1

¹ Wẽnnaam la Zu-soab a Zezi Kirist tẽn-tʋmd a zak n gʋlsd buud piig la a yiibã sẽn sãeegã, n pʋʋsd-ba.

² M ba-biisi, makr buud toay-toay sẽn tõe n paam yãmbã, ges-y-b wa bũmb sẽn wat ne yãmb sũ-noog zãnga,

³ yãmb sẽn mi tɩ y tẽebã makr wata ne sũ-marã yĩnga.

⁴ La yaa tɩlɛ tɩ sũ-mar maan a tʋʋmd sẽn zems zãnga, tɩ yãmb zẽms zãnga la y yɩ neb sẽn bɩ, la tɩ bũmb da paoog yãmb ye.

⁵ Yam sã n paoog yãmb ned a yembre, bɩ a kos Wẽnnaam sẽn kõt nebã fãa ne yamleoog n ka lengdẽ wã, la b na kõ-a yamã.

⁶ La a sã na n kos bɩ a kos ne tẽeb n da sãmb ye: Bala, ned ning sẽn sãmbd wẽnda wa ko-kãseng ko-pɛm sobg sẽn lengd la a zẽkdẽ.

⁷ Bɩ ned a woto da tags t'a na n paama bũmb Zu-soabã nengẽ ye.

⁸ A yaa ned sẽn ya yam a yiib soaba, t'a yam yuusd a sẽn maandã fãa pʋgẽ.

⁹ Bɩ ba-biig sẽn ya naong soab maan sũ-noog ne Wẽnnaam sẽn waoog-a wã.

¹⁰ La bɩ arzɛk soab maan sũ-noog ne Wẽnnaam sẽn ning yẽ paoogr zĩigẽ wã. Bala, yẽ na n looga wa mood puudu.

¹¹ Wĩntoog zẽkame tɩ zĩig fãa wɩnge. A kʋɩɩsa moodã, la a puudã sʋʋgame, la a rasãndã menemame. Arzɛk soab me na n zelga a woto a tʋʋma pʋse.

¹² Ned ning sẽn yas kãenkãe makr pʋgẽ la sũ-noog soaba. Bala, makrã zugẽ, a na n paama vɩɩm sẽn ya keoor Zu-soabã sẽn kãab neb nins sẽn nong bãmbã.

¹³ Bɩ ned baa a yen sẽn paamd makr da yeel tɩ yaa Wẽnnaam n makd yẽ ye. Bala, wẽng ka tõe n mak Wẽnnaam, la bãmb mengã ka makd ned baa a yembr ye.

¹⁴ La ned kam fãa paamda makre, a mengã ratem sẽn tusd-a n belgd-a wã yĩnga.

¹⁵ La yĩngã ratem sã n dɩk pʋga, a rogda yel-wẽnde. La yel-wẽndã sã n wa n bɩ, a wata ne kũum.

¹⁶ M ba-bi-nongdse, da tudg-y y mens ne yel-kãng ye:

¹⁷ Kũun-sõng fãa la kũun sẽn zems zãng fãa yita yĩngri, vẽenem ba wã nengẽ. Tekre, wall toeoong ka be bãmb pʋgẽ baa bilf ye.

¹⁸ Bãmb n dog tõnd wa sẽn zems b raabo, sɩd-goamã maasem yĩnga, tɩ tõnd na lʋɩ bãmb bõn-naandsã fãa taoore.

¹⁹ M ba-bi-nongdse, bãng-y yõwã neere: Woto, bɩ ned fãa wɩng ne kelgre, la a maag ne goama, la a maag ne sũ-yikri.

²⁰ Bala, ninsaal sũ-yikr ka wat ne tɩrlem Wẽnnaam nifẽ ye.

²¹ Yaa woto yĩnga, bas-y rẽgd buud fãa, la pʋ-toog fãa, la y reeg gomd ning b sẽn bʋd yãmb pʋgẽ la sẽn tõe n fãag yãmb sɩɩsã ne sũ-bʋgsem.

²² Yɩ-y koe-sakdba, la y ra yɩ koe-kɛlgdb bala, n belgd y mens ne tagsd sẽn ka sɩd ye.

²³ Bala, ned sã n kelgd gomdã n ka sakdẽ, a soab wẽnda wa ned sẽn get a meng nin-gɛtgẽ,

²⁴ la a sã n ges n sa, a loogdame, la tao-tao bala a yĩmda a sẽn dag n ya to-to.

