1

¹ Neb wʋsg makame n gʋls bũmb nins sẽn maan tõnd sʋkã.

² B sẽn gʋlsã zemsa wa neb nins sẽn dag n yã yellã hal a sɩngrẽ, la b lebg koe-noogã moaandbã sẽn togs tõndã.

³ Teofill sõngo, mam sẽn fees n bao n bãng fãa neb nins sẽn bils maamã nengẽ wã, mam tagsame tɩ yaa neer tɩ mam me gʋls yãmb n wilg yɛlã sẽn pʋg taab to-to,

⁴ tɩ yãmb tõe n deeg tɩ bũmb nins b sẽn dag n zãms yãmbã yaa sɩda.

⁵ Wakat ning Herood sẽn dag n ya Zude rĩma, maan-kʋʋd a ye n da be tɩ b boond t'a Zakari. Yẽ yaa maan-kʋʋd a Abiya sull a ye neda. A pagã yaa maan-kʋʋd kãsem a Aarõ yagenga, la a yʋʋr la a Elizabɛt.

⁶ Bãmb b yiibã fãa dag n yaa nin-tɩrs Wẽnnaam nifẽ, la b da sakda Zu-soabã tõodã la b noyã fãa sõama.

⁷ La b ra ka tar biig ye. Bala, a Elizabɛt da yaa kiiri, la b yiibã fãa da kʋʋlame.

⁸ Daar a yembre, a Zakari buudã sẽn da tog n ges maoongã yelle, a Zakari dag n maanda maan-kʋʋr tʋʋmdã Wẽnnaam taoore.

⁹ Bala, b dag n maana bãnde, wa sẽn zems maan-kʋʋdbã miningu, n yãk yẽnda t'a kẽ Zu-soabã roogẽ wã n yõog wusdã.

¹⁰ La neb kʋʋngã dag n bee yɩng wisdã yõogr wakat n pʋʋsdẽ.

¹¹ La Zu-soabã malɛk puka a meng ne a Zakari, n yas wusdã yõogr tẽn-kugrã rɩtgo.

¹² La a Zakari sẽn yã malɛkã, a yɛɛsame, tɩ rabeem yõk-a.

¹³ Malɛkã yeela yẽnda yaa: Zakari, da zoe rabeem ye, tɩ bõe, Wẽnnaam leoka fo pʋʋsgo. Fo pag a Elizabɛt na n doga bi-ribl n kõ-fo. La fo na n pʋda a yʋʋr t'a Zã.

¹⁴ Fo na n paama sũ-noog n kɩdme, la neb wʋsg na n maana sũ-noog a rogmã yĩnga.

¹⁵ Tɩ bõe, yẽ na n yɩɩ nin-kãseng Zu-soabã nifẽ. Yẽ kõn yũ divẽ wall bõn-yũudl sẽn yilimd neng ye. Sɩɩg-sõng na n pida yẽ a ma sẽn na n dog-a wakat bala.

¹⁶ A na n kɩtame t'a Israyɛl kamb wʋsg lebg n wa Zu-soabã sẽn ya bãmb Wẽnnaamã nengẽ.

¹⁷ Yẽ na n kẽna Wẽnnaam taoor ne sɩɩg ning la pãng ning a Eli sẽn da tarã, n kɩt tɩ ba-rãmbã paam zems-n-taar ne b kamba, n kɩt tɩ kɩɩsdbã paam yam n lebg nin-tɩrse. La a na n sõnga nebã tɩ b segl n sa Zu-soabã yĩnga.

¹⁸ A Zakari soka malɛkã tɩ yẽ na n yɩɩ a wãn n bãng bõn-kãnga? Bala, yẽ yaa nin-kẽema, la a pagã me yʋʋm ka paood ye.

¹⁹ La malɛkã leoka yẽnda yaa: Mam yaa a Gabriyɛl, n be Wẽnnaam taoore. B tʋma maam tɩ m wa n gom ne foom la m togs-f koe-no-kãnga.

²⁰ Gese, fo na n lebga muka, la fo kõn tõog n gome, hal tɩ ta wakat ning bõn-kãngã sẽn na n paam pisdgu, fo sẽn ka tẽ mam goama, tɩ b yaool n na n paam pidsgu, b wakat sã n ta wã yĩnga.

²¹ Wakat kãnga, nebã da gũuda a Zakari, la a sẽn kaoosd wẽnd-doogẽ wã yɛɛsa bãmba.

²² La a sẽn yi, a ka tõog n gom ne nebã ye. La b bãngame t'a yãa yãab wẽnd-doogẽ wã. La a sɩngame n bils bãmb ne magbo, la a ket n yaa muka.

²³ La a Zakari tʋʋmdã rasem sõor sẽn pidi, a kuila a yiri.

²⁴ La wakat bilf sẽn paase, a pag a Elizabɛt rɩka pʋga. La yẽ soondame hal tɩ ta kiis a nu.

²⁵ La a yeelame yaa: Ad bũmb ning Zu-soabã sẽn maan n kõ maam, n zems wakat ning bãmb sẽn yãk yam n na n yiis bũmb ning sẽn dag n ya mam yãnd nebã sʋkã.

²⁶ Kiis a yoob soabã wakate, Wẽnnaam tʋma malɛk a Gabriyɛl, Galile tẽng a yembr sẽn boond tɩ Nazarɛt,

²⁷ pa-kuil a yembr nengẽ, b sẽn da rɩk n kõ a Daviid yageng a Zozɛf. Pʋg-sadã yʋʋr la a Maari.

²⁸ Malɛkã waa yẽ nengẽ n yeel-a yaa: Mam pʋʋsda foom, ned ning Wẽnnaam sẽn ning barkã. Zu-soabã bee ne foom.

²⁹ Gom kãens namsa a Maari t'a sokd a meng tɩ pʋʋs-kãngã võor yaa bõe?

³⁰ Malɛkã yeel-a lame yaa: Maari, da zoe rabeem ye. Bala, fo paama bark Wẽnnaam nifẽ.

³¹ Gese, fo na n dɩka pʋga, n dog bi-ribla, la f na n pʋda a yʋʋr t'a Zezi.

³² Yẽ na n yɩɩ nin-kãsenga, la b na n boond-a lame tɩ Wẽn-kẽemd Bi-ribla. Zu-soab a Wẽnnaam na n kõo yẽnda a yaab a Daviid naam.

³³ Yẽ na n sooga a Zakob buudã wakat sẽn kõn sa, la a naamã kõn zĩnd saab wakat ye.

³⁴ A Maari soka malɛkã tɩ bõn-kãng na n yɩɩ wãn n yɩ tɩ yẽ nan ka mi raoa?

³⁵ La malɛkã leok-a lame yaa: Sɩɩg-sõng na n waa fo zugu, la Wẽn-kẽemdã pãngã na n luda foom ne b maasem. Yaa woto yĩng la b na n bool bi-sõng ning fo sẽn na n dogã tɩ Wẽnnaam Bi-ribla.

³⁶ Ad fo kẽem a Elizabɛt me rɩka pʋg a kʋʋlem wakate, n na n dog bi-ribla. B sẽn dag n boond yẽ tɩ kiirã, a tara kiis a yoob pʋg moasã.

³⁷ Bala, bũmb ka be Wẽnnaam sẽn ka tõe ye.

³⁸ Dẽ, a Maari yeelame yaa: Mam yaa Zu-soabã tʋmtʋmd poaka. Bɩ yãmb sẽn yeel bũmb ningã yɩ. La malɛkã loogame n bas-a.

³⁹ Da-kãens pʋgẽ, a Maari yikame n kẽng Zude tẽng a yembr sẽn be tãensã sẽne wã tao-tao.

⁴⁰ A Maari kẽe a Zakari zakẽ, n pʋʋs a Elizabɛt.

⁴¹ A Elizabɛt sẽn wʋm a Maari pʋʋsgã bala, biigã sẽn be yẽ pʋgẽ wã virsame, la a Elizabɛt pida ne Sɩɩg-sõngo.

⁴² A zẽka a koɛɛg n yeele: Fo tara Wẽnnaam bark n yɩɩd pagbã fãa. La biigã sẽn be fo pʋgẽ wã me tara barka.

⁴³ Maana a wãn tɩ mam wa paam tɩ m Zu-soabã ma wat m nengẽ?

⁴⁴ Bala, ade, fo pʋʋsmã sẽn kẽ mam tʋbrẽ wã yee, la biigã sẽn be mam pʋgẽ wã sẽn virs ne sũ-noogo.

⁴⁵ Bark bee pag ning sẽn tẽ tɩ Zu-soabã sẽn yeel yẽnda wã na n paama pidsgã zugu.

⁴⁶ La a Maari yeelame yaa: Mam sɩɩgã pẽgda Zu-soabã,

⁴⁷ la mam sũur pida ne sũ-noogo, mam fãagd a Wẽnnaam yĩnga.

⁴⁸ Bala, bãmb gesa b tʋmtʋmd-poakã a sik-m-mengã pʋgẽ. Bala, sẽn sɩng ne moasã, ad zamaan fãa neb na n yeelame tɩ bark bee mam zugu.

⁴⁹ Bala, sẽn Tõe-a-fãa wã maana bõn-kãsems n kõ maam. Bãmb yʋʋr yaa sõmblem.

⁵⁰ "Bãmb nimbãan-zoeerã paada neb nins sẽn zoet bãmbã zutu, zamaan o zamaane."

⁵¹ Bãmb wilga b kang pãnga. Bãmb sãeega neb nins sẽn dag n tar wuk-m-meng tagsd b sũyã pʋsẽ wã.

⁵² Bãmb deega pãens rãmbã naam n bas-ba, la b zẽk sik-m-mens rãmbã.

⁵³ Bãmb tɩgsa kom sẽn tar b rãmbã ne arzegse, la b kɩt tɩ arzegsã rãmb loog zaalem.

⁵⁴ Bãmb sõnga b tʋmtʋmd a Israyɛl, la b tẽeg n maan nimbãan-zoeere,

⁵⁵ wa b sẽn dag n yeel tõnd yaab-rãmbã tɩ b na n maana a Abraham ne a yagensã neer wakat fãa wã.

⁵⁶ A Maari paa ne a Elizabɛt sẽn kolg kiis a tãabo, n yaool n lebg n kuil a yiri.

⁵⁷ A Elizabɛt rogem wakat taame. La a roga bi-ribla.

⁵⁸ Yẽ yags-rãmbã ne a roagdbã wʋmame tɩ Zu-soabã puka b nimbãan-zoeer ne yẽnda, la b lagma ne-a n paam sũ-noogo.

⁵⁹ Rogmã rasem a nii daare, bãmb waa ne bi-bilfã n na n kẽes bãongo, la b da rat n pʋda a yʋʋr t'a Zakari wa a baaba.

⁶⁰ La a ma wã gomame n yeel tɩ ayo! T'a yʋʋr na n yɩɩ a Zã.

⁶¹ Nebã yeela a Elizabɛt tɩ yẽ roagdbã sʋka, ned ka be n tar yʋ-kãng ye.

⁶² La bãmb bilsa biigã baaba ne nus n dat n bãng a sẽn dat tɩ b pʋd biigã yʋʋr ninga.

⁶³ A Zakari kosa walga, n gʋls tɩ biigã yʋʋr la a Zã. La nebã fãa yɛɛsame.

⁶⁴ Wakat kãng bala, a Zakari zelemd lakame t'a sɩng n gomd n pẽgd Wẽnnaam.

⁶⁵ Rabeem yõka b yagsã fãa. La koe-kãng saaga Zude tẽmsã fãa sẽn be tãensã sʋkã. Nebã dag n gomda bõn-kãng yell ne taaba.

⁶⁶ Neb nins fãa sẽn wʋm gomdã da tagsda a yelle, la b sokdẽ tɩ bi-kãngã na n yɩɩ bõe biiga? Bala, Zu-soabã pãng dag n bee ne-a.

⁶⁷ Biigã ba a Zakari pida ne Sɩɩg-sõngo, n gom pĩnd-n-bãngr goam n yeele:

⁶⁸ Pẽgr Zu-soabã sẽn ya Israyɛl nebã Wẽnnaam, bãmb sẽn wa n ges b nebã n fãag-bã yĩnga,

⁶⁹ la bãmb sẽn kõ tõnd fãagd sẽn tar pãnga, sẽn yit a Daviid sẽn ya bãmb tʋmtʋmdã buud pʋgẽ

⁷⁰ wa bãmb sẽn dag n gom ne b no-rɛɛs-sõamyã noey hal wakat sẽn kaoose,

⁷¹ tɩ b na n fãaga tõnd n yiis d bɛɛbã la neb nins fãa sẽn kis-b tõndã nusẽ wã.

⁷² Woto, bãmb zoee tõnd yaab-rãmbã nimbãanega, n tẽeg bãmb kãab-sõngã yelle,

⁷³ wa bãmb sẽn dag n kãabe, n wẽen n yeel tõnd yaab a Abraham 74-75 tɩ b na n fãaga tõnd n yiis d bɛɛbã nusẽ, la b kõ tõnd pãn-tõog tɩ pʋʋs bãmb ne sõmblem la tɩrlem bãmb taoor hal tõnd vɩɩmã tɛka, tɩ rabeem kaẽ ye.

⁷⁶ La foom a bi-bilfã, b na n boola foom tɩ Wẽn-kẽemd no-rɛɛsa. Tɩ bõe, fo na n lʋɩɩ Zu-soabã taoore n maneg bãmb soayã,

⁷⁷ la f kɩt tɩ nebã bãng tɩ Wẽnnaam na n kõ-b-la b yel-wẽnã sugr n fãag-ba,

⁷⁸ tõnd Wẽnnaamã nimbãan-zoeerã sẽn ya kãsengã yĩnga. Yaa nimbãan-zoeerã yĩng la sõorã sẽn pukdã na n wa tõnd nengẽ,

⁷⁹ n kõ neb nins sẽn zĩ lik pʋgẽ la kũum maasmẽ wã vẽenem, la a tae tõnd tɩ d tũ laafɩ sore.

⁸⁰ La biigã bɩtame t'a yam paasdẽ. La a paa weoogẽ wã hal tɩ ta daar ning a sẽn puk a meng ne Israyɛl nebã.

2

¹ Ra-kãense, Sezaar a Ogust yiisa tõog n yeel tɩ b sõd a soolmã nebã fãa.

² Sõd-kãng sẽn yɩ dẽenem soabã zĩnda Siiri Gʋvɛrneer a Kiriniyus zamaanẽ.

³ Ned fãa kuiisa a meng tẽngẽ tɩ b tɩ sõd-ba.

⁴ A Zozɛf me yii Nazarɛt sẽn be Galile soolmẽ n kẽng a Daviid tẽng sẽn boond tɩ Betlehɛm n be Zude soolmẽ, yẽ sẽn ya a Daviid buud la a yagengã yĩnga.

⁵ Yẽ kẽnga be ne a pʋg-bil a Maari tɩ b sõd-a. La a Maari da tʋtame.

⁶ La bãmb sẽn be be, a Maari rogem wakat taame.

⁷ La yẽ roga a bi-ribl kãsengã, n vil-a ne peend n gãneg rũms rɩɩb koglg pʋgẽ, weer sẽn ka be sik-zĩigẽ wã yĩnga.

⁸ La tẽn-kãng pe-kɩɩmb n dag n be we-kɛɛng ne yʋng n gũud b piisi.

⁹ Zu-soabã malɛk puka a meng ne bãmba, la Zu-soabã ziir vẽenem yãgame n gũbg bãmba. Dabeem kãseng yõka bãmba.

¹⁰ La malɛkã yeel-b lame yaa: Da zoe-y rabeem ye, bala, mam togsda yãmb koe-noog sẽn na n wa ne sũ-no-kãseng nebã fãa yĩnga.

¹¹ Fãagd la b rog yãmb yĩng dũnna, a Daviid tẽngẽ wã. Bãmb la Kiristã, Zu-soabã.

¹² Ad bãnd ning sẽn na n kɩt tɩ yãmb bãng bãmba: Yãmb na n yãa bi-pɛɛlg sẽn vil ne peend n gãe rũms rɩɩb koglgẽ.

¹³ La zĩig pʋgẽ bala, malegs wʋsg yii arzãn n waa n paas malɛkã n pẽgd Wẽnnaam n yetẽ:

¹⁴ Ziiri! Wẽnnaam sẽn be hal saasẽ saasẽ! Laafɩ bee dũni zugu, neb nins bãmb sẽn nongã sʋka.

¹⁵ Malegsã sẽn bas bãmb n leb n leb arzãna, pe-kɩɩmbã yeela taab yaa: Wa-y tɩ d kẽng Betlehɛm n tɩ ges bũmb ning sẽn maan tɩ Zu-soabã togs tõndã.

¹⁶ La bãmb kẽnga tao-tao n tɩ yã a Maari ne a Zozɛf la bi-pɛɛlgã sẽn gãe rũms rɩɩb koglgẽ wã.

¹⁷ Bãmb sẽn yã bi-pɛɛlgã, b togsa bũmb nins fãa b sẽn dag n gom ne bãmb biigã wɛɛngẽ wã.

¹⁸ Yellã linga neb nins fãa sẽn wʋm bũmb nins pe-kɩɩmbã sẽn togsd bãmbã.

¹⁹ A Maari bĩnga gom-kãens fãa a sũurẽ n tagsd b yelle.

²⁰ Pe-kɩɩmbã lebgame, n waoogd Wẽnnaam la b pẽgd bãmba, bũmb nins fãa bãmb sẽn wʋme, la b sẽn yã tɩ sɩd yaa wa malɛkã sẽn da togs bãmbã yĩnga.

²¹ La rasem a nii daarã sẽn ya biigã bãong kẽesg daarã sẽn ta, b pʋda a yʋʋr t'a Zezi, wala malɛkã sẽn dag n yeel sẽn deng a ma sẽn na n dɩk a pʋgã.

²² La a Maari ne biigã yɩlgr wakat sẽn pidi, wa sẽn zems ne a Moyiis tõogã, yẽ ne a Zozɛf talla biigã n kẽng Zeruzalɛm n na n tɩ kõ Zu-soabã.

²³ Bãmb maana wa sẽn gʋls Zu-soabã tõog pʋgẽ n yetẽ tɩ b tog n dɩka bi-ribl rẽeng fãa n kõ Zu-soabã.

²⁴ La b maana wal a yiib bɩ man-wall-bi a yiib maoongo, wa sẽn gʋls Zu-soabã tõog pʋgẽ wã.

²⁵ La mik rao a yen n da be Zeruzalɛm n boond t'a Sɩmyõ. Rao-kãng dag n yaa nin-tɩrga, la a sakda Wẽnnaam. Yẽ dag n gũuda Israyɛl belsgo, la Sɩɩg-sõng dag n bee a zugu.

²⁶ Sɩɩg-sõng dag n wilg-a lame t'a kõn ki, hal t'a yã Kiristã, Zu-soabã sẽn na n tʋmã.

²⁷ Sɩɩg-sõng kɩtame t'a Sɩmyõ kẽng wẽnd-doogẽ wã. La a Zezi ba wã ne b ma wã sẽn tall bãmb n wa n na n pids bũmb ning tõogã sẽn yetã,

²⁸ a Sɩmyõ deega biigã a nusẽ, n pẽg Wẽnnaam n yeele:

²⁹ Zu-soaba! Moasã, yãmb basa y tʋmtʋmdã t'a loogd ne laafɩ. Wa yãmb sẽn dag n yeelã,

³⁰ mam nin yãa fãagr ning yãmb sẽn kõ tõndã,

³¹ fãagr y sẽn segl neba fãa nifẽ wã.

³² A yaa vẽenem sẽn vẽnegd bu-zẽmse, la a yaa Israyɛl sẽn ya yãmb nebã ziiri.

³³ B sẽn gom a Zezi yell a woto wã yɛɛsa b ba ne b ma.

³⁴ A Sɩmyõ ning-b-la barka, la a yeel a Zezi ma a Maari yaa: Ad bi-kãngã waa Israyɛl neb wʋsg lʋɩɩse la b yikr yĩnga, la a na n yɩɩ bãnd neb sẽn na n zãgse.

³⁵ A na n puka neb wʋsg sũy pʋsẽ yɛla, la sũ-sãoong sẽn wẽnd sʋʋg sẽn kõs ned n na n paam foom.

³⁶ Wẽnnaam no-rɛɛs-poak a ye n da be be. A yʋʋr la a Ãnn, a Fanuwɛl bi-pugla, n ya a Azɛɛr buudu. A ra kʋʋla wʋsgo. A zĩnda ne a sɩdã yʋʋm a yopoe a pʋgsademd wakate,

³⁷ n lebg pʋgkõore, n kell n paa a woto. La baa ne a sẽn tar yʋʋm pis-nii la a naasã, a dag n ka yit wẽnd-doogẽ wã ye. A dag n maanda Wẽnnaam tʋʋmd wĩntoog ne yʋngo, ne no-loeer la pʋʋsgo.

³⁸ Yẽ me waa wẽnd-doogẽ wã wakat kãng bala. Yẽ dag n pẽgda Wẽnnaam la a gomd ne neb nins sẽn dag n gũud Zeruzalɛm fãagrã a Zezi yelle.

³⁹ La bãmb sẽn pids bũmb fãa wa sẽn zems Zu-soabã tõogo, a Zozɛf ne a Maari leb n leba b tẽngẽ, Nazarɛt.

⁴⁰ Biigã ra bɩtame, la a pãng paasdame, la a da pida ne yam, la Wẽnnaam barkã da bee a zugu.

⁴¹ A Zezi ba-rãmbã dag n kẽngda Zeruzalɛm yʋʋmd fãa, zʋʋg-n-basã kibs yĩnga.

⁴² A Zezi sẽn ta yʋʋm piig la a yiibu, b kẽnga Zeruzalɛm wa sẽn zems kibsã miningu.

⁴³ La kibsã sẽn sa tɩ bãmb lebg n kuiisẽ, biig a Zezi paa Zeruzalɛm, la b ba-rãmbã ka bãng ye.

⁴⁴ Bãmb sẽn dag n tags t'a Zezi bee b kẽnd-n-taasã nengẽ wã yĩnga, b kẽna daar a ye kẽnde, n yaool n gẽes a Zezi b mitinsã sʋka.

⁴⁵ La b ka yãnd-b ye. La b lebg n lebda Zeruzalɛm la b gẽesd a Zezi.

⁴⁶ Ra-yɩt-n-daarã, bãmb yãnda a Zezi wẽnd-doogẽ wã tɩ b zĩ karen-saam-dãmbã sʋk n kelgd-b-la b sogsd-b sokdse.

⁴⁷ A Zezi bãngrã ne b leokdsã linga neb nins fãa sẽn da wʋmd bãmbã.

⁴⁸ A Zezi ba-rãmbã sẽn yãnd-bã, b yɛɛsame. A Zezi ma wã yeel-b lame yaa: M biiga, yaa bõe tɩ fo maan tõnd a woto? Gese, maam ne f baaba baoo foom ne sũ-sãanga.

⁴⁹ A Zezi yeel-b lame yaa: Bõe yĩng tɩ yãmb da baood maam? Yãmb da ka mi tɩ mam tog n bee m ba wã roogẽ laa?

⁵⁰ La bãmb ka wʋm bũmb ning a Zezi sẽn da gomd ne bãmbã võor ye.

⁵¹ Dẽ poore, a Zezi tũu bãmb n leb Nazarɛt, la b saka bãmb noore. Bãmb ma wã dag n bĩngda bõn-kãens fãa a sũurẽ.

⁵² A Zezi ra bɩtame, tɩ b yamã paasdẽ, la b paama Wẽnnaam barka la ninsaalb rẽnd me.

3

¹ Sezaar a Tɩbɛɛr sẽn deeg naam tɩ yʋʋm piig la nuunẽ, t'a Pilat dag n yaa Zude soolem Gʋvɛrneere, tɩ Herood ya Galile rĩma, t'a biig a Filip ya Yituure ne Tarkonit soolem dĩma, t'a Lizanyaas ya Abilɛn soolem dĩma,

² t'a Ann ne a Kayif ya maan-kʋʋdbã kãsem-dãmba, Wẽnnaam goma ne a Zakari biig a Zã weoogẽ wã.

³ La a Zã saaga tẽms nins fãa sẽn pẽ Zʋrdẽ wã, n moondẽ n yet nebã tɩ b tek yam n deeg lisgu, n paam b yel-wẽnã sugri.

⁴ Yɩɩ wa sẽn gʋls Wẽnnaam no-rɛɛs a Ezayi sebrã pʋgẽ wã: Yaa ned ning koɛɛg sẽn kelemd we-rasempʋɩɩgẽ wã, n yetẽ tɩ: Maneg-y Zu-soabã sore! Rems-y bãmb so-bugsã tɩ yɩ tɩrse!

⁵ Londã fãa na n pidsame! Tãensã ne kũnkubã fãa na n sarmame! So-golemsã na n lebga tɩrse, la b na n kõo so-rʋdã!

⁶ La ninsaal buud fãa na n yãa fãagr ning Wẽnnaam sẽn kõtã.

⁷ Dẽ, a Zã ra yeta neb kʋʋngã sẽn wat yẽ nengẽ t'a lis-bã yaa: Wag-toos buudu, ãnna n wilg yãmb tɩ y zoe sũ-puugr sẽn watã?

⁸ Woto yĩnga, bɩ y wom biis sẽn zemsd ne neb sẽn tek yam n kos sugri, la y da tags y sũyã pʋs t'a Abraham sẽn ya yãmb yaabã sekame ye. Bala, mam yeta yãmb tɩ Wẽnnaam tõe n dɩka kug-kãensã n kɩt tɩ b lebg a Abraham yagense.

⁹ Larã zoe n bee tɩɩsã yẽgẽ moasã. Dẽ, b na n keega tɩɩg ning fãa sẽn ka womd bi-sõama, n lob bugmẽ.

¹⁰ Neb kʋʋngã soka a Zã yaa: Woto wã, bõe la tõnd tog n maane?

¹¹ A Zã leok-b lame n yeele: Bɩ ned ning sẽn tar fu-yerdɩ a yiib yãk a ye n kõ sẽn ka tar-a, la ned ning sẽn tar n dɩtẽ me maan a woto.

¹² Yaood-dɛɛgdbã me waame n dat t'a lis-ba. B soka a Zã yaa: Karen-saamba, tõnd tog n maana bõe?

¹³ Yẽ leok-b lame n yeele: Da reeg-y yaood n yɩɩd b sẽn kõ yãmb noor tɩ y reegã baa bilfu.

¹⁴ Sodaas me soka a Zã tɩ la bãmb yẽ tog n maana bõe? Yẽ leoka bãmb n yeele: Da maan-y ned pãng ye, la y da rõd neb zaalem ye, la y maan sũ-noog ne y yaoodã.

¹⁵ Nebã da yas n gũudame, la b fãa da sokda b mens n dat n bãng sãnde ka a Zã la Kiristã.

¹⁶ A Zã leoka bãmb fãa n yeele: Mam lisda yãmb koomẽ. La ned a ye n wata, n tar pãng n yɩɩd maam. Mam pʋs n pa zems tɩ lood bãmb neooda sẽbds ye. Bãmb na n lisa yãmb Sɩɩg-sõngẽ la bugmẽ.

¹⁷ Bãmb zãada b kãoorgo. Bãmb na n pɩɩsa b zɛɛga, n wʋk ki wã n sui b baoorẽ. La b na n yõoga wudgã ne bugum sẽn ka kiida.

¹⁸ A Zã sagla nebã ne sagls a taab wʋsgo, n moon bãmb koe-noogã.

¹⁹ La a Zã sẽn wilg Herood sẽn ya Gʋvɛrneerã t'a sẽn maan ne a ba-biig a Filip pag Herodyaadã, ne tʋʋm wẽnsã fãa a sẽn maanã ka zemse,

²⁰ Herood leb n maana tʋʋm wẽng a to n paase, n yõk a Zã n sui bi-bees roogo.

²¹ Neba fãa sẽn paam koom lisgu, a Zezi me paama lisgu. La bãmb sẽn pʋʋsd wakate, yĩngr pakame,

²² la Sɩɩg-sõng rɩka man-wall wẽneg n sig bãmb zugu. Koɛɛg zĩnda saasẽ n yeele: Fo yaa mam bi-ribl-nongr sẽn ta mam yam zãnga.

