1

¹ Timoteu koitywy atipo­ꞌoro uimiwan ewawi. Uito ti Pauru mekewat Aipo­typot Iesui ehay moherep hat. Uito ti Aheha­kye­raꞌat hat Tupana potpo­ꞌoro pãi. Aimie­katup Iesui potpo­ꞌoro uito pãi."

² Timoteu uhaꞌyru sese ewy kahato ereĩneꞌen katu­pono saꞌa­wyꞌi ereĩneꞌen Iesui mohey hano uimienoi kaipyi pote are. Miꞌi tupono ahẽtup kahato Tupana pe eupi — Uiꞌywot erahaꞌat Timoteu kape ihaky­ꞌeꞌi hap wywo are. Etum o tope yt kat saꞌup i egyiꞌat hap. Iwanẽtup hap wẽtup yn etum iwepit hamuat are Tupana pe eupi.

"

³ Pyno mesup ahẽtup i raꞌyn eupi Timoteu tawa Ewesu piat ereĩneꞌen hamuat. Aikotã saꞌa­wyꞌi ahẽtup ewawi karãpe areto yi Masẽ­tunia kapiat turan — Ereĩneꞌen no tawa Ewesu tote mekewat itotiaria sehay yt pywo rakat i enoi haria ewãi hamo."

⁴ Atikuap koitywy tukup­teꞌen itote Iesui mohey haria sehay potꞌi enoi haria kat ywania kat ywania kat set kat set koꞌi enoi haria. Miꞌiria pe waku wãiꞌere — Wẽtup sehay upi neꞌi pote ti aru yt karãpe i Tupana miky­ꞌesat nug hamo eweikup­teꞌen katu­pono Iesui mohey kahato hap yn Tupana miky­ꞌesat ewy."

⁵ Yt naku i ti watu­ꞌuka sehay potꞌi ete ereꞌe o itotiaria pe katu­pono Tupana tiky­ꞌesat aiwo­ꞌo­wese ahehay wuat hap ereꞌe o iꞌatuepe. Wẽtup wanẽtup hap wywo yn waku wato­ꞌo­kyꞌe ereꞌe o. Yt iꞌatuekat kyꞌewi i ti wato­pot­kyꞌe ereꞌe o. Waku wato­ꞌo­kyꞌe wẽtup sok yn aito Iesui mohey haria aito pote."

⁶ Yt kan hamo i sehay wo watu­ꞌuka. Maꞌato mio tã watu­ꞌuka hap watunug mote aiwo­ꞌo­wese hap moma hamuat hap topy­huꞌat. Miꞌi pote waku ehenoi itotiaria pe — Yt eiwu­ꞌuka teiꞌo sehay wo ere. Miꞌi tã ewetunug mote yt kat i aiwo­ꞌo­wese hap toĩneꞌen meiũpe. Waku poꞌog watunug aiwo­ꞌo­wese hap miꞌi hawyi aiwa­nẽtup hap ikahu kahato rakat topy­huꞌat waku ere. Iꞌewyte Iesui mohey haria sese wato­py­huꞌat waku ereꞌe o itotiaria pe Timoteu."

⁷ Iraniaꞌin ikyꞌesat kahato miitꞌin muꞌe hamo Tupana mienoi Musei piat hap maꞌato yt taꞌa­tukuap i kat e kat e hap pytkai i. — Waku uruto yn eiꞌa­tu­muꞌe hanuaria wo iꞌatuꞌe taꞌa­tuehay pirik wo yt taꞌa­tukuap i taꞌa­tuꞌe hap koꞌi pytkai.

"

⁸ Tupana piat ainãpin saꞌa­wy­ꞌiwuat hap waku kahato wati­ꞌa­tu­muꞌe. Hãpyk kahato wati­ꞌa­tu­muꞌe pote ti aipo­wyro kahato wakuap nug hamo."

⁹ Wakuap nug haria tiky­ꞌesat kahato Tupana piat tonãpin hap. Maꞌato iraniaꞌin saꞌag kyꞌesat hap nug haria yt ikyꞌesat hin i Tupana ehay wuat kat pote yt nakuaria i pote he kahato iꞌatuepe iꞌatu­minug saꞌag koꞌi. Maꞌato ti miꞌiria pe Tupana tum iꞌatuewãi e hamuat. Maꞌato waku hap nug haria yt kat i raꞌyn Tupana miium wãiꞌe hap kat pote toiky­ꞌesat wakuap nug hap yn pote. Yt woꞌoewãi kuap i haria nãpin hamo Tupana tum wãitoꞌe hap. More­kuaria woꞌo­nãpin hap pun haria nãpin hamo tutum wãitoꞌe hap. Mekewat yt kat i Tupana e haria nãpin hamo tutum wãitoꞌe hap. Yt naku i nug haria pianuat tutum wãitoꞌe hap iꞌewyte yt karãpe i Tupana kapiat wanẽtup teran haria tutum wãitoꞌe hap. Toꞌywot toty auka haria woꞌo­pot­ꞌauka hat nãpin hamuat tutum wãitoꞌe hap."

¹⁰ Wuatꞌi hary­poria wywuat wuatꞌi ihainia wywuat ieĩneꞌen haria nãpin hamuat tutum wãitoꞌe hap. Iꞌewyte woꞌopiat woꞌo­pytyk piat ewãi hamuat ihainia toꞌope iꞌewyte hary­poria toꞌope miꞌi e haria ewãi hanuat. Iꞌewyte miitꞌin eroꞌok haria pianuat heso rakaria nãpin hanuat tutum. Woꞌo­kuasa i kuasa i haria nãpin hanuat tutum wãitoꞌe hap. Toĩ poꞌog meimẽwat kai saꞌag nug hap koꞌi. Yt ahenoi kuap yne i. Miꞌi tupono miꞌi hap nug haria wãiꞌe hamo Tupana tum naꞌyn iꞌatu­nãpin hap hãpyk kahato rakat."

¹¹ Tupana ewaku hap ewywuat yt kat i miꞌi rẽ wati­puẽti. Yt uwe i ikahu hap ewy topy­huꞌat iꞌewyte yt kat i ikahu iwat ihay ewywuat. Miꞌi e hap yn ahytpok wuatꞌi puo. Iꞌe uhepiat hap yn ahenoi miitꞌin me pãi.

"

¹² Pyno uiwepit kahato arehum kahato Aika­ꞌiwat Iesui ete Wuatꞌi Porekuat ete katu­pono Miꞌi hum tesaika hap uhepe tehay moherep hamuat. Arehum kahato tuwete katu­pono uiꞌairo teꞌe­ropat hat miitꞌin muꞌe hamuat."

