1

¹ Teofill, mam dẽenem sebrã pʋgẽ, mam wilga bũmb nins fãa a Zezi sẽn sɩng n maan la b zãms nebã,

² hal tɩ ta daar ning bãmb sẽn zẽk n kẽng arzãna. Sẽn deng a Zezi sẽn na n zẽke, b kõo b tõodã tẽn-tʋmdb nins bãmb sẽn tũusã, ne Sɩɩg-sõng pãnga.

³ A Zezi namsgã zugẽ, b maana bũmb wʋsg n na n wilg b karen-biisã tɩ b vɩɩme. A Zezi puka b meng ne tẽn-tʋmdbã rasem pis-naase, n gom ne bãmb Wẽnnaam soolmã yelle.

⁴ Daar a yembre, a Zezi da zĩ ne tẽn-tʋmdbã n dɩtẽ, la b yeel-b lame yaa: Da zãag-y ne Zeruzalɛm ye. Pa-y be n gũ bũmb ning m ba sẽn da kãabã, kũun ning mam sẽn da gom ne yãmb a yellã.

⁵ Bala, a Zã ra lisa nebã koomẽ. La yãmba, rasem bilf sã n paase, yãmb na n paama lisg Sɩɩg-sõng pʋgẽ.

⁶ La tẽn-tʋmdbã sẽn da tigim taabã soka a Zezi yaa: Zu-soaba, yaa moasã la y na n deeg Israyɛl soolmã n lebs-ba?

⁷ A Zezi leok-b lame yaa: Ka be ne yãmb tɩ bãng wakate la sasa ning m ba sẽn yãk ne noor ning b sẽn tarã ye.

⁸ La Sɩɩg-sõng sã n wa yãmb zutu, y na n deega pãnga, la yãmb na n yɩɩ mam kaset dãmb Zeruzalɛm, la Zude soolmã fãa, la Samari, la hal tɩ ta dũni tɛk fãa.

⁹ A Zezi sẽn gom a woto n sɛ, b zẽkame tɩ nebã get-ba. La sawadg lilla a Zezi tɩ nebã ka le ne-b ye.

¹⁰ La bãmb sẽn da ket n get yĩngr wakat ning a Zezi sẽn zẽkdã, haya! Raop a yiib sẽn yer fu-peels waa n yalsa bãmb sɛɛgẽ

¹¹ n yeel-b yaa: Galile neba, yaa bõe tɩ y yas n get yĩngri? Zezi kãngã Wẽnnaam sẽn zẽk tɩ b yi yãmb sʋk to-to n kẽng arzãn tɩ yãmb yã wã, b na n lebg n waa a woto bala.

¹² Dẽ, tẽn-tʋmdba yii tãng ning sẽn boond tɩ Oliiv tɩɩs tãngã n sig n leb Zeruzalɛm. Tãngã zãrem ne Zeruzalɛm zemsa vʋʋsg daar kẽnd bala.

¹³ La bãmb sẽn ta Zeruzalɛm, b rʋʋ yĩngr doogã, zĩig ning bãmb sẽn minim n sigdã. Dag n yaa a Pɩyɛɛr ne a Zã la a Zak la a Ãndre la a Filip la a Toma la a Bartelemi la a Matye la a Alfe biig a Zak la a Sɩmo sẽn ya Zelot ne a Zak biig a Zuud.

¹⁴ Bãmb fãa lagma taab ne yam a yembr n kẽngd taoor n pʋʋsd daar fãa, ne pagbã, la a Zezi ma a Maari ne a Zezi ma-biisã.

¹⁵ Badaare, a Pɩyɛɛr yika a ba-biis a taabã sʋka, la b sõorã da taa neb koabg la pisi, n yeel yaa:

¹⁶ M saam-biisi, ra yaa tɩlɛ tɩ bũmb ning Sɩɩg-sõng sẽn da gom ne a Daviid noor tɩ b gʋls gʋls-sõamyã pʋsẽ, n deng n togs t'a Zudaas na n lʋɩɩ neb taoor tɩ b wa n yõk a Zezi wã paam pidsgu.

¹⁷ A Zudaas ra yaa tõnd sullã ned a yen, la a ra paama a pʋɩɩr ne tõnd tʋʋmdã.

¹⁸ La rao-kãng rɩka ligd ning a sẽn paam a yel-wẽndã poorẽ wã n da pʋʋgo, la a lʋɩɩme t'a zugã reng taoore, t'a pʋgã pusg t'a yãadã yʋlʋm.

¹⁹ La Zeruzalɛm tẽngã neba fãa wʋma bõn-kãnga. Rẽ n kɩt tɩ b pʋd pʋʋgã yʋʋr ne b buudã goam tɩ "Hakeldama" sẽn dat n togs tɩ zɩɩm pʋʋgo.

²⁰ Mik b gʋlsa yɩɩn-sõamyã sebr pʋgẽ n yeel yaa: Bɩ a yirã lebg raboogo, tɩ ned ra zĩnd be ye. La tɩ ned a to reeg yẽ tʋʋmdã. 21-22 Rẽ wã, tɩ d gẽes neb nins sẽn zĩnd-b ne tõnd wakat ning Zu-soab a Zezi sẽn dag n tar tõnd n kẽnd la b watẽ, sẽn sɩng ne wakat ning a Zã sẽn lis bãmbã n tãag daar ning Wẽnnaam sẽn zẽk bãmb n bas tõndã sʋka, n yãk ned a yembr t'a naag tõnd n kɩs a Zezi vʋʋgrã kaseto.

²³ Bãmb wilga neb a yiibu: A Zozɛf b sẽn boond t'a Barsabas la b boondẽ me t'a Zustus ne a Matyaas.

²⁴ Dẽ, bãmb fãa pʋʋsa a woto: Zu-soaba, yãmb sẽn mi neba fãa sũyã, wilg-y ned ning yãmb sẽn yãk bãmb b yiibã sʋka,

²⁵ t'a kẽ tʋʋmdã pʋgẽ, n yɩ tẽn-tʋmd n led a Zudaas zĩigẽ, t'a basame n kẽng zĩig ning sẽn segd ne-a.

²⁶ Bãmb maana bãnde n na n yãk ned a yembre, la bãndã yõka a Matyaas. La yẽ naaga tẽn-tʋmdb piig la a yembrã sullẽ.

2

¹ Pãntekotã daar sẽn ta, bãmb fãa ra tigma taab zĩig a yembre.

² La tao-tao bala, bʋrg sẽn wẽnd sob-kãseng sẽn fugd bʋrg yii arzãn n wa n pid roog ning pʋg bãmb sẽn da zĩ wã.

³ La bãmb yãa bũmb sẽn wẽnd wa zɛlma, n ya wa bug-witim, n welg taab n sig ned kam fãa zugu.

⁴ Bãmb fãa pida ne Sɩɩg-sõngo. La b sɩngame n gom gom-zẽn wa sẽn zems Sɩɩgã sẽn kõ-b tɩ b goma.

⁵ Mik tɩ Zuif-rãmb sẽn sakd tẽebã sõama, sẽn yi soolem nins fãa sẽn be dũniyã tɛkã, n wa n be Zeruzalɛm.

⁶ Bʋrgã sẽn maanã, neb kʋʋng wʋsg tigma taaba. La bãmb fãa yɛɛsa wʋsgo, ned kam fãa sẽn da wʋmd tẽedbã sẽn gomd ne yẽ meng goama yĩnga.

⁷ La a linga bãmb tɩ b yɛɛs n yetẽ yaa: Nin-kãensa fãa sẽn gomdã, b ka Galile neb wɛ?

⁸ La yɩɩ a wãn tɩ tõnd ned kam fãa wʋmd bãmb sẽn gomd tõnd mens goam d sẽn dog ne a wã?

⁹ Neb sẽn yit Part la Meed ne Elam dãmba, ne neb nins sẽn yi Mezopotami la Zude la Kapados la Põ ne Azi soolem,

¹⁰ la Firzi la Pamfili ne Ezipt la Libi soolem toadgã sẽn pẽ Sirɛn.

¹¹ La neb nins sẽn yi Rom n ya Zuif-rãmba la bu-zẽms sẽn sakd Zuif-rãmba kaorengo, la Kɛrɛt neba ne Arabi neb bee tõnd sʋka. La baoosgo tõnd wʋmda b sẽn gomd Wẽnnaam tʋʋm kãsmsã ne tõnd mens goama!

¹² Bãmb fãa yɛɛsame n da ka mi b sẽn na tags tɩ bũmb ning ye. La b goma ne taab n yeel tɩ bõn-kãngã võor yaa bõe.

¹³ La neb a taab ra yaanda tẽedbã n yetẽ tɩ b yũu rã-toose n tɩge.

¹⁴ Dẽ, a Pɩyɛɛr yika yĩngr ne neb piig la a yembrã n zẽk a koɛɛg n gom ne neb kʋʋngã a woto: Yãmb Zuif-rãmba, la yãmb fãa sẽn be-b Zeruzalɛm, bãng-y bõn-kãnga la y kelg mam goama neere.

¹⁵ Nin-kãensã ka yũ rãam wala yãmb sẽn tẽedã ye. Bala, nan ket n yaa yibeoogo, wakat a wɛ bala.

¹⁶ La yaa bũmb ning Wẽnnaam no-rɛɛs a Zowɛl sẽn da togsã:

¹⁷ "Wẽnnaam yeelame yaa: Yaoolem wakate, mam na n pʋdga m Sɩɩgã ninsaalbã buud fãa zutu. Yãmb kom-dibli la y kom-pugli na n togsa bãngr goama. Yãmb kom-bɩɩs na n yãa vẽnegre, la yãmb nin-kẽemb na n paama zãmsdo.

¹⁸ N ye! Ra-kãens daare, mam na n pʋdga m Sɩɩgã m tʋmtʋmd-raopa la m tʋmtʋmd-pogs zutu, la b na n togsa bãngr goama.

¹⁹ Mam na n maana bõn-yɛɛsds yĩngri, saasẽ, la bõn-bãn dũniyã zugu, zɩɩm, la bugum, la bug-zõos na n zĩndame.

²⁰ Wĩndgã na n lebga lik bida, la kiuugã na n lebga wa zɩɩm, tɩ Zu-soabã daarã sẽn ya ra-kãseng la sẽn be ziirã yaool n wa.

²¹ La ned ning fãa sẽn na n pʋʋs ne Zu-soaba yʋʋr na n paama fãagre."

²² Yãmb Israyɛl neba, kelg-y gom-kãensã. Yãmb mens miime tɩ yaa Nazarɛt dao a Zezi la Wẽnnaam tall n maan bõn-bãnã la bõn-yɛɛsds la bãn yãmb sʋka, n wilg tɩ yaa bãmb n tʋm-ba.

²³ B zãmba rao-kãnga, n yõk n kõ yãmb wa sẽn zems Wẽnnaam yam-yãkrã, la bãmb sẽn da pĩnd n yeelã. Yãmb kɩtame tɩ yel-wẽn maandb ka a Zezi da-pɩk zug n kʋ-ba.

²⁴ La Wẽnnaam vʋʋga bãmb n fãag-b kũum pãng nugẽ. Tɩ bõe, kũumã pãng ra ka tõe n tall bãmb ye.

²⁵ Bala, a Daviid dag n goma b yell n yeel yaa: "Mam dag n yãta Zu-soaba mam taoor wakat fãa. Bala, bãmb bee ne maam, sẽn na n yɩl tɩ bũmb da wa n miim maam ye.

²⁶ Woto yĩnga, mam sũur pida ne sũ-noogo, la mam zelemd kɩdemdame. La baa mam yĩngã na n vʋʋsa tẽeb pidsg gũudem pʋgẽ.

²⁷ Tɩ bõe, yãmb ka na n bas maam kɩɩm-kulg pʋgẽ ye, la yãmb kõn bas y sõmblem soabã t'a pa yaoogẽ n põog ye.

²⁸ Yãmb wilga maam vɩɩm soaya: Yãmb na n pida maam ne sũ-noog y nengẽ."

²⁹ M saam-biisi, kõ-y maam noor tɩ m gom ne yãmb tõnd yaab a Daviid yell vẽenega: Bãmb kiime, tɩ b mum-ba, la b yaoog ket n bee tõnd sʋk hal tɩ ta rũnna.

³⁰ La bãmb da yaa Wẽnnaam no-rɛɛsa, n mi tɩ Wẽnnaam dag n wẽename n kãab bãmb n yeel tɩ b na n kɩtame tɩ b yagensa sʋka, a yembr sẽn yit bãmb buud pʋgẽ zaoond b naama geer zugu.

³¹ A Daviid da reng n goma Kiristã vʋʋgr yell n yeel tɩ b ka bas Kirist kɩɩm-kulg ye, la b yĩngã ka pa yaoogẽ n põog ye.

³² Yaa Zezi kãng la Wẽnnaam sẽn vʋʋgã, la tõnd fãa yaa bõn-kãng kaset dãmba.

³³ A Zezi zẽkame n be Wẽnnaam dɩtgo, la bãmb deega Sɩɩg-sõngã b sẽn da kãabã, b ba wã nengẽ, n pʋdg-a tõnd zutu. La yaa bõn-kãng la yãmb sẽn yãt la y wʋmd moasã wã.

³⁴ Tɩ bõe, a Daviid meng ka rʋ arzãn ye, la a yeelame tɩ Zu-soab a Wẽnd yeela yẽ Zu-soaba yaa: "Wa n zĩnd mam dɩtgo,

³⁵ hal tɩ m kɩt tɩ f tab f bɛɛbã."

³⁶ Dẽ yĩngã, Israyɛl buudã fãa, bãng-y sɩd-sɩd tɩ Zezi kãng yãmb sẽn ka da-pɩkã zugã, Wẽnnaam kɩtame tɩ bãmb lebg Zu-soaba la Kirist.

³⁷ La nebã sẽn wʋm gom-kãnga, a sɩɩsa bãmb sũyã. La b soka a Pɩyɛɛr ne tẽn-tʋmdba a taabã yaa: D saam-biisi, tõnd tog n maana bõe?

³⁸ A Pɩyɛɛr yeel-b lame yaa: Tek-y yam n kos sugri, la bɩ ned kam fãa sak n deeg koom lisg ne a Zezi Kirist yʋʋr a yel-wẽna sugr kũun yĩnga. Dẽ, y na yaool n deeg Wẽnnaam kũuna sẽn ya Sɩɩg-sõngã.

³⁹ Tɩ bõe, Wẽnnaam kãabgã yaa yãmb ne y kamb yĩnga, la neb nins fãa sẽn be zĩ-zãrgã yĩnga, la neb nins fãa tõnd Wẽnnaam sẽn na n boolã me yĩnga.

⁴⁰ A Pɩyɛɛr leb n goma goam a taab n kɩs kaset n sagl-b ne pẽdgr n yeel-b tɩ b fãag b mens n yi zamaan kãnga sẽn ya wẽngã pʋgẽ.

⁴¹ Neb nins sẽn sak a Pɩyɛɛr goama paama koom lisgu. La badaare, karen-biis sõor sẽn kolg tus a tãab n paase.

⁴² Bãmb da sakda tẽn-tʋmdba zãmsga neere, n vɩ ba-biis lagem-n-taar pʋgẽ, la b kaood burã n dɩt ne taaba, la b pʋʋsd ne taaba.

⁴³ La yɛɛsg ra tara neba fãa, tɩ bõe, tẽn-tʋmdbã ra maanda bõn-yɛɛsds ne bõn-bãn wʋsgo.

⁴⁴ Tẽedba fãa ra naaga taaba zĩ-yende, n dɩk b paoongã fãa n naag taaba.

⁴⁵ B ra koosda b paoongã ne b sẽn tarã n pʋɩt ligdã tɩ tat neba fãa, tɩ ned kam fãa paamd sẽn zemsd sẽn tõe sõng-a.

⁴⁶ Daar fãa, bãmb da naagda taab noor a yembr n be wẽnd-doogẽ wã. Bãmb da naagda taab n dɩt rɩɩbã b yiyã pʋse, la b dag n dɩta b rɩɩbã ne sũ-noogo, la ne sũy sẽn ya sõama.

⁴⁷ Bãmb da pẽgda Wẽnnaam. La neba fãa ra nong-b lame. La daar fãa, Zu-soabã da fãagda neb n paasd wẽnd-doogẽ wã.

3

¹ Zaabr lɛɛr a tãab sẽn ya pʋʋsgã wakat sẽn ta, a Pɩyɛɛr ne a Zã da tũu taab n kẽng wẽnd-doogẽ wã.

² La rao a ye sẽn dog ne komsem n da be be. La b ra rɩkda yẽ daar fãa n wat n zĩndgd-a wẽnd-doogã noor ninga b sẽn boond tɩ rigno-neerã t'a bõosd neb nins sẽn da kẽed wẽnd-doogẽ wã.

³ La rao wã sẽn yã a Pɩyɛɛr ne a Zã sẽn dat n kẽ wẽnd-doogẽ wã, yẽ bõos-b lame.

⁴ A Pɩyɛɛr ne a Zã gesa yẽnda n yeel-a t'a ges bãmba.

⁵ La rao wã gesa a Pɩyɛɛr ne a zã n tẽed tɩ bãmb na n kõ-a-la bũmbu.

⁶ La a Pɩyɛɛr yeel-a lame yaa: Mam ka tar wanzuri wala sãnem ye, la mam kõta foo bũmb ninga mam sẽn tarã, ne a Zezi Kirist sẽn yi Nazarɛt yʋʋre, yik n kẽne!

⁷ La a Pɩyɛɛr gãda rao wã nug-rɩtgo, n kɩt t'a yiki. La wakat kãng bala koamsã nao wã ne a nao-sẽbã lebga kãenkãe.

⁸ La yẽ yika wʋgʋp n yals yĩngr n sɩng kẽna. La yẽ kẽname n tũ bãmb n kẽ wẽnd-doogẽ wã n yɩgd n tiimsid n pẽgd Wẽnnaam.

⁹ Nebã fãa yãnda yẽ sẽn kẽnd la a pẽgd Wẽnnaamã.

¹⁰ La bãmb bãngame tɩ yaa rao ninga sẽn da zĩ wẽnd-doogã rignoor ninga sẽn boond tɩ neerã n bõosdẽ wã, la b sẽn yã bũmb ninga sẽn maan rao wã, dabeem yõk-b lame tɩ b yɛɛs wʋsgo.

¹¹ La rao wã sẽn da pʋgd a Pɩyɛɛr ne a Zã wã, neba fãa yɛɛsame n zoe n kẽng bãmb nengẽ, zĩig sẽn boond t'a Salmo veranda wã.

¹² A Pɩyɛɛr sẽn yã woto, a yeela nebã yaa: Yãmb Israyɛl neba, yaa bõe tɩ bõn-kãnga yɛɛs yãmba? La yaa bõe yĩng tɩ yãmb get tõnd a woto wala yaa ne tõnd pãng wala d sõmblem yĩng la d tõog n kɩt rao-kãnga kẽnda?

¹³ Yaa Abraham ne Izak la a Zakob Wẽnnaam sẽn ya tõnd yaab-rãmba Wẽnnaamã n waoog b tẽn-tʋmd a Zezi. Yaa bãmb la yãmb sẽn da zãmb n yõk n kɩs a Pilat, t'a Pilat da tags n dat n bas-b tɩ yãmb tõdg yẽnda taoorã.

¹⁴ Yãmb tõdga sõmblem la tɩrlem soabã, n kos tɩ b bas nin-kʋʋdã n kõ-yã.

¹⁵ La y yaool n kɩt tɩ b kʋ vɩɩm-naabã. La Wẽnnaam vʋʋg-b lame tɩ b yi kũum sʋk n vɩ. Tõnd yaa bõn-kãng kaset dãmba.

¹⁶ Yaa ne tẽeb la a Zezi yʋʋrã n kõ dao kãngã yãmb sẽn ne la y miẽ wã pãnga tõnd sẽn tẽe bãmb yʋʋrã yĩnga. Yaa tẽeb ne a Zezi n maag rao-kãnga zãng fasɩ yãmb fãa nifẽ.

¹⁷ La moasã, m saam-biisi, mam miime tɩ yaa yãmb ne y nanamsa zɩɩlma yĩng n kɩt tɩ y maan a Zezi a woto.

¹⁸ La Wẽnnaam maana a woto n pids bũmb ninga b sẽn da pĩnd n togs ne b no-rɛɛsdbã fãa noy tɩ bãmb Kiristã na n namsame wã.

¹⁹ Dẽ, tek-y yam n kos sugri tɩ Wẽnnaam tõe n yẽes y yel-wẽna,

²⁰ woto, Zu-soaba na n kɩtame tɩ yolsg wakat wa. La b na n tʋma Kirist a Zezi bãmb sẽn da yãk yãmb yĩngã.

²¹ A Zezi tog zĩnda arzãn nanda hal tɩ Wẽnnaam sẽn da togs bũmb ningã fãa wakat sẽn loogã ne b no-rɛɛs sõamyã noyã manegre wakat ta.

²² A Moyiis ra yeelame: "Zu-soaba sẽn ya yãmb Wẽnnaam na n yãka b no-rɛɛs sẽn ya wa maam yãmb buudã sʋk n kõ-yã. Yãmb na n kelga bũmb nins fãa yẽ sẽn na n togs yãmbã.

²³ La ned ning sẽn ka kelgd-a Wẽnnaam no-rɛɛs kãnga, b na n menes-a-la Wẽnnaam nebã sʋka."

²⁴ La Wẽnnaam no-rɛɛsdbã fãa sẽn sɩng ne a Sãmwɛll la sẽn pʋgl-b bãmba me goma ra-kãens yelle.

²⁵ Yãmb yaa Wẽnnaam no-rɛɛsdba kamba, la kaool ninga Wẽnnaam sẽn maan ne tõnd yaab-rãmbã kamba, Wẽnnaam sẽn yeela Abraham tɩ dũniyã buud fãa na n paama bark bãmb yagensã maasem yĩngã.

²⁶ Yaa yãmb yĩng pipi la Wẽnnaam yãk b tẽn-tʋmd n tʋm-b yãmb nengẽ, tɩ ned kam fãa yãmb sʋkã sã n wẽnemd n bas a yel-wẽna bɩ b ning-a barka.

4

¹ A Pɩyɛɛr ne a Zã sẽn da ket n gomd ne nebã, maan-kʋʋdbã ne wẽnd-doog gũudba naab la Saduusẽ-dãmba waame.

² Bãmb sũyã puuga wʋsg ne tẽn-tʋmdba yiibã sẽn da zãmsd nebã la b moondẽ n yetẽ tɩ neb nins sẽn tũud a Zezi wã na n vʋʋg n bas a kũum wala a Zezi sẽn vʋʋg n bas kũuma.

³ La b yõga tẽn-tʋmdbã n kɩs gũudbã tɩ b gũ-b hal tɩ beoog vẽege, bala wĩndga da zoe n kẽeme.

⁴ Baoosgo, neb nins sẽn da wʋm koe-moonegã, wʋsg tẽeme. Neba sẽn tẽ wã sõor kolga tus a nu.

⁵ La vẽkembeoogo, Zuif-rãmba nanamse la kãsem-dãmba ne tõog karen-saam-dãmbã,

⁶ la maan-kʋʋdbã kãsem a Ãnn ne a Kayif, la a Zã la a Alegsãndr la neb nins fãa sẽn da ya maan-kʋʋdba kãsem-dãmb buudã tigma taab Zeruzalɛm.

⁷ Bãmb talla a Pɩyɛɛr ne a Zã n wa n yals bãmb sʋk n sok-b tɩ yaa ne pãng bʋg wala yaa ne ãnna yʋʋr la b maan bõn-kãnga.

⁸ Dẽ, a Pɩyɛɛr sẽn pid ne Sɩɩg-sõngo, yẽ yeel-b lame yaa:

⁹ Zuif-rãmba nanamse ne kãsem-dãmba, b sẽn sokd tõnd rũnna n dat bãng maan-neerã tõnd sẽn maan koamsã, la sẽn yɩ to-to tɩ rao-kãng paam maagrã.

¹⁰ Yãmb fãa ne Israyɛl neba fãa bãng-y neere, tɩ yaa ne Nazarɛt dao a Zezi Kirist yãmb sẽn ka da-pɩk zug tɩ Wẽnnaam vʋʋg-b n bas kũuma yʋʋre, n kɩt tɩ rao-kãnga paam laafɩ zãng n yas yãmb fãa taoore.

¹¹ Wa gʋls sõamyã sẽn yetã, a Zezi yaa: "Kugr ninga yãmb a tãn-metbã sẽn da zagsã, la kug-kãng n lebg roogã pãng kugri."

¹² Fãagr ka be ne ned a to sã ka a Zezi ye. Tɩ bõe, Wẽnnaam ka kõ ned yʋʋr a to ninsaalba sʋk dũniyã zug tɩ tõnd tõe n tũ m paam fãagr ye.

¹³ La bãmb sẽn yã a Pɩyɛɛr ne a Zã pɛl-kɛgengã, b yɛɛsame, tɩ bõe, b ra bãngame t'a Pɩyɛɛr ne a Zã yaa nin-zaals sẽn ka paam zãmsgo. La b ra bãngame t'a Pɩyɛɛr ne a Zã ra tũuda a Zezi.

¹⁴ Kaorengã yɛl-bʋ-kaoodbã sẽn yã rao ningã sẽn paam maagrã t'a yik n yas a Pɩyɛɛr ne a Zã sɛɛgẽ wã, b ra ka tar sẽn na leok ye.

¹⁵ La b kõo a Pɩyɛɛr dãmb noor tɩ b yi kaoreng yɛl-bʋ-kaoodba roogẽ. La kaoreng yɛl-bʋ-kaoodbã yẽsa ne taab n yeel yaa: Tõnd na n maana nin-kãensa bõe?

¹⁶ Bala, Zeruzalɛm neba fãa bãnga vẽeneg tɩ nin-kãensa maana bõn-bãn-kãsenga, la tõnd ka tõe n kɩɩs bõn-kãng ye.

¹⁷ La sẽn na n yɩl tɩ yel-kãnga ra saag neba sʋk n paase, wa-y tɩ d gɩdg-b tɩ b ra leb n gom ne ned ba a yen a Zezi yʋʋrã yell ye.

¹⁸ Dẽ, b boola a Pɩyɛɛr ne a Zã n yeel-b tɩ b ra leb n tol n gom la b zãms nebã ne a Zezi yʋʋr ye.

¹⁹ La a Pɩyɛɛr ne a Zã leok-b lame yaa: Yaa tɩrg Wẽnnaam nifẽ tɩ tõnd sak yãmb n yaool n bas Wẽnnaam? Bɩ yãmb mens togse.

²⁰ Bala, tõnd ka tõe n ka gom bũmb ninga tõnd sẽn yã la d wʋma yell ye.

²¹ La kaoreng yɛl-bʋ-kaoodba leb n lenga a Pɩyɛɛr dãmb n leb n bas-b n ka tõog n paam bũmb sẽn na n sɩbg-b ye, b sẽn zoet nebã yĩnga. Tɩ bõe, neba fãa ra pẽgda Wẽnnaam bũmb ninga sẽn maana yĩnga.

²² Bala, rao ninga maagrã sẽn yɩ bõn-bãndã da tara sẽn yɩɩd yʋʋm pis-naase.

²³ La b sẽn yiis a Pɩyɛɛr ne a Zã n base, bãmb kẽnga b ba-biis a taaba nengẽ, n tɩ togs-b bũmb ning fãa maan-kʋʋdba kãsem-dãmba ne kãsem-dãmba sẽn da yeel bãmbã.

²⁴ Tẽedba sẽn wʋm yõwã, b lagma taab n pʋʋs Wẽnnaam n yeel yaa: Zu-soaba, yãmb n naan yĩngr la tẽnga, la ko-kãsengã, la bũmb nins fãa sẽn be b pʋsẽ wã,

²⁵ yãmb n kɩt tɩ tõnd yaab a Daviid sẽn ya yãmb tʋmtʋmda gom ne Sɩɩg-sõng pãnga, n yeel tɩ: "Yaa bõe yĩng tɩ buud toay-toayã sũy puudẽ, la yaa bõe tɩ nebã set sedb sẽn ka võore.

²⁶ Dũniyã rĩm-dãmba segla b mens zabr yĩnga, la nanamsã lagma taaba, n na n zab ne Zu-soabã la ne bãmb Kiristã."

²⁷ Tɩ bõe, Herood ne a Põns Pilat sɩd lagma taab Zeruzalɛm ka, ne bʋ-zẽmsã la ne Israyɛl nebã n zab ne yãmb tẽn-tʋmd-sõng a Zezi yãmb sẽn yãkã.

²⁸ Woto, bãmb pidsa bũmb ninga fãa sẽn zems yãmb sẽn da pĩnd n yãk ne y pãnga la y ratma.