²³ A Zezi sẽn wa n na n sɩng b tʋʋmdã, rẽ tɩ b da tara yʋʋm pis-tã sẽne. Bãmb da yaa a Zozɛf biig wa nebã sẽn dag n tagsdã. A Zozɛf dag n yaa a Heli biiga,

²⁴ sẽn yaa a Matat biiga, sẽn yaa a Levi biiga, sẽn yaa a Melki biiga, sẽn yaa a Yanayi biiga, sẽn yaa a Zozɛf biiga,

²⁵ sẽn yaa a Matatyas biiga, sẽn yaa a Amos biiga, sẽn yaa a Nahum biiga, sẽn yaa a Esli biiga, sẽn yaa a Nagayi biiga,

²⁶ sẽn yaa a Maat biiga, sẽn yaa a Matatyas biiga, sẽn yaa a Semeyin biiga, sẽn yaa a Zozɛf biiga, sẽn yaa a Zoda biiga,

²⁷ sẽn yaa a Zoaana biiga, sẽn yaa a Resa biiga, sẽn yaa a Zorobabɛll biiga, sẽn yaa a Salatyɛl biiga, sẽn yaa a Neeri biiga,

²⁸ sẽn yaa a Melki biiga, sẽn yaa a Adi biiga, sẽn yaa a Kozam biiga, sẽn yaa a Elmadam biiga, sẽn yaa a Ɛɛr biiga,

²⁹ sẽn yaa a Zezi biiga, sẽn yaa a Eliyezɛɛr biiga, sẽn yaa a Zorim biiga, sẽn yaa a Matat biiga, sẽn yaa a Levi biiga,

³⁰ sẽn yaa a Sɩmyõ biiga, sẽn yaa a Zuda biiga, sẽn yaa a Zozɛf biiga, sẽn yaa a Zonam biiga, sẽn yaa a Eliyakim biiga,

³¹ sẽn yaa a Meleya biiga, sẽn yaa a Mena biiga, sẽn yaa a Matata biiga, sẽn yaa a Natã biiga, sẽn yaa a Daviid biiga,

³² sẽn yaa a Ezayi biiga, sẽn yaa a Zobɛɛd biiga, sẽn yaa a Booz biiga, sẽn yaa a Sala biiga, sẽn yaa a Nasõ biiga,

³³ sẽn yaa a Aminadab biiga, sẽn yaa a Admin biiga, sẽn yaa a Arni biiga, sẽn yaa a Ɛsrom biiga, sẽn yaa a Farɛs biiga, sẽn yaa a Zuda biiga,

³⁴ sẽn yaa a Zakob biiga, sẽn yaa a Izak biiga, sẽn yaa a Abraham biiga, sẽn yaa a Taara biiga, sẽn yaa a Nakoor biiga,

³⁵ sẽn yaa a Seruk biiga, sẽn yaa a Reyu biiga, sẽn yaa a Falɛk biiga, sẽn yaa a Ebɛɛr biiga, sẽn yaa a Sala biiga,

³⁶ sẽn yaa a Kayinam biiga, sẽn yaa a Arfaksaad biiga, sẽn yaa a Sɛm biiga, sẽn yaa a Nowe biiga, sẽn yaa a Lemek biiga,

³⁷ sẽn yaa a Matusala biiga, sẽn yaa a Henok biiga, sẽn yaa a Zarɛd biiga, sẽn yaa a Maleleyɛl biiga, sẽn yaa a Kayinam biiga,

³⁸ sẽn yaa a Enos biiga, sẽn yaa a Sɛt biiga, sẽn yaa a Adam biiga, sẽn ya Wẽnnaam biiga.

4

¹ A Zezi sẽn pid ne Sɩɩg-sõngo, bãmb yii Zʋrdẽ n lebg n wa, la Sɩɩgã talla bãmb n kẽng weoogẽ.

² La rõatã maka bãmb beene dasem pis-naase. La dasem kãens pʋgẽ, bãmb ka tol n dɩ bũmb ye. La rẽ sẽn looge, kom yaool n yõka bãmba.

³ Dẽ, rõata yeela bãmb yaa: Yãmb sã n yaa Wẽnnaam Bi-ribla, bɩ y yeel kug-kãensã tɩ b lebg buri.

⁴ La a Zezi leoka yẽnda t'a gʋlsame tɩ: Ninsaal kõn vɩ ne rɩɩb bal ye.

⁵ Rõata talla bãmb n dʋ yĩngr n paase, n wilg bãmb dũniyã soolem dãmbã nif kamsg pʋgẽ,

⁶ n yeel-b yaa: Mam na n kõo yãmb dũni naamã fãa, ne soolem kãensã ziirã, bala, b kõ-a-la maam, la mam kõt-a la m sẽn dat a soaba.

⁷ Dẽ, yãmb sã n wõgemd mam taoore, a fãa na n lebga yãmb n so.

⁸ A Zezi leok-a lame n yeele: B gʋlsame yaa: "Waoog Zu-soaba, fo Wẽnnaam, la f pʋʋs bãmb b yen bala."

⁹ Rõata leb n talla a Zezi yɛs n kẽng Zeruzalɛm, n yals bãmb wẽnd-doogã zug n yeel-ba: Yãmb sã n yaa Wẽnnaam Bi-ribla, bɩ y yɩk ka n tiimd tẽnga.

¹⁰ Bala, b gʋlsame tɩ: "Bãmb na n yeela b malegsã tɩ b gũ yãmba,

¹¹ la malegsã na n zãa yãmb ne b nusi, sẽn na n yɩl tɩ yãmb naoor da wa n lak kugr ye."

¹² A Zezi leoka yẽnda tɩ b gʋlsame tɩ: Ra mak Zu-soaba, fo Wẽnnaamã ye.

¹³ Rõata sẽn mak a Zezi ne makr buud toor-toor n sɛ, a loogame n bas bãmba, hal tɩ ta a sẽn na n le paam weer a to n mak-ba.

¹⁴ A Zezi lebg n leba Galile ne Sɩɩg-sõngã pãnga. La bãmb yʋʋrã saaga soolmã fãa.

¹⁵ A Zezi da zãmsda nebã karen-dot pʋse, la nebã fãa ra pẽgda bãmba.

¹⁶ A Zezi kẽnga Nazarɛt, tẽng ning b sẽn dag n wub bãmbã. La vʋʋsg daare, bãmb kẽe karen-doogẽ wã wa bãmb sẽn minim n maandẽ wã. Bãmb yikame n na n karem.

¹⁷ La b kõo bãmb Wẽnnaam no-rɛɛs a Ezayi sebre. Bãmb laka sebrã, n yã zĩig ning b sẽn da gʋls n yeel tɩ:

¹⁸ Zu-soabã Sɩɩg bee mam zugu, tɩ bõe, b pʋdga b kaam mam zugu, tɩ m tõe n bels sũ-sãoong rãmba, tɩ m togs naong rãmbã koe-noogã. Bãmb tʋma maam tɩ m tʋg n moon yemsã yolsg koɛɛga, la m moon n togs zoensã, tɩ b na n leb n paama b nini, tɩ m kɩt tɩ neb nins b sẽn namsdã loog ne lohorem,

¹⁹ tɩ m moon bark yʋʋmd Zu-soabã sẽn kõtã.

²⁰ A Zezi pila sebrã n kɩs tʋmtʋmdã la b zĩndi. Neba fãa sẽn be karen-doogẽ wã da geta bãmba.

²¹ A Zezi sɩngame n gom ne-b n yeele: Gʋls-sõng kãngã yãmb sẽn wʋm moas-moasã wã paama pidsg rũnna.

²² La nebã fãa da kɩta bãmb kaset n pẽgd bãmba, gom-sõamy nins sẽn dag n yit bãmb noorẽ wã yĩnga, la b sokdẽ tɩ bãmb ka a Zozɛf biigã wɛ?

²³ A Zezi yeel-b lame yaa: Mam miime tɩ yãmb na n wẽe maam yel-bũn kãnga: Tɩpa, tɩp f meng f toor n sãooge, la: bɩ y maan bũmb nins fãa yãmb sẽn maan Kapɛrnawom tɩ tõnd wʋmã, y tẽngẽ ka.

²⁴ A Zezi leb n yeel-b lame yaa: Sɩda, mam yeta yãmb tɩ Wẽnnaam no-rɛɛs baa a yen zɩ n paam tɩ b reeg-a sõama a meng tẽngẽ ye.

²⁵ Mam yeta yãmb sɩd t'a Eli wakate, yĩngr sẽn pag tɩ saag ka ni yʋʋm a tãab la kiis a yoobe, tɩ kom kãseng kẽ tẽngã fãa wã, pʋgkõap wʋsg n da be Israyɛl.

²⁶ Baoosgo, Wẽnnaam ka tʋm a Eli pʋgkõor baa a yen nengẽ, sã n ka Sɩdõ soolem pʋgkõor a yembr sẽn dag n be Sarɛpta nengẽ bala.

²⁷ La Wẽnnaam no-rɛɛs a Elize wakate, yĩn-gãong bãas sẽn tar b rãmbã me ra yaa wʋsg Israyɛl. La baoosgo, baa a yen bãmb sʋkã ka paam yɩlgr ye, sã n ka Siiri rao a Naama bala.

²⁸ Neba fãa sẽn dag n be karen-doogẽ wã sẽn wʋm gom kãensã, b sũyã puugame.

²⁹ Bãmb yikame n veo a Zezi n yiis tẽngã, n tall-b n tɩ ta tãn-puuf ning bãmb tẽngã sẽn tiẽ wã zugu, n na n tus bãmb tɩ b yi tãngã zug n lʋɩ.

³⁰ La a Zezi tũu bãmb sʋk bal n looge.

³¹ A Zezi kẽnga Kapɛrnawom, Galile tẽng a ye, la bãmb dag n zãmsda nebã Zuif-rãmbã vʋʋsg raare.

³² La bãmb zãmsgã yɛɛsa nebã. Bala, bãmb da zãmsda ne noore.

³³ Dao a yen n da be karen-doogẽ wã tɩ zĩn-dẽgd tar-a.

³⁴ A kelma ne pãng n yeele: Hey! Nazarɛt dao a Zezi, yãmb data tõnd ne bõe? Yãmb waame n na n sãam tõnd laa? Mam mii yãmb sẽn ya ned ninga. Yãmb yaa Wẽnnaam sõmblem soaba.

³⁵ A Zezi tãsa yẽnda n yeel-a t'a sĩndi, la a yi n bas rao wã. Zĩnã luba daowã nebã sʋka, la a yi n bas-a n ka maan-a wẽng baa bilfu.

³⁶ Nebã fãa yɛɛsame n gomd ne taab n yetẽ tɩ koe-kãngã yaa bõe koɛɛga? Bãmb tara noor la pãnga, tɩ b sã n yeel zĩn-dãmb nins sẽn ya rẽgdã tɩ b yi, b yitame.

³⁷ La a Zezi yʋʋrã dag n saagda soolmã fãa.

³⁸ A Zezi sẽn yi karen-doogẽ wã, b kẽnga a Sɩmo yiri. A Sɩmo reem-poakã yĩns ra wɩnga hal wʋsgo, la b kosa a Zezi tɩ b maag-a.

³⁹ A Zezi sulga a zugẽ n tãs yĩn-wɩngrã, la a yĩn-wɩngrã sigame. La wakat kãng bala, a yikame n maan-b sãando.

⁴⁰ Wĩndg sẽn kẽ, neb nins fãa sẽn dag n tar bãad-dãmba, bãas buud toay-toay sẽn tara, tall-b lame n wa a Zezi nengẽ. A Zezi tika bãmb ned kam fãa ne b nusi, n maag-ba.

⁴¹ Zĩn-dãmb me dag n yit n basda neb wʋsgo, la b kelemdẽ n yetẽ tɩ: Yãmb yaa Wẽnnaam Bi-ribla. La a Zezi da tãsda bãmba, n gɩdgd-b tɩ b ra gom ye. Bala, zĩn-dãmbã ra miime t'a Zezi yaa Kiristã.

⁴² Beoogã sẽn vẽege, bãmb yiime n kẽng zĩig sẽn ya we-rasempʋɩɩgẽ. Neb kʋʋng sɩngame n gẽesd bãmba, n wa n ta bãmb nengẽ. B dag n datame n gɩdg a Zezi tɩ b da loog n bas-b ye.

⁴³ La a Zezi yeel-b lame tɩ yaa tɩlɛ tɩ bãmb moon Wẽnnaam soolem koe-noogã tẽms a taabã me. Bala, yaa bõn-kãng yĩng la b sẽn tʋm bãmbã.

⁴⁴ La a Zezi da moonda koe-noogã Galile karen-dotã pʋse.

5

¹ A Zezi sẽn da be Genezarɛt mogrã noore, neb kʋʋngã gũbga bãmba, n pẽdgd taab n dat n wʋm Wẽnnaam goamã.

² A Zezi yãnda koom kogend a yiib sẽn be kooma noore, zĩm-yõagdb sẽn da sig n bas n pegsd b zĩm-gãmba.

³ A Zezi kẽe koglg a yen sẽn da ya a Sɩmo rẽnda, n kos-a t'a zãag bilf ne kʋɩl-koakã. La a Zezi zĩnda koom koglgẽ wã n pa be n zãmsd neb kʋʋngã.

⁴ A Zezi sẽn gom n sɛ, b yeela a Sɩmo yaa: Kẽng-y kooma sẽn zulmẽ wã, tɩ y lob y zĩm-gãmba wã n yõg zĩma.

⁵ A Sɩmo leoka bãmba: Karen-saamba, tõnd tʋma yʋngã tõr n ka tol n yõk bũmb ye. La yãmb sẽn yeelã yĩnga, m na n loba zĩm-gãmba wã.

⁶ Bãmb sẽn lobã, b yõga zĩm wʋsgo, la b zĩm-gãmba wã ra pãrsdame.

⁷ Bãmb kamsa b tũud-n-taasã sẽn dag n be koglg a to wã pʋgẽ wã tɩ b wa n sõng-ba. B waame la b pidsa koom-kogend a yiibã hal tɩ b rat n lisi.

⁸ A Sɩmo Pɩyɛɛr sẽn yã woto, a wõgemda a Zezi taoor n yeele: Zu-soaba, zãag-y y meng ne maam. Tɩ bõe, mam yaa yel-wẽn maanda.

⁹ Bala, rabeem n da yõk yẽ ne neb nins sẽn da be ne yẽnda wã, zĩma bãmb sẽn yõgã waooglem yĩnga.

¹⁰ La yɩɩ woto me ne a Zebde kom-dibli a Zak ne a Zã sẽn yaa a Sɩmo tũud-n-taasã. La a Zezi yeela a Sɩmo yaa: Da zoe rabeem ye. Sẽn sɩng ne moasã, fo na n yɩɩ nin-baooda.

¹¹ Dẽ, bãmb lebg n talla kogendã n wa kʋɩl-koakẽ wã, n bas fãa la b tũ a Zezi.

¹² A Zezi ra bee tẽng a yen pʋgẽ, la rao a ye n be be tɩ yĩn-gãong bãag tar-a. A sẽn yãnd a Zezi, a lʋɩɩme n fõgen a neng tẽnga, n bõos bãmb a woto: Zu-soaba, yãmb sã n data, y tõee n kɩtame tɩ m yɩ yɩlemde.

¹³ A Zezi tẽega b nug n sɩɩs-a n yeele: Mam datame. Bɩ f yɩ yɩlemde. Tao-tao bala, yĩn-gãong bãagã loog n bas-a lame.

¹⁴ Dẽ, a Zezi keooga yẽ t'a ra gom bõn-kãng ne ned ye. La b yeel-a yaa: Kẽng n tɩ wilg f meng maan-kʋʋdã, la f maan maoong wa sẽn zems a Moyiis sẽn yeelã, f yɩlgrã yĩnga, t'a tõe n yɩ kaset bãmb yĩnga.

¹⁵ A Zezi yʋʋrã ra saagd n yɩɩda pĩnda. Neb kʋʋng wʋsg tigma taab n na n kelg-ba, la b tõe n paam tɩ b maag b bãasã.

¹⁶ La a Zezi ra kẽngda we-rasempʋɩɩsẽ, n tɩgd n pʋʋsdẽ.

¹⁷ Daar a yembre, a Zezi ra zãmsda neba. Fariisẽ-dãmb ne tõog karen-saam-dãmb da yii Galile tẽmsã fãa ne Zude la ne Zeruzalɛm n wa n zĩ be. La Zu-soaba pãng ra bee ne a Zezi tɩ bãmb maagd bãad-dãmba.

¹⁸ La ade, neb n tʋk ned sẽn ki bogre, ne gãaga, n da baood n na n kẽes-a, n sik-a a Zezi taoore.

¹⁹ La nebã sẽn ya wʋsg tɩ bãmb ka mi b sẽn na n tũ zĩig ning n kẽes-a wã yĩnga, b dʋʋ roogã zugu, n maan võore, n sik ki-bogrã ne a gãagã a Zezi taoor nebã sʋka.

²⁰ A Zezi sẽn yã b tẽebã, b yeela rao wã t'a paama a yel-wẽna sugri.

²¹ Tõog karen-saam-dãmbã ne Fariisẽ-dãmbã sɩngame n tagsdẽ n yetẽ yaa: Yaa yɛ ned la yõwã n paoogd Wẽnnaam a woto? Sã n ka Wẽnnaam b yen, ãnna n tõe n kõ yel-wẽn sugri?

²² A Zezi bãnga bãmb tagsdã, n gom ne-b n sok-b yaa: Bõe yĩng tɩ yãmb tagsd a woto y sũyã pʋse?

²³ Bʋg yeelg n ya naana n yɩɩda? "Fo paama f yel-wẽna sugr" bii, bɩ "yik n kẽne"?

²⁴ La yaa sẽn na yɩl tɩ yãmb bãng tɩ Ninsaal Bi-riblã tara pãn-tõog tẽng zug tɩ kõ yel-wẽna sugri. Dẽ, a Zezi yeela ki-bogrã yaa: Mam yeta foom tɩ f yik n dɩk f gãag n kuil f yiri.

²⁵ La wakat kãng bala, a yika bãmb taoore, n dɩk gãag ning yẽ sẽn da gãe a zugã, n loog n kuiis a yir la a pẽgd Wẽnnaam.

²⁶ Bãmb fãa ra yɛɛsame, la b waoogd Wẽnnaam. La rabeem yõka bãmb tɩ b yeel yaa: Tõnd yãa bõn-bãnd rũnna.

²⁷ Dẽ poore, a Zezi yiime, la b yãa yaood-dɛɛgd sẽn zĩ a tʋʋm zĩigẽ, t'a yʋʋr la a Levi. A Zezi yeela yẽ t'a tũ bãmba.

²⁸ A Levi basa fãa n yik n tũ a Zezi.

²⁹ A Levi maana kibs kãseng a yiri, a Zezi yĩnga. La yaood-dɛɛgdb wʋsg ne neb a taab n da be be n zĩ n dɩt ne bãmba.

³⁰ Fariisẽ-dãmbã ne bãmb tõog karen-saam-dãmbã ra yẽgemdame n yet a Zezi karen-biisã yaa: Bõe yĩng tɩ yãmb dɩtẽ la y yũud ne yaood-dɛɛgdbã la yel-wẽn maandbã?

³¹ A Zezi gomame n yeel-b yaa: Ka neb nins sẽn tar laafɩ wã n baood tɩp ye: yaa bãad-dãmbã.

³² Mam ka wa n na n bool nin-tɩrs tɩ b wa tek yam n kos sugr ye, yaa yel-wẽn maandbã.

³³ Bãmb yeela a Zezi yaa: A Zã karen-biisã ne Fariisẽ-dãmba karen-biis loeta noor naoor wʋsg n pʋʋsdẽ, tɩ yãmb karen-biisã yaool n dɩtẽ la b yũuda.

³⁴ A Zezi leoka bãmb yaa: Yãmb tõe n modga pʋg-paal sɩd tũud-n-taas tɩ b loe noor wakat ninga pʋg-paal sɩdã sẽn ket n be bãmb sʋk sɩda?

³⁵ Day n wat tɩ b na n yiis pʋg-paal sɩdã n bas-ba. Dẽ, da-kãense, b na yaool n loe noore.

³⁶ A Zezi wẽe bãmb yel-bũnd me n yeele: Ned kõn kẽeg fu-paalg n yãk a peend n na n lisg fu-kʋdg ye. Sã n ka rẽ, yẽ n kẽeg fu-paalga, la peendã yẽ sẽn yãkã ka zemsd ne fu-kʋdgã ye.

³⁷ La ned ka suiid divẽ paalg ko-wao-kʋdẽ ye. Sã n ka rẽ, divẽ paalgã na n kɩtame tɩ ko-waoosã pusi. Divẽ wã na raage, la ko-waoosã na sãam.

³⁸ La b tog n suii divẽ paalg ko-wao-paals pʋse.

³⁹ La ned sã n yũ divẽ kʋdgo, a ka leb n dat divẽ paalg ye. Tɩ bõe, a yetame tɩ divẽ kʋdgã yaa noogo.

6

¹ Zuif-rãmbã vʋʋsg daar a yen, a Zezi dag n pɩʋʋgda pʋto. Bãmb karen-biisã ra yãgsda kood n tẽgd n wãbdẽ.

² Fariisẽ-dãmba kẽer soka bãmb yaa: Yaa bõe tɩ yãmb maand bũmb sẽn ka zems tɩ maan vʋʋsg daare?

³ A Zezi leok-b lame yaa: Yãmb ka karem bũmb ning a Daviid sẽn maan kom sẽn tar yẽ ne a tũud-n-taasã wakate,

⁴ sẽn yɩ wãn tɩ yẽ kẽ Wẽnnaam doogẽ wã n deeg kaset bur paadma n wãb la a kõ a tũud-n-taasã, baa ne ned sẽn ka tar noor tɩ rɩ, sã n ka maan-kʋʋdbã balã laa?

⁵ La a Zezi yeela bãmb tɩ Ninsaal Bi-ribla yaa vʋʋsg daarã Zu-soaba.

⁶ Zuif-rãmbã vʋʋsg daar a to, a Zezi kẽe karen-doogẽ wã n zãmsd neba. Dao n dag n be be t'a nug rɩtg ki.

⁷ Tõog karen-saam-dãmbã ne Fariisẽ-dãmbã da gũusda a Zezi n dat n ges b sã n na n maaga ned vʋʋsg daarã. Dag n yaa sẽn na n yɩl n paam bũmb n dõd a Zezi.

⁸ La a Zezi da mii b tagsdã. Dẽ, b yeela rao ninga nug sẽn ki wã t'a yik n yals sʋk be. Yẽ yik n yaasa yĩngri.

⁹ Dẽ, a Zezi yeela bãmb yaa: M sokda yãmba, noor beeme tɩ maan neer vʋʋsg daare, wall tɩ maan wẽnga? Tɩ fãag neda, wall tɩ kʋ-a?

¹⁰ Dẽ, a Zezi wẽnemd n gesa bãmb fãa n yeel rao wã t'a tẽeg a nugã. Yẽ tẽegame la a nugã vʋʋgame.

¹¹ Bãmb sũyã puuga wʋsg tɩ b yẽsd ne taab n baood b sẽn na n maan a Zezi bũmb ninga.

¹² Wakat kãnga, a Zezi kẽnga tãng zug n na n tɩ pʋʋse. La bãmb pʋʋsa Wẽnnaam yʋngã tɛk fãa.

¹³ La beoogã sẽn vẽege, bãmb boola b karen-biisã n tũus bãmb piig la a yiibu, n bool-b tɩ tẽn-tʋmdba.

¹⁴ Yaa a Sɩmo bãmb sẽn pʋd a yʋʋr t'a Pɩyɛɛrã, ne a ba-biiga Ãndre, a Zak la a Zã, la a Filip ne a Bartelemi,

¹⁵ a Matye la a Toma, la a Alfe biig a Zak ne a Sɩmo b sẽn boond tɩ zelot,

¹⁶ la a Zak biig a Zuud, la a Zudas Iskaryo sẽn lebg zãmb soabã.

¹⁷ A Zezi yii ne b karen-biisã tãngã zug n sig n yaas tẽnga. Bãmb karen-bi wʋsgã da bee be ne neb kʋʋng wʋsg sẽn yi Zude soolem fãa, la Zeruzalɛm la Tɩɩr tẽn-kɩremse ne Sɩdõ. Bãmb da waame n na n kelg a Zezi, la b paam tɩ b yiis b bãasã n maag-ba.

¹⁸ Zĩn-dẽgd sẽn da namsd-b rãmbã paama maagre.

¹⁹ La neb kʋʋngã fãa ra baood n sɩɩs a Zezi. Bala, pãng n da yit a Zezi nengẽ n maagd bãmb fãa.

²⁰ Dẽ, a Zezi zẽka b neng n ges b karen-biisã n yeel yaa: bark bee yãmb sẽn ya naong rãmba zutu, bala, Wẽnnaam soolem yaa yãmb dẽnda.

²¹ Bark bee yãmb kom sẽn tar moasã wã zutu, bala, yãmb na n tɩgame. Bark bee yãmb sẽn yãbd moasã wã zutu, bala, yãmb na la.

²² Bark bee yãmb zutu, nebã sẽn na n kisg yãmba, la b bak yãmb toore, la b tʋ yãmba, la b tõdg yãmb yʋʋrã wa bõn-wẽnga, Ninsaal Bi-riblã yĩnga.

²³ Bɩ y maan sũ-noog da-kãnga n kɩdme, tɩ bõe yãmb keoor na n yɩɩ kãseng arzãn pʋgẽ. Bala, bãmb ba-rãmb dag n maanda Wẽnnaam no-rɛɛsdbã me a woto.

²⁴ La yãmb sẽn ya arzegs rãmbã, yãmb na paam toogo, bala, yãmb tara y belsgo.

²⁵ Yãmb sẽn dɩt n tɩgd moasã wã, yãmb na paam toogo, bala, kom na n yõka yãmba. Yãmb sẽn laad moasã wã, yãmb na paam toogo, bala, yãmb na n paama sũ-sãoong la nintãm.

²⁶ Yãmb na paam toogo, neba fãa sã n pẽgd yãmba, bala, ba-rãmba ra maanda belgr no-rɛɛsdbã a woto.

²⁷ La mam yeta yãmba, yãmb sẽn kelgd maamã, tɩ y nong y bɛɛbã, la y maan neb nins sẽn kis yãmbã neere.

²⁸ Ning-y neb nins sẽn kãabd yãmb wẽngã zut barka, la y pʋʋs neb nins sẽn maand yãmb wẽngã yĩnga.

²⁹ Ned sã n wẽ fo yɛgd pɛka, bɩ f wẽnemd a to wã me n kõ-a. Ned sã n deeg fo fu-bedre, bɩ f bas-a t'a reeg f fu-bilã me.

³⁰ Ned ning fãa sẽn kos foom bũmb bɩ f kõ-a, la ned sã n dɩk fo paoongo, bɩ f ra sok-a ye.

³¹ Bũmb ninga yãmb sẽn dat tɩ neba maan yãmbã, bɩ yãmb me maan bãmb me a woto.

³² Yãmb sã nong neb nins sẽn nong yãmbã bala, bõe bark la yãmb na n paame? Bala, yel-wẽn maandbã me nonga neb nins sẽn nong bãmbã.

³³ La yãmb sã n maand neb nins sẽn maand yãmb neerã bal neere, bõe bark la yãmb na n paame? Bala, yel-wẽn maandbã me maanda a woto.

³⁴ La yãmb sã n pengd neb nins yãmb sẽn tẽed tɩ b na n paam n lebsa yãmbã bala, bõe bark la yãmb na n paame? Bala, yel-wẽn maandbã me pengda taaba, tɩ b tõe n leb n deeg sẽn zem a woto.

³⁵ La, nong-y yãmb bɛɛba. Maan-y-b neere, la y peng n da tẽed tɩ b na lebs-y ye. La yãmb keoor na n yɩɩ kãsenga, la yãmb na n yɩɩ Wẽnnaam sẽn be saasẽ saasẽ wã kamba. Bala, bãmb yaa sõama zɩ-beoog rãmbã ne nin-wẽnsã yĩnga.

³⁶ Bɩ y yɩ nimbãan-zoɛtba, wa yãmb ba wã sẽn ya nimbãan-zoɛtã.

³⁷ Da bʋ-y ned bʋʋd ye, la b kõn bʋ yãmb bʋʋd ye. Da kao-y ned bʋʋd ye, la b kõn kao yãmb bʋʋd ye. Maan-y sugri, la b na maan yãmb me sugri.

³⁸ Bɩ y kõ la b na kõ yãmba. B na n maka sõama n kõ yãmba, n dĩ, n yegse, n ning tɩ sudgi. Bala, ne makdg ninga yãmb sẽn makd n kõt nebã, Wẽnnaam na n maka ne rẽnda n kõ yãmba.

³⁹ A Zezi wẽe bãmb yel-bũnd me n yeele: Zoang tõe n tɛɛ zoang sɩda? Bãmb b yiibã fãa kõn lʋɩ bokẽ sɩda?

