1

¹ Uito Eiꞌakag Iesui e. Uiꞌywot Tupana tiky­ꞌesat kahato atimo­herep ehepe yne aikotã yt pya hin i raꞌyn hap e. Miꞌi koꞌi toiky­ꞌesat uheropat haria ikuap e. Atipo­ꞌoro uhehay atipy piat uhehay moherep hat wẽ pyi e. Ahenoi yne uheropat hat uipot­muꞌe uimi­kyꞌe kahato Iuwãu me."

² Etimo­herep to mesuwat uhehay yne yne uheropat haria pe areꞌe. Mesuwat sehay yne Tupana e hap uhetiat e. Mesuwat uhehay wakuat yne areꞌe yne eimikuap ok tã ehewaure kaꞌa mikuap ok tã uiꞌe hap. Iꞌewyte aikotã emuꞌetu eraꞌa­kasa uimi­mo­herep epiat hap ewy topy­huꞌat areꞌe epe uiwy Iuwãu e."

³ Uimohey haria waku ehewaure kaꞌa ewetum kahato mesuwat uhehay wakuat kape e. Waku eweimo­wẽ­papꞌi mowẽ­papꞌi kahato mesuwat miwan ehepiat ikuap hawywiat ehepiat inug hamuat hap kape aikotã aikotã Tupana tunug hap ahenoi ehepe eꞌyianmete e. Yt pya hin i Mesuwat uhehay Tupana tipyt­ꞌatnug hamuat eꞌat. Eweimo­wẽpap mesuwat uhehay pote aru toĩneꞌen eipoi­tyro kahato hap eimo­wepit hap e Iesui ahepe.

"

⁴ Miꞌi pote uito Iuwãu atiwan naꞌyn Iesui ehay tomikuap ok tã hawyi atipo­ꞌoro Iesui mohey haria pe 7 tawa yi Asia piaria pe. Aikotã Iesui mimo­herep ewy mekewat temiit tomi­po­ꞌoro atipy kaipywiat wẽ pywiat ewy atipo­ꞌoro ehowawi uito Iuwãu. Maꞌato saꞌa­wyꞌi uimiwan me wepoi­tyro hap tohẽtup Tupana kaipyi 7 tawa piat Tupana mõtypot yat piaria wat hamo. Mio tã areꞌe epe Tupana — Uito ti emiit Iuwãu maꞌato En ni mekewat wuatꞌi eꞌat piat ieĩneꞌen hat are. En ni torania mesuwiat ieĩneꞌen hat eꞌyianmiat ieĩneꞌen hat are. En ni mesuwuat re ieĩneꞌen hat are. En ni wuatꞌi eꞌat sakpo ieĩneꞌen hat are. Tupana ahẽtup kahato ewawi ereĩneꞌen hegyiꞌat kahato Esaꞌyru mohey haria pe hap are. Etum o woꞌo­kyꞌe hap iꞌatuepe. Etimõꞌẽ Epãꞌãu 7 tawa piaria Esaꞌyru mohey haria kape are ewawi Tupana."

⁵ Tupana Esaꞌyru sese Iesui kaipyi ahẽtup etipoi­tyro emohey haria. Etum no iꞌatuepe i woꞌo­wese hap are epe. Wuatꞌi Porekuat no En poꞌog poꞌog iraniaꞌin kai are. En ni wuatꞌi eꞌyianmete wuat guꞌuro pywiat ieĩneꞌen i hat. En ni pywo yn e hat. Iesui En ni urukyꞌe hat sese katu­pono Esuu wo urupitpit hap etikoho yne torania uruminug saꞌag are. Ekuꞌuro hap uruka­wiano hap."

⁶ Waku yne hawyi urunug naꞌyn more­kuaria wo mesuwat yi tote Eꞌywot eropat hamuat are. En ni urunug miitꞌin epaꞌi wo Eꞌywot miky­ꞌesat ewy. Urunug naꞌyn emiit miitꞌin ekyi ewewawiat emõtypot haria wo hamo. Wuatꞌi eꞌat piat esaika hap moherep hanuaria urunug naꞌyn are. Etum no Emohey haria pe egyiꞌat hap kaipyi iꞌatu­mo­wepit hap wuatꞌi eꞌat pe aru yt kat saꞌup i hap ahẽtup areꞌe epe Tupana. Pyno waku raꞌyn uhehay. Uito Iuwãu.

"

⁷ Uiwy­riaꞌin Iesui mohey haria meiẽ ewehe­haꞌat ro Aika­ꞌiwat Iesui tut raꞌyn teiam ywyhig me. Taꞌi yne yne teꞌe­ra­ꞌa­kasa. Iꞌewyte ipiit suk haria iꞌauka haria teꞌe­ra­ꞌa­kasa kahato howawi. Ewehe­haꞌat ro teꞌe­ruwak kahato wuatꞌi ywania yt imohey i haria teꞌe­ro­kenꞌẽ haype kakꞌi­ꞌa­tuꞌe. Maꞌato aito imohey haria wahe­katup kahato. Waku eriot Mehĩ waku eriot Mimi watoꞌe. Iꞌewute aitoria 7 tawa piat Tupana mõtypot yat piaria pe yi Asia totiaria pe Iesui tuwe­mo­herep wy."

⁸ — Taꞌi uito ti rat Iesui e ahepe tut hawyi. Ahaꞌa­wynug yne uito hawyi areĩneꞌen ni hat uito. Uhepiat inug yne hap eꞌyianme areĩneꞌen ni e. Uimi­sa­ꞌa­wynug saꞌa­wynug atimo­putꞌok yne. Maꞌato wuatꞌi mesu­wa­rotiat eꞌyianme areĩneꞌen ne wuatꞌi eꞌat pe e. Uito ti rat Eika­ꞌiwat Wuatꞌi Esaika Hap Eiam uito e Iesui ahepe.

"

⁹ Pyno uito Iesui potpo­ꞌoro 12 ok takat Iuwãu areĩneꞌen eheykeꞌet ewy katu­pono waho­ꞌopot aiwo­ꞌo­ꞌe­wy­ꞌewy Iesui mohey haria aito pote are. Wẽtup sok yn aito. Iesui yn Aipo­rekuat aiꞌe pote aiꞌa­tu­sa­tyꞌi satyꞌi kahato iraniaꞌin. Miꞌi pote wẽtup miit yn ewy wahe­katup Aika­ꞌiwat putꞌokꞌe wuatꞌi Porekuat nuat hap eꞌat. Iesui yn Aipo­typot areꞌe hap etiat no uipyhyp mesuwe yi a yꞌy wato pyꞌa­setpiat uiꞌa­piheg hamo. Woꞌo­pyhyp hat ewy uinug katu­pono ahenoi uhehay wo Iesui ti Aipo­rekuat nuat areꞌe pote. Miꞌi pote uhehay monik hap kyꞌewi uiꞌatoiat mesuwat yi a Patumu e hap tote."

¹⁰ Miꞌi yi a tote Aika­ꞌiwat wanuat eꞌat Mytuꞌu eꞌat pe turan Tupana Pãꞌãu topy­huꞌat kahato uhete. Putꞌokꞌe hawyi uipyt­ꞌatnug kahato hawyi uimu­ꞌetu kahato. Miꞌi hawyi uiꞌok pe kai putꞌokꞌe raꞌyn sehay aikotã huhuꞌe hap ewy atikuap kahato. Ihay pirik kahato atikuap heremo kahato rakat. Huhuꞌe hap ewy maꞌato ihay ewy atikuap."

¹¹ — Uito ti yne saꞌa­wynug hat maꞌato uhepiat inug hap yianmete areĩneꞌen wuatꞌi eꞌat pe e. Uminug koꞌi yne ikahuro hap sakpo areĩneꞌen ne wuatꞌi eꞌat pe e uhepe. Miꞌi hawyi toꞌe i uhepe — Iuwãu e atomo­herep aru epe emiꞌa­kasa koꞌi emuꞌetu wuat ewywuat koꞌi e. Etiwan o uimi­mo­herep emuꞌetu hap koꞌi e. Miꞌi hawyi emiwan o etipo­ꞌoro uimohey haria pe 7 Tupana mõtypot yat kape yi Asia tote. Tawa EWESU piaria weꞌa­tunug haria kape. Iꞌewyte Tupana mõtypot yat tawa SIMINA piaria waꞌa­tunug haria kape etipo­ꞌoro uiꞌe hap emiwan. Iꞌewyte Tupana mõtypot yat tawa PẼKAMU piaria weꞌa­tunug haria kape etipo­ꞌoro emiwan. Iꞌewyte Tupana mõtypot yat tawa SATU piaria kape etipo­ꞌoro. Iꞌewyte Tupana mõtypot yat tawa TIATIRA kape etipo­ꞌoro wy. Iꞌewyte Tupana mõtypot yat tawa WIRATEWIA piaria kape etipo­ꞌoro hawyi Tupana mõtypot yat IRAUTISEIA piaria kape etipo­ꞌoro emiwan ipe pewiu tote e Iesui uhepe.

"

¹² Mio tã toꞌe hawyi aremorem mekewat ihay rakat IESUI kape araꞌa­kasa hamo. Aremorem turan hẽtyhot hap atipuẽti. Tuwẽtem wẽtup eiam myi ariãty."

¹³ Miꞌi hawyi mekewat aria ẽty koꞌi pyꞌa­setpe toĩneꞌen Aheykeꞌet toꞌe­wywuat sokpe iꞌywop takat puo yi kapiat hap. Ipotiꞌa ete toĩneꞌen iwoꞌo­kytyt hap ewywuat hekat rakat Uru kawiat imehit rakat."

¹⁴ Iꞌasap ikytsig kahato aikotã nukara kytsig hap amukiusu ap ewy ikytsig hap. Iha aria sapuẽ sapyhot hap ewy aria ẽty ewy."

¹⁵ Ipy koꞌi ihup hapyhot hap ewy aikotã Asu watopag aria pe hapyke kahato rakat ihup imehit hap ewy. Miꞌi hawyi ihay topy­huꞌat yꞌy esaika hap topyhyp pote hap ewy yꞌy wato puehay ewy woo wooꞌe neꞌi sooꞌe hap."

¹⁶ Miꞌi hawyi toĩneꞌen 7 waikiru ipo sese kai. Iwẽ pyi tuwẽtem kyseꞌyp surara wat toꞌowa piat hãihyk kahato rakat. Miꞌi kape arahaꞌat turan yne ipiit hẽtyhot yne atpo­sake turanuat wate­haꞌat at kape hap ewy kape araꞌa­kasa."

¹⁷ Araꞌa­kasa howawi hawyi araꞌat yi tote uhowa yi kape hap ewy ipoityꞌi uhetiat hawyi ipy yatype genꞌẽ pono ikuꞌuro rakat ewy areĩneꞌen. Miꞌi pote tuwe­ponug uipiit ete topo sese kai haype toꞌe — Uimi­kyꞌe Iuwãu e yt erekenꞌẽ teiꞌo uipupi e uhepe. Pywo ti rat uito wuatꞌi eꞌyianmete wuat eꞌat piat ieĩenꞌen hat Uito e iꞌewyte yt kat i raꞌyn topy­huꞌat re mesu­wa­rotiat pytkai aru areĩneꞌen ne Uito e uhepe."

¹⁸ Iuwãu e erahaꞌat ro uhowawi e. Haꞌa­wyte areĩneꞌen eipy­ꞌa­setpe. Miꞌi hawyi uiku­ꞌuro sese koitywy areĩneꞌen i raꞌyn wuatꞌi eꞌat piat hamo e. Miꞌi pote uiꞌe hap uhehay upi yn miitꞌin tuwẽtem kuap guꞌuro pyi e. Iꞌewyte uhehay upi yn miitꞌin tuwat taꞌa­tu­ꞌa­piheg aria wuat eꞌat piat hamuat kape e uhepe."

¹⁹ Miꞌi hawyi — Iuwãu e emiwan nug uimi­mo­herep tepiat emiꞌa­kasa aikotã topy­huꞌat irane hamuat iꞌewyte mesup muat toĩneꞌen hap ewywuat hap etiwan no e iꞌewyte aikotã aikotã irane atunug uimi­mo­herep epe hap ewy e uhepe."

²⁰ Mũki 7 waikiru uipo sese kawiat atomo­herep taꞌyn epe. Katu­pono atiky­ꞌesat etikuap yt uwe mikuap i aikotã aru kat kat koꞌi ewywuat tukup­teꞌen hap e. Iꞌewyte atimo­herep teran epe mekewat emoꞌa­kasa hap 7 ariãty wẽtup teiam mywiat hẽtyhot rakat nu Uru kawiat etiat e. Miꞌi ti atimo­herep teran kat som kat som miꞌi ewy hap topy­huꞌat hap mekewat ariãty eiam e. Iꞌewyte kat kawiat uipo sese kawiat 7 waikiru e hap som kat ewy hap e uhepe. Iuwãu e mekewat 7 waikiru uipo sese kawiat tukup­teꞌen aikotã uimohey haria akag koꞌi yi Asia totiaria tawa piat Tupana mõtypot yat apykok haria miꞌi aikotã 7 waikiru ewywuat tukup­teꞌen aikope teꞌe­ru­we­ꞌa­tunug hap tote mekewat 7 tawa yi Asia piaria akag koꞌi 7 waikiru uipupiat ewywuat koꞌi are e uhepe. Mekewat ariãty eiam 7 haga rakat miꞌi ti aikotã uimohey haria yi Asia piaria ewy e. Wẽtup haga wẽtup tawa piaria uimohey haria ewy wẽtup haga wẽtup tawa piaria ewy hap ewy teꞌe­ro­py­huꞌat uimohey haria teꞌe­ru­we­ꞌa­tunug haria ti teꞌe­ro­py­huꞌat mekewat 7 rakat ariãty ewy 7 tawa Asia piaria e uhepe ihay huhuꞌe hap ewywuat puo e Iesui uhepe.

Uito Iuwãu uimi­ꞌa­kasa hap ahenoi.

"

2

¹ Miꞌi hawyi Aheykeꞌet Iesui toꞌe uhepe — Iuwãu e mio tã etiwan no uimohey haria tawa EWESU apykok hat pe tawa Ewesu piaria etiat. Mio tã ereꞌe — Pyno atiky­ꞌesat ereĩneꞌen uipo pe katu­pono tukup­teꞌen uipo sese kai raꞌyn 7 waikiru koꞌi ewy 7 ok takaria Tupana mõtypot yat piaria apykok haria e. Uito ti uhewyry eipy­ꞌa­setpe aikotã aikotã ariãty yt hẽtyhot kahato i rakat moẽtyhot hat ewy e. Uhewyry eipy­ꞌa­setpe eimoẽ­tyhot hamuat e. Eipe wẽtup haga 7 haga pyꞌa­setpiat ariãty eiam ewy mekewat 7 ariãty wẽtup eiam hekat rakat pyꞌa­setpuo e."

² Uimohey haria tawa Ewesu piaria woro­ho­ꞌokuap kahato eipe. Uipotpap nug kahato haria eipe are e. Yt eipohep hin i uheropat hap ete e. Yt eweikyꞌe hin i yt naku i nug hap neꞌi. Atikuap eheko waku hap. Karãpe wẽtup ok putꞌokꞌe eimuꞌe hamo turan hepamo ihay eweimohey sio uhehay wo sio yt hap kuap hamo e. Maꞌato yt uhehay i neꞌi pote meremo — Eso i rat eweiꞌe tope. Ewehãꞌãg kahato mekewat sio Tupana mipo­ꞌoro wẽtup miit sio tuwehay pyi neꞌi hap kuap hamo e."

³ Eweho­ꞌopot kahato raꞌyn uimohey hap upi e uimohey motꞌi haria eipe e. Taꞌi uheropat motꞌi kahato haria eipe pãi are."

⁴ Waku kahato eipe e wen maꞌato wẽtup yt naku i eikawiat yt uimo­wepit hin i hap toĩneꞌen. Saꞌa­wyꞌi uikyꞌe kahato haty wo maꞌato mesup yt saꞌa­wy­ꞌiwuat yt ewy i raꞌyn uikyꞌe eipe. Uiꞌatoiat uikyꞌe saꞌa­wy­ꞌiwuat hap ete e. Haty kahato uipyꞌa pe miꞌi hap uhete e."

⁵ Pyno eiwa­nẽtup o aikotã saꞌa­wy­ꞌiwuat uikyꞌe haty wo ehepiat hap kape uimi­ky­ꞌeria e. Mesup uikyꞌe hap waure haria wo eweikup­teꞌen e. Eweiꞌaipok to uhowawi i uikyꞌe pote areꞌe ehepe maꞌato yt pote ariot eheꞌa­riãty sasep hamo e. Miꞌi hawyi iꞌypyryp hap yn toĩneꞌen itote e. Koitywy 7 ariãty toĩneꞌen maꞌato ahasep hawyi ti aru eiwat pote iꞌypyryp yt naku i topy­huꞌat e. Eweiꞌaipok to uhowawi areꞌe ehepe tawa Ewesu piaria e."

⁶ Tukup­teꞌen tawa EWESU piaria uimohey haria muꞌe haria uhyt Niku­raita mimu­ꞌeria — Waku eharyꞌi uiat uheha­ryꞌi wo hawyi uheha­ryꞌi ewano e haria toꞌope yt naku u. Waku ehaiwot ro eweikup­teꞌen miꞌi potmu­ꞌeria ete katu­pono Uito iꞌewyte uhaiwot areĩneꞌen iꞌatu­pot­muꞌe hap upiaria ete e Iesui."

⁷ Uimohey haria ehewaure kaꞌa kahato ro kat som Tupana Pãꞌãu toꞌe topot­mu­ꞌeria pe Tupana mõtypot yat piaria pe yi Asia tote e. Ewetum no ehewaure kaꞌa Tupana Pãꞌãu einãpin hap kape e. Uimohey haria e pywo pe ti uimikoi ypia pe toĩneꞌen wẽtup uimikoi ywa pyꞌa­setpe eimoieĩ­neꞌen wuatꞌi eꞌat piat hap e. Uwe uwe uimohey toku­ꞌuro hap kape iꞌewyte uwe uwe topy­huꞌat ahiag potiãꞌãg hap akit hat toku­ꞌuro hap kape miꞌi hat pe aru areꞌe — Waku etuꞌu ro uimikoi ypia ywa eimoieĩ­neꞌen wuatꞌi eꞌat piat hamo areꞌe aru e Tupana Pãꞌãu ehepe e mekewat waikiru ipupiat rakat uimiwan nug hamuat tawa EWESU piaria pe.

"

⁸ Miꞌi hawyi toꞌe i raꞌyn uhepe mekewat 7 waikiru ipo piat rakat — Iuwãu e wẽtup uhehay etiwan hawyi etipo­ꞌoro wẽtup Tupana mõtypot yat piaria kape e. Etipo­ꞌoro uhehay iꞌatu­ꞌa­pykok hat kape. Uimohey haria tawa SIMINA piaria kape e. Mio tã etiwan — Tawa SIMINA piaria uimohey haria Uito ti areĩneꞌen wuatꞌi eꞌyianmiat ieĩneꞌen hat e. Iꞌewyte areĩneꞌen aru yi waikiru koꞌi kahuro pytkai hap eꞌat e. Mesuwe saꞌa­wyꞌi uiku­ꞌuro maꞌato mesup areĩneꞌen i raꞌyn e."

⁹ Uimohey haria tawa SIMINA piaria woro­ho­ꞌokuap kahato eipe. Waku sakpoꞌe eipe e. Uheropat haria seseria kahato eipe e. Atikuap eweho­ꞌopot uhetiano hap e. Atikuap aikotã hoꞌopot kahato popuo eipotpap uimi­ky­ꞌesat nug hap ete. Satek takaria eweikup­teꞌen maꞌato uiwa­nẽtup hawe hekat kahato rakaria wuatꞌi eꞌat piaria eweikup­teꞌen e. Iꞌewyte atikuap aikotã itotiaria tukup­teꞌen hap eiꞌa­tu­sa­tyꞌi satyꞌi kahato haria e. Atikuap aikotã uruto yn ni Tupana kuap haria katu­pono Iuteu ywania sese uruto iraniaꞌin ehepe maꞌato eipe yt eweiꞌe. Miꞌiria taꞌa­tuehay saꞌag wo ehepe. Yt Tupana emiitꞌin hin i miꞌiria maꞌato ahiag mõtypot yat piaria miꞌiria e. Yt Iuteu ywania hin i maꞌato ahiag ywania saꞌag tukup­teꞌen miꞌiria Iuteu ywania ran neꞌi koꞌi e."

¹⁰ Yt eweikenꞌẽ teiꞌo ahiag mupi e katu­pono miꞌiria ahiag mõtypot haria eiꞌa­tuiãꞌãg aru eimo­so­ꞌopot ehepiat imohey hap saꞌag hamo ehepiat uimohey hap moweityk hap kyꞌewi. Maꞌato yt eweitoiat reiꞌo ehepiat uimohey hap ehãꞌãg hap upi 10 eꞌat hap ewy eweho­ꞌopot uimohey hap waure hamo. Eweipy­huꞌat ro uimohey hap mywo eiku­ꞌuro hap eꞌat kape pote eheĩneꞌen hap sese ikahu rakat wuatꞌi eꞌat piat atum ehepe aru e. Yt kat i saꞌag atipuẽti eikai e. Miꞌi hawyi woro­ho­ꞌo­painug more­kuaria wo uimi­mõ­typot wuatꞌi eꞌat piaria wo raꞌyn uimohey haria sese eweikup­teꞌen mote areꞌe ehepe tawa SIMINA totiaria pe e uhepe uimiwan nug hamuat tawa SIMINA piaria pe."

¹¹ — Pywo ti wuatꞌi uimohey haria pe mio tã e te Tupana Pãꞌãu are aikotã areꞌe tawa SIMINA piaria pe hap ewy e. Waku ehewaure kaꞌa kahato Tupana Pãꞌãu e hap uiwẽ pywiat e hap kape e torania 7 Tupana mõtypot yat piaria pe. Uwe uwe ahiag miat toiãꞌãg hap akit hat topy­huꞌat toku­ꞌuro hap kape miꞌi hat yt ikuꞌuro i typuot hap mekewat wuatꞌi eꞌat piat miitꞌin moso­ꞌopot at kaꞌap hap e Tupana Pãꞌãu ahepe.

"

¹² Miꞌi hawyi poꞌog tohenoi uhepe — Iuwãu e etiwan uhehay uimohey haria tawa PEKAMU piaria pe yi Asia totiaria pe e. Kotã ere o etiwan miꞌiria pe — Tawa PEKAMU piaria uimohey haria apykok hat e uhehay ti surara ekyseꞌyp typy hãi nakat toꞌowa piat hãihyk takat ewy kahato."

¹³ Uimohey haria tawa PEKAMU piaria woro­ho­ꞌokuap kahato eipe e. Atikuap aikotã eweikup­teꞌen uimohey haria sese wo ahiag emiitꞌin sem pyꞌa­setpe e. Atikuap eweikup­teꞌen aikope ahiag topy­huꞌat morekuat no hap tote e. Atikuap aikotã uikyꞌe sese haria eweikup­teꞌen itote. Yt eiwe­mõti hin i uhet enoi itotiaria piat hamo wãiꞌe ahiag pytkai e. Atikuap aikotã uimohey sese kahato haria eweikup­teꞌen itote. Atikuap aikotã yt eweipun hin i te kue uikuap ehepiat hap e. Atikuap saꞌa­wyꞌi aikotã uhehay moherep hat wakuat kahato Antipa ahiag etama piaria tiꞌauka eipy­ꞌa­setpia uhehay enoi uimohey hap kaipyi pote e. Uimi­po­ꞌoro taꞌa­tu­ꞌauka hawyi atikuap sese yt naku i miꞌiria ehetawa piaria e."

¹⁴ Maꞌato tukup­teꞌen eipy­ꞌa­set­piaria uimohey ran haria uhehay ewanĩ­kaptia tawa PEKAMU piaria. — Uruto Tupana ehay moherep haria iꞌatuꞌe wen maꞌato wẽtup sehay moherep haria aikotã nimo sehay yt hãpyk i rakat enoi hat Parãu mienoi ewy taꞌa­tu­mo­herep. Nimo Tupana ehay moherep hat Parãu e hap het rakat tiꞌa­tu­muꞌe kahato Isareu ywania ewanĩ­kaptia eporekuat Paraki e het rakat Tupana emiit Isareu ywania moꞌa­kagꞌaia Tupana set etiat hap tehay wo. Mio tã e Parãu — Waku ewetunug ienuk hap iwato hawyi eweiꞌauka eihũria Tupa­naria iãꞌãkap koꞌi mõtypot hamo e. Miꞌi hawyi waku yne hary­po­riaꞌin wywo toꞌope eweikup­teꞌen e. Miꞌi etunug mote ewanĩ­kaptia Isareu ywania Tupana miꞌa­piheg wo tukup­teꞌen eipy­ꞌa­setpe e Parãu morekuat Paraki pe tomi­nãpin e uhepe uimiwan nug hamuat."

¹⁵ Iꞌewyte sehay yt naku i moherep haria tukup­teꞌen eipy­ꞌa­setpe. Wẽtup sehay saꞌag moherep haria uimo­py­ꞌahak kahato miꞌi ti mekewat uhyt Niku­raita ehay upiat gupteꞌen haria mekewat — Waku ahewaire waire watunug iꞌatuꞌe saꞌag uimo­py­ꞌahak haria e."

¹⁶ Ewetoiat ro yne Tupa­naria areꞌe. Ewetoiat ehewaire hap yne areꞌe. Eweiꞌaipok to uhowawi uimienoi koꞌi nug hamo e. Yt pote ariot ehowawi eiwu­ꞌuka hap erut hamo e. Mekewat uiwẽ piat kyseꞌyp typy hãihyk takat wywo areto ehowawi surara ewy e. Eiweꞌeg woꞌo areꞌe tawa Pekamu piat uimohey haria pe."

¹⁷ Iꞌewyte yne eipe uimohey haria kape mio tã are aikotã Tupana Pãꞌãu eimuꞌe hap ewy e. Ehewaure kaꞌa pote ewewa­nẽtup to aikotã areꞌe 7 Tupana mõtypot yat piaria pe yi Asia piaria pe. Uwe uwe uimohey potꞌi ahiag miat toiãꞌãg pytkai toiꞌakit neꞌi toiãꞌãg hap toku­ꞌuro hap kape miꞌi hat pe atum man a atipy kaipywiat aikotã Uiꞌywot tum saꞌa­wyꞌi yahig note man a Iuteu ywania pe hap ewy atum tope uimiium toꞌewy. Uito yn atikuap aikope mekewat man a uimiium uimohey sese haria piat nuat hap e. Iꞌewyte uimohey sese hat ahetꞌok het pakup atum tope. Atiwan nu ikytsig sese rakat rote hawyi atum tope. Mekewat nu etiat uimiset pehik uito yn atikuap het. Iꞌewyte nu kytsig sat hat ikuap het maꞌato iraniaꞌin yt ikuap i toset uiat uimiwan. Miꞌi atum uimohey toku­ꞌuro hap kapiat haria pe pãi areꞌe uimohey haria 7 ywania yi Asia totiaria pe e mekewat hesokpe ikytsig nakat uhepe uimiwan nug hamuat tawa Pekamu piaria nãpin hamuat iꞌewyte ahepe yne imohey haria pe nãpin hamo.

"

¹⁸ Miꞌi hawyi mekewat ariãty eiam 7 haga rakat puat hewyry rakat toꞌe uhepe — Iuwãu etiwan uiꞌe hap koꞌi hawyi etipo­ꞌoro uimohey haria awa TIATIRA piaria kape iꞌatu­ꞌa­pykok hat kape etipo­ꞌoro. Mio tã etiwan — Tawa Tiatira piaria Uito ti Tupana Saꞌyru e uhehay sese atipo­ꞌoro ehowawi e. Uheha koꞌi ti aria sapuẽ sapyhot hap ewy nu mehit hap ewy e."

¹⁹ Woro­ho­ꞌokuap kahato eipe. Atikuap eipotpap koꞌi waku kahato hap e. Wakuap nug hap koꞌi ewetunug hap atikuap. Atikuap eiwo­ꞌo­kyꞌe kahato eiwo­ꞌo­po­wyro eipotpap etiat kaipyi hap atikuap. Aikotã eiwo­ꞌo­mõ­typot eiwo­ꞌoehay upiat hap kaipyi hap atikuap e. Iꞌewyte atikuap aikotã eweikup­teꞌen motꞌi uimohey wywo hap e. Atikuap mesup taꞌyn uheropat poꞌog haria wo eweikup­teꞌen hap e. Atikuap aikotã haꞌa­wy­tewuat kai poꞌog naꞌyn waku eipe hap koꞌi atikuap yne."

²⁰ Maꞌato iꞌewyte atikuap aikotã ehewaku hap toĩneꞌen kahato pytkai toĩneꞌen yt naku i hap itote yt eweitoiat hin i te e. Miꞌi hap nug hap ete ehewa­nĩkap wo kahato areĩneꞌen e. Toĩneꞌen wẽtup ok hary­poria eipy­ꞌa­setpe — Uito Tupana ehay moherep hat e hat Iesapeu e hap het rakat e. — Pyno sig waku ahewaire hewaire e Tupa­naria mõtypot hamo iꞌewyte waku Tupa­naria iãꞌãkap mõtypot ienuk hamo e Tupana uhepe e hat Mana Iesapeu. Miꞌi ete toiꞌa­tu­muꞌe uhemiit pytkai yt kat eweiꞌe i tope. Yt eweipo­ꞌoro hin i eipy­ꞌa­setpyi. Yt naku i kahato ewetunug tawa TIATIRA uimohey haria e."

²¹ Saꞌa­wyꞌi areꞌe — Mana Iesapeu pe — Etoiat ro ewaire waire hap meremo hawyi eraꞌaipok to uhowawi mana areꞌe. Karania wo neꞌi mio tã areꞌe tope maꞌato — Yt yt an e neꞌi uhepe e."

²² Pyno koitywy Mana ewaire waire hap eꞌyni eꞌahu hap eiam mo topy­huꞌat e. Hary­poria yt weꞌeg i hat mio koitywy woro­ꞌa­piheg epiat hoꞌopot hap mywo. Iꞌewyte ihainiaꞌin etiat wemaꞌat haria iꞌewyte atiꞌa­tu­ꞌa­piheg yne emoꞌahu hap eꞌyni pe e. Torania emoewaire haria iꞌatu­ꞌahu emoewaire hap taꞌa­tue­ꞌyni pe uhepiat taꞌa­tu­ꞌa­piheg eꞌapiheg tuwywuat. Eiwo­ꞌo­ꞌe­wy­ꞌewy motꞌi mana Iesapeu e. Ewetoiat eiminug saꞌag hawyi eweiꞌaipok to uhowawi hawyi waure wo areĩneꞌen maꞌato yt pote uimi­ꞌa­piheg koꞌi wo eweikup­teꞌen ehehatek hap sese topy­huꞌat e. Iwato kahato hoꞌopot aru e."

²³ Yt eweꞌeg i kahato i mana pote topap topap kahato aru hira­karia emẽpytꞌin koꞌi e. Woro­ꞌa­piheg kahu hawyi uimohey haria teꞌe­ru­wa­nẽtup kahato aikope aikope teꞌe­ru­we­ꞌa­tunug yi Asia totiaria teꞌe­ru­wa­nẽtup kahato aru eꞌapiheg hap emimu­ꞌeria e — Tupana tikuap kahato aiminug wuatꞌi yt naku i rakat koꞌi iꞌatuꞌe aru are e. Meiẽ toikuap sewaire waire nug i wuatꞌi wywuat hap iꞌatuꞌe aru e. Pywo ti rat Tupana tikuap aiwa­nẽtup hap iꞌewyte aiminug koꞌi sio waku sio yt hap koꞌi iꞌatuꞌe aru. Are pãi aipoepyk aiminug ok tã ne sio waku sio yt iꞌatuꞌe aru uimohey haria yne 7 tawa koꞌi piaria e."

²⁴ Maꞌato tukup­teꞌen eipy­ꞌe­satpe hary­poria yt iweꞌeg i rakat ehay upiat yt tuwat i rakaria uimohey haria. Miꞌiria ihainia iweꞌeg kahato rakaria — Yt naku i kahato ahewaire e. Miꞌiria pe Woro­ho­ꞌo­kyꞌe kahato e Tupana katu­pono yt eweiwat i mekewat Iesapeu wẽ pywiat poꞌog ahiag ehay saꞌag wuatꞌi kawiat rakat upi areꞌe e Tupana tawa TIATIRA piaria piat pe. Saꞌa­wyꞌi Iesapeu toꞌe — Toꞌiro woro­ho­ꞌo­muꞌe yt eimikuap i te ete e. Miꞌi ahenoi teran ehepe maꞌato wẽtup sehay piat pe. Toꞌiro ahewaire waire migꞌi wo ahiag ehay pyi e. Maꞌato yt iꞌatuꞌe iraniaꞌin. Miꞌiria pe yt woro­ho­ꞌo­nãpin teran i katu­pono — Yt eweiꞌe raꞌyn mana Iesapeu mienoi hap kape."

²⁵ Pyno mio tã areꞌe waku nug haria pe tawa TIATIRA piaria pe. Uimohey motꞌi ro e. Karamuo ariot hap kape uhut ehowawiat hap kape eweikup­teꞌen no uimohey haria motꞌi pote morekuat nuaria wuatꞌi pianuaria woro­ho­ꞌonug e."

²⁶ Uwe uwe eipe uimohey motꞌi rakaria iꞌewyte uwe uwe iꞌakit ahiag miat toiãꞌãg hap iꞌewyte uwe uwe inug uhehay toku­ꞌuro hap kape miꞌi haria pe are aru — Waku kahato eipe are. Woro­ho­ꞌonug eipe wuatꞌi ywania porekuat wo wuatꞌi eꞌat pe aru are e."

²⁷ Saꞌa­wyꞌi sese mio tã toꞌe Uiꞌywot uhepe — Uhaꞌyru e aikotã aikotã kamũti nug hat tiꞌa­porok tominug yt hãpyk i hawyi miꞌi hap ewy ti aru waku etiꞌa­tu­ꞌa­piheg o yt naku i nug haria wẽtup ywania wẽtup ywania yt uimohey teran i haria e nimo Uiꞌywot uhepe."

²⁸ Pyno koitywy kat Uiꞌywot toꞌe uhepe miꞌi hap ewy are ehepe. Pywo ti rat eipe uiꞌe­wywuat pote woro­ho­ꞌonug eipe wuatꞌi ywania pore­kuaria wo uiꞌewy eweikup­teꞌen aru wuatꞌi eꞌat piat are. Iꞌewyte meiũran ti aru ariot ehowawi aikotã aikotã mekewat waikiru wato at wẽtem hap enoi hap eꞌyianmete wuat ipohup at tuerut hap ewy ariot ehowawi iꞌypyryp hap moma hamuat eimo­wepit hamuat ariot aru ehowawi are e."

