1

¹ Uito ti Pauru kuekatu sese atipo­ꞌoro ehowawi Iesui mohey haria kape tawa Tesa­ro­nika piaria kape are. Uiwy­riaꞌin Iesui mohey haria mesuwat uimiwan atipo­ꞌoro ehowawi katu­pono atiky­ꞌesat kahato ti Tupana hegyiꞌat kahato ehepiat hap. Iꞌewyte atiky­ꞌesat kahato Tupana kaipywiat eiwo­ꞌo­wese hap. Pyno uito hawyi mehĩ Sira hawyi Timoteu wywo kuekatu urutoꞌe ehowawi uruwy­riaꞌin tawa Tesa­ro­nika piaria kape. Mesuwat uruipo­ꞌoro ehowawi urumiwan Aiꞌywot Tupana Aika­ꞌiwat Iesui hũria kape tomohey haria waꞌa­tunug haria kape."

² Yne eꞌat pe — Waku kahato tawa Tesa­ro­nika piaria urutoꞌe Tupana pe. Urutu­wehum kahato ewawi Tupana katu­pono torania Tesa­ro­nika piaria emohey haria kahato tukup­teꞌen urutoꞌe Tupana pe."

³ Yt ehẽku kaipyi yn i ti tuwẽtem ehepiat Iesui mohey hap maꞌato yne kaipyi tuwe­mo­herep. Miꞌi tupono urutu­wehum kahato Aiꞌywot atipy piat kape. Yt waure­ꞌu­ru­toꞌe hin i ti urukyꞌe ehepiat hap iꞌewyte miitꞌin kyꞌe ehepiat hap ete Aipo­typot Iesui mohey hap kaipyi. Iꞌewyte eipotpap hap koꞌi yt uruiwaure hin i.

"

⁴ Taꞌi uheywytꞌin uheinytꞌin uruikuap kahato ti aikotã Tupana eikyꞌe kahato pote eiꞌairo kahato ti towano."

⁵ Saꞌa­wyꞌi ti uruhenoi kahato ehepe sehay wakuat Iesui etiat maꞌato yt uruwat uruẽku kaipyi yn i maꞌato Tupana esaika hap kaipyi iꞌewyte Tupana Pãꞌãu kaipyi uruiꞌa­tu­muꞌe eipe. Taꞌi pywuat sese urutoꞌe. Urumi­mohey mesuwat sehay urutoꞌe uruhenoi ehepe turan. Eweikuap taꞌyn aikotã saꞌa­wyꞌi urutu­kup­teꞌen eipy­ꞌa­setpiat hap. Taꞌi eikyꞌe uruepiat hap yn ni toĩneꞌen urukai."

⁶ Saꞌa­wyꞌi uruminug wakuap kape ti ewehe­haꞌat kahato hawyi — Taꞌi uruto ti iꞌewyte urutu­kup­teꞌen teran Pauruꞌin ewy eweiꞌe. Taꞌi Iꞌatu­ka­ꞌiwat Iesui mohey haria wo urutu­kup­teꞌen teran eweiꞌe. Iꞌatu­mienoi ahepiat wyti pywuat kahato rakat eweiꞌe. Mio tã eweiꞌe hawyi ti Tupana Pãꞌãu putꞌokꞌe raꞌyn ehetiat hawyi eiwepit kahato hap taꞌyn topy­huꞌat ehete. Miꞌi hawyi ti maꞌato mekewat hoꞌopot hap eꞌat putꞌokꞌe raꞌyn ehete turan yt hep e kuap i raꞌyn ehepiat imohey hap iꞌewyte eiwepit hap."

⁷ Miꞌi pote ti yi Masẽ­tunia yi Akaia piaria teꞌe­ra­haꞌat kahato ehepiat mohey hap kape. — Pyno waku aito tawa Tesa­ro­nika piaria ewy waku wato­mohey Iesui iꞌatuꞌe teꞌe­ra­haꞌat ehowawi hawyi."

⁸ Miꞌi hap kaipyi ti Aika­ꞌiwat mohey hap tuwẽtem naꞌyn eiwẽ pyi. Miꞌi hawyi ti ihay eweihytpok kahato raꞌyn yne tawa Masẽ­tunia puo yne yi Akaia puo raꞌyn. Miꞌi hawyi ti yne tawa koꞌi puo raꞌyn imohey hap tuwe­sytpok."

⁹ Miꞌi hawyi ti karãpe uruhenoi teran naꞌyn iraniaꞌin me Iesui eimohey hap etiat hap miꞌi pote ti — Taꞌi uruikuap taꞌyn iꞌatuꞌe. Miꞌi hawyi ti karãpe uruewyry turan uruewyry hap upi teꞌe­roꞌe uruepe iraniaꞌin — Eweikuap apo Tesa­ro­nika piaria Iesui mohey hap iꞌatuꞌe uruepe. Koitywy ti iꞌatu­wese kahato eimi­mohey ete. Mo wuat minug tupa­naria atoiat haria raꞌyn miꞌiria iꞌatuꞌe uruepe miitꞌin. Miꞌi hawyi ti Wuatꞌi Eꞌat Piat Ieĩneꞌen hat Tupana sese eropat haria raꞌyn miꞌiria iꞌatuꞌe raꞌyn uruepe uruewyry tipytpe.