⁴⁰ Karen-biig ka yɩɩd a karen-saamb ye. La karen-biig fãa sẽn paam zãmsg n taas lebga wa a karen-saamba.

⁴¹ Yaa bõe tɩ fo get moogã sẽn be f ba-biigã nifẽ wã, n yaool n ka ne sug-raoogã sẽn be fo mengã rẽndẽ wã?

⁴² Fo sẽn ka ne sug-raoogã sẽn be fo nifẽ wã, fo na n yɩɩ a wãn n yeel f ba-biigã t'a bas tɩ f yãk moogã sẽn be a nifẽ wã? Zãmb soaba, deng n yãk sug-raoogã sẽn be fo nifẽ wã, la rẽ, fo na n yãa sõama n tõog n yãk moogã sẽn be f ba-biigã nifẽ wã.

⁴³ Tɩ-sõng ka be n womd bi-wẽns ye, la tɩ-wẽng me ka be n womd bi-sõama ye.

⁴⁴ Bala, b bãngda tɩɩg fãa a biisẽ. B ka wobd kankam gõaag zug ye, la b ka kaood sib kɛglg zug ye.

⁴⁵ Nin-sõng yiisda bõn-sõng a laog-sõngã bĩngr zĩigẽ sẽn be a sũurẽ, la nin-wẽng yiisda wẽnga a laog-wẽngã bĩngr zĩigẽ. Bala, yaa bũmb ning sẽn pid sũurã n yit noorẽ wã.

⁴⁶ Bõe yĩng tɩ yãmb boond maam tɩ Zu-soaba! Zu-soaba! La y ka maand mam sẽn yet yãmbã?

⁴⁷ Ned ning fãa sẽn wat mam nengẽ n kelgd mam goama n sakdẽ, mam na n wilga yãmb yẽ sẽn wẽnd ned ninga.

⁴⁸ Yẽ wẽnda wa rao sẽn yik n na n me a roogo. Yẽ tuu bog-zulunga, n yẽbg roogã kugr zugu. La ko-kãseng sẽn wa, ko-zoetma zoeeme n wẽ roogã, la a ka tõog n miim-a ye, roogã meebã sẽn da ya sõama wã yĩnga.

⁴⁹ La ned ning sẽn wʋmd n ka sakdẽ wã, yẽ wẽnda wa rao a yen sẽn me a roog tom zugu, n ka tuk bok ye. Ko-zoetma zoee n wẽe roogã, la tao-tao bala, a lʋɩɩme, la ro-kãnga sãoongã yɩɩ kãsenga.

7

¹ A Zezi sẽn gom gom-kãense ne neb nins sẽn da kelgd bãmba n sɛ, b kẽnga Kapɛrnawom.

² Sodaas koabg naab a ye n da tar a tʋmtʋmd nongr sẽn gãe ne bãag n kolg kũum.

³ Yẽ sẽn wʋm tɩ b gomd a Zezi yelle, a tʋma Zuif-rãmbã kãsem-dãmb bãmb nengẽ tɩ b tɩ kos-b tɩ b wa n fãag a tʋmtʋmdã.

⁴ Bãmb sẽn ta a Zezi nengẽ, b bõosa bãmb ne pẽdgr n yeele: Rao-kãngã zemsame tɩ y maan a sẽn kotã n kõ-a.

⁵ Tɩ bõe, yẽ nonga tõnd buudã, la yaa yẽnda n me tõnd karen-doogã.

⁶ Dẽ, a Zezi da tũuda bãmb n dabda, la b sẽn kolg yirã, sodaas koabg naabã tʋma a zo-rãmb tɩ b tɩ yeel a Zezi yaa: Zu-soaba, da nams-y y meng a woto ye. Bala, mam ka zems tɩ yãmb kẽ mam zakẽ ye.

⁷ Yaa woto yĩng me n kɩt tɩ mam ka tags tɩ mam zemsame tɩ wa yãmb nengẽ m toorã. Yãmb ye n gom bala, la mam tʋmtʋmdã na n paama laafɩ.

⁸ Bala, neb sẽn yɩɩd maam n so maam, tɩ mam me so sodaase. Mam sã n yeel a yen t'a kẽnge, a kẽngdame, la m yeel a to t'a wa, a watame. Mam sã n yeel m tʋmtʋmd t'a maan woto, a maanda rẽ.

⁹ Dẽ, a Zezi sẽn wʋm gom-kãensã wã, a yɛɛsa bãmba. La b wẽnemdame n yeel neb kʋʋngã sẽn da pʋgd bãmbã yaa: Mam yeta yãmb tɩ hal baa Israyɛl pʋgẽ, mam nan ka yã tẽ-kãseng a woto ye.

¹⁰ La b sẽn tʋm-b rãmbã sẽn lebg n ta yiri, b mikame tɩ tʋmtʋmda paama laafɩ.

¹¹ Vẽkembeoogo, a Zezi kẽnga tẽng a yen sẽn boond tɩ Nayin. Bãmb karen-biisã ne neb wʋsg da tũuda bãmba.

¹² A Zezi sẽn wa n kolg tẽngã noore, mikame tɩ neb n da tʋk kũum n dabd mumbu. Yẽ da yaa pag a yen sẽn ya pʋgkõor bi-ribl yende. La tẽngã neb wʋsg ra yãagda pagãm

¹³ Zu-soabã yãnda pagã, t'a nimbãaneg yõk-b tɩ b yeel-a t'a ra yãb ye.

¹⁴ A Zezi kolgame n tik pãndarã, la neb nins sẽn da tʋk-a wã yalsame. A Zezi yeelame yaa: Bi-bɩɩga, mam yeta foom tɩ f yiki.

¹⁵ La sẽn ki-a wã yikame n zĩnd n sɩng n gomda, t'a Zezi lebs-a a ma.

¹⁶ Neba fãa yɛɛsame n pẽgd Wẽnnaam n yetẽ yaa: Wẽnnaam no-rɛɛs kãseng puka tõnd sʋka, la Wẽnnaam waa n gesa b nebã.

¹⁷ Nebã sẽn gom a Zezi yell woto wã, koe-kãng saaga Zude soolmã fãa ne a tẽn-kɩremsã.

¹⁸ A Zã karen-biisã togsa yẽ bõn-kãens fãa.

¹⁹ A Zã boola a karen-biis a yiib n tʋm-b tɩ b tɩ sok Zu-soabã n gese, yaa bãmb la sẽn tog n wa-a wã bii, bɩ bãmb tog n gũu ned a to.

²⁰ Raopã sẽn ta a Zezi nengẽ, b yeelame yaa: A Zãmbatiis tʋma tõnd yãmb nengẽ tɩ d wa sok n gese, yaa yãmb la sẽn tog n wa-a wã bii, bɩ tõnd tog n gũu ned a to?

²¹ Wakat kãng bala, a Zezi maaga bãad-dãmb wʋsgo, koms-rãmba, la sɩ-wẽns sẽn tar-b rãmba, la b pugs zoens wʋsg nini.

²² La a Zezi leok-b lame n yeele: kẽng-y n tɩ togs-y-yã a Zã bũmb nins yãmb sẽn yã la y wʋmã: Zoens nin pugsdame, wobs kẽndame, yĩn-gãong bãas sẽn tar b rãmbã yĩns lebgda sõama, wʋms wʋmdame, koe-noogã moonda naong rãmb sʋka.

²³ La bark bee ned ning mam sẽn kõn yɩ kug-lakdg a yĩngã zugu.

²⁴ A Zã sẽn tʋm-b rãmbã sẽn looge, a Zezi sɩngame n gom ne neb kʋʋngã a Zã yell n yeele: Yãmb kẽng n tɩ gesa bõe we-rasempʋɩɩgẽ wã? Tãnwĩig sobg sẽn miimda?

²⁵ La bõe la yãmb sẽn kẽng n tɩ gesã? Rao sẽn yer waoogr futu? Ad neb nins sẽn yer fu-bʋgsã, la b vɩ bõn neeb sʋkã bee rĩm-dãmb zagsẽ.

²⁶ La boẽ la yãmb sẽn kẽng n tɩ gesã? Wẽnnaam no-rɛɛsa? Mam yeta yãmb tɩ n-ye, la a pʋs n yɩɩda Wẽnnaam no-rɛɛsa.

²⁷ Yaa yẽ yell la b sẽn gʋls n yeel tɩ: "Gese, mam tʋmda m koe-toagsd t'a reng fo taoor n segl f waoongã."

²⁸ Mam yeta yãmb tɩ pagb sẽn dog b rãmbã sʋka, baa a yen ka be sẽn ya-a kãseng n yɩɩd a Zã ye. La baoosgo, sẽn ya-a yao-zʋʋg Wẽnnaam soolmẽ wã yaa kãseng n yɩɩd a Zã.

²⁹ Neba fãa ne yaood-dɛɛgdbã sẽn wʋm a Zã goama, b reega a Zã lisgã, n wilg tɩ Wẽnnaam yaa tɩrga.

³⁰ La Fariisẽ-dãmbã ne tõog karen-saam-dãmbã sẽn zãgs t'a Zã kõn lis bãmbã, b tõdga bũmb ning Wẽnnaam sẽn da seglg bãmb yĩngã.

³¹ Dẽ, a Zezi kẽnga taoor n yeele: Mam na n mamsa zamaan kãngã neb ne bõe? La b wẽnda ãnna?

³² Bãmb wẽnda kamb sẽn zĩ raagẽ n boond taab n yetẽ yaa: Tõnd peeba wɩɩg yãmb yĩnga, la yãmb ka sao ye. Tõnd yɩɩla kʋʋr yɩɩla, la yãmb ka yãb ye.

³³ Bala, a Zãmbatiis waame n ka wãbd buri, la a ka yũud divẽ ye, tɩ yãmb yetẽ tɩ zĩn n tar-a.

³⁴ Ninsaal bi-riblã sẽn wa, b rɩtame la b yũuda, tɩ yãmb yetẽ tɩ rao-kãnga yaa yão-be-neda, la rã-yũuda, la yaood-dɛɛgdbã ne yel-wẽn maandbã zoa.

³⁵ La neb nins sẽn deegd Wẽnnaam yamã miime t'a yaa yam.

³⁶ Fariisẽ a yen bõosa a Zezi tɩ b wa n dɩ ne yẽnda. A Zezi kẽe Fariisẽ wã yir n zĩnd n na dɩ.

³⁷ La gese, pag a ye n da be tẽngã pʋgẽ n ya yel-wẽn maanda. Yẽ bãngame t'a Zezi zĩi Fariisẽ wã zakẽ n dɩtẽ. Yẽ talla albatr tʋk sẽn pid ne tɩdare, n wa n yals a Zezi poorẽ, b nao wã sɛɛgẽ.

³⁸ A dag n yãbdame, n sɩng n madgd a Zezi nao wã ne a nintãma, la a da yẽesd-b ne a zoobdo, n mogsd bãmb naowã la a zãgsd-b ne tɩdarã.

³⁹ Fariisẽ ning sẽn bool a Zezi wã sẽn yã woto, a tagsa a sũurẽ n yeele: rao-kãngã sã n da yaẽ Wẽnnaam no-rɛɛsa, b rag n na bãngẽ pag ning sẽn sɩɩsd bãmbã sẽn ya ned ninga, la a sẽn ya bũmb ninga: yel-wẽn maanda.

⁴⁰ A Zezi goma ne a Sɩmo n yeel-a yaa: Sɩmo, mam dat n yeela foom bũmbu. T'a leok tɩ: "Karen-saamba, yeel-y-yã".

⁴¹ A Zezi yeela yẽnda yaa: ned a ye n da be tɩ neb a yiib tar yẽ samde. A yembrã dag n tara deniye kobs-nu samde, t'a to wã tar pis-nu.

⁴² La bãmb sẽn da ka tar n na yao wã, yẽ basa b yiibã fãa samã taale. Bãmb b yiibã sʋka, bʋg n na n nong yẽnda n yɩɩda?

⁴³ A Sɩmo leokame tɩ yẽ tagsdame tɩ yaa ned ning sẽn dag n tar sam-kẽeng tɩ b bas-a taalã. A Zezi yeela yẽ t'a togsa sɩda .

⁴⁴ Dẽ, a Zezi wẽnemda paga sẽne n yeel a Sɩmo yaa: Fo nee pʋg-kãngã? Mam kẽe fo zakẽ, la fo ka kõ maam koom tɩ m waas m nao ye. La yẽnda, a madga mam nao ne a nintãm, n yẽes-b ne a zoobdo.

⁴⁵ Fo ka mok maam ye, la hal mam sẽn kẽ wã tɛka, yẽ mogsda mam nao n ka basdẽ ye.

⁴⁶ Fo ka sõog mam zug kaam ye, la yẽnda, a waala mam nao ne tɩdare.

⁴⁷ Yaa woto yĩnga, mam yeta foom tɩ yẽ paama a yel-wẽna sẽn yaa wʋsgã sugri. Bala, yẽ wilga a nonglem kãsenga. La ned ning b sẽn kõt sugr bũmb bilf yĩng nonglem yaa bilfu.

⁴⁸ La a Zezi yeela pagã yaa: fo paama f yel-wẽna sugri.

⁴⁹ Neb nins sẽn n da zĩ ne bãmb n dɩtẽ wã sɩngame n tags b sũyẽ wã a woto: dao-kãngã yaa ãnna n kõt baa yel-wẽna sugri?

⁵⁰ La a Zezi yeela pagã yaa: fo tẽeb n fãag foom. Kẽng ne bãane.

8

¹ Dẽ poore, a Zezi ra kẽnda tẽn-bõoneg pʋse, n moondẽ la b togsd Wẽnnaam soolem koe-noogã. Karen-biis piig la yiibã ra bee ne bãmba,

² n paas pagb kẽere, a Zezi sẽn dig sɩ-wẽns sẽn n dag n be ne-bã, la b maag-b n yiis b bãasã: Yaa a Maari b sẽn boond tɩ Magdala Maari, soab ning a Zezi sẽn dig zĩn-dãmb a yopoe tɩ b yi n bas-a wã,

³ Herood tʋʋma gɛt a Suuza pag a Zan ne a Suzan, la pagb a taab wʋsg sẽn da yãkd b paoong n sõngd a Zezi ne b karen-biisã.

⁴ Neb kʋʋng wʋsg tigma taaba, la neb yii tẽns toay-toay n wa bãmb nengẽ. A Zezi tãoo solem-kãnga:

⁵ Bõn-bu-fẽrgd a ye n yi n na n tɩ fẽrg a bõn-buudu, la yẽ sẽn fẽrgdã, bõn-buudã kẽer lʋɩɩ sor kɩrenga. Neb tab-b la ne nao, la liuuli rɩ-b lame.

⁶ Kẽer lʋɩɩ kugr zugu. La b sẽn yi, b kʋɩɩme, maasr sẽn n ka be yĩnga.

⁷ Kẽer me lʋɩɩ gõos sʋka. La gõosã naaga bãmb n yi n dɩ-ba.

⁸ La kẽer lʋɩɩ zĩ-sõngẽ, n yi n wom biis tɩ ta koabg-koabga. A Zezi sẽn gomdã, b zẽka b koɛɛg n yeele: Ned ning sẽn n tar-a tʋb sẽn wʋmd bɩ a wʋme.

⁹ A Zezi karen-biisã soka bãmb yel-bũndã võore.

¹⁰ A Zezi leoka bãmb n yeel yaa: b kõo yãmb pãn-tõog tɩ y bãng Wẽnnaam soolem yel-soalma. La ne neb a taabã, b togsda bãmb bõn-kãens ne soalma, sẽn na n yɩl tɩ "bãmb sẽn getã, bɩ b ra yã ye, la tɩ b sẽn wʋmdã, b kõn wʋm a võor ye."

¹¹ Yel-bũndã võor la a woto: bõn-buudã yaa Wẽnnaam goamã.

¹² Sẽn be-b sor kɩrengã yaa neb nins sẽn wʋm koɛɛgã, tɩ rõata wat n yiisd koɛɛgã sẽn da be b sũyẽ wã, sẽn na n yɩl la b ra tẽ n paam fãagr ye.

¹³ Sẽn be-b kugrã zugã yaa neb nins sẽn wʋmd koɛɛgã n deegd-a ne sũ-noogã. La b ka tar yẽgen ye. Bãmb tẽeda wakat bilf bala, la makr wakate, bãmb basda tẽebã.

¹⁴ Gõosã, bõn-buudã sẽn lʋɩ b sʋkã, yaa neb nins sẽn wʋmd koɛɛgã n sɛ n looge, tɩ yɩɩre, la arzegse, la dũni sũ-noogã rɩ koɛɛgã t'a ka womd biis tɩ bɩ ye.

¹⁵ Zĩ-sõngã, yaa neb nins sẽn wʋmd koɛɛgã ne sũur sẽn ya sõama la tɩrga, n talld-a, n yalsd kãenkãe, n womd biisã.

¹⁶ Ned ka yõgend fɩtɩl n fõgn-a ne peoogo, wall a ning-a gãag tẽngr ye. B rogend-a-la fɩtɩl doagendgã zug tɩ neb nins sẽn kẽedã tõe n yã vẽenemã.

¹⁷ Bala, bũmb ka be sẽn lud sẽn kõn puk ye, la bũmb ka be sẽn solg sẽn kõn vẽneg ye.

¹⁸ Dẽ, bɩ y gũus ne yãmb sẽn kelgd to-to wã. Bala, b na n kõo ned ning sẽn tara, la ned ning sẽn ka tara, b na n deega baa bũmb ning yẽ sẽn tagsd t'a tarame wã n bas-a.

¹⁹ A Zezi ma ne b ma-bi-raop waa bãmb nengẽ, la neb kʋʋngã yĩnga, b ka tõog n ta a Zezi ye.

²⁰ Nebã yeela a Zezi tɩ b ma wã bee yɩng ne b ma-bi-raopã n dat n yãnd-ba.

²¹ La a Zezi leoka bãmb n yeele: mam ma ne m ma-bi-raop yaa neb nins sẽn kelgd Wẽnnaam goamã n sakdẽ wã.

²² Daar a ye, a Zezi kẽe koom-koglg ne b karen-biisã, n yeel-b tɩ b wa tɩ b kẽng ko-kãsengã rʋʋnde. La b loogame.

²³ La bãmb sẽn dugsd koglgã wakate, a Zezi gũsame. La sob-kãseng yika kooma zugu, tɩ koom-koglgã ra pid ne koom, tɩ lebg yel-pakr ne-ba.

²⁴ Karen-biisã kolgame n nek a Zezi n yeel yaa: Karen-saamba! Karen-saamba! Tõnd na n kiime! A Zezi nekame, n tãs sobgã ne ko-pɛmã, la b yõkame, la zĩigã lebga sɩddd.

²⁵ Dẽ, bãmb soka b karen-biisã yaa: Yãmb tẽebã bee yɛ? La rabeem yõka bãmb tɩ b yɛɛs n sok taab tɩ nin-kãngã yaa yɛ neda? Bala, baa sobgã ne ko-pɛma sakda bãmb noore.

²⁶ Bãmb taa Geraza rãmbã tẽnga, tẽng sẽn teesd Galile.

²⁷ La a Zezi sẽn n sig tẽnga, tẽngã rao a ye zĩn-dãmb wʋsg sẽn tar waa n sega bãmba. Hal daar zãra, a ka le yeelgd fut ye, la a ra ka gãe yir ye, yaa yaadẽ.

²⁸ A sẽn yãa a Zezi, a kelmame n wõgemd bãmb taoor n zẽk a koɛɛg n yeele: Wẽnnaam sẽn be saasẽ saasẽ bi-ribl a Zezi, yãmb data maam ne bõe ? Mam bõosd-y lame tɩ y ra nams maam ye.

²⁹ Bala, a Zezi ra yeta zĩn-dẽgdã sẽn dag n kẽ yẽ hal daar zãrã t'a yi n bas rao wã. B ra sẽbda yẽ ne bãense, n balg a nao wã ne kutu, la a ra kaooda a sẽbdsã. La zĩna ra talld-a lame n kẽngd we-rasempʋɩɩsẽ.

³⁰ A Zezi soka yẽ t'a yʋʋr la a bõe. T'a leok t'a tusa. Bala, zĩn-dãmb wʋsg n da kẽ yẽnda.

³¹ La zĩn-dãmbã bõosa a Zezi tɩ b ra rig-b tɩ b kẽng zĩ-zulungẽ wã ye.

³² Kurkuy wʋsg n da be tãnga zug n wãbdẽ, la zĩn-dãmbã bõosa a Zezi tɩ b kõ bãmb noor tɩ b tɩ kẽ kurkuyã. La a Zezi kõ-b lame.

³³ Zĩn-dãmbã yii n basa rao wã n tɩ kẽ kurkuyã, la kurkuyã wudga tãnga sigdgẽ, n bilim n lʋɩ koomẽ wã, la koomã rɩ-b lame.

³⁴ Neb nins sẽn da gũud kurkuyã sẽn yã bũmb ning sẽn maanã, b zoee n tɩ togsa koɛɛgã tẽnga pʋgẽ la pʋtẽ wã me.

³⁵ Nebã kẽngame n na n tɩ ges bũmb ning sẽn maanã. Bãmb waa a Zezi nengẽ, la b yãa rao ning zĩn-dãmbã sẽn yi n basã t'a zĩ a Zezi sɛɛgẽ, n yer futu, n tar yam sõama. La rabeem yõka bãmba.

³⁶ Neb nins sẽn yã bũmb ning sẽn maanã togsa bãmb rao ning zĩna sẽn da tarã sẽn paam yolsg to-to.

³⁷ Geraza soolmã neba fãa kosa a Zezi tɩ b zãag n bas bãmba. Bala, rabeem kãseng n da yõk-ba. A Zezi kẽe koom-koglgã n lebg n lebe.

³⁸ Rao ning zĩn-dãmbã sẽn yi n basã bõosa a Zezi ne pẽdgr n dat n pa ne bãmba. La a Zezi kuils-a lame n yeele:

³⁹ Lebg n kuil f yir n tɩ wilg bũmb nins fãa Wẽnnaam sẽn maan n kõ fooma. Rao wã loogame n tɩ moon bũmb nins fãa a Zezi sẽn maan n kõ yẽ wã tẽngã fãa pʋgẽ.

⁴⁰ A Zezi sẽn leb rʋʋndã, neb kʋʋng reega bãmba, bala, b fãa ra gũuda bãmba.

⁴¹ La gese, dao a yen yʋʋr sẽn boond t'a Zayirus, n yaa karen-doog naab waame n wõgemd a Zezi taoor n bõos bãmb tɩ b wa yẽ yirã.

⁴² Bala, yẽ ra tara a bi-pugl yende, a yʋʋm sẽn kolg piig la yiibu, n gãe n dat n ki. A Zezi sẽn dabd be wakate, neb kʋʋngã rɩdga bãmba.

⁴³ La pag a ye n da be be tɩ bãag tar-a, t'a zɩɩm yit hal yʋʋm piig la a yiibu. Yẽ rɩka a sẽn da tarã fãa n kõ tɩpdba, la b baa a yen ka tõog t'a paam laafɩ ye.

⁴⁴ Yẽ kolga a Zezi poorẽ, n sɩɩs bãmb fuugã noore. La wakat kãng bala, zɩɩmã sẽn da yitã yõkame.

⁴⁵ La a Zezi sokame tɩ ãnna n sɩɩs bãmba? Ned fãa sẽn kɩɩsd tɩ ka yẽnda, a Pɩyɛɛr yeelame yaa: Karen-saamba, neb kʋʋngã gũbga yãmb n dɩdgd yãmba.

⁴⁶ La a Zezi leokame n yeele: Ned n sɩɩs maam. Bala, mam bãngame tɩ pãng n yi mam nengẽ.

⁴⁷ Pagã sẽn yã t'a yellã pukame, a waa n yĩgimda a Zezi taoor ne rigbu, neba fãa nifẽ, n togs bũmb ning yĩng sẽn kɩt tɩ yẽ sɩɩs a Zezi wã, la yẽ sẽn paam laafɩ zĩig pʋgẽ to-to.

⁴⁸ A Zezi yeel-a lame: M bi-pugla, fo tẽeb n fãag foom, kẽng ne bãane.

⁴⁹ A Zezi sẽn ket n gomda, ned n yi karen-doog naabã yir n wa n yeel-a: Da le nams-y karen-saamb ye: Yãmb bi-puglã kiime.

⁵⁰ La a Zezi sẽn wʋme, b yeela karen-doog naabã yaa: Da maan dabeem ye. Tẽ bala, la biigã na n põsame.

⁵¹ La a Zezi sẽn ta yirã, bãmb ka sak tɩ ned tũ bãmb n kẽ, sã n ka a Pɩyɛɛr ne a Zã, la a Zak ne biigã ba la a ma bala.

⁵² Neba fãa ra yãbdame n wiisd biigã yĩnga. Dẽ, a Zezi yeel-b lame tɩ b ra yãb tɩ biigã ka ki ye, t'a gõeeme.

⁵³ Nebã sẽn da mi tɩ biiga kiime wã, b yaala a Zezi.

⁵⁴ La a Zezi gãda biigã nugu, n zẽk b koɛɛg n yeele: M biiga, yiki.

⁵⁵ La a sɩɩgã lebg n waame, la wakat kãng bala, a yikame. La a Zezi yeelame tɩ b kõ biiga rɩɩb t'a rɩ.

⁵⁶ Bi-puglã ba-rãmb yɛɛsame, la a Zezi keooga bãmb tɩ b ra togs ned bũmb ning sẽn maanã ye.

9

¹ A Zezi tigma karen-biis piig la a yiibã n kõ-b pãnga la noor tɩ b tõog zĩn-dãmba, la pãn-tõog tɩ b maag bãad-dãmba.

² A Zezi tʋm-b lame tɩ b tɩ moon Wẽnnaam soolem koɛɛga, la b maag bãad-dãmba.

³ A Zezi yeel-b lame yaa: Da rɩk-y bũmb y kẽnda yĩng ye. Da rɩk-y da-saare, korgo, buri wall ligd ye. La y ra zã fut a yiib yiib ye.

⁴ Yãmb sẽn sig zak ning pʋgẽ, bɩ y pa be n ta y sẽn na n yi be n looge.

⁵ La zĩig ning fãa nebã sẽn ka reeg yãmba, y sã n wa n yit tẽn-kãnga, bɩ y pĩms y nao wã tom tɩ yɩ kaset b yĩnga.

⁶ A Zezi karen-biisã loogame n kẽng tẽng tẽnga, n moond koe-noogã, la b maagd neb zĩiga fãa.

⁷ Naab a Herood da wʋma bũmb nins fãa sẽn da maandã, la a da ka mi yẽ sẽn na n tags tɩ bũmb ning ye. Bala, neb kẽer da yetame t'a Zã vʋʋgame n yi kũum sʋka,

⁸ tɩ kẽer yetẽ tɩ Wẽnnaam no-rɛɛsdbã sẽn zĩnd pĩndã ned a ye n vʋʋge.

⁹ La Herood yeelame: Mam kɩtame tɩ b fiuug a Zã zugu. Dẽ, ned ning mam sẽn wʋmd tɩ b gomd a yell woto wã yaa ãnna soaba? La yẽ ra baoodame n dat n yãnd a Zezi.

¹⁰ Tẽn-tʋmdbã sẽn lebg n wa, b togsa a Zezi bũmb nins fãa bãmb sẽn maanã. A Zezi peega bãmb n yi kɛɛng n kẽng tẽng a yen sẽn boond tɩ Betsayida sẽne.

¹¹ La neb kʋʋngã bãngame n pʋg bãmba. A Zezi reeg-b lame n gom ne-b Wẽnnaam soolem yelle, la b maag neb nins sẽn dag n dat maagrã me.

¹² Wĩndgã sẽn kɩlle, karen-biis piig la yiibã kolgame n yeel a Zezi yaa: Kɩt-y tɩ neb kʋʋngã loog n kẽng tẽn-bõonegẽ wã ne pʋtã sẽn pẽ ka wã n tɩ paam gãag zĩisi, la b paam dɩɩbo. Bala, tõnd sẽn beẽ wã yaa we-rasempʋɩɩga.

¹³ A Zezi yeela karen-biisã tɩ bãmb mensã kõ nebã rɩɩb tɩ b rɩ. La b leokame n yeele: Tõnd ka tar sẽn yɩɩd bur a nu ne zĩm a yiib ye. Sã n ka tɩ tõnd mens na n kẽngame n tɩ ra rɩɩb nin-kãensã fãa yĩnga.

¹⁴ La nebã sẽn da be be wã kolga raop tus a nu. A Zezi yeela b karen-biisã tɩ b kɩt tɩ neba zĩnd sull-sulli, neb pis-nunu.

¹⁵ Karen-biisã maana a woto n kɩt tɩ b fãa zĩndi.