²⁹ Waku ehewaure kaꞌa kahato kat som areꞌe uipot­mu­ꞌeria 7 Tupana mõtypot yat koꞌi piat weꞌa­tunug haria pe yi Asia totiaria pe areꞌe e. Uito Iuwãu pyno waku watikuap kahato torania aitoria wuatꞌi Tupana Pãꞌãu mimo­herep ahepe mesuwat uimiwan me.

Uito Iuwãu.

"

3

¹ Miꞌi hawyi mekewat Miit waikiru koꞌi 7 rakaria topo piat hat toꞌe i raꞌyn uhepe — Iuwãu e etiwan no uhehay Tupana mohey haria tawa SARATU piaria kape e. Etiwan hawyi etipo­ꞌoro iꞌatu­ꞌa­pykok hat kape. Kotã ereꞌe o etiwan e — Uito ti Tupana Pãꞌãu yne eiam e. Koitywy atimõꞌẽ ehowawi Tupana mõtypot yat piaria 7 tawa yi Asia totiaria pe e. Iꞌewyte toĩneꞌen uipo pe mekewat waikiru koꞌi 7 rakaria. Atikuap kahato eiminug wakuat koꞌi e. Wakuat kahato eipe iꞌatuꞌe miitꞌin mesu­wa­ro­tiaria. Wuatꞌi miitꞌin mimõ­typot koꞌi eipe wen maꞌato uiwa­nẽtup hawe ikuꞌuro rakat ewy eweikup­teꞌen katu­pono yt karãpe i uiwesat eipe e. Uikyꞌe hap eipyꞌa piat ikuꞌuro raꞌyn e."

² Eweꞌeg wo o kat pote kurin uimohey hap eipyꞌa pe topy­huꞌat e. Miꞌi pote ikuꞌuro rakat ewy uimohey ehepiat hap e. Waku eweiwyro o ehepiat uimohey hit hap. Maꞌato yt pote ikuꞌuro aru eipyꞌa pe uimohey hap katu­pono atipuẽti eipotpap hap Tupana kapiat yt pywo pe i. Eiminug wakuat uimõ­typot hamuat yt uimo­wepit hin i uimohey ehepiat hap yt iwato i pote e. Pyno kurin kat uimohey hap ekawiat etimotag no e."

³ Uimohey haria saꞌa­wyꞌi uhehay sat kahato haria eipe e. Saꞌa­wyꞌi ehewaure kaꞌa yn uhehay kape maꞌato mio yt e. Tawa SARATU piaria eweiꞌaipok to uimohey hap kape aikotã eweimoheg eheha peꞌok hap ewy eweimoheg uimohey hap ehepiat katu­pono ariot ehowawi aikotã seroꞌok e hat ewy. Waku surara ewy eweikup­teꞌen maꞌato yt pote yt eweikuap hin i uhut hap e. Pyno eiwe­hymut ro katu­pono eiket kai putꞌok­ꞌare sere­ꞌokꞌe hat ewy e."

⁴ Maꞌato wẽtup ok wẽtup ok toĩneꞌen eipy­ꞌa­setpe uimohey te kahato hap wywo e. Miꞌiria ete yt aremõti hin i — Uheropat haria eipe areꞌe hamuat yt taꞌa­tu­hãꞌãg hin i iraniaꞌin ewy saꞌag nug hap ete. Katu­pono ehewaku hap putꞌokꞌe uhupiat ehewyry uiwywo hamo areꞌe ehepe ipatꞌok etiat tawa SARATU piaria pe. Pywo pe ti ehepe ti aru atum eipainug hap ikytsig kahato rakat ehepe uhemiit sese eipe hap moherep hamo e."

⁵ Pywo Uimohey haria torania pe areꞌe — Uwe uwe uimohey motꞌi toku­ꞌuro hap kape uwe uwe tiꞌakit yne ahiag miat toiãꞌãg hap koꞌi miꞌiria atiꞌa­tu­painug kahato sokpe ikytsig nakano uhemiit sese eipe hap moherep hamo e. Iꞌewyte iꞌatuset yne atimo­herep wuatꞌi ehamo. Iꞌatuset koꞌi atimo­herep miwan me atipy pe e. Yt karãpe i atiꞌa­tu­set­mo­weityk mekewat miwan myi areꞌe. Tupana mimoieĩ­neꞌen koꞌi wuatꞌi eꞌat piat gupteꞌen hanuaria miꞌiria e. Miꞌiria uhemiit sese koꞌi areꞌe atipy piaria pe. Miꞌiria uheka­tu­wyria sese areꞌe Uiꞌywot pe e."

⁶ Pyno waku ehewaure kaꞌa kahato kat e som Tupana Pãꞌãu toꞌe 7 Tupana mõtypot yat koꞌi piaria pe katu­pono yne Tupana mohey haria kape wy ihay mesuwe.

"

⁷ Miꞌi hawyi poꞌog Iesui henoi uhepe — Iuwãu e mesup etiwan uimi­ꞌa­tu­nãpin uimohey haria tawa WIRATEU piaria kape. Etiwan hawyi etipo­ꞌoro uiꞌe hap iꞌatu­ꞌa­pykok hat kape — Uiwy­riaꞌin Uito ti mekewat wakuat sese rakat Tupana ewywuat e. Hãpyk sese rakano areĩneꞌen pywuat yn uhehay e. Taꞌi Uito morekuat Tawi Saipepiat Sese e. Miꞌi pote Wuatꞌi Porekuat no areĩneꞌen e. Miꞌi pote areꞌo­ken­hypꞌok kuap kahato iꞌewyte atunug kuap kahato muꞌap ehewyry hamo e. Ahoꞌo­ken­hypꞌok hawyi yt uwe i uhemiitꞌin pyhyp kuap mesu­wa­rote e. Wuatꞌi Ywania Porekuat no areĩneꞌen. Uito Tawi Saipepiat Sese Are. Katu­pono morekuat Tawi tum tepu­retig uhepe ipowatꞌyp sese uipo pe toĩneꞌen e. Miꞌi pote uhehay wo ahoꞌo­ken­hypꞌok kuap wuatꞌi puꞌap uipotpap nug hamuat iꞌewyte atipyhyp kuap wuatꞌi puꞌap ewanĩ­kaptia wat e. Yt uwe i uipyhyp kuap e."

⁸ Uimohey haria tawa WIRATEU piaria woro­ho­ꞌokuap kahato eipe e. Ehesaika hap mesu­wa­rote yt iwato hin i hap atikuap wen maꞌato miꞌi pytkai uiwa­nẽtup hawe ehesaika kahato uhesaika hamo katu­pono ewetunug yne uhepiat einãpin hap koꞌi e. Waku kahato eipe katu­pono yt eiwe­mõti hin i uimohey hap moherep hamuat hap uhetiat enoi enoi iraniaꞌin miat hamo. Miꞌi pote woro­ho­ꞌo­po­ꞌoro eipe wuatꞌi miitꞌin kape uhehay moherep hamo e. Yt uwe i uipyhyp kuap pãi e. Yt uwe i uheꞌo­ken­hypꞌok kuap e. Miꞌi pytkai Uito wuatꞌi uhewa­nĩ­kaptia eꞌoken­hypꞌok kuap hat areĩneꞌen e. Uiphyp kuap haria yt uwe i e. — Yt ehenoi teiꞌo ehay mesuwe iꞌatuꞌe pytkai ahenoi te itote uhehay e. Yt uhehay pyhyp kuap i. Miꞌi pote uito atikuap kahato eipo­ꞌoro uhehay moherep hamuat wuatꞌi ywania muꞌe hamuat uimi­ky­ꞌesat ewywuat hap katu­pono woro­ho­ꞌokuap kahato wakuap nug haria eipe hap e. Koitywy woro­ho­ꞌo­po­ꞌoro wuatꞌi miitꞌin muꞌe hamo yt hekat rakaria hin i eipe pytkai e."

⁹ Maꞌato tukup­teꞌen ehetawa pe ahiag mõtypot sese haria — Uruto poꞌog eikai iꞌatuꞌe ehepe katu­pono uruto ti Aparãu emiariru sese koꞌi maꞌato eiperia yt iꞌatuꞌe. Iꞌatu­ꞌeso mio tã iꞌatuꞌe pote. Yt Iuteu ywania hin i miꞌiria e. Pyno atiꞌa­tu­mohit kahato miꞌiria hawyi eimõ­typot hamo teꞌe­ru­we­pỹ­ꞌã­tutuk ehowawi — Aparãu emiariru sese eipe iꞌatuꞌe aru ehepe katu­pono Iesui mikyꞌe sese koꞌi eipe iꞌatuꞌe aru ehepe. Atiꞌa­tu­mohit kahato miꞌiria ehamo hawyi teꞌe­ru­we­pỹ­ꞌã­tutuk ehowawi e."

¹⁰ Waku kahato uhehay mohey motꞌi haria eipe e. Taꞌi yt eipo hep hin i uhehay moherep hap ete uhehay nug hap ete e. Meiũran aru torania iãꞌãg koro hap eꞌat putꞌokꞌe mesu­wa­ro­tiaria wuatꞌi miitꞌin iãꞌãg hamo sio uhemiit sese sio yt hap kuap hap eꞌat sese maꞌato miꞌi hap eꞌat eꞌyianme woro­ho­ꞌohep mesuwat yi pyi eiperia katu­pono woro­ho­ꞌokuap taꞌyn uhehay nug motꞌi haria eipe hap atikuap taꞌyn e. Miꞌi pote mekewat eꞌat wuatꞌi iãꞌãg hap yt putꞌokꞌe i eiwat ehãꞌãg hamuat e."

¹¹ Pywo ti rat ariot merepꞌe hap ewy e. Yt uwe i Uito hawyi meremo aremo­herep i. Ahut hap eꞌat pe woro­ho­ꞌo­painug eipe more­kuaria wo mekewat eꞌat pe e. Pyno eweimohey ro uiꞌe hap eipyꞌa pe uhut hap kape e. Yt naku i wẽtup sehay upi neꞌi eweiwat eimaꞌat hap upi neꞌi e. Maꞌato eimaꞌat hap upi eweiwat pote yt atum kuap i eimiẽtup e. Yt woro­ho­ꞌonug kuap i more­kuaria wo e. Mekewat wuatꞌi eꞌat piat more­kuaria wo hap eweipun hawyi."

¹² Miꞌi pote are torania pe uwe uwe iꞌakit ahiagnia piat toiãꞌãg hap yt naku i nug hamuat miꞌi hat uimõ­typot sese hat topy­huꞌat wuatꞌi eꞌat pe Tupana mõtypot yat atipy pe e. Aikotã Tupana mõtypot yat eꞌãkukag iwatoꞌin nakat nu heg kawiat ikahu rakat ewywuat eweikup­teꞌen atipy pe aru Tupana mõtypot yat apyꞌaha wo katu­pono ahiag miat eimaꞌat hap pun haria yne eweipy­huꞌat pote e. Mekewat eꞌat pe aru eipiit ete atiwan uhet pakup iꞌewyte Uiꞌywot etawa set atipehik ehete mekewat Nusaken Pakup i het rakat atiwan ehete. Mekewat tawa atipy kaipywiat yi kapiat sut hat set mekewat tawa wakuat Uiꞌywot Tupana mipo­ꞌoro set atiwan aru ehete katu­pono eheko saꞌag akit haria eweikup­teꞌen pote areꞌe uimohey haria tawa WIRATEU piaria pe e."

¹³ Pyno waku ehewaure kaꞌa kahato kat e kat e Tupana pãꞌãu toꞌe Tupana mõtypot yat piaria pe. Kat e toiꞌa­tu­nãpin tomohey haria itotiaria hap kape.

"

¹⁴ Pyno miꞌi hawyi poꞌog toꞌe uhepe — Iuwãu e etiwan no tawa IRAUTISEIA piaria kape e. Uhet Iesui. Taꞌi yt uipo hep hin i pywuat sehay enoi hamuat ete e. Taꞌi saꞌa­wyꞌi mesuwat mytyp nug hap eꞌyianmete areĩneꞌen itote wuatꞌi Tupana Miky­ꞌesat Nug Hano yi atipy at waty waikiru koꞌi ahaꞌa­wynug yne Uito e Iesui uhepe."

¹⁵ Uimohey haria tawa IRAUTISEIA piaria woro­ho­ꞌokuap kahato eipe e. Atikuap kahato aikotã eiwe­potpap uimi­ky­ꞌesat nug hap ete e. Are pãi yt haty wo hin i eiwe­potpap uipotpap nug hap ete uimi­ky­ꞌesat nug hap ete — Hepama waku hap neꞌi eweiꞌe. Eipiit yt at hakup hin i uipotpap nug hap ete hap atikuap. Iꞌewyte — Aipiit yt raꞌak hin i Tupana potpap nug hap ete eweiꞌe hap atikuap. Maꞌato eiperup i potꞌi eiwe­potpap areꞌe. Uiwa­nẽtup hawe poꞌog waku haty wo eiwe­potpap sio eipe­rupꞌi sese hap wywo maꞌato — Mũki­ꞌite ti rat waku watunug eiꞌe hap yt uimo­wepit hin i hap e."

¹⁶ Pyno yt eipyꞌa pyi i hin i uikyꞌe e. Eiwe­potpap wen maꞌato — Arepotpap teran kahato Tupana potpap hap ete haty wo yt eweiꞌe hin i eipyꞌa pe. Miꞌi pote woro­ho­ꞌo­pugha aru e. Yt atiky­ꞌesat i miꞌi tã haria uipotpap nug haria hap e. Uito atiky­ꞌesat eipyꞌa pyi eiwa­nẽtup hawe — Atunug neran kahato e haria maꞌato yt pote uimo­py­ꞌahak haria wo eweikup­teꞌen e."

¹⁷ Miꞌi hap ewy arewa­nẽtup ehowawi tawa IRAUTISEIA piaria. Maꞌato — Waku kahato rakaria uruto eweiꞌe iraniaꞌin me. Waku kahato uruto eweiꞌe eiwo­ꞌope. Waku pe kahato uruto eweiꞌe. Ahekat kahato rakaria aito eweiꞌe eiwo­ꞌope. Aimi­ky­ꞌesat ok tã topy­huꞌat raꞌyn mesup aipo pe eweiꞌe eiwo­ꞌope. Maꞌato yt miꞌi tã hin i eweikup­teꞌen uiwa­nẽtup hawe areꞌe e. Yt naku i pe eweikup­teꞌen uikyꞌe ran haria e. Pywo ti rat aikotã satek takaria ewy ti rat eweikup­teꞌen e. Aikotã sẽtup i sẽtup i e haria ewy eweikup­teꞌen e. Aikotã yt ihapytig i rakaria ewy eweikup­teꞌen e. Aikotã yt hesokpe i rakaria ewywuat eweikup­teꞌen e. Miꞌi ewywuat eweikup­teꞌen mytkai — Waku pe watoĩ­neꞌen eweiꞌe eiwo­ꞌope. Maꞌato yt iꞌatu­wepit hin i rakaria ewy eipe e."

¹⁸ Tawa IRAUTISEIA piaria Uimohey haria koitywy woro­ho­ꞌo­nãpin neran aikotã ehekat wuatꞌi eꞌat piat sat hap kuap hap ete e. Uimohey haria eweikyiꞌat ro uipo pyi ehekat sese yt ikahuro rakat i e. Toĩneꞌen uipo pe hekat kahato rakat wuatꞌi eꞌat piat e. Miꞌi ti aria yt iꞌu kuap i hap ewy e Imehit kahato rakat miꞌi mekewat nu Uru kawait ewywuat e. Miꞌi eweikyiꞌat uikai hawyi hekat rakaria sese rakano eweikup­teꞌen are e. Eweikyiꞌat ro uipo pyi ehesokpe sese wuatꞌi eꞌat piat nuat e. Eipainug ikahu rakat sese mekewat ikytsig sese rakat eweikyiꞌat ro eipainug sese wuatꞌi eꞌat pe hap e. Maꞌato yt pote eiwe­mõti kahato aru yt kat i ehesokpe turanuat ewy pote eweikup­teꞌen wuatꞌi ehamo wuatꞌi eꞌat pe e. Iꞌewyte eweikyiꞌat mohag sese seha pohag eheha moeha­pytig hamuat wuatꞌi eꞌat piat nuat e."

¹⁹ Pywo ti rat uimohey haria uimi­kyꞌe sese koꞌi atiꞌa­tu­nãpin meremo atiꞌa­tu­ꞌa­piheg meremo yt naku i taꞌa­tunug hawyi uimẽ­pytꞌin mote e. Iꞌatu­minug saꞌag koꞌi atimo­herep kahato iꞌatuepe. Eiwe­morem no eiminug saꞌag koꞌi kaipyi hawyi eweiꞌaipok to uhowawi yne ehesaika hap wywo hawyi ewetunug no uimi­ky­ꞌesat ewywuat areꞌe yn e."

²⁰ Uimohey haria pywo ti rat areĩneꞌen ehoꞌo­ken­ꞌypy ete hawyi miꞌi kaipyi woro­ho­ꞌo­kaykay — Mehĩꞌin manaꞌin are areke teran eiꞌyat pe areꞌe at kaꞌap Uiꞌywot Tupana mõtypot yat piaria pe e. Uwe uwe kaykay­ꞌuiꞌe hap ikuap hawyi uiwesat — Waku Mehĩ waku Mimi — Ereke ro e. Miꞌi hat pe areke sese hawyi arenuk iwywo iꞌewyte tenuk uiwywo itote — Ereke ro Mehĩ Mimi e haria pyꞌa pe areĩneꞌen e Iesui ahepe.

"

²¹ Saꞌa­wyꞌi atiꞌakit kahato neꞌi ahiag hawyi areĩneꞌen wuatꞌi Porekuat no Uiꞌywot yatype e. Iꞌewyte uwe uwe iꞌakit ahiag uiꞌewy iꞌewyte uwe uwe uimohey toku­ꞌuro hap kape miꞌi hat pe aru areꞌe — Waku eraꞌapyk to uiwywo mesuwe uiꞌya­type areꞌe aru mekewat uikyꞌe hat pe e."

²² Pyno mio tã are uimohey haria weꞌa­tunug haria pe mekewat 7 Tupana mõtypot yat piaria pe yi Asia totiaria pe. Iꞌewyte torania uimohey haria pe areꞌe waku ehewaure kaꞌa kahato mesuwat uiꞌe hap kape e. Waku eiwe­wa­nẽtup kahato mesuwat Tupana Pãꞌãu mienoi kape kat areꞌe sese Tupana mõtypot yat piaria pe e Iesui ahepe.

Uito Iuwãu iꞌe hap ewy atiwan yne ehewowi.

"

4

¹ Saꞌa­wyꞌi uito Iuwãu Iesui potmuꞌe 12 ok takat araꞌa­kasa okenꞌypy ewy atipy pe. Miꞌi puo heremo yne atipy kape. Miꞌi hawyi atipy kaipyi sehay atikuap sehay wen maꞌato huhuꞌe hap ewy — Iuwãu e eriot ro mesuwe atipy kape e. Atimo­herep teran epe aikotã aru topy­huꞌat hamuat sese hap e. Yne aru topy­huꞌat uiꞌe hap ewy e uhepe saꞌa­wyꞌi."

² Miꞌi hawyi meremo Tupana Pãꞌãu uimoe­ha­py­hotꞌok aikotã wẽtup ok miit ewy areĩneꞌen Tupana Pãꞌãu wywo. Miꞌi hawyi uhereto atipy kape. Miꞌi tote araꞌa­kasa yne uimu­ꞌetu ewy ikahu kahato."

³ Saꞌa­wyꞌi araꞌa­kasa Aipo­typot Koro Iesui apyk pe wuatꞌi kaꞌiwat no. Ikahu kahato topy­huꞌat itote. Aikotã nu ikahu hekat rakat imehit hap ewy aikotã hẽtyhot meri­hup­ꞌokꞌe mekewat nu Iasipi hẽtyhot hap ewy aikotã nu Satuniu ewy Aiꞌakag Koro Iesui kahu hap. Iꞌewyte Morekuat apyk hap apypueri wo toĩneꞌen ipainũg hap weꞌyp ikahu kahato rakat ewy. Aika­ꞌiwat eꞌamyap herypꞌi ikahu rakat nu Emerauta mehit hap ewy."

⁴ Iꞌewyte itote araꞌa­kasa 24 miit apyk pe Morekuat eꞌamyap apypueri wo saꞌa­wy­ꞌi­wuaria poꞌog Tupana mohey haria. Iꞌatue­sokpe ikytsig kahato rakat. Iꞌatu­ꞌakag note iꞌatu­ꞌa­mãtap hekat rakat nu Uru kawiat morekuat painug hap koꞌi."

⁵ Miꞌi hawyi arahaꞌat i Aipo­typot Tupana eꞌamyap wato kape. Miꞌi heiam myi tuwẽtem merep merepꞌe hap koꞌi iꞌatu kahato. Huruhu­ruꞌe kahato itote sehay ewywuat wen huhuꞌe ihay pirik takat ewywuat tuwẽtem itote pyi. Ikahu kahato itote areꞌe uiwepe. Miꞌi hawyi arahaꞌat hawyi araꞌa­kasa ariãty itote wen maꞌato Tupana Pãꞌãu kawiat. Ikahu kahato itote katu­pono 7 ariãty ewywuat tuwẽtem itote pyi 7 ariãty eiam itote pote hap kape araꞌa­kasa itote atipy pe.

"

⁶ Miꞌi hawyi arahaꞌat i hawyi araꞌa­kasa hyemyiꞌa iwatoꞌin nakat ewy. Itote Aipo­typot wat amyap toĩneꞌen hyemyiꞌa pyꞌa­setpe. Mekewat hyemyiꞌa wato ewa ete heremo yne aipãꞌãu. Mekewat hyemyiꞌa yꞌy yt ipitpit hin i heremo kahato ipuo aikotã mekewat Nu hekat rakat Tiamante ewy. Miꞌi hawyi araꞌa­kasa 4 ok atipy piaria itote. Miꞌiria pe ete iha koꞌi yne iꞌatupiit ete. Miꞌi hap kape araꞌa­kasa."

⁷ Wẽtup ok atipy piat Awyato eowa ewywuat. Wẽtup ok atipy piat Wewato ahup mẽpyt eowa ewywuat. Wẽtup ok atipy piat miit eowa ewywuat. Wẽtup ok atipy piat hywi wato eowa ewywuat toĩneꞌen."

⁸ Yne 4 ok atipy piaria tukup­teꞌen topopy kuap takaria 6 ipepo wẽtup atipy piat ete. Iꞌewyte yne iꞌatu­pepo ete iha koꞌi torania puo. Ipepo ywytꞌok­pypuo iꞌewyte iha koꞌi tukup­teꞌen. Miꞌiria yt teꞌe­roket hin i maꞌato teꞌe­ru­wepy at kaꞌap Tupana kape — Wakuat sese En Tupana iꞌatuꞌe. Wakuat sese En Tupana iꞌatuꞌe. Wakuat sese En Tupana iꞌatuꞌe. En yn UrueTupana iꞌatuꞌe. En yn Urupo­typot Sese iꞌatuꞌe. En yn poꞌog poꞌog hesaika torania kawiat rakat iꞌatuꞌe. Wuatꞌi eminug hap eꞌyianmete ereĩneꞌen En iꞌatuꞌe. Iꞌewyte mesup te wuatꞌi eꞌat pe ereĩneꞌen iꞌatuꞌe. Iꞌewyte ikahuro hap ekuekai te ereĩneꞌen teꞌe­ru­wepy at kaꞌap meimuẽwat 4 ok takaria atipy piaria."

⁹ — Uruimõ­typot mõtypot kahato En Tupana iꞌatuꞌe. Hãpyk kahato En iꞌatuꞌe. Ewato kahato En iꞌatuꞌe. Urutu­wehum wehum kahato ewawi Tupana iꞌatuꞌe. Wuatꞌi eꞌat ieĩneꞌen hat iꞌatuꞌe. Ereĩneꞌen no Wuatꞌi Porekuat no iꞌatuꞌe teꞌe­ru­wepy puo meimuẽwat 4 ok atipy piaria."

¹⁰ Miꞌiria teꞌe­ru­wepy turan meimuẽwat 24 miit saꞌa­wy­ꞌi­wuaria poꞌog Tupana mohey haria teꞌe­ru­we­pỹ­ꞌã­tutuk iꞌatuewa yi kape Morekuat Wato oro ewa kape imõtypot hamo. Miꞌi hawyi iꞌatue­ꞌa­mãtap wakuat koꞌi taꞌa­tuhep iꞌatu­ꞌakag totepyi hawyi taꞌa­tu­pugha Aipo­typot py ywytꞌok­pype hawyi — Urupo­rekuat En iꞌatuꞌe. Ereĩneꞌen no wuatꞌi eꞌat pe wuatꞌi Porekuat no urutoꞌe iꞌatuꞌe."

¹¹ En yn ni Uruka­ꞌiwat Urupo­typot iꞌatuꞌe. Ewaku hap putꞌokꞌe sakpoꞌe wuatꞌi piat emõtypot hamo iꞌatuꞌe. Miꞌi pote uruimõ­typot mõtypot En iꞌatuꞌe. Wuatꞌi Mimõ­typot En iꞌatuꞌe. Wuatꞌi Mimõ­wato En iꞌatuꞌe. Poꞌog poꞌog wuatꞌi kai En iꞌatuꞌe. Iꞌewyte esaika hap poꞌog poꞌog torania kai iꞌatuꞌe. Waku uruimõ­typot En katu­pono Urunug Hat En Wuatꞌi Nug hat En mote iꞌatuꞌe. Emowepit hap sese eminug koꞌi katu­pono iꞌatu­kahu hap timo­herep Ekahu hap iꞌatuꞌe. Urutu­wehum kahato emiium ete emiky­ꞌesat ewy pote iꞌatuꞌe. Emõtypot hap koꞌi yne miꞌi eminug koꞌi iꞌatuꞌe 24 ok takaria saꞌa­wy­ꞌi­wuaria poꞌog imohey haria.

Iꞌatuꞌe hap ewy atiwan yne mesuwe uimiwan me. Uito Iuwãu.

"

5

¹ Miꞌi hawyi uito Iuwãu arahaꞌat i atipype hawyi araꞌa­kasa Aipo­typot apyk hap ikahu rakat tote. Miꞌi kape arahaꞌat hawyi araꞌa­kasa miwan Aipo­typot po sese kai toꞌokmõi me. Iꞌyhop ipe pewiu rakat ete miwan kokai kokai toĩneꞌen typy kawiat miwan. Howapy kahato ipytꞌat kahato mekewat miwan ipe ete. Mekewat iwan yt uwe i imowẽpap kuap katu­pono iheg me toꞌokmõi me toĩneꞌen. Tomo­satꞌe hap 7 wo ipyhyp hap iꞌywop hap ok tã 7 imosatꞌe hap ete ytyghe ewywuat toĩneꞌen."

² Miꞌi hawyi araꞌa­kasa wẽtup ok atipy piat ieĩneꞌen hat surara akag hesaika rakat hẽtup tehay pirik wo — Uwe uwe ewaku hap putꞌokꞌe Aipo­typot miꞌok­poꞌi miwan porap mowẽpap e hamo e tehay pirik wo ahowawi."

³ Miꞌi hawyi toikat kahato maꞌato yt wẽtup ok i toipuẽti katu­pono iꞌatue­waku hap yt putꞌokꞌe hin i iꞌokpoꞌi porop mowẽpap e hamo. Yt uwe i toipuẽti atipy pe iꞌewyte yt uwe i yi tote toipuẽti. Iꞌatue­waku hap yt putꞌokꞌe hin i imowẽpap hamo iꞌewyte tehaꞌat mekewat miwan kape hamo."

⁴ Yt uwe i toipuẽti iꞌokpoꞌi porop hamuat hawyi uito Iuwãu arawak haty wo katu­pono waku waku sese rakat yt wẽtup i aito toipuẽti pote arawak itote."

⁵ Maꞌato wẽtup ok 24 rakaria poꞌog Tupana mohey saꞌa­wy­ꞌiwuat haria toꞌe uhepe — Yt erewak teiꞌo mehĩ e uhepe — Erahaꞌat ro toĩneꞌen aipy­ꞌa­setpe wẽtup ok waku kahato rakat hewaku hap putꞌokꞌe mekewat miwan moherep hamo e. Meiẽ mekewat Morekuat Tawi Eꞌyianmiat Wuatꞌi Porekuat nuat yt karãpe iꞌaparap i pote hewaku hap putꞌokꞌe Tupana miwan imoherep hamo e. Erahaꞌat ro hesaika kahato Awyato Tig ewy hesaika hap ewy e. Eiꞌy­wania Akag Miꞌi Ehaꞌa­seꞌi Pot Iuta Saipepiat Miꞌi e. Miꞌi ewaku hap putꞌokꞌe mekewat miwan sat hamo mekewat puratig ewywuat moherep hamo e. Katu­pono miꞌi yn Guꞌuro Sese Hap Moma Hat e. Miꞌi yn ahiag yt tomaꞌat kuap i hat e uhepe mekewat saꞌa­wy­ꞌi­tewuat poꞌog imohey hat."

⁶ Miꞌi hawyi arahaꞌat hawyi araꞌa­kasa wuatꞌi pyꞌa­setpe wẽtup ok Miit Aihũ Mẽpyt Hit Kuteiru Ewywuat. Aipo­typot koro eiam note yꞌam me toĩneꞌen meimuẽwat 24 ok takaria saꞌa­wy­ꞌi­wuaria poꞌog imohey haria pyꞌa­setpe. Iꞌewyte meke­waria 4 ok takaria atipy piaria teꞌe­ru­wepy puo Tupana mõtypot haria pyꞌa­setpe. Miꞌi hawyi uito Iuwãu arahaꞌat kahato mekewat Hũ Hit kape. — Guꞌuro Kaipywiat Wẽtem Hat Miꞌi Miit areꞌe. Miꞌi hawyi araꞌa­kasa ipiit suk hap koꞌi kape. — Pywo ti rat Miitꞌin Miꞌauka Saꞌa­wy­ꞌiwuat Miꞌi Miit areꞌe arahaꞌat isuk hap koꞌi kapiat hawyi. Aikotã wati­ꞌauka aihũ hit aiminug saꞌag Tupana piat hep hamo aika­wiano aiꞌa­piheg hap moma hamo hap ewy areꞌe uiwa­nẽtup hawe. Tupana Mipo­ꞌoro Aihũ hit wuatꞌi pyꞌa­setpe hap kape arahaꞌat. Taꞌi 7 iꞌaut rakat iꞌakag note hap kape araꞌa­kasa. Iꞌewyte 7 iha rakat araꞌa­kasa 7 iha pyi Tupana Pãꞌãu hẽtyhot hap 7 iha Tupana eha piat ewywuat. Teha wo toiꞌa­tuepiok kuap kahato mesup­wa­rotiat yne miitꞌin sio waku sio yt hap kuap hamo. Yne heremo tope ewywuat."

⁷ Miꞌi hawyi mekewat Hũ Hit tat mekewat miwan topo sese kai toꞌokmõi miat miwan Wuatꞌi Porekuat po sese kai. Miꞌi pote mekewat Hũ Kuteiru taꞌa­tu­mõ­typot meimuẽwat 4 ok takaria atipy piaria poꞌog rakaria."

⁸ Mekewat miwan totat topo pe hawyi Tupana Hũ Hit Kuteiru itotiaria timõ­typot kahato mekewat Hũ Kuteiru. Meimuẽwat 4 ok takaria wuatꞌi eꞌat piat ieĩneꞌen haria. Iꞌewyte meimuẽwat 24 ok takaria poꞌog nakaria teꞌe­ru­we­pỹ­ꞌã­tutuk yi kape imõtypot hamo. Miꞌi hawyi teꞌe­ru­wepy kahato taꞌa­tupo piat wepy nug hap wywo. Haity koꞌi imehit kahato rakaria wywo ikahu rakaria wywo teꞌe­ru­wepy taꞌa­tupo piat kawakĩu wywo Tupana Hũ Kuteiru Hit mõtypot hamo. Miꞌi hawyi taꞌa­tuwuk ikamhig se rakat tyghe mohag hy puat Mekewat Kuteiru mõtypot hamo. Taꞌa­tuwuk ikamhig se rakat aria eiam imehit rakat Uru kawiat puo. Miꞌi ikamhig se kahato hap ewywuat Tupana wanẽtup hap ewy. Katu­pono Ihũ Hit mõtypot hap ahehay howawiat hap ewy."

⁹ Miꞌi hawyi araꞌa­kasa typyꞌi kahato miitꞌin Ihũ Hit mõtypot haria itote. Miꞌi hawyi teꞌe­ru­wepy kahato iraniaꞌin nywo. Maꞌato iꞌatu­wepy hap ipakup takat — Waku kahato En Tupana Hũ iꞌatuꞌe. — Waku kahato En iꞌatuꞌe. Ewaku hap putꞌokꞌe mekewat miwan okpoꞌi porop hamo. Waku etiꞌok­poꞌi porop hawyi etimo­herep uruepe Mimi Uhyt iꞌatuꞌe. Ewaku hap yn putꞌokꞌe Tupana mimo­satꞌe hap hep hamo iꞌatuꞌe. Ewaku hap yn iwato hap ok tã iꞌokman miat miwan moherep hamo eꞌauka uruka­wiano pote iꞌatuꞌe Saꞌa­wyꞌi esuu topy­huꞌat Tupana piat urukyiꞌat towanuat hawe iꞌatuꞌe. Katu­pono wuatꞌi mesu­wa­rotiat ywania kaipyi uruho­ꞌoekyi Tupana emiit no wuatꞌi miitꞌin wẽtup pusu wẽtup pusu kuap haria iꞌewyte wuatꞌi miitꞌin yt toꞌo­ꞌe­wywuat rakaria kaipyi iꞌewyte wuatꞌi miitꞌin wẽtup seko wẽtup seko mohey haria yt toꞌo­ꞌewy ewywuat i rakaria kaipyi iꞌewyte wuatꞌi yt toꞌo­ꞌe­wywuat i iꞌatupiit ete iꞌatueko rakaria kaipyi uruho­ꞌo­kyiꞌat esuu wo iꞌatuꞌe. Iꞌewyte wuatꞌi setama kaipyi uruho­ꞌo­kyiꞌat wuatꞌi ipe hun ipe kytsig ipe hup rakaria kaipyi uruho­ꞌoekyi Tupana emiit no Esuu wo iꞌatuꞌe teꞌe­ru­wepy puo wuatꞌi ywania Tupana Mipo­ꞌoro Aihũ Kuteiru ewywuat aikawiat ikuꞌuro rakat kape."