"

¹⁰ Koitywy taꞌa­tu­he­katup taꞌyn Aika­ꞌiwat Iesui Tupana Saꞌyru iꞌewyte Tupana mihep guꞌuro pywiat mohey haria wo raꞌyn tukup­teꞌen iꞌatuꞌe ahepe. Taꞌi saꞌa­wyꞌi wyti ipyꞌahak kahato Tupana aiminug saꞌag ete. Saꞌa­wyꞌi wyti aiꞌa­piheg hap yn topy­huꞌat ahepe yt kat i Tupana wywo aiwo­ꞌo­wese nug hanuat pote saꞌa­wyꞌi. Maꞌato Aheha­kye­raꞌat hat putꞌokꞌe aiꞌa­piheg hap u hamuat hawyi Tupana aihep taꞌyn aiꞌa­piheg hap kaipyi. Miꞌi hawyi iraniaꞌin yt kat iꞌatuꞌe kuap i raꞌyn ahete katu­pono — Waku eipe e yn naꞌyn ahepe. Miꞌi hap areꞌe ehepe Iesui mohey haria tawa Tesa­ro­nika piaria. Maꞌato yt uito yn i katu­pono torania mesuwat yi tote waku iꞌatuꞌe ehepe. Yt kat areꞌe kuap i raꞌyn miitꞌin me eimohey kahato hap etiat uruewyry tipytpe katu­pono taꞌa­tukuap yne raꞌyn ehepiat imohey waku kahato hap. Miꞌi tupono urutu­wehum kahato ehepiat imohey hap ete uruto Pauruꞌin.

"

2

¹ Uiwy­riaꞌin eweikuap taꞌyn aikotã uhepiat eimuꞌe hap tuwenug kahato itotiat hap. Eweikuap taꞌyn aikotã miitꞌin iꞌatupap kahato uimienoi upi."

² Eweikuap taꞌyn uiwy­riaꞌin karãpe urutuwat ehetawa Tesa­ro­nika kape tawa Wiripu piaria muꞌe hamo urutuwat maꞌato itotiaria yt uruꞌok­satꞌi hin i. Iꞌatu­mi­ky­ryꞌi kahato uruete urupiit ete haty. Miꞌi totepyi urutuwat ehowawi uruepiat hoꞌopot rokirẽ. Miꞌi hawyi putꞌok­ꞌu­ru­toꞌe ehetawa pe hawyi yt paaꞌu­ru­toꞌe hin i Tupana ehay moherep hap ete uruho­ꞌopot kahato itotiat pytkai. Miꞌi pytkai yt uruwẽ­pohep hin i eimuꞌe hap ete. Sehay pywuat sese yn uruwẽ pyi tuwẽtem. Poꞌog neꞌi urumoe­saika Tupana. Miꞌi hawyi urutu­ꞌuka hap pupi yt uruto­kenꞌẽ hin i tawa Wiripu piaria uruꞌahyk ahyk pytkai."

³ Yt kat i eimaꞌat uruepiat hap uruwa­nẽtup hawe. Yt kat i eipiit kyꞌesat hap wywo i woro­ho­ꞌo­muꞌe."

⁴ Taꞌi Tupana eropat haria wo yn urutu­kup­teꞌen miꞌi pote Tupana wẽ wo urutu­kup­teꞌen. Saꞌa­wyꞌi Tupana toꞌe uruepe — Woro­ho­ꞌo­mohey kahato eipe uhehay enoi hamo e. Uimi­ꞌai­roria sese eipe uhehay wakuat sytpok hanuaria e uruepe. Miꞌi hawyi hãpyk kahato uruiꞌa­tu­muꞌe eipe. Yt eimi­ky­ꞌesat ewy i wen maꞌato Tupana miky­ꞌesat ewy yn. Maꞌato itote uruiãꞌãg kahato Tupana. Toikuap teran pywuat tokyꞌe hap kaipywiat urupotpap hap haype sio miitꞌin miat urumõ­typot hap kaipyi neꞌi urupotpap miꞌi hap toikuap teran."

⁵ Yt karãpe i eima­ꞌatꞌi maꞌatꞌi wo uruiꞌa­tu­mo­pe­rupꞌi eipe. Maꞌato ti yt eimi­ky­ꞌesat ewy i uruiꞌa­tu­nãpin. Taꞌi Tupana miky­ꞌesat ewy yn uruiꞌa­tu­nãpin. Yt kat i urute­haꞌat ehekat kyꞌewi hap kape. Miꞌi pote pywo e Tupana eiꞌa­tu­muꞌe uruepiat hap ete."

