1

¹ Maam a Sɩmo Pɩyɛɛr sẽn ya a Zezi Kirist yamba, la b tẽn-tʋmdã n tʋmd seb-kãnga neb nins sẽn paam tẽeb sẽn tar yõod wa tõnd dẽnda nengẽ. Yaa tõnd Wẽnnaamã ne d Fãagd a Zezi Kirist tɩrlem tʋʋmdã maasem yĩng la d paam-a.

² Bɩ Yãmb sẽn bãng Wẽnnaam ne tõnd Zu-soab a Zezi wã kɩt tɩ y paam bark la laafɩ wʋsgo.

³ Wẽnnaam pãngã kõo tõnd bũmb ning fãa sẽn tõe n sõng tõnd tɩ d vɩɩmd Wẽnnaama tũudum pʋgẽ, la a kɩt tɩ d bãng soab ning sẽn bool-a tõnd tɩ d paam bãmb ziirã ne b sõmblemã.

⁴ Yaa bõn-kãens maasem yĩng la b kõ tõnd kãabs nins sẽn ya sõama la kãsemsã, tɩ yãmb sã n zoe n bas ratem-wẽnsã sẽn be dũniyã n wat ne sãoongã, kãab kãens yĩnga, yãmb na paam Wẽnnaam yalẽ wã.

⁵ La bõn-kãng yĩng me, maan-y y pãng sẽn tõe fãa, tɩ y tẽebã naag ne sõmblem, tɩ y sõmblemã naag ne bãngre.

⁶ La bãngrã pʋgẽ, bɩ y mao n paas yõk-m-menga la yõk-m-menga pʋgẽ, bɩ y paas sũ-tõogo la sũ-tõogã pʋgẽ, bɩ y paas Wẽnnaam sakre.

⁷ La Wẽnnaam sakrã pʋgẽ, maan-y taab ba-biir manesem la ba-biir manesem pʋgẽ, paas-y nonglem.

⁸ Sɩd me, bõn-kãensã sã n be yãmb pʋsẽ, la b sã n paamd pãng be n paasdẽ, b na n kɩtame tɩ yãmb maan tʋʋma la y wom biis sẽn na n kɩt tɩ yãmb bãng tõnd Zu-soab a Zezi kirist n paase.

⁹ La ned ning sẽn ka tar bõn-kãens yaa zoanga, la a nina mumame, la a yĩmdame tɩ yẽ paama pekr ne yel-wẽn nins yẽ sẽn da maan tɩ loogã.

¹⁰ M ba-biisi, yaa woto yĩnga, modg-y n yals-y kãenkãe Wẽnnaam sẽn bool yãmbã pʋgẽ, la b sẽn yãk yãmbã pʋgẽ, yãmb sã n maan woto, yãmb kõn tol n bʋdg n bas y tẽebã ye.

¹¹ Yaa woto n na n kɩt tɩ b kõ yãmb noor zãnga, tɩ y kẽ tõnd Zu-soab la d fãagd a Zezi Kirist soolem sẽn kõn sa wã pʋgẽ.

¹² Yaa woto yĩng tɩ mam na n tẽegd yãmb bõn-kãens daar fãa, baa ne yãmb sẽn zoe n mi-bã, la y sẽn yas kãenkãe sɩd-kãngã pʋgẽ wã.

¹³ Mam tagsame tɩ yaa neere, tɩ mam sẽn ket n vɩ yĩn-kiid-kãngã sẽn ya wa fu-roogã pʋga, bɩ m tẽeg-y tɩ y ra gũs ye.

¹⁴ Bala, mam miime tɩ sã n yɩ bilfu, mam na n yii yĩn-kiid-kãngã pʋgẽ, wa tõnd Zu-soab a Zezi Kirist sẽn vẽneg-a ne maama.

¹⁵ La mam na n modgame tɩ mam loogr poore, bɩ yãmb tõog n tẽegd bõn-kãens yell bũmb fãa pʋgẽ.

¹⁶ Sɩd me, tõnd ka tũnug soalem b sẽn tags n naane, n togs yãmb tõnd Zu-soab a Zezi Kirist pãn-kãsengã la bãmb waoongã yell ye, la yaa tɩ tõnd mens nin yãa bãmb ziirã.