¹⁰ — Waku kahato En Iesui iꞌatuꞌe. Katu­pono urunug miitꞌin moherep Tupana kapiat hamuat iꞌatuꞌe. Koitywy urunug paꞌi koꞌi wo. Koitywo wato­py­huꞌat emiꞌai­roria miitꞌin pore­kuaria wo emiky­ꞌesat nug hamo iꞌatuꞌe. Waku kahato En Tupana Hũ Kuteiru Waku sakpoꞌe kahato iꞌatuꞌe teꞌe­ru­wepy puo wuatꞌi ywania itotiaria.

"

¹¹ Miꞌi hawyi atikuap wẽtup wepy hap Tupana Hũ Kuteiru kape. Atipy piaria iꞌatu kahato teꞌe­ru­wepy hap atikuap itote. Atipy piaria sem teꞌe­ru­we­ꞌa­tunug kahato wuatꞌi Morekuat Akag apyk hap kape araꞌa­kasa. Iꞌewyte meimuẽwat 24 ok takaria poꞌog imohey sese haria wywo teꞌe­ru­we­ꞌa­tunug torania atipy piaria wywo Tupana Hũ Kuteiru mõtypot hamo. Typyꞌi kahato miꞌiria ewywuat hap kape araꞌa­kasa. Iꞌatu kahato 10000 wo 10000 rakat watopag itote itote hap ewy typyꞌi hap ewy araꞌa­kasa atipy piaria sem yt mimo­rania yne kuap takat i hap ewy araꞌa­kasa itote."

¹² Miꞌi hawyi yne atipy piaria teꞌe­ru­wepy Tupana hũ Kuteiru kape haty wo — Waku kahato En Waku kahato En Miitꞌin Miꞌauka iꞌatuꞌe teꞌru­wepy puo atipy piaria — Ewaku hap putꞌokꞌe miitꞌin airo hamo sio waku yt e hamo iꞌatuꞌe teꞌe­ru­wepy puo. Ewaku hap putꞌokꞌe Wuatꞌi Miitꞌin Porekuat Nuat pote iꞌatuꞌe. Waku wuatꞌi ekat topy­huꞌat epo pe. Taꞌi ewaku hap putꞌokꞌe kahato katu­pono wuatꞌi weꞌeg hap kuap hat En iꞌewyte wuatꞌi hesaika hap ekai toĩneꞌen iꞌatuꞌe. Pyno hãpyk kahato En mote waku Wuatꞌi Mimo­wato wo ereĩneꞌen iꞌatuꞌe. Waku yne ehay emõtypot hap topy­huꞌat teꞌe­ru­wepy haty wo atipy piaria sem mekewat Tupana Mipo­ꞌoro Aihũ Kuteiru Miitꞌin Miꞌauka Iesui kape. Uito Iuwãu araꞌa­kasa yne uimu­ꞌetu.

"

¹³ Miꞌi hawyi uito Iuwãu wẽtup i wepy hap atikuap Tupana Hũ Kuteiru mõtypot kahato hap wepy hap. Wuatꞌi atipy piaria iꞌewyte wuatꞌi yi totiaria wepy hap atikuap wuatꞌi yi ywytꞌok piaria iꞌewyte yꞌy wato piaria wepy hap atikuap. Mio tã iꞌatuꞌe — Uruimõ­typot kahato En iꞌatuꞌe. Eraꞌapyk to wuatꞌi Morekuat eiam note Urupo­rekuat koro wo Mehĩ Mimi iꞌatuꞌe. Ereĩneꞌen no Wuatꞌi Akag Wato wo iꞌatuꞌe. Ereĩneꞌen no Wuatꞌi Kawaiat Poꞌog Nakano iꞌatuꞌe. Yt uwe i poꞌog hesaika ekai Mimi Mehĩ iꞌatuꞌe. Taꞌi ewaku hap uruikuap kahato iꞌatuꞌe. Waku kahato En watoꞌe wuatꞌi eꞌat pe katu­pono wuatꞌi eꞌat pe gaꞌatpo mũki­ꞌite mesup wuatꞌi eꞌat pe ewaku hap putꞌokꞌe Urumi­mõ­typot no eminug koꞌi."

¹⁴ Miꞌi hawyi mekewat 4 ok takaria — Pywo ti rat pywo ti rat iꞌatuꞌe. Iꞌewyte mekewat 24 ok takaria poꞌog Tupana mohey saꞌa­wy­ꞌiwuat haria teꞌe­ru­we­pỹ­ꞌã­tutuk iꞌatuowa yi kape taꞌa­tu­mõ­typot Tupana Hũ Kuteiru haype — Wuatꞌi eꞌat piat ieĩneꞌen hat uruhe­waku kahato En iꞌatuꞌe.

Miꞌi tã uito Iuwãu araꞌa­kasa uimu­ꞌetu.

"

6

¹ Miꞌi hawyi uito Iuwãu arahaꞌat hawyi araꞌa­kasa Tupana Hũ Kuteiru. Miꞌi hawyi toipak wẽtup saꞌa­wy­ꞌiwuat miwan Tupana mosatꞌe hap. Mekewat 7 rakat imosatꞌe hap wẽtup toipak hawyi atikuap sehay wẽtup ok 4 ok takaria wẽ pyi — Iuwãu e eriot ro atipy kape e katu­pono atiky­ꞌesat erahaꞌat yi kape aikotã aru topy­huꞌat miitꞌin hap kape e."

² Arahaꞌat hawyi araꞌa­kasa raꞌyn wẽtup ok aihũ kawaru ikytsig kahato rakat ok pe tote surara akag ewywuat araꞌa­kasa. Miꞌi hawyi mekewat miit toto wuatꞌi ywania moperupꞌi hamo wuatꞌi akit hamo toto. Ipo pe mory­ꞌawat moryꞌa koꞌi. Miꞌi hawyi miitꞌin teꞌe­roꞌe — Waku En urupo­rekuat no iꞌatuꞌe. Miꞌi hawyi taꞌa­tu­painug mekewat surara akag morekuat no — En uruꞌakag wo iꞌatuꞌe. Miꞌi hap kape araꞌa­kasa.

"

³ Miꞌi hawyi arahaꞌat i raꞌyn Tupana Hũ Kuteiru Iesui kape. Miꞌi hawyi wẽtup i raꞌyn toihiot miwan mosatꞌe hap toipak hawyi mekewat 4 ok takaria wẽtup ok ihay uhowawi — Iuwãu e erahaꞌat ro yi kape erahaꞌat ro aikotã aru miitꞌin teꞌe­ro­py­huꞌat aru itote hap kape e."

⁴ Miꞌi hawyi araꞌa­kasa wẽtup ok surara akag aihũ kawaru hup kahato rakat okpe tote. Miꞌi hawyi hesaika kahato morekuat no topy­huꞌat. Taꞌa­tunug miꞌi taꞌa­tu­ꞌakag akag wo. Miꞌi hawyi toiꞌa­tu­muꞌe kahato tesu­ra­raꞌin me miitꞌin moma kuap kahato hap. Miꞌi hawyi toto te miitꞌin wywuat wuꞌuka hamo mesuwat yi totiaria yne wywo hamo. Miꞌi hawyi totat raꞌyn surara wato kyseꞌyp ewywuat wuatꞌi moperup hamo. Miꞌi hawyi yt kat i topy­huꞌat woꞌo­wese hap mesuwat yi tote maꞌato woꞌo­ꞌauka haria yn tukup­teꞌen itote. Miꞌi hap kape araꞌa­kasa.

"

⁵ Miꞌi hawyi Tupana Hũ Kuteiru Iesui tipak taꞌyn wẽtup miwan etiat mosatꞌe hap myeꞌym hap taꞌyn toipak. Miꞌi tutunug hawyi atikuap sehay wẽtup ok 4 takaria wẽ pyi. Iuwãu e erahaꞌat ro yi kape aikotã aru topy­huꞌat miitꞌin hap kape e. Arahaꞌat hawyi araꞌa­kasa raꞌyn wẽtup ok aihũ kawaru hun kahato okpe tote rakat surara akag kape araꞌa­kasa. Mekewat miit po piat kape araꞌa­kasa karania ipotyi hap kuap hap."

⁶ Atikuap sehay 4 ok takaria pyꞌa­setpyi — Miꞌi haꞌup iwato kahato — Miu haꞌup haꞌup woityꞌi hap topy­huꞌat yi totiaria mikyiꞌat nuat e ikap rakat iꞌewyte hesapo hy rakat iꞌewyte uꞌi. — Taꞌi wẽtup eꞌat miitꞌin taꞌa­tu­potpap at wẽtup ekuiꞌa uꞌi kyiꞌat hamo. Miꞌu haꞌup woityꞌi e. Taꞌi awati myeꞌym ekuiꞌa kyiꞌat hamo iꞌatu­potpap at e. Waku satek hap wywo etuꞌu kurin kurin miꞌu e yi totiaria pe.

"

⁷ Miꞌi hawyi Tupana Hũ Kuteiru Hit tipik wẽtup i raꞌyn miwan mosatꞌe hap 4 raꞌyn toipik hawyi atikuap sehay wẽtup ok 4 ok takaria wẽ pyi ihay raꞌyn uhowawi 4 ok taꞌyn meimuẽwat morekuat apyk hap kaipyi hay rakaria. — Iuwãu e eriot ro meikowo e. Erahaꞌat ro aikotã aru miitꞌin teꞌe­ro­py­huꞌat yi tote hap kape e uhepe."

⁸ Arahaꞌat hawyi araꞌa­kasa wẽtup ok surara akag kape tohũ Kawaru okpe tote. Ihũ ete ikaꞌay rakat hepihi pihi rakat yt ikahu hin i rakat. Mekewat miit set Guꞌuro iꞌatuꞌe. Tohũ saꞌag okpe tote hewyry aikope aikope tomi­ky­ꞌesat kape. Iꞌewyte toĩneꞌen hewat­ꞌymo yne muꞌap upi ikuꞌuro rakaria sem. Miꞌi hawyi Guꞌuro miitꞌin pyꞌa­setpe ikosap hap upi miitꞌin topap kahato ikuasa hap upi. Miꞌi hawyi atikuap sehay Guꞌuro pe — Ehoꞌo­ꞌauka ro yi totiaria e. Aikope aikope toĩneꞌen 4 miit ekai pote etiꞌauka wẽtup miit e. Toĩneꞌen 40 miit ekai pote etiꞌauka 10 miit e. Miꞌi hawyi toto miitꞌin wuꞌuka hamo. Ipatꞌok topap surara akag Guꞌuro e hap het rakat ekyseꞌyp mo. Ipatꞌok syꞌat pe topap ipatꞌok ahu pono topap ipatꞌok miꞌat koꞌi ipyꞌahak takaria tiꞌa­tu­ꞌuka. Topap topap yi totiaria sok kape araꞌa­kasa.

"

⁹ Miꞌi hawyi Tupana Hũ Kuteiru kape araꞌa­kasa. Miꞌi hawyi toipak miwan pyhyp 5 hap taꞌyn miwan pyhyp hap toipak hawyi arahaꞌat yparakai wato kape mekewat miium Tupana kapiat kape. miꞌi hawyi yparakai ywytꞌoꞌ­pype miitꞌin sem Tupana ehay moherep potiat miitꞌin miꞌauka sem kape araꞌa­kasa. — Eiwe­mohey Tupana pote uruiꞌauka eipe iꞌatuꞌe e Tupana wanĩ­kaptia. Maꞌato miꞌi pytkai — Uruimohey te pãi an iꞌatuꞌe imohey haria taꞌa­tu­ꞌa­tu­ꞌuka teran haria pe. Miꞌi hawyi miitꞌin miꞌauka wo tukup­teꞌen miꞌiria."

¹⁰ Miꞌiria tukup­teꞌen yparakai wato ywytꞌok­pype wuatꞌi miium Tupana kapiat pyꞌa­setpe tukup­teꞌen. Itote — Urupo­typot Urupo­typot iꞌatuꞌe taꞌa­tuehay pirik wo. Wakuat sese En iꞌatuꞌe. Hãpyk sese rakat En iꞌatuꞌe. Karãpe aru karãpe aru urueru­wepyk urusuu okpun haria ete uruꞌauka haria ete mytyp totiaria ete iꞌatuꞌe Tupana pe."

¹¹ Miꞌi hawyi tutum iꞌatue­sokpe ikytsig nakat miitꞌin miꞌauka tomohey potiat haria hap moherep hamo hawyi — Apuꞌete e hawyi woro­ho­ꞌo­ka­wiano irane e. Eiwe­mohey ro mesu­wete e. Pywo ti rat woho­ꞌo­poepyk irane maꞌato eipe yt eirania i te miitꞌin miꞌauka koꞌi e. Tukup­teꞌen eiꞌe­wy­wuaria miitꞌin miꞌauka wuat irane. Taꞌa­tu­ꞌauka yne aru eipe torania yne mesuwe hawyi woro­ho­ꞌo­ka­wiano eipe e. Atiꞌa­tu­ꞌa­piheg kahato aru eisuu okpun haria eiꞌauka haria e wuatꞌi miium yparakai koro ywytꞌokpy piaria pe. Miꞌi hap kape araꞌa­kasa yne.

"

¹² Miꞌi hawyi arahaꞌat i raꞌyn Tupana Hũ Kuteiru kape. Miꞌi hawyi toipak taꞌyn wẽtup miwan moheg hap 6 hap taꞌyn hawyi yi tyryꞌe tyryꞌe kahato. Miꞌi hawyi at yt hẽtyhot hin i. Iꞌewyte at hun kahato aikotã sokpe hun puo hẽtyhot hap ewy. Iꞌewyte waty ihup aikotã suu ewy toꞌo­puẽti pytkai ihup. Miꞌi hap kape araꞌa­kasa."

¹³ Miꞌi hawyi waikiru koꞌi hewo hewo atipy kaipyi yi kape. Hewo aikotã ywa hewo kahato ywytu uato turanuat hap ewy hewo hewo waikiru sem yi kape."

¹⁴ Miꞌi hawyi waikiru koꞌi yt teꞌe­ru­wekuap i raꞌyn aikotã wati­ꞌok­poꞌi aheꞌyni hap ewy at wẽtem hap kaipyi at minꞌe hap kape tuwe­ꞌok­mueri hawyi yityꞌok koꞌi tuwat wẽtup teiam kape. Iꞌewyte yꞌy wato piat tuwat wẽtup taꞌatueiam yꞌy wato piat kape hap araꞌa­kasa."

¹⁵ Miꞌi hawyi yi totiaria teꞌe­ro­kenꞌẽ kahato teꞌe­ra­haꞌat hamo. Miitꞌin porekuat koꞌi teꞌe­ro­kenꞌẽ kahato. Iꞌewyte hekat rakaria teꞌe­ro­kenꞌẽ kahato. Miit iwatoꞌin nakaria teꞌe­ro­kenꞌẽ iꞌewyte Tupana pupi. Iꞌewyte sura­raꞌin akag koꞌi teꞌe­ro­kenꞌẽ kahato. Miitꞌin ipiit hesaika rakaria teꞌe­ro­kenꞌẽ. Iꞌewyte miit eropat haria iꞌewyte teꞌe­ro­kenꞌẽ kahato Tupana owa kapiat teꞌe­ra­haꞌat hamo. Gaꞌapy pe miꞌat kaꞌa pe teꞌe­ru­wemig genꞌẽ pono yityꞌok kaꞌa pe Tupana Hũ Kuteiru pupi teꞌe­ro­kenꞌẽ kahato."

¹⁶ Miꞌi haype kakꞌi­ꞌa­tuꞌe kakꞌi­ꞌa­tuꞌe — Urusyp to urusyp to iꞌatuꞌe yihot kaipyi yityꞌok kape. Ehewo ro ehewo ro urusyp hamo iꞌatuꞌe. Katu­pono uruto­kenꞌẽ kahato Tupana owa kape uruta­ꞌa­kasa hamo iꞌatuꞌe. Yt uruiky­ꞌesat i tehaꞌat uruewawi iꞌatuꞌe. Uruto­kenꞌẽ kahato Tupana Hũ Kuteiru pupi iꞌatuꞌe. Katu­pono mesup haiwot raꞌyn ahete iꞌatuꞌe teꞌe­ru­wẽ­powat yihot kaipyi torania."

¹⁷ — Are pãi are an putꞌokꞌe raꞌyn aiꞌa­piheg hap eꞌat kakꞌi­ꞌa­tuꞌe kakꞌi­ꞌa­tuꞌe popuo. Mesup haiwot raꞌyn ahete iꞌatuꞌe. Ipoityꞌi kahato ahete iꞌatuꞌe. Yt uruhupit kuap i uruꞌa­piheg hap kakꞌi­ꞌa­tuꞌe kakꞌi­ꞌa­tuꞌe popua e hap kape araꞌa­kasa yne uito. Gytꞌi­ꞌa­tuꞌe popuo kyryꞌet­ky­ryꞌet­ꞌi­ta­tuꞌe.

Miꞌi kape araꞌa­kasa yne uito Iesui Kaitywy Iuwãu.

"

7

¹ Miꞌi hawyi uito Iuwãu arahaꞌat yi kape. Miꞌi turan araꞌa­kasa 4 ok atipy piaria Tupana mipo­ꞌoro koꞌi yi aipytyp tote wasere hewyry yi totiat pyhyp hamo. Wẽtup Tupana mipo­ꞌoro toĩneꞌen yꞌam me aikope at tuwẽtem hap tote. Miꞌi hawyi toipyhyp sese wasere at wẽtem hap kaipywiat. Wẽtup Tupana mipo­ꞌoro toĩneꞌen yꞌam me at minꞌe hap tote mekewat at minꞌe hap kaipywiat wasere pyhyp hamo. Maꞌato wẽtup ok atipy kaipywiat Tupana mipo­ꞌoro toĩneꞌen yꞌam me at posak pe wasere pyhyp hamo. Irokirẽ wẽtup ok Tupana mipo­ꞌoro koka­wiano toĩneꞌen at posak pe yꞌam me koka­wiano wasere pyhyp hamo. Miꞌi tã me taꞌa­tu­pyhyp yne wasere aipytyp tote. Miꞌi hawyi yt kat i wasere hewyry aipytyp tote hawyi ihyemyiꞌa wato koꞌi ihy nik kahato raꞌyn. Miꞌi hawyi gaꞌapy ete yt wasere hin i. Miꞌi hawyi gaꞌapy koꞌi yt iꞌywa yt hẽꞌẽ hin ĩ raꞌyn yt kat i wasere pote. Miꞌi kape arahaꞌat yne atipy kaipyi yi kape."

² Miꞌi hawyi uito Iuwãu arahaꞌat at tuwẽtem hap kape. Miꞌi turan araꞌa­kasa wẽtup ok Tupana mipo­ꞌoro atipy kaipywiat Tupana eropat hat sese. Miꞌi ti topopy puo taꞌam at wẽtem hap kaipyi. Miꞌi hawyi toikat Tupana eropat haria sese yi totiaria. Tupana eropat hat sese toipuẽti yi tote hawyi toiwan miꞌi miit owatuꞌa miꞌi ete Tupana pusu puo — Uheropat hat sese miꞌi e hamo howa­tuꞌa ete uwe Tupana emiit sese moherep hamo."

³ Topopy at wẽtem hap kaipyi turan tuwẽ­powat tehay pirik wo wasere pyhyp haria atipy kaipy­wiaria kape — Wasere pyhyp haria yt eweipyhyp ti teiꞌo wasere yi totiat yꞌy wato totiat. Yt eweiꞌa­piheg teiꞌo yi yꞌy e. Aputꞌi te e atimo­wekuap teran uwe Tupana eropat sese haria e. Iꞌatue­wa­tuꞌa atipehik iwan iꞌatue­wa­tuꞌa tote e tehay pirik wo wasere pyhyp haria pe."

⁴ Miꞌi hawyi toiꞌa­tu­mo­rania Tupana emiit sese hap mekewat miwan wywuat toiwan iatue­wa­tuꞌa sokpe ete. Miꞌi hawyi atikuap karania. 144000 miit Tupana wanuat iꞌatuꞌe hap atikuap. Torania miꞌiria Iuteu ywania meimuẽwat yne aseꞌi pot Isareu emiariru koꞌi. 144000 miit Iuteu ywania kawiat iꞌatuꞌe hap atikuap."

⁵ Pyno 12000 miit aseꞌi IUTA ywania kaipyi Tupana eropat haria sese. Miꞌi hawyi 12000 miit aseꞌi HUPIN ywania kaipywiat. 12000 miit aseꞌi KATI kaipywiat."

⁶ Miꞌi hawyi 12000 miit aseꞌi ASA kaipywiat. Miꞌi hawyi 12000 miit aseꞌi NATARI kaipywiat. Miꞌi hawyi 12000 miit aseꞌi MANASE kaipywiat toiꞌa­tu­mo­rania."

⁷ Miꞌi hawyi aseꞌi SIMIÃU kaipywiat 12000 miit. Miꞌi hawyi 12000 miit aseꞌi IREWI kaipy­wiaria. Miꞌi hawyi 12000 miit aseꞌi ISAKA kaipy­wiaria toiꞌa­tu­mo­rania."

⁸ Miꞌi hawyi aseꞌi SAPURUM kaipy­wiaria 12000 miit. Miꞌi hawyi 12000 miit aseꞌi IUSE kaipywiat toiꞌa­tu­mo­rania. Miꞌi hawyi 12000 miit aseꞌi PEISAMĨ kaipywiat toiꞌa­tu­mo­rania. Yne ASEꞌI POT ISAREU haꞌy­ruꞌin kaipy­wiaria 12000 miit torania Tupana eropat haria sese mesuwat yi tote toiꞌa­tu­mo­rania 144000 miit ASEꞌI POT ISAREU ywania saꞌyruꞌin 12 ok takaria emiariru emiariru koꞌi mesuwat yi totiaria. Miꞌi hap kape araꞌa­kasa torania miꞌiria Iuteu ywania Iesui mohey haria pakup takaria hehay wakuat moherep haria.

"

⁹ Miꞌi hawyi uito Iuwãu arahaꞌat i hawyi araꞌa­kasa miitꞌin sem kahato yt wati­mo­rania kuap i hap ewy. Katu­pono typyꞌi kahato miꞌiria. Teꞌe­ru­we­ꞌa­tunug Tupana Hũ Kuteiru owa kape Morekuat koro apyk hap tote teꞌe­ru­we­ꞌa­tunug. Tupana Hũ hit Kuteiru mõtypot hamo teꞌe­ru­we­ꞌa­tunug. Typyꞌi kahato araꞌa­kasa. Miꞌi hawyi arahaꞌat meimuẽ­wuaria kape hawyi atikuap yne ywania pyꞌa­setpyi teꞌe­ru­we­ꞌa­tunug yt toꞌo­ꞌewy hin i. Iꞌatupiit koꞌi ihup ikytsig hun. Katu­pono yne tama kaipyi iꞌatueko yt toꞌo­ꞌe­wy­ꞌewy hin i miꞌaria katu­puno wuatꞌi pusu kuap hap kaipyi teꞌe­ru­we­ꞌa­tunug wuatꞌi more­kuaria etama kaipyi teꞌe­ru­we­ꞌa­tunug Tupana Hũ Kuteiru owa kape. Yne iꞌatupo puat ikahu rakaria ariaꞌyp iãgã koꞌi taꞌa­tuerut Tupana Hũ Kuteiru hit mõtypot hamo. Taꞌa­tue­sokpe ikytsig nakat ikahu rakat puo tõꞌẽ imõtypot hamo."

¹⁰ Miꞌi hawyi iꞌatu­wẽpapꞌi taꞌa­tuehay wo — Tupana En yn Urueha­kye­raꞌat kuap hat katu­pono Esaꞌyru Iesui ikuꞌuro uruka­wiano hawyi emeiha­kye­raꞌat koꞌi wo urutu­kup­teꞌen iꞌatuꞌe. Wakuat En wakuat En iꞌatuꞌe. Waku ereꞌapyk Urupo­rekuat koro wo wuatꞌi eꞌat pe aru iꞌatuꞌe. Eraꞌapyk to eiam ikahu rakat tote. Waku morekuat akag epuretig toĩneꞌen epope wuatꞌi eꞌat pe iꞌatuꞌe. Wakuat En wakuat En iꞌatuꞌe iꞌatu­wẽpapꞌi haty wo."

¹¹ Miꞌi hawyi wuatꞌi atipy piaria iꞌewyte mio tã iꞌatuꞌe iꞌatu­wẽ­papꞌi meimuẽ­waria 24 ok takaria poꞌog imohey saꞌa­wy­ꞌiwuat haria teꞌe­ru­wẽ­powat iraniaꞌin iꞌewyte te. Miꞌi hawyi meimuẽwat 4 ok takaria atipy piat ieĩneꞌen haria teꞌe­ru­we­pỹ­ꞌã­tutuk iꞌatuowa yi kape mekewat wuatꞌi Porekuat Koro Atipy Piat Apyk Piat Iesui mõtypot hamo — Waku sakpoꞌe En waku sakpoꞌe En iꞌatuꞌe. Poꞌog waku wuatꞌi ewaku hap kai iꞌatuꞌe. Uruimõ­typot mõtypot kahato En wuatꞌi eꞌat pe iꞌatuꞌe haty wo iꞌatuꞌe."

¹² Pywo sese ti rat En. Uruhe­waku En uruimo­wato En katu­pono wuatꞌi weꞌeg hap heiam En iꞌatuꞌe. Emiium uruepiat ete urutu­wehum kahato iꞌatuꞌe. Uruimo­wato En uruehay wo iꞌatuꞌe. Eropy­huꞌat ro wuatꞌi mimõ­typot wo wuatꞌi akag wo. Esaika poꞌog poꞌog wuatꞌi kai iꞌatuꞌe. Wuatꞌi mimõ­typot sese wo poꞌog poꞌog rakano ereĩneꞌen. Ewaku poꞌog poꞌog urutoꞌe. Emiium poꞌog waku urutoꞌe. Emiium waku yne urutoꞌe. En yn Tupana wẽtup yn wuatꞌi eꞌat piat ieĩneꞌen hat En urutoꞌe. Tupana wo ereĩneꞌen esaika hap yne esaika hap torania kai iꞌatuꞌe miitꞌin sem taꞌa­tue­sokpe kytsig puo atipy piaria torania wywo."

¹³ Miꞌi hawyi wẽtup ok 24 rakaria apoꞌe uhepe — Iuwãu e etikuap apo uwe miꞌiria miitꞌin sem iꞌatue­sokpe kytsig nakat piaria. Etikuap karãpe tukup­teꞌen aru miꞌiria yi tote e uhepe."

¹⁴ — U pãi areꞌe yt atikuap i rat. En yn etikuap mehĩ are. Miꞌi hawyi uiwesat — Pyno ahehoi miꞌiria etiat epe Iuwãu e. Miꞌiria tõꞌẽ tõꞌẽ meikowo taꞌa­tu­ho­ꞌopot hoꞌopot sese hap kaipyi. Haꞌa­wyte miꞌiria miitꞌin mimo­so­ꞌopot kahato wo tukup­teꞌen yi tote taꞌa­tu­mohey Tupana Saꞌyru hawyi e. Wakuaria kahato miꞌiria katu­pono Tupana Hũ Kuteiru ikuꞌuro iꞌatu­ka­wiano. Taꞌa­tu­mohey hawyi Tupana tihep taꞌyn iꞌatu­minug saꞌag hap koꞌi e. Saꞌa­wyꞌi iꞌatu­minug saꞌag iꞌatu­pitpit hap ewy maꞌato koitywy ikytsig hap ewy teꞌe­ro­py­huꞌat miꞌiria Tupana Hũ Kuteiru suu mikoho koꞌi raꞌyn e. Saꞌa­wyꞌi iꞌatu­minug saꞌag sokpe hun hap ipitpit rakat ewy teꞌe­ro­py­huꞌat e. Maꞌato taꞌa­tu­mohey hawyi sokpe koho hap ewy Iesui suu puo hap ewy hawyi ikytsig naꞌyn iꞌatue­sokpe teꞌe­ro­py­huꞌat e uhepe."

¹⁵ Miꞌi tupono Tupana ehamo tukup­teꞌen kuap mesup e. Tupana owa kape teꞌe­ra­haꞌat kuap e. Miꞌi hawyi toꞌoehay Tupana wywo toꞌoewa kape. Miꞌi pote Aipo­typot amyap ikahu rakat yatype tukup­teꞌen miꞌiria e. Miꞌi pote tukup­teꞌen at kaꞌap ihamo e. Taꞌa­tue­ropat at kaꞌap wuatꞌi eꞌat pe Tupana miky­ꞌesat nug hap ete e. Miꞌi pote Tupana yt paaꞌe hin i iꞌatuete katu­pono toĩneꞌen iꞌatu­py­ꞌa­setpe taꞌa­tueTu­pana wo e uhepe."

¹⁶ Saꞌa­wyꞌi Miitꞌin misa­tyꞌi satyꞌi kahato haria miꞌiria miitꞌin mimoe­syꞌat koꞌi wo tukup­teꞌen e. Teꞌe­re­ꞌy­ꞌutui kahato pytkai yt kat i yꞌy taꞌatuium e. Saꞌa­wyꞌi taꞌa­tu­ho­ꞌopot at kaꞌap imohey pote e. Miitꞌin mimo­so­ꞌopot motpap wiat haria iꞌatupiit sero hakup pono haria e. Koitywy yt hakup i haria wo yt iãꞌãg haria wo i raꞌyn tukup­teꞌen e. Koitywy waku pe tukup­teꞌen e. Yt kat i poꞌog hoꞌopot hap katu­pono Tupana mipoi koꞌi tukup­teꞌen e. Koitywy Tupana mowepit at kaꞌap takaria wo tukup­teꞌen miꞌiria e uhepe."

¹⁷ — Koitywo Tupana Hũ Kuteiru topy­huꞌat iꞌatu­ꞌa­pykok hat sese. Toiꞌa­tu­ꞌa­pykok mekewat Morekuat eꞌamyap ikahu rakat rote pyi. Koitywy Tupana Saꞌyru topy­huꞌat iꞌatupoi hat e. Teꞌe­re­ꞌy­ꞌutui hawyi Tupana Hũ hit timo­herep yꞌy wakuat rakat yt ipitpit hin i rakat aimoieĩ­neꞌen wuatꞌi eꞌat piat hat yꞌy e. Toiꞌa­tu­ꞌy­kesat yrasa sese koꞌi kape iꞌatu­moieĩ­neꞌen sese hamo e. Tupana sese topy­huꞌat iꞌatu­mo­wepit hat — Uhaꞌy­ruꞌin uhaki­ꞌytꞌin wãi ehekiri teiꞌo e. Koitywy ti aru yt karamuo i raꞌyn eheha hy homhomꞌe ehekiri hap upi e. Atihep yne ehepiat hatyꞌu hap e. Koitywy wuatꞌi eꞌat pe eweikup­teꞌen waku pe eweikup­teꞌen e Tupana Hũ Kuteiru Hit mekewat hoꞌopot haria kape e uhepe mekewat wẽtup ok 24 rakaria kaipyiat hat.

Araꞌa­kasa yne mekewat kape uimu­ꞌetu Uito Iuwãu.

"

8

¹ Miꞌi hawyi mekewat Kuteiru tipik taꞌyn popera mosatꞌe hap torania raꞌyn mekewat 7 hap taꞌyn. Toipik yne raꞌyn hawyi iꞌatu­po­ꞌinik yne atipy piaria. Wẽtup ora patꞌok turan yt uwe hin i ihay atipy pe hap kape araꞌa­kasa. Ipoꞌinik sese itote toipik yne raꞌyn mote."

² Miꞌi hawyi araꞌa­kasa raꞌyn 7 ok takaria atipy piat gupteꞌen haria Tupana pyꞌa­setpe imiky­ꞌesat nug hanuaria. Yne miꞌiria kape tutum huhuꞌe hap akuara wato."

³ Miꞌi hawyi wẽtup ok atipy piat ieĩneꞌen hat putꞌokꞌe raꞌyn mekewat aimiium Tupana kapiat yparakai wato Tupana ywyt pe. Toĩneꞌen ipo pe heiam nu imehit rakat kawiat. Toĩneꞌen mekewat heiam me mohag hy ikamhig se rakat wẽtup ok miium iwuk hamuat. Saꞌa­wy­ꞌiwuat aimiium Tupana kapiat ieĩneꞌen hap tote toĩneꞌen Tupana emiit iꞌatu­mienoi Tupana kapiat ywytpe. Miꞌi hawyi wẽtup ok tum tope ahehay Tupana kapiat sehay wuatꞌi imohey haria ehay Tupana kapiat sehay ewywuat mekewat mohag ikamhig se rakat ewywuat. Miꞌi totopag heiam me mohag hy puo hawyi toiwuk Tupana mowepit hamuat."

⁴ Miꞌi hawyi mekewat heiam kaipyi taꞌam naꞌyn ywyhig iꞌatu­miẽtup Tupana kapiat eꞌyhig. Miꞌi turan heiam toĩneꞌen Tupana yatypiat ieĩneꞌen hat po pe raꞌyn. Miꞌi hawyi ikamhig se rakat taꞌam aria upi Tupana kape imowepit hap."

⁵ Miꞌi hawyi mekewat atipy piat tipag naꞌyn aria teiam kamũti pe yparaka aikope aria wo watum aimiium Tupana kapiat hap tote pyi hawyi toto kamũti topo piat wywo hawyi toipun naꞌyn yi kape aipytyp kape. Toipun naꞌyn yi kape hawyi atikuap sehay yi tote huhuꞌe hap ewy ihay pirik. Miꞌi hawyi merep merepꞌe iꞌewyte mytyp tyryꞌe kahato."

⁶ Miꞌi hawyi 7 ok takaria iꞌatue­huhu iꞌatu­rania tukup­teꞌen iꞌatupo pe iꞌatu­mipy wuat."

⁷ Miꞌi hawyi wẽtup ok i huhuꞌe raꞌyn tuwepy raꞌyn. Miꞌi pote iꞌaman ewy nukara toꞌo­pype suu wywo tuwe­mo­herep. Miꞌi hawyi taꞌat raꞌyn yi kape. Miꞌi pote gaꞌapy piat wukꞌe raꞌyn ariaꞌyp watoꞌin iꞌewyte gaꞌakyt hyp koꞌi ipatꞌok wukꞌe raꞌyn."

