Bi-ribl yendã dũniyã pʋgẽ tɩ tõnd tõe n paam vɩɩm bãmb maasem yĩnga.
<p><sup>10</sup> Nonglem kãng ka tõnd sẽn nong Wẽnnaam yĩng ye, yaa bãmb sẽn nong tõndo, n tʋm b Bi-riblã tɩ b yɩ maoong tõnd yel-wẽna sugr kũun yĩngã yĩnga.
<p><sup>11</sup> Mam zo-nongdse, Wẽnnaam sã n nong tõnd hal wʋsg a woto, tõnd me tog n nonga taaba.
<p><sup>12</sup> Ned baa a yen zɩ n yã Wẽnnaam ye. Tõnd sã n nong taaba, Wẽnnaam bee tõnd pʋgẽ, la bãmb nonglema zemsa zãng tõnd pʋgẽ.
<p><sup>13</sup> Ad bũmb ning sẽn kɩted tɩ tõnd bãng tɩ d bee Wẽnnaam pʋgẽ, la tɩ bãmb bee tõnd pʋgẽ: Yaa tɩ bãmb kõo tõnd b Sɩɩgã.
<p><sup>14</sup> La tõnd yãame la d kɩt kaset tɩ d ba wã tʋma b Bi-riblã tɩ b yɩ dũni fãagda.
<p><sup>15</sup> Ned ning sẽn yet t'a Zezi yaa Wẽnnaam Bi-ribla, Wẽnnaam bee a soab pʋgẽ, la a soab bee Wẽnnaam pʋgẽ.
<p><sup>16</sup> La ne tõndo, tõnd bãnga nonglem ning Wẽnnaam sẽn tar tõnd yĩngã, la tõnd tẽe nonglem kõngo. Wẽnnaam yaa nonglem. Ned ning sẽn be nonglem pʋgẽ, a bee Wẽnnaam pʋgẽ, la Wẽnnaam bee yẽ soab pʋgẽ.
<p><sup>17</sup> Nonglema sã n zems zãng tõnd pʋsẽ, dẽ, bʋʋda kaoob daare tõnd pɛlg na n yɩɩ kãenkãe, bala, Kirist sẽn ya to-to wã, tõnd me vɩɩmã yaa a woto dũni kãngã pʋga.
<p><sup>18</sup> Rabeem ka be nonglem pʋgẽ ye, la nonglem sẽn zems zãng yiisda rabeem. Bala, rabeem wilgdame tɩ sɩbgr n be, la ned ning sẽn zoet rabeem, nonglemã ka zems zãng yẽ pʋgẽ ye.
<p><sup>19</sup> Ne tõndo, tõnd tara nonglem, Wẽnnaam sẽn deng n nong tõndã yĩnga.
<p><sup>20</sup> Ned sã n yet t'a nonga Wẽnnaam n yaool n kis a ba-biiga, yẽ soab yaa zĩrĩ yagda. Bala, ned ning sẽn ka nong a ba-biig a sẽn ne wã, a ka tõe n nong Wẽnnaam yẽ sẽn ka ne wã ye.
<p><sup>21</sup> Dẽ, ad tõog ninga Kirist sẽn kõ tõndã: Ned ning sẽn nong Wẽnnaam, tog n nonga a ba-biig me.
<h4>5</h4>
<p><sup>1</sup> Ned ning fãa sẽn tẽed t'a Zezi yaa Kiristã, yaa Wẽnnaam n dog yẽ soaba. La ned ning fãa sẽn nong soab ning sẽn dog-a bãmbã, nonga bãmb sẽn dog a soabã me.
<p><sup>2</sup> Ad bũmb ning sẽn kɩted tɩ tõnd bãng tɩ d nonga Wẽnnaam kambã: Yaa tõnd sẽn na n nong Wẽnnaam la d sakd bãmb tõodã.
<p><sup>3</sup> Bala, tɩ nong Wẽnnaam yaa tɩ sak bãmb tõodã. La bãmb tõodã ka toog ye.
<p><sup>4</sup> Bala, Wẽnnaam sẽn dog a soab fãa tõogda dũniyã. Ad tõogr ning sẽn tõogd dũni wã: yaa tõnd tẽebã.
<p><sup>5</sup> Ãnna n tõogd dũni wã, sã n ka ned ninga sẽn tẽed t'a Zezi yaa Wẽnnaam Bi-riblã.
