1

¹ Uiwy­riaꞌin uito ti Iesui potpo­ꞌoro Pauru. Mesup atipo­ꞌoro uimiwan ehowawi tapy­ꞌyiaria tawa Korosi piaria Iesui potpo­ꞌo­roria kape. Mesup Tupana emiitꞌin sese eipe are Iesui mohey potꞌi haria eipe. Uito ti Aipo­typot eropat hat sese uito. Uito Tupana miꞌairo sese Imipo­ꞌoro Tosa­ꞌyru Iesui moherep hamuat. Tomi­ky­ꞌesat ewy uiꞌairo."

² Miꞌi pote kuekatu e hap atipo­ꞌoro ehowawi. Iꞌewyte aiwy Timoteu tuwehay poꞌoro ehowawi urumiwan me. Uruhẽtup ehowawi — Uruꞌywot Tupana etum no woꞌo­kyꞌe hap woꞌo­wese hap tawa Korosi piaria pe urutoꞌe. Ereĩneꞌen o itote hegyiꞌat kahato Esaꞌyru mohey haria piat hano urutoꞌe."

³ Uruka­ꞌiwat Iesui Ywot waku kahato En katu­pono Emipo­ꞌoro Esaꞌyru Uruka­ꞌiwat nuat kahato urutoꞌe. Waku sakpoꞌe En katu­pono etiꞌa­tue­ha­kye­raꞌat raꞌyn uruwy­riaꞌin tawa Korosi piaria urutoꞌe Tupana pe."

⁴ Urumo­wepit kahato miꞌiria katu­pono miꞌiria emimo­waku koꞌi. Miꞌiria Esaꞌyru Emipo­ꞌoro mohey haria kahato. Emipo­ꞌoro Urupo­typot upiat haria kahato miꞌiria urutoꞌe. Waku sese En Tupana katu­pono etunug naꞌyn miꞌiria emẽpytꞌin kyꞌe kahato haria urutoꞌe Tupana pe.

"

⁵ Uheka­tu­wyria gaꞌatpo mekewat sehay pywuat wakuat Iesui etiat putꞌokꞌe ehetawa pe hawyi eiwe­waure kaꞌa kahato. Eweikuap taꞌyn hawyi — Taꞌi miꞌi wato­mohey pote ti watoĩ­neꞌen aru wuatꞌi eꞌat pe atipy pe eweiꞌe raꞌyn Tupana e hap ewy eweiꞌe. — Tupana atunug aru eꞌe hap ewy eweiꞌe. Mio tã eweiꞌe raꞌyn hawyi Iesui mohey haria sese eweipy­huꞌat. Waku kahato katu­pono iꞌewyte woꞌo­kyꞌe kahato haria kahato eweipy­huꞌat eipe."

⁶ Koitywy mesuwat Iesui etiat ainãpin hap aimoe­ha­py­hotꞌok kahato wuatꞌi miitꞌin me mesuwat yi totiaria pe. Tuwe­sytpok kahato ihay wakuat aikowo aikowo tuwat Tupana ehay wuatꞌi puo. Miꞌi hawyi miꞌiria wy waku pe raꞌyn tukup­teꞌen. Tupana mipoi­tyro wo raꞌyn tukup­teꞌen. Miꞌi hap ewy raꞌyn eweikup­teꞌen eweikuap taꞌyn sehay hawyi. Eipe ti eweikuap taꞌyn Tupana tum ehepiat wuatꞌi eꞌat piat eheĩneꞌen hamuat hap. Eweikuap taꞌyn yt kat saꞌup i tegyiꞌat hap tutum neran hap eweikuap taꞌyn.

"

⁷ Gaꞌatpo mehĩ Epawai toĩneꞌen eipy­ꞌa­setpe turan tohenoi kahato raꞌyn Tupana egyiꞌat hap etiat. Taꞌi miꞌi ti Aipo­typot eropat hat sese uruto ewywuat kahato aipotpap upiat kahato uhyt Epawai. Iꞌewyte eiwo­ꞌo­muꞌe kahato hat miꞌi. Yt ipohep hin i wakuat sehay enoi hap ete ehepe. Miꞌi kaipyi eweipuẽti raꞌyn Tupana egyiꞌat hap."

⁸ Miꞌi hawyi mehĩ Epawai urumuꞌe kahato mesuwe aikotã eweikup­teꞌen itote — Tawa Korosi piaria ti woꞌo­kyꞌe kahato haria e uruepe. Tupana Pãꞌãu kaipyi toꞌo­kyꞌe kahato e ehetiat uruepe mehĩ Epawai."

⁹ Miꞌi e hap uruikuap hawyi uruhẽtup kahato Tupana kape eipo­wyro hamuat uhyt Epawai e hap uruikuap hawyi. Mesup te uruhẽtup ehupi — Tupana urutoꞌe etum tawa Korosi piaria pe emiky­ꞌesat nug hap kuap hamuat urutoꞌe. Iꞌewyte etum no iꞌatu­weꞌeg kahato hap eweꞌeg hap ok tã ewanẽtup hap ewy urutoꞌe Tupana Pãꞌãu me."

¹⁰ — Tupana uruiky­ꞌesat kahato tawa Korosi piaria Epãꞌãu eiam kahato wo eweꞌeg hamo iꞌewyte emiky­ꞌesat nug kuap hap urutoꞌe mesuwe uruhẽtup. Uruiky­ꞌesat miꞌiria aikotã iꞌyp iꞌywa kahato rakat ewy hewo hewo kahato hap ewy wyti uruiky­ꞌesat kahato miꞌiria Tupana urutoꞌe. Pyno uruiky­ꞌesat miꞌiria wakuap yn nug haria En ewy hap uruiky­ꞌesat. Iꞌewyte uruiky­ꞌesat ekuap hap ihotꞌok ewy ewy putꞌokꞌe Esaꞌyru mohey haria ete urutoꞌe uruhẽtup Tupana pe."

¹¹ Tupana Pãꞌãu hesaika kahato yne esaika hap apy tote. Miꞌi pote aito ahesaika kahato Tupana Pãꞌãu poꞌog poꞌog aipyt­ꞌatnug hawyi. Miꞌi hawyi wato­py­huꞌat hesaika hap wywo. Miꞌi hawyi aimoe­saika wuatꞌi saꞌag miat aiꞌakit hap pun hamo. Miꞌi hawyi wyti iꞌewyte wahupit kuap yne iꞌatu­mi­ky­ryꞌi hap koꞌi. Miꞌi hawyi perupꞌi puo wato­mohey wuatꞌi eꞌat pe motꞌi kahato Tupana Pãꞌãu toĩneꞌen aikai pote."

¹² Miꞌi hawyi watu­wehum aiwepit kahato hap wywo Aiꞌywot Tupana kape katu­pono Aiꞌywot atipy piat aimo­hãpyk aiwa­nẽtup hap. Miꞌi hawyi — Wakuaria wo raꞌyn miꞌiria e ahepiat pe. Uhemiitꞌin sese miꞌiria e. Uheka­reꞌen aru atum yne iꞌatuepe. Uhetawa hẽtyhot rakat atum aru iꞌatuepe e. Iꞌatueo­wakai waku pe yne raꞌyn e ahepiat Topãꞌãu eiam koꞌi pe."

¹³ Saꞌa­wyꞌi ahiag potmu­ꞌeria wo watoĩ­neꞌen. Yt watu­we­ꞌa­putsit kuap i ipo pyi. Iꞌe hap yn watunug kuap. Iꞌypyryp wiat ieĩneꞌen haria ewywuat watoĩ­neꞌen. Saꞌa­wyꞌi hoꞌo­wasat rakaria wo watoĩ­neꞌen maꞌato Aiꞌywot atipy piat tipo­hari raꞌyn aito ahiag po pyi. Miꞌi hawyi ahero­kosap Tosa­ꞌyru eropat haria wo raꞌyn. Tomi­kyꞌe kahato emiit no raꞌyn ainug. Waku kahato are."

¹⁴ Miꞌi hawyi waure wo raꞌyn Tupana toĩneꞌen aiminug saꞌag koꞌi kai. Iesui aikyiꞌat tosuu wo aheha­kye­raꞌat hamo."

