1

¹ Timoteu mesup uimiwan atipo­ꞌoro kuekatu uiꞌe hap. Uito eꞌywot Pauru mekewat Aipo­typot miꞌairo tehay moherep wuatꞌi miitꞌin mianuat hat. Karãpe etomohey Iesui hawyi pywo Aipo­rekuat sese ere o wuatꞌi pe. Miꞌi pote ti aru ereĩneꞌen wuatꞌi eꞌat pe Tupana wywo ere o katu­pono mio tã e hap ti saꞌa­wy­ꞌite Tupana tomo­herep uhepe."

² Taꞌi uhaꞌyru sese ewy ereĩneꞌen Timoteu. Woro­kyꞌe kahato en. Aiꞌywot sese ti Tupana iꞌewyte Aika­ꞌiwat sese ti Iesui. At kaꞌap mio tã are Tupana pe — Waku etipo­wyro ro Timoteu egyiꞌat hap kaipyi. Waku erahaꞌat Timoteu kape ikyꞌe hap wywo are. Iwanẽtup hap wẽtup yn etum iwepit hamuat are Tupana pe meiũpepyi eupi."

³ Iꞌewyte — Waku kahato En Uruꞌywot are. Taꞌi Tupana eheropat kahato hat uito Pauru. Emiky­ꞌesat ewy yn atunug neran. Aikotã saꞌa­wyꞌi aiꞌy­wania tunug emiky­ꞌesat ewy iꞌewyte uito atunug mesup are Tupana pe. Karãpe uiwa­tetup ewawi turan Timoteu — Waku kahato En Tupana are yn wãtym muo ihotꞌok ewy ewy are Tupana pe."

⁴ Timoteu yt atiwaure kuap i aikotã eꞌyatypiat areĩneꞌen turanuat aikotã erewak uikyꞌe epiat haype hap. Uipap kahato ewawiat uiꞌa­kasa hamo hawyi atikuap uimo­wepit kahato en hap."

⁵ Uimo­wa­nẽtup kahato en Iesui mohey sese hap kape mekewat pywuat sese hap yt eso hin i Iesui mohey hap ete. Saꞌa­wyꞌi ti ehary Iroiti iꞌewyte ety Eunise tukup­teꞌen imohey sese haria. Miꞌi hawyi koitywy en i raꞌyn iꞌatu ewywuat imohey sese hare en ereĩneꞌen."

⁶ Miꞌi tupono woro­nãpin Timoteu. Saꞌa­wyꞌi woro­ꞌatoiat en itote Iesui mohey haria akag wo. Miꞌi hap eꞌat pe areponug eꞌakag ete hawyi Tupana tum tesaika hap topotpap nug epiat hamo. Pyno waku ewatetup o miꞌi hap kape."

⁷ Tupana tum naꞌyn ahepe Topãꞌãu aimoe­saika kahato hap yt uwe pupiat i aikenꞌẽ hamo. Koitywy Topãꞌãu wo aipytꞌat nug kahato raꞌyn woꞌo­kyꞌe hamo. Miꞌi kaipyi koitywy watu­we­nãpin kuap taꞌyn saꞌag nug hap akit hamuat.

"

⁸ Yt eremõti teiꞌo Aika­ꞌiwat ehay moherep hamo. Iꞌewyte uito areĩneꞌen woꞌo­pyhik hawe Iesui mohey hap upi pytkai yt eremõti teiꞌo — Uito Pauru mẽpyt e hamo. Maꞌato waku ere — Uito iꞌewyte ahoꞌopot hawe areĩneꞌen wy mesuwat sehay wakuat moherep hap upi waku ere o Tupana pe. Uimoe­saika hap ok tã aru atunug ere o Tupana pe Timoteu."

⁹ Tupana aheha­kye­raꞌat hawyi ainug temiitꞌin wo. Yt aiwa­nẽtup kahu hap upi i yt ahewaku hap upi i maꞌato tomi­ky­ꞌesat no tegyiꞌat hap ok tã aheha­kye­raꞌat wuatꞌi eꞌat piat aikotã Tupana toꞌe nimo saꞌa­wyꞌi tutunug yne wuatꞌi hap yianmete — Atiꞌa­tue­ha­kye­raꞌat ti aru Uhaꞌyru mohey haria e Iesui etiat hap ewy."

¹⁰ Pyno koitywy watikuap kahato hegyiꞌat ahepiat hap katu­pono Aika­ꞌiwat Iesui ut hawyi tuwe­mo­herep taꞌyn ahepe aikotã aiku­ꞌuro hap kaipywiat aimo­herep hamo. Tehay wakuat toimo­herep taꞌyn ahepe aheĩneꞌen wuatꞌi eꞌat piat hamuat hap.

