1

¹ Koe-noog ninga sẽn togsd a Zezi Kirist sẽn ya Wẽnnaam Bi-riblã yɛlã sɩngr la a woto.

² A zemsa wa Wẽnnaam no-rɛɛs a Ezayi sẽn gʋlsã: Ade, mam tʋmda m koe-toagsd t'a reng fo taoor n maneg f sorã.

³ Yaa yẽ koɛɛg n kelemd we-rasempʋɩɩgã pʋgẽ n yetẽ: Maneg-y Zu-soaba sore, rems-y bãmb so-bugsã tɩ yɩ tɩrse.

⁴ A Zã ra bee weoogẽ n lisd nebã la a moondẽ n yetẽ tɩ b tek yam n deeg lisg b yel-wẽna sugr yĩnga.

⁵ Zude rãmba ne Zeruzalɛm dãmba yitame n kẽngd yẽ nengẽ, n vẽnegd n togsd b yel-wẽna t'a lisd bãmb Zʋrdẽ kʋɩlga pʋgẽ.

⁶ A Zã futã ra wʋga ne yʋgemd kõbdo. A sẽbdgã ra yaa gãongo, la a rɩɩb ra yaa sʋya la weoog sɩɩdo.

⁷ Yẽ ra moondame n yetẽ: Ned sẽn yɩɩd maam n na n pʋgl maam n wa. Mam pʋs n pa zems tɩ zõond n lok bãmb neooda loets ye.

⁸ Mam lisa yãmb koomẽ, la bãmb na n lisa yãmb Sɩɩg-sõng pʋgẽ.

⁹ Wakat kãnga, a Zezi yii Galile Nazarɛt n wa, la a Zã lisa bãmb Zʋrdẽ kooma pʋgẽ.

¹⁰ La b sẽn yit koomẽ wã, b yãa yĩngr sẽn pake, la Sɩɩg-sõng sẽn wẽnd wall sẽn sigd bãmb zugu.

¹¹ Koɛɛg zĩnda saasẽ n yeele: Fo yaa mam Bi-ribl-nongr sẽn ta mam yam zãnga.

¹² Tao-tao bala, Sɩɩgã kɩtame t'a Zezi kẽng we-rasempʋɩɩgẽ.

¹³ Bãmb paa be rasem pis-naas tɩ Sʋtãanã mak bãmba. B ra bee be ne we-rũmsi, la malɛk-rãmb ra sõngda bãmba.

¹⁴ B sẽn kẽes a Zã bi-bees roogã zugẽ, a Zezi kẽnga Galile n tɩ moond koe-noogã n yetẽ:

¹⁵ Wakat taame, la Wẽnnaam soolem kolgame. Tek-y yam n bas y yel-wẽna la y tẽ koe-noogã.

¹⁶ Bãmb sẽn tũud Galile mogrã noore, bãmb yãa a Sɩmo ne a ba-biig a Ãndre tɩ b lobd zĩm-gãmbr mogrã pʋgẽ. Bala, b ra yaa zĩm-yõagdba.

¹⁷ A Zezi yeel-b lame yaa: Wa n tũ-y maam, tɩ m na n kɩtame tɩ y lebg nin-baoodba.

¹⁸ Bãmb basa b zĩm-gãmba wã tao-tao n tũ a Zezi.

¹⁹ Bãmb sẽn kẽng taoor bilfu, b yãa a Zebde kom-dibli a Zak ne a ba-biig a Zã. Bãmb me ra bee koom-koglgẽ n tõgd b zĩm-gãmba.

²⁰ Tao-tao bala, a Zezi boola bãmba, la b basa b ba a Zebde koglgã pʋgẽ ne tʋmtʋmdbã n tũ bãmba.

²¹ A Zezi ne b karen-biisã kẽnga Kapɛrnawom. La Zuif-rãmbã vʋʋsg daarã sẽn ta, a Zezi kẽe karen-doogẽ wã n sɩng n zãms nebã.

²² Bãmb zãmsgã yɛɛsa nebã, bala, b zãmsa ne noore, la ka wa tõog karen-saam-dãmbã ye.

²³ La rao a yen n da be bãmb karen-doogẽ wã tɩ zĩn-dẽgd tar-a. A kelmame n yeele:

²⁴ Zezi sẽn yit Nazarɛt, yãmb toor bee ne tõndo? Yãmb waame n na n sãam tõnd laa? Mam bãnga yãmb sẽn ya ned ninga. Yãmb yaa Wẽnnaam sõmblem soaba.

²⁵ A Zezi leng-a lame n yeele: Sĩnd la f yi n bas rao wã.

²⁶ Zĩn-dẽgdã kelma ne pãnga, n yi n bas rao wã t'a rigd wʋsgo.

²⁷ Neba fãa yɛɛsame n sok taaba: Bõn-kãnga yaa bõe? Koe-paalga! B tãsda zĩn-dãmb mens hal tɩ b sakd-ba.

²⁸ Tao-tao bala, bãmb yʋʋr saaga zĩiga fãa Galile soolmẽ.

²⁹ A Zezi ne b karen-biisã sẽn yi karen-doogẽ wã, a Zezi ne a Zak la a Zã kẽnga a Sɩmo ne a Ãndre rãmb zakẽ.

³⁰ A Sɩmo reem-poakã yĩns ra wɩngame t'a gãeyã. La a Zezi sẽn ta bala, b togs-b lame.

³¹ Bãmb kolgame n gãd a nug n sõng-a t'a yiki, la wakat kãng bala, a yĩn-wɩngrã sigame t'a yik n maan-b sãando.

³² La zĩ-sobdo, wĩndgã lʋɩɩs poore, neba talla bãad-dãmba fãa ne neb nins zĩn-dãmb sẽn tarã n wa a Zezi nengẽ.

³³ La tẽngã nebã tigma taab roogã noore.

³⁴ A Zezi maaga neb wʋsgo, bãas buud toay-toay sẽn da tara. Bãmb diga zĩn-dãmb wʋsg me n ka sak tɩ b gom ye, bala, zĩn-dãmba da mii bãmba.

³⁵ A Zezi sãda beoogo, tɩ zĩigã ket n ya lika, n kẽng zĩig neb sẽn ka be n tɩ pʋʋse.

³⁶ A Sɩmo ne neb nins sẽn be ne yẽ wã baoo bãmba.

³⁷ La b sẽn yãnd a Zezi, b yeel-b lame yaa: Neba fãa baooda yãmba.

³⁸ La a Zezi leoka bãmba: Wa-y tɩ d kẽng tẽn-kɩremse, tɩ m tɩ moon koe-noogã beene me, tɩ yaa rẽnda yĩng la m wa-yã.

³⁹ Bãmb saaga Galile n moon koe-noogã karen-dotã pʋse, la b rig zĩn-dãmba.

⁴⁰ Ned a yen yĩn-gãong bãag sẽn tar n wa a Zezi nengẽ n yĩgimd n bõos bãmb ne nimbãaneg n yeele: Yãmb sã n data, y tõe n maaga maam tɩ m yɩ yɩlemde.

⁴¹ Rao wã nimbãaneg yõka a Zezi tɩ b tẽeg b nug n sɩɩs-a n yeele: Mam datame, lebg yɩlemde.

⁴² Wakat kãng bala, yĩn-gãongã bãag loog n bas-a lame t'a lebg yɩlemde.

⁴³ A Zezi yeel-a-la tao-tao t'a looge, n keoog-a neer n yeele:

⁴⁴ Yõk f noor n da yeel ned tɩ bũmb ye. La f kẽng n tɩ wilg f meng maan-kʋʋdã, la f maan maoong ning a Moyiis sẽn wilgã, f yɩlgr yĩnga, t'a yɩ kaset neba yĩnga.

⁴⁵ La rao wã sẽn looge, a puka yellã n moone, hal t'a Zezi ka le tõe n kẽ tẽngẽ tɩ ka yɩ ne soosg ye. Bãmb zĩnda zĩis neb sẽn ka be, la neb ra yita zĩiga fãa n wat bãmb nengẽ.

2

¹ Rasem bilf rẽ loogr poore, a Zezi lebg n waa Kapɛrnawom, la nebã wʋmame tɩ b bee roogẽ.

² Nebã tigma taab hal wʋsgo, tɩ weer ka be baa rig-noorẽ wã ye. La a Zezi moona bãmb Wẽnnaam koɛɛga.

³ B talla ned a yen sẽn ki bogr n wa bãmb nengẽ, la yaa neb a naas n tʋk-a.

⁴ La bãmb sẽn ka tõe n tall-a n ta a Zezi nengẽ neba waooglem yĩngã, b laka roogã zugu, zĩig ning a Zezi sẽn yɛsã n tũnug võ-kãnga n sik ki-bogrã ne a gãagã.

⁵ A Zezi sẽn yã b tẽebã, b yeela sẽn ki-a bogrã yaa: M biiga, fo paama f yel-wẽna sugri.

⁶ Tõog karen-saam-dãmb kẽer sẽn da zĩ be ra tagsda b sũurẽ woto:

⁷ Yaa a wãn tɩ ra-kãnga gomd a woto? Bãmb paoogda Wẽnnaam. Ãnna n tõe n kõ yel-wẽn sugr tɩ ka Wẽnnaam b yen tãa?

⁸ A Zezi bãnga bũmb nins b sẽn tagsd b sũurẽ wã n sok-b yaa: Yaa bõe tɩ yãmb tagsd woto y sũyã pʋse?

⁹ Bʋg n ya naana n yɩɩd tɩ yeel ki-bogr soabã: Fo paama f yel-wẽna sugri, bɩ yik n dɩk f gãagã n kẽne?

¹⁰ La yaa tɩ yãmb na bãng tɩ Ninsaal Bi-riblã tara pãng dũni zug tɩ kõ yel-wẽn sugri.

¹¹ La a Zezi yeela ki-bogr soabã yaa: Mam yeta foom tɩ f yik n dɩk f gãagã n kuili.

¹² Tao-tao bala, a yikame n dɩk a gãagã n loog nebã fãa nifẽ, tɩ b fãa yɛɛs n pẽg Wẽnnaam n yeele: Tõnd nan ka yã bũmb a woto nand ye.

¹³ A Zezi leb n kẽnga mogrã noore, la kʋʋngã fãa waa bãmb nengẽ. La bãmb zãms-b lame.

¹⁴ A Zezi sẽn loogda, b yãa a Alfe biig a Levi t'a zĩ yaood-deegr zĩigẽ. Bãmb yeela yẽnda yaa: Tũ maam. La a Levi yikame n tũ bãmba.

¹⁵ A Zezi sẽn zĩ a Levi roogẽ n dɩtẽ, yaood-dɛɛgdbã ne yel-wẽn maandb wʋsg me lagmame n dɩt ne bãmba, ne b karen-biisã. Bala, b yɩɩ wʋsg n tũ bãmba.

¹⁶ Tõog karen-saam-dãmbã sẽn ya Fariisẽ-dãmb sẽn yã t'a Zezi rɩt ne yaood-dɛɛgdbã la ne yel-wẽn maandbã, b soka b karen-biisã yaa: Bõe yĩng tɩ bãmb dɩt la b yũud ne yaood-dɛɛgdbã la ne yel-wẽn maandbã?

¹⁷ A Zezi sẽn wʋm woto, b yeela bãmba: Nin-kegems ka baood tɩp ye, yaa bãad-dãmb n baooda. Mam ka wa n na n bool nin-tɩrs ye, la yaa yel-wẽn maandbã.

¹⁸ A Zã karen-biisã ne Fariisẽ-dãmbã da loeta noore. Nebã wa n soka a Zezi: Yaa bõe t'a Zã karen-biisã ne Fariisẽ-dãmbã karen-biisã loet noor tɩ yãmb karen-biisã ka loetẽ?

¹⁹ A Zezi leok-b lame n yeele: Ned sã n maan kãadem n bool neba, nin-kõens tõee n loee noor wakat ning b sẽn ket n be ne-a wã sɩda? Bãmb sã n ket n be ne pʋg-paalã sɩda, b ka tõe n loe noor ye.

²⁰ Daar n wat tɩ b na n yiis pʋg-paalã sɩdã b sʋka. Dẽ, wakat kãnga, b na yaool n loe noore.

²¹ Ned ka rɩkd peen-paalg n lisg fu-kʋdg ye, tɩ bõe, peen-paalgã na n kɩtame tɩ fu-kʋdgã kẽeg n yɩɩg pĩnda.

²² Ned ka suiid divẽ paalg ko-wao-kʋdẽ ye, tɩ bõe, divẽ wã na n kɩtame tɩ b pusi: Divẽ wã na raage, ko-waoosã na sãame. Divẽ paalg tog n suii ko-wao-paals pʋse.

²³ Zuif-rãmbã vʋʋsg daar a yen, a Zezi ne b karen-biisã da pɩʋʋgda pʋto, la b karen-biisã sẽn kẽndã, b sɩngame n yãgs koodo.

²⁴ Fariisẽ-dãmbã yeela bãmb yaa: Gese, yaa bõe tɩ bãmb maand bũmb ning sẽn ka zems tɩ maan vʋʋsg daare?

²⁵ A Zezi leok-b lame n yeele: Yãmb zɩ n karem bũmb ning a Daviid sẽn maan b yel-pakr wakate, la kom sẽn tar bãmb ne neb nins sẽn dag n be ne bãmbã laa?

²⁶ La tɩ bãmb kẽe Wẽnnaam roogẽ, maan-kʋʋd a Abiyataar zamaanẽ, n dɩ kaset bur-paadem sẽn ka zems tɩ neba rɩ, kal maan-kʋʋdbã bala, la tɩ bãmb kõo neb nins sẽn da be ne bãmbã me laa?

²⁷ B yeel-b lame yɛs yaa: Vʋʋsg raarã maana ninsaal yĩnga, la b ka maan ninsaal vʋʋsg daarã yĩng ye.

²⁸ Woto yĩnga, Ninsaal Bi-riblã soo bũmba fãa, baa ne vʋʋsg daarã me.

3

¹ A Zezi leb n kẽe karen-doogã pʋgẽ, la rao a yen n da be be t'a nug ki.

² La Fariisẽ-dãmbã gũusa a Zezi n dat n bãng b sã n na n maaga yẽnda Zuif-rãmbã vʋʋsgã daare, sẽn na yɩlẽ n paam n dõd bãmba.

³ A Zezi yeela rao ninga nug sẽn ki wã yaa: Yik n yaas sʋk ka!

⁴ La b soka Fariisẽ-dãmba yaa: Dẽ yĩnga, noor beeme tɩ maan neer vʋʋsgã daar bii, bɩ tɩ maan wẽnga? Tɩ fãag ned bii, bɩ tɩ kʋ-a? La b sĩndame.

⁵ A Zezi wẽneg n gesa b fãa ne sũ-yikri la ne sũ-sãoongo, b sũyã sẽn diglmã yĩngã. La b yeela rao wã t'a tẽeg a nugã. Rao wã tẽegame la a nugã vʋʋgame.

⁶ Fariisẽ-dãmbã yiime n yẽs ne Herood poorẽ dãmba tao-tao n bao b sẽn na n maan to-to n menes a Zezi.

⁷ A Zezi ne b karen-biisã kẽnga mogrã sẽne. La neb wʋsg yii Galile la Zude la Zeruzalɛm la Yidume la Zʋrdẽ rʋʋnde la Tɩɩr ne Sɩdõ tẽmse n tũ bãmba.

⁸ Neb kʋʋng kʋʋng sẽn wʋm bũmb nins fãa bãmb sẽn maanã waa bãmb nengẽ.

⁹ A Zezi yeela b karen-biisã tɩ b pẽneg kogl-bil yam-yam wakat fãa bãmb yĩnga, tɩ kʋʋngã ra wa n dɩdg bãmb ye.

¹⁰ Bãmb sẽn maagd neb wʋsgã yĩng kɩtame tɩ bãad-dãmb wʋsg da maoodẽ n dɩdgd taab n dat n sɩɩs bãmba.

¹¹ Zĩn-dãmb nins sẽn ya rẽgdã sã n yã bãmba, b wõgemdeda bãmb taoor n kelem n yeele: Yãmb yaa Wẽnnaam Bi-ribla.

¹² La a Zezi keooga bãmb neere, n yeel-b tɩ b ra kaas b yʋʋrã ye.

¹³ Rẽ zugẽ, bãmb dʋʋ tãngã n bool b sẽn dat b rãmbã tɩ b wa bãmb nengẽ.

¹⁴ Bãmb yãka raop piig la a yiib tɩ b pa ne bãmba,

¹⁵ tɩ b tõe n tʋm-b tɩ b tɩ moon koe-noogã, ne pãn-tõog tɩ rig zĩn-dãmba.