¹⁷ Bala, bãmb deega waoogr la ziir tõnd Ba a Wẽnnaam nengẽ. Yaa bãmb sẽn wa n wʋm naam sẽn be ziirã koɛɛg sẽn gom ne bãmb n yeel tɩ: Ada yaa mam bi-ribl nongr sẽn ta mam yam zãnga.

¹⁸ Yaa tõnd sẽn wa n be tãn-sõngã zug ne bãmbã la tõnd wʋm koe-kãng sẽn yi arzãn n gome.

¹⁹ Tõnd leb n mii vẽeneg tɩ pĩnd-n-bãngr goam sẽn da togsã yaa sɩda. Yaa neer tɩ yãmb ges bõn-kãens wa y sẽn get fɩtl sẽn be zĩ-likẽ n yãgd n gũud hal beoog sẽn na n vẽeg tɩ yibeoog ãdgã yãg yãmb sũyã pʋse.

²⁰ Sẽn deng bũmb fãa, bãng-y tɩ ned ka be n tõe n bilg Wẽnnaam gʋls-sõmyã pĩnd-n-bãngr gomd baa a yen võor ne a meng pãng ye.

²¹ Bala, pĩnd-n-bãngr gomd baa a ye zɩ n tol n yɩ ne ninsaal tʋlsem ye, la yaa Sɩɩg-sõng sẽn kõ bũmb ningã la ninsaalbã reegd n togsd Wẽnnaam yĩnga.

2

¹ Zĩrĩ-bãngdb n dag n zĩnd Wẽnnaam neba sʋka. Woto me, zĩrĩ karen-saam-dãmb n be yãmb sʋkã. B na n maana sɩlem n wa ne zãmsg sẽn menesd neba, la b na n kɩɩsa Zu-soab ning sẽn fãag-a bãmbã, la b na n taka sãoong sẽn kõn kaoos n wa b mens zutu.

² Neb wʋsg na n pʋga bãmb b tʋʋm-beedã pʋgẽ, la sɩd sorã na n paama tʋʋsgo, bãmb tʋʋm-beedã yĩnga.

³ Bãmb rat-wʋsgã yĩnga, b na n belga yãmb ne sɩlem goam n fã yãmba. La bãmb sɩbgrã sɩnga hal daar zãr n watẽ, la bãmb sãoongã ka na n vaal ye.

⁴ Bala, Wẽnnaam ka bas tɩ malegs nins sẽn maan-b yel-wẽna põs ye B rig-b lame n lobe, n kẽes-b bog-zulung sẽn ya lik bida pʋgẽ, n balg-b be n gũud bʋʋdã kaoob daare.

⁵ Wẽnnaam ka bas pĩnd dũniyã t'a põs ye. Yaa neb a nii bal la bãmb põsg-yã: Ya a Nowe n dag n ya tɩrlmã koe-moaanda. La Wẽnnaam kɩtame tɩ sa-kãseng wa ni wẽn-kɩɩsdbã dũni zugu.

⁶ Wẽnnaam sɩbga tẽns nins sẽn boond tɩ Sodom la Gomoorã, n kɩt tɩ b lebg tompeglem, tɩ yɩ mamsg wẽn-kɩɩsdb nins sẽn na n pʋgl n wa wã yĩnga.

⁷ La Wẽnnaam fãaga nin-tɩrg a Lot. Yẽ sũur da sãama hal wʋsgo, nin-wẽns kãensã tʋʋm-dẽgdã sẽn ya wʋsgã yĩnga.

⁸ Bala, nin-tɩr-kãng sẽn da be bãmb sʋk n yãt tʋʋm-dẽgd nins b sẽn maandã, la a wʋmdẽ wã, a sũurã ra sãamda daar fãa, t'a namsd wʋsg a tɩrlmã pʋgẽ.

⁹ Rẽ wã, Zu-soabã mii b sẽn na n maan to-to n fãag neb nins sẽn sakd bãmbã makr wakate, la b sẽn na n maan to-to n bĩng tʋʋm-wẽns maandbã n sɩbg-b bʋʋdã kaoob daare.