²⁹ La moasã, Zu-soaba, kelg-y b zabr goama. La y kõ y tẽn-tʋmdbã raood kãseng tɩ b moon yãmb koɛɛgã.

³⁰ Tẽeg-y y nug n kɩt tɩ neb paam maagre, tɩ bõn-bãna la bãna maan ne y tẽn-tʋmd-sõng a Zezi yʋʋre.

³¹ La bãmb sẽn pʋʋs n sɛ, bãmb sẽn da tigim taab roog ningã rigmdame. La b fãa pida ne Sɩɩg-sõngo. La b moona Wẽnnaam koɛɛgã ne raoodo.

³² Neb wʋsgã sẽn ya tẽedbã sũyã la b yama fãa ra yaa a yembre. Bãmb ned ba a yen dag n ka yet tɩ bũmb nins yẽ sẽn so wã yaa a meng rẽnd ye. La paoongã fãa ra yaa bãmb fãa n so.

³³ La tẽn-tʋmdbã ra kɩta Zu-soaba a Zezi vʋʋgrã kaset ne pãn-kãsenga. La bark kãseng ra sigda bãmb fãa zutu.

³⁴ La bãmb sʋka ned ba a yen da ka naong soab ye, bala, neb nins fãa sẽn da tar pʋto, wall rotã koosa bãmb fãa, n dɩk b sẽn koosã ligd n tall n wa.

³⁵ La b kɩta tẽn-tʋmdba ligdã, la b pʋɩta ligdã tɩ ned kam fãa paam sẽn zems a sõngre.

³⁶ La a Zozɛf, tẽn-tʋmdbã sẽn pʋd a soab yʋʋr t'a Barnabas sẽn dat n togs tɩ ned sẽn belsd a taaba. Yẽ yaa Levi buudu la a yita Sɩpr.

³⁷ Yẽ koosa a pʋʋg n tall ligdã n wa rɩgl tẽn-tʋmdba taoore.

5

¹ La rao a yen yʋʋr sẽn boond t'a Ananiyas ne a paga a Safɩra me koosa b pʋʋgo.

² La a Ananiyas ne a paga seda ne taab n yãk ligdã n bĩng b mens yĩnga. La a rɩk sẽn kellã n tɩ kɩs tẽn-tʋmdbã.

³ La a Pɩyɛɛr sok-a lame yaa: Ananiyas, yaa bõe tɩ Sʋtãana soog fo sũurã hal n kɩt tɩ f yag zĩrĩ ne Sɩɩg-sõng n yãk pʋʋgã ligd fo sẽn koosã?

⁴ Fo sẽn dag n nan ka koos pʋʋgã, a ka foom n so laa? La fo sẽn koos-a wã ligdã ka fo rẽnd sɩda? La yɩɩ a wãn tɩ fo tags f sũurẽ tɩ maan bõn-kãnga? Fo ka yag zĩrĩ wã ne ninsaalb ye, la yaa ne Wẽnnaam la f yag-yã.

⁵ A Ananiyas sẽn wʋm gom-kãense a lʋɩɩ tẽng n ki. La rabeem kãseng yõka neb nins fãa sẽn wʋm yel-kãnga

⁶ La kom-bɩɩsa yikame n dɩk-a n vil ne pɛɛl n tɩ mumi.

⁷ La sẽn kaoos bilf n kolg lɛɛr a tãabo, a Ananiyas pagã me kẽeme la yẽ ka bãng bũmb ninga sẽn da maana ye.

⁸ A Pɩyɛɛr sok-a lame yaa: Togs maam yãmb sã n koosa y pʋʋgã a woto tɛka. La a leokame tɩ n-ye, tɩ yaa woto tɛka.

⁹ Dẽ, a Pɩyɛɛr yeela yẽ yaa: Yɩɩ a wãn tɩ yãmb sed ne taab n na n mak Zu-soabã Sɩɩga? Gese, neb nins sẽn mum fo sɩdã bee rignoorẽ, la bãmb na n dɩka foom me n looge.

¹⁰ La wakat kãng bala, yẽ lʋɩɩ tẽng a Pɩyɛɛr taoor n ki. La kom-bɩɩsã kẽeme n mik t'a Safɩra kiime. La b rɩk-a lame n tɩ mum n yegl a sɩdã.

¹¹ Rabeem kãseng yõka tẽedba fãa ne neb nins fãa sẽn wʋm bõn-kãensa.

¹² Tẽn-tʋmdba maana bãna la bõn-yɛɛsds wʋsg nebã sʋka. Tẽedba fãa tigma taab zĩig ning sẽn boond tɩ Salmo zãndã.

¹³ La neb a taabã sʋk ned ba a yen da ka saagd n dat n naag-b ye. La nebã ra pẽgda tẽedba wʋsgo.

¹⁴ Raop la pagb wʋsg sẽn da tẽed Zu-soaba tara paasg daar fãa.

¹⁵ B ra tallda bãad-dãmb ne gãas wala pãnday n wat n gãnegd-b soaya zut tɩ daar ninga a Pɩyɛɛr sã n wa n loogdẽ, bɩ a maasma tõe n bui bãad-dãmb kẽere.

¹⁶ La neb wʋsg-wʋsg yii tẽns sẽn yeg Zeruzalɛm n tall bãad-dãmb la neb zĩn-dẽgd sẽn namsd n wa. La bãmb fãa paama maagre.

¹⁷ La maan-kʋʋdba kãsem ne neb nins fãa sẽn da be ne yẽnda wã, sẽn dat n togs tɩ Saduusẽ-dãmbã, yik n pida ne sũ-kiiri.

¹⁸ Bãmb yõga tẽn-tʋmdbã n kẽes bi-bees roogẽ.

¹⁹ La Zu-soabã malɛk waa ne yʋng n pak bi-bees roogã kʋɩleng n yiis tẽn-tʋmdbã n yeel-b yaa:

²⁰ Kẽng-y n tɩ yals-y wẽnd-doogã pʋg n togs nebã vɩɩm kãnga koɛɛga fãa.

²¹ La bãmb sẽn wʋm woto, bãmb kẽe wẽnd-doogẽ wã yibeoog pĩnd n sɩng n zãmsd nebã. La maan-kʋʋdba kãsem ne neb nins sẽn da be ne yẽ wã waame n tigim kaorengã yɛl-bʋ-kaoodba la Israyɛl kãsem-dãmbã, La b tʋmame tɩ b tall tẽn-tʋmdbã sẽn be bi-bees roogẽ wã n wa.

²² La gũudba sẽn ta bi-bees roogẽ wã, b ka yãnd tẽn-tʋmdbã be ye. La b lebgame n tɩ yeel yaa:

²³ Tõnd yãa bi-bees roogã sẽn pag sõama, tɩ gũudbã yas noyẽ wã n gũudẽ. La tõnd sẽn pake d ka yã ned doogã pʋgẽ ye.

²⁴ La bãmb sẽn wʋm gom-kãensã, wẽnd-doog gũudbã kãsem ne maan-kʋʋdba kãsem-dãmb dag n ka mi b sẽn na n tags bũmb ninga tẽn-tʋmdbã wɛɛngẽ ye, la b ra sokda b mens tɩ yel-kãnga na n yɩɩ a wãna.

²⁵ La ned n wa n yeel-b tɩ neb nins bãmb sẽn dag n kẽes bi-bees roogã bee wẽnd-doogẽ wã n zãmsd nebã.

²⁶ La wẽnd-doog gũudbã kãsem ne gũudba kẽngame n tɩ tall tẽn-tʋmdbã n wa n ka maan-b pãng ye. Tɩ bõe, gũudba ra yɛɛsdame tɩ nebã na n wa lob bãmb kuga.

²⁷ La b sẽn tall tẽn-tʋmdbã n leb n wa, b kɩtame tɩ b yals kaoreng yɛl-bʋ-kaoodbã taoore. La maan-kʋʋdba kãsem yeel-b lame yaa:

²⁸ Tõnd dag n yeela yãmb tɩ y ra le saag n zãms nebã ne yʋ-kãngã ye. La ade, yãmb pidsa Zeruzalɛm ne y zãmsgã. La y rat n dɩk raowã kũum yell n dogl tõnd zutu!

²⁹ A Pɩyɛɛr ne tẽn-tʋmdbã leokame yaa: Tõnd tog n saka Wẽnnaam n yɩɩd ninsaalbã.

³⁰ Tõnd yaab-rãmba Wẽnnaam vʋʋga a Zezi yãmb sẽn dag n ka a soab da-pɩkã zug tɩ b ki wã.

³¹ Wẽnnaam zẽka a Zezi tɩ b be bãmb rɩtgo n ya rĩma la fãagda n na n kõ Israyɛl nebã yam tekre la yel-wẽna sugri.

³² Tõnd yaa bõn-kãens kaset dãmba. La Sɩɩg-sõng Wẽnnaam sẽn kõ neb nins sẽn sak bãmbã me yaa kaset soaba.

³³ La kaoreng yɛl-bʋ-kaoodbã sẽn wʋm gom-kãense, b sũyã puugame tɩ b ra baood tẽn-tʋmdbã n dat n kʋ.

³⁴ La tõog karen-saamb a yen yʋʋr sẽn boond t'a Gamalyɛll n ya Fariisẽ ned n dag be b sʋka. La neba ra waoogda yẽnda la a yika kaoreng yɛl-bʋ-kaoodbã taoor n kõ noor tɩ yiis tẽn-tʋmdbã tɩ yɩ bilfu.

³⁵ La yẽ yeela nebã yaa: Israyɛl neba, gũus-y ne bũmb ningã yãmb sẽn dat n maan nin-bãmba wã.

³⁶ Tɩ bõe, a Tedaas yika wakat sẽn ka zãra n yetẽ tɩ yẽ yaa nin-kãsenga. La neb sẽn kolg kobs naas da tũuda yẽnda. La b kʋ-a lame, la neb nins fãa sẽn da tũud yẽ wã zoe n sãeegame, la b tũudma yɩɩ zaalem.

³⁷ La yẽ sẽn looge, Galile dao a Zudas me yika sõdbã wakat n kɩt tɩ neb wʋsg tũ yẽnda. La b kʋʋ yẽ me, la neb nins fãa sẽn da tũud yẽ wã sãeegame.

³⁸ Dẽ, moasã, mam yeta yãmb tɩ y bas nin-bãmba tɩ b loog la y ra le bao tɩ maan bãmb bũmb ye. Tɩ bõe, bãmb sẽn maanda, wala b tʋʋma sã yaa ninsaalb rẽnda, b na n sãama b toore.

³⁹ La b sã n yita Wẽnnaam nengẽ, yãmb kõn tõog n sãam-b ye. Gũus-y y mens n da wa n zab ne Wẽnnaam ye.

⁴⁰ Bãmb saka a Gamalyɛl goama. La b leb n boola tẽn-tʋmdbã n kɩt tɩ b pãb-b ne kalwaase n yeel-b tɩ b ra le saag n gom ne a Zezi yʋʋr ye. La b bas-ba.

⁴¹ Tẽn-tʋmdbã yii kaoreng yɛl-bʋ-kaoodbã taoor ne sũ-noogo b sẽn ges tɩ bãmb zemsame tɩ paam namsg a Zezi yʋʋrã yĩnga.

⁴² Bãmb dag n zãmsda nebã la b moond Kirist Zezi koe-noogã wẽnd-doogẽ wã la zagsã pʋs daar fãa n ka basdẽ ye.

6

¹ Wakat kãnga, karen-biisã ra lebgda wʋsgo. Zuif-rãmb nins sẽn vɩ-b tẽn-taasã yẽgma ne Zuif-rãmb nins sẽn vɩ-b Zeruzalɛma, b sẽn da ka kõt bãmb pʋgkõapã b daar fãa pʋɩɩrã wa sẽn zemsã yĩnga.

² Dẽ, tẽn-tʋmdba piig la a yiibã tigma karen-biisa fãa n yeel-b yaa: A ka zems tɩ tõnd bas Wẽnnaam koɛɛgã mooneg n pʋɩt neb rɩɩb ye.

³ Ba-biisi, woto yĩngã, bɩ y yãk raop a yopoe yãmb sʋkã sẽn tar kaset sõngo, n pid ne Sɩɩg-sõng la yam, tɩ tõnd ning tʋʋm-kãngã bãmb zutu.

⁴ La tõnd na n kell n kẽnga taoor ne pʋʋsgo la Wẽnnaam koɛɛgã moonego.

⁵ La neb kʋʋngã fãa sũur yɩɩ noog ne koe-kãnga. Dẽ, bãmb yãka a Etɛn sẽn pid ne tẽeb la Sɩɩg-sõngo la a Filip la a Porkoor la a Nikanoor la a Tɩmo la a Parmenaas ne a Nikola sẽn yit Ãntiyos n dag n kẽ Zuif-rãmba kaorengo.

⁶ B talla bãmb n wa tẽn-tʋmdba nengẽ la b pʋʋsame n tik-b ne b nusi.

⁷ La Wẽnnaam koɛɛgã ra saagdame n yɩɩd pĩnda, la karen-biisã sõor dag n paasda wʋsg Zeruzalɛm. La maan-kʋʋdb wʋsg ra sakda tẽebã.

⁸ A Etɛn sẽn pid ne bark la pãnga, a maana bõn-yɛɛsds kãsemse la bãn neba sʋka.

⁹ La karen-doog ning sẽn boond tɩ neb sẽn paam lohorem karen-doogã neb kẽere sẽn yit Sirɛn la Alegsãndri n paas ne Zuif-rãmb sẽn yit Silisi la Azi soolem sɩngame n wẽ nokoeemd ne a Etɛn.

¹⁰ La a Etɛn sẽn da gomd ne yam la Sɩɩg-sõng pãngã, b ka tõog n leok yẽ ye.

¹¹ Dẽ, b maana Zãmb n paam neb tɩ b yeel tɩ bãmb wʋmame t'a Etɛn tʋʋd a Moyiis ne Wẽnnaam.

¹² La b rãmba nebã ne kãsem-dãmba la ne gʋlsdbã. La b waame n yõk a Etɛn ne pãng n tall-a n kẽng Kaoreng-yɛl-bʋ-kaoodbã taoore.

¹³ Bãmb waa ne zĩri kaset dãmb tɩ b yet t'a Etɛn tʋʋda zĩ-sõngã la tõogã n ka basdẽ ye.

¹⁴ Bala, bãmb wʋma a Etɛn sẽn yeel tɩ Nazarɛt dao a Zezi na n sãama zĩ-kãnga la b tek minind nins a Moyiis sẽn da kõ bãmbã.

¹⁵ Neb nins sẽn da zĩ bʋ-kaoorã zĩigẽ wã fãa ra geta a Etɛn la b yãame tɩ yẽ nengã wẽnda wa malɛk nenga.

7

¹ La maan-kʋʋdbã kãsem soka a Etɛn tɩ sɩd yaa a woto laa?

² A Etɛn leokame n yeel yaa: Raopa, la ba-biisi la m ba-rãmba, kelg-y-yã. Tõnd yaab a Abraham sẽn dag n be Mezopotami n nan ka kẽng kaarã nandã, Wẽnnaam sẽn tar zĩirã vẽnega b meng ne bãmba.

³ La Wẽnnaam yeel-b lame tɩ: "Yi n bas f tẽngã ne f buudã n kẽng tẽng ning mam sẽn na n wilg foomã."

⁴ Dẽ, a Abraham yi n basa Kalde-rãmba tẽng n kẽng n tɩ zĩnd kaarã. La bãmb ba wã kũum poore, Wẽnnaam kɩtame tɩ b yi be n wa tẽn-kãnga yãmb sẽn be moasã wã pʋgẽ.

⁵ La Wẽnnaam ka kõ a Abraham zĩig ba sẽn sekd naoor rɩglog tɩ yɩ a pʋɩɩr tẽng kãngã pʋgẽ ye. La Wẽnnaam kãabame tɩ b na n kõo bãmb ne b yagensã tẽngã tɩ b soog-a, a Abraham loogr poore. La rẽ t'a Abraham nan ka tar biig ye. Wẽnnaam da gomame n yeel a Abraham a woto:

⁶ "Fo yagensã na n zĩnda tẽng a to, tɩ b kẽes-b yembdo, la b na n namsa bãmb hal tɩ ta yʋʋm kobs naase."

⁷ Wẽnnaam yeelame yaa: "La mam na n sɩbga buud ninga sẽn na n kẽes-b yembdã, la bõn-kãng zugẽ b na n yaool n yii be n waoog maam tẽn-kãnga pʋgẽ."

⁸ Dẽ, Wẽnnaam maaana zood lagem-n-taar ne a Abraham n kõ-a bãong kẽesg tɩ yɩ bãnde. La a Abraham doga a Izake. La rasem a nii sẽn ta, b kẽesa a Izak bãongo, la a Izak sẽn dog a Zakobe, a kẽesa yẽ me bãongo. La a Zakob sẽn dog Zuif-rãmba yaab-rãmb piig la a yiibã, a kẽes-b la bãongo.

⁹ La Zuif-rãmba yaab-rãmb maana sũ-kiir ne a Zozɛf n koos-a tɩ b tall-a n kẽng Ezipt.

¹⁰ La Wẽnnaam dag n bee ne a Zozɛf, la b fãaga yẽ namsgã fãa pʋgẽ. La Wẽnnaam kɩtame t'a Zozɛf tar yam la bark Ezipt rĩm a Farõ nifẽ. La Farõ kɩtame t'a Zozɛf lebg Ezipt Gʋvɛrneer ne na-yirã fãa.

¹¹ La kom-kãseng n kẽ Ezipt soolma fãa ne Kana tẽng gilli, la namsgã yɩɩ wʋsgo la tõnd yaab-rãmba ra ka tar dɩɩb sẽn na rɩ ye.

¹² A Zakob sẽn wʋm tɩ kood bee Ezipt tẽnga, b tʋma tõnd yaab-rãmba be dẽenem.

¹³ La a Zakob sẽn tʋm-b naoor a yiib soaba, a Zozɛf vẽnega a meng ne a ba-biisã. La Farõ bãnga a Zozɛf sẽn ya buud ninga.

¹⁴ Dẽ, a Zozɛf tʋmame tɩ b tɩ peeg a ba a Zakob ne b yirã rãmb fãa, b sõora taa bãmb pis-yopoe la a nu.

¹⁵ A Zakob kẽnga Ezipt la b kii be. La tõnd yaab-rãmba me kii be.

¹⁶ La b tʋka b kũuma n kẽng Sɩsɛm n tɩ mum yaoog ninga a Abraham sẽn dag n da ne ligd a Hamoor kamba nengẽ sẽn be Sɩsɛma pʋgẽ.

¹⁷ La wakatã sẽn kolgd tɩ Wẽnnaam sẽn dag n maan kãabg ninga ne a Abrahamã tog n pidsi, neba fɩɩgame n lebg wʋsg Ezipt tẽngã pʋgẽ,

¹⁸ hal tɩ Ezipt rĩm a to sẽn ka bãng a Zozɛf reeg naam.

¹⁹ Rĩm kãng maana sɩlem n zãmb tõnd buudã n maan tõnd yaab-rãmbã pãng n kɩt tɩ b bas b kom-peels tɩ b ki.

²⁰ La yaa wakat kãng la b rog a Moyiis. A rag n yaa bi-neere n ta Wẽnnaam yam. La yẽ zĩnda a ba wã zakẽ kiis a tãabo.

²¹ La b sẽn yiis a Moyiis n base, Farõ bi-pugla rɩka yẽ n wub-a wa a biiga.

²² B zãmsa a Moyiis Ezipt-rãmba yama fãa. La a goama ne a tʋʋma ra tara pãnga.

²³ La a Moyiis sẽn ta yʋʋm pis naase, a tags a sũurẽ n dat n gesa a ba-biisã sẽn ya Israyɛl yagensã.

²⁴ A Moyiis yãa b sẽn maand Israyɛl ned a yen pãnga, la a sõnga Israyɛl nedã n dok a sũur n kʋ Ezipt nedã.

²⁵ A Moyiis ra tẽedame t'a ba-biisã na n bãngame tɩ Wẽnnaam na n talla yẽnda n fãag ba. La b ka bãng ye.

²⁶ La vẽkembeoogo, a Moyiis yãa Israyɛl neb a yiib sẽn zabd taaba. La yẽ rat paas a zabrã n yeel yaa: "Yaa bõe tɩ y maan taab pãnga? Yãmb yaa ba-biisi."

²⁷ Ned ninga sẽn maand a to wã pãngã tusa yẽ n yeel-a tɩ ãnna n yãk-a t'a yɩ bãmb naab la b bʋ-kaooda,

²⁸ t'a Moyiis rat kʋʋ yẽ wala a sẽn kʋ Ezipt nedã zaame wã laa?

²⁹ A Moyiis sẽn wʋm gom-kãngã, a Zoeeme n kẽng n tɩ zĩnd Madiyã tẽng n dog kom-dibli a yiib beene.

³⁰ La yʋʋm pis naas rẽ zugẽ, malɛk puka a meng ne a Moyiis tuug sẽn wit bugum pʋgẽ weoog sẽn pẽ Sinayi tãngã.

³¹ A Moyiis sẽn yã tuugã sẽn wit bugmã b yɛɛsame. La b sẽn kolgd n na n gese, bãmb wʋma Zu-soaba koɛɛg sẽn yeel yaa:

³² "Mam yaa fo yaab-rãmba Wẽnnaam. A Abraham la a Izak ne a Zakob Wẽnnaam." La rabeem yõka a Moyiis t'a sɩng n digda, n ka saag n na n ges ye.

³³ La Zu-soaba yeela a Moyiis yaa: "Piid f neooda wã, bala fo sẽn be zĩig ningã yaa zĩ-sõngo.

³⁴ Mam yãa m nebã sẽn be Eziptã namsgã, la m wʋma b wõosgã. La m sigame n na n fãag-ba. Moasã, wa tɩ m na n tʋm-f la Ezipt."

³⁵ Moyiis ninga Israyɛl kamba sẽn dag yeel tɩ ãnna yãk-a t'a yɩ bãmb naab la b bʋ-kaoodã, yaa Moyiis kãng la Wẽnnaam tʋmy t'a yɩ naaba la fãagda, ne malɛk ninga sẽn dag n puk a meng ne bãmb tuugã pʋgẽ wã sõngre.

³⁶ Yaa a Moyiis n maan bõn-yɛɛsds la bãna Ezipt tẽngã n yiis Israyɛl kambã Ezipt soolma pʋgẽ la mog-miuugã ne weoogã pʋgẽ yʋʋm pis-naasã.

³⁷ Leb n ya a Moyiis kãng n dag n yeel Israyɛl kambã yaa: "Wẽnnaam na n yãka b no-rɛɛs sẽn wẽnd maam yãmb ba-biisã sʋk n kõ yãmba."

³⁸ La yaa yẽnda n zĩnd ne Israyɛl nebã weoogẽ wã, n dag n be ne malɛkã sẽn gomd ne yẽnda Sinayi tãngã. La a zĩnda ne tõnd yaab-rãmbã n deeg tõog sẽn kõt vɩɩmã n kõ yãmba.

³⁹ Tõnd yaab-rãmbã rag n ka tʋlg n na n sak a Moyiis ye. Bãmb basa a Moyiis kɛɛnga n baood n lebg n leb Ezipt.

⁴⁰ B yeela a Aarõ yaa: "Maan wẽnnaam-dãmb n kõ tõnd tɩ b lʋɩ d taoore. Tɩ bõe, a Moyiisi, soab ning sẽn yiis-a tõnd Ezipt tẽngã, tõnd ka mi bũmb ning sẽn maan-a ye."

⁴¹ Dẽ, badaare b maana nag-bila, n maan maoong n kõ wẽnd-naandgã, la b maana sũ-noog ne bũmb ninga b mens nus sẽn maana.

⁴² La Wẽnnaam wẽnemda b neng n bas-b tɩ b pʋʋs yĩngr ãds wa sẽn gʋls Wẽnnaam no-rɛɛsdbã sebr pʋgẽ wã: "Israyɛl neba, yãmb sẽn zĩnd weoogã pʋgẽ yʋʋm pis-naasã, yãmb kʋʋ rũms la y maan maand n kõ maam sɩda?

⁴³ La yãmb zẽka wẽnnaam a molok fu-roogo ne wẽnnaam a Ramfã ãdga. Yãmb maana wẽnd-naands kãens n na n waoogd-ba. Woto yĩnga, mam na n yiisa yãmb tɩ y kẽng hal n zãag ne Babilon."

⁴⁴ Weoogẽ wã tõnd yaab-rãmba da tara kaset fu-roogã. Fu-roogã wẽnda mamsg ninga a Moyiis sẽn dag n yãndã, tɩ sẽn gomd-a ne yẽ wã yeel-a t'a ti n wẽneg a woto wã.

⁴⁵ Rẽ zugẽ, tõnd yaab-rãmba reega fu-ro-kãng n tall-a n kẽ tẽng ninga pʋg a Zozoe sẽn lʋɩ bãmb taoor n zab tɩ Wẽnnaam dig buud a taabã tɩ b reeg n soogã, la fu-roogã paa be hal tɩ ta a Daviid zamaane.

⁴⁶ A Daviid paama bark Wẽnnaam nifẽ, n kos bãmb noor n dat n me roog n kõ a Zakob Wẽnnaam.

⁴⁷ La baoosgo yɩɩ a Salmo n me roogã n kõ Wẽnnaam.

⁴⁸ La Wẽnnaam sẽn-ka-to ka kẽed rot sẽn me ne ninsaalb nus ye. Wala Wẽnnaam no-rɛɛsa sẽn yeelã:

⁴⁹ Zu-soaba yeelame: "Arzãn yaa mam geere la dũniyã yaa mam nao-raogendga. Ro-bʋg buud la yãmb na n me n kõ maam? La mam vʋʋsg zĩig bee yɛ?

⁵⁰ Ka mam meng n naan bõn-kãens fãa laa?"

⁵¹ Yãmb yaa kɩɩsdba. La yãmb sũyã ne y tʋba pagame n ka wʋmd Wẽnnaam boaalã ye. Yãmb kɩɩsda Sɩɩg-sõng daar fãa wala y yaab-rãmbã sẽn da maana.

⁵² Wẽnnaam no-rɛɛs bʋg la y yaab-rãmbã ka namse? B kʋʋ neb nins sẽn da pĩnd n togs tɩrlem soaba waoongã. La moasã, yaa yãmb n zãmb tɩrlem soabã n kʋ-a.

⁵³ Malɛk-rãmba kõo yãmb Wẽnnaam tõogã la yãmb ka sak-a ye.

⁵⁴ Kaoreng yɛl-bʋ-kaoodbã sẽn wʋm gom-kãensã, b sũyã yika ne a Etɛn tɩ b wãb b yẽna.

⁵⁵ La a Etɛn sẽn pid ne Sɩɩg-sõngo, yẽ gesa yĩngri la a yãnda Wẽnnaam ziirã, la a Zezi sẽn yas Wẽnnaam dɩtgo.

⁵⁶ La a Etɛn yeelame yaa: Kelg-y yã, mam nee yĩngr sẽn pake la Ninsaal Bi-riblã sẽn yas Wẽnnaam dɩtgo.

⁵⁷ Dẽ, bãmb kelma ne pãng n yẽd b tʋba. La b fãa wudgame n yõk a Etɛn.

⁵⁸ La b talla yẽnda n yi tẽngã n sɩng n lob-a ne kug n na n kʋ. La kaset dãmba rʋʋga b fut bi-bɩɩg a yen yʋʋr sẽn boond t'a Soll taoore.

⁵⁹ La b sẽn da lobd a Etɛn ne kugã, a ra pʋʋsdame n yetẽ: Zu-soab a Zezi, reeg-y m sɩɩgã.

⁶⁰ Dẽ, a Etɛn yĩgimda a rũm zug n kelem ne pãng n yeel yaa: Zu-soaba da ning-y b taal yel-wẽn-kãnga yĩng ye. La a sẽn yeel a woto n sɛ, a gũsame.

8

¹ La a Soll da gesame t'a Etɛn kʋʋbã zemsame.

² Nin-sõamyã rɩka a Etɛn n mum la b yãba wʋsg yẽ kũuma yĩnga.

³ La a Soll da namsda tẽedbã wʋsgo. Yẽ ra kẽeda rot pʋs fãa n yõgd raop la pagb n kẽesd-b bi-bees roogẽ.

⁴ Dẽ, b sẽn sãeeg neb ninsã da kẽngda zĩig zĩig n moond koe-noogã.

⁵ A Filip kẽnga Samari na-tẽngã n tɩ moon Kirist koɛɛgã be.

⁶ Neb kʋʋngã sẽn wʋmd la b yãt a Filip sẽn maand bõn-bãna, bãmb naaga taab n kelgd bũmb ninga yẽ sẽn togsdã neer neere.

