1

¹ Maam a Pɩyɛɛr sẽn ya a Zezi Kirist tẽn-tʋmdã n tʋmd seb-kãngã Wẽnnaam nin-tũusdsã sẽn sãeeg n be Põ la Galasi la Kapados la Azi ne Bitini soolem n lebg sãamb beene wã.

² Yãmb yaa tõnd ba a Wẽnnaam neb b sẽn tũusi, wa sẽn zems bãmb sẽn pĩnd n bãngã, tɩ Sɩɩg-sõng welg-y toor tɩ y zĩnd pʋ-peelem n yɩ sakdb n paam t'a Zezi zɩɩmã pek yãmba. Bɩ y paam bark la laafɩ wʋsgo.

³ Pẽgr Wẽnnaam ning sẽn ya tõnd Zu-soab a Zezi Kirist ba. Bãmb nimbãan-zoeerã sẽn ya kãsengã yĩnga, b kõo tõnd dogem paalg a Zezi Kirist sẽn vʋʋg n bas kũuma maasem yĩnga, tɩ tõnd tar tẽeb pidsg gũudum

⁴ sẽn vɩ, la d paam dogem-pʋɩɩr sẽn ka tõe n sãame, wall rẽgme, wall zelg ye. La b bĩng-a-la arzãn pʋg yãmb yĩngã,

⁵ yãmb tẽebã yĩnga, Wẽnnaam pãngã zãada yãmba, tɩ yãmb na paam fãagr ning sẽn segl n sɛ, n na n puk yaoolem wakatã.

⁶ Yãmb maanda sũ-noog bõn-kãng yĩnga, baa ne sẽn ya tɩlɛ tɩ yãmb paam makr buud toay-toay sẽn namsd yãmb moasã wakat bilf yĩngã.

⁷ Yaa sẽn na yɩl n mak yãmb tẽeba n bãng a sẽn ya a soaba. Sãnem yaa bõn-sãamdga, la baoosgo b makd-a-la ne bugum n getẽ. La yãmb tẽebã sẽn tar yõod wʋsg n yɩɩd sãnemã, b makd-a lame n getẽ, t'a Zezi Kirist waoongã daare, bɩ y paam pẽgre la ziiri ne waoogre.

⁸ Baa ne yãmb sẽn nan ka yã a Zezi Kiristã, yãmb nonga bãmba. Baa yãmb sẽn nan ka yã bãmbã, yãmb tẽeda bãmba, n maand sũ-noog noor sẽn ka tõe n togse, la sẽn tar ziiri.

⁹ Bala, yãmb paama y sɩɩsã fãagr tɩ yɩ y tẽebã keoore.

¹⁰ Wẽnnaam no-rɛɛsdbã sẽn pĩnd n togs bark ning Wẽnnaam sẽn da bĩng yãmb yĩngã baoome la b vees n na n bãng fãag-kãnga võore.

¹¹ Wẽnnaam no-rɛɛsdbã maoome, n bao n na n bãng Kirist Sɩɩgã sẽn be bãmb pʋsẽ wã sẽn pĩnd n gomd Kirist namsgã, ne b waoongã sẽn na n pʋglã sẽn n na n yɩ wakat ninga, la sẽn na n tũ ne bũmb ninga.

¹² La Wẽnnaam vẽnega b no-rɛɛsdbã tɩ b bãng tɩ bãmb sẽn deeg koɛɛg ningã ka bãmb mens yĩng ye, la yaa yãmb yĩnga la b ya bõn-kãens tʋmtʋmdba. Moasã, neb nins sẽn moon yãmb koe-noogã togsa yãmb bõn-kãens ne Sɩɩg-sõng sẽn yi arzãnã pãnga, la baa malegsã mens datẽ lame n wʋm a võore.

¹³ Yaa woto yĩnga, yõk-y y tagsgo, yɩ-y gũus-m-mens-rãmba, la y paam tẽeb pidsg gũudum sẽn ya sõama zãng ne bark ning b sẽn na n kõ yãmb Kirist waoongã wakatã.