"

¹¹ Taꞌi Tupana uiꞌairo topot­po­ꞌoro sese wo wuatꞌi puat tehay moherep hamo miitꞌin atumuꞌe uhepiat hamo."

¹² Miꞌi hap upi ti ahoꞌopot aikotã aikotã hap koꞌi. Miitꞌin iꞌatu­mi­ky­ryꞌi kahato uhete maꞌato yt aremõti hin i Tupana ehay ete katu­pono atikuap kahato uiwy uimi­mohey Iesui. Miꞌi hap toikuap iꞌewyte uito atikuap are. Yne uimiium tepiat toiꞌa­tunug iheg me itote tut hamuat kape."

¹³ Timoteu epap kahato o uimienoi epiat pywuat sese sehay upi. Ewatetup miꞌi e hap koꞌi upi katu­pono aikotã aikotã ereĩneꞌen hamuat ahenoi epe. Miꞌi hap tote ereĩneꞌen wuatꞌi eꞌat pe. Etomohey Aika­ꞌiwat Iesui. Etikyꞌe kahato Miꞌi. Miꞌi hawyi wẽtup piit ewy yn watoĩ­neꞌen Iesui wywo."

¹⁴ Tupana Pãꞌãu esaika hap topy­huꞌat kahato ahepe. Kat e hap kat e hap wakuap koꞌi tutum epe emohey haype. Miꞌi koꞌi o etat kahato etomoheg kahato ewanẽtup hawe uhaꞌyru.

"

¹⁵ Uhyt Wikeru iꞌewyte uhyt Emosene yi Asia piaria uiꞌatoiat raꞌyn iꞌewyte itotiaria iraniaꞌin yt iꞌatu­wese i raꞌyn uhete."

¹⁶ Maꞌato mehĩ Onesi­wuru ti yt uiꞌatoiat hin i pãi. Uipo­wyro kahato miꞌi. — Tupana are etum o wakuap yn aiwy Onesi­wuru pe imẽpytꞌin me are torania iꞌyaty­piaria wywo karania wo etum o wakuap Tupana are. Taꞌi uimo­wepit hat kahato miꞌi. Yt tokenꞌẽ hin i uipyhik hap pupi. Tut tuereto uipyhik hap kape. Yt tuwe­mõti hin i — Uito Pauru ekatuwy toꞌe hamo."

¹⁷ Putꞌokꞌe Huma pe hawyi yt toikuap i aiũpe uipyhik hap tawa Huma piat hap maꞌato miꞌi pytkai uikat kahato. Meremo putꞌok­toꞌe itotiat hawyi miꞌi hawyi uipuẽti."

¹⁸ Tupana ahẽtup aiwy Onesi­wuru upi. Etum egyiꞌat kahato hap Onesi­wuru pe are. Etiꞌa­tu­moe­hãite iꞌyaty­piaria wywo are yn. Pyno Iesui tut turan atiky­ꞌesat Onesi­wuru pe haꞌup ikahu rakat are Tupana pe. Pywo etikuap kahato raꞌyn Timoteu aikotã saꞌa­wyꞌi areĩneꞌen tawa Ewesu piat turanuat uipo­wyro kahato hat Onesi­wuru topy­huꞌat itote. Miꞌi hawyi ipoityro hap ahẽtup kahato Tupana kaipyi uito Pauru.

"

2

¹ Timoteu Aipo­typot Iesui hegyiꞌat kahato tesaika hap ium ahepiat hamo. Miꞌi hap kaipyi ereĩneꞌen hemiit hesaika kahato rakano hap wẽtup piit ieĩneꞌen hap ewy raꞌyn ereĩneꞌen iwywo."

² Uimienoi kuap kahato hat en uhaꞌyru katu­pono uiwywo yn ereĩneꞌen uipot­muꞌe turan. Yt etiwaure teiꞌo uiꞌe hap maꞌato etomo­herep yne o Iesui mohey kahato haria pe — Imohey hap yt atoiat hin i haria pe. Ahaipe­piaria piat uimienoi moherep hanuat ereĩneꞌen.

"

³ Aikotã surara tuwe­mo­so­ꞌo­potꞌi hap ewy eremo­so­ꞌopot uhaꞌyru. Surara sese ewy o ereĩneꞌen Iesui emiit wakuano."