²⁵ La ned ning sẽn get tõog sẽn zems zãngã, sẽn ya lohorem tõogã, la a maoodẽ, n ka kelgd bal la a yĩmdẽ wã, la a maood n sakdẽ wã, soab kõng na paam Wẽnnaam bark a sẽn maandã pʋgẽ.

²⁶ Ned sã n tẽed t'a yaa wẽn-tũuda, n yaool n ka tõe a zelemde, a belgda a menga, la nin-kãng wẽn-tũudma yaa zaalem bala.

²⁷ Ba a Wẽnnaam taoore, wẽn-tũudum sẽn ya yolemde, n ka tar wada, yaa tɩ kẽng n ges kɩɩbse la pʋgkõap b sũ-sãamsã pʋse, la tɩ gũus f meng ne dũni rẽgdo.

2

¹ M ba-biisi yãmb sẽn tẽed tõnd Zu-soab a Zezi Kiristã, sẽn so-a ziirã, bɩ y ra tũus neb ye.

² Ned sẽn pid sãnem nugbĩnga la a yer naam fut sã n kẽ yãmb kaorengo, tɩ naong soab me sẽn yer nimbãan-fut me kẽ,

³ yãmb sã n waoog ned ning sẽn yer-a naam futã n yeel-a: Fo wa n zĩnd waoogr zĩ-kãnga wã, la y yeel naongã soaba: Fo yals yĩngr be, wall f yeel: Zĩnd tẽng mam naoẽ wã.

⁴ Dẽ yĩnga, yãmb ka tũusd neba, la y ya bʋ-kaoodb sẽn tar tags-wẽnse?

⁵ M ba-bi-nongdse, kelg-y-yã! Dẽ yĩnga, Wẽnnaam ka tũus neb nins dũni sẽn get wa naong rãmbã n kɩt tɩ b yɩ arzegs rãmba la b na n soog soolem ning bãmb sẽn kãab neb nins sẽn nong-b bãmbã yĩng sɩda?

⁶ La yãmba, yãmb paooga naong soabã. Dẽ yĩnga, arzegs rãmbã ka weoogd yãmb la b tar yãmb n kẽnd bʋʋd zĩisẽ sɩda?

⁷ Dẽ yĩnga, ka bãmb n paoogd yʋ-sõng ning Wẽnnaam sẽn kõ yãmbã?

⁸ Sɩda, yãmb sã n sakd Wẽnnaam soolem tõog sẽn be gʋls-sõamyã pʋgẽ, n yetẽ tɩ: Nong f to wa f mengã, yãmb maanda neere.

⁹ La yãmb sã n get nebã n tũusd-ba, yãmb maanda yel-wẽnde, la tõogã kɩtame tɩ yãmb bãng tɩ y beegame.

¹⁰ Bala, ned ning fãa sẽn sak-a tõodã fãa, n yaool n maan yel-wẽnd n kɩɩs a yen tãa, a lebga bɛɛgd ne tõodã fãa.

¹¹ Soab ning sẽn yeel tɩ: Ra yo wã, soab kãng me n yeel tɩ: Ra kʋ wã. La fo sã n ka n maan yoobo, n yaool n kʋ neda, fo lebga tõog kɩɩsda.

¹² Gom-y la y tʋm wa neb b sẽn na n tall lohorem tõog n kao b bʋʋdo.

¹³ Bala, ned sã n ka tar nimbãan-zoeere, bʋʋdã me ka na n zoe a nimbãaneg ye. Nimbãan-zoeer tõogda bʋʋdo.

¹⁴ M ba-biisi, ned sã n yet t'a tara tẽeb n yaool n ka tʋmdẽ, a yõod yaa bõe? Dẽ yĩnga, tẽ-kãng tõe n fãagame?

¹⁵ D ba-bi-raoog bɩ d ba-bi-poak sã n ya beelle, tɩ daar fãa bɩ a ka tar dɩɩb n dɩtẽ,

¹⁶ tɩ yãmb ned a yembr yeel-a yaa: Kẽng-y ne laafɩ, yiis f waoodo, la f rɩ n tɩge, n yaool n ka kõ-a bũmb ning a sẽn tog n paam a sõngr yĩnga, gom-kãng yõod bee yɛ?

¹⁷ Yaa a woto me ne tẽebã. Tẽeb sã n ka naag ne tʋʋma, a mengã yaa kɩɩnga.

¹⁸ La nina na n yeelame: Fo tara tẽebo, la mam tʋmdame. Wilg maam f tẽeb tɩ tʋʋm ka tũ ye, la mam na n talla m tʋʋma n wilg foom m tẽebo.

