1

¹ Mesup ti Pauru miwan atipo­ꞌoro ewawi uiwy Titu. Uito ti meiũ Tupana eropat hat iꞌewyte wuatꞌi Porekuat Iesui ehay moherep hat uito. Saꞌa­wyꞌi ti Tupana uiꞌairo tehay moherep hamo tomi­ꞌai­roria piat hamo uipo­ꞌoro. Mio tã e uhepe — Atiky­ꞌesat en uhehay pywuat moheg miitꞌin miat hamo e. Uhaꞌyru mohey hap moheg hamo uimi­ꞌai­roria muꞌe hamo woro­ꞌairo en e Tupana uhepe."

² Katu­pono saꞌa­wy­ꞌite at yt kat i te turan toꞌe Tupana ahepe — Atum aru ehepe eheĩneꞌen wuatꞌi eꞌat piat hamuat e ti Tupana. Yt heso i ahete Tosa­ꞌyru mohey haria pe. Miꞌi hap yn wahe­katup aito mesup."

³ Heꞌat putꞌokꞌe raꞌyn hawyi Tupana timo­herep taꞌyn uhepe tehay — Atum aru wuatꞌi eꞌat piat eheĩneꞌen hap Uhaꞌyru mohey haria pe e Tupana ahepe. — Koitywy woro­po­ꞌoro en Pauru uhaꞌyru etiat sehay moherep hamo katu­pono woro­mohey en inug hamo e uhepe. Miꞌi tupono ti atimo­herep Haꞌyru wuatꞌi uwania pe Tupana e hap ewywuat. Aheha­kye­raꞌat Tupana piat hap Iesui mikyiꞌat moherep hat areĩneꞌen mesup uito. Uito ti Pauru.

"

⁴ En ni Titu uhaꞌyru sese Iesui mohey hap kaipywiat katu­pono aimi­mohey ti wẽtup ok yn toĩneꞌen mote ꞌi pote wẽtup ok yn aito. — Etum no egyiꞌat hap uhaꞌyru Titu pe areꞌe mesup mesuwe Aiꞌywot Tupana pe. Iꞌewyte imowepit kahato hap etum o uhaꞌyru Titu pe areꞌe mesup mesuwe Tupana pe Iesui Uheha­kye­raꞌat hat pe wuatꞌi Porekuat pe.

"

⁵ Saꞌa­wyꞌi woro­mo­py­huꞌat en yꞌy toꞌo­raniat yi Kereta pe yt uiminug yne reꞌym moma hamo. Pyno waku etiꞌairo torania yne tawa puat Iesui mohey haria apykok hanuaria areꞌe saꞌa­wyꞌi epe uhaꞌyru."

⁶ Waku etiꞌairo yt iꞌaparap i hat wẽtup ok yn iharyꞌi rakat are. Iꞌewyte imẽpytꞌin Iesui mohey haria ewywuat etiꞌairo. Yt etiꞌairo teiꞌo imẽpytꞌin ipyꞌahak poityꞌi rakat neꞌi areꞌe. Yt toꞌywot ehay upiat i haria. Miꞌi yt naku i aiꞌa­pykok hano."

⁷ Tupana potpap nug haria pote waku yn nug hat waku etiꞌairo. Maꞌato — Uito poꞌog waku iraniaꞌin kai e hat yt etiꞌairo teiꞌo. Iꞌewyte marakꞌa yt etiꞌairo teiꞌo. Mahy u hat pote yt naku Iesui mohey haria apykok hat wo topy­huꞌat areꞌe. Yt etiꞌairo teiꞌo miꞌi hat ewywuat. Wuꞌuka teran hat iꞌewyte yt naku i — Uiwano yn naꞌyn e hat. Miꞌiria ewywuaria yt putꞌokꞌe Iesui mohey haria apykok hanuaria wo. Miꞌi pote waku yn nug hat etiꞌairo."