⁴ Katu­pono ti topotpap hawe ti surara tiky­ꞌesat topo­ꞌoro hat mowepit hap yn toiky­ꞌesat. Miꞌi pote toto topo­ꞌoro hat miky­ꞌesat nug hamuat. Saꞌa­wy­ꞌiwuat tekat koꞌi kape yt tuwe­wa­nẽtup i raꞌyn maꞌato tuwa­nẽtup surara akag miat topo­ꞌoro hap kape yn. Miꞌi hap ewy ro ereĩneꞌen Aipo­typot piat epoꞌoro hap ewy."

⁵ Karãpe aheput hap ete wato­ꞌoiãꞌãg hap ewy uwe poꞌog ihyha hap kuap hamo waku hãpyk kahato rakat morekuat piat ainãpin hap ewy waku watunug. Yt miꞌi hap ewy i pote yt uwe i miꞌi poꞌog iꞌatuꞌe ahepe aihyha pytkai. Maꞌato iꞌe hap ewy wateput miꞌi pote miitꞌin mimõ­typot no watoĩ­neꞌen. Miꞌi hap ewy ti waku watoĩ­neꞌen hãpyk kahato imohey hap ete toꞌo­ꞌe­wywuat seput kahato haria ewy Timoteu."

⁶ Karãpe — Aiwe­so­ꞌo­potꞌi popuo watikoi aiko watoꞌe miꞌi rokirẽ ti maꞌato karãpe haat hawyi aiwano topy­huꞌat saꞌa­wy­ꞌi­tewuat haat. Miꞌi hap ewy ti Iesui ehay upi waku watu­we­so­ꞌo­potꞌi popuo watu­we­potpap."

⁷ Erewa­nẽtup to uimienoi kape Timoteu. Miꞌi pote ti aru Aika­ꞌiwat tum epiat wuatꞌi etiat kuap hamo.

"

⁸ Timoteu ewatetup o Aika­ꞌiwat Iesui kape. Taꞌi miꞌi ti morekuat Tawi emiariru Emiariru sese. Miꞌi Miit Tupana mimoieĩ­neꞌen pakup i raꞌyn hat ahenoi wuatꞌi puo."

⁹ Miꞌi mienoi upi ti ahoꞌopot te. Uipoꞌi poꞌi raꞌyn haity wo woꞌo­ꞌauka hat ewy. Uito uipyhik kuap maꞌato Tupana ehay ti yt uwe i ipyhik kuap yt uwe i iꞌakit kuap."

¹⁰ Maꞌato yt uiwẽ­pohep hin i Iesui mohey hap ete wãiꞌi­ꞌa­tuꞌe pytkai. Uiꞌauka pote uiꞌauka maꞌato yt uipohep hin i te. Katu­pono Tupana tiꞌa­tue­ha­kye­raꞌat teran kahato tomi­ꞌai­roria ahoꞌopot kahato Iesui mohey iꞌatuepiat hamuat pytkai. Miꞌi hap kaipyi Tupana tiꞌa­tue­ha­kye­raꞌat miꞌiria. Miꞌi hawyi Iesui kahu hap ewywuaria raꞌyn tukup­teꞌen iwywo wuatꞌi eꞌat pe raꞌyn."

¹¹ — Uiku­ꞌuro pote uiku­ꞌuro maꞌato yt woro­ꞌatoiat Tupana watoꞌe pote watoĩ­neꞌen iwywo wuatꞌi eꞌat pe waku watoꞌe. Hãpyk kahato sehay miꞌi."

¹² — Iwywo waho­ꞌopot pote iwywo morekuat no watoĩ­neꞌen waku watoꞌe maꞌato — Atoiat Iesui mohey hap watoꞌe pote iꞌewyte — Yt uimohey hat i meiẽ e ahepe e."

¹³ Watoiat pytkai yt aiꞌatoiat hin i. Yt aiꞌatoiat i kat pote yt heso i. — Yt karãpe i ti aru woro­ho­ꞌo­ꞌatoiat e. Miꞌi e hap koꞌi ti aimi­mohey wuat watoꞌe waku kahato.

"

¹⁴ Timoteu etiꞌa­tu­nãpin no haty wo epotmu­ꞌeria — Tupana yt tiky­ꞌesat i wyti aiwo­ꞌoe­wa­nĩkap hap neꞌi watunug tehay enoi turanuat hap. Yt kan hamo i watu­ꞌuka sehay hit kuap hap ete e maꞌato aiwu­ꞌuka i pote ti yt kat i aiwo­ꞌo­wehik hap itote ere o. Eweꞌeg wo o miꞌi hap pupi katu­pono Tupana toĩneꞌen aipy­ꞌa­setpe aiwa­ꞌa­tunug turan."