⁶ Iꞌewyte yt kat i urumõ­typot hap uruiky­ꞌesat eimuꞌe turan. Yt uwe kaipyi hin i uruiky­ꞌesat urumõ­typot hap. Yt eikaipyi i wyti maꞌato urupo­ꞌoro hat mowepit hap yn uruwa­nẽtup hawe eimuꞌe turan."

⁷ Uruto ti Iesui potpo­ꞌo­roria sese maꞌato miꞌi pytkai urumõ­typot ro urupoi ro yt urutoꞌe i ehepe. Perupꞌi popuo urutu­kup­teꞌen eipy­ꞌa­setpe aikotã aity aimo­pe­rupꞌi mope­rupꞌi temi ete hap ewy."

⁸ Taꞌi eipy­ꞌa­setpe urutu­kup­teꞌen eikyꞌe kahato haria wo. Urutu­wehum kahato ehete. Miꞌi pote eheropat haria wo uruto­py­huꞌat katu­pono uruiꞌa­tu­kyꞌe kahato eipe."

⁹ Yt sẽtup i sẽtup i haria wo hin i urutu­kup­teꞌen eipy­ꞌa­setpiat turan. Yt kat i hin i uruhẽtup ehepe. Yt eimiꞌu kyꞌewi i ti uruiꞌa­tu­muꞌe Tupana ehay wo eipe. Maꞌato urupotpap urupo wuat kaipyi yn ni urutenuk. Yt eiꞌokpe tote hin i urutu­kup­teꞌen yt ehekat kyꞌewi hin i ti urutu­kup­teꞌen. Yt waure­ꞌe­weiꞌe teiꞌo miꞌi hap kai uruwy­riaꞌin."

¹⁰ Miꞌi hap ete pywo eweiꞌe iꞌewyte Tupana pywo e urutu­kup­teꞌen eipy­ꞌa­setpiat turan katu­pono wakuap mywo hãpyk puo yt kat i eimaꞌat hap mywo urutu­kup­teꞌen ehehamo iꞌewyte Tupana ehamo."

¹¹ Eweikuap taꞌyn eipy­ꞌa­setpe urutu­kup­teꞌen turan eiꞌywot sese ewy urutu­kup­teꞌen einãpin haype aikotã aiꞌywot tuwe­ha­ponik kahato hap ewy eipy­ꞌa­setpe urutu­kup­teꞌen einãpin hanuaria."

¹² Uruiꞌa­tu­ma­ha­raꞌi maha­raꞌi kahato eipe urumẽ­pytꞌin mote. Ehewyry hãpyk kahato o Tupana miky­ꞌesat ewy urutoꞌe. Eikaykay raꞌyn temiitꞌin no tetawa kape aikope toĩneꞌen Morekuat no hap kape aikope tewaku hap moherep hap kape eikaykay. Miꞌi tote yt tuwe­mõti hin i Tupana eiminug koꞌi pupi. Miꞌi hap uruiky­ꞌesat kahato. Yt kat i hin i Tupana wemõti eiminug koꞌi pupiat hap uruiky­ꞌesat.

"

¹³ Waku kahato eipe uiwa­nẽtup hawe katu­pono saꞌa­wyꞌi Iesui kapiat uruehay hap kape ehewaure kaꞌa kahato. — Yt miitꞌin ehay wo hin i urunãpin eweiꞌe eipyꞌa pe tawa Tesa­ro­nika piaria. Waku kahato eiperia. — Tupana ehay sese wo urumuꞌe katu­pono Iesui Aimoieĩ­neꞌen hat ete urumuꞌe eweiꞌe uruepiat. Miꞌi hawyi Iesui mohey haria wo raꞌyn eweipy­huꞌat kahato itote waku hap ewy are. Miꞌi hap upi urutu­wehum kahato Tupana kape at kaꞌap ehupi are. Yt karãmuat i ikahuro rakat uruwehum hap katu­pono Tupana ehay mio tuwenug kahato raꞌyn eheĩneꞌen hawuo Iesui mohey hawyi."

¹⁴ Miꞌi hawyi ehetawa Tesa­ro­nika piaria iꞌatu­hoiro haria kahato ehete eiꞌa­tu­mo­so­ꞌopot kahato itote aikotã saꞌa­wyꞌi Iesui mohey haria Iuteuria hoꞌopot iꞌatue­tawa piaria hap ewy topy­huꞌat ehete eiwo­ꞌo­ꞌe­wy­ꞌewy."

¹⁵ Nimo Iuteuria tuꞌuka Tupana potpo­ꞌo­roria tehay moherep haria. Miꞌi hawyi Aika­ꞌiwat Iesui taꞌa­tu­ꞌauka raꞌyn wy. Miꞌi pote koitywy aiꞌauka teran miꞌiria. Yt Tupana mowepit hap hin i te taꞌa­tunug ahete. Iꞌewyte yne ahewa­nĩ­kaptia wo tukup­teꞌen miꞌiria Iuteuria."