¹⁴ Bɩ y yɩ kom-sakdse, la y da sak wẽng ratem nins yãmb sẽn dag n sak wakat sẽn looge, y sẽn da be y zɩɩlmã pʋg ye.

¹⁵ La soab ning sẽn bool-a yãmbã sẽn ya sõama wã yĩnga, bɩ yãmb me welg toor n yɩ sõama y yel-manesem buud fãa pʋgẽ.

¹⁶ Bala, Wẽnnaam gʋls-sõamyã yetame yaa: Bɩ y yɩ pʋ-peelem dãmba, bala, mam yaa pʋ-peelem soaba.

¹⁷ Yãmb sã n pʋʋsd Wẽnnaam ning sẽn ka tũusd nebã, la sẽn kaood ned kam fãa bʋʋd wa sẽn zems a tʋʋmdã, bɩ y kẽn ne gũus-m-menga, yãmb sẽn ket n be dũni zug wakate.

¹⁸ Sɩd me, yãmb miime tɩ ka ne bõn-sãamds sẽn wẽnd ligdi, wall sãnem, la b fãag yãmb n yiis vɩɩmã minind nins sẽn ka yõodã yãmb sẽn deeg y yaab-rãmba nengẽ wã pʋgẽ ye.

¹⁹ La yaa ne Kirist zɩɩma sẽn ya sõama wʋsgã, Kirist yɩɩ wa pe-bil sẽn ka tar yelle, la sẽn ka

²⁰ tar bãnde, Wẽnnaam dag n pĩnd n yãka Kirist sẽn deng dũni naanego, la b waa yãmb yĩnga, yaoolem zamaana pʋgẽ.

²¹ Kirist maasem yĩnga, yãmb tẽeda Wẽnnaam ning sẽn vʋʋg-a Kirist n bas kũum la b kõ-b waoogrã. Sẽn na yɩl tɩ yãmb tẽebã ne y teegrã zĩnd ne Wẽnnaam.

²² Yãmb sẽn sak sɩdã n yɩlg y mensã, sẽn na n yɩlẽ n paam nonglem meng-meng ba-biisã yĩngã, bɩ y nong taab wʋsg ne y sũyã fãa,

²³ yãmb sẽn paam rog-paalgã yĩnga, ka bõn-buud sẽn sãamd n kɩt tɩ yãmb paam dogem paalgã ye, la yaa bõn-buud sẽn ka sãamda, yaa Wẽnnaam goamã sẽn vɩ n paad wakat sẽn kõn sa wã.

²⁴ Bala, Ninsaal fãa wẽnda wa moodo, la a waoogrã fãa wẽnda wa mo-pui. Mood kʋɩtame la mo-pui sʋʋgdame

²⁵ La Zu-soabã goam paada wakat sẽn kõn sa. Yaa koe-kãng la koe-noogã b sẽn togs yãmbã.

2

¹ Dẽ yĩngã, bas-y pʋ-toog fãa, la sɩlem fãa, la zãmbo, la sũ-kiiri, la paoogr goam buud fãa.

² Yɩ-y wa kom-peelse, n tʋlg Wẽnnaam goamã sẽn ya wa bĩisim sẽn ka pulã, t'a bɩɩs yãmb tɩ y paam fãagre,

³ sã n yaa tɩ yãmb pẽnega Zu-soabã n bãng tɩ b yaa sõama.

⁴ Kolg-y Zu-soab a Zezi sẽn ya "kug-vɩɩg" ninsaalbã sẽn zãgsã, la sẽn ya kugr Wẽnnaam sẽn yãke, la sẽn be yõod bãmb taoorã.

⁵ La yãmb mens sẽn wẽnd kug-vɩɩsã, me-y y mens tɩ yɩ Sɩɩg-sõng roogo, la maan-kʋʋdb sẽn ya sõama, n kõt Wẽnnaam maoong sẽn ya Sɩɩg-sõng rẽnda, n tat Wẽnnaam yam a Zezi Kirist maasem yĩnga.