¹⁰ Sẽn pʋs n yɩɩd fãa, yaa neb nins sẽn be tʋʋm-dẽgd maaneg ratem pʋgã, n baood n maan yĩngã tʋlsem, la b kɩɩsd Wẽnnaam noorã. Zĩrĩ karen-saam-dãmbã yaa sek-m-mens-rãmba, la tɩta-neba, b ka yɛɛsd tɩ paoog yĩngr rãmb ziirã ye. B tʋʋd-b lame.

¹¹ Baa malegs nins sẽn tar pãng ne pãn-tõog n yɩɩd bãmbã yaool n ka gomd yĩngr pãens rãmbã wẽng Zu-soabã taoor ye.

¹² Nin-wẽn-kãensã wẽnda rũms sẽn sakd b mens ratem, tɩ b belma yõod yaa yõk n kʋ balã. Bãmb paoogda bũmb nins b sẽn ka mi. Bãmb mens tʋʋm dẽgdã n na n sãam-ba.

¹³ Bãmb tʋʋm wẽnsã yĩnga, b na n deega tʋʋm wẽns yaoodo. Bãmb getame tɩ tʋm wẽngã ratem tʋʋm ne wĩntoog yaa sũ-noog bũmbu. Bãmb yaa wẽns la rẽgdo, la b sẽn naagd yãmb n dɩtẽ wã wakate, b maanda sũ-noog ne b zãmbã.

¹⁴ Bãmb nina geta pʋg-yoaadba, la b zɩ n maan yel-wẽn n tɩg ye. B belgda neb nins yam sẽn yuusdã n tõogdẽ, b sũyã pida ne maan sɩlem n kãag n kõ b mense. Wẽnnaam kãab-wẽng bee bãmb zutu.

¹⁵ Bãmb bʋdg n basa so-tɩrgã, n menem n tũ a Beoor biig a Balaam sore. Yẽ sakame n na n maan wẽng n deeg yaoodo,

¹⁶ la a paama lengre, a kɩɩsgã yĩnga. Bõang sẽn ka gomd goma wa ninsaala n gɩdg Wẽnnaam no-rɛɛs kãng yalem-tʋʋmã.

¹⁷ Nin-kãens wẽnda buls sẽn ka tar koom ye, la wa sawat sobg sẽn dɩkda. B zĩig na n yɩɩ lik sẽn ya bida pʋgẽ.

¹⁸ Ne bãmb wuk-m-meng gom-minimã, la b gom-vɩɩdã, b rɩkda b yĩngã ratem sẽn ya tʋʋm-dẽgdã n belgd neb nins sẽn nan lak b mens ne sẽn vɩ-b wẽng maaneg pʋgẽ wã.

¹⁹ B kãabda nebã lohorom, tɩ bãmb mensã yaool n ya tʋʋm-dẽgd yemse, bala, ned kam fãa yaa bũmb ning sẽn tõog yẽ wã yamba.

²⁰ Sɩd me, nebã sã n bãng tõnd Zu-soab la d fãagd a Zezi Kiristã, n yi n bas dũni wã dẽgdã, n leb n kẽ a pʋgẽ t'a tõog bãmba, bãmb yaoolem toogã wẽng na n yɩɩga pipi rẽndã.

²¹ Bala, bãmb sã n dag n ka bãngẽ tɩrlmã sor n são bãmb sẽn bãng-a, n yaool n wẽnemd n bas tõ-sõng ning b sẽn dag n kõ bãmbã.

²² Bũmb ning sẽn paam bãmbã yaa wa yel-bũnd ning sẽn ya sɩdã sẽn yeelã: Baagã lebg n tɩ rɩɩ a sẽn dag n wʋbã, la kurku-yãangã b sẽn nan pekã leb n tɩ bilma begdã.

3

¹ Mam zo-nongdse, ade, zoe n yaa sebr a yiib-n-soab mam sẽn gʋlsd yãmba. Sɛb a yiibã fãa pʋse, mam tẽegda yãmba, sẽn na n yɩl tɩ yãmb yamã puk vẽenega,

² tɩ yãmb tõog n tẽeg Wẽnnaam no-rɛɛs sõmyã sẽn dag n deng n togsã, la tõnd Zu-soab la d Fãagdã tõogã yãmb tẽn-tʋmdbã sẽn zãms yãmbã.

³ Sẽn deng bũmb fãa, bãng-y tɩ yaoolem wakate, neb sẽn laad neb n na n zĩndi. B na n yaala yãmba, b na n yɩɩ neb sẽn sakd b mens yĩngã ratem.