⁸ Waku hegyiꞌat miitꞌin miat — Ereke ro e hat iꞌatu­ꞌakag wo waku etiꞌairo. Wakuap yn nug neran hat waku etiꞌairo. Iweꞌeg kahato hat waku hãpyk kahato rakat waku Tupana ewywuat wakuat rakat etiꞌairo waku. Wewãikuap hat waku etiꞌairo iꞌatu­ꞌakag nuat."

⁹ Etiꞌairo aimi­mohey wuatꞌi eꞌat piat moherep hat Iesui mimuꞌe ewywuat etiꞌairo. Miꞌi hat ewywuat etiꞌairo pote hesaika rakaria watu­kup­teꞌen ipotmu­ꞌeria pywo piat taꞌa­tu­muꞌe pote."

¹⁰ Miꞌi hat etiꞌairo pote meremo taꞌa­tu­mo­pe­rupꞌi tehay pywuat no yt iꞌewy i rat e haria.

Taꞌi tukup­teꞌen aipy­ꞌe­set­piaria aimi­mu­ꞌeria wẽtup ehay upiat myhuꞌat haria. Miꞌiria tuꞌuka teran kahato sehay pywuat ete aimaꞌat teran haype. — Uruto Iesui mohey haria iꞌatuꞌe wen maꞌato wẽtup sehay ete aimuꞌe. Sehay potꞌi Iuteu ywania eko enoi haria miꞌiria."

¹¹ — Wãiꞌere o iꞌatuepe yt naku i miꞌi tã ehenoi katu­pono urumo­ꞌa­kagꞌaia kahato yne aimẽ­pytꞌin nywo ereꞌe ro miꞌiria pe. Pyno ti yt naku i watu­wa­nẽtup miꞌi haria ehay kape katu­pono miꞌiria ti ahekat kyꞌewi aimuꞌe. Pyno waku teꞌe­ru­we­mõti mekewat aheka­reꞌen kyꞌewiat hap ete."

¹² Saꞌa­wyꞌi yi Kereta pe toĩneꞌen wẽtup ok woꞌo­nãpin hat. Miꞌi hat toꞌe — Pywo ti rat aiꞌy­wania yi Kereta piaria ti heso heso rakaria e. Haiwot rakaria wo tukup­teꞌen e. Ienuk yn neran haria. Yt ipotpap teran i rakaria e ti saꞌa­wyꞌi yi Kereta piaria muꞌe hat toꞌy­wania etiat pe."

¹³ Pywo kahato toꞌe miꞌi miit katu­pono miꞌi tã ti tukup­teꞌen yi Kereta piaria. Miꞌi tupono o etiꞌa­tu­nãpin o Iesui mohey haria — Ewetoiat ro eiꞌy­wania yi Kereta eko saꞌag hawyi eweiꞌaipok to Iesui mohey hap kape ereꞌe o yi Kereta piaria pe. — Pywo ti iꞌatuꞌe hawyi mono iꞌatu­haĩte raꞌyn imohey hap ete."

¹⁴ — Yt eweimuꞌe teiꞌo poꞌog mekewat eimuꞌe saꞌa­wy­ꞌiwuat heso rakat ete ereꞌe ro iperup takaria pe. Iꞌewyte eweitoiat ro Iuteuria eko koꞌi aimuꞌe hap koꞌi yt Tupana ehay kaipywiat i koꞌi ereꞌe o epotmu­ꞌeria pe are.

"

¹⁵ Waku hap etiat wanẽtup haria pe — Waku yne Tupana minug koꞌi mesuwat yi totiat koꞌi iꞌatuꞌe. Teꞌe­ru­wehum yn Tupana minug ete maꞌato iraniaꞌin yt imohey i haria yt wẽtup i waku Tupana minug koꞌi. Yt naku i iꞌatuꞌe yn Tupana miium ete katu­pono iꞌatu­wa­nẽtup hawe yt naku i hap yn topy­huꞌat. Teꞌe­ru­we­mõti kahato teꞌe­ru­wa­nẽtup hawe yt taꞌa­tunug i iꞌatueko ewy pote."