⁶ Bala, Wẽnnaam gʋls-sõamyã pʋgẽ b yeelame yaa: Ade, mam dɩgenda kugr sẽn tar pãng Siyõ pʋgẽ, mam sẽn yãke, la m sẽn waooge. La ned ning sẽn tẽed-a kug-kãnga, a kõn paam yãnd ye.

⁷ Dẽ yĩnga, bãmb kug-kãng bee yõod wʋsg ne yãmb sẽn tẽedã, la ne neb nins sẽn ka tẽedã, kugr ning tãn-metbã sẽn zagsã, kug-kãng lebga roogã pãng kugri, a soakã zĩigẽ. La a yaa kug-lakdg nebã yĩnga. La pĩig sẽn lubd nebã.

⁸ Bãmb lakda kug-kãnga, b sẽn ka sakd Wẽnnaam goamã yĩnga. La Wẽnnaam dag n pĩnd n miime tɩ na n yɩɩ a woto ne-ba.

⁹ La yãmb yẽ, yãmb yaa buud b sẽn tũusi, la naam maan-kʋʋdba, la buud sẽn welg toor Wẽnnaam yĩnga, neb Wẽnnaam sẽn da tɩ y moon n wilg sẽn bool-a yãmb n yiis likã pʋgẽ, n kẽes-y vẽenem sẽn be ziirã pʋgã tʋʋm sõama wã.

¹⁰ Pĩnda, yãmb dag n ka Wẽnnaam neb ye, la moasã, yãmb yaa Wẽnnaam neba. Yãmb sẽn dag n ka paam nimbãan-zoeerã, moasã, yãmb paama nimbãan-zoeere.

¹¹ Mam zo-nongdse, yãmb sẽn ya sãamb la kaoos-wetã, mam sagenda yãmb tɩ y da sak yĩngã ratem wẽnsã sẽn zabd ne sɩɩgã ye.

¹² Paam-y yel-manesem sẽn ya sõama neb nins sẽn ka pʋʋsd Wẽnnaamã sʋka, tɩ baa b sẽn dõt yãmb zĩig ning fãa n yetẽ tɩ y yaa tʋʋm wẽns maandbã, bɩ b yã yãmb tʋʋm sõama wã n waoog Wẽnnaam, b waoongã daare.

¹³ Zu-soabã maasem yĩnga, sak-y dũniyã nebã tõod fãa, sã n ya rĩm-dãmba sẽn so pãnga,

¹⁴ sã n ya nanams rĩmã sẽn tʋm tɩ b sɩbg neb nins sẽn maand wẽngã, la b waoog neb nins sẽn maand neerã.

¹⁵ Bala, yaa Wẽnnaam daab tɩ yãmb sẽn maand neerã, y na kɩt tɩ yalemb bas b zɩɩlem goamã.

¹⁶ Kẽn-y wa burkĩmba, la y ra sak tɩ yãmb lohormã yɩ pʋ-toog lillidg ye. Bɩ y tʋm wa Wẽnnaam tʋmtʋmdba.

¹⁷ Waoog-y neba fãa. Nong-y y ba-biisã, la y zoe Wẽnnaam. Waoog-y rĩma.

¹⁸ Tʋmtʋmdba, sak-y y zu-soben-dãmba la y zoe-ba. La ka zu-soben-dãmb nins sẽn ya nin-sõama la sũ-bʋgsem dãmbã bal ye. Sak-y neb nins sẽn ya

¹⁹ nin-toosã me. Bala, ned sã n sak namsg sẽn ka zems ne-a, a sẽn sakd Wẽnnaam yĩnga, yõwã bee barka.

²⁰ Sɩd me, yãmb sã n sak tɩ b nams yãmb y sẽn maan yel-wẽnd yĩnga, bõe waoogr n be be? La yãmb sã n maan tʋʋm sõama n sak namsg bõn-kãens yĩnga, yõwã bee bark Wẽnnaam taoore.