¹⁵ Tupana sese ti yt heremo i ahowawi. Miꞌi hawyi toipo­ꞌoro ahowawi Tosa­ꞌyru wẽtup ok tuwe­mo­herep hamo Aipo­rekuat nuat. Imipo­ꞌoro Haꞌyru ti iꞌewywuat sese topy­huꞌat. Iꞌywot yt heremo pytkai i maꞌato Haꞌyru wata­ꞌa­kasa hawyi watikuap taꞌyn Haꞌyru hawyi watikuap taꞌyn Toꞌywot ewy raꞌyn hap. Miꞌi hawyi yt heremo i rakat heremo raꞌyn. Haꞌyru ti poꞌog naꞌyn torania iraniaꞌin kai ipotput­ꞌokꞌe. Torania Tupana minug kai ipotput­ꞌokꞌe. Poꞌog naꞌyn yne ieĩneꞌen haria hewyry rakaria yi totiat atipy piat kai poꞌog Haꞌyru."

¹⁶ Tosa­ꞌyru ehay wo tutunug yne yne. Yt kat kawiat i tutunug. Atipy piaria yne toimo­herep iꞌewyte yne yi totiaria Haꞌyru inug. Yne heremo rakaria inug iꞌewyte yt heremo i rakaria atipy piaria akag koꞌi inug. Tuꞌi­saria yne imiꞌai­roria tukup­teꞌen. More­kuaria iꞌewyte imiꞌai­roria. Waikiru at waty yi iminug koꞌi yne Tosa­ꞌyru ehay wo yne tutunug. Mesup tutum naꞌyn yne yne Tosa­ꞌyru pe."

¹⁷ Haꞌyru toĩneꞌen yne iminug koꞌi eꞌyianmete. Wẽtup ok yn naꞌyn topy­huꞌat Tosa­ꞌyru wywo. Haꞌyru esaika hap wywo toiꞌa­tu­mo­py­huꞌat yne yne at waikiru waty yi yne yne. Tosa­ꞌyru ehay wo toiꞌa­tu­mo­wo­ꞌosat yne. Toiꞌa­tu­moheg yne Tosa­ꞌyru ehay wo yne tominug koꞌi."

¹⁸ Miꞌi hawyi wuatꞌi puo Tupana mohey haria akag wo topy­huꞌat raꞌyn Haꞌyru. Tomohey haria akag akag wo toĩneꞌen. Miꞌi hawyi yne aito imohey haria ipiit ewy wato­py­huꞌat maꞌato Iesui aiꞌakag wo topy­huꞌat aikotã aiꞌakag me watu­we­wa­nẽtup hap ewy aipiit tutunug miꞌi hap ewy watunug iꞌe hap ewy. Tomohey hanuaria Saꞌa­wynug hat ti Iesui. Ahesaika hap Haꞌyru kaipyi yn tut aimoe­saika hamuat. Ahehaĩte hap iꞌewyte Haꞌyru tunug wy. Ikuꞌuro sese aika­wiano hawyi Tupana tomoieĩ­neꞌen i raꞌyn guꞌuro pyi. Yt uwe hin i te tuwẽtem guꞌuro pyi turan tuwẽtem guꞌuro pyi katu­pono Tupana tiky­ꞌesat Tosa­ꞌyru yianmete wuat miitꞌin wẽtem hap. Miꞌi saꞌa­wyꞌi wyti putꞌokꞌe guꞌuro hakpo guꞌuro hap."

¹⁹ Pyno aito wẽtup yn imiky­ꞌesat ewywuat Tupana wywo Haꞌyru wywo Ipãꞌãu wywo wato­mohey Haꞌyru hawyi.

"

²⁰ Tupana atoiat haria yne aitoria saꞌa­wyꞌi iꞌewyte atipy piaria ahyt Tupana atoiat haria saꞌa­wyꞌi. Miꞌi hawyi Tupana watunug ahewa­nĩkap mo. Miꞌi pote wẽtup eꞌat pe toꞌe Tosa­ꞌyru pe — Woronug En muꞌap ewywuat miitꞌin aipok uhowawiat hamuat. Ekuꞌuro ariaꞌyp posak ete hawyi taꞌat yne esuu raꞌyn hawyi uiwaure haria uikat kuap taꞌyn. Miꞌi esuu wo atiꞌa­tu­mo­wehik yne miitꞌin emohey haria uhowawi i raꞌyn e mesu­wa­rotiat yi totiaria iꞌewyte atipy piaria uiꞌatoiat haria e. Miꞌi hawyi aru woꞌo­wese hap i raꞌyn topy­huꞌat e Tupana Tosa­ꞌyru pe.

"

²¹ Saꞌa­wyꞌi watoĩ­neꞌen pya kahato Tupana kai yt naku i nug haria kahato aiwa­nẽtup hawe iꞌewyte aipiit no. Miꞌi pote watunug Tupana ahewa­nĩkap mo katu­pono wakuat kahato Tupana pote."

²² Maꞌato koran wyti Tupana ainug naꞌyn towy­riaꞌin no kahato. Aipo­typot piit ikuꞌuro ariaꞌyp posak ete hawyi Tupana tunug Tosa­ꞌyru muꞌap tuwe­wawiat aiꞌaipok hamuat. Ipiit aiwanuat ewy ikuꞌuro hawyi Tupana tekyi kahato tuwe­wawi Tosa­ꞌyru mohey haria. Koitywy ihamo raꞌyn watoĩ­neꞌen. Koitywy toꞌe ahepe — Yt kat i te saꞌag atipuẽti eikai e. Waku puo raꞌyn eweikup­teꞌen uiwa­nẽtup hawe aikotã yt karãpe i eweiꞌa­parap uhepe hap ewy eipe e ahepe. Koran uiwy­riaꞌin no raꞌyn eipe e Tupana ahepe."

²³ Pyno aiwy raꞌyn Tupana. Yt nakuap i watoiat raꞌyn hawyi waku aikyꞌe hat sese wato­mohey wuatꞌi eꞌat pe. Saꞌa­wyꞌi watikuap mekewat Iesui etiat sehay wakuat ehay hawyi wato­mohey raꞌyn Iesui. Miꞌi hawyi watoĩ­neꞌen aru wuatꞌi eꞌat pe e hap ewy wato­mohey. Miitꞌin teꞌe­ru­we­ky­ryꞌi ahetiat pytkai imohey hap yt watoiat hin i. Iheg me kahato watoĩ­neꞌen imohey hap ete. Saꞌa­wyꞌi wato­mohey kahato. Pyno koitywy yt naku i raꞌyn imohey hap watoiat sehay waku kahato Iesui etiat. Miꞌi atikuap saꞌa­wyꞌi hawyi uheropat kahato at kaꞌap wuatꞌi miitꞌin kape miꞌi moherep hamo aikope aikope miitꞌin tukup­teꞌen hap upi yne ywania pe ahytpok miꞌi ehay wakuat mesuwat yi wato hap ok tã. Miꞌi hamo yn uinug uito Pauru."

²⁴ Koitywy hoꞌopot hat ewy areĩneꞌen mesuwe. Uipiit satyꞌi kahato areĩneꞌen katu­pono woꞌo­pyhik hawe areĩneꞌen hatek takat ewy. Miꞌi pytkai uiwepit yn katu­pono eika­wiano ahoꞌopot. Saꞌa­wyꞌi Aipo­typot Iesui hoꞌopot kahato aika­wiano tomohey haria etiano. Koitywy watoĩ­neꞌen wẽtup mẽpyt sok ewy Iesui upi katu­pono toho­ꞌopot aika­wiano. Miꞌi hap ewy kahato ahoꞌopot Iesui mohey haria kawiano."

²⁵ Miꞌi pote Tupana toꞌe uhepe — Woronug en uimohey hano uheropat hano. Atiky­ꞌesat etomo­herep wuatꞌi pe uhehay e. Miꞌi tã etunug mote emimu­ꞌeria waku pe tukup­teꞌen. Miꞌi pote etiꞌa­tu­muꞌe ro uhehay wo wuatꞌi ywania pe e Tupana uhepe. Uito ti Pauru.

"

²⁶ Mesuwat sehay wakuat yt uwe i ikuap saꞌa­wyꞌi. Nimuaria yt uwe i mesuwat yi tote ikuap mesuwat sehay etiat. Tupana yt tomo­herep i miitꞌin muo mekewat eꞌat pe maꞌato mesup heremo raꞌyn wuatꞌi Iesui mohey haria pe raꞌyn."