¹³ Saꞌa­wyꞌi te yt atimohey i te turan atere­mõ­pusu kahato Iesui. Atiꞌa­tu­sa­tyꞌi satyꞌi kahato hemiitꞌin. Miꞌi turan ne uhehay saꞌag Iesui ete. Yt imohey i hap kaipyi areĩneꞌen saꞌag Iesui ete. Yt uiweꞌeg hin i haype maꞌato miꞌi pytkai uikyꞌe hap wywo ihaꞌat uhowawi. Yt atikuap i kahato atunug saꞌag mekewat eꞌat piat."

¹⁴ Sakpoꞌe hegyiꞌat kahato rat uhepe pãi Uika­ꞌiwat uheĩneꞌen ne wanĩkap nuat turan. Miꞌi hawyi tutum tomohey hamuat hap uhepe. Koitywy iwywo wẽtup piit hap ewy yn naꞌyn urutu­kup­teꞌen."

¹⁵ Timoteu ahenoi teran epe sehay pywuat sese rakat sakpo aimi­mohey wuat. Mio tã are Aika­ꞌiwat Iesui tuwe­mo­herep mesuwe yi tote yt nakuaria i atueha­kye­raꞌat hamo tuwe­mo­herep. Miꞌi atikuap kahato katu­pono uito poꞌog yt nakuat i wuatꞌi kawiat pãi are."

¹⁶ Maꞌato miꞌi pytkai Tupana uikyꞌe kahato yt kat i uhewaku hap upi. Tuwe­kai­pywiat tegyiꞌat hap moherep hamo uheha­kye­raꞌat. Koitywy ti iraniaꞌin uiꞌe­wy­wuaria saꞌag nug haria tikuap taꞌyn Tupana tiꞌa­tue­ha­kye­raꞌat kuap torania yt naku i nug haria hap. Miꞌi tupono ti aru wuatꞌi miitꞌin saꞌag nug haria — Pyno uito uheha­kye­raꞌat kuap wy iꞌatuꞌe. Uheha­kye­raꞌat Tupana piat hap atikuap taꞌyn iꞌatuꞌe irane."

¹⁷ Uruꞌywot Tupana uruimõ­typot at kaꞌap En iꞌatuꞌe. Urupo­typot koro wuatꞌi eꞌat piat En iꞌatuꞌe Tupana piat uheha­kye­raꞌat hap upi. Yt karãpiat i weityk hat En iꞌatuꞌe. Miitꞌin yt teꞌe­ra­ꞌa­kasa kuap i ewawi rakat En. Wẽtup Tupana yn ereĩneꞌen. Miꞌi rẽ yt kat i hin i Tupana toĩneꞌen iꞌatuꞌe hap upi. Miꞌi urumi­mõ­typot kahato En. Wuatꞌi kawiat poꞌog ikahu rakat En. Iꞌewyte wuatꞌi eꞌat piat ieĩneꞌen hat En pãi iꞌatuꞌe taꞌa­tukuap Tupana piat uheha­kye­raꞌat hap hawyi.

"

¹⁸ Uhaꞌyru sese ewy kahato ereĩneꞌen Timoteu. Miꞌi tupono woro­nãpin neran. Saꞌa­wyꞌi Tupana eꞌairo kahato Iesui mohey haria wẽ pyi. Itote toꞌe epe — En ni uimi­po­ꞌoro uhehay moherep hanuat e Tupana Pãꞌãu epe itote. Miꞌi hap o yt etiwaure teiꞌo. Waku etopytyk miꞌi e hap aikotã surara po pe moryꞌa wato hap ewywuat wanĩkap wywo wuꞌuka hamuat. Miꞌi e hap wywo o waku etuꞌuka ahiag e hap auka hamo woro­nãpin uhaꞌyru."

¹⁹ Uhaꞌyru atimoheg kahato o epiat Iesui mohey hap aikotã enãpin hap kape erewa­nẽtup kahato. Miꞌi hawyi etunug ewanẽtup hap kaipyi wakuap erenãpin hap ok tã katu­pono tukup­teꞌen epyꞌa­setpe yt naku i nug haria. Saꞌa­wyꞌi miꞌiria Iesui mohey haria tukup­teꞌen maꞌato taꞌa­tupun naꞌyn Iesui mohey hap taꞌa­tu­kawiat. Miꞌiria ti tukup­teꞌen hoꞌo­wasat rakaria ewywuaria aikotã aheꞌyara apyꞌat hap yt wati­puẽti i raꞌyn hap ewywuaria miꞌiria tukup­teꞌen yt kat i poꞌog Iesui mohey hap mio iꞌatukai."

²⁰ Typy ok ti miꞌi haria set mehĩ Imeneu hawyi Arisã­tere. Saꞌa­wyꞌi Iesui mohey haria tukup­teꞌen miꞌiria maꞌato koitywy Tupana moweu­kaꞌi hanuaria wo raꞌyn tukup­teꞌen — Pyno koitywy eipe ahiag eipo­rekuat no raꞌyn Satanai wanu­waria eipe are iꞌatuepe. Eiꞌa­piheg hap yn naꞌyn topy­huꞌat ehete. Miꞌi tupono ehera­ꞌaipok Iesui kapiat hap are iꞌatuepe uito Pauru.

"

2

¹ Timoteu enãpin sese hap ahenoi teran kahato epe. Pyno waku wahẽtup kahato Tupana pe wuatꞌi miitꞌin powyro hamuat hap — Tupana etum o ihaky­ꞌeꞌi rakaria pe iꞌatu­miꞌu iꞌatue­sokpe iꞌatuꞌyat waku watoꞌe motꞌi haty wo hum hap kape. Tutum hawyi — Waku kahato En Papai etum naꞌyn uimiẽtup ewy waku watoꞌe Tupana pe Timoteu."

² Iꞌewyte waku wahẽtup Tupana pe — Etiꞌa­tu­po­wyro o urupo­re­kuaria uruꞌakag koꞌi mesu­wa­ro­tiaria. Urupo­wyro kahato urutu­kup­teꞌen hap ete hamo meiũpe waku wahẽtup. Etiꞌa­tu­po­wyro uruieĩneꞌen hap wẽtup ehay yn hamuat. Yt karãpe i saꞌag uruete hamuat yt wẽtup ok i urupyhyp pyhyp wakuat nug hap ete emiky­ꞌesat nug wuatꞌi puat hamo. Etiꞌa­tu­po­wyro more­kuaria tuꞌi­saria waku kahato wahẽtup Tupana pe."

³ Mio tã wahẽtup pote wati­mo­wepit kahato Tupana aheha­kye­raꞌat hat."

⁴ Katu­pono toiky­ꞌesat kahato miitꞌin torania tomie­ha­kye­raꞌat nuaria tehay pywuat sese hap kuap hanuaria toiky­ꞌesat."

⁵ Wẽtup yn Tupana maꞌato yt uwe i miit ihay kuap iwywo katu­pono saꞌag nug haria yn pote maꞌato wẽtup miit ihay kuap iwywo. Aika­ꞌiwat Iesui ihay kuap iwywo katu­pono miit sese yt saꞌag nug hat i pote. Miꞌi ikuꞌuro woꞌo­wese nug Tupana wywo hap. Koitywy imohey hap upi ahehay kuap Tupana wywo."