⁸ Miꞌi rokirẽ wẽtup ok tuwe­hu­hupy akuara wato. Miꞌi ti imipy typy hap. Totopy raꞌyn mote wẽtup yityꞌok aria kawiat taꞌat yꞌy wato pe. Miꞌi hawyi yꞌy wato puaria hoꞌopap kahato wẽtup ikuꞌuro myeꞌym puo yꞌy piaria."

⁹ Miꞌi pote yꞌy wato piat gupteꞌen haria hoꞌopap taꞌyn yne yꞌy hit upi yꞌy wato upi. Iꞌewyte yara wato koꞌi ipatꞌok taꞌyn toimoma."

¹⁰ Miꞌi hawyi wẽtup ok i 7 ok takaria tehu­hupy. Miꞌi wyti iꞌokhyt pun naꞌyn waikiru iwato rakat ewywuat taꞌat raꞌyn atipy kaipyi yꞌy hitꞌi koꞌi ete."

¹¹ Mekewat waikiru set nop e hap katu­pono taꞌat raꞌyn mekewat waikiru yꞌy hitꞌi koꞌi piat hawyi iꞌewyte nop taꞌyn iꞌewyte yrasa koꞌi teꞌe­ro­py­huꞌat nop taꞌyn. Miꞌi hawyi miitꞌin teꞌe­re­ꞌyꞌu mekewat nop takat wo hawyi topap taꞌyn."

¹² Miꞌi hawyi wẽtup ok i 7 ok takaria iꞌuhu teꞌakuara wato hawyi wãtym naꞌyn aikope aikope yt hẽtyhot hin i raꞌyn at waty iꞌewyte waikiru ihotꞌok puo yt hẽtyhot hin i yt heremo i raꞌyn aikotã wãtymꞌi ewy aikotã wãtym yt heremo i hap ewy."

¹³ Miꞌi hawyi arahaꞌat hawyi uheha wo atikuap wẽtup ok atipy piat ywaiti pe topopy raꞌyn yi totiaria muꞌe hamo. Miꞌi kaipyi sehay atikuap ihay pirik wo toꞌe — Yt naku i kahato yt naku i kahato yt naku i kahato topy­huꞌat irane mesuwe katu­pono toĩneꞌen myeꞌym atipy piaria yt iꞌuhuu teꞌa­kuara wato i te taꞌa­tue­huhu myeꞌym ok takaria e tehay pirik wo yi totiaria pe.

Miꞌi sehay atikuap hawyi atiwan naꞌyn uimu­ꞌetu uito Iesui potmuꞌe Iuwãu are.

"

9

¹ Miꞌi hawyi uito Iuwãu arahaꞌat i hawyi araꞌa­kasa wẽtup ok atipy piat Tupana eropat hat mekewat 7 ok takaria kaipyi wẽtup ok 7 ok hap. Miꞌi iꞌuhuu teꞌa­kuara wato. Huhuꞌe hawyi wẽtup ok atipy piat taꞌat yi kape waikiru wato at hap ewy. Maꞌato mekewat atipy kaipywiat waikiru ewywuat hẽtyhot kahato rakat toĩneꞌen. Miꞌi hawyi Tupana tum naꞌyn tope tesaika hap yi kaꞌa wato saꞌag okenhypꞌok hamo yi kaꞌa yn nakat yt ikaꞌa sasat rakat i okenhypꞌok hamo."

² Toho­ꞌo­ꞌoken­hypꞌok hawyi heꞌyhig hun am yi kaꞌa wato pyi aikotã go wato wuk hap ewy. Miꞌi hawyi ywyhig hun tomo­ꞌy­pyryp yne raꞌyn at iꞌewyte yt hẽtyhot kuap i raꞌyn mekewat ywyhig hun taꞌam yi kaꞌa pyi pote."

³ Miꞌi hawyi hewo hewo mekewat ywyhig hun kaipyi pohit iwato kahato koꞌi sem kasi­kasi iwato kahato koꞌi sem tuwe­nõꞌẽ mekewat ikaꞌa wato pyi. Miꞌiria pe Tupana tum sapot ewywuat haty hap miitꞌin atumo­so­ꞌopot hamuat miitꞌin hok hok hap hamuat."

⁴ Miꞌi hawyi Tupana toꞌe kasi­kasi wato pohit wato saꞌag koꞌi pe — Yt ewetuꞌu teiꞌo poꞌog upip yhop ariaꞌyp koꞌi e. Maꞌato eweiwat ro miitꞌin iraniaꞌin kape iꞌatu­mo­so­ꞌopot hamo areꞌe e. Yt kat i miwan Uhet etiat rakaria iꞌatuo­wa­tuꞌa ete pote waku etiꞌa­tu­mo­so­ꞌopot ihokhok hap mywo e."

⁵ Miꞌi hap ete 5 ewaty iꞌypyryp we eweimo­so­ꞌopot ro miꞌiria e. Maꞌato yt eweiꞌauka teiꞌo maꞌato aikotã sapot piat miitꞌin hok hap turan wuat saty hap ewy o ewetunug miꞌiria e Tupana sapot iwato kahato ewywuaria pe. Miꞌi hawyi tuwat raꞌyn pohit kasi­kasi koꞌi miitꞌin hokhok hamuat. Yt Tupana mohey i haria iatu­ꞌa­piheg hamo."

⁶ — Haty pãi haty an iꞌatuꞌe haty kahato uhete haty kahato uhete kakꞌi­ꞌa­tuꞌe kakꞌia­tuꞌe. Uruku­ꞌuro teran uruku­ꞌuro teran iꞌatuꞌe maꞌato guꞌuro hap pya kahato urukai iꞌatuꞌe toꞌope. Uiꞌauka ro iꞌatuꞌe maꞌato 5 ewaty turan taꞌa­tu­ho­ꞌopot maꞌato yt uwe i ikuꞌuro."

⁷ Meimuẽwat kasi­kasi wato kahato rakaria koꞌi pohit wato kahato rakaria koꞌi sapot ewywuat miꞌiria owa koꞌi miit ewy. Morekuat ewy iꞌatue­ꞌa­mãtap imehit rakat kawiat Uru kawiat. Iꞌatupiit aikotã surara hũria ewy kawaru ewy tuꞌuka turanuat teꞌe­ru­we­painug hap ewy iꞌatupiit ete meimuẽwat kasi­kasi koꞌi sapot ewywuat koꞌi hap kape arahaꞌat."

⁸ Iꞌatuiãi koꞌi awyato iãi ewy. Iꞌatu­ꞌasap koꞌi iꞌywop kahato aikotã makuptia asap ewy."

⁹ Iꞌatu­po­tiꞌa ete surara ewy iꞌatu­ꞌauka hap sopo hamo iheg kahato rakat ewy. Miꞌi hawyi teꞌe­ru­we­popy turan iꞌatu­po­pesap ipuehay kahato aikotã surara sem kawaru totiaria ikohyeput tuꞌuka hamo hap ewy aikotã sura­raꞌin eꞌyara sem yi upiat puehay ewy."

¹⁰ Iꞌatu­su­waipo miitꞌin hok hamuat aikotã sapot ewywuat. Miꞌi wo taꞌa­tu­so­ꞌopot kahato yt Tupana mohey haria i 5 ewaty turan."

¹¹ Meimuẽwat sapot ewywuat potypot set wuatꞌi moma hat e. Miꞌi yi kaꞌa saꞌag upiaria topy­huꞌat. Iuteuria pusu puat taꞌa­tu­setꞌok Apatãu iꞌatuꞌe maꞌato kereku pusu puo Apariãu iꞌatuꞌe ahiag iꞌatuꞌe."

¹² Pyno wẽtup raꞌyn tokosap hoꞌopot hap sese hap maꞌato typy te toĩneꞌen hoꞌopot hap sese hap katu­pono typy ok te yt huhuꞌe i te.

"

¹³ Miꞌi hawyi uito Iuwãu arahaꞌat i hawyi araꞌa­kasa wẽtup atipy piat huhuꞌe irane rakat kape. Akuara wato ipo pe toĩneꞌen. Miꞌi hawyi atikuap sehay aimiium Tupana kapiat yparakai kaipyi yparakai 4 eꞌaut rakat kaipyi mekewat yparakai imehit kahato rakat Uru kawiat rakat kaipyi."

¹⁴ Miꞌi hawyi toꞌe 6 rakat huhuꞌe hat pe — Mehĩ e tukup­teꞌen yꞌy wato Eurate ywytꞌok­pype iheg me taꞌa­tu­kytyt puo yi kaꞌa pe 4 ok takaria e. Miꞌiria saꞌa­wyꞌi Tupana atoiat haria teꞌe­ro­py­huꞌat maꞌato mesup taꞌa­tu­ꞌa­saity iheg nakat ete tukup­teꞌen yꞌy wato Eurate e hap het rakat ywytꞌok­pype e. Etihep iꞌatu­kytyt hap kaipyi e."

¹⁵ Miꞌi hawyi toto mekewat yꞌy wato Eurate e hap kape mekewat atipy piat miꞌi hawyi 4 ok takaria toiꞌa­tu­po­re­nõtem iꞌatu­pyhyp hawyi — Aheꞌat raꞌyn iꞌatuꞌe toꞌope aimi­ky­ꞌesat saꞌag nug hamo iꞌatuꞌe. Waku watunug aimi­ky­ꞌesat saꞌag mesup taꞌyn iꞌatuꞌe. Waku watu­we­potpap katu­pono miꞌi nug hamo ainug saꞌa­wyꞌi iꞌatuꞌe. Pyno toꞌiro waho­ꞌo­ꞌauka miitꞌin iꞌatuꞌe. Waku yne myeꞌym miitꞌin kaipyi wati­ꞌauka wẽtup miit iꞌatuꞌe katu­pono miꞌi nug hamo watoĩ­neꞌen mesup eꞌat pe iꞌatuꞌe. Toꞌiro miitꞌin hoꞌo­ꞌauka hamo iꞌatuꞌe. Mesup eꞌat aheꞌat miitꞌin sem atuꞌuka hamo iꞌatuꞌe toꞌope."

¹⁶ Miꞌi hawyi teꞌe­ru­we­ꞌa­tunug kahato sura­raꞌin sem iꞌatu kahato yne teꞌe­ra­ꞌapyk iꞌatuhũ okpe tote. Miꞌi hawyi wẽtup ok toꞌe uhepe — Iuwãu e etikuap apo karania surara tukup­teꞌen itote miitꞌin atuꞌuka haria apo uhepe. — U yt atikuap i areꞌe hawyi uiwesat — Pywo pe ti iꞌatu kahato yt aimikuap i koꞌi hap ewy tukup­teꞌen 200.000.000 sura­raꞌin iꞌatu hap 200.000 wo 1000 sura­raꞌin itote tukup­teꞌen e uhepe."

¹⁷ Miꞌi hawyi uimu­ꞌetu araꞌa­kasa mekewat sura­raꞌin sem taꞌa­tuhũ kawaru sem okpe tote. Iꞌatue­sokpe iꞌatupyt etiat sura­raꞌin wat ewywuat taꞌa­tu­ꞌauka hap sopo hap maꞌato aria kawiat toĩneꞌen nu hup ewy aria sapuẽ hapyke rakat ewy. Miꞌi hawyi iꞌatu­hũria kawaru akag koꞌi awyato akag ewy. Miꞌi hawyi taꞌa­tuwẽ pyi tuwẽtem aria ẽty hun ytyghe wuk hap ewy tuwẽtem haty wo iꞌatuwẽ pyi miitꞌin hoꞌo­ꞌa­tu­ꞌuka hamo."

¹⁸ Miꞌi hawyi mekewat aria iꞌatuwẽ pywiat hoꞌo­ꞌauka kahato miitꞌin myeꞌym kaipyi wẽtup miit taꞌa­tu­ꞌauka."

¹⁹ Iꞌatue­saika hap topy­huꞌat iꞌatuwẽ pyi miitꞌin auka hamuat. Katu­pono aria sapuẽ hapyke rakano taꞌa­tu­ꞌa­tuowa iraniaꞌin taꞌa­tu­wẽpyi. Iꞌewyte iꞌatu­su­waipo ãpy ete moi akag ewy. Iꞌatu­su­waipo wo miitꞌin moso­ꞌopot hap topy­huꞌat."

²⁰ Miꞌi hawyi taꞌa­tu­ꞌa­tu­moma kahato miitꞌin yi totiaria 30 kaipyi 10 ok miit taꞌa­tu­moma kahato miitꞌin. Maꞌato miꞌi pytkai iraniaꞌin yt ikuꞌuro i rakaria yt teꞌe­ru­we­morem hin i Tupana kape. Teꞌe­ra­ꞌa­kasa yne hoꞌopot hap pytkai yt paaꞌi­ꞌa­tuꞌe hin i. Taꞌa­tu­mõ­typot re ahiagnia. Taꞌa­tunug ne tupa­naria hekat rakaria ihup ikytsig ikaꞌay rakaria taꞌa­tu­ꞌa­tu­mõ­typot re. Miꞌi hawyi taꞌa­tu­mõ­typot yt ihapytig i rakaria tupa­naria taꞌa­tu­minug koꞌi yt kat kuap haria i yt hewyry kuap i rakaria taꞌa­tu­ꞌa­tu­mõ­typot kahato te. Yt taꞌa­tu­mõ­typot teran hin i Taꞌa­tunug Hat Sese. Taꞌa­tu­ho­ꞌopot pytkai yt teꞌe­ra­ꞌaipok hin i Tupana Sese kape."

²¹ Iꞌewyte taꞌa­tu­minug saꞌag koꞌi yt taꞌatoiat hin i. Miitꞌin auka haria wo te teꞌe­ro­py­huꞌat iꞌewyte paini koꞌi wo te tukup­teꞌen ne miitꞌin maꞌat hamo. Taꞌa­tu­maꞌat hap topy­huꞌat mekewat paini mimo­herep. Yt nakuaria i tukup­teꞌen ne. Iꞌatue­waire atuewaire te. Sero­ꞌok­ꞌi­ꞌa­tuꞌe te. Miꞌiria Tupana tiꞌa­tu­ꞌa­piheg kahato pytkai yt paaꞌi­ꞌa­tuꞌe hin i iꞌatu­minug saꞌag nug hap ete. Maꞌato poꞌog taꞌa­tu­ꞌa­tunug yt Tupana miky­ꞌesat koꞌi i.

Miꞌi hap kape araꞌa­kasa yne uito Iesui mikyꞌe Iuwãu uimu­ꞌetu aikotã aru hap.

"

10

¹ Miꞌi hawyi uito Iuwãu arahaꞌat i hawyi araꞌa­kasa wẽtup ok poꞌog hesaika rakat atipy piat. Miꞌi ti taꞌapyk yi kape. Ipiit ete hesokpe ywyhig ikytsig kahato rakat. Ipainug hap iꞌakag ete weꞌyp ewy ikahu kahato rakat. Howa hẽtyhot kahato at ewy. Ipy typy wasere yp ok tã toĩneꞌen maꞌato aria kawiat ewy topy­huꞌat."

² Miꞌi hawyi wẽtup iwan okpoꞌi hit totat. Miꞌi hawyi toiꞌok­po­ꞌi­porop taꞌyn. Ipy sese topypag yꞌy wato owa tote maꞌato topy ran kai topypag yi tote."

³ Miꞌi hawyi mekewat atipy piat akag tuwẽ­powat tehay pirik wo aikotã awyato koꞌi iꞌatuehay hap ewy. Tuwẽ­powat kahu hawyi 7 wo huhuꞌe."

⁴ Maꞌato huhuꞌe hap miitꞌin pusu ewy topy­huꞌat. Miꞌi pote uito Iuwãu atikuap kat som toꞌe huhuꞌe tohenoi hap — Pyno atiwan mesu­wa­rote kat som teꞌe­roꞌe hap uiwepe atiwan turan putꞌokꞌe uhete sehay atipy kaipyi — Yt etiwan neiꞌo kat som toꞌe huhuꞌe puat hap e. Yt atiky­ꞌesat i miitꞌin ikuap hap koran te e."

⁵ Miꞌi hawyi mekewat atipy piat ihay raꞌyn — Yt uheso i rat e. Miꞌi hawyi topo sese tohupit ywaipe tehay Tupana kapiat pywo yn e hamo."

⁶ — En ni atipy nug hat iꞌewyte yne atipy piaria nug hat e. En ni mytyp nug hat iꞌewyte yne yi totiaria nug hat e. En ni yꞌy wato nug hat iꞌewyte yne yꞌy piaria nug hat e. Eset ri Tupana e. En ni pywo sese rakat e. Miꞌi pote areꞌe pywo rakat eꞌe hap ewy wuatꞌi miitꞌin me areꞌe — Mũki­ꞌite yt kat i poꞌog miitꞌin wanuat eꞌat koꞌi saꞌa­wy­ꞌiwuat ewy e Tupana e. Mekewat 7 huhuꞌe hap ikahuro hawyi iꞌewyte ikahuro raꞌyn eꞌat koꞌi yi totiaria wanuat e Tupana e."

⁷ Pywo ti rat e mekewat 7 ok huhuꞌe hawyi aikotã Tupana toꞌe saꞌa­wyꞌi tehay moherep haria wẽ pyi topy­huꞌat aru yne iꞌatuꞌe hap ewy huhuꞌe hap tutunug 7 rakat hawyi e. Topy­huꞌat aru aikotã atunug aru e tehay moherep haria wẽ pyi saꞌa­wyꞌi hap ewy topy­huꞌat e. Miꞌi tokosap yne raꞌyn hawyi yne mekewat atunug aru e hap saꞌa­wyꞌi yt heremo i rakat heremo raꞌyn topy­huꞌat kat atunug naꞌyn atunug aru ehehamo uiꞌe hap ewy e Tupana e. Miꞌi hawyi — Atikuap yne atunug aru e hap e Tupana wuatꞌi miitꞌin me e mekewat atipy piat iwatoꞌin nakat.

"

⁸ Miꞌi tohenoi kahu hawyi atikuap sehay atikuap saꞌa­wyꞌi hap ewy — Iuwãu e etat atipy piat po pyi mekewat iwan okpoꞌi hit e uhepe. Etat ro mekewat atipy piat ipy yꞌy pe kokawiat ipy yi totiat rakat po pyi e. Mekewat miwan taꞌa­py­meha piat e mekewat sehay atipy kaipywiat e uhepe."

⁹ Miꞌi hawyi areto raꞌyn mekewat atipy piat owa kape hawyi — Mehĩ etum no mekewat miwan hit uhepe areꞌe tope. Miꞌi hawyi uiwesat — Etat ro miwan hit hawyi etuꞌu yne ro e. Hẽꞌẽ kahato aru etipuẽti ewẽ pe awiꞌa hy ewywuat e maꞌato etohon hawyi yt naku i etipuẽti aru epyꞌa pe yt hẽꞌẽ hin i maꞌato nop hap topy­huꞌat epyꞌa pe e uhepe."

¹⁰ Miꞌi hawyi atat mekewat miwan hit atipy piat akag po pyi hawyi atuꞌu raꞌyn hawyi iꞌe hap ewy topy­huꞌat hẽꞌẽ kahato waku kahato awiꞌa hy ewy maꞌato atuꞌu hawyi nop hap ewy topy­huꞌat uimeꞌen me."

¹¹ Miꞌi hawyi mekewat poꞌog atipy piat rakat toꞌe uhepe — Iuwãu e pyno ti pywo ti rat Tupana ehay etimo­herep aru iꞌatu kahato miitꞌin kape e. Ehenoi aru aikotã topy­huꞌat iꞌatuete irane hap e. Ehenoi poꞌog aru iꞌatuepe mekewat sehay emihon kaipyi waku yne pusu puo aru ehenoi mekewat miwan miat emiꞌu yne yne ywania kape iꞌewyte yne more­kuaria kape iꞌewyte yne tama piaria kape miwan miat e hap ewy waku etiꞌa­tu­mo­herep aru e. Yt naku i mesup miitꞌin ikuap maꞌato heꞌat putꞌokꞌe aru hawyi waku etimo­herep yne kat toꞌe kat toꞌe huhuꞌe hap puo e uhepe mekewat miwan kaipywiat uipoi hat atipy piat.

Pyno mesuwe uimiwan me mekewat miwan uimiꞌu hap ewy ahenoi mesup ehepe uito Iuwãu.

"

11

¹ Miꞌi hawyi Aipo­typot Iesui tum uhepe ariaꞌyp hit kat kupitu kat kupitu Tupana yat toineꞌen hap hãꞌãg hamuat ãpy hãpyk kahato rakat. Tutum uhepe hawyi toꞌe — Uiwy Iuwãu ereto ro meikowat ariaꞌyp hit ãpy hãꞌãg hamuat wywo Tupana mõtypot yat sese kape e. Miꞌi hawyi ehãꞌãg no karan iwato hap karan iꞌywop hap karan itypore hap e iꞌewyte yne Tupana mõtypot yat ipytꞌat koꞌi ehãꞌãg iwato hap e uhepe. Iꞌewyte etiꞌa­tu­mo­rania yne miitꞌin Tupana mõtypot haria itotiaria e uhepe. Iꞌewyte yparakai aikope Tupana kapiat taꞌa­tumiium pytyp hap waku ehãꞌãg yne mekewat ariaꞌyp hit ãpy wo karan iwato karan iꞌywop hap itypore hap e uhepe."

² — Maꞌato Tupana mõtypot yat eꞌoken yt ehãꞌãg neiꞌo katu­pono Tupana mõtypot yat eꞌoken mesup koitywy yt aiꞌy­wania wat i maꞌato iraniaꞌin yt Iuteu i ywania wanuat topy­huꞌat. Iꞌewyte Tupana etawa Ieru­sarẽi iraniaꞌin ywania tipo­hari raꞌyn aiꞌy­wania Iuteu ywania po pyi. Sura­raꞌin hewyry aru itote 42 ewaty sura­raꞌin tipo­hari Ieru­sarẽi iꞌatu­ꞌy­wania wanuat e uhepe e Akag Iesui uhepe."

³ Mekewat eꞌat pe aru atipo­ꞌoro typy ok uimi­ꞌairo koꞌi uhehay moherep hamuat tawa Ieru­sarẽi miaria kape e. Atum miꞌiria pe uhesaika hap uhehay moherep hamuat 1260 eꞌat taꞌa­tu­mo­herep uhehay uhesaika hap wywo e. Iꞌatue­sokpe iꞌanam nakat waku paaꞌwa­toꞌe aiminug saꞌag ete e hap moherep hamo e."

⁴ — Meke­waria typy ok takaria teꞌe­ro­py­huꞌat Uriweiru yp ewy Tupana eꞌariãty rakat ewywuaria e. Taꞌa­tu­pytꞌat ikap ihy rakat wo hap ewy miꞌiria Tupana eꞌariãty hapyke rakaria ewy teꞌe­ro­py­huꞌat e. Katu­pono Tupana ehay moherep haria miꞌiria typy ok takaria e. Toꞌo­ꞌewy kahato aikotã typy rakat ariãty Tupana yaty­piaria ieĩneꞌen haria ariãty eiam hẽtyhot kahato rakaria ewy mekewat typy ok Tupana mipo­ꞌo­roria e. Teꞌe­ro­py­huꞌat hamuat Wuatꞌi Miitꞌin Yi Totiaria Kaꞌiwat eꞌariãty moherep hamo e uhepe."

⁵ Miꞌi hawyi yi tote taꞌa­tu­mo­herep kahato uhehay e. Iꞌatu­wa­nĩ­kaptia iꞌatu kahato maꞌato umipo­ꞌo­roria typy ok poꞌog hesaika iꞌatu­ꞌuka teran haria kai e. Karãpe miitꞌin tuwat aru uimi­po­ꞌororia typy ok auka hamo miꞌi hawyi iꞌatu­wa­nĩ­kaptia koꞌi yne topap aria iꞌatuwẽ pywiat wo e. Yt uwe i uimi­po­ꞌo­roria typy ok auka kuap hat e uhepe."

⁶ Miꞌi hawyi miꞌiria typy ok takaria uimi­po­ꞌo­roria hesaika kahato rakaria wo tukup­teꞌen e. Taꞌa­tu­pyhyp kuap aru iꞌaman e. Miitꞌin sem me taꞌa­tu­mo­herep aikotã aru e hap koꞌi e. Wãiꞌi­ꞌa­tuꞌe iꞌaman me taꞌa­tu­henoi miitꞌin miat turan yt kat i iꞌaman iꞌatuko ete e. Yt kat i iꞌaman mesuwat yi tote iꞌatuꞌe hap ewy taꞌa­tu­mi­ky­ꞌesat ewy e. Iꞌewyte taꞌa­tunug kuap yꞌy koꞌi huu rakano. Iꞌewyte taꞌa­tu­mi­ky­ꞌesat ewy taꞌa­tu­po­ꞌoro kuap ahu. Saꞌag nug haria taꞌa­tue­wa­nĩ­kaptia moma hanuaria tukup­teꞌen e. Iꞌewyte taꞌa­tu­po­ꞌoro kuap hamuat ihywy­ꞌokmõi koꞌi taꞌa­tu­wa­nĩ­kaptia ãpymin hamo e uhepe Iesui."

⁷ Miꞌi hawyi 42 ewaty hap ete tokosap taꞌyn iꞌatuehay hap e. Toran naꞌyn hawyi tuwẽtem irane yi kaꞌa wato saꞌag myi mekewat haiwot rakat saꞌag kahato rakat ipoityꞌi rakat ahiag e. Miꞌi hawyi tuꞌuka kahato Tupana ehay enoi haria typy ok takaria ete e. Miꞌi hawyi poꞌog hesaika topy­huꞌat e. Miꞌi hawyi hamuat ewy toiꞌa­tu­ꞌakit uimi­po­ꞌo­roria tesu­ra­raꞌin sem py wo hawyi toiꞌa­tu­ꞌuka uimi­po­ꞌo­roria typy ok takaria e uhepe."

⁸ Iꞌatupiit toipun tawa wato pyꞌa­setpyi aikope saꞌa­wyꞌi taꞌa­tu­pehik Tupana Mipo­ꞌoro Uito ariaꞌyp posak ete hap tote taꞌa­tu­pugha tawa puꞌap tote tawa pyꞌa­setpe wuatꞌi ehamo e. Tawa Esitu saꞌa­wyꞌi yt naku pe i kahato tukup­teꞌen uimohey haria. Miꞌi hap ewy kahato yt naku i kahato tukup­teꞌen aru uimohey haria mekewat tawa Ieru­sarẽi miaria e Tupana. Miꞌi pote wẽtup set atum tawa Ieru­sarẽi miaria pe — Tawa Sutuma piaria eipe areꞌe e. Mio tã areꞌe katu­pono uimiwuk tawa Sutuma saꞌa­wyꞌi e. Yi Esitu piaria uhewa­nĩ­kaptia ewy kahato tawa Ieru­sarẽi miaria mesup e. Saꞌag kahato taꞌa­tunug saꞌa­wy­ꞌi­wuaria uimohey haria ete e. Sutuma miaria iꞌewyte yt naku i yn teꞌe­ro­py­huꞌat uimohey haria ete e. Ieru­sarẽi miaria poꞌog uimohey haria auka karia wuatꞌi tawa kai e uhepe."

⁹ — Yt eweisyp teiꞌo miꞌiria ete neꞌi iꞌatuꞌe iraniaꞌin Ieru­sarẽi miaria uimi­po­ꞌo­roria typyꞌok takaria piit etiat e. Miꞌi pote iꞌatupiit ikuꞌuro rakaria tukup­teꞌen muꞌap tote tawa Ieru­sarẽi me myeꞌym eꞌat hawyi wẽtup eꞌat patꞌok. Miꞌi hawyi miitꞌin tõꞌẽ tõꞌẽ kahato teꞌe­ra­haꞌat hamo. Teꞌe­ru­we­ꞌa­tunug wuatꞌi pusu kuap hap kaipyi wuatꞌi ywania kaipyi wuatꞌi tama kaipyi ipe hup takaria ipe hun nakaria ipe kytsig nakaria tõꞌẽ tõꞌẽ hepiok hamo myeꞌym eꞌat kape e."

¹⁰ Miꞌi hawyi õꞌẽ haria iꞌatu­wepit kahato — Waku pe raꞌyn iꞌatuꞌe e. Ikuꞌuro raꞌyn Tupana ehay moherep haria iꞌatuꞌe e. Waku kahato iꞌatuꞌe toꞌoepe e. Ikuꞌuro raꞌyn Tupana ehay moherep haria typy ok takaria iꞌatuꞌe e. Saꞌa­wyꞌi miꞌiria aimo­so­ꞌopot haria tukup­teꞌen mesuwat mytyp tote iꞌatuꞌe toꞌope. Koitywy waku raꞌyn watunug aimi­ky­ꞌesat ewy yt naku i nug hap iꞌatuꞌe. Miꞌi hawyi ienuk hap taꞌa­tunug hawyi toꞌope taꞌatuium kat koꞌi kat koꞌi toꞌo­mo­wepit hamo — Waku pe mesup topap taꞌyn aimo­so­ꞌopot haria iꞌatuꞌe toꞌope e."

¹¹ Myeꞌym eꞌat hawyi wẽtup eꞌat patꞌok hawyi iꞌatupiit toĩneꞌen i wuatꞌi ehamo muꞌap tote hawyi Tupana timoieĩ­neꞌen i raꞌyn Topãꞌãu wo toimo­pyhuꞌi raꞌyn e. Iꞌatuieĩ­neꞌen i hap teke iꞌatupiit pe hawyi iꞌatu­poĩꞌãm naꞌyn wuatꞌi miitꞌin weky­ryꞌi haria ehamo e. Miꞌi hawyi itotiaria sehaꞌat haria teꞌe­ro­kenꞌẽ kahato raꞌyn iꞌatu­pupi e."

¹² Miꞌi hawyi ti typy ok takaria tikuap sehay pirik atipy kaipyi — Eweiꞌõꞌẽ ro meikowo e. Mio tã e hawyi taꞌa­tue­wa­nĩ­kaptia ehamo teꞌe­raꞌam naꞌyn ywyhig muo wuatꞌi ehamo e Iesui uhepe."

¹³ Iꞌatuꞌam turan hurukꞌe iwato kahato topy­huꞌat tawa Ieru­sarẽi ete e. Miꞌi hawyi yat koꞌi nu kawiat koꞌi hewo hewo kahato e. Ikaipyi iꞌatu 10 hap taꞌat wẽtup tuereto hap ewy yi hurukꞌe kahato pote miitꞌin hoꞌopot kahato hawyi 7000 miit ikuꞌuro itote. Miꞌi pote iraniaꞌin yt map haria i teꞌe­ro­kenꞌẽ kahato hawyi — Tupana atipy piat poꞌog torania kai En iꞌatuꞌe aru tawa Ieru­sarẽi miaria e Aipo­typot Iesui uhepe.

"

¹⁴ Pyno typy hoꞌopot hap miitꞌin piat hap tokosap taꞌyn maꞌato wẽtup te yt tokosap i te hoꞌopot hap sese miitꞌin miat hap katu­pono yt torania i te huhuꞌe."

¹⁵ Miꞌi hawyi atipy piat wẽtup te myhuꞌat hat akuara wato huhuꞌe raꞌyn mekewat 7 ok takat hawyi uito Iuwãu araꞌa­kasa miꞌi hap kape uimu­ꞌetu. Miꞌi hawyi atikuap miitꞌin sem ihay pirik kahato atipy pe — Tupana Mipo­ꞌoro topy­huꞌat raꞌyn Wuatꞌi Porekuat nuat iꞌatuꞌe haty wo. Wuatꞌi Ywania Potypot no Aipo­rekuat topy­huꞌat mesu­wepyi wuatꞌi eꞌat pe iꞌatuꞌe. Miꞌi Miit yn toĩneꞌen Aiꞌakag koro iꞌatuꞌe. Aika­ꞌiwat mesup topy­huꞌat poꞌog wuatꞌi kai iꞌatuꞌe teꞌe­ro­wẽ­powat atipy piaria hap atikuap.

"

¹⁶ Miꞌi hawyi mekewat 24 ok takaria morekuat eꞌamyap totiaria teꞌe­ru­we­pỹ­ꞌã­tutuk Tupana kape iꞌatueowa yi kape Tupana mõtypot hamo."

¹⁷ — Urutu­wehum ewawi Tupana iꞌatuꞌe. Uruka­ꞌiwat sese En iꞌatuꞌe. Wuatꞌi Eꞌat piat En iꞌatuꞌe. Yne eminug koꞌi eꞌyianmete ereĩneꞌen ni iꞌatuꞌe. Mesup te ereĩneꞌen iꞌewyte wuatꞌi eminug hap sakpo ereĩneꞌen ne iꞌatuꞌe. Iꞌewyte wuatꞌi eꞌat tokosap pytkai ereĩneꞌen ne iꞌatuꞌe. Yt uwe i putꞌokꞌe esaika hap ete iꞌatuꞌe. Miꞌi esaika hap iwato rakat wywo ereĩneꞌen no atipy piat iꞌatuꞌe. Yi totiat Potypot no ereĩneꞌen iꞌatuꞌe."

¹⁸ — Uruꞌakag wo saꞌa­wy­ꞌi­tepyi wuatꞌi ywania. Yt emohey i haria haiwot kahato eete iꞌatuꞌe. Koitywy maꞌato waku ereĩneꞌen Surara Akag ewy iꞌatu­ꞌa­piheg hamo iꞌatuꞌe. Etiꞌa­tu­poepyk taꞌyn ewanĩ­kaptia iꞌatuꞌe. Waku etiꞌairo uwe waku uwe yt hap iꞌatuꞌe. Waku mesup etum no eropat sese haria pe iꞌatu­saꞌup wakuat iꞌatuꞌe. Waku iꞌewyte ehay moherep saꞌa­wy­ꞌiwuat rakaria pe emieha­kye­raꞌat koꞌi pe iꞌatu­saꞌup wakuat waku etum iꞌatuepe iꞌatuꞌe. Waku iꞌewyte emõtypot haria pe iwatoꞌin nakaria koꞌi pe iꞌewyte yt uwe i mikuap koꞌi pe iꞌatu­saꞌup wakuat etum iꞌatuepe iꞌatuꞌe. Waku iꞌewyte etiꞌa­tu­ꞌa­piheg eꞌyi kahu hap moma haria iꞌatuꞌe 24 ok takaria poꞌog imohey haria Tupana pe.