²⁷ Koitywy Tupana toꞌe — Saꞌa­wyꞌi yt uwe i kape atimo­herep uhehay pakup e. Kurin ikuap haria saꞌa­wyꞌi maꞌato koitywy Uhaꞌyru mohey haria kape atimo­herep taꞌyn uhehay ikahu kahato rakat sehay hekat rakat wuatꞌi ywania mesuwat yi totiat kapiat sehay wakuat e. Saꞌa­wyꞌi migꞌi wo toĩneꞌen maꞌato mesup atimo­herep taꞌyn ehepe e Tupana ahepe. Etunug no Uhaꞌyru Eporekuat no eipyꞌa pe pote eweikup­teꞌen aru uhehamo mesuwe atipy pe uimi­mõ­typot koꞌi wo e Tupana ahepe."

²⁸ Miꞌi tupono koitywy wuatꞌi ywania pe — Ewetunug no Iesui Eipo­rekuat no urutoꞌe wuatꞌi miitꞌin me. Eiweꞌeg wo o watoꞌe. Eweikuap o mesuwat sehay wakuat watoꞌe wuatꞌi pe. Miꞌi hawyi yne Tupana esaika hap wywo waku watoĩ­neꞌen weꞌeg haria wo iraniaꞌin pyꞌa­setpe katu­pono wati­ky­ꞌesat kahato miꞌiria yne yne Tupana wywuat ieĩneꞌen haria wo. Watekyi teran kahato miitꞌin aiweꞌeg hap wywo Tupana kape. Wati­ky­ꞌesat miꞌiria Tupana kuap haria. Wati­ky­ꞌesat miꞌiria Haꞌyru mohey sese haria. Wati­ky­ꞌesat miꞌiria wẽtup wanẽtup hap ewy yn Aipo­typot Iesui wywo."

²⁹ Uito Pauru arepotpap kahato miitꞌin mohãpyk Iesui mohey hap etiat hamo. Uipiit sakup hap wywo aremo­so­ꞌopot kahato miꞌi nug hamo yne uhesaika hap wywo. Iꞌewyte yne Aipo­typot miium uhesaika hap wywo arepotpap katu­pono Tupana Pãꞌãu uipiit pyi ipotpap kahato topotpap nug hamo are. Uiwy­riaꞌin tawa Korosi piaria pywo pe ti areꞌe teran ehepe arepotpap saꞌa­wy­ꞌipyi mesup te arepotpap kahato. Woro­ho­ꞌonug Aipo­typot Iesui emiit no yt eipe yn i maꞌato iꞌewyte iraniaꞌin ywania torania atiꞌa­tu­muꞌe teran Iesui ete.

"

2

¹ Manaꞌin uhytꞌiꞌin tawa Korosi piaria haꞌa­wy­tepyi mesup te ahoꞌopot kahato uipyꞌa pe ehetiano. Uhehay kahato Tupana pe ehetiano katu­pono woro­ho­ꞌonug neran eipe Aika­ꞌiwat emiit no imohey sese haria wo. Maꞌato yt ehepe yn i ahenoi teran maꞌato iꞌewyte iꞌatu kahato yt uiꞌa­kasa i te haria iꞌewyte tawa Irautiseia piaria kape hap ahẽtup at kaꞌap Tupana pe."

² — Atiky­ꞌesat miꞌiria ieĩneꞌen kahato Esaꞌyru mohey hap upi hap ahẽtup. Etimonik to iꞌatu­ꞌa­rotꞌi hap areꞌe Tupana pe. Miꞌi hawyi etunug miꞌiria iwepit rakaria wo are. Etiꞌa­tu­ꞌa­po­ꞌahik miꞌiria woꞌo­kyꞌe haria wo aikotã urueꞌyni uruiꞌok­poꞌi hap ewy are. Atiky­ꞌesat miꞌiria hesaika rakaria wo surara ewywuaria ehay moherep haria wo are. Atiky­ꞌesat pywuat sehay kuap kahato haria wo are. Atiky­ꞌesat ikuap hotꞌok kahato sehay pywuat hawyi — Pywo ti rat e haria wo tukup­teꞌen are. Atiky­ꞌesat kahato taꞌa­tukuap kahato mekewat eꞌe hap saꞌa­wy­ꞌiwuat yt heremo i rakat Iesui eꞌyianmete wuat are. Mekewat — Atipo­ꞌoro aru Uhaꞌyru Eipo­rekuat no eꞌe hap are."

³ Aika­ꞌiwat Iesui pe toĩneꞌen yne yne weꞌeg hap koꞌi yne yne mikuap koꞌi are. Watikat pote wati­puẽti yne. Wahẽtup tope pote tuwe­mo­herep taꞌyn ahepe yne yne wuatꞌi Tupana mikuap yne. Wahẽtup pote Iesui aimo­weꞌeg kuap Tupana mikuap koꞌi ete are.

"

⁴ Pyno eiweꞌeg wo o eimaꞌat sehay wuat teran haria pupi. Wãiꞌe­weiꞌe o iꞌatuehay wuꞌuka hap neꞌi ete are iꞌatuehay yt pywo rakat i. Yt eweiwat reiꞌo iꞌatuehay upi katu­pono yt pywo i sehay hap nug kuap kahato haria miꞌiria. Iꞌatu­weꞌeg kahato heso nug hamo. Iꞌatuehay se kahato tuereto maꞌato eimaꞌat hamo neꞌi. Yt ereto teiꞌo iꞌatuehay upi are."

⁵ Uimo­wepit kahato haria eipe. Waku kahato eweikup­teꞌen Aipo­typot Iesui mohey haria sese raꞌyn ewy. Waku wẽtup surara yꞌam miat hat ewy eweikup­teꞌen — Yt atoiat i imohey hap eweiꞌe eiwo­ꞌope. Eiwa­nẽtup hap yt eweiꞌywyk hin i. — Uruto Iesui mohey haria waku eweiꞌe. Miꞌi hap araꞌa­kasa yne mesuwe uiwa­nẽtup hawe. Yt areĩneꞌen i eipy­ꞌa­setpe wen maꞌato uimu­ꞌetu wuat ewy atikuap. Uimo­wepit kahato haria eipe uiwa­nẽtup hawe uipyꞌa pe are."

⁶ Miꞌi hawyi waku eweiꞌe Iesui pe — Uruiky­ꞌesat kahato En Uruka­ꞌiwat no hap eweiꞌe. Miꞌi ti waku watoꞌe. Iꞌewyte mesup yne eꞌat pe waku watoꞌe Aika­ꞌiwat Iesui pe — Worokuap kahato teran uipyꞌa pe waku watoꞌe. Uruiky­ꞌesat aiwa­nẽtup hap wẽtup ok wanẽtup hap ewy yn waku watoꞌe. Miꞌi ti iꞌewyte waku watoꞌe at kaꞌap wato­mohey hawyi.

"

⁷ Waku wato­py­huꞌat Aika­ꞌiwat ewy are. Saꞌa­wyꞌi uruiꞌa­tu­muꞌe kahato eipe Iesui ete. Miꞌi hawyi eweimohey Iesui hawyi waku. Koitywy maꞌato waku eweimohey poꞌog poꞌog yne eꞌat. Aimikoi hapo kahato rakat ti ihãite raꞌyn tuwe­sapo nug kahato hawyi. Miꞌi hap ewy karãpe watunug Aimi­mohey miky­ꞌesat ewy at kaꞌap. Wati­mohey kahato raꞌyn Iesui hawyi ahehãite hap kahato raꞌyn watikuap. Miꞌi aikotã tuwe­motag kahato ariaꞌyp wato ewy hapo yi piit pe hap ewy watoĩ­neꞌen. Miꞌi hap ewy waku ahehay wati­pehik Iesui ehay ete. Miꞌi hawyi — Waku kahato En Iesui aiꞌe hap yn watoꞌe aipyꞌa pe. Arehum ewawi watoꞌe yn ahehãite imohey hap kaipyi.