⁶ Putꞌokꞌe raꞌyn aheha­kye­raꞌat hap eꞌat hawyi Aika­ꞌiwat ikuꞌuro raꞌyn aika­wiano hamo tuweium naꞌyn ahepe. Miꞌi kape wata­ꞌa­kasa raꞌyn hawyi watikuap kahato wuatꞌi ywania Tupana tiꞌa­tu­ky­ꞌesat kahato tomie­ha­kye­raꞌat no hap watikuap taꞌyn."

⁷ Yt uheso i ti pywo sese ti. Saꞌa­wyꞌi ti uimuꞌe Tupana mesuwat sehay wo Tosa­ꞌyru etiat — Etimo­herep to mesuwat uhehay wuatꞌi yt Iuteuria i iraniaꞌin ywania pe e. Uwe mesuwat uhehay pywuat mohey haria ti aru uimie­ha­kye­raꞌat no tukup­teꞌen e uhepe saꞌa­wyꞌi Tupana.

"

⁸ Timoteu atiky­ꞌesat kahato miitꞌin torania iꞌatuehay Tupana kapiat hap atiky­ꞌesat uito. Atiky­ꞌesat miꞌiria Tupana wanuaria wo yn hap. Atiky­ꞌesat miꞌiria tukup­teꞌen yt woꞌo­weu­kaꞌi hap mywo i maꞌato woꞌo­wese hap yn atiky­ꞌesat yt kat i saꞌag hap iꞌatu­wywo. Iꞌatuehay toꞌo­ꞌe­wy­ꞌewy wẽtup ehay yn hap atiky­ꞌesat.

"

⁹ Hary­po­riaꞌin atiky­ꞌesat kahato eweikup­teꞌen Iesui mohey haria kahato. Waku weꞌeg sese rakaria wo eweikup­teꞌen. Waku eiwe­painug hap ehesokpe hãpyk kahato rakano Iesui mõtypot hap eiwa­nẽtup hawe. Waku eiꞌasap iꞌewyte ehewahi ehesokpe imõtypot hap wywo yn ehete. Eiweꞌeg wo o mekewat — Uito poꞌog hekat rakat eiꞌe hap eiwe­painug hap pupi. Maꞌato waku ikahu rakano o eweikup­teꞌen imõtypot ehepiat hap ok tã."

¹⁰ Waku poꞌog maꞌato eiwe­painug eiwa­nẽtup hawe eiwese sese hap wywo iꞌewyte waku eweiwe­painug waku nug hap wywo — Uito Iesui mohey hat sese eiꞌe hap enoi hamuat."

¹¹ Karãpe ewaꞌa­tunug aiwo­ꞌo­muꞌe hamo turan waku eweimuꞌe kahato yt kat i mekewat sehay sehay hap wywo. Waku eiwe­waure kaꞌa kahato woꞌo­muꞌe hat kape. Eweikup­teꞌen perupꞌi puo eiꞌa­tunik takaria wo eweikup­teꞌen itote."

¹² Yt atiky­ꞌesat i eipe ihainiaꞌin akag wo eweikup­teꞌen. Iꞌewyte yt naku i ihainiaꞌin muꞌe hat akag wo eweikup­teꞌen. Poꞌog waku iꞌatu­mi­mu­ꞌeria wo hewaure kaꞌa kahato rakaria wo eweikup­teꞌen."

¹³ Katu­pono saꞌa­wyꞌi Tupana tunug ihainia ti irokirẽ hary­poria. Eiꞌyianme mimi Ãtau tutunug hawyi mana Ewa tutunug."

¹⁴ Iꞌewyte saꞌa­wyꞌi mana Ewa ti ipun Tupana piat ainãpin hap. Toiꞌa­parap miꞌi saꞌa­wyꞌi ahiag ehay upi pote."

¹⁵ Miꞌi pote toĩneꞌen mesup ehete mekewat Tupana eiꞌa­piheg hap mekewat haty kahato hap eimẽpyt tuwe­mo­herep hap turan. Koitywy Iesui tiꞌa­tue­ha­kye­raꞌat teran yne eipe hary­po­riaꞌin. Toiky­ꞌesat eipe tomie­ha­kye­raꞌat wuaria hawyi woꞌo­kyꞌe haria hawyi weꞌeg kahato haria eipe hap toiky­ꞌesat are uito Pauru.

"

3

¹ Timoteu uwe uwe ipotpap kahato Iesui mohey haria apykok hamo miꞌi hat ti poꞌog wuatꞌi motpap kawiat kyꞌesat hat are. Aikotã hãpyk woꞌo­muꞌe hat ipotpap. Miꞌi ti waku toꞌairo hawyi tutunug kuap hãpyk yn."

² Maꞌato eweꞌeg wo o miꞌi wuat airo hap ete Timoteu katu­pono yne miit mikuap hãpyk yn nakat waku etiꞌairo. Wẽtup ok wywo yn iharyꞌi rakat etiꞌairo. Yt naku i etiꞌairo kowoꞌi kowoꞌi wanẽtup haria. Waku — Yt uipo hep i Tupana potpap hap ete e hat etiꞌairo. Maꞌato waku wy emiꞌai­roria paaꞌe haria miitꞌin nãpin turanuat hanuaria teꞌe­ro­py­huꞌat. Waku iraniaꞌin — Wakuat yn nug haria miꞌiria iꞌatuꞌe emiꞌai­roria etiat. Iꞌewyte etikat o — Waku eweikup­teꞌen uiꞌyat pe e hat waku etiꞌairo."

³ Yt naku i mahy se kuap hat iꞌewyte marakꞌa yt naku i. Waku miitꞌin ete iperupꞌi kahato rakat woꞌo­wese hap etiꞌairo. Yt naku i kareꞌen kyꞌesat hap kape yn iwanẽtup hat."

⁴ Waku wati­ꞌairo toꞌyat piaria poꞌoro perupꞌi tuwat hat. Waku imẽpytꞌin mimõ­typot imẽpytꞌin miehay mohey kahato. Miꞌi haria yn waku etiꞌairo eiꞌa­pykok hanuaria wo."

⁵ Maꞌato yt toiꞌa­pykok kuap i tomẽ­pytꞌin miꞌi hap pote ti yt aikotã kuap i Tupana mẽpytꞌin apykok kuap hamo pãi."

⁶ Pyno iꞌewyte Iesui mohey pakup i haria neꞌi yt naku i aiꞌa­pykok hamo aiꞌakag wo katu­pono meremo i teꞌe­ru­we­mo­wato teran hap kaipyi teꞌe­ru­we­maꞌat neꞌi aikotã saꞌa­wy­ꞌiwuat sese ahiag — Uito poꞌog e hat tuwe­maꞌat neꞌi hap ewy ti Iesui mohey pakup i hat neꞌi aiꞌa­pykok hamo."