¹⁹ F tẽedame tɩ Wẽnnaam a yen bal n be. Yaa sõama. Zĩn-dãmbã me tẽedame, la b rigda ne rabeem.

²⁰ Yam ka sek soaba, fo rat n bãngame tɩ tẽeb sẽn ka naag ne tʋʋm ka yõod laa?

²¹ Ka ne tʋʋm la tõnd ba a Abraham paam tɩrlem, a sẽn ning a biribl a Izak tẽn-kugr zug n kõ Wẽnnaamã laa?

²² Fo neeme tɩ tẽeb n dag n naag ne a tʋʋmã, la a tʋʋmã yĩnga, Wẽnnaam kɩtame t'a tẽebã zems zãnga.

²³ Woto, Wẽnnaam gʋls-sõngã paama pidsgu. B yeelame yaa: A Abraham tẽe Wẽnnaam, la b gesa rẽnda wa tɩrlem a yĩnga. La b bool-a lame tɩ Wẽnnaam zoa.

²⁴ Yãmb neeme tɩ yaa ne tʋʋm la ned paamd tɩrlem, la ka ne tẽeb bal ye.

²⁵ Pʋg-yoodr a Rahaab me, ka ne tʋʋm yĩng la a paam tɩrlem a sẽn deeg Israyɛl gũusdbã, la a kɩt tɩ b tũ sor a to n loogã sɩda?

²⁶ Yĩng sã n ka naag ne sɩɩga, a yaa kũum. Woto me, tẽeb sã n ka naag ne tʋʋma a yaa kɩɩnga.

3

¹ M ba-biisi, bɩ yãmb neb wʋsg da bao tɩ lebg karen-saamb dãmb ye, bala, yãmb miime tɩ tõnd karen-saamb dãmbã bʋʋd na n yɩɩ toog n yɩɩda.

² Tõnd fãa tudgda ne tuudg buud wʋsgo. Ned sã n ka tudg ne a goama, a yaa ned sẽn zems zãnga, n tõe n gãd a yĩngã tõre.

³ Tõnd sã n ningd wiid noey salba tɩ b na sak tõndo, tõnd kɩtedame tɩ b yĩngã kẽnd tõnd sẽn datẽ.

⁴ Ges koom-kogl-bɛdã me, baa b sẽn ya bɛd to-to, tɩ sob-kãseng tusd-ba, yaa kom-koglg wẽnemdg-bil bal n kɩted tɩ koglgã teesd a soabã sẽn datẽ.

⁵ Woto me, zelemd yaa yĩngã wil-bil a yembre, la a waoogda a meng ne bũmb kãsemse. Ges-y bug-bil bal sẽn tõe n yõog we-kãsengã.

⁶ Zelemd me yaool n yaa bugum, a yaa wẽng zĩ-kãsenga. Zelemd bee tõnd yĩnga wila sʋka, a rẽgemda yĩngã tõre, la a wɩngda tõnd vɩɩmã tõr t'a lebg bas. A bugma yita bug-tẽnga.

⁷ Ninsaal wõra we-rũmsã buud fãa, liuuli buud fãa bõn-vuuds buud fãa, koomẽ rũms buud fãa, n kɩt tɩ b sakd yẽnda.

⁸ La ned baa a yen ka tõe n tõog a zelemd t'a sak-a ye. A yaa wẽng ned sẽn ka tõe n wõr n tõog ye. A pida ne zẽnem kʋʋdga.

⁹ Tõnd pʋʋsda Zu-soabã sẽn ya tõnd ba wã bark ne d zelemdã, la yaa ne yẽ me la tõnd kãabd neb nins Wẽnnaam sẽn naan n wẽneg b mengã.

¹⁰ Bark la kãab-wẽng yita noor a yembr pʋgẽ. M ba-biisi, a ka tog n yɩɩ a woto ye.

¹¹ Dẽ yĩnga, ko-noog ne ko-tood tõe n bula ko-nif a yembrẽ?

¹² Dẽ yĩnga m ba-biisi, kankang tõe n woma oliiv sɩda, bɩ nasaar-sãbg tõe n woma kankama? Ko-nif sẽn yiisd ko-yamsem ka tõe n yiis ko-noog ye.

¹³ Ãnna yãmb sʋkã n ya yam soaba, t'a yam weke? Bɩ a yel-manesem-sõngã wilg a tʋʋm sẽn yɩt ne bʋgsem la yam.

¹⁴ La sũ-ki-toaag sã n be yãmb sũuri, tɩ geesem-geesem me beẽ, da waoog-y y mense, la y da yag zĩrĩ n kɩɩs sɩdã ye.