"

⁸ Aimuꞌe haria iraniaꞌin tuwe­kaipyi aimuꞌe. Yt Tupana mipo­ꞌo­roria i iꞌatu kahato tukup­teꞌen. Iraniaꞌin aimuꞌe haria nagnia ehay kaipyi miit wanẽtup hap kaipyi mekewat mãꞌãu saꞌag wanẽtup hap aimuꞌe saꞌag. Yt imohey i haria porekuat ehay moherep haria iraniaꞌin. Yt Aipo­typot upiat aimuꞌe haria hin i woꞌo­maꞌat haria wo miꞌiria. Miitꞌin wanẽtup hap ewy yn aimuꞌe. Eiweꞌeg wo o iꞌatu­wo­ꞌo­muꞌe hap pupi katu­pono aimaꞌat reran haype are."

⁹ Taꞌa­tu­ky­ꞌesat eipe taꞌa­tuemiit no aikotã wamiri ewy aimuꞌe iraniaꞌin.

Tupana tipo­ꞌoro Tosa­ꞌyru Aipo­rekuat no maꞌato Tosa­ꞌyru piit pe toĩneꞌen miit sese wo Tupana tuwe­puꞌi nug. Iesui ti miit sese toĩneꞌen aiꞌe­wywuat. Iꞌewyte Iesui piit pe Tupana yne yne toĩneꞌen."

¹⁰ Iꞌatu kahato atipy piaria akag more­kuaria koꞌi tukup­teꞌen wen Iesui poꞌog poꞌog miꞌiria kai e. Iesui ti poꞌog poꞌog Morekuat no ahiag kai poꞌog hesaika ahiagnia kai poꞌog poꞌog nakat. Miꞌi hawyi aito Iesui mohey haria pote iwywo wẽtup miit ewy yn watoĩ­neꞌen. Miꞌi pote tutum ahepe toieĩneꞌen hap wuatꞌi eꞌat piat ieĩneꞌen hap mesuwe iꞌewyte atipy pe. Koitywy poꞌog waku aheĩneꞌen hap saꞌa­wy­ꞌiwuat kai."

¹¹ Pyno karãpe topy­huꞌat aito Iesui mohey haria wato­py­huꞌat wẽtup ywania ewy iwywo. Saꞌa­wyꞌi aipiit miky­ꞌesat saꞌag ewy yn watunug kuap maꞌato mesup Iesui titek taꞌyn hawyi toipugha aimi­ky­ꞌesat saꞌag koꞌi aheko saꞌag koꞌi aipotpap saꞌag hap koꞌi. Toitek pun naꞌyn aiwa­nẽtup hawiat aikotã saꞌa­wyꞌi Iuteu ywania tunug taꞌa­tu­mẽpyt tuwe­mo­herep ihainia hawyi taꞌa­tue­murui sokpe tek pun iꞌatueko ewy. Miꞌi hap ewy Tupana titek aimi­ky­ꞌesat saꞌag hawyi toipun naꞌyn pya aikai e. Miꞌi hap ewy Iesui titek kuap aimi­ky­ꞌesat saꞌag koꞌi are."

¹² Iuteu ywania emurui ãpy tek — Uito Iuteu ywania e hamo maꞌato aito Iesui mohey haria ahetꞌok yꞌy wuat hamo wati­mo­herep Iesui mohey hap. Minwa­toꞌe yꞌy pe turan Iesui syp hap wati­mo­herep ahetꞌok hawe. Aiminug saꞌag koꞌi kaipywiat aihep Tupana piat hap watu­wẽtem yꞌy pywiat hawyi. Wati­mo­herep Tupana tihep taꞌyn Iesui guꞌuro pyi hap tesaika hap no wati­mo­herep ahetꞌok hawe. Aiminug saꞌag nug hap pywiat aihep Tupana piat hap wati­mo­herep ahetꞌok hawe."

¹³ Aikotã ikuꞌuro rakat yt ikuap hin i ahehay. Yt toikuap i watoĩ­neꞌen itotiat hap ewy wato­py­huꞌat saꞌa­wyꞌi Tupana kapiat ikuꞌuro rakat ewy yt watikuap i ihay yt wata­ꞌa­kasa kuap i howawi katu­pono aiminug saꞌag aipyhyp kahato howawi ikuap hamuat. Iꞌewyte aimi­ky­ꞌesat saꞌag kape yn aiwa­nẽtup hap. Kat pote saꞌa­wyꞌi yt kat i i Tupana ehay aikai maꞌato koran yt miꞌi tã hin i katu­pono Tupana tomo­weityk yne yne raꞌyn aiminug saꞌag koꞌi. Aimoieĩ­neꞌen i guꞌuro pyi hap ewy tutum ahepe. Karãpe wato­mohey Iesui mekewat eꞌat pe watu­wẽtem guꞌuro pyi hap ewy Iesui tuwẽtem hap ewy. Koitywy watoĩ­neꞌen Tupana ewawi yt saꞌag ewawi i raꞌyn. Yt ikuꞌuro rakaria ewy i raꞌyn mesup watoĩ­neꞌen maꞌato Tupana ewawi aheha ahewaure mesup.

"

¹⁴ Saꞌa­wyꞌi wato­py­huꞌat wete­weru wato kahato haria ewy. Aikotã aiwe­te­weru hap wato turan aimo­ꞌarot kahato hap ewy. Miwan me iwato kahato topy­huꞌat hap ewy aiwe­te­weru hap. Yt ikahu hin i ewy aiꞌakit hap topy­huꞌat. Miꞌi hap ewy aiwe­te­weru hap saꞌa­wyꞌi aikotã yt karãpe i wahaꞌup nug kuap hap ewy. Miꞌi hawyi maꞌato — Atum yne miitꞌin wete­weru hap saꞌup mo e Iesui Tupana pe. Miꞌi hawyi taꞌa­tu­moheg Iesui ariaꞌyp posak ete. Toieĩneꞌen hap tutum aiwe­te­weru hap saꞌup mo. Koitywy Tupana toꞌe ahepe — Yt kat i iraꞌyn ti mekewat miwan miat ewete­weru hap tuweityk taꞌyn e. Uhaꞌyru tum yne raꞌyn eiwe­te­weru hap saꞌup Uhaꞌyru suu taꞌat yne hawyi ikuꞌuro ariaꞌyp posak ete e Tupana ahepe mesup taꞌyn."

¹⁵ Saꞌa­wyꞌi raꞌyn Iesui ikuꞌuro turan toiꞌakit yne raꞌyn ahiag. Tesaika wo toiꞌa­tu­ꞌa­peman kytyt mãꞌãu saꞌag koꞌi. Aipo­typot ikuꞌuro ariaꞌyp posak ete hawyi aihep ahiagnia po pyi kahato. Iesui tiꞌakit yne raꞌyn ahiag. Koitywy wuatꞌi miky­ryꞌi wo raꞌyn tukup­teꞌen ahiagnia — Yt ewesaika i raꞌyn e Tupana wuatꞌi ehamo ahiag koꞌi pe.

"

¹⁶ Miꞌi pote yt naku i watuwat wẽtup sehay upi katu­pono — Ewehenuk i urueko yt ewy i hawyi Tupana yt eheha­kye­raꞌat hin i iꞌatuꞌe. Yt eiwe­ꞌyꞌu hãpyk i uruꞌewy pote yt naku i te eweikup­teꞌen Tupana wanẽtup hawe iꞌatuꞌe saꞌag. Yt eweimohey teiꞌo iꞌatuehay — Yt eweiwat i uruenuk wato hap Tupana mõtypot hap kape pote hoꞌo­wasat rakaria eweipy­huꞌat iꞌatuꞌe. Tupana eꞌat mesup iꞌatuꞌe. Tupana ewaty mesup iꞌatuꞌe. Tupana eꞌanu mesup iꞌatuꞌe. Maꞌato yt eweimõ­typot i Tupana mesuwat eꞌat pe pote yt Tupana mieha­kye­raꞌat koꞌi i wo eweipy­huꞌat iꞌatuꞌe. Maꞌato yt eweiwat reiꞌo mekewat wẽtup sehay upi katu­pono Iesui yn aheha­kye­raꞌat kuap pãi are."