¹⁶ Miꞌiria — Uruikuap Tupana iꞌatuꞌe wen maꞌato iꞌatu­minug koꞌi yt Tupana mohey haria minug ewy hin i katu­pono hema­rakꞌa poityꞌi iraniaꞌin ete. Yt uwe ehay upi i miꞌiria teꞌe­ro­py­huꞌat teran. Iꞌewyte yt kat i iꞌatu­minug wakuap heremo. Yt taꞌa­tu­he­papꞌi wakuap nug hap pãi — Uruikuap kahato Tupana iꞌatuꞌe pytkai. Miꞌi tã hap ewy miꞌiria. Uito Pauru.

"

2

¹ Maꞌato en Titu ehenoi ro Iesui mohey haria pe yi Kereta piaria pe Tupana ehay hãpyk kahato rakat yn pywuat rakat Tupana e hap ewywuat yn."

² Pyno mio tã ereꞌe o iꞌatuepe. Etiꞌa­tu­nãpin ihainiaꞌin nagnia pe — Waku etunug waku miitꞌin me hawyi miitꞌin mimõ­typot no eweikup­teꞌen ereꞌe o. Ehehay hãpyk yn haria wo o eweikup­teꞌen ereꞌe o. Eiwewãi o eiminug saꞌag ete hawyi Iesui mohey haria kahato wo o eweikup­teꞌen ereꞌe o. Woꞌo­kyꞌe hap yn o ewetunug ereꞌe o. Imohey potꞌi haria wo o eweipy­huꞌat ereꞌe o nagnia pe Titu.

"

³ Iꞌewyte Titu hary­po­riaꞌin nagnia pe kotã ereꞌe o — Eweꞌeg wo o manaꞌin eiminug saꞌag pupi ereꞌe o. Hary­poria wakuat ewy eweikup­teꞌen aikotã Tupana ewaku hap ewy o eweikup­teꞌen ereꞌe o. Yt naku i ehehay miitꞌin mohit hap ete eiwẽ pyi ereꞌe o. Yt naku i mahy u haria wo eweikup­teꞌen."

⁴ Waku eweikup­teꞌen hary­po­riaꞌin heꞌaito pakup takaria nãpin haria wo ereꞌe o nagnia pe. Manaꞌin waku mio tã eweiꞌe heꞌaito pakup takaria pe — Waku eweikyꞌe eꞌaito iꞌewyte waku eweiꞌa­tu­kyꞌe eimẽ­pytꞌin ereꞌe o hary­poria nagnia heꞌaito pakup takaria nãpin hamo."

⁵ — Iꞌewyte wãiꞌe­weiꞌe o eiminug saꞌag nug hap pupi. Eweiꞌa­tu­po­wyro kahato o eheꞌaito eimẽ­pytꞌin iꞌewyte eiꞌyat piaria waku iꞌatuꞌe manaꞌin nagnia heꞌaito pakup takaria pe. Eheꞌaito miky­ꞌesat ewy o eweikup­teꞌen eweiꞌe o heꞌaito pakup i rakaria pe ereꞌe o haryꞌin me are. Pyno Titu eꞌe hap ewy taꞌa­tunug pote ti aru ahewa­nĩ­kaptia — Taꞌi Iesui mohey haria hary­po­riaꞌin iweꞌeg kahato haria iꞌatuꞌe. Miꞌi pote yt teꞌe­ru­we­ky­ryꞌi kuap i Tupana ehay ete ereꞌe o manaꞌin nagnia pe.

"

⁶ Miꞌi hawyi ti kurum iwasu koꞌi pe ereꞌe o — Pyno iweꞌeg haria ewywuaria wo o eweipy­huꞌat ereꞌe o. Wakuat yn nug haria wo eweikup­teꞌen Tupana miky­ꞌesat nug haria ereꞌe o kurum iwasuria pe."