¹⁵ Yam kãng ka yam sẽn yit yĩngr ye. A yita tẽng zug n ya yĩng rẽnda, la zĩn-dãmb dẽnda.

¹⁶ Bala, sũ-kĩir la geesem-geesem sẽn be zĩig ningã, zũnglug la maan wẽns buud fãa bee be.

¹⁷ Yam sẽn yit yĩngrã yaa sõama zãnga, la sẽn paase, a baooda laafɩ, a wata ne sũ-bʋgsem, la sugri, la a pida ne nimbãan-zoeere la bi-sõamyã fãa, la a ka be bakre la zãmb ye.

¹⁸ Tɩrlem bil bʋta laafɩ pʋgẽ, la yaa laafɩ baoodbã n bʋt-a.

4

¹ Maoorã ne zabã sẽn be yãmb sʋkã yita yɛ, sã n ka yãmb datem sẽn maood ne taab yãmb yĩngã wil pʋsẽ wã pʋgẽ?

² Yãmb get n datame la y ka paamd ye. Yãmb yaa nin-kʋʋdba la sũ-ki-neba, n yaool n ka tõe n paam baa fɩ ye. Yãmb zabdame la y maoodẽ, la y ka paamd ye, bõe yĩnga, yãmb ka kot ye.

³ Yãmb kotame la y ka paamd ye, bala bũmb ning yãmb sẽn tags n kosã ka sõama ye. Yãmb kotame n dat n tall n maan y yĩnsã sẽn datã.

⁴ Yãmb sẽn ya nin-yoaadbã, yãmb ka mi tɩ dũni nonglem yaa beem ne Wẽnnaam laa? Dẽ, ned sã n dat n yɩ dũni zoa, a yɩta Wẽnnaam bɛyã.

⁵ Yãmb tẽedame tɩ Wẽnnaam gʋls-sõamyã sẽn yet tɩ: Yaa ne sũ-kiir la Wẽnnaam nong sɩɩg ninga b sẽn kɩt tɩ b be yãmb pʋgẽ wã, b gomda zaalem laa?

⁶ La bãmb kõta bark sẽn yɩɩda, bala b gʋls-sõamyã yetame yaa: Wẽnnaam kɩɩsda tɩtaam-dãmbã la b ningda sik-m-mens-rãmbã zut barka.

⁷ Dẽ wã sak-y Wẽnnaam. Kɩɩs-y Sʋtãana la a na zoe n zãag ne yãmba.

⁸ Kolg-y Wẽnnaam, la bãmb na pẽneg yãmba. Yel-wẽn-maandba, nudg-y y nusã. Yam a yiib rãmbã, nedg-y y sũyã.

⁹ Bãng-y y nimbãanegã sẽn yaa a soaba, maan-y sũ-sãoongo, yãb-y-yã. Bɩ y laadã tek n lebg wiisgu, tɩ y sũ-noogã lebg sũ-sãoongo.

¹⁰ Sik-y y meng Zu-soabã taoore, la bãmb na zẽk yãmba.

¹¹ M ba-biisi, da gom-y taab yell wẽng ye. Ned ning sẽn gomd a ba-biig yell wẽnga, wall a kaood a bʋʋdo, a gomda tõogã yell wẽnga, la a kaood tõogã bʋʋdo. La fo sã n kaood tõogã bʋʋdo, fo ka tõ-sakd ye, fo yaa a bʋ-kaooda.

¹² Wẽnnaam b yen tãa n ya tõogã soaba, la bʋ-kaooda. Bãmb n tõe n fãag neda, bãmb n tõe n sãam-a. La fo yaa ãnna n kaood f to bʋʋdo?

¹³ Yãmb dãmb sẽn yet tɩ: Dũnna wall beoogo, tõnd na n kẽnga tẽn-kãnga, n zĩnd be yʋʋmde, n leeb n paam yõodo. Yaa yãmb la m gomd-ne.

¹⁴ Yãmb sẽn ka mi y vɩɩmã sẽn na n yɩ to-to beoogã, yãmb yaa walem sẽn zẽkd wakat bilf pʋgẽ bala, la a menemdẽ wã.

¹⁵ Yãmb tog n yeelame yaa: Zu-soabã sã n data, tõnd na vɩɩmde, la d na n maan woto wall woto.

¹⁶ La moasã, yãmb waoogda y mens y tɩtaamã pʋgẽ. Tɩtaam a woto buud fãa yaa wẽnga.

¹⁷ Ned sã n mi tɩ maan neere, n yaool n ka maandẽ, a maanda yel-wẽnde.