²¹ Sɩd me, yaa bõn-kãng yĩng la b bool yãmba. Tɩ bõe, Kirist me namsa yãmb yĩnga, n bas mamsg ne yãmba, tɩ y tũ bãmb naowã.

²² Bãmb ka tol n maan yel-wẽnd ye, la b ka tol n wʋm zĩrĩ goam sẽn yi bãmb noorẽ ye.

²³ Neb tʋʋ bãmba, la b ka tʋʋs n lebs ye. Neb namsa bãmba, la b ka zab ne-b ye. B basa b yɛlã sẽn kaood-a bʋʋd tɩrgã nugẽ.

²⁴ Kirist meng n deeg tõnd yel-wẽnã b yĩngã pʋgẽ da-pɩkã zugu, tɩ tõnd sẽn ya wa kũum yel-wẽnã wɛɛngẽ wã, tõnd na vɩɩmd n maan tɩrlem. Yaa bãmb poglgã yĩng la yãmb paamd maagre.

²⁵ Bala, yãmb dag n wẽnda piis sẽn meneme, la moasã, yãmb lebgame n wa y sɩɩsã pe-kɩɩma la b guudã nengẽ.

3

¹ Woto me, pagba, bɩ yãmb ned kam fãa sak a sɩda, tɩ baa bãmb neb kẽer sẽn ka sakd Wẽnnaam koɛɛgã, bɩ b

² sẽn yãt b pagbã yel-manesmã sẽn ya sõama wã, la sẽn waoogd bãmbã, kɩt tɩ b sak Wẽnnaam, tɩ ka tũ ne goam ye.

³ Da bao-y neerem ning ninã sẽn tõe n yã wã bala, sẽn ya zut pãnengo, wall sãnem faon-teedo, wall nagem fut yeelgr ye.

⁴ La yãmb tog n baoo neerem ning sẽn solge, n be ned kam fãa sũurẽ, la sẽn ka sãamdã, sẽn ya sũ-bʋgsem sɩɩga, la sũ-maasem. Ade, yaa bõn-kãensã n tar yõod wʋsg Wẽnnaam nifẽ.

⁵ Kʋdemd wakate, pʋg-sõama nins sẽn da tẽed Wẽnnaamã dag n manegda b mens a woto, n sakd b sɩdba.

⁶ Rẽndã n kɩt t'a Sara dag n sakd a Abraham n boond-a t'a Zu-soaba. Yãmb sã n maan tʋʋm sõama, n ka sak n bas tɩ bãmb kẽes yãmb dabeem, yãmb lebga a Sara kom-pugli.

⁷ Woto me, raopa, bɩ yãmb ned kam fãa vɩɩmd ne a paga, la y bãng tɩ bãmb yaa neb sẽn ka tar pãng wa yãmb ye. Maan-y-b wa sẽn zemse, n nand-ba, bala, b yaa pʋɩt-n-taas ne yãmba, vɩɩm ning Wẽnnaam sẽn kõ wã pʋgẽ, maan-y-yã a woto tɩ bũmb baa fʋɩ ra wa gɩdg yãmb pʋʋsg ye.

⁸ Sẽn na n baase, bɩ yãmb fãa paam tagsg a yembre, la yam a yembre. Paam-y nonglem y ba-biis yĩnga, la y pid ne nimbãan-zoeere la sik-m-menga.

⁹ Da lebs-y ned wẽnga, a sẽn maan yãmb wẽng yĩng ye, la y ra tʋʋs n lebs b sẽn tʋʋs yãmb yĩng ye. Da maan-y-yã a woto ye. Bɩ y lebs barka, bala, yaa bõn-kãng yĩng la b bool yãmb tɩ y na paam bark tɩ yɩ y pʋɩɩre.