"

¹⁹ Miꞌi hawyi uito Iuwãu arahaꞌat i hawyi araꞌa­kasa atipy pe Tupana mõtypot yat tuwe­ꞌo­ken­hypꞌok taꞌyn hawyi arahaꞌat Tupana yat kape. Miꞌi tote araꞌa­kasa raꞌyn mekewat saꞌa­wy­ꞌiwuat Tupana Pãꞌãu apyk hap aikope saꞌa­wyꞌi Tupana ihay raꞌyn — Atunug aru uiꞌe hap ewy e hap totepyi ihay i raꞌyn. Miꞌi hawyi tuwẽtem kahato itote pyi merep merepꞌe hap koꞌi hap ewy araꞌa­kasa. Miꞌi hawyi hurukꞌe kahato hap atikuap. Miꞌi hawyi yi tyryꞌe kahato hawyi miitꞌin teꞌe­ru­wẽ­powat kahato itote pyi. Miꞌi hawyi nukara iwatoꞌin nakat hewo yi kape.

Miꞌi hap kape araꞌa­kasa yne uimu­ꞌetu Iesui mimo­herep uhepe. Uito ti Iesui potmuꞌe Iuwãu.

"

12

¹ Miꞌi hawyi uito Iuwãu araꞌa­kasa wẽtup uimu­ꞌetu uimo­wa­nẽtup hap sese kat som Tupana aimuꞌe hap sese areꞌe uiwepe. Katu­pono araꞌa­kasa waikiru pyꞌa­setpe wẽtup ok hary­poria ewywuat yꞌam me waty tote. Hesokpe at ewywuat. Iꞌakag ete toĩneꞌen amãtap iwepainug hap waikiru koꞌi 12 waikiru koꞌi."

² Miꞌi ti tuwak popuo toꞌe — Uimẽpyt irane e kynkyn­toꞌe popuo. Uimẽpyt hap eꞌat raꞌyn e tuwak popuo. Haty kahato e."

³ Miꞌi hawyi uimu­ꞌetu wẽtup kape araꞌa­kasa uimo­wa­nẽtup hap sese katu­pono mekewat hary­poria yatype toĩneꞌen mekewat moiꞌok saꞌag iwatoꞌin nakat. Uimo­ꞌa­kagꞌaia kahato mekewat moiꞌok koro 7 iꞌakag nakat ipe ihup kahato rakat huwaipo waikiru koꞌi ete hewyry. Ipainug hap amãtap morekuat ewywuat 7 amãtap. Iꞌaut piit kahato rakat 10 iꞌaut rakat iꞌakag koꞌi ete."

⁴ Miꞌi ti tosu­waipo wo toiꞌa­tu­pugha kahato waikiru koꞌi tosu­waipo wo. Myeꞌym kaipyi toipatꞌok wẽtup waikiru hap ewy. Waikiru sem toipugha kahato yi kape. Miꞌi hawyi itote tohe­katup hary­poria imẽpyt ywãꞌĩ hap tutuꞌu teran imẽpyt haype."

⁵ Miꞌi hawyi imẽpyt ihainia raꞌyn. Tuwẽtem hawyi Tupana tioto meremo atipy kape aikope toĩneꞌen Morekuat no hap tote. Miꞌi hawyi toꞌe Hary­poria Mẽpyt pe — Meiũran aru etiꞌa­tu­mo­pe­rupꞌi haty wo yne miitꞌin e Tupana. Aikotã Morekuat tepu­retig wywo hap toimo­pe­rupꞌi temiit nuat hap ewy ereĩneꞌen aru e. Miꞌi hap ewy etunug irane e Tomie­raꞌam Hirakat pe."

⁶ Miꞌi hawyi mekewat hary­poria topopy raꞌyn moiꞌok pupi aikope yt uwe i miitꞌin hap kape. Miꞌi hawyi Tupana minug yahig yt uwe i mikuap hap tote hary­poria tuwemig. Miꞌi kape toipo­ꞌoro temiitꞌin ipoi hamo 1260 eꞌat turan 42 ewaty hap ewy.

"

⁷ Miꞌi hawyi uito Iuwãu arahaꞌat wuꞌuka hap kape waikiru pyaꞌsetpe. Mekewat atipy piat akag Mikeu temiitꞌin atipy piaria tesu­ra­raꞌin wywo taꞌa­tu­ꞌuka kahato moiꞌok koro ete."

⁸ Miꞌi hawyi moiꞌok tiꞌa­tu­ꞌakit teran surara akag Mikeuꞌin maꞌato Mikeu tiꞌa­tu­ꞌakit neꞌi moiꞌok hawyi toꞌe — Motoro emiitꞌin wywo e. Yt naku i raꞌyn ereĩneꞌen poꞌog mesuwe atipype e. Motoro esura­raꞌin wywo e Mikeu moiꞌok koro pe."

⁹ Miꞌi hawyi toiꞌa­tu­ꞌok­hyt­pugha moiꞌok hesu­ra­raꞌin nywo waikiru kaipyi yi kape. Moiꞌok koro wẽtup het ahiag e wẽtup het miitꞌin moꞌa­kagꞌaia hat. Wẽtup het satanai e."

¹⁰ Miꞌi hawyi wẽtup ok atipy piat tuwẽ­powat tehay pirik wo — Tupana Mipo­ꞌoro Iesui tiꞌakit neꞌi ahiag e. Temiitꞌin mohit hat toimohin neꞌi raꞌyn e. Saꞌa­wyꞌi ihay saꞌag Tupana emiitꞌin ete at kaꞌap ahiag — Emiit yt kat hamo i e. Yt nakuaria kahato emiit e yn saꞌa­wyꞌi Tupana pe e. Maꞌato mesup toiꞌa­tu­pugha raꞌyn e. Waku kahato e. Tupana timo­herep taꞌyn ahiag akit hamuat e. Koitywy watikuap Tupana Miꞌairo Iesui poꞌog poꞌog hesaika ahiag kai e hap watikuap e. Aheha­kye­raꞌat hap topy­huꞌat raꞌyn e. Katu­pono Iesui aihep sese ahiag po pyi e wẽtup ok atipy kaipyi haty wo."

¹¹ Mesup aheywytꞌin aheinytꞌin Iesui mohey haria tiꞌa­tu­ꞌakit neꞌi ahiag e. Mekewat aikotã taꞌa­tuhũ ewywuat ikuꞌuro rakat suu mohey hap kaipyi taꞌa­tu­ꞌa­tuiãꞌãg hap koꞌi yne taꞌa­tu­ꞌakit neꞌi e. Ikuꞌuro rakat huu at hap iꞌatu­ka­wiano taꞌa­tu­mohey hawyi esaika hap wywo taꞌa­tu­ꞌakit neꞌi ahiag e. Iꞌewyte iꞌatu­mienoi Iesui piat taꞌa­tue­ha­kyeraꞌat hap moherep hap wo taꞌa­tu­ꞌakit neꞌi ahiag e. Taꞌa­tu­ku­ꞌuro hap kape taꞌa­tu­mohey hamo taꞌa­tu­ꞌakit ahiag e tehay pirik wo atipy piat e."

¹² Pyno koitywo atipy piaria iꞌatu­wepit raꞌyn e. Yt kat i ahiag mio itote waku pe raꞌyn e. Miꞌi pote — Eiwehum no Tupana kape yne eipyꞌa pyi e. Maꞌato eweiwak to yi totiaria e. Katu­pono mesup ahiag haiwot raꞌyn taꞌa­tu­pugha atipy pyi hawyi. Yt naku i pe eweikup­teꞌen mesup aru yi totiaria. Eiweꞌeg wo o yꞌy upiaria yi totiaria katu­pono toĩneꞌen eipy­ꞌa­setpe ahiag toꞌok­hytpun atipy kaipyi yi kape hawyi e. Koitywy haiwot rakano toĩneꞌen katu­pono toikuap taꞌyn mesup yt wuatꞌi porekuat no i toĩneꞌen ne hap. Miꞌi pote aikotã aikotã toikat tuwa­nẽtup miitꞌin atuekyi tuwe­wawiat hamuat hap teropat haria wo hap e tehay pirik wo — Yt iꞌatu i raꞌyn uheꞌat uipotpap hamo e ahiag."

¹³ Ahiag toĩneꞌen yi tote hawyi — Uipun atipy kaipyi e. Miꞌi hawyi toha­tyꞌi hatyꞌi mekewat Ihainia hit ty."

¹⁴ Maꞌato Tupana tum naꞌyn hary­poria pe hywi wato kahato rakat popesap ewywuat tutum hawyi toꞌe mana pe — Mana e waku erepopy yahig wato kape e. Waku eremig itote uiminug eiam me e. Itote moiꞌok yt epuẽti hin i e. Ereĩneꞌen no myeꞌym iꞌaman motpe itote e. Miꞌi hawyi waku at pe erẽtem epyhyp hap wyi e."

¹⁵ Miꞌi hawyi mekewat moiꞌok wato wẽ pyi tuwẽtem yꞌy ihy koro ewy Mekewat Hirakat ty ãpymin teran hamo. Toiky­ꞌesat totioto pya teran haype. Miꞌi pote yꞌy tuwẽtem kahato moiꞌok wẽ pyi aikotã yꞌy mutꞌe hap ewy."

¹⁶ Maꞌato mesuwat yi tipo­wyro kahato hary­poria. Maꞌato yi topy­huꞌat ikaꞌa wato kahato yꞌy wato hy sym hamo. Miꞌi pote moiꞌok wẽ pywiat maꞌato mekewat yꞌy mutꞌe rakat yt tiꞌã­pymin kuap i mekewat hary­poria."

^{17 (17-18)} Miꞌi pote poꞌog haiwot ahiag mekewat hary­poria yt miꞌã­pymin i ete. Miꞌi hawyi toto wuꞌuka hamo imẽpyt saipe­piaria moma hamo. Tupana piat ainãpin hap nug haria ete Iesui yn Uruka­ꞌiwat e haria motꞌi haria moma hamo ete. Miꞌiria moma hamo moiꞌok toto tosaiwot wywo. ¹⁸ Toto hawyi toĩneꞌen yikyt upi hyemyiꞌa wato yẽpeke mekewat iꞌakare wasu ewywuat ahiag toĩneꞌen iꞌam me Iesui emiitꞌin u hamuat.

Pyno uito Iuwãu uimi­ꞌa­kasa hap atiwan naꞌyn.

"

13

¹ Miꞌi hawyi uito Iuwãu uhewyry yꞌy wato ẽpe ete yi kyt upi. Miꞌi puo arahaꞌat hawyi araꞌa­kasa wẽtup ok tuwẽtem yꞌy wato pyi yt nakuat i sese uimogyt kahato. Miꞌi awyato tig koro 7 iꞌakag nakat. Iꞌakag koꞌi ete 10 iꞌaut. Iꞌewyte yne iꞌaut ete ipainug hap amãtap morekuat wat ewywuat. Miꞌi kape araꞌa­kasa uimu­ꞌetu. Mekewat awyato tig koro 7 iꞌakag ete howa­tuꞌa ete toĩneꞌen het saꞌag koꞌi. Het koꞌi saꞌag uito Tupana e hap ewy. Toimohit teran kahato Tupana toset wo."

² Arahaꞌat kahato mekewat yꞌy pywiat wẽtem hat kape. Taꞌi awyato tig ewy kahato areꞌe uiwa­nẽtup hawe. Ipy ipo hĩpa py ewy. Iwẽ awyato wato wẽ ewy areꞌe. Tuwẽtem yꞌy pyi hawyi mekewat moiꞌok toꞌe tope — Woronug naꞌyn en wuatꞌi uhemiitꞌin porekuat no e. Waku eraꞌapyk morekuat nuat uiꞌapyk hap tote e. Woronug en uhehay­tuwy e. Miꞌi hawyi ehay topy­huꞌat uhehay kaipyi e. Miꞌi hawyi ehay upi yne miitꞌin teꞌe­ro­py­huꞌat e moiꞌok mekewat yt nakuat i rakat hĩpa py ewywuat pe."

³ Uito Iuwãu arahaꞌat mekewat 7 iꞌakag nakat kape maꞌato wẽtup ok akag hepihi wato rakat maꞌato tokãꞌã raꞌyn aikotã saꞌa­wyꞌi iꞌauka hap ewy. Miꞌi hawyi arahaꞌat yne miitꞌin tutunug tomi­ky­ꞌesat ewy. Tuwat kahato ihay upi."

⁴ — Woro­mõ­typot En moiꞌok iꞌatuꞌe. Tupana sese moiꞌok iꞌatuꞌe. Katu­pono yꞌy pywiat wẽtem hat urupo­rekuat no iꞌatuꞌe. Mio tã iꞌatuꞌe hawyi teꞌe­ru­we­pỹ­ꞌã­tutuk 7 iꞌakag nakat kape — Yt uwe i ekai poꞌog wakuat iꞌatuꞌe. Yt uwe i eꞌakit kuap iꞌatuꞌe. Torania teꞌe­ro­kenꞌẽ epupi tuꞌuka ewywuat hamo iꞌatuꞌe torania miitꞌin."

⁵ Miꞌi hawyi mekewat moiꞌok wẽ wo topy­huꞌat hawyi ihay se tuwe­mõ­typot hamuat — Uito ti Tupana e Uito ti Tupana e. Aikotã morekuat wato ewy ihay se 42 ewaty turan miꞌi yn topy­huꞌat morekuat koro wo. Miꞌi turan ipotpap kahato moiꞌok miky­ꞌesat ewy."

⁶ Tuwe­ky­ryꞌi kahato Tupana ete towẽ pyi — Yt ikahu hin i Tupana set e. Tupana mõtypot yat yt kat hamo i e. Yt naku i nug haria atipy piaria e. Yt naku i kahato Tupana e."

⁷ Iꞌewyte — Etiꞌa­tu­moma ro Tupana emiitꞌin e moiꞌok mekewat yꞌy wato pywiat wẽtem hat pe. Wuꞌuka hamo waku wati­ꞌa­tu­ꞌakit Tupana mohey haria e. Miꞌi hawyi wati­ꞌa­tu­ꞌakit yne hawyi waku wuatꞌi ywania akag wo eropy­huꞌat mesuwat yi tote e. Yne pusu kaꞌiwat sio ihup sio ikytsig sio hun yne ywania kaꞌiwat kat e pusu kuap haria kat ywania kaipy­wiaria e. Waku yne tama piaria porekuat iꞌatu­mi­ꞌakit no iꞌatu­mi­mohit hat no ereĩneꞌen e ahiag awyato tig koro pe."

⁸ Mekewat eꞌat turan taꞌa­tunug Tupana wo mekewat awyato ewywuat saꞌag nakat. Teꞌe­ru­we­pỹ­ꞌã­tutuk hawyi — En ni Tupana iꞌatuꞌe iraniaꞌin. Maꞌato mekewat ikuꞌuro aihũ Kuteiru ewywuat rakat mohey haria yt inug i mekewat awato tig akag ewywiat taꞌa­tue­tu­pana wo. Yt taꞌa­tu­mõ­typot i. Katu­pono Tupana Sese yn saꞌa­wyꞌi toĩneꞌen yi nug hap eꞌyianmete iꞌatuꞌe iesui mohey haria. Miꞌiria Tupana tunug iꞌatuset pehik hawe tomiwan ete. Miꞌiria Uihũ Kuteiru hit mohey haria toiwan tomiwan me mesuwat yi nug hap eꞌyianmete miꞌiria aru — Uruimohey Tupana Hũ ikuꞌuro aika­wiano haype pote yt uruimohey i moiꞌok mipo­ꞌoro aipo­rekuat nuat iꞌatuꞌe haria toiwan tomiwan me mesuwat yi yt kat i tep hap eꞌat pe turan Tupana.

"

⁹ Uiwy­riaꞌin uito ti Iuwãu. Ehewaure kaꞌa pote eiwa­nẽtup to kat som Tupana toꞌe ehowawi hap kape areꞌe."

¹⁰ Mio tã areꞌe ehepe — Eiweꞌeg wo o Tupana emiitꞌin eipe pote. Eweimohey ro yne eipyꞌa pe eiku­ꞌuro hap kape katu­pono ti aru ahatyꞌi hatyꞌi kahato woꞌo­pyhik hawe imohey haria aito pote. Waku waho­ꞌopot aiku­ꞌuro hap kape. Aiꞌauka kyseꞌyp wo pytkai yt naku i watoiat Iesui hap aiꞌauka iraniaꞌin imohey pote areꞌe. Ehewaure kaꞌa pote eweikuap to uiꞌe hap. Uito Iuwãu uipyhyp hawe yꞌy wato pyꞌa­setpe yi a tote uiꞌatuiat mesuwe Iesui mohey hap upi.

"

¹¹ Miꞌi hawyi uito arahaꞌat hawyi araꞌa­kasa wẽtup ok kape. Yi kaꞌa pyi tuwẽtem iꞌaut kurin kat yt iꞌaut rakat ewy i. Yty hit mẽpyt ewy aihũ kaneiru mẽpyt ewy. Typy iꞌaut kurin kat maꞌato ihay hawyi ihay pirik kahato akuara wato ehay ewy."

¹² Miꞌi topy­huꞌat uito Tupana e hat saipepiat saꞌa­wy­ꞌiwuat morekuat koro yianmiat ewy. — Eweimõ­typot ro uheꞌyianmiat Tupana wo eawyoto tig ewywuat piat. Isuk hap tuwe­mo­kãꞌã raꞌyn iꞌauka hap tokãꞌã raꞌyn toĩneꞌen i raꞌyn hap ewy maꞌato yt kahato i."

¹³ Mekewat yi kaꞌa pywiat wẽtem hat mekewat wẽtup ok Tupana ran saipepiat inug kuap kahato yt miitꞌin minug ewywuat i. Tutunug iwato kahato miitꞌin mowa­nẽtup hamo. Toikaykay kuap aria atipy kaipyi yi kape wuatꞌi miitꞌin ehamo iwato kahato."

¹⁴ Toiꞌa­tu­maꞌat miitꞌin mesuwat yi tote tomi­mo­herep yt miitꞌin minug kuap i rakat wywo. Maꞌato tuweran note yt uwe i mekewat awyato tig akag 7 iꞌakag nakat iwywo pote yt toimo­herep kuap i miitꞌin mowa­nẽtup hamo. Katu­pono yianmiat hap ahiag kaipyi hesaika hap toĩneꞌen. Miꞌi hawyi toiꞌa­tu­mo­wa­nẽtup pywo iꞌatu­ꞌe­hamo. Miꞌi hawyi — Uimohey pote ewetunug no Tupana iãꞌãkap uheꞌyianmiat ewywuat e mekewat kyseꞌyp misuk maꞌato toĩneꞌen i raꞌyn guꞌuro pywiat hat e yn miitꞌin me. Miꞌi hawyi taꞌa­tunug naꞌyn mekewat awyato tig akag 7 iꞌakag nakat iãꞌãkap."

¹⁵ Taꞌa­tunug hawyi mekewat iãꞌãkap teꞌyianmiat iãꞌãkap toimoieĩ­neꞌen. Miꞌi hawyi iãꞌãkap ihay raꞌyn toimo­pyhu raꞌyn hawyi tutum tesaika hap mekewat iãꞌãkap we yt tomõ­typot i haria auka hamuat."

¹⁶ — Eweimõ­typot ro Tupana wo iãꞌãkap e. Ewetunug no uiꞌe hap ewy e. Ewetat ro miwan ehowa­tuꞌa ete mekewat ahetu­pana iꞌãꞌãkap set e. Iꞌewyte eipo sese kai mekewat miwan iãꞌãkap set ewetat ro e wuatꞌi miitꞌin me miit akag koꞌi pe iꞌewyte miit emiit pe iꞌewyte hekat rakaria pe iꞌewyte hatek takaria pe mipyhyp koꞌi pe iꞌewyte woꞌo­pyhyp haria pe. — Hẽ to eweiꞌe ro eipiit etiat miwan nug haria pe e."

¹⁷ — Yt eweiꞌe pote yt kat i aru uruiwe­neru ehepe e — Yt eweiꞌe pote iꞌewyte uruipyhyp aru eipe wuatꞌi weneru hap ete e wuatꞌi pe. Miꞌi hawyi taꞌa­tuwan yne miitꞌin piit mekewat Tupana iãꞌãkap set wywo mekewat Tupana iãꞌãkap morania hap wywo.

"

¹⁸ Uiwy­riaꞌin weꞌeg haria eipe pote eweikuap to mekewat Tupana iãꞌãkap set mekewat yt nakuat i set e Tupana ahepe. Eiweꞌeg mote yt niatpo i eweikuap het kat pote miitꞌin set wywo topy­huꞌat. Wati­mo­rania yne mekewat miwan koꞌi het koꞌi wati­mo­rania yne tuwat i tuwat i hawyi wati­puẽti miwan toꞌo­kape 666. Miꞌi kaipyi watikuap het aiweꞌeg mote e. Yne miwan miat 666 piat wẽtup het toĩneꞌen. Wati­mo­rania yne numuru hawyi 666 wati­puẽti e Tupana ahepe. Miꞌi hap kape uito Iuwãu araꞌa­kasa yne.

"

14

¹ Miꞌi hawyi uito Iuwãu arahaꞌat hawyi araꞌa­kasa uimu­ꞌetu wuat ewy. Eiwe­haꞌat ro eiwe­haꞌat ro Tupana Hũ Kuteiru toĩneꞌen tawa Ieru­sarẽi me yityꞌok Sitãu tote. Eiwe­haꞌat ro. Iꞌatu kahato teropat haria wywo toĩneꞌen itote 144000 heropat haria iwywo tukup­teꞌen itote. Eiwe­haꞌat ro areꞌe ehepe. Iꞌywot set miwan toĩneꞌen ihũ hit Kuteiru ewatuꞌa ete."

² Miꞌi hawyi atikuap wepy hap ikahu atipy pe ihay se kahato rakat aikotã ywytu yꞌy ete hap ewy aikotã ipuehay yꞌy hitꞌi soroꞌe hap ewy atikuap uimu­ꞌetu wuat ewy. Iꞌatu kahato yꞌy soroꞌe hap ewy ipuehay. Miꞌi puehay puo atikuap huruhu­ruꞌe hap iwato rakat haty wo. Miꞌi hawyi atikuap wepy nug hap ewy aikotã mory­ꞌawat ewywuat haity iꞌatu kahato rakat pyi tuwepy hap ewy tuwepy. Miitꞌin sem teꞌe­ru­wepy iꞌatu kahato kawakiu wywo hap ewy."

³ Miꞌi hawyi Tupana Hũ hit mieha­kye­raꞌat koꞌi teꞌe­ru­wepy atipy pe. Wepy hap ipakup takat sese. Mekewat apyk piat Morekuat eꞌyian notiat hat mõtypot hamuat. Miꞌiria mekewat 24 ok poꞌog wuat imohey yne eꞌat piat haria ehamo. Iꞌewyte 4 ok takaria ehamo. Teꞌe­ru­wepy mekewat wepy pakup. Maꞌato itotiaria yt tikuap hin taꞌa­tu­pyꞌa pe kat e hap kat e hap teꞌe­ru­wepy hap. Maꞌato mekewat 144000 rakaria Iuteuria Iesui mohey haria ikuap taꞌa­tu­pyꞌa pe. Katu­pono miꞌiria iꞌewyte Tupana mieha­kye­raꞌat koꞌi taꞌa­tukuap."

⁴ Iꞌatu­weꞌeg kahato mekewat 144000 miit Iesui eropat haria. Yt karãpe i hary­po­riaꞌin miat taꞌa­tu­waire hap upi tuwat. Miꞌiria 144000 ihainia yt karãpe i iharyꞌi rakaria taꞌa­tunug kahato Tupana Hũ hit Kuteiru emiit sese imiꞌai­roria sese koꞌi miꞌiria. Toiꞌa­tue­ha­kye­raꞌat miꞌiria iraniaꞌin Iuteuria eꞌyianmete. Miꞌi hawyi 144000 miitꞌin rakaria ehay kaipyi miitꞌin sem toiꞌa­tue­ha­kye­raꞌat. Tupana kapiat weium hap koꞌi imowepit hamuat iꞌewyte Tupana Hũ hit Kuteiru kapiat weium hap imowepit hamuat teꞌe­ro­py­huꞌat miꞌiria 144000 Iuteuria Iesui mohey haria."

⁵ Tupana mimoe­waku koꞌi kahato miꞌiria katu­pono wakuaria kahato miꞌiria. Yt karãpe i teꞌe­ro­py­huꞌat Tupana maꞌat haria wo iꞌewyte yt karãpe i heso rakaria wo teꞌe­ro­py­huꞌat.

"

⁶ Miꞌi hawyi uito Iuwãu wẽtup araꞌa­kasa topopy rakat ywyhig muo. Miꞌi hawyi toimo­herep kahato tehay wo sehay wakuat Tupana etiat mekewat sehay wakuat wuatꞌi eꞌat piat. Yt karãpiat i ikahuro rakat. Miꞌi ti topopy kahato wuatꞌi Setama kape wuatꞌi ywania kape toto wuatꞌi pusu kuap haria kape topo­pypuo. Wuatꞌi miitꞌin kape toto hun nakaria ihup takaria iꞌewyte ikytsig nakaria kape yt toꞌo­ꞌe­wywuat i kape topopy. Miꞌi hawyi ywyhig kaipyi toimo­herep sehay wakuap."

⁷ Miꞌi ti tehay pirik wo tuwẽ­powat — Eweimõ­typot o Tupana yn e. Eiwehum yn no Tupana kape e. Katu­pono yt pya hin i tut uwe waku uwe yt naku i rakat moherep hanuat tut hap eꞌat e. Uwe imiꞌa­piheg wuat uwe yt e hamo tut irane. Miꞌi pote eweimõ­typot ro Atipy Nug Hat Yi Nug Hat e. Eweikyꞌe ro Yꞌy Wato Nug Hat e tehay pirik wo topopy popuo pyi.

"

⁸ Haipepe wẽtup atipy kaipywiat mopy hat araꞌa­kasa. Miꞌi ihay raꞌyn — Mekewat tawa Papi­runia ewywuat ikahuro raꞌyn e. Katu­pono tawa Papi­runia piaria tiꞌa­tu­muꞌe kahato miitꞌin taꞌa­tu­waire waire e hap ete — Ewetunug no urueko ewy iꞌatuꞌe yne ywania pe — Waku yne hary­poria wewe­neru haria wo waku ahewaire aikotã mahy wo aimo­pẽꞌã wywo hap ewy iꞌatuꞌe. Miꞌi pote Tupana haiwot pote toiꞌa­tu­moma miꞌiria tawa Papi­runia piaria ewywuat gupteꞌen haria e mekewat mopy ywyhig muat hat.

"

⁹ Miꞌi hawyi uito Iuwãu araꞌa­kasa wẽtup atipy piat mekewat typy rakat saipepiat. Miꞌi hawyi myeꞌym naꞌyn atipy piat mopy hat. Miꞌi tuwẽ­powat tehay pirik wo. — Eiweꞌeg wo o yt eweimõ­typot reiꞌo mekewat awyato tig koro 7 iꞌakag nakat — Uito Tupana heso rakat e. Yt eweimõ­typot reiꞌo iminug Tupana iãꞌãkap e. Karãpe toiwan teran toset ewatuꞌa ete epo sese ete pote waku wãiꞌe­weiꞌe."

¹⁰ Katu­pono — Uito Tupana heso rakat wywuat wat haria Tupana sese miꞌa­piheg wo teꞌe­ro­py­huꞌat. Yt naku i topy­huꞌat iꞌatu­ꞌa­piheg hap aikotã sapo hy watuꞌu mani hy pyre puo hap ewy — Ewetuꞌu yne ro e aru Tupana topy­ꞌahak hap wywo. Miꞌi hawyi woro­ho­ꞌo­ꞌa­piheg aria wo e. Miꞌi hawyi woro­ho­ꞌo­mo­so­ꞌopot wuatꞌi eꞌat pe e Tupana — Uito Tupana sese e heso rakat mõtypot haria pe. Aria sapuẽ puo iꞌatueiam sese topy­huꞌat iꞌatuepiat hoꞌopot hap. Miꞌi puo hoꞌopot hap sese topy­huꞌat e wuatꞌi atipy piaria ehamo Tupana Hũ hit Kuteiru ehamo. Eweꞌeg wo katu­pono miꞌi tã neꞌi ti aru eweho­ꞌopot ewetunug mekewat set ehowa­tuꞌa ete pote. Ewetunug mekewat heso rakat ehetu­pana wo pote."

¹¹ Miꞌi hawyi Tupana mimo­so­ꞌopot koꞌi heꞌyhig am ywaipe wuatꞌi eꞌat pe. Are pãi hoꞌopot hawe miꞌiria yt teꞌe­roket kuap i yt teꞌe­re­mohy kuap i miꞌiria. Haty pote yt teꞌe­roket kuap i at kaꞌap. Katu­pono mekewat yt naku i nug hat taꞌa­tunug taꞌa­tue­tu­pana wo. Iꞌewyte hãꞌãkap kape teꞌe­ru­we­pỹ­ꞌã­tutuk aikotã imõtypot Tupana ewywuat hamo. Iꞌewyte het taꞌa­tuwan taꞌa­tueo­wa­tuꞌa ete pote taꞌa­tu­sa­tyꞌi satyꞌi hawe tukup­teꞌen wuatꞌi eꞌat pe."

¹² Uiwy­riaꞌin uito Iesui potmuꞌe 12 ok takat Iuwãu. Eiweꞌeg wo o yt eweiwat reiꞌo — Uito Tupana heso rakat upi eimo­so­ꞌopot pytkai katu­pono mesuwe yn eimo­so­ꞌopot kuap. Waku wato­mohey Iesui aiꞌauka teran pytkai areꞌe. Waku Tupana piat ainãpin hap aiku­ꞌuro hap kape wato­pytyk. Aito Tupana mimoe­waku koꞌi pote waku wato­mohey aipe­rupꞌi popuo yt kat i waure­ꞌaiꞌe hap areꞌe.

"

¹³ Miꞌi hawyi atikuap sehay atipy kaipyi uimu­ꞌetu — Iuwãu e Etiwan itote uiꞌe hap e. — Waku kahato meimuẽ­waria taꞌa­tu­ka­ꞌiwat potpap taꞌa­tunug taꞌa­tu­ku­ꞌuro hap kape. Waku kahato meimuẽwat teꞌe­ru­we­potpap taꞌa­tu­ka­ꞌiwat potpap ete mesuwat eꞌat pyi taꞌa­tu­ku­ꞌuro hap kape e. Miꞌi hawyi Tupana Pãꞌãu iꞌewyte toꞌe — Pywo ti rat waku iꞌatu­potpap hoꞌopot hap Tupana potpap taꞌa­tunug at kaꞌap e. Miꞌi hawyi waku pe tukup­teꞌen wuatꞌi eꞌat pe e Tupana Pãꞌãu. Waku pe tukup­teꞌen katu­pono iꞌatu­minug koꞌi yt karãpe i miitꞌin tiwaure iꞌatu­miekyi koꞌi. Toĩneꞌen yne itote e Tupana Pãꞌãu ahepe.

"

¹⁴ Miꞌi hawyi uito Iuwãu arahaꞌat ywaipe hawyi araꞌa­kasa wẽtup ok apyk pe ywyhig kytsig me Miꞌi ti Aheykeꞌet ewywuat. Morekuat wato painug hap imehit rakat toĩneꞌen ipiit ete. Ipo pe kyse hãihyk kahato rakat miꞌi kape araꞌa­kasa."

¹⁵ Miꞌi hawyi uito Iuwãu araꞌa­kasa wẽtup ok tuwẽtem Tupana mõtypot yat pyi hawyi tuwẽ­powat mekewat ywyhig notiat apyk piat kape — Etiterek to mikoi mehĩ ekyse wo e. Kat pote iterek hamo waku raꞌyn e."

¹⁶ Miꞌi hawyi toiterek taꞌyn teky­seꞌyp wo. Mikoi yi etiat toiꞌa­tunug."

¹⁷ Miꞌi hawyi arahaꞌat wẽtup ok atipy piat ieĩneꞌen hat tuwẽtem Tupana yat pyi hawyi araꞌa­kasa ipo pe kyse ãpo­riꞌã hãihyk kahato rakat."

¹⁸ Miꞌi hawyi arahaꞌat hawyi araꞌa­kasa wẽtup atipy piat te. Miꞌi ti ipotpap mekewat aria ikamhig se rakat Tupana kapiat wuk hamuat hap ete. Miꞌi hawyi ihay pirik mekewat wẽtup ok kyseꞌyp hãihyk ipo piat rakat kape — Etipuruk to Uwa ypia sat katu­pono iꞌatag naꞌyn e."

¹⁹ Miꞌi hawyi teky­seꞌyp mo toipuruk yne Uwa sat koꞌi yi totepyi yne Uwa ypia kaipyi. Miꞌi hawyi tohytmoi yne itok hap we ihy hep hamo. Mekewat itok hap Tupana saiwot hap ewy. Uwa sat miitꞌin ewy."

²⁰ Miꞌi hawyi tuwẽtem miitꞌin suu ewywuat itok hawyi. Toitok yne mekewat Uwa tawa wato Ieru­sarẽi miaria hawyi ti Huu kahato itote aikotã ihyemyiꞌa wato sese hap ewy. Miꞌi kape arahaꞌat turan hawyi iꞌatuhũ kawaru hewyry mekewat miitꞌin suu muꞌap tote hewyry ihyemyiꞌa ewy miitꞌin suu. hutꞌypy puo

Uito Iuwãu miꞌi tã hap araꞌa­kasa yne hawyi atiwan are.

"

15

¹ Miꞌi hawyi uito Iuwãu arahaꞌat i raꞌyn atipy kape. Miꞌi hawyi uimo­wa­nẽtup kahato uimia­ꞌa­kasa hap koꞌi. Uimogyt hap ewy katu­pono araꞌa­kasa 7 ok atipy piaria kape. Miꞌiria 7 ok takaria Tupana tiꞌa­tu­po­ꞌoro yi kape tosaiwot miitꞌin minug saꞌag etiat hap apiheg hamuat. Toiꞌa­tu­po­ꞌoro miꞌiria 7 ok takaria wuatꞌi miitꞌin apiheg 7 wuat hamo — Miꞌi taꞌa­tunug hawyi yt kat i raꞌyn uipy­ꞌahak iꞌatuetiat hap e. Kat pote uimi­po­ꞌo­roria atiꞌa­tu­mo­ha­ky­ꞌeꞌi kahato hamuat e. Miꞌi atunug hawyi toran naꞌyn uipy­ꞌahak hap e.

"

² Miꞌi hawyi araꞌa­kasa ihyemyiꞌa iwato rakat maꞌato iheg kahato rakat imehit kahato rakat. Aikotã aria ewy hẽtyhot itote ihup hap. Miꞌi hawyi Tupana tum iꞌatuepe wepy nug hamuat mory­ꞌawat ewywuat maꞌato haity iꞌatu kahato rakat. Miꞌiria saꞌa­wy­ꞌiwuat ahiag akit haria raꞌyn. Iꞌewyte yt karãpe i mekewat het 666 mimo­herep ahiag wat taꞌa­tunug taꞌa­tue­wa­tuꞌa ete haria miꞌiria. Yt karãpe i taꞌa­tu­mõ­typot Tupana wo mekewat yt naku i nug hat — Uito Tupana e hat neꞌi. Iꞌewyte toiãꞌãkap iminug yt taꞌa­tu­mõ­typot i Tupana wo."