¹⁷ Saꞌa­wy­ꞌi­wuaria Iuteu ywania inug kahato taꞌa­tueko koꞌi aheha­kye­raꞌat hap Iesui ut hap moherep hamo Aipo­rekuat nuat ut hap moherep hamo. Karãpe wata­ꞌa­kasa miit putꞌokꞌe turan wata­ꞌa­kasa ipãꞌãu kape. Miꞌi hap ewy iꞌatueko koꞌi Iesui ut hap moherep hamuat. Iuteu eko timo­herep kahato Iesui ut saꞌa­wy­ꞌipyi te aikotã aipãꞌãu yi totiat timo­herep ahut hap ewy are.

"

¹⁸ Yt eweiwat reiꞌo iꞌatuehay upi karãpeĩ teꞌe­roꞌe ehepe — Yt eweikup­teꞌen i Tupana mieha­kye­raꞌat koꞌi katu­pono yt uruꞌewy i ehewaku hap. Poꞌog uruto eikai katu­pono atipy piaria ihay uruwywo urumu­ꞌetu iꞌatuꞌe. Uruta­ꞌa­kasa Tupana urumu­ꞌetu iꞌatuꞌe. Atipy piaria kuap haria uruto uruehay iꞌatu­wywo iꞌatuꞌe. Miꞌi pote poꞌog uruto eikai iꞌatuꞌe. Tupana mieha­kye­raꞌat koꞌi sese uruto. Eipe yt hin i katu­pono uruto paaꞌe haria sese iꞌatuꞌe. Maꞌato yt pywo pe i mio tã iꞌatuꞌe. Teꞌe­ru­we­mõ­typot hap yn iꞌatu­wa­nẽtup hawe. Iꞌatu­wa­nẽtup hap miit wanẽtup hap ewywuat yn. Maꞌato yt kat i Iesui mõtypot hap iꞌatu­pyꞌa piat pytkai."

¹⁹ Maꞌato aito yt iꞌatu­ꞌewy i. Iesui sat haria kahato aito. Miꞌi Miit yn Aiꞌakag. Aipiit tuwehik kahato Aiꞌakag Iesui wanẽtup hap upi. Ahãtikag iꞌewyte apyꞌyha aipuꞌi hawyi aipe hawyi ahaga koꞌi toꞌosat kahato Aiꞌakag Iesui wywo hawyi aipuꞌi apyꞌyha wẽtup piit yn wato­py­huꞌat. Miꞌi hap ewy watoĩ­neꞌen Iesui wywo wẽtup piit ewy. Iesui ti Aiꞌakag. Aito ipiit ewy. Aiꞌakag kaipyi aipiit ihãite tuwe­motag. Maꞌato miꞌiria — Uruto poꞌog eikai e haria — Uruto ti eiꞌakag e haria miꞌiria. Yt taꞌa­tu­ky­ꞌesat i Iesui taꞌa­tu­ꞌakag wo are. Maꞌato aito Iesui mohey haria watu­kup­teꞌen. Taꞌi Iesui piit iaga ewywuaria aito. Miꞌi pote aipiit tuwehik kahato Aiꞌakag Iesui ete. — Urutu­we­ha­kye­raꞌat uruto waku nug haria pote iꞌatuꞌe saꞌag maꞌato — Aito Iesui mieha­kye­raꞌat haria watoꞌe. Tupana esaika hamo yn aimo­hãpyk kuap watoꞌe."

²⁰ Kat pote pyno mesup te eweiwa­nẽtup te miꞌiria ewywuaria are. Mesu­wa­ro­tiaria — Urutu­we­ha­kye­raꞌat kuap rat aru e haria. Yt naku i mekewat miꞌu watuꞌu e haria. Yt naku i watemig mekewat iꞌatuꞌe. Yt naku i watopag aiwẽ pe mekewat ipuꞌi e haria. Miꞌi tã watunug mote yt wataꞌam i iꞌatuꞌe saꞌag ahiag ehay upi."

²¹ Teꞌe­ru­we­ha­kye­raꞌat teran miꞌu kaipyi. — Ewetunug yne wãiꞌu­ruꞌe hap miꞌi pote Tupana eheha­kye­raꞌat iꞌatuꞌe. Maꞌato wãiꞌi­ꞌa­tuꞌe hap yt Tupana wãiꞌe hap ewy hin i are katu­pono teꞌe­ru­we­kaipyi teꞌe­ru­we­ha­kye­raꞌat teran haype. Yt naku i kahato are."

²² Maꞌato wato­mohey raꞌyn Aipo­typot Iesui yn Aheha­kye­raꞌat kuap hat watoꞌe katu­pono ikuꞌuro aika­wiano hawyi aihep mekewat ahiagnia ehay po pyi watoꞌe. Yt wato­mohey poꞌog i raꞌyn watu­we­ha­kye­raꞌat kuap hap watoꞌe. Koitywy watikuap taꞌyn yt miꞌu kaipyi i aheha­kye­raꞌat hap watoꞌe. Watikuap taꞌyn aheko miꞌu yt aimo­hãpyk kuap i Tupana wanẽtup hawe watoꞌe."

²³ Mãꞌãu saꞌag upiaria teꞌe­ru­we­piit­mo­sa­tyꞌi kahato hawyi — Uruimõ­typot Tupana poꞌog eikai iꞌatuꞌe saꞌag ahepe. Urutu­we­mohit kahato poꞌog eikai urutu­we­mo­syꞌat at kaꞌap pote poꞌog waku uruto eikai iꞌatuꞌe ahepe. Wate­haꞌat miꞌiria kape hawyi aikotã weꞌeg kahato haria ewy tukup­teꞌen maꞌato iꞌatu­wa­nẽtup hawe saꞌag yn iꞌatu­wa­nẽtup hap taꞌa­tupiit miky­ꞌesat saꞌag nakat ewy yn iꞌatu­wa­nẽtup hawe. Teꞌe­ru­we­piit­mo­sa­tyꞌi kahato teꞌe­ru­we­mõ­typot hamo. Maꞌato iꞌatu­wa­nẽtup hawe taꞌa­tunug taꞌa­tupiit miky­ꞌesat saꞌag nakat yn. Iꞌatu­pot­ꞌewãi hap koꞌi yt iꞌatu­mõ­hapyk kuap i Tupana wanẽtup hawe. Teꞌe­ru­we­pit­mo­ha­tyꞌi teꞌe­ru­we­ha­kye­raꞌat hamo wen maꞌato yt pytkai i katu­pono Iesui yn aheha­kye­raꞌat kuap toku­ꞌuro hamo pãi an watoꞌe.

"

3

¹ Aipo­typot Iesui toku­ꞌuro hawyi tuwẽtem guꞌuro pyi. Koitywy wato­mohey Iesui toĩneꞌen atipy pe Toꞌywot Tupana po sese kai hap wato­mohey. Miꞌi pote wẽtup miit piit ewy yn wato­py­huꞌat. Karãpe Iesui tuwẽtem guꞌuro pyi hawyi aito imohey haria iꞌewyte watu­wẽtem guꞌuro pyi hap ewy. Karãpe taꞌam atipy kape hawyi aito iꞌewyte wataꞌam atipy kape hap ewy. Miꞌi tote Aipo­typot Iesui taꞌapyk Tupana po sese kai. Toꞌywot mõtypot hawe toĩneꞌen itote. Waku miꞌi kape aiwa­nẽtup hap."

² Waku watu­wa­nẽtup atipy kape aikope Aipo­typot Iesui toĩneꞌen hap kape. Waku aiwa­nẽtup hap Aika­ꞌiwat atipy piat wanẽtup hap ewy are. Yt naku i watu­wa­nẽtup mesu­wa­ro­tiaria yt imohey i haria ewy katu­pono mesu­wa­rotiat kape yn teꞌe­ru­wa­nẽtup."

³ Wati­mohey Iesui hawyi wẽtup piit ewy watoĩ­neꞌen. Ikuꞌuro hawyi aikotã watoĩ­neꞌen ipiit pe hap ewy ikuꞌuro hawyi aiku­ꞌuro hap topy­huꞌat hap ewy. Tuwẽtem miꞌi pote watu­wẽtem aito guꞌuro pyi hap ewy. Koitywy Aika­ꞌiwat Iesui toĩneꞌen atipy pe Toꞌywot wywo i raꞌyn. Miꞌi hawyi aito ipiit pe watoĩ­neꞌen. Miꞌi pote waku yt kat i mesu­wa­rotiat saꞌag koꞌi kape watu­wa­nẽtup."