⁷ Tɩ bõe, zin-dẽgd wʋsg ra kelemda ne pãng n yit n basd neb nins b sẽn da tarã. La koms-rãmb wʋsg ne wobs me ra paamda maagre.

⁸ La sũ-no-kãseng zĩnda tẽn-kãng pʋga.

⁹ Dao a yen yʋʋr sẽn boond t'a Sɩmo n da zoe n deng n be tẽn-kãng me pʋga n maand tɩt n yɛɛsd Samari nebã. A ra yeta a meng tɩ nin-kãsenga.

¹⁰ La sẽn sɩng ne nin-tals la nin-kãsems fãa ra kelgda yẽnda neere n yetẽ tɩ rao-kãng yaa Wẽnnaam pãnga. Tɩ yaa pãng ninga b sẽn boond tɩ pãn-kãsengã.

¹¹ Nebã ra kelgda yẽ neere, tɩ bõe, yaa daar zãr la a maand a tɩɩmã n yɛɛsd bãmba.

¹² La neba sẽn tẽ a Filip sẽn moond Wẽnnaam soolem koe-noogã la a Zezi Kirist yʋʋrã, b raop la b pagb sak n deega koom lisgu.

¹³ A Sɩmo menga tẽeme n deeg koom lisg n kell n pa ne a Filip la a sẽn yãt bõn-yɛɛsdsã ne bõn-bãn kãsemsã sẽn maandã, a yɛɛsame.

¹⁴ Tẽn-tʋmdbã sẽn be Zeruzalɛmã sẽn wʋm tɩ Samari nebã reega Wẽnnaam goama, b tʋma a Pɩyɛɛr ne a Zã bãmb nengẽ.

¹⁵ A Pɩyɛɛr ne a Zã sẽn ta Samari b pʋʋsa tẽedbã yĩng tɩ b reeg Sɩɩg-sõngo.

¹⁶ Bala, Sɩɩg-sõng nan zɩɩ n sig bãmb ned ba a yen zug ye. Bãmb da paama koom lisg bal ne zu-soab a Zezi yʋʋre.

¹⁷ Dẽ, a Pɩyɛɛr ne a Zã tika tẽedba ne b nusi, la b reega Sɩɩg-sõngo.

¹⁸ A Sɩmo sẽn yã tɩ wakat ning tẽn-tʋmdbã sẽn tikd tẽedbã ne b nusã b reegda Sɩɩg-sõngo, yẽ waa ne ligd n na n kõ a Pɩyɛɛr ne a Zã.

¹⁹ Yẽ yeel-b lame yaa: Kõ-y maam me pãn-kãnga tɩ mam sẽn na n tik ned ning fãa ne m nusi, bɩ a reeg Sɩɩg-sõngo.

²⁰ La a Pɩyɛɛr yeela yẽnda yaa: Bɩ f ligdã naag foom n sãam, fo sẽn tẽed tɩ ligd tõe n daa Wẽnnaam kũunã yĩnga.

²¹ Fo ka tar pʋɩɩr yel-kãnga pʋgẽ ye. Tɩ bõe fo sũurã ka tɩrg Wẽnnaam taoor ye.

²² Dẽ yĩnga, bɩ f tek yam n bas f tags wẽnsã n pʋʋs Zu-soabã tɩ sã n tõe bɩ f paam sugr kũun tags kãnga sẽn be fo sũurẽ wã yĩnga.

²³ Tɩ bõe, mam neeme tɩ sũ-toog n tar foo tɩ f ya yel-wẽna yamba.

²⁴ A Sɩmo yeel-b lame yaa: Yãmb mens pʋʋs Zu-soabã mam yĩnga, tɩ bũmb nins yãmb sẽn yeelã ba a yen da paam maam ye.

²⁵ La a Pɩyɛɛr ne a Zã sẽn kɩs kaset la b moon Zu-soabã koɛɛg n sa, b lebg n leba Zeruzalɛm. La b sẽn wa n dabdã, b moona koe-noogã Samari tẽn-bõones wʋsg pʋse.

²⁶ La Zu-soabã malɛk goma ne a Filip n yeel-a t'a yik n kẽng wĩndgã goabg n tũ sor ningã sẽn yit Zeruzalɛm n dabd Gaza, n ya weoog sorã.

²⁷ A Filip yikame kẽng tao-tao. La rao a yen sẽn ya zu-soab n yit Etiyopi sega yẽ sorã zugu. Rao-kãng yaa Etiyopi rĩm-poaka, Kãndaas ligd gũuda, yẽ ra waa Zeruzalɛm n na n pʋʋs Wẽnnaam.

²⁸ La yẽ ra lebg n kuiisame, a ra zĩi a wiid voatɩɩr pʋg n karemd Wẽnnaam no-rɛɛs a Ezayi sebre.

²⁹ La Sɩɩg-sõng yeela a Filip t'a kẽng n kolg voatɩɩrã.

³⁰ Yẽ wudg n kolgame, la a wʋma Etiyopi rao wã sẽn da karemd Wẽnnaam no-rɛɛs a Ezayi sebre, t'a Filip sok-a t'a wʋmda a sẽn karemda võor sɩda?

³¹ Tɩ raowã leok tɩ yẽ na n yɩɩ wãn n tõog n wʋm a võor tɩ sã n ka ned n bilg n kõ-a. La a boola a Filip t'a wa kẽ voatɩɩrã pʋg n zĩnd ne yẽnda.

³² Rao wã sẽn da karemd zĩig ninga gʋls-sõngã pʋgẽ wã ra yeta a woto: B waa ne bãmb wala b sẽn wat ne pesg kʋʋb zĩigẽ, la wala pe-bil sẽn ka yaagd a noor a wõrsdã ye.

³³ B sẽn paoog bãmba pʋgẽ, b ka kao b bʋʋd tɩrg ye. Ãnna n na n tõog n wilg bãmb sẽn bas b poorẽ? Bala, b yiisa bãmb vɩɩm dũniyã zug ka.

³⁴ Ligd-gũudã yeela a Filip yaa: M Bõosdame tɩ y togs maam. Yaa ãnna yell la Wẽnnaam no-rɛɛsã sẽn gomd a woto wã? Yaa b meng yell bii, bɩ yaa ned a to yelle?

³⁵ Dẽ, a Filip sɩnga ne gʋls-sõngã zĩ-kãng n moon yẽnda a Zezi koe-noogã.

³⁶ La bãmb sẽn ket n kẽnda, b waa n taa koom zĩigẽ. La ligd-gũudã yeelame yaa: Ad koom, bõe n gɩdg maam ne koom lisgu?

³⁷ A Filip yeel-a lame t'a sã n tẽ ne a sũurã fãa, a tõe n paama koom lisgu. La a leokame tɩ yẽ tẽedame t'a Zezi Kirist yaa Wẽnnaam Bi-ribla.

³⁸ Dẽ, a kɩtame tɩ voatɩɩrã yalse. La a Filip ne ligd-gũudã tũu taab n sig n kẽ koome wã. La a Filip lisa yẽnda.

³⁹ La bãmb sẽn lebg n yi koomã pʋgẽ, Zu-soabã Sɩɩg rɩka a Filip n looge, la ligd-gũudã ka le yãnd-a ye. La a leb n dɩka a sor ne sũ-noogo.

⁴⁰ La b yãa a Filip Azot. La yẽ moona koe-noogã tẽns nins fãa yẽ sẽn tũ wã, halɩ n tɩ ta Sezaare.

9

¹ Baoosgo, a Soll sẽn dag n ket n namsd Zu-soaba karen-biis n dat kʋ-bã, a kẽnga maan-kʋʋdba kãsem nengẽ

² n tɩ kos-a t'a gʋls sɛb n tʋm karen-dot nins sẽn be Damasã tɩ yẽ sã tɩ n yã neb beene sẽn tũud Zu-soaba sore, sã n ya raop wala pagba, bɩ yẽ yõg-b n tall n wa Zeruzalɛm.

³ La yẽ sẽn wa n be sorẽ n kolg Damase, tao-tao bala, vẽenem n yi arzãn n yãg n gũbg yẽnda.

⁴ La a Soll lʋɩɩ tẽnga. La a wʋma koɛɛg sẽn yet yẽnda yaa: Solle, Solle, yaa bõe tɩ fo namsd maam?

⁵ A Soll leokame tɩ Zu-soaba, yãmb yaa ãnna: La Zu-soaba yeelame yaa: Mam yaa a Zezi fo sẽn namsd a soabã. Na n yɩɩ toog ne foom, fo sẽn kɩɩsda yĩnga. La yẽ ra yɛɛsame n digd n sok Zu-soaba tɩ bãmb datame tɩ yẽ maan bõe. Dẽ Zu-soaba yeela yẽnda

⁶ Yik n kẽ tẽngã pʋgẽ, la beene b na n yeela foom bũmb ninga f sẽn tog n maane.

⁷ La raop nins sẽn da tũud a Sollã yɛɛsame n yas n ka tõe n gom ye. B dag n wʋmda koɛɛgã la b ka ne ned ye.

⁸ A Soll yikame, la baa yẽ nina sẽn pukã, a ra ka tõe n yã baa fʋɩ. B gãda a nug n tae-a n kẽng Damase.

⁹ Yẽ maana rasem a tãab n ka tõe n yã ye. La a ka rɩ wala a yũ bũmb ye.

¹⁰ Karen-biig a ye n dag n be Damas t'a yʋʋr boond t'a Ananiyas. Zu-soaba puka b meng ne yẽnda vẽnegr pʋgẽ n yeel-a tɩ Ananiyas! T'a leok yaa: Ad mam Zu-soaba.

¹¹ Zu-soaba yeela a Ananiyas yaa: Yik n kẽng sor ning sẽn boond tɩ tɩrgã n ta a Zudas zakẽ n bao ned yen sẽn yit Tars t'a yʋʋr boond t'a Solle.

¹² Tɩ bõe yẽ pʋʋsdame n yã vẽnegr pʋgẽ tɩ ned a yen yʋʋr sẽn boond t'a Ananiyas waa n tik yẽ ne a a nus tɩ yẽnda leb n paam a nini.

¹³ A Ananiyas leokame n yeel yaa: Zu-soaba, mam wʋma neb wʋsg sẽn gomd rao-kãnga sẽn maan yãmb nebã sẽn be Zeruzalɛma wẽng wʋsga yelle.

¹⁴ La maan-kʋʋdba kãsem-dãmb kõo yẽ noor t'a wa ka n yõg neb nins fãa sẽn pʋʋsd ne yãmb yʋʋrã.

¹⁵ La Zu-soab yeela a Ananiyas yaa: Kẽnge. Tɩ bõe, mam yãka rao-kãnga n na n kɩt t'a tall mam yʋʋrã n wilg bu-zẽmse la rĩm-dãmba la Israyɛl nebã.

¹⁶ La mam meng n na n wilg yẽnda namsg nins fãa yẽ sẽn tog n nams yʋʋrã yĩngã.

¹⁷ La a Ananiyas kẽngame. La yẽ taa n kẽe roogẽ wã n tik a Soll ne a nus n yeel-a yaa: Ba-biig a Solle, Zu-soab a Zezi sẽn puk b meng ne yãmb y sẽn wa n be sorã zug n watẽ wã tʋma maan tɩ m wa tɩ y tõe n leb n paam y nini, la y pid ne Sɩɩg-sõngo.

¹⁸ La tao-tao bala, bũmb sẽn wẽnd wa nod-pags yi a Soll nini wã n lʋɩ. La yẽ leb n paama a nini. La yẽ yikame n deeg koom lisgu.

¹⁹ Dẽ, a Soll deega rɩɩb n dɩ la a pãnga leb n waame.

²⁰ La a Soll paa ne karen-biisã sẽn be Damasã rasem bilfu. La tao-tao bala, yẽ sɩngame n moond koɛɛga karen-dot pʋs n yẽte t'a Zezi yaa Wẽnnaam Bi-ribla.

²¹ Neb nins fãa sẽn wʋm yẽnda wã yɛɛsame n sokdẽ tɩ rao-kãnga n dag n namsd neb nins sẽn be Zeruzalɛm n pʋʋsd ne a Zezi yʋʋra wɛ! Tɩ la yẽ ka wa ka n na n yõg neb nins sẽn pʋʋsd ne a Zezi yʋʋrã n tall-b n kẽng n tɩ ko maan-kʋʋdba kãsem-dãmba wɛ?

²² La a Soll koe-moonegã pãng ra paasdame daar fãa la yẽ ra tõogda Zuif-rãmbã sẽn be Damasã n wilgd-b t'a Zezi sɩd yaa Kiristã.

²³ La sẽn kaoos bilfu, Zuif-rãmba naaga taab n yãk yam n dat n kʋ a Solle.

²⁴ La a Soll bãnga b yam-wẽngã. Bãmb dag n gũusda tẽnga noyã wĩndg la yʋngo, sẽn na n yɩl n kɩt tɩ b kʋ a Solle.

²⁵ Dẽ, karen-biisa kẽesa a Soll peoogẽ ne yʋng n gãndg n sik yẽ lalgã poore.

²⁶ A Soll sẽn ta Zeruzalɛm, yẽ makame n dat n lagem ne karen-biisã, la bãmb fãa ra zoeta a Solle. Tɩ bõe, b ra ka tẽed t'a Soll sɩd lebga a Zezi karen-biig ye.

²⁷ Dẽ, a Barnabas peega a Soll n tall-a n kẽng tʋmtʋmdba nengẽ, n togs bãmb a Soll sẽn yã Zu-soaba sorã zugã, la Zu-soaba sẽn gom ne-a to-to wã. La yẽ togsa bãmb a Soll sẽn moon koɛɛgã ne pɛl-kɛgeng Damas tẽngã pʋgẽ ne a Zezi yʋʋrã.

²⁸ La a Soll dag n tũuda bãmb n gõod la a wat Zeruzalɛm la a moond koɛɛga ne Zu-soaba yʋʋr ne raoodo.

²⁹ A Soll ra gomda ne Zuif-rãmb nins sẽn gomd Gɛrk goama la a wẽed nokoɛɛm ne-ba. La b ra baood n na n kɩtame tɩ b kʋ a Solle.

³⁰ La ba-biisã sẽn bãng bõn-kãnga, b talla a Soll n ta Sezaare n kɩt t'a kẽng Tars:

³¹ A Zezi tẽedba sẽn be zuude la Galile ne Samari wã fãa dag n bee laafɩ, b pãnga ra paasdame la b ra sakda Zu-soabã la Sɩɩg-sõng ra sõngd-b lame tɩ b lebgd wʋsgo.

³² A Pɩyɛɛr sẽn da saagd zĩiga fãa n get nin-tũusdsã, a kẽnga a Zezi tẽedba sẽn da be lida wã nengẽ.

³³ La yẽnda yaa rao a yen beene t'a yʋʋr boond t'a Ene n ya ki-bogre n gãe gãag zug hal yʋʋm a nii.

³⁴ A Pɩyɛɛr yeel-a lame yaa: Ene, a Zezi maagda foo, yik n maneg f gãagã f toore. La tao-tao bala a Ene yikame

³⁵ Lida ne Saarõ tẽnga neba fãa yãa a Ene la b saka Zu-soabã.

³⁶ Tẽed-poak a ye n da be Zope t'a yʋʋr boond t'a Tabita sẽn dat n togs tɩ Dorkas ne Gɛrk goama. A yʋʋra võor yaa yãka: Pʋg-kãng ra maanda tʋʋm-sõamyã wʋsgo, la a sõngd naong rãmba.

³⁷ Ra-kãense, a Dorkas lʋɩɩ bãag n ki. La b sẽn so yẽ koom n sɛ, b rɩk-a lame n gãneg yĩngr doog pʋgẽ.

³⁸ La Lida dag n ka zãr ne Zope ye. Dẽ, karen-biisã sẽn wʋm t'a Pɩyɛɛr bee Lida, b tʋma raop a yiib ye nengẽ tɩ b tɩ bõos-a t'a wa bãmb nengẽ n da kaoos ye.

³⁹ La a Pɩyɛɛr yikame n tũ-b n looge. La yẽnda sẽn ta, b talla yẽ n dʋ yĩngr dooga pʋgẽ. La pʋgkõapa fãa kolga a Pɩyɛɛr n yãbd la b wilgd yẽndã fu-yerd ninsi la fut nins a Dorkas sẽn dag n sẽ a sẽn wa n ket n vɩ wã.

⁴⁰ A Pɩyɛɛr kɩtame tɩ neba fãa yi. La yẽ yĩgimdame n pʋʋse. Dẽ a wẽnemdame n ges kũuma n yeel-a tɩ Tabita yiki. La a puka a nini. La a sẽn yãa a Pɩyɛɛr, a yikame n zĩndi.

⁴¹ La a Pɩyɛɛr gãda a nug n sõng-a t'a yik yĩngri. A Pɩyɛɛr boola nin-sõamyã ne pʋgkõapã n wilg-b t'a Dorkas vʋʋgame.

⁴² Zope tẽnga fãa wʋma bõn-kãnga, la neb wʋsg suk tẽe Zu-soabã.

⁴³ A Pɩyɛɛr paa Zope n kaoos bilfu, yẽ siga zapa a sɩmo yiri.

10

¹ Dao a ye n da be Sezaare t'a yʋʋr boond t'a Korney n ya sodaas koabg naab n be soda-kʋʋngã b sẽn boond tɩ Itali-rãmba sʋka.

² Rao-kãng ra yaa wẽn-tũuda, la yẽ ne a yirã rãmb ra zoeta wẽnnaam. Yẽ ra sõngda neb wʋsg sẽn ya naong rãmba, la a ra pʋʋsda Wẽnnaam wakat fãa.

³ Sẽn zems zaabr lɛɛr a tãab sasa, yẽ yãa Wẽnnaam malɛk vẽeneg vẽnegr pʋgẽ t'a kẽ n yeel yẽ tɩ Korney.

⁴ La yẽ gesa malɛk ne rabeem n yeel-a yaa: Yaa a wãna m Zu-soaba? Malɛk yeel-a lame yaa: Wẽnnaam tẽra fo pʋʋsgã la f sẽn sõngd naong rãmba yelle, la b ka yĩnd f yell ye.

⁵ Dẽ moasã, bɩ f tʋm neb Zope tɩ b tɩ bool ned a yen yʋʋr sẽn boond t'a Sɩmo Pɩyɛɛr t'a wa.

⁶ Yẽ siga zap a Sɩmo zakẽ, yirã bee ko-kãsenga noore.

⁷ La malɛk ning sẽn gom ne yẽ wã looge, a Korney boola a tʋmtʋmdb a yiib ne a sodaag a yen sẽn ya nin-sõng sodaas nins yẽ sẽn so wã sʋka.

⁸ A Korney togsa bãmb bũmb nins fãa sẽn maana la a tʋm-b Zope.

⁹ Vẽkembeoogo, bãmb sẽn waa n be sorẽ n kolgd Zope, sẽn zems wĩnto-sʋka, a Pɩyɛɛr dʋʋ roogã zug n na n pʋʋse.

¹⁰ La kom yõka a Pɩyɛɛr t'a rat rɩɩb n dɩ. La b sẽn segend rɩɩbã n na n kõ-a wakate, yẽ paama vẽnegre.

¹¹ A Pɩyɛɛr yãnda arzãn sẽn pake, la bũmb sẽn wẽnd wa peen-bedr b sẽn loe a noy a naasã t'a sigd n sigd tẽnga.

¹² La rũms buud fãa sẽn tar nao a naase, la bõn-vuudsã la bõn-pɩgs buud fãa n dag n be a pʋgẽ.

¹³ La koɛɛg n yeel a Pɩyɛɛr t'a yik n kʋ ne dɩ.

¹⁴ La a Pɩyɛɛr leokame yaa: Ayo, Zu-soaba, tɩ bõe mam zɩɩ n dɩ bũmb sẽn ka zems wala sẽn ya rẽgd ye.

¹⁵ La yẽ leb n wʋma koɛɛg sẽn gomd ne yẽnda n yetẽ tɩ Wẽnnaam sẽn yeel tɩ bũmb ning yaa yɩlgemdã bɩ a ra bool bõn-kãng tɩ yaa rẽgd ye.

¹⁶ Bõn-kãng maana naoor a tãabo. La tao-tao bal rẽ zugẽ bõn-kãng leb n zẽk leba arzãn pʋgẽ.

¹⁷ Wakate ninga a Pɩyɛɛr sẽn nan tagsd a sũurẽ n dat n bãng vẽnegr ninga yẽ sẽn yã wã võore, rẽ t'a Korney sẽn tʋm neb ninsã sok n bãnga a Sɩmo yirã zĩig n wa n be zaka noore.

¹⁸ Bãmb boolame n sok tɩ yaa ka la a Sɩmo Pɩyɛɛr sẽn be wã?

¹⁹ A Pɩyɛɛr sẽn da ket n tagsd n baood vẽnegra võore, sɩɩgã yeela yẽnda tɩ ad neb a

²⁰ tãab n be be n baood-a. T'a yik n sig n tũ la a ra sãmb ye tɩ bala yaa bãmb n tʋmba.

²¹ Dẽ, a Pɩyɛɛr sigame n kẽng ra-kãens nengẽ n yeel yaa: Yaa maam la ned ninga yãmb sẽn baoodã, yaa bõe yell n wa ne yãmb ka?

²² Bãmb leokame yaa: Sodaas koabg naab a Korney n tʋm tõndo. Bãmb yaa nin-tɩrga n zoet Wẽnnaam, la Zuif-rãmba fãa kɩta bãmb kaset sõngo. Wẽnnaam malɛk n sagl-b tɩ b kɩt yãmb wa b yirã tɩ b kelg bũmb ninga y sẽn tar n na n gom ne-bã.

²³ Dẽ, a Pɩyɛɛr kɩtame tɩ b kẽ, la yẽ reeg-b-la sãando. Vẽkembeoogo, a Pɩyɛɛr yikame n tũ-b n looge. La ba-biisã sẽn be Zope wã neb kẽer yãaga bãmba.

²⁴ La ra-yɩt-n-daare, bãmb taa Sezaare. A Korney ra gũudb lame, la yẽ ra boola a roagdba la a zo-nongds tɩ b tigim yẽ yirã.

²⁵ A Pɩyɛɛr sẽn wa n kẽedẽ wã, a Korney wa n sega yẽnda n lʋɩ n wõgemd a taoore, n na n pʋʋs-a ne waoogre.

²⁶ La a Pɩyɛɛr roog-a lame n yeel-a yaa: Yiki, bala mam me yaa ninsaal bala.

²⁷ Dẽ, yẽ kell n sõsda ne a Korney. La a kẽe roogẽ wã n mik neb wʋsg sẽn tigim be.

²⁸ A Pɩyɛɛr yeel-b lame yaa: Yãmb miime t'a ka zems ne Zuif-rãmba tõog tɩ ned sẽn ya Zuif lagem ne buud sẽn ka Zuif wala kẽ a zakẽ ye. La Wẽnnaam wilga maam tɩ mam ka tog n yeel ned ba yen tɩ sẽn ka zemse, wala rẽgd ye.

²⁹ Yaa woto yĩng n kɩt tɩ yãmb sẽn bool maama, m waame n ka kɩɩs ye. Dẽ, mam dat n bãnga bũmb ninga sẽn kɩt tɩ yãmb tʋm n bool maama.

³⁰ A Korney leokame yaa: Rab-tatẽ sẽn zems wakat kãnga, mam dag n bee m doogẽ zaabr lɛɛr a tãab wakat n pʋʋsdẽ. Tao-tao bala, rao sẽn da yer fut sẽn pɩnd n yals mam taoorã,

³¹ n yeel yaa: Korney! Wẽnnaam wʋma fo pʋʋsgã, la b ka yĩmd sõngr ninga fo sẽn sõngd naong rãmbã yell ye.

³² Dẽ, bɩ f tʋm neb Zope tɩ b tɩ bool a Sɩmo Pɩyɛɛr t'a wa. Yẽ siga a Sɩmo sẽn ya zapã zakẽ sẽn be ko-kãsengã sɛɛgã.

³³ La tao-tao bala mam tʋma neb tɩ b bool yãmba. La yãmb maana neer n sak n wa. Moasã, tõnd fãa bee Wẽnnaam taoor ka n na n kelg bũmb nins fãa Zu-soabã sẽn yeel yãmb tɩ y togs tõndã.

³⁴ Dẽ, a Pɩyɛɛr gomame n yeel yaa: Moasã, mam sɩd bãngame tɩ Wẽnnaam ka tũusd neb ye.

³⁵ Ned ning fãa, sẽn ya buud ninga fãa sẽn zoet Wẽnnaam la a maand tɩrlem, yẽnda soab tata bãmb yam.

³⁶ Wẽnnaam tʋma b koɛɛga Israyɛl yagensa nengẽ n togs-b tɩ laafɩ koe-noog wata a Zezi sẽn ya neba fãa Zu-soabã maasem yĩnga.

³⁷ Yãmb mii bũmb ninga sẽn sɩng n maan Galile la Zude soolma fãa a Zã sẽn dag n moond neba koom lisg koɛɛg zugẽ.

³⁸ Yãmb bãnga sẽn yɩ to-to tɩ Wẽnnaam sik b Sɩɩg-sõng pãngã Nazarɛt dao a Zezi zugã. La sẽn yɩ to-to me t'a Zezi saag tẽngã n maan neer n maag neb nins fãa sẽn dag n be Sʋtãana yembd pʋgẽ wã, tɩ bõe, Wẽnnaam bee ne bãmba.

³⁹ A Zezi sẽn maan bũmb nins fãa Zuif-rãmbã tẽngẽ wã la Zeruzalɛm pʋgẽ, tõnd yaa kaset dãmba. Bãmb ka a Zezi da-pɩk zug n kʋ-ba,

⁴⁰ la rasem a tãab daare, Wẽnnaam vʋʋga bãmb n kõ-b noor tɩ b vẽneg b menga.

⁴¹ La b ka vẽneg b meng ne neba fãa ye. La yaa ne tõndo, Wẽnnaam sẽn dag n pĩnd n yãk tɩ ya kaset dãmbã tõnd dɩɩme la d yũ ne bãmb b vʋʋgrã zugẽ.

⁴² La a Zezi kõo tõnd noor tɩ d moon neba sʋk n kɩs kaset n yeel tɩ Wẽnnaam yãka bãmb tɩ b na n kao nin-vɩɩse la kũum bʋʋdo.

⁴³ Wẽnnaam no-rɛɛsdbã fãa goma Zezi yell n yeel tɩ ned ning fãa sẽn tẽeda bãmb na n paama a yel-wẽn sugr kũun ne bãmb yʋʋre.

⁴⁴ A Pɩyɛɛr sẽn ket n gomda, Sɩɩg-sõng siga neb nins fãa sẽn dag n kelgd yẽ goama zutu.

⁴⁵ Tẽedb nins sẽn ya Zuif buud n tũ a Pɩyɛɛr n wa wã yɛɛs wʋsg ne Sɩɩg-sõng sẽn ya Wẽnnaam kũuna sẽn sigd neb nins me sẽn ka Zuif-rãmba zutã.

⁴⁶ Tɩ bõe, b da wʋmda b sẽn gom-zẽn n waoogd Wẽnnaam.

⁴⁷ Dẽ, a Pɩyɛɛr leb yeelame yaa: Nin-bãmba sẽn paam Sɩɩg-sõng pidb wala tõndã, moasã b tõe n gɩdga bãmb tɩ b ka paam koom lisg sɩda?

⁴⁸ A Pɩyɛɛr kõo noor tɩ b lis-b ne a Zezi Kirist yʋʋre. Dẽ, bãmb kosa a Pɩyɛɛr t'a pa ne-b rasem bilfu.

11

¹ Tʋmtʋmdba la b ba-biisã sẽn da be Zude wã wʋmame tɩ bu-zẽmsã me reega Wẽnnaam goama.

² La a Pɩyɛɛr sẽn lebg n wa Zeruzalɛm tẽedb nins sẽn ya Zuif buudã wẽe nokoeemd ne yẽnda.

³ N yeel-a yaa: Yãmb kẽe neb sẽn ka kẽ bãong zakẽ n dɩ ne-ba!

⁴ La a Pɩyɛɛr togsa bãmb ball-ball yellã fãa sẽn maana, n yeel-b yaa:

⁵ Mam dag n bee Zope tẽngã pʋgẽ, La mam sẽn wa n pʋʋsdẽ, mam paama vẽnegre. Mam yãa bũmb sẽn wẽnd wa peen-bedr sẽn yi arzãn n sigd mam nengẽ t'a noy a naasa loe. La a sulgame n pẽneg maam.

⁶ Mam maaga m meng n gese la m yãa rũms sẽn tar nao a naase, we-rũmsi, baa bõn-vuuds ne bõn-pɩgs sẽn be a pʋgẽ wã.