⁷ Iꞌewyte en Titu poꞌog wakuap nug hamo ereĩneꞌen itotiaria kurum iwasuria kai hawyi ti aru — Pyno waku watunug Titu ewy iꞌatuꞌe kurum iwasuria. Tupana ewy ereĩneꞌen iꞌatu­muꞌe haype yt kat i eso hap wywo. Epyꞌa hãpyk wywo etiꞌa­tu­muꞌe Titu."

⁸ Iꞌewyte ahewa­nĩ­kaptia etiꞌa­tu­wesat ehay hãpyk kahato eweꞌeg hap kaipyi etiꞌa­tu­wesat perupꞌi puo. Miꞌi tã etiꞌa­tu­wesat pote ti aru yt kat i iꞌatuꞌe kuap i raꞌyn Tupana ehay mohit hamuat ete. Teꞌe­ru­we­mõti raꞌyn katu­pono yt kat i taꞌa­tu­puẽti ehay kaipyi saꞌag hap neꞌi. Yi kape yn naꞌyn iꞌatueha pãi.

"

⁹ Pyno miꞌi tã ereꞌe o Iesui mohey haria miitꞌin eropat haria pe — Ewetunug o eika­ꞌi­waria piat Ehetu­ꞌi­saria piat eiꞌa­tu­po­ꞌoro hap ewy iꞌatu­mi­ky­ꞌesat ewy ereꞌe o. Yt naku i more­kuaria eweiꞌa­tuehay moweu­kaꞌi eipo­ꞌoro hap pote. Waku eweikup­teꞌen eiꞌa­pykok haria mowepit kahato haria wo ereꞌe o epotmu­ꞌeria pe Titu."

¹⁰ — Iꞌewyte yt ewete­roꞌok teiꞌo eika­ꞌiwat ekareꞌen koꞌi ereꞌe o. Iꞌewyte eipotpap kahato o wakuap koꞌi eiminug koꞌi ete. Eika­ꞌi­waria emiitꞌin no kahato o eweikup­teꞌen ereꞌe o. Miꞌi tã ewetunug mote ti aru eika­ꞌiwat Tupana ehay mõtypot hap kahato ewetunug eika­ꞌi­waria wanẽtup hawe Aheha­kye­raꞌat hat Tupana ehay mõtypot hamo eweikup­teꞌen ereꞌe o Iesui mohey haria miitꞌin eropat haria pe Titu.

"

¹¹ Pyno koitywy Tupana mio tã e ahepe iꞌewyte wuatꞌi miitꞌin me — Woro­ho­ꞌo­kyꞌe kahato eipe e raꞌyn. Pyno woro­ho­ꞌoe­ha­kye­raꞌat reran eipe e wyti Tupana wuatꞌi ywania pe. Atum hamuat uhegyiꞌat kahato pote teꞌen neꞌi yne ehepe e ti Tupana ahepe."

¹² Miꞌi hawyi aikyꞌe hap watikuap kahato raꞌyn. Iꞌewyte aikotã waku watu­kup­teꞌen mesu­wa­rotiat hap watikuap katu­pono Tupana aimuꞌe raꞌyn — Saꞌa­wyꞌi te ti eimi­ky­ꞌesat ewy yn ewetunug e. Mekewat eꞌat pe saꞌag kahato rakaria wo eweikup­teꞌen e. Maꞌato uhegyiꞌat hap putꞌokꞌe ehete pote waku eweitoiat raꞌyn eiminug saꞌag hap koꞌi uimi­ky­ꞌesat ewy yn nug hamuat e. Wakuaria wo uhewaku hap ewy atiky­ꞌesat e. Uimõ­typot haria eipe atiky­ꞌesat e Tupana ahepe."