¹⁰ Wẽnnaam gʋls sõama yetame yaa: Sɩd me, ned sã n dat t'a vɩɩm yɩ-a noogo, la a paam sũ-noog a vɩɩm wakate, bɩ a gũus t'a zelemd da gom wẽng ye la a ra sak t'a noor gom zĩrĩ goam ye.

¹¹ Bɩ a zãag a meng ne wẽnga, la a maan neere, bɩ a bao laafɩ ne nebã, la a pʋg laafɩ wã.

¹² Bala, Zu-soabã geta nin-tɩrse, bãmb kelgda nin-tɩrs pʋʋsgo, la b wẽnemdeda b neng n basd neb nins sẽn maand wẽngã.

¹³ Yãmb sã n wɩngd ne tʋʋm sõama maanego, ãnna n na n maan yãmb wẽnga?

¹⁴ La baa yãmb sã n paamd namsg tɩrlem yĩnga, yãmb na paam sũ-noogo. Da zoe-y ninsaalbã sẽn zoet bũmb ningã ye, la y ra sãam y sũy ye.

¹⁵ Bɩ y waoog Kirist sẽn ya yãmb Zu-soabã, y sũyã pʋsẽ. Bɩ y yɩ neb sẽn tõe wakat fãa, n leokd neb nins sẽn sokd yãmb n dat n bãng y tẽebã yellã ne sũ-maasem la ne sik-m-menga.

¹⁶ Paam-y sũur kaset sõngo, tɩ baa sẽn ya zĩig ning fãa, bɩ neb nins sẽn kãnegd-b yãmbã, n gomd yãmb wẽng Kirist tũudmã pʋgẽ wã paam yãnde.

¹⁷ Bala, sã n taa Wẽnnaam yam tɩ tõnd paam namsg d sẽn maan neer yĩnga, yõwã n ya sõama n yɩɩd tõnd sẽn na n paam namsg d sẽn maan wẽng yĩnga.

¹⁸ Sɩd me, Kirist me kii vugr bal yel-wẽna yiisg yĩnga. Bãmb sẽn ya nin-tɩrgã, b kii ka-tɩrlem dãmbã yĩnga, sẽn na yɩl n tall yãmb n ta Wẽnnaam nengẽ. B kʋʋ bãmb yĩngã, la Sɩɩg-sõng leb n kõo bãmb vɩɩm.

¹⁹ La Sɩ-kõng maasem yĩnga, bãmb kẽnga kɩɩm-kulg me n tɩ moon koɛɛgã sɩɩs nins b sẽn da balgã sʋka.

²⁰ Bãmb yaa neb nins sẽn yɩ kɩɩsdb wakat sẽn looge, Wẽnnaam sẽn maan sũ-mar n kaoos wakat ning a Nowe sẽn maan koom koglgã tɩ neb bilfu, dat n togs tɩ neb a nii wã kẽe a pʋgẽ n põs koomã.

²¹ Rẽndã ra mamsda koom lisg ning sẽn fãagd yãmb rũnna-rũnna wã. Yaa lisg sẽn ka yĩng rẽgd yiisg yĩng ye, la yaa kosg sẽn kot Wẽnnaam ne sũur kaset sẽn ya sõama, a Zezi Kirist sẽn vʋʋg n bas kũumã maasem yĩnga.

²² A Zezi Kirist zẽk n bee arzãna, n be Wẽnnaam dɩtgo, la malɛk-rãmbã ne pãn-soaadbã, la pãens rãmbã sakda bãmba.

4

¹ Dẽ wã yĩnga, Kirist sẽn nams b yĩnga pʋgẽ wã yĩnga, bɩ yãmb me paam tagsg a yen ne bãmba. Bala, ned ning sẽn nams a yĩngã pʋg basa yel-wẽnã,

² tɩ wakat ning sẽn ket yẽ sẽn na n vɩɩmd a yĩngã pʋgã, yẽnda kõn leb n vɩ wa sẽn zems ninsaal datem ye, la a na n vɩɩmda wa sẽn zems Wẽnnaam datem.