¹⁶ Ad raop piig la a yiibã bãmb sẽn yãkã: a Sɩmo b sẽn pʋd a yʋʋr t'a Pɩyɛɛr,

¹⁷ a Zak sẽn ya a Zebde biiga, ne a ba-biig a Zã, a Zezi sẽn pʋd b yʋy tɩ Boanergɛs, sẽn dat n yeel tɩ raop sẽn wẽnd wa sa-kɛlenga,

¹⁸ a Ãndre, a Filip, a Bartelemi, a Matye, a Toma, a Alfe biig a Zak, a Tade,

¹⁹ a Sɩmo sẽn boond tɩ zelot la a Zudas Iskaryo, ned ning sẽn zãmb-a a Zezi wã.

²⁰ A Zezi kuila yir ne b karen-biisã. La neb kʋʋng wʋsg tigma taab yɛs hal tɩ bãmb ka tar sẽk n na n dɩ ye.

²¹ A Zezi roagdbã sẽn wʋm bõn-kãnga, b waame n na n peeg-ba, bala, b ra tagsdame t'a Zezi ra zʋbsdame.

²² La tõog karen-saam-dãmbã sẽn yi Zeruzalɛmã yeelame: Belzebul n so bãmba. Bãmb rigda zĩn-dãmbã ne zĩn-dãmbã naab pãnga.

²³ A Zezi boola bãmba, n gom ne bãmb ne yel-bũnd n yeele: Sʋtãanã na n yɩɩ a wãn n dig sʋtãana?

²⁴ Soolem neb sã n welg taab n gõdg n zabd ne taaba, soolem kãng na wã.

²⁵ La yir a yen neb sã n welg taab n gõdg n zabd ne taaba, yi-kãng na wã.

²⁶ Woto, Sʋtãanã sã n zabd ne a menga, a welgame la a ka tõe n yals ye, a yell sãamame.

²⁷ Ned ka tõe n kẽ pãng soab roogẽ n wʋk a teedo, a sã n ka reng n sẽb-a ye. La a sã n sẽb-a, a tõe n yaool n wʋka a roogã teedo.

²⁸ Mam yeta yãmb sɩd tɩ ninsaalbã yel-wẽna fãa b sẽn maandã, la paoogr nins fãa b sẽn paoogdã tõe n paama sugri.

²⁹ La ned sã n paoog Sɩɩg-sõngo, a ka tõe n paam sugr abada. Yel-wẽn kãng paada ne-a wakat sẽn kõn sa.

³⁰ A Zezi goma a woto b sẽn yeel tɩ zĩn-dẽgd n tar bãmbã yĩnga.

³¹ A Zezi ma ne b ma-biis waa n yalsa yɩng n tʋm tɩ b bool-b tɩ b wa.

³² Kʋʋngã ra zĩndame n gũbg bãmba, la b yeela a Zezi yaa: Ad y ma ne y ma-biisã bee yɩng n baood yãmba.

³³ La b leokame: Mam ma yaa ãnna, la m ma-biis yaa ãnna rãmba?

³⁴ La b wẽnemdame n ges neb nins sẽn zĩ n gũbg bãmbã n yeele: Ad m ma ne m ma-biisi.

³⁵ Bala, ned ninga fãa sẽn maand-a Wẽnnaam daabo, ada soab n ya mam ma-bi-raoogo, la m ma-bi-poaka, la m ma.

4

¹ A Zezi leb n sɩngame n na n zãms nebã mogrã noore. Neb kʋʋng wʋsg sẽn tigim taab bãmb nengẽ yĩnga, bãmb kẽe koom-koglg ninga sẽn be mogrã pʋgẽ wã n zĩndi. La kʋʋngã fãa zĩnda koomã noore.

² Bãmb wẽe yel-bũn n zãms nebã bũmb wʋsgo. Zãmsgã pʋgẽ b yeela nebã yaa:

³ Kelg-y-yã! Ned a yen n da kẽng n na n tɩ fẽrg bõn-buudu.

⁴ Fẽrgrã wakate, bõn-biis kẽer lʋɩɩ sor kɩrenga, la liuuli waa n dɩɩ bãmba.

⁵ La kẽer lʋɩɩ kug zĩiga, tom sẽn ka waoogẽ, la tao-tao bala, b yiime, tomã sẽn ka waoogã yĩnga.

⁶ La sõor sẽn zẽke, wĩntoogã yõog-b lame tɩ b ki, b sẽn ka paam yẽgã yĩnga.

⁷ La kẽer lʋɩɩ gõos sʋka, la gõosã yikame n dɩ-b tɩ b ka wom biis ye.

⁸ La kẽer lʋɩɩ zĩ-sõngẽ n yik n wom biisi. Kẽer womame tɩ ta bɛɛl pis-tãtã, tɩ kẽer ta pis-yoobyoobe, tɩ kẽer ta koabg-koabga.

⁹ Dẽ, a Zezi yeelame: Sẽn tar-a tʋb sẽn wʋmd bɩ a wʋm.

¹⁰ Bãmb sẽn wa n be kɛɛnga, neb nins sẽn tũ-b bãmbã ne karen-biis piig la a yiibã soka bãmb yel-bũnã võore.

¹¹ A Zezi yeela bãmba: Yaa yãmb la Wẽnnaam kɩt tɩ y bãng bãmb soolem bõn-solgdse, la ne neb nins sẽn ka be soolmã pʋgẽ wã, yel-kãens yaa soalem bala,

¹² "hal tɩ baa b sã n get sõama, b kõn yã ye, la b sã n wʋmd sõama, b kõn wʋm a võore, tɩ b ra wa n tek yam n kos sugr n paam ye."

¹³ A Zezi leb n sok-b lame yaa: Yãmb ka wʋmd yel-bũn-kãnga võor laa? Dẽ, yãmb na n maana a wãn n wʋm yel-bũnã fãa võore?

¹⁴ Bõn-bu-fẽrgdã fẽrga Wẽnnaam goama.

¹⁵ Neb kẽer wẽnda wa sor kɩrengã, zĩig ning Wẽnnaam goama sẽn fẽrgã. Bãmb sẽn wʋm koɛɛgã yee, la Sʋtãanã sẽn wat n yiis koɛɛg ning sẽn bʋd b sũurẽ wã.

¹⁶ Woto me, neb nins sẽn wʋm Wẽnnaam koɛɛgã n deeg-a tao-tao ne sũ-noogã wẽnda wa kugã zĩig bõn-buudã sẽn lʋɩẽ wã.

¹⁷ Bãmb ka tar yẽg ye, bãmb kaoosda bilf bala. La toog bɩ namsg sã n paam bãmba Wẽnnaam koɛɛgã yĩnga, tao-tao bala, b lʋɩtame.

¹⁸ Neb a taab wẽnda wa gõos zĩigã bõn-biisã sẽn lʋɩẽ wã. Bãmb yaa neb nins sẽn wʋmd Wẽnnaam koɛɛgã, tɩ yɩɩr ne dũniyã yɛlã,

¹⁹ la arzegs belgre, la bũmb a taab ratem kẽedẽ n dɩt Wẽnnaam koɛɛgã t'a ka womd biis ye.

²⁰ La neb a taab wẽnda wa zĩ-sõngã bõn-biisã sẽn lʋɩ a pʋgẽ wã. Bãmb dãmb yaa neb sẽn wʋmd Wẽnnaam koɛɛgã n deegdẽ n womd biisi. Kẽer womame tɩ ta bɛɛl pis-tãtã, tɩ kẽer ta pis-yoobyoobe, tɩ kẽer ta koabg-koabga.

²¹ A Zezi leb n soka bãmb yaa: Rẽ yĩnga, b fõgenda fɩtɩl ne peoogo, wall b ning-a gãag tẽngre? B kõn dogl-a fɩtɩl doagendgã zug sɩda?

²² Tɩ bõe, bũmb ka be sẽn ludi, sẽn kõn puk ye, la bũmb ka be sẽn solge, sẽn kõn vẽneg ye.

²³ Bɩ sẽn tar-a tʋb sẽn wʋmd wʋme.

²⁴ Bãmb leb n yeela neba yaa: Gũus-y neer ne bũmb ning yãmb sẽn wʋmdã. Wẽnnaam na n maka ne makdg ninga yãmb sẽn tar n makd n kõt nebã n lebs yãmba, la b na n ningame tɩ sudgi.

²⁵ Bala, b na n kõo ned ning sẽn tar-a, la ned ning sẽn ka tar-a wã, b na n deega baa bũmb bilf ning a sẽn tarã.

²⁶ Bãmb leb n yeelame: Wẽnnaam soolem yaa wa rao sẽn bʋd bõn-biis a pʋʋgẽ.

²⁷ A gõe t'a ne me, wĩndg ne yʋngo, bõn-biisã bundame n yikdẽ, la yẽ ka mi sẽn yɩt to-to ye.

²⁸ Bõn-bulã yita b toore, n deng n ya vãado, n wa rɩk pʋse, n yaool n wom biis sẽn ya sõama.

²⁹ La biisã sã n bɩ zãnga, b tigsdame, bala, a tigsg wakat taame.

³⁰ A Zezi leb n yeelame: Tõnd na n mamsa Wẽnnaam soolemã ne bõe, wall d bilg-a ne bõe yel-bũndi?

³¹ A wẽnda wa siin-bila. Yẽ yaa bilf n yɩɩd bõn-biisã fãa sẽn bʋt tẽngã.

³² La b sã n bʋd-a, a yikdame n lebg wok n yɩɩd zẽed buud a taabã fãa, n tãoodẽ tɩ liuuli tõe n tʋɩ b tʋgd a maasmẽ.

³³ Yaa ne yel-bũn a woto buud wʋsg la a Zezi wilg nebã Wẽnnaam goamã, a wa sẽn zems b wʋmbo.

³⁴ A Zezi ka gom ne-ba, a sã n ka ne yel-bũn ye. La b sã n wa n be ne b karen-biisã bala, b bilgda bãmb bũmb fãa võore.

³⁵ La baraar bala, zĩ-sobd sẽn ta, a Zezi yeela b karen-biisã yaa: Wa-y tɩ d kẽng mogrã rʋʋnde.

³⁶ La karen-biisã sẽn kuils nebã n sɛ, bãmb looga ne a Zezi ne koom-koglg ning b sẽn dag n be a pʋgẽ wã. La kogond a taab me tũu bãmba.

³⁷ Sob-kãseng yikame tɩ ko-pɛma kẽed koglgã pʋg hal t'a zoe n kolg pidbu.

³⁸ La a Zezi ra bee koglgã poorẽ n kʋgl zu-kʋk n gõe. La b neka bãmb n yeele: Karen-saamba, tõnd sẽn na n sãamã yell ka pak yãmb laa?

³⁹ A Zezi sẽn neke, b lenga sobgã, n yeel ko-kãsengã t'a bas bʋʋr la a sĩndi! La sobgã yõkame tɩ zĩigã lebg sɩddd.

⁴⁰ Dẽ, a Zezi sok-b lame: Yaa bõe tɩ yãmb zoet rabeem a woto? Yaa a wãn tɩ yãmb ka tar tẽebo?

⁴¹ Dabeem kãseng yõk-b lame, la b soka taab tɩ nin-kãnga yaa bõe neda, tɩ hal baa sobgã ne ko-kãsengã sakd bãmba?

5

¹ A Zezi ne b karen-biisã taa ko-kãsengã rʋʋnde, tẽng sẽn boond tɩ Gadara.

² A Zezi sẽn yi koom-koglgã pʋgẽ bala, rao a yen zĩn-dẽgd sẽn tar yii yaad zĩigẽ n wa bãmb nengẽ.

³ Rao-kãng da gãee yaadẽ wã, la neb da ka le tõe n sẽb-a ye, baa ne kutu.

⁴ Bala, naoor wʋsgo, b ra balga a naowã ne kutu la b sẽb-a ne bãense, la a kaoo bãensã n sãam kutã, la ned baa a yen ka tar pãng sẽn sek tɩ tõog-a ye.

⁵ Daar fãa, yʋng ne wĩndga, a bee yaadẽ wã la tãensã zut n kelemdẽ la a pogend a meng ne kuga.

⁶ A sẽn yã a Zezi sẽn ket n be yɩɩga, a wudgame n ta n wõgemd bãmb taoore, n zẽk a koɛɛg n gom ne pãng n yeele:

⁷ Zezi! Saasẽ-saasẽ Wẽnnaam bi-ribla, yãmb data maam ne bõe? Mam kota yãmb ne Wẽnnaam yʋʋr tɩ y ra nams maam ye.

⁸ Bala, a Zezi yeela yẽnda yaa: Zĩn-dẽgdã! Yi n bas rao wã.

⁹ La bãmb sok-a lame yaa: Fo yʋʋr la a bõe? T'a leok-ba: Mam yʋʋr la a Tusa wã, bala, tõnd yaa wʋsgo.

¹⁰ La yẽ kosa a Zezi ne a sũur fãa n yeel tɩ b ra rig zĩn-dãmbã tɩ b yi tẽn-kãng ye.

¹¹ Kurkuy kʋʋng wʋsg n da be tãngã sẽne n wãbdẽ.

¹² La zĩn-dãmbã bõosa a Zezi n yeele: Tʋm-y tõnd kurkuyẽ wã tɩ d tɩ kẽ-ba.

¹³ La b kõ-b la noore. La zĩn-dãmba yiime n kẽ kurkuyã tɩ b yi tãngã sigdg n wudg n lʋɩ ko-kãsengã pʋgẽ. La b sõorã kolga tus a yi, la koomã rɩ-b lame.

¹⁴ La neb nins sẽn dag n gũud bãmbã zoeeme n tɩ togs koɛɛgã tẽngã pʋgẽ la a kɩremsã, la neba yiime n tɩ ges bũmb ninga sẽn maanã.

¹⁵ Bãmb waa a Zezi nengẽ, la b yãa ned ning zĩn sẽn boond tɩ Tusa wã sẽn dag n tarã, t'a yer fut n zĩẽ, n mi a nenga.

¹⁶ Neb nins sẽn yãnd bũmb ning sẽn maanã togsa neb a taabã sẽn yɩ to-to ne rao ning zĩna sẽn da tarã, la ne kurkuyã.

¹⁷ Dẽ, bãmb sɩngame n kos a Zezi ne b sũur fãa tɩ b yi n bas b tẽngã.

¹⁸ Bãmb sẽn wa n kẽed koom-koglgẽ wã, rao ning zĩna sẽn dag n tarã kosa bãmb noor n na n pa ne bãmba.

¹⁹ La a Zezi ka sak ye, n yeel-a t'a kuil a nebẽ n tɩ wilg bũmb nins fãa Zu-soabã sẽn maan yẽnda wã, la b sẽn zoe yẽ nimbãaneg to-to.

²⁰ Yẽ kẽnga Dekapol soolem n tɩ moon bũmb nins fãa a Zezi sẽn maan n kõ yẽ wã. La neba fãa yɛɛsame.

²¹ A Zezi kẽe koom-koglgã n leb ko-kãsengã rʋʋnde. La neb kʋʋng wʋsg le tigma taab bãmb nengẽ, la a Zezi da bee koomã noore.

²² La karen-doog kãsem a yembr n wa be t'a yʋʋr boondẽ t'a Zayirus. Yẽ sẽn yã a Zezi, a wõgemda bãmb taoore,

²³ n kos bãmb ne a sũur fãa n yeele: Mam bi-pugl n kolg kũum. Wa-y n sɩɩs-y-yã-a ne y nus t'a sãoog n tɩlge.

²⁴ A Zezi yãaga yẽnda, la neb kʋʋng wʋsg tũu bãmba, n dɩdgd bãmba.

²⁵ Mik tɩ pag a yen n da be be t'a zɩɩm yit hal yʋʋm piig la a yiibu.

²⁶ Yẽ namsa wʋsg tɩpdb wʋsg nusẽ, n kɩs bũmb nins fãa a sẽn da tarã, la a ka sãoog baa bilfu, bãagã pʋs n yãngdame.

²⁷ A wʋma a Zezi kibare, la a wẽdga nebã n wa a Zezi poorẽ n sɩɩs bãmb fuugu.

²⁸ Bala, a ra yeela a sũurẽ woto: Mam sã n tõog n sɩɩs b futã bala, mam na n paama maagre.

²⁹ La wakat kãng bala, zɩɩma sẽn dag n yitã yõkame, la a bãnga a yĩngã pʋgẽ tɩ bãagã bas-a lame.