⁴ Karãpe taꞌaipok i raꞌyn mesuwat yi kape hawyi aito wata­ꞌaipok iwywo te ipiit piat ieĩneꞌen haria aito hap ewy. Wẽtup miit ewy yn naꞌyn watoĩ­neꞌen mekewat eꞌat pe. Iwywuat iwemo­herep mesuwe pote watu­we­mo­herep e. Mekewat eꞌat pe Iesui mõtypot hap eꞌat kahato iꞌewyte aimõ­typot hap eꞌat katu­pono imohey haria aito ipuꞌi kawiat ewywuat aito pote. Miꞌi hap eꞌat pe — Pywo iꞌatuꞌe iraniaꞌin yt imohey i haria.

"

⁵ Waku wati­ꞌakit yne aiwa­nẽtup saꞌag hap aiwa­nẽtup hawiat. Waku wati­waure yne saꞌa­wy­ꞌiwuat aiwary wary hap aheꞌaito aito hap. Miꞌi hap waku watoiat yne e. Waku watipun yne yt ahegyiꞌat i hap katu­pono yt ahegyiꞌat i hap saꞌag kahato topy­huꞌat Tupana wanẽtup hawe. Aikotã ariaꞌyp nu kawiat Tupana iãꞌãkap mõtypot hap yt naku i hap ewy te yt ahegyiꞌat i hap topy­huꞌat yt naku i Tupana wanẽtup hawe. Waku watimak aipiit miky­ꞌesat saꞌag koꞌi aiwe­mõti hap koꞌi. Waku wahasep wẽtup ok aheha­ryꞌi wuat kyꞌesat i hap wẽtup ok aheꞌaito wuat kyꞌesat i hap. Waku wãiwa­toꞌe aiwa­nẽtup hawe aipot­mõti te mõti te hap koꞌi are. Waku wati­ꞌauka aiꞌe hap aiwa­nẽtup hawe — Uiwano yn atiky­ꞌesat ekat koꞌi e hap. Waku yt kat i ihainia wary wo hap aiwa­nẽtup hawe."

⁶ Katu­pono miꞌi hap koꞌi watunug mote yt Tupana miky­ꞌesat ewy hin i watunug. Miꞌi tã yt imohey i haria raꞌyn inug at kaꞌap. Yt naku i watuwat miꞌiria ehay upi. Miꞌi upi watuwat pote Tupana miꞌa­piheg koꞌi wo wato­py­huꞌat aru katu­pono Tupana taꞌa­tunug taꞌa­tue­wa­nĩkap wo miꞌi tã nug haria."

⁷ Miꞌi minug saꞌag koꞌi ete haiwot kahato Tupana toĩneꞌen miꞌi tã watunug pote. Saꞌa­wyꞌi yt imohey i te turan miꞌi tã yn aheko saꞌag yn watunug kuap. Pyno yt atunug i uiminug saꞌag koꞌi watoꞌe saꞌa­wyꞌi maꞌato yt watoiat kuap i katu­pono saꞌag nug hap eropat haria wo watu­kup­teꞌen saꞌa­wyꞌi."

⁸ Maꞌato koran waku wati­ꞌapun pya aikai yt aiwese i hap. Waku wati­mo­pe­rupꞌi ahaiwot neꞌi hap. Waku wati­waure aipy­ꞌahak potꞌi miitꞌin etiat hap. Waku yt uwe i wati­mohit ahehay wo. Yt naku i wati­poepyk poepyk neꞌi iraniaꞌin e. Yt naku i wahuꞌat aiwo­ꞌo­mõti te hap sehay saꞌag nug hap etiat. Waku wati­waure yne yt naku i nug hap koꞌi."

⁹ Waku wati­waure aheso miitꞌin kapiat hap. Yt naku i ahehay aheso heso hamo katu­pono watunug saꞌa­wyꞌi yt watikuap i te Iesui turan aheko saꞌag upi yn watunug neran. Aikotã watihep ahesokpe potꞌi koꞌi hawyi watopag ahesokpe ipakup i koꞌi raꞌyn hap ewy waku wati­pugha saꞌa­wy­ꞌiwuat aheso hap. Miꞌi hawyi waku watopag aiwa­nẽtup hap pywuat hap ewy. Waku watu­we­painug ahesokpe pakup hap ewy ahehay pywuat aiꞌe hap ewy."

¹⁰ Wati­mohey hawyi Tupana aimo­pakup i miit pakup mo wato­py­huꞌat toiãꞌãkap sese ewy ainug. Miꞌi pote waku mekewat yt naku i nug hap aipiit piat aiwa­nẽtup hawiat ikuꞌuro rakat ewy topy­huꞌat. Yne eꞌat pe Tupana ainug kahu aiwa­nẽtup hawe poꞌog poꞌog saꞌa­wy­ꞌiwuat kai. Yne eꞌat pe Tupana kuap haria wo wato­py­huꞌat poꞌog poꞌog. Koitywy Tupana tiky­ꞌesat tokuap hap kaipyi towy ok sese wo aito hap. Miꞌi hawyi toiky­ꞌesat aiwa­nẽtup hap towa­nẽtup hap ewy."

¹¹ Karãpe wato­py­huꞌat Iesui mohey haria Tupana ainug wẽtup ywania pakup wo ewywuat. Iuteu ywania aito pote sio yt Iuteu ywania i aito pote sio ahemurui sokpe yt kat i sio toĩneꞌen Tupana wanẽtup hawe wẽtup ywania pakup yn ewy wato­py­huꞌat. Sio aito tapy­ꞌyiaria sio yt sio gaꞌapy piaria sio yt miit akag sio miit emiit wẽtup ywania yn Tupana wanẽtup hawe aito. — Eipe Uimi­po­ꞌoro Eipo­rekuat nuat mohey haria eipe e ahepe miꞌi pote wẽtup tapyꞌyia yn uiwa­nẽtup hawe eweikup­teꞌen e Tupana ahepe. Eipe Uimi­po­ꞌoro eiam eipe e. Uimi­po­ꞌoro Eipo­rekuat nuat kyꞌe haria eipe e Tupana. Sio Tapaiũꞌa sio yt sio ipe kytsig sio yt wẽtup ywania yn eipe uiwa­nẽtup hawe Uhaꞌyru emiitꞌin eipe pote e Tupana ahepe.

"

¹² Waku watu­we­painug hap ewy waku ahesokpe pakup watopag maꞌato wẽtup ahesokpe pakup woꞌo­kyꞌe hap kawiat. Wẽtup aipainug hap woꞌo­wese hap. Wẽtup aipainug hap — En poꞌog waku uikai e hap aiwa­nẽtup hawe. Wẽtup aipainug hap paaꞌe hap. Wẽtup hap aipainug hap aipe­rupꞌi hap. Wẽtup Iesui mohey motꞌi hap. Miꞌi koꞌi wo waku watu­we­painug are."

¹³ Iꞌatu kahato Tupana wanuat aimo­kahu hap. Wẽtup woꞌo­po­wyro hap. Wẽtup yt aipot­mõ­py­ꞌahak i hap. Wẽtup aiwo­ꞌoe­waure aiwo­ꞌo­minug saꞌag etiat hap. Wẽtup aipainug hap aiwu­ꞌuka hap monik hap. Wẽtup aiwo­ꞌoehay aiwo­ꞌopiat hap — Waure wo areĩneꞌen uhyt mimi mana emiꞌa­parap uhepiat hap kai aiꞌe hap. Miꞌi koꞌi yne waku ahesokpe pakup ewywuat aiwe­painug hap ikahu rakat ewywuat. Miꞌi wo waku watu­we­painug aikotã Iesui tiwaure ahepiat iꞌaparap tetiat hap ewy te waku wati­waure iraniaꞌin piat hap aiꞌa­parap hap."

¹⁴ Wẽtup aipainug hap toĩneꞌen ikahu poꞌog torania kai miꞌi ti aiwo­ꞌo­kyꞌe hap kawiat. Yt naku i wati­waure aiwo­ꞌo­kyꞌe hap katu­pono karãpe aiwo­ꞌo­kyꞌe hap toĩneꞌen hawyi aiwo­ꞌo­wese hap topy­huꞌat wẽtup miit ewywuat yn wato­py­huꞌat."