¹³ Miꞌi hawyi Iesui putꞌokꞌe hap eꞌat yn naꞌyn wahe­katup Tupana mõtypot eꞌat sese raꞌyn. Taꞌi Uhetu­pana iꞌewyte Iesui Aheha­kye­raꞌat hat poꞌog wuatꞌi kai putꞌokꞌe irane. Putꞌokꞌe hawyi ikahu hap sese watikuap taꞌyn. Mekewat eꞌat pe ti wahe­katup kahato turan tut."

¹⁴ Aheha­kye­raꞌat hat Iesui ikuꞌuro raꞌyn ariaꞌyp posak ete aika­wiano. Yne yt nakuap i nug saꞌag po pyi aihep hamo ikuꞌuro. Tupana wanuaria wo ainug neran pote wakuaria wo aito hap toiky­ꞌesat. Miꞌi pote aihep taꞌyn saꞌag nug hap po pyi aimo­waku hamo raꞌyn. Koitywy Aheha­kye­raꞌat hat iwepit kahato raꞌyn.

"

¹⁵ Pyno uhaꞌyru Titu uimienoi mesuwat uimiwan miat ehenoi yne Iesui mohey haria epotmu­ꞌeria pe are. Aikotã woꞌo­muꞌe hat sese ewy etiꞌa­tu­nãpin Iesui ainãpin hap ewy. Iꞌaparap hap etikuap hawyi wãiꞌere o iꞌatuepe yt iꞌatu­mohit wywo teiꞌo maꞌato wãiꞌere iꞌatuepe. — Taꞌi Tupana wyti uipo­ꞌoro meikowo ehepiat sehay wakuat Iesui etiat moherep hamo ereꞌe o iꞌatuepe. Uito ti ehehay­tuwy sese ereꞌe o epotmu­ꞌeria pe Titu. Uito Pauru.

"

3

¹ Etiꞌa­tu­muꞌe epotmu­ꞌeria mio tã ereꞌe o Titu — Eweiꞌa­tuehay upi ehetu­ꞌi­saria eiꞌa­kagnia iꞌewyte ehesu­ra­raꞌin eweiꞌa­tuehay upi eweikup­teꞌen ereꞌe o. Miꞌi hap etiat iꞌatu­muꞌe hap ete yt waure wo eweikut­p­teꞌen ereꞌe o. Karãpeĩ eiꞌa­kagnia eipo­ꞌoro motpap wakuap nug hap miꞌi pote — Hẽ eweiꞌe kahato ereꞌe o epotmu­ꞌeria pe."

² Iꞌewyte yt uwe teiꞌo eweiꞌa­tuehay moweu­kaꞌi ereꞌe o. Iꞌewyte miitꞌin wuatꞌi wywo o eiwese eweikup­teꞌen ereꞌe o Titu. Iꞌewyte waku eweikat ewy ewese hap wywo. Iꞌewyte eipe­rupꞌi kahato yn o yne miitꞌin ete eweikup­teꞌen ereꞌe o Iesui mohey haria pe."

³ Kat pote ti aito nimo te yt hãpyk i sese rakaria watoĩ­neꞌen. Woꞌoehay upi upi haria wo i ti aito katu­pono mekewat eꞌat pe aito aiminug saꞌag atoiat reran aiꞌe pytkai yt watoiat kuap i. Miꞌi hawyi ti mekewat aiminug saꞌag kape neꞌi watoĩ­neꞌen. Miꞌi hap kaipyi ti aiwo­ꞌo­weu­kaꞌi aiwo­ꞌopiat hap yn naꞌyn tuwekuap ahete. Miꞌi haype ti — Atiky­ꞌesat ewat uiwano aiꞌe hap aiwa­nẽtup hawe. Iꞌewyte — Atiky­ꞌesat ti uito poꞌog ekai iraniaꞌin kai aiꞌe hap yn. Miꞌi hap kaipyi ti ipyꞌahak takaria wo aito yne miitꞌin ete. Iꞌewyte iraniaꞌin torania ipyꞌahak takaria wo ahete tukup­teꞌen."