⁷ Dẽ mam wʋma koɛɛg sẽn yeel tɩɩyɛɛr yik n kʋ n dɩ.

⁸ La mam leokame yaa: Ayo, Zu-soaba, tɩ bõe bũmb sẽn ka zems wala sẽn ya rẽgd na n zɩɩ n kẽ mam noorẽ ye.

⁹ La koɛɛga yii arzãn naoor a yiib soab n yeel maam yaa: Wẽnnaam sẽn yeel tɩ bũmb ninga yaa yɩlemdã, bɩ f ra bool-a tɩ rẽgd ye.

¹⁰ Bõn-kãng maana hal naoor a tãabo, dẽ, a fãa lebg n dʋʋ arzãna.

¹¹ La wakat kãng bala, raop a tãab sẽn yi Sezaare b sẽn tʋm-b mam nengẽ waa n taa zak ninga mam sẽn da be wã noore.

¹² Sɩɩg-sõng yeela maam tɩ m tũ-b n loog la m da sãmb ye. Ba-biisã yoobã sẽn be ka wã yãaga maam n ta Sezaare. La tõnd kẽ a Korney zakẽ wã.

¹³ La a Korney togsa tõnd sẽn yɩ to-to tɩ yẽnda yã malɛkã sẽn wa yẽ rooga pʋgẽ n yeel yẽ t'a tʋm neb Zope tɩ b tɩ bool a Sɩmo Pɩyɛɛr t'a wa.

¹⁴ T'a Pɩyɛɛr na n togsa yẽ koees sẽn na n kɩt tɩ yẽnda ne a yirã rãmb fãa paam fãagre.

¹⁵ La mam sẽn sɩng n gomdã, Sɩɩg-sõng siga bãmb zut wala b sẽn dag sig tõnd zut sɩngrẽ wã.

¹⁶ Dẽ, mam tẽega Zu-soabã goamã b sẽn dag n yeelã: A Zã lisa ne koom la b na n lisa yãmb Sɩɩg-sõng pʋga.

¹⁷ Rẽ wã yĩnga, Wẽnnaam sẽn kõ-b kũun ninga b sẽn dag n kõ tõnd d sẽn tẽ Zu-soab a Zezi Kirist yĩngã, dẽ mam yaa ãnna soab n tõe n kɩɩs Wẽnnaam?

¹⁸ Bãmb sẽn wʋm bõn-kãnga, b sĩnda b noore. La b pẽga Wẽnnaam n yeel yaa: Rẽnd Wẽnnaam kɩtame tɩ bu-zẽmsã me tek yam n kos sugr n na paam vɩɩm.

¹⁹ Namsg ninga sẽn paam tẽedba a Etɛn kũuma poorẽ wã kɩtame tɩ b sãeeg n kẽng hal Fenisi, la Sɩpr ne Ãntiyos la b ka moon ned a to Wẽnnaam koɛɛga sã ka Zuif-rãmba bal ye.

²⁰ Baoosgo tẽedb kẽer sẽn yi Sɩpr la Sirɛn waa Ãntiyos la b goma ne neb a taabã me n moon-b Zu-soab a Zezi koe-noogã.

²¹ Zu-soaba pãng da bee ne bãmba la neb wʋsg tẽe Zu-soabã n kos sugri.

²² A Zezi tẽedba sẽn be Zeruzalɛma wʋma koe-kãnga, la b tʋma a Barnabas Ãntiyos.

²³ La yẽnda sẽn ta n yãnd Wẽnnaam sẽn ning tẽedba bark to-to wã, a sũurã yɩɩ noogo. La a paasa b fãa raood n yet tɩ b kell n tũ Zu-soabã ne b sũyã fãa n da bas ye.

²⁴ Tɩ bõe, a Barnabas yaa nin-sõngo, n pid ne Sɩɩg-sõngo n tar tẽebo. La neb wʋsg tẽe Zu-soabã.

²⁵ Dẽ poore,a Barnabas kẽnga Tars n na n tɩ bao a Solle.

²⁶ La yẽ sẽn yãnd-a Soll be a peeg-a lame n wa Ãntiyos. Bãmb paa be ne a Zezi tẽedba yʋʋmd tõre n zãms neb kʋʋng wʋsgo. Yaa Ãntiyos la b sɩng n bool a Zezi karen-biisã tɩ Kirist neba.

²⁷ La ra-kãense, Wẽnnaam no-rɛɛsdb yii Zeruzalɛm n wa Ãntiyos.

²⁸ La bãmb ned a yen yʋʋr sẽn boond t'a Agabus yikame n togs ne Sɩɩg-sõng pãng tɩ wakat n wat tɩ kom-kãseng na n zĩnd dũniyã tɛk fãa. La komã sɩd zĩnda a Sezaar kolood sẽn wa n dɩt naam wakate.

²⁹ Dẽ karen-biisã yãka yam tɩned kam fãa kɩs sõngr ning sẽn zems a pãng tɩ b tʋm n sõng ba-biisã sẽn dag n be Zude soolma.

³⁰ La b maana a woto n dɩk n ning a Barnabas ne a Soll nusẽ tɩ b tɩ kɩs kãsem-dãmba sẽn be Zude wã.

12

¹ La wakat kãng sasa, rĩm a Herood sɩngame n nams a Zezi tẽedba kẽere.

² Yẽnda kɩtame tɩ b kʋ a Zã ba-biig a Zak ne sʋʋga.

³ La yẽ sẽn yã tɩ bõn-kãng taa Zuif-rãmba yam, a kell n kɩtame tɩ b yõk a Pɩyɛɛr. Rag n yaa bur sẽn ka rã-bɩll kibs daare.

⁴ Herood sẽn yõk a Pɩyɛɛr n kẽes bi-bees roogẽ, a kɩtame tɩ sodaas piig la a yoob gũ a Pɩyɛɛr n dees taab naas-naase, n dag n tagsdẽ tɩ zʋʋg-n-basã kibs sã n loog bɩ a yiis-a n kao a bʋʋd neba nifẽ.

⁵ Dẽ, bi-bees roogã pʋgẽ b ra gũuda a Pɩyɛɛre. La a Zezi tẽedba rag n pʋʋsda Wẽnnaam ne b sũur fãa a Pɩyɛɛr yĩnga.

⁶ Yʋng ninga sẽn deng a Herood sẽn na n yiis a Pɩyɛɛr n kao a bʋʋdã, gũudba rag n bee bi-bees rooga noor n gũudẽ la b ra balga a Pɩyɛɛr ne bãens a yiib t'a gãe pʋgẽ. Sodaas a yiib tẽn-sʋka.

⁷ Tao-tao bala, Zu-soaba malɛk puka a menga la vẽenem n yãg bi-bees roogã pʋgẽ. Malɛkã wẽe a Pɩyɛɛr lʋgr n nek-a n yeel-a yaa: Yik tao-tao. La bãensa lʋɩɩme n bas a Pɩyɛɛr nusã.

⁸ Dẽ, malɛka yeela a yẽnda t'a sẽb a sẽbdgã la a wid a neooda. A Pɩyɛɛr maana a woto. La malɛkã yeel-a lame t'a rɩk a fuugã n yeelg n tũ yẽnda.

⁹ A Pɩyɛɛr tũu malɛkã n yi, la a ra ka tagsd tɩ bũmb ninga malɛkã sẽn moonda yaa sɩd ye. A ra tagsdame tɩ yẽ yãa vẽnegre.

¹⁰ La bãmb sẽn loog pipi gũudã ne yiib soabã n ta kʋleng ninga sẽn teesd tẽngã n pag ne kutã, kʋɩlen-kãng paka a toor bãmb taoore. La b yiime n kẽng n dɩk sorã, la tao-tao bala, malɛkã loog n bas yẽnda.

¹¹ Dẽ, a Pɩyɛɛr yam vẽnegame t'a bãng bũmb ning sẽn maana. La a yeelame yaa: Moasã, mam bãnga sɩd-sɩd tɩ yaa Zu-soabã n tʋm malɛk t'a fãag maam Herood nugẽ la na bũmb ning fãa Zuif-rãmba sẽn da rat n maan maama.

¹² A Pɩyɛɛr sẽn tagse, a kẽnga a Maari yiri. Yaa a Zã b sẽn boond t'a markã ma. La neb wʋsg n dag n tigim taab beene n pʋʋsdẽ.

¹³ A Pɩyɛɛr wẽe rignoor ninga b sẽn kẽeda kʋɩlengã, la tʋmtʋmd poak a yen yʋʋr sẽn boond t'a Rood kolgame n na n kelge.

¹⁴ La yẽnda bãnga a Pɩyɛɛr koɛɛgã la a sũurã yɩɩ noog t'a bas kʋɩlengã pakr n wudg n leb pʋgẽ n tɩ togs t'a Pɩyɛɛr n wa n be rignoorẽ wã.

¹⁵ Bãmb yeela yẽnda t'a lebgame. La tʋmtʋmd-poakã kell n baas n yeelame tɩ yẽ sẽn yetã yaa sɩda.

¹⁶ Dẽ, b yeelame tɩ yaa a Pɩyɛɛr malɛka. La wakat kãnga, a Pɩyɛɛr dag n ket wẽeda kʋɩlengã. La b sẽn yaool n pake, b yãa a Pɩyɛɛr la b yɛɛsame.

¹⁷ A Pɩyɛɛr Zãasa bãmb ne nug n na n kɩt tɩ b sĩndi. La a Pɩyɛɛr togs-b-la Zu-soabã sẽn maan to-to n yiis yẽnda bi-beesa roog pʋgẽ. La a yeel tɩ b tɩ togs a zak ne ba-biis a taabã bõn-kãnga. Dẽ, yẽ yiime n kẽng zĩig a to.

¹⁸ La beoogã sẽn vẽege, rãmbg kãseng n yik sodaasã sʋka, b sẽn dag n dat n bãng a Pɩyɛɛr sẽn be zĩig ninga yĩnga.

¹⁹ Herood kɩtame tɩ bao a Pɩyɛɛr, la b ka yãnd-a ye. A kɩtame tɩ b kao gũudba bʋʋdo, la a kõ noor tɩ b kʋ-ba. Rẽ zugẽ, Herood yii Zude n kẽng Sezaare n tɩ pa be wakat bilfu.

²⁰ Herood sũur puuga wʋsg ne Tɩɩr la Sɩdõ nebã. Nin-kãensa zemsa taab n na n kẽng Herood nengẽ bãmb yãga zood ne sõgen ning sẽn manegd rĩma roogã, la b waa Herood nengẽ n na n bao tɩ laafɩ zĩnd bãmb ne rĩma sʋka, sʋka, bala rĩma soolma n dag n dɩlg bãmb tẽngã.

²¹ Daar ninga Herood sẽn yãkã sẽn ta, a yeelga a naam fut n zaoond a naam geer zug n gom gom-bɛd neba taoore.

²² La neba kelmame n yeel tɩ yaa wẽnd n gom, tɩ ka ninsaal n goma ye.

²³ La wakat kãng bala, Zu-soaba malɛk wẽe Herood yẽ sẽn dɩk Wẽnnaam waoogrã n kõ a mengã yĩnga. La zũnzũi n dɩ-a t'a ki.

²⁴ Wẽnnaam koɛɛga ra saagdame n yɩɩd pĩnda.

²⁵ La barnabas ne a Soll sẽn maan b tʋʋmd Zeruzalɛm n sɛ, b peega a Zã b sẽn boond t'a Mark n lebg n wa Ãntiyos.

13

¹ Wẽnnaam no-rɛɛsdb la karen-saam-dãmb n dag n be a Zezi tẽedba sẽn be Ãntiyosã sʋka. Yaa a Barnabas ne a Sɩmyõ b sẽn boond t'a Nizɛɛr ne a lisiyus sẽn yit Sirɛn la a Manayɛn sẽn wub rĩma Herood ba wã Zakẽ la a Solle.

² Bãmb sẽn da maand Zu-soaba tʋʋmd la b loet noore, Sɩɩg-sõng yeel-b lame tɩ b yãk a Barnabas ne a Soll n welg-b toore, tɩ b maan tʋʋmd ninga b sẽn bool-b tɩ b maana.

³ Dẽ, bãmb loee noor n pʋʋs la yaool n tik a Barnabas ne Soll ne b nus pʋʋs b yĩng n bas-b tɩ b kẽnge.

⁴ La Sɩɩg-sõng sẽn tʋm a Barnabas ne Solle, b kẽnga Selesi, la b kẽe koom-koglg be n kẽng Sɩpr.

⁵ Bãmb sẽn ta tẽng sẽn boond tɩ Salamin, b sɩng n moona Wẽnnaam koɛɛga Zuif-rãmba karen-dot pʋse. A Zã-Mark ra bee ne bãmb n sõngd-ba.

⁶ Bãmb pɩʋʋga tẽng ninga koomã sẽn gũbgã fãa hal n ta tẽng sẽn boond tɩ Pafos, la b yãa bag a yen be sẽn ya zãmb-no-rɛɛsa, yẽ yaa Zuif t'a yʋʋr boond t'a Bar-Zezi sẽn dat n togs t'a zezi biiga.

⁷ Yẽnda ra bee ne tẽn-kãng Gʋvɛrneer a Sergiyus Polus sẽn da ya ned sẽn tar yam wʋsgã. Gʋvɛrneerã kɩtame tɩ b bool a Barnabas ne a Solle, bala a rag n dat wʋma Wẽnnaam goama.

⁸ La a Elimas sẽn ya bagã yʋʋr ne Gɛrk goama kɩɩsa a Barnabas ne a Soll n baood n sãam Gʋvɛrneerã tẽebo.

⁹ Dẽ, a Soll b sẽn boond me t'a Poll pida ne Sɩɩg-sõng n ges bagã,

¹⁰ n yeel-a yaa: Sɩlem-wẽng soaba fo pida ne wẽnem Sʋtãan biiga, f yaa tɩrlem fãa bɛyã. F ka na n bas Zu-soab so-tɩrsã sãoongo?

¹¹ Moasã, gese, Zu-soaba na n wẽe foo ta f leg Zoang, n kaooswakat bilfu f kõn tol n leb n yã wĩntoogã vẽenem ye. La tao-tao bala, a Elimas nina sɩnga mumbu la lebga lik bida ne yẽnda. Yẽnda Wẽnnaam zĩiga fãa n baood ned sẽn na n gãd a nug n tɛ-a.

¹² Dẽ, guvɛrneerã sẽn yã bũmb ninga sẽn maana, a tẽeme. Bala, Zu-soaba zãmsgã wɛɛngẽ wã yɛɛsa yẽnda.

¹³ A Poll ne a tũud-n-taasa kẽe koom-koglg Pafos n yi be n kẽng Pɛrz sẽn be Paamfili soolma. A Zã-Mark basa bãmb be n lebg n leb Zeruzalɛm.

¹⁴ A Poll dãmb yii Pɛrz n kell n kẽng n ta Ãntiyos sẽn be Pisidi soolem. La Zuif-rãmba vʋʋsg daare, a Poll dãmb kẽ karen-doogẽ wã n zĩndi.

¹⁵ La sẽn karem tõogã ne Wẽnnaam no-rɛɛsdbã sɛbã n sɛ, karen-doogã nanams tʋma neb tɩ b yeel a Poll dãmb yaa: Ba-biisi, yãmb sã n tara koɛɛg n na n gom ne nebã n paas-b raoodo, yãmb tõee n gomame moasã.

¹⁶ A Poll yikame n zãas a nug n yeel yaa: Yãmb Israyɛl neba, la yãmb dãmb sẽn zoet Wẽnnaamã, kelg-y yã!

¹⁷ Wẽnnaam ninga sẽn ya Israyɛl nin-kãensa Wẽnnaam tũusa tõnd yaab-rãmbã n kɩt tɩ bu-kãng bɩ a sẽn wa n be sãand weoog Ezipt tẽngã wakate. La Wẽnnaam yiisa bãmb be ne pãn-kãsenga.

¹⁸ La b sõnga bãmb sẽn kolg yʋʋm pis-naas weooga pʋga.

¹⁹ La Wẽnnaam sãama buud a yopoe Kana n dɩk b soolma n kõ b nebã tɩ b sooge.

²⁰ La bõn-kãens fãa kolga yʋʋm kobs-naas la pis-nu. Dẽ poorẽ, Wẽnnaam kõo tõnd yaab-rãmba bʋ-kaoodba hal tɩ ta Wẽnnaam no-rɛɛs a Sãmwɛll zamaane.

²¹ Rẽ zugẽ, bãmb kosa rĩma, la Wẽnnaam kõ b la a Sayull sẽn ya rao a kiis biiga n ya Bɛnzame buudu. Yẽ rɩɩ naam yʋʋm pis-naase (40).

²² Wẽnnaam sẽn yiis a Sayull naame wã b yãka a David t'a yɩ Israyɛl dãmba rĩma. La Wẽnnaam kɩsa a David kaset n yeel a woto: "Mam yãame t'a Izayi biig a Daviid yaa rao sẽn ta mam yam. Yẽnda n na n pids mam datmã fãa zãnga."

²³ Yaa a Daviid yagensã sʋk la Wẽnnaam kɩtɩ t'a Zezi rog n yɩɩ fãagd Israyɛl neba yĩnga wa sẽn zems bãmb sẽn dag n kãabã.

²⁴ Sẽn deng a Zezi waoongo, a Zã dag n mooname n yeel Israyɛl neba fãa tɩ b tek yam n sak lisgu.

²⁵ La a Zã tʋʋmd sẽn wa n kolgd sɛɛbo, a rag n yetame yaa: Yãmb tagsdame tɩ mam yaa ãnna? Mam ka ned ninga yãmb sẽn gũud a soaba ye. La kelg-y yã: Bãmb na n pʋgla maam n waa, la mam sõmblem pʋs n ka sek tɩ m lok b neooda sẽbds ye.

²⁶ M ba-biisi, yãmb sẽn ya a Abraham yagensã la neb nins sẽn be yãmb sʋk n zoet Wẽnnaamã, yaa yãmb yĩng la b tʋm fãagrã koe-no-kãngã.

²⁷ Tɩ bõe, Zeruzalɛm neba ne b nanamsa ka bãng a Zezi sẽn ya ned ning ye. La b ka wʋm Wẽnnaam no-rɛɛsdba goama b sẽn karemd vʋʋsg daar fãa wã võor ye. La b kaoo a Zezi bʋʋd n pids Wẽnnaam no-rɛɛsdba gom-kãense.

²⁸ Baa b sẽn ka yã bũmb ne bãmb sẽn zems kũuma, b kosa a Pilat t'a kɩt tɩ b kʋ a Zezi.

²⁹ La b sẽn pids bũmb nins fãa gʋls-sõamyã sẽn da togs bãmb wɛɛngẽ wã, b sik-b-la da-pɩkã zug n tɩ gãneg yaoogẽ.

³⁰ La Wẽnnaam vʋʋga a Zezi n bas kũum.

³¹ La neb nins sẽn dag n tũ a Zezi n yi Galile n kẽng Zeruzalɛm yãa bãmb rasem wʋsgo. La moasã b yaa a Zezi kaset dãmb Israyɛl nebã sʋka.

³² La tõnd togsda yãmb koe-no-kãnga, n wilgd yãmb kãabg ninga Wẽnnaam sẽn da kãab tõnd yaab-rãmbã,

³³ moasã, Wẽnnaam pids-a lame n kõ tõnd sẽn ya bãmb yagensã n vʋʋg a Zezi n bas kũum wa sẽn gʋls yɩɩn-sõng a yiib soaba pʋgẽ wã: "Rũnna, mam yaa fo ba, la fo yaa mam biiga, maam n dog foom."

³⁴ Wẽnnaam dag n yeelame tɩ b na n vʋʋg-b lame n bas kũuma tɩ b yĩngã ra põog ye. Yaa bũmb ninga Wẽnnaam sẽn dag n gom la a woto: "Mam na n kõo yãmb a David bõn-sõamyã. Bũmb nins sẽn sõama la sɩdã."

³⁵ Yaa woto yĩng tɩ b leb n yeel zĩig a to yaa: "Yãmb kõn bas y sõmblem soaba t'a põog ye."

³⁶ La a Daviid sẽn maan sẽn tat Wẽnnaam yam bãmb wakatẽ wã, b yaool n kiime n paam b saam-dãmba, la b yĩnga põogame.

³⁷ La Wẽnnaam sẽn vʋʋg ned ninga n bas kũuma ka põog ye.

³⁸ Dẽ, ba-biisi, bɩ y bãng tɩ yaa a Zezi maasem yĩng la b moond yãmb yel-wẽma sugr kũun koɛɛga.

³⁹ La ned ninga fãõa sẽn tẽed bãmba, b basda yẽnda taal ne bũmb ninga fãa a Moyiis tõogã sẽn dag n ka tõe n bas-y taalã.

⁴⁰ Woto yĩnga, bɩ y gũus tɩ Wẽnnaam no-rɛɛsdba sẽn yeel bũmb ninga b sɛbã pʋsã ra paam yãmb ye.

⁴¹ "Nin-kɩɩsdba, ges-y-yã la y yɛɛs n menem, tɩ bõe mam na n maana tʋʋmd yãmb belma wakate. Yaa tʋʋmde, tɩ b sã n dag n togs-a yãmb bɩ y ka tõe n tẽ ye."

⁴² La a Poll ne a Barnabas sẽn yi karen-doogẽ wã, neba kosa bãmb tɩ vʋʋsg daar sẽn watã bɩ b leb n wa n moon koe-kãnga yɛsa.

⁴³ La kaorengã sẽn sɛ, Zuif-rãmb ne neb nins sẽn tẽed Zuif-rãmba kaoreng wʋsg tũu a Poll ne a Barnabas tɩ b sõs ne-b n sagl-b tɩ kell n pa Wẽnnaam barkã pʋgẽ.

⁴⁴ La vʋʋsg daar sẽn leb n ta, sẽn kolg tẽnga neba fãa tigma taab n na n kelg Wẽnnaam goama.

⁴⁵ Zuif-rãmba sẽn yã neb kʋʋgã, sũ-kiir yõk-b lame tɩ b kɩɩs a Poll goama la b tʋ yẽnda.

⁴⁶ A Poll ne a Barnabas yeela bãmb vẽeneg yaa: yaa yãmb la b rag n tog n deng n togs Wẽnnaam goama pipi. La y sẽn zãgs Wẽnnaam goma, yãmb kao y mens bʋʋd n yet tɩ yãmb ka zems tɩ paam vɩɩm sẽn kõn sɛ wã ye. Rẽ wã tõnd na n kẽnga bu-zẽmsã nengẽ moasã.

⁴⁷ Tɩ bõe, Zu-soaba yeela tõnd a woto yaa: "Mam yãka foom tɩ f yɩ vẽenem bu-zẽmsã yĩnga, n tall fãagrã n ta hal dũniyã tɛk fãa."

⁴⁸ La bu-zẽmsa sẽn wʋm woto, b sũyã yɩɩ noodo, la b pẽga Zu-soaba goamã. La neb nins fãa sẽn da na n paam vɩɩm sẽn kõn sɛ wã lebga tẽedba.

⁴⁹ La Zu-soabas koɛɛg ra saagda soolem kãng fãa.

⁵⁰ La Zuif-rãmba pagb nins sẽn sakd tẽebã yell neerã la ne tẽnga nin-kãsems tɩ b nams a Poll la a Barnabas n dig-b tɩ b yi bãmb soolmẽ.

⁵¹ A Poll ne a Barnabas pĩmsa b nao wã tom nin-bãmb yĩnga, la b yɩ n kẽng Ikoniyom.

⁵² La karen-biisã sẽn be Ãntiyosã ra pida ne sũ-no-kãsenga la ne Sɩɩg-sõngo.

14

¹ A Poll ne a Barnabas tũu taab n kẽ Zuif-rãmba karen-doog a yen pʋg sẽn be Ikoniyom, la b gomame n tõog tɩ Zuif-rãmba wʋsg ne Gɛrk-rãmba lebg tẽedba.

² La Zuif-rãmb nins ka tẽ wã rãmba bu-zẽmsã n kɩt tɩ b sũyã sãam ne karen-biisã.

³ A Poll ne a Barnabas paa Ikoniyom n kaoose. A Poll dãmb daag n kɩsa sɩd ne Zu-soabã n gomd ne pɛl-kɛgenga. La Zu-soaba kɩsa bãmb bark goama a Poll dãmb sẽn moondã kaseto n kõ bãmb pãn-tõog tɩ b maan bãna la bõn-yɛɛsds ne b nusi.

⁴ La tẽnga neba welga taaba, tɩ kẽer ra be Zuif-rãmba poorẽ la kẽer ra bee tʋmtʋmdba poorẽ.

⁵ La bu-zẽmsa ne Zuif-rãmba la b nanamsa sɩngame n segl b mens n na n maan a Poll dãmb wẽnga, n dat lob bãmb kug n kʋ.

⁶ La a Poll ne a Barnabas sẽn bãnge, b zoeeme n kẽng Listr ne Dɛrb tẽnsã, sẽn be Likaoni soolma, la tẽns a taab sẽn pẽ be.

⁷ La b moona koe-noogã beene.

⁸ Dao a ye n da be Listr t'a nao ki t'a ka tõe n yik ye. Yẽ sẽn dogã tɛka, a yaa põore la a zɩ n tõog n kẽn ye.

⁹ Yẽ ra kelgda bũmb ninga a Poll sẽn togsdã. La a Poll ges-a lame n bãng t'a tara tẽeb n tõe n paam maagre.

¹⁰ A Poll Zẽka a Koɛɛg n yeel rao wã t'a yik n yals a nao wã zugu. La rao wã yɩɩ yagbgo n yik n sɩng kẽna.

¹¹ Neb kʋʋnga sẽn yã bũmb ninga a Poll sẽn maana, b zẽka b koees n yeel ne Likaoni-rãmba goam tɩ yaa Wẽnnaam dãmb n dɩk yĩns n sig n wa bãmb sʋka.

¹² B pʋda a Barnabas yʋʋr t'a Zees la b pʋd a Poll t'a Hɛrmes sẽn dag n ya yẽnda n gomda yĩnga.

¹³ Wẽnnaam ning sẽn boond tɩ Zeesã pʋʋgã roog rag n bee tẽnga noore, la zees maan-kʋʋdã baoo tɩ-puud n wʋg n pid lols yubli n tall-b n wa tẽnga yoy n dat tɩ neb kʋʋngã lagem yẽnda tɩ b maan maoong n kõ a Poll ne Barnabas.

¹⁴ La tʋmtʋmdb a yiibã sẽn wʋm bõn-kãnga, b kẽesa b fut n wudg n kẽ kʋʋngã sʋk n kelem n yeel yaa:

¹⁵ Daopa, yaa bõe tɩ y maand a woto? Tõnd me yaa ninsaalb wa yãmb bala. Tõnd moonda yãmb koe-noog n yet-y tɩ y bas wẽnd-naands-kãens sẽn ka tar yõoda la y wẽnemd n sak Wẽnnaam ninga sẽn vɩ wã la sẽn naan yĩngr la tẽnga la ko-kãsenga ne bũmb nins fãa sẽn be b pʋgẽ wã.

¹⁶ Yʋʋm sẽn looge, Wẽnnaam sẽn vɩ wã basa buudã fãa tɩ b maan b yam daabo.

¹⁷ La baoosgo, Wẽnnaam maana kaset n wilg-b tɩ bãmb beene n mam neer n kõ yãmb saaga t'a niid tɩ sẽoog ne bõn-bɩʋʋng beẽ tɩ rɩɩb sekd yãmb n pids y sũyã ne sũ-noogo.

¹⁸ Baa ne gom-kãensã, yɩɩ toog ne tʋmtʋmdbã tɩ b tõog tɩ neba ra maan maoong n waoog-ba.

¹⁹ La Zuif-rãmb n yi Ãntiyos ne Ikoniyom n wa n rãmb nebã tɩ b lob a Poll kuga. La b sẽn tẽed t'a kiime wã, b vuuga yẽnda n yiis tẽngã pʋga.

²⁰ La tẽedba gũbga a Poll la a leb n yikame n kẽ tẽnga pʋga. La vẽkembeoogo, a Poll ne a Barnabas kẽnga tẽnga a yen sẽn boond tɩ Dɛrb.

²¹ La bãmb sẽn moon koe-noogã tẽng pʋga, b paamame tɩ neb wʋsg lebg karen-biisi. La a Poll ne a Barnabas lebg n leba Listr ne Ikoniyom la Ãntiyos yɛsa.

²² Bãmb belsa tẽedba sũyã n paas-b raood n sagl-b tɩ b yals tẽeba pʋg kãenkãe n yeel-b yaa: Yaa tɩlɛ tɩ tõnd paam namsg wʋsg n yaool n tõog n kẽ Wẽnnaam soolme wã.