³⁰ Wakat kãng bal me, a Zezi bãnga b mengã pʋgẽ tɩ pãng n yi bãmb nengẽ. La b wẽnemda kʋʋngã sʋk n soke: Ãnna n sɩɩs mam futã?

³¹ Bãmb karen-biisã yeela bãmb yaa: Yãmb yãame tɩ neb wʋsg rɩdga yãmba, tɩ yãmb le sokdẽ tɩ ãnna n sɩɩs yãmba.

³² La bãmb da wẽnemdame n na n ges n bãng sẽn maan-a bõn-kãngã.

³³ La rabeem yõka pagã t'a rigda, la a sẽn mi bũmb ning sẽn maan yẽ yĩngẽ wã yĩnga, a waa n yĩgimda a Zezi taoore, n pelg a pʋgã fãa n togs bãmba.

³⁴ La a Zezi yeela yẽnda: M biiga, fo tẽeb n maag-fo. Kẽng ne laafɩ n paam f meng ne bãag ning sẽn tar foomã.

³⁵ Bãmb sẽn ket n gomda, neb yii karen-doog kãsmã zakẽ n wa n yeele: Yãmb bi-puglã kiime, bõe tɩ y na n kell n nams karen-saamba?

³⁶ La a Zezi ka kelg gom-kãens ye, la b yeela karen-doog kãsmã yaa: Da maan dabeem ye, tẽ bala.

³⁷ La b ka sak tɩ ned yãag bãmb ye, sã n ka a Pɩyɛɛr la a Zak ne a ba-biig a Zã.

³⁸ B sẽn ta karen-doog kãsmã zakẽ, a Zezi yãa neb wʋsg sẽn be be n yãbda, n wiisdẽ, n maand bʋʋr wʋsgo.

³⁹ Bãmb kẽeme n sok neba yaa: Yaa bõe tɩ yãmb maand bʋʋr a woto la y yãbda? Biigã ka ki ye, a gõeeme.

⁴⁰ La neba yaala bãmba. Dẽ, a Zezi kɩtame tɩ neba fãa yi, la b tall biigã ba ne a ma, ne b karen-biis a tãabã sẽn yãag bãmbã n kẽ biigã sẽn be zĩig ningã.

⁴¹ Bãmb gãda biigã nug n yeel-a: "Talita kumi" sẽn dat n yeel tɩ: Mam bi-pugla, mam yeta foom tɩ f yiki.

⁴² Tao-tao bala, bi-puglã yikame n sɩng n kẽnda, bala, a ra tara yʋʋm piig la a yiibu. La nebã yɛɛsa wʋsgo.

⁴³ A Zezi sagla bãmb neere n yeel-b tɩ b gũus tɩ ned da bãng ye, n yaool n yeel-b tɩ b bao rɩɩb n kõ biigã t'a rɩ.

6

¹ A Zezi basa zĩ-kãnga n leb b meng tẽngẽ, la b karen-biisã tũu bãmba.

² La Zuif-rãmbã vʋʋsg daar sẽn ta, bãmb zãmsa nebã karen-doogẽ wã. Neba wʋsg sẽn wʋm bãmb zãmsgã, b yɛɛsame n soke: Bãmb bãng-kãng yita yɛ? Ad yaa yam meng-meng la b kõ-ba, hal tɩ b tõe n maan bõn-bãn ne b nusi!

³ Ka bãmb la ra-wãadã, a Maari biigã, a Zak la a Zoze la a Zuud la a Sɩmo ma-biigã? Bãmb ma-bi-pogs ka be tõnd sʋk ka sɩda? La yõwã kɩtame tɩ Nazarɛt nebã ka tẽ a Zezi ye.

⁴ La a Zezi yeela bãmb yaa: Wẽnnaam no-rɛɛs ka kongd waoogre, sã n ka a meng tẽngẽ la a roagdb sʋka la a meng zakẽ ye.

⁵ Bãmb ka tõog n maan bõn-bãnd baa a yen beene, sã n ka b sẽn tik bãad-dãmb kẽer ne b nus n maag-bã bala.

⁶ La nebã ka-tẽebã yɛɛsa a Zezi. A Zezi saaga tẽn-kɩremsã n zãms nebã.

⁷ Dẽ, bãmb boola b karen-biisã piig la a yiibã, n sɩng n tʋm bãmb b yiib-yiibu, n kõ-b pãn-tõog tɩ b rig zĩn-dãmb nins sẽn ya rẽgdã.

⁸ A Zezi yeel-b lame tɩ b ra zã baa fʋɩ b kẽndã yĩnga, sã n ka rasaar bal ye. Tɩ b ra zã buri, wall korg bɩ ligd b sẽbds pʋs me ye.

⁹ B yeel-b lame tɩ b wid neooda la b ra yeelg fu-yord a yiib ye.

¹⁰ La a Zezi yeela bãmb yaa: Yãmb sã n tɩ sig ned zakẽ, pa-y be hal tɩ ta y loogre.

¹¹ La yãmb sã n kẽng tẽngẽ tɩ b ka reeg yãmba, la b ka kelg yãmba, bɩ y yi be la y pĩms y naowã tom tɩ bõn-kãng yɩ kaset b yĩnga.

¹² Bãmb loogame n moon n yeel nebã tɩ b tog n teka yam n kos sugri.

¹³ Bãmb diga zĩn-dãmb wʋsgo, la b tigsa bãad-dãmb wʋsg ne kaam n maag-ba.

¹⁴ Naab a Herood wʋma a Zezi kibare, bala, b yʋʋrã saaga zĩigã fãa. Neba yeelame: A Zãmbatiis vʋʋgame n yi kũum sʋka. Yaa woto n kɩt t'a tar pãng n maand bõn-bãna.

¹⁵ Neb a taab yeelame: Yaa a Eli! La neb kẽer yeelame: Bãmb yaa Wẽnnaam no-rɛɛs wa Wẽnnaam no-rɛɛsdb a taabã.

¹⁶ La Herood sẽn wʋm woto, yẽ yeelame: Yaa Zã ning mam sẽn da fiuug a zugã. Yaa yẽnda n vʋʋge.

¹⁷ Tɩ bõe, Herood meng da kɩtame tɩ b yõk a Zã n sẽb n kẽes bi-bees roogẽ, yẽ ba-biig a Filip pag a Herodyaad a sẽn peegã poorẽ.

¹⁸ Bala, a Zã ra yeel-a lame tɩ ka zems ne tõog tɩ yẽ dɩk a ba-biigã pag ye.

¹⁹ A Herodyaad sũur yika ne a Zã t'a rat n kɩt tɩ b kʋ-a.

²⁰ La yẽ ka tõe ye, bala, Herood zoeta a Zã, a sẽn mi t'a yaa nin-tɩrg la nin-sõngã yĩnga. Herood gũ-a lame, la a sẽn wʋm a Zã goamã, lebga tagsg wʋsg ne-a. Baoosgo, a kelg-a la ne sũ-noogo.

²¹ Herood sẽn tẽeg a dogem daar n maan kibs a nin-kãsemsã ne a sodaas nanamsã ne Galile soolem nanamsã yĩnga, a Herodyaad paama weer n na n maan a sẽn dag n datã.

²² A Herodyaad bi-pugl kẽe roogẽ wã n sao, la biigã saoog yɩɩ Herood ne neb nins sẽn dag n zĩ ne yẽ n dɩtẽ wã noogo.

²³ Herood wẽena ne yẽnda n yeele: Fo sẽn kos maam bũmb ning fãa, mam na kõ foom, baa sã n ya mam soolemã pʋɩ-sʋka.

²⁴ La bi-puglã yiime n tɩ sok a ma: M kos bõe? La a ma wã leokame: Kos a Zãmbatiis zugã.

²⁵ La yẽ leba rĩma nengẽ tao-tao n tɩ kos yẽnda a woto: Mam datame tɩ y kõ maam a Zãmbatiis zug ne lengr moasã bala.

²⁶ Rĩma sũur sãamame. La a wẽenegã ne neba sẽn zĩ ne yẽnda wã yĩnga, a ka rat n tõdg ye.

²⁷ Tao-tao bala, rĩmã yeela dapoe-bil t'a kẽng n tɩ wa ne a Zãmbatiis zugã.

²⁸ Dapoe-bilã kẽngame n tɩ fiuug a Zã zugã bi-beesã roogẽ n sagl lengrẽ n tall n wa n kõ bi-puglã, la bi-puglã tallame n tɩ kõ a ma.

²⁹ La a Zã karen-biisã sẽn wʋme, b waa n dɩka kũuma n tɩ ning yaoogẽ.

³⁰ A Zezi tẽn-tʋmdbã tigma taab bãmb nengẽ n wilg bãmb bũmb nins fãa bãmb sẽn maane, la b zãms nebã.

³¹ Neb wʋsg ra watame la b loogdẽ hal tɩ bãmb ka tol n tar weer n na n dɩ ye. Dẽ, a Zezi yeel-b lame yaa: Wa-y tɩ d yi we-kɛɛnga, neb sẽn ka beẽ tɩ y tɩ vʋʋs bilfu.

³² Bãmb kẽe koom-koglgã n na n yi kɛɛnga, zĩig neb sẽn ka beẽ.

³³ La neb wʋsg yãa bãmb loogrã n bãng bãmba. La neb yii tẽns fãa n zoe ne nao n deng bãmb n ta zĩig ning bãmb sẽn dabdã.

³⁴ A Zezi sẽn yi koom-koglgẽ wã, b yãa neb kʋʋng wʋsgã, la b nimbãaneg yõka bãmba, tɩ bõe, bãmb wẽnda wa piis sẽn ka tar pe-kɩɩm ye. La bãmb sɩngame n zãms-b bũmb wʋsgo.

³⁵ Wakatã sẽn loogdã yĩnga, a Zezi karen-biisã kolga bãmb n yeele: Zĩ-kãngã yaa weoogo, la wakatã loogdame.

³⁶ Kɩt-y tɩ nebã loog n kẽng tẽn-bõonego la tẽn-kɩrems sẽn pẽ n tɩ ra dɩɩb n dɩ.

³⁷ A Zezi leok-b lame tɩ bãmb mensã kõ nebã rɩɩb tɩ b rɩ. La b yeela a Zezi: Tõnd na n kẽngame n tɩ ra bur deniye kobsi n wa n kõ-b tɩ b rɩ?

³⁸ La a Zezi leok-b lame n yeele: Yãmb tara bur a wãna? Kẽng n ges-y yã. Karen-biisã kẽngame n tɩ gese, la b wa n togs a Zezi tɩ yaa bur a nu ne zĩm a yiibu.

³⁹ Dẽ, bãmb yeelame tɩ b zĩnig nebã fãa sull-sull mo-maasã zugu.

⁴⁰ La bãmb zĩnda rulg-rulga, koabg-koabga la pis-nunu.

⁴¹ A Zezi dɩka bur a nu wã ne zĩm a yiibã n nak n ges yĩngri, n ning barka, n yaool n kao burã n kõ b karen-biisã tɩ b pʋɩ kʋʋngã. Bãmb pʋɩɩ zĩm a yiibã me tɩ ta neba fãa.

⁴² Bãmb fãa rɩɩme n tɩge.

⁴³ La b wʋka bur-gɩrsã ne zĩm-kɛlã peoog piig la a yiibu.

⁴⁴ Neb nins sẽn dɩ burã yaa raop tus a nu.

⁴⁵ Tao-tao bal yõwã zugẽ, a Zezi kɩtame tɩ b karen-biisã kẽ koom-koglgã n deng bãmb taoor ko-kãsengã rʋʋnde, Betsayida sẽne, tɩ bãmb mengã yõdg n kuils nebã.

⁴⁶ Bãmb sẽn kuils nebã n sa, b kẽnga tãngã zug n tɩ pʋʋse.

⁴⁷ Zĩ-sobd sẽn ta, koom-koglgã bee ko-kãsengã sʋka, t'a Zezi be tẽng b yembre.

⁴⁸ Bãmb yãame tɩ b karen-biisã namsda wʋsgo, n dugsd koom-koglgã, bala, sobg n segd-ba. Sẽn kolg tõd-beoogo, a Zezi kẽna ko-kãsengã zug n dabd b karen-biisã sẽne, n dat n loog-ba.

⁴⁹ Bãmb sẽn yã a Zezi tɩ b kẽnd koomã zugã, b tẽeme tɩ yaa kɩɩma,

⁵⁰ la b kelmame, bala, bãmb fãa yã-b lame, la rabeem yõka bãmba. Tao-tao bala, a Zezi goma ne bãmb n yeele: Keng-y y sũyã, yaa maam. Da zoe-y rabeem ye.

⁵¹ Bãmb kẽe koom-koglgã pʋgẽ n paas b karen-biisã, la sobgã yõkame. Karen-biisã yɛɛsame n sẽege,

⁵² tɩ bõe, bãmb dag n ka wʋm burã bõn-bãndã võore, b sũyã sẽn diglmã yĩnga.

⁵³ La bãmb sẽn pɩʋʋg mog-kãsengã, bãmb taa Genezarɛt soolmẽ, la b yalsa koomã noore.

⁵⁴ La bãmb sẽn yi koom-koglgẽ wã, nebã bãnga a Zezi tao-tao.

⁵⁵ La b zoeeme n kẽ soolemã fãa n tɩ rɩgs bãad-dãmbã ne pãnday n wa zĩig ning fãa b sẽn wʋm t'a Zezi be.

⁵⁶ A Zezi sẽn taẽ fãa, tɩ yaa tẽn-bõonegẽ, tɩ yaa tẽn-bɛdẽ, tɩ yaa pʋt rotẽ, nebã gãnegda bãad-dãmb raas pʋse, la b kosa a Zezi tɩ b sak tɩ b sɩɩs b fuugã noor bala. La neb nins fãa sẽn sɩɩsã paama laafɩ.

7

¹ Fariisẽ-dãmbã ne tõog karen-saam-dãmbã kẽer sẽn yi Zeruzalɛm tigma taab n gũbg a Zezi.

² Bãmb yãa a Zezi karen-biisã kẽer sẽn dɩt rɩɩb ne nus-rẽgdo, sẽn dat n togs tɩ sẽn ka nudg ye.

³ Fariisẽ-dãmbã ne Zuif-rãmbã fãa yaool n ka rɩt tɩ b ka reng n nudg b nusã neer wa sẽn zems b yaab-rãmbã miningã ye.

⁴ La bãmb sã n yi raagẽ n wa, b sã n ka waase b ka rɩt ye. La b tara minind a taab b sẽn sakda, a wa wama la yʋya la zũud laas needgo.

⁵ Fariisẽ-dãmbã ne tõog karen-saam-dãmbã soka a Zezi tɩ yaa bõe yĩng tɩ bãmb karen-biisã ka sakd b yaab-rãmbã miningu, n dɩt ne nus-rẽgdo?

⁶ A Zezi leoka bãmb yaa: Zãmb-dãmba, a Ezayi sɩd togsa bãngr goam ne yãmb yelle, a sẽn gʋls n yeele: "Nin-kãensã waoogda maam ne b nobɩms bala, la b sũyã zãra ne maam.

⁷ La bãmb sẽn waoogd maamã yaa zaalem, bala, bãmb zãmsa nebã kaoreng sẽn ya ninsaalb tõod bala."

⁸ Yãmb basda Wẽnnaam tõod n sakd ninsaalb minindu.

⁹ A Zezi kẽnga taoor n yeele: Yãmb tara sɩlem n maandẽ n basd Wẽnnaam tõodã kɛɛnga n sakd y mens minindu.

¹⁰ Bala, a Moyiis ra yeelame: "Waoog f ba la f ma, la ned sã n paoog a ba bɩ a ma bɩ b kʋ-a."

¹¹ La ne yãmba, ned sã n yeel a ba bɩ a ma: "Mam sẽn da na n sõng yãmb ne bũmb ningã, a lebga korbã, sẽn dat n togs tɩ kũun Wẽnnaam yĩnga," a ka yell ye.

¹² Yãmb ka le sakd t'a maan baa fʋɩ a ba bɩ a ma yĩng ye.

¹³ Woto, yãmb minindã yãmb sẽn karemd nebã kɩtdame tɩ Wẽnnaam goamã lebg zaalem. La yãmb maanda bũmb a woto buud wʋsgo.

¹⁴ Dẽ poore, bãmb leb n boola neb kʋʋngã n yeel-ba: Yãmb fãa, kelg-y maam la y bãnge.

¹⁵ Bũmb ka be n kẽed ninsaal pʋgẽ n tõe n kɩt t'a lebg rẽgd ye. Yaa bũmb ning sẽn yit ninsaal pʋgẽ wã n kɩtd t'a lebg rẽgdo.