5

¹ Mosã, mam gomda ne yãmba, arzegsã rãmba! Wɩsg-y y meng n yãbe, tood nins sẽn na n wa yãmb zutã yĩnga!

² Yãmb arzɛkã põogame. Zũnzũy dɩɩ yãmb futã.

³ Tẽngempiisim n dɩ yãmb sãnemã ne y wanzuri wã, la b tẽngempiismã na n yɩɩ kaset sẽn kaood yãmb bʋʋdo, n sãam yãmb yĩngã wa bugum. Yãmb tigsa paoong mosã wakat sẽn ya yaoolmã n bĩngi.

⁴ Ade, tẽn-tʋmdb nins sẽn tigs yãmb koodã tɩ yãmb yaool n ka yao-bã kelemdame. Tigsdbã kelems zẽk n taa pãn-kẽemd soabã tʋbẽ.

⁵ Yãmb vɩɩmda rɩ-n-tɩk pʋgẽ, la teed sẽn nags sʋka. Yãmb wuba y mens sãoong daarã yĩnga.

⁶ Yãmb kaoo nin-tɩrg bʋʋd n kʋ-a, la yẽ ka kɩɩs yãmb ye.

⁷ Woto yĩnga, m ba-biisi, maan-y sũ-mar hal tɩ ta Zu-soabã waoongo. Ad ka-koaad gũuda a pʋtã bi-sõamyã n pid ne sũ-mar a yĩnga, hal t'a paam sigr saaga la bõn-bɩʋʋng saaga.

⁸ Bɩ yãmb me maan sũ-mare, n keng y raoodo, bala, Zu-soabã waoong kolgame.

⁹ M ba-biisi, da yẽgem-y ne taaba, tɩ Zu-soabã ra wa kao yãmb bʋʋd ye. Ad bʋ-kaoodã yɛsa dignoorẽ wã.

¹⁰ M ba-biisi, dɩk-y Wẽnnaam no-rɛɛsdbã sẽn gom Zu-soabã yʋʋrã yĩngã mamsgo la b sũ-marã tɩ yɩ mamsg yãmb yĩnga.

¹¹ Gese, tõnd yetame tɩ neb nins sẽn yals-b kãenkãe wã yaa sũ-noog rãmba. Yãmb wʋmame tɩ b gom a Zoob sũ-marã yelle, la yãmb yãa baoosg ning Zu-soabã sẽn kõ-a wã. Bala, Zu-soabã pida ne nonglem la nimbãan-zoeere.

¹² M ba-biisi, sẽn yɩɩd fãa, bɩ y da wẽen ne arzãna, wall ne tẽngã, wall ne wẽeneg buud a to ye. La bɩ yãmb n-ye yɩ n-ye, tɩ yãmb ayo yɩ ayo tɩ bʋʋd da wa n lʋɩ y zut ye.

¹³ Ned bee yãmb sʋk n namsdẽ? Bɩ a pʋʋse. Ned n tar sũ-noogo? Bɩ a yɩɩl Wẽnnaam yɩɩla.

¹⁴ Ned n be yãmb sʋkã n ka keeme? Bɩ a bool Wẽnnaam nin-tũusdsã kãsem-dãmbã, la bɩ bãmb tik-a ne kaam ne Zu-soabã yʋʋre, n pʋʋs a yĩnga.

¹⁵ Tẽeb pʋʋsg na n fãaga bãadã, la Zu-soabã na n yik-a lame, la a sã n da maana yel-wẽna, a na paam sugri.

¹⁶ Woto yĩngã, vẽneg-y n togs-y taab y yel-wẽna, la y pʋʋs taab yĩnga, tɩ y tõe n paam maagre. Nin-tɩrg pʋʋsgo, a sẽn pʋʋs ne a sũur fãa tara tõogr wʋsgo.

¹⁷ A Eli dag n yaa ninsaal wa tõndo. A pʋʋsa ne pẽdgre, tɩ saag kõn ni ye, la saag ka tok tẽng yʋʋm a tãab la kiis a yoob ye.

¹⁸ La a leb n pʋʋsame, la saag yii yĩngr n ni, la tẽng bõn-koaadl woma biisi.

¹⁹ M ba-biisi, yãmb ned a yembr sã n menem n zãag ne sɩdã, tɩ ned a to leb n tall-a t'a wa a pʋgẽ,

²⁰ bɩ y bãng tɩ ned ning sẽn leb n tall-a yel-wẽn-maandã t'a bas meneng sorã n lebg n wa wã, a fãaga ned yõore, la a sõng-a t'a paam yel-wẽn wʋsg sugri.