¹⁶ Yt ewehenoi teiꞌo iraniaꞌin wẽtup ywania pe iꞌatuꞌe uruepe. Katu­pono miꞌiria yt tiky­ꞌesat hin i iraniaꞌin ehakye­raꞌat hap katu­pono — Howapy yne raꞌyn iꞌatupiit iꞌatu­minug saꞌag koꞌi wo. Yt kat i raꞌyn heiam howapy poityꞌi pote e Tupana. Toran naꞌyn putꞌokꞌe raꞌyn koitywy iꞌatu­ꞌa­piheg hap e Tupana Iuteuria pe topy­ꞌahak popuo.

"

¹⁷ Uiwy­riaꞌin ehepiat hoꞌopot turan yt uwe hin i uruto eiwywo eipo­wyro hamo. Urupiit yt uwe i maꞌato uruwa­nẽtup hap toĩneꞌen ehowawi yn are. Taꞌi uruehatꞌat kahato eiky­ꞌewi kat pote saꞌa­wyꞌi uruꞌaipok wo urutuwat ehowawi. Miꞌi hawyi poꞌog urupap ehowawi — Toꞌiro wata­ꞌaipok i ro aheka­tu­wyria Tesa­ro­nika piaria ewawi urutoꞌe urupap haype."

¹⁸ Iꞌewyte uito Pauru miꞌi hap yn uiwẽ pyi tuwẽtem — Toꞌiro wata­ꞌaipok i uiꞌe hap ewy. Miꞌi hawyi urutuwat maꞌato yt putꞌok­ꞌu­ru­toꞌe i. Taꞌi karania wo neꞌi urupyhyp ahiag ehowawiat urutuwat turan. Urutuwat wen maꞌato yt putꞌok­ꞌu­ru­toꞌe hin i. Urupyhyp yn tuereto ahiag ehowawiat uruwat turan."

¹⁹ Katu­pono karãpeĩ putꞌokꞌe Aika­ꞌiwat Iesui Wuatꞌi Miitꞌin Porekuat nuat turan eipe yn eweipy­huꞌat uimo­wepit kahato hanuaria wo aikotã more­kuaria teꞌe­ru­wehum kahato hamuat taꞌa­tu­ꞌakag painug hap ete. Miꞌi hap ewy hamuat uruto urutu­wehum kahato hamuat ehete. Miꞌi hap yn uiwa­nẽtup hawe."

²⁰ Katu­pono eipe yn eweipy­huꞌat uimo­ꞌok­pi­pokꞌi haria wo urutoꞌe Pauruꞌin.

"

3

¹ Karãpe yt urutuwat kuap i ehowawiat pote pyno uruipo­ꞌoro Timoteu ihaꞌat ehowawiat hamo are aikotã eweikup­teꞌen hap kuap hamo uruehatꞌat kahato hawyi. Uruipo­ꞌoro miꞌi pytkai uruto urutu­kup­teꞌen tawa Atena pe."

² Miꞌi hawyi urueka­tuwy Timoteu uruipo­ꞌoro ehowawi Iesui ehay etiat urupotpap hap moherep ehepiat hamo katu­pono Tupana eropat hat kahato Timoteu aiꞌe­wywuat sese. Miꞌi uruipo­ꞌoro pote eimoe­hãite kahato ehepiat imohey hap upi. Yt uruiky­ꞌesat i eihep imohey hap kaipyi hoꞌopot hap."

³ Katu­pono Iesui mohey raꞌyn ahepiat pote iꞌatu­mi­ky­ryꞌi kahato miitꞌin ahete miꞌi pytkai Tupana yt tipyhyp hin i katu­pono miꞌi hap kaipyi aikuap pywuat tomohey hap sese iꞌewyte yt tokyꞌe i haria kuap hamo."

⁴ Saꞌa­wyꞌi urutu­kup­teꞌen eiwywuat turan — Tut aru ehepiat hoꞌopot hap urutoꞌe. Miꞌi hawyi putꞌokꞌe raꞌyn ehete uruꞌe hap ewy. Koitywy ewehãꞌãg naꞌyn iꞌewyte eweikuap taꞌyn miitꞌin miky­ryꞌi ehetiat hap."

⁵ Saꞌa­wyꞌi tawa Atena pe areĩneꞌen turan ehowawi yn uiwa­nẽtup hap. Wẽtup eꞌat pe haty kahato uhete katu­pono yt atikuap i aikotã som eweikup­teꞌen hap. Miꞌi hawyi yt ahupit kuap i raꞌyn mesuwat haty hap hawyi atipo­ꞌoro Timoteu iꞌatuepiat imohey hap kuap hamo are sio ahiag iꞌatuiãꞌãg moityꞌi hawyi imohey hap pun haria wo raꞌyn tukup­teꞌen hawyi uipotpap hap topy­huꞌat yt kat hamo i hap kuap hamo atipo­ꞌoro Timoteu."