¹⁶ Sẽn tar-a tʋb sẽn wʋmda, bɩ a wʋm.

¹⁷ Bãmb sẽn bas nebã n kẽ roogẽ, b karen-biisã soka bãmb yel-bũn kãng võore.

¹⁸ La a Zezi yeel-b lame yaa: Yãmb me yam ka vẽneg laa? Yãmb ka wʋmd tɩ bũmb sẽn be yɩng n kẽed ninsaal pʋgẽ ka tõe n kɩt t'a lebg rẽgd laa?

¹⁹ Bala, bõn-kãng ka kẽed yẽ sũurã pʋgẽ ye, a kẽeda a pʋgẽ tɩ b yaool n tɩ yiis-a n bas we-kɛɛnga. (A Zezi goma a woto n na n wilg tɩ rɩɩb fãa yaa sẽn na rɩ.)

²⁰ Bãmb leb n yeelame: Yaa bũmb ning sẽn yit ninsaal pʋgẽ wã n kɩtd t'a lebg rẽgdo.

²¹ Bala, yaa pʋgẽ, ninsaalb sũyã pʋs la bõn-wẽnsã yita: tags-wẽnse, tʋʋm-dẽgdo,

²² wagdem, nin-kʋʋre, yoobo, yão-beedo, pʋ-toogo, sɩlem, rãmbgo, sũ-kiiri, nin-tʋʋre, tɩtaam la yalem-tagsgo.

²³ Bõn-wẽn kãens fãa yita ninsaal pʋgẽ n kɩtdẽ t'a lebg rẽgdo.

²⁴ A Zezi basa zĩ-kãnga n kẽng Tɩɩr soolmẽ. Bãmb kẽe roogẽ n ka rat tɩ ned bãng ye, la b ka tõog n soond ye.

²⁵ Bala, zĩn-dẽgd n dag n tar pag a yembr bi-pugla, la pagã wʋma a Zezi kibare, n wa n wõgemd bãmb taoore.

²⁶ Yẽ yaa Gɛrk sẽn yit Siiri Fenisi. Yẽ kosa bãmb tɩ b rig zĩnã sẽn tar a biigã.

²⁷ A Zezi yeela yẽnda: Bas tɩ kambã rɩ n tɩg nanda, bala, a ka zems tɩ b rɩk kamb rɩɩb n kõ ba-bi ye.

²⁸ Yẽ leoka bãmb yaa: Zu-soaba, yaa sɩda, la ba-bi sẽn be taabl tẽngr rɩta kambã rɩ-zersã.

²⁹ Dẽ, bãmb yeel-a lame yaa: Gom-kãnga yĩng bɩ f kẽnge. Zĩnã yiime n bas f bi-puglã.

³⁰ La yẽ sẽn ta yiri, a mikame tɩ zĩnã yii n basa a bi-puglã t'a gãe a gãagẽ.

³¹ A Zezi basa Tɩɩr soolem n leb n tũ Sɩdõ n pɩʋʋg Dekapol n kẽng Galile mog-kãsengã sẽne.

³² B waa ne wʋng sẽn ya bidg bãmb nengẽ n kos-b tɩ b tik-a ne b nusi.

³³ Bãmb peega yẽnda kʋʋngã sʋk n yi kɛɛnga, n ning b nus-bi a tʋbã pʋsẽ, la b tʋbsame, n tẽk a zelemdã ne kolkoodã,

³⁴ n yaool n nak n ges yĩngr n wẽ sir n yeele: "Effata", sẽn dat n togs tɩ yoke.

³⁵ Tao-tao bala, a tʋba yoosame, la a zelemdã lakame t'a gomd sõama.

³⁶ A Zezi sagla bãmb tɩ b ra togs ned ye. La bãmb sã n sagendẽ, b moondame n yɩɩd pĩnda.

³⁷ Nebã yɛɛsa hal wʋsg n yetẽ: Bãmb maanda bũmb fãa neere. Bãmb kɩtdame tɩ baa wʋms wʋmdẽ, tɩ mugs gomda.

8

¹ Ra-kãense, neb wʋsg sẽn leb n tigim taaba, la b ka tar rɩɩb sẽn na rɩ, a Zezi boola b karen-biisã n yeel-b yaa:

² Kʋʋngã nimbãaneg tara maam, bala, rasem a tãab moasã la b be ne maam n ka tar rɩɩb sẽn na rɩ ye.

³ Mam sã n kɩt tɩ b kuil ne kom, b na n tadga sorẽ, bala, kẽer sẽn yiẽ zãrame.

⁴ Bãmb karen-biisã sok-b lame yaa: Ned na n yɩɩ a wãn n paam bur weoogẽ ka tɩ sek bãmba fãa?

⁵ A Zezi soka bãmb yaa: Yãmb tara bur a wãna? Bãmb leokame t'a yopoe.

⁶ Dẽ, bãmb kɩtame tɩ kʋʋngã zĩnd tẽnga. Bãmb dɩka bur a yopoe wã, la b sẽn ning-a bark n sa, b kaoome n kõ b karen-biisã tɩ b pʋɩ nebã, la b pʋɩ-b lame.

⁷ La bãmb dag n tara zĩm-bõoneg bilfu. La a Zezi sẽn ning-a barka, b yeelame tɩ b pʋɩ rẽ me.

⁸ Nebã dɩɩme n tɩge. La karen-biisã wʋka bur-gɩrsã sẽn kellã peoog a yopoe n zã.

⁹ Sẽn dɩ-bã sõor kolga neb tus a naase. Dẽ poore, a Zezi kuils-b lame.

¹⁰ Tao-tao bala, bãmb ne b karen-biisã kẽe koom-koglgã n kẽng Dalmanuta.

¹¹ Fariisẽ-dãmba waame n sɩng n gom ne a Zezi. La sẽn na yɩlẽ n mak a Zezi, b kosa bãmb tɩ b wa ne bãnd sẽn yit yĩngri.

¹² A Zezi wẽe sir-kãseng b sũurẽ n yeele: Bõe tɩ zamaan kãngã nebã baood bãnde? Mam yeta yãmb sɩd tɩ zamaan kãngã nebã kõn tol n paam bãnd ye.

¹³ Dẽ, a Zezi basa bãmb n kẽ koom koglg n kẽng ko-kãsengã rʋʋnde.

¹⁴ B karen-biisã yĩmame n ka zɩ bur ye. Yaa bur a yen tãa bal la b dag n tar koglgã pʋgẽ.

¹⁵ A Zezi sagla bãmb woto: Gũus-y y mens neer ne Fariisẽ-dãmba la Herood rã-bɩlle.

¹⁶ B karen-biisã yẽsa ne taab n yeel tɩ yaa bãmb sẽn ka tar burã yĩng la a Zezi gom a woto wã.

¹⁷ A Zezi bãngame n sok-b yaa: Yaa a wãn tɩ yãmb yẽsd ne taab n yetẽ tɩ yaa yãmb sẽn ka tar burã yĩnga? Yãmb yam ket n nan ka vẽneg laa? Yãmb ket n nan ka wʋm laa? Yãmb yamã kɩdame laa?

¹⁸ Yãmb sẽn tar ninã y ka ne laa? "Yãmb sẽn tar tʋbã y ka wʋmd laa? Yãmb ka tol n tar pʋ-tẽer laa?"

¹⁹ Mam sẽn kao bur a nu n kõ neb tus a nu wã, yãmb wʋka bur-gɩrsã sẽn kellã peoog a wãna? Bãmb leokame tɩ piig la a yiibu.

²⁰ La mam sẽn kao bur a yopoe n kõ neb tus a naasã, yãmb wʋka bur-gɩrsã sẽn kellã peoog a wãna? Bãmb leokame t'a yopoe.

²¹ La a Zezi sok-b lame yaa: Yãmb ket n ka wʋm laa?

²² Bãmb kẽnga Betsayida, la b waa ne zoang a Zezi nengẽ n kos bãmb tɩ b sɩɩs-a.

²³ Bãmb gãda zoangã nug n tɛ-a n yi tẽngã, n tʋbs kolkood n ning a ninã, n tik-a ne b nusi, n sok-a a sã n yãta bũmbu.

²⁴ Zoangã gesame la a leok tɩ yẽ nee nebã, la b wẽnda wa tɩɩse, la b kẽndame.

²⁵ A Zezi leb n tika yẽ ninã ne b nusã yɛsa. La zoangã sẽn ges kũii, a ninã pukame t'a ne vẽenega.

²⁶ Dẽ, a Zezi kuilsa yẽ a yiri, n yeel-a t'a da kẽ tẽngã pʋgẽ ye.

²⁷ A Zezi ne b karen-biisã kẽnga tẽns sẽn pẽ tẽng sẽn boond tɩ Filip Sezaare. La b sẽn be sorẽ, a Zezi soka b karen-biisã tɩ nebã yetame tɩ bãmb a Zezi yaa ãnna?

²⁸ B leokame tɩ kẽer yetame t'a Zãmbatiis, tɩ kẽer yetẽ t'a Eli, tɩ kẽer me yetẽ tɩ Wẽnnaam no-rɛɛsdbã ned a yembre.

²⁹ La a Zezi sok-b lame yaa: La yãmba, yãmb yetame tɩ mam yaa ãnna? A Pɩyɛɛr leoka bãmb n yeel tɩ b yaa Kiristã.

³⁰ A Zezi sagla bãmb neer tɩ b ra togs ned yõwã ye.

³¹ Dẽ, a Zezi sɩngame n zãms b karen-biisã n yeel tɩ yaa tɩlɛ tɩ Ninsaal Bi-riblã nams wʋsgo, la tɩ tẽngã nin-kẽembã ne maan-kʋʋdbã kãsem-dãmbã, ne tõog karen-saam-dãmbã na n zãgsa bãmba, la tɩ b na n kʋʋ bãmba, la tɩ ra-yɩt-n-daarã, bãmb na n vʋʋgame.

³² Bãmb wilga bõn-kãens vẽenega. La a Pɩyɛɛr boola bãmb kɛɛnga, n sɩng n zab bãmba.

³³ A Zezi leb n wẽnegame n ges b karen-biisã, n leng a Pɩyɛɛr n yeele: Sʋtãana, leb mam poorẽ, bala, fo tagsgã ka Wẽnnaam tagsg ye, yaa ninsaalb rẽnda.

³⁴ Dẽ, bãmb boola b karen-biisã ne neb kʋʋngã n yeel-b yaa: Ned sã n dat n tũ maam, bɩ a kɩɩs a mengã raabo, n dɩk a ra-pɩk n tũ maam.

³⁵ Bala, ned ning fãa sẽn dat n gũ a vɩɩm, a vɩɩmã na sãam, la ned ning fãa sẽn na bas a vɩɩm mam yĩnga la koe-noogã yĩnga, a na põse.

³⁶ La ned sã n paam dũni bũmb fãa n yaool n bas n ki, bõe yõod la a paam a pʋgẽ?

³⁷ Ninsaal na n teka a vɩɩmã ne bõe?

³⁸ Mam yelle la mam goamã sã n ya yãnd ne nina zamaan kãngã nebã sẽn ya yoaadbã la yel-wẽn maandbã sʋka, yẽ me yell na n yɩɩ yãnd ne maam a Ninsaal Bi-riblã, wakat ning mam sẽn na n wa ne m ba wã naam la ne maleg-sõmyã.

9

¹ A Zezi leb n yeela nebã yaa: Mam yeta yãmb sɩda, tɩ neb n be ka n ka na n ki hal tɩ b yãnd Wẽnnaam soolemã sẽn wat ne pãnga.

² Yɩ tɩ rab-yoaablẽ, a Zezi peega a Pɩyɛɛr ne a Zak la a Zã n tall bãmb bal n dʋ tãn-luglug zugu, zĩig neb sẽn ka be. La a Zezi nengã tedga bãmb taoore.

³ Bãmb futã pɩndame, n ya peels n yɩɩd dũni neb sẽn tõe n kɩt tɩ yɩ.

⁴ A Eli ne a Moyiis puka bãmb taoore, n gom ne a Zezi.

⁵ A Pɩyɛɛr yeela a Zezi yaa: Karen-saamba, yaa neer tɩ d pa ka, tɩ d tilg fu-rot a tãabo: yãmb a yembre, a Moyiis a yembre, a Eli a yembre.

⁶ A ra ka mi a sẽn yet ye, bala, rabeem kãseng n da kẽ-ba.

⁷ Sawadg waa n luda bãmba, la koɛɛg yii sawadgẽ wã n yeele: Ada yaa mam Bi-ribl-nongre. Kelg-y-yã-a.

⁸ Tao-tao bala, karen-biisã wẽnesame n ges zĩiga fãa, la b ka yã neda, sã n ka a Zezi bal sẽn yɛs ne bãmbã.

⁹ Bãmb sẽn sigd tãngã, a Zezi yeela b karen-biisã tɩ b ra saag n togs ned bũmb nins b sẽn yã wã, hal tɩ Ninsaal Bi-riblã vʋʋg n bas kũum.

¹⁰ Bãmb talla koe-kãng bãmb sʋka, la b soka taab tɩ "vʋʋg n bas kũumã" võor yaa bõe.

¹¹ Karen-biisã soka bãmb woto: Yaa bõe tɩ tõog karen-saam-dãmbã yetẽ tɩ yaa tɩlɛ t'a Eli reng n wa?

¹² Bãmb leok-b lame yaa: Sɩda, a Eli n na n deng n wa n lebs n maneg bũmba fãa. La yaa bõe tɩ b gʋls tɩ yaa tɩlɛ tɩ Ninsaal Bi-riblã nams wʋsgo la b paam paoogre?

¹³ La mam yeta yãmb t'a Eli waame, la nebã maana yẽ wa b sẽn data, wa b sẽn pĩnd n gʋls n gom a yellã.

¹⁴ La bãmb sẽn kolg b karen-biis a taabã nengẽ, bãmb yãa neb kʋʋng wʋsg sẽn gũbg bãmba, la tõog karen-saam-dãmb sẽn wẽed nokoɛɛm ne bãmba.

¹⁵ La nebã sẽn yã a Zezi wã, a ling-b la wʋsgo, la b zoeeme n tɩ pʋʋs-ba.

¹⁶ A Zezi soka nebã: Yaa bõe yell la yãmb gomd ne bãmba?

¹⁷ La rao a yen n zĩnd kʋʋngã sʋk n leok bãmba: Karen-saamba, mam waa ne m biig yãmb nengẽ. Zĩn sẽn kɩtd tɩ ned lebg mukã n tar-a.

¹⁸ A sẽn yõk-a zĩig ning fãa, a lubd-a-la tẽnga tɩ tãntãn-puud yit a noorẽ, tɩ biigã wãb a yẽn n tɩre. La mam kosa yãmb karen-biisã tɩ b rig zĩnã la b ka tõog ye.

¹⁹ A Zezi leoka bãmba: Yãmba, zamaan kãngã neb sẽn ka tẽebo, mam na n zĩnda ne yãmb hal tɩ ta wakat bʋgo? Mam na n maana sũ-mar ne yãmb hal tɩ ta wakat bʋgo? Tall-y biigã n wa ka.

²⁰ La b tall-a lame n wa bãmb nengẽ. Tao-tao bala, zĩnã sẽn yã a Zezi, a rĩmsa biigã ne pãnga, hal t'a lʋɩ tẽng n bilimdẽ t'a tãntãn-puud yita.

²¹ A Zezi soka a ba wã: Wakat bʋg la a sɩng n maand biigã a woto? Yẽ leokame: Hal a sẽn ket n ya bilf wakate.

²² La naoor wʋsgo, a lub-a-la bugmẽ bɩ koomẽ n dat n kʋ-a. La yãmb sã n tõe n maana bũmb bɩ y zoe d nimbãaneg n sõng-do.

²³ A Zezi yeela yẽ yaa: Yãmb sã n tõe? Ned ning fãa sẽn tẽed tõee bũmb fãa.

²⁴ Tao-tao bala, biigã ba zẽka a koɛɛg n yeele: Mam tẽedame. Paas-y m tẽebã t'a paoodame.

²⁵ A Zezi sẽn yã kʋʋngã sẽn zoet n watẽ wã, bãmb lenga zĩn-dẽgdã n yeel-a: Zĩn sẽn maand ned t'a lebg muk la wʋngã, mam yeta foom, yi n bas biigã la f ra leb n kẽ-a yɛs ye.

²⁶ La zĩnã kelmame, n zugs biigã ne pãng t'a lebg wa kũum, la a yi bas-a. Neb kẽer yeelame t'a kiime.