⁴ La b na n yeelame yaa: "Bãmb sẽn da kãab tɩ b na n lebg n waame wã, b bɛɛ?"

⁵ Sɩd me, yaa ne yamleoog la b yĩm tɩ wakat sẽn looge, saasẽ la tẽng zĩndame. Wẽnnaam gomame tɩ tẽng puk koomã sʋka, la yɩɩ koomã la Wẽnnaam kɩt tɩ lebg tẽnga.

⁶ La b yĩmame tɩ tẽngã Wẽnnaam sẽn naan a woto wã, yaa ko-kãsengã n leb n dɩ-a t'a sãame.

⁷ La ne gom-kãng bala, saasẽ la rũnna dũni wã bĩnga bugum yĩnga. B bĩng-b-la b sẽn na n kao nin-wẽnsã bʋʋd n kɩt tɩ b sãamã daar yĩnga.

⁸ Mam zo-nongdse, bũmb a yen n be yãmb sẽn ka tog n yĩm ye, yaa tɩ ne Zu-soabã, daar a yen yaa wa yʋʋm tusri, la yʋʋm tusr yaa wa daar a yen.

⁹ Wẽnnaam ka basd tɩ bãmb sẽn kãabã kaoos n pids wa neb kẽer sẽn tagsdã ye. La yaa tɩ bãmb maanda sũ-mar ne yãmba, b sẽn ka rat tɩ ned baa a yen sãama yĩnga. Bãmb ratem yaa tɩ yãmb fãa tek yam n kos sugri.

¹⁰ Zu-soabã daar na n waa wa wagdre. Badaare, saasẽ na n looga ne bʋr-kãsenga. Bugma sẽn kok teed ninsã na n yẽnegame, la dũni wã ne bũmb nins sẽn be a pʋgẽ wã na n dɩɩ bugum.

¹¹ Rẽ wã yĩnga, bõn-kãensã fãa sẽn na n wa n yẽnegã yĩnga, ges-y tɩ yãmb yel-manesmã ne y Wẽnnaamã tũub yɩ sõama!

¹² Gũu-y-yã, la y modg n kɩt tɩ Wẽnnaam daarã wa tao-tao. Yaa daar ning saasẽ sẽn kok bugmã sẽn na n yẽneg tɩ teedã fãa sẽn kok bugum na n yẽnegã.

¹³ La tõnd gũuda Wẽnnaam sẽn pʋlem saasẽ paalg la dũni paalgã, tɩ tɩrlem na n zĩnd a pʋgã.

¹⁴ Mam zo-nongdse, gũudum kãngã pʋgẽ, modg-y tɩ bãmb na mik tɩ yãmb ka tar rẽgdo, la tɩ y ka tar bũmb sẽn ka zemse, la tɩ y bee laafɩ pʋga.

¹⁵ Bãng-y tɩ tõnd Zu-soabã sẽn maand sũ-marã, yaa tɩ yãmb na paam fãagre, wa tõnd ba-bi-nongr a Poll sẽn gʋls me n wilg yãmb wa sẽn zems yam ning Wẽnnaam sẽn kõ yẽnda wã.

¹⁶ A Poll maanda a woto a sɛbã fãa pʋse, sɛbã a sẽn gʋls n gomd bõn-kãens yelle, la sẽn tar koees b wʋmb sẽn ya toogo, tɩ neb nins sẽn ka mi wã, la sẽn nan ka kɩ-b yẽgã toeemd b võor wa b sẽn toeemd gʋls-sõmyã fãa võor tɩ gõdg n sãamd-bã.

¹⁷ Woto yĩnga, m ba-bi-nongdse, yãmb sẽn pĩnd n paam tɩ b keoog yãmbã, maan-y gũusgu, tɩ neb nins toog sẽn ka be ne Wẽnnaam sakrã bʋdgrã da wa tus yãmb tɩ y ka leb n yas kãenkãe yɛs ye.

¹⁸ Bɩ yãmb bɩ tõnd Zu-soaba la d Fãagd a Zezi Kirist barkã pʋgẽ, la y bãngd-b yellã n paasdẽ. Bãmb n so ziir sẽn sɩng ne moasã hal tɩ ta wakat sẽn kõn sa.