¹⁵ Aika­ꞌiwat Iesui ainug kahato aipyꞌa piat aiwo­ꞌo­wese haria wo. Miꞌi hawyi karãpe yt aiwo­ꞌo­wese i hap putꞌokꞌe ahete miꞌi hawyi haty kahato aipyꞌa pe. Miꞌi hawyi meremo watikat aiwo­ꞌo­wese hap i raꞌyn katu­pono Tupana tiky­ꞌesat kahato aiwo­ꞌo­kyꞌe hap. Toiky­ꞌesat kahato watoĩ­neꞌen wẽtup woꞌo­kyꞌe haria sok ewy yn mesuwiat aheĩneꞌen turan. Miꞌi hap kape ti aikaykay mesup. Toiky­ꞌesat kahato watoꞌe aiwo­ꞌope — Arehum ewowi uhyt mehĩ mana mimi e hap ewy toiky­ꞌesat. Uimo­wepit en waku watoꞌe. Toiky­ꞌesat — Arehum emiium ete mehĩ mana pĩꞌã kurum e hap ewy toiky­ꞌesat aiwo­ꞌope.

"

¹⁶ Sehay wakuat Aipo­typot etiat Iesui etiat Tupana tiky­ꞌesat kahato aiwa­nẽtup hawe aipyꞌa pe. Toiky­ꞌesat yne Iesui mienoi aikai howapy sakpo hap ti raꞌyn toiky­ꞌesat. Toiky­ꞌesat yne Tosa­ꞌyru ehay aipyꞌa pyi tuwẽtem nakat aikotã hekat rakat hegyiꞌat rakat tum hap ewy. Toiky­ꞌesat ahegyiꞌat kahato hap tehay wywuat torania pe. Toiky­ꞌesat wati­ꞌa­tu­muꞌe kahato iraniaꞌin tehay wepy puat hap. Toiky­ꞌesat wati­ꞌa­tu­muꞌe kahato tehay wo iraniaꞌin hap yne aiweꞌeg hap wywo waku aiwo­ꞌo­muꞌe hamo. Toiky­ꞌesat morekuat Tawi wepy hawuo watu­wepy hap. Toiky­ꞌesat tehay kaipywiat hap watu­wehum kahato tewawiat wepy hamuat wuatꞌi ehamo hap. Toiky­ꞌesat watu­wepy mekewat sehay ikahu rakano tuetiat hamo. Toiky­ꞌesat watu­wepy mekewat saꞌa­wy­ꞌiwuat wepy hap pyi. Toiky­ꞌesat towawiat wepy hap aipyꞌa pywiat hap Topãꞌãu wywo. Toiky­ꞌesat watu­wehum tewawiat wepy hap mywo — Waku kahato En aiꞌe hap toiky­ꞌesat. — Emiium waku kahato Tupana aiꞌe hap toiky­ꞌesat."

¹⁷ Toiky­ꞌesat yne aiminug koꞌi Tosa­ꞌyru Aipo­typot Iesui mõtypot hap. Toiky­ꞌesat yne ahehay Tosa­ꞌyru Iesui set mõtypot hap. Toiky­ꞌesat kahato ahehay towawiat hap aiwepit hap wywo. Toiky­ꞌesat ahehay towawi Tosa­ꞌyru set upi hap. Toiky­ꞌesat watoꞌe — Urupo­rekuat nuat urumo­wepit kahato. En waku kahato Esaꞌyru waku kahato emiium e hap ewywuat aiꞌe hap Tupana tiky­ꞌesat.

"

¹⁸ Manaꞌin erepy­huꞌat ro eꞌaito ehay upi Iesui mohey hat en mote. Etunug no eꞌaito miky­ꞌesat ewy Tupana miky­ꞌesat ewy are."

¹⁹ Mehĩꞌin waku wati­kyꞌe kahato aheha­ryꞌi aipyꞌa pyi. Yt naku i wati­mohit miꞌiria ahehay wo. Yt naku i watoĩ­neꞌen marakꞌa wo aheha­ryꞌi ete."

²⁰ Hira­karia kurumꞌin pĩꞌãꞌin eweimohey Iesui pote erepy­huꞌat ro eꞌywot ety ehay upi. Eꞌywot ety mõtypot hano ereĩneꞌen mote Tupana mowepit hano ereĩneꞌen are."

²¹ Papaiꞌin waku eweinãpin ehaꞌy­ruꞌin ehaki­ꞌytꞌin iꞌatu­kyꞌe hawuo wen maꞌato yt etimo­py­ꞌahak teiꞌo ehehay saꞌag wo. Etiꞌa­piheg apiheg yn mote yi kape yn tehaꞌat aru hawyi iꞌarot rakaria wo tukup­teꞌen at kaꞌap.

"

²² Miitꞌin eropat haria mesuwe woro­ho­ꞌo­nãpin neran ewetunug no mesu­wa­ro­tiaria eika­ꞌi­waria piat miky­ꞌesat ewy waku ewetunug. ehetu­ꞌi­saria eipo­ꞌoro hap ewy ewetunug no e. Yt eimi­ky­ꞌesat ewy pytkai i maꞌato eiꞌakag miky­ꞌesat ewy ewetunug are. Eika­ꞌiwat okpe wuat neꞌi pytkai o eweiwe­potpap ihamo hap ewy e. Yt naku i aheha mesu­wa­rotiat aika­ꞌiwat kape sio tehaꞌat sio yt aipotpap nug hap kape aiꞌe hawe. Poꞌog waku watu­we­potpap haty wo aipyꞌa pyi Tupana eropat haria aito pote."

²³ Waku watu­we­potpap kahato aika­ꞌiwat mesu­wa­rotiat miky­ꞌesat nug hap ete maꞌato aiwa­nẽtup hap Aika­ꞌiwat atipy piat potpap nug hap watunug mesuwat motpap nug hap kaipyi."

²⁴ Waku watoꞌe aipyꞌa pe — Aipotpap saꞌup sese topy­huꞌat atipy pe waku nug haria aito mesuwe pote waku watoꞌe. Itote atipy pe tutum aru ahaꞌup watu­we­potpap mesu­wa­rotiat pytkai katu­pono Aika­ꞌiwat Iesui eropat haria sese aito waku watoꞌe."

²⁵ Aiminug waku pote haꞌup toĩneꞌen Tupana miium muat. Maꞌato waku aiweꞌeg wo katu­pono aiminug saꞌag saꞌup iꞌewyte Tupana tum. Waku aiweꞌeg wo katu­pono Tupana tikyꞌe kahato torania aitoria toꞌoe­wy­ꞌewy. Yt naku i watunug mote aiꞌa­piheg sio aito miitꞌin akag sio aito miitꞌin mimõ­typot sio aito yt uwe mikuap i e. Miꞌi pote toꞌoe­wy­ꞌewy toiꞌa­tu­ꞌa­piheg yt naku i nug tipyt. Wẽtup eꞌat pe ti aru toimo­herep wuatꞌi pe aiminug saꞌag koꞌi yt heremo i rakat koꞌi — Waku kahato eipe torania iraniaꞌin toꞌe ahepiat pytkai toiꞌa­tu­ꞌa­piheg yt naku i nug haria.

"

4

¹ Gaꞌi­waria Iesui mohey haria waku watum aipotpap nug haria pe saꞌup waku hap ewy iꞌatu­potpap hap ok tã. Waku watum saꞌup aikotã miit hãpyk takat tum hap ewy aikotã miit hegyiꞌat rakat ewy. Miꞌi pote waku wati­mõꞌẽ hãpyk ahemiitꞌin me ahekat katu­pono atipy pe toĩneꞌen Aika­ꞌiwat koro gaꞌi­waria aito mesuwe pytkai.

"

² Karãpeĩ wahẽtup Tupana kape aimi­ky­ꞌesat waku wahẽtup — Tut wyti aru aiꞌe hap wywo. Yt tutum i te hawyi waku wahẽtup i. Miꞌi hawyi aiwesat sio waku e wahẽtup hap kape sio yt e waku — Arehum ewawi Tupana waku watoꞌe."