²⁷ La a Zezi gãda a nug n zẽk-a, la a yik n yalsa yĩngri.

²⁸ Wakat ning a Zezi sẽn kẽ roogẽ tɩ neb a taab ka be be, bãmb karen-biisã soka bãmb yaa: Bõe tɩ tõnd ka tõog n dig zĩn-kãngã?

²⁹ A Zezi yeela bãmb yaa: Bõn-kãngã ka yita, tɩ sã n ka ne pʋʋsg ye.

³⁰ Bãmb yii be n pɩʋʋg Galile. La a Zezi ka rat tɩ ned bãng bãmb sẽn beẽ ye.

³¹ Bala, bãmb zãmsa b karen-biisã n yeele: B na n ninga Ninsaal Bi-riblã neb nusẽ. B na n kʋ-b lame, la b kʋ-b tɩ rab tãtẽ, b na n vʋʋgame.

³² La bãmb karen-biisã ka wʋm gom kãng võor ye, la b zoee rabeem n ka sok bãmb ye.

³³ Bãmb taa Kapɛrnawom, la a Zezi sẽn kẽ roogẽ, b soka b karen-biisã: Yaa bõe poorẽ la yãmb da wẽed nokoeemd ne taab sorã zugã?

³⁴ La b sĩndame, bala, bãmb sẽn dag n be sorã zugã, b ra wẽeda nokoeemd ne taaba n dat n bãng sẽn ya-a kãseng n yɩɩd bãmb sʋka.

³⁵ Dẽ, a Zezi zĩndame n bool b karen-biis piig la a yiibã n yeel-b yaa: Ned sã n dat n yɩ taoor soaba, bɩ a yɩ neba fãa poorẽ soaba, la neba fãa tʋmtʋmda.

³⁶ Bãmb peega bi-bilfu n yals-a bãmb sʋka, n kogl-a n yeel b karen-biisã:

³⁷ Ned sã n deeg bi-bilf a woto mam yĩnga, yaa maam la a reeg-yã. La ned sã n deeg maam, ka maam la a reegɩ ye, yaa sẽn tʋm-a maamã la a reeg-yã.

³⁸ A Zã yeela bãmb yaa: Karen-saamba, tõnd yãa rao a yembr t'a rigd zĩn-dãmb ne yãmb yʋʋre, n yaool n ka tõnd tũud-n-taag ye. La tõnd gɩdg-a lame a sẽn ka tũud tõndã yĩnga.

³⁹ A Zezi leokame n yeele: Da gɩdg-y-yã-a ye, bala, ned ka be sẽn na n maan bõn-bãnd ne mam yʋʋre, n wẽneg n sãbs maam ye.

⁴⁰ Ned sã n ka kɩɩsd tõndo, a bee ne tõndo.

⁴¹ Mam yeta yãmb sɩda, tɩ ned sã n kõ yãmb koom mam yĩng tɩ y yũ, yãmb sẽn ya Kirist nebã yĩnga, a soab kõn kong a keoor ye.

⁴² La ned sã n maan kom-bõoneg kãens sẽn tẽed maamã ned a yembr t'a lʋɩ, sẽn ya neer n yɩɩd a soab yĩnga, yaa b sẽn na n loe a yubl ne neer kugr n lob-a ko-kãsengã pʋgẽ. Neer kuga (9.42)

⁴³ Fo nug sã n dat n maan foom tɩ f lʋɩ, bɩ f fiuug-a. Yaa neer tɩ fo yɩ nug-yend n paam vɩɩm sẽn kõn sa, n yɩɩd tɩ fo tall f nus a yiibã n tɩ kẽ bug-tẽnga, bugum sẽn ka kiid pʋgẽ,

⁴⁴ zĩig ning bãmb zũnzũy sẽn ka kiida la bugum sẽn ka kiida.

⁴⁵ Fo naoor sã n dat n maan foom tɩ f lʋɩ, bɩ f fiuug-a. Yaa neer tɩ fo yɩ nao-yende, n paam vɩɩm sẽn kõn sa, n yɩɩd tɩ f tall f nao a yiibã n tɩ kẽ bug-tẽnga,

⁴⁶ zĩig ning bãmb zũnzũy sẽn ka kiida, la bugum sẽn ka kiida.

⁴⁷ Fo nif sã n dat n maan foom tɩ f lʋɩ, bɩ f feoog-a. Yaa neer tɩ f yɩ nin-feoog n kẽ Wẽnnaam soolmẽ, n yɩɩd tɩ tall f nin a yiibã n tɩ kẽ bug-tẽnga,

⁴⁸ "zĩig ning bãmb zũnzũy sẽn ka kiida la bugum sẽn ka kiida."

⁴⁹ Tɩ bõe, ned fãa na n paama yuglg ne bugum wa yamsem.

⁵⁰ Yamsem yaa bõn-sõngo. La yamsem noosem sã n yi, yãmb na n maana bõe t'a leb n yɩ noogo? Tall-y yamsem noosem n zĩnd ne taab ne laafɩ.

10

¹ A Zezi yii be n kẽng Zude soolem pʋgẽ tẽnsẽ, la Zʋrdẽ rʋʋnd a to wã. La neb kʋʋng leb n tigma bãmb nengẽ, la bãmb leb n zãms-b lame wa b sẽn mi n maandẽ wã.

² Fariisẽ-dãmbã waa a Zezi nengẽ. B soka a Zezi sok-bẽdgo, n yeel tɩ rẽ yĩnga tõogã kõta rao noor t'a lebs a paga?

³ A Zezi leoka bãmba: A Moyiis tõogã yeela yãmb tɩ bõe?

⁴ Bãmb yeelame: A sakame tɩ b gʋls baosg sebr n kɩs-a la b rig-a.

⁵ A Zezi yeela bãmba: Yaa yãmb sũyã sẽn diglmã yĩng la a Moyiis kõ yãmb tõ-kãnga.

⁶ La hal dũni sɩngrẽ, "Wẽnnaam naana rao la paga.

⁷ Yaa woto yĩnga, rao na n yii n basa a ba la a ma, n zĩnd ne a paga.

⁸ La bãmb b yiibã fãa na n lebga yĩng a yembre." Woto, bãmb ka leb n ya a yiib yɛs ye, bãmb yaa yĩng a yembre.

⁹ Dẽ, bɩ ninsaal da welg bũmb nins Wẽnnaam sẽn lagem ne taab ye.

¹⁰ Bãmb sẽn kẽ roogẽ, b karen-biisã le soka bãmb koe-kãng yelle.

¹¹ A Zezi yeela bãmb yaa: Ned sã n dig a pag n dɩk pag a to, a yaa yoaad a pipi pagã nifẽ.

¹² La pag sã n bas a sɩd n dɩk a to, a maanda yoobo.

¹³ Neb talla kom-bõoneg n wa a Zezi nengẽ tɩ b sɩɩs-ba, la b karen-biisã lenga neb nins sẽn wa-b ne-bã.

¹⁴ A Zezi sẽn yã bõn-kãnga, a ka yɩ b sũurã noog baa bilf ye. La bãmb yeela b karen-biisã yaa: Bas-y kom-bõonegã tɩ b wa mam nengẽ la y ra gɩdg-b ye, tɩ Wẽnnaam soolmã yaa neb nins sẽn wẽnd-b bãmbã yĩnga.

¹⁵ Mam yeta yãmb sɩda tɩ ned ning fãa sẽn kõn deeg Wẽnnaam soolmã koɛɛg wa bi-bilfu, a kõn kẽ be ye.

¹⁶ Dẽ, bãmb deega kambã n tik-b ne b nusi, n ning-b barka.

¹⁷ A Zezi sẽn yik n dɩk sore, dao a yen n zoe n wa n yĩgimd bãmb taoor n sok bãmb yaa: Karen-saamb sõngo, bõe la mam na n maan n paam vɩɩm sẽn kõn sa?

¹⁸ A Zezi yeela yẽnda: Bõe tɩ fo boond maam tɩ sõngo? Nin-sõng ka be tɩ sã n ka Wẽnnaam b yen bala.

¹⁹ Fo mii tõodã: "Da kʋ ye. Da yo ye. Da zu ye. Da kɩs kaset-zĩrĩ ye. Da zãmb ned ye. Waoog f ba la f ma."

²⁰ Yẽ leoka bãmb yaa: Karen-saamba, mam saka rẽnda fãa hal m yãadem wakat tɩ ta moasã.

²¹ A Zezi ges-a lame n noang-a. La bãmb yeela yẽnda: Bũmb a yen n paoog foom. Kẽng n koos bũmb nins fãa fo sẽn tarã n kõ naong rãmba, la fo na paam paoong arzãna, la wa n tũ maam.

²² La koe-kãng kɩtame tɩ rao wã neng gãnem t'a loog ne sũ-sãoongo, bala, a rag n tara paoong wʋsgo.

²³ A Zezi wẽnegame n ges n yeel b karen-biisã: A na n yɩɩ toog ne neb nins sẽn tar-b arzegsã tɩ kẽ Wẽnnaam soolmẽ.

²⁴ A Zezi gom-kãng yɛɛsa b karen-biisã, la a Zezi kẽnga taoor n yeel-ba: M kamba, ad na n yɩɩ toog ne neb nins sẽn teegd arzegsã tɩ b kẽ Wẽnnaam soolmẽ.

²⁵ A yaa naana tɩ yʋgemd tũ fu-pĩim yõorẽ n looge, n yɩɩd tɩ arzɛk soab kẽ Wẽnnaam soolmẽ.

²⁶ Bãmb karen-biisã yɛɛsg paasame tɩ b sok taab yaa: Dẽ, ãnna n tõe n paam fãagre?

²⁷ A Zezi gesa bãmb n yeele: Ninsaal ka tõe bõn-kãng ye, la ka a woto ne Wẽnnaam ye. Bala, Wẽnnaam tõee bũmb fãa.

²⁸ A Pɩyɛɛr sɩngame n yeel bãmba: Gese, tõnd basa bũmba fãa n tũud yãmba.

²⁹ A Zezi leokame: Mam yeta yãmb sɩda, tɩ ned ka be sẽn na n bas a yiri, bɩ a ba-bi-raopa, bɩ a ba-bi-pogse, bɩ a ma, bɩ a ba, bɩ a kamba, bɩ a pʋt mam yĩnga la koe-noogã yĩnga,

³⁰ n ka paam yiyã, la ba-bi-raopa la ba-bi-pogse, la ma-rãmba, la kamba, la pʋt naoor koabga, la namsg ye. La wakat sẽn wata, a na paam vɩɩm sẽn kõn sa.

³¹ Taoor rãmb wʋsg na n lebga poorẽ dãmba, tɩ poorẽ dãmb wʋsg lebg taoor dãmba.

³² Bãmb bee sorẽ n dabd Zeruzalɛm, la a Zezi lʋɩɩ bãmb taoore. Bãmb karen-biisã yɛɛsame, la neb nins sẽn dag n pʋgd bãmbã da maanda yɩɩre. A Zezi leb n peega b karen-biis piig la a yiibã n sɩng n togs-b bũmb nins sẽn na n paam bãmbã.

³³ Gese, tõnd dabda Zeruzalɛm, la b na n yõka Ninsaal Bi-riblã n kõ maan-kʋʋdbã kãsem-dãmbã ne tõog karen-saam-dãmbã. La b na n kaoo bãmb bʋʋd n yeel tɩ b kʋ-ba. B na n ninga bãmb bu-zẽms nusẽ,

³⁴ b na n yaala bãmba, n tʋbs bãmb kolkoodo, n pãb bãmb ne kalwaase, n kʋ bãmba. La b ki tɩ rab tãtẽ, b na vʋʋge.

³⁵ A Zebde kom-dibli a Zak ne a Zã kolga a Zezi n yeel bãmb yaa: Karen-saamba, tõnd datame tɩ yãmb maan bũmb ning tõnd sẽn na n kos yãmbã n kõ-do.

³⁶ A Zezi soka bãmba: Bõe la yãmb dat tɩ mam maan n kõ yãmba?

³⁷ Bãmb yeelame: Yãmb sã n wa n be y naama sẽn tar ziirã pʋgẽ, sak-y tɩ tõnd ned a yembr zĩnd yãmb dɩtgo, t'a to wã zĩnd yãmb goabga.

³⁸ A Zezi leoka bãmb yaa: Yãmb ka mi bũmb ning yãmb sẽn kotã ye. Dẽ yĩnga, yãmb tõee n yũu bõn-yũudl ning mam sẽn na n yũ wã, la y reeg toog ning mam sẽn na n deegã?

³⁹ Bãmb yeelame tɩ b tõeeme! La a Zezi leoka bãmba: Yaa sɩda, yãmb na n yũu bõn-yũudl ning mam sẽn na n yũ wã, la y reeg toog ning mam sẽn na n deegã.

⁴⁰ La a ka be ne maam tɩ sak tɩ yãmb zĩnd mam dɩtgo wall mam goabg ye. La neb nins Wẽnnaam sẽn segl zĩ-kãng b yĩngã na paam-a.

⁴¹ Karen-biis piigã sẽn wʋm gom-kãngã, b sũur sãama ne a Zak la a Zã.

⁴² A Zezi boola bãmb n yeel-b yaa: Yãmb mi tɩ neb nins nebã sẽn get wa soolem nanamsã maanda b nebã pãnga, la tɩ nin-kãsemsã soo bãmb ne pãnga.

⁴³ La a kõn yɩ a woto yãmb sʋk ye. Ned sã n dat n yɩ kãseng yãmb sʋka, bɩ a yɩ yãmb tʋmtʋmda.

⁴⁴ La ned sã n dat n yɩ taoor soab yãmb sʋka, bɩ a yɩ yãmb fãa yamba.

⁴⁵ Tɩ bõe, Ninsaal Bi-riblã sẽn wa wã, ka tɩ nebã na tʋm bãmb yĩng ye, la yaa tɩ tʋm nebã yĩnga, la tɩ kõ b vɩɩm tɩ yɩ yaoodo, tɩ neb kʋʋng wʋsg tõe n paam yolsgo.

⁴⁶ Bãmb taa Zeriko. La bãmb sẽn yit Zeriko ne b karen-biisã la neb kʋʋng wʋsgã, a Time biig a Bartime ra zĩi sorã kɩreng n bõosdẽ.

⁴⁷ Yẽ sẽn wʋm tɩ yaa Nazarɛt Zezi n watã, a sɩngame n kelem n yeele: Zezi! A Daviid Bi-ribla! Zoe-y mam nimbãanega.

⁴⁸ Neb wʋsg lenga yẽnda n yeel-a t'a sĩndi, la a zẽka a koɛɛg n yɩɩd pĩnd n yeele: A Daviid Bi-ribla, zoe-y mam nimbãanega!

⁴⁹ A Zezi yalsame n yeel tɩ b bool-a. La b boola zoangã n yeel-a: Keng f sũuri. Yik tɩ b boonda foom.

⁵⁰ Zoangã loba a fuug tẽng n yik wʋgʋp, n wa a Zezi nengẽ.

⁵¹ A Zezi sok-a lame yaa: Bõe la fo rat tɩ mam maan n kõ foom? Zoangã leoka bãmb n yeele: M karen-saamba, m data m ninã pukri.

⁵² La a Zezi yeel-a lame: Kẽnge! Fo tẽeb n maag foom. Tao-tao bala, a paama a nini, la a sɩngame n tũ a Zezi sorã zugu.

11

¹ Bãmb sẽn kolg Zeruzalɛm n pẽneg Bɛtfaaze la Betani, oliiv tɩɩs tãngã sẽne, a Zezi tʋma b karen-biis a yiib n yeel-b yaa:

² Kẽng-y tẽng ninga sẽn be-a yãmb taoorã. Yãmb sã n kẽ tẽngã bala, y na n yãa bõn-bil sẽn loe, ned sẽn nan ka zomb-a ye. Lok-y-yã-a n wa-ne ka.

³ Ned sã n sok yãmb tɩ yaa bõe tɩ yãmb maand a woto? Bɩ y leok-a tɩ yaa Zu-soabã n dat-a, la bãmb na n kɩtame tɩ b leb n tall-a n wa ka moas-moasã bala.

⁴ Bãmb karen-biisã kẽngame n tɩ yã bõn-bil sẽn loe zak noore, sorã kɩrenga, la bãmb lok-a lame.

⁵ Neb kẽer sẽn be be soka bãmb yaa: Yãmb maanda bõe? Yaa bõe tɩ yãmb lokd bõn-bilã?

⁶ Bãmb leoka wa a Zezi sẽn da yeel bãmbã, la b basa bãmb tɩ b looge.