<p><sup>6</sup> Yaa a Zezi Kirist n wa ne koom, la zɩɩm, la ka ne koom bal ye, la yaa ne koom la zɩɩm, la yaa Sɩɩg-sõng n kɩt kaseto, Sɩɩg-sõng sẽn ya sɩd soabã yĩnga.
<p><sup>7</sup> Bala, yaa neb a tãab n kɩt kaset arzãn pʋga: yaa ba wã, la gomdã, la Sɩɩg-sõngo. La bãmb b tãabã yaa yembre.
<p><sup>8</sup> La bũmb a tãab n be n kɩt kaset tẽng zugu: yaa Sɩɩg-sõngo, la koom, ne zɩɩm. La bãmb b tãabã kaset zemsda taaba.
<p><sup>9</sup> Tõnd sã n deegd ninsaalb kaseto, Wẽnnaam kaset n ya kãsẽng n yɩɩda. Tɩ bõe, ad Wẽnnaam kaseto: Yaa tɩ Wẽnnaam kɩta b Bi-riblã kaseto.
<p><sup>10</sup> Ned ning sẽn tẽed Wẽnnaam Bi-riblã tara kaset kãngã a meng pʋgẽ. Ned ning sẽn ka tẽed Wẽnnaam, a maanda bãmb tɩ b yɩ wa zĩrĩ yagda yẽ sẽn ka tẽed kaset ninga Wẽnnaam sẽn kɩs b Bi-riblã wɛɛngẽ wã yĩnga.
<p><sup>11</sup> Kaset kãng la woto: Wẽnnaam kõo tõnd vɩɩm sẽn kõn sa, la vɩ-kãng bee b Bi-riblã pʋgẽ.
<p><sup>12</sup> Ned ninga sẽn tar-a Bi-riblã tara vɩɩmã, la ned ninga sẽn ka tar-a Wẽnnaam Bi-riblã ka tar vɩɩmã ye.
<p><sup>13</sup> Mam gʋlsa yãmb bõn-kãngã, sẽn na yɩl tɩ yãmb bãng tɩ yãmb sẽn tẽed Wẽnnaam Bi-riblã yʋʋrã, yãmb tara vɩɩm sẽn kõn sa.
<p><sup>14</sup> Ad pɛl-kɛgeng ning tõnd sẽn tar bãmb taoorã: Tõnd sã n kos bũmb sẽn zems ne bãmb daabo, b kelgda tõndo.
<p><sup>15</sup> La tõnd sã n miẽ tɩ b kelgda tõndo, sẽn ya bũmb ninga la tõnd kos-yã, tõnd miime tɩ d paama bũmb ninga tõnd sẽn kos bãmbã.
<p><sup>16</sup> Ned sã n yã a ba-biig sẽn maan yel-wẽnd sẽn ka wat ne kũum, bɩ a pʋʋse, la Wẽnnaam na kõ-a vɩɩm. Yaa neb nins sẽn maand-b yel-wẽn sẽn ka wat ne kũuma yĩnga la y tog n pʋʋse. Yel-wẽnd n be n wat ne kũum, ka yel-wẽn kãng yĩng la mam sẽn yet tɩ y pʋʋsã ye.
<p><sup>17</sup> Tʋʋm-wẽng fãa yaa yel-wẽnde, la yel-wẽn n be n ka wat ne kũum ye.
<p><sup>18</sup> Tõnd miime tɩ Wẽnnaam sẽn dog ned ning fãa ka maand yel-wẽn ye, la Wẽnnaam Bi-riblã gũuda yẽnda, la wẽng soabã ka sɩɩsd yẽ ye.
<p><sup>19</sup> Tõnd miime tɩ d yaa Wẽnnaam dẽnda, la dũniyã zãng bee wẽng soabã nugẽ.
<p><sup>20</sup> Tõnd miime me tɩ Wẽnnaam Bi-riblã waame, la b kõo tõnd bãngr tɩ d bãng soab ning sẽn yaa sɩdã. La tõnd bee sẽn ya-a sɩdã pʋgẽ, b Bi-ribl a Zezi Kirist maasem yĩnga. Yaa bãmb la Wẽnnaam sɩd-sɩda la vɩɩm sẽn kõn sa.
<p><sup>21</sup> Mam kom-bõonego, lak-y y mens ne wẽn-naandsã.