¹⁶ A Zezi reega bur a nu wã ne zĩm a yiibã n nak n ges yĩngr n ning-b barka, n yaool n kao burã ne zĩma n kõ karen-biisã tɩ b pʋɩ neb kʋʋngã.

¹⁷ Bãmb fãa rɩɩme n tɩge, la b wʋka gɩrsã sẽn kellã n pid pet piig la a yiibu. Bur a nu ne zĩm a yiibu (9.13)

¹⁸ Daar a ye, a Zezi ra bee zĩig neb sẽn ka be, n pʋʋsdẽ, la karen-biisã ra bee ne bãmba. A Zezi soka b karen-biisã yaa: Neb kʋʋngã yetame tɩ mam yaa ãnna?

¹⁹ Bãmb leokame tɩ kẽer yetame t'a Zãmbatiis, tɩ kẽer yetẽ t'a Eli, tɩ kẽer yetẽ tɩ Wẽnnaam no-rɛɛsdbã sẽn zĩnd pĩndã ned a ye sẽn vʋʋge.

²⁰ La a Zezi soka bãmb yaa: La yãmba, yãmb yetame tɩ mam yaa ãnna? A Pɩyɛɛr leokame tɩ bãmb yaa Kirist sẽn yi Wẽnnaam nengẽ.

²¹ A Zezi keooga bãmb neere, n yeel-b tɩ b ra saag n togs ned yõwã ye.

²² A Zezi gomame n paas n yeel tɩ yaa tɩlɛ tɩ Ninsaal Bi-riblã nams wʋsgo, tɩ kãsem-dãmbã ne maan-kʋʋdbã kãsem-dãmba la tõog karen-saam-dãmbã kɩɩs bãmba n kʋ-ba, la tɩ rasem a tãab daare bãmb na vʋʋge.

²³ Dẽ, a Zezi yeela b fãa yaa: ned sã n dat n tũ maam, bɩ a kɩɩs a mengã ratem, n tʋk a da-pɩk daar fãa n pʋg maam.

²⁴ Sɩd me, ned ning fãa sẽn dat n kogl a vɩɩm, a vɩɩm na sãame. La ned ning sẽn na n bas a vɩɩm mam yĩnga, a na n le paam-a lame.

²⁵ Ned sã n paam dũni bũmb fãa, n yaool n menem wall a sãam a menga, a yõod bee yɛ ne-a?

²⁶ Sɩd me, ned sã n zoe mam yãnde la mam goama yãnde, Ninsaal Bi-riblã sã n wa n wa ne b ziirã, la b ba wã ziiri, ne malegs-sõamyã, b na n zoee yẽ me yãnde.

²⁷ Mam yeta yãmb sɩd-sɩd tɩ neb nins sẽn be ka wã kẽer ka na n ki hal tɩ b yãnd Wẽnnaam soolmã.

²⁸ Sẽn kolg rasem a nii, a Zezi sẽn gom gom-kãensã zugẽ, bãmb peega a Pɩyɛɛr ne a Zã la a Zak n dʋ tãngã zug n na n pʋʋse.

²⁹ La bãmb sẽn pʋʋsd wakate, b nengã yalẽ tedgame, la bãmb futã lebga peels n pɩnda.

³⁰ La gese, raop a yiib n wa n gom ne a Zezi. Dag n ya a Moyiis ne a Eli,

³¹ n puk b meng ne ziiri, n gomd ne a Zezi b kũuma b sẽn na n ki Zeruzalɛma yelle.

³² Gõeem ra namsda a Pɩyɛɛr ne a tũud-n-taasã, la bãmb neendame n yãnd a Zezi ziirã ne raop a yiibã sẽn da be ne bãmbã.

³³ Wakat ning raopã sẽn bas a Zezi n loogdẽ wã, a Pɩyɛɛr yeela a Zezi yaa: Karen-saamba, yaa sõama tɩ tõnd pa ka. D tilg fu-rot a tãabo: a yembr yãmb yĩnga, a yembr a Moyiis yĩnga, a yembr a Eli yĩnga. Yẽ ra ka mi a sẽn gomd bũmb ningã ye.

³⁴ La yẽ sẽn gomd a woto, sawadg waa n luda bãmba, la a Moyiis rãmb sẽn kẽed sawadgẽ wã, rabeem yõka bãmba.

³⁵ La koɛɛg yii sawadgẽ wã n yeele: Ada yaa mam Bi-ribl mam sẽn yãke, bɩ y kelg-a.

³⁶ La koɛɛgã sẽn gom a woto n sɛ, a Zezi ra yɛsa b yembre. Karen-biisã kell n sĩndame n ka togs ned bũmb ning bãmb sẽn yã wã da-kãens ye.

³⁷ Vẽkembeoogo, bãmb sẽn yi tãngã zug n sigi, neb kʋʋng wʋsg waa n sega a Zezi.

³⁸ La gese, neb kʋʋngã sʋka, dao a ye n zĩnd be n zẽk a koɛɛg n yeele: Karen-saamba, m kot-y lame tɩ y ges m bi-riblã. Bala, yaa m bi-yende.

³⁹ Zĩn n kẽed-a, la a sã n kẽ-a bala, a kelemdame, la zĩna kɩtdame t'a sobg n gʋɩgsdẽ, tɩ tãntãn-puudã yita. A sã n na n wa n yi n bas biigã, rẽ t'a nams-a-la wʋsgo, n pogl-a.

⁴⁰ Mam bõosa yãmb karen-biisã tɩ b rig-a, la b ka tõog ye.

⁴¹ A Zezi yeelame yaa: Neb sẽn ka tẽebo, la sẽn ya nin-wẽnse, mam na n paa ne yãmb la m maan sũ-mar ne yãmb tɩ ta wakat bʋgo? Tall f biigã n wa ne ka.

⁴² La biigã sẽn kolgdã, zĩna lub-a-la tẽnga, n nams-a wʋsgo. La a Zezi lenga zĩn-dẽgdã, n maag biigã n kɩs-a a ba.

⁴³ La neba fãa yɛɛsame, b sẽn yã Wẽnnaam pãn-kãsengã yĩngã.

⁴⁴ Yãmba, yok-y y tʋb n kelg gom-kãensã sõama: b na n yõka Ninsaal Bi-riblã n kõ neba.

⁴⁵ La karen-biisã ra ka wʋmd gom-kãng võor ye. A ra solga ne bãmba, sẽn na n yɩlg tɩ b ra bãng a võorã ye. La b ra yɛɛsdame n ka rat n sok a Zezi bõn-kãng wɛɛngẽ ye.

⁴⁶ Nokoeemd yika bãmb sʋka, tɩ b rat n bãng sẽn ya-a kãseng n yɩɩd bãmb sʋkã.

⁴⁷ A Zezi sẽn mi bãmb sũyã tagsgã, b peega bi-bilf n zĩnig-a b sɛɛgẽ

⁴⁸ n yeel karen-biisã yaa: ned ning fãa sẽn na n deeg bi-bilf kãngã mam yʋʋrã yĩnga, yaa mam mengã la a reeg-yã. La ned ning fãa sẽn deeg maam, a reegda sẽn tʋma maamã. Bala, ned ning sẽn ya-a yao-zʋʋg yãmb sʋkã, yaa yẽ soab n ya kãsenga.

⁴⁹ A Zã gomame n yeele: Karen-saamba, tõnd yãa rao sẽn digd zĩn-dãmb ne yãmb yʋʋre, la tõnd gɩdg-a lame, a sẽn ka naag tõnd n tũud yãmbã yĩnga.

⁵⁰ A Zezi leok-a lame n yeele: ra gɩdg-a ye. Bala, ned sã n ka kis yãmba, a bee ne yãmba.

⁵¹ Wakat ning b sẽn tog n zẽk a Zezi tɩ b kẽng arzãnã sẽn kolge, bãmb tolg n yãka yam n na n kẽng Zeruzalɛm.

⁵² B tʋma neb tɩ b reng bãmb taoore. La b kẽngame n tɩ kẽ Samari n na n segl bũmb fãa a Zezi yĩnga.

⁵³ La neba ka reeg a Zezi ye, bãmb sẽn dag n dabd Zeruzalɛma yĩnga.

⁵⁴ Bãmb karen-biis a Zak ne a Zã sẽn yã woto, b yeelame yaa: Zu-soaba, yãmb datame tɩ d kɩt tɩ bugum yi yĩngr n sig n dɩ-ba?

⁵⁵ La a Zezi wẽnemdame n leng bãmb n yeele: yãmb ka mi sɩɩg ning sẽn tar yãmbã ye.

⁵⁶ Bala, Ninsaal Bi-riblã ka wa tɩ sãam ninsaalbã vɩɩm ye, la yaa tɩ fãag-ba. La bãmb kẽnga tẽng a to.

⁵⁷ Bãmb sẽn be sorẽ n dabda, ned n yeel a Zezi t'a na n tũu bãmb n kẽng zĩig ning fãa bãmb sẽn na n kẽnge.

⁵⁸ A Zezi leok-a lame tɩ waas tara bogdo, la liuuli sẽn yɩgda tara tʋgdo, la Ninsaal Bi-riblã ka tar zĩig sẽn na n gãneg a zug ye.

⁵⁹ A Zezi yeela ned a to t'a tũ bãmba. La yẽ leoka a Zezi yaa: bas-y-m nand tɩ m tɩ mum m ba la m wa.

⁶⁰ La a Zezi leok-a lame n yeele: bas kũ-rãmbã tɩ b mum b kũum, la foo, kẽng n moon Wẽnnaam soolem koɛɛgã.

⁶¹ Ned a to leb n yeelame: Zu-soaba mam na n tũu yãmba, laa, sak-y tɩ m deng n tɩ pʋʋs m zaka rãmb wẽnd-na-taas la m wa.

⁶² A Zezi leoka yẽ yaa: ned sã n gãd wãk rũng sẽn tata, la a rat n wẽnemd n ges a poorẽ, yẽ ka zems tɩ kẽ Wẽnnaam soolma ye.

10

¹ Rẽ poore, Zu-soabã leb n yãka neb pis-yopoe la a yiib a taaba, n tʋm bãmb yiib yiib tɩ b reng bãmb taoor n kẽng tẽng fãa la zĩig ning fãa bãmb meng sẽn tog n kẽngã.

² A Zezi yeela bãmb yaa: Tigsgã yaa wʋsgo la tʋmtʋmdbã sõor paoodame. Kos-y tigsgã soab tɩ b tʋm tʋmtʋmdb b tigsgẽ wã.

³ Kẽng-y-yã! Ade, mam tʋmda yãmb wa piis digd-n-yĩids sʋka.

⁴ Da zã-y ligd korgo, wall yolgo, wall neooda ye, la y ra yals n pʋʋs ned sor zug ye.

⁵ Yãmb sã n na n kẽ yir fãa, bɩ y pʋʋs-b a woto: Bɩ laafɩ zĩnd yi-kãnga pʋga.

⁶ La laafɩ ned sã n be be, yãmb laafɩ wã na n siga a zugu. La laafɩ ned sã n ka be, bɩ y loog ne y laafɩ pʋʋsem.

⁷ Pa-y yi-yɛnga, n dɩ la y yũ bũmb ning sẽn be be. Bala, tʋmtʋmd toga ne a yaoodo. Da-y tegs-y yiy ye.

⁸ Tẽng ning fãa yãmb sẽn na n kẽ tɩ b reeg yãmba, bɩ y rɩ bũmb nins b sẽn na n kõ yãmbã.

⁹ Maag-y bãad-rãmb nins sẽn be be wã, la y yeel-b tɩ Wẽnnaam soolmã kolga bãmba.

¹⁰ Tẽng ning fãa yãmb sẽn na n kẽ tɩ b ka reeg yãmba, kẽng-y tẽngã soay zut n yeele:

¹¹ Yãmb tẽngã wubsg meng sẽn bol tõnd nao wã, tõnd pĩmsd-a lame n basd ne yãmba. La baoosgo, bãng-y tɩ Wẽnnaam soolmã pẽnegame.

¹² Mam yeta yãmb tɩ da-kõngo, Sodom sɩbgrã toolem kõn ta tẽng kãng rẽndã ye.

¹³ Korazin, fo na paam toogo! Betsayida, fo na paam toogo! Bala, bõn-bãn nins sẽn maan yãmb sʋkã sã n dag n maanẽ Tɩɩr ne Sɩdõ, yaa hal daar zãr la b da na n yeelg boto, la b yug b zug tompeglem n kos sugri.

¹⁴ Dẽ n kɩt tɩ bʋʋdã daare, Tɩɩr ne Sɩdõ sɩbgr kõn ta yãmb dẽndã ye.

¹⁵ La foom, Kapɛrnawom, b na n zẽka foom n taas saasẽ bɩ? Ayo! B na n sigsa foom hal n taas kɩɩm-kulgu.

¹⁶ Ned ning sẽn kelgd yãmb kelgda maam. La ned ning sẽn zãgsd yãmb zãgsda maam. La sẽn zãgsd-a maam zãgsda sẽn tʋm-a maamã.

¹⁷ Neb pis-yopoe la a yiibã lebg n waa ne sũ-noog n yeele: Zu-soaba, baa zĩn-dãmba mens sakda tõnd noor yãmb yʋʋrã yĩnga.

¹⁸ A Zezi yeel-b lame: Mam dag n nee a Sʋtãan sẽn yi yĩngr n lʋɩt wa sa-yãgbo.

¹⁹ La ade, mam kõo yãmb pãng tɩ y tab wiis la namse, la bɛyã pãngã fãa, la baa fʋɩ kõn tõog n maan yãmb wẽng ye.

²⁰ Baoosgo, da maan-y sũ-noogo, zĩn-dãmbã sẽn sakd yãmbã yĩng ye. Maan-y sũ-noogo, yãmb yʋɩyã sẽn gʋls arzãn pʋgẽ wã yĩnga.

²¹ Wakat kãng bala, Sɩɩg-sõng kɩtame t'a Zezi paam sũ-no-kãseng n yeele: M ba sẽn ya arzãn la tẽng Zu-soaba, mam pẽgda yãmba, yãmb sẽn solg bõn-kãens ne yam-dãmba la yẽesem-dãmbã, n yaool n vẽneg-b ne kom-bõonegã yĩnga. N ye, m ba, yãmb sẽn dat tɩ yɩ a woto wã yĩnga.

²² M ba kõo maam bũmba fãa, la ned baa a yen ka mi Bi-riblã sẽn yaa a soaba, a sã n ka a ba wã ye. La ned baa a yen ka mi ba wã sẽn yaa a soaba, sã n ka Bi-riblã bala, la ned ning Bi-riblã sẽn dat n vẽneg bãmb ne-a wã ye.

²³ A Zezi wẽnemdame n gom ne b karen-biisã b yen-yen n yeel-b yaa: Bark bee neb nins nin sẽn yãt bũmb nins yãmb sẽn yãtã zutu.

²⁴ Bala, mam yeta yãmb tɩ Wẽnnaam no-rɛɛsdb wʋsgo, la rĩm-dãmb dag n dat n yãa bũmb nins yãmb sẽn yãtã la b ka yã ye. B dag n dat n wʋma bũmb nins yãmb sẽn wʋmdã la b ka wʋm ye.

²⁵ La gese, tõog karen-saamb a yembr yikame n na n mak a Zezi n yeele: Karen-saamba, bõe la mam tog n maan n paam vɩɩm sẽn kõn sa wã tɩ yɩ m pʋɩɩre?

²⁶ A Zezi sok-a lame tɩ bõe la b gʋls tõodã sebrã pʋgẽ, la bõe la yẽ karemd be?

²⁷ A leokame n yeele: Nong Zu-soaba fo Wẽnnaam ne f sũur fãa, la f sɩɩg fãa, la f pãng fãa, la f tagsg fãa, la f nong f to wa f menga.

²⁸ A Zezi leok-a lame yaa: Fo leokrã yaa sõama. Maan a woto, la f na vɩɩmde.

²⁹ La yẽ sẽn dat n wilg t'a yaa tɩrga, a soka a Zezi tɩ ãnna la yẽ to?

³⁰ A Zezi leb n gomame n yeele: Dao n dag n yi Zeruzalɛm n dabd Zeriko. A tɩ lʋɩɩ fãadb sʋka, tɩ b rees a sẽn tarã, n pãb-a hal t'a kolg kũum, tɩ b bas-a n looge.

³¹ Mikame tɩ maan-kʋʋd n dag n dɩk so-kãnga. A yãa rao wã, la a gilg n loog n bas-a lame.

³² Woto me, Levit a yen taa zĩ-kãnga. A yãa rao wã, la a gilg n loog n bas-a lame.

³³ La Samari ned sẽn dag n togd sor taa rao wã sɛɛgẽ n yãnd-a, t'a nimbãaneg yõk-a.

³⁴ A kolga rao wã, n tɩbs a noadã ne kaam la divẽ, la a vil-b ne pɛɛla. Rẽ sẽn sa, a rɩk-a lame n zombg a meng bõn-zoambedga, n tall-a n kẽng sik zĩigẽ n tɩ ges a yelle.

³⁵ Vẽkembeoogo, a yãka deniye a yiib n kɩs sik zĩigã soab n yeel-a t'a yõdg n ges bãadã yelle, la t'a ligd sã n kẽ, a lebgre a meng na lebs-a.

³⁶ Bãmb b tãabã sʋka, bʋg n wẽnda a yaa ned ning sẽn lʋɩ-a fãadbã sʋkã to?

³⁷ Tõog karen-saambã leokame tɩ yaa ned ning sẽn zoe-a yẽ nimbãanegã. La a Zezi yeel-a lame t'a me kẽng n tɩ maan a woto. Samari nin-sõngo (10.30)

³⁸ A Zezi sẽn kẽnd ne b karen-biisã, b taa tẽng a yembre, la pag sẽn boond t'a Mart sika bãmb a yiri.

³⁹ A dag n tara ma-bi-poak sẽn boond t'a Maari. La a Maari zĩnda Zu-soabã sɛɛgẽ n kelgd bãmb goama.

⁴⁰ Rɩɩbã seglg yɛl toay-toayã dag n sooga a Mart tagsgã. A waame n yeel yaa: Zu-soaba, mam ma-bi-poakã sẽn bas maam m yembr tɩ m get seglgã yellã ka namsd yãmba? Dẽ wã yaa, yeel-y-yã-a t'a sõng-ma.

⁴¹ Zu-soabã yeela a Mart yaa: Mart! Mart! Fo maanda yɩɩre, n sidgd ne bũmb wʋsgo.

⁴² Bũmb a yen tãa n ya tɩlɛ. A Maari yãka pʋɩ-sõng b sẽn kõn deeg n bas-a ye.

11

¹ Daar a yen, a Zezi da bee zĩig a ye n pʋʋsdẽ. Bãmb sẽn pʋʋs n sɛ, b karen-biig a yembr yeela bãmb yaa: Zu-soaba, zãms-y tõnd pʋʋsgo, wa a Zã sẽn zãms b karen-biisã.

² A Zezi yeela bãmb yaa: Yãmb sã n pʋʋsdẽ, bɩ y yeele: Tõnd ba! Bɩ yãmb yʋʋrã yɩ ne waoogre, tɩ yãmb soolmã wa.

³ Kõ-y tõnd d daar o daar dɩɩbã daar fãa.

⁴ Kõ-y tõnd d beegrã sugri, tɩ tõnd me kõta neb nins fãa sẽn beegd tõndã sugri, la y ra bas tõnd tɩ d kẽ makr pʋgẽ ye.

⁵ A Zezi leb n yeela bãmb a woto: Ãnna yãmb sʋkã n na n tar a zoa, t'a wa a nengẽ yʋn-sʋka, n yeel-a tɩ "m zoa, peng-m bur a tãab

⁶ tɩ m zoa n yi sor n wa n sig-m tɩ m ka tar bũmb sẽn na kõ-a t'a rɩ ye".

⁷ A zoa wã sã n pa pʋgẽ n leok-a t'a ra nams-a ye, tɩ rignoorã zoe n pagame, la tɩ yẽ ne a kambã zoee n kẽe gãaga, la t'a ka le tõe n yik n kõ-a bur ye.

⁸ Mam yeta yãmb tɩ baa a sã n ka na n yik n kõ-a burã, a sẽn ya yẽ zoa wã yĩnga, a na yik n kõ-a bũmb nins fãa a sẽn data, a pẽdgrã yĩnga.

⁹ La maam, mam yeta yãmb tɩ y kose la b na kõ yãmba, tɩ y bao la y na yã, tɩ y kabse la b na pak tɩ y kẽ.

¹⁰ Bala, ned ning fãa sẽn kot deegdame. Ned ning sẽn baood yãtame, la b pakdame tɩ sẽn kabsd-a kẽ.

¹¹ Yãmb sẽn ya ba-rãmbã, ãnna yãmb sʋk bi-ribl n na n kos-a bur t'a kõ-a kugri,

¹² wall a kos-a zĩinf t'a kõ-a waaf tɩ ka zĩinfu, wall a kos-a gell t'a kõ-a nanga?

¹³ Sã n yaa tɩ yãmb sẽn ya nin-wẽnsã miime tɩ kõ y kambã bõn-sõamyã, yãmb ba sẽn be arzãnã n mi n yɩɩda, n na n kõ neb nins sẽn kot bãmbã Sɩɩg-sõngo.

¹⁴ A Zezi dag n digda zĩn sẽn ya muka. Zĩnã sẽn yi, mukã gomame, la neb kʋʋngã yɛɛsame.

¹⁵ La neb kẽer yeelame tɩ yaa ne zĩn-dãmbã naab a Belzebul pãng la a Zezi digd zĩn-dãmbã.

¹⁶ La neb kẽer sẽn dat n mak bãmbã kosa bãmb tɩ b wa ne bãnd sẽn yit arzãna.

¹⁷ La a Zezi sẽn mi b tagsgã yeel-b lame yaa: soolem ning fãa neb sẽn welg taab n gõdg n zabd ne taaba, a na sãame, la rotã na n lʋɩt n yẽegda taaba.

¹⁸ La sã n yaa tɩ Sʋtãanã welgame n gõdg n zabd ne a menga, a soolmã na n yɩɩ a wãn n yalse? Bõe yĩnga, yãmb yetame tɩ yaa ne a Belzebul pãng la mam digd zĩn-dãmbã.

¹⁹ La sã n yaa tɩ mam digda zĩn-dãmbã ne a Belzebul pãnga, yaa ne ãnna soab pãng la yãmb kambã rigd-ba? Rẽnda n kɩt tɩ bãmb mensã na n yɩ yãmb bʋ-kaoodba.

²⁰ La sã n yaa ne Wẽnnaam pãngã la mam digd zĩn-dãmbã, rẽnda Wẽnnaam soolem taa yãmb nengẽ.

²¹ Pãng soab sẽn raoolem a meng sõama sã n gũud a zaka, bũmb kõn sɩɩs a paoongã ye.

²² La ned pãng sẽn yɩɩd yẽnda sã n wa n tõog-a, a reegda a zab-teedã fãa a sẽn dag n teegã, la a wʋk a teedã n pʋɩ neba.

²³ Sẽn ka be-a ne maam kisa maam, la sẽn ka naagd-a maam n tigsdẽ sãeegdame.

²⁴ Sɩɩg sẽn ya rẽgd sã n yi n bas neda, a saagda zĩ-pɛɛlã n baood vʋʋsgo. La a sẽn ka yãt vʋʋsgã yĩnga, a yetame t'a na n leb n leba a yir ning a sẽn dag n yi n basã.

²⁵ La a sã n ta, a mikdame tɩ yirã pɩɩsame n maneg n nagse.

²⁶ Dẽ, a kẽngdame n tɩ peeg sɩɩs a yopoe a taab sẽn ya wẽns n yɩɩd yẽnda. B wat n kẽe be n zĩndi, la rao-kãng vɩɩmã lebgda wẽng n yɩɩd pipi wã.

²⁷ A Zezi sẽn gom a woto, pag n zĩnd nebã sʋk n zẽk a koɛɛg n yeel tɩ pag ning sẽn zã-a a Zezi pʋga la a yẽsem bãmbã yaa ned sẽn tar barka.

²⁸ La a Zezi leokame n yeel tɩ yaa neb nins sẽn kelgd Wẽnnaam goamã n sakdẽ wã n tar barkã.

²⁹ Nebã sẽn tigsd taab n lebgd kʋʋngã, a Zezi yeelame yaa: Zamaan kãngã neb yaa nin-wẽnse. B baooda bãnde, la b kõn kõ bãmb bãnd a to tɩ ka a Zonaas rẽndã ye.

³⁰ Bala, a wa a Zonaas sẽn yɩ bãnd Niniiv nebã yĩngã, Ninsaal Bi-riblã me na n yɩɩ bãnd zamaan kãngã nebã yĩnga.

³¹ Rĩm-poak ning sẽn dag n yi wĩndg goabgã na n yika bʋʋdã daar n kao zamaan kãngã nebã bʋʋdo. Bala, a yii tẽngã satmẽ n na n wa n kelg a Salomo yam goama. La gese, sẽn be-a ka wã yɩɩda a Salomo.

³² Bʋʋdã wakate, Niniiv nebã na n yika ne zamaan kãngã nebã n kao b bʋʋdo. Tɩ bõe, a Zonaas sẽn moon bãmb koɛɛgã, b kosa sugri. La gese, sẽn be-a ka wã yɩɩda a Zonaas.

³³ Ned kõn yõgen fɩtɩl n bao zĩig n solg-a, wall a fõgen-a ne peoog ye. Ayo! A dogend-a-la fɩtɩl doagendg zugu, tɩ neb nins sẽn kẽedã na yã vẽenem.

³⁴ Fo nifã yaa f yĩngã fɩtla. Fo nif sã n ya sõama, fo yĩngã tõr tara vẽenem. La a sã n ka sõama, fo yĩngã tõr me bee lik pʋgẽ.

³⁵ Gũus f menga, tɩ vẽenem ning sẽn be fo pʋgẽ wã da wa n lebg lik ye.

³⁶ Dẽ, fo yĩngã tõr sã n tar vẽenem, tɩ lik baa bilf ka be zĩig baa a ye, a na n paama vẽenem sõama wa wakat ning fɩtɩl sẽn yãgd ne a pãngã fãa n vẽnegd foomã.

³⁷ A Zezi sẽn gomda, Fariisẽ a yembr bõosa bãmb tɩ b wa n dɩ ne yẽnda. A Zezi kẽeme n zĩnd n na n dɩ.

³⁸ Fariisẽ wã sẽn yã t'a Zezi ka waas n yaool n na n dɩ wã, ling-a lame.

³⁹ La Zu-soabã yeel-a lame yaa: Yãmb Fariisẽ-dãmbã, yãmb nedgda wama ne laasã poaya, la yãmb pʋsã pida ne fãab la wẽnga.

⁴⁰ Ka-yam-dãmba, ka sẽn maan-a yɩngã n maan pʋgẽ wã me laa?

⁴¹ Kõ-y naong rãmbã ne y sũyã fãa, la bũmba fãa na n yɩɩ yolgemd yãmb yĩnga.

⁴² Yãmb Fariisẽ-dãmbã na n paama toogo! Tɩ bõe, yãmb yaooda mant ne ru la zẽ-vãad buudã fãa piig-pʋɩya, n yaool n basd tɩrlem la Wẽnnaam nonglem. Yaool n yaa bõn-kãensã la yãmb tog n maane, la y ra bas sẽn ketã me ye.

⁴³ Yãmb Fariisẽ-dãmbã, y na paam toogo! Tɩ bõe, yãmb nonga pipi zaoog karen-dotẽ wã, la y nong nebã sẽn pʋʋsd yãmb daasẽ wã.

⁴⁴ Yãmb na paam toogo! Tɩ bõe, yãmb yaa wa yaado, bũmb sẽn ka wilgd b zĩiga, tɩ neb tabd n ka miẽ ye.

⁴⁵ Tõog karen-saamb a yembr goma ne bãmb n yeele: Karen-saamba, yãmb sẽn gomd a woto wã, yãmb paoogda tõnd me.

⁴⁶ A Zezi leokame n yeele: Yãmb tõog karen-saam-dãmbã me na n paama toogo! Tɩ bõe, yãmb dɩkda zɩɩbo, a tʋkr sẽn ya toog n tʋkd nebã, tɩ yãmb mensã yaool n ka sɩɩsd-b ne y nug-bil ye.

⁴⁷ Yãmb na paam toogo! Tɩ bõe, yãmb meta Wẽnnaam no-rɛɛsdbã yaado, tɩ yaool n ya yãmb ba-rãmbã n kʋ-ba.