²³ A Zezi tẽedba sẽn be zĩig ninsã fãa, a Poll dãmb yãka kãsem-dãmb n kõ-ba. La bãmb loee noor n Pʋʋs n dɩk-b n bas Zu-soab ninga bãmb sẽn tẽ a soaba nugẽ.

²⁴ La a Poll ne a Barnabas pɩʋʋga Pisidi soolem n kẽng Paamfili soolem.

²⁵ Bãmb moona Wẽnnaam koɛɛgã Pɛrz n yaool n kẽng Atali.

²⁶ Bãmb kẽ koom-koglg tẽn-kãng n leb Ãntiyos, yaa tẽng ninga b sẽn dag n ning b zut bark tɩ b maan tʋʋmd ning bãmb sẽn maana.

²⁷ La b sẽn ta Ãntiyos b tigma a Zezi tẽedba fãa n togs-b Wẽnnaam sẽn tall bãmb n maan bãmb bũmb nins fãa wã. La sẽn yɩ to-to tɩ Wẽnnaam pak sor tɩ bu-zẽmsa me tõe n tẽ wã.

²⁸ La a Poll dãmb paa be ne tẽedbã n kaoose.

15

¹ Neb kẽer yii Zude n wa Ãntiyos n sɩng n zãmsd ba-biisã n yetẽ tɩ b sã n ka kẽ bãong wa sẽn zems a Moyiis tõogã, b ka tõe n paam fãagr ye.

² A Poll ne a Barnabas kɩɩs-b lame n wẽ nokoeem-kãseng ne-b bõn-kãng wɛɛngẽ. Rẽ, ba-biisã yãka yam t'a Poll ne a Barnabas ne bãmb sʋkã neb kẽer na n kẽnga tẽn-tʋmdbã ne kãsem-dãmba nengẽ Zeruzalɛm n tɩ ges yel-kãng yelle.

³ Dẽ, a Zezi tẽedbã sẽn be Ãntiyosã yãag-b lame. A Poll dãmb pɩʋʋga Fenisi la Samari soolem la b togsda sẽn yɩ to-to tɩ bu-zẽmsã me sak Wẽnnaamã. La bõn-kãng kõo ba-biisã fãa sũ-no-kãsenga.

⁴ La a Poll dãmb sẽn ta Zeruzalɛm, a Zezi tẽedba ne tẽn-tʋmdbã ne kãsem-dãmbã reeg-b lame. La a Poll dãmb togs-b la bũmb nins fãa Wẽnnaam sẽn tall bãmb n maana.

⁵ La Fariisẽ-dãmba neb kẽer sẽn ya tẽedbã yikame n yeel tɩ yaa tɩlɛ tɩ b kẽes bu-zẽmsã bãongo la b kɩt tɩ b sak a Moyiis tõogã.

⁶ Tẽn-tʋmdbã ne kãsem-dãmba tigma taab n na n ges yel-kãng yelle.

⁷ Bãmb sẽn wẽ nokoɛɛma wʋsg n kaoose, a Pɩyɛɛr yikame n yeel yaa: M ba-biisi, hal pipi wakat bala, Wẽnnaam yãka maam yãmb sʋk tɩ m moon koe-noogã bu-zẽmsa me tɩ b wʋme la b tẽ.

⁸ La Wẽnnaam sẽn mi ninsaalbã fãa sũyã, b kõ-b la Sɩɩg-sõng wa b sẽn dag n kõ tõndã, tɩ yɩ kaset tɩ b sak n deeg-b lame.

⁹ Wẽnnaam ka welg tõnd toor ne bu-zẽmsã ye, bala b sẽn tẽ wã yĩnga, Wẽnnaam yɩlga b sũyã.

¹⁰ Dẽ moasã, yaa bõe tɩ y baood Wẽnnaam noor n zɩlgd karen-biisã zɩɩb tõnd yaab-rãmba wala tõnd mens sẽn ka tõog n tʋke?

¹¹ La tõnd tẽedame tɩ yaa Zu-soab a Zezi barkã yĩng n kɩt tɩ tõnd paam fãagr wala bãmb me sẽn paam to-to wã.

¹² Nebã sẽn tigma fãa sĩndame n kelg a Barnabas na a Poll sẽn togsd Wẽnnaam sẽn tall bãmb n maan bõn-bãna la bõn-yɛɛsdsã fãa bu-zẽmsã sʋkã.

¹³ Bãmb sẽn gom n sɛ, a Zak gomame n yeel yaa:

¹⁴ M ba-biisi, kelg-y maam. A Sɩmo wilga yãmb Wẽnnaam sẽn geelg bu-zẽmsã to-to n sɩng n yãk neb be n maan b rẽndã.

¹⁵ La bõn-kãng zemsa ne Wẽnnaam no-rɛɛsdbã sẽn goma. B gʋlsame n yeel yaa:

¹⁶ "Zu-soabã yetame yaa: Rẽ poore, mam na n lebgame n wa n me a Daviid doogã sẽn dag n lʋɩ wã. Mam na n leb n manega yẽ raboogã n me, la m na yik-a lame n yalse,

¹⁷ tɩ neb a taabã sẽn ketã bao Zu-soabã. La buud nins fãa sẽn pʋʋsd ne mam yʋʋrã me na n baoo maam.

¹⁸ Ade, yaa Zu-soabã sẽn wilg bõn-kãens hal yʋʋm zãrã n yeel a woto."

¹⁹ Yaa woto yĩng n kɩt tɩ mam togsdẽ t'a zemsame tɩ d da bao yell n kõ bu-zẽmsã sẽn sakd Wẽnnaamã ye.

²⁰ La bɩ d gʋls-b n yeel-b tɩ b lak b mens ne wẽn-naandsã maand nemdo la wɩɩbdo, la b ra wãb rũng sẽn sãrg nemdo, la b ra rɩ zɩɩm ye.

²¹ Tɩ bõe, hal kʋdem wẽndẽ tɩ ta moasã, b moonda a Moyiis tõogã tẽnsã pʋse, la b karemd-a karen-dotã pʋs vʋʋsg daar fãa.

²² Dẽ, tẽn-tʋmdbã ne kãsem-dãmbã la tẽedba fãa yãka yam n na n tũus neb kẽer bãmb sʋkã n tʋm-b tɩ b tũ a Poll ne Barnabas n kẽng Ãntiyos. Bãmb yãka a Zud b sẽn boond t'a Barsabas la a Sɩlaas. Bãmb b yiibã fãa yaa neb ba-biisã sẽn waoogda.

²³ B kɩs b la sebrã, la b sẽn gʋlsã yeelame yaa: Tẽn-tʋmdbã ne kãsem-dãmbã, la ba-biisã pʋʋsda ba-biis nins sẽn be bu-zẽmsã sʋk n be Ãntiyos la Siri ne Silisi soolma.

²⁴ Tõnd wʋmame tɩ neb kẽer n yi tõnd nengẽ n wa n dãmbd yãmb la b yuusd yãmb yam ne b goama. La ka tõnd n kõ-b noor ye.

²⁵ Yaa woto yĩnga, tɩ tõnd tigim taab n yãk yam a yembr n yãk neb n tʋm-b tɩ b na n yãag d zo-nongds a Poll ne a Barnabas n wa yãmb nengẽ.

²⁶ A Poll dãmb ra gẽnega b yõe tõnd Zu-soab a Zezi Kirist tʋʋmdã yĩnga.

²⁷ Rẽnda yĩng la d tʋm a Zud ne a Sɩlaas yãmb nengẽ. La b mens na n togs-y la bõn-kãense.

²⁸ Tɩ bõe, Sɩɩg-sõng ne tõnd me gesame tɩ yaa neere tɩ d da zɩlg-y zɩɩb sã n ka bũmb nins sẽn ya tɩlɛ wã ye. La yaa tɩ yãmb ka tog n wãb nemd

²⁹ b sẽn maan maoong n kõ wẽn-naands ye, la y ka tog n dɩ rũng sẽn sãrg ye, la y da rɩ zɩɩm ye, la y ra maan wɩɩbd ye. Yãmb sã n lak y mens ne bõn-kãense, y maana sẽn ya neere. Wẽnd na sõng yãmba.

³⁰ Dẽ, b basa b sẽn tʋm-b rãmbã tɩ b loog n kẽng Ãntiyos. La b tigma tẽedbã fãa beene n kɩs-b sebrã.

³¹ B sẽn kɩt tɩ b karem sebrã n sɛ, b fãa sũyã yɩɩ noogo, b sẽn paas bãmb raoodã yĩnga.

³² A Zud ne a Sɩlaas mens sẽn da ya Wẽnnaam no-rɛɛsdbã, b goma ne ba-biisã n kaoose, n paas-b raoodo la pãnga.

³³ La b sẽn pa Ãntiyos n kaoos bilfu, ba-biisã pʋʋs-b lame tɩ wẽnd na kuils-b laafɩ, n bas-b tɩ b lebg n leb neb nins sẽn tʋm-b bãmbã nengẽ.

³⁴ La a Sɩlaas yãka yam n na n pa Ãntiyos.

³⁵ La baoosgo, a Poll ne a Barnabas paa Ãntiyos. La bãmb ne neb a taab wʋsg ra zãmsda nebã la b moond-b koe-noogã sẽn ya Zu-soabã goama.

³⁶ Rasem bilf sẽn paase, a Poll yeela a Barnabas t'a wa tɩ b leb n kẽng tẽns nins fãa bãmb sẽn dag n moon Zu-soabã koɛɛgã n tɩ ges ba-biisã n bãng b kibar sẽn ya to-to.

³⁷ A Barnabas rag n dat n peega a Zã b sẽn boond t'a Mark t'a tũ-ba.

³⁸ La a Poll tagsame tɩ yaa neer tɩ b ra peeg-a Zã-Mark ye. Tɩ bala, a rag n lebg n basa bãmb Paamfili soolem n ka le yãag-b n maan tʋʋmdã ye.

³⁹ La b kɩɩsa taab wʋsg yel-kãng wɛɛngẽ hal n welg taaba. La a Barnabas peega a Mark n kẽ koom-koglg n na n kẽng Sɩpr.

⁴⁰ La a Poll yãka a Sɩlaas, la ba-biisã pʋʋsame tɩ Zu-soabã ning-b barka, la b loogame.

⁴¹ A Poll pɩʋʋga Siri ne Silisi soolem n paas a Zezi tẽedbã pãnga.

16

¹ A Poll taa Dɛrb ne Listri. Karen-biig a ye n dag n be beene t'a yʋʋr la a Tɩmote. A ma yaa Zuif poak sẽn ya tẽeda, la ba wã yaa Gɛrk buudu.

² Ba-biisã sẽn be Listr ne Ikoniyomã ra kɩta yẽ kaset sõngo.

³ A Poll dag n datame n peeg a Tɩmote, la tall-a lame n tɩ kẽes bãongo, Zuif-rãmbã sẽn dag n be tẽn-kãensã yĩnga. Bala, b fãa ra miime t'a Tɩmote ba wã yaa Gɛrka.

⁴ A Poll dãmb sã n ta tẽngẽ fãa, b togsda tẽedbã yam-yãkr nins tẽn-tʋmdbã ne kãsem-dãmbã sẽn be Zeruzalɛmã sẽn yãkã, sẽn na yɩlg tɩ b sak yam-yãk kãense.

⁵ A Zezi tẽedba tẽeb pãng da paasdame, la b sõorã ra paasda daar o daare.

⁶ La Sɩɩg-sõng sẽn gɩdg a Poll dãmb tɩ b ra moon Wẽnnaam koɛɛgã Azi soolem yĩnga, b pɩʋʋga Firzi ne Galasi soolem.

⁷ Bãmb sẽn kolg Mizi soolem, b makame n na n kẽng Bitini soolem, la a Zezi Sɩɩgã ka sak tɩ b kẽng ye.

⁸ Dẽ, bãmb pɩʋʋga Mizi soolmã, n kẽng n ta Torwas.

⁹ Yʋngo, a Poll paama vẽnegre. A yãa Masedoan ned sẽn yas n bõosd yẽ n yetẽ yaa: Wa-y Masedoan, n wa n sõng-do.

¹⁰ Vẽneg kãngã a Poll sẽn paamã zugẽ, tao-tao bala, tõnd baoome tɩ kẽng Masedoan. Tɩ bõe, tõnd yeela tɩ yaa Wẽnnaam n boond tõnd tɩ d tɩ moon koe-noogã soolem kãng pʋga.

¹¹ Tõnd kẽe koom-koglg Torwas n kẽng Samotars tɩrga. La vẽkembeoogo, tõnd kẽnga Neyapolis.

¹² La tõnd yii beene n kẽng Filip. Filip yaa Masedoan soolem na-tẽnga la ra yaa Rom nebã n so-a. Tõnd paa tẽn-kãng rasem bilfu.

¹³ Zuif-rãmbã vʋʋsgã daare, tõnd yii tẽngã n kẽng kʋɩlg noore, tõnd sẽn dag n tagsd tɩ d na n yãa pʋʋsg zĩig beene wã yĩnga. Tõnd zĩnda tẽnga, n gom ne pagb nins sẽn da tigim taab be wã.

¹⁴ Pag a yembr n dag n be be n zoet Wẽnnaam, t'a yʋʋr ya a Lidi. A yita Tɩyatɩɩr, la a koosda peen-miid sẽn be neer wʋsgo. Pʋg-kãng ra kelgdame, la Zu-soabã sɩɩsa a sũurã t'a sak n deeg bũmb nins a Poll sẽn da togsdã.

¹⁵ La yẽnda ne a yirã rãmb sẽn paam lisgu, a kosa tõnd a woto: Yãmb sã n tẽed tɩ mam tũuda Zu-soabã sɩd-sɩda, bɩ y wa n sig mam yirã n zĩnd be. La a pẽdga tõnd wʋsg n tõoge.

¹⁶ Tõnd wa n dag n dabda pʋʋsg zĩigẽ, la tʋmtʋmd-poak a yen sẽn ya kĩnkir bag n wa n seg tõndo. A zu-soben-dãmbã ra paamda ligd wʋsg a bagrã bʋgb yĩnga.

¹⁷ Yẽ sɩngame n pʋgd a Poll ne tõnd poor n yetẽ yaa: Nin-bãmba yaa Wẽnnaam sẽn-ka-to tʋmtʋmdba, la b wilgd-y la fãagr sore.

¹⁸ A maana a woto n kaoos rasem wʋsgo. La a Poll yam yii ne yẽnda t'a wẽnemd n yeel zĩna yaa: Mam yeta foom ne a Zezi Kirist yʋʋre tɩ f yi n bas bi-puglã. La wakat kãng bala, zĩna yiime n bas-a.

¹⁹ Tʋmtʋmd-poakã zu-soben-dãmbã sẽn yã tɩ b ka na n leb n paam ligd bi-puglã yĩnga, b yõka a Poll ne a Sɩlaas n tɛ-b n kẽng raagẽ wã, taoor dãmbã nengẽ.

²⁰ B talla a Poll dãmb n kẽng bʋ-kaoodba nengẽ n tɩ yeel yaa: Nin-bãmba sẽn ya Zuif-rãmbã rãmbda tõnd tẽngã,

²¹ n zãmsd nebã minindu, tõnd sẽn ya Rome nebã sẽn ka tar noor tɩ reeg-b wall d tũ-b ye.

²² Neb kʋʋngã yika zabr ne a Poll dãmba. La bʋ-kaoodbã kɩtame tɩ b pãrs a Poll ne a Sɩlaas futã la b yeel tɩ b pãb-b ne kalwaase.

²³ B sẽn pãb a Poll dãmb sõama n sɛ, b kẽes-b-la bi-bees roogo, la b yeel bi-bees roog gũudã t'a gũ-b neere.

²⁴ B sẽn yeel gũudã a woto n sɛ, a kẽesa bãmb roog sẽn be roog a to pʋgẽ n balg-b ra-bãongo.

²⁵ La sẽn kolg yʋʋn-sʋka, a Poll ne a Sɩlaas ra pʋʋsdame, la b yɩɩnd n waoogd Wẽnnaam. La bi-beesã ra kelgd-b lame.

²⁶ Tao-tao bala, tẽn-digemd kãseng n zĩndi, hal tɩ bi-bees roogã yẽbgr rigimdi. Wakat kãng bala, kʋɩlemsã fãa pagsame, la bi-beesã fãa bãens sogsame.

²⁷ Bi-bees roog gũuda nekame. La a sẽn yã tɩ bi-bees roogã kʋɩlems pagsame, a wõoga a sʋʋg n na n kʋ a menga, a sẽn tagsd tɩ bi-beesã zoeeme wã yĩnga.

²⁸ La a Poll zẽka a koɛɛg n yeel yaa: Da maan-y y meng bũmb ye! Tõnd fãa bee ka.

²⁹ Dẽ, bi-bees roog gũudã kosame tɩ b wa ne bugum, la a wudga tao-tao n kẽ bi-beesã roogẽ, n lʋɩ a Poll ne a Sɩlaas taoor ne rigbu.

³⁰ La yẽ yiisa a Poll ne a Sɩlaas yɩnga, n sok-b yaa: M neb sõamyã, bõe la mam tog n maan n paam fãagre?

³¹ La b leokame n yeele: Tẽ-y Zu-soab a Zezi, la yãmb ne y yirã rãmb na n paama fãagre.

³² La a Poll dãmb moona yẽnda ne neb nins fãa sẽn dag n be yẽ zakẽ wã Zu-soabã koɛɛga.

³³ Gũudã talla bãmb wakat kãng bala, ne yʋngã, n tɩ pegs b noadã. La tao-tao bala, yẽnda ne a zaka rãmb fãa paama koom lisgu.

³⁴ A talla a Poll dãmb n kẽ a zakẽ, n kõ-b rɩɩbo, la yẽ ne a yirã rãmb fãa paama sũ-noogo, b sẽn tẽ Wẽnnaamã yĩnga.

³⁵ La beoog sẽn vẽege, bʋ-kaoodbã tʋma gũudb tɩ b tɩ yeel bi-bees roogã gũud yaa: yiis nin-bãmbã n base.

³⁶ Bi-bees roogã gũud tɩ togsa a Poll gom kãens n yeele: Bʋ-kaoodbã tʋma koɛɛg n yeel tɩ m yiis-y n base. Rẽ wã, yi-y n loog-y ne laafɩ.

³⁷ La a Poll yeela gũudbã yaa: Bãmb kɩtame tɩ b pãb tõnd neba fãa taoore, tɩ tõnd bʋʋd nan ka kao ye, la b kẽes tõnd bi-bees roogo. Tõnd yaool n yaa Rom neba. Tɩ moasã, bãmb rat n soos n yiis tõndo? Bada! B wa b toor n wa n yiis tõndo.

³⁸ Gũudbã tɩ togsa bʋ-kaoodbã gom kãense. La b sẽn wʋm t'a Poll ne a Sɩlaas yaa Rom nebã, rabeem yõk-b lame.

³⁹ Dẽ, b waa n kosa a Poll dãmb sugri, n yiis-ba, la b bõos-b tɩ b yi tẽngã.

⁴⁰ Bãmb sẽn yi bi-bees roogã, b kẽnga a Lidi yiri. La b sẽn yã ba-biisã, b sagl-b lame la b looge.

17

¹ A Poll dãmb tũu Amfipolis ne Apoloni n ta Tesalonik. Zuif-rãmbã karen-doog n da be be.

² A Poll kẽe karen-doogẽ wã wa a sẽn minim n maandẽ wã, La a sõsa ne bãmb gʋlsg sõamyã wɛɛngẽ, vʋʋsg ray a taab n pʋgl taaba.

³ Yẽ ra bilgda bãmb la a wilgd-b tɩ Kirist da tog n namsame, la tɩ b na n vʋʋgame n bas kũum. A Poll yeel-b lame yaa: Zezi ning mam sẽn gomd ne yãmb b yellã, yaa bãmb la Kiristã.

⁴ La Zuif-rãmbã kẽer tẽe a Poll sẽn yeelã, la bãmb ne Gɛrk-rãmb kʋʋng wʋsgo, la pagb wʋsg me nebã sẽn waoogd naaga ne a Poll la a Sɩlaas.

⁵ La sũ-kiir yõka Zuif-rãmbã tɩ b kams ninsaan-faad neba sʋka, n kɩt tɩ b gũm taaba, n dambd tẽngã. B kẽnga a Zaazõ yirã n na n tɩ bao a Poll ne a Sɩlaas n tall-b n kẽng nebã taoore.

⁶ La b sẽn ka yãnd a Poll rãmba, b yõga a Zaazõ ne ba-biis kẽer n tall-b n kẽng tẽn-soaadbã taoore, n kelemd n yetẽ yaa: Nin bãmbã, sẽn dãmb-b dũni fãa wã waa ka me, la a Zaazõ reeg-b-la a yiri.

⁷ B fãa tʋʋmã kɩɩsda Sezaar noorã, la b yetame tɩ rĩm a to n be: a Zezi.

⁸ Gom-kãens namsa neb kʋʋngã ne tẽn-soaadbã.

⁹ La b kɩtame t'a Zaazõ ne neb a taabã gãneg yaood tɩ b yaool n bas-b tɩ b looge.

¹⁰ Tao-tao bala, ba-biisã kɩtame t'a Poll ne a Sɩlaas loog Beere ne yʋngã. La b sẽn ta beene bala, b kẽe Zuif-rãmba karen-doogẽ.

¹¹ Zuif-rãmb nins sẽn dag n be Beere wã da tara yam sõng n yɩɩd sẽn be-b Tesalonikã. Bãmb deega Wẽnnaam koɛɛgã ne b sũyã fãa. La daar fãa, bãmb da vɛɛsda gʋls sõamyã n dat n bãng bũmb nins b sẽn yet bãmbã sã n yaa a sɩda.

¹² Neb wʋsg bãmb sʋkã tẽeme, la Gɛrk-rãmba sʋk me, pagb wʋsg nebã sẽn nande, ne raop wʋsg tẽeme.

¹³ La Zuif-rãmb nins sẽn be Tesalonikã sẽn bãng t'a Poll da moonda Wẽnnaam koɛɛgã Beere me, b waa beene, n pirs nebã, n dãmb-ba.

¹⁴ Dẽ, tao-tao bala, ba-biisã kɩtame t'a Poll zãag n kẽng ko-kãsengã noore. La a Sɩlaas ne a Tɩmote paa Beere.

¹⁵ Neb nins sẽn yãag a Pollã talla yẽnda n ta Atɛn. La a Poll yeel-b lame tɩ b sã n leb bɩ b tɩ yeel a Sɩlaas ne a Tɩmote tɩ b babs-a n wa tao-tao. Dẽ, b lebgame.

¹⁶ A Poll sẽn be Atɛn n gũud a Sɩlaas ne a Tɩmote waoongã, yẽ sũurã sãama wʋsgo, a sẽn yã tɩ tẽngã pida ne wẽn-naandsã yĩnga.

¹⁷ Dẽ, a Poll dag n sõsda ne Zuif-rãmbã, la ne buud a taabã neb sẽn zoet Wẽnnaamã karen-doogẽ wã. La daar fãa, raagã pʋga, a ra sõsda ne neb nins sẽn wat be wã.

¹⁸ Epikuryẽ-rãmba ne Ɛstoyisẽ-dãmba karen-saam-dãmb kẽer me sɩngame n gom ne a Polle. La kẽer sokame tɩ gom-to-nedã rat n yeelame tɩ bõe? La neb a taab yetame tɩ yaa wa a Poll yaa wẽn-zẽms koe-toagsda, bala, a dag n gomda a Zezi la kũum vʋʋgr yelle.

¹⁹ La b talla a Poll n kẽng Areopaazã kãsem-dãmbã taoor n sok-a yaa: Dẽ yĩnga, fo tõe n togsa tõnd zãms-paalgã fo sẽn tarã võor tɩ d bãnge?

²⁰ Bala, bũmb nins fo sẽn togsd tõndã yaa bõn-sãams ne tõndo, la tõnd dat n bãnga b võore.

²¹ Tɩ bõe, Atɛn neba fãa ne sãambã sẽn be bãmb sʋkã da ka rɩkd b weerã n maand bũmb a to tɩ sã n ka tɩ gom, wall tɩ kelg koe-paals ye.

²² A Poll yik n yalsa Areopaazã sʋk n yeel yaa: Atɛn neba, bũmb fãa pʋgẽ, mam mikame tɩ yãmb yaa wẽn-pʋʋsdb meng-menga.

²³ Tɩ bõe, mam sẽn wa n kẽnd la m get bũmb nins yãmb sẽn dond n pʋʋsdã, mam pʋs n yãa tẽn-kugr a yen tɩ b gʋls a zug tɩ "wẽnnaam ning d sẽn ka mi wã rẽnda". Wẽnnaam ning yãmb sẽn waoogd n yaool n ka mi-bã, yaa Wẽnnaam kãng yell la mam sẽn gomd ne yãmbã.

²⁴ Wẽnnaam ning sẽn naan-a dũni wã ne bũmb nins fãa sẽn be a pʋgẽ wã, bãmb yaa yĩngr la tẽng Zu-soaba, la b ka kẽed pʋʋsg rot ninsaalb nus sẽn me pʋsẽ,

²⁵ la b ka baood me tɩ ninsaalb tʋm ne b nus n sõng-b wa bũmb n paoog-b ye. Tɩ bõe, yaa bãmb n kõt ninsaalbã vɩɩm, la vʋʋsem, la bũmbã fãa.

²⁶ Wẽnnaam talla nin-yend n kɩt tɩ ninsaalbã buud fãa zĩnd dũni zug tɛk fãa, la b welga wakat n kõ ninsaalbã, la b ning b soolmã tods n kõ-ba.

²⁷ Wẽnnaam maana bõn-kãnga, sẽn na n yɩlẽ tɩ ninsaalba bao bãmba, la tɩ b sẽn maood n dat n yãnd Wẽnnaamã, bɩ tõe tɩ b yãnd-ba. Tɩ bõe, Wẽnnaam ka zãr ne tõnd ned ba a yen ye,

²⁸ bala, yaa bãmb pʋg la d tar vɩɩm, la d tõe n kẽne la d beẽ. Yaa wala yãmb yʋʋmba kẽer sẽn dag n yeel me tɩ tõnd yaa Wẽnnaam koãmbã.

²⁹ Rẽ, wã yĩnga, tõnd sẽn ya Wẽnnaam kambã, d ka tog n tags tɩ Wẽnnaam wẽnda sãnem, wala wanzuri, wala kugr sẽn peese wa sẽn zems ninsaalb minim la b tagsg ye.

³⁰ Neba sẽn ka mi b sẽn maanda wakate, Wẽnnaam ka maand bũmb ye, La moasã, b yeta nebã fãa sẽn be zĩiga fãa tɩ b tek yam n kos sugri.

³¹ Tɩ bõe, Wẽnnaam yãka raare tɩ rao ning bãmb sẽn yãkã na n kao dũniyã fãa bʋʋd ne tɩrlem. La Wẽnnaam kõo neba fãa bãnde n vʋʋg rao-kãng n bas kũum n wilg tɩ yaa sɩda.

³² La b sẽn wʋm a Poll sẽn gomd kũum vʋʋgr yellã, kẽer yaala yẽnda, la kẽer yeelame tɩ b na n leb n kelga a Poll koe-kãnga nindaare.

³³ Dẽ, a Poll yii bãmb sʋka.

³⁴ La baoosgo neb kẽer lagma a Poll n tẽ. A Denis sẽn ya bʋ-kaoodba sʋk ned a yen dag n naaga be, ne pag a yembr yʋʋr sẽn boond t'a Damaris n leb n paas neb a taaba.

18

¹ Rẽ poore, a Poll basa Atɛn n kẽng Korẽnt.

² Yẽnda yãnda Zuif a yen beene t'a yʋʋr boondẽ t'a Akilas, yẽ yaa soolem a yen sẽn boond tɩ Põ neda. La yẽnda ne a pag a Pirsill yii Itali soolem n nan wa be paalem, naab a Kolood sẽn dag n yiis tõog n yet tɩ Zuif-rãmba fãa yi Rom tẽnga yĩnga. A Poll kẽnga bãmb nengẽ.

³ La a Poll nug-tʋʋmdã ne bãmb dẽndã sẽn dag n ya bũmb a yembrã, yẽ zĩnda bãmb yirã n naag taab n tʋmdẽ. Bãmb dag n sẽta fu-roto.

⁴ Vʋʋsg daar fãa a Poll moonda koɛɛg karen-doogã pʋgẽ n maoodẽ tɩ Zuif-rãmba ne Gɛrk-rãmba tẽ-a.

⁵ La a Sɩlaas ne a Tɩmote sẽn yi Masedoan a wa, a Poll rɩka a weerã zãng n moon koe-noogã n yeel Zuif-rãmba tɩ yaa a Zezi la Kiristã.