⁶ Mio tã are turan Timoteu putꞌokꞌe raꞌyn uruete. Miꞌi hawyi sehay wakuat kahato tohenoi uruepe ehetiat — Taꞌi sakpoꞌe te taꞌa­tu­mohey hap e. Taꞌi Tupana kyꞌe hap te toĩneꞌen itote e. Aikyꞌe hap wuatꞌi eꞌat piat toĩneꞌen ne e. Iꞌatue­hatꞌat kahato te ti aiky­ꞌewi e. Taꞌa­tu­ky­ꞌesat kahato teꞌe­ra­ꞌa­kasa ahowawiat hap e aikotã saꞌa­wyꞌi aito ahehatꞌat iꞌatu­ky­ꞌewi hap ewy e Timoteu uruepe ehehay tohenoi."

⁷ Miꞌi hawyi urusa­tyꞌi hap tuweityk taꞌyn uruete. Waku sakpoꞌe taꞌa­tu­mohey kahato te urutoꞌe. Miꞌi hawyi yt uruho­ꞌopot kahato i raꞌyn katu­pono Timoteu mienoi ehetiat urumo­wepit kahato."

⁸ Pyno Iheg me kahato o eweikup­teꞌen imohey hap ete. Miꞌi tupono waku pe eweikup­teꞌen maꞌato yt pote yt uimo­wepit hin i."

⁹ Miꞌi hap uruikuap hawyi poꞌog poꞌog urutu­wehum Tupana ete — Waku kahato En urutoꞌe katu­pono tawa Tesa­ro­nika piaria emohey kahato te waku kahato urutoꞌe."

¹⁰ Tupana urupo­wyro o miꞌiria kapiat uruꞌa­kasa hamo urutoꞌe katu­pono urutuwat teran i raꞌyn emohey haria yt ihãite i te rakat moehãite hamo urutoꞌe at kaꞌap Tupana pe."

¹¹ — Uruꞌywot uruhẽtup Uruka­ꞌiwat Iesui set upi etum o uruepe muꞌap mekewat Tesa­ro­nika kapiat uruwat hamo urutoꞌe Tupana pe."

¹² Uruiꞌa­tu­kyꞌe kahato eipe. Miꞌi hap ewy atiky­ꞌesat eiwo­ꞌope eiwo­ꞌo­kyꞌe hap miꞌi pote ahẽtup Tupana pe — Etiꞌa­tu­moe­saika o poꞌog poꞌog Iesui mohey haria ekyꞌe poꞌog hamo iꞌewyte iraniaꞌin atukyꞌe hamo are. Miꞌi hap ti ahẽtup Tupana pe ehupi."

¹³ Eiwo­ꞌo­kyꞌe kahato pote Tupana eimoe­saika wakuat nug hamo aikotã toꞌo­wywuat hamo. Miꞌi pote ti aru karãpe Tupana tut Tosa­ꞌyru wywo teropat haria wywuat turan ehewaku kahato hap toipuẽti eikai katu­pono miitꞌin kyꞌe kahato haria eipe pote. Miꞌi hap uruikuap taꞌyn uruto Pauruꞌin.

"

4

¹ Uruwy­riaꞌin koitywy uruhẽtup kahato ehupi poꞌog poꞌog Tupana mowepit haria wo eweikup­teꞌen hap Iesui miky­ꞌesat ewy kahato. Uruikuap taꞌyn ti koitywy Tupana mowepit haria wo raꞌyn eweikup­teꞌen. Miꞌi tã raꞌyn pytkai ti uruhẽtup poꞌog poꞌog ne."

² Iꞌewyte yt waure­ꞌe­weiꞌe teiꞌo Iesui kaipywiat einãpin uruepiat hap ete."

³ Pyno koitywy uruhenoi teran ehepe kat som Tupana tiky­ꞌesat watunug hap. Yt toiky­ꞌesat i ti wuatꞌi hary­po­riaꞌin wywuat hap iꞌewyte wuatꞌi ihainiaꞌin wywuat yt aiweꞌeg i hap ti yt toiky­ꞌesat i. Waku iweꞌeg kahato rakaria wo toiky­ꞌesat aheĩneꞌen hap."

⁴ Tupana tiky­ꞌesat wyti wẽtup ok wywo yn aheꞌaito hap iwary hap toiky­ꞌesat iweꞌeg kahato rakaria aito pote. Miꞌi tã watunug pote miitꞌin mimõ­typot no watoĩ­neꞌen."

⁵ Maꞌato iraniaꞌin yt Tupana kuap i haria ti iꞌatue­waire ewaire hap yn taꞌa­tunug. Maꞌato aito ti yt toiky­ꞌesat hin i miꞌiria ewywuat aheĩneꞌen hap."

⁶ Yt naku i kahato ti wati­po­hari aiwy iharyꞌi ete pãi urutoꞌe saꞌa­wy­ꞌite ehepe. Iꞌewyte wy koitywy yt eweimaꞌat reiꞌo wẽtup ok hary­poria imoewaire hamo urutoꞌe haty wo katu­pono miꞌi tã watunug pote Tupana miꞌa­piheg wo watu­kup­teꞌen pãi."

⁷ Tupana yt tiky­ꞌesat hin i ti yt iweꞌeg i rakaria wo aheĩneꞌen hap maꞌato toꞌe­wywuat ahewaku hap yn toiky­ꞌesat."