³ Are pãi teꞌe­ru­wepy kahato saꞌa­wy­ꞌiwuat Tupana eropat sese hat aseꞌi Musei minug wepy hap kaipyi iꞌewyte mekewat Tupana Hũ hit Kuteiru minug wepy hap kaipyi teꞌe­ru­wepy. — Tupana En ni urupo­typot koro iꞌatuꞌe En ni poꞌog hesaika torania kai iꞌatuꞌe. Eminug koꞌi urumo­wa­nẽtup kahato katu­pono iwato kahato etunug kuap yt uwe minug ewy i. Wuatꞌi ywania akag ereĩneꞌen iꞌatuꞌe. Yne eminug koꞌi pywo rakat yn iꞌewyte yne hãpyk kahato rakat eminug koꞌi iꞌatuꞌe. Yt uwe maꞌat hat i En iꞌatuꞌe. Wuatꞌi mimõ­typot En iꞌatuꞌe. Eset ri Tupana ikahu kahato eset iꞌatuꞌe. Uruka­ꞌiwat ti eset iꞌatuꞌe."

⁴ Uruto­kenꞌẽ popuo katu­pono uruewaku hap yt putꞌokꞌe i uruehay ewywuat hamo iꞌatuꞌe. En yn ni wakuat sese iꞌatuꞌe. Tupana urumi­mõ­typot En urutoꞌe wuatꞌi eꞌat pe iꞌatuꞌe. Meiũran aru wuatꞌi ywania kaipyi wuatꞌi tama kaipyi teꞌe­ru­we­pỹ­ꞌã­tutuk ewawi En ni Tupana taꞌa­tuꞌe hamo iꞌatuꞌe. Eminug wakuat heremo wuatꞌi miitꞌin ehamo. Wakuat wakuat iꞌatuꞌe Tupana pe teꞌe­ru­wepy puo ihyemyiꞌa wato upiaria.

"

⁵ Miꞌi hawyi uito Iuwãu arahaꞌat Tupana mõtypot yat atipy piat kape. Miꞌi hawyi tuwe­ꞌo­kenhyp arahaꞌat turan hawyi ipuo heremo kahato. Itote Araꞌa­kasa saꞌa­wy­ꞌiwuat sokpe kawiat Tupana mõtypot yat aikope topy­huꞌat Tupana Pãꞌãu saꞌa­wy­ꞌite teiam sokpe kawiat pe hap."

⁶ Miꞌi hawyi mekewat Tupana mõtypot yat pyi tuwe­nõꞌẽ mekewat 7 ok takaria atipy piaria uimia­ꞌa­kasa saꞌa­wy­ꞌi­tewuat hap koꞌi Tupana mipo­ꞌoro miitꞌin apiheg hamuat tosaiwot hap wywuat hanuaria. Iꞌatu­painug hap sokpe ikytsig kahato rakat. Ikahu kahato rakat. Ipotiꞌa tote toĩneꞌen morekuat esokpe ewywuat nu uru kawiat imehit kahato rakat moraꞌa sopo hamuat."

⁷ Miꞌi hawyi mekewat 4 ok takaria wuatꞌi eꞌat piat ieĩneꞌen haria tum 7 ok takaria atipy piaria pe 7 kamũti imehit rakat kawiat. Miꞌi 7 eiam me howapy kahato Tupana saiwot hap wywo miitꞌin yi totiaria apiheg hamuat."

⁸ Miꞌi tutum iꞌatuepe hawyi Tupana mõtypot yat topy­huꞌat howapy kahato raꞌyn imõtypot hap ywyhig imehit rakat ewy. Miꞌi hawyi yt uwe i teke kuap itote. Uipot­po­ꞌo­roria tiꞌa­tu­ꞌa­piheg yne hawyi waku eiwe­hytꞌok i raꞌyn uimõ­typot hap yat pe e. Iꞌatu­moe­ha­ky­ꞌeꞌi hap tokosap hawyi waku eiwe­hytꞌok i raꞌyn e.

Uito Iuwãu miꞌi hap kape araꞌa­kasa kahato.

"

16

¹ Miꞌi hawyi uito Iuwãu atikuap ihay wato kahato Tupana mõtypot atipy piat kaipyi — Uheropat haria atipy piaria eweiwat ro meiũpepyi yi kape uiꞌe hap ewy e. Ewetioto ro kamũti iraniaꞌin meimuẽwat howapy uhaiwot hap wywuat rakat e. Putꞌok­ꞌe­weiꞌe uhepiat eipo­ꞌoro hap tote hawyi ewehytpok kamũti pytꞌat aiũpe woro­ho­ꞌo­po­ꞌoro hap tote e 4 ok atipy piaria pe."

² Miꞌi hawyi toto saꞌa­wy­ꞌiwuat atipy pyi taꞌa­tu­ꞌã­ti­ꞌy­pykiat wywo. Putꞌokꞌe mytyp tote hawyi tohytpok mekewat — Uito Tupana e hat heso rakat mohey haria ete. Meimuẽwat hãꞌãkap mohey haria ete. Mekewat — Uito Tupana e hap set howa­tuꞌa etiat rakaria ete. Miꞌi hawyi miꞌiria ete hepihi pihi saꞌag satꞌe kahato iꞌatupiit ete yt tokãꞌã rakat nuat i hap kape araꞌa­kasa."

³ Miꞌi hawyi typy ok toto atipy kaipyi yꞌy wato kape. Toipugha yꞌy wato pe hawyi iꞌok puk hap ewy huu nem nakat ewy yꞌy wato pe. Miꞌi hawyi yne yne yꞌy piaria topap."

⁴ Miꞌi hawyi wẽtup ok i raꞌyn toipo­ꞌoro atipy kaipyi torania ihy koro kape iꞌewyte wuatꞌi yꞌy hitꞌi koꞌi kape.

"

⁵ Miꞌi hawyi myeꞌym nakat raꞌyn toipo­ꞌoro hawyi miꞌi tiꞌokpun itote Tupana saiwot hap. Teke yꞌy pe hawyi suu wo yꞌy topy­huꞌat. Miꞌi hawyi atikuap sehay — Yꞌy topy­huꞌat suu ewy e. Miꞌi hawyi mekewat kamũti erut hat tuwẽ­powat — Waku raꞌyn e emiky­ꞌesat ewy Tupana e katu­pono saꞌa­wyꞌi mesuwat yi totiaria taꞌa­tu­ꞌuka emipo­ꞌo­roria ehay moherep hanuaria. Taꞌa­tu­pugha emiit suu mesuwat yi tote e. Miꞌi pote koran etum naꞌyn iꞌatu­miꞌu wo suu katu­pono yne yꞌy topy­huꞌat suu wo raꞌyn e. Waku etipoepyk miꞌiria katu­pono yt naku i kahato emipo­ꞌo­roria suu ok pun haria e."

⁶ Iꞌatu­ꞌa­piheg hap iꞌatu­minug saꞌag ok tã etum e. Miꞌi pote hãpyk kahato etunug no e. Wakuat yn nug hat en Tupana e. Nimo pyi mesup te iꞌewyte wuatꞌi eꞌat pe waku kahato En e. Koitywy iꞌatu­we­ꞌy­ꞌutui turan suu yn topy­huꞌat taꞌa­tu­miꞌu wo e atipy kaipywiat yꞌy nug suu wuat erut hat.

"

⁷ Miꞌi hawyi atikuap sehay aikope taꞌatuium Tupana kape hap kaipyi yparakai kaipyi — Pywo ti rat eꞌe hap ewy etunug no Tupana e etiꞌa­tu­poepyk emipo­ꞌoro auka haria Tupana e. Waku etiꞌa­tu­ꞌa­piheg miꞌiria e."

⁸ Miꞌi hawyi araꞌa­kasa 4 ok takat kamũti wywo hewyry rakat kape. Miꞌi hawyi toiꞌokpun kamũti pytꞌat at ete hawyi at yt saꞌa­wy­ꞌiwuat ewy hin i. Poꞌog hakup saꞌa­wy­ꞌiwuat kai hawyi miitꞌin ete hakup kahato raꞌyn."

⁹ Miꞌi hawyi — Yt naku i kahato En Tupana iꞌatuꞌe yi totiaria. Urumo­so­ꞌopot kahato at wo iꞌatuꞌe. Etunug yt naku i kahato at wo uruete iꞌatuꞌe. Yt kan hamo i En uruipuẽti. Wãiꞌi­ꞌa­tuꞌe. Etunug hãpyk i ro at iꞌatuꞌe. Maꞌato yt teꞌe­ra­ꞌaipok hin i Tupana kape taꞌa­tu­minug saꞌag kaipyi pytkai mio tã iꞌatuꞌe. Yt teꞌe­ru­we­pỹ­ꞌã­tutuk teran hin i Tupana kape — Waku kahato En Tupana taꞌa­tuꞌe hamuat. Yt karãpe i teꞌe­ru­wehum Tupana Kape.

"

¹⁰ Miꞌi hawyi uito Iuwãu arahaꞌat wẽtup ok atipy piat toto teka­mũti wywo hap kape. Toto aikope yt naku i rakat taꞌapyk morekuat no hap kape Tupana saiwot hap kamũti howapy rakat wywo toto. Miꞌi ti putꞌok­toꞌe hawyi toiꞌokpun morekuat saꞌag ete hawyi yne hetama iꞌypyryp sese tapy­huꞌat. Yt karãpiat ewy i iꞌatu­mo­so­ꞌopot kahato miꞌi hap ok tã. Miꞌi hap upi kakꞌi­ꞌa­tuꞌe kakꞌi­ꞌa­tuꞌe — Iꞌypyryp sese iꞌypyryp sese urumo­so­ꞌopot sese iꞌatuꞌe kakta­ꞌa­tuꞌe popuo."

¹¹ — Haty ti rat iꞌatuꞌe haty ti rat ahepihi iꞌatuꞌe teꞌe­ruwak popuo — Yt naku i kahato En atipy piat Tupana iꞌatuꞌe. Yt karãpe i uruta­ꞌaipok uruminug saꞌag myi iꞌatuꞌe iꞌatuehay popuo.

"

¹² Miꞌi hawyi araꞌa­kasa 6 ok hap taꞌyn atipy piat kamũti wywuat hat hawyi toto yꞌy wato Eurate hy kape. Miꞌi iꞌokpun teka­mũti piat Tupana saiwot hap yꞌy wato pe hawyi yꞌy wato Eurate hy ihysik raꞌyn hawyi — Pyno waku watuwat raꞌyn mesup Iuteu ywania momã hamo katu­pono koitywy wati­po­ꞌoro kuap ahesu­ra­raꞌin yꞌy wato sakpo iꞌatuꞌe more­kuaria toꞌope at minꞌe hap totiaria. Koitywy toĩ naꞌyn yꞌy wato sakpo muꞌap ihy sik hawyi iꞌatuꞌe."

¹³ Miꞌi hawyi uito Iuwãu arahaꞌat moiꞌok kape mekewat yt naku i nug hat — Uito Tupana heso hat kape. Iꞌewyte mekewat yt naku i nug hat iãꞌãkap kape araꞌa­kasa. Arahaꞌat turan araꞌa­kasa ahiag pãꞌãu myeꞌym ok tuwe­nõꞌẽ iwẽ pyi. Yt ikahu hin i rakat aikotã waꞌasa saꞌag ewy."

¹⁴ Miꞌi hawyi miꞌiria mãꞌãu saꞌag myeꞌym ok takaria inug kuap kahato yt miitꞌin minug kuap ewy i taꞌa­tunug wuatꞌi miitꞌin mowa­nẽtup hamo. Miꞌi hawyi myeꞌym ok takaria ahiag pãꞌãu saꞌag koꞌi kawiat tuwat aikope more­kuaria tukup­teꞌen hap kape. Miꞌi hawyi teꞌe­ru­we­ꞌa­tunug yne more­kuaria Tupana etiat wuꞌuka nug hamo teꞌe­ru­we­ꞌa­tunug taꞌa­tue­su­ra­raꞌin wywo. Miꞌi hawyi teꞌe­ru­we­ꞌa­tunug yne torania hawyi Tupana toꞌe — Koitywy yt pya hin i hamuat uheꞌat — Uito poꞌog hap atimo­herep wuatꞌi miitꞌin me hap eꞌat e Tupana. Wuatꞌi sura­raꞌin teꞌe­ru­we­ꞌa­tunug mekewat yꞌy wato ihypap takat sakpo."

¹⁵ Miꞌi hawyi Arahaꞌat turan wẽtup ok toꞌe — Eiweꞌeg wo o miitꞌin yne yi totiaria e. Eiwa­tetup o katu­pono seroꞌok e hat ewy ariot e. Yt uwe i ti ikuap karãmuo uhut hap e. Miꞌi pote eweikup­teꞌen sokpe piaria ewy waku uipuẽti hamo e. Yt pote aru eiwe­mõti kahato yt ehesokpe rakaria ewywuaria eweipy­huꞌat uhut turan ariot pote e.

"

¹⁶ Miꞌi hawyi ahiag pãꞌãu waꞌasa ewywuaria teꞌe­ru­we­ꞌa­tunug yne mesuwat yi totiaria taꞌa­tue­su­ra­raꞌin wywo. More­kuaria iꞌewyte taꞌa­tue­su­ra­raꞌin wywo yi Iuteuria etama kape teꞌe­ru­we­ꞌa­tunug tuꞌuka hamo. Iuteuria pusu puo yi wato Amaketũ tote teꞌe­ru­we­ꞌa­tunug.

"

¹⁷ Miꞌi hawyi uito Iuwãu arahaꞌat atipy kape turan araꞌa­kasa wẽtup ok 7 ok hap toto kamũti wywo. Miꞌi hawyi 7 ok hap toran hap taꞌyn toto. Miꞌi hawyi toto yi kape maꞌato putꞌok toꞌe hap eꞌyianmete toiꞌokpun kamũti pytꞌat Tupana saiwot hap ywytu ete ywyhig ete. Miꞌi tutunug hawyi atikuap ihay pirik Tupana mõtypot yat atipy piat kaipyi aikope Tupana taꞌapyk Morekuat no hap kaipyi. — Torania raꞌyn uhaiwot hap atunug e. Yne raꞌyn yt kat i raꞌyn poꞌog e."

¹⁸ Miꞌi hawyi ywytu uato kahato pigꞌe pigꞌe kahato. Miꞌi hawyi atikuap iꞌatu kahato miitꞌin kakꞌi­ꞌa­tuꞌe kakꞌi­ꞌa­tuꞌe. Miꞌi hawyi iꞌatu kahato moryꞌa ewy hewo yi kape. Miꞌi hawyi huruhu­ruꞌe kahato yt ipoꞌinik takat i. Miꞌi hawyi tyryꞌe haty wo kahato yi. Yt karãpiat ewy i hurukꞌe hap. Nimuat miitꞌin nug hap turan yt uwe i taꞌa­kasa miꞌi ewywuat yi hurukꞌe hap. Yt kat i hurukꞌe hap poꞌog mote."

¹⁹ Miꞌi hawyi mekewat tawa iwatoꞌin nakat Papi­runia mekewat tawa poꞌog iwato rakat pok pokꞌe yi tyryꞌe kahato itote pote. Iꞌewyte yne tawa koꞌi taꞌat yne yi totiat koꞌi yi tyryꞌe poityꞌi pote hewo yne. — Yt naku i kahato tawa Papi­runia piaria e Tupana. — Atiꞌa­tu­poepyk iꞌatu­minug koꞌi uhaiwot iꞌatu­minug saꞌag hap kaipyi e. Yt karãpe i atiꞌa­tu­waure kuap iꞌatu­minug saꞌag koꞌi. Pyno eiꞌa­piheg uhepiat hap topy­huꞌat mekewat kuiꞌa pytꞌat howapy aikotã mani hypyre wywo hap ewy. Ewetuꞌu ro miꞌi areꞌe ehepe. Uhaiwot hap wywo ewetuꞌu ro e iraniaꞌin me yi Papi­runia pe Tupana."

²⁰ Hewo yne yityꞌok koꞌi hawyi taꞌa­tukat turan yt uwe i ipuẽti aiũpe aiũpe yityꞌok koꞌi hap yt uwe i ikuap. Tuweityk taꞌyn yi tyryꞌe hawyi yꞌy wato pyꞌa­setpiat koꞌi iꞌapo­rokꞌe yne raꞌyn."

²¹ Miꞌi hawyi hewo nukara koꞌi iwatoꞌin nakat iꞌaman wato ewy. Aikotã ipotyi sese hap porap yt uwe i hupit hap ewy. Miꞌi hawyi hewo hewo miitꞌin ete. Miꞌi hawyi yi totiaria — Yt naku i kahato En Tupana iꞌatuꞌe. Kat pote yt naku i etunug uruete iꞌatuꞌe. Yt naku i kahato nukara koꞌi iꞌatuꞌe. Wãi iꞌatuꞌe. Yt naku i kahato Tupana iꞌatuꞌe taꞌa­tu­py­ꞌahak hap wywo.

Miꞌi hap ewy araꞌa­kasa uito Iuwãu.

"

17

¹ Miꞌi hawyi wẽtup atipy piat toꞌe uhepe — Toꞌiro uhupi Iuwãu e. Atimo­herep teran epe aikotã aru Tupana tiꞌa­tu­ꞌa­piheg tawa wato Papi­runia piaria hamuat hap kape e uhepe mekewat wẽtup kamũti pytꞌat okpun hat. Toꞌiro uhupi e. Atimo­herep epe yt iꞌatu­weꞌeg i hap e. Aikotã wẽtup ok hary­poria wuatꞌi ihainia wywo hat ewy tukup­teꞌen miꞌiria e. Miꞌi pote Tupana tiꞌa­tu­ꞌa­piheg miꞌiria tawa Papi­runia piaria e. Toꞌiro pyno mekewat tawa wato kape. Wanĩkap koꞌi yt tuwe­hytꞌok kuap i tawa Papi­runia pe katu­pono mekewat tawa topyhyp hawe toĩneꞌen ihy esaika kahato howawi pote sura­raꞌin yt tuwe­hytꞌok kuap i e."

² Yt naku i kahato miꞌiria e uhepe. Tupa­naria weneru haria miꞌiria e. Aikotã yt iweꞌeg i sese rakaria ewy tukup­teꞌen e uhepe. Taꞌa­tu­kaykay tuwe­wawi topiit kyiꞌat haria e. Miꞌi ewywuat tawa Papi­runia piaria tukup­teꞌen e. — Toꞌiro ahewaire waire iꞌatuꞌe wuatꞌi ywania pe. Aikotã mahy weneru haria tikaykay mahy kyiꞌat haria hap ewy tawa wato Papi­runia piaria tukup­teꞌen e uhepe. Miꞌi hap ewy tawa Papi­runia tiꞌa­tu­kaykay more­kuaria taꞌa­tue­miitꞌin wywo wuatꞌi tupa­naria mõtypot hap etiat iꞌatu­muꞌe hamo e uhepe mekewat kamũti pytꞌat okpun hat atipy kaipywiat."

³ Miꞌi hawyi uhereto mekewat atipy piat hap araꞌa­kasa uimu­ꞌetu Tupana timo­herep yne. Miꞌi hawyi putꞌok­ꞌare yahig wato tote. Itote araꞌa­kasa hary­poria waire waire nug hat yt naku i sese rakat apyk pe tohũ awyato tig koro saꞌag note. Ihũ awyato ihup kahato aikotã wewe­neru haria esokpe hup hap ewy. Ihũ awyato saꞌag nakat toĩneꞌen 7 iꞌakag nakat ipiit ete. 10 iꞌaut rakat 7 akag totiat koꞌi. Ipiit etiat miwan saꞌag kahato Tupana sese mohit kahato hap toĩneꞌen — En ni yt naku i kahato Tupana e tope ete miwan saꞌag hap koꞌi hap kape araꞌa­kasa."

⁴ Itote mekewat ipiit weneru hat esokpe ihup kyre hap ewy. Tuwe­painug kahato wahi hekat rakat koꞌi wo. Nu ikahu kahato rakano tuwe­painug hap ihup ikaꞌay ikytsig ihyrypꞌi. Ipo pe hekuiꞌa mahy eiam imehit kahato rakat hekat rakat. Hekuiꞌa topy­huꞌat Iesui mohey haria suu. Miitꞌin toimoe­saika yt naku i nug iwywuat hamuat hap."

⁵ Mekewat hary­poria yt naku i nug hat akag ete toĩneꞌen mekewat hary­poria set itote miwan me — Uito ti wuatꞌi wewe­neru haria ty e. Uito tawa Papi­runia piaria morekuat hary­poria kawiat e. Yt naku i nug hap etiat miitꞌin muꞌe hat uito e. Yt uwe i te mikuap yt naku i nug hap moherep hat uito e miwan howa­tuꞌa ete."

⁶ Arahaꞌat hawyi mekewat yt iweꞌeg i rakaria akag hary­poria kawaiat temahy u at kaꞌap takat ewy topy­huꞌat hemahy Iesui mohey haria suu. Yt taꞌa­tu­ꞌatoiat hin i Iesui mohey haria suu u hap. Tupana eropat haria sese suu hemahy wo. Iꞌok sese miꞌi mahy wo. Miꞌi hawyi arewa­nẽtup hawyi yt naku i sese saꞌag kahato hap ewy areꞌe uiwa­nẽtup hawe. Miꞌi rokirẽ yt heremo hin i uimu­ꞌetu."

⁷ Miꞌi hawyi mekewat atipy piat toꞌe uhepe — Yt heremo hin i emuꞌetu ewaꞌa­kasa hap e. Pyno atimo­herep epe mekewat hary­poria yt iweꞌeg i rakat koro hap ete uwe uwe mekewat awyato tig koro ihũ saꞌag topy­huꞌat mekewat 7 iꞌakag nakat 10 iꞌaut rakat mekewat hary­poria ereto hat ete hap ahenoi epe e."

⁸ Mekewat awyato tig saꞌag saꞌa­wyꞌi toĩneꞌen yi tote maꞌato miꞌi hawyi ikuꞌuro hawyi meiũran tuwẽtem guꞌuro pyi mekewat yi kaꞌa saꞌag iwato rakat kaipyi yt ikaꞌa sasat rakat i kaipyi e. Miꞌi hawyi yi totiaria yt Iesui mohey i haria teꞌe­ru­wa­nẽtup kahato toĩneꞌen i hawyi e. Mekewat eꞌat pe — Are pãi are an ikuꞌuro saꞌa­wyꞌi mesuwat awyato wato tig ewywuat maꞌato mesup tuwe­mo­herep i raꞌyn iꞌatuꞌe aru mekewat meimuẽ­waria yt Tupana miwan miaria iꞌatuset pehik i haria — Miꞌiria ti waku tukup­teꞌen wuatꞌi eꞌat pe uiwywo atipy pe yt toꞌe i Tupana miwan me haria. Saꞌa­wyꞌi Tupana tiwan naꞌyn tomohey haria saꞌa­wyꞌi sese at yi waikiru yt kat i te turan toiwan tomi­moieĩ­neꞌen wuaria set koꞌi maꞌato mekewat awyato ahiag mohey haria set koꞌi yt wẽtup i Tupana miwan ete e uhepe mekewat atipy kaipywiat Tupana ehay moherep hat uhepe uito Iuwãu me."

⁹ Eiweꞌeg wo o eweikuap kat som Tupana toꞌe ahepe mesuwe katu­pono iweꞌeg kahato rakaria yn tikuap uiꞌe hap mesuwe uito Iuwãu. Pyno mekewat hary­poria hũ awyato saꞌag 7 iꞌakag koꞌi 7 more­kuaria ewy tukup­teꞌen. Miꞌiria ti hary­poria yt iweꞌeg i rakat eꞌaito koꞌi miꞌiria. Meke­waria 7 ok takaria teꞌe­ra­ꞌapyk miitꞌin akag koꞌi wo tawa wato yt naku i rakat eꞌyityꞌok koꞌi tote 7 yityꞌok koꞌi tote teꞌe­ra­ꞌapyk."

¹⁰ Miꞌi hawyi morekuat koꞌi hoꞌopap kahato raꞌyn 5 ikuꞌuro raꞌyn mekewat 7 yityꞌok totiat etawa pe. Miꞌi hawyi typy more­kuaria yn naꞌyn toĩneꞌen. Wẽtup toĩneꞌen mesup te morekuat no maꞌato miꞌi ti ikuꞌuro irane hawyi mekewat wẽtup ok tuwe­mo­herep morekuat no. Maꞌato miꞌi ti yt toĩneꞌen motꞌi morekuat no."

¹¹ Miꞌi hawyi mekewat hary­poria saꞌag hũ awyato saꞌag 7 ok takaria more­kuaria saipepiat tuwenug naꞌyn morekuat no. Miꞌi ti morekuat koro wo topy­huꞌat raꞌyn 8 rakat. Miꞌi ti ipotpap kahato morekuat no maꞌato taꞌat aria wato pe wuatꞌi eꞌat piat hoꞌopot piat pe."

¹² Miꞌi hawyi atipy piat toꞌe i uhepe — Iuwãu e mekewat ihũ 10 iꞌaut rakat mekewat hary­poria hũ awyato tig ewywuat ipiit etiat tukup­teꞌen aikotã 10 more­kuaria hap ewy. Mesup yt morekuat no i maꞌato meiũran aru topy­huꞌat more­kuaria wo e. Meiũran aru mekewat hary­poria hũ yt naku i rakat tiꞌa­tunug more­kuaria wo toꞌe­wywuat no maꞌato aru yt tukup­teꞌen motꞌi i iwywo more­kuaria wo e."

¹³ Miꞌiria wẽtup wanẽtup hap ewy tukup­teꞌen mekewat hary­poria hũ wywo. Meke­waria 10 iꞌaut ewywuaria hesaika kahato rakaria tukup­teꞌen e. Miꞌi hawyi iꞌatue­saika hap wo taꞌa­tu­mõ­typot mekewat awyato saꞌag me. Miꞌi ti topy­huꞌat more­kuaria 10 ok takaria mipo­ꞌoro hanuat iꞌatu­mi­ky­ꞌesat nug hamuat topy­huꞌat mekewat hary­poria hũ awyato saꞌag nakat."

¹⁴ Miꞌi hawyi 10 iꞌaut rakaria tuꞌuka Tupana hũ hit Kuteiru wywo maꞌato poꞌog Tupana hũ hit Kuteiru iꞌatu­ꞌakit hano topy­huꞌat. Katu­pono poꞌog poꞌog Morekuat no Iesui toĩneꞌen. Iꞌewyte hemiit poꞌog tuwat Taꞌa­tu­ka­ꞌiwat upi. Yt waure­ꞌi­ꞌa­tuꞌe hin i taꞌa­tu­ka­ꞌiwat ete pyi. Taꞌa­tu­ꞌauka hap kape yt taꞌa­tu­ꞌatoiat hin i. Miꞌi pote tukup­teꞌen Taꞌa­tu­ka­ꞌiwat wywo mekewat hary­poria hũ 10 iꞌaut rakat okpe tote. Miꞌi hawyi Tupana hũ topy­huꞌat wuatꞌi Kaꞌiwat no Wuatꞌi Morekuat Porekuat no topy­huꞌat."

¹⁵ Miꞌi hawyi mekewat atipy piat toꞌe i uhepe — Mekewat yt iweꞌeg i rakat taꞌapyk itote yne yꞌy ete katu­pono yꞌy wato tapy­huꞌat wuatꞌi miitꞌin ewywuat. Yꞌy wato topy­huꞌat wuatꞌi pusu kuap haria aikope aikope tukup­teꞌen wuatꞌi yꞌy ete hap ewy e. Miꞌi tote toĩneꞌen mekewat hary­poria iꞌatu­muꞌe hamo tupa­naria mõtypot hap ete waku ahewaire waire e hap ete e uhepe."

¹⁶ iꞌewyte toꞌe uhepe — Mekewat yt iweꞌeg i rakat hũ ete eraꞌa­kasa 10 iꞌaut koꞌi iꞌatu­py­ꞌahak kahato irane mekewat hary­poria ete e. Tuꞌuka kahato iwywo. Meiũran ihũ aut koꞌi tihiot yne hesokpe hary­poria wat e. Miꞌi hawyi yt hesokpe i rakano topy­huꞌat e. Miꞌi hawyi topy­huꞌat hiwu e. Miꞌi hawyi taꞌa­tusuk suk taꞌa­tuꞌaut no e. Miꞌi hary­poria taꞌa­tuwuk yt iweꞌeg i rakat aria wo e. Mio tã hap ewy irane topy­huꞌat e atipy piat uhepe."

¹⁷ Miꞌi hawyi Tupana tiꞌa­tu­mo­wa­nẽtup 10 iꞌaut rakat more­kuaria ewywuat hary­poria hũ waku topy­huꞌat eipo­rekuat no e hap ete. Miꞌi hawyi taꞌa­tunug Tupana miky­ꞌesat ewy yt taꞌa­tukuap pytkai i e. Miꞌi pote teꞌe­roꞌe — Waku ereĩneꞌen urupo­rekuat no iꞌatuꞌe hary­roria hũ me neꞌi. Miꞌi hawyi — Waku e katu­pono Tupana timoma teran. Miꞌi e hap ewy e atipy piat uhepe."

¹⁸ Etikuap mekewat ewaꞌa­kasap hap hary­poria e. Miꞌi ti mekewat tawa wato yt naku i nug hat aikope wuatꞌi mesu­wa­rotiat more­kuaria saꞌag nug haria akag wo taꞌapyk morekuat no e uhepe mekewat atipy piat.

Uito Iuwãu araꞌa­kasa yne miꞌi hap koꞌi kape.

"

18

¹ Miꞌi hawyi uito Iuwãu arahaꞌat hawyi araꞌa­kasa wẽtup ok tut atipy kaipyi yi kape. Tupana emiit Morekuat ewy. Miꞌi ti sut hat ipoꞌoro kuap kahato Morekuat ewy. Imehit kahato rakat. Imehit hap kaipyi yi mesu­wa­rotiat poꞌog hẽtyhot saꞌa­wy­ꞌiwuat kai."

² Miꞌi hawyi atipy kaipywiat toꞌe tehay pirik wo — Hewo hewo irane tawa wato Papi­runia e. Tuweityk taꞌyn wuatꞌi miꞌatoiat no raꞌyn tapyhuꞌat tawa saꞌag Pari­runia e. Koitywy yt uwe i toĩneꞌen itote e. Ahiagnia tukup­teꞌen itote iehog koꞌi yn naꞌyn e. Tawa Papi­runia pe topy­huꞌat uruwu eiam mo hywi eiam wo e. Yne kat kat saꞌag eiam mo topy­huꞌat itote e."

³ Nimo te pyi tawa Papi­runia piaria tiꞌa­tu­muꞌe kahato wuatꞌi ywania waku ahewaire hewaire e hap ete e. Aikotã mahy weneru haria wo — Etuꞌu ro yt pote uruiꞌahyk en e haria ewy tukup­teꞌen wuatꞌi hary­poria wewe­neru hat ete e. Miꞌi nug hap ete yne more­kuaria waku iꞌatuꞌe. Yt wãiꞌi­ꞌa­tuꞌe hin i katu­pono iꞌatuekat tut mekewat kaipyi e. Iꞌewyte karaiwa koꞌi iꞌatu­potpap mekewat ete e. Miꞌi kaipyi yn tukup­teꞌen hekat rakaria wo e. Taꞌa­tu­we­neru kahato tupana iãꞌãkap koꞌi tawa Papi­runia pyi e. Tawa Papi­runia ekat kaipyi teꞌe­ru­we­moekat e. Koitywy tawa Papi­runia iꞌanam irane tehay pirik wo wuatꞌi pe e.

"

⁴ Miꞌi hawyi atikuap wẽtup ok tuwẽ­powat atipy kaipyi hap — Uhemiitꞌin e eiwe­nõꞌẽ ro pya kahato miꞌiria kai e. Yt ewetunug neiꞌo miꞌiria tawa Papi­runia piaria minug ewywuat e. Ewetoiat ro tupa­naria e. Iꞌewyte iꞌatue­waire atuewaire hap eweitoiat e. Yt naku i aru eweikup­teꞌen iꞌatu­py­ꞌa­setpe uhepiat iꞌatu­ꞌa­piheg hap eꞌat pe raꞌyn e. Katu­pono atiꞌa­tu­ꞌuhu iꞌatu­ꞌahu hap hamo miꞌiria e. Yt atiky­ꞌesat i satꞌe ehete e sehay atipy kaipyi."

⁵ Iꞌatu kahato iꞌatu­minug saꞌag iꞌatuwat e. Miꞌi pote koitywy yne tawa Papi­runia piaria yt naku i nug haria sese teꞌe­ro­py­huꞌat iꞌatuꞌe toꞌope atipy piaria. Miꞌi hap araꞌa­kasa pyno — Yt eweikuap i uhepiat ehewãi hap pote woro­ho­ꞌo­ꞌa­piheg eipe wy e. Woro­ho­ꞌokuap taꞌyn eipe e. Yt naku i nug hap ete e Tupana tawa Papi­runia piaria pe."

⁶ Eweikup­teꞌen eipe wepit weneru hat ewy e. Miꞌi pote eiꞌa­piheg uhepiat hawe eweikup­teꞌen e Tupana katu­pono eweiꞌa­tu­mo­so­ꞌopot kahato uhemiitꞌin miꞌi tã ewetunug haype hap kaipyi e. Miꞌi pote woro­ho­ꞌo­ꞌa­piheg eipe e. Maꞌato eweho­ꞌo­sa­tyꞌi satyꞌi hap kai aru poꞌog torania kai e Tupana. Eweiꞌa­tu­mo­so­ꞌopot kahato uhemiitꞌin typyꞌi kahato saꞌa­wyꞌi e. Yt miitꞌin ewy i ewetunug e. Maꞌato koran atunug ehete aikotã ewetunug uhemiitꞌin ete hap kai poꞌog naꞌyn yt naku i atunug ehete e."