¹⁵ Eremuꞌe kahato at kaꞌap Tupana ehay enoi hãpyk hamuat hap ete. Yt epohep hin i o Tupana miky­ꞌesat nug hamuat. Miꞌi hawyi — Waku kahato epotpap uhepiat hap e Tupana epe. Miꞌi hawyi yt eremõti hin i Tupana pupi hãpyk kahato epotmuꞌe tehay sese wuat pote."

¹⁶ Waku watoiat kahato yt aiweꞌeg i hap aiwo­ꞌoꞌehay wuat wuꞌuka hap aiwo­ꞌo­muꞌe turanuat hap katu­pono miꞌi hap yt kan hamo i maꞌato watunug miꞌi neꞌi pote Tupana tuwe­mõti aipupi iꞌewyte wati­ꞌa­tu­putsit neꞌi iraniaꞌin Tupana kuap teran hap kaipyi."

¹⁷ Uhyt Imeneu uhyt Wiretu miꞌiria tuꞌuka kahato sehay wo aiwo­ꞌo­muꞌe turan. Yt ikahu hin i iwuꞌuka hap. Haty kahato aiwo­ꞌo­kyꞌe hap ete. Topy­huꞌat aikotã ahepihi haty kahato hap ewy. Sehay wuat iwuꞌuka hap miitꞌin woꞌo­ꞌatoiat hap ewy. Yt kan hamo i watu­ꞌuka sehay wo."

¹⁸ Haꞌa­wyte aimuꞌe haria uhyt Imeneu uhyt Wiretu pywo sehay upiat haria tukup­teꞌen wen maꞌato mio ti taꞌa­tu­ꞌatoiat raꞌyn. Miꞌi hawyi wẽtup sehay kape — Tupana tiꞌa­tu­hymut kahu raꞌyn map haria iꞌatuꞌe. Mio tuwat raꞌyn yne raꞌyn Iesui upi iꞌatuꞌe. Mio tã iꞌatuꞌe pote aimogyt kahato ahepiat imohey hap etiat waure­wa­toꞌe pote. Iꞌatuepiat aimuꞌe hap toĩneꞌen aikotã hepihi wato yt uwe i imog kuap hap ewywuat are. Satꞌe raꞌyn iraniaꞌin ete hap ewy."

¹⁹ Maꞌato aito yt watoiat hin i te pywuat sehay mohey hap katu­pono Tupana saꞌy­ruꞌin saki­ꞌytꞌin aito. Watunug iꞌyat iheg nakano pote yt taꞌat i. Miꞌi hap ewy wato­mohey kahato. Pywo kahato pote yt watoiat i. Aikotã Tupana toꞌe saꞌa­wyꞌi hap ewy — Woro­ho­ꞌokuap ti eipe uimẽ­pytꞌin e. Iꞌewyte uwe uwe toꞌe — Uito Tupana wano e miꞌi hat pe — Pyno eminug saꞌag etoiat yne e Tupana.

"

²⁰ Hekat rakat yat koro pe tukup­teꞌen kahato seiam koꞌi yt toꞌo­ꞌe­wywuat ewywuat rakaria i. Iraniaꞌin wuatꞌi eꞌat piat ahenuk hap maꞌato iraniaꞌin aiwy­riaꞌin sese poi hap ewy tukup­teꞌen. Miꞌi koꞌi yt wẽtup kawiat yn i irania kuiꞌa kawiat irania yi kawiat irania hekat rakat kawiat imehit rakat. Miꞌi koꞌi heiam wati­puẽti getap wato pe."

²¹ Watoiat yne saꞌag nug hap pote hekat rakat kuiꞌa ewy watoĩ­neꞌen ekuiꞌa wo iꞌyat koro pe ikahu kahato imowepit kahato hamo. Miꞌi hawyi — Waku ti rat uimi­ky­ꞌesat nug hamo en e ahepe Tupana. Miꞌi hawyi Tupana emiit sese wo watoĩ­neꞌen. Miꞌi hawyi kat koꞌi kat koꞌi imiky­ꞌesat yn naꞌyn watung."

²² Timoteu yt erewa­nẽtup teiꞌo emotag hap turan epiit miky­ꞌesat saꞌag nug hamuat kape maꞌato meremo o etoiat. Erepik meremo o miꞌi hap kaipyi hãpyk nug hap kape Tupana mohey hap kape woꞌo­kyꞌe hap kape woꞌo­wese nug hap kape iraniaꞌin Iesui mohey haria upi urupo­wyro Tupana e haria upi wanẽtup kahu haria upi."