⁷ Yt Iesui mohey haria yn i mimõ­typot maꞌato yne miitꞌin mimõ­typot etiꞌairo. Yne miitꞌin mimõ­typot etiꞌairo pote yt wẽtup ok pupi i tuwe­mõti. Miꞌi pote ahiag yt timaꞌat kuap i wy.

"

⁸ Timoteu waku etiꞌairo aipy­ꞌa­set­piaria waku rakaria aipo­wyro hanuaria. Miitꞌin mimõ­typot kahato yn waku etiꞌairo. Mahy u poityꞌi rakaria neꞌi yt naku i etiꞌairo. Ahekat nuat kyꞌesat hap kape yn wanẽtup hat yt naku i maꞌato hegyiꞌat rakat yn waku."

⁹ Waku etiꞌairo yt waureꞌe hin i Iesui ehay tomi­mo­herep tepiat imohey hat mekewat tomikuap ok tã wakuat nug hat waku etiꞌairo."

¹⁰ Maꞌato wati­ꞌairo aheropat hanuaria hawyi waku wahãꞌãg waku sio yt hap kuap hamo. Waku kahato ipotpap hap hawyi waku topy­huꞌat aheropat hamo maꞌato yt naku i ipotpap hawyi yt naku i."

¹¹ Iharyꞌi waku rakat yn waku. Iꞌewyte yt naku i iharyꞌi marakꞌa poityꞌi rakat neꞌi. Waku iharyꞌi iweꞌeg kahato rakat sehay pywuat piat yn ihay rakat."

¹² Waku aheropat haria wẽtup kahato yn iharyꞌi. Iꞌewyte waku tosa­ꞌy­ruꞌin tosa­ki­ꞌytꞌin toꞌyat piaria poꞌoro kuap kahato perupꞌi puo hat."

¹³ Uwe topy­huꞌat aipo­wyro wakuat motpap wuat miꞌi hat ti aru topy­huꞌat wuatꞌi mimõ­typot kahato rakano. Miꞌi hawyi karãpe — Uito Aika­ꞌiwat Iesui mohey kahato hat iꞌatuꞌe aimuꞌe turan yt teꞌe­ru­we­mõti hin i iraniaꞌin woꞌo­ky­ryꞌi hap pupi miitꞌin mimõ­typot koꞌi miꞌiria pote.

"

¹⁴ Timoteu mesuwat uimiwan atipo­ꞌoro ewawi uhehatꞌat kahato haype. Miꞌi tupono areto teran kahato ewawi uhehay ewywuat hamo."

¹⁵ Maꞌato yt areto i pote yt uhewyry kuap i ewawi pote meikowat uimiwan atipo­ꞌoro ewawi aikotã waku etunug itote hap kuap hamo. Miꞌi uimiwan kaipyi waku etiꞌa­tu­nãpin itotiaria aikotã waku aiwo­ꞌo­wese haria wo watu­kup­teꞌen aito Iesui mohey haria. Taꞌi aito ti Tupana saꞌy­ruꞌin wo Tupana saki­ꞌytꞌin wo aito watu­kup­teꞌen wẽtup piit yn aito Tupana yat apyꞌyha iũtikag ewywuat aito katu­pono Tupana ehay mohey haria aito."

¹⁶ Tupana mienoi Iesui etiat watikuap kahato maꞌato yt karãpe i watikuap yne yne. Tupana yn ikuap sese hat. Miꞌi hawyi ikuap hat sese tuwe­mo­herep taꞌyn ahowawi. Mio tã toꞌe ahepe Iesui etiat — Meiũ ti pywuat sese e. Miꞌi Miit kape atipy piaria teꞌe­ra­ꞌa­kasa yne. Miꞌi ti imoherep taꞌyn kat ywania puo kat ywania puo miꞌi hap tuwe­mo­herep taꞌyn tehay wo. Miꞌi hawyi ti iꞌatu kahato raꞌyn imohey haria mesuwat yi tote. Miꞌi hawyi Tupana tioto i raꞌyn atipy kape i are uito Pauru.

"

4

¹ Pyno koitywy Tupana Pãꞌãu toꞌe kahato ahepe — Meiũran ikahuro hamo ti aru wẽtup ok wẽtup ok waureꞌe imohey tepiat hap ete. Miꞌi hawyi ti aru mãꞌãu saꞌag miat taꞌa­tu­maꞌat hap upi i raꞌyn teꞌe­ro­py­huꞌat. Iꞌewyte ahiag koꞌi ehay enoi hap upi i raꞌyn teꞌe­ro­py­huꞌat e Tupana ahepe."

² Mekewat eꞌat pe ahiag koꞌi eso eso hap upi pywo iꞌatuꞌe ahiag eso hap ete. Miꞌi tã e haria heso heso rakaria aima­ꞌatꞌi maꞌatꞌi hanuaria. Yt taꞌa­tuenoi teran hin i sehay pywuat taꞌa­tukuap sehay pywuat pytkai. Saꞌa­wyꞌi iꞌatu­wa­nẽtup hawe sehay toĩneꞌen — Ehenoi ro pywo rat e hap toĩneꞌen maꞌato koitywy yt kat i raꞌyn iꞌatukai iꞌatu­wewãi hap katu­pono ti taꞌa­tuhep taꞌyn mekewat iꞌe hap taꞌa­tu­we­nãpin hap teꞌe­ru­wa­nẽtup hawiat. Koitywy yt kat i iꞌatu­we­mõti hap taꞌa­tu­ꞌeso atuꞌeso hamo."

³ — Yt naku i eharyꞌi eꞌaito iꞌatuꞌe saꞌag. Yt naku i miꞌu watuꞌu yne iꞌatuꞌe saꞌag. Yt taꞌa­tukuap i aikotã Tupana tunug yne miꞌu mesuwat yi tote aimiꞌu wo. Toiky­ꞌesat waku aiꞌe popuo iꞌu hap. Iminug koꞌi tomohey haria poi hap tutunug tehay pywuat mohey haria mowepit hamo tutunug kat koꞌi kat koꞌi som."

⁴ Yne Tupana minug miꞌu koꞌi wakuat no tukup­teꞌen. — Eminug yt naku i yt watoꞌe kuap i Tupana pe. Wakuat yn tutunug miꞌi tupono — Waku kahato emiium Tupana. Urumo­wepit kahato En waku watoꞌe iꞌu hap eꞌyianmete watu­wehum."

⁵ Katu­pono saꞌa­wyꞌi Tupana toꞌe — Waku yne emiꞌu wo e. Miꞌi tupono mesup ti aito waku aiꞌe Tupana pe rokirẽ watenuk. Miꞌi tupono yne waku watuꞌu Tupana miium aimiꞌu wuat.