⁴ Yt naku i kahato ahete mekewat eꞌat pe maꞌato miꞌi pytkai Tupana tuwe­mo­herep taꞌyn ahepe aikyꞌe kahato hap. Miꞌi kaipyi aheha­kye­raꞌat hamuat. Iwese kahato ti ahete. Tuwepyi aikyꞌe teꞌen neꞌi haype."

⁵ Taꞌi Tupana yn ti Aheha­kye­raꞌat kuap hat. Aito ti yt wati­ꞌa­tue­ha­kye­raꞌat kuap hin i aiwewi. Iꞌewyte aiminug wakuap koꞌi ti yt putꞌokꞌe i aheha­kye­raꞌat hamuat kyiꞌat hamo. Tepiat aheha­ky­ꞌeꞌi hap kaipyi yn ti Tupana aheha­kye­raꞌat kuap. Iꞌewyte aiminug saꞌag ipitpit kahato hap koꞌi Tupana yn ikoho kuap. Iꞌewyte ti tutum ahepe Topãꞌãu Wakuat Sese raꞌyn. Miꞌi hawyi ti tosa­ꞌy­ruꞌin no tosa­ki­ꞌytꞌin no ainug Topãꞌãu wo. Miꞌi hawyi ti koitywy ipakup i rakaria wo raꞌyn watoĩ­neꞌen. Tupana tunug ni tuweran miꞌi tã hap ahetiat tuwepyi."

⁶ Miꞌi hawyi ti aipiit wyti Topãꞌãu Wakuat eiam mo raꞌyn tutunug. Tutum kahato Topãꞌãu wakuat poꞌog naꞌyn ahepe aimiẽtup kai katu­pono ti Aika­ꞌiwat Iesui tikyiꞌat tuwe­kaipyi raꞌyn aheha­kye­raꞌat hamuat."

⁷ Koitywy ti Iesui tum naꞌyn ahepe Topãꞌãu aikyꞌe haype. Yt aiwaku hap upi i tutum neꞌen neꞌi. Miꞌi pote Tupana toꞌe ahepe wati­mohey Haꞌyru hawyi — Koitywy waku rakaria wo eweikup­teꞌen uipyꞌa pe e Tupana ahepe e. Eipo pe raꞌyn ti atum yne uipo­watꞌyp e. Uhekat yne atum ehepe e ahepe. Miꞌi tupono wuatꞌi eꞌat piat ieĩneꞌen hap kape yn naꞌyn aiwa­tetup."

⁸ Pywo kahato ti mesuwat uimienoi pãi. Miꞌi tupono Titu etiꞌa­tu­nãpin kahato epotmu­ꞌeria — Waku watu­wa­nẽtup kahato aikotã aru watunug waku hap ete ereꞌe o iꞌatuepe katu­pono waku nug haria wo watoĩ­neꞌen mote Tupana mowepit kahato haria wo wato­py­huꞌat. Iꞌewyte waku miitꞌin powyro kahato rakaria wo wato­py­huꞌat ereꞌe o Iesui mohey haria pe Titu."

⁹ — Maꞌato mekewat wuꞌuka hap ehay wuat yt kat hamuat i. Miꞌi hap koꞌi waku watoiat yne ereꞌe o. Yt eiwu­ꞌuka teiꞌo — Uruwat uruꞌy­wania ni waku poꞌog iraniaꞌin ywania kai eiꞌe hap ete. Uruꞌy­wania set poꞌog poꞌog eiꞌy­wania pe kai eiꞌe hap ete yt eiwu­ꞌuka teiꞌo. Iꞌewyte yt eiwu­ꞌuka teiꞌo miitꞌin wãiꞌe hap hit koꞌi ete miitꞌin seko hit ete kat miꞌu waku watuꞌu kat som waku kat som yt aipainug hap ete. Yt kan hamo i aheko urueko hap ete watu­ꞌuka. Yt aipo­wyro hin i watu­ꞌuka sokpe ete yt Tupana ehay kaipyi i pote. Pyno mekewat nagnia ehay seko etiano yt naku i watu­ꞌuka ereꞌe o are."