²³ Uhaꞌyru tukup­teꞌen kahato ti sehay wuat wuꞌuka teran haria yt kan nuat i ihay rakaria. Miꞌiria pe waku u pãi u an watoꞌe yn naꞌyn iꞌatuehay pe. Yt wati­ꞌa­tu­wesat i raꞌyn iwuꞌuka hap sehay enoi pote."

²⁴ Katu­pono yt uwe i Aika­ꞌiwat eropat hat wakuat wuꞌuka hano toĩneꞌen. Maꞌato hemiit sese ti iwese yne miitꞌin ete. Woꞌo­muꞌe kuap kahato hat yt ipyꞌahak hin i maꞌato hepamo ikuap haria ete Tupana eropat hat."

²⁵ Hepamo towese popuo toiꞌa­tu­nãpin kuap kahato ipyꞌahak teran tetiat rakaria. Etiꞌa­tu­muꞌe mio tã iraniaꞌin mote meiũran Tupana tum kuap iꞌatuepe paaꞌi­ꞌa­tuꞌe hamuat taꞌa­tu­ꞌatoiat mono taꞌa­tu­minug saꞌag — Pywo raꞌyn taꞌa­tuꞌe haype."

²⁶ Miꞌi hap kaipyi ti aru teꞌe­ra­ꞌaipok taꞌyn taꞌa­tu­mo­weꞌeg hap kape. Miꞌi hawyi ti aru toiꞌa­tue­ha­kye­raꞌat raꞌyn ahiag ewamiri pyi aikope ahiag miky­ꞌesat yn taꞌa­tunug. Miꞌi hap kaipyi wati­ꞌa­tu­muꞌe wanĩ­kaptia aiwese kahato hap wywo wati­ꞌa­tu­muꞌe. Miꞌi hap ewy waku watunug Timoteu are uito eꞌywot Pauru.

"

3

¹ Timoteu niatpo ti aru watoĩ­neꞌen wuatꞌi saꞌag nug haria eꞌat putꞌokꞌe turan katu­pono imohey haria piat hoꞌopot hap eꞌat mekewat eꞌat pe."

² Katu­pono mekewat eꞌat pe yt hegyiꞌat i rakaria tukup­teꞌen kahato — Ewat uiano yne iꞌatuꞌe. Uito poꞌog ekai e haria. Uito poꞌog atikuap ekai iꞌatuꞌe. Toꞌo­ky­ryꞌi kahato Tupana ete. Iꞌatuehay taꞌa­tu­ꞌywot taꞌa­tuty piat yt taꞌa­tu­mohey hin i. Etum neꞌen neꞌi ikahu rakat iꞌatuepiat hawyi — Waku yt iꞌatuꞌe hin i egyiꞌat hawe. — Yt kat i Tupana iꞌatuꞌe i."

³ Yt uwe etiat i iwese rakaria miꞌiria. Ehaky­ꞌeꞌi hap yt kuap i haria. Taꞌa­tu­mo­weu­kaꞌi yn miitꞌin. Meremo wuꞌuka teran haria haiwot rakaria wakuap nug hat etiat ipyꞌahak takaria."

⁴ Taꞌa­tu­wy­riaꞌin maꞌatꞌi maꞌatꞌi hanuaria wo i tukup­teꞌen. Iꞌatu­hu­haiꞌi yn tukup­teꞌen. — Uito poꞌog e hap yn iꞌatu­wa­nẽtup hawe. Taꞌa­tu­wepit hap kape yn teꞌe­ru­wa­nẽtup. Yt Tupana mowepit hap yt kape i teꞌe­ru­wa­nẽtup."

⁵ Teꞌe­ru­wa­ꞌa­tunug Tupana mõtypot hamo maꞌato yt pywo pe i. Yt taꞌa­tu­ky­ꞌesat hin i Tupana esaika hap taꞌa­tu­mo­pakup i hamuat. Miꞌi ewywuaria ti aru pywo tukup­teꞌen kahato. Miꞌi tupono o eroꞌoksep yn naꞌyn miꞌi haria pupi. Eiweꞌeg wo o miꞌi haria ewamiri pupi."