"

⁶ Pyno mesuwat enãpin hamo etiꞌa­tu­muꞌe ro Iesui mohey haria Timoteu. Etiꞌa­tu­muꞌe hãpyk kahato pote ti aru erepy­huꞌat Aipo­typot Iesui eropat kahato hano. Iꞌewyte etikuap kahato raꞌyn uhepiat imohey hap iꞌewyte sehay pywuat sese etiat etikuap taꞌyn. Miꞌi tupono atiky­ꞌesat poꞌog poꞌog eremuꞌe hap miꞌi etiano."

⁷ Ipoty kahato ti sehay yt Tupana mienoi kaipywiat i yt Tupana e hap ewywuat hin i. Miꞌi tupono waku waure wo miꞌi hap koꞌi kai. Yt kan hamo i wato­pot­muꞌe miꞌi hap koꞌi ete. Taꞌi poꞌog waku wato­ꞌo­moe­saika kahato Tupana e hamo Ipãꞌãu wo miitꞌin e hap koꞌi kai."

⁸ Waku aiwe­saika saika hap aipiit moheg hamo are maꞌato poꞌog waku wuatꞌi kai watu­we­saika saika Tupana Pãꞌãu e hap nug hamo. Katu­pono imiky­ꞌesat ewy watunug mote ipakup takano watoĩ­neꞌen mesuwe. Iꞌewyte aiku­ꞌuro hap eꞌat pe wuatꞌi eꞌat pe aikai Tupana."

⁹ Pyno Timoteu ahenoi teran epe sehay pywuat sese aimi­mohey aipyꞌa piat hap — Tupana ti wuatꞌi eꞌat piat ieĩneꞌen hat toĩneꞌen. Iꞌewyte wuatꞌi miitꞌin ehakye­raꞌat teran hat Tupana."

¹⁰ Wuatꞌi tomohey haria Ehakye­raꞌat hat Miꞌi are ti epe pãi. Miꞌi ti aimie­katup sese. Miꞌi kape yn watu­we­potpap watu­we­so­ꞌopot waku."

¹¹ Mio tã e hamo etiꞌa­tu­muꞌe at kaꞌap yne o miitꞌin."

¹² En ni kurum iwasu te. — Uruewatꞌyp neꞌi wyti en iꞌatuꞌe epe itote maꞌato o ereĩneꞌen iꞌatu­py­ꞌa­setpe waku kahato rakano iꞌatue­hamo ihay hãpyk kahato rakano hãpyk kahato woꞌo­kyꞌe hano ereĩneꞌen. Iesui mohey sese hano ereĩneꞌen. Yt wẽtup i o saꞌag etunug iꞌatu­wo­ꞌo­ky­ryꞌi hamo. Miꞌi tã ereĩneꞌen mote yt uwe i itotiaria emohit kuap nagnia emimu­ꞌeria iꞌatue­watꞌyp neꞌi en mytkai.

"

¹³ Meiũran ti aru areto ewawi Timoteu maꞌato putꞌok­ꞌare itote hap kape waku yt ewẽpohep teiꞌo mekewat Tupana miwan miat mowẽpap waꞌa­tunug haria piat hap ete. Miꞌi hawyi kat e hap kat e hap o etimo­herep iꞌatuepe mekewat Tupana miwan miat mowẽpap hap. Iꞌewyte waku Tupana ehay mohey hamo kahato ereĩneꞌen."

¹⁴ Saꞌa­wyꞌi Tupana tum epe tesaika hap topotpap nug hamuat tutum epe saꞌa­wyꞌi. Miꞌi tupono yt waure wo teiꞌo mekewat miium kai maꞌato waku etimo­herep kahato hesaika hap miitꞌin me. Saꞌa­wyꞌi Tupana ehay moherep haria teꞌe­roꞌe epe — Tupana miꞌairo en iꞌatuꞌe. Iꞌewyte Iesui mohey haria akag koꞌi teꞌe­ru­we­ponug eꞌakag ete — Tupana potpap nug hat en taꞌa­tuꞌe haype. Miꞌi tupono waku etimo­herep kahato hesaika hap imiium epiat miitꞌin me."

¹⁵ Timoteu waku mesup uiꞌe hap sepap kahato hano ereĩneꞌen. Miꞌi pote ti aru wuatꞌi sehaꞌat haria — Pywo Timoteu tuwe­motag kahato Tupana emiit no iꞌatuꞌe."

¹⁶ Eweꞌeg wo o Timoteu koran ti itu eremaꞌat neꞌi. Iꞌewyte eweꞌeg wo o emienoi Tupana ehay mienoi aparap hap pupi. Miꞌi tã etunug at kaꞌap pote ti aru ehakye­raꞌat Tupana emimu­ꞌeria wywo are uito Pauru.

"

5

¹ Karãpe wẽtup ok eꞌyian tiꞌa­parap Tupana pe pote yt ehoiroꞌi hoiroꞌi teiꞌo miꞌi miit ete. Yt naku i wati­mohit aseꞌiꞌi koꞌi hary koꞌi e. Maꞌato waku perupꞌi puo wati­nãpin aimi­mõ­typot koꞌi waku — Papai Mamai yt naku i miꞌi tã watunug aito waku watoꞌe perupꞌi puo iꞌatu­kyꞌe hap wywo iporo pote."

² Miꞌi hawyi karãpe eꞌyian hary­poria kawiat tiꞌa­parap Tupana pe pote waku etiꞌa­tu­nãpin perupꞌi puo. — Mamai ereꞌe popuo imõtypot haype. Maꞌato iraniaꞌin makup­tiaria tiꞌa­parap Tupana pe pote waku etiꞌa­tu­nãpin perupꞌi puo Uheinyt ereꞌe popuo yt iꞌatu­ky­ꞌesat popuo i.

"

³ Waku hiwuria sese wati­po­wyro heꞌaito kuꞌuro rakaria yt imẽpyt i te turanuat ikuꞌuro heꞌaito rakat yt hemia­riru i te rakat."

⁴ Waku hiwuria mẽpytꞌin me hemia­ri­ruꞌin me ereꞌe — Eweimõꞌẽ ro eityꞌin me eheha­ryꞌin me. Ewehaꞌup nug o eimotag hap Tupana miky­ꞌesat ewy ereꞌe o hiwu mẽpytꞌin me hiwu emiari­ruꞌin me."

⁵ Maꞌato tukup­teꞌen hiwu sese koꞌi yt uwe i mipo­wyro koꞌi Tupana mohey haria taꞌa­tu­hẽtup kahato Tupana kape ihotꞌok puo wãtym mo — Uruieĩneꞌen hap miꞌu sokpe etum o uruepe iꞌatuꞌe."

⁶ Maꞌato hiwu tomi­ky­ꞌesat saꞌag nug hat ikuꞌuro rakat ewywuat toĩneꞌen Tupana wanẽtup hawe. Ipiit ihãite rakat wen maꞌato yt iweꞌeg i rakat pote."