⁷ Aikotã wepit weneru haria sese ewy eweikup­teꞌen tawa Papi­runia piaria e. — Yt karãpe i ikahuro uheꞌai­toria e haria ewy. Pyno uhekat rakano motꞌi areĩneꞌen eweiꞌe. Yt karãpe i uhatek eweiꞌe pote yt iweꞌeg i rakat hary­poria ewy eweikup­teꞌen e. Aikotã teꞌe­roꞌe — Uito areĩneꞌen morekuat eharyꞌi wo e haria ewy tawa Papi­runia piaria maꞌato yt miꞌi tã hin i e. Ihakyꞌe i rakaria sese eweikup­teꞌen e. Aikotã aikotã eweho­ꞌopot kakꞌe­weiꞌe kakꞌe­weiꞌe e. Eheꞌaito kak potiat ewy e Tupana. Saꞌa­wyꞌi eweimo­wato kahato ehekat koꞌi — Uruto poꞌog e hamo maꞌato Uito poꞌog eiꞌe pote Tupana eiwe­mo­wato hap kai poꞌog woro­ho­ꞌo­mohit neꞌi e Tupana."

⁸ Wẽtup eꞌat pe yn atunug eimoma hap eiꞌahu hap ehesyꞌat hap eimoma hap e. Paaꞌeiꞌe hap eiꞌauka e. Woro­ho­ꞌowuk yne eipe aria wo e. Uhesaika kahato ti katu­pono Uito Tupana Wuatꞌi akag wo areĩneꞌen mote e. Uito yn atikuap e. Uito Tupana sese pote atikuap kahato tawa Papi­runia piaria iꞌatu­minug saꞌag koꞌi hap e. Miꞌi pote uimi­ꞌa­piheg wuaria wo teꞌe­ro­py­huꞌat Papi­runia piaria e."

⁹ Woro­ho­ꞌowuk turan yhig hun aria saꞌag kawiat taꞌam wuatꞌi mesu­wa­ro­tiaria ehamo ehetawa pyi e. Miꞌi hawyi more­kuaria tuwak tuwak eiwuk hap taꞌa­kasa hawyi e. — Uheha­ryꞌi ikahu rakat aimi­kyiꞌat ikuꞌuro raꞌyn iꞌatuꞌe. Ahetu­pa­naria aria miꞌu wo raꞌyn iꞌatuꞌe. Aikotã aru ahewaire waire hap mesup ahekat sat hamo katu­pono wukꞌe yne raꞌyn mote iꞌatuꞌe toꞌo­kakꞌi kahato."

¹⁰ Pya pyi neꞌi raꞌyn tuwak popuo teꞌe­roꞌe — Yt naku i kahato an pãi iꞌatuꞌe ahetawa koro Papi­runia tuwe­moma wẽtup eꞌat pe turan yn iꞌatuꞌe. Imiꞌa­piheg sese wo tukup­teꞌen iꞌatuꞌe toꞌokakꞌi popuo. Pya pyi teꞌe­ra­haꞌat katu­pono teꞌe­ro­kenꞌẽ kahato aria satꞌe taꞌa­tuetiat hap pupi."

¹¹ Miꞌi hawyi weneru haria teꞌe­roꞌe — Saꞌa­wyꞌi tawa Papi­runia piaria kape wati­we­neru aipiit ahetu­pana koꞌi yi totiaria karaiwa koꞌi kape iꞌatuꞌe. Koitywy hawyi yt aikope kuap i wati­we­neru kuap iꞌatuꞌe toꞌokakꞌi popuo. Aika­ꞌi­waria topap yne raꞌyn iꞌatuꞌe."

¹² Yt kat i poꞌog nu imehit rakat ahekat koꞌi aimi­kyiꞌat wuat aimi­we­neru wuat iꞌatuꞌe. Yt kat i poꞌog nu ikahu rakat koꞌi hekat rakat koꞌi painug hap iꞌatuꞌe. Yt kat i poꞌog wahi hekat rakat koꞌi painug hap iꞌatuꞌe. Yt kat i sokpe kype ikahu rakat poꞌog iꞌatuꞌe. Yt kat i sokpe ipewiu rakat haꞌup woity rakat iꞌatuꞌe. Hekat rakaria esokpe yt kat i ihyrypꞌi rakat ikaꞌay rakat iꞌatuꞌe. Yt kat i morekuat painug hap yt kat i ariaꞌyp aimi­kyiꞌat wuat aimi­we­neru wuat iꞌatuꞌe. Yt kat i poꞌog heiam ikahu rakaria nu ikahu rakat kawiat heiam imehit rakat kawiat ariaꞌyp itig nakat kawiat yt kat i raꞌyn iꞌatuꞌe. Ikag ikytsig kahato rakat kawiat aipainug hap yt kat i poꞌog aimi­we­neru aimi­kyiꞌat wuat iꞌatuꞌe teꞌe­ruwak popuo iꞌatuꞌe."

¹³ Yt kat i aimiꞌu mosẽꞌẽ hap iꞌatuꞌe. Yt kat i aimo­kamhig se hap. Yt kat i aimiwuk wuat aiꞌyat mokamhig se hap iꞌatuꞌe. Mahy yt kat i wy iꞌatuꞌe. Yt kat i aimiꞌu mokap hap iꞌatuꞌe. Yt kat i aheꞌuꞌi iꞌatuꞌe. Yt kat i aheman nug hap iꞌatuꞌe. Yt kat i ipuꞌi aimiꞌu wo iꞌatuꞌe. Yt kat i wewato ahup aimi­we­neru wo aimi­kyiꞌat wo iꞌatuꞌe. Iꞌewyte yt kat i aihũ Kaneiru koꞌi iꞌatuꞌe. Yt kat i aihũ Kawaru ahereto hap iꞌatuꞌe. Aheꞌyara koꞌi yt kat i iꞌatuꞌe. Yt kat i ahemiit wuatꞌi eropat haria yt kat saꞌup i etiaria aimi­we­neru nuat aimi­kyiꞌat wuat iꞌatuꞌe miitꞌin mesu­wa­ro­tiaria teꞌe­ruwak popuo iꞌatuꞌe. Yt naku i ahetawa Papi­runia yhig hun aria saꞌag kawiat miꞌu wo mesup ahetawa akag Papĩ­runia tapy­huꞌat Tupana miwuk iꞌatuꞌe. Miꞌi hawyi aikotã aru iꞌatuꞌe."

¹⁴ Miꞌi hawyi teꞌe­roꞌe toꞌope — Yt naku i yt naku i iꞌatuꞌe. Aheka­reꞌen aipainug kahato hap aimi­ky­ꞌesat kahato koꞌi aimikat koꞌi yt kat i mesup raꞌyn ahetawa wato aria hun tuꞌu yne iꞌatuꞌe. Imehit hap aimo­kahu hap aipainug hap yt kat hamo i rakat Tuwat yne raꞌyn wukꞌe yne raꞌyn iꞌatuꞌe. Watikat pytkai yt kat i wati­puẽti itote mekewat waku hap koꞌi iꞌatuꞌe toꞌope."

¹⁵ Wuatꞌi kyiꞌat haria wuatꞌi weneru haria taꞌa­tuepiok kahato tawa ikuꞌuro rakat hawyi kakꞌi­ꞌa­tuꞌe — Saꞌa­wyꞌi ekat kahato kaipyi uruto­py­huꞌat hekat rakaria wo iꞌatuꞌe. Koitywy yt wateke kuap tawa wato Papi­runia pe katu­pono uruto­kenꞌẽ kahato sio satꞌe mekewat aria aimo­so­ꞌopot hat iꞌatuꞌe toꞌope yt taꞌa­tu­wepit hin popuo i."

¹⁶ Saꞌa­wyꞌi tawa Papi­runia teꞌe­ru­we­painug kahato more­kuaria ewy iꞌatuꞌe. Iꞌatue­sokpe hekat rakaria sese wo ipewiu kahato rakano ihup hawyi ihyrypꞌi iꞌatuꞌe. Iꞌatu­painug hap imehit kahato rakat uru kawiat iꞌatu­puĩꞌã piat koꞌi ti ikahu rakaria ihup ikaꞌay rakaria iꞌatuꞌe. Iꞌewyte iꞌatue­wahi koꞌi ti ikahu rakaria iꞌatuꞌe. Iꞌatu­painug hap ti hekat rakaria sese wo iꞌatu­painug hap iꞌatuꞌe toꞌope."

¹⁷ Koitywy yt uwe i itote tuweityk yne raꞌyn iꞌatuꞌe. Meremo iꞌatue­ka­reꞌen koꞌi yt kat hamo iꞌatuꞌe. Saꞌa­wyꞌi iꞌatu kahato tawa wakuat Papi­runia wã tote tukup­teꞌen yara wato piaria iꞌatuꞌe. Saꞌa­wyꞌi urutioto yne aheka­reꞌen koꞌi aikope aikope mesuwat yi tote iꞌatuꞌe. Mesup yt kat i yara tawa Papi­ruinia wã tote pãi an iꞌatuꞌe."

¹⁸ Karãpe yara wato piaria teꞌe­ra­ꞌa­kasa iwuk hap kapiat yahig hun saꞌag kapiat hawyi teꞌe­roꞌe taꞌa­tuehay pirik wo — Yt naku i raꞌyn katu­pono ahetawa Papi­runia poꞌog ikahu torania kawiat yt kat i raꞌyn mesup iꞌatuꞌe teꞌe­ruwak popuo."

¹⁹ Ahekat iwato kahato tuwat yne iꞌatuꞌe kakta­ꞌa­tuꞌe popuo. Ahetawa wato yahig ewy topy­huꞌat iꞌatuꞌe toꞌo­kakꞌi haype taꞌa­tu­wowo yi taꞌa­tu­ꞌakag note e taꞌa­tueko ewy paaꞌi­ꞌa­tuꞌe hap moherep hamo. Eiwe­haꞌat ro iꞌatuꞌe aimoekat hat tuweityk taꞌyn iꞌatuꞌe. Saꞌa­wyꞌi aheꞌyara taꞌa­tu­puru saꞌup ete aheꞌyara wato iꞌatue­ka­reꞌen ereto hamo aikope aikope haꞌup iwato taꞌatuium iꞌatuꞌe. Maꞌato mesup yt kat kuap i raꞌyn watioto iꞌatuekat wukꞌe yne hawyi iꞌatuꞌe teꞌe­ruwak popuo.

"

²⁰ Miꞌi hawyi uito Iuwãu areꞌe atipy piaria pe — Waku kahato eiwe­mo­wepit ro atipy pe katu­pono Tupana tiwuk taꞌyn tawa saꞌag Papi­runia areꞌe. Eiwehum no itotiaria katu­pono Tupana ehay moherep haria Papi­runia piaria miꞌauka koꞌi yt uwe i aru waku eweiꞌe areꞌe. Iꞌewyte uiwy­riaꞌin 12 ok takaria Iesui potpo­ꞌo­roria eiwe­mo­wepit ro katu­pono mesup Tupana eipoepyk taꞌyn eiꞌauka haria tawa Papi­runia piaria yt uwe i mesup wote areꞌe uimu­ꞌetu.

"

²¹ Miꞌi hawyi surara akag atipy piat hesaika kahato rakat totat nu myp wato ok tã hawyi toipun haty wo atipy kaipyi hawyi taꞌat yꞌy wato sese pe. Miꞌi hawyi minꞌe hawyi toꞌe haty wo — Meiẽ mekewat nu wato ewy topy­huꞌat aru tawa wato Papi­runia ewywuat katu­pono Tupana tipugha tawa Papi­runia aikotã yt heremo hin i uimipun nu wato hap ewy e. Yt uwe i aru ipuẽti kuap mekewat tawa e haty wo."

²² Yt kat i hairu saꞌag Papi­runia pe aru e. Yt kat i wepy hap eweipuẽti aru e. Yt eweipuẽti aru wyti akuara pywiat wepy hat. Yt uwe i huhuꞌe haria itote e uhepe. Yt kat i moryꞌa saity pywiat wepy hap e. Yt kat i getap nug haria e. Yt wẽtup ok i kat koꞌi kat koꞌi nug hat e. Yt kat i tõgtõgꞌe hap e. Yt kat i itote man koꞌi nug hap e atipy piat e."

²³ Yt wẽtup i hẽtyhot hap eweipuẽti e katu­pono yt karãmuo i wẽtup ok ariãty nug hat toĩneꞌen aru tawa Papi­runia pe e. Yt karãmuo i aru eweipuẽti wepit hap itote e. — Atiky­ꞌesat en uheha­ryꞌi wo atiky­ꞌesat en uheꞌaito wo e hap yt kat i raꞌyn e. Yt uwe i ihainiaꞌin wywuat hat yt uwe i hary­po­riaꞌin wywuat hat saꞌa­wyꞌi miꞌi yn itote pytkai e. Karaiwa akag koꞌi yn itote saꞌa­wyꞌi heso rakaria woꞌo­mo­ꞌa­kagꞌaia haria yne mesu­wa­rotiat woꞌo­maꞌat haria yt miit ewy i taꞌa­tu­mo­herep taꞌa­tupo wo miitꞌin ekat kyꞌewi maꞌato mekewat eꞌat pe yt wẽtup i itote e atipy piat uhepe."

²⁴ Tupana eiꞌa­piheg aru tawa Papi­runia piaria e kat pote toipuẽti kahato ehetawa pe temiitꞌin suu tomi­po­ꞌoro koꞌi tehay moherep haria eimi­ꞌauka koꞌi suu okpun hap toipuẽti temiitꞌin koꞌi suu eimi­ꞌauka koꞌi yne pote eiꞌa­piheg sese aru haty wo e atipy piaria hesaika kahato rakat tehay pirik wo.

Miꞌi hap etiat atiwan yne uito miitꞌin mosa­tyꞌi Iuwãu.

"

19

¹ Tawa Papi­runia wukꞌe hawyi atikuap wepy hap iꞌatuehay typyꞌi kahato hap ewy typyꞌi kahato haty wo heremo kahato iꞌatuehay. Mio tã iꞌatuꞌe teꞌe­ru­wepy — Urutu­wehum kahato ewawi Tupana iꞌatuꞌe. En yn Urueha­kye­raꞌat hat iꞌatuꞌe. En yn urumi­mõ­typot iꞌatuꞌe. En yn UrueTupana ereĩneꞌen Wuatꞌi Porekuat no iꞌatuꞌe."

² En yn waku miitꞌin apiheg kuap hat katu­pono En yn etikuap iꞌatu­pyꞌa piat koꞌi kat koꞌi kat koꞌi hap iꞌatuꞌe. Pywo hap upi yn etiꞌa­tu­ꞌa­piheg iꞌatuꞌe. Saꞌa­wyꞌi tawa Papi­runia piaria hary­poria yt iweꞌeg i kahato rakat ewy tukup­teꞌen katu­pono taꞌa­tu­ꞌa­tu­muꞌe kahato yi totiaria yt naku i nug hamo wuatꞌi hary­poria wywo wuatꞌi ihainia wywo iꞌatuꞌe. Miꞌi hawyi emipo­ꞌoro emiitꞌin auka haria tukup­teꞌen miꞌiria maꞌato mesup etiꞌa­tu­moma yne miꞌiria emiitꞌin suu okpun hap upi iꞌatuꞌe. Waku kahato En iꞌatuꞌe."

³ Etiꞌa­tu­ꞌa­tu­poepyk taꞌyn mote urutu­wehum kahato ewowi Tupana iꞌatuꞌe. Miꞌi hawyi mekewat tawa Papi­runia wuk hap yt karãpe i aru hoꞌosep iꞌatuꞌe. Ywyhig hun yn naꞌyn taꞌam itote pyi at kaꞌap wuatꞌi eꞌat pe iꞌatuꞌe. Waku kahato En Tupana iꞌatuehay atipy piaria sem wepy hawe.

"

⁴ Miꞌi hawyi mekewat saꞌa­wy­ꞌi­wuaria 24 ok takaria teꞌe­ru­we­pỹ­ꞌã­tutuk Tupana ewawi imõtypot hamo. Iꞌewyte 4 ok takaria wuatꞌi eꞌat piaria teꞌe­ru­we­pỹ­ꞌã­tutuk howawi pywo kahato ti rat iꞌatuꞌe hap ewy. Iꞌewyte urutu­wehum ewawi UrueTupana iꞌatuꞌe."

⁵ Miꞌi hawyi uito Iuwãu atikuap sehay aikope Tupana taꞌapyk Morekuat no hap kaipyi mio tã e — Mehĩꞌin manaꞌin e toꞌiro watu­wehum ahehay wo Tupana kape e. Toꞌiro Tupana eropat haria wati­mõ­typot Tupana ahehay wo e. Torania aito sio aito more­kuaria sio aito semiit toꞌiro watu­wehum kahato Tupana kape ahehay wo e sehay aikope Tupana taꞌapyk kaipyi.

"

⁶ Miꞌi hawyi uito Iuwãu atikuap wẽtup i wepy hap typyꞌi kahato rakaria. Teꞌe­ru­wepy kahato aikotã ywytu uato sese puehay ewy — Urutu­wehum ewowi Tupana urutu­wehum ewowi Tupana urutu­wehum ewowi Tupana mio tã urutoꞌe katu­pono etunug Esaỹry raꞌyn Wuatꞌi Porekuat no urumi­ky­ꞌesat ewy iꞌatuꞌe teꞌe­ru­wepy puo."

⁷ — Toꞌiro watu­we­mo­wepit iꞌatuꞌe toꞌope. Toꞌiro watu­wehum Tupana kape ahehay wo iꞌatuꞌe toꞌope. Toꞌiro waku kahato En katu­pono mesup etum esaꞌyru pe heha­ryꞌi ikahu kahato rakat iꞌatuꞌe. Waku pe tuwe­painug me ikahu kahato pe iharyꞌi toineꞌen iꞌatuꞌe."

⁸ Heꞌaito Tupana Saꞌyru ikahu rakat no toineꞌen tesokpe pe ikytsig rakano esokpe ikahu kahato pĩꞌã iꞌatuꞌe. Ikytsig imehit kahato aikotã Tupana emiitꞌin imimo­kytsig ewy esokpe ikahu hap ewy iꞌatuꞌe.

"

⁹ Miꞌi hawyi atipy piat toꞌe uhepe — Iuwãu e etiwan no kat som areꞌe epe hap koꞌi e katu­pono Tupana e hap ahenoi epe — Waku raꞌyn Uhaꞌyru eharyꞌi hap eꞌat e. Mesup atunug ienuk hap imõtypot hamo e. Uhaꞌyru eharyꞌi hap mõtypot hap ienuk hap kape woro­ho­ꞌo­kaykay wen maꞌato yt ehewaku hap kaipyi i woro­ho­ꞌo­kaykay eipe e. Woro­ho­ꞌo­kaykay Uhaꞌyru eharyꞌi hap mõtypot hap ienuk hap kape woro­ho­ꞌo­kyꞌe kahato pote e. Woro­ho­ꞌo­ꞌairo uimi­poi­tyro koꞌi uhegyiꞌat pote e Tupana e.

"

¹⁰ Miꞌi hawyi wẽtup ok toꞌe atipy piat uhepe Iuwãu e Tupana sese ihay teran ewywo e. Miꞌi hawyi arepỹ­ꞌã­tutuk mekewat atipy piat Tupana ehay moherep hat kape hawyi atimõ­typot kahato miꞌi wen maꞌato — Iuwãu e yt uimõ­typot teiꞌo katu­pono uito eꞌewywuat Tupana eropat hat yn e. Yne ewyriaꞌin Iesui mohey haria ewywuat arepy­huꞌat Tupana eropat hat e. Uito ti yt poꞌog i ekai e. Waku Tupana yn wati­mõ­typot katu­pono saꞌa­wy­ꞌi­wuaria Tupana ehay moherep haria Iesui etiat taꞌa­tu­henoi taꞌa­tuwẽ pyi yianmete taꞌa­tu­henoi Iesui minug koꞌi e miꞌiria ewy areĩne­ꞌen e atipy piat uhepe.

"

¹¹ Miꞌi hawyi uito Iuwãu arahaꞌat atipy kape turan heremo ipuo wuatꞌi araꞌa­kasa yne itote hawyi itote araꞌa­kasa waku kahato rakat. Miꞌi ti taꞌapyk tohũ kawaru ikytsig kahato rakat rote. Mekewat waku rakat Yt Aimaꞌat Kuap I hap het rakat Miꞌi. Wẽtup iwat het Aimi­mohey kahato rakat. Iꞌewyte Pywo Sese rakat wẽtup iwat het. Toikuap kahato uwe waku uwe yt hap koꞌi e. Yt naku i nug haria wywo wuꞌuka hamo toto raꞌyn e."

¹² Miꞌi hawyi mekewat Waku Sese Rakat tehaꞌat kahato aikotã hẽtyhot pya hap. Iꞌakag ete iꞌatu kahato ipainug hap amãtap More­kuaria Akag Sese ewy. Het toĩneꞌen miwan me maꞌato yt uwe i ikuap tuwewi yn toset toikuap e."

¹³ Miꞌi ti araꞌa­kasa huu ewy kahato yne hesokpe ete. Maꞌato het aipusu puo Tupana Ehay Yne e hap."

¹⁴ Miꞌi hawyi mekewat toto atipy kaipyi yi kape tohũ kawaru kytsig nakat ok tote. Iꞌewyte hesu­ra­raꞌin tuwat hupi taꞌa­tu­hũria kytsig nakaria okpe tote. Iꞌatue­sokpe ikytsig sese hawuo tuwat hupi."

¹⁵ Topy­ꞌahak wywo toto tesu­ra­raꞌin wywo wuatꞌi ywania tewa­nĩ­kaptia akit hamo. Ihay kyseꞌyp hãihyk takat ewywuat wywo toto ipo pe. Heka­raꞌyp ihũria atusiu hap maꞌato iheg kahato rakat nu ewywuat wanĩ­kaptia mope­rupꞌi hamo. Miꞌi hawyi teꞌe­ro­kenꞌẽ ipo piat heka­raꞌyp pupi. Miꞌi hawyi taꞌa­tunug iꞌe hap ewy. Miꞌi hawyi tewa­nĩ­kaptia toiꞌa­tu­ꞌakit yne. Toiꞌa­tu­ꞌakit miꞌiria topy­ꞌahak hap wywo Tupana saiwot hap wywo poꞌog haiwot torania kai. Toiꞌa­tu­ꞌakit akit tewa­nĩ­kaptia aikotã watihep kana hy hap ewy."

¹⁶ Miꞌi hawyi araꞌa­kasa iꞌok poꞌi hap hesokpe ete. Het Wuatꞌi Porekuat Porekuat e. Wuatꞌi Kaꞌiwat Kaꞌiwat e miwan ok poꞌi hap ete hesokpe ete. Uito Iuwãu araꞌa­kasa yne uimu­ꞌetu.

"

¹⁷ Miꞌi hawyi uito Iuwãu arahaꞌat at kape hawyi araꞌa­kasa atipy piat yꞌam me. Miꞌi hawyi tuwẽ­powat haty wo itote pyi — Uruwu koꞌi hywi koꞌi weita koꞌi e eweikuap eimiꞌu raꞌyn koitywy e. Tupana tunug naꞌyn miꞌu eiwanuat e. Eiwe­ꞌa­tunug no meikowo eipopy puo aikope aikope pyi ewehenuk hamo Tupana piat eipoi hap kape e."

¹⁸ Meiẽ iꞌatu kahato more­kuaria piit eimiꞌu wo e. Ewetuꞌu ro more­kuaria puꞌi e. Ewetuꞌu ro surara akag koꞌi puꞌi surara hesaika kahato rakaria puꞌi ewetuꞌu ro e. Iꞌatu sura­raꞌin hũria Kawaru koꞌi puꞌi eimiꞌu wo raꞌyn e. Eiwe­ꞌa­tunug no weitaria uruwu koꞌi hiwu koꞌi katu­pono eimiꞌu raꞌyn e. Ipuꞌi yn mesuwe karai­waria puꞌi e. Iꞌatuemiit puꞌi hekat rakaria puꞌi iꞌewyte miit emiit puꞌi miitꞌin mikuap koꞌi puꞌi iꞌewyte yt miitꞌin mikuap i koꞌi puꞌi e. Waku eiwe­popy meikowo katu­pono mũki­ꞌite ehenuk hap eꞌat raꞌyn e atipy piat tehay pirik atipy kaipyi."

¹⁹ Miꞌi hawyi Uito Iuwãu arahaꞌat hawyi araꞌa­kasa mekewat yt naku i rakat — Uito Tupana e hat heso rakat torania tesu­ra­raꞌin wywo taꞌa­tu­ꞌakag koꞌi wywo. Tuwat tuwat tuꞌuka hamo Morekuat Porekuat apyk piat ieĩneꞌen tohũ kytsig totiat kape. Mekewat atipy kaipy­wiaria ete iꞌewyte yne Iesui mohey haria hesu­ra­raꞌin ete tuꞌuka hamo."

²⁰ Miꞌi hawyi tuꞌuka kahato itote. Maꞌato Iesui tiꞌa­tu­ꞌakit kahato neꞌi — Uito Tupana e hat heso rakat yt naku i nug hat. Iꞌewyte taꞌa­tu­ꞌakit mekewat heso rakat — Uito Tupana ehay moherep kahato hat e woꞌo­ma­ꞌatꞌi maꞌatꞌi hat neꞌi mekewat yt naku i nug hat set howa­tuꞌa etiat rakaria woꞌo­ma­ꞌatꞌi maꞌatꞌi hat. Toiꞌakit neꞌi mekewat — Eweimõ­typot ro Tupana iãꞌãkap e hat. Miꞌi haria Waku Rakat esura­raꞌin koꞌi tiꞌa­tu­ꞌakit yne. Miꞌi hawyi Wuatꞌi Porekuat Porekuat topytyk taꞌyn mekewat awyato tig saꞌag iꞌewyte mekewat — Uito Tupana ehay moherep hat woꞌo­ma­ꞌatꞌi hat hawyi toiꞌa­tu­pugha miꞌiria mekewat ihyemyiꞌa wato aria sapuẽ sapyhot pe ytyghe wuk hap puo rakat pe. Toipytyk taꞌyn wen maꞌato yt toiꞌa­tu­ꞌauka hin i maꞌato taꞌa­tu­puhu hap wywo toiꞌa­tu­pugha aria pe wuatꞌi eꞌat piat pe. Miꞌi hap ewy araꞌa­kasa."

²¹ Miꞌi hawyi mekewat Waku Rakat kawaru okpe totiat rakat Aipo­typot Iesui timoma yne iꞌatue­su­ra­raꞌin tehay wo. Miꞌi rẽ toꞌe — Weitaria Uruwuria eimiꞌu raꞌyn e. Miꞌi hawyi toiꞌa­tunug yne mesu­wa­rotiat hawyi weitaria iꞌatuꞌok wuatꞌi Tupana wanĩ­kaptia puꞌi wo.

Uito Iuwãu miꞌi hap kape araꞌa­kasa yne uimu­ꞌetu.

"

20

¹ Miꞌi hawyi uito Iuwãu arahaꞌat hawyi araꞌa­kasa wẽtup ok atipy kaipywiat sut hat. Topo pe toterut haity korente iheg sese rakat iꞌanam kahato rakat. Miꞌi hawyi toto atipy kaipyi yi kaꞌa kape yt ikaꞌa sasat rakat i kape. Ipo pe hesaika hap yi kaꞌa sese ewãhyp hamuat."

² Miꞌi hawyi atipy piat tat haty wo mekewat moiꞌok ipoꞌi poꞌi hamo ipyhyp motꞌi sese hamo. Miꞌi hawyi toipyhyp taꞌyn mekewat wẽtup het ahiag wẽtup het satanai — Woro­pyhyp en wẽtup 1000 anu e atipy kaipywiat sut hat ahiag me."

³ Miꞌi hawyi moiꞌok toiꞌok­hytpun yi kaꞌa saꞌag yt ikaꞌa sasat rakat i pe hawyi tohe­wãhyp yi kaꞌa hawyi tutunug imoheg hap itote. Miꞌi hawyi ahiag yt tomaꞌat kuap i mesu­wa­ro­tiaria miitꞌin wẽtup 1000 anu itote toĩneꞌen. Yt tohãꞌãg kuap i wuatꞌi ywania topyhyp wiat pote turan. Miꞌi hawyi atipy piat sut hat toꞌe uhepe — Wẽtup 1000 anu tokosap hawyi aru atipo­re­nõꞌẽ ikaꞌa pyi ahiag e. Miꞌi hap kape araꞌa­kasa uimu­ꞌetu."

⁴ Miꞌi hawyi uito Iuwãu arahaꞌat more­kuaria typyꞌi kahato Tupana mipo­ꞌoro aipo­typot nuat koꞌi. Miꞌiria teꞌe­ra­ꞌapyk aipo­re­kuaria wo Iesui wywo yne miitꞌin mesu­wa­rotiat karai­waria wo. Saꞌa­wyꞌi miꞌiria timo­herep kahato taꞌa­tuehay wo Iesui etiat miitꞌin me. Miꞌiria yt imõtypot hin i mekewat saꞌag nug hat — Uito Tupana e hat heso rakat. Yt taꞌa­tu­mõ­typot i — Uito Tupana e hat minug iãꞌãkap koꞌi. Yt taꞌa­tunug i mekewat ihay saꞌag nakat — Yt ewetunug i uhet ehowa­tuꞌa ete eipo ete pote woro­ꞌauka e rakat. Maꞌato mio tã e pytkai — Yt iꞌatuꞌe yt urutunug i iꞌe hap ewy iꞌatuꞌe tipyt taꞌa­tu­ꞌauka miꞌiria saꞌa­wyꞌi. Maꞌato miꞌiria tukup­teꞌen i raꞌyn more­kuaria wo uwe waku uwe yt hap enoi hamuat. Tupana Mipo­ꞌoro Aipo­rekuat nuat emiitꞌin wuatꞌi ywania more­karia wo. Miꞌiria ti Aika­ꞌiwat Iesui mimoieĩ­neꞌen koꞌi torania tomohey haria eꞌyian notiaria koꞌi. Miꞌi hawyi ahiag toĩneꞌen 1000 anu kaꞌap pe turan miꞌiria tukup­teꞌen more­kuaria wo wuatꞌi ywania pyꞌa­setpe."

⁵ Miꞌi turan iraniaꞌin Iesui mohey haria yt tuwe­nõꞌẽ i te guꞌuro pyi. Maꞌato wẽtup 1000 at pot tokosap hawyi tuwe­nõꞌẽ guꞌuro pyi. Miꞌiria yn yianmete teꞌe­re­hymut katu­pono Iesui tiꞌa­tu­ka­wiano miꞌiria saꞌa­wyꞌi katu­pono yt Tupana mohey i haria miꞌauka koꞌi wo tukup­teꞌen saꞌa­wyꞌi pote."

⁶ Waku puo kahato tukup­teꞌen miꞌiria katu­pono Tupana mimõ­typot sese koꞌi miꞌiria. Miꞌi pote toiꞌa­tu­moieĩ­neꞌen miꞌiria iraniaꞌin eꞌyianmete. Maꞌato meiũran iꞌewyte taꞌa­tu­ꞌauka haria yt naku i nug haria Tupana tiꞌa­tu­moieĩ­neꞌen ne hamuat hawyi toiꞌa­tu­po­ꞌoro wẽtup iꞌatueiam kape iꞌatu­mo­so­ꞌopot hamuat kape iꞌatu­ku­ꞌuro typuot i hap kape. Maꞌato iꞌatu­mi­ꞌauka koꞌi Iesui kawiano koꞌi yt karãpe i topap typuo i iraniaꞌin ewy. Yt karãpe i taꞌa­tu­so­ꞌopot miꞌiria tukup­teꞌen more­kuaria wo Aika­ꞌiwat wywo wuatꞌi eꞌat pe. Miitꞌin ehay moherep Tupana kapiat hanuaria wo tukup­teꞌen. Wẽtup 1000 anu turan more­kuaria wo tukup­teꞌen yi tote. Tupana mõtypot haria sese miꞌiria.

"

⁷ Wẽtup 1000 anu tokosap hawyi mekewat atipy piat taꞌaipok taꞌyn yi kaꞌa okenhypꞌok hamo hawyi toipok korente ahiag ete pyi hawyi tohe­wy­hypꞌok taꞌyn hawyi toꞌe — Toran naꞌyn epyhyp hap e ahiag me."

⁸ Miꞌi hawyi ahiag toto itote pyi aikope aikope wuatꞌi ywania moꞌa­kagꞌaia hamo. Hewyry kahato mesu­wa­rotiat wuatꞌi ywania pe toꞌe hamo — Toꞌiro uhupi tawa Ieru­sarẽi moma hamo e wuatꞌi ywania pe yi Koki piaria yi Makoki piaria pe. — Toꞌiro Tupana mohey haria moma hamo e. Miꞌi hawyi imimaꞌat koꞌi tuwat kahato hupi. Iꞌatu kahato tuwat iꞌatue­su­ra­raꞌin aikotã yi kyt yt wati­mo­rania kuap i hap ewy tuwat ahiag upi tuꞌuka hamo Tupana emiitꞌin moma teran hamo."

⁹ Miꞌi hawyi ahiag topy­huꞌat iꞌatue­su­ra­raꞌin akag wo hawyi toiꞌa­tu­po­ꞌoro tesu­raraꞌin Tupana etawa Ieru­sarẽi apypueri hamo. Iuteuria yi wato hap ok tã sura­raꞌin yn teꞌe­ro­py­huꞌat itote. Miꞌi hawyi tõꞌẽ tõꞌẽ wanĩ­kaptia ahiag esura­raꞌin Tupana Mikyꞌe Sese kahato etawa moma hamo. Miꞌi ti wanĩ­kaptia tiꞌa­py­pueri taꞌa­tu­ꞌa­pyhik saꞌag maꞌato miꞌi turan Tupana tipo­ꞌoro atipy kaipywiat aria meke­waria tewa­nĩ­kaptia wuk hamo. Miꞌi hawyi aria tuꞌu yne miꞌiria."

¹⁰ Miꞌi hawyi mekewat woꞌo­maꞌat hat Tupana topytyk hawyi toipun aria emyiꞌa wato pe. Saꞌa­wyꞌi mekewat moiꞌok toipun mekewat aria pe iꞌewyte mekewat yt naku i rakat — Uito Tupana e hat heso rakat toipun tope te. Miꞌiria wywo ahiag hoꞌopot sese at kaꞌap wuatꞌi eꞌat pe. Miꞌi tã hap ti atikuap uimu­ꞌetu aikotã aikotã topy­huꞌat irane hap.

"

¹¹ Miꞌi hawyi Uito Iuwãu arahaꞌat mekewat Morekuat Porekuat Akag apyk hap kape. Araꞌa­kasa hawyi — Ikahu kahato heꞌamyap are. Ikytsig kahato are. Miꞌi hawyi arahaꞌat howa kape. Ikahu kahato rasig pãi are. Poꞌog ikahu at waikiru waty koꞌi kai iꞌewyte mytyp koꞌi kai poꞌog ikahu areꞌe. Miꞌi hawyi at waikiru waty koꞌi mytyp koꞌi teꞌe­ru­we­mõti kahato hawyi teꞌe­ru­wemig ipupi hap ewy poꞌog ikahu iꞌatukai pote poꞌog hẽtyhot poꞌog imehit iꞌatukai. Miꞌi rokirẽ poꞌog arahaꞌat waikiru waty at mytyp kape. Maꞌato miꞌi turan yt araꞌa­kasa hin i raꞌyn iꞌatue­wawi yt taꞌatueiam note hin i raꞌyn apo pãi pote areꞌe.