⁷ Bãmb waa ne bõn-bilã a Zezi nengẽ, n palg-a b futu, la a Zezi zomb-a lame.

⁸ Neb wʋsg yɛɛda b fut sorã zugu, tɩ kẽer gãneg tɩɩs vãad b sẽn kao pʋt pʋsẽ.

⁹ Neb nins sẽn be a Zezi taoorã ne neb nins sẽn pʋgd bãmbã kelmame n yeele: Hozaana! Bark bee ned ning sẽn wat ne Zu-soaba yʋʋrã zugu!

¹⁰ Bark bee soolem ning sẽn wat-a wã, tõnd ba a Daviid soolmã zugu. Hozaana hal saasẽ!

¹¹ A Zezi taa Zeruzalɛm n kẽ wẽnd-doogẽ wã. La bãmb sẽn ges bũmbã fãa n sa, rẽ tɩ zĩigã sobgame. La b yii be ne b karen-biisã piig la a yiibã n kẽng Betani.

¹² Vẽkembeoog yibeoogo, bãmb sẽn yit Betani, kom da tara a Zezi.

¹³ La b sẽn tool n yã kankang sẽn tar vãad yɩɩga, bãmb kẽngame n na n tɩ ges b sã n na paam bũmb beene. La b sẽn kolge, b ka yã bũmb ye, yaa vãad bala: Bala, kankam wakat nan ka ta ye.

¹⁴ Dẽ, bãmb yeela kankangã yaa: Ned kõn leb n dɩ fo biis yɛs ye, abada. La bãmb karen-biisã wʋmame.

¹⁵ Bãmb taa Zeruzalɛm, la a Zezi sẽn kẽ wẽnd-doogã zakẽ, b sɩngame n dig neb nins sẽn koosda, wall b raad beene wã. La b leeba ligd tekdbã taabl-dãmba la wan koaasdbã goeelse.

¹⁶ La bãmb ka sak tɩ ned baa a yen zã teoog n pɩʋʋg wẽnd-doogã zak ye.

¹⁷ La bãmb zãmsa nebã n yeele: Rẽ yĩnga, b ka gʋls tɩ "b na n boola mam doogã tɩ pʋʋsg roog buud fãa yĩng" sɩda? La yãmb maan-a lame t'a lebg wagda geongo.

¹⁸ Maan-kʋʋdbã kãsem-dãmbã ne tõog karen-saam-dãmbã wʋma a Zezi gomdã, la b baoo sor ning b sẽn na n tũ n kʋ-ba. Bãmb dag n zoeta a Zezi, bala, b zãmsgã ra kẽe neb kʋʋngã sõama.

¹⁹ La zĩ-sobd sẽn ta, a Zezi yii tẽngã ne b karen-biisã.

²⁰ La yibeoogo, bãmb sẽn loogda, b yãa kankangã sẽn kʋɩ ne a yẽgã fãa.

²¹ A Pɩyɛɛr sẽn tẽeg bũmb ninga sẽn dag n maanã, a yeela a Zezi yaa: Karen-saamba, ges-y-yã! Kankangã yãmb sẽn dag n kãab wẽngã, a kʋɩɩme.

²² A Zezi yeela bãmba: Maan-y tẽeb ne Wẽnnaam.

²³ Mam yeta yãmb sɩda, tɩ ned sã n yeel tãn-kãngã t'a serg a sẽn beẽ wã n kẽ ko-kãsengã pʋga, la a sã n ka sãmb a sũurã pʋgẽ, la a sã n tẽ tɩ bũmb ning yẽ sẽn yeelã na n yɩɩme, Wẽnnaam na n kɩtame tɩ yɩ a woto.

²⁴ Yaa woto yĩnga, mam yeta yãmba: Bũmb ning fãa yãmb sẽn na pʋʋs n kose, bɩ y tẽ tɩ y reeg-a lame, la yãmb na yã t'a pidsame.

²⁵ Yãmb sã n yas yĩngr n pʋʋsdẽ, yãmb sã n tara yell ne neda, bɩ y kõ-a sugri, tɩ yãmb ba sẽn be arzãnã me kõ yãmb sugr y beegrã yĩnga.

²⁶ La yãmb sã n ka maan sugri, yãmb ba sẽn be arzãnã me kõn maan yãmb sugr ne y beegrã ye.

²⁷ Bãmb leb n kẽnga Zeruzalɛm yɛsa, la a Zezi sẽn gõod wẽnd-doogẽ wã, maan-kʋʋdbã kãsem-dãmbã ne tõog karen-saam-dãmbã, ne kãsem-dãmbã waa bãmb nengẽ n sok-b yaa:

²⁸ Yãmb maanda bõn-kãens ne no-bʋgo, la ãnna n kõ yãmb noor tɩ y maane?

²⁹ A Zezi leoka bãmb yaa: Mam na n soka yãmb sokr a yembre. Leok-y maam tɩ mam na yaool n togs yãmb mam sẽn paam noorã zĩig ning n maand bõn-kãensã.

³⁰ A Zã lisgã yii arzãn bii, bɩ ninsaalb nengẽ? Leok-y maam.

³¹ La bãmb yẽsa ne taab a woto: Tõnd sã n leok t'a yii arzãna, bãmb na n yeelame tɩ la yaa wãn tɩ tõnd ka tẽ-a?

³² La tõnd sã n yeel t'a yii ninsaalb nengẽ, ha!... Bãmb dag n zoeta nebã, bala, nebã ra tẽedame t'a Zã sɩd yaa Wẽnnaam no-rɛɛs hakɩɩka.

³³ Dẽ, bãmb leoka a Zezi tɩ b ka mi ye. La a Zezi yeela bãmba: Mam me kõn togs yãmb mam sẽn paam noorã zĩig ning n maand bõn-kãensã ye.

12

¹ Dẽ poore, a Zezi sɩngame n tão bãmb yel-bũnd n yeele: Dao a yen n da sel a nasaar sib tɩɩse, n wẽ yãgr n gũbg-a, n tuk divẽ wẽkr boko la a me gãosgo. La yẽ gũnug-a-la ne sib koaadba la a bas n tog sore.

² La bõn-bɩʋʋng sẽn ta, yẽ tʋma tʋmtʋmd sib koaadbã nengẽ t'a tɩ reeg a pʋɩɩr n wa n kõ-a.

³ La bãmb yõka yẽnda n pãbe, n dig-a t'a lebg a nug-zaala.

⁴ La yẽ leb n tʋma tʋmtʋmd a to bãmb nengẽ, la b pãba yẽ zugã n yaal-a.

⁵ Yẽ tʋma a tãab soaba, la b kʋʋ yẽnda. La yẽ tʋma neb a taab wʋsgo, la b pãba kẽere, n kʋ kẽere.

⁶ Nin-yend tãa n da ket yẽ sẽn tõe n tʋme: A bi-ribl nongre. Yẽ yaool n tʋma yẽnda n tagsdẽ: B na n waooga mam biigã.

⁷ La sib koaadb kãens yẽsa ne taab n yeele: Yaa yõwã n na n soog a ba wã paoongã. Wa-y tɩ d kʋ-a tɩ paoongã lebg tõnd dẽnda.

⁸ La bãmb yõka yẽnda n kʋ, n yiis-a nasaar sibã pʋʋgẽ n lob kɛɛnga.

⁹ Woto wã, nasaar sib pʋʋgã soab na n maana bõe? Yẽ na n waame n kʋ sib koaadb kãense, la a rɩk pʋʋgã n gũnug koaadb a taaba.

¹⁰ Yãmb nan ka karem gʋls-sõmyã koe-kãngã laa? Kugr ninga tãn-metbã sẽn zãgsã lebga roogã pãng kugri, a soakã zĩigẽ wã.

¹¹ Yaa Zu-soabã n kɩt t'a yɩ a woto, la a yaa bõn-kãseng tõnd nifẽ. Gãosg nasaar sib pʋʋgẽ (12.1)

¹² Maan-kʋʋdbã kãsem-dãmbã ne tõog karen-saam-dãmbã la kãsem-dãmbã da rat n yõka a Zezi, la b zoee kʋʋngã. B bãngame tɩ yaa bãmb yell la a Zezi gom yel-bũndã pʋgẽ. La b basa a Zezi n looge.

¹³ Bãmb tʋma Fariisẽ-dãmba kẽer ne Herood poorẽ dãmb kẽer tɩ b tɩ maan sɩlem n kɩt t'a Zezi gom n yõk b meng n kõ-ba.

¹⁴ B waa n yeela a Zezi a woto: Karen-saamba, tõnd miime tɩ yãmb yaa sɩd soaba, la tɩ yãmb ka zoet ned baa a yen: Bala, yãmb ka tũusd neb ye. La yãmb zãmsda nebã Wẽnnaam sorã ne sɩda. Dẽ yĩnga, a zemsa ne tõnd tõogã tɩ yao Sezaar yõor yaood bɩ a ka zemse? Tõnd tog n yaoome bii, bɩ d ka tog n yao?

¹⁵ A Zezi sẽn mi b zãmbã leoka bãmb yaa: Yaa bõe tɩ yãmb makd maam? Wa-y ne lagf a yen tɩ m gese.

¹⁶ La b talla a yen n wa n kõ bãmba. La a Zezi sok-b lame yaa: Maasmã ne yʋʋrã yaa ãnna rẽnda? Bãmb leokame tɩ yaa Sezaar rẽnda.

¹⁷ Dẽ, a Zezi yeela bãmb yaa: Lebs-y Sezaar bũmb nins Sezaar sẽn so, la y lebs Wẽnnaam bũmb nins Wẽnnaam sẽn so. A Zezi leokrã yɛɛsa bãmba.

¹⁸ Saduusẽ-dãmba sẽn yet tɩ kũum vʋʋgr ka be wã waa a Zezi nengẽ n sok bãmb a woto:

¹⁹ Karen-saamba, a Moyiis ra gʋlsame n yeel tõnd tɩ: "Ned sã n ki n bas a paga, n ka tar biiga, bɩ a ba-biig reeg a pagã n dog kamb a ba-biigã yĩnga."

²⁰ Raop a yopoe n da be n ya ba-biisi. Kẽem soabã peega paga, la a kiime n ka paam biig ye.

²¹ Yiib soabã reega pʋgkõorã, la yẽnda me kiime n ka paam biig ye. Tãab soaba me yɩɩ a woto.

²² Bãmb b yopoe wã ned baa a yen ka paam biig ye. Bãmb fãa sẽn ki, pagã me yaool n kiime.

²³ Kũum vʋʋgr wakate, pagã na n yɩɩ ãnna soab paga? Bala, yẽ yɩɩ bãmb b yopoe wã fãa paga.

²⁴ A Zezi leoka bãmba: Ka yãmb sẽn ka wʋmd gʋls-sõamyã, wall Wẽnnaam pãngã võor yĩng la yãmb tudg-y sɩda?

²⁵ Tɩ bõe, kũum vʋʋgr wakate, raop ka na n le rɩgs pagba, pagb me ka na n kuil sɩdba: Bãmb na n yɩɩ wa malegsã sẽn be arzãnã.

²⁶ La ne kũum vʋʋgrã yelle, yãmb nan ka karem a Moyiis sebrẽ wã, Wẽnnaam sẽn gom ne a Moyiis to-to, tuugã sẽn wit bugma sɛɛgẽ wã n yeele tɩ: "Mam yaa a Abraham Wẽnnaam, a Izak Wẽnnaam la a Zakob Wẽnnaam" laa?

²⁷ Wẽnnaam ka kũum Wẽnnaamã ye b yaa nin-vɩɩse Wẽnnaam. Ad yãmb tudgrã yaa kãsenga!

²⁸ Tõog karen-saamb a yembr sẽn wʋm bãmb goama, la a sẽn yã t'a Zezi leoka bãmba ne yam, a kolgame n sok bãmb yaa: Tõodã fãa sʋka, bʋg n yɩɩda?

²⁹ A Zezi leokame n yeele: Ad tõog ning sẽn yɩɩd-a wã: "Israyɛl dãmba, kelg-y-yã. Zu-soaba, tõnd Wẽnnaamã yaa Zu-soab b yen tãa.

³⁰ Nong Zu-soaba fo Wẽnnaam ne f sũur fãa la f ratem fãa la f yam fãa la f pãng fãa."

³¹ Tõog ninga sẽn pʋgd-a yẽ la woto: "Nong f to wa f menga." Tõog ka be sẽn yɩɩd bãmba ye.

³² Tõog karen-saambã yeela bãmb yaa: Karen-saamba, y gomd yaa sɩda. Wẽnnaam sɩd yaa b yen tãa, la a to ka be kal bãmb bala,

³³ la tɩ nong bãmb ne f sũur fãa la f yam fãa la f pãng fãa, la tɩ nong f to wa f menga, a yɩɩda maand sẽn yõogd bugum la maand buud a taabã fãa.

³⁴ A Zezi sẽn yã tɩ yẽ leoka ne yam, b yeel-a lame: Fo ka zãr ne Wẽnnaam soolem ye. La ned baa a yen ka saag n le sok bãmb bũmb ye.

³⁵ A Zezi sẽn zãmsd nebã wẽnd-doogẽ wã, b sokame: Yɩta a wãn tɩ tõog karen-saam-dãmbã yetẽ tɩ Kirist yaa a Daviid biiga?

³⁶ Sɩɩg-sõng kɩtame t'a Daviid meng yeel tɩ: "Zu-soaba yeela mam Zu-soaba yaa: Zĩnd mam dɩtgo, hal tɩ m kɩt tɩ f tab f bɛɛbã n zĩẽ."

³⁷ A Daviid meng boonda bãmb tɩ Zu-soaba. Dẽ, bãmb na n yɩɩ a wãn n le yɩ a Daviid biiga? La neb kʋʋng wʋsg kelga bãmb ne sũ-noogo.

³⁸ Zãmsgã pʋgẽ, a Zezi yeela nebã yaa: Gũus-y y mens ne tõog karen-saam-dãmbã sẽn nong n gõ ne fu-bɛda, n dat tɩ nebã pʋʋsd bãmb raas pʋsã.

³⁹ Bãmb baooda waoogr zaoods karen-dotẽ la rɩɩb zĩisẽ.

⁴⁰ Bãmb gʋsda pʋgkõap paoongo, la b pʋʋsd pʋʋs-wogd nebã gesg yĩnga. Bãmb na n paama sɩbgr sẽn ya toog n yɩɩd a taabã.

⁴¹ A Zezi zĩndame n tees b neng ligdã koglgã, n get kʋʋngã sẽn ningd ligdã be wã. Arzegs rãmb wʋsg ninga ligd wʋsgo.

⁴² Pʋgkõor a yen sẽn ya naong soab n wa n ning lagd-bõoneg sẽn zem tãma.

⁴³ La a Zezi boola b karen-biisã n yeel-ba: Mam yeta yãmb sɩd-sɩd tɩ pʋgkõ-kãngã sẽn ya naong soabã kõome n yɩɩd neba fãa sẽn ning ligd ligdã koglgẽ wã.

⁴⁴ Tɩ bõe, bãmb ned kam fãa tʋm n yõngame n ningi, la yẽ sẽn ka tarã, a pɩɩsa a meng zãng n kɩse, hal a rɩɩb ligdi.

13

¹ A Zezi sẽn yit wẽnd-doogẽ wã, bãmb karen-biig a yembr yeela bãmb yaa: Karen-saamba, ges-y kugã neerlem la rotã bedrem!

² A Zezi leoka yẽnda: Fo nee ro-kãsems kãensã? Kugr baa a yen kõn pa a to zug b sẽn kõn leeb n lub ye.

³ A Zezi zĩnda oliiv tɩɩs tãngã sẽn be wẽnd-doogã neng taoorã zugu. Bãmb sẽn ya b yen tɩ neb a taab ka be ne bãmba, a Pɩyɛɛr ne a Zak la a Zã la Ãndre kosa a Zezi a woto:

⁴ Wilg-y tõnd bõn-kãng sẽn na n wa wakat ninga, la bãnd sẽn na n wilg bõn-kãens fãa saab wakate.

⁵ La a Zezi sɩngame n yeel bãmba: Gũus-y y mens neer tɩ ned da tõog n tudg yãmb ye.

⁶ Bala, neb wʋsg na n dɩka mam yʋʋr n wa n yeel tɩ bãmb yaa maam, la b na n tudga neb wʋsgo.

⁷ Yãmb sã n wʋm zabr rãamde, la y wʋm zabr kibare, bɩ y ra yɛɛs ye, tɩ bõe, yaa tɩlɛ tɩ bõn-kãens fãa zĩndi, la rẽ nan ka wakat saab nand ye.