³ Sɩd me, wakat sẽn looge, yãmb dag n maanda wa neb nins sẽn ka pʋʋsd Wẽnnaamã sẽn maandã. Yaa n sekame. Yãmb dag n kẽnda raglem pʋga, ratem wẽnse la yũ rãam n tuubdẽ wã pʋga, la rã-tɩgrã ne yão-beedã pʋga, la wẽn-naandsã pʋʋsg sẽn ya bõn-wẽng wʋsgã pʋga.

⁴ Yãmb sẽn ka le naagd neb nins sẽn ka pʋʋsd Wẽnnaamã n maand tʋʋm-dẽgd kãensã, a linga bãmb tɩ b kãnegd yãmba.

⁵ Bãmb na n yals n togsa b yɛlã soab ning sẽn segl n sɛ n na n kao nin-vɩɩs la kũum bʋʋdã taoore.

⁶ Sɩd me, yaa rẽ yĩng n kɩt tɩ b moon koe-noogã neb nins sẽn ki wã me, tɩ ninsaalbã sẽn kao bãmb bʋʋd wa sẽn zems yĩngã rẽndã, bɩ Wẽnnaam nifẽ bãmb na vɩ sɩɩg pʋgẽ.

⁷ Bũmb fãa sɛɛb wakat kolgame. Dẽ wã yĩnga, yɩ-y neb sẽn tar yam la gũus-m-mens-rãmba, n kẽng taoor ne pʋʋsgo.

⁸ La sẽn deng bũmb fãa, nong-y taab daar fãa. Bala, nonglem luta yel-wẽn wʋsgo.

⁹ Maan-y taab sãando, tɩ yẽgõng kaẽ ye.

¹⁰ Yãmb ned kam fãa sẽn deeg kũunã, rɩk-y-b n tʋm n sõng neb a taaba, wa Wẽnnaam barkã kũun toay-toayã yel-gɛtb sẽn ya sõama.

¹¹ Ned sã n gomda, bɩ a gom wa sẽn zemsd Wẽnnaam goamã sẽn yetã. Ned sã n sõngdẽ, bɩ a sõng wa sẽn zemsd pãng ning Wẽnnaam sẽn kõ-a wã, tɩ Wẽnnaam sẽn so ziiri la pãng wakat sẽn kõn sa wã paam waoogr bũmba fãa pʋga, a Zezi Kirist maasem yĩnga. Ãmina!

¹² Mam zo-nongdse, ra sak-y tɩ nams-toaag ning sẽn be yãmb sʋk n makd yãmbã yɩ lingr ne yãmba, tɩ ya wa yaa yel-sãang n paamd yãmb ye.

¹³ Ka tog n yɩ a woto ye, maan-y sũ-noogo, yãmb sẽn paam pʋɩɩr ne Kirist namsgã yĩnga, tɩ yãmb tõe n maan sũ-noog n kɩdem wakat ning bãmb ziirã sẽn na n pukã.

¹⁴ B sã n nams yãmb Kirist yʋʋrã yĩnga, y zug yaa noogo, bala, Sɩɩg ninga sẽn be ziirã sẽn ya Wẽnnaam Sɩɩgã bee yãmb zutu.

¹⁵ Bɩ yãmb ned baa a yen da paam namsg a sẽn ya nin-kʋʋd yĩnga, wall wagdr yĩnga, wall tʋʋm-wẽns maand yĩnga, wall a sẽn ya ned sẽn kẽed yɛl sẽn ka pak-a yĩng ye.

¹⁶ La ned sã n paamd namsgo, a sẽn ya Kirist tẽed yĩnga, bɩ a ra zoe yãnd ye, a pẽg Wẽnnaam, b sẽn boond yẽ tɩ Kirist tẽedã yĩnga.

¹⁷ Bala, moasã yaa wakat b sẽn na n sɩng bʋʋdã kaoob ne Wẽnnaam nebã. La sã n mikame tɩ yaa ne tõnd la b na n sɩng bʋʋdã kaoobo, neb nins sẽn ka sakd-b Wẽnnaam koe-noogã baoosg na yɩɩ a wãna?