³ Karãpe ewehẽtup eimi­ky­ꞌesat koꞌi urupo­wyro hamuat waku ewehẽtup to — Tupana etum Pauruꞌin moesaika hamuat ehay etiat henoi hamo eweiꞌe. Etiꞌa­tu­po­wyro o miꞌiria iraniaꞌin yt ekuap i te haria atumuꞌe hamo katu­pono typyꞌi kahato te Emipo­ꞌoro Esaꞌyru Urupo­rekuat nuat yt kuap i te haria tukup­teꞌen ehay ti migꞌi wo te topy­huꞌat iꞌatuepe waku eweiꞌe Tupana pe — Uruiky­ꞌesat kahato Pauruꞌin powyro hap katu­pono more­kuaria tipyhyp teran ehay Urupo­rekuat koro etiat waku eweiꞌe Tupana pe are. Iesui ehay pyhyp hamo more­kuaria uipyhyp mesuwe woꞌo­pyhik hawe are."

⁴ Pyno ewehẽtup — Tupana etipo­wyro kahato o Pauru ehay enoi miitꞌin miat kuap hamo waku eweiꞌe o katu­pono yt naku i ihik wo neꞌi ehay moherep hap waku eweiꞌe Tupana pe at kaꞌap uipo­wyro hamuat."

⁵ Waku weꞌeg kahato haria wo wato­py­huꞌat karãpe yt Iesui mohey i raꞌyn haria pyꞌa­setpiat ahehay turan. Waku wahenoi iꞌatuepe Aipo­typot Iesui etiat. Waku watikat miitꞌin iꞌatu­muꞌe hamuat ihay se rakat yne eꞌat turan."

⁶ Waku watikat kahato aiwa­nẽtup hawe iꞌatu­wesat hamuat yne apo apoꞌi­ꞌa­tuꞌe hap ete. Waku wati­ꞌa­tu­wesat Tupana weꞌeg hap ewy pywuat woꞌo­wesat hap ewy ihay se rakat ewy waku watekyi Iesui kape yt imohey i te haria are.

"

⁷ Mesup atipo­ꞌoro ehowawi aikywyt aheywyt Tikiku. Waku kahato Tikiku uimi­kyꞌe kahato. Yt iperup hin i Tupana potpap nug hamo. Tikiku yt toiwaure hin i Tupana eropat hap. Aiꞌewy kahato ipotpap takat Tikiku Aika­ꞌiwat potpap ete."

⁸ Pyno atipo­ꞌoro Tikiku ehowawi tohenoi yne aru putꞌok­toꞌe hawyi uhetiat aikotã areĩneꞌen mesuwe hap etiat. Iꞌewyte aru tohenoi yne ehetiat aikotã eweikup­teꞌen Korosi pe hap tohenoi aru putꞌok­toꞌe mesuwe i hawyi. Woro­ho­ꞌo­mo­wepit teran haype atipo­ꞌoro Tikiku ehowawi. Tohenoi yne mesuwiat uheĩneꞌen hap hawyi eiwepit kahato rakaria wo eweikup­teꞌen aru are."

⁹ Ehetawa piat Unesimu aru atipo­ꞌoro wy ehowawi. Aikywyt aheywyt kahato Unesimu. Iesui mohey kahato hat Unesimu. Putꞌok­ꞌi­ꞌa­tuꞌe Unesimu Tikiku wywo hawyi taꞌa­tu­henoi kahato ehowawi kat som urutunug mesuwe hap koꞌi.

"

¹⁰ Aiwy Aritaku toĩneꞌen mesuwe woꞌo­pyhyp hawe uiwywo toĩneꞌen. Kuekatu toipo­ꞌoro ehowawi. Iꞌewyte Panãpe enyt mẽpyt Maku ipoꞌoro tehay wy tuwehum hap ehowawi. Pyno meiũran Maku putꞌokꞌe itote pote waku — Ereke ro uruwy eweiꞌe o Maku pe eiwepit hap wywo ikyꞌe hap wywo aikotã areꞌe saꞌa­wyꞌi hap ewy ewetunug Maku pe are."

¹¹ Mehĩ Iusue iꞌewyte ipoꞌoro kuekatu ehowawi mekewat wẽtup het Iutu e hap. Pywo ti rat uipo­wyro kahato mesuwe miꞌiria kuekatu e haria are. Taꞌa­tu­ky­ꞌesat kahato Tupana topy­huꞌat Morekuat no mesuwat yi tote hap miꞌi pote iꞌatu­potpap kahato inug hamo. Miꞌiria yne uiꞌewy Iuteu ywania kawiat Iesui mohey haria. Uimo­wepit haria kahato miꞌiria are.

"

¹² Aiwy Epawai toĩneꞌen mesuwe. Miꞌi iꞌewyte waku e hap toipo­ꞌoro ehowawi. Aipo­typot Iesui eropat kahato hat Epawai eipy­ꞌa­set­pywiat miꞌi. Miꞌi pote tohẽtup at kaꞌap topyꞌa pyi Tupana kape yne hesaika hap wywo — Etipo­wyro aiwy­riaꞌin tawa Korosi piaria emiky­ꞌesat ok tã nug hanuaria teꞌe­ro­py­huꞌat. Etiꞌa­tu­motag miꞌiria Esaꞌyru ok tã e. Etiꞌa­tu­moe­saika yt karãpe i eꞌatoiat hamuat e. Atiky­ꞌesat itotiaria pywo iꞌatuꞌe yne hap ehay etiat hap e Epawai at kaꞌap meiũpepyi Tupana kape epowyro hamuat."

¹³ Aiwy Epawai tiky­ꞌesat kahato yne eipe yne tawa Korosi piaria Iesui mohey haria wo hap toiꞌa­tu­ky­ꞌesat iꞌewyte tawa Irautiseia piaria iꞌewyte tawa Iero­puri piaria yt uheso hin i toiꞌa­tu­ky­ꞌesat yne eipe imohey haria wo hap are.

"

¹⁴ Iꞌewyte aimi­kyꞌe aipohag nug hat Iruka iꞌewyte aiwy Tema tiꞌa­tu­po­ꞌoro eikyꞌe hap — Uruipo­ꞌoro uruiꞌa­tu­kyꞌe eiperia e hap."

¹⁵ Yne Iesui mohey haria piat waku e hap uruipo­ꞌoro. Kuekatu uruipo­ꞌoro tawa Irautiseia piaria kape. Uruiky­ꞌesat kahato ehehãite hap eweiꞌe mehĩ Niwa pe iꞌewyte yne Iesui mohey haria toꞌyat puat waꞌa­tunug haria pe are. Miꞌiria kape kuekatu uruipo­ꞌoro.

"

¹⁶ Meikowat uimiwan o eweimo­wẽpap aiũpe eiwa­ꞌa­tung hap tote are. Miꞌi hawyi eweikuap yne raꞌyn hawyi waku eweipo­ꞌoro tawa Irautiseia kape miꞌiria piat ikuap hamo teꞌe­ru­wa­ꞌa­tunug hawyi. Iꞌewyte eiperia eweimo­wẽpap o uimiwan saꞌa­wy­ꞌiwuat uimi­po­ꞌoro tawa Irautiseia piaria pe."

¹⁷ Miꞌi hawyi atipo­ꞌoro i sehay uhyt Akipu kape. Pyno koitywy atoiat eipo pe raꞌyn Aika­ꞌiwat potpap koꞌi. Miꞌi hap ti koitywy tutum eipo pe raꞌyn. Pyno koitywy eweꞌeg wo o. Eweimoma o ipotpap hap imiky­ꞌesat ok tã are."

¹⁸ Pyno ti uipo wo ti yne mesuwat atunug uimiwan are. Pyno atunug mesuwe miwan me uhet sese uipo minug uikuap hamuat sio uito sio yt kuap hamo. Uhet ti Pauru.

Pyno yt eweiwaure teiꞌo uipyhik hap mesuwe morekuat woꞌo­pyhyp hawe. Saity iheg nakat uipo ete areĩneꞌen Tupana miky­ꞌesat ewywuat hap. Yt uiwaure teiꞌo.

— Pyno Tupana etiꞌa­tu­kyꞌe kahato Esaꞌyru mohey haria tawa Korosi piaria. Etiꞌa­tu­poi­tyro egyiꞌat kahato hap upi ahẽtup mesuwe uipyhyp wyi are. Toran naꞌyn uhehay are. Waku Tupana pe."