⁶ Hary­poria yat pe yt weꞌeg i hat yat pe tuwe­hytꞌok yt uwe mikuap mo i wẽtup sehay wuat imuꞌe hamo imaꞌat hamuat haype. Taꞌa­tu­maꞌat kuap kahato katu­pono mekewat hary­po­riaꞌin yt iꞌatoiat teran hin i taꞌa­tu­minug yt taꞌa­tu­weꞌeg i hap koꞌi. Miꞌi hary­poria ikyꞌesat kahato teha­kye­raꞌat Tupana piat hap maꞌato yt totoiat teran hin i tominug yt naku i yt iweꞌeg i hap koꞌi pytkai."

⁷ Pywuat sehay atikuap teran iꞌatuꞌe wen maꞌato yt taꞌa­tukuap i taꞌa­tu­muꞌe kahato pytkai."

⁸ Aikotã saꞌa­wyꞌi pywuat sehay pun haria mehĩ Iane iꞌewyte mehĩ Iãpere ewywuat gupteꞌen haria miꞌiria. Saꞌa­wyꞌi miꞌiria Musei ehay pywuat yt taꞌa­tusat i. Miꞌi haria ewywuaria ti aru mesuwe tukup­teꞌen aru. Yt teꞌe­ru­wa­nẽtup kuap i pywuat sese sehay kape katu­pono taꞌa­tuepiat imohey saꞌa­wy­ꞌiwuat hap taꞌa­tupun neꞌi."

⁹ Aima­ꞌatꞌi maꞌatꞌi hap kaipyi wuatꞌi miitꞌin tiꞌa­tukuap taꞌyn woꞌo­maꞌat haria wo miꞌiria. Aikotã saꞌa­wyꞌi Iane Iãpere ewywuaria miꞌiria.

"

¹⁰ Maꞌato en yt miꞌiria ewywuat hin i Timoteu katu­pono en uhaipepiat kahato emuꞌe uhepiat hap ewy kahato nug hat en. Uiminug wakuat e hamuat ewy kahato nug hat en. Uipy­ꞌãtap upiat ewyry raꞌyn. Iesui mohey uhepiat hap upi hewyry motꞌi kahato rakat raꞌyn en. Yt uihyha i hap upi hin i ewyry en. Uhepiat miitꞌin kyꞌe hap upi uhepiat hoꞌopot hap kuap hamo ewyry raꞌyn."

¹¹ Iꞌewyte etikuap kahato iꞌatu­mi­ky­ryꞌi uhatyꞌi hatyꞌi hap koꞌi. Saꞌa­wyꞌi karãpe areĩneꞌen tawa Atiokia pe tawa Ikuniu pe tawa Iritara pe taꞌa­tu­mi­ky­ryꞌi saꞌag kahato uhete. Uhatyꞌi hatyꞌi uimo­so­ꞌopot uimo­ha­ky­ꞌeꞌi maꞌato uipo­re­ro­kosap neꞌi Uika­ꞌiwat Iesui."

¹² Uwe uwe topy­huꞌat teran Aika­ꞌiwat Iesui ewy hewaku hap ewy miꞌi hat wyti miitꞌin miky­ryꞌi hamo topy­huꞌat miitꞌin misa­tyꞌi satyꞌi wo topy­huꞌat."

¹³ Maꞌato miitꞌin saꞌag nug haria woꞌo­ma­ꞌatꞌi maꞌatꞌi haria ti aru poꞌog poꞌog tuwe­mo­herep. Iꞌatu­minug saꞌag kaipyi meiũran poꞌog saꞌag teꞌe­ro­py­huꞌat. Miꞌi hawyi wuatꞌi maꞌat hamo teꞌe­ro­py­huꞌat. Iꞌewyte miꞌi hawyi wuatꞌi miitꞌin maꞌat hano teꞌe­ro­py­huꞌat."

¹⁴ Maꞌato Timoteu yt atiky­ꞌesat i en miꞌi tã ereĩneꞌen. Maꞌato uhepiat emuꞌe hap ete at kaꞌap ereĩneꞌen poꞌog poꞌog katu­pono saꞌa­wy­ꞌite miꞌi hap ete pywo haty wo eremuꞌe. Miꞌi hap ewy te mesup etimohey te Timoteu katu­pono etikuap sese raꞌyn uiwẽ pywiat emuꞌe hap."

¹⁵ Katu­pono ehire pyi te etikuap Tupana ehay miwan miat hap ete pywuat sese hap kaipyi etipuẽti Ekaꞌiwat Iesui etiat kuap hamuat. Katu­pono yianmete taꞌa­tu­henoi Aika­ꞌiwat Iesui etiat. Miꞌi hap kaipyi ti wati­puẽti aiweꞌeg hap Iesui mohey hamuat. Miꞌi hawyi wato­mohey hawyi aheha­kye­raꞌat hap topy­huꞌat."