⁸ Ipãꞌãu weꞌeg kahato rakat aimuꞌe hamuat. Miꞌi tupono uwe uwe topot­ma­ꞌatꞌi maꞌatꞌi hary­po­riaꞌin ihainiaꞌin wywo yt tuweꞌeg i haype. Miꞌi hat topy­huꞌat Tupana ehay pun hano. Iꞌewyte miitꞌin maꞌat hat miꞌi.

"

⁹ Nimo pyi te mesup te Tupana eimuꞌe kahato aikotã eiwo­ꞌo­kyꞌe hamuat hap ete. Miꞌi tupono ipotmu­ꞌeria wo raꞌyn eweikup­teꞌen koitywy. Miꞌi tupono yt kat no kuap i raꞌyn poꞌog woro­ho­ꞌo­muꞌe woꞌo­kyꞌe hap ete mesuwat uimiwan me katu­pono eiwo­ꞌo­kyꞌe kuap kahato raꞌyn."

¹⁰ Iesui mohey haria wuatꞌi tawa Masẽ­tunia piaria ikuap yne raꞌyn woꞌo­kyꞌe hap eikaipyi. Miꞌi tupono ti uruhẽtup poꞌog ehepe eiwo­ꞌo­kyꞌe hap miitꞌin kyꞌe hap."

¹¹ Uiwy­riaꞌin woro­ho­ꞌo­nãpin pywuat sehay wo. Woꞌoe­re­mo­pusu haria wo yt naku i aito watu­kup­teꞌen. Waku teꞌen aipotpap kaipyi aimiꞌu ahaka­reꞌen aikotã urutoꞌe saꞌa­wyꞌi hap ewy waku watoiat yne aiperup hap koꞌi urutoꞌe."

¹² Miꞌi hawyi ipotpap kahato rakaria wo eweikup­teꞌen are. Miꞌi pote ti aru meiũran — Taꞌi waku kahato miꞌiria iꞌatuꞌe Iesui mohey haria. Waku kahato miꞌiria iꞌatuꞌe iraniaꞌin. Eipo minug kaipyi mio tã iꞌatuꞌe. Yt eweikup­teꞌen neiꞌo iraniaꞌin okpe tote neꞌi iꞌatue­ka­reꞌen iꞌatu­miꞌu etiano neꞌi maꞌato motpap haria wo eweikup­teꞌen. Yt sẽtup i sẽtup i e haria wo teiꞌo eweikup­teꞌen are.

"

¹³ Uruwy­riaꞌin uruiky­ꞌesat eweikuap kahato pywuat sehay aikotã ikuꞌuro rakaria tukup­teꞌen hamuat hap. Yt uruiky­ꞌesat i eweikup­teꞌen Iesui mohey ran haria wo neꞌi katu­pono taꞌa­tuwy kuꞌuro pote toꞌo­kakꞌi kahato — Yt karãpe i raꞌyn aru wata­ꞌa­kasa aiwy kape taꞌa­tue­haype."

¹⁴ Maꞌato aito ti wato­mohey kahato raꞌyn karãpe Iesui toku­ꞌuro hawyi toĩneꞌen pakup i hap. Iꞌewyte wato­mohey kahato raꞌyn karãpe Tupana tut hamuat Iesui wywo iꞌewyte map haria imohey haria tõꞌẽ tõꞌẽ Iesui upi atipy kaipyi hap wato­mohey kahato raꞌyn aito."

¹⁵ Pyno mio tã e Tupana henoi map haria etiat tomohey haria etiat — Taꞌi ariot i ti aru yt ihãite rakaria kape yn i maꞌato map haria uimohey haria kape wy ariot. Miꞌi hawyi toꞌo­pype atero­poꞌok e Tupana."

¹⁶ Pyno Aika­ꞌiwat sese ti aru taꞌapyk atipy kaipyi miꞌi hawyi atipy piaria esurara akag ti aru ihay pirik kahato. Miꞌi turan ti aru huhuꞌe akuara wato pyi mekewat hut hap enoi hamo. Miꞌi turan ti aru mekewat Iesui mohey haria ikuꞌuro rakaria Tupana tiꞌa­tu­po­re­nõꞌẽ yne yne aiꞌam hap eꞌyianmete."

¹⁷ Miꞌi hawyi aito ihãite te rakaria ahytmoi tomi­moieĩ­neꞌen guꞌuro pywiat haria wywo. Miꞌi hawyi ti aru wataꞌam aiwo­ꞌo­pype howa kape hut turan ywyhig kape. Miꞌi hawyi itote wato­ꞌo­puẽti ywaiti pe."

¹⁸ Pyno waku wato­ꞌo­mo­wepit aiwo­ꞌope aheĩneꞌen pakup i hap ete urutoꞌe ehepe Pauruꞌin.

"

5

¹ Tut aru Iesui maꞌato yt watikuap i karãpeĩ putꞌokꞌe hamuat sio iꞌaman motpe sio at pe hap koꞌi ti yt urutuwan kuap i ewawi."