⁷ Timoteu etiꞌa­tu­nãpin o hiwuria mẽpytꞌin hiwuria emiari­ruꞌin aikotã uimienoi ewy. Mesuwat ewy taꞌa­tunug mote yt uwe i teꞌe­ru­we­ky­ryꞌi kuap Iesui mohey haria ete."

⁸ Maꞌato toĩneꞌen wẽtup ok eipy­ꞌa­set pe — Yt atipo­wyro teran i uiꞌywot uity uimẽ­pytꞌin e hat miꞌi hat wyti ipun neꞌi raꞌyn Iesui mohey hap sese. Miꞌi hawyi topy­huꞌat poꞌog yt naku i Tupana ehay pun haria kai."

⁹ Timoteu waku wati­po­wyro hiwu iporo rakat 60 anu ieĩneꞌen hat heꞌaito wẽtup ok wywuat yn ieĩneꞌen hat miꞌi rokirẽ wuat heꞌaito kuꞌuro rakat. Miꞌiria etiꞌa­tuset pehik iꞌewy­wuaria wywo Iesui mohey haria miium Tupana piat kaipywiat iꞌatuieĩ­neꞌen hamo."

¹⁰ — Wakuap yn nug hat meiẽ hiwu iꞌatuꞌe iraniaꞌin hap upi watikuap wakuat hiwu. — Saꞌa­wyꞌi tomẽ­pytꞌin erohik kahato hat iꞌatuꞌe. Meiẽ — Ereke ro uiꞌyat pe e hat wuatꞌi piat hat meiẽ iꞌatuꞌe hap upi watikuap wakuat hiwu. — Tupana emiit hoꞌopot haria powyro kahato hat meiũ iꞌatuꞌe ihaky­ꞌeꞌi rakaria eropat hat meiũ wuatꞌi eꞌat piat waku yn hap nug hat meiũ iꞌatuꞌe hap upi watikuap uwe wakuat hiwu. Miꞌi wahet­pehik kuap Tupana mohey haria miium kaipywiat ieĩneꞌen hamo."

¹¹ Maꞌato yt etipehik teiꞌo hiwu ipakup te rakaria mekewat Tupana mohey haria miium kaipywiat gupteꞌen haria set kape katu­pono miꞌi meiũran ipakup te rakaria ti ikyꞌesat re i iꞌatue­ꞌaito hap i raꞌyn. Taꞌa­tu­waure raꞌyn Aika­ꞌiwat Iesui wẽtup taꞌa­tue­ꞌaito i raꞌyn kyꞌesat hap kyꞌewi. Yt iweꞌeg i rakaria wo tukup­teꞌen."

¹² — Uito ti aru yt karãmuo i raꞌyn uheꞌaito an iꞌatuꞌe pytkai. Iesui kape yn naꞌyn ti aru uipotpap taꞌa­tuꞌe pytkai hiwu ipakup takaria meiũran taꞌa­tu­ky­ꞌesat i raꞌyn ihainia hawyi meremo taꞌa­tu­waure saꞌa­wy­ꞌiwuat taꞌa­tuehay."

¹³ Miꞌi hawyi iraniaꞌin tuwe­mo­hapap kahato aiperup hap ete satꞌi satꞌi getap koꞌi upi neꞌi. Miꞌi hap kaipyi tuwe­mo­hapap woꞌo­kuasa kuasa i hap ete. Aiwu­ꞌuka hap neꞌi enoi enoi hap ete. Woꞌo­ma­ꞌatꞌi maꞌatꞌi hap ete yn ihay. Wemõti hap sehay saꞌag yt watikuap teran i rakat taꞌa­tu­huꞌat."

¹⁴ Miꞌi tupono atiky­ꞌesat — Waku eꞌaito i ro watoꞌe ipakup te rakaria hiwu pe. Eꞌaito pakup i raꞌyn hawyi waku emẽpytꞌin hawyi mono etiꞌa­tue­ropat eꞌyat pe waku ereꞌe. Waku pe tukup­teꞌen hiwuria Iesui mohey haria pote ti aru yt iꞌatuehay saꞌag kuap i ahewa­nĩ­kaptia imohey ahepiat hap ete."

¹⁵ Iꞌewyte tukup­teꞌen iraniaꞌin hiwuria saꞌa­wy­ꞌite Iesui mohey haria miꞌiria wen maꞌato koitywy ahiagnia akag Satanai ehay upiat myhuꞌat haria miꞌiria."

¹⁶ Ehenoi iraniaꞌin hary­po­riaꞌin me ihainiaꞌin me Iesui mohey haria pe — Toĩ wẽtup ok eꞌyat pe hiwu miꞌi pote waku eweipo­wyro eweipoi mekewat eꞌyat piat hiwu ereꞌe o. Yt ewewei­po­ꞌoro teiꞌo eꞌyatypiat hiwu Iesui mohey haria miium wuat ipoi hamo katu­pono ti typyꞌi kahato hiwuria yt uwe i mipo­wyro koꞌi. Waku wati­ꞌa­tu­po­wyro kahato hiwuria yt uwe i mipo­wyro koꞌi ereꞌe o Timoteu Iesui mohey haria pe.

"

¹⁷ Timoteu waku wati­ꞌa­tu­po­wyro kahato Iesui mohey haria akag koꞌi saꞌup mo. Miꞌiria ti iꞌatu­potpap kahato poꞌog iraniaꞌin kai aimuꞌe kahato Tupana ehay mohey hap ete pote waku watum poꞌog saꞌup miꞌiria pe. Typy ok miit potpap hap saꞌup ewy waku watum."

¹⁸ Katu­pono saꞌa­wyꞌi Tupana toꞌe miwan me — Wãi yt eweikytyt teiꞌo eihũ wewato ahup ipotpap awati ehaꞌok hap etiat turan. Waku tenuk topotpap popuo e Tupana saꞌa­wyꞌi. Iꞌewyte ewetum o eheropat haria pe iꞌatu­we­potpap hap ewy saꞌup atiky­ꞌesat e Tupana. Miꞌi hap ewy waku saꞌup watum ipotpap Tupana ehay etiat aimuꞌe haria pe."

¹⁹ Timoteu waku wahenoi Iesui mohey haria pe — Yt eweiꞌa­tuehay mohey teiꞌo meremo aimuꞌe haria kuasa hap ete aiꞌakag kuasa hap koꞌi ete. Maꞌato waku hepamo apowa­toꞌe ikuap sese haria pe akasa sese haria pe typy ok myeꞌym ok pe hap ewy."

²⁰ Maꞌato aiꞌakag tiꞌa­parap pywo pote waku wati­nãpin wahewãi wuatꞌi ehamo. Miꞌi hap watunug pote iraniaꞌin teꞌe­ro­kenꞌẽ iꞌewywuat saꞌag nug hap pupi."