⁴⁸ Woto, yãmb yaa kaset rãmba, la y wilgdame tɩ yãmb saka y ba-rãmbã sẽn tʋmã. Bãmb n kʋ Wẽnnaam no-rɛɛsdbã, tɩ yãmb met b yaadã.

⁴⁹ Yaa rẽnda n kɩt tɩ Wẽnnaam yamã yetẽ yaa: Mam na n tʋma no-rɛɛsdb la tẽn-tʋmdb b nengẽ. Bãmb na n kʋʋ kẽere, la b nams kẽere,

⁵⁰ tɩ m tõe n sok zamaan kãngã nebã m no-rɛɛsdb nins fãa b sẽn kʋ hal dũni sɩngr tɩ ta moasã wã zɩɩm,

⁵¹ sẽn sɩng ne a Abɛl zɩɩm tɩ ta a Zakari b sẽn kʋ tẽn-kugrã ne wẽnd-doogã sʋkã zɩɩm. N-ye! Mam yeta yãmb tɩ b na n soka zamaan kãngã nebã bõn-kãnga.

⁵² Yãmb tõog karen-saam-dãmbã, yãmb na paam toogo! Tɩ bõe, yãmb feooga bãngr kʋɩlen-bilã. Yãmb mens ka rat n kẽ ye, la y gɩdgda neb nins sẽn dat n kẽ wã tɩ b ka tõe n kẽ ye.

⁵³ Bãmb sẽn yi be, tõog karen-saam-dãmbã ne Fariisẽ-dãmbã pẽdga bãmb wʋsgo, n sogs-b tɩ b gom bũmb wʋsg yelle,

⁵⁴ n bẽt bãmba n dat n paam gomd sẽn yi bãmb noorẽ n yõk-ba.

12

¹ Wakat kãnga, neb tus tus tigma taaba, n sẽbg taaba, tɩ ya wa b na n fẽda taaba. A Zezi deng n goma ne b karen-biisã n yeel-b yaa: Gũus-y y mens ne Fariisẽ-dãmbã rã-bɩllã sẽn ya zãmbã.

² Bũmb ka be sẽn ludi, sẽn kõn puk ye. La bũmb ka be sẽn solge, b sẽn kõn bãng ye.

³ Yaa woto yĩng tɩ bũmb ning fãa yãmb sẽn na gom lik bida pʋgẽ, b na n wʋm-a-la vẽenemẽ. La bũmb nins yãmb sẽn na n walem tʋbẽ, rot pʋsẽ, b na n moon-b-la rot zutu.

⁴ M zo-rãmba, mam yeta yãmb tɩ y ra zoe neb nins sẽn kʋʋd yĩngã n yaool n ka tõe n maan bũmb a to n paasã ye.

⁵ Mam na n wilga yãmb y sẽn tog n zoe a soaba. Zoe-y soab ning sẽn tõe n kʋ, la b tõe n kẽes bug-tẽngẽ me wã. N-ye! Mam yeta yãmb tɩ yaa soab kãng la yãmb tog n zoe.

⁶ B ka koosd yirs a nu su a yiib sɩda? Baoosgo, Wẽnnaam ka yĩmd b baa a yembr yell ye.

⁷ Baa yãmb zugã zoobd fãa sõdame. Dẽ yĩngã, bɩ y ra zoe rabeem ye. Yãmb bee yõod n yɩɩd yirs wʋsgo.

⁸ Mam yeta yãmb tɩ ned ning fãa sẽn na n kɩs kaset nebã taoor t'a yaa mam neda, Ninsaal Bi-riblã me na n kɩsa kaset Wẽnnaam malegsã taoor tɩ soab kãng yaa bãmb neda.

⁹ La ned ning fãa sẽn na n kɩɩs nebã taoor t'a ka mi maam, Ninsaal Bi-riblã me na n kɩɩsa Wẽnnaam malegsã taoor tɩ bãmb ka mi-a ye.

¹⁰ Ned ning fãa sẽn goma Ninsaal Bi-riblã wẽng tõe n paama sugri. La ned ning sẽn na n paoog-a Sɩɩg-sõng kõn tol n paam sugr ye.

¹¹ B sã n tall yãmb n kẽng karen-dotẽ wall bʋ-kaoodba la pãn-soaadbã taoore, bɩ y da maan yɩɩr ne yãmb sẽn na n gom to-to n yiis y menga, wall y sẽn na n yet tɩ bũmb ning ye.

¹² Tɩ bõe, wakat kãng bala, Sɩɩg-sõng na n wilga yãmb bũmb ning y sẽn tog n yeelã.

¹³ Ned a yen zĩnda kʋʋngã sʋk n yeel a Zezi yaa: Karen-saamba, yeel-y m ba-biigã t'a pʋɩ tõnd dogem pʋɩɩrã n yãk m dẽnd n kõ-ma.

¹⁴ A Zezi leok-a lame yaa: Dao wa, ãnna n yãk maam tɩ m yɩ yãmb bʋ-kaooda, wall y te-pʋɩta?

¹⁵ Dẽ, a Zezi yeela nebã yaa: Gũus-y y mens ne rat wʋsgã. Bala, hal baa naar pʋgẽ, ninsaal vɩɩmã ka tũud ne bũmb nins a sẽn tarã ye.

¹⁶ La a Zezi wẽe bãmb yel-bũnd n yeele: Arzɛk soab a yen pʋt n da sak sõama.

¹⁷ La a da tagsda a sũurẽ n yetẽ yaa: Mam na n maana a wãna? Bala, mam ka tar zĩig n na n bĩng m koodã ye.

¹⁸ A yeelame yaa: "Ad bũmb ning mam sẽn na n maane: Mam na n wãa m bao wã n lebs n me sẽn ya bɛd n yɩɩda, n bĩng m koodã fãa ne m teedã be.

¹⁹ La mam a n yeela m meng yaa: Fo tara paoong wʋsg sẽn sekd yʋʋm wʋsg yĩnga. Bɩ f vʋʋse, n dɩ la f yũ, la f maan sũ-noogo."

²⁰ La Wẽnnaam yeela yẽnda yaa: "Yalma! Yʋn-kãngã bala, mam na n deega fo vɩɩmã. La bũmb nins fo sẽn seglã na n yɩɩ ãnna rẽnda?"

²¹ Yaa a woto ne ned ning fãa sẽn tigsd paoong a meng yĩnga, n yaool n ka tar Wẽnnaam arzegsã.

²² Dẽ poore, a Zezi yeela b karen-biisã yaa: Yaa woto yĩng tɩ mam yet yãmb tɩ y ra maan yɩɩr ne y vɩɩmã yelle, yãmb sẽn na n dɩ bũmb ninga, wall ne y yĩngã yelle, y sẽn na n yeelg bũmb ning ye.

²³ Bala, vɩɩm yɩɩda rɩɩbo, la yĩng yɩɩda futu.

²⁴ Ges-y gãabdã! B ka bʋta, b ka tigsda, b ka tar pilgu wall baoor ye. La Wẽnnaam rɩlgd-b lame. Yãmb ka be yõod n yɩɩd bõn-yɩgdɩ wã sɩda?

²⁵ Ãnna yãmb sʋkã n tõe n paas a vɩɩmã woglem kãntɩɩg a yembre, a sẽn maand yɩɩr yĩnga?

²⁶ Dẽ, yãmb sã n ka tõe n maan bũmb sẽn ya bilf n yɩɩda, bõe yĩng tɩ yãmb maand yɩɩr ne bũmb nins sẽn ketã?

²⁷ Ges-y rulg-lɛlem sẽn bɩt to-to. B ka tʋmda, la b ka wĩid lamdo. Baoosgo, mam yeta yãmb t'a Salomo mengã ne a naamã fãa ka tõog n maneg a meng ne fut n yɩ neer wa rulg-lelemd a yembr ye.

²⁸ Yãmb tẽeb bilf rãmba, sã n yaa tɩ Wẽnnaam nagsa mood sẽn be weoogẽ rũnna, tɩ b na n tugl-b bugum beoogã a woto, bãmb kõn ges yãmb fut yell n yɩɩda?

²⁹ Dẽ wã, bɩ y da nams y mens n baood y sẽn na n dɩ bũmb ninga, wall y sẽn na n yũ bũmb ning ye.

³⁰ Tɩ bõe, yaa dũni neb nins sẽn ka pʋʋsd Wẽnnaamã n baood bõn-kãense. Yãmb ba wã miime tɩ yãmb dat-b lame.

³¹ Bas-y rẽ la y bao Wẽnnaam soolmã, la b na n kõo yãmb bõn-kãensã n paase.

³² Mam piisi, da zoe-y dabeem ye. Bala, a taa yãmb ba wã yam tɩ b kõ yãmb b soolmã.

³³ Koos-y yãmb sẽn tarã n dɩk a ligdã n kõ naong rãmba. Bao-y kord sẽn ka sãamda, la paoong sẽn ka sat arzãn pʋga, zĩig ning wagdr sẽn ka kolgda, la mogd sẽn ka sãamda.

³⁴ Bala, yãmb paoong sẽn beẽ wã, yãmb sũurã me na n zĩnda be.

³⁵ Bɩ y sẽb y sees sẽbdse, la y yõgen y fɩtɩl-dãmba,

³⁶ la y yɩ wa neb sẽn gũud tɩ b zu-soab yi pʋg-peegr kibs n lebg n wa, t'a sã n ta bal n wẽ bɩ b pak t'a kẽ.

³⁷ Bark bee tʋmtʋmd kãens zutu, b zu-soabã sẽn na n wa n ta n mik tɩ b neeme. Mam yeta yãmb sɩd-sɩd tɩ b zu-soabã na n sẽba a sẽbdga, n kɩt tɩ b zĩnd rɩɩb zĩigẽ, t'a wa n kõ-b rɩɩbo.

³⁸ Yẽ wat yʋn-sʋk tɩ ya no-kɛlenga, a sã n wa n mik tɩ b ka gõe, b sũur na yɩ noogo.

³⁹ Bãng-y neer tɩ roog soab sã n dag n miẽ wakat ning wagdr sẽn na n wa, a rag n na n neendame n ka bas t'a poog a roogã ye.

⁴⁰ Bɩ yãmb me segl n sɛ. Bala, Ninsaal Bi-riblã na n waa wakat ning yãmb sẽn ka tagsd tɩ b na n waame wã.

⁴¹ Dẽ, a Pɩyɛɛr soka a Zezi yaa: Zu-soaba, yaa tõnd bal la yãmb wẽ yel-bũn kãngã bii, bɩ yaa neba fãa?

⁴² T'a Zezi leok yaa: Dẽ, ãnna n ya tʋmtʋmd sẽn maand sɩda la a tar yam, t'a zu-soabã yeel-a t'a ges a tʋmtʋmdbã yelle, n kõt-b rɩɩb wakat fãa sẽn zemse?

⁴³ Tʋmtʋmd kãng zu-soabã sã n wa n mik t'a maanda a woto, tʋmtʋmdã sũur na yɩ noogo.

⁴⁴ Mam yeta yãmb sɩd-sɩd t'a zu-soabã na n kɩtame tɩ yẽ ges a arzegsã fãa yelle.

⁴⁵ La tʋmtʋmd kãng sã n yeel a sũurẽ t'a zu-soabã kaoosda waoongo, n sɩng n pãbd tʋmtʋmd daopã la tʋmtʋmd pogsã, n dɩtẽ la a yũud n gãeemdẽ,

⁴⁶ tʋmtʋmd kãng zu-soabã na n waa daar ning yẽ sẽn ka gũud-a, la wakat ning a sẽn ka mi. A zu-soabã na n sɩbga yẽ sõama, n kɩt tɩ bũmb nins sẽn paamd neb nins sẽn ka maand sɩdã paam yẽnda me.

⁴⁷ Tʋmtʋmd ning sẽn mi a zu-soab raabo, n yaool n ka segl bũmbu, la a ka maan a zu-soabã sẽn datã, b na n pãb-a la wʋsgo.

⁴⁸ La ned ning sẽn ka mi a zu-soabã raabo, n maan tʋʋmd sẽn tog ne sɩbgre, b na n pãba yẽ bilfu. B sã n kõ ned bũmb wʋsgo, b na n sok-a-la bũmb wʋsgo. La b sã n gũnug ned bũmb wʋsgo, b na n sok-a-la wʋsg n yɩɩda.

⁴⁹ Mam waame n na n lob bugum dũni zugu. La mam nonga a sã n da zoe n widgẽ!

⁵⁰ La lisg n be mam sẽn tog n deege, la a yellã na n namsa maam hal t'a wa n pidsi.

⁵¹ Yãmb tẽedame tɩ mam waame tɩ laafɩ na zĩnd tẽng zugu? Mam yeta yãmb tɩ ayo. La yaa tɩ welgr na zĩndi.

⁵² Bala, sẽn sɩng ne moasã, neb a nu sẽn be zak a yen pʋg na n welga taaba, tɩ tãabã kɩɩs yiibã, tɩ yiibã kɩɩs tãabã.

⁵³ Ba na n welga ne a bi-ribla, tɩ bi-ribl welg ne a ba. Ma na n welga ne a bi-pugla, tɩ bi-pugl welg ne a ma. Sɩd ma na n welga ne a bi-paga, tɩ bi-pag welg ne a sɩd ma.

⁵⁴ A Zezi leb n yeela neb kʋʋngã yaa: Yãmb sã n yã sawadg sẽn yikd nin-taoore, tao-tao bala, yãmb yetame tɩ saagã na n niime, la a yɩta a woto.

⁵⁵ La yãmb sã n yã tɩ sobg yita wĩndg goabga, yãmb yetame tɩ zĩigã na n yɩɩ tʋʋlgo, la a yɩta a woto.

⁵⁶ Zãmb-dãmba, yãmb mii tẽng yɛla, la yĩngr yɛl sẽn ya to-to. Bõe tɩ yãmb ka mi moasã wakatã yɛl n welge?

⁵⁷ La yaa bõe tɩ yãmb ka tõe n bãng sẽn ya tɩrg y toor n bake?

⁵⁸ Fo sã n dabd bʋʋd zĩigẽ ne f zabd-n-taaga, bɩ f modg n maneg f yellã ne-a, yãmb sẽn ket sorã zug wakate, tɩ yẽ ra wa tall foom n kẽng bʋ-kaoodba taoore, tɩ bʋ-kaoodbã yõk foom n kõ bi-bees roog gũud t'a kẽes-f bi-bees roog ye.

⁵⁹ Mam yet-f lame tɩ fo kõn yi be hal tɩ f yao a samdã yaoolem lagf ye.

13

¹ Wakat kãnga, neb kẽer waa n togsa a Zezi bũmb ning sẽn maan Galile neba, a Pilat sẽn daag b zɩɩm n kalem ne b maandã zɩɩmã.

² A Zezi leoka bãmb n yeele: Yãmb tẽedame tɩ Galile nin-kãens sẽn nams a woto wã, b yaa yel-wẽn maandb n yɩɩd Galile neb a taabã laa?

³ Ayo! Mam yeta yãmb tɩ ayo. Yãmb sã n ka tek yam n kos sugri, yãmb fãa na n sãama a woto me.

⁴ Wall neb piig la a nii Siloe gãosgã sẽn lʋɩ n bʋʋg-b n kʋ-bã, yãmb tagsdame tɩ bãmb yaa bɛɛgdb n yɩɩd Zeruzalɛm neb a taabã laa?

⁵ Ayo! Mam yeta yãmb tɩ ayo. Yãmb sã n ka tek yam n kos sugri, yãmb fãa me na n sãama a woto.

⁶ A Zezi wẽe yel-bũn kãngã me: Ned n dag n tar kankang sẽn sel a nasaar sib pʋʋgẽ. A waame n na n yãgs biisi, la a ka yã ye.

⁷ Dẽ, a yeela pʋʋgã koaad yaa: "Yʋʋm a tãab moasã la mam wat n dat kankangã biisi, la m ka yãt ye. Keeg-a! Bõe yĩng t'a yãmb zĩigã zaalem?"

⁸ Nasaar sib pʋʋgã koaad leokame n yeele: "M soaala, leb n bas-y-yã-a roandã yɛsa. Ka ne rẽ, mam na n tuume n gilg-a la m ning-a birga.

⁹ Daar ninga a na wom biisi. La a sã n ka wome, bɩ y keeg-a".

¹⁰ Zuif-rãmbã vʋʋsg daar a yembre, a Zezi dag n zãmsda neb karen-doog a yen pʋgẽ.

¹¹ La pag a yen n da be be, tɩ zĩn kɩt t'a lebg koams hal yʋʋm piig la a nii. A dag n zõrame n ka tõe n doog baa bilf ye.

¹² A Zezi yãa-a lame n gom ne-a n yeele: Paga, fo paama yolsg ne f komsmã.

¹³ Bãmb tika yẽ ne b nusi. Wakat kãng bala, a roogame n kõ Wẽnnaam waoogre.

¹⁴ La karen-doogã naab sũur sãama ne a Zezi sẽn maan bõn-bãnd vʋʋsg daarã, la a yeela nebã yaa: Dasem a yoob n be tʋʋm yĩnga. Wa-y da-kãens tɩ b maag-yã, tɩ da yɩt tõnd vʋʋsg daarã ye. Zu-soabã leok-a lame n yeele:

¹⁵ Zãmb rãmba, yãmb ned kam fãa ka lokd a naaf a rɩɩb koglgẽ n tall n tɩ yũnug vʋʋsg daarã sɩda?

¹⁶ La pʋg kãngã sẽn ya a Abraham bi-pugla, t'a Sʋtãan loe-a hal yʋʋm piig la a nii wã, d ka tog n lok-a vʋʋsg daare?

¹⁷ A Zezi sẽn gom a woto, yãnd yõka b bɛɛba fãa, la neb kʋʋngã maanda sũ-noog bũmb nins fãa a Zezi sẽn maan tɩ be ziirã yĩnga.

¹⁸ A Zezi leb n yeelame yaa: Wẽnnaam soolma wẽnda bõe, la m na n mams-a-la ne bõe?

¹⁹ A wẽnda wa siin-bil ned sẽn dɩk n lob a zẽed zĩigẽ. A yitame n lebg tɩɩga, la yĩngr liuuli vɩɩ a wilẽ wã.

²⁰ B leb n yeelame: Mam na n mamsa Wẽnnaam soolmã ne bõe?

²¹ A wẽnda rã-bɩll pag sẽn dɩk n ning zom wam a tãabo, hal tɩ zom-nagdgã fãa wuki.

²² A Zezi da pɩʋʋgda tẽn-bɛd la tẽn-bõonego, n zãmsd nebã la b dabd Zeruzalɛm.

²³ Ned n sok bãmb yaa: Zu-soaba, yaa neb bilf bal n na n paam fãagre? A Zezi leoka bãmb n yeele:

²⁴ Nang-y pãng n tũ digno-sẽkã n kẽ. Bala, mam yeta yãmb tɩ neb wʋsg na n baoome tɩ kẽ la b ka na n tõog ye.

²⁵ Yirã soab sã n yik n pag rignoorã, tɩ yãmb pa yɩng n sɩng n kabsdẽ la y yet Zu-soabã tɩ b pak tɩ y kẽ, b na n leoka yãmb tɩ b ka mi yãmb sẽn yitẽ ye.

²⁶ Dẽ, yãmb na n sɩngame n yeele: "Tõnd dɩɩ ne yãmba la d yũ ne yãmba, la yãmb zãmsa neb tõnd soaya zutu."

²⁷ La b na n leoka yãmb n yeele: "Mam ka mi yãmb sẽn yitẽ ye. Zãag-y ne maam, yãmb fãa sẽn tʋmd ka-tɩrlem tʋʋma."

²⁸ Yãmb sã n yã a Abraham, la a Izak, la a Zakob ne Wẽnnaam no-rɛɛsdbã fãa Wẽnnaam soolmã pʋgẽ, tɩ b yaool n lob yãmb yɩnga, nintãm ne yẽn wãbr na zĩnd be.

²⁹ Neb na n yii yaang la taoore, dɩtg la goabga, n zĩnd n dɩ Wẽnnaam soolmã pʋgẽ.

³⁰ La gese, poorẽ dãmb n be n na n yɩ dẽenem dãmba, tɩ dẽenem dãmb me yɩ poorẽ dãmba.

³¹ Wakat kãnga, Fariisẽ-dãmbã kẽer waa n yeela a Zezi yaa: Kẽng n looge! Yi ka, bala, Herood dat n kʋʋ foom.

³² A Zezi yeela bãmb yaa: Kẽng n tɩ yeel-y bõn-bɛɛgã tɩ mam digda zĩn-dãmba, la m maagd bãad-dãmb rũnna la beooge. La ra-yɩt na n yɩɩ baoosg daar ne maam.

³³ La yaa tɩlɛ tɩ mam kẽn dũnna, la beoogo, la dayɩta. Bala, a ka zems tɩ Wẽnnaam no-rɛɛs ki zĩig a to tɩ ka Zeruzalɛm ye.

³⁴ Zeruzalɛm! Zeruzalɛm! Fo sẽn kʋʋd Wẽnnaam no-rɛɛsdba, la f lobd neb nins Wẽnnaam sẽn tʋm fo nengẽ wã kugã, naoor a wãn la mam dag n tʋlg n tigs fo kambã wa no-yãang sẽn põgended a kamb a pɩgsẽ? La yãmb ka ralg ye.

³⁵ Gese, b na n basa yãmb ne y roogã. La mam yeta yãmb tɩ yãmb ka na n leb n yã maam yɛsa, hal tɩ ta daar ning yãmb sẽn na n yeel tɩ: "Bark bee ned ning sẽn wat ne Zu-soabã yʋʋrã zugu."

14

¹ Daar a yembre, a Zezi kẽe Fariisẽ-dãmbã naab a yembr zakẽ n na n dɩ, la Fariisẽ-dãmbã dag n gũusda bãmba.

² La ade, rao a ye n dag n be bãmb taoore, bã-motg sẽn tara.

³ A Zezi goma ne tõog karen-saam-dãmbã la Fariisẽ-dãmba n yeele: Dẽ yĩnga, noor beeme tɩ maag ned vʋʋsg daare?

⁴ Bãmb kell n sĩndame. Dẽ, a Zezi peega bãadã, n maag-a, la b kuils-a.

⁵ La a Zezi yeel-b lame yaa: Ãnna yãmb sʋkã bi-ribl bɩ a naaf n na n lʋɩ bulgẽ vʋʋsg daar t'a ka yiis-a tao-tao?

⁶ La b ka tõog n leok gom kãng ye.

⁷ Rẽ poore, a Zezi goma ne neb nins b sẽn bool rɩɩbã yĩngã n wẽ-b yel-bũndi. Tɩ bõe, bãmb yãame tɩ nin-kãens baooda naam zĩndg zĩisi. B yeel-b lame yaa:

⁸ Ned sã n bool foom yi-kãadem kibsa, da tʋg n zĩnd naam zĩndg zĩigẽ ye, tɩ tõe t'a boola ned sẽn yɩɩd foom.

⁹ Sã n yɩ a woto, sẽn bool-a foom ne yẽnda wã na n waa n yeela foom tɩ f yik n bas zĩig n kõ-a, fo na n yaool n tɩ zĩnda poorẽ zaoogã zugu, la f na n yãa yãnde.

¹⁰ B sã n bool foom, kẽng n tɩ zĩnd poorẽ zaoogã zugu, tɩ ned ning sẽn bool-a foomã sã n wa bɩ a yeel foom yaa: "M zoa, wa taoor ka!" Woto na n yɩɩ fo waoogr neb nins fãa sẽn zĩ ne foom n dɩtẽ wã taoore.

¹¹ Sɩd me, b na n sika ned ning fãa sẽn zẽkd a menga, la b na n zẽka ned ning fãa sẽn sikd a menga.

¹² La a Zezi yeela ned ning sẽn bool-a bãmb tɩ b wa n dɩ wã yaa: Fo sã n na n bool neb tɩ b wa n dɩ ne foom, tɩ ya wĩntoog bɩ yʋngo, da bool f zo-rãmba, wall f ba-biisi, wall f buudu, wall f yags nins sẽn ya arzegs rãmbã, tɩ bãmb me da wa n bool foom ye. Rẽ na n yɩɩ lebsgo.

¹³ Fo sã n na n bool neb tɩ b wa n dɩ ne foom, bool naong rãmba, la koms-rãmba, la wobse, la zoense,

¹⁴ la fo na n paama sũ-noogo, b sẽn ka tar n na n kõ foom n lebsã yĩnga. Bala, nin-tɩrsã vʋʋgr wakate, fo na n paama keoore.

¹⁵ Neb nins sẽn dag n zĩ n dɩtẽ wã sẽn wʋm a Zezi gom kãensã, b ned a yembr yeelame yaa: Bark bee ned ning sẽn na n naag-a n dɩ Wẽnnaam soolmẽ wã zugu!

¹⁶ La a Zezi leoka yẽnda n yeele: Dao a yembr n dag n segl rɩɩb n bool neb wʋsg tɩ b wa rɩ.

¹⁷ Dɩɩbã wakate, a tʋma a tʋmtʋmd t'a tɩ yeel neb nins a sẽn boolã tɩ b wa tɩ bũmba fãa zoe n segl n saame.

¹⁸ La bãmb ned kam fãa sɩng n padmame. Pipi soabã yeelame tɩ yẽ raa pʋʋgo, la yaa tɩlɛ tɩ yẽ kẽng n tɩ gese, la a kotame tɩ b bas-a taale.

¹⁹ A to yeelame tɩ yẽ raa nag-koods piiga, la yẽ na n mak-b lame n gese, la a kotame tɩ b bas-a taale.

²⁰ Ned a to yeelame tɩ yẽ nan peega a pʋg-paala, la rẽ n kɩt tɩ yẽ ka na n tõog n wa ye.

²¹ Tʋmtʋmdã lebgame n tɩ togs a soaalã bõn-kãense. A soaalã sũur yĩigame t'a yeel a tʋmtʋmdã t'a kẽng raasẽ wã, la tẽngã soayã zut tao-tao, n wa ne naong rãmba, la koms-rãmba, la zoense, la wobsã be.

²² Tʋmtʋmdã yeelame tɩ yẽ maana a soaalã sẽn yeelã, la vɩʋʋg ket n beeme.

²³ La soaalã yeela tʋmtʋmdã yaa: Rɩk soayã, la f yeg yãgã n modg nebã tɩ b wa kẽ hal tɩ mam yirã pid ne neba.

²⁴ Bala, mam yeta yãmb tɩ neb nins mam sẽn dag n boolã, bãmb ned baa a yen kõn lemb mam dɩɩbã ye.

²⁵ Neb kʋʋng wʋsg dag n tũuda a Zezi sorã zugu. A Zezi wẽnemdame n yeel-b yaa:

²⁶ Ned sã n wat mam nengẽ, n ka kis a ba la a ma la a paga la a kamba la a ba-bi-raopa la a ba-bi-pogse, la baa ne a mengã vɩɩm, a ka tõe n yɩ mam karen-biig ye.

²⁷ La ned ning fãa sẽn kõn dɩk a da-pɩk n tũ maam, ka tõe n yɩ mam karen-biig ye.

²⁸ Bala, ãnna n be yãmb sʋkã n dat n me gãosgo, n ka reng n zĩnd n geel ligd ning fãa a sẽn tog n yiis tʋʋmdã yĩnga, n bãng a sã n tara sẽn sek tɩ me-a n sa?

²⁹ Sã n ka rẽ, a sã n yẽbg roogã n sa, n yaool n ka tõe n baas-a, neb nins fãa sẽn na n yã wã na n yaala yẽnda n yeele:

³⁰ Rao kãngã sɩnga gãosg meeb la a ka tõog n baas ye.

³¹ Wall rĩm bʋg n be n dat n tɩ zab ne rĩm a to, n ka reng n zĩnd n mag n gese, yẽ ne a nebã tus piigã sã n tara pãn-tõog tɩ kẽng n seg rĩm a to wã sẽn wat ne neb tus pisi wã?

³² Rĩm a to wã sẽn ket n be yɩɩga, a na n tʋma neb a nengẽ tɩ b tɩ yẽs laafɩ yẽsg ne-a.

³³ Woto me, yãmb ned ning fãa sẽn ka basd bũmb nins fãa a sẽn tarã ka tõe n yɩ mam karen-biig ye.

³⁴ Yamsem yaa bõn-sõngo. La yamsem sã n lebg poada, bõe la b na n ning-a t'a le paam noosem?

³⁵ A ka yõod tãnd yĩnga, wall birg yĩng ye. B lobd-a la yɩnga. Bɩ sẽn tar-a tʋb n wʋmdẽ wʋme!

15

¹ Yaood-dɛɛgdba fãa ne yel-wẽn maandba fãa kolga a Zezi n na n kelg-ba.