² Yt urutuwan kuap i ehowawi katu­pono yt uwe i ikuap aikotã yt uwe i seroꞌok e hat ikuap wãtym muat. Miꞌi hap ewy kahato Iesui ut hap yt uwe i ikuap."

³ Miꞌi turan ti aru miitꞌin teꞌe­roꞌe toꞌope — Yt kat i wyti poꞌog hoꞌopot hap iꞌatuꞌe aru. Yt eweikenꞌẽ teiꞌo iꞌatuꞌe katu­pono waku pe raꞌyn watoĩ­neꞌen iꞌatuꞌe maꞌato yt pywo pe i. Katu­pono hupiꞌa rakat hary­poria ete watikuap imẽpyt haty hap meremo putꞌokꞌe tuwete hap ewy meremo putꞌokꞌe hamuat ikahuro hap eꞌat imoma hap eꞌat meremo putꞌokꞌe. Yt uwe i aru tuwemig kuap i aru mekewat eꞌat pe."

⁴ Maꞌato ariãty ewy watoĩ­neꞌen aito pote ariãty hot pe ti raꞌyn watoĩ­neꞌen hut turan mote yt aimogyt kuap i. Hẽtyhot pe watoĩ­neꞌen mote watikuap taꞌyn putꞌokꞌe irane mekewat ikahuro hap eꞌat pe. Maꞌato iꞌypyryp mẽpytꞌin neꞌi aito pote ti iꞌypyryp we ti raꞌyn watoĩ­neꞌen hut turan. Miꞌi hawyi get haria ewy wato­py­huꞌat pote mekewat eꞌat pe aimogyt kahato katu­pono mekewat eꞌat pe iꞌypyryp we ieĩneꞌen haria iꞌatu­minug saꞌag hap koꞌi heremo raꞌyn."

⁵ Maꞌato ariãty mẽpytꞌin no wato­py­huꞌat aito pote ihotꞌok mẽpytꞌin sese wo raꞌyn aito katu­pono wato­py­huꞌat Iesui ehay wywo. Miꞌi pote aito yt iꞌypyryp mẽpytꞌin wo hin i katu­pono yt watunug neran i raꞌyn saꞌag."

⁶ Taꞌi aito Iesui ut hap kape wate­haꞌat kahato. Yt naku i get haria ewy neꞌi watoĩ­neꞌen hut hap owakai iraniaꞌin ewy."

⁷ Taꞌi get haria wãtym muo teꞌe­roket kahato. Iꞌewyte mahy u haria iꞌatu­mo­pẽꞌã miꞌiria wãtym muo tukup­teꞌen."

⁸ Maꞌato aito hẽtyhot puo ahewyry yt kat i aimo­pẽꞌã hap mywo. Waku wato­py­huꞌat aikotã sura­raꞌin ewy katu­pono sura­raꞌin ipag taꞌa­tu­po­tiꞌa tote iheg nakat moryꞌa pupi taꞌa­tu­ꞌauka hap. Miꞌi hap ewy waku wato­mohey Iesui hawyi iꞌewyte wato­ꞌo­po­wyro waku aiwo­ꞌo­kyꞌe hap ete. Karãpe Iesui mohey hano watoĩ­neꞌen iꞌewyte miitꞌin kyꞌe hano pote ti surara ipotiꞌa tote iheg nakat ewy watoĩ­neꞌen. Iꞌewyte sura­raꞌin ipag taꞌa­tue­sapeu iheg nakat taꞌa­tu­ꞌahot hap pupi hap ewy waku watoĩ­neꞌen. Uheywytꞌin uheinytꞌin waku wate­haꞌat kahato Aheha­kye­raꞌat hat yatypiat aheĩneꞌen hap kyꞌewi. Miꞌi hap ewy ti waku wate­haꞌat kahato surara esapeu iheg nakat ewy.

"

⁹ Tupana aiꞌairo yt aiꞌa­piheg hamuat i maꞌato aheha­kye­raꞌat hamo."

¹⁰ Iesui ikuꞌuro aiꞌa­piheg hap u hamo. Miꞌi tupono karãpe hut turan watuwat hupi sio watoĩ­neꞌen map haria wo raꞌyn mekewat eꞌat pe sio ahehãite te watuwat hupi."

¹¹ Miꞌi tupono ti waku wato­ꞌo­moe­saika wato­ꞌo­mo­wepit tut aru Iesui aiꞌe hap ete. Taꞌi atikuap taꞌyn eipe miꞌi hap nug haria raꞌyn are. Miꞌi yn uruiky­ꞌesat poꞌog.

"

¹² Uhytꞌiꞌin eweiꞌa­tu­mõ­typot o eimuꞌe haria eipy­ꞌa­set­piaria. Mio tã urutoꞌe uruwese popuo. Yt eweiꞌa­tu­mohit neꞌi teiꞌo aiꞌa­pykok haria katu­pono Tupana minug aiꞌakag wuat ainãpin hanuaria. Iꞌewyte aipo­reto muꞌap hãpyk takat kapiat haria."