¹⁶ Wuatꞌi yianmiat Tupana ehay miwan miat tuwẽtem hemiitꞌin wẽ pyi Tupana Pãꞌãu ihay. Waku kahato aimuꞌe pywuat sehay wo. Ainãpin kahato kat som waku watunug iꞌewyte aimuꞌe kahato saꞌag kaipyi aipo­re­ro­kosap hamo wakuap yn nug hamo aimuꞌe."

¹⁷ Aimo­hãpyk kahato hamuat Tupana ainãpin tehay wo. Toꞌe hap kaipyi Tupana tiꞌa­tu­moe­saika kahato teropat haria wuatꞌi sepap hap kuap yne hamo wuatꞌi wakuap nug hamo are epe eꞌywot uito Pauru.

"

4

¹ Pyno Timoteu woro­nãpin kahato haty wo Tupana ehamo Aipo­typot Iesui ehamo — Etimohey kahato o Tupana ehay ereꞌe o epotmu­ꞌeria pe. Yt ewẽpohep hin i neiꞌo miꞌi hap ete. Yt epohepap pytkai i yt epohep teiꞌo iꞌatu­muꞌe hap ete. Katu­pono tut irane Aika­ꞌiwat uwe waku uwe yt naku i rakaria hap enoi hamo ihãite rakaria kape iꞌewyte map haria kape."

² Yt etoiat reiꞌo ihay moherep hap. Wãi ere o miitꞌin minug saꞌag koꞌi ete. Yt eweipun neiꞌo ehepiat imohey hap ere o wuatꞌi pe. Eiwepit ro ere o epotmu­ꞌeria pe. Yt kat i iꞌatu­mõ­py­ꞌahak hap wywo maꞌato hepamo perupꞌi wo etiꞌa­tuekyi kahato ro emienoi wo Tupana kape katu­pono tut irane wuatꞌi Porekuat no emienoi wo."

³ Pywo ti aru meiũran aimi­mu­ꞌeria yt tiky­ꞌesat i kahato taꞌa­tu­muꞌe hãpyk takanuat hap. Miꞌi haype ti aru — Wãiꞌi­ꞌa­tuꞌe yt he i iꞌatuꞌe yt watu­wa­nẽtup teran i mio tã e hap kape iꞌatuꞌe aimuꞌe ihãite rakat etiat hap ete. Miꞌi hawyi ti aru taꞌa­tu­mi­ky­ꞌesat ewywuat taꞌa­tu­muꞌe haria taꞌa­tukat."

⁴ Iꞌatue­waure kaꞌa yt kat i raꞌyn sehay pywuat kape. Taꞌa­tu­ky­ꞌesat yt taꞌa­tu­weꞌeg i hap haype."

⁵ Maꞌato en Timoteu eweꞌeg wo o mio tã iꞌatuꞌe hap kai. Yt eremoe­ha­ma­naꞌi teiꞌo maꞌato Tupana ehay pywuat sese po pe ereĩneꞌen o. Epiat hoꞌopot pytkai yt ewẽpohep teiꞌo. Maꞌato en woro­ky­ꞌesat wuatꞌi puat Tupana ehay wakuat sytpok hamo. Etimoehãite yne o epotpap Tupana miium epiat uhaꞌyru.

"

⁶ Aikotã aihũ wati­ꞌauka Tupana mõtypot hamo hap ewy uito porap putꞌokꞌe raꞌyn uiku­ꞌuro hap Tupana mõtypot hamuat hap pãi."

⁷ Surara wakuat ewy uipotpap uiꞌakag Iesui miky­ꞌesat ete. Seput hap etiat poꞌog ihyha rakat ewy areĩneꞌen. Iraniaꞌin taꞌa­tu­ku­ꞌuro hap pupi teꞌe­ro­kenꞌẽ kahato i maꞌato uito yt miꞌi hat i. Iraniaꞌin aipok haria neꞌi maꞌato uito putꞌok­ꞌare aheput hap ete. Miꞌi hap ewy areĩneꞌen imohey hap mywo."

⁸ Karãpe wateput turan seput hat akag toꞌe — En poꞌog ihyha rakat e wuatꞌi ehamo. Miꞌi hap ewy ti meiũran Aiꞌakag Iesui toꞌe irane uhepe — En ni wakuat kahato Tupana wanẽtup hawe e irane uhepe maꞌato yt uhepe yn i maꞌato iꞌewyte uwe uwe tokyꞌe haria pe torania — Atiꞌa­tu­ky­ꞌesat Iesui taꞌaipok i e haria pe."