²¹ Timoteu etunug no haty wo yne yne enãpin hap uhepiat hap ewy. Etiꞌa­tu­nãpin uiꞌewy yne itotiaria toꞌe­wy­ꞌewy. Eꞌyian pupi o yt erekenꞌẽ teiꞌo eꞌywania pupi iꞌatu­nãpin hamo. Ewy ok sese pupi iꞌewyte yt erekenꞌẽ teiꞌo inãpin hamo maꞌato waku torania etiꞌa­tu­nãpin perupꞌi puo. Woro­nãpin Tupana ehamo Iesui ehamo iꞌewyte atipy piaria wakuaria ehamo woro­nãpin uhaꞌyru."

²² Yt naku i aiꞌakag wanuaria wati­ꞌa­tu­ꞌairo meremo Timoteu aimuꞌe sese hanuaria are.

Karãpe iraniaꞌin ahãꞌãg saꞌag nug hamo waku — Wãi yt atunug neran i watoꞌe. Iꞌewyte waku ereĩneꞌen pya saꞌag nug hap kai are."

²³ Timoteu yt naku i kahato ereĩneꞌen iꞌahu kahato imeꞌen ete rakano. Waku mohag Uwa hy etuꞌu emeꞌen mog hamo. Yt naku i yꞌy yn etuꞌu are.

"

²⁴ Tukup­teꞌen yt nakuat i nug haria yne piat heremo rakaria. Miꞌi haria pe — Yt nakuaria i sese watoꞌe. Tupana miꞌa­piheg wuaria watoꞌe. Iꞌewyte iraniaꞌin minug saꞌag yt heremo i rakaria tukup­teꞌen. Miꞌiria ti yt watikuap i sio waku sio yt watoꞌe kuap i maꞌato putꞌokꞌe raꞌyn iꞌatu­minug saꞌag moherep hap eꞌat pe Tupana tomo­herep yne aru yt heremo i rakat aiminug saꞌag."

²⁵ Iꞌewyte tukup­teꞌen waku nug haria yne piat heremo rakaria. Iꞌewyte tukup­teꞌen migꞌi wuat wakuap nug haria maꞌato meiũran heremo yne iꞌatu­minug wakuap koꞌi Tupana tomo­herep miꞌi hap koꞌi are Uito Pauru.

"

6

¹ Timoteu mio tã ereꞌe ro Iesui mohey haria pe semiitꞌin me woꞌo­ꞌe­ropat haria pe — Uiwy­riaꞌin waku wati­ꞌa­tu­mõ­typot kahato aipo­ꞌoro haria aika­ꞌi­waria ere. Miꞌi tã watunug motꞌi pote ti aru ahehay wo aipotpap ete meiũran yt teꞌe­ru­we­ky­ryꞌi hin i Ahetu­pana ete ihay aiwẽ piat hap ete pãi ere o."

² Aipo­ꞌoro hat Aika­ꞌiwat Iesui mohey hat pote waku wati­mõ­typot poꞌog aipotpap kahato hap upi katu­pono aheykeꞌet ewy topy­huꞌat Iesui mohey hap ete aimi­mohey ewywuat hat pote. Miꞌi pote ereꞌe i — Wẽtup yn aipotpap Aika­ꞌiwat aito pote yt naku i wati­hay­mo­weu­kaꞌi aika­ꞌiwat mesu­wa­rotiat Iesui mohey hat pote. Waku wati­ꞌa­tu­kyꞌe aikotã aheykeꞌet ewy pãi ere woꞌo­ꞌe­ropat haria Iesui mohey haria pe. Miꞌi e hap etiꞌa­tu­muꞌe kahato o emimu­ꞌeria pe Timoteu.

"

³ Tukup­teꞌen ti itote iraniaꞌin woꞌo­muꞌe haria wẽtup sehay wuat haria yt Aika­ꞌiwat Aipo­typot Iesui etiat hin haria i yt uimienoi Iesui etiat yt ewywuat haria i. Taꞌi yt pywo pe hin i iꞌatu­mienoi."

⁴ Miꞌiria ti — Uruto poꞌog uruikuap iraniaꞌin kai e haria yt taꞌa­tukuap i kahato pytkai tuꞌuka yn sehay wo pytkai. Kat e hap kat e hap sehay hit ete tuꞌuka teran toꞌope. Miꞌi hap kaipyi toꞌoe­ha­ꞌy­wywi yn toꞌope. Taꞌa­tu­patꞌok patꞌok Iesui mohey haria tuꞌuka sehay wuat haype. Toꞌo­mohit mohit kahato toꞌope taꞌa­tuehay wo. — Yt naku i miꞌi miit iꞌatuꞌe yn toꞌope. Waku miꞌi haria yt eweiwesat i tuꞌuka teran eiwywo turan maꞌato yt ewetunug neiꞌo miꞌi haria ehewa­nĩkap mo maꞌato eweikyꞌe miꞌiria tuꞌuka teran pytkai are."

⁵ Iꞌatu­wa­nẽtup hap yt toto kuap i. Sehay wakuat yt kat i iꞌatu­wa­nẽtup hawe. Miꞌi pote tuꞌuka yn hap toĩneꞌen iꞌatuehay kaipyi iꞌatu­wa­nẽtup hawyi. — Iesui atimohey hawyi hekat rakano areĩneꞌen iꞌatuꞌe teꞌe­ru­wepe yt miꞌi tã hin i pytkai i."

⁶ Uwe uwe iwepit Tupana miky­ꞌesat nug hap ete sio yt kat i tekat pytkai miꞌi hat toĩneꞌen hekat kahato rakano Tupana wanẽtup hawe."

⁷ Pyno apoꞌare kat koꞌi aiꞌy­wãꞌĩ turan waterut aheka­reꞌen aipo hit pe. Pywo pe ti yt kat i waterut aipo pe. Iꞌewyte aiku­ꞌuro turan kat som apo watioto kuap. Yt kat kuap i wy."

⁸ Toĩ aimiꞌu ahesokpe aikosap hamuat i wyti pote ti waku raꞌyn ahete waku watoꞌe aiwo­ꞌope."

⁹ Maꞌato hekat kahato teran rakaria ti aru hewo hamuat ahiag ewamiri pe tominug saꞌag wywo ahiag esuki pe. Tominug saꞌag kaipyi iꞌatuewo kahato aria kape yt iweꞌeg i hap kaipyi taꞌa­tu­mi­ky­ꞌesat saꞌag upi. Miꞌi kape miitꞌin iꞌatuewo kahato aria kape hekat kahato teran rakaria."