¹³ Waku aimuꞌe haria kyꞌe haria wo watu­kup­teꞌen. Waku iꞌatu­mõ­typot haria wo watu­kup­teꞌen. Iꞌewyte wato­ꞌo­wese kahato aiwo­ꞌope.

"

¹⁴ Maꞌato toĩneꞌen eipy­ꞌa­setpe motpap pupiat woꞌoksep hat neꞌi pote waku wãiꞌe­weiꞌe miꞌi hat pe merup upiat neꞌi myhuꞌat hat pe. Iꞌewyte waku ti wati­mo­ꞌok­pi­pokꞌi ihay kenꞌẽ tehay hamuat rakat. Iꞌewyte waku wati­ꞌy­kesat imohey hap etiat yt hesaika i rakat. Iꞌewyte waku aipe­rupꞌi yn wuatꞌi miitꞌin ete."

¹⁵ Iꞌewyte yt naku i nug ehetiat haria o yt eweiꞌa­tu­poepyk teiꞌo. Miꞌi hawyi ti waku watikat aikotã miat waku watunug wakuat aiwo­ꞌope hap yn naꞌyn. Maꞌato yt Iesui mohey haria kape yn i wyti mio tã are maꞌato yne miitꞌin me."

¹⁶ Yne eꞌat pe waku watu­wehum Tupana kape."

¹⁷ Iꞌewyte yne eꞌat pe wahẽtup Tupana kape yt ikahuro i hamuat hap."

¹⁸ Iꞌewyte yne eꞌat pe — Waku kahato En Tupana watoꞌe sio hoꞌopot pote sio ahehãite pote. Miꞌi tã yne eꞌat pe waku watunug katu­pono miꞌi tã hap Tupana tiky­ꞌesat Iesui mohey haria tunug hap.

"

¹⁹ Yt naku i wãiwa­toꞌe Tupana Pãꞌãu miat aimuꞌe turan."

²⁰ Iꞌewyte yt naku i watu­we­ky­ryꞌi neꞌi aimuꞌe wẽtup ok Tupana Pãꞌãu kaipywiat turan."

²¹ Karãpe wẽtup ok aimuꞌe turan waku watu­wa­nẽtup — Tupana e hap ewy sio waku watoꞌe aiwa­nẽtup hawe. Ipãꞌãu kaipyi pote waku watoꞌe yt pote wati­ꞌairo hawyi waku yt nakuat i watipun."

²² Ipotyi kahato ti aheko saꞌag. Pyno miꞌi waku watoiat yne.

"

²³ — Tupana etiꞌa­tu­po­wyro o uruwy­riaꞌin itotiaria. Etiꞌa­tu­mo­pe­rupꞌi wakuap nug hamo are. Uruiky­ꞌesat tawa Tesa­ro­nika piaria emohey haria wuatꞌi kupteꞌen hap. Etiꞌa­tu­mo­pa­kupꞌi iꞌatu­wa­nẽtup pakup i hamo are. Miꞌi hawyi yt kat i iꞌatu­wa­nẽtup saꞌag hap kapiat hap uruiky­ꞌesat Uruꞌywot urutoꞌe. Uruiky­ꞌesat miꞌiria ewano yn hap urutoꞌe. Miꞌi tã etunug mote ti aru karãpe Esaꞌyru emipo­ꞌoro ut turan yt kat i iꞌatu­minug saꞌag hut turan etipuẽti aru urutoꞌe yn Tupana pe."

²⁴ Yt karãpe i Tupana aiꞌatoiat. Saꞌa­wyꞌi aikaykay towano. Mio toĩneꞌen aiwywo wuatꞌi eꞌat pe toꞌoewy ainug.

"

²⁵ Uruwy­riaꞌin ewehẽtup o Tupana ewawi urupo­wyro hamuat."

²⁶ Mesuwat uhekue­katu atipo­ꞌoro torania Iesui mohey haria itotiaria kape. Waku wato­ꞌa­hi­ꞌy­pysat tuereto aiwo­ꞌo­kyꞌe hap moherep hamo."

²⁷ Mesuwat urumiwan me uruhenoi Aika­ꞌiwat Iesui etiat. Miꞌi tupono eweimo­wẽpap to mesuwat mienoi yne Iesui mohey haria pe."

²⁸ Toran naꞌyn urumiwan. — Iesui ereĩneꞌen kahato Morekuat no tawa Tesa­ro­nika piaria emohey haria pyꞌa­setpe. Etum neꞌen neꞌi iꞌatuepe poꞌog poꞌog egyiꞌat hap. Miꞌi yn uruhẽtup Aika­ꞌiwat pe ekawiano.

Toran naꞌyn urumiwan ewawi mesup. Woro­ho­ꞌo­kyꞌe kahato. Miꞌi tupono uito Pauru hawyi mehĩ Sira hawyi mehĩ Timoteu kuekatu uruipo­ꞌoro."