⁶ La Zuif-rãmba ra kɩɩsda a Poll la b tʋʋd-a. Dẽ, yẽnda fugsa a fut n yeel-b yaa: Yãmb sã n sãame, a taala bee ne yãmba la a ka be ne maam ye. La sẽn sɩng ne moasã, mam na n kẽnga bu-zẽmsã nengẽ.

⁷ Dẽ, a Poll yii be n kẽng ned a yembr yʋʋr sẽn boond t'a Titiyuus Zustus yiri, yẽ yaa ned sẽn zoet Wẽnnaam dabeem, la a zakã ra pẽe ne karen-doogã.

⁸ La a Kirspus sẽn ya karen-doog naaba ne a yirã rãmb fãa tẽe Zu-soabã. La Korẽntẽ neb wʋsg sẽn wʋm a Poll koe-moonegã bãmb me tẽeme n paam koom lisgu.

⁹ La yʋngo, Zu-soaba goma ne a Poll vẽnegr pʋg n yeel-a yaa: Da zoe rabeem ye, kẽng taoor n gom la f ra sĩnd ye.

¹⁰ Tɩ bõe, mam bee ne foom, la ned ba a yen kõn tõog n yõk foom n maan-f wẽng ye, bala, neb wʋsg n be tẽn-kãnga pʋg n ya mam neba.

¹¹ A Poll zĩnda Korẽnt yʋʋmd la kiis a yoobe, n zãms nebã Wẽnnaam goama beene.

¹² La wakat ninga a Galiyõ sẽn dag n ya Akayi soolem Gʋvɛrneerã, Zuif-rãmba lagma taab n dõd a Poll n tall a n kẽng bʋʋd zĩigẽ.

¹³ B tɩ yeelame yaa: Rao-kãnga sẽn baood n kɩt tɩ nebã waoog Wẽnnaam to-to wã ka zemsd ne tõogã ye.

¹⁴ A Poll sẽn yet t'a na n gome, la a Galiyõ sẽn yeel Zuif-rãmba yaa: Zuif-rãmba, sã n dag ya bũmb sẽn ka tɩrg wala tʋʋm wẽng poorẽ, mam dag n na n maaga m meng n kelg yãmba.

¹⁵ La sã n yaa nokoɛɛma, goam poorẽ, la yʋy la yãmb mens tõogã poorẽ, yõwã yaa yãmb la pak-yã. Mam ka na n yɩ bõn-kãens bʋ-kaood ye.

¹⁶ La a Galiyõ riga bãmb tɩ b yi bʋʋda zĩigẽ.

¹⁷ Dẽ, b naaga taab n yõk a Sostɛn sẽn ya karen-doog naabã n sɩng n pãbd-a bʋʋda zĩig noore. La a Galiyõ dag n ka maand yɩɩr ne yel-kãng ye.

¹⁸ A Poll kell n paa Korẽnt n kaoose. Dẽ, a yaool n basa ba-biisã n kẽ koom-koglg n kẽng Siri la a Pirsill ne a Akilas tũu yẽnda. La sẽn deng a Poll sẽn na n kẽ koom-koglgã, a kɩtame tɩ b põng a zugã Sãnkre, bala yẽ rag n pʋlma Wẽnnaam.

¹⁹ Bãmb taa Efɛɛse, la a Poll basa a Akilas ne a Pirsill beene. A Poll kẽnga karen-doogẽ n tɩ sõs ne Zuif-rãmbã.

²⁰ La b kos-a lame t'a pa be n kaoose, la a zãgsame.

²¹ A Poll pʋʋsa bãmb wẽn-na-taas n yeel-b yaa: kibsã sẽn watã, yaa tɩlɛ tɩ mam maan-a Zeruzalɛm. Wẽnnaam sã n data, mam na n leb n waa yãmb nengẽ. La yẽ kẽe koom-koglg Efɛɛs n looge.

²² A Poll sẽn sig Sezaare, a kẽnga Zeruzalɛm n na n tɩ pʋʋs a Zezi tẽedbã n yaool n kẽng Ãntiyos.

²³ La yẽnda sẽn kaoos Ãntiyos bilfu, a lebg n dɩka sor n kẽng tẽng-tẽnga, n pɩʋʋg Galasi soolem ne Firzi soolem n paas karen-biisã fãa pãng b tẽebã pʋga.

²⁴ Zuif a yembr yʋʋr sẽn boond t'a Apolos n dag n wa Efɛɛse, yẽ roga Alegsãndri. Yẽ yaa ned sẽn ya gom-minim soaba la yẽ ra mii gʋls-sõamyã neere.

²⁵ B rag n zãms-a-la Zu-soabã sore. La baa sẽn da yaa a Zã lisgã yell bal la yẽ mi wã, a ra zãmsda neba ne a sũura fãa bũmb nins sẽn wilgd a Zezi kibarã tɩrga.

²⁶ Dẽ, a Apolos sɩngame n gom karen-doogã pʋg ne pɛl-kɛgenga. La a Pirsill ne a Akilas sẽn wʋm yẽ koɛɛgã, b peeg-a lame n maneg n zãms-a Wẽnnaam sorã tɩrg n paase.

²⁷ A Apolos sẽn dat n kẽng Akayi wã, ba-biisã paasa yẽnda raood n gʋls sebr n tʋm karen-biisã sẽn be soolem kãngã n yet tɩ b reeg-a neere. La yẽ sẽn ta beene, a sõnga neb nins sẽn ya tẽedbã wʋsg ne Wẽnnaam barkã.

²⁸ Bala, yẽ goma wʋsg ne Zuif-rãmbã, n tall gʋls-sõamyã nebã taoor n wilg-b t'a Zezi yaa Kiristã.

19

¹ A Apolos sẽn wa n be Korẽntã wakate, a Poll pɩʋʋga soolem nins sẽn be zugẽ wã n kẽng Efɛɛse. A Poll yãa karen-biis kẽer be,

² n sok-b tɩ b sẽn tẽ wã, b paama Sɩɩg-sõngo. La b leoka yẽnda tɩ bãmb zɩɩ n wʋm tɩ b gomd tɩ Sɩɩg-sõng n be ye.

³ T'a Poll sok-b tɩ rẽ wã lisg ninga b sẽn deegã yaa bʋgo? Tɩ b leok tɩ yaa a Zã lisgã.

⁴ Dẽ, a Poll yeel-b lame yaa: A Zã rag n lisda neb nins sẽn tek-b yam n kos sugrã, la b rag n yeta Israyɛl nebã tɩ b tẽ ned ningã sẽn na n pʋgl a yẽnda n wa wã. Sẽn dat n togs t'a Zezi.

⁵ Bãmb sẽn wʋm a woto, b kɩtame tɩ b lis-b koomẽ ne Zu-soab a Zezi yʋʋre.

⁶ A Poll tika bãmb ne a nusi, la Sɩɩg-sõng siga b zutu. Bãmb sɩngame n gom gom-zẽna n togs bãngr goama.

⁷ Nin-kãens fãa sõorã ra kolga piig la a yiibu.

⁸ A Poll kẽe karen-doogẽ wã n gom ne Pɛl-kɛgenga, la yẽ moona Wẽnnaam soolem koɛɛgã kiis a tãabo n maood n dat n wilg sẽn kelgd-b yẽ wã tɩ yaa sɩda.

⁹ La neb kẽer riglima b sũyã n tõgdg tɩ b ka na n tẽ ye. La b gom Zu-soaba sor wẽng neb wʋsgã taoore. Dẽ, a Poll yii bãmb sʋk, n peeg karen-biisã toor n kẽng a Tiranuus kaorengã roog pʋg n zãms-b daar fãa.

¹⁰ Bõn-kãng kaoosa yʋʋm a yiibu, hal tɩ Zuif-rãmba ne Gɛrk-rãmba la neb nins fãa sẽn be Azi soolma wʋm Zu-soabã koɛɛgã.

¹¹ La Wẽnnaam maana bõn-bãn-kãsems ne a Poll nusi.

¹² Hal tɩ b rɩgs pɛɛla wala fut sẽn da sɩɩs a Poll yĩngã n ningd bãad-dãmba zut la b paamda maagre, la sɩ-wẽnsã yit n basd-b lame.

¹³ Tɩt rãmb kẽer sẽn da ya Zuif buud n ya gõaadb makame n na tall Zu-soab a Zezi yʋʋrã n dig zĩn-dãmb tɩ b yi n bas bãad-dãmba. Tɩtã rãmb yeela sɩ-wẽnsã yaa: Ne a Poll sẽn moond Zezi ningã wã yʋʋre, mam yeta yãmb tɩ y yi.

¹⁴ Neb nins sẽn dag n maand a woto wã yaa Zuif-rãmba maan-kʋʋdbã kãsem a yen yʋʋr sẽn boond t'a Seva kom-dibli a yopoe.

¹⁵ La sɩ-wẽnga leok-b lame yaa: Mam mii a Zezi, la m mii a Poll sẽn ya ned ninga. La yãmba, yãmb yaa ãnna rãmba?

¹⁶ La sɩ-wẽngã sẽn tar ned ningã yikame n yẽeg-b n zab ne-b n tõog-b fãa ne pãng hal tɩ b zoe n yi ro-kãng pʋg bɛɛl la ne sãmpoaga.

¹⁷ La Zuif-rãmba ne Gɛrk-rãmba sẽn da be Efɛɛs fãa wʋma bõn-kãnga: La rabeem yõka b fãa, la Zu-soab a Zezi yʋʋrã paama waoogre.

¹⁸ Neb nins sẽn tẽ wã wʋsg dag wat n togsda b sẽn da maan bũmb ninsã neba taoore.

¹⁹ La bãmb neb wʋsg sẽn da be bãmb sʋkã n ya bag-bʋgdbã talla b sɛbã n wa n yõog bugum neba fãa taoore. La b geela sɛba ligd n mik tɩ taa wanzuri ligd tus pis nu.

²⁰ Woto kɩtame tɩ Zu-soaba koɛɛg saag ne pãnga la tõogre.

²¹ Bõn-kãens zugẽ, a Poll yãka yam n na pɩʋʋg Masedoan ne Akayi n kẽng Zeruzalɛm, la a yet tɩ yẽ sã n ta beene, yaa tɩlɛ t'a kẽng Rom tẽng me.

²² A Poll tʋma a sõangdb a yiib tɩ b kẽng Masedoan, yaa a Tɩmote ne a Erast. La yẽnda meng leb n paa Azi soolem n kaoos bilfu.

²³ Wakat kãnga, rãmb-kãsems n yik Zu-soabã sor wɛɛngẽ.

²⁴ Yõak a yembr n da be t'a yʋʋr boond t'a Demetiryus, yẽ ra maanda wẽn-poak a Artemi pʋʋsg ro-bõoneg ne wanzuri. A maanda a woto t'a tʋmtʋmdba paamd ligd wʋsgo.

²⁵ Yẽ tigma nin-bãmb ne neb nins sẽn ya yõgsã n yeel-b yaa: Raopa, yãmb fãa miime tɩ yaa ne nug-tʋʋm kãngã la tõnd tʋmd n paamd ligdi.

²⁶ La yãmb yãtame la y wʋmd bũmb nins rao a Pollã sẽn maandã. Tɩ bõe, yẽnda yetame tɩ neba nus sẽn maan wẽnnaam-dãmba ninsã ka wẽnnaam-dãmb ye, la a tõogame n tek neb wʋsg yam. La ka Efɛɛs soolem bal ye, yaa sẽn kolg Azi fãa gilli.

²⁷ Sã n ka gũusi, bõn-kãnga na n sãama tõnd tʋʋmdã, la sẽn paase, a na n maaname tɩ wẽn-poak kãseng a Artemi pʋʋsgã roog ka leb n tar waoogr ye. Dẽ, Azi soolem nebã fãa ne dũniyã fãa sẽn da pʋʋsd wẽn-poak ninga ka na n le paam pẽgr ye.

²⁹ La tẽnga fãa rãmbame. Bãmb yõga Gayus ne a Aristark sẽn ya Masedoan neba n yaa a Poll tũud-n-taasã, n naag taab n wudg tao-tao n kẽ reema zĩigẽ.

³⁰ A Poll dag n dat n kẽnga neb kʋʋngã taoore, la karen-biisã gɩdg-a lame.

³¹ Kãsem-dãmb kẽer meng sẽn be Azi soolem n ya a Poll Zo-rãmb tʋmame tɩ b kos-a t'a ra kẽng reema zĩigẽ ye.

³² La wakat kãnga, neb kẽer kelemdame n yet tɩ woto, tɩ neb kẽer kelem n yeel bũmb a to. Tɩ bõe, neb kʋʋngã rãmbdame, hal tɩ neb kẽer meng rag ka mi bũmb ning yĩng sẽn kɩt tɩ b tigma ye.

³³ La b kɩtame t'a Alegsãndr yi kʋʋngã sʋka, tɩ Zuif-rãmba tus-a t'a kẽng neba taoore. La a Alegsãndr zẽka a nug n na n gom neba taoore.

³⁴ La neba sẽn bãng t'a Alegsãndr yaa Zuifã, b fãa naaga taab n kelem hal tɩ kolg lɛɛr a yiib n yetẽ tɩ Efɛɛsẽ-rãmbã wẽn-poak a Artemi yaa kãsenga.

³⁵ Baoosgo, tẽnga seb-gʋlsdã tõogame tɩ neba sĩndi, la a yeel yaa: Efɛɛs neba, ãnna soab n ka mi tɩ yaa Efɛɛz tẽngã n ya Artemi kãsenga pʋʋsg roog gũuda, la Artemi naandã sẽn yi yĩngr n lʋɩ wã gũuda?

³⁶ La ned ka tõe n kɩɩs bõn-kãng ye. Rẽ wã yĩnga, y tog n maaga y mense n da maan bũmb baa fʋɩ ne yãgb ye.

³⁷ Tɩ bõe, rao-kãens yãmb sẽn tall n wa ka wã, b ka paooge, wala b tʋʋs tõnd wẽn-poakã ye.

³⁸ Rẽ wã yĩnga, a Demetiryus ne a tʋmd-n-taasã sã n tar yell ne neda, bʋʋd ray beeme, la bʋ-kaoodb beeme. Bɩ b tɩ bʋ ne taab be.

³⁹ Yãmb sã n ket n tar yɛl a taaba, bʋ-kaoodbã sã n wa tigim wa sẽn zems ne tõogã, b na ges yel-kãng yelle.

⁴⁰ La sɩdã, b tõe dõda tõnd n yet tɩ d rãmbda tẽngã, bũmb ning sẽn maan dũnna wã yĩnga. Bala, tõnd ka tar bũmb sẽn wilgd tɩ d tara noor tɩ tigim a woto ye.

⁴¹ La yẽ sẽn gom a woto n sɛ, a kɩtame tɩ nebã looge.

20

¹ La rãmbgã sẽn sigi, a Poll tigma karen-biisã n paas-b raood n yaool n loog n kẽng Masedoan.

² Yẽ pɩʋʋga zĩig zĩig soolem kãng pʋg n sagl karen-biisã wʋsgo, n yaool n kẽng Gɛrs tẽnga.

³ La a Poll zĩnda Gɛrs soolem kiis a tãabo. La yẽ rag n dat n kẽe koom-koglg n kẽng Siiri, la Zuif-rãmbã sẽn soos n sed n dat yõk-a wã yĩnga, yẽ yãka yam n na n lebg n tũ Masedoan sore.

⁴ Neb nins sẽn yãag a Poll n ta Azi soolma, yaa Beere rao a Pirus biiga a Sopatɛɛr ne a Aristark ne a Sekõndus sẽn yit Tesalonik la a Gayus sẽn yit Dɛrb tẽnga, ne a Tɩmote ne a Tisik la a Torfim sẽn dog Azi soolma.

⁵ Nin-kãens renga taoor n tɩ gũ tõnd Torwas soolem.

⁶ La bur sẽn ka rã-bɩll kibsã loogr poore, tõnd mensã kẽe koom-koglg Filip. La sẽn kaoos rasem a nu, tõnd tɩ bʋʋga bãmb Torwas, la d zĩnda be rasem a yopoe.

⁷ Dimaas daar zaabre, tõnd dag n tigmame n na dɩ tẽegr buri. A Poll sẽn da tog n loog vẽkembeoogã, yẽ moona koɛɛgã ne karen-biisã n gom n kaoos halɩ n ta yʋn-sʋka.

⁸ Yĩngr doog ninga pʋg tõnd sẽn da tigma, fɩtl-dãmb wʋsg n dag n be be.

⁹ La bi-bɩɩg a yen yʋʋr sẽn boond t'a Etikus n da zao fẽnetr zugu. La a gũsa sõama, a Poll koe-moon-wokã wakate. La gõeemã sẽn dɩk-a wã yĩnga, a yii yĩngr ro-tomdem a tãab soabã n lʋɩ tẽnga. La b rɩk-a lame n mik t'a kiime.

¹⁰ La a Poll sigame n zõond a Etikus zug n dɩk-a a nusẽ n yeel yaa: Da maan-y yɩɩr ye, a vɩɩme.

¹¹ La a Poll sẽn lebg n dʋ, a Kao burã n dɩ. La a gomame yɛs n kaoos hal tɩ beoogã vẽege, n yaool n looge.

¹² La b yãaga bi-bɩɩgã vɩɩga. La a yɩɩ belsg kãseng bãmb fãa yĩnga.

¹³ Tõnd denga taoor n kẽ koom-koglg n kẽng Asos, yaa be la tõnd da tog n tɩ seg a Poll n dɩke, yẽnda n da yãk yam a woto n na n kẽn ne nao n kẽng be.

¹⁴ La a Poll sẽn seg tõnd Asose, a kẽe koom-koglgã ne tõnd n kẽng Mitilɛn.

¹⁵ Tõnd yika be ne koom-koglgã n looge, la vẽkembeoogo, tõnd taa tẽng sẽn boond tɩ Siyo taoore, la daar ning sẽn pʋgdã, tõnd taa Samos, la daar ninga sẽn pʋgla yẽ wã, tõnd siga Mile.

¹⁶ A Poll dag n sɩd yãka yam n na n loog Efɛɛs n da sig be ye, sẽn na n yɩl n da sãam weer Azi soolme wã ye. Tɩ bõe, yẽ ra yãgdame n datẽ tɩ sã n tõe, bɩ a zĩnd Zeruzalɛm Pãntekotã daare.

¹⁷ A Poll zĩnda Mile n tʋm koɛɛg tɩ b bool a Zezi tẽedbã kãsem-dãmbã sẽn be Efɛɛsã tɩ b wa.

¹⁸ La b sẽn wa n ta a Poll nengẽ, yẽ yeel-b lame yaa: Yãmb mii mam yel-manesem sẽn yɩ to-to ne yãmb wakat fãa, sẽn sɩng ne daar ning mam sẽn wa Azi soolmã pʋgẽ wã.

¹⁹ Mam tʋma Zu-soab yĩng ne sik-m-menga, baa ne nintãmã, la tood nins mam sẽn paamã, Zuif-rãmbã sẽn da set n dat n kʋ maamã.

²⁰ Yãmb miime tɩ mam ka solg yãmb bũmb nins fãa sẽn na n sõng-y wã ye. Mam togsa yãmb bũmba fãa la m zãms-y nebã sʋka la rot pʋse.

²¹ Mam kɩsa kaset ne Zuif-rãmba la Gɛrk-rãmbã n yeel-b tɩ b tek yam n kos Wẽnnaam sugri, la b tẽ tõnd Zu-soab a Zezi.

²² La moasã, Sɩɩg-sõng sẽn modgd maam tɩ m kẽng Zeruzalɛmã, mam na n kẽngame, la m ka mi bũmb ning sẽn na n tɩ paam maam be ye.

²³ Mam sẽn mi bala, yaa tɩ Sɩɩg-sõng keoogda maam tẽng tẽnga, tɩ bi-bees roogo la namsg n gũud maam.

²⁴ La mam tagsdame tɩ mam vɩɩmã ka tar yõod ne maam ye. La sẽn pak maam yaa tɩ m wee n tõog n maan m tʋʋmdã hal n ta a tɛka, n tõog n baas tʋʋmd ning Zu-soab a Zezi sẽn ning mam zugã, n moon Wẽnnaam barkã koe-noogã.

²⁵ Mam zĩnda yãmb sʋk n moon Wẽnnaam soolem koɛɛgã, la mam mii moasã tɩ yãmb ned baa a yen ka na n le yã mam neng yɛs ye.

²⁶ Yaa woto yĩng tɩ mam togsd yãmb dũnna, tɩ yãmb ned a yen sã n sãame, a taalã ka be ne maam ye.

²⁷ Bala, mam togsa yãmb Wẽnnaam daabã fãa n ka solg bũmb ye.

²⁸ Dẽ wã, gũus-y mense, la y ges piis nins fãa Sɩɩg-sõng sẽn kõ-y tɩ y gũ wã yelle. Rɩlg-y Zu-soabã tẽedbã b sẽn da ne b biigã zɩɩmã.

²⁹ Mam miime tɩ mam loogr poore, neb sẽn wẽnd wa rigd-n-yĩid toos n na n wa yãmb sʋk n sãam piisã.

³⁰ La neb n na n yik yãmb sʋkã n zãmsd nebã sẽn ka sɩda, n maan a woto n belg tẽedba tɩ b tũ-ba.

³¹ Rẽ wã yĩnga, neend-y la y tẽeg tɩ yʋʋm a tãabo, mam sagla yãmb ned kam fãa ne nintãm, wĩntoog ne yʋng n ka bas ye.

³² La moasã, mam basda yãmb Wẽnnaam nugẽ, la m basd-y ne bãmb bark goamã sẽn tar pãng n tõe n paas yãmb daoodo, la a kɩt tɩ yãmb yɩ pʋɩt-n-taas ne Wẽnnaam neba fãa wã.

³³ Mam ka maan sũ-kiir ne ned ligdi, wall a sãnem, wall a fut ye.

³⁴ Yãmb mens miime tɩ mam tʋma ne m meng nus n na n paam bũmb ning sẽn na sek maam ne neb nins sẽn tũud maamã.

³⁵ Mam wilga yãmb bũmb fãa pʋgẽ tɩ d tog n tʋma a woto n tõog n sõng naong rãmba, la d tẽeg goam nins Zu-soab a Zezi meng sẽn yeelã: Tɩ kõ bee bark n yɩɩd tɩ reege.

³⁶ A Poll sẽn gom a woto n sɛ, a yĩgimdame n pʋʋs ne bãmb fãa.

³⁷ La b fãa ra yãbda wʋsgo, n mobgd a Poll n mogsd-a, n pʋʋsd-a wẽnd-na-taase.

³⁸ La b sũyã sẽn sãam ne bũmb ning n yɩɩd yaa a Poll sẽn yeel tɩ b ka na n leb n yãnd-a wã. Rẽ poore, b yãaga yẽnda hal n ta koom-koglgẽ wã.

21

¹ La tõnd sẽn bas bãmba, d kẽe koom-koglg n loog n kẽng tɩrg n ta Kos. La vẽkembeoogo tõnd taa Rood, n yaool n yi be n kẽng Patara.

² Tõnd yãnda koom-koglg beene sẽn dag n dabd Fenisi, tõnd yaool n kẽe yẽnda n kẽnge.

³ Tõnd sẽn kẽng n kolg Sɩpre, tõnd bas-a-la goabg n kẽng Siiri sẽne n na yeg Tɩɩr n tɩ sig zĩig ning koom-koglgã sẽn tog n sik a zɩɩbã.

⁴ Tõnd yãa tẽedb beene la tõnd paa ne bãmb rasem a yopoe. La Sɩɩg-sõng wilga bãmb tɩ b yeel a Poll t'a ra kẽng Zeruzalɛm ye.

⁵ La rasem kãens loogr zugẽ, tõnd loogame. La b fãa ne b pagbã la b kambã yãaga tõndo, hal n yi tẽnga pʋgẽ. Tõnd yĩgimda koomã noor n pʋʋse.

⁶ Dẽ, tõnd sẽn pʋʋs taab wẽnd-na-taas n sɛ, tõnd kẽe koom-koglgẽ wã, la b lebgame n kuil b yiyã.

⁷ Tõnd sẽn kẽn ne koom-koglgã n sɛ, tõnd yii Tɩɩr n kẽng Tolemayiis n tɩ pʋʋs ba-biisã la d zĩnd ne bãmb beene daar a yen.

⁸ Vẽkembeoogo, tõnd loogame n ta Sezaare. Tõnd siga koe-moaand a Filip zakẽ. Yẽnda yaa neb a yopoe wã b sẽn da tũus Zeruzalɛmã nin-yende.

⁹ La yẽ ra tara kom-pugli a naas sẽn nan ka mi rao ye, n ya Wẽnnaam no-rɛɛsdba.

¹⁰ Tõnd paa Sezaare rasem wʋsgo, la Wẽnnaam no-rɛɛs a yen yʋʋr sẽn boond t'a Agabus yii Zude n wa tõnd nengẽ.

¹¹ Yẽ rɩka a Poll sẽbdgã n sẽb a nao ne a nus n yeel yaa: Ade, Sɩɩg-sõng yetame tɩ Zuif-rãmbã na n sẽba ned ning sẽn so-a sẽbd kãnga wã a woto Zeruzalɛm, n ning-a bu-zẽmsa nusẽ.

¹² Tõnd ne neb nins sẽn be Sezaare wã sẽn wʋm bõn-kãnga, tõnd kosa a Poll t'a ra kẽng Zeruzalɛm ye.

¹³ La a Poll leokame: yaa bõe n tar yãmb tɩ y yãbd n na n sãam mam sũuri? Bala, mam seglame n sɛ, la ka sẽbrã yĩng bal ye. M seglame me n na n ki Zeruzalɛm Zu-soab a Zezi yʋʋrã yĩnga.

¹⁴ La yẽ sẽn ka sak tõnd sẽn datã, d bas-a lame la d yeel tɩ Zu-soabã maan b raabo.

¹⁵ Rasem kãens sẽn looge, tõnd segla d teed n kẽng Zeruzalɛm.

¹⁶ Sezaare karen-biis kẽer me yãaga tõndo. B talla tõnd n tɩ ta rao a yen sẽn yit Sɩpr t'a yʋʋr boond t'a Nazõ yiri. Yẽ yaa karen-bi-kʋdre. Yaa yẽ zakẽ la tõnd tog n zĩndi.

¹⁷ Tõnd sẽn ta Zeruzalɛm, ba-biisã reega tõnd ne sũ-noogo.

¹⁸ Vẽkembeoogo, a Poll kẽnga a Zak yir ne tõndo, la a Zezi tẽedba kãsem-dãmb fãa tigma beene.

¹⁹ A Poll sẽn pʋʋs-b n sɛ, a sɩngame n togs bãmb bũmb nins fãa Wẽnnaam sẽn tall yẽnda n maan bu-zẽmsã sʋkã.

²⁰ Bãmb sẽn kelg a Poll goama, b pẽga Wẽnnaam la b yeel a Poll yaa: Ba biiga, yãmb yãame, Zuif-rãmb tus wʋsg n lebg tẽedba, la b fãa wɩngda ne a Moyiis tõogã.

²¹ Mik b ra kɩtame tɩ bãmb tẽed tɩ yãmb zãmsda Zuif-rãmb nins fãa sẽn be bu-zẽmsa sʋkã n yet-b tɩ b wẽnemd n bas a Moyiis tõogã, la b ra kẽes b kamba bãongo, la b ra tũ mininda ye.

²² Dẽ wã, d na n maana wãna? Bala, neb wʋsg na n sɩd wʋmame tɩ y waame la neb kʋʋng na n tigmame.

²³ Woto yĩnga, bɩ y maan bũmb ninga tõnd sẽn na n yeel-y wã. Tõnd tara raop a naas sẽn maan pʋleng ne Wẽnnaam.

²⁴ Peeg-y-ba, n naag ne-b n sak miningã n yɩlg-y mense, la y yao yaoodã, tɩ b põng b zutã. Dẽ neba fãa na n bãngame tɩ bũmb nins fãa b sẽn wʋm tɩ b gomd yãmb wɛɛngẽ wã ka sɩd ye, la tɩ yãmb meng sakda a Moyiis tõogã.

²⁵ Sã n ya ne bu-zẽms nins sẽn lebg tẽedbã, tõnd gʋls-b lame n yeel-b tɩ b ra wãb rũms nemd b sẽn maan maoong n kõ wẽn-naands ye, la b ra rɩ zɩɩm, la b ra wãb rũng sẽn sãrg nemd ye, la b ra maan wɩɩbd ye.

²⁶ Vẽkembeoogo, a Poll peega nin-bãmba b naasã n naag ne-b n yɩlg-b mense, n yaool n kẽ wẽnd-doogẽ wã n togs nebã bãmb yɩlgrã rayã sẽn na n baas wakat ninga, la wakat ning bãmb ned kam fãa sẽn na n wa ne a kũun tɩ b maan maoongã.