¹⁸ La sã n yaa tɩ nin-tɩrg fãagr paoong yaa toogo, dẽ ned ning sẽn ya wẽn-kɩɩsd la yel-wẽn-maandã yell na n yɩɩ a wãna?

¹⁹ Rẽ wã yĩnga, bɩ neb nins sẽn paamd namsg wa sẽn zems Wẽnnaam tʋlsmã rɩk b sɩɩsã n bas Wẽnnaam sẽn ya naanda la sɩd soabã nugẽ, n kell n maan neere.

5

¹ Dẽ, mam sagenda kãsem-dãmbã sẽn be yãmb sʋkã, mam me sẽn ya kãsem wa bãmbã, la m ya Kirist namsgã kaset soabã, la m ya pʋɩt-n-taag ne Kirist ziirã sẽn na n wa pukã yĩnga.

² Rɩlg-y Wẽnnaam piisã sẽn be ne yãmbã. La ka ne modgr ye, yaa ne yamleoogo wa sẽn zems Wẽnnaam daabã. La ka paoong ratem yĩng ye, yaa ne sũur sẽn ya sõama.

³ La ka tɩ y soog nebã b sẽn gũneg yãmbã ne pãng ye, la yaa tɩ yãmb na yɩ mamsg wʋsg piisã yĩnga.

⁴ La Pe-kɩɩmbã kãsem sã n wa puki, yãmb na n paama maanf sẽn tar ziiri, la sẽn ka sãamd ye.

⁵ Woto me, kom-bɩɩse, sak-y kãsem-dãmbã. La bɩ yãmb fãa paam sik-m-menga, yãmb ne taab sʋka. Bala, Wẽnnaam kɩɩsda wuk-m-mens rãmbã, la b ningd sik-m-mens rãmbã zut barka.

⁶ Dẽ wã, sik-y y mens Wẽnnaam sẽn ya pãng soabã taoore, tɩ bãmb tʋlsma wakat sã n ta, bɩ bãmb zẽk yãmba.

⁷ Sik-y yãmb yɩɩrã fãa n bas ne bãmba, bala, bãmb n get yãmb yelle.

⁸ Yɩ-y neb sẽn tar yam! Gũus-y-yã! Yãmb bɛyã sẽn ya a Sʋtãan gõodame n kelemd wa gɩgemde, n baood a sẽn tõe n paam a soab n sãame.

⁹ Kɩɩs-y-yã-a, n yals tẽebã pʋg kãenkãe, la y bãng tɩ namsg a woto buud me namsda yãmb ba-biisã sẽn be duniyã pʋgã.

¹⁰ Yãmb sã n nams wakat bilf pʋgẽ, Wẽnnaam sẽn so bark fãa wã, sẽn bool-a yãmb tɩ y wa paam pʋɩɩr ne ziir ning sẽn kõn sa a Zezi kirist maasem yĩngã, bãmb menga na n zãmsa yãmba, n paas yãmb pãnga, n kɩt tɩ yãmb kɩ yẽga, la b kɩt tɩ yãmb yɩ neb sẽn ka vigsd ye.

¹¹ Bɩ pãngã yɩ bãmb dẽnd zamaan o zamaane! Ãmina.

¹² Yaa ne tõnd ba-biig a Sɩlvẽ sẽn ya sɩd soabã nug la mam gʋlsd seb-bi-kãngã n na n tʋm yãmba, la m sagl-yã, la m wilg-y tɩ yãmb sẽn be bark ning pʋgã n ya Wẽnnaam bark meng-menga.

¹³ A Zezi tẽedbã sẽn be Babilonna, ne m biig a Mark me pʋʋsda yãmba.

¹⁴ Pʋʋs-y taab n mok taab ne nonglem mokre. Bɩ Yãmb fãa sẽn tũud Kiristã paam laafɩ!