² La Fariisẽ-dãmba la tõog karen-saam-dãmba da yẽgemdame n yetẽ tɩ rao-kãnga reegda yel-wẽn maandba la b rɩt ne-ba.

³ La a Zezi wẽe bãmb yel-bũn kãnga n yeele:

⁴ Nin-bʋg n be yãmb sʋkã n na n tar piis koabga, t'a yembr meneme, t'a ka bas pis-wɛ la a wɛ wã weoogẽ wã n kẽng n tɩ gẽes pesg ning sẽn menem-a wã hal t'a yãnd-a?

⁵ La yẽ sã n yãnd-a, a na n palg-a-la a bagdẽ ne sũ-noogo.

⁶ La yẽ sã n lebg n ta yiri, a boonda a zo-rãmbã ne a yagsã a yir n yeel-b yaa: "Naag-y maam n maan sũ-noogo, bala, mam yãnda m pesgã sẽn dag n menemã".

⁷ Woto me, mam yeta yãmb tɩ sũ-noog na n zĩnda arzãn pʋgẽ, yel-wẽn maand a yen sẽn tek yam n kos sugr yĩnga, n yɩɩd nin-tɩrs pis-wɛ la a wɛ sẽn ka baood sugr kosgã yĩnga.

⁸ Walla, pʋg bʋg n na n tar ligd piiga t'a yembr menem t'a ka yõgen fɩtla, n pɩɩs roogã la a gẽes-a neer hal n yãnd-a?

⁹ La a sã n yãnd-a, a boonda a zo-rãmbã ne a yagsã a yir n yeel-b yaa: Naag-y maam n maan sũ-noogo, bala, mam yãnda m lagfã sẽn dag n menemã.

¹⁰ Woto me, mam yeta yãmb tɩ yel-wẽn maand a yen sã n tek yam n kos sugri, sũ-noog na n zĩnda Wẽnnaam malegsã sʋka.

¹¹ A Zezi leb n yeelame yaa: Rao n dag n tar kom-dibli a yiibu.

¹² La yaowã yeela a ba wã yaa: "M ba, pʋɩ-y y paoongã n yãk m pʋɩɩr n kõ-ma". La ba wã pʋɩ-b-la a paoongã.

¹³ Rasem bilf zugẽ, yaowã tigsa a sẽn da tarã fãa n kẽng tẽng sẽn zãra, n tɩ sãam a paoongã be ne tʋʋm-dẽgd maanego.

¹⁴ La yẽ sẽn sãam a paoongã fãa n sa, kom kãseng n kẽ tẽn-kãnga, la koma sɩngame n nams-a.

¹⁵ Yẽ kẽng n tɩ noka tẽnga ned a yembre, t'a tʋm yẽ a pʋtẽ t'a tɩ gũ kurkuyã.

¹⁶ Yẽ dag n datẽ la zãbnã kurkuyã sẽn da rɩtã n dɩ n pid a pʋga, la ned ka kõt yẽnda ye.

¹⁷ Yẽ tagsa a sũurẽ n yeele: "M baaba tʋmtʋmdbã waooga, la b tara rɩɩb n dɩt n tɩgd n kelldẽ, tɩ kom kʋʋd maam ka.

¹⁸ Mam na n yikame n kẽng m baaba nengẽ n tɩ yeel-b yaa: M ba, mam beega Wẽnnaam la m beeg yãmba.

¹⁹ Mam ka le zems tɩ b bool maam tɩ yãmb biig ye. Ges-y maam wa yãmb tʋmtʋmd a yembre".

²⁰ La a yikame n kẽng a ba wã nengẽ. La yẽ sẽn ket n be yɩɩga, a ba wã yã-a lame t'a nimbãanega yõk-a. A ba wã wudgame n tɩ mobg-a n mok-a.

²¹ Biigã yeela a ba wã yaa: "M ba, mam beega Wẽnnaam la m beeg yãmba. Mam ka le zems tɩ b bool maam tɩ y biig ye."

²² La a ba wã yeela a tʋmtʋmdbã yaa: "Wa-y ne fuug ning sẽn yaa-a neer n yɩɩdã tao-tao n yeelg-a. Ning-y-yã-a nug-bilã nugbĩnga, la y wĩd-a neooda.

²³ Wa-y ne nag-bi-noabdgã, n kʋ-a tɩ d rɩ la d maan sũ-noogo.

²⁴ Bala, mam bi-ribl kãnga ra kiime la a leb n vʋʋgame. A rag n menemame, la d leb n yãnd-a lame." La bãmb sɩngame n kɩdemdẽ.

²⁵ La bi-ribl kãsengã ra bee pʋtẽ. La yẽ sẽn lebg n watẽ n kolg yiri, a wʋma yʋʋmb ne saoog rãamde.

²⁶ Yẽ boola tʋmtʋmd a yembr n sok-a bũmb ninga sẽn maandã võore.

²⁷ Tʋmtʋmdã yeela yẽ yaa: "Yãmb yaowã lebg n waame, tɩ yãmb ba wã kʋ nag-bi-noabdgã, a sẽn lebg n wa ne laafɩ wã yĩnga."

²⁸ Yẽ sũurã puugame t'a ka sak n na n kẽ ye. A baaba wã yiime n na n bool-a t'a wa n kẽ.

²⁹ Dẽ, a leoka a ba wã yaa: "Ade, yaa yʋʋm wʋsg la mam tʋmd n kõt yãmba. Mam nan ka kɩɩs yãmb noor ye. La maam yẽ, yãmb zɩɩ n kõ maam baa bull tɩ m maan sũ-noog ne m zo-rãmb ye.

³⁰ La yãmb bi-kãnga, sẽn sãam-a yãmb paoongã ne pʋg-yoaadbã sẽn lebg n wa wã, yãmb kʋʋ nag-bi-noabdgã n kõ-a".

³¹ A ba wã yeel-a lame yaa: "M biiga, fo bee ne maam daar fãa, la bũmb nins fãa mam sẽn tarã yaa foom n so.

³² La a zemsame tɩ tõnd maan sũ-noog n kɩdem. Bala fo yao wã fo sẽn ne wã ra kiime, la a leb n vʋʋgame. A rag n menemame, la m leb n yãnd-a lame".

16

¹ A Zezi yeela b karen-biisã me yaa: Arzɛk soab a yembr n da n be n tar a tʋʋm taoor soaba, la b togs-a lame t'a tʋmtʋmdã sãamda yẽ paoongã.

² Yẽ boola tʋʋma taoor soab n yeel-a yaa: "Bõe tɩ b gomd fo yell a woto tɩ mam wʋmdẽ? Wilg maam fo tʋʋma sẽn yɩ to-to. Bala, fo ka na n le yɩ mam tʋʋma taoor soab ye."

³ Tʋʋma taoor soab tagsa a sũurẽ n yeele: "Mam zu-soabã sẽn dat n yiis maam tʋʋmdẽ wã, mam na n maana boẽ? Koobo? Mam ka tar pãng n na n ko ye, la bõsg yaa yãnd ne maam.

⁴ Mam mii m sẽn na n maanega, tɩ b sã n wa n yiis maam m tʋʋmdẽ wã, bɩ neb deeg maam b yiyã".

⁵ Dẽ, yẽ kɩtame tɩ b bool a zu-soaba sam-dãmbã yembr yembre, n yeel pipi soabã yaa: "Fo tara mam zu-soaba samd wãna?"

⁶ T'a leok tɩ kaam rʋg-bɛd koabga. La a yeela yẽ t'a reeg a sebrã n zĩnd tao-tao n gʋls tɩ pis-nu.

⁷ Yẽ leb n soka a to yaa: "La fo yẽ samdã yaa wãna?" Tɩ yẽ leok tɩ kood yond kobs-nu. La a yeela yẽ t'a reeg a sebrã n gʋls tɩ kobs-naase.

⁸ La a zu-soaba pẽga a tʋʋma taoor soab sẽn ka tɩrgã a sẽn maan yama yĩnga. Bala, dũni kanga neb maanda yam ne taaba, n yɩɩd vẽenem kambã.

⁹ La mam yeta yãmb tɩ y rɩk dũni paoongã n bao zo-rãmba, tɩ paoongã sã n wa n sɛ n bas yãmba, bɩ Wẽnnaam reeg yãmb yiy sẽn paad wakat sẽn kõn sa wã pʋgẽ.

¹⁰ Ned ning sẽn maand sɩd bõn-bõoneg pʋse, a maanda sɩd bõn-kãsems pʋse. La ned ninga sẽn ka maand sɩd bõn-bõoneg pʋs ka na n maan sɩd bõn-kãsens pʋs me ye.

¹¹ Dẽ, yãmb sã n ka maan sɩd ne dũniyã arzegse, ãnna n na n dɩk paoong sɩd-sɩd n gũnug yãmba?

¹² La yãmb sã n ka maan sɩd ne ned a to paoongo, ãnna n na n kõ yãmb y meng rẽnda?

¹³ Tʋmtʋmd baa a ye ka be n tõe n sak zu-soben-dãmb a yiib ye. Bala, yẽ na n kisga a yen la a nong a to wã, wall a waoog a yen la a paoog a to wã. Yãmb ka tõe sak Wẽnnaam la ligd me ye.

¹⁴ Fariisẽ-dãmbã sẽn da nong ligdã ra kelgda bõn-kãensã fãa la b ra yaanda a Zezi.

¹⁵ A Zezi yeel-b lame yaa: yãmb yaa neb sẽn wilgd nebã tɩ y yaa tɩrse. La Wẽnnaam mii yãmb sũyã. Bala, bũmb ning neba sẽn pẽgd wʋsgã yaa bõn-wẽng Wẽnnaam nifẽ.

¹⁶ Hal tɩ ta a Zã wakate, dag n yaa tõogã ne no-rɛɛsdbã wakate. La sẽn sɩng ne a Zã wakatã, b moonda Wẽnnaam soolem koe-noogã, la ned kam fãa nangda pãng n dat n kẽ be.

¹⁷ Yĩngr la tẽng loogr yaa naana n yɩɩd tõogã kargr a yen menengo.

¹⁸ Ned ning fãa sẽn dig a pag la a rɩk a to, maanda yoobo. La ned ning fãa sẽn dɩk paga a sɩd sẽn dig maanda yoobo.

¹⁹ Rao a ye n da be n ya arzɛk soaba, n yeelgd fu-sõama sẽn ya neeba. La daar fãa, a tara bũmb fãa tɩ seke, t'a vɩɩma ya noog wʋsgo.

²⁰ Naong soab a yen sẽn boond t'a Lazaar dag n gãee arzɛk soabã zak noore. La a yĩnga fãa da pida ne noada.

²¹ A rag n nongẽ lame n paam rɩ-zeremsã sẽn yit arzɛk soaba taabl zug n lʋɩtẽ wã n dɩ. La sẽn paase, baasã wat n lelemda a noadã.

²² Naong soabã wa n kiime. La malegsã talla yẽ n kẽng a Abraham nengẽ. La arzɛk soabã me wa n kiime, la b mum-a lame.

²³ Kɩɩm-kulgã pʋgẽ, yẽ nak n gesame. La a namsgã pʋgẽ, a tool n yãa a Abraham yɩɩga, t'a Lazaar be ne-a.

²⁴ Yẽ zẽka a koɛɛg n yeel: "M ba a Abraham! Zoe-y mam nimbãanega, n tʋm a Lazaar t'a tẽk a nug-bil koomẽ n wa n wʋlg m zelemdã. Bala, mam namsda wʋsg bug-kãnga pʋgẽ."

²⁵ A Abraham leoka yẽ n yeele: "M biiga, bɩ f tẽeg tɩ fo paama arzegs f vɩɩmã wakate, la t'a Lazaar paama toodo. La moasã, yẽ paamda belsg ka, tɩ fo be toog pʋgẽ.

²⁶ La rẽ fãa sẽn yãk a toogo, bok-kãseng n be tõnd ne yãmb suka, sẽn na n yɩl tɩ neb nins sẽn dat n yi ka n wa yãmb nengẽ wã ra tõog ye, la tɩ sẽn be-b yãmb nengẽ wã me ra tõog n wa tõnd nengẽ ye".

²⁷ Arzɛk soabã yeelame yaa: "Sã n ya a woto, m ba, mam kota yãmb tɩ y tʋm a Lazaar mam ba wã yiri.

²⁸ Bala mam tara ba-bi-raop a nu. Bɩ a kẽng n tɩ kɩs bãmb kaset tɩ b ra wa n wa zĩ-kãnga sẽn ya namsg zĩigã ye".

²⁹ A Abraham leokame tɩ b tara a Moyiis ne Wẽnnaam no-rɛɛsdbã, la b kelg bãmba.

³⁰ La arzɛk soabã yeelame yaa: "Ayo, m ba a Abraham! La ned sẽn ki sã n vʋʋg n kẽng bãmb nengẽ, b na n teka yam n kos sugri."

³¹ La Abraham leoka yẽ yaa: "Bãmb sã n ka kelg a Moyiis ne Wẽnnaam no-rɛɛsdbã, baa ned sẽn ki sã n vʋʋge, b kõn tẽ-a ye." A Lazaar ne arzɛk soabã (16.19)

17

¹ A Zezi yeel a b karen-biisã yaa: Bũmb nins sẽn wat ne lʋɩɩsã ka tõe n ka wa ye. La ned ning sẽn na n wa-a ne-bã na paam toogo.

² B sẽn na loe ned kokor ne neer kugr n lob-a ko-kãsenga pʋg n são a yĩnga, n yɩɩd a sẽn na n kɩt tɩ kom-bõoneg kãens ned a yembr lʋɩ.

³ Gũus-y y mense. Fo ba-biig sã n maan yel-wende, bɩ f leng-a, la a sã n kos sugri, bɩ f kõ-a.

⁴ La a sã n beeg foom naoor a yopoe daar a yembre, n lebg n wa fo nengẽ naoor a yopoe n yet t'a kota sugri, bɩ f kõ-a sugri.

⁵ Tẽn-tʋmdba yeela Zu-soabã yaa: Paas-y d tẽebã.

⁶ La Zu-soabã yeelame yaa: Yãmb sã n da tarẽ tẽeb sẽn zem siin-bila, yãmb dag n na yeel wom-sɛ-kãngã t'a vik n tɩ sel ko-kãsengã pʋga, la a dag n na sak yãmba.

⁷ Ãnna n be yãmb sʋkã n tar tʋmtʋmd sẽn kood wall sẽn gũud rũmsi, t'a sã n yi weoog n lebg n wa bɩ a yeel tʋmtʋmdã: wa kell n zĩnd n dɩ?

⁸ Yẽ ka na n yeel tʋmtʋmdã tɩ: Segl dɩɩb n kõ-ma n tek fuug n tall rɩɩbã n wa n kõ-m tɩ m dɩ la m yũ. Rẽ poore fo na yaool n dɩ la f yũ?

⁹ Yẽ na n pʋʋsa tʋmtʋmd-kãng barka, a sẽn maan bũmb ninga b sẽn yeel-a t'a maana yĩnga?

¹⁰ Woto me, yãmb sã n maan bũmb nins fãa b sẽn yeel yãmb tɩ y maana, bɩ y yeele: Tõnd yaa tʋmtʋmdb sẽn ka yõod ye, d maana tʋʋmd ninga tõnd sẽn da tog n maanã bala.

¹¹ A Zezi sẽn wa n dabd Zeruzalɛm, bãmb da tũuda Samari soolem ne Galile sʋka.

¹² Bãmb sẽn kẽed tẽn-bil a yen pʋga, neb piiga yĩn-gãong bãas sẽn tar waa n sega bãmba. Bãmb yaasa yɩɩg n zẽk b koees n yeele:

¹³ Zezi, Zu-soaba, zoe-y tõnd nimbãanega.

¹⁴ A Zezi sẽn yãnd-bã, b yeel-b lame tɩ b kẽng n tɩ wilg b mens maan-kʋʋdbã. La bãmb sẽn dabd be wakate, bãmb kell n lebga yɩlma.

¹⁵ Bãmb sʋka ned a yen sẽn yã t'a paama maagre, yẽ lebg n pʋga a nao, n zẽk a koɛɛg n pẽgd Wẽnnaam.

¹⁶ Yẽ wõgemda a Zezi taoore, n fõgn a neng tẽnga, n pʋʋs bãmb barka. A dag n yaa Samari neda.

¹⁷ A Zezi gomame n yeel yaa: Bãmb piiga fãa ka lebg yɩlma sɩda? La neb a wɛ wã bee yɛ?

¹⁸ Yaa sãan-kãnga bal n lebg n wa n na kõ Wẽnnaam waoogre?

¹⁹ Dẽ a Zezi yeel-a lame yaa: yik n looge. Fo tẽeb n fãag foom.

²⁰ Fariisẽ-dambã soka a Zezi n dat n bãng Wẽnnaam soolmã sẽn na n wa wakat ninga. A Zezi leok-b lame yaa: Wẽnnaam soolmã ka wate, n ya wa bũmb ned sẽn tõe n gẽnes ye.

²¹ B ka na n yeel tɩ ges-y-yã! Wẽnnaam soolem bee ka wall a bee ka sẽne ye. Bala, ad-y Wẽnnaam soolmã bee yãmb sʋka.

²² La a Zezi yeela b karen-biisã yaa: Wakat n wat tɩ yãmb na n dat n yã Ninsaal Bi-riblã rayã daar a yen la yãmb kõn yã ye.

²³ B na n yeela yãmb tɩ b bee ka, wala b bee ka sẽne. Da kẽng-y be ye, la y ra babs-b ye.

²⁴ A wa sa-yãgb sẽn yit kɩreng a yen n yãg n tɩ ta kɩreng a to wã, Ninsaal Bi-riblã me na n yɩɩ a woto b waoongã dãare.

²⁵ La yaa tɩlɛ tɩ bãmb deng n nams wʋsgo, la tɩ zamaan kãnga nebã zãgs bãmba.

²⁶ Bũmb ninga sẽn zĩnd a Nowe wakatã na n zĩnda Ninsaal Bi-riblã waoongã wakat me.

²⁷ Nebã rag n dɩtame la b yũuda, la b kẽed kãadem, la b kõt b kamb sɩdba, hal tɩ ta daar ninga a Nowe sẽn kẽ koom koglgẽ wã. Sa-kãsenga waame n sãam bãmb fãa.

²⁸ A na n yɩɩ wa a Lot wakatã. Nebã rag n dɩtame la b yũuda, n daadẽ la b koosdẽ, n bʋtẽ la b metẽ.

²⁹ La daar ning a Lot sẽn yi Sodom tẽngã, bugum yii yĩngr n ni wa saaga, ne kidbri n sãam bãmb fãa.

³⁰ Na n yɩɩ a woto me daar ning Ninsaal Bi-riblã sẽn na n puk b mengã.

³¹ Badaare, bɩ ned ninga sẽn be roog zug t'a teed be roogã pʋg ra sig n dɩgs-b ye. La bɩ ned ninga sẽn be pʋtẽ da lebg n leb poorẽ me ye.

³² Tẽeg-y-yã a Lot pagã yelle.

³³ Ned ninga sẽn na n bao tɩ gũ a vɩɩm, a na n menes-a lame, la ned ning sẽn na bas a vɩɩm na n paam-a lame.

³⁴ Mam yeta yãmb tɩ baraar yʋngo, neb a yiib sẽn na n goẽ gãag a yembr zugu, b na n dɩka a ye, n bas a ye.

³⁵ Pagb a yiib sẽn na n werd neerẽ ne taaba, b na n dɩka a yembr n bas a ye.

³⁶ Raop a yiib sẽn na n be pʋʋgẽ, b na n dɩka a yembr la b bas a ye.

³⁷ Karen-biisã soka a Zezi yaa: Zu-soaba, na n yɩɩ zĩ-bʋgo? La a Zezi leokame tɩ dɩgr sẽn be zĩig ninga, yɩbrend tigimda beene. Pagb a yiib sẽn werd neerẽ (17.35)

18

¹ A Zezi wẽe bãmb yel-bũnd n na n wilg-b tɩ b tog n pʋʋsa wakat fãa n da yɛ ye.

² A Zezi yeelame: Bʋ-kaood a ye n da be tẽng a yen pʋgẽ n ka zoet Wẽnnaam, la a ka zoet ned baa a yen nif ye.

³ Pʋgkõor a ye me n da be tẽn-kãng pʋga, n wat n yet bʋ-kaoodã t'a sõng-a tɩ ned n zabd ne yẽnda.

⁴ Bʋ-kaoodã zãgsame n kaoos t'a ka na n sõng-a ye. La a yaool n tagsa a sũurẽ n yeele: "Baa ne mam sẽn ka zoet Wẽnnaama, la m ka zoet ned nifã,

⁵ pʋgkõ-kãngã sẽn pẽdgd maama yĩnga, mam na n baas n sõng-a lame t'a ra wat n namsd maam tɩ wa n loog nug ye."

⁶ Zu-soabã leb n yeelame yɛsa: Kelg-y bʋ-kaood-wẽngã sẽn yeelã.

⁷ Dẽ, Wẽnnaam kõn sõng bãmb nin-tũusdsã sẽn zẽkd b koees wĩndg la yʋng n kot bãmbã? B na kaoos n sõng-ba?

⁸ Mam yeta yãmb tɩ b na n sõnga bãmb tao-tao. La Ninsaal Bi-riblã sã n wa, b na n yãa tẽeb tẽng zugu?

⁹ A Zezi leb n wẽe yel-bũn-kãnga neb kẽer yĩnga, b sẽn da tẽed tɩ b yaa tɩrse, la b paoogd neb a taabã yĩnga, n yeele:

¹⁰ Daop a yiib n da kẽng wẽnd-doogẽ n na n tɩ pʋʋse. A ye wã yaa Fariisẽ ned la a to wã yaa yaood-dɛɛgda.

¹¹ Fariisẽ nedã yalsa yĩngr n pʋʋs a sũurẽ a woto: "Mam Wẽnnaam, m pʋʋsda yãmb bark mam sẽn ka wẽnd wa neb a taabã sẽn ya wagda la nin-wẽnse la yoaadbã, la m ka wẽnd baa yaood-deegd-kãnga wã yĩnga.

¹² Mam loeta noor naoor a yiib rasem a yopoe pʋgẽ, mam yãkda m sẽn tarã piig pʋɩɩr n kõtẽ."

¹³ Yaood-dɛɛgdã yalsa yɩɩga, n pʋs n ka saagd n na n doog a neng yĩngr ye. La a ra pĩisda a yãoog n yetẽ: "Mam Wẽnnaam! Zoe-y mam nimbãaneg tɩ m yaa yel-wẽn-maanda."

¹⁴ Mam yeta yãmb tɩ rao-kãng lebg n kuila a yir ne tɩrlem. La fariisẽ nedã ka paam ye. Bala, b na n sika ned ning sẽn zẽkd a menga, la b na zẽka ned ning sẽn sikd a menga.

¹⁵ Neb n dag n talled hal baa kom-peels n wat a Zezi nengẽ tɩ b sɩɩs-ba. La karen-biisã sẽn yã bõn-kãnga, b sɩngame n lengd neb nins sẽn tall-b kambã n wa wã.

¹⁶ La a Zezi kɩtame tɩ b wa ne kambã, la b yeele: Bas-y kom-bõonegã tɩ b wa mam nengẽ la y ra gɩdg-b ye. Bala, Wẽnnaam soolmã yaa neb nins sẽn wẽnd-b bãmbã yĩnga.

¹⁷ Sɩd-sɩdã, mam yeta yãmb tɩ ned ning fãa sẽn ka reegd Wẽnnaam soolmã wa bi-bilf ka na kẽ be ye.

¹⁸ Naab a yembr soka a Zezi yaa: Karen-saam-sõngo, bõe la mam tog n maan n paam vɩɩm sẽn kõn sa?

¹⁹ A Zezi yeel-a lame yaa: Bõe yĩng tɩ f boond maam tɩ nin-sõngo? Ned kae n ya sõama tɩ sã n ka Wẽnnaam b yen bala.

²⁰ Fo mii tõodã: "Da yo ye, da kʋ ye, da zu ye, da kɩs kaset zĩrĩ ye, waoog f ba la f ma".

²¹ Rao wã yeelame tɩ yẽ saka bõn-kãensã fãa hal sẽn sɩng a yãadem wakate.

²² A Zezi sẽn wʋm woto, b yeel-a lame yaa: Bũmb a ye n ket n paoog foom. Koos fo sẽn tarã fãa n pʋɩ naong rãmba la f na n paama paoong arzãna. La f wa tũ maam.

²³ Yẽ sẽn wʋm bõn-kãnga, a sũurã sãama hal wʋsgo, bala yẽ ra tara arzegs wʋsgo.

²⁴ A Zezi sẽn yã t'a sũurã sãama wʋsgã, b yeelame: Ad na n yɩɩ toog ne neb nins sẽn tar arzegsã tɩ kẽ Wẽnnaam soolmẽ.

²⁵ Bala, yʋgemd sẽn na n tũ fu-pĩim yõorẽ n loog yaa naana n yɩɩd arzɛk soab sẽn na n kẽ Wẽnnaam soolmẽ.

²⁶ Neb nins sẽn da kelgd bãmbã yeelame tɩ rẽ, ãnna n tõe n paam fãagre.

²⁷ La a Zezi leokame tɩ ninsaalbã sẽn ka tõe bũmb ningã, Wẽnnaam tõeeme.

²⁸ La a Pɩyɛɛr yeelame yaa: Ade, tõnd basa d sẽn tarã n tũ yãmba.

²⁹ La a Zezi yeela bãmb yaa: Sɩd-sɩdã, mam yeta yãmba, tɩ ned ka be sẽn na n bas a yiri, a paga, a buudu, wall a kamba, Wẽnnaam soolmã yĩnga,

³⁰ n ka reeg wʋsg n yɩɩd a woto zamaan kãnga pʋgẽ, la a paam vɩɩm sẽn kõn sa zamaan ninga sẽn watã pʋgẽ ye.

³¹ A Zezi peega karen-biis piig la yiibã kɛɛng n yeel-b yaa: Ade, tõnd dabda Zeruzalɛm, la bũmb ninga fãa Wẽnnaam no-rɛɛsdbã sẽn da gʋls Ninsaal Bi-riblã yell wɛɛngẽ wã na n pidsame.

³² Bala, b na n yõka bãmb n kõ bu-zẽmsã. Bu-zẽmsã na n yaala bãmba, n gom bãmb wẽnga n tʋbs bãmb kolkoodo.

³³ La b na n pãba bãmb ne kalwaase n yaool n kʋ-ba. La ra-tãtẽ-daare bãmb na n vʋʋgame.

³⁴ La karen-biisa ka wʋm b gomda võor baa bilfu. Gom-kãensa rag n solga ne bãmba, la b ra ka mi gom kãng sẽn dat n yɛɛlg ye.

³⁵ A Zezi sẽn kolg Zeriko, zoang a ye n da zĩ sorã kɩreng n bõsdẽ.

³⁶ Yẽ wʋma kʋʋngã sẽn loogdã rãamde, a sokame n na n bãng sẽn ya bũmb ninga.

³⁷ La b togsa yẽ tɩ yaa Nazarɛt dao a Zezi n da loogde.

³⁸ La a kelmame n yeele: Zezi, a Daviid Bi-ribla, zoe-y mam nimbãanega!

³⁹ Neb sẽn da kẽnd taoorã lenga yẽ n dat t'a sĩndi. La a kelmame n yɩɩd pĩnda n yeel tɩ: Daviid bi-ribla, zoe-y mam nimbãanega.

⁴⁰ A Zezi yalsame n yeel tɩ b tall-a n wa. La a sẽn kolge, a Zezi sok-a lame:

⁴¹ Bõe la fo rat tɩ m maan n kõ-fo? Yẽ leokame tɩ: Zu-soaba, m dat n le paama m ninã.

⁴² La a Zezi yeela yẽnda : Leb n paam f nini. Fo tẽeb n fãag-fo.

⁴³ Wakat kãng bala, a ninã pukame t'a tũ a Zezi la a waoogd Wẽnnaam. Neba fãa sẽn yã rẽnda wã, b pẽga Wẽnnaam.

19

¹ A Zezi kẽe Zeriko, n pɩʋʋgd tẽngã,

² la dao a ye n da be be t'a yʋʋr boond t'a Zaase, a yaa arzɛk soaba n ya yaood-dɛɛgdbã naaba.

³ Yẽ ra baood n yãnda a Zezi n bãng b sẽn ya a soaba, la neb kʋʋngã yĩnga, a rag n ka tõe n yã-b ye, bala yẽ yaa rao-kʋɛɛga.

⁴ Dẽ, yẽ wudgame n kẽng taoor n tɩ rʋ wom-sɛɛg n na n ges a Zezi, bala b ra tog n tũu beene n looge.