⁸ Tẽng a ye rãmb na n yika zabr ne tẽng a to rãmba, tɩ soolem a ye rãmb yik ne soolem a to rãmba. La tẽn-digimdg na n zĩnda zĩig-zĩiga, la kom na n zĩndame. Bõn-kãens fãa na n yɩɩ wa rogem toog sɩngr bala.

⁹ Gũus-y y mense. Neb na n yõga yãmb n kẽng bʋʋd zĩisẽ, la b na n pãba yãmb karen-dot pʋse. Neb na n yõga yãmb n kẽng Gʋvɛrneer dãmba la rĩm-dãmb taoor mam yĩnga, tɩ bãmb paam n wʋm kasetã.

¹⁰ Yaa tɩlɛ tɩ koe-noogã reng n moon tẽnsã fãa pʋse.

¹¹ La b sã n yõg yãmb n kẽnd bʋʋdã zĩigẽ, bɩ y ra maan yɩɩr ne yãmb sẽn na n tɩ yeel tɩ bũmb ning ye. Togs-y bũmb ning Wẽnnaam sẽn na n wilg yãmb wakat kãngã, bala, ka yãmb n na n gom ye, yaa Sɩɩg-sõngo.

¹² Ned na n zãmba a ba-biig tɩ b kʋ-a. Kamb na n yika ne b ba-rãmb la b ma-rãmba, n kɩt tɩ b kʋ-ba.

¹³ Neb na n kisga yãmb mam yʋʋrã yĩnga, la ned ninga fãa sẽn na yals kãenkãe hal tɩ wakat ta na paam fãagre.

¹⁴ Yãmb sã n wa n yã "sãoong bõn-wẽngã" t'a be zĩig ning sẽn ka zems t'a beẽ wã - bɩ sẽn karemd-a wã wʋm a võor sõama - bɩ neb nins sẽn be Zude soolmẽ wã zoe n dʋ tãensã.

¹⁵ Bɩ ned ning sẽn be a roog zug ra sig n kẽ a roogẽ n na n dɩk bũmb ye.

¹⁶ La bɩ ned ning sẽn be a pʋʋgẽ ra lebg n tɩ rɩk a fuug ye.

¹⁷ Pagb nins sẽn tʋta la sẽn yẽsemd kamb na yã toog da-kãens daare.

¹⁸ Pʋʋs-y tɩ bõn-kãens ra yɩ waood wẽnd ye.

¹⁹ Tɩ bõe, tood nins sẽn na n zĩnd da-kãens daarã, sẽn sɩng ne Wẽnnaam sẽn naan dũni hal tɩ ta moasã, a buud nan ka zĩnd ye, la tood a woto buud kõn leb n zĩnd ye, abada.

²⁰ Zu-soabã sã n da ka boogẽ da-kãens sõore, ned baa a yen dag n kõn põs ye. La nin-tũusdsã bãmb sẽn tũusã yĩnga, bãmb booga da-kãens sõore.

²¹ Dẽ, ned sã n yeel yãmb tɩ Kirist bee ka, wall b bee ka sẽne, bɩ y ra tẽ-a ye.

²² Tɩ bõe, neb sẽn yagd zĩrĩ tɩ b yaa Kirist, la neb sẽn yagd zĩrĩ tɩ bãmb yaa Wẽnnaam no-rɛɛsdb na n yikame n maan bãna la bõn-yɛɛsdse, tɩ b sã n tõe, bɩ b tudg nin-tũusdsã.

²³ Gũus-y y mense. Mam pĩnd n togsa yãmb bũmba fãa.

²⁴ Wakat kãnga, to-kãng zugẽ, wĩntoogã na n sobgame la kiuugã kõn kõ a vẽenem yɛs ye.

²⁵ Ãdsã na n yii yĩngr n dʋʋge, la saasẽ pãens rãmbã na n digimdame.

²⁶ Dẽ poore, nebã na n yãa "Ninsaal Bi-riblã sẽn wat ne sawato," ne pãn-kãsenga, la naam.

²⁷ La bãmb na n tʋma b malegsã, n tigs b nin-tũusdsã sẽn be dũni kɩrems a naasã, hal dũni tɛk tɩ ta yĩngr tɛka.

²⁸ Ges-y kankang n paam zãmsgo: a sã n tão wil-poal n tobdẽ, yãmb miime tɩ sig-noor kolgdame.

²⁹ Woto me, yãmb sã n yã tɩ bõn-kãens maandẽ, bɩ y bãng tɩ Ninsaal Bi-riblã waoong kolgame, la b waame n sa.

³⁰ Mam yeta yãmb sɩda, tɩ zamaan kãngã kõn looge, hal tɩ bõn-kãens fãa paam pidsgu.

³¹ Yĩngr la tẽng na looge, la mam goamã kõn tol n loog ye, abada.

³² Sã n yaa ne da-kãng daare la a wakatã, ned baa a yen ka mi ye: Malegs sẽn be arzãn ka mi, bi-riblã me ka mi. Yaa m ba bal n mi.

³³ Gũus-y neere. Neend-y, tɩ bõe, yãmb ka mi wakat ninga ra-kãng sẽn na n wa ye.

³⁴ A na n yɩɩ wa rao sẽn togd sore, n bas a yir ne a tʋmtʋmdbã, n wilg ned kam fãa a tʋʋmde la a yeel zag-no-gũudã t'a gũ.

³⁵ Woto yĩnga, neend-y, tɩ yãmb ka mi wakat ning yirã soab sẽn na n wa wã ye. Tõe n yɩɩ zĩ-sobdo, wall yʋʋn-sʋka, wall no-kɛleng wakate, wall yibeoogo.

³⁶ Maan-y rabeem tɩ b ra ling n wa n mik tɩ yãmb gõeeme ye.

³⁷ Bũmb ning mam sẽn yet yãmbã, mam yet-a-la neba fãa: Neend-y-yã.

14

¹ Ra keta rasem a yiib tɩ ta zʋʋg-n-bas kibsã, la bur sẽn ka rã-bɩll kibsã. La maan-kʋʋdbã kãsem-dãmbã ne tõog karen-saam-dãmbã da baooda sɩlem ning bãmb sẽn na n maan n paam n yõk a Zezi n kɩt tɩ b kʋ.

² La b yeelame tɩ b ra maan kibsã wakate, tɩ rãmbg ra wa n zĩnd nebã sʋk ye.

³ A Zezi sẽn be Betani n zĩ yĩng soab a Sɩmo roogẽ n dɩtẽ, pag a yembr n wa be n tar albatre tʋk sẽn pid ne naar halaal tɩdar kaam, a raab sẽn ya toogo. La a wãaga tʋkã n kiig kaamã a Zezi zugu.

⁴ Bãmb karen-biis kẽer sũy yikame tɩ b gom ne taab n yeel tɩ yaa bõe tɩ b sãam tɩdar kaamã?

⁵ Tɩ b ra tõe n koos-a-la deniye kobs-tã n kõ naong rãmba. La b yẽgma ne pagã.

⁶ La a Zezi yeel-b lame: Bas-y-yã-a laafɩ. Bõe tɩ yãmb namsd-a? A maana maam yel-sõmde.

⁷ Tɩ bõe, naong rãmb na n kell n bee ne yãmb wakat fãa, la yãmb tõe n maan-b la neer y sẽn dat wakate. La mam ka na n be ne yãmb daar fãa ye.

⁸ Pagã maana a sẽn tõe. A pĩnd n ninga mam yĩngã tɩdar kaam m mumb yĩnga.

⁹ Mam yeta yãmb sɩda tɩ dũni tɛk fãa, zĩig ning fãa b sẽn na n moon koe-no-kãngã, b na n togsa bũmb ning pagã sẽn maanã, a tẽegr yĩnga.

¹⁰ A Zudas Iskaryo sẽn ya a Zezi karen-biis piig la a yiibã ned a yembr kẽnga maan-kʋʋdbã kãsem-dãmb nengẽ n tɩ yeel-b t'a na n yõka a Zezi n kõ-ba.

¹¹ Koe-kãng yɩ-b la noogo, tɩ b kãab-a ligdi. La a Zudas baoo weer ninga a sẽn na paam n yõk bãmb n kõ.

¹² Bur sẽn ka rã-bɩll kibsã pipi daar sẽn ya zʋʋg-n-basã pe-bilã kʋʋb raare, a Zezi karen-biisã soka bãmb tɩ b ratame tɩ bãmb kẽng n tɩ segl zʋʋg-n-basã kibs rɩɩb yɛ bãmb yĩnga.

¹³ La a Zezi tʋma b karen-biis a yiib n yeel-ba: Kẽng-y tẽngã pʋgẽ, la yãmb na n sega rao sẽn zɩt koom ne yʋʋre. Pʋg-y yẽnda.

¹⁴ La a sẽn na n kẽ zak ningã, bɩ y yeel yirã soab tɩ karen-saamb sokdame yaa: "Zĩig bee yɛ mam sẽn na n dɩ zʋʋg-n-basã kibs ne m karen-biisã?"

¹⁵ La a na n wilga yãmb do-kãseng sẽn be roog zugu, sẽn segle, tɩ teed fãa be a pʋgẽ. Yaa be la yãmb na n segl pakã tõnd yĩnga.

¹⁶ Karen-biisã loogame n kẽng tẽngã pʋgẽ, la b mikame tɩ bũmba fãa yɩɩ wa a Zezi sẽn da yeelã, la b segla zʋʋg-n-basã kibsã.

¹⁷ Zĩ-sobd sẽn ta, bãmb waa ne b karen-biisã piig la a yiibã.

¹⁸ Bãmb sẽn zĩ n dɩtẽ, a Zezi yeelame: Yãmb ned a yen sẽn dɩt ne maamã n na n zãmb maam.

¹⁹ Sũ-sãoong sɩng n yõka bãmb tɩ b sok a Zezi yembr-yembre: Yaa maam?

²⁰ A Zezi leoka bãmba: Yaa yãmb piig la a yiibã ned a yembr sẽn tʋmd a nug ne maam laagẽ wã.

²¹ Ninsaal Bi-riblã na n kii wa b sẽn gʋls b yellã to-to wã. La rao ning sẽn na n yõk-a bãmb n kõ wã na n paama toogo. Rao-kãng ma sã n dag n ka rogẽ-yã-a n são.

²² Rɩɩbã wakate, a Zezi rɩka bur n ning bark n kao n kõ bãmb n yeele: Deeg-y n dɩ-y-yã. Yõwã yaa mam yĩngã.

²³ Dẽ poore, bãmb dɩka bõn-yũudla, n ning-a bark n kõ b karen-biisã, la b fãa yũume.

²⁴ La a Zezi yeela bãmb yaa: Yõwã yaa mam zɩɩm, kãab-paalg zɩɩm sẽn daag neb wʋsg yĩnga.

²⁵ Mam yeta yãmb sɩda, tɩ mam kõn leb n yũ nasaar sib biis koom yɛs ye, hal tɩ ta daar ninga mam sẽn na n yũ a paalg Wẽnnaam soolmẽ wã.

²⁶ Bãmb sẽn yɩɩl yɩɩlã n sɛ, bãmb kẽnga oliiv tɩɩs tãngã zugu.

²⁷ A Zezi yeela b karen-biisã yaa: Yãmb fãa na n targ n basa maam. Tɩ bõe a gʋlsa a woto: "Mam na n wẽe pe-kɩɩmã, la piisã na n sãeegame."

²⁸ La mam sã n vʋʋge, mam na n denga yãmb taoor Galile.

²⁹ A Pɩyɛɛr yeela bãmb yaa: Baa neba fãa sã n targ n bas yãmba, mam yẽ kõn targ ye.

³⁰ A Zezi leoka yẽnda: Mam yeta foom sɩda, tɩ rũnna, yʋngã bala, sẽn deng no-raoog kɛleng a yiib soabã, foo, fo na n kɩɩsa naoor a tãab tɩ f ka mi maam ye.

³¹ La a Pɩyɛɛr yeela ne pãng n yɩɩd pĩnda, tɩ baa sã n ya tɩlɛ tɩ yẽ naag bãmb n ki, yẽ kõn kɩɩs t'a ka mi bãmb ye. La bãmb fãa me yeela a woto.

³² Bãmb taa zĩig a yen sẽn boond tɩ Getsemaane. La a Zezi yeela b karen-biisã tɩ b zĩnd ka tɩ bãmb kẽng n tɩ pʋʋs la b wa.

³³ B peega a Pɩyɛɛr ne a Zak la a Zã tɩ b tũ bãmba. A Zezi sɩngame n paam sũur zɩ-kãsenga.

³⁴ Bãmb yeela a Pɩyɛɛr dãmb yaa: Sũ-sãoong n tar maam hal n dat n kʋ maam. Pa-y ka n neende.

³⁵ Dẽ, a Zezi kẽnga taoor bilfu, n vãbend tẽng n pʋʋs n yeel tɩ sã n da tõeẽ bɩ to-kãngã da paam bãmb ye.

³⁶ Bãmb yeelame: Abba, m ba, yãmb tõee bũmb fãa. Yiis-y bõn-yũudl kãngã mam taoore. Baoosgo, da maan-y mam daab ye, maan-y y raabo.

³⁷ A Zezi waa b karen-biisã nengẽ n mik tɩ b gõeeme. La bãmb yeela a Pɩyɛɛr yaa: Sɩmo, fo gõeeme laa? Fo ka tõe n neend lɛɛr a yembre?

³⁸ Neend-y la y pʋʋse n da wa n lʋɩ makr pʋg ye. Sɩɩgã ratame, la yĩngã bee pãn-komsem pʋgẽ.

³⁹ A Zezi leb n zãaga bilf n tɩ pʋʋs wa pĩndã bala.

⁴⁰ Bãmb leb n waa n mikame tɩ b karen-biisã gõeeme yɛsa, tɩ bõe, gõeema ra tar-b la wʋsgo. La b karen-biisã ka mi b sẽn na n leok bãmb tɩ bũmb ning ye.

⁴¹ A Zezi leb n waa naoor a tãab soab n yeel bãmb yaa: Kell n gũs-y moasã n vʋʋse. Maan n saame. Wakatã taame. Ges-y-yã, b zãmba Ninsaal Bi-riblã n kõ yel-wẽn maandbã.

⁴² Yik-y tɩ d kẽnge. Ned ninga sẽn na n zãmb-a maam n yõk n kõ wã kolgdame.

⁴³ A Zezi sẽn nan ket n gomda, a Zudas sẽn ya bãmb karen-biisã piig la a yiibã ned a yembr waame, la a waa ne neb kʋʋng maan-kʋʋdbã kãsem-dãmbã ne tõog karen-saam-dãmbã ne kãsem-dãmbã sẽn tʋm, la b zãada sʋʋs ne roaya.

⁴⁴ Ned ning sẽn na n zãmb a Zezi wã dag n kõo bãmb bãnd n yeel tɩ ned ninga yẽ sẽn na n mokã, yaa soab kõng la a Zezi. Bɩ b yõk-a, n gũ-a neer n tall n looge.

⁴⁵ A Zudas sẽn ta bala, a kolga a Zezi n yeel-b tɩ "karen-saamba", la a mok-ba.

⁴⁶ Neb a taabã yõka a Zezi. A Zudas waa ne sodaase (14.43)

⁴⁷ Ned a yen sẽn dag n be be wõoga a sʋʋg n kɛ maan-kʋʋd kãsmã tʋmtʋmd n fiuug a tʋbre.

⁴⁸ A Zezi goma ne-b n yeele: Yãmb waa ne sʋʋs la roay n na n yõk maam wa m yaa fãada!

⁴⁹ Mam dag n bee ne yãmb daar fãa n zãmsd nebã wẽnd-doogẽ wã, la yãmb ka yõk maam ye. La yaa tɩ gʋls-sõmyã na paam pidsgu.

⁵⁰ La bãmb karen-biisã fãa basa bãmb n zoe.

⁵¹ Bi-bɩɩg a yembr n dag n lob fu-goabg bal n tũ bãmba.

⁵² La b gãda yẽnda t'a bas a fu-goabgã n zoe beelle.

⁵³ Bãmb talla a Zezi n kẽng maan-kʋʋdbã kãsem yiri, zĩig ning maan-kʋʋdbã kãsem-dãmba fãa la kãsem-dãmbã ne tõog karen-saam-dãmbã sẽn tigmã.

⁵⁴ A Pɩyɛɛr pʋgla bãmb yɩɩg-yɩɩga, n ta maan-kʋʋdbã kãsem zakẽ n zĩnd ne tʋmtʋmdbã n woot bugum.