²⁷ Rasem a yopoe wã sẽn kolg pidsgu, Zuif-rãmbã sẽn yit Azi soolmã sẽn yãa a Poll wẽnd-doogã pʋgẽ, b rãmba neb kʋʋngã gilli, n yõk a Polle,

²⁸ n kelemd n yetẽ yaa: Israyɛl neba, wa n sõng-y-do! Ad rao ninga sẽn zãmsd neba fãa zĩiga fãa tɩ b kɩɩs Israyɛl buudã, la b kɩɩs a Moyiis tõogã la zĩ-kãnga, la a kɩtame meng tɩ Gɛrk-rãmb kẽ wẽnd-doogẽ wã n kɩt tɩ zĩ-sõng-kãnga rẽgme.

²⁹ Bala b rag n yãa Efɛɛs rao a Torfim t'a tũud a Poll tẽngã pʋgẽ, la b tagsdame t'a Poll tall-a lame n kẽ wẽnd-doogẽ wã.

³⁰ Tẽngã fãa rãmbame, la neb yii zĩiga fãa n zoe n wa. B yõka a Poll n tɛ-a n yiis wẽnd-doogẽ wã, la b pag kuɩlemsã tao-tao.

³¹ La b sẽn dat kʋ a Pollã, b wa n togsa sodaas tusr naaba tɩ Zeruzalɛm fãa dãmbame.

³² Wakat kãng bala, yẽ yãka sodaase, la sodaas koabg nanamse, n zoe n kẽng neba nengẽ. Nebã sẽn yã sodaas tusr naaba ne sodaasã, b basa a Poll pãbre.

³³ Dẽ, sodaas tusr naaba kolgame n yõka a Poll n kɩt tɩ b balg-a ne bãens a yiibu. La a yaool n sok a Poll sẽn ya ned ninga, la a sẽn maan bũmb ninga.

³⁴ La neb kʋʋngã sʋka, kẽer kelemdame n yet tɩ woto, tɩ kẽer yet bũmb a to. Dẽ, bʋrgã sẽn ya wʋsg tɩ sodaas tusr naabã ka tõe n bãng sẽn ya sɩdã, a yeelame tɩ b tall a Poll n kẽng gãosgẽ wã.

³⁵ La a Poll sẽn ta rʋʋdgã, yɩɩ tɩlɛ tɩ sodaasã tebg yẽnda, neb kʋʋngã sẽn maood n dat n maan a Poll pãnga yĩnga.

³⁶ Bala, b fãa ra pʋgdame n kelemdẽ n yetẽ tɩ b kʋ-a.

³⁷ La wakat ning b sẽn tar a Poll n kẽed gãosgẽ wã, a Poll yeela sodaas tusr naabã yaa: M tara noor tɩ yeel-y bũmbu? La sodaas tusr naabã sok-a lame yaa: Fo mii Gɛrk goamã?

³⁸ Rẽnd fo ka Ezipt ned ninga sẽn dag n wa-a ne rãmbg pĩndã, n peeg nin-kʋʋdb tus a naas tɩ b tũ-f n kẽ weoogã wɛ?

³⁹ A Poll leokame yaa: Mam yaa Zuif, m doga Tars sẽn be Silisi soolem, m yaa tẽn-kãseng neda. M bõosd-y lame tɩ y kõ-maam noor tɩ m gom ne nebã.

⁴⁰ La sodaas tusr naabã kõ-a-la noore, la a Poll yik n yalsa rʋʋdgã zug n zẽk a nug n zãas neba, la bʋrga sɛɛme, tɩ lebg sɩddd. Dẽ, yẽ gomã ne bãmb ne hebre-rãmb goamã.

22

¹ A Poll yeela nebã yaa: M ba-biisi la m ba-rãmba, kelg-y bũmb ning mam sẽn tar moasã n na n togs yãmb n yiis m meng yellẽ wã.

² Bãmb sẽn wʋm t'a Poll gomd ne bãmb ne Hebre-rãmba goama, b yalsa sɩddd n yɩɩd pĩnda. Dẽ, a Poll yeel-b lame.

³ Mam yaa Zuif sẽn dog Tars sẽn be Silisi soolem. La b wuba maam Zeruzalɛm ka la mam zĩnda a Gamalyɛl taoor tɩ b zãms maam tɩ m bãng tõnd yaab-rãmbã tõod neere. Mam me rag n wɩngda ne Wẽnnaam tʋʋmdã wala yãmb fãa sẽn ya to-to rũnna wã.

⁴ Mam dag n namsa neb nins sẽn dag n tũud so-kãnga wã n kʋ-ba, la m yõg raop la pagb n sẽb n kẽes-b bi-bees roogo.

⁵ Maan-kʋʋdbã kãsem ne kãsem-dãmbã fãa sullã yaa mam kaset dãmba. Mam tol n deega sɛb bãmb nengẽ, ba-biis nins sẽn be Damasã yĩnga, la m kẽnga be n na n tɩ sẽb tẽedba sẽn be be wã n tall-b n wa Zeruzalɛm n kɩt tɩ b sɩbg-ba.

⁶ La mam sẽn waa n be sorẽ n kolgd Damase, sẽn zems wĩnto-sʋk sasa, tao-tao bala, vẽenem kãseng n yi arzãn n yãg n gũbg maam.

⁷ Mam lʋɩɩ tẽnga, la m wʋma koɛɛg sẽn dag n yet maam yaa: "Solle! Solle! Yaa bõe tɩ fo namsd maam?"

⁸ Mam sokame tɩ Zu-soaba yãmb yaa ãnna soab tɩ mam namsd-yã? La koɛɛgã yeela maam yaa: "Mam yaa a Zezi sẽn yit Nazarɛt, soab ning fo sẽn namsdã."

⁹ Neb nins sẽn da be ne maama yãa vẽenemã, la b ka wʋm ned ninga sẽn da gomd-a ne maama koɛɛgã ye.

¹⁰ Dẽ, mam sokame yaa: "Zu-soaba, bõe la mam tog n maane?" La Zu-soabã yeela maam yaa: "Yik n kẽng Damas la beene, b na n togsa foom bũmb nins fãa Wẽnnaam sẽn yet foo tɩ f maana."

¹¹ La vẽenemã sẽn yãg tɩ mam lebg zoangã yĩnga, mam tũud-n-taasã gãda mam nug n tae maam n ta Damase.

¹² Mik tɩ rao a yen n dag n be be t'a yʋʋr boondẽ t'a Ananiyas n sakd tõodã, la Zuif-rãmba fãa sẽn da be be wã ra kõta yẽ kaset sõngo.

¹³ Yẽ waa mam nengẽ n yeel maam yaa: "M ba-biig a Solle, paam-y nin yɛsa." La wakat kãng bala, mam le paama m nini, la m yãnd-a lame.

¹⁴ A Ananiyas yeelame yaa: "Tõnd yaab-rãmba Wẽnnaam pĩnd n yãka yãmb tɩ y bãng b tʋlsem, tɩ y yã tɩrlem soabã la y wʋm bãmb noor goama.

¹⁵ Bala, yãmb na n yɩɩ bãmb kaset soaba n togs bũmb nins yãmb sẽn yã la y wʋmã, neba fãa taoore.

¹⁶ La moasã, yaa bõe tɩ y kaoosdẽ? Yik-y n pʋʋs-y ne Zu-soabã yʋʋre, n deeg koom lisgu, n paam y yel-wẽna pekre."

¹⁷ La mam lebg n waa Zeruzalɛm, la mam sẽn be wẽnd-doogã pʋg n pʋʋsdẽ, mam paama vẽnegre.

¹⁸ La m yãnda Zu-soabã, la b yeela maam tɩ m nang-pãng n yi Zeruzalɛm tao-tao, tɩ bala, tẽngã nebã ka na n deeg mam sẽn na n kɩs Zu-soaba kasetã ye.

¹⁹ La mam yeelame: "Zu-soaba, bãmb mens miime tɩ mam da kẽnda karen-dot pʋsẽ, n kɩtdẽ tɩ b kẽesd neb nins sẽn tẽed yãmbã bi-bees roogo, la m kɩtdẽ tɩ b pãbd-ba.

²⁰ La b sẽn na n daag y kaset kɩt a Etɛn zɩɩmã wakate, mam meng ra bee be, mam da yetame tɩ b sẽn maanda yaa sõama, maam n da gũud neb nins sẽn kʋʋd a Etɛnna futu."

²¹ Dẽ, Zu-soabã yeela maam yaa: "Kẽnge, bala, m na n tʋma foom zĩ-zãrgẽ, bu-zẽmsã nengẽ."

²² Neba kelga a Poll hal tɩ ta wakat ninga yẽ sẽn gom gom-kãngã, la wakat kãnga, b sɩngame n zẽk b koees n yetẽ: menes-y nin-kãnga duniyã zugu! Kʋ-y-yã-a, yẽ ka tog n vɩɩmd ye.

²³ Bãmb dag n kelemdame, n lobd b fut la b lobd tom yĩngri.

²⁴ Sodaas tusr naabã yeelame tɩ b kẽes a Poll gãosgẽ wã n pãb-a ne kalwaas n sok-a n bãng sẽn ya bũmb ninga yĩng tɩ Zuif-rãmba kelemd a woto n dõt yẽnda wã.

²⁵ La b sẽn sẽb a Poll ne wĩy n na n pãbe, yẽ soka sodaas koabg naab ning sẽn da be be wã tɩ rẽ yĩnga, tõogã kõta bãmb noor tɩ b pãb Rom ned ne kalwaas t'a bʋʋd meng nan ka kao?

²⁶ Gom-kãensa yĩnga, sodaas koabg naaba kẽng n tɩ togsa sodaas tusr naabã bõn-kãng n yeel yaa: Yãmb na n maana a wãna? Rao-kãngã, yaa Rom neda.

²⁷ Dẽ, sodaas tusr naabã wa n soka a Poll yaa: Togs maam, fo yaa Rom neda? T'a leok tɩ n-ye.

²⁸ Dẽ, sodaas tusr naabã le yeelame yaa: Ad mam yaoo ligd wʋsgo, n paam lebg Rom neda. La a Poll yeelame yaa: La mam yẽ roga ne-a.

²⁹ Tao-tao bala, neb nins sẽn dag n tog n pãb a Poll la b sok-a wã loogame n bas-a. La sodaas tusr naabã sẽn bãng t'a Poll yaa Rom nedã, la yẽ sẽn da kɩt tɩ b sẽb-a wã yĩnga, rabeem yõk-a lame.

³⁰ La vẽkembeoogo, sodaas tusr naabã sẽn dat n bãng bũmb ninga Zuif-rãmba sẽn dõt a Pollã tiki-takɩ, yẽ kɩtame tɩ b lodg a Poll sẽbrã n bas-a. La a yeel maan-kʋʋdbã kãsem-dãmb ne kaoreng yɛl-bʋ-kaoodbã fãa tɩ b tigim taaba. Dẽ, a kɩtame tɩ b talla a Poll n wa n yalsg-a bãmb sʋka.

23

¹ A Poll gesa kaoreng yɛl-bʋ-kaoodbã n yeel yaa: M saam-biisi, mam kẽna Wẽnnaam taoor ne sũur kaset sẽn ya sõama hal tɩ ta rũnna.

² La maan-kʋʋd kãsem a Ananiyas yeelame tɩ neb nins sẽn pẽ a Pollã wẽ a noorã.

³ Dẽ, a Poll yeela yẽnda yaa: Pʋ-libsem soaba, Wẽnnaam na n wẽe yãmba. Yãmb zĩndame n na n kao mam bʋʋd wa sẽn zems ne tõogo, la y kɩɩs tõogã n yet tɩ b wẽ maam.

⁴ Neb nins sẽn da be be wã yeela a Poll tɩ Wẽnnaam maan-kʋʋd kãsem la yẽ tʋʋsda.

⁵ La a Poll yeelame yaa: M saam-biisi, mam da ka mi tɩ yaa maan-kʋʋd kãsem ye, bala, Wẽnnaam gʋls-sõamyã yeelame tɩ: "Ra gom f tẽng neb naab wẽng ye."

⁶ La a Poll sẽn mi tɩ nebã sẽn tigma kẽer yaa Saduusẽ-dãmba tɩ kẽer ya Fariisẽ-dãmbã, a zẽka a koɛɛg kaoreng yɛl-bʋ-kaoodbã sʋk n yeele: M saam-biisi, mam yaa Fariisẽ, la m yaa Fariisẽ biiga. Yaa mam sẽn tẽed tɩ kũum vʋʋgr beene wã yĩng n kɩt tɩ b bʋʋd mam bʋʋdo.

⁷ La a Poll sẽn yeel gom-kãnga, Fariisẽ-dãmbã ne Saduusẽ-dãmbã sɩngame n wẽ nokoɛɛma ne taaba, la nebã welga taaba.

⁸ Sɩd me, Saduusẽ-dãmbã yetame tɩ kũum vʋʋgre, wall malɛka wall Sɩɩg ka be ye. Tɩ Fariisẽ-dãmba yaool n yetẽ tɩ bõn-kãens fãa beeme.

⁹ La bʋr-kãseng yikame, la tõog karen-saam-dãmb kẽer sẽn be Fariisẽ-dãmba sullẽ wã yikame n kɩɩs ne pãng n yeel tɩ bãmb ka yã bõn-wẽng ne rao-kãngã ye, la tɩ tõeeme tɩ yaa sɩɩg wall malɛk n gom ne-a.

¹⁰ La nokoeemdã sẽn lebgd wʋsgã, tɩ sodaas tusr naabã zoet rabeem tɩ nebã na n wa tae a Poll n tõsã, a yeela sodaasã tɩ b sig nebã sʋk n tall a Poll n wa gãosgã pʋga.

¹¹ La yʋng ninga sẽn pʋgdã, Zu-soaba vẽnega b meng ne a Poll n yeel-a yaa: keng f pɛlga, tɩ bõe, yaa tɩlɛ tɩ f kɩs mam kaset Rom tẽng me wala fo sẽn kɩs mam kaset Zeruzalɛma.

¹² La beoogã sẽn vẽege, Zuif-rãmba yẽsa ne taab n yãk yam n wẽen tɩ b ka na n dɩ wall b yũ, sã n ka tɩ b kʋʋ a Polle.

¹³ Neb nins sẽn yẽs ne taab n wẽena sõor yɩɩda pis-naase.

¹⁴ Bãmb kẽng n tɩ yãa maan-kʋʋdbã kãsem-dãmb ne kãsem-dãmbã n yeel-b yaa: Tõnd wẽename tɩ d ka na n lemb dɩɩbo, sã n ka tɩ d paam n kʋʋ a Polle.

¹⁵ Dẽ yĩngã, bɩ yãmb ne kaoreng yɛl-bʋ-kaoodba fãa kos sodaas tusr naabã tɩ b wa ne a Poll y nengẽ, wa y rat n baoo n bãnga yẽnda yellã n paase. La rẽ tɩ tõnd mensa seglame n na n kʋ-a t'a nan ka ta ka ye.

¹⁶ La a Poll tão biig wʋmame tɩ b set n dat n kʋʋ a Polle, la a kẽnga gãosgẽ wã n tɩ kẽ be n togs a Poll.

¹⁷ Dẽ, a Poll boola sodaas koabg naab a yembr n yeel-a t'a tall bi-bɩ-kãng n kẽng sodaas tusr naabã nengẽ, tɩ bala, a tara koɛɛg n dat n togs-a.

¹⁸ Sodaas koabg naabã peega biigã n kẽng sodaas tusr naabã nengẽ n yeel yaa: Bi-bɛɛg a Poll boola maam n kos-m tɩ m tall bi-bɩ-kãngã n wa y nengẽ t'a tara koɛɛg n dat n togs-yã.

¹⁹ La sodaas tusr naabã gãda bi-bɩ-kãng nug n yi kɛɛng n sok-a tɩ yaa bõe la a tar n dat n togs yẽnda.

²⁰ Bi-bɩɩgã leokame yaa: Zuif-rãmba lagma taab n dat n kos yãmb tɩ y tall a Poll n wa kaoreng yɛl-bʋ-kaoodbã taoor wala b rat n leb n sok n bãnga yẽnda yellã n paase.

²¹ Ra kelg-y-b ye, bala, bãmb sʋka neb sẽn yɩɩd pis-naas n segend bẽdg a Poll yĩnga, la b yãka yam n wẽen tɩ b ka na n dɩ wala b yũ sã n ka tɩ b kʋ a Polle. Bãmb seglame n sɛ moasã n gũud yãmb sẽn na n yet tɩ bũmb ninga.

²² Sodaas tusr naabã keooga bi-bɩɩgã n yeel-a: Ra togs ned bũmb ninga fo sẽn togs maama ye.

²³ Dẽ poore, sodaas tusr naabã boola sodaas kobs nanams a yiib n yeel yaa: Segl-y sodaas kobs-yi la wed-rʋʋdb pis-yopoe, ne kãn-tãoodb kobs-yi tɩ yʋngã wakat a wɛ sasa, y na n kẽnga hal Sezaare.

²⁴ La y segl wiid me sẽn na n zombg a Poll n tall-a n kẽng Gʋvɛrneer a Feligs nengẽ tɩ bũmb ra maan-a ye.

²⁵ La yẽ gʋlsa sebr n yeel a woto:

²⁶ Maam a Kolood Liziyaas n pʋʋsd Gʋvɛrneer sõng a Feligs.

²⁷ Zuif-rãmbã ra yõka rao-kãngã n da na n kʋ-a, la mam sẽn wʋm tɩ yẽ yaa Rom nedã, mam waa ne sodaas n fãag-a.

²⁸ La mam sẽn dat n bãng sẽn ya bũmb ninga yĩng la Zuif-rãmbã rõt yẽnda wã, m tall-a lame n kẽng b kaoreng yɛl-bʋ-kaoodbã taoore.

²⁹ La mam mikame tɩ b sẽn dõt yẽnda wã yaa nokoɛɛm sẽn kẽed ne bãmb mens tõoga yell wɛɛngẽ, la rao-kãngã ka maan bũmb sẽn zems tɩ b kʋ-a wall b kẽes-a bi-bees roog ye.

³⁰ Dẽ, mam sẽn wʋm tɩ Zuif-rãmbã setame n dat n kʋ-a wã, mam tʋm-a-la yãmb nengẽ tao-tao la m yeela a rõatbã tɩ b wa yãmb taoor n togs b koɛɛgã. Wẽnd-na sõnge.

³¹ La sodaasã peega a Poll ne yʋng n tall-a hal n ta Ãntipatiris wa b sẽn da yeel bãmbã.

³² La vẽkembeoogo, sodaas nins sẽn kẽn ne nao wã lebg n leba gãosgẽ wã n bas wed-rʋʋdbã tɩ b tall a Poll n looge.

³³ Bãmb sẽn ta Sezaare, b kɩsa Gʋvɛrneerã sebrã la b ning a Poll yẽ nugẽ.

³⁴ Gʋvɛrneerã sẽn karem sebrã n sɛ, a soka a Poll a sẽn yit soolem ninga. La yẽ sẽn wʋm t'a Poll yita Silisi soolem,

³⁵ A yeelame t'a rõatbã sã n wa n wa, a na kelg-a. La a yeelame tɩ b kẽes a Poll Herood na-zakẽ wã n gũ-a.

24

¹ La rasem a nu sẽn looge, maan-kʋʋd kãsem a Ananiyas waa Sezaare ne kãsem-dãmb kẽere la gom-minim soab a yen yʋʋr sẽn boond t'a Tertull. Bãmb togsa b sẽn bʋʋd ne a Pollã yell Gʋvɛrneer a Feligs taoore.

² B boola a Poll t'a wa, la a Tertull sɩngame n dõd yẽnda n yeele:

³ Feligs sõngo, yaa yãmb maasem yĩng tɩ tõnd paamd laafɩ hakɩɩka, la y maana yam tʋʋm n maneg soolem kãngã, tõnd deegda bãmb bũmb fãa pʋgẽ, la zĩiga fãa n pʋʋsd d zaame beoogo.

⁴ La mam ka rat n dɩk yãmb weerã n kaoos ye. Yaa woto yĩng tɩ m kot-y tɩ y maan sũ-mare n kelg tõnd wakat bilfu.

⁵ Tõnd mikame tɩ rao-kãnga yaa wẽnem soaba n wat ne rãmbg Zuif-rãmba fãa sẽn be dũniyã zugã sʋka la a yaa Nazarɛt dãmba kaoreng taoor soaba.

⁶ La a makame meng n dat n paoog wẽnd-doogã. Dẽ, tõnd yõk-a lame. Tõnd dag n dat n kao a bʋʋd wa sẽn zems tõnd tõogã.

⁷ La sodaas tusr naab a Liziyaas waa n deeg-a-la ne pãn-kãseng tõnd nusẽ.

⁸ La a yeela a Poll rõatbã tɩ b wa yãmb nengẽ. Yãmb meng tõe n sok-a lame n bãng bũmb nins fãa yĩng sẽn kɩt tɩ d bʋʋd ne-a wã.

⁹ Zuif-rãmba paasa gomda pãng n yet tɩ yaa sɩda.

¹⁰ Dẽ, Gʋvɛrneerã zẽka a nug n yeel a Poll t'a gome. Dẽ, a Poll dɩka koɛɛg n yeel yaa: Mam miime tɩ yãmb yaa soolem-kãngã bʋ-kaood hal yʋʋm wʋsgo. Dẽ, yaa ne kɩs-sɩd la mam na n gom yãmb taoor n yiis m meng yellẽ wã.

¹¹ Yãmb meng tõe n baoome n bãnge. Sẽn ka yɩɩd rasem piig la a yiibu, mam kẽnga Zeruzalɛm n na n tɩ pʋʋs Wẽnnaam.

¹² B ka yã maam tɩ m wẽed nokoeemd ne ned ba a yen wẽnd-doogã pʋga, wala m rãmbd neb kʋʋng karen-dot pʋse, bɩ tẽng pʋg zĩig ba a yen ye.

¹³ La bãmb ka tõe n wilg yãmb tɩ bũmb ninga b sẽn dõt maam moasã wã yaa sɩd ye.

¹⁴ Baoosgo, mam togsda bõn-kãnga y taoore. Mam pʋʋsda m yaab-rãmbã Wẽnnaam n tũud so-paalg ninga bãmb sẽn boond tɩ yaa kaoreng a to wã. La mam tẽeda bũmb nins fãa sẽn gʋls tõogã sɛb pʋse, la Wẽnnaam no-rɛɛsdbã sɛbã pʋsã.

¹⁵ Mam tara tẽeb pidsg gũudem kãnga, ne Wẽnnaam wa mam dõatbã mens sẽn tarã, n tẽed tɩ nin-sõama la nin-wẽns na n vʋʋgame n bas kũum.

¹⁶ Yaa woto yĩnga, tɩ mam me maood n dat n paam sũur kaset sẽn ya sõama Wẽnnaam la ninsaalb taoore daar fãa.

¹⁷ Mam yii Zeruzalɛm n kaoos yʋʋm wʋsgo, la m lebg n waa be n na n kõ m neba sõngre, la m maan maoong n kõ Wẽnnaam.

¹⁸ La b yaool yãa maam wẽnd-doogẽ wã tɩ m yɩlgd m menga la neb ka tigme, la rãmbg ka zĩnd ye.

¹⁹ La Zuif-rãmb kẽer sẽn yi Azi soolem dag n bee be la b sã n da tarẽ yell ne maam yaa bãmb n dag tog n yals yãmb taoor n bʋ ne maam.

²⁰ Wall, nin-bãmba sẽn be ka wã togs b sã n yãa mam sẽn maan wẽnga, mam sẽn yals kaoreng yɛl-bʋ-kaoodbã taoorã.

²¹ Sã n ka bũmb a yembrã mam sẽn maana, m sẽn yik n yals b sʋk n zẽk m koɛɛg n yeel tɩ: "Yaa mam sẽn tẽed tɩ kũum vʋʋgr beeme wã yĩng n kɩt tɩ yãmb bʋʋd ne maam dũnna."

²² A Feligs sẽn mi Kirist kaorengã yell neerã, a visga bʋʋdã daar n yeel nebã tɩ b kuil tɩ sodaas tusr naab a Liziyaas sã n wa n wa, a na yaool n ges b yellã.

²³ La yẽ yeela sodaas koabg naabã t'a gũ a Poll, la a kõ-a lohorem bilfu, la a ra gɩdg a Poll zo-rãmbã sẽn dat n sõng-a wã ye.

²⁴ Rasem bilf sẽn paase, a Feligs ne a pag a Dursill sẽn ya Zuif poakã waame. La a tʋmame tɩ b bool a Poll t'a wa, la yẽ kelga a Poll sẽn togs tẽeb ne Kirist Zezi wã sẽn ya bũmb ninga.

²⁵ La a Poll sẽn gom tɩrlma vɩɩm la tõog-m-menga la bʋ-kaoor sẽn watã yellã, rabeem yõka a Feligs t'a yeel a Poll t'a loog moasã tɩ yẽ sã n wa paam weere a na leb n bool-a.

²⁶ A ra tẽedame me t'a Poll na n kõ-a-la ligdi, yaa rẽ yĩng n kɩt t'a bool a Poll naoor wʋsg n sõs ne-a.

²⁷ La yʋʋm a yiib sẽn looge, a Porkius Festus reega a Feligs zĩig n ya Gʋvɛrneer. La a Feligs sẽn dat n maan sẽn noom Zuif-rãmba, a ka kõ a Poll lohorem ye.

25

¹ A Festus sẽn wa soolma pʋg tɩ rabtãtẽ, a yii Sezaare n kẽng Zeruzalɛm.

² Maan-kʋʋdbã kãsem-dãmb ne Zuif-rãmba kãsem-dãmb dõta a Poll a Festus taoore.

³ B kosa a Festus n pẽdg-a wʋsg n dat t'a maan bãmb neer n kɩt tɩ b tall a Poll n wa Zeruzalɛm, la b rag n segla bẽdg n dat n solg n kʋ-a Poll sorã zugu.

⁴ A Festus leokame t'a bee bi-bees roog Sezaare, la sã n yɩ bilfu, yẽ menga na n lebg n lebame.

⁵ La a yeel-b lame: Bɩ yãmb kãsem-dãmb kẽer tũ maam tɩ d kẽng Sezaare, tɩ rao-kãng sã n maana sẽn ya wẽng bɩ bãmb bʋ ne-a beene.

⁶ A Festus ka kaoos b sʋk n yɩɩg rasem a nii bɩ piig ye. Dẽ a lebg n leba Sezaare. La vẽkembeoogo, a Festus zaoonda bʋʋda geer zug n yeel tɩ b tall a Poll n wa.

⁷ La a Poll sẽn ta, Zuif-rãmb nins sẽn yi Zeruzalɛma gũbga yẽnda n dõt-a ne bõn-wẽns wʋsgo, la b ka tõe n wilg tɩ b sẽn dõt a Poll ne bũmb ninsã yaa sɩd ye.

⁸ La a Poll goma n na n fãag a meng n yeel yaa: Mam ka maan bũmb sẽn ya wẽng n kɩɩs Zuif-rãmba tõogo wala sẽn kɩɩsd wẽnd-doogã bɩ Sezaar ye.

⁹ Dẽ, a Festus sẽn dat n maan sẽn noom Zuif-rãmbã, yẽ soka a Poll yaa: Fo rat n kẽnga Zeruzalɛm tɩ b tɩ bʋ f bʋʋd mam taoor yel-kãnga poorẽ bɩɩ?

¹⁰ A Poll leokame yaa: Mam yasa Sezaar bʋʋd geer taoore, la yaa ka la b tog kao mam bʋʋdo. Yãmb meng mii neere, tɩ mam ka maan bũmb n beeg Zuif-rãmbã ye.

¹¹ Mam sã n da tarẽ kongre, la m sã n da maane tʋʋm sẽn zems ne kũum, mam kõn zãgs tɩ m ka na n ki ye. La b sẽn dõt maam ne bũmb ningã sã n ya zĩri, ned ka tõe n yõk maam n kõ-b ye. Mam data Sezaar nengẽ.

¹² La a Festus sẽn yẽs ne a sõangdbã n sa, a leoka a Poll yaa: Fo sẽn dat Sezaar nengẽ wã, f na n kẽnga Sezaar nengẽ.

¹³ La rasem bilf sẽn looge, rĩm a Agirpa ne a Bereniis waa Sezaare n na n pʋʋs a Festus.

¹⁴ La b sẽn kaoos be rasem wʋsgo, a Festus togsa rĩma a Poll yellã n yeel yaa: A Feligs basa rao a yen sẽn ya bi-bɛɛg ka.

¹⁵ Mam sẽn wa n be Zeruzalɛm wakatã, maan-kʋʋdbã kãsem-dãmb ne Zuif-rãmbã kãsem-dãmb bʋʋ ne yẽnda n kos maam tɩ m kao a bʋʋd tɩ zems kũum.