⁵ La a Zezi sẽn ta zĩ-kãnga, bãmb nak n gesame n yeel a Zaase yaa: Zaase, sig tao-tao, bala mam tog n siga fo yirã rũnna.

⁶ A Zaase siga tao-tao n deeg a Zezi ne sũ-noogo.

⁷ Nebã sẽn yã rẽ, bãmb fãa yẽgmame n yetẽ t'a Zezi tɩ siga yel-wẽn-maand yiri.

⁸ La a Zaase yalsa Zu-soabã taoor n yeel-b yaa: Ade, Zu-soaba, mam na n yãka m paoongã pʋɩ-sʋk n kõ naong rãmba. La mam sã n dag n zãmba ned n deeg a bũmbu, m na n lebsa yẽnda naoor a naase.

⁹ A Zezi yeela yẽnda yaa: Fãagr waa yi-kãnga pʋg rũndã, tɩ bõe, nin-kãnga me ya a Abraham yagenga.

¹⁰ Bala Ninsaal Bi-ribla waame n na n bao bũmb nins sẽn da menema n fãag-ba.

¹¹ La neba sẽn kelg gom-kãense, a Zezi leb n wẽe bãmb yel-bũndi, tɩ bõe, bãmb da kolga Zeruzalɛm. La nebã ra tagsdame tɩ Wẽnnaam soolmã na n puka wakat kãng bala.

¹² Dẽ, a Zezi yeelame yaa: Na-biig a yembr n da yi n kẽng tẽng sẽn zãr n na n tɩ reeg naam la n wa.

¹³ Yẽ boola a tʋmtʋmdb piig n kõ-b min piig n yeel-b tɩ b yõdg n leeb n paam yõod hal tɩ yẽ lebg n wa.

¹⁴ La a soolmã neba ra kisa yẽnda, la b tʋma neb tɩ b pʋgl-a n tɩ yeel yaa: "Tõnd ka rat tɩ rao-kãnga soog tõnd ye."

¹⁵ La yẽ sẽn deeg naama n lebg n wa, a kɩtame tɩ b bool tʋmtʋmdb nins yẽ sẽn da kõ ligdã tɩ b wa, tɩ yẽ bãng ned kam fãa sẽn leeb n paam yõod to-to.

¹⁶ Pipi soabã waa n yeelame yaa: "Zu-soaba yãmb minna paama yõod min piiga."

¹⁷ A yeela yẽ yaa: "Be neere, tʋmtʋmd-sõngo, fo sẽn maan sɩd ne bũmb bilfã yĩnga, bɩ f soog tẽms piiga."

¹⁸ La yiib soabã waame n yeele: "Zu-soaba, yãmb minna doga min a nu."

¹⁹ A yeela yẽ yaa: "Fo me soog tẽms a nu."

²⁰ A to n waa n yeele: "Zu-soaba, ad yãmb minna! Mam dag n vil-a-la ne peend n bĩngi,

²¹ bala, mam da zoeta yãmba, yãmb sẽn ya nin-toaagã yĩnga. Yãmb dɩkda bũmb ninga y sẽn ka rɩgle, la y tigsd bũmb ninga yãmb sẽn ka bʋd ye."

²² Naabã yeela tʋmtʋmd kãng yaa: "Tʋmtʋmd-wẽnga, mam na n dɩka fo menga goam n kao fo bʋʋdo. Fo ra miime tɩ mam yaa nin-toaaga, tɩ mam dɩkda bũmb ning mam sẽn ka rɩgle, la m tigsd bũmb ning mam sẽn ka bʋd ye,

²³ dẽ, bõe yĩng tɩ fo ka bĩng mam ligdã bãnkẽ tɩ mam sã n lebg n wa bɩ m deeg-a ne yõodo?"

²⁴ La a yeela neb nins sẽn da be be wã tɩ b reeg min a yembrã a sẽn tarã n kõ ned ning sẽn tar-a min piigã.

²⁵ Bãmb yeela yẽ yaa: "Zu-soaba, yẽ tara min piiga."

²⁶ Mam yeta yãmb tɩ b na kõo ned ning sẽn tara, la ned ning sẽn ka tarã, b na n deega baa bũmb bilf ninga yẽ sẽn tarã.

²⁷ La sẽn keta, tall-y mam bɛɛbã sẽn da ka rat tɩ mam soog-bã n wa ne ka. Kood-y-b mam nifẽ.

²⁸ A Zezi sẽn gom a woto n sɛ, bãmb lʋɩɩ nebã taoor tɩ b rabd Zeruzalɛm.

²⁹ La bãmb sẽn kolg Bɛtfaaze ne Betani sẽn be tãng ninga sẽn boond tɩ oliiv tɩɩs tãngã sẽne, a Zezi tʋma b karen-biis a yiibu.

³⁰ N yeel-b yaa: Kẽng-y tẽng ninga sẽn be taoorã, y sã n ta be, y na n yãnda bõn-bil b sẽn loe, tɩ ned nan ka zomb-a. Lok-y-yã-a, n wa ne ka.

³¹ Ned sã n sok yãmb tɩ bõe yĩng tɩ y lokd-a, bɩ y yeel-a tɩ yaa Zu-soabã n dat-a.

³² Neb nins b sẽn da tʋma kẽngame n tɩ mik tɩ yaa wa a Zezi sẽn da yeel bãmbã bala.

³³ La bãmb sẽn lokd bõn-bilã, a soaalbã soka bãmb tɩ yaa bõe tɩ b lokd bõn-bilã.

³⁴ B leokame tɩ Zu-soabã dat-a lame.

³⁵ La b talla bõn-bilã n wa a Zezi nengẽ, n paal b fut a poorã n kɩt t'a Zezi zombe.

³⁶ La bãmb sã n kẽngdẽ, nebã yɛɛta b futã sorã zugu.

³⁷ Bãmb sẽn kolgd Zeruzalɛm, oliiv tɩɩs tãngã sigdg sẽne, bãmb karen-bi-kʋʋngã fãa sɩngame n zẽk b koees n pẽg Wẽnnaam ne sũ-noogo, bõn-bãna fãa bãmb sẽn yã wã yĩnga.

³⁸ Nebã da yetame tɩ yaa: Wẽnd na bark rĩm ninga sẽn wat ne Zu-soabã yʋʋrã! Laafɩ bee arzãna, la ziir bee hal yĩngri.

³⁹ Fariisẽ-dãmba kẽer sẽn dag n be neb kʋʋngã sʋk yeela a Zezi tɩ b leng b karen-biisã tɩ b sĩndi.

⁴⁰ A Zezi leokame yaa: Mam yeta yãmb tɩ b sã n sĩndi, kugã na n kelmame!

⁴¹ Bãmb sẽn kolg Zeruzalɛm, a Zezi sẽn yã tẽngã, b yãba a yĩng n yeele:

⁴² Fo me sã n da bãngẽ bũmb ninga sẽn wat ne fo laafɩ wã rũnna! La moasã b solga ne foom.

⁴³ Wakat n wat tɩ fo bɛɛba na n me bõn-yood n gilg foom. B na n gũbga foom n dɩdg-f zĩiga fãa.

⁴⁴ B na n sarma foom ne f kambã sẽn be fo pʋgẽ wã, la b kõn bas kugr baa yembr kugr a to zug fo pʋgẽ ye, fo sẽn ka bãng wakat ninga fo fãagrã sẽn wa wã yĩnga.

⁴⁵ A Zezi kẽe wẽnd-doogẽ wã n sɩng n dig koaasdbã,

⁴⁶ n yeel-b yaa: A gʋlsame tɩ: "Mam doogã na n yɩɩ pʋʋsg roogo, la yãmba, y maan-a lame t'a lebg wagda geongo."

⁴⁷ A Zezi da zãmsda nebã daar fãa wẽnd-doogã pʋgẽ. La maan-kʋʋdbã kãsem-dãmba ne gʋlsdbã la tẽngã kãsem-dãmb dag n baood n na n kʋʋ bãmba.

⁴⁸ La bãmb da ka mi b sẽn na n maan to-to ye, tɩ bõe nebã fãa ra yong n kelgda a Zezi.

20

¹ Ra-kãense, daar a yembre, a Zezi sẽn zãmsd nebã wẽnd-doogẽ wã la b moond koe-noogã, maan-kʋʋdba kãsem-dãmba, la gʋlsdba ne kãsem-dãmbã waame.

² La b yeela a Zezi yaa: Togs-y tõndo: Yaa ne no-bʋg la yãmb maand bõn-kãensã, wall ãnna n kõ yãmb no-kãnga.

³ A Zezi leok-b lame yaa: Mam me na n soka yãmb sokre.

⁴ Togs-y maam: A Zã lisgã yii arzãn bii, bɩ yaa ninsaalb nengẽ?

⁵ La bãmb yẽsa ne taab n yeele: Tõnd sã n yeel t'a yii arzãna, b na n yeelame tɩ la yaa bõe tɩ tõnd ka tẽ a Zã,

⁶ la tõnd sã n yet t'a yii ninsaalb nengẽ, neba fãa na n loba tõnd kuga, bala neba tẽeda hakɩɩk t'a Zã yaa Wẽnnaam no-rɛɛsa.

⁷ Dẽ bãmb leokame tɩ b ka mi lis-kãng sẽn yi zĩig ning ye.

⁸ A Zezi yeel-b lame yaa: Mam me ka na n togs yãmb mam sẽn paam noorã zĩig ninga n maand bõn-kãensã ye.

⁹ La a Zezi sɩngame n wẽ neba yel-bũn kãnga n yeele: Dao a ye n da sel nasaar sib pʋʋgo, n dɩk-a n peng nasaar sib koaadba, la a yi n tog sor n na n tɩ kaoose.

¹⁰ La bõn-bɩʋʋng sẽn ta, a tʋma tʋmtʋmd nasaar sib koaadbã nengẽ tɩ b kis-a nasaar sib biis t'a wa n kõ-a. La nasaar sib koaadbã pãba yẽnda n lebs-a t'a kuil nug-zaala.

¹¹ Yẽ leb n tʋma tʋmtʋmd a to Yɛsa. La koaadbã pãba yẽnda n paoog-a n lebs-a t'a kuil nug-zaala.

¹² Yẽ leb n tʋma tãabẽ soaba, la b pogla yẽnda n dig-a.

¹³ La nasaar sib pʋʋgã soab yeelame yaa: "Mam na n maana bõe? Mam na n tʋma m bi-ribl-nongrã tɩ tõeeme tɩ b waoog-a."

¹⁴ La nasaar sib koaadbã sẽn yã biigã, b yẽsa ne taab n yeele: "Yaa yõwã n na n soog a ba wã paoongã."

¹⁵ La b yõka yẽ n yiis nasaar sib pʋʋgẽ wã n kʋ-a. Moasã nasaar sib pʋʋgã soab na n maan-b-la bõe?

¹⁶ A na n waame, n sãam koaadb-kãense, la a rɩk pʋʋgã n peng koaadb a taaba. La nebã sẽn wʋm bõn-kãnga, b yeelame tɩ: Bɩ ra yɩ a woto ye.

¹⁷ La a Zezi gesa bãmb n yeel yaa: Gʋlsg sõngã sẽn yeel tɩ: "Kugr ning tãn-metbã sẽn zãgsã lebga roogã pãng kugri, a soaka zĩigẽ wã" võor yaa bõe?

¹⁸ Ned ninga sẽn na n lʋɩ-a kug-kãnga zug na n tõtmame, la kug-kãnga sẽn na n lʋɩ ned ninga zugu, a na n beds-a lame.

¹⁹ Maan-kʋʋdbã kãsem-dãmb ne tõog karen-saam-dãmbã baoome tɩ yõk a Zezi wakat kãng bala, la bãmb zoee nebã. B ra bãngame tɩ yaa bãmb yĩng la a Zezi sẽn wẽ yel-bũn kãngã wã.

²⁰ Bãmb sɩngame n gũusd a Zezi, sẽn na yɩl n paam a Zezi gomd n bẽd-b n yõk n tɩ kɩs pãn-soaadbã ne Gʋvɛrneerã sẽn so noorã.

²¹ Nin-kãens soka a Zezi a woto: Karen-saamba, tõnd miime tɩ yãmb gomda tɩrlem la y zãmsd nebã ne tɩrlem, la tɩ yãmb ka tũusd neb ye. La yãmb zãmsda nebã Wẽnnaam sor wa sẽn zems sɩdã.

²² Tõogã kõta tõnd noor tɩ d yao Sezaar yõor yaood bɩ a ka kõta?

²³ La a Zezi sẽn bãng bãmb sɩlma leok-b lame yaa:

²⁴ Wilg-y maam lagfo. Maasmã ne gʋlsemã sẽn be a zugã yaa ãnna rẽnda? Tɩ b leok tɩ Sezaar.

²⁵ Dẽ, a Zezi yeela bãmb yaa: Rẽ wã, kõ-y Sezaar bũmb ning sẽn ya Sezaar dẽnda, la y kõ Wẽnnaam bũmb ning sẽn ya Wẽnnaam dẽnda.

²⁶ Bãmb ka tõog n yõk a Zezi b gomd baa a yen pʋgẽ nebã taoor ye. La a Zezi leokrã yɛɛs-b lame tɩ b sĩndi.

²⁷ Saduusẽ-dãmba sẽn yet tɩ kũum vʋʋgr ka be wã neb kẽer kolgame n sok a Zezi a woto:

²⁸ Karen-saamba, a Moyiis dag n gʋlsame n yeel tõnd tɩ: "Ned ba-biig sã n tar pag n ki n bas-a n ka paam biiga, bɩ yẽ peeg pagã n dog kamb a ba-biigã yĩnga."

²⁹ La raop a yopoe n dag n be n ya ba-biisi. La kãsma peega paga la a kiime n ka paam biig ye.

³⁰ La yiib soabã reega pʋgkõorã, n ki n bas-a tɩ tãab soaba reeg-a.

³¹ La a yɩɩ woto ne bãmb b yopoe wã fãa, b kiime n ka paam kamb ye.

³² La pagã me yaool n kiime.

³³ Kũum vʋʋgr daare, bãmb sʋkã, yẽ na n yɩɩ ãnna soab paga? Bala yẽnda rag n yɩɩ neb a yopoe wã paga.

³⁴ A Zezi leoka bãmb yaa: Dũni kãnga nebã peegda pagba tɩ pagba kuiis sɩdba,

³⁵ la neb nins b sẽn na n mik tɩ b zemsame tɩ zĩnd dũni ning sẽn watã pʋgẽ wã la tɩ vʋʋg n bas kũumã ka na n le peeg pagba, wala kuil sɩdb ye.

³⁶ Bãmb ka tõe n leb n ki yɛs ye, tɩ bõe, b na n yɩɩ wa malegse, la b na n yɩɩ Wẽnnaam kamba, bãmb sẽn vʋʋg n bas kũumã yĩnga.

³⁷ Zĩig ning b sẽn gomd tuugã bugma sẽn be a zugã yellã, a Moyiis wilgame tɩ kũum vʋʋgdame, yẽ sẽn boond Zu-soabã t'a Abraham ne a Izak la a Zakob Wẽnnaamã.

³⁸ La Wẽnnaam ka kũum Wẽnnaam ye, b yaa nin-vɩɩs Wẽnnaam. Bala ne bãmba neba fãa vɩɩme.

³⁹ Gʋlsdb kẽer leokame yaa: Karen-saamba, yãmb goma sõama.

⁴⁰ La bãmb ka saag n le sok a Zezi sokr a to yɛs ye.

⁴¹ A Zezi sok-b lame yaa: B tõe n yɩɩ a wãn n yeel tɩ Kirist yaa a Daviid yagenga?

⁴² A Daviid meng yeela yɩɩn-sõamyã sebr pʋgẽ tɩ: "Zu-soaba yeela mam Zu-soaba yaa: Zĩnd mam dɩtgo,

⁴³ hal tɩ m kɩt f bɛɛba yɩ fo nao roagendga."

⁴⁴ Dẽ, a Daviid boonda bãmb tɩ Zu-soaba, woto bãmb na n yɩɩ a wãn n yaa a yagenga?

⁴⁵ La nebã fãa sẽn kelgd a Zezi, bãmb yeela b karen-biisã yaa:

⁴⁶ Gũus-y y mens ne gʋlsdbã sẽn nong n gõod ne fu-wogdo, n nongẽ tɩ neba pʋʋsd bãmb raasẽ, la b baood n zĩnd waoogr goeels zut karen-dotẽ, la rɩɩb zĩisẽ wã.

⁴⁷ Bãmb deesda pʋgkõapã paoong zãnga la b pʋʋsd pʋʋs-wogd nebã nin gesg yĩnga. Bãmb na n paama sɩbgr sẽn ya toog n yɩɩda.

21

¹ A Zezi zẽka b neng n ges arzegsã rãmb sẽn da ningd b kũunã ligdã ningr zĩigẽ.

² Bãmb yãa pʋgkõor a yen me sẽn ya naong soab t'a ningd tãma a yiib beene.

³ La a Zezi yeelame yaa: Mam yeta yãmb sɩd-sɩd tɩ pʋgkõ-kãngã sẽn ya naong soabã ningame n yɩɩd neb a taabã fãa.

⁴ Bala, nin-kãensã ned kam fãa tʋm n yãka a paoong a sẽn tar tɩ loogã pʋgẽ n ning ligdã ningr zĩigẽ, la pʋgkõorã ninga a sẽn tarã fãa, hal baa a rɩɩbã ligd zãnga.

⁵ La neb kẽer sẽn dag n gomd wẽnd-doogã yell n wilgd tɩ b nags-a-la ne kug-neebã, la teedã neb sẽn tall n wa n kõ Wẽnnaamã, a Zezi yeelame yaa:

⁶ Day n wate, tɩ bũmb ningã yãmb sẽn ne wã, kugr baa a yen kõn pa a to zug b sẽn kõn leeb n lub ye.

⁷ Bãmb soka a Zezi yaa: Karen-saamba, dẽ, bõn-kãens na n waa dabʋre, la bõe bãnd n na n wilg bõn-kãens waoongo?

⁸ A Zezi leokame yaa: Gũus-y tɩ ned ra belg yãmb n tõog ye. Bala, neb wʋsg n na n dɩk mam yʋʋr n wa n yeel tɩ bãmb la Kirist, la tɩ wakat kolgame. Da tũ-y-b ye.

⁹ La yãmb sã n wa wʋm tɩ b gomd zabre, la tẽn-dãmbg yelle, bɩ y ra zoe rabeem ye. Bala, bõn-kãens tog n deng n waame, la ka dũniyã saab nand ye.

¹⁰ Dẽ, a Zezi yeel-b lame: Tẽng a yembr na yika zabr ne tẽng a to, la rĩung a yen na n yika ne rĩung a to.

¹¹ Tẽn-digimdg kãsems na n zĩndame, la bã-longds ne kom na n zĩnda zĩig zĩiga, la yel-kãsems sẽn kẽesd rabeem ne bõn-bãn sẽn yit yĩngr na n zĩndame.

¹² La sẽn deng bõn-kãens fãa, b na n yõga yãmba, n nams-yã. B na n yõga yãmb n tall n kẽng karen-dotẽ, b na n kẽesa yãmb bi-bees roto, b na n tall-y lame n kẽng rĩm-dãmb ne Gʋvɛrneer dãmb taoor mam yʋʋrã yĩnga.

¹³ Na n tũu ne rẽnda tɩ yãmb kɩs bãmb mam kaseto.

¹⁴ Dẽ wã, ning-y y yamẽ, n da reng n tags y sẽn na n tɩ gom bũmb ning n fãag y meng ye.

¹⁵ Bala, mam na n ninga goam y noorẽ, la m kõ-y yam, la yãmb bɛɛbã fãa baa a yen kõn tõog n kɩɩs wall b wẽ nokoeemd ye.

¹⁶ Baa yãmb ba-rãmba, la y ba-biisi, la y roagdba, la y zo-rãmb mens na n yõga yãmb n kɩse, la b na n kʋʋ yãmb neb kẽere.

¹⁷ Nebã fãa na n kisga yãmb mam yʋʋrã yĩnga.

¹⁸ La yãmb zug zoobg baa a yen kõn menem ye.

¹⁹ Yãmb sã n yals kãenkãe, y na n fãaga y mense.

²⁰ Dẽ, yãmb sã n wa n yã sodaas sẽn gũbg Zeruzalɛm, bɩ y bãng t'a sãoongã kolgame.

²¹ Dẽ, bɩ neb nins sẽn na n be Zude wã zoe n dʋ tãmse, tɩ neb nins sẽn be Zeruzalɛm tẽngã pʋgẽ wã zoe n yi, la tɩ neb nins sẽn na n be-b wetẽ da kẽ tẽngã pʋgẽ ye.

²² Bala, ra-kãens na n yɩɩ sũ-dokr rayã, tɩ bũmb nins fãa b sẽn gʋlsã na paam pidsgu.

²³ Pagb nins sẽn tʋtã, la sẽn yẽsemd kamb ra-kãens daarã na n paama toogo. Bala, to-kãseng n na n zĩnd soolmã pʋgẽ, la Wẽnnaam sũ-puugr na n lʋɩɩ nin-kãens zutu.

²⁴ Zabr sʋʋg n na n kʋ bãmba, la b na n yõga bãmb n maan yemse, n tall n kẽng buudã fãa sʋka. La bu-zẽms na n sooga Zeruzalɛm ne pãng hal tɩ b wakatã pidi.

²⁵ Bãn na n zĩnda wĩndgẽ, la kiuugẽ, la ãdsẽ, la tẽngã zugu, ko-kãsengã bʋrgã, la a ko-pɛmã na n yɛɛsa buud toay-toayã tɩ b ka mi b sẽn na n maan bũmb ning ye.

²⁶ Rabeem na n kʋʋ ninsaalba, bãmb sẽn gũud bũmb ning sẽn na n wa dũni zugã yĩngã. Bala, yĩngr pãens na n digimdame.

²⁷ Dẽ, b na n yãa Ninsaal Bi-riblã sẽn zao sawadg n wat ne pãnga la ne ziiri.

²⁸ La bõn-kãens sã n sɩng n watẽ, bɩ y roog la y nak n gese, tɩ bõe, yãmb fãagrã kolgame.

²⁹ La a Zezi wẽe bãmb yel-bũnd n yeele: Ges-y kankanga, la tɩɩsã fãa.

³⁰ Yãmb sã n yã b sẽn tobda, yãmb mens miime tɩ sigr zoe n kolgame.

³¹ Woto me, yãmb me sã n wa n yã tɩ bũmb kãensã maandame, bɩ y bãng tɩ Wẽnnaam soolmã kolgame.

³² Sɩd-sɩdã, mam yeta yãmb tɩ neb nins sẽn vɩ moasã wã fãa kõn ki tɩ bõn-kãensã ka pids ye.

³³ Yĩngr la tẽng na looge, la mam goamã kõn tol n loog ye.

³⁴ Gũus-y y mens tɩ rɩ-n-tɩk wall rã-tɩgre, la vɩɩmã yɛl yɩɩr da wa n zɩsg yãmb sũyã ye, la tɩ ra-kãng ra wa n ling yãmb

³⁵ wa zĩm-gãmbre, bala, ra-kãng na n waa n linga neb nins fãa sẽn be tẽn-gãongã fãa zugã.

³⁶ Dẽ yĩnga, bɩ y neend la y pʋʋs wakat fãa tɩ y tõe n paam pãng n põs bũmb nins fãa sẽn tog n wa wã, la y tõog n yals Ninsaal Bi-riblã taoore.

³⁷ A Zezi da zãmsda nebã wẽnd-doogẽ wã wĩndga, la yʋngo bãmb kẽnd n gãee tãng ning b sẽn boond tɩ oliiv tɩɩs tãnga zugu.

³⁸ La nebã fãa kẽngda bãmb nengẽ wẽnd-doogẽ wã, sẽn sɩng ne yibeoogo, n na n tɩ kelg bãmba.

22

¹ Bur sẽn ka rã-bɩll kibsa, b sẽn boond tɩ zʋʋg-n-basã da kolgame.

² Maan-kʋʋdbã kãsem-dãmba ne tõog karen-saam-dãmbã dag n baooda b sẽn na n maan to-to n kʋ a Zezi. Bala, b ra zoeta nebã.

³ La a Sʋtãan kẽe a Zudas, b sẽn boond tɩ Iskaryo, sẽn dag n ya neb piig la a yiibã ned a yembrã.

⁴ La a Zudas kẽngame n tɩ yẽs ne maan-kʋʋdbã kãsem-dãmbã la ne wẽnd-doog gũudbã kãsem-dãmbã, n bao a sẽn na n tũ sor ning n yõk a Zezi n kõ-ba.

⁵ Bãmb sũyã yɩɩ noogo, tɩ b sar tɩ bãmb na n kõo a Zudas ligdi.

⁶ La yẽ sakame, n sɩng n baood weer ning yẽ sẽn na n yõk a Zezi n kõ-ba, tɩ kʋʋngã ka bãng ye.

⁷ Bur sẽn ka rã-bɩllã raare, daar ning b sẽn da tog n kʋ zʋʋg-n-basã pe-bilã taame.

⁸ La a Zezi tʋma a Pɩyɛɛr ne a Zã n yeel-b yaa: Kẽng-y n tɩ segl-y Zuif-rãmbã zʋʋg-n-basã rɩɩb tõnd yĩng tɩ d rɩ-a.

⁹ Bãmb soka a Zezi tɩ yɛɛne la bãmb dat tɩ b tɩ segl zʋʋg-n-basã.

¹⁰ A Zezi leok-b lame yaa: Ade, yãmb sã n kẽ tẽngã pʋgẽ, yãmb na n sega rao sẽn tʋk koom ne yʋʋre. Tũ-y-yã-a n kẽ yir ning a sẽn na n kẽ wã.

¹¹ Yeel-y yirã soab yaa: "Karen-saamb sokdame tɩ roog ning bãmb sẽn na n dɩ zʋʋg-n-basã kibs ne b karen-biisã bee yɛ?"

¹² La yẽ na n wilga yãmb do-pʋg sẽn ya yalenga n be roog zugu, tɩ teedã fãa be be, yaa be la y na n segl zʋʋg-n-basã.

¹³ Bãmb kẽngame, n tɩ mik tɩ bũmba fãa yaa wa a Zezi sẽn dag n yeel bãmbã, la b segla zʋʋg-n-basã.

¹⁴ Wakat sẽn ta, a Zezi zĩnda ne tẽn-tʋmdbã n na n dɩ.

¹⁵ A Zezi yeel-b lame yaa: Mam tʋlga ne m sũur fãa n dɩ zʋʋg-n-bas kãngã ne yãmba, sẽn deng m namsgã.

¹⁶ Bala, mam yeta yãmb tɩ mam kõn leb n dɩ-a yɛsa, hal t'a pids Wẽnnaam soolem pʋgẽ.

¹⁷ A Zezi rɩka bõn-yũudla n ning bark n yeele: Deeg-y bõn-yũudl-kãngã n pʋɩ ne taaba.

¹⁸ Bala, mam yeta yãmb tɩ sẽn sɩng ne moasã, mam kõn leb n yũ nasaar sib koom yɛsa, hal tɩ Wẽnnaam soolmã wa.

¹⁹ Dẽ poore, a Zezi rɩka bur n ning bark n yaool n kao-a n kõ karen-biisã n yeele: Ada yaa mam yĩnga, b sẽn kõ yãmb yĩnga. Bɩ y maand bõn-kãnga n tẽegd mam yelle.

²⁰ Woto me, bãmb sẽn dɩ n sɛ, a Zezi rɩka bõn-yũudlã n kõ-b n yeele: Bõn-yũudl kãngã yaa kãab paalga, mam zɩɩmã sẽn daag yãmb yĩngã maasem yĩnga.

²¹ Baoosgo, ade, ned ning sẽn zãmbd-a maamã naaga maam ka n dɩtẽ.

²² Ninsaal Bi-riblã na n kii wa Wẽnnaam sẽn yãk yam to-to wã. La ned ning sẽn na n zãmb-a bãmbã na n paama toogo.

²³ La karen-biisã sɩngame n sokd taab n dat n bãng sẽn ya ned ning bãmb sʋkã n na n maan yel-kãngã.

²⁴ Karen-biisã wẽe nokoeemd ne taab wʋsg n dat n bãng ned ning b sẽn tog n ges wa kãsem bãmb sʋkã.

²⁵ A Zezi yeel-b lame: Soolem dĩm-dãmbã soo nebã ne pãnga, la sẽn tar-b noor ne nebã kɩtdame tɩ b boond bãmb tɩ tʋʋm neer maandba.

²⁶ La a ka a woto ne yãmb ye. Sẽn ya-a kãseng n yɩɩd yãmb sʋka, bɩ a yɩ wa yao-zʋʋga, tɩ ned ning sẽn ya-a taoor soab yɩ wa tʋmtʋmda.