¹⁰ Timoteu aimaꞌat sese hap neꞌi ti uhekat iwato sese hap kyꞌe hap. Mio tã watu­wa­nẽtup hap kaipyi ti tut aikotã watunug saꞌag ahekat wati­puẽti hamuat. Tukup­teꞌen iraniaꞌin Iesui mohey haria saꞌa­wy­ꞌiwuat haria maꞌato mio miꞌi haria tiꞌatoiat raꞌyn imohey hap taꞌa­tuepiat hap taꞌa­tukat hap ete yn teꞌe­ru­we­mohey. Yt iꞌatu­wepit hin i raꞌyn miꞌiria. Koitywy iꞌatu­ꞌarot hap yn naꞌyn iꞌatuete. Yt teꞌe­ru­wehum kuap i taꞌa­tuekat kahato pytkai.

"

¹¹ Maꞌato aito ti Tupana emiitꞌin sese aito miꞌi tupono waku yt wati­ky­ꞌesat i mekewat uhekat poꞌog hap — Atiꞌa­tu­ky­ꞌesat e hap. Poꞌog waku wati­ky­ꞌesat hãpyk kahato Tupana wywuat waku rakat. Tupana kyꞌe hap poꞌog waku imohey hap poꞌog waku aiwo­ꞌo­kyꞌe hap poꞌog waku. — Atimohey potꞌi Iesui aru ahoꞌopot kahato pytkai aiꞌe hap yn waku aiwa­nẽtup hawe aiwe­pe­rupꞌi hamuat hap kat hap yn aiwa­nẽtup hawe aito Tupana emiitꞌin hap ewy."

¹² Karãpe wateput yn hawyi meiũran watu­we­pokuap kahato miꞌi hap ete. Miꞌi hawyi putꞌok­wa­toꞌe iraniaꞌin eꞌyianmete. Miꞌi hap ewy waku watoĩ­neꞌen Tupana mohey hap ete. Meiũran putꞌok­wa­toꞌe Tupana ete wuatꞌi eꞌat piat aheĩneꞌen iwywuat hap tote. Miꞌi hamuat kape haꞌa­wy­te­pyite aikaykay karãpe — Woro­mohey En Iesui ere tope haty wo wuatꞌi Iesui mohey haria ehamo turan."

¹³ Koitywy woro­po­ꞌoro en Timoteu etunug yne ro epoꞌoro hap koꞌi Iesui mienoi koꞌi."

¹⁴ Miꞌi hap upi ereĩneꞌen pote ti aru yt kat i saꞌag ekai topy­huꞌat Iesui e hap yn nug hamo ereĩneꞌen mote. Maꞌato iraniaꞌin woꞌo­muꞌe miitꞌin kaipywiat hap etiwaure yne yt Iesui mienoi ewywuat i. Waku yne epoꞌoro hap koꞌi etunug yne Aika­ꞌiwat aimie­katup putꞌokꞌe hap kape. Miꞌi hap nug hamo woro­po­ꞌoro Tupana ehamo iꞌewyte Aika­ꞌiwat Aipo­typot Iesui ehamo Wuatꞌi Miitꞌin Moieĩneꞌen hat ehamo. Saꞌa­wyꞌi Aika­ꞌiwat Iesui yt tokenꞌẽ hin i morekuat Pũsiu Piratu pupi maꞌato tohenoi kahato pywuat sese sehay. Miꞌi hap ewy o ereĩneꞌen Timoteu."

¹⁵ Meiũran ti aru Iesui Tupana tipo­ꞌoro i tepiat ikyꞌesat hap eꞌat pe toipo­ꞌoro i raꞌyn. Waku kahato Iesui miꞌi yn ni Wuatꞌi Miitꞌin Porekuat no. Miꞌi ti more­kuaria Porekuat iꞌewyte wuatꞌi kaꞌiwat Kaꞌiwat. Waku kahato Iesui."

¹⁶ Aito ti yne ikuꞌuro rakat nuaria aito maꞌato Iesui ti wuatꞌi eꞌat piat ieĩneꞌen sese hanuat raꞌyn teiam hẽtyhot kahato rakat pe. Yt uwe i tehaꞌat kuap howawi. Yt uwe i tokosap kuap heiam hẽtyhot rakat kape. Yt uwe i tehaꞌat kuap mesu­wa­rotiat teha wo. Aheha yt putꞌokꞌe i aiꞌa­kasa hamo. Pyno toꞌiro Iesui wati­mõ­typot katu­pono wuatꞌi kawiat hesaika rakat Miꞌi. Wuatꞌi eꞌat piat ieĩneꞌen hat miꞌi. Miꞌi tupono waku wati­mõ­typot Miꞌi.

"

¹⁷ Pyno tukup­teꞌen Iesui mohey haria aipy­ꞌa­setpe hekat rakaria. Waku miꞌiria pe ereꞌe — Eweiꞌatoiat ro — Uito poꞌog wakuat iraniaꞌin kai eiwa­nẽtup hap ereꞌe o. Iꞌewyte yt eheka­reꞌen neꞌi teiꞌo eweimohey maꞌato Tupana yn o eweimohey ere katu­pono ehekat yt eheĩneꞌen motꞌi hamuat hin i maꞌato Tupana hegyiꞌat kahato tutum kahato ahepe wuatꞌi aimo­wepit kahato hamuat ere o."

¹⁸ Wakuap nug haria wo o eweikup­teꞌen ereꞌe. Waku eipotpap kahato wakuap nug hap koꞌi ete yn. Hegyiꞌat rakaria wo o eweikup­teꞌen ere. Yt hekat i rakaria tukup­teꞌen eimikuap pote eweimõꞌẽ miꞌiria pe ehekat ere o hekat rakaria pe Iesui mohey haria pe."

¹⁹ Taꞌa­tunug taꞌa­tu­nãpin epiat hap pote ti aru hekat rakaria wo sese tukup­teꞌen atipy pe.

"

²⁰ Timoteu waku etopag yne mesuwat uiꞌe hap ewanẽtup hawe. Mesuwat uimiwan waku iheg me epyꞌa pe. Tukup­teꞌen ti sehay wuat — Toꞌiro watu­ꞌuka e haria maꞌato yt etiꞌa­tu­wesat reiꞌo miꞌiria. Tupana etiat iꞌatuehay saꞌag hap kape o yt ewaure kaꞌa teiꞌo. — Uruto poꞌog uruikuap uruwa­nẽtup hawe iꞌatuꞌe ahepe yt taꞌa­tu­weꞌeg i haype. Pyno yt erewa­nẽtup motꞌi teiꞌo iꞌatuehay kape."

²¹ Iꞌatuehay — Uito poꞌog iꞌatuꞌe hap iꞌatu­maꞌat hamo topy­huꞌat. Tupana mohey hap taꞌa­tu­ꞌatoiat raꞌyn aikotã muꞌap wati­waure hawyi ahoꞌo­wasat hap ewy. Pyno ahẽtup kahato Tupana pe — Tupana etiꞌa­tu­poi­tyro Timo­teuꞌin torania itotiaria gupteꞌen haria areꞌe ahẽtup. Pyno toran naꞌyn.

Uito ti Pauru"