¹⁰ Maꞌato toĩ wẽtup ok aipy­ꞌa­setpe Iesui mohey hat wuꞌuka teran hat eipatꞌok patꞌok teran hat miꞌi pote waku eweikaykay miꞌi ehowawi hawyi eweinãpin miꞌi. Uhyt mana etoiat ro mekewat meru­wano sehay eweiꞌe tope. Miꞌi hawyi tutunug i raꞌyn miꞌi pote waku eweikaykay i raꞌyn wãiꞌeiꞌe hamo. Maꞌato yt toikuap i tonãpin hap miꞌi hawyi o yt eiwa­nẽtup i raꞌyn ihay kat e hap kat e hap koꞌi kape."

¹¹ katu­pono tuꞌuka teran haype yt naku i tutunug. Tuwepyi raꞌyn tutunug wãiꞌaiꞌe pytkai raꞌyn. Mekewat wuꞌuka hap nug hap kaipyi ti yne miitꞌin tikuap taꞌyn yt nakuat inug hat miꞌi. Miꞌi pote waku raꞌyn aipohep taꞌyn mekewat ihay ete.

"

¹² Titu atipo­ꞌoro teran wẽtup ok esaipe piano aimi­mu­ꞌeria apykok hamuat maꞌato yt atikuap i te uwe waku atipo­ꞌoro hap. Koitypuo maꞌato atipo­ꞌoro mehĩ Atema sio mehĩ Tikiku are. Pyno putꞌokꞌe esaipepiat hawyi etikat kahato epuꞌap uhowawiat eꞌut hamuat Titu. Areĩneꞌen wyti aru mekewat tawa Niko­puri tote are. Miꞌi kape eriot meremo uhaꞌyru. Miꞌi hawyi mekewat iꞌaman mot naꞌak hap eꞌat koꞌi pe tawa Niko­puri pe watu­kup­teꞌen."

¹³ Pyno Titu etipo­wyro mekewat mehĩ Sena mekewat wuꞌuka haria atunãpin hat muꞌap saꞌup ete. Iꞌewyte mekewat mehĩ Aporu puꞌap saꞌup ete etipo­wyro. Etum o mekewat mieroto wo imiꞌu hesokpe aikotã aikotã waku hap ewy."

¹⁴ Pyno Titu koitywy waku watoꞌe aipot­mu­ꞌeria pe Iesui mohey haria pe — Eweiꞌa­tu­muꞌe ro hoꞌopot haria powyro hamuat ete. Iꞌewyte aikotã waku hatek sese rakaria powyro hamo eweikup­teꞌen hap ete waku watoꞌe aipot­mu­ꞌeria pe katu­pono yt naku i kahato ti watoĩ­neꞌen neꞌen neꞌi ahowawi yn wanẽtup hano neꞌi. Waku wati­ꞌa­tu­nãpin Iesui mohey haria."

¹⁵ Pyno koitywy torania meiũpiaria uiwy­wuaria gupteꞌen haria tipo­ꞌoro taꞌa­tue­kue­katu ewawi Titu. Iꞌewyte kuekatu raꞌyn ti aru aiwy­riaꞌin itotiaria Iesui mohey haria pe urutoꞌe.

Pyno — Tupana etum no uhaꞌyru Titu pe imowepit kahato hap egyiꞌat hap ok tã iꞌewyte torania itotiaria Esaꞌyru mohey haria pe ahẽtup epe Tupana waku. Toran naꞌyn uimiwan ewawi uiwy Titu.

Uito ti Pauru"