²⁷ Bala, ned ning sẽn zĩ n dɩtẽ wã la kãseng n yɩɩd bii, bɩ yaa ned ning sẽn kɩt-a rɩɩbã? La baoosgo, mam bee yãmb sʋk wa rɩ-kɩta.

²⁸ Yãmba, yãmb yaa neb sẽn kell n modg n pa ne maam m makrã pʋgẽ.

²⁹ Yaa rẽnd n kɩt tɩ mam kõt yãmb soolmã, wa m ba sẽn kõ-a maamã,

³⁰ tɩ yãmb tõe n zĩnd ne maam m soolmã pʋgẽ n dɩ la y yũ, la y zaoond gɛy zut n kao Israyɛl buud piig la a yiibã bʋʋdo.

³¹ Zu-soabã yeelame yaa: Sɩmo! Sɩmo a Sʋtãan kosame n na n yelg yãmb wa b sẽn yelgd koodo.

³² La mam pʋʋsa fo yĩnga, tɩ f tẽeba ra wa paoog ye. La fo sã n lebg n wa mam nengẽ, bɩ f paas f ba-biisã raoodo.

³³ A Pɩyɛɛr yeelame yaa: Zu-soaba, mam seglame n sɛ tɩ kẽ bi-bees roog ne yãmba, wall tɩ ki ne yãmba.

³⁴ La a Zezi yeel-a lame yaa: Pɩyɛɛr, mam yeta foom tɩ rũnna, no-raoog kõn kelem tɩ fo ka kɩɩs noor a tãab tɩ f ka mi maam ye.

³⁵ A Zezi leb n yeela b karen-biisã yaa: Mam sẽn tʋm yãmb tɩ y ka zɩ ligdi wall korgo, wall neooda wã, bũmb paooga yãmba? B leokame tɩ baa fɩ.

³⁶ La a Zezi yeel-b lame: Moasã, ka le yaa a woto ye. Bɩ ned ning sẽn tar ligd korg rɩk-a, tɩ ned ning me sẽn tar korg rɩke. La ned ning sẽn ka tar zabr sʋʋga, bɩ a koos a fuug n da a yen.

³⁷ Bala, mam yeta yãmb tɩ bũmb ning b sẽn gʋls n yeel tɩ "b naaga bãmb ne tʋʋm-wẽns maandbã" tog n pidsa mam zugu. La bũmb ning sẽn gʋls n gomd mam yellã kolga pidsgu.

³⁸ Karen-biisã yeela a Zezi tɩ ad zabr sʋʋs a yiibu. La a Zezi yeel-b lame tɩ rẽ sekame.

³⁹ A Zezi yiime n kẽng oliiv tɩɩs tãngẽ wã, wa bãmb sẽn minim n maandẽ wã. La karen-biisã tũu bãmba.

⁴⁰ Bãmb sẽn ta zĩ-kãnga, a Zezi yeela b karen-biisã tɩ b pʋʋs n da wa n lʋɩ makr pʋgẽ ye.

⁴¹ La bãmb zãag n basa karen-biisã, sẽn zems kugr lobgre, n tɩ yĩgimd n pʋʋs

⁴² n yeel yaa: M ba, yãmb sã n data, bɩ y zãag bõn-yũudl kãngã ne maam. Baoosgo, bɩ y ra maan mam sẽn datã ye, maan-y y raabo.

⁴³ Dẽ, malɛk yii arzãn n puk a meng ne bãmba n paas bãmb pãnga.

⁴⁴ La sũ-sãoong-kãseng yõka a Zezi, la bãmb pʋʋsa ne pãng n yɩɩd pĩnda, la b tʋʋlgã lebga wa zɩ-pɛla, n lasd tẽnga.

⁴⁵ Bãmb basa b pʋʋsgã n yik n wa b karen-biisã nengẽ n mik tɩ b gõeeme, sũ-sãoongã yĩnga.

⁴⁶ La a Zezi yeel-b lame yaa: Bõe yĩng tɩ yãmb gõe? Yik-y n pʋʋs-y n da wa n lʋɩ makr pʋgẽ ye.

⁴⁷ Bãmb sẽn dag n nan ket n gomda, ad neb kʋʋng sẽn be taabẽ! La ned ning b sẽn boond t'a Zudas, n ya karen-biis piig la yiibã ned a yembrã dag n lʋɩɩ bãmb taoore. Yẽ kolga a Zezi n mok-ba.

⁴⁸ A Zezi yeela yẽ yaa: Zudas, yaa ne mokr la fo na n yõk Ninsaal Bi-riblã n kõ laa?

⁴⁹ Neb nins sẽn dag n be ne a Zezi wã yãa bũmb ning sẽn na n maanã, la b soka a Zezi yaa: Zu-soaba, d kɛ-b ne sʋʋse?

⁵⁰ Karen-biisã ned a yembr kɛɛ maan-kʋʋdbã kãsem tʋmtʋmd n fiuug a dɩtg tʋbre.

⁵¹ La a Zezi gomame n yeel yaa: Bas-y-yã a woto. La a Zezi tika rao wã tʋbr n maag-a.

⁵² Dẽ poore, a Zezi yeela maan-kʋʋdbã kãsem-dãmbã ne wẽnd-doog gũudbã nanamsã la kãsem-dãmbã sẽn dag n na n yõk bãmbã yaa: Yãmb waa mam nengẽ ne sʋʋse la ne rasab wa m yaa fãada.

⁵³ Mam dag n bee wẽnd-doogẽ wã daar fãa ne yãmba, la y ka yõkd maam ye. La wakat kãngã yaa yãmb rẽnda la likã pãng wakate.

⁵⁴ B yõka a Zezi n tall-b n kẽng maan-kʋʋdbã kãsem yiri. A Pɩyɛɛr dag n pʋgda yɩɩg-yɩɩga.

⁵⁵ Nebã yõgna bugum zaka sʋka, n zĩndi. La a Pɩyɛɛr zĩnda ne bãmba.

⁵⁶ Tʋmtʋmd-poak a yen sẽn yã a Pɩyɛɛr t'a zĩ bugmã vẽenemẽ, a ges-a-la kuii n yeele: Rao-kãnga me rag n bee ne a Zezi.

⁵⁷ La a Pɩyɛɛr kɩɩsame n yeele: Paga, mam ka mi a Zezi ye.

⁵⁸ Sẽn yɩ bilfu, ned a to yãa a Pɩyɛɛr n yeele: Fo me yaa bãmb ned a yembre. La a Pɩyɛɛr yeela rao wã yaa: Mam ka bãmb ned ye.

⁵⁹ Sẽn zems lɛɛr a yembr rẽ zugẽ, ned a to leb n yeelame: Hakɩɩka! Rao-kãngã rag n bee ne bãmba. Bala, yẽ yaa Galile neda.

⁶⁰ A Pɩyɛɛr leokame: Hey! Mam ka mi bũmb ninga fo sẽn gomd a yellã ye. Wakat kãng bala, yẽ sẽn ket n gomda, no-raoog kelmame.

⁶¹ Zu-soaba wẽnemdame n ges a Pɩyɛɛr. La a Pɩyɛɛr tẽega gomd ning bãmb sẽn dag n yeel yẽnda wã: Sẽn deng no-raoog sẽn na n kelem rũnna, fo na n kɩɩsa naoor a tãab tɩ f ka mi maam ye.

⁶² A Pɩyɛɛr yii yɩng n yãb ne sũ-sãoong wʋsgo.

⁶³ Raop nins sẽn da gũud a Zezi wã yaala bãmba, n pãb-ba.

⁶⁴ Bãmb da loeta a Zezi nengã ne peend n yet-b yaa: Bãng-bãnge, ãnna n wẽ yãmbã?

⁶⁵ La bãmb tʋʋ a Zezi ne tʋɩy a taab wʋsgo.

⁶⁶ La beoogã sẽn vẽege, tẽngã nin-kẽembã sull ne maan-kʋʋdbã kãsem-dãmb la tõog karen-saam-dãmbã tigma taab n kɩt tɩ b tall a Zezi n wa bãmb kaoreng yɛl bʋ-bʋʋdbã taoore.

⁶⁷ B yeela a Zezi yaa: Yãmb sã n yaa Kiristã, bɩ y yeel tõndo. A Zezi leok-b lame n yeele: Mam sã n yeel yãmba, y kõn tẽ maam ye.

⁶⁸ La m sã n sok yãmb bũmbu, y kõn leok-m ye.

⁶⁹ Sẽn sɩng moasã, Ninsaal Bi-riblã na n zĩnda pãng soab a Wẽnnaam rɩtgo.

⁷⁰ Bãmb fãa sokame: Rẽnd yãmb yaa Wẽnnaam biig wɛ? La a Zezi leok-b lame: Yaa wa yãmb sẽn yeelã: "Mam yaa woto."

⁷¹ Dẽ, bãmb yeelame: Yaa bõe kaset la tõnd leb n baoodẽ? Tõnd mens wʋma bãmb noor goama.

23

¹ Bãmb fãa yikame n tall a Zezi n kẽng a Pilat taoore.

² B sɩngame n dõd a Zezi n yeel yaa: Tõnd yãa rao-kãnga t'a rãmbd tõnd tẽngã n yetẽ tɩ b ra yao a Sezaar yõor yaood ye. La a yetẽ tɩ yẽ menga yaa Kiristã, la rĩma.

³ A Pilat soka a Zezi a woto: Yãmb yaa Zuif-rãmba rĩma? T'a Zezi leok-a: Yaa wa yãmb sẽn yeelã.

⁴ A Pilat yeela maan-kʋʋdba kãsem-dãmb ne neb kʋʋngã tɩ yẽ ka yã bõn-wẽng ne rao-kãngã sẽn na kɩt tɩ b sɩbg-a ye.

⁵ La nebã kẽnga taoor n kell n yeel yaa: Zãmsgã bãmb sẽn sɩng Galile n Zãms nebã Zude fãa hal tɩ ta ka wã wata ne rãmbg nebã sʋka.

⁶ A Pilat sẽn wʋm bõn-kãnga, yẽ sokame n dat n bãng rao wã sã n yaa Galile neda.

⁷ La a Pilat sẽn wʋm t'a Zezi yaa Herood soolma neda, a tʋma bãmb a nengẽ. A Herood me rag n bee Zeruzalɛm wakat kãnga.

⁸ Herood sẽn yãnd a Zezi, a paama sũ-no-kãsenga, bala, yẽ rag n wʋmame tɩ b gomd b yelle, la hal daar zãra, yẽ rag n dat n yãa a Zezi. La a rag n tẽedame t'a Zezi na n maana bõn-bãnd t'a yãnde.

⁹ Herood soka bãmb bũmb wʋsgo, la a Zezi ka leok yẽ tɩ bũmb ye.

¹⁰ Maan-kʋʋdbã kãsem-dãmbã ne tõog karen-saam-dãmba yalsa be n dõd a Zezi b pãng tɛka.

¹¹ Herood ne a sodaasã paooga a Zezi, n yaal-ba, n yeelg-b fu-neere la a lebs-b a Pilat nengẽ.

¹² Badaar bala, a Pilat ne Herood sẽn dag n ya beemã lebga zoodo.

¹³ A Pilat tigma maan-kʋʋdba kãsem-dãmba la nanamse ne nebã

¹⁴ n yeel-b yaa: Yãmb talla rao-kãnga n wa mam nengẽ n yeel t'a yaa tẽn-dãmbda. Ade, mam sok-a-la yãmb taoore la mam ka yã t'a maana tʋʋm-wẽns nins yãmb sẽn dõt-a wã ba a yembr ye.

¹⁵ Herood me ka yã bõn-wẽng ne-a ye, bala, bãmb lebs n tʋm-a-la tõnd nengẽ. Ade, rao-kãnga ka maan bũmb sẽn tog ne kũum ye.

¹⁶ Dẽ, mam na n kɩtame tɩ b sɩbg-a-la m bas-a.

¹⁷ Kibs fãa, rag n yaa tɩlɛ t'a Pilat yiis bi-bɛɛg a ye n bas n kõ nebã.

¹⁸ Bãmb fãa naaga taab n kelem n yeel tɩ b kʋ rao-kãnga la b yiis a Barabas n kõ-ba.

¹⁹ B ra kẽesa a Barabas bi-bees roogẽ tẽn-dãmbg sẽn dag n zĩnd tẽngã pʋgẽ wã poorẽ, la a sẽn kʋ ned yĩnga.

²⁰ A Pilat leb n goma ne nebã, n dat n bas a Zezi.

²¹ La nebã ra kelemdame n yetẽ: Ka-y-b da-pɩk zugu! Ka-y bãmb da-pɩk zugu!

²² A Pilat leb n yeela bãmb naoor a tãab soab yaa: La bãmb maana bõe sẽn ya wẽnga? Mam ka yã bũmb b sẽn maane, n tog kʋʋb ye. Dẽ wã mam na n kɩtame tɩ b sɩbg-ba la m bas-ba.

²³ La neba zẽka b koees wʋsg n kos tɩ b ka a Zezi da-pɩk zugu. La b kelemsã tõogame t'a Pilat tũ b sẽn datã.

²⁴ A Pilat kaoo bʋʋdã tɩ yɩ wa nebã sẽn kosã.

²⁵ Yẽ basa ned ninga nebã sẽn kosã, a soab b sẽn dag n kẽes bi-bees roog tẽn-dãmbgo, la nin-kʋʋr yĩngã. La a rɩk a Zezi n kɩs-b tɩ b maan b sẽn dat ne-ba.

²⁶ La bãmb sẽn tall a Zezi n loogdẽ, bãmb yõka dao a yen sẽn yi weoogẽ n kuiisẽ. A yʋʋr la Sɩmo. B kɩtame t'a tʋk da-pɩkã n pʋg a Zezi.

²⁷ Neb kʋʋng wʋsgo, raop la pagb dag n pʋgda a Zezi. La pagbã da yãbdame, n wiisdẽ, n pĩisd b gɛy a Zezi yĩnga.

²⁸ A Zezi wẽnegame n yeel pagbã yaa: Zeruzalɛm pagba, da yãb-y mam yĩng ye. Yãb-y y mense, la y kamb yĩnga.

²⁹ Bala, bãng-y tɩ ray n wate, tɩ b na n yeel tɩ pʋg-kiyã la sẽn ka tol n dog-bã, la sẽn ka yẽsem-b kambã n tar sũ-noogo.

³⁰ La nebã na n sɩng n yeela tãmsa tɩ b sirg n põd-ba, la b yeel kũnkuba tɩ b lill bãmba.

³¹ Bala, b sã n maand ra-maas a woto, b na n maana ra-koeemsã wãn-wãna?

³² B rag tara nin-wẽns a yiib n kẽnd n na tɩ lagem ne a Zezi n kʋ.

³³ La bãmb sẽn ta zĩig ninga b sẽn boond tɩ zu-wangã, b kaa a Zezi da-pɩkã zug be, ne nin-wẽns a yiibã: A yembr b rɩtgo a to wã b goabga.

³⁴ A Zezi yeelame yaa: M ba, kõ-y-b sugri, tɩ b ka mi bũmb ninga b sẽn maandã ye. La bãmb maana bãnd n pʋɩ a Zezi futã ne taaba.

³⁵ Nebã rag yasa be n getẽ. La tẽnga nanamsa ra yaanda a Zezi n yetẽ: B fãaga neb a taaba, bãmb sã n yaa Kiristã, Wẽnnaam sẽn yãk a soabã, bɩ b fãag b menga.

³⁶ Sodaasã me kolgame n yaal a Zezi, la b kõ-b divẽ miisga,

³⁷ n yeel a Zezi yaa: Yãmb sã n yaa Zuif-rãmbã rĩma, bɩ y fãag y meng y toore.

³⁸ B ra gʋlsa a woto bãmb zugẽ: Nin-kãnga yaa Zuif-rãmbã rĩma.

³⁹ Nin-wẽnsã sẽn dag n be da-pɩgsã zutã ned a yen tʋʋsa a Zezi n yeel-b tɩ ka bãmb la Kiristã laa? Tɩ b fãag b meng la b fãag bãmba.

⁴⁰ La a to wã lenga yẽnda n yeel-a yaa: Fo ka zoet Wẽnnaam laa? Fo sɩbgrã sẽn ya yembr ne bãmb sɩbgrã?

⁴¹ Tõnd yẽ sɩbgrã zemsame. Bala, tõnd deegda sẽn zems d tʋʋma. La nin-kãngã ka maan bũmb sẽn ya wẽng ye.

⁴² La a yeela a Zezi yaa: Yãmb sã n wa n deeg y naamã, bɩ y tẽeg mam yelle.

⁴³ A Zezi leok-a lame yaa: "Mam yeta foo sɩd-sɩd tɩ rũnna bala, fo na n zĩnda ne maam Paradi pʋga."

⁴⁴ Rẽ tɩ ra zoe n kolga wĩnto-sʋka, la zĩiga fãa lebga lik bida hal tɩ ta wẽn-kaoore.

⁴⁵ Wĩntoogã sobgame, la fu-lillidgã sẽn be wẽnd-doogẽ wã pãrga pʋɩ-sʋka.

⁴⁶ La a Zezi zẽka b koɛɛg n yeel yaa: M ba, m basda m sɩɩgã yãmb nugẽ. La a Zezi sẽn gom a woto n sɛ, b kiime.

⁴⁷ Sodaas koabg naabã sẽn yã bũmb ninga sẽn maana, a waooga Wẽnnaam n yeel tɩ: Hakɩɩka rao-kãnga ra yaa nin-tɩrga.

⁴⁸ La neb kʋʋngã sẽn da wa n na ges bõn-kãngã sẽn yã bũmb nins sẽn maana, b lebgdame la b pĩisd b yãoodo.

⁴⁹ Neb nins fãa sẽn dag n mi a Zezi wã, ne pagb nins sẽn yi Galile n yãag bãmbã dag n yasa yɩɩg n get bũmb nins sẽn maandã.

⁵⁰ Kaorengã yɛl-bʋ-kaood a ye n da be t'a yʋʋr boond t'a Zozɛf n ya nin-sõngo la nin-tɩrga.

⁵¹ A rag n ka lagem ne bʋ-kaoodb a taabã n yãk yama la a maan b sẽn maan bũmb ningã ye. A rag n yaa Arimate sẽn ya Zuif-rãmba tẽng neda. La a ra gũuda Wẽnnaam soolmã waoongo.

⁵² A kẽnga a pilat nengẽ n tɩ kos a Zezi kũumã.

⁵³ Yẽ sika kũumã, da-pɩkã zugu, n vil-a ne lẽ peend n tɩ gãneg yaoogẽ sẽn tu kugr zugu, kũum sẽn nan ka mumẽ ye.

⁵⁴ Badaar dag n yaa seglg daare, la vʋʋsg daarã da rat n sɩngame.

⁵⁵ La pagbã sẽn da yi Galile n yãag a Zezi wã tũu a Zozɛf n wa yã yaoogã la b sẽn gãneg a Zezi kũuma be to-to.

⁵⁶ La b lebgame n tɩ to tɩdar zom la b maan tɩdar kaam. La bãmb vʋʋsa vʋʋsg daarã wa sẽn zems a Moyiis toogã. Yaoog sẽn tuk pĩigẽ (23.53)

24

¹ Dimaas daar yibeoog pĩnda, pagbã talla ka-rambã b sẽn da seglã n kẽng yaoogẽ wã.

² B mikame tɩ b bilga kugrã n bas yaoogã noore.

³ Bãmb kẽeme la b ka yã Zu-soab a Zezi kũumã ye

⁴ Bãmb sẽn da ka mi b sẽn tagsd tɩ bũmb ningã, ade, raop a yiib sẽn yer fut sẽn pɩnd puka b meng ne bãmba.

⁵ Rabeem yõka bãmb tɩ b yĩgimd n sulg b nens tẽnga. La raopã yeel-b lame yaa: Yaa bõe tɩ yãmb baood nin-vɩɩg kũum sʋka?

⁶ Bãmb ka be ka ye, b vʋʋgame. Tẽeg-y bũmb ning bãmb sẽn da gom ne yãmb b sẽn da ket n be Galile wã.

⁷ B yeelame tɩ yaa tɩlɛ tɩ b zãmb Ninsaal Bi-riblã n yõk n kõ yel-wẽn maandbã tɩ b ka-b da-pɩk zugu, la tɩ rasem a tãab daare bãmb na n vʋʋgame.

⁸ La pagbã tẽega a Zezi goama.

⁹ La bãmb yii yaoogẽ wã n kẽng n tɩ togs karen-biis piig la a yembrã ne neb a taabã fãa bõn-kãens fãa.

¹⁰ Da yaa a Maari sẽn yit Magdala, ne a Zan la a Zak ma a Maari, n paas pagb a taab sẽn da be ne bãmbã n tɩ togs tʋmtʋmdbã bõn-kãnga.

¹¹ La tʋmtʋmdbã tagsame tɩ pagbã sẽn da gomdã yaa zʋbsgo la b ka tẽ-b ye.

¹² La a Pɩyɛɛr yikame n wudg n kẽng yaoogẽ wã. Yẽ sẽn zõonde, a ka yã bũmb tɩ sã n ka pɛɛlã sẽn dʋr tẽngã. La bũmb ninga sẽn maana yɛɛsa yẽ, la a lebg n leba a yiri.

¹³ La mikame tɩ badaare, karen-biis a yiib n da rabd tẽn-bil a yen sẽn boond tɩ Emayus, n zems kɩlometr piig la a yembr ne Zeruzalɛm.

¹⁴ Bãmb da gomda bũmb nins fãa sẽn maanã yell ne taaba.

¹⁵ La bãmb sẽn gomd n kɩɩsd taaba, a Zezi meng waame n kẽn ne bãmba.

¹⁶ La bãmb yam ludame tɩ b ka bãng a Zezi ye.

¹⁷ A Zezi soka bãmb tɩ yaa bõe yell la b gomd ne taab la b kẽnda. La b yalsame tɩ b nensã gãnem.

¹⁸ La bãmb ned a yen sẽn boond t'a Keleopaas soka a Zezi yaa: Yãmb y yen bal n be Zeruzalɛm n ka bãng bũmb ninga sẽn maan be rasmã noorã?

¹⁹ A Zezi soka bãmb tɩ yaa bõe yelle. La b leoka bãmb yaa: Yell ning sẽn paam Nazarɛt dao a Zezi wã. Sẽn da yaa Wẽnnaam no-rɛɛs sẽn tar pãng ne b tʋʋma la b goama, Wẽnnaam la nebã fãa taoorã.

²⁰ Tɩ tõnd maan-kʋʋdbã kãsem-dãmb ne tõnd nanamsã sẽn yɩ to-to n yõk bãmb n kɩs tɩ b kao b bʋʋd n yeel tɩ b zemsa kũuma, n ka-b da-pɩk zugã.

²¹ Tõnd da tẽedame tɩ yaa bãmb n na n fãag Israyɛl, la sẽn paas rẽ fãa, ad yaa rasem a tãab rũnna la bõn-kãens maan-yã.

²² Yaa sɩd tɩ pagb kẽer sẽn be tõnd sʋk yɛɛsa tõnd wʋsgo. B kẽnga yaoogẽ wã yibeoogẽ pĩnda,

²³ n tɩ ka yã a Zezi kũuma ye. B waa n yeelame tɩ malegs n puk b mens ne bãmba, n yeel bãmb t'a Zezi vɩɩme.

²⁴ La neb kẽer sẽn da be ne tõndã kẽnga yaoogẽ wã n tɩ mik tɩ bũmba fãa yaa wa pagbã sẽn dag togsã bala. La bãmb ka yãnd a Zezi ye.

²⁵ Dẽ, a Zezi yeel-b lame yaa: Neb yam sẽn ka weke, yãmb ka tẽed bũmb nins fãa Wẽnnaam no-rɛɛsdbã sẽn togsã tao-tao ye!

²⁶ Dẽ yĩnga, Kirist dag n ka tog n nams a woto n yaool n deeg b naamã sɩda?

²⁷ A Zezi bilga bãmb bũmb nins sẽn be gʋls-sõamyã fãa pʋgẽ n gomd bãmb yellã, sẽn sɩng ne a Moyiis tɩ ta Wẽnnaam no-rɛɛsdbã fãa.

²⁸ La b sẽn kolg tẽn-bil ninga bãmb sẽn da rabdã, a Zezi maana wa bãmb dat n taa taoore.

²⁹ La karen-biis a yiibã pẽdga bãmb n yeel tɩ b pa ne bãmba, bala, yʋng kolgame la wĩndgã dat n kẽeme. A Zezi kẽe n siga ne bãmba.

³⁰ A Zezi sẽn zĩ ne bãmb n na n dɩ, b rɩka burã n pʋʋs Wẽnnaam bark n kao-a n kõ bãmba.

³¹ Dẽ, karen-biisã yama vẽnegame tɩ b bãng tɩ yaa a Zezi, la a Zezi menema bãmb taoor bala.

³² La bãmb goma ne taab n yeel yaa: Bãmb sẽn da gomd ne tõnd sorã zug la b bilgid tõnd gʋls-sõamyã, tõnd ka paam sũ-no-kãseng sɩda?

³³ La bãmb yika wakat kãng bal n leb Zeruzalɛm n tɩ yã karen-biis piig la a yembrã ne b tũud-n-taas sẽn tigim taaba,

³⁴ la b yeela bãmb tɩ hakɩɩka! Zu-soaba vʋʋgame la b vẽnega b meng ne a Sɩmo.

³⁵ Bãmb me togsa bũmb ning sẽn maan bãmb sorã zugã, la bãmb sẽn bãng a Zezi to-to b sẽn wa n kaood burã.

³⁶ Bãmb sẽn da ket n gomd a woto, a Zezi meng puka bãmb sʋk n yeel-b yaa: Bɩ laafɩ zĩnd ne yãmba.

³⁷ Dabeem yõka bãmb la b yɛɛsame n tẽed tɩ b yãa kɩɩma.

³⁸ La a Zezi yeel-b lame yaa: Bõe yĩng tɩ yãmb yɛɛsdẽ, la yaa bõe tɩ y sãmbd y sũyã pʋsẽ a woto?

³⁹ Ges-y mam nusã la m nao wã. Yaa maam bala, Sɩɩs-y maam n gese. Kɩɩm ka tar nemd wall kõab wa mam sẽn tarã ye.

⁴⁰ A Zezi sẽn gom a woto, b wilga karen-biisã b nusã la b nao wã.

⁴¹ Karen-biisã sẽn ket n ka tẽeda, b sũ-nooga yĩnga, la sẽn ya lingr ne bãmbã, a Zezi sok-b lame b sã n tara rɩɩb be sẽn na rɩ.

⁴² Bãmb kõo a Zezi zĩm-sẽedgo ne sɩɩd bilfu.

⁴³ A Zezi reeg-a lame n dɩ bãmb nifẽ.

⁴⁴ Dẽ poore, a Zezi yeel-b lame yaa: Bũmb ninga mam sẽn da togs yãmb mam sẽn dag n ket n be ne yãmba la woto: Ra yaa tɩlɛ tɩ bũmb nins fãa sẽn gʋls a Moyiis tõoga pʋgẽ la Wẽnnaam no-rɛɛsdbã sɛb pʋsã la yɩɩn-sõamyã pʋgẽ n gomd mam yellã paam pidsgu.

⁴⁵ Dẽ, a Zezi vẽnega b yamã tɩ b tõog wʋm Wẽnnaam gʋls sõamyã võore.

⁴⁶ La a Zezi yeel-b lame yaa: Woto b gʋlsame n yeel tɩ Kiristã tog n namsame la tɩ b na n vʋʋg n basa kũum rasem a tãab daare.

⁴⁷ La tɩ sẽn sɩng ne Zeruzalɛm, b na n moona yam tekr koɛɛg buuda fãa sʋk ne bãmb yʋʋr tɩ b tõe n paam yel-wẽna sʋgri.

⁴⁸ Yãmb yaa bõn-kãng kaset-dãmba.

⁴⁹ La ade, mam na n tʋma yãmb bũmb ninga m ba sẽn dag n kãabã, t'a wa yãmb zutu. Pa-y Zeruzalɛm hal tɩ y deeg pãng sẽn yit yĩngri.

⁵⁰ La a Zezi peega bãmb n kẽng Betani sẽne, la b zẽka b nus n ning karen-biisã zut barka.

⁵¹ La barkã ningr wakate, a Zezi basa karen-biisã n zẽk n kẽng arzãna.

⁵² La karen-biisã waooga a Zezi, la b leb Zeruzalɛm ne sũ-no-kãsenga.

⁵³ La bãmb bee wẽnd-doogã pʋg wakat fãa n pẽgd Wẽnnaam.