⁹ Timoteu atiky­ꞌesat kahato eriot uhowawi. Miꞌi tupono yne esaika hap mywo eriot meikowo uhaꞌyru."

¹⁰ Katu­pono aiwy Tema uiꞌatoiat raꞌyn. Kat pote tekat poꞌog kyꞌesat Tupana kawiat haype. Miꞌi pote tawa Tesa­ro­nika kape toto. Aiwy Kesente toto yi Karata kape. Titu ti toto raꞌyn tawa Taumasia kape miꞌi tupono waku eriot meikowo."

¹¹ Maꞌato aiwy Iruka yn ti topy­huꞌat uiwywo. Timoteu atiky­ꞌesat etikat o aiwy Maku miꞌi hawyi eterut ewywo eut turan katu­pono miꞌi waku raꞌyn aipo­wyro aipotpap etiat hamo."

¹² Uhyt Tikiku ti atipo­ꞌoro tawa Ewesu kape."

¹³ Timoteu atoiat uheka­misa wato uipysop uhyt Kapu yat pe tawa Turate piat. Miꞌi atiky­ꞌesat eterut hap eut tuwywo. Iꞌewyte miwan koꞌi itote tukup­teꞌen. Miꞌi iꞌewyte eterut o wy. Atiky­ꞌesat poꞌog ipe totiat miwan.

"

¹⁴ Uhyt Aresã­tere yne imehit rakat tupa­naria iãꞌãkap koꞌi nug hat etiat uimaꞌat kahato hat. Uimo­so­ꞌopot kahato miꞌi. Taꞌi haiwot kahato aipot­muꞌe hap ete. Toimoma teran uipot­muꞌe hap."

¹⁵ Pyno eweꞌeg wo o ipupi. Waku wahẽtup Tupana kape — Etipoepyk to Aresã­tere iminug saꞌag ok tã urumaꞌat hap ok tã haꞌup iminug saꞌag waku watoꞌe Tupana pe.

"

¹⁶ Miꞌi hap eꞌat pe yt iꞌatu­wese hin i uhemiitꞌin ran koꞌi. Yt uipo­wyro i haype. Yt naku i atipuẽti sehay wuat haria uhemiitꞌin uiꞌatoiat yne. Miꞌi hawyi uiꞌatoiat uiwy­riaꞌin wanĩ­kaptia pyꞌa­setpe uito waku sio yt e hamo. — Tupana waure wo ereĩneꞌen uiwy­riaꞌin uiꞌatoiat haria kai are Tupana pe."

¹⁷ Uiꞌatoiat maꞌato Aika­ꞌiwat yt uiꞌatoiat hin i. Tutum uhepe tesaika hap tehay wakuat enoi hamuat. Taꞌi Tupana uheha­kye­raꞌat uiꞌauka tet pupi aikotã aihũ wati­ka­wiano awyꞌato pupi hap ewy."

¹⁸ Taꞌi Aika­ꞌiwat uheroꞌok kuap kahato uiꞌauka teran haria po pyi uimaꞌat teran haria tok pyi. Miꞌi hawyi uiꞌãuka iꞌatu pupi. Tetama atipy piat pe uhereto. — Arehum at kaꞌap ewawi Tupana. Ekahu kahato En are aru wuatꞌi eꞌat pe. Taꞌi miꞌi tã wyti pyno."

¹⁹ Uhekue­katu atipo­ꞌoro mehĩ Akuira kape iharyꞌi Pisira kape. Iꞌewyte kuekatu mehĩ Onesi­wuru pe torania iꞌyaty­piaria kape."

²⁰ Uhyt Eratu topy­huꞌat tawa Kurintiu pe. Aiwy Towimu atimõ­py­huꞌat tawa Miretu pe kat pote iꞌahu pote.

"

²¹ Atiky­ꞌesat eriot mesup uhowawi Timoteu iꞌaman mot ewakai te.

Eyke­ꞌetꞌin Iesui mohey haria Eũpuru Putensi Irinu iꞌewyte mana Kautia iꞌewyte torania meiũpiaria Iesui mohey haria kuekatu iꞌatuꞌe ewawi.

"

²² Atiky­ꞌesat ihãite kahato ehepiat imohey hap. Miꞌi hap ahẽtup Tupana pe — Etum o Timoteu pe egyiꞌat hap are ti Tupana pe.

Pyno toran naꞌyn. Uito Pauru"