¹⁶ Mam leoka bãmb tɩ Rom-dãmba ka minim tɩ rɩk bi-bɛɛg n kɩs tɩ b kʋ, n ka reng n kõ-a noor t'a yals a rõatbã taoor n paam weer n gom n fãag a meng ne bũmb ninga b sẽn dõd-a wã ye.

¹⁷ Dẽ, b tũu maam n wa ka. La vẽkembeoogo mam zaoonda m bʋʋda geer n yeel tɩ b tall rao-kãng n wa.

¹⁸ La a rõatbã sẽn wa wã, b ka tol n wilg tʋʋm wẽng ba a yen rao-kãnga sẽn maane, wa mam sẽn da tagsdã ye.

¹⁹ Bãmb sẽn tar yell ne yẽ, yaa sẽn kẽed b mens wẽn-tũudum wɛɛngẽ, la ne rao a yen sẽn boond t'a Zezi n ki t'a poll yetẽ tɩ rao-kãng vɩɩme.

²⁰ Mam sẽn da ka mi m sẽn na n maan to-to ne yel-kãngã wã, m sok-a-la a sã n datẽ lame n kẽng Zeruzalɛm tɩ b tɩ bʋ a bʋʋd be yel-kãngã wɛɛngẽ.

²¹ La a Poll kosame n yeel tɩ yẽ ratame tɩ b bas tɩ rĩm-kãsengã ges yẽ yellã yelle. Dẽ, mam kosa noor n na n tall-a hal tɩ m wa n tʋm-a Sezaar nengẽ.

²² A Agirpa yeela a Festus yaa: Mam me rat n kelga rao-kãngã koɛɛga. A Festus leokame tɩ beoogo, a na n bool-a lame t'a wa t'a kelg-a.

²³ Dẽ, vẽkembeoogo, a Agirpa ne a Bereniis waa ne waoogr wʋsg n kẽ bʋʋda kaoob zĩigẽ ne sodaas tusr nanamsã, la tẽngã nin-kãsemse. La a Festus yeelame tɩ b tall a Poll n wa.

²⁴ Dẽ, a Festus yeelame: Rĩm a Agirpa, la yãmb fãa sẽn be ka ne tõndã, yãmb nee rao-kãngã, ned ningã poorẽ Zuif-rãmbã neb kʋʋngã fãa sẽn wa mam nengẽ sã n ya Zeruzalɛm, wall kaane n kelem n yeel tɩ rao-kãngã ka tog n vɩɩmdã.

²⁵ La ne maam, mam mikame t'a ka maan tʋʋm wẽng sẽn zems ne kũum ye. La yẽ meng sẽn yet t'a ratame tɩ rĩm kãsengã kaoo a bʋʋdã, mam yãka yam n na n tʋm-a rĩm kãsengã nengẽ.

²⁶ Mam ka tar koɛɛg vẽeneg n na n gʋls n togs rĩm kãsengã rao kãngã yellã wɛɛngẽ ye. Yaa rẽndã yĩng la m bool-a t'a wa yãmb taoore, sẽn yɩɩd fãa, a bee yãmb taoore rĩm a Agirpa, tɩ y sã n sogs-a n sɛ, bɩ m yaool n paam koɛɛg n gʋlse.

²⁷ Tɩ bõe, mam tagsdame tɩ yaa yalemdo tɩ tʋm bi-bɛɛg n ka tol n wilg vẽeneg a sẽn beeg ne bũmb ningã.

26

¹ A Agirpa yeela a Poll tɩ b kõt-a-la noor t'a gom n yiis a meng yellẽ wã. Dẽ, a Poll tẽega a nug n yeel yaa:

² Rĩm a Agirpa, mam sũur yaa noogo m sẽn paam dũnna n na n gom yãmb taoor n togs bũmb nins fãa Zuif-rãmba sẽn dõt maama wɛɛngẽ wã.

³ Tɩ bõe, yãmb mii Zuif-rãmba minindã ne b nokoɛɛma zãnga. Rẽ wã, mam kot-y lame tɩ y kelg maam ne sũ-mare.

⁴ Zuif-rãmba fãa mii mam vɩɩmã sẽn yɩ bũmb ninga hal mam sẽn ya bi-bilf wakate, b mii mam sẽn zĩnd m nebã sʋka la Zeruzalɛm hal sɩngrẽ wã sẽn yɩ to-to.

⁵ Bãmb mii maam hal daar zãra, b sã n dat n togs sɩda. Mam yaa Fariisẽ neb nins sẽn sakd tõnd wẽn-tũudma n yɩɩd neb a taaba ned a yembre.

⁶ La moasã, b bʋʋda ne maam, mam sẽn tẽed kãabg ninga Wẽnnaam sẽn da kãab tõnd yaab-rãmbã yĩnga.

⁷ La tõnd buud piig la a yiibã me pʋʋsda Wẽnnaam wĩntoog la yʋng n ka basdẽ ye, n gũud kãab-kãng pidsgu. Rĩm a Agirpa, yaa tẽeb pidsg gũudem kãng yĩng n kɩt tɩ Zuif-rãmbã rõd maam.

⁸ Bõe yĩng tɩ yãmb Zuif-rãmbã tagsdẽ tɩ yaa toog ne Wẽnnaam tɩ b vʋʋg kũum?

⁹ Mam meng da tagsame tɩ m tog n zaba ne m pãng tɛka n kɩɩs Nazarɛt dao a Zezi yʋʋrã.

¹⁰ La mam maana bõn-kãng Zeruzalɛm. La mam sẽn paama noor maan-kʋʋdbã kãsem-dãmb nengẽ, mam menga kẽesa Wẽnnaam nin-tũusds wʋsg bi-bees roogo. La b sã n da rat n kʋ-ba, mam ningda m nugu.

¹¹ Wakat kẽere, mam kɩtedame tɩ b sɩbg-b karen-dot pʋse, n da rat n modg-b tɩ b kɩɩs b tẽebã. Mam sũurã pʋʋga wʋsg ne bãmb hal tɩ m kẽng tẽn-zẽms pʋs n tɩ nams-ba.

¹² Yaa woto yĩnga, tɩ maan-kʋʋdbã kãsem-dãmb kõ maam noor n tʋm maam tɩ m kẽng Damas.

¹³ Rĩm a Agirpa, mam sẽn be sorẽ, wĩnto-sʋk sasa, mam yãa vẽenem sẽn yi arzãn n yãgd n yɩɩd wĩntoog vẽenem, n wa n bui maam ne m tũud-n-taasã.

¹⁴ Tõnd fãa lʋɩɩ tẽnga, la mam wʋma koɛɛg sẽn da yet maam ne Hebre-rãmbã goam yaa: "Solle, Solle, yaa bõe tɩ fo namsd maam? Yaa toog ne foom, fo sẽn zãgsda yĩnga."

¹⁵ Mam sokame tɩ Zu-soaba yãmb yaa ãnna? La Zu-soabã leokame yaa: "Mam yaa a Zezi, fo sẽn namsd a soabã.

¹⁶ Yik n yals yĩngri. Mam vẽnega m meng ne foom n na n kɩt tɩ f yɩ mam tʋmtʋmda, la m kaset soab n togs neb a taabã bũmb nins fo sẽn yã rũnna wã, la bũmb nins mam sẽn na n wilg fooma.

¹⁷ Mam yãka foo Zuif-rãmbã ne bu-zẽmsã sʋka, la m tʋmda foom b nengẽ,

¹⁸ tɩ f puk b nina tɩ b wẽnemd n bas likã n wa vẽenemẽ wã la b bas Sʋtãana n sak Wẽnnaam n paam b yel-wẽna sugri, la pʋɩɩr ne neb nins sẽn tẽ maam n lebg Wẽnnaam nebã."

¹⁹ Woto wã yĩnga, Rĩm a Agirpa, mam ka kɩɩs vẽnegr ninga sẽn yi arzãna ye.

²⁰ La m deng n moona koɛɛgã Damas nebã nanda la m yaool n moon-a Zeruzalɛm ne Zude soolma fãa pʋga, la bu-zẽmsã n yeel-b tɩ b tek yam n kos sugr n sak Wẽnnaam n maan tʋʋm sẽn wilgd tɩ b sɩd teka yam.

²¹ Yaa bõn-kãnga yĩng la Zuif-rãmbã sẽn yõk maam wẽnd-doogã pʋg n na n kɩt tɩ b kʋ wã.

²² La Wẽnnaam gũudmã yĩnga, mam ket n vɩɩme hal tɩ ta rũnna, n kɩt kaset nin-talse la nanams taoore. La mam ka togsd bũmb a to tɩ sã n ka Wẽnnaam no-rɛɛsdbã ne a Moyiis sẽn da wilg tɩ na n waame wã bal ye.

²³ B ra yeelame tɩ Kirist na n namsame la b na n yɩɩ pipi soab sẽn vʋʋg n bas kũum, la b na n waa ne fãagre vẽenem tõnd buudã ne bu-zẽmsã yĩnga.

²⁴ La a Poll sẽn gom a woto n na n fãag a mengã, a Festus zẽka a koɛɛg n yeel-a yaa: Polle! Fo yaa gãeenga. Fo bãngrã sẽn ya wʋsgã kɩtame tɩ f lebg gãeenga.

²⁵ A Poll yeelame: Festus sõngo, mam ka gãeeng ye. Mam sẽn gomda yaa sɩda la mi-m-neng goama.

²⁶ Rĩm a Agirpa mii bõn-kãense, dẽ mam tõe n goma ne pɛl-kɛgeng bãmb taoore, bala mam mii vẽeneg tɩ bãmb mii b fãa, tɩ bõe bõn-kãens ka solg n maan ye.

²⁷ Rĩm a Agirpa, yãmb tẽeda Wẽnnaam no-rɛɛsdbã sẽn yeel bũmb ninsã? Mam miime tɩ yãmb tẽeda bõn-kãense.

²⁸ A Agirpa yeela a Poll yaa: Fo tagsdame tɩ wakate bilf pʋgẽ, f tõe n kɩtame tɩ mam yɩɩ a Zezi neda?

²⁹ A Poll leokame yaa: Yaa wakat bilf pʋgẽ woo, wall yaa wakat wʋsg pʋgẽ me, mam pʋʋsda Wẽnnaam tɩ kõn yɩ yãmb y yembr bal ye. La yaa tɩ neb nins fãa sẽn kelgd mam koɛɛgã dũnna wã me, yãmb na lebg wa maam, bãn-kãensã sẽn yãk b toogo.

³⁰ Dẽ, rĩma ne Gʋvɛrneera la a Bereniis ne neb nins sẽn da zĩ ne bãmbã yikame.

³¹ B sergame n yẽs ne taab n yeel tɩ rao-kãngã ka maan bũmb sẽn zems ne kũum, wall bi-bees roog kõom ye.

³² La a Agirpa yeela a Festus tɩ sã n ka a Poll sẽn yeel t'a rata Sezaar nengẽ wã, a ra tõe n paamẽ la lohorem.

27

¹ La b sẽn yãk yam tɩ tõnd na n kẽ koom-koglg n kẽng Itali, b rɩka a Poll ne bi-bees a taaba, n kɩs soda-sull ning b sẽn boond tɩ rĩma sodaasã, sodaas koabg naab a yen yʋʋr sẽn boond t'a Zulius.

² Tõnd kẽe koom-koglg sẽn yi Adarmit n dabd Azi soolem tẽnsã sẽn be koomã noor sẽne n looge. La Masedoan dao a ye sẽn yi Tesalonik t'a yʋʋr boond t'a Aristark n da be ne tõndo.

³ La vẽkembeoogo, tõnd taa sɩdõ. La a Zulius maana a Poll neer n kõ-a lohorem t'a kẽng n tɩ ges a Zo-rãmb n paam tɩ b sõng-a.

⁴ Tõnd sẽn yi be, d basa Sɩpr goabga, sobgã sẽn da segd tõndã yĩnga.

⁵ Tõnd sẽn pɩʋʋg ko-kãsengã sẽn pẽ Silisi ne Pamfili wã, tõnd taa Mira sẽn be lisi soolem.

⁶ La beene, sodaas koabg naabã yãa koom-koglg sẽn yi Alegsãndri n dabd Itali, la yẽ kɩtame tɩ tõnd kẽe koom-koglg-kãngã.

⁷ Tõnd kẽna bãanem-bãanem n kaoos rasem wʋsgo, la d namsa wʋsg n kolg Nid tẽnga noore. La sobgã sẽn ka sak tɩ tõnd ta be wã, tõnd yega Kɛrɛt tẽngã n kẽng Salmone sẽne.

⁸ Tõnd namsa wʋsg ne koom-koglgã n yeg Kɛrɛt kɩrenga, n ta zĩiga a yen sẽn boond tɩ Koom-koglg yalsg zĩ-neerã sẽn pẽ Laaze tẽnga.

⁹ Wakat wʋsg loogame la koom-koglgã kẽnd wa n lebga yel-pakre. Tɩ bõe, no-loeerã wakat zoe n loogame.

¹⁰ Yaa woto yĩng n kɩt t'a Poll keoog-b n yeel yaa: Raopa, mam neeme tɩ so-toak-kãngã na n yɩɩ wẽnga, koom-koglgã ne a zɩɩbã na n yɩɩ bõne-kãsenga, la sẽn yɩɩda, sã n ka gũusi tõnd mensã na n kii a pʋgẽ.

¹¹ La sodaas koabg naabã ra kɩsa sɩd ne ned ninga sẽn get koom-koglgã kẽnd yellã ne koom-koglgã taoor soab n yɩɩd a Poll goama.

¹² La koom-koglgã yalsg zĩig ra ka sõama tɩ pa be waood wẽnd ye, yaa woto yĩng tɩ neb wʋsg yãk yam n yeel tɩ b yi be n mao tɩ sã n tõe bɩ b ta Fenigs sẽn ya koom-koglg yalsg zĩig sẽn be Kɛrɛt n pakd n teesd wĩndgã goabga la a rɩtgã, n zĩnd be waoodã wẽnde.

¹³ Sob-fʋl-fʋl yii wĩndgã goabg n sɩng n fʋʋsdẽ, la bãmb tagsame tɩ b ra tõe n maana b sẽn dat n maan bũmb ningã. B yika ne koom-koglgã n kẽng n yeg Kɛrɛt n tũ a kɩrengã.

¹⁴ La sẽn yɩ bilfu, sob-kãseng b sẽn boond tɩ Erakilõ yika koomã sẽn gũbg tẽng ninga wã tãmsa sẽne.

¹⁵ La a sẽn wẽ koglgã t'a ka tõe n kẽng taoorã, tõnd basame tɩ sobgã peeg-koglgã.

¹⁶ Tõnd kolga tẽn-bil a yen sẽn be koomã sʋk tɩ b boond tɩ Kolooda. Dẽ, tõnd namsa wʋsg n tõog n yalsg koom-kogl-bilã.

¹⁷ La b sẽn zẽk-kogl-bilã n kẽes koom-koglgã pʋg n sɛ, b yaool n sẽba koom-koglgã ne wĩyã. La b sẽn zoet tɩ koom-koglgã na n wa tɩ sud bĩisrã sẽn be Libi yegendã, b sika koom-koglgã pɛɛla n bas tɩ sobgã peeg-koglgã.

¹⁸ La sobgã namsa tõnd wʋsgo, dẽ vẽkembeoogo, b loba koglgã zɩɩb koomã pʋgẽ.

¹⁹ La rasem a tãabẽ daarã, bãmb mens sɩngame n wʋk-koglgã teed kẽer n lob koome wã.

²⁰ La kaoosa rasem wʋsg tɩ wĩndgã, wala ãdsã ka puk ye, la sobgã ra ketẽ n tara pãnga hal tɩ tõnd wa n ka leb n tẽed tɩ d na n põsame ye.

²¹ Neb nins sẽn da be koom-koglgã pʋgã maana rasem wʋsg n ka rɩ bũmb ye. Dẽ, a Poll yikame n yals b sʋk n yeel yaa: M saam-biisi, yãmb sã n dag sakẽ mam goama n ka yi n bas Kɛrɛt tẽngã, tõnd da ka na n paam bõn a woto la to-kãngã ye.

²² La moasã, mam sagenda yãmb tɩ y keng y sũyã tɩ bala, tõnd ned ba a yembr ka na n ki ye, sã n ka koom-koglgã bal n na n sãam.

²³ Bala, Wẽnnaam ning sẽn so maam tɩ mam sakd-a wã malɛk waa mam nengẽ yʋngẽ,

²⁴ la a yeela maam yaa: "Poll, ra zoe rabeem ye, yaa tɩlɛ tɩ fo ta Sezaar taoore. La gese, Wẽnnaam sẽn ya sõmblem soab la b maand nimbãan-zoeer ne fooma rɩka neb nins sẽn be koom-koglgã pʋg ne fooma vɩɩm n ning fo nugẽ."

²⁵ Woto yĩnga, m saam-biisi, keng-y y sũyã, bala, mam tara tẽeb kãnga ne Wẽnnaam, tɩ na n yɩɩ wala b sẽn togs maana bala,

²⁶ la tõnd na n tɩ teega tẽng a yen koom sẽn gubgi.

²⁷ Dag n yaa yʋnd piig la a naas-n-soaba la sobgã ra lengd tõnd ko-kãsengã sẽn boond tɩ Adɩryatikã zugu. La sẽn kolg yʋn-sʋka, koom-koglgã pʋgẽ tʋmtʋmdbã tẽeme tɩ b pẽnega tẽnga.

²⁸ Bãmb loee koom zulum bõn-makdgã ne wĩir n los koome wã n mak a zulma n mik tɩ yaa metr pis-tã la a yopoe. La b sẽn le zãag bilfu, b losame yɛsa n mik tɩ zulma zemsa metr pisi la a nii.

²⁹ Bãmb sẽn yɛɛsd tɩ tõnd koom-koglgã na n wa tɩ wẽ kug yĩnga, b losa kug bɛd a naas sẽn da tar n yalsed koom-koglgã koomã pʋgẽ, tɩ b gãd-koglgã. La b ra yãgdame n dat tɩ beoogã vẽeg tao-tao.

³⁰ Koom-koglgã tʋmtʋmdb maana wala b rat n losa kug a taab sẽn yalsed koom-koglgã koomã pʋgẽ tɩ b gãd-koglgã, mik b da soosdame n dat n sik koom-kogl bilã koome wã n zoe.

³¹ A Poll yeela sodaas koabg naabã ne sodaasã yaa: Nin-bãmba sã n ka pa koom-koglgã pʋga, yãmb kõn tõog n põs ye.

³² Dẽ, sodaasã wãa wĩ nins sẽn da loe kogl-bilã n pase, n bas-a t'a lʋɩ koomẽ wã.

³³ Sẽn deng beoogã vẽegre, a Poll sagla neba fãa n yeel-b tɩ b rɩ. Yẽ yeel-b lame yaa: Ade, yaa rasem piig la a naas rũnna la yãmb sẽn gũud sobgã yõkre, n ka sakd n dɩ rɩɩb ye.

³⁴ Rẽ wã, mam kota yãmb tɩ y rɩ, tɩ bõe, yaa sẽn na n fãag yãmba, la yãmb ned ba a yen zoobg ka na n menem ye.

³⁵ A Poll sẽn gom a woto n sa, a rɩka bur n yals neba fãa taoor n pʋʋs Wẽnnaam barka. A sẽn pʋʋs n sa, a kaoo burã n sɩng wãbre.

³⁶ Dẽ, neba fãa me kenga b pels n dɩ.

³⁷ Tõnd fãa sẽn da be koom-koglgã pʋgẽ wã yaa neb kobsi la pis-yopoe la a yoobe.

³⁸ La b sẽn dɩ n tɩge, b loba koodã koomã pʋgẽ n na n boog koom-koglgã zɩɩbo.

³⁹ La beoogã sẽn vẽege, koom-koglgã tʋmtʋmdbã ka bãng sẽn ya tẽng ning ye. La b yãa zĩiga, kʋɩl-koakã sẽn gonge, zĩ-bĩuusgu, la bãmb yãka yam n dat tɩ sã n tõe, bɩ b tall koom-koglgã n ta beene.

⁴⁰ Bãmb logsa bãens nins sẽn yalsd-koglgã n bas tɩ b lʋɩ koomẽ wã, la b kell n logs-koglgã wẽnemdedgã wĩ, n yaool n zẽk-koglgã taoorẽ peendã, sẽn na yɩl tɩ sobgã tus-ba, la b tees kʋɩl-koakã.

⁴¹ La bãmb tɩ kẽe bĩisr pʋgẽ, ko-wĩis a yiib sʋka, la b basa koglgã t'a pa be. Koglgã taoor kẽe bĩisrẽ wã sõama n ka le tõe n serg ye. La ko-pɛmã wẽe koglgã poor ne pãng n wesge.

⁴² La sodaasã da rat n kʋʋ bi-beesã tɩ b ned ba a yen da wa dug koomã n zoe y põs ye.

⁴³ La sodaas koabg naabã sẽn dat n fãag a Pollã, a ka sak tɩ b maan a woto ye. Yẽ yeela neb nins sẽn mi rugbã tɩ b reng n lʋɩ koome wã n rug n yi yɩnga,

⁴⁴ la a yeel neb a taabã tɩ b sog ra-bogdɩ, wall koom-koglgã raado, n dug n yi. La woto, neba tõog n taa yɩng ne yõore la laafɩ.

28

¹ Tõnd sẽn põsã poore, d wʋmame tɩ tẽn-kãng sẽn be koomã sʋkã boondame tɩ Malt.

² Tẽngã neba gesa tõnd yell neer wʋsg ne nimbãan-zoeere la saagã sẽn da ni tɩ ya waoodã yĩnga, b widga bugum n deeg tõnd fãa be tɩ d gũbg n woode.

³ A Poll wʋka ra-yãngls n na n ning bugmẽ wã, la bug-waolgã yĩnga, waaf n yi be n gãd a Poll nugã.

⁴ La tẽngã neb sẽn yã waafa sẽn luund a Poll nugẽ wã, b goma ne taab n yeele: Hakɩɩka rao-kãnga yaa nin-kʋʋda, tɩ bõe, baa ne yẽ sẽn põs ko-kãsengã, wẽnd tɩrlem ka rat n bas-a t'a vɩɩnd ye.

⁵ La a Poll mesga waafã t'a lʋɩ bugmẽ wã la a Poll bũmb ka zab baa bilf ye.

⁶ Nin-kãens ra gũudame n na n yã a sẽn mode wall a Poll sẽn na n lʋɩ n ki zĩig pʋgẽ. La b sẽn gũ n kaoos n mik tɩ bũmb baa fʋɩ ka maan yẽ wã, b wẽnemdame n yeel t'a Poll yaa wẽnd a yembre.

⁷ Soolem a ye n da pẽ be tɩ ya tẽn-kãng naabã n so, naabã yʋʋr la a Publius. A reega tõnd ne nonglem n sik a yir rasem a tãabo.

⁸ A Publius baaba n da gãe ne yĩn-wɩngre la sãb-noaadga, la a Poll kẽe a nengẽ n tik-a ne a nus n pʋʋs n maag-a.

⁹ Rẽ zugẽ, tẽngã bãad-dãmb a taab me waame, la b fãa paama laafɩ.

¹⁰ B waooga tõnd ne waoog kãsenga, la tõnd sẽn wa n na n loogã, b kõo tõnd bũmb nins fãa sẽn tõe n sõng tõnd d so-toakã pʋgẽ.

¹¹ La kiis a tãab zugẽ, tõnd kẽe Alegsãndiri koom-koglg yʋʋr sẽn boond tɩ Diyoskuur yẽ zĩnda Malt waooda wẽnde.

¹² Tõnd sẽn taa Sɩrakus tẽnga d paa be rasem a tãabo.

¹³ La tõnd yii beene n tũ koomã noor n ta Regiyo. La vẽkembeoogo, wĩndga goabg sobgã yikame, la rasem a yiib pʋgẽ, tõnd taa Pʋzoll.

¹⁴ Tõnd yãa ba-biis tẽn-kãng pʋga, tɩ b kos tõnd tɩ d pa be ne bãmb rasem a yopoe. Yɩɩ woto tɩ tõnd kẽng Rom.

¹⁵ Ba-biisã sẽn be Roma sẽn wʋm tõnd kibare, b waa n sega tõnd hal tẽms sẽn boond tɩ Apiyus ne Tʋroa-Tavɛrn. A Poll sẽn yãnd-bã, a pʋʋsa Wẽnnaam bark la a keng a pɛlga.

¹⁶ Tõnd sẽn wa n ta Roma, sodaas koabg naabã rɩka bi-beesã n kɩs sodaasã taoor soaba, la b kõo a Poll lohorem t'a zĩnd toore ne sodaag a yen sẽn gũud-a.

¹⁷ B sẽn ta Rom tɩ rabtãtẽ, a Poll boola Zuif-rãmba nin-kãsems tɩ b wa yẽ nengẽ. La b sẽn tigim taaba, a Poll goma ne bãmb a woto: M saam-biisi, baa ne mam sẽn ka maan bũmb sẽn beegd tõnd buudã, la m ka maan bũmb sẽn kɩɩsd tõnd yaab-rãmbã minungã, b yõka maam Zeruzalɛm n kɩs Rom-dãmba tɩ b kẽes maam bi-bees roogo.

¹⁸ La Rom-dãmba sẽn kelg maam, b rag n dat n bas-m lame, bala b ka yã mam sẽn maan bũmb n tog ne kʋʋb ye.

¹⁹ La Zuif-rãmba zãgsame, dẽ, yɩɩ tɩlɛ ne maam tɩ m kos n na n kẽng Sezaar nengẽ. La yaool n ka bũmb la m tar n dat n dõd m buudã ye.

²⁰ Yaa woto yĩng n kɩt tɩ m dat n yãnd-yã n gom ne-yã, tɩ bõe, yaa Israyɛl neba tẽeb pidsg gũudem poorẽ la b balg maam ne bãn-kãensã.

²¹ Zuif-rãmba nin-kãsems yeela a Poll yaa: Tõnd ka reeg sebr baa a yen sẽn yi Zude soolem n gomd ne tõnd yãmb yell ye, la ba-biig baa a yen ka yi be n wa n togs tõndo, wall a gom yãmb sẽn maan tɩ ka zems ye.

²² La tõnd datẽ lame n kelg yãmb sẽn na n yeel tɩ bũmb ninga, bala tõnd miime tɩ zĩiga fãa, neba kɩɩsda kaoreng ning yãmb sẽn tũudã.

²³ Bãmb yãka daar n kõ a Polle, la badaare bãmb wʋsg waa n yãnd a Poll a gãagã zĩigẽ, la yẽ goma ne bãmb yibeoog hal tɩ ta zaabre, yẽ rɩka a Moyiis tõogã ne Wẽnnaam no-rɛɛsdba sɛb n moon bãmb Wẽnnaam soolmã koɛɛg n na n wilg-b t'a Zezi koɛɛgã yaa sɩda.

²⁴ Neb kẽer tẽe bũmb ning yẽ sẽn da yetã la neb kẽer kɩɩsame n ka tẽ ye.

²⁵ La bãmb sẽn ka zems taab n yik n na n loogã, a Poll yeel-b-la gom kãensã bal n paase: Sɩɩg-sõng sɩd tar bʋʋm la a sẽn da gom ne y yaab-rãmbã n yeel

²⁶ Wẽnnaam no-rɛɛs a Ezayi tɩ: "Kẽng nin-bãmbã nengẽ n tɩ yeel-b yaa: Yãmb na n wʋma sõama la y kõn wʋm a võor ye. Yãmb na n gesa sõama la y kõn yã ye.

²⁷ Bala, nin-kãensã sũyã lebga riglima, b yẽda b tʋba, la b mum b nini, sẽn na yɩlẽ tɩ b nin da yã, tɩ b tʋb ra wʋm ye, tɩ b ra tags n wʋm a võor ye. La b sẽn kõn tek yam n kos sugri, sẽn na yɩl tɩ mam maag-b ye."

²⁸ A Poll leb n yeelame yaa: Dẽ wã yĩnga, bãng-y tɩ b tʋma Wẽnnaam fãagr koɛɛga bu-zẽmsã tẽngẽ, la b na n kelg-a lame.

²⁹ A Poll sẽn yeel a woto n sɛ, Zuif-rãmba loogdame la b wẽed nokoeemd wʋsg ne taaba.

³⁰ A Poll zĩnda be yʋʋm a yiib tõre, la a yaood roogã ligdi. La yẽ ra reegda neb nins fãa sẽn da wat yẽ nengẽ wã ro-kãng pʋga.

³¹ Yẽ ra moonda Wẽnnaam soolem koɛɛgã, la a zãmsd nebã a Zezi Kirist koɛɛgã ne pɛl-kɛgenga, tɩ gɩdgr kaẽ ye.