⁵⁵ Maan-kʋʋdbã kãsem-dãmbã ne kaoreng yɛl bʋ-bʋʋdbã fãa baoo kaset dãmb sẽn na n dõd a Zezi n kɩt tɩ b kʋ-ba, la b ka yã ye.

⁵⁶ Bala, neb wʋsg yaga zĩrĩ n dõd bãmba la b kasetã ka zems taab ye.

⁵⁷ Neb kẽer yik n kɩsa kaset zĩrĩ ne bãmb yell n yeel tɩ bãmb wʋma a Zezi sẽn yeel tɩ:

⁵⁸ Mam na n sãama Wẽnd-do-kãnga ninsaalb nus sẽn me wã, n lebs n me a to ninsaalb nus sẽn ka me, dasem a tãab pʋgẽ.

⁵⁹ La baa ne yel-kãnga, bãmb kasetã ka zems taab ye.

⁶⁰ Dẽ, maan-kʋʋdbã kãsem yika tigingã sʋk n sok a Zezi yaa: Yãmb ka leokd tɩ bũmb laa? Yaa bõe rõadg la nebã rõt yãmbã?

⁶¹ A Zezi sĩndame n ka leok tɩ bũmb ye. Maan-kʋʋdbã kãsem soka bãmb yɛsa, bãmb sã n yaa Kirist, Wẽnnaam sẽn ya bark soabã Bi-ribla.

⁶² A Zezi leokame n yeele: Mam sɩd yaa Kirist. La yãmb na n yãa "Ninsaal Bi-riblã sẽn zao sẽn-tõe-a-fãa wã soabã rɩtgo, la b sẽn wat ne sawato."

⁶³ Dẽ, maan-kʋʋdbã kãsem pãrsa a fut n yeele: Tõnd le rata kaset rãmb n maan bõe?

⁶⁴ Yãmb wʋma b sẽn gom n paoog Wẽnnaamã. Yãmb tagsda a wãna? La nebã fãa kaoo bãmb bʋʋd n yeel tɩ b zemsa kũum.

⁶⁵ Neb kẽer sɩngame n tʋbs bãmb kolkoodo, n pil bãmb neng ne peend n pãb bãmb ne nug-gila, n yeel bãmb yaa: Togs-y bãngr goama. La tʋmtʋmdbã deega a Zezi n laal bãmb pegse.

⁶⁶ A Pɩyɛɛr sẽn zĩ zakã pʋgẽ wã, maan-kʋʋdbã kãsem tʋmtʋmd-poak n wa be.

⁶⁷ A sẽn yã a Pɩyɛɛr sẽn woot bugmã, a ges-a lame n yeel-a: Yãmb me ra bee ne Nazarɛt dao a Zezi.

⁶⁸ Yẽ kɩɩsame n yeele: Mam ka mi ye. Mam ka bãng fo sẽn dat n togs bũmb ningã ye. La a yiime n kẽng zãongẽ wã. La no-raoog kelmame.

⁶⁹ Tʋmtʋmd-poakã sẽn yã yẽnda, a leb n sɩngame n wilg neb nins sẽn be be wã t'a Pɩyɛɛr yaa a Zezi neda.

⁷⁰ La a Pɩyɛɛr leb n kɩɩsame tɩ ka sɩd ye. Sẽn yɩ bilfu, neb nins sẽn be be wã yeela a Pɩyɛɛr: Fo sẽ ya bãmb neda, bala, fo yaa Galile ned wɛ!

⁷¹ La a sɩngame n kãab a meng n wẽen n yeele: Mam ka mi rao ning yãmb sẽn gomd a yellã ye.

⁷² Wakat kãng bala, no-raoog kelma naoor a yiib soaba. La a Pɩyɛɛr tẽega gomd ning a Zezi sẽn dag n yeel yẽ wã: Sẽn deng no-raoog sẽn na n kelem naoor a yiibu, fo na n kɩɩsa naoor a tãab tɩ f ka mi maam ye. La a sẽn tagse, a yãbame.

15

¹ Yibeoog pĩnda, maan-kʋʋdbã kãsem-dãmb tigma ne kãsem-dãmbã la tõog karen-saam-dãmbã, la kaoreng yɛl bʋ-bʋʋdbã fãa. Bãmb sẽba a Zezi n tall-b n tɩ kɩs a Pilat.

² A Pilat soka a Zezi: Yãmb yaa Zuif-rãmbã rĩma? A Zezi leoka yẽ a woto: Yãmb n yeele.

³ Maan-kʋʋdbã kãsem-dãmbã rõda bãmb ne bũmb wʋsgo.

⁴ A Pilat leb n soka bãmb yaa: Yãmb ka leokd tɩ bũmb laa? Ges-y bũmb nins fãa b sẽn dõt yãmbã.

⁵ La a Zezi ka tol n leok tɩ bũmb ye. La rẽ yɛɛsa a Pilat.

⁶ Kibs fãa, a Pilat dag n yiisda bi-bɛɛg a yen, nebã sẽn kos a soabã n base.

⁷ La ned a yen sẽn boond t'a Barabas dag n bee bi-bees roogẽ ne tẽn-dãmbdba, tɩ bõe, tẽn-dãmbg wakate, b kʋʋ neda.

⁸ Kʋʋngã rʋʋme n tɩ kos a Pilat bũmb ning a sẽn mi n maand n kõt bãmbã.

⁹ A Pilat soka bãmb b sã n datame t'a bas Zuif-rãmbã dĩmã n kõ-ba.

¹⁰ Bala, yẽ bãngame tɩ yaa sũ-kiir yĩng la maan-kʋʋdbã kãsem-dãmbã yõk a Zezi n wa n kɩs yẽnda.

¹¹ La maan-kʋʋdbã kãsem-dãmbã kɩtame tɩ nebã kos tɩ b yiis a Barabas n base.

¹² A Pilat leb n gomame n sok bãmb tɩ b ratame tɩ yẽ maan a soab ning bãmb sẽn boond tɩ Zuif-rãmbã dĩmã bõe?

¹³ Bãmb leb n kelmame n yeele: Ka-y bãmb da-pɩk zugu.

¹⁴ A Pilat soka bãmba: B maana bõe sẽn ya wẽnga? La nebã leb n kelma ne pãng n yɩɩd pĩnda: Ka-y bãmb da-pɩk zugu.

¹⁵ A Pilat sẽn dat n noog neba sũur yĩnga, a yiisa a Barabas n base. La yẽ sẽn kɩt tɩ b pãb a Zezi ne kalwaase, yẽ rɩka bãmb n kõ nebã tɩ b ka-b da-pɩk zugu.

¹⁶ Sodaasã talla a Zezi n kẽng zaka pʋgẽ, sẽn dat n togs tɩ sodaasã zakẽ, la bãmb tigma sodaasã fãa sẽn be zĩ-kãngã.

¹⁷ B yeelga a Zezi fu-miuugu, la b kala gõos wa maanfo n fõgen bãmb zugu.

¹⁸ Dẽ, sodaasã sɩngame n pʋʋs bãmb n yeele: Zuif-rãmbã dĩma, tõnd pʋʋsda yãmba.

¹⁹ La bãmb wẽe a Zezi zug ne tãnwĩiga, n tʋbs bãmb kolkoodo, la b yĩgimdame n wõgemd bãmb taoore.

²⁰ Bãmb sẽn yaal a Zezi a woto n sɛ, b pidga fu-miuugã n lebs a Zezi futã n yeelg-ba, la b talla bãmb n na n tɩ ka da-pɩk zugu.

²¹ Bãmb modga ned a yen sẽn yi weoogẽ n loogdẽ t'a tʋk a Zezi da-pɩkã. A yʋʋr la a Sɩmo, n ya Sirɛn neda. Yẽ yaa a Alegsãndr ne a Rufus ba.

²² Bãmb talla a Zezi n kẽng zĩig ning sẽn boond tɩ Golgota, sẽn dat n togs tɩ zu-wang zĩiga.

²³ Bãmb kõo a Zezi rãam sẽn kalem ne miir la a Zezi ka yũ ye.

²⁴ Bãmb kaa a Zezi da-pɩk zugu, la b pʋɩɩ bãmb futã n maan bãnde, n na n bãng ned kam fãa sẽn na n paam fuug ninga.

²⁵ Yaa sõ-bɩɩmd wakat la b ka bãmb da-pɩkã zugu.

²⁶ Gʋlsem ning sẽn wilgd b sẽn dõd bãmb ne bũmb ningã yeta a woto: Zuif-rãmbã rĩma.

²⁷ Bãmb kaa fãadb a yiib da-pɩgs zut ne a Zezi: A yembr b rɩtgo, a to wã b goabga.

²⁸ Woto, gʋls-sõng sẽn yet tɩ b lagma bãmb ne wẽng maandbã paama pidsgu.

²⁹ Neb nins sẽn loogd be wã tʋʋ bãmba, n gõms b zut n yeele: N-faa! Yãmb sẽn tõe n sãam wẽnd-doogã n lebs n me-a rasem a tãabã,

³⁰ bɩ y fãag y meng n wa n sig da-pɩkã zugu.

³¹ Maan-kʋʋdbã kãsem-dãmbã ne tõog karen-saam-dãmbã me goma ne taab n yaal bãmb n yeele: B fãaga neb a taaba, n yaool n ka tõe n fãag b meng ye.

³² Bɩ Kirist sẽn ya Israyɛl dĩmã sig da-pɩkã zug moasã tɩ d yã n tẽ. La neb nins b sẽn ka da-pɩgs zut ne bãmbã me goma bãmb wẽnga.

³³ Sẽn ta wĩnto-sʋka, dũni gill fãa lebga lik bida hal tɩ ta wẽn-kaoore.

³⁴ La wẽn-kaoor wakate, a Zezi zẽka b koɛɛg n kelem n yeele: Eloyi! Eloyi! Lama sabaktani? Sẽn dat n togs tɩ: "Mam Wẽnnaam! Mam Wẽnnaam! Yaa bõe tɩ yãmb bas maam?"

³⁵ Neb kẽer sẽn dag n be be wã sẽn wʋm a woto, b yeelame: Gese, bãmb boonda a Eli.

³⁶ La bãmb ned a yembr wudgame n dɩk needg n los miismẽ, n yaag n sel tãnwĩig n kõ bãmb tɩ b yũ, la a yeele: Bas-y tɩ d ges a Eli sã n na wa n sik bãmba.

³⁷ La a Zezi zẽka b koɛɛg n kelem ne pãnga, la b kiime.

³⁸ Wẽnd-doogã fu-lilldig sɩnga yĩngr n kẽeg n tãag tẽnga.

³⁹ Sodaas koabg naabã sẽn dag n yas t'a neng tees a Zezi wã, a sẽn yã b kũuma sẽn yɩ to-to wã, a yeelame: Hakɩɩka, rao-kãngã yaa Wẽnnaam Bi-ribla.

⁴⁰ Pagb me n dag n be be n yas yɩɩg n getẽ. A Maari sẽn yit Magdala, ne a Maari sẽn ya a Zak-bil ne a Zoze ma, la a Salome da bee bãmb sʋka.

⁴¹ Bãmb dag n tũuda a Zezi n sõngd bãmb wakat ninga b sẽn dag n be Galile. Pagb a taab wʋsg da tũu a Zezi n wa Zeruzalɛm.

⁴² Dag n yaa seglg daare, sẽn dat n togs tɩ daar ninga sẽn deng vʋʋsg daarã. La wĩndgã sẽn kolg lʋɩɩs yĩnga,

⁴³ a Zozɛf sẽn yit Arimate waame. Yẽ yaa kaorengã yɛl bʋ-bʋʋd neba fãa sẽn waoogda, la a me rag n gũuda Wẽnnaam soolem waoongo. Yẽ maana raood n kẽng a Pilat nengẽ n tɩ kos a Zezi kũumã.

⁴⁴ A Pilat sẽn wʋm t'a Zezi zoe n kiime, a yɛɛsame, la a kɩtame tɩ b bool sodaas koabg naabã t'a wa, t'a sok-a n na n bãng b sã n kii sẽn kaoose.

⁴⁵ Sodaas koabg naabã sẽn wilg yẽ yellã sẽn yɩ to-to wã, a kõo a Zozɛf a Zezi kũumã.

⁴⁶ La a Zozɛf raa lẽ peen-peelse, n sik a Zezi kũumã da-pɩkã zugu, n vil-b ne pɛɛlã n gãneg-b yaoog sẽn tuk kugr zug pʋgẽ, la a bilma kugr n lud yaoogã noore.

⁴⁷ A Maari sẽn yit Magdala ne a Zoze ma a Maari ra geta zĩig ninga b sẽn gãneg bãmbã.

16

¹ Vʋʋsg daarã sẽn looge, a Maari sẽn yit Magdala ne a Zak ma a Maari la a Salome daa tɩdar sẽn ya yũ-noogo n na n tɩ yug a Zezi kũumã.

² Dimaasã daar yibeoog pĩnda, bãmb taa yaoogẽ wã sõ-pukr wakate.

³ Bãmb goma ne taab n yeel tɩ ãnna n na n lak kugrã n bas yaoogã noor n kõ-ba.

⁴ La bãmb sẽn zẽk b nens n gese, b yãame tɩ b bilga kugrã sẽn ya bedr wʋsgã n bas yaoogã noore.

⁵ Bãmb sẽn kẽ yaoogẽ wã, b yãa bi-bɩɩg t'a zĩ rɩtgo n yer fu-pɛɛlga, la b yɛɛsame.

⁶ Yẽ yeela bãmba: Da yɛɛs-y ye. Yãmb baooda Nazarɛt dao a Zezi b sẽn ka da-pɩkã zugã. Bãmb vʋʋgame. Bãmb ka be ka ye. Ad zĩig ning b sẽn dag n gãneg bãmbã.

⁷ La y kẽng n tɩ yeel b karen-biisã ne a Pɩyɛɛr t'a Zezi na n denga yãmb taoor n kẽng Galile. Yaa beene la yãmb na n yã bãmba wa b sẽn da yeel yãmbã.

⁸ Pagbã yii yaoogẽ wã n zoe ne yɛɛsg la rigbu. La yɛɛsgã yĩnga, bãmb ka togs ned tɩ bũmb ye.

⁹ A Zezi sẽn vʋʋg dimaas daar yibeoogã, b reng n puka b meng ne a Maari sẽn yit Magdala, soab ninga bãmb sẽn dig zĩn-dãmb a yopoe tɩ yi n basã.

¹⁰ La yẽ kẽngame n tɩ togs neb nins sẽn dag n be ne a Zezi wã la sẽn zĩ ne sũ-sãams la nintãmã.

¹¹ Bãmb sẽn wʋm t'a Zezi vɩɩme, la tɩ pagã yã-b lame, bãmb ka tẽ-a ye.

¹² Dẽ poore, a Zezi puka b meng ne bãmb neb a yiib sẽn dag n be sorẽ n kẽnd weoogẽ, la yɩɩ ne wẽneg a to.

¹³ Bãmb me lebg n waa n togsa b taabã, la b kell n ka tẽ bãmb me ye.

¹⁴ A Zezi yaool n puka b meng ne karen-biis piig la a yembrã, dẽ tɩ b zĩ n dɩtame. La a Zezi zab-b lame, b ka-tẽebã la b sũ-riglmã yĩnga. Bala, b ka tẽ neb nins sẽn yã bãmb b vʋʋgrã zugẽ wã ye.

¹⁵ La a Zezi yeela bãmb yaa: Saag-y dũni tɛk fãa n moon neba fãa koe-noogã.

¹⁶ Ned ning fãa sẽn na tẽ, tɩ b lis-a, a na paam fãagre. La ned ning fãa sẽn kõn tẽ na kong bʋʋm.

¹⁷ Ad bãn nins sẽn na n tũ neb nins sẽn na n tẽ wã: ne mam yʋʋre, bãmb na n diga zĩn-dãmba la b gom gom-zẽnse.

¹⁸ Bãmb na n yõga wiisi, la b sã n yũ bũmb sẽn ya zẽnem, a kõn zab-b ye. Bãmb na n tika bãad-rãmb ne b nusi, la b na n paama maagre.

¹⁹ Zu-soab a Zezi sẽn gom woto n sɛ, dẽ Wẽnnaam zẽka bãmb n kẽng arzãna, la bãmb zĩnda Wẽnnaam nug rɩtgo.

²⁰ La bãmb karen-biisã kẽngame n moon koɛɛgã zĩig fãa. Zu-soabã tʋma ne bãmba, n maan bãn n tũnug koɛɛgã n wilg t'a yaa sɩda.