"

¹² Miꞌi hawyi Tupana toꞌe ikuꞌuro rakaria pe — Eiwe­nõꞌẽ ro eweikup­teꞌen i ro yne eipe e. Miitꞌin mikuap koꞌi iꞌewyte yt miitꞌin mikuap koꞌi i eweikup­teꞌen i ro e. Eweĩꞌẽ ro uhowawi e Tupana saꞌa­wy­ꞌi­wuaria ikuꞌuro rakaria pe. Miꞌi hawyi teꞌe­ru­we­ꞌa­tunug heꞌamyap kape. Miꞌi hawyi miwan koꞌi ahyt araꞌa­kasa itote. Miꞌi miwan myi Tupana timo­herep aikotã aikotã tehamuat iꞌatu­minug koꞌi toiꞌa­pypok miwan ahyt hawyi taꞌa­tuieĩ­neꞌen mytyp tote te turanuat aikotã itotiat re turan taꞌa­tunug waku sio yt hap toimo­herep. Sio miꞌiria hap Tupana miꞌa­piheg wo teꞌe­ro­py­huꞌat sio yt. Iꞌewyte toĩneꞌen wẽtup miwan itote yt iraniaꞌin ewy hin i. Miꞌi ti toiꞌa­pypok hawyi Tupana mimoieĩ­neꞌen sese koꞌi toimo­herep wuatꞌi eꞌat piat ieĩneꞌen haria."

¹³ Miꞌi hawyi uito Iuwãu arahaꞌat yꞌy wato kape. Miꞌi turan yꞌy piat ikuꞌuro rakaria tuwe­nõꞌẽ yꞌy wato pyi Tupana e hap ewy. Iꞌewyte woꞌosyp hap kaipyi tuwe­nõꞌẽ kahato. Aikope aikope miitꞌin ikuꞌuro hap kaipyi tuwe­nõꞌẽ hawyi Tupana kape teꞌe­ru­we­ꞌa­tunug hawyi wẽtup ok wẽtup ok pe — Waku en kat pote yi tote waku etunug ereĩneꞌen hap turan e. Maꞌato wẽtup ok pe — En ni yt naku i etunug ereĩneꞌen hap hap turan e Tupana map haria pe."

¹⁴ Miꞌi hawyi Tupana tehaꞌat mekewat wẽtup miwan kape hawyi toꞌe i — Uwe uwe wat toĩneꞌen mesuwe het miwan me miꞌi hat yt toto hin i aria wato ẽty pyꞌaset kape e maꞌato yt kat i het mesuwe miwan me pote miꞌi hat toto meremo e. Maꞌato Tupana yt tipuẽti i miwan me het koꞌi rakaria Tupana tipugha aria emyiꞌa wato kape. Yt toipuẽti i tomie­ha­kye­raꞌat nuat set miwan me pote. Miꞌiria yt tomohey i haria raꞌyn."

¹⁵ Miꞌi hawyi Tupana tat guꞌuro hap miitꞌin auka hap iꞌahu hap iꞌewyte hoꞌopot hap iꞌewyte satek hap hawyi toiꞌa­tu­pugha yne miꞌi saꞌag koꞌi aria pe. Miꞌi hawyi toꞌe tomipun koꞌi pe — Koitywy eiku­ꞌuro typuot i hap putꞌokꞌe raꞌyn e. Eweho­ꞌopot ro wuatꞌi eꞌat pe e. Miꞌi hap koꞌi kape araꞌa­kasa uimu­ꞌetu.

Uito Iuwãu miꞌi tã hamuat hap ti araꞌa­kasa uimu­ꞌetu aikotã aikotã topy­huꞌat irane hamaut hap ewy. Yt uheso i katu­pono uheha wo araꞌa­kasa uiꞌe hap.

"

21

¹ Miꞌi hawyi uito Iuwãu arahaꞌat i raꞌyn hawyi araꞌa­kasa yi waikiru waty koꞌi ipakup koꞌi sese raꞌyn. Koran nuat saipepiat koꞌi ipakup takaria Tupana minug koꞌi. Miꞌi hawyi koran nuat yt kat hamo i raꞌyn. Ikahu kahato yi pakup waikiru koꞌi pakup waty pakup at pakup wote teꞌe­ru­we­mõti kahato neꞌi raꞌyn yianmiat at waikiru waty mytyp."

² Miꞌi hawyi arahaꞌat ywaipe turan araꞌakasa tawa Ierusarẽi ipakup taꞌapyk turan wakuat kahato Tupana ewywuat wakuat. Iꞌewyte ikahu sese rakat aikotã hary­poria ikahu sese rakat ewy. Are pãi ikahu kahato aikotã hary­poria tuwe­painug toꞌo­kyiꞌat hap eꞌat pe hap ewy are saĩke iro pote. Miꞌi hawyi atikuap miꞌi tawa Tupana etawa Ieru­sarẽi ipakup e hap het rakat areꞌe."

³ Miꞌi hawyi wẽtup ok tuwẽ­powat atipy kaipywiat Tupana ieĩneꞌen hap kaipyi miitꞌin pyꞌa­setpiat raꞌyn ieĩneꞌen hat. Waku pe i raꞌyn toĩneꞌen mesup yi tote e. Miitꞌin topy­huꞌat Tupana ywania wo i raꞌyn e. Wuatꞌi miitꞌin topy­huꞌat hemiitꞌin no e. — AheTupana sese En iꞌatuꞌe i raꞌyn koitywo tope e. — Eipe uimẽ­pytꞌin e Tupana iꞌatuepe e."

⁴ Miꞌi hawyi yt eweiwak poꞌog neiꞌo e. Koitywy ti aru yt karãpe i teꞌe­ruwak poꞌog e. Yt kat i iꞌatu­ꞌarot hap e. Yt kat i poꞌog haty hap itote e iꞌatue­hãite sese itote katu­pono yt kat i saꞌa­wy­ꞌiwuat ewy e. Ipakup we tukup­teꞌen mesup e."

⁵ Miꞌi hawyi toꞌe Aipo­typot Iesui uhepe atipy kaipyi Morekuat eiam kaipyi — Koitywy atomo­pakup i yne uiminug saꞌa­wyꞌi wuat wuatꞌi e. Yne aru topy­huꞌat uimienoi uiꞌe hap ewy e. Etiwan no uiꞌe hap ewy Iuwãu e uhepe."

⁶ Koitywy atunug i raꞌyn waku pe yne i raꞌyn uiꞌe hap ewy e. Waku pe i raꞌyn uimi­ky­ꞌesat ewy atunug e. Pyno haꞌa­wynug saꞌa­wyꞌi hat Uito iꞌewyte yne saipepiat nug hat Uito e. Yne wyro hat Uito e. Waku pe yne atunug uimi­ky­ꞌesat ewy e Iesui uhepe. Uwe uwe tikuap sese teran Tupana miꞌi hat pe atimo­herep Tupana yt kat saꞌup i uhegyiꞌat hap ok tã e. Atum tope Uiꞌywot kuap hap e. Aikotã etipuẽti yꞌy hitꞌi ihy kahu rakat ereꞌy­ꞌutui kahato turan hawyi ereꞌyꞌu yt kat saꞌup ete i hap ewy atum Tupana kuap hap wuatꞌi eꞌat piat eimoieĩ­neꞌen hamuat e. Atunug uiꞌe hap ewy e."

⁷ Uwe uwe ahiag miat toiãꞌãg hap yt naku i nug hamuat akit hat miꞌi hat pe atum yne Tupana wat e. Miꞌi hat pe areꞌe — Uhaꞌyru sese en uhakiꞌyt sese en areꞌe. Miꞌi hawyi uiwesat miꞌi hat — En ni Uiꞌywot sese iꞌatuꞌe e."

⁸ Maꞌato iraniaꞌin teꞌe­ro­kenꞌẽ uimohey hap moherep hamo e. Miꞌi pote miꞌiria aru tukup­teꞌen wuatꞌi eꞌat pe mekewat aria emyiꞌa wato pe ytyghe wuk hap ewywuat pe e. Iꞌewyte woꞌo­pot­ꞌauka haria paini koꞌi iꞌewyte hewaire hewaire rakaria iꞌewyte wuat minug Tupana mõtypot haria iꞌewyte woꞌo­ma­ꞌatꞌi maꞌatꞌi haria iꞌewyte yt uimohey i haria iꞌewyte yt naku i nug haria miꞌiria typuot i map hanuaria hoꞌopot wuatꞌi eꞌat pe aria ẽty emyiꞌa ewywuat pe e uhepe Aipo­typot Iesui atipy kaipywiat morekuat eiam note pyi.

"

⁹ Miꞌi hawyi uito Iuwãu arahaꞌat hawyi araꞌa­kasa wẽtup ok mekewat saꞌa­wy­ꞌi­wuaria 7 ok takaria yianmiat kamũti howapy rakat erut hat tut uhowawi. Miꞌi hawyi ihay uiwywo — Mehĩ e toꞌiro uhupi e. Atimo­herep teran epe uwe topy­huꞌat Tupana Saꞌyru eharyꞌi e hap e. Uwe ikuꞌuro aikotã aihũ ikuꞌuro saꞌa­wyꞌi aika­wiano hap ewy e. Miꞌi wat ikahu rakat iharyꞌi teran e. — Toꞌiro e."

¹⁰ Miꞌi hawyi uhereto uimu­ꞌetu itote hawyi Tupana Pãꞌãu timo­herep yne uhepe. Miꞌi hawyi toꞌe uhepe — Eraꞌapyk to meiũpe yityꞌok ywaiti sese rakat rote e. Erahaꞌat ro e hawyi arahaꞌat hawyi araꞌa­kasa Tupana etawa sese iwato kahato iminug ikahu kahato Tupana ewy. Hãpyk kahato Tupana eꞌokipy. Miꞌi taꞌapyk yi kape tawa Ieru­sarẽi e hap het rakat."

¹¹ Are pãi hẽtyhot kahato mekewat Tupana etawa areꞌe. Tuwe­kaipyi hẽtyhot hap toĩneꞌen ikahu tonug hat ewy ikahu hap areꞌe. Taꞌi nu ikahu rakat ewy imehit ihup ihyrypꞌi ikaꞌay. Mekewat nu haꞌup woity rakat koꞌi ewy areꞌe. Mekewat nu IASIPI ewy ikahu kahato mekewat tawa areꞌe. Nu yt ipitpit hin i rakat ewy aikotã nu TIAMANTE ewy areꞌe."

¹² Miꞌi hawyi araꞌa­kasa 12 okenꞌypy mekewat tawa wato ete — Waku eiwe­hytꞌok e hap mekewat tawa ete. Miꞌi puo yn waku wateke mekewat tawa pe. Katu­pono tawa pyhyp hap ywaiti rakat toĩneꞌen mekewat tawa Ieru­sarẽi mipueri wo. Atipy piat surara toĩneꞌen yne okenꞌypy rania tukup­teꞌen 12 okenꞌypy ete. 12 set toĩneꞌen okenꞌypy rania. Wẽtup set toĩneꞌen yne okenꞌypy ete ikuap hamuat. Ahaꞌa­seꞌi Iako saꞌy­ruꞌin 12 ok takaria Iuteuria koꞌi set 12 ywania set toĩneꞌen itote yne okenꞌypy kuap hamo."

¹³ Mekewat tawa okipy owa ete okenꞌypy koꞌi ete kokai myeꞌym okenꞌypy hawyi kokai okenꞌypy myeꞌym okenꞌypy kokai myeꞌym okenꞌypy kokai myeꞌym okenꞌypy tuereto auriwo. Myeꞌym okenꞌypy at minꞌe hap kai myeꞌym okenꞌypy at wẽtem hap kai myeꞌym okenꞌypy at posak kai koka­wiano myeꞌym okenꞌypy iꞌewyte koka­wiano at posak kawiano myeꞌym okenꞌypy."

¹⁴ Miꞌi hawyi arahaꞌat tawa kape hawyi areꞌe — Pywo ti rat arewa­nẽtup yt karãpe i iꞌapo­rokꞌe okenꞌypy koꞌi mekewat okenꞌypy koꞌi ny kawiat imehit kahat hap ewy aikotã wahi iꞌa rakat ikahu rakat nu koꞌi yn heꞌo­kipy wo. Iwato kahato rakaria 12 okenꞌypy toĩneꞌen itote areꞌe. Ikahu kahato meimẽwat nu koꞌi toꞌo­tote tote yityꞌok ewy. Toĩneꞌen yne wyti itote uruset koꞌi Tupana hũ Iesui potmueria 12 ok takaria set koꞌi tukup­teꞌen yne tawa 12 okipy ete hap araꞌakasa. Iꞌewyte uhet Iuwãu itote araꞌakasa wy areꞌe."

¹⁵ Miꞌi hawyi mekewat atipy piat toꞌe i uhepe — Mesup atikuap teran karan iwato karan iꞌywop hap Tupana etawa Ieru­sarẽi pakup e. Toĩneꞌen ipo pe hãꞌãg hap ikahu kahato rakat imehit rakat Tupana etawa iãꞌãg hamuat typy miit ywaiti hap ewy iãꞌãg hap. Miꞌi hawyi okenꞌypy koꞌi iꞌewyte tohãꞌãg koran iwato koran iꞌywop hap ewy. Iꞌewyte nu pype iꞌãpeꞌok takat tohãꞌãg atipy piat tawa pyhyp hap."

¹⁶ Tohãꞌãg hawyi iwato kahato e uhepe iꞌywop hap iwato hap ywaiti hap toꞌo­ku­pitu kupitu Tupana etawa 12.000.000 aiko wato hap ok tã hap ewy e uhepe."

¹⁷ Iꞌanam kahato mekewat tawa pyhyp hap wẽtup go iꞌanam hap ewy e. Pywo ti rat yt uheso i iwato hap ete. Uipo piat hãꞌãg hap hãpyk kahato rakat. Yi totiat iãꞌãg hap toꞌo­ꞌe­wy­ꞌewy e."

¹⁸ Ikahu kahato Tupana tunug tetawa. Poꞌog yi kape tawa Ieru­sarẽi pakup heꞌokipy suwy ipyhyp hap nu ãpeꞌok wẽtup nu kawiat ikahu kahato rakat ihyrypꞌi nu IASIPI e hap het rakat ikahu kahato imehit kahato nu Uru ewy. Heremo kahato ipuo."

¹⁹ Miꞌi rẽ arahaꞌat hawyi atikuap Tupana etawa pytyp 12 wuat toꞌo­tote tote ikahu kahato. Miꞌi tote typy nu wo tawa pakup heꞌokipy suwy nu haꞌup woity rakat ihyrypꞌi atipy ewy nu SAWIRA e hap nu kawiat. Myeꞌym nu wo tawa Ieru­sarẽi pakup hakipy suwy haꞌup woity rakat kawiat wo ihyrypꞌi imehit hap aikotã pykasu atig eꞌaiꞌa etiat ewy itig hap ewy nu KAUSETUNIA kawiat haꞌup woity rakat. Miꞌi hawyi 4 nu wuat Tupana etawa eꞌokipy suwy hap toĩneꞌen nu haꞌup woity sese rakat ihyrypꞌi gaꞌapy ewy mekewat nu EMERAUTA e hap nu kawiat wo."

²⁰ Miꞌi hawyi 5 wuat Tupana etawa pytyp miꞌi ti haꞌup woity rakat sese ihup kahato rakat nu SATUNIU e hap het rakat. Miꞌi hawyi 6 wuat nu tawa pytyp ihup kahato suu ewy nu SATIU e hap het rakat haꞌup woity rakat. Miꞌi hawyi 7 wuat nu tawa pytyp wẽtup ikaꞌay kahato ikahu kahato rakat haꞌup woity rakat nu KISORITU e hap het rakat. Miꞌi hawyi mekewat 8 wuat nu tawa pytyp ihyrypꞌi hawyi itig ikytsig kahato rakat no nu PERIRU e hap het rakat. Miꞌi hawyi 9 wuat nu tawa pytyp wẽtup nukara imehit ikaꞌay rakat hap ewy nu TUPASIU e hap het rakat. Miꞌi hawyi 10 wuat nu tawa pytyp ihyrypꞌi pakuꞌa yhap imehit hap nu tawa pytyp nu KISOPASU hap het rakat. Miꞌi hawyi 11 wuat nu tawa pytyp haꞌup woity rakat ihyrypꞌi kyre rakat nu IASINTU e hap het rakat. Miꞌi hawyi 12 wuat nu tawa okipy toran hap heꞌo­kipy ikahu sese rakat ihyrypꞌi kyre heremo kahato ipuo nu AMETITA e hap het rakat."

²¹ Pyno 12 Tupana eꞌoken­ꞌypy koꞌi ete ikahu kahato rakaria aikotã wahi ikahu rakat ewy. Wẽtup a yne okenꞌypy ete aikotã wahi ikytsig kahato rakat iꞌa nu PERURA e hap het rakat imehit kahato rakat."

²² Miꞌi hawyi uito Iuwãu arahaꞌat tawa Ieru­sarẽi Pakup kape hawyi atikat mekewat aikotã saꞌa­wyꞌi tawa Ieru­sarẽi potꞌi pe toĩneꞌen Tupana mõtypot yat iwatoꞌin kahato rakat hap ewy. Arewa­nẽtup toĩneꞌen Tupana mõtypot yat aikotã tawa Ieru­sarẽi potꞌi piat ewy areꞌe uiwa­nẽtup hawe haype. Maꞌato atikat pytkai yt atipuẽti Tupana mõtypot yat nu kawiat minug. Kat pote are. Miꞌi hawyi atikuap hawyi pãi — Aika­ꞌiwat koro Tupana Tohũ Kuteiru wywo koitywy tuwenug Tupana mõtypot yat miitꞌin eiam mo tomõ­typot hamo toĩneꞌen mesup areꞌe uiwepe."

²³ Hẽtyhot kahato tawa Ieru­sarẽi Pakup we. Tupana kahu hap Ihũ Kuteiru kahu hap topy­huꞌat mekewat tawa imoẽtyhot hamo ariãty ewy at kaꞌap. Saꞌa­wy­ꞌiwuat at waty waikiru koꞌi yt imoẽtyhot i raꞌyn itote."

²⁴ Tupana topy­huꞌat tohũ Kuteiru wywo toꞌewy at waty waikiru ewy mesuwat yi tote wuatꞌi ywania tomie­ha­kye­raꞌat moẽtyhot hamo. Iꞌewyte yne iꞌatu­ꞌakag koꞌi Tupana mõtypot haria tukup­teꞌen Ihũ Kuteiru mõtypot haria wo. Miꞌi hawyi miitꞌin akag koꞌi tuwat tawa Ieru­sarẽi Pakup kape Tupana mõtypot hamo — Urupo­rekuat sese En iꞌatuꞌe hamo."

²⁵ Tupana yt tipyhyp hin i itote — Eiwe­hytꞌok o e yn. Maꞌato saꞌa­wy­ꞌiwuat tawa Ieru­sarẽi potꞌi pe taꞌa­tu­pyhyp wãtym hawyi maꞌato Ieru­sarẽi Pakuwe yt taꞌa­tu­pyhyp i wãtym yt kat i itote pote."

²⁶ Miꞌi hawyi yne ywania teꞌe­roꞌe — Tawa Ieru­sarẽi Pakup poꞌog yne kai iꞌatuꞌe. Toꞌiro watuwat tawa Ieru­sarẽi Pakup kape AheTupana mõtypot hamo iꞌatuꞌe. Toꞌiro watioto ahekat aimiium Tupana piat mõtypot hamo iꞌatuꞌe."

²⁷ Tupana mimo waku koꞌi yn teke kuap hetawa pe Tupana Hũ Kuteiru miset pehik koꞌi miwan etiat — Miꞌiria uimi­moieĩ­neꞌen koꞌi yn tuwe­hytꞌok kuap mesuwe e. Yt naku i nug haria heso heso rakaria miitꞌin maꞌat haria yt uwe i itote Tupana etawa pe.

Miꞌi hap koꞌi kape uito Iuwãu araꞌa­kasa uimu­ꞌetu aikotã topy­huꞌat irane hamaut hap.

"

22

¹ Pywo ti rat ikahu kahato tawa Ieru­sarẽi Pakup e atipy piat uhepe. Erahaꞌat ro yꞌy kape e hawyi arahaꞌat yꞌy kape. Miꞌi turan ikahu kahato yꞌy. Yt ihy pitpit hin i. Miirꞌin mohãite rakat toĩneꞌen itote. Ihyeput kahu kahato. Ihy pyꞌa­setpiat ikahu sese rakat ewy. Aikope Tupana taꞌapyk Tohũ Kuteiru wywo miꞌi hap ywyꞌokpy kaipyi ihyeput yꞌy."

² Yꞌy wyti ihyeput muꞌap pyꞌa­setpuo areꞌe. Yꞌy ẽpe ete wyti ariaꞌyp koꞌi kokai kokai ikahuria kahato rakaria tukup­teꞌen areꞌe. Iꞌywa koꞌi hewo kahato maꞌato yt toꞌo­ꞌewy hin i hewo tuereto kat kat ywa koꞌi. Wẽtup ewaty wẽtup ywa hewo hawyi wẽtup waty hawyi wẽtup ywa hewo tuereto. 12 wo hewo wẽtup 12 waty pe. Watuꞌu mekewat kat kat ywa koꞌi hawyi aimoieĩ­neꞌen wuatꞌi eꞌat aipiit ipakup wuatꞌi eꞌat pe hap topy­huꞌat. Iꞌyhop koꞌi mohag ewy wuatꞌi ywania moehãite hamo."

³ Saꞌa­wyꞌi Tupana toꞌe Ãtãu me — Uiꞌatoiat hawyi eꞌyi yt ihãite i e. Maꞌato itote yi pakup hawe hesaika kahato toineꞌen katu­pono Tupana toꞌe yi pe — Yt woro­ꞌa­kurek poꞌog i raꞌyn e. Erenug i ro e yi pe. Iꞌatu kahato itote Tupana Hũ eropat haria wo. Koitywo Tupana toĩneꞌen iꞌatu­py­ꞌa­setpe Morekuat no Iesui wywo e. Wuatꞌi ywania iꞌatu­potpap kahato imiky­ꞌesat nug hap ete."

⁴ Tuwehik kahato iꞌatuete. Mesup yt pya hin i iꞌatukai e. Toꞌo­haꞌat toꞌoe­wawi tokyꞌe haype e. Toset no toiꞌa­tu­mo­wekuap iꞌatue­wa­tuꞌa ete e."

⁵ Yt kat i ariãty itote kat pote yt kat i iꞌypyryp hap itote pote. Wãtym yt kat i katu­pono Aipo­typot Tupana toĩneꞌen aheꞌa­riãty wo. Topy­huꞌat Aika­ꞌiwat hẽtyhot puo aiko­hye­wyry e. Miꞌi pote yt kat hamo i at itote. Miꞌi hawui Iesui eropat haria teꞌe­ro­py­huꞌat iraniaꞌin yi totiaria more­kuaria wo wuatꞌi eꞌat pe e.

"

⁶ Miꞌi hawyi toꞌe uhepe atipy piat — Iuwãu e yne aru uiꞌe hap topy­huꞌat aikotã areꞌe hap ewy e. Yt pya i raꞌyn tut aru uiꞌe hap eꞌat Aipo­typot Tupana e hap e. Saꞌa­wyꞌi ihay tehay moherep haria wẽ pyi aikotã aikotã topy­huꞌat hamuat hawyi iꞌe hap ewy topy­huꞌat. Koitywy Tupana uipo­ꞌoro atipy kaipyi teropat haria mesu­wa­ro­tiaria muꞌe hamo aikotã aru topy­huꞌat mesu­wa­rote hap e. Pywo yn Tupana ihay uiwẽ pyi e."

⁷ Miꞌi hawyi atikuap Tupana Hũ Kuteiru Iesui ehay — Uhytꞌiꞌin manaꞌin e ehewaure kaꞌa ro uhowawi kat pote ariot merep hap ewy ehowawi hamuat e. Eiweꞌeg wo o katu­pono yt uwe i ikuap karãpe ariot hap. Mesuwe uhemiit Iuwãu tiwan uhehay koꞌi yne aikotã aikotã topy­huꞌat aru eimo­weꞌeg hamo hap yt uwe i eimaꞌat hamuat e. Woro­ho­ꞌo­nãpin kahato mesuwat miwan me e. Pyno ewetunug o uhepiat einãpin hap mesuwat miwan miat e.

"

⁸ Pyno uito Iesui potmuꞌe Iuwãu areꞌe. Mesuwe uimiwan me yne toimo­herep Tupana yn uhewaure miẽtup mo hap. Ipatꞌok araꞌa­kasa ipatꞌok atikuap atipy piat wẽ pyi hawyi arepỹ­ꞌã­tutuk howawi imõtypot hamo. Miꞌi hawyi areꞌe — Ikahu kahato ti emimo­herep emienoi uhewowi areꞌe. Woro­mõ­typot kahato En pãi areꞌe."

⁹ Miꞌi hawyi mekewat wẽtup atipy piat sehay erut hat toꞌe uhepe — Yt uimõ­typot teiꞌo Tupana ewy katu­pono uito Tupana eropat hat sese neꞌi eiꞌe­wywuat re neꞌi uito e. Eweimõ­typot ro Tupana yn e. Tupana eropat hat no areĩneꞌen aikotã saꞌa­wy­ꞌiwuat Tupana ehay moherep haria powyro hat re areĩneꞌen e. Miꞌi hap ewy te mesup woro­po­wyro teran Iesui mohey haria e uhepe. Meiũran aru iꞌatu kahato mesuwat emiwan wo mopywo haria hawyi taꞌa­tunug iꞌe hap ewy haria e. Miꞌiria powyro hat areĩneꞌen e. Maꞌato yt atiky­ꞌesat i uimõ­typot hap maꞌato atiky­ꞌesat Uipo­ꞌoro Hat Tupana Iesui mõtypot hap e atipy piat uhepe."

¹⁰ Miꞌi hawyi toꞌe uhepe — Iuwãu e etimo­herep o mesuwat emiwan e. Yt atiky­ꞌesat i migꞌi wo neꞌi etimo­herep e. Epiat ikuap kat aru kat aru toĩneꞌen hap ewy atiky­ꞌesat iraniaꞌin ikuap wy e. Kat pote atiky­ꞌesat yne ikuap miitꞌin aikotã aru topy­huꞌat hap yiam me te iꞌatu­mo­weꞌeg hamo — Pywo miwan iꞌatuꞌe hamo. Katu­pono yt pya i miwan miat tut aru e hap koꞌi e."

¹¹ Miꞌi hawyi toꞌe — Eiweꞌeg wo o mehĩꞌin manaꞌin e. Waku eweimohey yne torania kat e som toꞌe mesuwat miwan me hãpyk hap yt putꞌokꞌe yne i te pytkai e. Yt naku i eweimohey ran neꞌi kat e som hap koꞌi sio mũki­ꞌite eꞌihotꞌok eweiꞌe iꞌe hap mohey hap ete e. Mũki­ꞌite atimohey eweiꞌe pote potꞌi poityꞌi kat pote merep i hap ewy tut Aika­ꞌiwat. Maꞌato hut turan atomohey Iesui ereꞌe neꞌi turan tut pote yt naku i nug haria wo eweikup­teꞌen. Yt naku i eiwa­nẽtup hut turan ipitpit kahato eiwa­nẽtup hawe e. Maꞌato waku nug haria eweikup­teꞌen turan tut pote waku kahato rakaria wo te eweikup­teꞌen ne itote e. Maꞌato Tupana kape ewanẽtup hap hut turan mote — Eipe waku kahato e tut hawyi. Pyno eiweꞌeg wo e kat pote mũki­ꞌite atimohey Iesui eweiꞌe pote potꞌi poityꞌi e atipy piat ahepe.

"

¹² Miꞌi hawy Iesui toꞌe uhepe ahepe — Ehewaure kaꞌa ro e. Yt pya hin i uhut hap eꞌat e. Meremo ehaꞌup wywo ariot eiminug wakuap ok tã ium ehepe hamo e. Eiminug yt naku i hap ok tã atum ehepe haꞌup e."

¹³ Yne saꞌa­wyi­wanuat nug hat sese Uito aikotã miwan toĩneꞌen saꞌa­wy­ꞌipyi ikahuro hap kape aikotã aru toĩneꞌen hap atunug yne aru iꞌe hap ewy e. Miꞌi hap ewy ahaꞌa­wynug aikotã woꞌo­muꞌe hap ete toĩneꞌen miwan me saꞌa­wyꞌi hap ewy atunug aru e. Miꞌi e hap ewy areĩneꞌen yne eꞌyianmete e. Miꞌi hap ewy areĩneꞌen yne wyro hamo e. Aikotã miwan toĩneꞌen moꞌy­wopo wuat hawyi yt kat i raꞌyn miwan toĩneꞌen poꞌog kat pote toran hap taꞌyn hap ewy atunug yne raꞌyn Tupana e hap atunug aru e hap ahaipepiat nug hat areĩneꞌen ne e Iesui ahepe.

"

¹⁴ Miꞌi hawyi toꞌe atipy piat — Uwe uwe inug mesuwat piat tonãpin hap miꞌi Tupana mipoi­tyro wo toĩneꞌen. Pywo ti rat uwe uwe Tupana mipoi­tyro wo toĩneꞌen uwe uwe tunug Tupana miky­ꞌesat miꞌi hat pe ti aru Tupana toꞌe — Waku etuꞌu kat kat ywa wuatꞌi eꞌat piat eimoieĩ­neꞌen hamuat uimikoi kaipyi e aru Tupana miꞌi hat pe. Ereke mehĩ ereke mana uhetawa pakup we e aru tomi­ky­ꞌesat nug haria pe e."

¹⁵ Maꞌato iraniaꞌin me — Ereke ro yt e hin i e. Yt karãpe i — Ereke ro uhetawa pe e paini koꞌi pakup we e. Yt karãpe i — Ereko ro e woꞌo­ꞌauka haria pe e. Yt karãpe i — Ereke ro e hewaire waire rakaria pe e. Iewyte uwe uwe imõtypot mo wuat Tupana miꞌi haria pe — Ereke ro yt e hin i Iewyte uwe uwe miitꞌin potma­ꞌatꞌi maꞌati hat toĩneꞌen niꞌi hat pe — Ereke ro uhetawa pakup we yt e i e atipy piat.

"

¹⁶ Miꞌi hawyi Iesui toꞌe uhepe ahepe — Uito Iesui morekuat Tawi saipepiat sese aikotã ahewatꞌyp ikuꞌuro miꞌi hawyi toĩneꞌen iꞌypykyt hap ewy areĩneꞌen morekuat tawi saipepiat meiũran iꞌyp wato kahato aru e. Uito areĩneꞌen aikotã mekewat waikiru tut ihotꞌok kai i at ut hap enoi hamuat hap ewy atimo­herep Tupana ut hap e. Miꞌi hap ewy atipo­ꞌoro raꞌyn wẽtup ok uipot­po­ꞌoro atipy kaipyi yne mesuwat miwan moherep ehowawiat uimohey haria kape Iuwãu miwan myi e Iesui.

"

¹⁷ Miꞌi pote mesup — Eraꞌaipok to Iesui meikowo watoꞌe. Aikotã hary­poria tiky­ꞌesat kahato tehay­tuwy pya ieĩneꞌen hat hawyi — Eraꞌaipok to eraꞌaipok to e hap ewy watoꞌe — Eraꞌaipok to watoꞌe aipyꞌa pyi epe Iesui. Iꞌewyte Tupana Pãꞌãu ehay moherep haria saꞌa­wy­ꞌi­wuaria iꞌewyte koran wuaria — Eraꞌaipok to meikowo Iesui iꞌatuꞌe Tupana Pãꞌãu ehay moherep haria iꞌewyte aito. Iꞌewyte waku yne mesuwat miwan kuap haria teꞌe­roꞌe — Eraꞌaipok to Iesui waku watoꞌe. Uiwy­riaꞌin eweikup­teꞌen teran wuatꞌi eꞌat pe pote ewetat ro yt kat saꞌup i aikotã mekewat yꞌy aimoieĩ­neꞌen hap yt kat saꞌup i Tupana etawa pe rakat hap ewy waku wato­mohey."

¹⁸ Uito ti Iuwãu. Iꞌe hap ewy yn atiwan. Waku eweimohey uimiwan hap areꞌe. Yt etimo­ꞌa­pyꞌi teiꞌo mesuwat sehay katu­pono Tupana ehay yn atimo­herep. Yt mesuwat uiat kaipyi i maꞌato iꞌe hap ewy yn atiwan areꞌe. Yt naku i mesuwat miwan eweiꞌe pote Tupana miꞌapiheg no eweikup­teꞌen aru aikotã yne mesuwat uimiwan aikotã aikotã aru mesuwe hoꞌopot hap ewy. Miꞌi hap ok tã tohenoi aru."

¹⁹ Maꞌato ipatꞌok yn etimohey pote miꞌi hawyi etihep uhehay kurin naꞌyn mesuwat miwan myi pote miꞌi haria pe Tupana toꞌe — Eipe yt ewetuꞌu kuap i eimoe­hãite hamuat uimikoi kat kat ywa e uhetawa pakuwe mesuwat miwan miat mienoi ewy eweihep wẽtup uhehay wakuat mesuwat miwan myi pote woro­ho­ꞌohep eset uimiwan myu uwe toineꞌen wuatꞌi eꞌat pe aru uiꞌe hap uimiwan miat kaipyi e Tupana."

²⁰ Pywo kahato mesuwat miwan me toꞌe Iesui — Ariot aru merepꞌe hap ewy e. Pyno — Eriot ro Iesui waku watoꞌe Aika­ꞌiwat pe."

²¹ — Uika­ꞌiwat Iesui etiꞌa­tu­poi­tyro o egyiꞌat hap kaipyi yne mesuwat yi Asia piaria iꞌewyte etipoi­tyro mesuwat miwan mohey haria yt iꞌatue­waku hap upi i wen maꞌato iꞌatu­kyꞌe hap wywo hap ok tã. Miꞌi hap ahẽtup Iesui set upi waku.

Uito Iesui potmuꞌe 12 ok Iuwãu Iesui mimo­herep aikotã aru e hap miwan nug hat."